MM Story Teller

Chapter 29

Viewers 3k

🌱Arc 1 [ ကျောင်းတွင် လယ်စိုက်ခြင်း ]

Ch 29

လယ်မြေဧကတစ်ထောင်၏သွေးဆောင်မှု (အပိုင်းနှစ်)

ပါးပါးမုန့်၏ လယ်ကွင်းများအပြင် အခြားသောစမ်းသပ်စိုက်ခင်းများကလည်း အောင်မြင်ကြောင်း သတင်းပို့ခဲ့သည်။

CX-7က ငရုတ်သီးစိုက်ပျိုးရန် ပိုမိုသင့်တော်သောရာသီဥတုမျိုးရှိသည့်နေရာများတွင် စွမ်းဆောင်ရည်ပိုကောင်းကြောင်း စွေ့ချီချောင်းသတင်းရခဲ့သည်။ တစ်မုလျှင် အမြင့်ဆုံးအထွက်နှုန်းမှာ လေထောင့်ခြောက်ရာကီလိုဂရမ်ဖြစ်ပြီး အနိမ့်ဆုံးမှာ သုံးထောင့်ငါးရာကီလိုဂရမ်အောက် မလျော့ပေ။ ၎င်း၏ ရေရှည်စွမ်းဆောင်ရည်ကလည်း အလွန်ကောင်းမွန်လှသည်။ ထို့ကြောင့် CX-7က အလွန်အောင်မြင်သည်ဟု မှတ်ယူနိုင်သည်။

ငရုတ်သီးလက်ကားရောင်းချသူတစ်ဦးက ကောက်ပဲသီးနှံကြည့်ရှုရန် လာရောက်စဉ် ငရုတ်သီးအရသာကို မြည်းစမ်းကြည့်ပြီးနောက် ငရုတ်သီး၏အရောင်အဆင်းနှင့်အရည်အသွေးကြောင့် တစ်ကီလိုလျှင် ရှစ်ယွမ်အထိပေးဆောင်ရန် ဆန္ဒရှိကြောင်း ငရုတ်သီးစမ်းသပ်စိုက်ပျိုးသူတစ်ဦးက ပြောပြခဲ့သည်။

ဤစျေးနှုန်းက ပါးပါးမုန့်၏ခန့်မှန်းချက်ထက် များစွာမြင့်မားလှသည်။ တစ်နည်းဆိုရသော် ဤစျေးနှုန်းအတိုင်းရောင်းချမည်ဆိုပါက သူက တစ်နှစ်လျှင် ယွမ်တစ်သိန်းကျော် ဝင်ငွေရရှိရန်အတွက် ထိုငရုတ်သီးကို တစ်နှစ်လျှင် မြေသုံးမု၌ နှစ်ကြိမ်ခန့် စိုက်ပျိုးရမည်ဖြစ်၏။

၎င်းက စမ်းသပ်ဆဲထုတ်ကုန်တစ်ခုဖြစ်ပြီး လက်ရှိတွင် အကြီးစားစိုက်ပျိုးမှုမလုပ်နိုင်သေးကြောင်း သိရှိလိုက်ရပြီးနောက် လက်ကားရောင်းချသူများ နှမြောတသဖြစ်သွားကြပြီး နောင်တွင် ထိုငရုတ်မျိုးကွဲများနှင့် ထုတ်လုပ်ရေးကုမ္ပဏီကို အာရုံပိုစိုက်ရန်စိတ်ကူး၍ ဤငရုတ်မျိုးကွဲများနှင့် ၎င်း၏နောက်ကွယ်ရှိ R&Dယူနစ်များ အကြောင်းကို အထူးတလည်မေးမြန်းခဲ့ကြသည်။

စွေ့ချီချောင်း၏ တိုက်ရိုက်ထုတ်လွှင့်ရေးပို့စ်ကို လူအများက အာရုံစိုက်လာကြသည်။ လူတိုင်းလူတိုင်း သူတို့၏ငရုတ်သီးများကို ရိတ်သိမ်းပြီးစီးသွားပြီး အချက်အလက်အားလုံးကို စုဆောင်းပြီးသွားသည့်နောက်မှာမူ လူအများစုက ဤအတိုင်းထိုင်မနေနိုင်ကြတော့ပေ။

စွေ့ချီချောင်း၏စာတိုက်ပုံးထဲတွင် သီးသန့်ပေးပို့ထားသော စာစောင်များစွာ ပြည့်နှက်သွားသဖြင့် ပေါက်ထွက်လုနီးပါးပင်။ ထိုစာအများစက မျိုးစေ့ဝယ်ယူချင်ကြသည့်တောင်သူလယ်သမားများ ပေးပို့ထားခြင်းပင်။ စိုက်ပျိုးရေးကုမ္ပဏီများနှင့် လက်ကားဖြန့်ဖြူးရောင်းချသူများအပြင် မျိုးစေ့ကုမ္ပဏီများသည်လည်း ပူးပေါင်းဆောင်ရွက်ရန်ဆန္ဒရှိမရှိ မေးမြန်းထားကြသေးသည်။ စွေ့ချီချောင်းအနေနှင့် သူတို့အားလုံးကို အကြောင်းမပြန်နိုင်ပေ။

