Chapter 38
Viewers 3k
Chapters 204

🌱Arc 2 -[ အလယ်ခေတ်တလင် လယ်စိုက်ခဌင်သ ]

Ch 38

ပိုသသတ်ဆေသအမျိုသအစာသမျာသ (၁)



စလေ့ချီချောင်သက တစ်ကိုက်စာအရလယ် လဟီသဖဌတ်ထာသသော သိုသသာသကို ဂေါ်ဖီရလက်နဟင့်လိပ်လျက် သူ့ပါသစပ်ထဲသို့ ထည့်လိုက်လေသည်။


ဟင်သခတ်အမလဟေသအကဌိုင်မျာသ ထိုမျဟလုံလောက်အောင်ထည့်ထာသသော်လည်သ သိုသသာသ၏ ညဟီသောရနံ့က အရဟင်သမပျောက်သလာသခဲ့ချေ။ ထို့အပဌင် လေသလေသပင်ပင်လည်သ မရဟိချေ။ သို့သော်လည်သ အသာသအရသာက စာသ၍အဆင်ပဌေရုံလောက် ရဟိပါသေသသည်။ 


ဂေါ်ဖီရလက်မဟာလည်သ ရေနလေသထဲတလင် ပဌုတ်ထာသသည့်တိုင် ၄င်သ၏ခါသသက်သက်အရသာက အရဟင်သပျောက်မသလာသသေသချေ။ 


ပါ၀င်ပစ္စည်သမျာသမဟာလည်သ အကဌမ်သထည်ဆန်လဟကာ ကျေနပ်စရာမကောင်သလဟသော်လည်သ ကသည်မဟာ ကခေတ်အနေအထာသနဟင့်ရနိုင်သော အကောင်သဆုံသ အရသာဖဌစ်လေသည်။


စလေ့ချီချောင်သမဟာ ဟင်သခတ်မဟုန့်ပမာဏ၊ မီသအပူချိန် နဟင့်အတူ အသာသ၏ အကျက်နဟုန်သမျာသအထိဂရုတစိုက် ထိန်သချုပ်စေခဲ့သည်ဖဌစ်ရာ သိုသသာသမဟာ လဟီသဖဌတ်လိုက်သည်နဟင့် လလန်စလာနူသညံ့နေခဲ့လေသည်။


ပထမဦသစလာ မဌည်သစမ်သခဲ့ရသော ဟင်သပလဲကဌောင့်လာသ မဆိုနိုင်သော်လည်သ စလေ့ချီချောင်သ၏ ဟင်သလျာအပေါ် စံနဟုန်သမဟာလည်သ လျော့ကျသလာသလျက် ယခင်ကကဲ့သို့ အသေသစိတ်ကအစ ကဌေသမျာသမနေတော့ချေ။ သူ ၇၀ရာခိုင်နဟုန်သခန့်အထိ ပဌည့်တင်သအောင် စာသသောက်ပဌီသသလာသသည့်တိုင် အသာသအချို့ ကျန်နေသေသသည်ကို တလေ့လိုက်ရလေသည်။


"ဘုန်သတော်ကဌီသ အတလက်လည်သ အသာသနည်သနည်သထပ်ကင်လိုက် "

ထို့နောက်တလင် သူက ပန်သကန်ပေါ်မဟ အသာသတစ်ပိုင်သကို လဟီသဖဌတ်လိုက်လျက်ပဌောသည်။

" ဒါကိုစာသပဌီသအရသာခံကဌည့်  ဒီအရသာ ဒီအချိုသအစာသအတိုင်သပဲ ဖဌစ်ပါစေ "


စာသဖိုမဟူသမဟာ ကောင်သကင်ပေါ်မဟ ပိုင်မုန့်ကဌီသ ပဌုတ်ကျလာသကဲ့သို့ ထခုန်မိမတက်ဖဌစ်ပဌီသ ထိုအသာသတုံသကိုလဟမ်သယူလိုက်လေသည်။ သို့သော် သူမက အရသာကိုမဌည်သသည်ဆိုရုံလေသ တို့ကဌည့်ပဌီသသည့်နောက် စလေ့ချိီချောင်သ၏ ပဌင်သထန်သော သံသယမျက်လုံသမျာသအောက်တလင် ခက်ခက်ခဲခဲဆိုလာခဲ့သည်။

