အခန်း ၁-၁ အနက်ရောင်ပင်လယ်မှလူငယ်

အခန်း ၁-၁ အနက်ရောင်ပင်လယ်မှ လူငယ်

ဖန်ဆင်းရှင်များ^၁သည် လူသားမျိုးနွယ်အား ဖန်ဆင်းခြင်းစက်ဝိုင်း၏ အလယ်ဗဟို၌ ဖြစ်တည်စေခဲ့သည်။ ယင်းစက်ဝိုင်း၏ အခြားသော အစိတ်အပိုင်းများမှာ ကျယ်ပြောကာ ဖရိုဖရဲဖြစ်နေသော ကမ္ဘာ၏ အမည်မသိနေရာများသို့ သက်ရောက်မည်ပင်။

 

အချိန်ရွေ့လျားလာသည်နှင့်အတူ ခေတ်မီလူ့အဖွဲ့အစည်းနှင့် ခေတ်အဆက်ဆက် ကုန်လွန်ဖြစ်တည်ပြီးနောက် ဖန်ဆင်းခြင်းစက်ဝိုင်းသည်လည်း တိတ်တဆိတ် ပျောက်ကွယ်သွားလေသည်။ ကြယ်စင်များအားကြည့်ကာ ဟောပြောခန့်မှန်းခဲ့သည့် အနတ္တများစွာသော ဗျာဒိတ်တော်များမှာ စီစဉ်ရေးဆွဲထားသလို ဖြစ်မလာချေ။ အစမှ အဆုံးတိုင်အောင် ဖန်တီးရေးဆွဲသတ်မှတ်ထားသော စီရင်ချက်များမှာ ဒဏ္ဍာရီလာ စိတ်ကူးပုံပြင်များထဲ၌သာ တည်ရှိတော့သည်။

 

ခေတ်ဆိုးတစ်ခုပင်။ နက်ဗျူလာဂြိုဟ်၏ အလယ်တွင်ရှိသော ကုန်းမြေသုံးခု၌သာ လူသားများ နေထိုင်ကြဆဲ ဖြစ်သည်။ ရုတ်တရက် ဖြစ်ပေါ်လာသော နျူကလိယစစ်ပွဲကြောင့် အဆုံးတွင် လူသားဦးရေ သန်း ၅၀၀ ပင် မကျန်တော့ဘဲ အဓိကမျိုးနွယ် သုံးခုသာ ကျန်ရစ်သည်။ လွန်ကဲစွာ ထုတ်ယူသုံးစွဲမှုကြောင့် အလယ်ကုန်းမြေ၌ သဘာဝသယံဇာတ အရင်းအမြစ်များ ခမ်းခြောက်နှင့်ပြီး ဖြစ်သည်။ ဂြိုဟ်၏ ဗဟိုချက်မှ စွမ်းအင်ပမာဏ အများအပြားအား ပိုက်ဖြင့်သွယ်တန်းကာ ထုတ်ယူသုံးစွဲကြပြီး အဆိုပါ စွမ်းအင်များအား ယူရေနီယံဓာတ်ပေါင်းဖိုမှ ရရှိသည်။ ဂြိုဟ်၏ မျက်နှာပြင်မှာ အပျက်အစီးပုံအဖြစ် ပြောင်းလဲနှင့်ပြီးဖြစ်ကာ သံမဏိမြို့တော်၏ နယ်မြေပိုင်ဆိုင်မှုမှာ အကျယ်ပြန့်ဆုံး ဖြစ်ပြီး တတိယမြောက်ကုန်းမြေပေါ်၌ တည်ရှိသည်။

 

အစိုးရအား ဗဟိုကွန်ပျူတာဖြင့် အစားထိုးပြီး တရားရုံးတော်တစ်ခု တည်ထောင်ကာ တိုင်းပြည်၏ ယန္တရားအသစ် ဖြစ်လာသည်။ သို့သော်လည်း တစ်နေ့တွင် ကွန်ပျူတာများ၏ နိုးထမှုနှင့်အတူ ကမ္ဘာကြီးတစ်ခုလုံးအား စက်ရုပ်များ သိမ်းယူလိုက်ကြသည်။ လူသားမျိုးနွယ်အတွက်မူ ထွက်ပြေးလွတ်မြောက်ခြင်း သို့မဟုတ် ဖိအားပေး မောင်းထုတ်ခံရခြင်း သို့မဟုတ် စက်ရုပ်များ၏ အုပ်ချုပ်ခံဘဝသို့ ကျရောက်သွားခြင်းပေလော။

 

သံမဏိမြို့တော်၏ အဓိကစွမ်းအားစု သို့မဟုတ် စက်ရုပ်များသည် ဂြိုဟ်တစ်ခုလုံးအား သိမ်းပိုက်ထားပြီး ၎င်းတို့၏ အဆက်မပြတ် ထုတ်လုပ်မှုများကြောင့် စက်ရုပ်မြို့တော် (သံမဏိမြို့တော်)၏ ကောင်းကင်တစ်ခွင် အဝါရောင်တိမ်စိုင်များ ခြုံလွှမ်းထားလေသည်။ ကုန်းမြေပေါ်တွင် မိုးမျှော်တိုက် အများအပြား ရှိသော်လည်း ယင်းတို့မှာ သံမဏိမြို့တော်၏ ရေခဲတမျှအေးစက်လှသော စက်ရုံများ ဖြစ်လေသည်။ တစ်ချိန်တည်းမှာပင် ကုန်းမြေ၏ အောက်ခြေ နက်ရှိုင်းသောနေရာ၌ လူသားမျိုးနွယ်စု နေထိုင်လေသည်။ ထိုလူသားများမှာ စက်ရုပ်များ၏ ကျေးကျွန်များ ဖြစ်ကြပြီး သူတို့၏ နေ့စဉ်လုပ်ငန်းဆောင်တာများမှာ ရိုးရှင်းကာ ပုံသေဆန်လှသည်။ အလုပ်နှင့် အိပ်ရာ၊ နိုးတာနှင့် အလုပ် လှည့်ပတ်နေခြင်းပင်။ လှောင်အိမ်ထဲ၌ ဖမ်းဆီးခံထားရသော တိရစ္ဆာန်များနှင့် မခြားပေ။

 

ကျွန်ုပ်တို့၏ ဇာတ်ဆောင်ဖြစ်သော အာခါသည် လက်ရှိအချိန်၌ စက်ရုပ်မြို့တော် (သံမဏိမြို့တော်) ၏ မြေအောက်ကမ္ဘာ၌ နေထိုင်သည်။ အာခါသည် ‘ပုရွက်ဆိတ်အသိုက်’ ဟု ခေါ်သော လူနေဧရိယာ၌ နေထိုင်သည့် လူသားတစ်ဦးဖြစ်သည်။

 