ထိုအတောအတွင်း အချို့က စွေ့ချီချောင်း၏ရုံးခန်းကို ဖုန်းခေါ်ဆိုလာကြသည်။ သူ့ဖုန်းနံပါတ်ကို ထိုလူများ မည်သို့မည်ပုံရသွားသည်အား သူမသိပေ။

အလားအလာအကောင်းဆုံးမှာ နန်ဟိုင်စိုက်ပျိုးရေးသိပ္ပံဌာန၏ သဘာဝပေါက်ပင် သုတေသနပြုဌာနပင်ဖြစ်သည်။ သူတို့က စွေ့ချီချောင်းကို ဥက္ကဋ္ဌစွေ့မှတစ်ဆင့် တိုက်ရိုက်ဆက်သွယ်ခဲ့ကြသည်။ စွေ့ချီချောင်းက တစ်ကိုယ်တည်းအလုပ်လုပ်နေကြောင်း သူတို့သိထားကြပြီး သူ့အနေနှင့် ကိုယ်ပိုင်မျိုးစေ့ကုမ္ပဏီတည်ထောင်ရန် စိတ်ဝင်စားခြင်းရှိမရှိ မေးမြန်းချင်ကြသည်။ အကယ်၍ စိတ်ဝင်စားပါက အနာဂတ်တွင် သူတို့က သူနှင့်ပူးပေါင်းဆောင်ရွက်လိုကြသည်။

သူတို့က သူတို့၏ကိုယ်ပိုင်ချန်နယ်များမှတစ်ဆင့် ငရုတ်သီးအမှည့်များကိုရယူရန် စီစဉ်နိုင်သည်။ ဤနည်းဖြင့် စွေ့ချီချောင်း၏ပို့စ်ထဲတွင် တင်ထားသည့်ငရုတ်သီးများက သူကတိပေးထားသလို အမှန်တကယ်ရှိနေလေကြောင်း သူတို့အနေနှင့် အတည်ပြုပြီးသားဖြစ်သွား၏။ ရှုထောင့်အချို့မှကြည့်လျှင် ဤငရုတ်သီးမျိုးအသစ်များက စွေ့ချီချောင်းအာမခံထားသည်ထက်ပင် ပိုစွမ်းဆောင်နိုင်လေသည်။

စွေ့ချီချောင်းကိုယ်တိုင် စိုက်ပျိုးထားသော သီးနှံများက ပမာဏအားဖြင့် အလွန်နည်းပါးလှသော်လည်း ဤအတိုင်းအတာအထိ စွမ်းဆောင်နိုင်သည်မှာ အလွန်အံ့သြဖွယ်ကောင်းလှ၏။ ဤသည်မှာ ပရော်ဖက်ရှင်နယ်သုတေသနတက္ကသိုလ်တစ်ခုခု သို့မဟုတ် မျိုးစေ့ကုမ္ပဏီတစ်ခုခု၏ လုပ်ဆောင်မှုရလဒ်ဟု ဆိုလာလျှင်ပင် ယုံကြည်မိလိမ့်မည်သာ။

သူတို့က စွေ့ချီချောင်းကို ဤငရုတ်သီးမျိုးကွဲအသစ်ကို ကိုယ်တိုင်ဖန်တီးခဲ့သည်မှာ နှစ်ပေါင်းမည်မျှကြာခဲ့ပြီလဲဟု မေးမြန်းခဲ့ကြသည်။ သို့သော် စွေ့ချီချောင်းက သူတို့ကို အမှန်အတိုင်း မပြောနိုင်ခဲ့ပေ။ သူ့အနေနှင့် ထိုငရုတ်သီးမျိုးကိုဖန်တီးရန် တစ်နှစ်ပင်မကြာလိုက်ချေ။ သီးနှံမျိုးကွဲအသစ်များကို ပြုစုပျိုးထောင်ခြင်းမှာ ယခုလိုရလဒ်ကောင်းများထွက်လာရန်အတွက် သာမန်လူများအတွက် နှစ်ပေါင်းများစွာအလုပ်လုပ်ရပေလိမ့်မည်။

"နောက်ထပ်မေးခွန်းတစ်ခုကတော့ မစ္စတာစွေ့ ဒီCX-7နဲ့ပတ်သက်ပြီး မူပိုင်ခွင့်ဘယ်လောက်များလျှောက်ထားမလဲ…"

သဘာဝပေါက်ပင်သုတေသနဌာနမှ တစ်စုံတစ်ဦးက သူ့ကိုမေးမြန်းခဲ့သည်။

စွေ့ချီချောင်းကလည်း ပြန်ဖြေရှာ၏။

"ကျွန်တော် မပြောတတ်ဘူး… မူပိုင်ခွင့်က လျှောက်မှရမှာလား…"

သဘာဝပေါက်ပင်သုတေသနဌာနမှ ပုဂ္ဂိုလ် : "..."

