MM Story Teller

Chapter 194( Arc 13 start)

Viewers 32k

🦊Arc 13 [စွမ်းအင်ကျောက် လက်မှုပညာရှင်]

Chapter 194

13.1 - ဒီလိုချိုရဲပြီး လွယ်လွန်းတဲ့ဇာတ်ကြောင်းမျိုးက ပြောင်းဖို့အခက်ဆုံးပဲ....

ကိစ္စများကို ရှင်းလင်းပြီးသည့်နောက် ရွှယ်လင်က သူ့ကတိအတိုင်း အိုင်ဗန်ကိုယ်ထဲမှအဆိပ်ကို ရှီး၏ဖြေဆေးနှင့် ဖယ်ရှားပေးခဲ့သည်။

သို့သော် သူ့ကိုယ်ထဲမှအဆိပ်က ဖြေရန်ခက်ခဲနေ၏။ အမှောင်ထု၏ ဝါးမြိုမှုမှ ကျန်ရစ်နေခဲ့သော အမှောင်ထုအစအနလေးမှာ ပျောက်မသွားခဲ့ပေ။ အိုင်ဗန်၏အနာဂတ်သည် အလင်းစွမ်းအားချစ်ခြင်းကို မခံရတော့၍ တစ်သက်လုံး ဒုက္ခိတကိုယ်ဖြင့် ကုသသူလုပ်ရတော့မည့်အရေးသို့ ပြောင်းလဲသွားရတော့သည်။ သို့ထိတိုင် ယင်းကသူ့အတွက် အရေးမကြီးသေးချေ။

အိုင်ဗန်၏ဉာဏ်ရည်နှင့် စိတ်အခြေအနေမှာ ချစ်သူကို သတ်လိုက်သောကြောင့် ငါးနှစ်သားအရွယ်သို့ ရောက်သွားခဲ့လေသည်။ သူအရွယ်ရောက်မလာချင်တော့ပေ၊ သူလုပ်ခဲ့သည့်အရာများနှင့် ရင်မဆိုင်လိုတော့ဘဲ သူကိုယ်တိုင်ဖန်တီးထားသော သွေးအိုင်ဘေးတွင်လဲကျနေသော ချစ်သူကိုလည်း မမှတ်မိချင်တော့ချေ။

ထို့ကြောင့်သူက ရှောင်ပြေးရန်ရွေးချယ်ခဲ့သည်။

သူထိုနေ့ညက လုပ်ခဲ့မိသည့် ကိစ္စကို နားမလည်နိုင်တော့ဘဲ တစ်သက်လုံး အပြစ်တင်နောင်တရစိတ်များဖြင့် နေထိုင်သွားရတော့မည်ဖြစ်ရာ မေ့မြောနေရာမှ နိုးလာသည်နှင့် သူ့ကိုယ်သူ ချိတ်ပိတ်ပစ်ခဲ့သည်။

ထိုနေ့ညတွင် နန်းတော်ထဲ၌ ဖြစ်ပျက်ခဲ့သမျှကိစ္စတိုင်းကို ကောင်းကင်မှော်ဆရာက အပြင်သို့ လုံးဝသတင်းမထွက်အောင် တားဆီးထားခဲ့သည်။ သူမအနေဖြင့် တော်ဝင်မိသားစုကို ကာကွယ်ချင်သောကြောင့် အိမ်ရှေ့စံမင်းသား သေဆုံးသွားသည်ကိုသာ ကြည့်နေခဲ့ရ၏။ သူမသည် ရွှယ်လင်နှင့်ပင်အပေးအယူလုပ်ခဲ့ပြီး ဘုရင်မကြီးကိုလည်း ပလ္လင်ပေါ်မှ ဆွဲချခဲ့သည်။

တစ်လအကြာ၌ ဘုရင်မကြီးက မကောင်းဆိုးဝါးသားရဲတောအုပ်အတွင်းသို့ နှင်ထုတ်ခံလိုက်ရသည်။ သူမပိုင်ဆိုင်ထားသည့်အရာတိုင်းကို စွန့်လွှတ်ခဲ့ရပြီး တောအုပ်ထဲတွင် ကိုယ်လုံးတီးဖြင့် လျှောက်သွားနေခဲ့ရသည်။ သို့ထိတိုင် ရွှယ်လင်က မကျေနပ်သေးပါချေ။ သူသည် ရှီးအား သူမကို အင်မတန်တောက်ပရွှန်းစိုနေသော အမွှေးများဖြင့် မကောင်းဆိုးဝါးသားရဲတစ်ကောင်အဖြစ် ပြောင်းခိုင်းခဲ့သည်။ ၎င်းတို့ကြောင့် ဘုရင်မကြီး၏ ကျန်ရှိနေသောနေ့ရက်များမှာ သူမကို အမဲလိုက်ချင်နေသည့် မုဆိုးများလက်မှ လွတ်အောင် ပြေးခဲ့ရပေသည်။ နောက်ဆုံးတွင် သူမသည် အမဲလိုက်မုဆိုးများ၏ ရက်ရက်စက်စက် သတ်ဖြတ်ခြင်းကို ခံခဲ့ရပြီး သူမတစ်ခါက ဝတ်ခဲ့ဖူးသော သားမွှေးအထည်အဖြစ် ပြောင်းလဲခံလိုက်ရ၏။