အာခါမှာ ယခုနှစ်၌ အသက် ၁၆ နှစ် ရှိပြီဖြစ်ကာ ပြုပြင်ထိန်းသိမ်းရေးပညာရှင်အဖြစ် တာဝန်ယူထားသည်။ နေ့စဉ်နေ့တိုင်း မတူညီသော သက်ဝင်စက်ရုပ်များ၏ အပြစ်အနာအဆာများအား ရှာဖွေဖယ်ထုတ်ကာ အစားထိုးသင့်တန် အစားထိုးရပြီး တစ်ချိန်တည်းမှာပင် ဗဟိုစက်မှုခရိုင်မှ ထုတ်လုပ်လိုက်သည့် အသစ်အသစ်သော နည်းပညာများနှင့် အပိုအစိတ်အပိုင်းများအား လေ့လာစမ်းစစ်ရသည်။ ထူးခြားဆန်းပြားသော စက်ရုပ်များသည် အာခါထံသို့ ရောက်လာကာ အနည်းငယ်မျှပင် ကျိုးကြောင်းသင့်ခြင်းမရှိသော တောင်းဆိုမှုများ ပြုတတ်ကြသည်။

 

“ငါ့ရဲ့ အနီအောင်ရောင်ခြည်ကာမှန်ကို လဲပေး.. မော်ဒယ်က RM47 ကို လိုချင်တယ်..”

 

လူသဏ္ဌာန်ရှိသော စက်ရုပ်မှ ပြောလာခြင်းပင်။

 

“တောင်းပန်ပါတယ်.. ကျွန်တော်တို့ သိုလှောင်ရုံမှာ RM 47 မော်ဒယ် မရှိတော့ပါဘူး.. လိုချင်ရင် နောက်လအထိ စောင့်ရပါလိမ့်မယ်..”

 

အာခါ ပြန်ဖြေသည်။

 

“ငါ့ရဲ့ အနီအောင်ရောင်ခြည်ကာမှန်ကို လဲပေး.. မော်ဒယ်က RM47 ကို လိုချင်တယ်..”

 

စက်ရုပ်မှ ထပ်ပြောသည်။

 

“ကျွန်‌တော်တို့ဆီမှာ မရှိ‌တော့ပါဘူး.. သိုလှောင်ရုံထဲမှာ ပစ္စည်းပြတ်နေပါတယ်..”

 

“လူသားထိန်းချုပ်မှုစည်းမျဉ်း.. တတိယမြောက် ဥပဒေရဲ့...”

 

စက်ရုပ်သည် တည်ကြည်လေးနက်ပြီး ငြီးငွေ့ဖွယ်ကောင်းသော အသံဖြင့် ပြောလေသည်။

 

“ပြဌာန်းချက်အရ လူသားတွေက ဉာဏ်ရည်မြင့်သက်ရှိတွေရဲ့ တောင်းဆိုမှုကို ငြင်းဆိုခွင့်မရှိဘူး.. ငြင်းဆိုရင် သတ်ပစ်ပိုင်ခွင့်ရှိတယ်..”

 

အာခါ အဖြေအတွက် နောက်တစ်နည်း စတင်စဉ်းစားရတော့သည်။ ယခင်ပြုပြင်ထိန်းသိမ်းရေးပညာရှင်သည် ထိုအကြောင်းအရင်းကြောင့် လေဆာရောင်ခြည်ဖြင့် ခေါင်းဖြတ်သတ်ခံခဲ့ရသည်။ စတင်နှိုးဆွထားပြီးဖြစ်သော ကာစတန်မာ၏ လေဆာရောင်ခြည်ပစ်သည့် အပေါက်အား စိုက်ကြည့်နေမိသည်။ သူ၏ သေးငယ်လှသော အသက်လေးမှာ အများဆုံး ၁၀ စက္ကန့်မျှသာ ရှင်သန်ခွင့်ရှိတော့မည်။

 

“အချိန်စမှတ်ပြီ..”

 

စက်ရုပ်မှ သတိပေးလာသည်။

 

“၁၀.. ၉..”

 

“ကျေးဇူးပြုပြီး ခဏလောက် စောင့်ပါဦး..”

 

အာခါ အလျင်စလို ပြန်ဖြေသည်။ အံဆွဲထဲမှ ပြောင်လက်နေသည့် မှန်တစ်ခုအား ရွေးယူကာ စက်ရုပ်တွင် တပ်ဆင်ပေးလိုက်သည်။ အဆိုပါမှန်မှာ လွန်ခဲ့သည့်နေ့တွင် အခြားစက်ရုပ်တစ်ခုထံမှ ဖြုတ်ယူထားသော အစတစ်ခုပင်။

 

“လိုက်ဖက်မှု မရှိဘူး.. ငါ့ရဲ့ အနီအောက်ရောင်ခြည်ကာမှန်က ချွတ်ယွင်းသွားပြီ..”

 

“ဒါက ပြုပြင်ဖို့လိုအပ်တဲ့ နည်းပညာဆိုင်ရာ အမှားအယွင်းတစ်ခုပါ.. ကျေးဇူးပြုပြီး ပြန်လည်တန်းစီပေးပါ.. ကျွန်တော့်ရဲ့ ဝန်ဆောင်မှုကိုလည်း အဆင့်သတ်မှတ်ပေးပါ..”

 

အာခါ၏ ပရိုဖိုင်အား စက်ရုပ် ကောက်ယူလိုက်ချိန်တွင် အာခါသည် ယင်းအား စိတ်လှုပ်ရှားစွာ၊ တုန်လှုပ်ခြောက်ခြားစွာဖြင့် စိုက်ကြည့်နေမိသည်။ ထိုစက်ရုပ်သည် သေချာပေါက် တိုင်တန်းပေလိမ့်မည်။ သို့သော်လည်း အသက်ဆုံးရှုံးရခြင်းထက် များစွာပိုကောင်းပေသည်။

 

စက်ရုပ်ထွက်ခွာသွားသည့် အခါမှသာ အာခါ စိတ်သက်သာရာ ရစွာဖြင့် သက်ပြင်းချနိုင်တော့သည်။

 

“ငါ့ရဲ့ စွမ်းအင်အရင်းအမြစ်ကို အစားထိုးဖို့ ကူညီပေးပါ..”

 

အလုပ်ခုံ၏ရှေ့တွင် အခြားဉာဏ်ရည်မြင့်စက်ရုပ်တစ်ခု ထိုင်နေသည်။ အာခါ မိုးကောင်းကင်ကိုပင် ကျေးဇူးအခါခါ တင်မိလိုက်သည်။ ဤတစ်ခုမှာ မနုဿစက်ရုပ်^၂ပင်။

 

မနုဿစက်ရုပ်များမှာ စက်ရုပ်များနှင့် ကွဲပြားခြားနားသည်။ ယင်းတို့သည် သံမဏိမြို့တော်မှ အေးစက်စက်သက်ရှိများနှင့် မတူပေ။ စက်ရုပ်မြို့တော် (သံမဏိမြို့‌တော်) တွင် နေထိုင်သူများအား အဆင့် ၃ ဆင့် ခွဲခြားထားသည်။ ထိပ်ဆုံးအဆင့်မှာ စက်ရုပ်များဖြစ်သည်။ မနုဿစက်ရုပ်များမှာ အလယ်အလတ်တန်းစားများ ဖြစ်ကြပြီး အာခါတို့ကဲ့သို့သော လူသားမျိုးနွယ်မှာ အနိမ့်ဆုံးအဆင့်အဖြစ် သတ်မှတ်ထားသည်။

 

“ဘတ္ထရီ ဒါမှမဟုတ် အနုမြုစွမ်းအင် ဘယ်ဟာ လိုချင်တာလဲ..”