သဘာဝပေါက်ပင် သုတေသနဌာနမှလူခက အလွန်စိုးရိမ်ထိတ်လန့်သွားရှာလေသည်။

"ဟုတ်တယ်လေ ဘာလို့ မလျှောက်ထားတာလဲ… မြန်မြန်လေးပြင်လိုက်တော့…"

စွေ့ချီချောင်းက လုပ်ထုံးလုပ်နည်းများနှင့်ပတ်သက်၍ ဗဟုသုတ များများမရှိချေ။ အခြေခံအားဖြင့် သူက ဤမူပိုင်ခွင့်များကို လုံးဝအရေးမစိုက်ပေ။

ထို့ကြောင့် အခြားသူများက စွေ့ချီချောင်းကို သက်ဆိုင်ရာမူပိုင်ခွင့်လျှောက်ထားခြင်းဆိုင်ရာ လုပ်ထုံးလုပ်နည်းများအကြောင်းလေ့လာရန် တိုက်တွန်းကြသည်။

တစ်ချိန်တည်းမှာပင် စွေ့ချီချောင်း၏စမ်းသပ်ချက် အောင်မြင်မှုကြီးမားလာကြောင်း ကျောင်းသားများနှင့် အင်တာနက်အသုံးပြုသူများစွာကလည်း သိရှိလာခဲ့ကြသည်။ သို့ဖြစ်ရာ သူ့ကို မူပိုင်ခွင့်လျှောက်ထားရန် တိုက်တွန်းလာကြပြန်သည်။ အကယ်၍ သူသာ သီးနှံအမြောက်အမြားမထုတ်လုပ်နိုင်ခဲ့ပါက CUရှိလူတိုင်း CX-7ကို စားနိုင်တော့မည် မဟုတ်ပေ။

ရက်အနည်းငယ်ကြာပြီးနောက် သဘာဝပေါက်ပင်သုတေသနဌာနမှ လူများက လူကိုယ်တိုင်လာရောက်တွေ့ဆုံရန်အတွက် ကန်တင်းရှေ့အထိ ရောက်လာကြသည်။ ဥက္ကဋ္ဌစွေ့လည်း ထိုနေရာတွင်ရှိနေချေသည်။

"မင်္ဂလာပါ သူဌေးစွေ့…"

ဧည့်သည်ဖြစ်သူက သုတေသနဌာန၏ဒါရိုက်တာဖြစ်သည်။ နှုတ်ခွန်းဆက်စကား အနည်းငယ်ပြောပြီးနောက်တွင် သူက လာရင်းကိစ္စကို ပြောလေတော့သည်။

"တကယ်တော့ ကျွန်တော် ဒီကိုရောက်လာရတဲ့ရည်ရွယ်ချက်က ရိုးရိုးလေးပါ…ကျွန်တော် စိတ်ရင်းနဲ့မေးချင်တယ် ခင်ဗျား ကျွန်တော်တို့ဌာနနဲ့ ပူးပေါင်းဖို့ စိတ်ဝင်စားလာ..."

ဥက္ကဋ္ဌစွေ့၏အမူအရာက အနည်းငယ်ပြောင်းလဲသွားသည်။

သုတေသနဌာန၏ ရည်ရွယ်ချက်မှာ အမှန်တကယ်ရိုးရှင်းလှသည်။ အမှန်တွင် စွေ့ချီချောင်းက ထူးချွန်ပြောင်မြောက်သော စာရွက်စာတမ်းများကို လက်ဆုပ်လက်ကိုင်ပြတတ်သူမဟုတ်ကြောင်း လူအတော်များများ သတိထားမိကြသည်။ ထိုအစား သူက လူတိုင်းအာရုံမစိုက်ဘဲမနေနိုင်လောက်သည့် အလားအလာကောင်းသော အရည်အသွေးမြင့် စီးပွားဖြစ်ငရုတ်သီးမျိုးကွဲကို တီထွင်ခဲ့သည်။

အကယ်၍ ထိုကဲ့သို့သောပါရမီရှင်မျိုးသာ သူတို့ဌာနကိုရောက်လာပါက နောက်ထပ်သုတေသနပရောဂျက်များကိုလည်း အောင်မြင်စွာဖန်တီးနိုင်လိမ့်မည်ဖြစ်၏။

ပြီးတော့ ရန်ပုံငွေ ဘယ်လောက်များများ ရလာမယ်တဲ့လဲ... စိုက်ပျိုးရေးသိပ္ပံနဲ့ နည်းပညာဆုတွေလည်း ဘယ်လောက်များများရနိုင်လေမလဲ...

