MM Story Teller

Chapter 151

Viewers 8k

🦊Arc 10 - သောကနှင့်ပြည့်နေသော audio dramaစက်ဝန်း

Chapter 151

10.4 - ဝမ်းရော့ယီး...လမ်းခွဲရအောင်

သူယခုလေးတင် ထွက်လာသောကြောင့် နျန်စစ်မုတိုက်ခန်းသော့ကို သူနှင့်အတူယူလာခဲ့သည်။ ယခု အခန်းသို့ပြန်လာသည့်အခါ ထိုသော့ဖြင့်ပင် တံခါးဖွင့်ရတော့မည်။

အရင်ဆုံး ရွှယ်လင်၏အခြေအနေကို စစ်ကြည့်လိုက်ပြီး အနှီသူက အိပ်ပျော်နေလေသည်။ ဝမ်းရော့ယီး ဝယ်လာသမျှကို ဘေးချကာ ရွှယ်လင်အတွက် မနက်စာစချက်ပေးလေ၏။ နောက်တကြိမ် ရွှယ်လင်နိုးလာသည့်အခါ ဆန်ပြုတ်ကနူးအိ၍ ပျစ်သည့်အနေအထားသို့ရောက်နေပြီဖြစ်ကာ စားရန်အတွက်အသင့်ဖြစ်နေပြီ။

"အစာမရှိဘဲဆေးသောက်လို့မရဘူး...ဆန်ပြုတ်လေးအရင်စားလိုက်..." ရွှယ်လင်မှာ အိပ်ချင်မူးတူးဖြစ်နေဆဲ၊ ၎င်း၏မျက်လုံးတစ်စုံက အရည်ကြည်လေးများဖြင့် ရွှန်းလဲ့နေလေသည်။ သို့တစေ အမြန်ကွယ်လိုက်ပြီး ဝမ်းရော့ယီးကို ထပ်မကြည့်တော့ချေ။ ဆန်ပြုတ်ကိုလှမ်းယူပြီး အမြန်သောက်လိုက်ကာ ကမ်းပေးလာသောဆေးကို ခပ်သွက်သွက် သောက်လိုက်သည်။

ဝမ်းရော့ယီးက သူ့ဘေးမှလက်ချာရိုက်နေဆဲ။ "မင်းကိုယ်မင်းလည်းကြည့်ဦး...နေမကောင်းပဲနဲ့ ညဥ့်နက်တဲ့အထိ မနေသင့်ဘူး... ကောင်းကောင်းလည်းမအိပ်ဘူး... နေမကောင်း ဖြစ်နေတာကိုလည်း မပြောဘူး... ငါ့ကို မင်းကောင်လေးလို့ရော သဘောထားသေးလား..." သူလက်ဆန့်ထုတ်ပြီးရွှယ်လင်၏ခေါင်းကို ပွတ်သပ်ပေးလိုက်သည်။ ထိုသူက အဖျားတက်နေဆဲဖြစ်လေရာ နောက်တစ်ကြောင်းထပ်ဖြည့်ပြောလိုက်၏။

"တခြားကလေးတွေများ ငိုပြရင် သကြားလုံးရမယ်ဆိုတာသိကြတယ်...ဘာလို့ ဒီလောက်တုံးရတာလဲ...အကုန်လုံးကို စိတ်ထဲမှာသိမ်းထားလို့ရမယ်လို့ ထင်နေတာလား..."

အစက အွန်လိုင်းပေါ်တွင် လောင်နေသည့်ကိစ္စကို နျန်စစ်မုအားပြောရန် ကြံရွယ်ထားခဲ့သည်။ နျန်စစ်မုသာ သူ့ကိုလာရှာခဲ့လျှင် ထိုကိစ္စက ဖြေရှင်းပြီးသား ဖြစ်နေလောက်ပြီ၊ ဤမျှအထိ စိတ်သောကရောက်နေရတော့မည်မဟုတ်။ ဤပုံစံက ဝမ်းရော့ယီးကို နာကျင်စေသည်။