 

အာခါ မေးလိုက်သည်။

 

“ဘတ္ထရီ ပေးပါ..”

 

မနုဿစက်ရုပ်သည် ထွက်ခွာသွားသည့် စက်ရုပ်အားကြည့်နေရင်းဖြင့် ပြန်ဖြေသည်။

 

“မင်းရဲ့ခေါင်း‌တော့ လေဆာနဲ့ အပိုင်းပိုင်းဖြတ်ခံရပြီလို့ ထင်နေတာ.. အဲလိုသာဆို ငါတော့ ပြဿနာတက်ပြီ.. ငါ့ရဲ့ လမ်းမှတ်သားစနစ်က ချွတ်ယွင်းနေတယ်.. ဒီမှာသာ မပြင်နိုင်ဘူးဆိုရင် အိမ်ကိုတောင် ဘယ်လိုပြန်ရမလဲ မသိတော့ဘူး..”

 

မနုဿစက်ရုပ် နောက်သို့လှည့်လိုက်ပြီး အာခါသည် သူ၏နောက်ကျောရှိ သေတ္တာအား ဖွင့်ကာ ပြောလေသည်။

 

“ခင်ဗျားရဲ့ လမ်းညွှန်စနစ်က ရေစိုနေတယ်..”

 

အာခါ မီးဖွင့်ကာ မနုဿစက်ရုပ်အတွက် အပိုပစ္စည်းအချို့နှင့် အစားထိုးတပ်ဆင်ပေးလိုက်သည်။ မနုဿစက်ရုပ် စကားမပြောတောဲ့ တိတ်ဆိတ်စွာ ထိုင်နေသည်။ ထို့ကြောင့် အာခါသည် ယင်း၏ ဘေးတိုက်မျက်နှာပြင်အား လေ့လာကြည့်မိသည်။

 

မနုဿစက်ရုပ်အားလုံး၌ တူညီသောပုံစံ ရှိလေသည်။ ထိုကြောင့် လူသားများသည် ယင်းတို့အား အဝတ်အစား သို့မဟုတ် နံပါတ်တို့နှင့် ခွဲခြားရသည်။ ထို့အပြင် မနုဿစက်ရုပ်အားလုံးမှာ အမျိုးသားများ ဖြစ်ကြသည်။ ထိုအရာသည် အာခါအား အချိန်အတော်ကြာအောင် အတော်လေး စိတ်ရှုပ်ထွေးစေခဲ့သည်။

 

စက်ရုပ်များနှင့် နှိုင်းစာလျှင် အာခါသည် မနုဿစက်ရုပ်များအား ဝန်ဆောင်မှုပေးရန် ပိုမိုလိုလားသည်။ တစ်ခုတည်းသော အကြောင်းအရင်းမှာ မနုဿစက်ရုပ်များ၌ ပျော်ရွှင်ခြင်း၊ ဝမ်းနည်းခြင်းစသည့် ခံစားချက်များရှိပြီး ရံဖန်ရံခါ ဟော်မုန်းများ၏ သက်ရောက်မှုလည်း ခံကြရသည်။ မနုဿစက်ရုပ်များသည် လူသားများ လုပ်ငန်းခွင်အတွင်း မှားယွင်းမှုရှိပါက နေရာတွင်ပင် အသက်နုတ်ယူတတ်ကြသော စက်ရုပ်များနှင့် မတူကြပေ။

 

“မင်းက လူသစ်ပဲ..”

 

“ခင်ဗျား ဘယ်လိုသိလဲ..”

 

ကွန်ပျူတာထဲမှ မှတ်တမ်းများအား ကြည့်လိုက်ရာ ဤမနုဿစက်ရုပ်မှာ လွန်ခဲ့သော သုံးနှစ်အတွင်း အာခါ၏ အလုပ်ခုံသို့ တစ်ခါမျှပင် မလာခဲ့ဖူးချေ။

 

“ဘာလို့ဆို မင်းက အရမ်းပဲ သိချင်စိတ်များနေတယ်လေ.. ငါ့ကိုကြည့်နေတာ အကြာကြီးပဲ.. ပုရွက်ဆိတ်အသိုက်က လောလောလတ်လတ် ထွက်လာတဲ့ လူသားတွေက မင်းလိုပဲ..”

 

အာခါ စကားမဆက်ရဲတော့ချေ။ စီနီယာများ၏ အကြံပေးချက်များအရ မနုဿစက်ရုပ်များအားလည်း လှောင်ပြောင်ခြင်း မပြုသင့်ပေ။

 

မနုဿစက်ရုပ်များ၏ စိတ်ခံစားချက်ကြောင့် အကျိုးဆက်မှာ ပိုမိုပြင်းထန်နိုင်သည်။ ထို့ကြောင့် သူတို့၏ ဟော်မုန်း မညီမျှမှု ဖြစ်နေမည်ဆိုလျှင် လူသားများအား သတ်ဖြတ်နိုင်ချေရှိသည်။

 

“အလုပ်လုပ်နေတုန်း အာရုံမစိုက်နိုင်ဘဲ ဖြစ်တာက အမှားလုပ်ဖို့ ပိုလွယ်တယ်.. အဲဒါဆိုရင် ကာစတန်မာရဲ့ အဆင့်သတ်မှတ်ချက်အပေါ် သက်ရောက်စေနိုင်တယ်နော်..”

 

အာခါ အလျင်စလို ခေါင်းညိတ်လိုက်သည်။

 

“သတိပေးတဲ့အတွက် ကျေးဇူးတင်ပါတယ်ခင်ဗျာ..”