ဥက္ကဋ္ဌစွေ့က ခြောက်ကပ်ကပ်ပြုံးလျက် ဝင်ပြောလာ၏။

"ခဏလေးနေပါဦး ဒါရိုက်တာယန်... ငါ့တူလေးကိုပါ ဖိတ်ရမယ်လို့လည်း ကြိုပြီးအကြောင်းမကြားထားဘူးနော်…"

ဒါရိုက်တာယန်က ပူးပေါင်းဆောင်ရွက်မှု ဖြစ်နိုင်ခြေရှိမရှိကိုဆွေးနွေးပြီး ဟင်းသီးဟင်းရွက်စိုက်ခင်းများကို သွားကြည့်ချင်ရုံသက်သက်ရောက်လာသည်ဟုသာ သူထင်ခဲ့သည်။

ဒါရိုက်တာယန်က သူ့မျက်မှန်ကို ပင့်တင်လိုက်သည်။

"ဒါနဲ့ ပတ်သက်ပြီး ခင်ဗျားကိုပြောစရာလိုသေးလို့လား… ကျုပ်သာ သူ့ကိုမဖိတ်ရင် ရိုင်းပျရာကျသွားမှာပေါ့…"

ဥက္ကဋ္ဌစွေ့က ထိုစကားကို ချေပရန်နည်းလမ်းမရှိသော်လည်း သူ့တူဖြစ်သူက စိုက်ပျိုးရေးသုတေသနနှင့် ပါဝင်ပတ်သက်နေသည် ဟူသောကိစ္စကို မြင်ယောင်ကြည့်၍မရပေ။ သို့သော် လက်တွေ့တွင်မူ သူ့တူဖြစ်သူက သုတေသနဌာနကို အိမ်ရှေ့တံခါးပေါက်အထိ ရောက်လာအောင်စွမ်းဆောင်နိုင်ခဲ့သည့် သီးနှံမျိုးစိတ်အသစ်တစ်မျိုးကို တီထွင်ခဲ့လေသည်။

အစပိုင်းတွင်မူ စွေ့ချီချောင်းက ကျောင်းတွင်း၌ ဟင်းသီးဟင်းရွက်စိုက်ပျိုးနေခဲ့ပြီး သူမိတ်ဆက်ပေးခဲ့သည့်ဟင်းလျာများ နာမည်ကျော်သွားချိန်တုန်းကမူ ဥက္ကဋ္ဌစွေ့က ယနေ့လိုအခြေအနေမျိုးအထိ ရောက်လာလိမ့်မည်ဟု တစ်ခါမျှမထင်ထားခဲ့ပေ။

သူ့မှာ သူ့အစ်ကိုကို မည်သို့မည်ပုံပြောပြရမည်ကိုပင် မသိတော့ပေ။

"အဲ... ကျူပ်ရဲ့တူလေးက စိုက်ပျိုးရေးမေဂျာယူထားတာမဟုတ်ဘူး ဘဏ္ဍာရေးမေဂျာပါ…"

"ဒါကြောင့် သူက ပညာရပ်ဆိုင်ရာသုတေသနတွေ လုပ်နေတာကိုး… ဒီလိုရလဒ်တွေ ထွက်လာနိုင်တာက သူ့မှာ ပင်ကိုထက်မြက်မှုတွေရှိနေတယ်ဆိုတာကို သက်သေပြနေတာပဲလေ…"

ဒါရိုက်တာယန်က စွေ့ချီချောင်းဘက်ကိုလှည့်ပြီး ခံစားချက်များပြည့်နှက်နေသောလေသံဖြင့် ပြောလာလေသည်။

"လယ်သမားငယ်များအတွက် အမေးအဖြေဖိုရမ်ပေါ်က မင်းရဲ့အဖြေတွေကို ကျုပ်မြင်ဖူးတယ်… မင်းရဲ့အခြေခံအုတ်မြစ်က အရမ်းခိုင်မာပေမဲ့ အတိမ်အနက်ခန့်မှန်းမရနိုင်ဘူး… ဒါပေမဲ့ ဒါအတွက် နည်းလမ်းတစ်ခုကိုတော့ ကျုပ်တို့စဉ်းစားကြည့်လို့ရပါတယ်… ကျုပ်တို့ မင်းကို စာချုပ်ချုပ်ပြီးအလုပ်ခန့်လို့ရတယ်…"

ဥက္ကဋ္ဌစွေ့ : "..."