"မင်းပုံစံက လူတွေကို ဂရုစိုက်တတ်သလိုပဲနော်.." ရွှယ်လင် ဆေးသောက်နေခြင်းကို လက်စသတ်လိုက်သည်။ ထိုသူထံမှ လက်ချာအရိုက်ခံပြီးနောက် သူအမှားမလုပ်ထားသလို ဝန်မခံဘဲ အေးတိအေးစက်ဖြင့် ပြန်ပြောလိုက်သည်။

ဝမ်းရော့ယီးတယောက် ကြောင်အသွားခဲ့သည်။ ထိုကိစ္စများက မည်သို့များ ဤအခြေအနေအထိ ရောက်လာရသည်မသိ၊ သူစကားခေါင်းစဥ် လွှဲချင်သော်လည်း ပြောရမည့်စကားကို ရှာမရဖြစ်နေပြန်သည်။

သူအခြားသူများကို ဘယ်လိုဂရုစိုက်မလဲသိသည်မှာ အမှန်ပင်။ မုစစ်ချောင် နိုင်ငံခြားကိုရောက်လာချိန်တွင် ကလေးသာရှိသေးသည်။ ဦးလေးဖြစ်သူက အလုပ်များနေသောကြောင့် သူ့ကို ဂရုစိုက်ရန်အချိန်မရှိ၊ ထို့ကြောင့် မုစစ်ချောင်ထက် တစ်နှစ်ကြီးပြီး သူငယ်ချင်းဖြစ်သောသူ့ကို မုစစ်ချောင်အတွက် ဂရုစိုက်ပေးရန် အကူအညီတောင်းခဲ့သည်။ ဝမ်းရော့ယီးတွင် ညီလေးမရှိ၍ ထိုသူကို ညီတစ်ယောက်အဖြစ် ဂရုစိုက်ပေးခဲ့၏၊ အင်္ဂလိပ်စကားပြောကောင်းအောင် ကိုယ်တိုင်ကိုယ်ကျ လေ့ကျင့်ပေးခဲ့သည်။

သို့ထိတိုင် သူကြိုးစားပမ်းစား ပြုစုခဲ့ရသည့်ကလေးကို ဝက်တစ်ကောင်က ခိုးပြေးသွားခဲ့သည်၊ ဝမ်းရော့ယီးမှာ သူ့ခံစားချက်ကိုပင် မဆန်းစစ်နိုင်သေး။ နျန်စစ်မုနေမကောင်းဖြစ်နေ၍ အကျင့်အရ ဂရုစိုက်ပေးမိသည်။ ယခုမူ တဖက်လူက ထုတ်ပြောလာသည့်အခါ အခြေအနေက ထူးဆန်းသွားခဲ့လေ၏။

ထိုသူက ပုံသဏ္ဍာန်မျိုးစုံရှိသည်၊ လက်ရှိပုံစံထက် ပိုရှက်စရာကောင်းသည့် အရာရှိသော်လည်း နောက်ဆုံးတွင်မူ ရွှယ်လင် သည်ကမ္ဘာသို့ ရောက်မလာခင် အခြားလူတစ်ယောက်နှင့် ချစ်ကြိုက်မိသည်ကိုအပြစ်ပြော၍ မရပေ။ သည်တကြိမ်တွင်မူ အခြေအနေက ကွာခြားသွားလေပြီ။ ဝမ်းရော့ယီးမှာ အချိန်အကြာကြီးယူကာ စဥ်းစားနေပြီး မည်သည့်နေရာမှ စရမည်မသိ။ ရွှယ်လင်ထိုင်ချင်နေသည့်အခါ ခေါင်းအုံးကို အလိုလိုပြင်ပေးမိသွားသည်။

ရွှယ်လင်၏ အဖျားက မကျလာသေးပေ။ မျက်နှာကရဲနေပြီး နှုတ်ခမ်းများကဖြူဖျော့နေခဲ့ကာ မျက်တွင်းဟောက်ပင် ဖြစ်နေသလိုပင်။ "ဝမ်းရော့ယီး..."