 

အာခါ၏ အဆင့်သတ်မှတ်ချက်တွင် အမှတ် ၅ မှတ် ရှိသည်။ အဆင့် D ရရှိသည့် အခါတိုင်းတွင် အမှတ် ၁ မှတ် နုတ်ခံရမည်ဖြစ်ကာ အဆင့် A ရရှိသည့်အခါတိုင်းတွင် တစ်မှတ် ထပ်ပေါင်းပေးခံရမည်။ ရမှတ်စုစုပေါင်း သုညသို့ ရောက်ရှိသွားပါက ထိန်းချုပ်မှုစနစ်မှ ‘အသုံးမဝင်’ ဟု သတ်မှတ်မည် ဖြစ်သည်။

 

အသုံးမဝင်ဟု သတ်မှတ်ခံရသော လူသားများအတွက် လူ့အဖွဲ့အစည်းအား မည်သည့်နေရာတွင်မျှ အကျိုးမပြုဟု ဆိုနိုင်သောကြောင့် ထုတ်လုပ်မှုပင်စည်များအဖြစ် ယူဆောင်သွားခံရကာ ပရိုတင်းများ ဖြစ်လာလိမ့်မည်။ တစ်နည်းဆိုရသော် ကွပ်မျက်ခံရခြင်းပင်။ ထိုလူများ၏ ခန္ဓာကိုယ်အစိတ်အပိုင်းများအား ဇီဝစွမ်းအားစနစ်သို့ ပို့ဆောင်ပြီး မနုဿစက်ရုပ်အသစ်များ ထုတ်လုပ်ရာ၌ အသုံးပြုမည် ဖြစ်သည်။ သို့မဟုတ် အာဟာရထုတ်လုပ်ရာ၌ ကုန်ကြမ်းများ ဖြစ်လာပေမည်။

 

အာခါသည် မနုဿစက်ရုပ်၏ လမ်းညွှန်စနစ်အတွင်းရှိ ဘတ္တရီအား အစားထိုးတပ်ဆင်ပေးလိုက်ပြီး ဟောင်းနွမ်းနေပြီဖြစ်သော လမ်းကြောင်းပြချပ်စ်ပြားအား လဲလှယ်ပေးလိုက်သောကြောင့် သူ၏ လမ်းညွှန်စနစ်မှာ ယခင်ထက်ပင် ပိုမိုချောမွေ့စွာ လုပ်ဆောင်နိုင်လာသည်။

 

“ပြီးသွားပါပြီ..”

 

“မင်းရဲ့ ကျွမ်းကျင်မှုက တကယ်ကောင်းတာပဲ..”

 

အန်းဒရွိုက် ပေါ့ပေါ့ပါးပါးပင် ပြောလေသည်။

 

“ကျေးဇူးတင်ပါတယ်..”

 

မနုဿစက်ရုပ် ထွက်ခွာသွားသည့်အခါတွင် အာခါအား ပြီးပြီးရော ‘D’ အဆင့် သတ်မှတ်ပေးသည်။

 

အာခါ၏ စိတ်ထဲ၌ ဒေါသအပြည့် ဖြစ်လာသော်လည်း အသံတစ်သံမျှပင် မပြုရဲချေ။ ကွန်ပျူတာမျက်နှာပြင်သို့ ကြည့်လိုက်သည့်အခါ အလုပ်ဆင်းရန် စက္ကန့် ၃၀ မျှသာ လိုတော့သည်။

 

တစ်စက္ကန့်ပြီး တစ်စက္ကန့် ကုန်လွန်ပြီးနောက် လျှပ်စစ်ဘဲလ်သံ မြည်လာသည်။ အာခါ သူ၏ ပစ္စည်းကိရိယာများအား နေရာတကျ ထားလိုက်ပြီးနောက် သူပိုင်ဆိုင်သည့် အရာများအား သိမ်းဆည်းလိုက်သည်။ ထို့နောက် လှည့်လိုက်သည့်အခါ သူ၏အနောက်ရှိ ဝင်ပေါက်တံခါး ပွင့်နေပြီး ဖြစ်သည်။

 

“ကျေးဇူးပြုပြီး ၁၀ စက္ကန့်အတွင်း ပြုပြင်ထိန်းသိမ်းရေးဌာနမှ ထွက်ခွာပေးပါ..”

 

အမျိုးသမီးစက်ရုပ်အသံ၏ သတိပေးချက် ထွက်ပေါ်လာသည်။

 

အာခါသည် အဝိုင်းသဏ္ဌာန်ရှိ လိုဏ်ခေါင်းအတွင်းသို့ ဝင်လိုက်ပြီး သူ၏ခြေလှမ်းများမှာ အလျင်လိုနေသော်လည်း ညီညာသည်။ ပြုပြင်ထိန်းသိမ်းရေးဌာန၏ အလုပ်ချိန်ပြောင်းလဲခြင်း ဖြစ်သည်။ အဘက်ဘက်မှ ရောက်လာကြသော လူသားများသည် ဌာန၏ အလယ်ဗဟိုတွင် စုဝေးလိုက်ကြပြီး သတ္တုထောက်လှမ်းစက်ဖြင့် စစ်ဆေးခံရသောကြောင့် နေရာတစ်ခုလုံး ‘ဘိပ် ဘိပ်’ ဟူသောအသံများ ပြည့်သွားလေသည်။ အဓိကဝင်ပေါက်အား ဖြတ်သန်းပြီးနောက် ပလက်ဖောင်းသည် ‘ဗုန်း’ ဟူသည့်အသံ ထွက်ပေါ်ကာ မြေအောက်သို့ နိမ့်ဆင်းဝင်ရောက်သွားသည်။

 

လူသားအလုပ်သမားများ၏ အဝတ်အစားများမှာ ဆင်တူသော်လည်း အာခါ ကဲ့သို့ အသက်အရွယ်အမျိုးမျိုး ရှိသောကြောင့် သက်ဆိုင်ရာလမ်းကြောင်းများမှ သွားကာ စက်လှေကားဖြင့် အတက်အဆင်း ပြုလုပ်ရပြီး သေးငယ်ကျဉ်းမြောင်းသော နေရာအတွင်း တစ်ဦးနှင့်တစ်ဦး တိုးဝှေ့နေကြရသည်။ သူတို့၏ အမူအရာများအရ အလျင်လိုနေပြီး မည်သူမျှ စကားမပြောကြပေ။

 

ပထမဆုံးအကြိမ် စက်လှေကားရပ်သွားချိန်၌ ကင်းလှည့်စက်ရုပ်စစ်သားနှစ်ရုပ် ဝင်လာသည်။ တိုးဝှေ့နေကြသော လူသားများ နောက်သို့ဆုတ်ကာ ထိုစက်ရုပ်များအတွက် နေရာဖယ်ပေးကြသည်။

 

ဒင်ခနဲမြည်ကာ အနီရောင်အလင်းနှင့်အတူ အမျိုးသမီးစက်ရုပ်အသံ ထွက်ပေါ်လာသည်။

 

“အခြားစက်လှေကားတွေ ဆန့်ကျင်ဘက်အရပ်ကိုသွားတာကို စောင့်ဆိုင်းပါမယ်..”

 

စက်လှေကားအတွင်း၌ အလွန်ပူကာ ပြည့်ကြပ်နေပြီး လူတိုင်း ချွေးဒီးဒီးကျနေသည့်တိုင်အောင် မလှုပ်ရဲသလို စကားပြောဆိုရဲခြင်းလည်း မရှိပေ။ အာခါ၏ ဘေးတွင်ရှိသော လူတစ်ဦးမှ မျက်ခုံးပင့်ကာ အချက်ပြလေသည်။

 

အာခါ ခေါင်းလှည့်လိုက်သည့်အခါ စက်ရုပ်နှစ်ရုပ်စလုံး မီးလင်းနေသည်ကို ရုတ်တရက် တွေ့လိုက်ရသည်။ ထောင့်ပေါင်းစုံမှ ကင်မရာများသည်လည်း အာခါရှိရာသို့ လှည့်လာကြသည်။ မော်နီတာများ ပွင့်လာပြီး ကင်မရာအလင်းတံခါးများ တဖြတ်ဖြတ် လက်လာပြီး သူ၏ရင်ဘတ်အရှေ့ရှိ အိတ်ကပ်အား မမှိတ်မသုံ ချိန်ထားကြသည်။ အာခါ၏ နှလုံးမှာ လည်ချောင်းထဲမှ ခုန်ထွက်မတတ်ပင်။

 

“မင်း ဘာတွေ လုပ်ထားတာလဲ..”