ဥက္ကဋ္ဌစွေ့က ဤကိစ္စနှင့်ပတ်သက်၍ ရုတ်ခြည်းအတွေးပေါက်သွားသည်။ ဤကိစ္စတွင် စွေ့ချီချောင်း၏ကိုယ်ပိုင်ဆန္ဒကိုသာ ဦးစားပေးထားလိုက်သည်။ အကြောင်းမှာ သူ့အစ်ကိုနှင့်မရီးတို့ကပင် သူ့တူ၏ဆန္ဒကို မပိတ်ပင်နိုင်ခဲ့သောကြောင့်ပင်။

သို့သော် အားလပ်ချိန်များပိုလျှံနေပြီး အသီးအရွက်များ ထပ်စိုက်ရန်ပြင်နေသည့် စွေ့ချီချောင်း၏ပြောစကားကြောင့် ဥက္ကဋ္ဌစွေ့ အံ့သြသွားရသည်။

"... ကျွန်တော် တောင်းပန်ပါတယ်… ဒါပေမဲ့ ကျွန်တော်မလုပ်နိုင်ပါဘူး… တခြားတစ်နေရာမှာ အလုပ်လုပ်ဖို့စိတ်ကူးမရှိပါဘူး…"

"ဘာလို့လဲ…"

ဒါရိုက်တာယန်က မျက်မှောင်ကြုတ်လိုက်မိသည်။

"ကျုပ်တို့ဌာနဘက်က ကမ်းလှမ်းထားတဲ့အခြေအနေတွေက သိပ်အဆင်မပြေဘူးလို့ ထင်နေတာလား ရှောင်စွေ့...ကျုပ်တို့ရဲ့ဌာနက လောလောဆယ်မှာ ဧရိယာထောင့်ခြောက်ရာမုလောက်ကျယ်တဲ့ စမ်းသပ်ရေးစခန်းတစ်ခုကို နန်ရှန်မှာ တည်ဆောက်ဖို့စီစဉ်နေတယ်… အဓိကကတော့ ခရမ်းသီးနဲ့ သစ်သီးဝလံတွေကို သုတေသနလုပ်ဖို့အတွက်ပေါ့… အဲ့ဒါအပြင် ခရိုင်အဆင့်အထိအတည်ပြုထားပြီးသွားတဲ့ မျိုးစေ့အသစ် ခြောက်ဆယ်လောက်လည်းရှိတယ်… ဒီပြည်နယ်တစ်ခုလုံးနဲ့ခြုံကြည့်ရင် ကျုပ်တို့အဖွဲ့အစည်းက စက်မှုလုပ်ငန်းတွေကြားမှာ တော်တော်လေးလူသိများတာပါ..."

စွေ့ချီချောင်း : "..."

စွေ့ချီချောင်း : "ထောင့်ခြောက်ရာမုတဲ့လား..."

ထိုစကားနှစ်ခွန်းကိုသာ သူ့နားထဲကြားလိုက်ရသည်။

ဒါရိုက်တာယန်က သူ လုပ်ငန်းခွင်ပတ်ဝန်းကျင်အနေအထားကို အံ့အားသင့်သွားသည်ဟု တွေးလိုက်သည်။

"ဟုတ်တာပေါ့…အဲဒီစခန်းရဲ့တည်နေရာက နည်းနည်းတော့ဝေးတယ်…ဒါပေမဲ့ နယ်မြေဧရိယာကသန့်တယ်… ကြည့်လိုက်ပါဦး... မင်းတို့တက္ကသိုလ်မြို့တော်ကလည်း မြို့ဆင်ခြေဖုံးထဲမှာရှိနေတာလေ…အဲဒါအပြင်ကို ငါတို့မှာ တခြားပန်းခြံတွေနဲ့ စခန်းတွေလည်းရှိသေးတယ်…"

ဒါရိုက်တာယန်မှာ ထိုတဒင်္ဂလေးတွင် စွေ့ချီချောင်း၏မျက်ဝန်းအစုံ တောက်ပသွားသည်ကို ရှင်းရှင်းလင်းလင်းမြင်လိုက်ရပြီး ထိုမျက်ဝန်းက အလားတူအလုပ်မျိုးတွင် ပါဝင်နေသူတစ်ဦး၏ မျက်လုံးအကြည့်မျိုးဖြစ်သည်ဟု ကောက်ချက်ချလိုက်၏။ ရှောင်စွေ့က သုတေသီကဲ့သို့လူစားမျိုးဖြစ်သည်ဟု လူအများစုက မထင်ကြသော်လည်း သူ၏အသွင်အပြင်နှင့် စိတ်နေစိတ်ထားကိုသာကြည့်ပြီးဆုံးဖြတ်ပါက တစ်ဖက်လူ၏မျက်လုံးထဲရှိ စိတ်အားထက်သန်မှုကို ခံစားမိနိုင်လေသည်။

သို့သော် သူ ကြာမြင့်စွာ မပျော်နိုင်သေးမီမှာပင် စွေ့ချီချောင်း၏မျက်ဝန်းထဲမှ အလင်းရောင်က တစ်ဖန်မှိန်ကျသွားပြန်သည်။

