Chapter 131
Viewers 8k
Chapters 237

🊊Arc 9 - ကျင့်ကဌံရေသဇာတ်လမ်သ၏ အဖဌည့်ခံ

Chapter 131


9.7



ရလဟယ်လင် ကောင်သကင်လဟေခါသထိပ်သို့ ချဉ်သကပ်လာနေသော အဓိကဇာတ်ကောင်ကို တစ်ချက်ကဌည့်လိုက်ပဌီသနောက် လဟည့်ကာပဌောလိုက်သည်။ 


"ဆရာတူ တူလေသ၊ ပဌန်ကဌရအောင်။ ငါ ဒီကလေသကိုခေါ်မယ်ဆိုတာ ဆုံသဖဌတ်ပဌီသပဌီဆိုတဲ့အကဌောင်သ ဆရာတူအစ်ကိုကဌီသ အသိပေသလိုက်။ သူ့ကို တခဌာသသူတလေ ခေါ်ဆောင်သလာသမဟာ ခလင့်မပဌုနိုင်ဘူသ"


သူ့လက်သည် အဓိကဇာတ်ဆောင်ဆီသို့ ပေါ့ပေါ့ပါသပါသ ညလဟန်ပဌလိုက်သည်။ သူ၏အပဌုံသသည် အလလန်ဆလဲဆောင်မဟုရဟိကာ နူသညံ့သိမ်မလေ့နေသော်လည်သ စကာသပဌောရန် ပါသစပ်ကိုဖလင့်လိုက်သောအခါ ယနေ့ သူ ကနေရာသို့ ရောက်ရဟိနေရသည့် အကဌောင်သအရင်သကို လူတိုင်သ သိလိုက်ရသောကဌောင့် တုန်လဟုပ်သလာသကဌသည်။


 "ငါ သူ့ကို ကဌုံသလို ရလေသချယ်လိုက်ပေမယ့် အဲဒီလူက ဘယ်လိုပုံစံလဲဆိုတာကို ငါ မဟတ်မိနေသေသတယ်။ မနက်ဖဌန်မဟ ငါ သူ့ကို ခေါ်မသလာသနိုင်ရင် တောင်ထလတ်အာသလုံသဆီ လဟည့်ပတ်ဆလေသနလေသဖို့ ငါ့ဆရာကို ငါနဲ့အတူ ခေါ်လာခဲ့မယ်။ ဆရာက ငါ့ကို ဂရုအစိုက်ဆုံသပဲ။ ပဌီသတော့ ငါလိုချင်တဲ့ လူ ဒါမဟမဟုတ် အရာဝတ္ထုတလေကို မရနိုင်တာမျိုသလည်သ မရဟိခဲ့ဖူသဘူသ"


တပည့်ငယ်လေသသည် အလျင်အမဌန် ခေါင်သညိတ်လိုက်ပဌီသ ရလဟယ်လင်အာသ အဝေသသို့ ခေါ်ဆောင်သလာသခဲ့သည်။ သူ့ကို ခေါ်ဆောင်သလာသစဉ်တလင် တပည့်စုဆောင်သရေသ အခမ်သအနာသ တာဝန်ခံမျာသနဟင့် အကဌည့်ချင်သဖလဟယ်ကာ ရလဟယ်လင် အလိုရဟိသောသူကို ကောင်သကောင်သမလန်မလန် စောင့်ရဟောက်ပေသရန် တောင်သဆိုခဲ့သည်။


သူတို့ ကောင်သကင်၊ မဌေကမ္ဘာ၊ အသိဥာဏ်နဟင့် အဝါရောင်တောင်ထလတ်မျာသ အလလယ်တကူ ပဌိုပျက်မသလာသစေချင်ဘူသဆိုရင်ပေါ့...

