Chapter 177( Arc 11 end)

🦊Arc 11 END - ဧကရာဇ်ပလ္လင်ထက်မှ ကောလေး

Chapter 177

11.17 - နောက်ဆုံးတော့...အရှင်သခင်ကိုရှာဖို့ စီစဥ်ရတော့မည်လား....

ရွှယ်လင်မှာ အမြစ်တစ်ခုကျွတ်ထွက်သွားခြင်းကြောင့် တိုင်းပြည်မပြိုကွဲအောင် ထိန်းသိမ်းခဲ့သည်။ 

တော်ဝင်မျိုးနွယ်မှ ဆင်းသက်လာသော ကလေးတစ်ယောက်ကိုပင်တွေ့ခဲ့ပြီး နောက်ဖြစ်လာမည့်ဧကရာဇ်အဖြစ် စတင်လေ့ကျင့်ပေးခဲ့သည်။ တော်ဝင်မိသားစုအတွင်း ကလေးရှားသည်ဟူ၍မရှိရာ ရွှယ်လင်က တစချက်သာကြည့်ပြီး ထိုကလေးကို ရွေးချယ်ခဲ့သည်။ သူသည် ထိုကောင်လေးကို နန်းတော်သို့ တိုက်ရိုက်ခေါ်လာခဲ့ပြီး အိမ်ရှေ့စံမင်းသားနေရာကို ချက်ချင်းပေးခဲ့သည်။ အမတ်များ၏ ငြင်းဆိုမှုကို ဂရုမစိုက်ဘဲ အနှီကောင်လေးကို တော်ဝင်မိသားစုအတွင်းသို့ သွတ်သွင်းခဲ့သည်၊ အမည်ပင်ပြောင်းပစ်ခဲ့ပြီး သူ့ကလေးအဖြစ် သတ်မှတ်ခဲ့သည်။

ထိုကိစ္စကို ချမ်ကျင့်ကျန်းနှင့် ဆွေးနွေးခဲ့ပြီး အမတ်ချုပ်ကြီးအနေဖြင့် ချမ်ကျင့်ကျန်းက ချက်ချင်း ဆောင်ရွက်ပေးခဲ့သည်။ ရွှယ်လင်အလုပ်ကို လိုက်လုပ်ပေးနေရသည်ထက် ကလေးတစ်ယောက်ကို စောင့်ရှောက်ရခြင်းက သူနှင့်ပိုသင့်တော်လေသည်။ ရွှယ်လင်ကား ထိုသူသာ ချမ်ကျင့်ကျန်းအနောက်လိုက်လျှင် သူ့အတိုင်းဖြစ်လာပြီး အနာဂတ်ကို ပိုမိုနားလည်လာကာ တိုင်းပြည်ကို သူတို့လိုချင်သည့် လမ်းကြောင်းပေါ်ရောက်သည်အထိ ဆွဲတင်နိုင်လိမ့်မည်ဟု စကားအလှလေးဖြင့် မြှူဆွယ်ထားသေးသည်။ 

ချမ်ကျင့်ကျန်းက ရွှယ်လင်ပြောချင်သည့်ရည်ရွယ်ချက်ကို နားလည်သလားမသိပေ၊ သို့ထိတိုင် ကလေးကိုမူ ခေတ်ပေါ်အတွေးအခေါ်များကို စတင်သင်ကြားပေးခဲ့သည်။ ရွှယ်လင်ကမူ တားရန်ရည်ရွယ်ချက်မရှိဘဲ လီယွမ်ကဖြတ်သွားရင်း စာသင်နေသည်ကို ကြားရသည့်အခါ ခေါင်းထဲပင်ချွေးပြန်လာရသည်။ သူချမ်ကျင့်ကျန်းနှင့် အတူထိုင်ပြီး ဘဝနှင့်ပတ်သက်ပြီးသာ စကားထိုင်ပြောလိုက်ချင်တော့၏။