"ခင်ဗျားရဲ့စေတနာကို ငြင်းရမှာတော့အားနာပါတယ်…ဒါပေမဲ့ လတ်တလောမှာ ကျွန်တော်က ကန်တင်းကိုပဲအာရုံစိုက်နေတာမို့ပါ…"

ဒါရိုက်တာယန်က သူ့စကားကြောင့် ခဏမျှအံ့အားသင့်သွားချေသည်။

"သေချာစဉ်းစားကြည့်မယ်ဆိုရင် မင်းက ရသာမြိန်အစားအသောက်တွေကို စိုက်ပျိုးရတာနှစ်သက်တယ်လို့ အင်တာနက်ပေါ်ကလူတိုင်း ပြောနေကြတာလားလို့… ရသာမြိန်အစားအသောက်အစီအစဉ်တွေမှာတောင် မပါချင်ခဲ့ဘူးလေ…"

စွေ့ချီချောင်းက ယခုအချိန်မှာ အလွန်စိတ်မကောင်းဖြစ်နေလေပြီး သူ့လိုလူတစ်ယောက်က ဤအလုပ်ကို အမှန်တကယ်ငြင်းဆန်နေရသည့်အတွက်ကြောင့် တစ်ဘဝစာပိုင်ဆိုင်ထားသမျှ ခန္တီပါရမီအားလုံးကို ထုတ်သုံးလိုက်ရသည်။

သူက အေးဆေးတည်ငြိမ်သောအသံဖြင့် ပြောလိုက်၏။

"ဟုတ်ပါတယ် တကယ်တော့ ကျွန်တော်က ရသာမြိန်အစားအသောက်တွေကို သိပ်စိတ်မဝင်စားဘူး… ဟင်းလျာတွေ ပိုမိုကောင်းမွန်အောင် အဆင့်မြှင့်တာပဲဖြစ်ဖြစ် သီးနှံမျိုးစိတ်သစ်ကို ဖန်တီးတာပဲဖြစ်ဖြစ် အကုန်လုံးက ကန်တင်းရဲ့ကောင်းကျိုးအတွက်လုပ်ခဲ့တာချည်းပဲ"…"

ဒါရိုက်တာယန် : "..."

ဥက္ကဋ္ဌစွေ့ : "..."

ကမ္ဘာကြီးက လွန်စွာကြီးမားကျယ်ပြောလှသည်ဖြစ်ရာ အံ့သြနေရန်တော့မလိုချေ။

ဒါရိုက်တာယန်က ထိုစကားကို သူ့ခေါင်းထဲသို့ အချိန်အတော်ကြာသည်အထိရိုက်သွင်းနေရင်း သူ့ကိုယ်သူနှစ်သိမ့်ရန် ကြိုးစားနေလေသည်။ သို့သော် နောက်ဆုံးတွင် သူ လက်မခံနိုင်သေးချေ။ သို့ဖြစ်ရာ စွေ့ချီချောင်းက သူ့မိသားစုပိုင်လုပ်ငန်းကို အမွေဆက်ခံရန် ရည်ရွယ်ထားသောကြောင့် ငြင်းဆန်နေခြင်းဖြစ်သည်ဟူသောအချက်ကိုသာယုံကြည်ရန် ဆုံးဖြတ်လိုက်သည်။ ဤအကြောင်းပြချက်ကမှ ပို၍အဓိပ္ပါယ်ရှိသေးသည်။

မုတစ်ထောင်ကျော်၏ သွေးဆောင်ဖြားယောင်းမှုကို တွန့်ဆုတ်စွာငြင်းဆိုပြီးနောက် စွေ့ချီချောင်းက ဥက္ကဋ္ဌစွေ့၏ ထူးခြားသောစကားအသွားအလာကြောင့် ဒါရိုက်တာယန်နှင့် အေဂျင်စီသဘောတူညီမှုစာချုပ်ကို စတင်ဆွေးနွေးခဲ့သည်။

သူက ကုမ္ပဏီတစ်ခုနှစ်ခု သို့မဟုတ် အဖွဲ့အစည်းများနှင့် သီးသန့်အေဂျင်စီသဘောတူညီချက်တစ်ခုကို လက်မှတ်ရေးထိုးနိုင်သည်။ ဥပမာအားဖြင့် သူက သဘာဝပေါက်ပင်သုတေသနဌာနနှင့်လည်း စာချုပ်ချုပ်ဆိုနိုင်သည့်အပြင် ပူးပေါင်းမှုအတွက် သစ္စာရှိရှိစောင့်ဆိုင်းနေသောဌာနများနှင့်လည်း လက်မှတ်ရေးထိုးနိုင်သည်။ ဌာနနှင့်ကုမ္ပဏီများမှာ ထိုစမ်းသပ်မှုများကို သူတို့၏နာမည်အောက်တွင်ထားပြီး မူပိုင်ခွင့်များလျှောက်ထားလိမ့်မည်။ ထို့နောက် မျိုးကွဲအသစ်များကို ပြန်လည်ဆန်းစစ်ပြီးသည်နှင့် အရေအတွက်အမြောက်အမြားထုတ်လုပ်ရန်အတွက် ထိုမျိုးစေ့များ၏ နောက်ဆုံးဗားရှင်းများကို အရောင်းမြှင့်တင်မည်ဖြစ်၏။