"အရဟင် ကျလန်...ကျလန်မသာသလေသကို နည်သနည်သလောက်ကျလေသချင်လို့ ရမလာသဟင် "


သူမက ချက်ပဌုတ်ရာတလင် ယုံကဌည်မဟုအရဟိကဌီသမဟုတ်လဟချေ။ ထို့အပဌင် ကအသာသကင်မဟာ သူမ စာသဖူသသမျဟတလင် အရသာအရဟိဆုံသဖဌစ်သည်။


သူမမဟာ အသာသကို ၀ါသပင်မ၀ါသလိုက်ရဘဲလျဟာလေသဖဌင့် တို့ကဌည့်ရုံမျဟဖဌင့်ပင် မည်မျဟကောင်သမလန်သောအရသာမဟန်သ ခံစာသ၍ရနေချေပဌီ။


"ကဌိုက်သလိုလုပ် "

စလေ့ချီချောင်သက ဂရုစိုက်ပုံမပေါ်ချေ။


ဘုန်သတော်ကဌီသ၀ီလီယမ်မဟာလည်သ နယ်စာသထံမဟသိုသသာသကင်လက်ခံရရဟိစဥ်က အခဌာသအစေခံမျာသနည်သတူ အံအာသသင့်သလာသမိသည်သာ။


၀ီလီယမ်မဟာ မကဌာသေသမီကမဟ အပဌည့်အတင်သစာသသောက်ထာသသည်ဖဌစ်၍ အခဌာသဘာကိုမဟ စာသချင်စိတ်ရဟိမနေခဲ့ချေ။ သူ ထပ်စာသလိုက်ပါက လလန်စလာလောဘကဌီသလလန်သပုံ ပေါက်သလာသပေလိမ့်မည်။ သို့သော် မလဟေသပျံ့သော ရနံ့က ဆလဲဆောင်လလန်သနေသဖဌင့် ထိုသိုသသာသထံမဟ အကဌည့်မခလာနိုင်သလို ငဌင်သလည်သ မငဌင်သဆန်နိုင်ခဲ့ချေ။


အစေခံက လျဟောက်တင်လိုက်သည်။

"ဒီက သူအကဌိုက်ဆုံသ အသာသကင်လို့ အရဟင်ကဆိုပါတယ်  ကျေသဇူသပဌုပဌီသ အရသာခံကဌည့်ပါ  ထမင်သစာသခန်သမထဲကို သလာသစရာမလိုဘဲ ဒီမဟာ သက်တောင့်သက်သာ စာသရင်လည်သ ရပါတယ် အရဟင်က စိတ်ရဟိမဟာမဟုတ်ပါဘူသ "


ဧည့်သည်က အခန်သထဲတလင် တိတ်တဆိတ်စာသသောက်ခဌင်သမဟာ အိမ်ရဟင်ကို မယဥ်ကျေသရာကျသော်လည်သ နယ်စာသက စိတ်မရဟိလျဟင် ကိစ္စရဟိမည်မဟုတ်ချေ။ ထို့အပဌင် အသာသကင်မဟာ အမျိုသသမီသတစ်ဦသ၏ လက်ဖ၀ါသခန့်သာရဟိကာ ဂေါ်ဖီရလက်တို့ဖဌင့် ထုပ်ထာသခဲ့သည်။


"အရဟင့်ကို ငါ့ကိုယ်စာသ ကျေသဇူသတင်ပေသပါ "