ယင်းရှန်းက နှစ်သစ်ကူးမတိုင်ခင် အောင်ပွဲခံပြီး ပြန်ရောက်လာခဲ့သည်။ ရွှယ်လင်ကသူ့အတွက် စားသောက်ပွဲကြီး ကျင်းပပေးခဲ့ပြီး သူတို့ကလေးက ခြောက်နှစ်ပင်ရှိပြီဖြစ်ကြောင်း၊ သူ့လမ်းသူလျှောက်နိုင်ပြီး ပဲငံပြာရည်ပင်ဝယ်နိုင်နေပြီဖြစ်ကြောင်း ပြောပြလိုက်သည်။

ယင်းရှန်းသည်ကား ကနဦးတွင်စိတ်ရှုပ်သွားသည့် မျက်နှာမျိုးဖြစ်နေသော်လည်း ကလေးကိုမြင်သည့်အခါ စကားပြောနေရင်းက ရပ်သွားခဲ့လေ၏။ 

ထိုနေ့ညတွင် ဧကရာဇ်သည် ရှန်းလုံနန်းဆောင်သို့ နန်းတွင်းအကြံပေးကို ဆင့်ခေါ်ခဲ့သည်။ ကိစ္စများကိုဖြေရှင်းရန် အချိန်ကြာကြာမယူလိုက်ရဘဲ ရှုဟမ်ကသူတို့နောက်မှ ကိစ္စများကို ဖြေရှင်းလိုက်ခြင်းက သူ့ဘဝကိုအတော်လေး သနားစရာကောင်းသွားစေခဲ့သည်။ အရှင်မင်းကြီး၏ အရူးထနေမှုက မတိုင်ခင်ကလေးတင် ပိုပြင်းထန်လာခဲ့၏။

အမတ်များမှာ အရှင်မင်းကြီးအနေဖြင့် ဧကရီကို အိမ်ရှေ့စံအား လက်ခံသွားစေရန် မည်သို့ပြောလိုက်ကြောင်း မသိကြသော်လည်း ရက်စက်ကြမ်းတမ်းသည့် နန်းတွင်းအကြံပေးက လက်ခံခဲ့သည်၊ မှူးမတ်တစ်ယောက်အနေဖြင့် အရှင်မင်းကြီးအရှေ့တွင် ငြင်းပယ်ရန် မည်သည့်အကြောင်းမှ မရှိချေ။ ကြမ်းပြင်ကို ခေါင်းဖြင့်တိုက်ကာ ဆန့်ကျင်နေမည့် အမတ်များထက် ကျန်နေသေးသောအမတ်များက အရှင်မင်းကြီး၏ လမ်းစဥ်ကို လိုက်နာလာကြသည်။

သူလုပ်နေတာတွေက အလျင်းသင့်သလိုပါပဲ..သူတို့သာလက်ခံရင်ပြီးပြီ။ အရှင်မင်းကြီးသာပျော်နေလျှင် အဆင်ပြေသွားမည်သာ။

အရှင်မင်းကြီးက ငယ်လွန်းသေးသည်။ အရှင်မင်းကြီးက သူ့ကလေးမွေးပြီးလျှင် လွယ်လွယ်ကူကူ ဖြတ်ကျော်နိုင်ပါဦးမည်လား။

ဤကမ္ဘာတွင် ၎င်းတို့၏ တစ်ဖက်သက်ဆန်မှုကို မပြနိုင်ကြောင်း ၎င်းတို့မသိကြပေ။ ရွှယ်လင်သည် ကောလေးဖြစ်ကြောင်း မှဲ့နီလေးကသက်သေပြနေပြီး ပျောက်ဆုံးနေသောကိုယ်အစိတ်အပိုင်းဟူ၍လည်းမရှိ၊ သူ့အတွက် ကလေးမမွေးနိုင်ဟူသောအချက်မှာ မဖြစ်နိုင်ချေ။

ရှက်စရာကောင်းလွန်းနေ၍ပင် ဖြစ်လိမ့်မည်။

****

နှစ်သစ်ကူးပြီးနောက်တွင် ရှုဝမ်သည် မယ်တော်ကြီးကို မြို့တော်သို့ ပြန်ခေါ်လာခဲ့ပြီး မြို့စောင့်ဂိတ်ကို ဖြတ်လိုက်သည်နှင့် နန်းတွင်းအစောင့်ရဲမက်များက ဝန်းရံလိုက်ကြသည်။ နန်းတွင်းအစောင့်တပ်၏ ခေါင်းဆောင်မှာ သစ်ရွက်ခြောက်ရွက်ဂိတ်၏ ယခင်ခေါင်းဆောင်ဖြစ်ပြီး နန်းတွင်းရာထူးကိုလက်ခံခဲ့သော မူကောက ရှုဝမ်နှင့်အတူပါလာခဲ့သော လူတိုင်းကို ဖမ်းဆီးလိုက်ကြကာ ထောင်ထဲသို့ တန်းထည့်လိုက်ကြသည်။