အားလုံးပြီးဆုံးသွားသည့်အခါ ရွှယ်လင်သည်ရှီးနှင့် သဘောတူထားချက်အတိုင်း နေထိုင်ခဲ့သည်၊ သို့သော် ၎င်းတို့ကြားမှ ပတ်သက်မှုက အမြဲထူးဆန်းနေခဲ့၏။ ရှီးက ရွှယ်လင်ကို နတ်ဘုရားများနှင့် သင့်တော်သည့် မကောင်းဆိုးဝါးသားရဲတောအုပ်အလယ်သို့ ပြန်ခေါ်လာခဲ့သည်။ စနစ်သည်ကား အခြားသော နတ်ဘုရားများ ထွက်သွားသည့်နေရာကို သိချင်လွန်း၍ တစ်ပိုင်းသေနေပြီး ထိုအချိန်က ရှီးက သူ့ကိုယ်သူ တစ်ဦးတည်းသော နတ်ဘုရားဖြစ်အောင် လုပ်ခဲ့သည့်အရာကိုလည်း အတိအကျသိချင်နေလေသည်၊ သို့သော် ရွှယ်လင်က ဘယ်တော့မှမမေးဘဲ ရှီးကလည်း ထိုကိစ္စအပေါ် တစ်ခါမှစိတ်မဝင်စားခဲ့မိပေ။ ထို့ကြောင့် စနစ်မှာ ဘယ်တော့မှ အတိအကျမသိရတော့ဘဲ ရှိနေခဲ့၏။

သည်ကမ္ဘာတွင် မထင်မှတ်ထားသည့် မတော်တဆမှုများစွာ ဖြစ်ပျက်ခဲ့သည်။ အများစုက ရှီး၏ကိုယ်ပေါ်တွင် ပေါ်လာတတ်သော ရွှယ်လင်၏အမြှီးနှင့် ဆက်နွယ်နေတတ်၏။ စနစ်က ဆယ်မျက်နှာကမ္ဘာထံသို့ တောင်းဆိုချက်ပေးပို့လိုက်ပြီး အမြှီးထဲတွင်ရှိနေသော စွမ်းအင်ကိုဖယ်ရှားရန် ရွှယ်လင်ကိုလမ်းညွှန်ပေးလိုက်၏။ သို့တစေ နောက်ဆက်တွဲက ရှိနေသေးသည်။

"သူက နောက်ထပ်ကမ္ဘာကိုရောက်ရင် ငါ့ကိုလုံးဝမေ့သွားမှာပေါ့?" ရွှယ်လင်သည် စနစ်၏စကားကို ထူးဆန်းနေသည့်မျက်နှာထားဖြင့် တုံ့ပြန်လိုက်၏။

"အင်း...ပုံမှန်ဆိုရင်တော့ ဒီကမ္ဘာတွေက host အပေါ်ထားတဲ့ သူ့အချစ်တွေက အားကောင်းလွန်းလို့ host ကိုတွေ့တာနဲ့ မြင်မြင်ခြင်းချစ်မိသွားတတ်တာ..ဒါပေမဲ့ host ကိုစွမ်းအင်တွေ အတင်းဖယ်ထုတ်ဖို့ ကူညီပေးတာက နဂိုအစီအစဥ်အပေါ် သက်ရောက်လိမ့်မယ်...ပြီးတော့ နောက်ကမ္ဘာရောက်ရင် host ကို မြင်မြင်ခြင်းချစ်မိတော့မှာမဟုတ်ဘူး.."

စနစ်သည် ရွှယ်လင်ကို ထောက်ပြနေပြီး ထပ်ဖြည့်ပြောလိုက်၏။ "အခြားကမ္ဘာမှာ..host က သူ့ကိုအနိုင်မကျင့်ဘဲနဲ့ ပျော်ရွှင်နိုင်မယ့် နည်းလမ်းကို ရွေးချယ်လို့ရတယ်...ဒါမှမဟုတ် လက်ဦးမှုယူပြီး အပျော်ကစားလို့လည်းရတယ်..ပြီးတော့ သူ host ကို ချစ်လာအောင် ဆွဲဆောင်လို့လည်းရတယ်..."