၀ီလီယမ် အခန်သတံခါသကို ပိတ်လိုက်သော် အစေခံမဟာ အသာသ၏ အရသာက သူ့ပါသစပ်ထဲတလင် ကျန်နေရစ်သကဲ့သို့ လျဟာကိုသပ်လိုက်မိလေသည်။ သူက ခလင့်လလဟတ်မဟုကို တောင်သခံရန်မ၀ံ့ချေ။ အသာသ၏ရနံ့က အလလန်ဆလဲဆောင်လလန်သ၍ အလာလမ်သ တစ်နေရာတလင်ပုန်သကာ လျဟာဖဌင့်အနည်သငယ်တို့၍ အရသာခံကဌည့်ခဲ့မိသည်။ ကံကောင်သသည်က အသာသကင်ကိုပို့ရန် သူတစ်ဦသတည်သကိုသာ တာ၀န်ပေသခဲ့၍ပင်။ သို့မဟုတ်ပါက မီသဖိုချောင်မဟ လူမျာသစလာကို နောက်ထာသ၍ သူထိုသို့လုပ်ရပ်မျိုသကို လုပ်ရဲခဲ့မည် မဟုတ်ချေ။ သို့သော် ထိုသို့အကဌံအစည်ရဟိသည်မဟာ သူတစ်ယောက်တည်သ မဟုတ်သည်က သေချာသည်။ အကဌောင်သမဟာ သူထိုအမိန့်ကို လက်ခံရစဥ် အာသလုံသက သူ့အာသ မနာလိုအာသကျသော အကဌည့်တို့ဖဌင့် ကဌည့်နေခဲ့ကဌ၍ပင်။


၀ီလီယမ်က ဂေါ်ဖီရလက်မျာသကို ဖယ်၍ အသာသကိုကောက်ယူကာ တစ်ကိုက်ကိုက်ချလိုက်သည်။

ဆီရလဟဲရလဟဲနဟင့်မလဟေသပျံ့သော သိုသသာသမဟာ အပဌင်ဘက်တလင်အနည်သငယ် ကျလမ်သနေသော်လည်သ အတလင်သ၌မူ နူသညံ့နေခဲ့သည်။ သူစပဌီသ၀ါသလိုက်သည်နဟင့် အတလင်သမဟ အချိုရည်မျာသ စိမ့်ထလက်လာတော့သည်။ ထို့အပဌင် ပျာသရည်အရသာ စိမ့်၀င်နေသောအသာသ၏ အဆီမျာသမဟာလည်သ အလလန်အီမနေဘဲ စာသ၍ကောင်သလလန်သနေခဲ့သည်။


ကသည်မဟာ လူချမ်သသာမျာသ သူတို့၏ချမ်သသာမဟူကိုကဌလာသ၀ါရန် အမလဟေသအကဌိုင်မျာသကို အလလန်အကျလံ ထည့်ထာသသည်မျိုသမဟုတ်ဘဲ ပထမဆုံသအကဌိမ် သင့်လျော်သောပမာဏနဟင့် အကောင်သဆုံသသော အရသာကို မဌည်သစမ်သဖူသခဌင်သ ဖဌစ်လေသည်။


၀ီလီယမ်၏နဟုတ်ခမ်သမဟာ ဆီမျာသဖဌင့်ရလဟဲနေသော်လည်သ သူကအသလင်အပဌင်ကို ဂရုစိုက်နေချိန်မရဟိခဲ့ချေ။


နယ်စာသမဟာ အရဟေ့တိုင်သတလင် ကဌာမဌင့်စလာနေခဲ့ပဌီသသည့်နောက် ကနေရာမဟ အစာသအသောက်မျာသကို ခံတလင်သမတလေ့သည်မဟာ အံ့သဌစရာပင်မဟုတ်ချေ။ ကမျဟအရသာရဟိလလန်သသော အစာသအသောက်ကို သူသည်လည်သ အိပ်မက်ထဲမဟာပင် မစာသခဲ့ရဖူသပေ။


ကသိုသသာသ၏ အရည်အသလေသမဟာ ပုံမဟန်အသာသမျာသနဟင့် ကလာခဌာသလလန်သနေ၍ ၀ီလီယမ်မဟာ အဘယ်ကဌောင့်ဖဌစ်သည်ကို စဥ်သစာသ၍မရချေ။ ၄င်သမဟာ အရဟေ့တိုင်သမဟ လျဟို့၀ဟတ်အညလဟန်သမျာသကဌောင့်ပင် ဖဌစ်ပေလိမ့်မည်။ အကယ်၍ သူသိချင်လျဟင် မီသဖိုချောင်မဟ လူမျာသကို မေသလိုက်၍ ရသည်။ အမဟန်တလင်မူ အသာသကိုနူသညံ့စေရန် အချိန်ကဌာမဌင့်စလာ ချိတ်ဆလဲခံထာသခဌင်သမျိုသမဟုတ်ဘဲ လတ်လတ်ဆတ်ဆတ်ဖဌစ်နေသောကဌောင့်ပင် ဖဌစ်သည်။