 ရှုဝမ်နှင့်သန်းရှီတို့၏ ဧကရာဇ်ဟောင်းအား အဆိပ်ခတ်မှုကို လူတိုင်းသိစေရန်ကြေညာခဲ့ကာ ဧကရာဇ်သည်လည်း တော်ဝင်မိသားစု၏ ဂုဏ်သိက္ခာကို မထိန်းသိမ်းထားချင်တော့ပုံရသည်။ ထိုကိစ္စက အကြီးအကျယ် ဂယက်ရိုက်သွားပြီး တိုင်းပြည်ထဲမှ လူတိုင်းသိသွားကြသည်၊ သန်းမိသားစုနှင့် ရှုဝမ်တို့၏မျိုးဆက်ကိုးဆက်လုံး ကွပ်မျက်ခံလိုက်ရသည်။ ရှုမိသားစု အိမ်တော်သည်လည်း ဧက္ကရာဇ်၏လက်အောက်သို့ နောက်တဖန်ပြန်ရောက်သွားပြန်၏။

ဤအကြောင်းကြောင့် တိုင်းပြည်၏အင်အားစု အစိတ်အပိုင်းတိုင်းတွင် ရွှယ်လင်၏အမည်တစ်လုံးက အနည်းဆုံးပါနေတတ်ပြီး တစ်စုတည်းဖြစ်သွားသလို ယူဆနိုင်သည်။

နောက်ငါးနှစ်အကြာတွင် အလယ်ပိုင်းအုပ်ချုပ်ရေးက စီရင်စုအားလုံးကို အပြည့်အဝထိန်းချုပ်လိုက်နိုင်ပြီး ထီးနန်းကိုသစ္စာရှိသူကြောင့် လူတိုင်းပြန်လည် အစားထိုးခံလိုက်ရသည်။ အင်အားစုများက မြို့တော်တွင်အဓိကရှိနေပြီး ရွှယ်လင်သည်လည်း မူလတည်းက ရည်ရွယ်ထားခဲ့သော အုပ်ချုပ်ရေးဌာနများ စုစည်းခြင်းကို အောင်မြင်သွားခဲ့သည်။

ယခုကဲ့သို့သောစနစ်မျိုးက အချိန်ကြာလာသည်နှင့်အမျှ တဖြည်းဖြည်း စိတ်အေးလက်အေးနေ၍ရသည်၊ လက်ရှိအခြေအနေအရကြည့်လျှင် အသင့်တော်ဆုံးပင်။

ငါးနှစ်သည် အများအပြားကို ပြောင်းလဲသွားစေနိုင်သော်လည်း အချို့အရာများက ဘယ်သောအခါမှ မပြောင်းလဲချေ။

ကျီးရုန်ဟန်သည် သူ့ကိုယ်သူ ပြန်လည်သုံးသပ်ပြီး လီယွမ်နှင့်တွေ့ရရန် မြို့တော်သို့ပြန်သွားချင်ခဲ့၏၊ သို့ထိတိုင် လီယွမ်က သူ့ကိုမတွေ့ချင်ခဲ့ပေ။ သူ့နှလုံးသားက ပြည်သူများအတွက်ဖြစ်နေပြီး လူတိုင်းအားကူညီရန်အတွက် သူ့ကိုယ်သူနစ်မြှုပ်ထားလိုက်ပေပြီ။ ဆယ့်တစ်နှစ်အရွယ် အိမ်ရှေ့စံမှာ ကြီးလေးသောတာဝန်များကို ယူနိုင်နေပြီဖြစ်သည်။ သည်နှစ်များအတွင်း နန်းတွင်းအကြံပေးနှင့် သင်ယူနိုင်ခဲ့ပြီး အကြံဉာဏ်ကောင်းအများအပြားကို ပေးနိုင်ခဲ့သည်။ ရွှယ်လင်သည် သူ့အား ပြည်တွင်းရေးရာများတွင်ပင် ပါဝင်ခွင့်ပေးထားပြီဖြစ်သည်။