ဤသည်မှာ နျန်စစ်မုကသူ့ကို အမည်အပြည့်အစုံခေါ်သည့် ပထမဆုံးအကြိမ်ပင်။ ဝမ်းရော့ယီးမှာ ရုတ်ချည်းပင်အာရုံစိုက်လိုက်မိပြီး အချို့အကြောင်းကြောင့် ထိတ်လန့်လာမိလေသည်။

"လမ်းခွဲရအောင်..."

ဆယ်ကျော်သက်လေးက အိပ်ရာပေါ်တွင်ထိုင်နေသည်၊ သည်မနက်လေးတွင် သူကြုံသလိုပစ်ထားသည့် ဂျက်ကပ်ကို ဝတ်ထားသည်။ အိပ်ရာမှနိုးလာ၍ နီရဲနေသော မျက်လုံးများက ပိုသိသာနေ၏၊ ကောက်ကွေးနေသော ဆံပင်တိုလေးက ပွနေပြီး သူ့ကို ချစ်စရာကောင်းသည့် ပုံပေါ်လာစေသည်။ သို့သော် မျက်နှာထားက သိပ်မကောင်းနေချေ။ နေမကောင်းနေ၍ နှုတ်ခမ်းများက ဖြူဖတ်ဖြူရော်နှင့် မျက်နှာလေးက ရဲနေသေးသည်၊ ငိုတော့မည့်နှယ် မျက်လုံးထဲတွင် မျက်ရည်အပြည့်။

မည်သို့ပင်ပြောပြော သူဝမ်းရော့ယီးထံကြည့်လာသည့် မျက်လုံးများက အေးစက် မှုန်မှိုင်းနေလေသည်၊ ထို့နောက် အနှီသူက ထပ်ပြောလာပြန်၏။

"လမ်းခွဲရအောင်..."

ရုတ်တရက် သတိလက်လွတ်ဖြစ်နေရာမှ နိုးထမလာခင်အထိ ဝမ်းရော့ယီးနားထဲတွင် ထိုစကားက အကြိမ်ပေါင်းများစွာ ပဲ့တင်ထပ်နေခဲ့သည်။ သူသည်ကား နျန်စစ်မုကို မယုံနိုင်သလို ငေးကြည့်နေမိ၏၊ သူ့အကြည့်က စူးရှလွန်းနေသည်။ ဤပတ်သတ်မှုက သူ၏ အကြံပေးချက်ကြောင့် ဖြစ်လာရသည်မှာ မှန်သော်လည်း နှစ်ဦးသားက 'စမ်းကြည့်မယ်' ဆိုသော သဘောထားဖြင့်သာ စခဲ့ကြသည်၊ ထိုကလေးက သူ့အပေါ် မှီခိုလာသည်ကို သူသိနေ၏။ အရင်က သူ့အားကြည့်လာသည့် အကြည့်များက သက်သေပင်။

ယခု သူစဥ်းစားကြည့်ပြီးနောက် ဝမ်းရော့ယီး ချာတိတ်၏ မျက်လုံးများကို ကြည့်လိုက်သည်။ သူ၏စွတ်စိုနေသော မျက်လုံးလေးများက သနားစရာကောင်းသည့်တိုင် ရှင်းပါသည်။ သူ့အကြည့်များတွင် ဥပေက္ခာပြုမှုများရှိနေပြီး ဝမ်းရော့ယီး၏ နှလုံးသားကို ထိတ်လန့်စိတ်များဖြင့် တုန်လှုပ်သွားစေခဲ့သည်။ ဘာကြောင့်မှန်းမသိ၊ သူအနည်းငယ်နာကျင်နေမိ၏။

"ဘာလို့လဲ..." ဝမ်းရော့ယီးတယောက် မေးသည့်အချိန်မှာပင် ထိတ်လန့်နေလေပြီ။ "အမုန်းပွားတဲ့လူတွေကြောင့်လား..ငါမန်နေဂျာကိုပြောပြီးပါပြီ...အဲဒီလူတွေကို ထပ်ပြီးမနှောင့်ယှက်စေနဲ့...စိတ်ချပါ...ငါသူတို့ကို ထပ်ပတ်သက်ခွင့် မပေးတော့ပါဘူး..."