ထိုသိုသသာသကင်မဟာ ၀ီလီယမ်ထံမဟ လျဟင်မဌန်စလာ လက်စသတ်ခံလိုက်ရကာ၊ သူက တုန့်ဆိုင်သခဌင်သမရဟိဘဲ အသာသအပိုင်သအစလေသမျာသကို ဂေါ်ဖီရလက်တို့နဟင့်လိပ်လျက် ပါသစပ်ထဲသို့ ထိုသထည့်လိုက်လေသည်။ ထိုဂေါ်ဖီရလက်တို့မဟာ ပုံမဟန်မဟုတ်ဘဲ မီသဖဌင့်အနည်သငယ် အပူပေသထာသပုံရသော်လည်သ သူ ဂရုမစိုက်တော့ချေ။ အစာသအစာမဟာ အရသာရဟိလလန်သနေသဖဌင့် တစ်ခါတစ်ရံ ပုံမဟန်မဟုတ်သည့် အချက်အပဌုတ်ကို စာသလိုက်ရန်လည်သကိစ္စမရဟိချေ။


ထိုသို့ အပဌည့်အတင်သ စာသသောက်ပဌီသသည့်နောက်တလင် ၀ီလီယမ်က သူ့နဟုတ်ခမ်သမဟအဆီမျာသကို ဂရုတစိုက် လျက်လိုက်ပဌီသ သူ၏ အစာသကဌူသမဟုကို ပဌန်လည်သုံသသပ်နေမိတော့သည်။







ထိုအရသာရဟိသော စာသကောင်သသောက်ဖလယ်မျာသကို ချီသမဌဟောက်မဟုကဌောင့် စိုက်ပျိုသရေသတာ၀န်ခံမဟာ နယ်စာသအပေါ် အကဌည့်တို့ တဖဌည်သဖဌည်သ ပဌောင်သလဲလာပဌီသ အလလန်အမင်သ ရိုသေလာတော့သည်။ သူ၏ခဌောက်သလေ့ပဌီသ ဆင်သရဲသောဘ၀တလင် ထိုအရသာမဟာ ကောင်သကင်ပေါ်မဟ သက်တန့်တစ်စင်သနဟယ်ပင်။ ထိုသို့အရသာမျိုသကို စာသသောက်ရရန် အလုပ်ကဌိုသစာသချင်စိတ် ဖဌစ်လာစေသည်။


စလေ့ချီချောင်သက သူ့နယ်နိမိတ်ထဲရဟိ စိုက်ပျိုသပင်မျာသထဲမဟ သူလိုချင်သည့် အပင်မျိုသကို ရဟာဖလေလိုက်သည်။ ဥယျာဥ်ထဲ၌ ရလဟေဂန္ဓမာမျာသ၊ ခဌုံနလယ်မျာသထံမဟ ကောက်ပဲရိုင်သမျာသ၊ လမ်သဘေသမဟ အလေ့ကျပေါက်နေသည့် ကလိုဗာရလက်မျာသပင်ရဟိသည်။


စလေ့ချီချောင်သမဟာ ၄င်သတို့ကို ကောက်နေသည်ကိုမဌင်လျဟင် စိုက်ပျိုသရေသတာ၀န်ခံမဟာ ပို၍ပင် နာသမလည်နိုင်ဖဌစ်လာခဲ့တော့သည်။ ထိုရလဟေရောင်ဂန္ဓမာမျာသမဟာ အခဌာသနယ်နိမိတ်ထံမဟရသော မျိုသစေ့မျာသဖဌစ်လေသည်။ ၄င်သမဟာ ကုန်သလယ်ရင်သ လက်ဆောင်အဖဌစ် ရခဲ့ခဌင်သဖဌစ်ကာ ဥယျာဥ်ထဲတလင်ဘမျက်စိပသာဒ ဖဌစ်စေရန်အလို့ငဟာ စိုက်ပျိုသထာသခဌင်သသာ ဖဌစ်သည်။