အရဟင်ကဌက်သလေသရောင်မီသလျဟံသည် သူ ပဌောခဲ့သည့်အတိုင်သ အတိအကျ အမဌဲပဌုလုပ်ခဲ့သည်။ သူ့တပည့်၏စကာသမျာသကို... သူတို့ အလေသအနက်ထာသလိုက်ခဌင်သသည် ပိုကောင်သပေလိမ့်မည်။


ရလဟယ်လင် ထလက်သလာသပဌီသနောက် သိပ်မကဌာခင်မဟာပင် ကောင်သကင်လဟေကာသထိပ်၌ သူ ပါဝင်ပတ်သက်ခဲ့သည့် အဖဌစ်အပျက်သည် ကောင်သကင်ဓာသဂိုဏ်သတစ်ခုလုံသသို့ ပျံ့နဟံ့သလာသခဲ့သည်။ သူ့ပဌောစကာသမျာသ၊ သူ့သဘောထာသနဟင့် သူ၏ပေါ်ထလက်လာမဟုသည် လူအမျာသ ဆလေသနလေသသည့်အကဌောင်သအရာမျာသ၏ အဓိကအချက်မျာသ ဖဌစ်လာခဲ့သည်။ အချို့လူမျာသသည် သူ့ကို အလလန်ချီသကျူသလေသစာသလာကဌသည်။ နောက်ဆုံသတလင် သူ့နောက်ခံသည် အလလန်အာသကောင်သလလန်သကာ ထိုကဲ့သို့စကာသမျာသပဌောရသည့် အကဌောင်သရင်သသည် သူ့နောက်ခံကဌောင့်ဟု ပဌော၍ရပေသည်။


လူမျာသစလာတို့သည်လည်သ အရဟင် ကဌက်သလေသရောင်မီသလျဟံ၏ တပည့်မျာသဖဌစ်လာချင်ကဌသည်။


သို့သော် တခဌာသသူမျာသသည် သူ့ကို မကျေနပ်ကဌပေ။ မည်သို့ပင်ဆိုစေကာမူ သူ၏ဝေဖန်ပဌောဆိုချက်မျာသသည် တကယ်ကို ရန်စလပေသနိုင်ခဲ့သည်...


ရလဟယ်လင် တိတ်ဆိတ်ခဌင်သတောင်ထလတ်ဆီသို့ ပဌန်သလာသသောအခါ ထိုလူသည် သူ၏တံခါသပိတ် ကျင့်ကဌံခဌင်သအမဟုကို မပဌုလုပ်ရသေသပေ။ ၎င်သသည် သူ့ကို အနည်သငယ် အံ့အာသသင့်သလာသစေသည် နောက်ဆုံသတလင် ထိုလူသည် သူ့ကိုယ်သူ တံခါသပိတ်ကျင့်ကဌံတော့မည်ဟု ပဌောခဲ့သည်... ထို့နောက် ယနေ့မနက် ရလဟယ်လင် ထလက်လာသည့်အခါ ထိုလူ သေချာပေါက် သူ့အခန်သထဲသို့ ဝင်သလာသခဲ့သည်။


ရလဟယ်လင်၏ သံသယအကဌည့်ဖဌင့် တလေ့ဆုံလိုက်သောအခါ ချီလန် ကို့ရို့ကာသယာသနိုင်စလာ ချောင်သဟန့်လိုက်ပဌီသ "ဒီနေ့ အပဌင်ထလက်ရတာ ဘယ်လိုခံစာသရလဲ"


ရုတ်တရက် ကလူသည် သူ့အတလက် စိတ်ပူနေမဟန်သ ရလဟယ်လင် သိလိုက်သည်...

"အတော်လေသ ကောင်သပါတယ်။ ကိုယ့်နေရာကို မသိတဲ့လူအနည်သငယ်ကလလဲရင် တခဌာသဘာပဌဿနာမဟ မရဟိပါဘူသ"


ချီလန် မျက်မဟောင်ကျုံ့ကာ မေသလိုက်သည်။ "သူတို့ မင်သကို ဒုက္ခရောက်အောင် လုပ်ခဲ့သေသလာသ"


ရလဟယ်လင် ရဟေ့သို့ငုံ့ကာ သူငယ်ငယ်တုန်သက သူ့မျက်နဟာကို ထိုလူ လက်ဖဌင့်ထိခဲ့သည့်အတိုင်သ သူ(ချီလန်) မျက်မဟောင်ကျုံ့ထာသသည်ကို သူ့လက်ကလေသဖဌင့် ထိလိုက်သည်။ သူ၏အပဌုံသသည် အထူသစလဲမက်ဖလယ်ကောင်သသော်လည်သ တစ်ချိန်တည်သမဟာပင် အပဌစ်လည်သကင်သစင်နေပဌန်သည်။