 

အာခါ၏ဘေးရှိ လူမှ အသံတိုးတိုးဖြင့် မေးလေသည်။

 

“သူတို့က မင်းကို မျက်စိတောက်ထောက် ကြည့်နေပုံရတယ်..”

 

အာခါ၏ ခန္ဓာကိုယ်တစ်ခုလုံး တမဟုတ်ချင်း တုန်ယင်လာပြီး အလုပ်လုပ်နေစဉ် လျှို့ဝှက်စွာ ဝှက်ထားမိသည့် ချစ်ပ်ပြားအား အမှတ်ရမိလိုက်သည်။

 

ကင်းလှည့်စက်ရုပ်စစ်သားများ၏အသံ ထွက်ပေါ်လာသည်။

 

“သတိပေးပါတယ်.. မင်းရဲ့ ခန္ဓာကိုယ်အပူချိန်က အရမ်းမြင့်နေတယ်..”

 

စက်လှေကားအတွင်းရှိ လူတိုင်း ခပ်တောင့်တောင့်ဖြစ်သွားကြသည်။ ကင်းလှည့်စက်ရုပ်စစ်သားများသည် အနီအောက်ရောင်ခြည် စစ်ဆေးစက်များဖြင့် ပုရွက်ဆိတ်အသိုက်မှ လူတိုင်းအား စတင်စစ်ဆေးလေသည်။ ရုတ်တရက်ဆိုသလို အာခါ၏ စိတ်ထဲ၌ ပုံရိပ်တစ်ခု မြင်ယောင်လာမိသည်။ စက်လှေကားအတွင်းမှ စက်ရုပ်စစ်သားများ၏ အနီအောက်ရောင်ခြည်စနစ်အောက်တွင် သူ၏ခန္ဓာကိုယ်မှာ သိသိသာသာ ထင်ရှားနေလိမ့်မည်။

 

“ပုံမှန်မဟုတ်တာ.. မရှိဘူး ဟုတ်တယ်မလား..”

 

အာခါ တုန်ယင်စွာဖြင့် ပြောလေသည်။

 

“ကျ.. ကျွန်တော် ဘာဥပဒေကိုမှ မချိုးဖောက်ထားပါဘူး..”

 

လူတိုင်း အာခါအား ကြည့်လိုက်ကြသည်။

 

ဒင်ခနဲ မြည်လာပြီးနောက် စက်လှေကား၏ မီးစိမ်းလင်းလာပြန်သဖြင့် တချုံးချုံး မြည်သံနှင့်အတူ အောက်သို့ ဆက်ဆင်းသွားလေသည်။

 

“စစ်ဆေးခြင်း ဆက်လက်လုပ်ဆောင်ပါမယ်..”

 

ကင်းလှည့်စက်ရုပ်စစ်သားများမှ အသိပေးလာသည်။

 

“အသိပေးချက်.. စစ်ဆေးမှုကို အမျိုးအစား ၄ မျိုးခွဲပြီး လုပ်ဆောင်ပါမယ်..”

 

အာခါ ‘ငါတော့ သေပြီ..’ ဟူ၍သာ တွေးမိတော့သည်။

 

ကင်းလှည့်စက်ရုပ်များ၏ ရှာဖွေမှုကြောင့် အာခါခိုးယူထားသည့် ချစ်ပ်ပြားအား တွေ့ရှိသွားမည်ဆိုပါက ချက်ချင်းဆိုသလို သေနတ်ဖြင့် ပစ်သတ်ကြပေလိမ့်မည်။ တစ်ကိုယ်လုံး ချွေးများရွှဲစိုလာပြီး စိတ်အာရုံလည်း ဗလာကျင်းသွားသည်။

 

သို့သော်လည်း အာခါ၏ အနောက်တွင် မတ်တတ်ရပ်နေသော သက်လတ်ပိုင်းအရွယ် စက်ပြင်ဆရာတစ်ဦးမှာ အထိန်းအချုပ်မဲ့စွာ တုန်ယင်နေသည်။ မျက်နှာတစ်ခုလုံး ဖြူဖျော့ကာ မိုး‌ပေါက်များ ရွာကျသည့်သဖွယ် ချွေးဒီးဒီးကျနေသည်။ တုန်ယင်နေသော ခန္ဓာကိုယ်ဖြင့် အာခါအား ပြင်းထန်စွာ ဝင်ဆောင့်မိသည်။

 

အာခါ ဆတ်ခနဲ လှည့်ကြည့်လိုက်သည့်အခါ သက်လတ်ပိုင်းအရွယ်လူသည် သူ၏ပခုံးအား တင်းတင်းကြပ်ကြပ် ဆုပ်ကိုင်ထားသည့်အတွက်ကြောင့် အချိန်တစ်ခု ကြာသည့်တိုင်အောင် မည်သို့ပြုရမည်ကို မသိနိုင်ဘဲ ရှိနေသည်။

 

“ကယ်ပါ.. ငါ့ကို ကယ်ပါ..”

 

သက်လတ်ပိုင်းစက်ပြင်ဆရာသည် ကောက်ရိုးတစ်မျှင်အား ဖမ်းဆွဲသကဲ့သို့ အာခါ၏ လက်အား တင်းကြပ်စွာ ဆုပ်ကိုင်ထားလေသည်။

 

စက်လှေကားအတွင်းရှိ လူအားလုံး တစ်ချိန်တည်းမှာပင် အကြောင်းအရင်းတစ်ခုကို သတိပြုမိလာကြသည် _ ဒီလူတော့ သတ်ခံရတော့မယ်..

*****

 

“သင့်ဦးတည်ရာဖြစ်သည့် ပုရွက်ဆိတ်အသိုက်သို့ ရောက်ရှိပါပြီ..”

 

စက်လှေကားအတွင်းမှ အမျိုးသမီးစက်ရုပ်အသံ ထွက်ပေါ်လာသည်။

 

စက်လှေကား၏ တံခါးကြီးများ ပွင့်သွားသည်နှင့်တစ်ပြိုင်နက် သက်လတ်ပိုင်းအရွယ်လူသည် အာခါအား တွန်းတိုက်ကာ ပြေးထွက်သွားလေသည်။

 

“သတိပေးချက်.. ချက်ချင်း ရပ်ပါ..”