ရွှယ်လင် ခေါင်းခါပြလိုက်သည်။ သူသည် ထိုနေရာမှာပင် အင်မတန်တည်ငြိမ်စွာဖြင့် မလှုပ်မယှက်ထိုင်နေခဲ့၏။ ယင်းက ဝမ်းရော့ယီးကိုပို၍ပင် ပျာယာခတ်ကာ စိတ်ရှုပ်ထွေး သွားစေခဲ့သည်။

"အဲဒီကိစ္စကြောင့် မဟုတ်ဘူး...."

"ဒါဆို..."

"ဝမ်းရော့ယီး...ငါတကယ်မင်းကို သဘောကျတယ်...မင်းငါ့ကိုစကားပြောရင် အရမ်းနူးညံ့တာကို သဘောကျတယ်...ငါကမင်းရဲ့ကမ္ဘာကြီးလိုမျိုး ပြုံးပြလာရင်လည်း သဘောကျတယ်...ငါမင်းကိုစိတ်ဝင်စားနေတာတော့ သိပါတယ်...ဒါပေမဲ့ မင်းကတော့ငါ့ကို သဘောမကျဘူးလေ..." ထိုစကားကို ပြောနေစဥ်အတွင်း ရွှယ်လင်၏ မျက်နှာထားက ဗလာဖြစ်နေခဲ့ပြီး အမှန်တကယ်ကို လက်လျှော့လိုက်သယောင်။

"ဒါပေမဲ့လည်း ကိစ္စမရှိပါဘူး...မင်းငါ့ကိုတကယ် သဘောကျလာတဲ့အထိစောင့်နေနိုင်ပါတယ်...မင်းငါ့ကိုသံယောဇဥ်ရှိနေတာနဲ့ ကျေနပ်ပါတယ်...မင်းငါ့ကိုကျေးဇူးတင်ရမယ့်ရက်လည်း ရောက်လာမှာပါ..."

"ဒါဆို အခုကရော..?"

"ဒါပေမဲ့ အဲဒီစကားတွေအားလုံးက ငါမင်းကိုချစ်မိနေတယ်လို့ဆိုလိုတာလေ...မင်းမျက်နှာကိုမြင်တိုင်း နောက်လူတစ်ယောက်ကို မတွေးမိဘူး...နောက်တစ်ယောက်ကို ရှာဖို့ဆိုတာကတော့ဝေးရော....ငါ...နျန်စစ်မုက...မချစ်တတ်တာဖြစ်မယ်...ငါက စိတ်ပျက်စရာကောင်းချင်ကောင်းမယ်..ငါမင်းနေရာမှာ ဘယ်သူ့ကိုမှအစားမထိုးနိုင်ဘူး...ငါ့ကိုနားလည်ပေးနိုင်မယ့်သူလည်း မရှိတော့ဘူး..."

ဝမ်းရော့ယီး ပါးစပ်ဟကာ ငြင်းလိုက်ချင်သည့်တိုင် နျန်စစ်မု၏ နောက်ထပ်စကားက သူပြောမည့်စကားများကို ပိတ်ဆို့ပစ်လိုက်သည်။

"မုစစ်ချောင်...ဟုတ်တယ်မလား...ငါမနေ့က မင်းနဲ့တွေ့ချင်လို့ လာခဲ့တုန်းက သူ့ကိုတွေ့လိုက်တယ်..."

"ငါကသတိထားနေတုန်းပဲ..မင်းငါ့ကိုကြည့်တဲ့ပုံနဲ့ သူ့ကိုကြည့်တဲ့ပုံနဲ့ မတူဘူးလေ...မင်းသူ့ကိုသဘောကျနေတာ.."

ဝမ်းရော့ယီး ခေါင်းယမ်းကာ ငြင်းဆန်လေ၏။

"မဟုတ်ပါဘူး..."

"အခုသူ့ကို သဘောကျနေတဲ့လူ ရှိနေပြီ..သူတို့က အတူတူတောင်နေနေကြပြီ...ဒါကြောင့် မင်းက မင်းနှလုံးသားထဲက အပေါက်ကိုဖြည့်ဖို့ အစားထိုးရှာနေတာမလား.."