ရွှယ်လင်နှင့် ယင်းရှန်းတို့မှာ အတူတကွရှိလာသည့်အချိန်အတွင်း ကလေးတစ်ယောက်မှ မရှိခဲ့ပေ၊ အိမ်ရှေ့စံကိုသာ သူတို့ကလေးအဖြစ်ပျိုးထောင်ပေးခဲ့သည်။ အိမ်ရှေ့စံ၏ အရည်အချင်းနှင့် ဉာဏ်ရည်ကြောင့် အနာဂတ်တွင် ဧကရာဇ်ကောင်းတစ်ယောက်ဖြစ်လာနိုင်ပြီး အမတ်များလည်း အခြေအနေနှင့် လိုက်လျောညီထွေရှိလာခဲ့သည်။

မတိုင်ခင်က နန်းတွင်းသည် သွေးချင်းချင်းနီခဲ့၏။ ယခုမူ နန်းတော်တစ်ခုလုံး တောက်ပနေခဲ့ပြီး မနက်ခင်းညီလာခံ၏ လေထုသည်လည်း မတိုင်ခင်ကထက် ပိုမိုကွဲပြားသွားခဲ့သည်။

ရွှယ်လင်တစ်ယောက် နန်းတွင်းအကြံပေး၏ရင်ခွင်ထဲတွင် လဲလျောင်းရင်းအချိန်ကုန်နေစဥ် ညီလာခံကို ၎င်းတို့နှင့်တစ်လျှောက်လုံး လွှတ်ထားခဲ့သည်။ အိမ်ရှေ့စံကြီးလာသည့်အခါ အိမ်ရှေ့စံကို ယာယီ ထီးနန်းလွှဲလိုက်ပြီး ယင်းရှန်းကိုခေါ်ကာ တလောကလုံးအနှံ့ ခရီးထွက်သွားခဲ့၏။

ရှေ့အနာဂတ်ကိုပိုမျှော်ကြည့်လေ အချိန်များက ပို၍လျှင်မြန်စွာ ကုန်ဆုံးသွားလေပင်။ မကြာခင်မှာပင် အိမ်ရှေ့စံက ထီးနန်းဆက်ခံရမည့်အရွယ်သို့ ရောက်လာခဲ့သည်။ ရွှယ်လင်ကသူ့အား လက်ထပ်ပွဲကျင်းပပေးပြီး ဘယ်လက်ရုံးအမတ်ချုပ်ကြီး ချမ်ကျင့်ကျန်းကို သူ့နေရာတွင်ထားရစ်ခဲ့သည်။ အိမ်ရှေ့စံမှာ လက်ထပ်ပွဲမတိုင်ခင်အထိ ပျော်ရွှင်နေသော်ငြား လက်ထပ်ပွဲမကျင်းပမီ သတင်းဆိုးကြားရလိမ့်မည်ဟု မမျှော်လင့်ထားခဲ့ပေ။

သူ၏ခမည်းတော်က ချက်ချင်းပင် နန်းစွန့်ခဲ့ပြီး သူ့နေရာကိုပေးခဲ့သည်။ သူနှင့်အတူ နန်းတွင်းအကြံပေးကိုခေါ်ကာ ထွက်ပြေးသွားတော့၏။

အိမ်ရှေ့စံမှာ ဒေါသထွက်လွန်း၍ စကားပင်မပြောနိုင်တော့ချေ။ ၎င်းက ခေါင်းခေါက်ပြီးမှ သကြားလုံးလာကျွေးသည်နှင့် မတူပါသလော? ထိုသူသည်ကား သွပ်သွပ်ခါအောင်ရူးသွားပြီဖြစ်မည်! သူသည်ကား တောရွာဇနပုဒ်လေးမှ ရောက်လာပြီး မင်းသမီးလေးနှင့်တိုင်းပြည်တစ်ခွင် မလှည့်လည်ရသေးပေ။ အဘယ်ကြောင့်များ သူကဧကရာဇ်ဘုရင် ဖြစ်လာရပါသနည်း။ သူ၏ခမည်းတော်သည်ကား အတော်လေးကို မုန်းစရာကောင်းသည်ပင်။