 

တစ်ချိန်တည်းမှာပင် ကင်းလှည့်စက်ရုပ်စစ်သားများသည် ထွက်ပြေးသွားသည့်လူအား လိုက်ဖမ်းသောကြောင့် စက်လှေကားအတွင်းရှိ လူအုပ်ကြီး အပြင်သို့ လျှံထွက်လာသည်။ စင်္ကြံတစ်လျှောက် ပြေးလွှားနေသော သက်လတ်ပိုင်းအရွယ်လူကိုသာ မြင်နေရသည်။

 

တစ်ယောက်မှ အော်လိုက်သည်။

 

“ဖယ်ကြ..”

 

စင်္ကြံတွင်ရှိနေသည့်လူတိုင်း ထိတ်လန့်သွားကြပြီး မျက်နှာကျက်တွင် တပ်ဆင်ထားသော စောင့်ကြည့်ကင်မရာများမှ သေးငယ်ပါးလွှာသည့် သံချောင်းများ ပစ်လွှတ်လိုက်သည်။ လေထဲတွင် သံချောင်းများ ဝဲပျံလာသည်။

 

ဘုန်းခနဲ မြည်သံကျယ်ကြီးနှင့်အတူ သံချောင်းတစ်ခုသည် ပြေးနေသော သက်လတ်ပိုင်းအရွယ်လူ၏ ဦးခေါင်းခွံအား ထိုးစိုက်သွားပြီး နံရံတွင် ခိုင်ကျည်စွာ သံဖြင့်ချိတ်တွယ်ခံလိုက်ရသည်။

 

လူအုပ်တစ်ခုလုံး စိတ်မသက်မသာ ဖြစ်လာကြပြီး စကားသံများ ထွက်‌ပေါ်လာသည်။ အာခါ၏ ခန္ဓာကိုယ်တစ်ခုလုံး ချွေးအေးများ စိုရွှဲနေ၏။ ဘေးပတ်ဝန်းကျင်ရှိ စကားများမှတဆင့် ထိုစက်ပြင်ဆရာသည် ယနေ့၌ အဆင့် D သုံးကြိမ် သတ်မှတ်ခံခဲ့ရသောကြောင့် နောက်ဆုံးအကြိမ် စားသောက်ပြီးသည့်နောက်တွင် ကွပ်မျက်ရန် ခေါ်ဆောင်သွားခံရမည် ဖြစ်သည်။

 

အာခါသည် ကင်းလှည့်စက်ရုပ်စစ်သားများ ဖြစ်စဉ်အား ရှင်းလင်းနေသည်ကို အခွင့်ကောင်းယူကာ အသက်ရှူအောင့်ကာဖြင့် စင်္ကြံမှ ထွက်ခွာသည်။ ခပ်သုတ်သုတ်လမ်းလျှောက်ကာ အဆုံးတွင် သူ့ကိုယ်သူ မထိန်းချုပ်နိုင်တော့ဟန်ဖြင့် သန့်စင်ခန်းအတွင်းသို့ ပြေးဝင်သွားသည်။ စိတ်အခြေအနေကြောင့် အဆက်မပြတ် မြင့်တက်လာနေသော ခန္ဓာကိုယ်အပူချိန်အား လျှော့ချရန် ရေအေးများဖြင့် မျက်နှာသစ်လိုက်သည်။ တစ်ချိန်တည်းမှာပင် အဆမတန်ခုန်နေသော နှလုံးသားမှလည်း တဖြည်းဖြည်း ငြိမ်ကျလာသည်။

 

အာခါ၏ ခန္ဓာကိုယ်တစ်ခုလုံး စိုရွှဲကာ ရေတစက်စက် ကျနေပြီး ခန္ဓာကိုယ်တစ်ခုလုံးအား ကြောက်ရွံ့မှုတို့ လွှမ်းခြုံလာသည်။ ကွပ်မျက်ခံရသော စက်ပြင်ဆရာ၏ အဆုံးသတ်အား သူသိထားသည်။ အလောင်းအား ယူဆောင်သွားခံရကာ စက်ရုံအတွင်းရှိ အအေးခန်းထဲ၌ ထည့်ထားမည်။ ထို့နောက် တစ်စစီ ဆွဲဖြုတ်ကြမည်။ ထို့နောက် အသုတ်လိုက်ခွဲကာ အက်ဆစ်နှင့်စိမ်ပြီးနောက် မနုဿစက်ရုပ်အသစ်များ ပြုလုပ်ရာ၌ သဘာဝထုတ်ကုန်တစ်ခုအဖြစ်သို့ ပြောင်းလဲပစ်မည်။ သို့မဟုတ် တိရစ္ဆာန်စာ ကျွေးခံရမည်။

 

အာခါ၏ နှလုံးသားတစ်ခုလုံး နာကျင်မှုနှင့် ဒေါသတို့ဖြင့် လောင်မြိုက်နေသည်။ ရူးသွပ်သွားသည့်နှယ် အော်ဟစ်ပစ်လိုက်ချင်သော်ငြား မလုပ်နိုင်ချေ။ မကျေနပ်ချက်တို့ ပြည့်နေသဖြင့် ထွက်ပေါက်ရှာလိုသည့်တိုင် ဖွင့်ထုတ်ရန် နေရာမရှိချေ။ နေရာတိုင်းတွင် စောင့်ကြည့်ကင်မရာများ ရှိနေသောကြောင့် အော်သံပင် မထွက်ရဲချေ။ စောင့်ကြည့်ကင်မရာများအား ကျောပေးကာ ခိုးယူလာခဲ့သော လမ်းကြောင်းပြချပ်စ်ပြားအား အိတ်ကပ်အတွင်းမှ ထုတ်ယူကာ ကြည့်လိုက်သည်။ ဤချပ်စ်ပြားမှာ အာလူးပူပူနှင့် တူလှပြီး သူ့အား အလွန်အမင်း ထိတ်လန့်နေစေသည်။

 

ထို့ကြောင့် ဤအရာအား တတ်နိုင်သမျှ မြန်မြန် ဖြေရှင်းရပေမည်။ ထိုအကြောင်းအား ပိုမိုစဉ်းစားမိလာသည်နှင့်အမျှ ပိုမိုကာ ကြောက်ရွံ့လာမိသည်။ အာခါ သန့်စင်ခန်းအတွင်းမှ ထွက်ကာ သူ့ကိုယ်သူ ခြောက်သွေ့စေပြီးနောက် လူနေရပ်ကွက်များသို့ ပြန်လိုက်သည်။

 

ပုရွက်ဆိတ်အသိုက်အတွင်း၌ အလုပ်သွား၊ အလုပ်ပြန်လူများ ရှိနေသည်။ သူနေထိုင်ရာ ခရိုင်သို့ ပြန်ရောက်ပြီးမှာသာ အာခါ စိတ်သက်သာရာ ရစွာဖြင့် သက်ပြင်းချနိုင်တော့သည်။ ပထမဆုံး အလုပ်စဝင်သည့် နေ့မှာပင် အားအင်ကုန်ခမ်းသွားရသဖြင့် နောက်ထပ်နေ့ရက်များအတွက် ခွန်အားမရှိတော့ဟုပင် ခံစားနေမိသည်။

 

သူ၏ အလုပ်ချိန်ဇယားအား ကြည့်လိုက်သည့်အခါ အနားယူချိန် ၁၀ နာရီခန့် ရှိသည်ကို တွေ့လိုက်ရသည်။ နေထိုင်ရာခရိုင်သို့ ဝင်လိုက်သည်နှင့် ခေါင်းညိတ်ပြလာကြသော လူအချို့ရှိလေသည်။ အာခါ ကိုးရိုးကားယားနိုင်စွာဖြင့် ပြုံးပြလိုက်မိသည်။

 

“ကိုကိုအာခါ အလုပ်ဆင်းပြီး ပြန်လာပြီ..”