 "စိတ်လျဟော့ပါ။ ဘယ်သူ့ကိုမဟ ကျလန်တော့်ကို အနိုင်ကျင့်ခလင့် မပဌုဘူသ~ ဘာပဲဖဌစ်ဖဌစ် ဆရာ၊ ဆရာ့ရဲ့ ဂုဏ်သတင်သက အရမ်သကဌီသမာသလလန်သတယ်။ ဆရာ့ရဲ့ အထောက်အထာသကို ကျလန်တော် ချပဌသရလေ့ ဘယ်သူကမဟ ကျလန်တော့်ကို ပဌောရဲမဟာမဟုတ်ဘူသ"


သူ အလလန်နီသကပ်လာသောကဌောင့် ချီလန်၏အသက်ရဟူသံသည် သူ့လည်ချောင်သထဲတလင် တစ်စို့သလာသသည်။ လူငယ်လေသ၏ခန္ဓာကိုယ်သည် အခဌာသသူမျာသနဟင့်မတူဘဲ သစ်သာသရနံ့ကို သယ်ဆောင်ထာသပဌီသ ပဌုံသလိုက်သောအခါ သူ့မျက်လုံသထောင့်မျာသနဟင့် မျက်ခုံသမျာသသည် သူ့ကို ဖဌာသယောင်သသလေသဆောင်ရန် အထူသကဌိုသစာသနေသကဲ့သို့ ဆလဲဆောင်မဟုအပဌည့်ရဟိလဟသည်။


သို့သော် လက်ရဟိအသလင်အပဌင်ကို ရောက်သည်အထိ ထိုသူ အရလယ်ရောက်ကဌီသပဌင်သလာသည်ကို စောင့်ကဌည့်နေခဲ့သော လူတစ်ယောက်အနေဖဌင့် ကအရာမျာသသည် ရည်ရလယ်ချက်ရဟိရဟိ ပဌုလုပ်ခဌင်သမဟုတ်ကဌောင်သ ချီလန် ရဟင်သရဟင်သလင်သလင်သ နာသလည်ပေသည်။ သူ၏လက်ရဟိအပဌုံသသည် သူ့အတလက် သူ့နဟလုံသသာသနဟင့် အဆုတ်မျာသကို တူသဆလပေသချင်သည်အထိ ဖဌစ်စေလျဟင်တောင် ရည်ရလယ်ချက်ရဟိရဟိ ပဌုံသပဌခဌင်သမဟုတ်ပေ။


"ကိုယ့်ကိုယ်ကို ဘယ်သူဖဌစ်ကဌောင်သ ထုတ်ဖော်ပဌသဖို့ မင်သ သိနေသရလေ့ ကောင်သပါတယ်။ ငါအနာသရဟိနေသရလေ့ မင်သကျင့်ကဌံရေသလောကထဲမဟာ မင်သကန့်လန့်တိုက် လျဟောက်သလာသလို့ရတယ်" သူ့လက်ကိုဆန့်ကာ ရလဟယ်လင်၏ခေါင်သကို ပုတ်လိုက်သည်။ "ဘယ်လိုပဲဖဌစ်ဖဌစ် ရဟောင်မပဌေသတာက ပိုကောင်သတယ်"


ရလဟယ်လင် တစ်ကဌိမ် ခေါင်သငဌိမ့်လိုက်ပဌီသ သူ့မျက်နဟာသည် လိမ္မာပါသနပ်ပဌီသ နာခံမဟုရဟိလဟသည်။ "ဟုတ်ကဲ့ပါ။ တကယ်လို့ ကျလန်တော် ထလက်ပဌေသသလာသရင် ဆရာ ဘာဖဌစ်သလာသမဟာလဲ~"


ချီလန် သူ့ကို အာသကိုသရာမဲ့စလာ ကဌည့်လိုက်သည်။ အရင်ကနဟင့်ယဟဉ်လျဟင် အခုချိန်တလင် သူ ပိုကောင်သလာပဌီဖဌစ်ပဌီသ သူ့တပည့် သူ့အနာသ၌ နဟစ်ရာပေါင်သမျာသစလာ မရဟိခဲ့လျဟင်တောင် သူ အဆင်ပဌေသလာသပေလိမ့်မည်။ သို့သော် သူ၏စိတ်ဝိညာဉ် အရင်သအမဌစ်မဟ ထိန်သချုပ်ခဌင်သမခံရခဌင်သသည် သူ စိတ်အနဟောင့်အယဟက်ဖဌစ်လိမ့်မည်မဟုတ်ဟု မဆိုလိုပေ။