စကားတစ်လုံးချင်းစီတိုင်းက အသွားထက်သည့် ဓားတစ်ချောင်းလိုပင်၊ ဝမ်းရော့ယီး၏နှလုံးကို တန်းစိုက်သွားခဲ့သည်။ မူလက ထိုသို့သော ရည်ရွယ်ချက်မျိုးရှိခဲ့၍ ဘယ်လိုငြင်းရမလဲ မသိတော့ပေ။

"ငါက အချစ်လိုအပ်နေတယ်..ဒါပေမဲ့ ဒီလိုပုံစံမျိုးမဟုတ်ဘူး..."

"ဒီတော့...ဝမ်းရော့ယီး...လမ်းခွဲရအောင်..."

ဝမ်းရော့ယီး ရွှယ်လင်၏လက်ကို လှမ်းကိုင်ချင်သည့်တိုင် ဖယ်ရှားခံလိုက်ရသည်။ "ငါစကားမဆုံးသေးဘူး...ထပ်ပြောလိုက်ဦးမယ်..."

"မဟုတ်ဘူး..." ဝမ်းရော့ယီးမှာ မည်သို့ရှင်းပြရတော့မသိတော့။ ထိုသူအား ကယ်ရာမဲ့စွာဖြင့်ကြည့်ရင်း သက်ပြင်းချလိုက်မိလေ၏။ "မင်းထင်နေသလိုမဟုတ်ပါဘူး...မင်းငါရှင်းပြတာကိုလည်း နားမထောင်ဘူး..မင်းကအခု နေမကောင်းဖြစ်နေတယ်လေ..."

ဝမ်းရော့ယီးက ထပ်ပြောချင်နေသေးသော်လည်း ရွှယ်လင်မှာ ထိုအကြောင်းကိုထပ်မငြင်းခုန်ချင်တော့လေရာ ခပ်ပြတ်ပြတ်မောင်းထုတ်လိုက်လေတော့၏။

ရွှယ်လင်ကမတ်တပ်ရပ်ကာ အနည်းငယ်မျှဘေးဘီလှည့်ကြည့်သည်။ သူပိုသက်သာလာစေကာမူ သနားစရာကောင်းနေသည့် ပုံစံကြောင့် လူတိုင်းက ကရုဏာသက်နေကြဆဲပင်၊ ထို့ကြောင့် သူဟာသူဆေးသောက်နေသော ဆဲလ်ဖီပုံရိုက်ပြီး Weibo တွင်တင်လိုက်သည်။

[အရုဏ်ဦးချစ်သူ : ငါမကြာသေးခင်က အရမ်းပင်ပန်းလို့ နေမကောင်းဖြစ်သွားတယ်..ဒီမနက်နိုးလာတော့ ဖျားနေပြီ..[သောကရောက်နေတဲ့အီမိုဂျီ] ]

Weibo တွင်မက်ဆေ့ချ်တင်လိုက်သည်နှင့် ဇီးကွက် fan များ အများအပြားစုဝေးလာကြ၏။ သူမျက်ခုံးပင့်လိုက်ပြီး မနေ့ညကသီချင်းကို သွားကြည့်လိုက်သည်။ သူက Weibo ၏ ဝက်ဘ်ဆိုက်စာမျက်နှာတွင် အရှေ့မှဖော်ပြခံထားရပြီး ပြသနေသောမျက်နှာပြင်တွင် မှတ်ချက်များ ပြည့်ကျပ်နေ၏။ မက်ဆေ့အရမ်းများနေ၍ ၎င်းတို့အားလုံးမှာ တကြိမ်တည်းနှင့် ရှင်းခံလိုက်ရလေသည်။

သို့ထိတိုင် အမျိုးသမီးလေးများ၏ ရွှယ်လင်အတွက် မျောက်လေးများမွေးပေးချင်ကြောင်း၊ သူတို့နားက ကိုယ်ဝန်ရတော့မည်ဖြစ်ကြောင်း တစ်ယောက်တစ်ပေါက် ပြောနေကြသော စိတ်အားတက်ဖွယ် မှတ်ချက်များကိုတားဆီး၍မရချေ။