 

ကလေးတစ်ဦးမှ အော်ပြောသည်။

 

“အပေါ်မှာ ဘယ်လိုမျိုးလဲဟင်..”

 

“မင်းရဲ့ ပထမဆုံးနေ့က ဘယ်လိုလဲ..”

 

လူငယ်တစ်ဦး လျှောက်လာပြီး အာခါ၏ ပခုံးအား လက်ဖြင့်ပုတ်သည်။

 

အာခါ ခေါင်းညိတ်ပြလိုက်သည်။

 

“အ.. အဆင်ပြေပါတယ်..”

 

ဤနေရာတွင် နေထိုင်သူအများစုမှာ လူငယ်များဖြစ်ပြီး အာခါထက်ပင် ငယ်ရွယ်ကြသည်။ ပုရွက်ဆိတ်အသိုက်အား ခရိုင်ပေါင်း ၁၄၀၀၀ အဖြစ် ပိုင်းခြားထားပြီး ခရိုင်တစ်ခုစီမှ အလုပ်သမားများအား ‘လူသားကိုယ်စားလှယ်’ များဟု ခေါ်ဆိုကြသည်။ ထို ‘လူသားကိုယ်စားလှယ်’များ ၏ ကုန်းမြေပေါ်၌ ပြုမူပုံများသည် ၎င်းနေထိုင်ရာ ခရိုင်တစ်ခုလုံး၏ အသက်ရှင်သန်မှု အရည်အသွေးအား တိုက်ရိုက်သက်ရောက်မည် ဖြစ်သည်။ ကျန်ရှိသော လူသားများအတွက်မူ စက်ရုပ်များ၏ လေ့ကျင့်ပေးခံရခြင်း၊ မျိုးပွားခြင်း၊ ကျွမ်းကျင်မှုအသစ်များ လေ့လာခြင်း စသဖြင့် ပြုလုပ်ကြရသည်။

 

တူညီစွာပင် ကျွမ်းကျင်မှုစစ်ဆေးရာ၌ မည်သည့်ကျွမ်းကျင်မှုမျှ ပြသနိုင်ခြင်းမရှိသည့် လူများအား အသုံးမဝင်ဟု သတ်မှတ်မည်ဖြစ်ကာ ကွပ်မျက်ရန် စောင့်ဆိုင်းရုံသာ ကျန်ရှိလေသည်။

 

အာခါ၏ စိတ်ထဲတွင် ယနေ့ရရှိလာသော အဆင့် ‘D’ မှာ အလွန်လေးလံသော ဝန်ထုပ်ကြီးတစ်ခုဖြစ်ပြီး ကာစတန်မာ၏ အတွန့်တက်ခြင်းကိုလည်း ရရှိထားသည်။ စစ်ဆေးခြင်းဌာနသည် သူ၏လုပ်ဆောင်မှုအား စစ်ဆေးမည်ဖြစ်ကာ ကံကောင်းမည်ဆိုပါက အဆင့် ‘B’ အဖြစ် သတ်မှတ်ခံရမည်ဖြစ်သည်။ ယင်းမှာ အမှတ် နုတ် ခြင်း သို့မဟုတ် ထပ်ပေါင်းထည့်ခြင်းမျိုး မဟုတ်ပေ။ အဆင့် ‘D’  ဟု သာ ဆက်လက်သတ်မှတ်ခံရမည်ဆိုလျှင် သူ့အပေါ်၌ ရှိနေသည့် ဖိအားမှာ ပို၍ပင် ကြီးမားလာပေမည်။

 

အခန်းတစ်ခုထဲတွင် လူငယ်များ ကျယ်လောင်စွာ စာဖတ်နေကြပြီး အာခါမှာ နံဘေးတွင် ထိုင်နေကာ တိတ်တဆိတ် ညစာစားနေသည်။ အ‌တော်ငယ်သော ကလေးတစ်ဦးသည် သူ၏ဘေးရှိ စားပွဲပေါ်တွင် လှဲကာ အာခါအား ကြည့်နေသည်ကို မြင်လိုက်ရသည်။

 

“ကိုကို့ရဲ့ သစ်သီးလေးကို စားလို့ရမလား..”

 

ထိုကလေးမှ မေးသည်။

 

“ရတာပေါ့..”

 

အာခါ သူ၏သစ်သီးအား ကလေးထံသို့ ကမ်းပေးလိုက်ပြီးနောက် ထိုကလေးလေးမှာ သစ်သီးအားယူကာ ပြေးထွက်သွားလေသည်။ ထို့နောက် အာခါပေးသည့် သစ်သီးအား သူ၏ကစားဖော်များနှင့်အတူ ဝေမျှလိုက်သည်။

 

ခေတ္တမျှကြာပြီးနောက် သတိပေး စက်ရုပ်ကြေညာသံတစ်ခု ထွက်ပေါ်လာသည်။ အိပ်ချိန်ရောက်ပြီပင်။ အိပ်စက်ရန်လိုအပ်သော လူသားများမှာ သက်ဆိုင်ရာ အိပ်ဆောင်များသို့ ပြန်ကြရသည်။ အာခါသည် ဆေးကြောပြီးသော ပန်းကန်ပြားအား အမှိုက်ပုံးအတွင်းသို့ ပစ်ထည့်ကာ စိုးရိမ်စွာဖြင့် သူ၏အိပ်ဆောင်သို့ ပြန်လာသည်။

 

လူတိုင်း sleeping pod^၃  တစ်ခုစီ ပိုင်ဆိုင်ထားကြပြီး ထိုsleeping pod မှာ ပုရွက်ဆိတ်အသိုက်အတွင်းရှိ တစ်ခုတည်းသော ကိုယ်ပိုင်နေရာဖြစ်သည်။ အာခါသည် အိပ်ရာဝင်တေးဖွင့်ကာ သူ၏ ကိုယ်ပိုင် sleeping pod သို့ ဝင်လိုက်သည်။ sleeping pod မှာ ကျယ်ဝန်းပြီး အာခါ ၂ ကိုယ်စာမျှ ဆံ့လေသည်။ အထဲတွင် အစိမ်းရောင် အပင်အိုးလေးတစ်ခုလည်း ရှိနေသည်။

 