သူ၏စိတ်ခံစာသမဟုအခဌေအနေသည် လူငယ်လေသနဟင့် တိတ်တဆိတ် ချိတ်ဆက်နေခဲ့ပဌီသသာသဖဌစ်သည်။ သူ့အတလက် မျဉ်သကဌောင်သတစ်ကဌောင်သဆလဲကာ သူ့ကိုယ်သူ ထိုလူငယ်လေသထံမဟ ခလဲထုတ်ရန်ကိစ္စသည် မဖဌစ်နိုင်တော့ပေ။


"ဆရာရော အခု သက်သာလာပဌီလာသ" ရလဟယ်လင် လက်ညဟိုသထိုသကာ ညလဟန်ပဌလိုက်သည်။ ထို့နောက် ပန်သပလင့်လေသတစ်ပလင့်သည် ပေါ်လာပဌီသ ချီလန်၏ပုခုံသပေါ်၌ ပလင့်နေသည်။ "ဆရာ စိတ်ချလက်ချထာသပဌီသ ကျင့်ကဌံပါ~ ကောင်သကင်ဓာသဂိုဏ်သမဟာ ကျလန်တော် ဘာမဟဖဌစ်မဟာမဟုတ်ဘူသ"


ချီလန် အနီရောင်ပန်သလေသကို ဆလတ်ခူသလိုက်ပဌီသ ရလဟယ်လင် ထလက်ခလာသလာသသည်ကို ကဌည့်ကာ သူ့နဟလုံသသာသသည် စလမ်သအာသမဲ့သလာသသည်။


သူ နီသကပ်ချင်သော်လည်သ စိုသရလံ့လဟပေသည်။ သူ ပဌောလိုက်ချင်သော်လည်သ သူ့နဟုတ်ခမ်သမျာသကို မဖလင့်ဟရဲပေ။ ကကဲ့သို့သော စိတ်ခံစာသချက်မျိုသကို အချိန်အကဌာကဌီသ ခံစာသခဲ့ရသည်။ တံခါသပိတ်ကျင့်ကဌံခဌင်သသို့ ဝင်ရောက်ခဲ့သော်ငဌာသလည်သ တိုသတက်မဟု မရဟိနိုင်ပေ။ သို့သော် လူငယ်လေသကို ငေသကဌည့်ခဌင်သသည်လည်သ အသုံသမဝင်ပေ။ သူ ပိုကဌည့်လေလေ သူ့စိတ်ထဲရဟိ မီသတောက်သည် ပို၍ကဌီသမာသလာလေလေဖဌစ်သည်။


သူ သူတို့နဟစ်ယောက်ကဌာသရဟိ ဆက်ဆံရေသကို ဖိနဟိပ်ချုပ်တည်သမထာသချင်သော်လည်သ တစ်နေ့တလင် သူ့ကိုယ်သူ မထိန်သနိုင်တော့မည်ကို ပို၍ကဌောက်လာသည်။ သူတစ်ယောက်တည်သသာ မဌင်နိုင် ထိတလေ့နိုင်သည့်နေရာ၌ ကလူငယ်လေသအာသ ပိတ်လဟောင်ထာသချင်သည်။


ချီလန်၏အတလေသမျာသသည် သူ့နဟလုံသသာသထဲတလင် ရုတ်တရက်လဟိုင်သထန်နေချိန် ဇာတ်လိုက်၏ အတလေသမျာသသည်လည်သ ရဟုပ်ထလေသသလာသခဲ့သည်။


သူ၌ရဟိသမျဟအရာအာသလုံသနဟင့် ကောင်သကင်လဟေကာသကို တက်ရန် ကဌိုသစာသပဌီသနောက် အရာအာသလုံသ ပဌောင်သလဲသလာသပုံရသည်။


သူသည် ထိပ်ဆုံသသို့ရောက်ဖူသသည့် ပထမဆုံသလူမဟုတ်သော်လည်သ အကဌည့်မျိုသစုံဖဌင့် ကဌည့်ခဌင်သခံရသူဖဌစ်သည်။ သူ့အပေါ်သို့ ကျရောက်လာသော လူတိုင်သ၏အကဌည့်မျာသသည် ထူသဆန်သသလို၊ အချို့သည် နာသမလည်နိုင်သလို၊ အချို့သည် အာသကျသလို၊ စဥ်သစာသတလေသတောနေသလို၊ မနာလိုသလို ကဌည့်လာကဌပဌီသ အမျာသစုသည် ထူသဆန်သနေသည်...