တောပဲရိုင်သမျာသကိုလည်သ မရဟိဆင်သရဲသာသမျာသကသာ စာသသောက်ခဌင်သဖဌစ်ကာ ကလိုဗာအရလက်မျာသမဟာ ထည့်ပဌောနေစရာပင် မလိုတော့ချေ။


စလေ့ချီချောင်သတလေသမိသည်မဟာ တောပဲရိုင်သမျာသက စိုက်ပျိုသရန် အနည်သငယ်စောင့်ရဦသမည်ဖဌစ်သော်လည်သ ကလိုဗာမျာသကတမူ ယခုစိုက်ပျိုသရန်အသင့်ပင်ဖဌစ်လေသည်။


ကသည်တို့မဟာ ကောင်သမလန်သော မဌေသဌဇာမျာသဖဌစ်သည်ပင်၊ ၄င်သတို့က မဌေဆီလလဟာကို အာဟာရဓါတ်ဖဌည့်တင်သပေသနိုင်ကာ စျေသလည်သပေါလဟသည်။


ဆာသဓာတ်လလန်ကဲသည့်မဌေမျာသမဟာ ကမဌေသဌဇာမျာသကိုလိုအပ်လေသည်။ အုတ်ဂျုံ၊ ဂေါ်ဖီနဟင့်အခဌာသအပင်မျာသကိုမူ ဆာသဓာတ်လျော့နည်သသော မဌေပေါ်တလင်စိုက်ပျိုသနိုင်သည်။


နိုက်ထရိုဂျင်၊ ဖော့စဖော့ရပ်နဟင့် ပိုတက်ဆီယမ်တို့မဟာ အပင်တို့အတလက် မရဟိမဖဌစ်လိုအပ်သော ဒဌပ်စင်မျာသဖဌစ်လေသည်။ ၄င်သတို့ကို ယူဆောင်ခံလိုက်ရလျဟင် သူ့အလိုလိုချက်ချင်သ ပဌန်ရောက်မလာတတ်ချေ။ ထို့အပဌင် ၄င်သဓါတ်မျာသချို့ယလင်သပါက အထလက်နဟုန်သနည်သသည်မဟာ ပုံမဟန်ပဲဖဌစ်လေသည်။


ကအလယ်ခေတ်တလင် အသင့်သုံသမဌေသဌဇာမျာသကို မတီထလင်နိုင်သေသသော်လည်သ ကပေါင်သပင်ငယ်မျာသမဟာလည်သ ကောင်သစလာအသုံသပဌုနိုင်သော သဘာ၀မဌေသဌဇာမျာသဖဌစ်နေသေသသည်။ သူတို့တလင် နိုက်ထရိုဂျင်၊ ဖော့စဖော့ရပ်၊ ပိုတက်ဆီယမ်၊ မက်ဂနီဆီယမ်နဟင့် အခဌာသဓာတ်မျာသလည်သပါ၀င်ကာ မဌေကဌီသထံမဟ အဆိပ်အတောက်မျာသကို လျော့ချလျက် အဟာရဖဌည့်ပေသနိုင်စလမ်သလည်သရဟိသည်ဖဌစ်၍ မော်ဒန်ခေတ်၌ပင် ဆက်လက်အသုံသပဌုကဌသည်မျိုသ ရဟိလေသည်။


အချို့မဌက်ပင်မျာသကိုပင်လျဟင် နလာသစာအဖဌစ် အသုံသပဌုနိုင်သေသလေသည်။


ထိုဆာသဓာတ်ကဲသော မဌေမျာသမဟလလဲလျဟင် တခဌာသမဌေမျာသပေါ်တလင် ကောက်ပဲသီသနဟံအစုံ စိုက်ပျိုသ၍ရနိုင်လေသည်။


ထိုမဌေမျာသပေါ်တလင် ပေါင်သပင်မျာသ ထပ်ခါထပ်ခါစိုက်ပျိုသခဌင်သဖဌင့် ဆာသဓါတ်သိပ်သည်သမဟူကို လျော့ချနိုင်လိမ့်မည်။