အပြင်ဘက်၌ မှောင်နေပြီး sleeping pod များ၌ အဖုံးအကာများရှိသည်။

 

အာခါသည် မီးအိမ်ဖွင့်ကာ ယနေ့ ခိုးယူလာခဲ့သော ဟောင်းနွမ်းနေပြီဖြစ်သည့် လမ်းကြောင်းပြချပ်စ်ပြားအား စေ့စေ့စပ်စပ်ကြည့်သည်။ ဤချပ်စ်ပြားမှာ အာခါအတွက် အလွန်အသုံးဝင်လှသည်။

 

အပြင်သို့ မသွားလိုဘဲ ခေတ္တမျှ အိပ်စက်လိုသည်။ တစ်နည်းဆိုရသော် ယနေ့အတွက် အပြင်မထွက်လိုတော့ပေ။ အိပ်စက်ခြင်းကသာလျှင် ယနေ့ရရှိခဲ့သော အဆင့် ‘D’ အတွက် စိုးရိမ်ပူပန်မှုအား ယာယီမေ့ဖျောက်ထားနိုင်မည် ဖြစ်သည်။ သို့ပေသည့်တိုင် အိပ်စက်ရန် ကြေညာချက် စတင်သည်နှင့် အာခါ ခေတ္တမျှ လှဲလျောင်းလိုက်သော်လည်း အလွန်အမင်း စိုးရိမ်ပူပန်မှုကိုသာ ခံစားနေမိသည်။ ခန္ဓာကိုယ်အား မှောက်ချည်လှန်ချည် ပြုလုပ်သည့်တိုင်အောင် အိပ်ဖို့ရာ လမ်းမမြင်ပေ။

 

အတင်းအကြပ် မျက်စိစုံမှိတ်သော်ငြား အိပ်မရနိုင်ချေ။ ယနေ့ခိုးယူလာခဲ့သော လမ်းကြောင်းပြချပ်စ်ပြားနှင့် စက်ပစ္စည်းများအကြောင်းကိုသာ အဆက်မပြတ် တွေးနေမိသည်။ နာရီဝက်မျှ ကြာပြီးနောက် အာခါ အိပ်ရာမှ ထပြီး sleeping pod ၏ အဖုံးအားဖွင့်ကာ ထွက်သွားလေသည်။

 

အိပ်ခန်းမအတွင်း၌ အပြာရောင်အလင်းထုတ်လွှင့်နေသော sleeping pod များ အတန်းလိုက် ရှိလေသည်။ အာခါသည် အလျင်စလို ခြေလှမ်းများဖြင့် အိပ်ခန်းမအတွင်းမှ ထွက်သွားသည်။ လက်ဗွေဖတ်စက်ပေါ်သို့ လက်တင်လိုက်ပြီးနောက် နေထိုင်ရာခရိုင်သို့ ပြန်လည်ရောက်ရှိလာသည်။ ယခင်က ဤနေရာတွင် လူပေါင်းများစွာ စုဝေးလျက်ရှိသည်။ အာခါသည် လုံခြုံဘေးကင်းသော လမ်းကြောင်းမှတဆင့် အတွင်းသို့ဝင်လိုက်ပြီး လှေကားထစ်များမှတဆင့် အလျင်စလို ခြေလှမ်းများဖြင့် မြေအောက်သို့ သွားကာ လှေကားထောင့်တွင် ပုန်းအောင်းလိုက်သည်။ ရုတ်တရက်ဆိုသလို အာခါ၏ နောက်ကျောဘက်မှ တံခါးဖွင့်သံကဲ့သို့ ခပ်တိုးတိုးအသံတစ်ခု ထွက်ပေါ်လာသည်။

 

အာခါ၏ ခန္ဓာကိုယ်တစ်ခုလုံး အေးစက်တောင့်တင်းသွားသည်။

 

ဘယ်သူလား..

 

သိလိုစိတ်အပြည့်ဖြင့် လှည့်ကြည့်ချင်မိသည့်တိုင် သူ၏ စူးစမ်းလိုမှုတို့အား အတင်းအကြပ် ဖိနှိပ်ထားရသည်။

 

လှည့်ကြည့်လို့ မဖြစ်ဘူး....

 

အာခါ မိမိကိုယ်မိမိ သတိပေးနေရသည်။ စက်ပစ္စည်းအသံများ မကြားရသည့်အတွက် ကင်းလှည့်စက်ရုပ် မဖြစ်နိုင်ချေ။ အလွန်စိုးထိတ်နေမိသည့်အတွက် စောင့်ကြည့်ကင်မရာများ တစ်ဖက်လှည့်နေချိန်အား အခွင့်ကောင်းယူကာ သုံးအထိ တိတ်တဆိတ် ‌ရေတွက်လိုက်သည်။ ထို့နောက် မြားတစ်စင်းသဖွယ် အမှိုက်သွန်ပိုက်အတွင်းသို့ ဒိုင်ဗင်ပစ်ဝင်လိုက်သည်။

 

အာခါသည် အမှိုက်သွန်ပိုက်မှတဆင့် အပြင်ဘက်ရှိ အမှိုက်ပုံးဆီသို့ လျှောဆင်းလိုက်သည်။ ဤနေရာရှိ အမှိုက်များအား ၆ နာရီလျှင်တစ်ကြိမ် မီးရှို့ဖျက်ဆီးလေ့ရှိသဖြင့် အောက်သိုးသိုးအနံ့များနှင့် မီးခိုးငွေ့များ အမြဲမပြတ် ရှိနေလေသည်။

 

အမှိုက်သွန်ပိုက်တွင်ရှိသည့် အ‌ပေါက်တစ်ခုမှတဆင့် တွားသွားထွက်လာကာ သံချေးတက်နေသည့် လှေကားအား တွယ်တက်သည်။ ထို့နောက် ပင်လယ်လေညင်း၏ ဆီးကြိုနှုတ်ဆက်ခံလိုက်ရသည်။ လှိုင်းလုံးများ၏ အသံမှာ တဝုန်းဝုန်းထနေပြီး အာခါ၏ ခန္ဓာကိုယ် တစ်ခုလုံးအား နှစ်မြုပ်ပစ်တော့မည့်နှယ်။

 

ရာသီဥတု ဆိုးလှသည်ကြောင့် ယနေ့ ထွက်လာမိသည်ကိုပင် စတင် နောင်တရလာမိသည်။ အစောပိုင်းမှ စိုးရိမ်ပူပန်မှုထဲ နစ်မြုပ်နေဆဲပင်။

 

တစ်ယောက်ယောက်များ ဒီလမ်းကြောင်းကို တွေ့သွားတာလား.. ဒါပေမဲ့ ဘယ်လိုဖြစ်နိုင်မှာလဲ.. ဒီအမှိုက်ပုံးကို ဟိုးအရင်ကတည်းက စွန့်ပစ်ထားပြီးသားလေ.. ပြီးတော့ ဒီနားမှာလည်း ခြေရာတွေဘာတွေ မရှိဘူး..

*****

to be continued...