စိတ်ထဲတွင်မူ အပြစ်တင်နေလင့်ကစား အဆုံးတွင် အိမ်ရှေ့စံအတွက် ရွေးချယ်စရာမရှိ၊ ထီးနန်းဆက်ခံလိုက်ရသည်။ သူထီးနန်းအား လွှဲပြောင်းယူရသည့်နေ့တွင် ချမ်ကျင့်ကျန်းက ဘယ်လက်ရုံးအမတ်ချုပ်ကြီးအဖြစ်မှ ဧကရီဖြစ်လာခဲ့၏။

ဧကရီတစ်ယောက်အနေဖြင့် သူ့အားညီလာခံတက်ရောက်မည့်အရေးကို ပိတ်ပင်မည်မဟုတ်ပေ။ ကျန်းနန်ဝမ်ကိုဥပမာထားပြီး သူတို့နှစ်ယောက်လုံး သမားရိုးကျမဟုတ်ခဲ့လျှင်ပင် အမတ်များက လက်ခံပေးလိမ့်မည်။

 လူတိုင်းသည် တော်ဝင်မိသားစုအတွင်း အပြောင်းအလဲဖြစ်ခြင်းကို မကြာသေးခင်ကဖြစ်ပျက်ခဲ့သလို သဘောမထားကြ၊ ဧကရီ နံနက်ခင်းညီလာခံကို တက်ရောက်ခြင်းမှာပုံမှန်ပင်ဖြစ်သည်။ ယခင် ညာလက်ရုံးအမတ်ချုပ်ကြီးသည်လည်း ဧကရီပင်မဟုတ်ပါလား။

လီယွမ်: "???" အေးဆေးနေတာကို အမြှီးတက်နင်းခံရပြန်ပြီ?? သူနဲ့ဘာဆိုင်လို့လဲ!!!

****

ဆယ်နှစ်ကုန်ဆုံးသွားခဲ့ပြီ။ ရွှယ်လင်နှင့် ယင်းရှန်းတို့သည် သူတို့စတင်တွေ့ခဲ့ကြစဥ်က မီးပုံးပွဲတော်အတွက် ယင်းရှန်းမှ သူ့အားခေါ်လာပေးခဲ့သော ကျန့်ကျင့်သို့ အရင်သွားခဲ့ကြသည်။

"အဲဒီအချိန်တုန်းက မင်းကိုယ့်ရင်ခွင်ထဲရောက်လာအောင် လူအုပ်ကြီးကတွန်းပေးလိုက်တယ်လို့ထင်ခဲ့တာ...အဲဒီတည်းကမင်းကကိုယ့်အတွက် ဖြစ်သွားခဲ့တာထင်တယ်.."

"တော်စမ်းပါ...အဲဒီညက တွန်းထိုးနေတဲ့လူတွေက ခင်ဗျားလူတွေဆိုတာ မသိဘူးထင်နေလား..."

"ကလေးလေး...ဒီနေ့ရဲ့လေထုလေးကို မဖျက်ဆီးဘူးလို့ သဘောတူထားတယ်လေ..."

"ကောင်းပြီ..."

ထို့နောက် သူတို့ရွှယ်နိုင်ငံတစ်ပြည်လုံးကို ခရီးထွက်ကြသည်။ နှစ်စဥ်စာပြန်ပို့သော်လည်း သူတို့ရောက်နေသည့် နေရာအကြောင်းကိုမူမပြောကြချေ။

အိမ်ရှေ့စံသည်ဧကရာဇ်နှင့် ဆယ်နှစ်ကျော်ကြာအောင်နေထိုင်ခဲ့သည်။ သူ့နေရာကိုဆက်ခံခဲ့ပြီး မွန်မြတ်သောဘုရင်တစ်ပါးအဖြစ် နေထိုင်ခဲ့သည်။ ထိုအချိန်မှ သူ၏ခမည်းတော်နှစ်ပါးက ခရီးစဥ်ကိုအဆုံးသတ်ပြီး မြို့တော်သို့ပြန်လာခဲ့ကြ၏။