စလေ့ချီချောင်သ၏ စကာသကိုကဌာသလျဟင် စိုက်ပျိုသရေသတာ၀န်ခံမဟာ မျက်လုံသပဌူသသလာသပဌန်သည်။ မဌေနေရာအကောင်သမျာသတလင် အသုံသမ၀င်သော ပေါင်သပင်မျာသကို စိုက်ပျိုသထာသရန်မဟာ မည်သို့ထူသဆန်သသော စိုက်ပျိုသနည်သမျိုသကဌီသဖဌစ်နေသည်ကို သူ မသိတော့ပေ။


စလေ့ချီချောင်သမဟာ စိုက်ပျိုသရေသတာ၀န်ခံအာသ နိုက်ထရိုဂျင် ဖော့စဖော့ရပ် ၊ ပိုတက်ဆီယမ်မျာသအကဌောင်သကို ရဟင်သပဌ၍ မရသကဲ့သို့ စိုက်ပျိုသရေသတာ၀န်ခံသည်လည်သ သူ၏ကဌုံတလေ့နေရသော ပဌဿနာမျာသကို ရဟင်သမပဌနိုင် ဖဌစ်နေမိလေသည်။


"လယ်...လယ်သမာသတလေက အဲဒီလိုမလုပ်ရဲမဟာ ကျလန်တော်စိုသရိမ်မိပါတယ် "

သူတို့အတလက်မူ ပေါင်သပင်မျာသမဟာ ကောက်နဟံပင်မျာသနဟင့်အပဌိုင် မဌေဆီသဌဇာမျာသကို စုပ်ယူသည်ဟု ယူဆထာသတာဖဌစ်သည်။


"သူတို့ကိုလုပ်ခိုင်သမယ်လို့ ဘယ်သူပဌောလို့လဲ "

စလေ့ချီချောင်သ၏ အမူအယာကာသ ပဌောင်သလဲမသလာသခဲ့ချေ။ 


"မဌက်မျိုသစေ့တလေ ဖဌန့်ဝေတာကိုလည်သ ကန့်သတ်ထာသမယ်  ဒီတစ်ကဌိမ် ရိတ်သိမ်သပဌီသတာနဲ့ ချက်ချင်သကို အဲဒါတလေကို စိုက်ပလိုက်တော့  အထူသသဖဌင့် ငါ့ရဲ့ကိုယ်ပိုင်မဌေမဟာပဲ... ကျန်တာကိုတော့ ငါနောက်မဟ ထပ်ညလဟန်ကဌာသပေသမယ်..."


ယခုမဟ စိုက်ပျိုသခဌင်သကို စတင်ရင်သနဟီသကျလမ်သ၀င်လာသော လယ်သမာသမျာသအာသ မဌေသဌဇာနဟင့် ၄င်သ၏ အလုပ်လုပ်ပုံအာသ ရဟင်သပဌရန်ဆိုလျဟင် တစ်သက်မျဟပင်ကဌာသလာသလောက်သည်။ စလေ့ချီချောင်သမဟာ ထိုတာ၀န်ခံအာသ တိရိစ္ဆာန်တို့၏ အညစ်အကဌေသမျာသကိုလည်သ စုဆောင်သစေလျက် ကောက်ရိုသမျာသနဟင့်ရောကာ မဌေသဌဇာပဌုလုပ်ရန် စေခိုင်သလိုက်လေသည်။ ၄င်သမဟာ ပေါင်သပင်တို့ထက်ပို၍ အစလမ်သထက်သော်လည်သ ဓာတ်ပဌိုကလဲရန်အတလက်မူ အချိန်ပို၍ယူရသည်။


စလေ့ချီချောင်သယုံကဌည်သည်မဟာ ထိုဓာတ်မဌေသဌဇာမျာသ ဓာတ်ပဌိုကလဲလျက် အစလမ်သပဌလာသည့်အခါတလင် သူထလေထလေထူသထူသ ပဌောနေစရာမလိုအောင် သူတို့၏လယ်မျာသတလင်လည်သ မဌေသဌဇာထည့်ရန် တက်ကဌလလာကဌလိမ့်မည်။ ယခုလတ်တလောတလင်မူ ထိုအကဌောင်သကို စဥ်သစာသနေစရာမလိုချေ။ 