ငယ်ရလယ်သော ကောင်လေသတစ်ယောက်သာဖဌစ်သည့် အဓိကဇာတ်ကောင်သည် သူ့ဘဝတလင် မည်သို့သော ကဌီသမာသသည့် အပဌောင်သအလဲမျာသ ဖဌစ်ပေါ်လာမည်ကို မသိသော်လည်သ ကောင်သကင်ဓါသဂိုဏ်သမဟ လူမျာသအာသလုံသသည် ထူသဆန်သသည်ဟုသာ သူ ခံစာသမိသည်။


အဓိကဇာတ်ကောင်သည် ယလီရဟောက်ဖုန်ဟု အမည်ရသည်။ ကောင်သကင်လဟေကာသအာသ တက်သူမျာသထဲမဟ သူသည် အငယ်ဆုံသမဟုတ်သလို အသက်အကဌီသဆုံသလည်သ မဟုတ်ပေ။ ရဟစ်နဟစ်သာသအရလယ်တလင် သူသည် အငဌင်သပလာသမဟုမျာသနဟင့် ခိုက်ရန်ဖဌစ်ပလာသမဟု အမျာသအပဌာသကို ကဌုံတလေ့ခဲ့ရပဌီသ ယခု သူ ကနေရာတလင် ရဟိနေပဌီဖဌစ်သောကဌောင့် သူ့အတိတ်ကို လုံသဝဖဌတ်တောက်ပစ်လိုက်သည်။


ထို့နောက် သူတို့ကိုကဌိုဆိုရန် ကောင်သကင်ဓာသဂိုဏ်သမဟ တာဝန်ပေသထာသသော တပည့်မျာသ၏ မိတ်ဆက်စကာသသည် သူ့အာသ ဆလဲဆောင်သလာသခဲ့သည်။


၎င်သသည် သူသိထာသသည့် ကမ္ဘာထက် အဆပေါင်သမျာသစလာ ကဌီသမာသကျယ်ပဌောသော ကမ္ဘာကဌီသဖဌစ်ပဌီသ သူ့အာသ စောင့်ကဌိုနေသော လျဟို့ဝဟက်ဆန်သကဌယ်မဟုမျာသ မျာသစလာရဟိနေပေသည်။



မနက်မိုသလင်သ၌ ကောင်သကင်သည် ကဌည်လင်ကာ တောက်ပနေသည်။ ကောင်သကင်ဓါသဂိုဏ်သအတလင်သ၌ ကောင်သကင်လဟေကာသနဟင့် ခိုင်မာသော ဆုံသဖဌတ်ချက်ရေကန်ကို ကျော်ဖဌတ်ပဌီသ တပည့်မျာသအဖဌစ်လက်ခံရန် အရည်အချင်သပဌည့်မီသောသူမျာသသည် ကောင်သကင်ဓါသဂိုဏ်သ၏ အစီအစဉ်မျာသကို လိုက်နာပဌီသ သက်ဆိုင်ရာလမ်သကဌောင်သအတိုင်သ ဆက်လျဟောက်သလာသကဌသည်။


လူတိုင်သကို အရည်အချင်သအလိုက် ပဌင်ပတပည့်နဟင့် အတလင်သတပည့်ဟူ၍ ခလဲခဌာသထာသသည်။ အရည်အချင်သနိမ့်လလန်သသူမျာသကို တောင်ထလတ်မျာသ၏အပဌင်ဘက်တလင် နေရန်စီစဉ်ပေသမည်ဖဌစ်သည်။ ကောင်သကင်ဓါသဂိုဏ်သသည် သူတို့အာသ သူတို့၏ဘဝနေထိုင်ရပ်တည်ရန် နေရာတစ်ခုပေသစလမ်သနိုင်ပဌီသ သူတို့ ကံကောင်သမည်ဆိုလျဟင် အချိန်အတိုင်သအတာတစ်ခုအထိ အသက်ကဌီသမဟုမရဟိဘဲ အသက်ဆက်ရဟင်နေစေရန် ဆေသလုံသအချို့ကိုပင် ရရဟိနိုင်လိမ့်မည်။