စွေ့ချီချောင်းက လိုအပ်သောစာရွက်စာတမ်းများပြင်ဆင်ရခြင်းထက် ဟင်းသီးဟင်းရွက်စိုက်ခင်းများတွင် အချိန်ဖြုန်းရန်သာ ဆန္ဒရှိလေသည်။

စွေ့ချီချောင်း၏သဘောထားကြောင့် ဥက္ကဋ္ဌစွေ့လည်း ဒါရိုက်တာယန်တွေးသလို တွေးနေမိတော့သည်။ သူ့တူလေးက နောက်ပိုင်းမှာ မိသားစုစီးပွားရေးကို ပြန်ဆက်ခံရန် စီစဉ်နေခြင်းဖြစ်နိုင်သည်။ မည်သို့ပင်ဖြစ်စေ စွေ့ချီချောင်းတစ်ယောက် ကန်တင်းအလုပ်ကို အလွန်တရာစိတ်အားထက်သန်နေလိမ့်မည်ဟုလည်း သူမယုံခဲ့ပေ။ ဒါရိုက်တာယန် စမ်းသပ်စိုက်ခင်းအကြောင်းပြောနေသည်ကို ကြားသည့်အခါက စွေ့ချီချောင်း၏မျက်ဝန်းအစုံက တောက်ပသွားချေသည်။ ထို့အပြင် သူက အခြားကန်တင်းလေးခုကို ပေါင်းစည်းရန်ပင် စိတ်မဝင်စားခဲ့ပေ။

စွေ့ချီချောင်းပြောခဲ့သည့်အတိုင်း ထိုကမ်းလှမ်းချက်က သူ့အား ကျော်ကြားမှုနှင့် အမြတ်အစွန်းများစွာရရှိစေမည့် အရာတစ်ခုဖြစ်သည်။ ထိုအကျိုးအမြတ်များကို မည်သူမှငြင်းပယ်နိုင်မည်မဟုတ်ပေ။ ပရောဂျက်ကို သဘာဝပေါက်ပင်သုတေသနဌာနနှင့် မျိုးစေ့ကုမ္ပဏီများထံ လွှဲပြောင်းပေးအပ်မည်ဆိုပါက အတည်ပြုချက်ရယူရန်အတွက် လျှောက်ထားပြီး အမျိုးမျိုးသောစမ်းသပ်မှုများလည်း ပြုလုပ်ရမည်ဖြစ်၏။ ဘေးကင်းလုံခြုံမှုရှိမရှိစစ်ဆေးမှုများခံယူပြီးနောက် ကောက်ပဲသီးနှံများ၏အရည်အသွေးက ကျေနပ်ဖွယ်ကောင်းသည်ဟု ယူဆနိုင်သရွေ့ ငရုတ်သီးများကို အရေအတွက်အများအပြားဖြန့်ဝေရန်နှင့် လူသိများလာအောင်လုပ်ဆောင်ရန်မှာ သူတို့အတွက် အလွန်လွယ်ကူသွားမည်သာ။

CX-7 မှာ လာမည့်နှစ်အစောပိုင်း၌ ဈေးကွက်ထဲတွင် ရောင်းချနိုင်တော့မည်ဖြစ်၏။

ဥက္ကဋ္ဌစွေ့က သူ့ရုံးခန်းထဲရှိထိုင်ခုံပေါ်တွင်ထိုင်ကာ သူ့အစ်ကိုနှင့်မရီးတို့အား ဖုန်းပြောနေလေသည်။ လတ်တလောအတွင်း စွေ့ချီချောင်းလုပ်နေသည့်ကိစ္စများကို ပြောပြသည်။ သူစိုက်ပျိုးထားသော ငရုတ်သီးမျိုးစိတ်အသစ်က ကုမ္ပဏီအမြောက်အများ၏အာရုံစိုက်မှုကို ရလိုက်သည့်ကိစ္စအပြင် သဘာဝပေါက်ပင်သုတေသနဌာနမှ ဖိတ်ကြားချက်ကို ငြင်းပယ်လိုက်ပုံကိုလည်း ပြောပြခဲ့သည်။