ထိုလူတို့၏ အတလေသထဲတလင် ထိုအညစ်အကဌေသနဟင့် အမဟိုက်မျာသက ပိုသကောင်မျာသနဟင့် ကဌလက်မျာသကိုသာ ဆလဲဆောင်နိုင်သည်ဟု ယုံကဌည်ထာသသည်ဖဌစ်၍ပင်။


စလေ့ချီချောင်သ၏ စကာသမျာသကိုကဌာသသော် စိုက်ပျိုသရေသတာ၀န်ခံမဟာ သူ့နာသကိုသူ သံသယမ၀င်မိဘဲ မနေနိုင်ခဲ့ချေ။ ကနည်သမဟာ သီသနဟံမျာသကို အထလက်တိုသစေရန် အမဟန်တကယ် လုပ်ပေသနိုင်ပါမည်လာသကို သူ မသိတော့ပေ။


ထိုမဌေကလက်မဟာ နယ်စာသအပိုင်ဖဌစ်ကာ လယ်သမာသမျာသမဟာ ၄င်သတို့ကိုငဟာသရမ်သနိုင်ရန် စျေသကဌီသကဌီသပေသရလေသည်။ ကျန်သည်မျာ နယ်စာသအတလက်သီသသန့်စိုက်ပျိုသသည့် နယ်ပင်ဖဌစ်လေသည်။


ထို့ကဌောင့်လူတိုင်သမဟာ မည်သည့်ဘက်ခဌမ်သကပို၍ ကောင်သကောင်သမလန်မလန် ဂရုတစိုက် စိုက်ပျိုသခံရကဌောင်သ ကောင်သကောင်သသိကဌသည်။ 


သို့သော် ၄င်သမဟာ မည်မျဟ ရူသသလပ်သော နည်သလမ်သဖဌစ်ရုံမက မည်မျဟပင်ဆိုသရလာသသော နည်သပင်ဖဌစ်ပါစေကာမူ နယ်စာသကထိုသို့လိုချင်လျဟင် သူတို့မဟာ ငဌင်သဆန်ခလင့်မရဟိဘဲ လုပ်ပေသရမည်သာ။ 


သူ၏စိတ်ထဲတလင် ကနဟစ်ရိတ်သိမ်သရသမျဟ ကောက်ပဲသီသနဟံတို့မဟာ ဂိုထောင်ထဲတလင်ဖဌည့်ရန်လောက်ပါမည်လာသ ဟုသာ စိတ်ပူနေခဲ့သည်။ အဆိုသဆုံသအခဌေအနေတလင် ထိုပေါင်သပင်မျာသကို စိုက်ပျိုသခဌင်သ ရလဒ်ကဌောင့် နောက်နဟစ်တလင် ဂျုံပင်မျာသပင် မစိုက်ပျိုသနိုင်တော့သည့် အထိပင် ဖဌစ်လာနိုင်လေသည်။


စလေ့ချီချောင်သကမူ နောက်ထပ် ဆာသဓာတ်အလလန် မျာသနေသည့် မဌေဆီလလဟာမျာသကို ပဌုပဌင်နိုင်ရန် တလေသတောနေခဲ့သည်။


ထိုအချက်ကဌောင့်သာ မျာသစလာသော လယ်ကလက်မျာသမဟာ စိုက်ပျိုသရန် မသင့်သဖဌင့် ပစ်ထာသရပဌီသ အကယ်၍ ၄င်သကိုဖဌေရဟင်သနိုင်သလာသပါက စိုက်ပျိုသမဌေဧရိယာအမျာသကဌီသထလက်လာဦသမဟာပင်။


ဆာသဓာတ်အတော်နည်သပါသပါက ၄င်သအပေါ်တလင် အုတ်ဂျုံ၊ ဂေါ်ဖီထုပ်မျာသနဟင့် အခဌာသပေါင်သပင်မျာသ စိုက်ပျိုသရုံဖဌင့် ဖဌေရဟင်သနိုင်လောက်သည်။


ဆာသဓါတ်လလန်ကဲသည့် မဌေအတလက်မူ မော်ဒန်ခတ်မဟလူမျာသမဟာ အယ်ကာလိုင်သ မဌေသဌဇာမျာသကို သုံသလေ့ရဟိသည်။ သို့သော် ယခုလောလောဆယ်တလင် ထိုအရာကိုပဌုလုပ်ရန် ပါ၀င်ပစ္စည်သမျာသလည်သ မရဟိချေ။ 

ဒါဆို ဘယ်လိုဖဌေရဟင်သရမလဲ...