အချိန်တိုအတွင်း Weibo မက်ဆေ့ချ်တင်လိုက်သည်နှင့် မှတ်ချက်အများအပြားတက်လာသည်။ သူနေမကောင်းဖြစ်နေသည်ကိုကြားရသည့်အခါ အများစုကအားပေးကြပြီး လွန်ခဲ့သောနှစ်ရက်က သူ့အား မျက်နှာမပြနိုင်တော့ဟုဆိုကာ အမုန်းပွားနေခဲ့ကြသောမိန်းကလေးများကမူ အေးခဲတိတ်ဆိတ်နေကြလေ၏။ ၎င်းတို့၏မန်နေဂျာကပြောထား၍လည်းဖြစ်နိုင်သည်၊ ယခင်က ရွှယ်လင်အပေါ် ပြောမိခဲ့သမျှအတွက်တောင်းပန်ကြပြီး မှတ်ချက်များကို ဖျက်ပေးမည့်အကြောင်း ပြောလာခဲ့သည်။

ရွှယ်လင်သည် သူ၏မက်ဆေ့ချ်ကို ထပ်ဆင့်ပို့ပေးသူ၏ ပရိုဖိုင်ကိုနှိပ်လိုက်ပြီး follow လုပ်ထားသူအများစုက 'လူချောလေးများ၏အရုဏ်ဦး' ဘလော့ဂ်မှဖြစ်နေခဲ့သည်။ သူမက်ဆေ့ချ်ပို့လိုက်သည်နှင့် ဝမ်းရော့ယီးက တစ်ဆင့်ပြန်ပို့ခဲ့ခြင်းဖြစ်မည်။ ဝမ်းရော့ယီးကအိမ်ပင်ပြန်မရောက်သေးသည်ဖြစ်ရာ ၎င်းကိုလမ်းမှာပင်မြင်လိုက်ပုံရ၏။

[လူချောလေးများအရုဏ်ဦး: မင်းနေမကောင်းရင် ကောင်းကောင်းအနားယူ...ဖုန်းဆော့မနေနဲ့ဦး //[အရုဏ်ဦးချစ်သူ : ငါမကြာသေးခင်က အရမ်းပင်ပန်းလို့နေမကောင်းဖြစ်သွားတယ်..ဒီမနက်နိုးလာတော့ ဖျားနေပြီ..[သောကရောက်နေတဲ့အီမိုဂျီ] ]

ရွှယ်လင် နှုတ်ခမ်းစူလိုက်သည်။ သူ့ကိုအာရုံစိုက်မနေတော့ဘဲ unfollow လုပ်လိုက်ပြီး သူ၏ပုံမှန် follower စာရင်းထဲမှဖယ်လိုက်သည်၊ ထို့နောက် စဥ်းစားပြီးမှ ဘလော့လိုက်၏။

မတွေ့မမြင်ရလေ ကောင်းလေ။

အချိန်အတန်ကြာအောင် တုံ့ပြန်မှုမလာသည့်အခါ နျန်စစ်မုက တစ်ခဏသာစိတ်ဆိုးနေခြင်းဖြစ်သည်ဟု သူ့ကိုယ်သူ ဖြေသိမ့်လိုက်သည်။ နှစ်ရက်ခန့် စောင့်ပြီးသည့်နောက် သူ၏ရှင်းပြချက်က အသင့်ဖြစ်နေလောက်ပြီ။

သူကရိုးသားတယ်! နျန်စစ်မုကိုအစားထိုးဖို့မတွေးခဲ့သင့်ဘူး!