ပါးပါးစွေ့က အပျော်လွန်သွားလေသည်။ နောက်ဆုံးတစ်ကြိမ် မားမားစွေ့ စွေ့ချီချောင်းထံကို အလည်သွားစဉ်က သူမ အသီးအရွက်ခြင်းတစ်လုံးနှင့် ပြန်ရောက်လာခဲ့ပြီး သူ့ကို ထိုအသီးအရွက်များကို နေ့တိုင်းစားခိုင်းသည်။ စွေ့ချီချောင်းက ကျောင်းမှာသာ အမြဲနေထိုင်တော့မည်ဆိုသောအချက်ကိုပင် သူ လက်ခံမိလုနီးပါးပင်။ သို့သော် ယခုမူ အခြေအနေများက အသစ်တစ်ဖန်ပြောင်းလဲသွားပြန်လေ၏။

"အင်း... ချီချောင်းမှာ သင့်တင့်လျောက်ပတ်တဲ့အတွေးမျိုးရှိတယ်ထင်တယ်… အခု သူက ကျောင်းထဲမှာအလုပ်များနေတော့ စိတ်အခြေအနေလည်းပိုကောင်းလာပုံပဲ…"

သူ့အစ်ကိုနှင့်မရီးတို့ဖြင့် ဖုန်းပြောပြီးနောက် ဥက္ကဋ္ဌစွေ့ဖုန်းချလိုက်ချိန်တွင် အတွင်းရေးမှူးက ရုံးခန်းထဲသို့ဝင်လာသည်ကို တွေ့လိုက်ရသည်။

အတွင်းရေးမှူးက စာရွက်စာတမ်းတချို့ကို လက်ထဲမှာကိုင်ထားပြီး သူ့မျက်နှာထက်မှာလည်း တွေဝေတွန့်ဆုတ်နေဟန်တို့က အထင်းသားဖြစ်နေသည်။

"ဥက္ကဋ္ဌစွေ့... မြို့တော်ရင်းနှီးမြှုပ်နှံမှု မြှင့်တင်ရေးဗျူရိုက အခုလေးတင်ဖုန်းဆက်ပါတယ်… တခြားပြည်နယ်တွေဆီက စုံစမ်းစစ်ဆေးရေးကိုယ်စားလှယ်အဖွဲ့က ဒီတစ်ပတ်ထဲ နန်ဟိုင်ကိုလာမယ်တဲ့…"

ဥက္ကဋ္ဌစွေ့က ခေါင်းပင်မော့မကြည့်ပေ။

"အဲ့လိုလား… သူတို့က တက္ကသိုလ်မြို့တော်မှာ ပရောဂျက်တစ်ခုလုပ်ချင်နေတာလား… သူတို့ ကျောင်းကိုအလည်လာချင်နေတာဆိုရင်လည်း မင်း တွေ့ဆုံဖို့စီစဉ်လိုက်လို့ရတယ်လေ…"

ထို့နောက် သူ့အတွင်းရေးမှူး၏စကားက အနည်းငယ်ရယ်စရာကောင်းနေကြောင်း သူသတိထားမိလိုက်သဖြင့် မေးလိုက်လေသည်။

"ဒီလိုကိစ္စမျိုးကို ဘာလို့ငါ့ဆီလာတင်ပြနေရတာလဲ…ငါ့ကို ကြိုဆိုဧည့်ခံရေးမှာ ပါစေချင်လို့လား…"

အတွင်းရေးမှူးက စာရွက်ပေါ်တွင် ရေးထားသောမှတ်ချက်ကို ကြည့်ရင်း စကားမစလာမီ ပင့်သက်ရှိုက်လိုက်လေသည်။

"မဟုတ်ပါဘူး… သူတို့ပြောတာက သူတို့ဘက်က တွေ့ဆုံဖို့အတွက် ကန်တင်းမှာပဲချိန်းဆိုချင်တယ်တဲ့… ပထမကန်တင်းမှာပါ..."

ဥက္ကဋ္ဌစွေ့ : "..."

ဥက္ကဋ္ဌစွေ့က မေးလာလေသည်။

"မင်း ဘာပြောလိုက်တယ်…"

အတွင်းရေးမှူးကလည်း ဤကိစ္စက အလွန်ယုတ္တိမတန်သလို ခံစားမိသည်။ အမှန်တွင် မြို့တော်ရင်းနှီးမြှုပ်နှံမှုမြှင့်တင်ရေးဗျူရိုမှ ဝန်ထမ်းသည်လည်း သူတို့နှစ်ယောက် ဆွေးနွေးညှိနှိုင်းနေစဉ်အတွင်း သူပြောလိုက်သည့်စကားကို ထူးဆန်းနေသလို ခံစားနေရပုံပေါ်သည်။

"အဲ့ဒါက... ကိုယ်စားလှယ်အဖွဲ့ဘက်က နာမည်ကြီးဒေသထွက်အစားအသောက်တွေကို မြည်းစမ်းကြည့်ချင်တယ်လို့အရင်ပြောလာတာပါ…"

ဥက္ကဋ္ဌစွေ့ : "..."

🌱🌱🌱

Prev Next