ရွှယ်လင်နှင့်ယင်းရှန်းတို့သည် နောက်ထပ်နှစ်အနည်းငယ်ခန့်နားပြီး နောက်တကြိမ်ထွက်ကြပြန်သည်။ ဤတစ်ကြိမ်တွင် ပင်လယ်ကိုခရီးထွက်ကြပြီး ရွှယ်ပြည်နှင့်ဝေးနိုင်သမျှ ဝေးဝေးသွားကြလေ၏။

ဤကမ္ဘာတွင် ရွှယ်လင်နှင့်ယင်းရှန်းတို့သည် အနှံ့အပြားခရီးနှင်ခဲ့ကြသည်။ နှစ်ယောက်လုံးသည်ကား မရေမတွက်နိုင်သောမီးပုံးပွဲတော်များစွာကို မြင်တွေ့ခဲ့ကြရသည့်တိုင် နောက်ဆုံးတွင် သူတို့ပထမဆုံးတွေ့ခဲ့ကြသည့် ကျန့်ကျင့်တွင်သာ အခြေစိုက်ရန်ရွေးချယ်ခဲ့ကြသည်၊ ထို့နောက် ယခင်ကအကြိမ်ပေါင်းများစွာ ကြုံတွေ့ခဲ့ရဖူးသော ခွဲခွာခြင်းကို တိတ်ဆိတ်စွာ စောင့်ဆိုင်းခဲ့ကြသည်။

သေခြင်းတရားရောက်လာသည့်အခါ ရွှယ်လင်မှာ မှတ်ဉာဏ်များထဲမှ ပင်လယ်ထဲသို့ ဝိုးတဝါး သက်ဆင်းသွားခဲ့၏။

ယခုတစ်ကြိမ်ကြိုးစားမှုက ယခင်တစ်ကြိမ်နှင့် မတူညီပေ။ ဤတစ်ကြိမ်တွင် သူ့မှတ်ဉာဏ်ထဲမှသူကိုယ်တိုင်က စတင်လှုပ်ရှားလာသည်ကို တွေ့လိုက်ရသည်။

မှတ်ဉာဏ်ထဲတွင် ၎င်းသည် လမိုက်ညဖြစ်ပြီးလေထန်နေခဲ့သည်။ သူသည် သန်းခေါင်ယံအလယ်တွင် တောအုပ်ထဲ၌ အထီးကျန်စွာရှိနေခဲ့ပြီ ဂိုဏ်းအကြီးအကဲတစ်ယောက်က သူ့အားခေါ်လာကာ နာမည်တစ်ခုပေးခဲ့၏။

"သူ့အမွှေးကအရမ်းဖြူတယ်..ပြီးတော့ သူ့ကိုနှင်းတောထဲက ကောက်လာခဲ့တာ..ငါ့မျက်လုံးသာမကောင်းရင် နှင်းတောထဲမှာခဲပြီး သေသွားတော့မှာ..."

 အကြီးအကဲသည် သူ့အားပွေ့ချီထားရင် အသေအချာကြည့်နေပြန်သည်။ "အို့...မင်းကအသက်ရှူနေတုန်းပဲကိုး...မင်းရဲ့မိသားစုကိုတော့မသိပေမဲ့..ဒီနေ့ကစပြီး ငါမင်းကိုစောင့်ရှောက်ပေးမယ်..."

"ဒီအမွှေးလေးတွေက အရမ်းလှတယ်..လျှောက်မလုပ်နဲ့..သူ့မိသားစုလာရှာရင် ဒုက္ခဖြစ်လိမ့်မယ်...လူတိုင်းကဒီကိစ္စကြောင့်နဲ့ ရမယ်ရှာတာ ခံရလိမ့်မယ်..."

"ဘယ်သူကဂရုစိုက်နေလို့လဲ...ငါကောက်လာတာဆိုမှတော့ ငါ့အပိုင်ပဲလေ..." ၎င်းကငယ်လွန်းနေသေးပြီး အကြီးအကဲကခေါ်လာခြင်းဖြစ်သောကြောင့် သူ၏ယိုင်နဲ့နေသော တဲစုတ်လေးထံခေါ်သွားခဲ့သည်။ အကြီးအကဲသည်သူ့အား နွေးထွေးသည့်သားမွှေးများပေါ်တွင် နေရာချနေရင်းပြောနေခဲ့၏။ "မင်းကဖြူစွတ်လွန်းတော့...ရွှယ်လင်လို့ခေါ်မယ်..."