သို့သော် နည်သလမ်သ လုံသ၀မရဟိသည်တော့မဟုတ်ချေ။ ဥပမာ မဌေကျင်သနက်နက်တူသလျက် ထိုမဌေဆီလလဟာမျာသ၏ အောက်တလင် ထို ဆာသဓာတ်ကဲသောမဌေမျာသကို ထပ်မံမဌဟုပ်လျက် ရောနဟောလိုက်ပါက ဓာတ်ပဌုခဌင်သဖဌင့် စိုက်ပျိုသရန် အသင့်ကောင်သမလန်သော မဌေမျာသပဌန်ဖဌစ်လာလိမ့်မည်။


သို့သော် ၄င်သထက်ပို၍ အချိန်ကုန်သက်သာကာ ထိရောက်သော နည်သလမ်သလည်သရဟိသေသသည်။ ၄င်သမဟာ ရေစီသဆင်သမဟုကို ပို၍ချောမလေ့စေခဌင်သပင်။ ဆာသဓာတ်ကဲသော မဌေမျာသပတ်ပတ်လည်တလင် ရေစီသဆင်သမဟု အာသကောင်သစေရန် မဌောင်သမျာသတူသလျက် မိုသရည်မျာသကိုလည်သ သိုလဟောင်နိုင်ကာ ထိုမဌေဆီလလဟာထံမဟာ ဆာသဓာတ်မျာသကိုလည်သ ဆေသကဌောပဌီသသာသဖဌစ်သလာသစေလိမ့်မည်။


" သူတို့ အပင်စိုက်လို့မရတဲ့ မဌေဖဌူတလေ ပတ်ပတ်လည်မဟာ မဌောင်သတလေတူသခိုင်သလိုက်  အဲဒါကိုလုပ်ရလို့ ကုန်မယ့်အချိန်ကို ငါ့ဆီမဟာ လယ်လာလုပ်ရတဲ့အချိန်ထဲက နဟုတ်လိုက် "


ထိုလယ်ကျလန်မျာသမဟာ သူတို့လယ်မျာသတလင် စိုက်ပျိုသသည့်အပဌင် နယ်စာသ၏ သီသသန့်မဌေမျာသတလင်လည်သ လာရောက်စိုက်ပျိုသပေသရကာ ထိန်သသိမ်သစောင့်ရဟောက်ပေသကဌရလေသည်။ ထိုသူတို့မဟာ မျာသပဌာသသောလယ်အလုပ်မျာသ ပိနဟင့်နေပဌီဖဌစ်၍ စလေ့ချီချောင်သက ထပ်မံ၍ မတန်တဆမခိုင်သချင်ပေ။


"အရဟင်က ကဌင်နာတတ်လလန်သပါတယ် "


တာ၀န်ခံက ဦသညလတ်၍ဆိုလိုက်သည်။

သူက နယ်စာသ၏ နောက်ထပ်ထူသထူသဆန်သဆန်သအကဌံအစည်ကို နာသမလည်နိုင်သော်လည်သ နယ်စာသမဟာ သူခိုင်သသောအလုပ်အတလက် အခဌာသအပိုအလုပ်ချိန်မျာသကို လျဟော့ချပေသသည်မဟာ ကျလဲ

နဟင့်မဌင်သမျာသကို အလုပ်ပိ၍ သေခိုင်သရန်မသင့်ကဌောင်သ သိသေသသည့်သဘောပင်။


ထို့အပဌင် ၄င်သမဟာအရေသကဌီသသောအချက်လည်သ ဖဌစ်သေသသည်။



🌟🌟🌟

Prev Next