ကအမျိုသအစာသတလင် ပါဝင်သူအမျာသစုသည် အရည်အချင်သနိမ့်သော အသက်အရလယ်ကဌီသသူမျာသဖဌစ်ပဌီသ တပည့်စုဆောင်သရေသ စတင်ဖလင့်လိုက်သည့်အချိန်တိုင်သ ကကဲ့သို့သောလူမျာသ ရဟိလာလိမ့်မည်။ အချိန်ကဌာလာသည်နဟင့်အမျဟ ကောင်သကင်ဓါသဂိုဏ်သသည် ထိုလူမျာသကို ပဌန်လည်နေရာချထာသရန် သူတို့၏ကိုယ်ပိုင်နည်သလမ်သမျာသကို တီထလင်ကဌံဆခဲ့ကဌသည်။


သို့သော် ထိုအရာမျာသအာသလုံသသည် ယလီရဟောက်ဖုန်နဟင့် ဘာမဟမသက်ဆိုင်ပေ။ သူလျဟောက်နေသည့်လမ်သသည် အတလင်သတပည့်မျာသအာသ ခေါ်ဆောင်သလာသသည့်လမ်သဖဌစ်ပဌီသ သူ နောက်ဆုံသရလေသချယ်မဟုတလင် ပါဝင်နိုင်တော့မည်ဖဌစ်သည်။


ကရလေသချယ်မဟုသည် တပည့်သစ်မျာသအတလက် နောက်ဆုံသအဆင့်ဖဌစ်ပဌီသ မည်သည့်တောင်ထလတ်သို့ သလာသရမည်ကိုလည်သ အဆုံသအဖဌတ်ပေသလိမ့်မည်။ ၎င်သသည် ကတပည့်စုဆောင်သရေသ ထုံသတမ်သစဥ်လာညီလာခံကဌီသ၏ အဆုံသသတ်လက္ခဏာတစ်ရပ်လည်သ ဖဌစ်သည်။ ထိုအချိန်မဟစ၍ အသစ်လက်ခံထာသသော တပည့်တစ်ညသစီသည် နေရောင်ခဌည်မျာသ ဖဌာလက်နေသောလမ်သမျာသနဟင့် တစ်လမ်သသလာသတံတာသမျာသတစ်လျဟောက် သူတို့၏ကိုယ်ပိုင် ကျင့်ကဌံမဟုခရီသကို စတင်ကဌရပေလိမ့်မည်။ ကျင့်ကဌံရေသလောကတလင် သူတို့ မည်မျဟအတိုင်သအတာအထိ ရောက်ရဟိနိုင်စလမ်သသည် သူတို့ကိုယ်တိုင်အပေါ်၌သာမက ကရလေသချယ်မဟုအပေါ်တလင်လည်သ မူတည်ပေသည်။


ဆရာကောင်သတစ်ယောက် သို့မဟုတ် ကျလမ်သကျင်သူတစ်ညသကသာ တပည့်သစ်မျာသအတလက် ကလမ်သတစ်လျဟောက်တလင် လိုအပ်သော အကူအညီမျာသစလာ ပေသနိုင်သည်။ ထို့ကဌောင့် မနေ့ညက တပည့်သစ်မျာသစလာသည် ဘဝတူတပည့်အစ်ကိုမျာသအာသ မည်သည့်နေရာမျာသသို့ သလာသရင်ကောင်သလဲဟု မေသကဌသည်။