ယခုမူ ရွှယ်လင်သည် အသိစိတ်ပျောက်လောက်သည်အထိ အေးစက်နေခဲ့သော မြေခွေးလေး မဟုတ်တော့ပါချေ။ အကြီးအကဲစကားကို ကြားလိုက်ရသည့်အခါ သူသည်ကား သက်ပြင်းချလိုက်မိပြီး အကြီးအကဲက ရုတ်တရက်ရူးသွပ်သွားမည့်လူများထဲမှ တစ်ယောက်မဟုတ်၍ ကျေးဇူးတင်မိသွားရသည်။ အနည်းဆုံးတော့ ထိုလူသည် 'မင်းကဖြူလွန်းတော့ ငါမင်းကို ရှောင်ပိုင်လို့ခေါ်မယ်' ဟုမပြောခဲ့ပေ။

သူတစ်သက်လုံး ထိုနာမည်ကြီးဖြင့် အသက်မရှင်သွားလိုပေ။ 

ထို့နောက် ရွှယ်လင်သည် ကလေးဘဝမှမှတ်ဉာဏ်များကြောင့် နောက်ပိုင်းဖြစ်ပျက်ခဲ့သမျှများကို သိလိုက်ရလေ၏။ သို့သော်လည်း ပြန်လည်အောက်မေ့မိသည့်အခါ အချိန်အလုံအလောက်မရချေ။ အချိန်တို့က အင်မတန်မြန်ဆန်စွာ ကုန်ဆုံးသွားခဲ့လေရာ ချက်ချင်းပင် အရွယ်ရောက်လာခဲ့ပြီး ရူးသွပ်မိုက်မဲစွာဖြင့် ဆရာသခင်ဖြစ်သူနှင့် တိုက်ခိုက်နေလေပြီ။

နောက်ပိုင်းတွင် သူသည်ကလေးတစ်ယောက်၏ ကိုယ်ထဲသို့ဝင်ရောက်ပြီး ထိုကလေးက ဝိညာဥ်ကူးပြောင်းသွားခဲ့သည်။ သူသည်ကား ထိုကလေးဝိညာဥ်အနောက်သို့လိုက်ကာ နောက်ထပ်ကမ္ဘာသို့ ရောက်ရှိလာခဲ့၏။

ရုတ်ချည်းပင် ရွှယ်လင် နားလည်သွားခဲ့ရသည်။ တကယ်ကိုပင် ထိုကလေးတွင် သူ၏ဝိညာဥ်ခန္ဓာရှိနေရသည့် အကြောင်းအရင်းကိုမှတ်မိသွားခဲ့ပြီ။ ထိုအခြင်းအရာကြောင့်ပင် သူသည် ကလေးခန္ဓာကိုယ်မှခွာပြီး သွားချင်တိုင်း သွားခွင့်ရနေခဲ့သည်၊ ထို့ကြောင့်ပင် ကလေးကို နှုတ်ဆက်စွန့်ခွာပြီး အရှင်သခင်ကိုရှာဖွေရန် လမ်းစဥ်ကို ရှာရတော့မည်။

အရှင်သခင်အကြောင်း တွေးလိုက်မိသည့်အခါ ရွှယ်လင်၏အတွေးများက ရပ်တန့်သွားခဲ့သည်။

ယခု သူပြန်တွေးကြည့်မိသည့်အခါ အင်မတန်စိတ်ဝင်စားစရာကောင်းသည့် အရာတစ်ခုရှိနေခဲ့သည်။ ကလေးဘဝတွင်ကျင်လည်စဥ် သူသင်ယူခဲ့ရသည့် အရာများအရ ကလေးဝိညာဥ်ကူးပြောင်းရသည့်နေရာမှာ စိတ်ကူးယဥ်ဝတ္ထုကမ္ဘာပင်ဖြစ်သည်။ သို့သော် လောကကြီး၏စည်းမျဥ်းက ပြည့်စုံပြီး ထိုကမ္ဘာတွင် အရှင်သခင်ကိုရှာဖွေရန် စီစဥ်ရလိမ့်မည်။