ဝမ်းရော့ယီး အသိစိတ်တို့ကို ပြန်လည်စုစည်းလိုက်ကာ ရွှယ်လင်သည် သူ၏ဖန်များမှ အရုဏ်ဦးချစ်သူအပေါ် နောက်တကြိမ်အမုန်းပွားကြသည့်အချိန်တွင် တကယ်ကိုဒေါသထွက်နေခဲ့ခြင်းဖြစ်ပြီး တမင်တကာစနောက်နေခြင်းမဟုတ်ကြောင်း သဘောပေါက်သွားရလေသည်။

သူ၏မန်နေဂျာကို အွန်လိုင်းပေါ်မှ CP စာများနှင့်ပတ်သတ်၍ ကြပ်မတ်ရန်ပြောခဲ့သည့်တိုင် အချို့သောပရိသတ်များက သူတို့ကိုအမိန့်ပေးနေသည့် ပုံစံပေါ်သောကြောင့် နားမထောင်ချင်ကြ။ သူတို့၏အရှင်သခင် တစ်ခုခုဖြစ်နေပြီဆိုသည်နှင့် အရုဏ်ဦးချစ်သူထံ စိတ်ဆိုးမာန်ဆိုးဖြင့် အပြေးအလွှားသွားကာ သူတို့၏အရှင်သခင်အပေါ် ကြိုက်ရဲသည့်သူကို သတ်ပစ်ချင်တတ်ကြသည်။

အစပိုင်းတွင် လူချောလေး၏အရုဏ်ဦးထံမှ မက်ဆေ့ချ်က အသုံးဝင်နေခဲ့ပြီး သူတို့တွင် ကောင်းမွန်သည့် သီးသန့်ဆက်ဆံရေးမျိုး ရှိနေကြောင်း သက်သေပြပြီးသားဖြစ်သွားခဲ့၏၊ သူ၏ follower များကို အရုဏ်ဦးချစ်သူက သူ့ပေါင်အားဖက်ထားခြင်း မဟုတ်ကြောင်း ပြသခဲ့သည်။ သို့ထိတိုင် ရွှယ်လင်ကသူ့ကိုဂရုမစိုက်တော့ဘဲ follow ပင်ဖြုတ်သွားခဲ့သေးသည်။

သူ၏မိန်းကလေးပရိသတ်များက ထိုအကြောင်းကို အထကောက်ကာ ခွင့်မလွှတ်နိုင်စရာဖြစ်လာခဲ့၏။

သူတို့၏နတ်ဘုရားက အာရုံစိုက်ခံရမှုကြောင့်လေးစားစရာကောင်းပြီး ဘယ်ကိစ္မဆို လွယ်ကူအောင် ကြိုးစားနိုင်သည်! အာပလာလူတစ်ယောက်မှ အခွင့်အရေးယူစရာမဟုတ်ပေ! အရာဏ်ဦးချစ်သူက သူ့ကိုယ်သူဘာများထင်နေပါသနည်း? အခြားသူများက ၎င်းတို့၏ ပတ်သတ်မှုကိုထုတ်မပြတတ်ပေ၊ ထိုသူက သူ့ကိုယ်သူ နာမည်ကြီး ထင်နေလေသလား!

အမုန်းပွားသူများက ထိုနည်းလမ်းကိုနောက်တကြိမ်အသုံးချပြန်ကာ အရုဏ်ဦးချစ်သူ၏ Weibo အကောင့်ကို နောက်တကြိမ်နှောင့်ယှက်ကြပြန်သည်။

သည်တကြိမ်တွင် အရုဏ်ဦးချစ်သူ၏ မိန်းကလေးပရိသတ်များက သည်းမခံနိုင်ကြတော့ပါချေ။ ၎င်းတို့က အေးတိအေးစက်ဖြင့် ပြန်သတ်ကြတော့၏။