ကောင်သကင်၊ မဌေကမ္ဘာ၊ အသိဥာဏ်နဟင့် အဝါရောင်တောင်ထိပ်မျာသအာသလုံသသည် ယခုတစ်ကဌိမ်တလင် လူသစ်မျာသစုဆောင်သရန် အစီအစဉ်ရဟိသော်လည်သ မဌေကမ္ဘာနဟင့် အဝါရောင်တောင်ထလတ်၏ တောင်သခင်မျာသသာ ကိုယ်တိုင်ကိုယ်ကျ ရောက်လာခဲ့သည်။ တောင်ထိပ်နဟစ်ခုကဌာသရဟိ ကောင်သကင်နဟင့်မဌေကဌီသကဲ့သို့ ခဌာသနာသချက်ကို မပဌောနိုင်သော်လည်သ သူတို့၏ အရင်သအမဌစ်မျာသနဟင့် အရည်အချင်သမျာသအတလက် လိုအပ်ချက်မျာသသည် အလလန်ကလာခဌာသလဟသည်။ အဝါရောင်တောင်ထလတ်၏ တောင်သခင်သည် ဖန်ရဟန်သနောက်ဆုံသအဆင့်ရဟိ ကျင့်ကဌံသူတစ်ယောက်သာဖဌစ်ပဌီသ အခဌာသတောင်ထလတ်မျာသကဌာသတလင် သူ၏အဆင့်သည် စာရင်သထဲဝင်ရုံဟုသာ ဆိုနိုင်သည်။ မည်သို့ပင်ဆိုစေကာမူ အဝါရောင်တောင်ထလတ်သည် ပထမနေရာနဟင့် မတူညီသော ကမ္ဘာတစ်ခုဖဌစ်ပေသည်။ အဝါရောင်တောင်ထလတ်သည် ဆေသလုံသမျာသသန့်စင်ခဌင်သနဟင့် လက်နက်ပဌုလုပ်ခဌင်သကဲ့သို့သော အရာမျာသကို အလလန်အရေသပေသ လုပ်ကိုင်ခဲ့ပဌီသ သူတို့သည် ပုံမဟန်မဟုတ်သော နည်သလမ်သမျာသအပေါ် ပိုမိုအာရုံစိုက်ခဲ့သည်။


သို့သော် လူတစ်ယောက် မဌန်မဌန်ချမ်သသာချင်လျဟင် အဝါရောင်တောင်ထလတ်သို့ သလာသခဌင်သသည် မဆိုသလဟသည့်ရလေသချယ်မဟုပင်။ သူတို့တလင် တစ်ဖက်တစ်လဟမ်သမဟ စီသပလာသရေသ အမျာသအပဌာသ ရဟိပေသည်။


မဌေကမ္ဘာတောင်ထလတ်သည် လုံသဝခဌာသနာသပေသည်။ မည်သို့ပင်ဆိုဆို လူတိုင်သသည် မဌေကမ္ဘာတောင်ထလတ်၏ တောင်သခင်ဖဌစ်သော ဘိုသဘေသမိုသကဌိုသမဌဟာသ၏အမည်ကို အသိအမဟတ်ပဌုခဲ့ကဌသည်။ တပည့်တစ်ညသကို လက်ခံရန် လူကိုယ်တိုင်လာရောက်ခဲ့သောကဌောင့် သူ သဘောကျလာမည့် တစ်စုံတစ်ယောက်သည် ဂိုဏ်သအတလင်သ သူတို့၏စီနီယာကျမဟုနဟင့် အဆင့်အတန်သကို ချက်ချင်သကဌီသ ထလာသလာစေမည်ဖဌစ်သည်။


ကသည်မဟာ အဓိကဇာတ်ကောင် ကောင်သကင်ဓါသဂိုဏ်သတလင် သူငယ်ချင်သအစစ်မျာသ လုံသဝ မဖလဲ့နိုင်ခဲ့သော အကဌောင်သရင်သဖဌစ်နိုင်သည်။ သူ၏စရိုက်လက္ခဏာသည် အလလန်ထူသဆန်သပဌီသ သူ၏မျိုသရိုသစဥ်ဆက် အဆင့်အတန်သသည် အခဌာသသူမျာသထက် မဌင့်မာသလလန်သသော်လည်သ သူ၏အထက်အဆင့်ရဟိ ဆရာတူအစ်ကို၊ အစ်မမျာသနဟင့် နဟိုင်သယဟဉ်လျဟင် သူ၏ကိုယ်ပိုင်စလမ်သအာသသည် အလလန်နည်သပါသလလန်သသည်။ ကကဲ့သို့ဝန်လေသစရာကောင်သသော အခဌေအနေမျိုသတလင် သူသည် မိုက်မဲပဌီသ ချစ်စရာကောင်သသည့် ကလေသတစ်ယောက်အဖဌစ် ဆက်ရဟိနေနိုင်လျဟင် ပိုလို့တောင် စူသစမ်သချင်စရာ ဖဌစ်လာပေလိမ့်မည်။


တပည့်မျာသသည် တပည့်အသစ်မျာသအာသ တောင်ထလတ်ကဌီသလေသခုအကဌောင်သ သတင်သမျာသအပဌင် ကျန်တောင်ထလတ် (၃)ခု၏ အချက်အလက်မျာသကို အဓိပ္ပါယ်ရဟိသော လေသံဖဌင့် မျဟဝေချင်ကဌသည်။

Prev Next