အရှင်သခင်များမှာ အင်မတန်ဆန်းကြယ်သော လူတစ်စုဖြစ်သည်။ ၎င်းတို့တွင် လောကကြီးအား ထိန်းချုပ်နိုင်မည့် စွမ်းရည်များရှိပြီး အတွင်းနှင့်ပြင်ပမှ လူများနှင့် ပါဆက်သွယ်နိုင်သည်။ အခြားကမ္ဘာတွင် ၎င်းတို့က အခြားသူများကို ဝိညာဥ်ကူးပြောင်းခွင့်ပေးသည်။ 

ပုံမှန်အရှင်သခင်မိသားစုတွင် နှစ်ပေါင်းရာချီထောင်ချီတိုင်း ဆက်ခံသူအရှင်သခင် တစ်ယောက်သာရှိတတ်၏။ အနှီသူသာကံကြမ္မာအရ ဆက်လက်အသက်ရှင်နေသေးပါက အရှင်သခင်အဖြစ် စွမ်းရည်များရရှိလိမ့်မည်၊ ထို့နောက် အချိန်နှင့်အာကာသကိုပါ ခရီးနှင်နိုင်လိမ့်မည်၊ လက်ရှိအချိန်နှင့်အာကာသအတွင်း ရှိနေသူများကို ပို့ဆောင်ပေးနိုင်လိမ့်မည်။

ထို့ကြောင့် ရွှယ်လင်သည် ထိုနေ့က သူနှင်းတောထဲတွင် ပေါ်လာခဲ့ရသည့်အကြောင်းအရင်းကို နားလည်သွားခဲ့သည်။ ထိုကမ္ဘာမှထွက်ခွာလာခဲ့ရခြင်းမှာ အရှင်သခင်ကိုရှာဖွေရန်ပင်။ သို့ထိတိုင် နောက်ထပ်ကမ္ဘာသို့ အပို့ခံခဲ့ရသည်။ နောက်ဆုံးတကြိမ် သူရခဲ့သည့်မှတ်ဉာဏ်အရ ကမ္ဘာများကို အပို့ခံခဲ့ရသည်မှာ အရှင်သခင်၏စွမ်းအားများကြောင့်ပင်။ ရည်ရွယ်ချက်ကရှင်းပါသည်  သူအသက်ဆက်ရှင်ရန်အတွက်ပင်။

သို့ဆိုပါက နောက်ထပ်မေးခွန်းတစ်ခု ရှိနေသေးသည်။ ဘာကြောင့် သူအသက်ရှင်နိုင်ခဲ့ပါသနည်း။ သို့မဟုတ် နောက်တစ်မျိုးပြောင်းမေးရမည်ဆိုလျှင် သူ၏ရှင်သန်မှုက အတိအကျက ဘာများဖြစ်ပါသနည်း။ အမြှီးကိုးချောင်းမြေခွေးအနေဖြင့် ရွှယ်လင်သည်သူ၏ကနဦးရည်ရွယ်ချက်ကို ပထမဆုံးအကြိမ် သံသယဝင်မိလာလေပြီ။ သူ၏မူလအသွင်အပြင်ကို မမှတ်မိတော့သော်လည်း သူမွေးဖွားလာခဲ့ရပုံကို နားလည်ချင်ပြီး ဤကမ္ဘာသို့ ရောက်လာရပုံကိုလည်း သိချင်သည်။ ထိုကမ္ဘာကသူ့အား ရှင်သန်ခွင့်မပေးရသည့်အကြောင်းအရင်းကို သိချင်သည်၊ အသက်ရှင်ခွင့်ရရန် ကမ္ဘာများကို ကူးပြောင်းနေရသည့် အကြောင်းအရင်းကို သိချင်သည်။

နောက်ဆုံးတွင်မတော့...သူအရှင်သခင်ကိုရှာရန် စီစဥ်ရတော့မည်လား....။

🦊Arc 11 - ဧကရာဇ်ပလ္လင်ထက်မှ ကောလေး

The end 🦊🦊🦊