ငါတို့အာပလာကောင်လေးက ငါတို့နဲ့ပဲဆိုင်တယ်။ နင်တို့ရဲ့ ကြီးမြတ်တဲ့နတ်ဘုရားကြီးကို လာပတ်သက်လှည့်ပါလို့လည်း ငါတို့မခေါ်ခဲ့ဘူး - နင်တို့ရဲ့ကြီးမြတ်တဲ့နတ်ဘုရားက တကယ်တမ်းမှာ ဘယ်လိုစရိုက်မျိုးရှိမယ်ဆိုတာ ဘယ်သူကသိမှာလဲ၊ ငါတို့ရဲ့အာပလာကောင်လေးက သူ့ကိုဒီလောက်ကြိုက်သွားရအောင်လို့လေ? ကြည့်ရတာတော့ ရွံဖို့ကောင်းတဲ့ဟာမျိုး လုပ်လိုက်တာနေမှာပေါ့ - ငါတို့ရဲ့ ဒါလင်က အရမ်းသဘောကောင်းတာ၊ စိတ်လည်းမဆိုးတတ်ဘူး၊ အရမ်းလည်းယဥ်ကျေးတယ်။ သူကလူတိုင်းကို စာပြန်တယ်၊ နင်တို့ရဲ့ကြီးမြတ်တဲ့နတ်ဘုရားကိုပဲ ပလစ်ထားတာ၊ အဲဒါ သူတစ်ခုခုလုပ်လိုက်လို့ပေါ့!

ကြီးမြတ်တဲ့နတ်ဘုရားက အရမ်းကိုအံ့ဩစရာဖြစ်နေတာမဟုတ်ဘူးလား? လူတိုင်းကသူ့ကို စာပြန်နေရအောင် သူ့မှာဘာအခွင့်အရေးရှိလို့လဲ? ဒီမှာ အချင်းချင်းသိနေတဲ့သူ ဘယ်သူမှမရှိဘူး နင်တို့မိသားစုက ကြီးမြတ်တဲ့နတ်ဘုရားက အရမ်းကိုစွမ်းအားကြီးတယ်။ တခြားလူရဲ့ Weibo အကောင့်ထဲကို တနေကုန်ဝင်နေရအောင် သူ့မှာဘာမှလုပ်စရာမရှိဘူးလား? ဒီအခြေအနေကိုတောင် နားမလည်နိုင်ကြသေးဘူးလား! နင်တို့ရဲ့ကြီးမြတ်တဲ့နတ်ဘုရားကပဲ စိတ်မချမ်းသာနေတာ၊ အိမ်ပြန်ပြီး ကိုယ်ဟာကိုယ်ပဲ သုံးသပ်နေသင့်တယ်!

ပွဲ၏မီးတောက်မှာ အရှိန်ကောင်းနေပြီ၊ သို့သော် ရွှယ်လင်သည် သီချင်းဆိုသည့် channel သို့သာပြန်သွားပြီး ဘာမှမဖြစ်ခဲ့သလို ဖျော်ဖြေတင်ဆက်နေခဲ့သည်။

သူ့ဘက်မှ အအေးမိနေရုံဟုသာပြောသော်လည်း နောက်တကြိမ်လူများအရှေ့သို့ပေါ်လာပြီး သီဆိုဖျော်ဖြေခဲ့သည်။

Channel မှ မိန်းကလေးပရိသတ်များမှာ သူ့ကိုတွေ့လိုက်ရ၍ အလွန်ပင်အံ့အားသင့်သွားခဲ့ကြပြီး သူ၏အသံကအက်နေသေး၍ အနားယူရန်ပိုလိုအပ်ကြောင်း သတိပေးခဲ့ကြသည်။

ယနေ့တွင်ကားထူးဆန်းနေသည်။ ရွှယ်လင် Channel တွင်သီချင်းဆိုနေစဥ် တယောက်မှရောက်မလာခဲ့ကြချေ။ သီဆိုပြီးနောက်တွင် သူ၏အအေးမိထားသောဒဏ်ကြောင့် ဖျော်ဖြေသည့်ပုံစံက အဆင်မပြေကြောင်းပြောပြခဲ့သည်။

သူ၏အသံမှာ သနားစရာကောင်းလောက်အောင် စိတ်ဓာတ်ကျနေပုံပေါ်ပြီး ယင်းကပင် မိန်းကလေးပရိသတ်တို့

ကို စိတ်ညစ်သွားရစေခဲ့သည်။

[ငှက်အစပ်: သီချင်းမဆိုရင်ရောဘယ်လိုလဲ? ဒါလင်...အထူးဖျော်ဖြေတာမျိုးလုပ်ပြီး တို့နဲ့စကားပဲပြောရင်ရော?]

Prev Next