ရွှယ်လင်က မေးစေ့ကိုပွတ်ကာ ပြောလိုက်လေသည်။ "သူက ငါ့ကိုမေ့သွားရုံတင် မဟုတ်ပဲ..ငါက သူ့ရည်းစားပါဆိုတာကိုတောင် မေ့သွားမှာပေါ့...."

သူသည် ငဒူကောင်လို ရေရွတ်နေပြီး မဆိုးလှသလိုခံစားနေရသည်။ မရေတွက်နိုင်သော ကမ္ဘာများတွင် ထိုယောက်ျားပျိုက သူ့ထံအရင်လာခဲ့ရာ ထိုယောက်ျားပျိုထံသို့ တစ်ကြိမ်ခန့် ချဥ်းကပ်ရန်ကြိုးစားခြင်းက မဖြစ်နိုင်သည့်အရာမဟုတ်...သူသည် ပိုပြီးပင် ပျော်စရာကောင်းသလိုခံစားရ၏၊ အချစ်သစ်ခရီးလမ်းကို စတင်လမ်းဖောက်ရသလိုပင်။

ရွှယ်လင်သည် သူတို့ကြားမှ ပတ်သတ်မှုအတွက် တက်ကြွနေတတ်သည့် အဖြစ်မှာရှားပါး၏။ အချိန်အများစုတွင် သူကပျင်းရိနေတတ်ပြီး ထိုယောက်ျားပျိုက သူ့အနားတွင်တွယ်ကပ်နေတတ်သည်.....ယင်းမှာ ကမ္ဘာတိုင်းမှ ထိုသူ၏အချစ်က ဟုန်းဟုန်းတောက်နေ၍ဖြစ်လိမ့်မည်။ ယခုပင် ထိုအစီအစဥ်ကသက်ရောက်မှုကို ခံလိုက်ရပြီး မူလသက်ရောက်မှုက ထပ်မရှိတော့ပေ၊ ယင်းကို ရွှယ်လင်အတွက် အခွင့်အလမ်းတစ်ခုဟု ယူဆ၍ရနိုင်သည်။

"Host ဆုံးဖြတ်ပြီးပြီလား.."

"ငါ့မှာ နောက်ထပ်ရွေးစရာလည်း မရှိတော့ဘူး..." ဤသည်ကို ရွေးစရာဟု ဆိုရမည်ထက် ဒါမေးဒါဖြေမေးခွန်းနှင့် ပိုတူနေသည်ဟု ဆိုရမည်။ သူ၏စွမ်းအားကို ကျိန်းသေပြန်ပြင်ရန် လိုအပ်နေသည်။ သို့ထိတိုင် နောက်ထပ်အရေးကြီးသည့်အရာ ရှိနေသေး၏။

"မင်းရဲ့အစီအစဥ်ဆိုတဲ့ဟာက သူ့ရဲ့နဂိုမှတ်ဉာဏ်ကိုထိခိုက်နိုင်လား.."

"မဟုတ်ဘူး...ဒီအစီအစဥ်ကို ဆယ်မျက်နှာကမ္ဘာက ချထားတာ..ဘော့စ်က ဘာလို့ဒီလိုထူးဆန်းတာတွေ လုပ်ချင်တာလဲတော့ ငါလည်းမသိဘူး..."

ရွှယ်လင်က ခေါင်းညိတ်ပြောလိုက်၏။ "ကောင်းပြီလေ..ဒါဆိုလည်း..."

ရှီးထံတွင် ရွှယ်လင်၏အမြှီးထဲမှ သူ့အပိုင်ပါနေသော စွမ်းအင်ကိုဖယ်ထုတ်ရန်တောင်းဆိုချက်ကို နဂိုတည်းက ငြင်းပယ်ချက်မရှိခဲ့ပေ။ ထိုသူသည် ရွှယ်လင်က သည်ကမ္ဘာနှင့် မပတ်သတ်ဟု ထင်နေပုံရပြီး ရွှယ်လင်က အိုလီဗာမဟုတ်သည်ကိုလည်း သိပုံရသောကြောင့် တစ်ခါမှသူ့အား ထိုနာမည်ဖြင့်မခေါ်ခဲ့ပေ။

ရွှယ်လင်၏နေရာမှ ဝင်ကြည့်ပြီး ရှီးကသူ့အား တစ်ခုသာမေးလိုက်သည်။

"ကိုယ်တို့နောက်တစ်ကြိမ် ထပ်တွေ့ရဦးမှာလား.."

ရွှယ်လင်က သူ့အားပြန်မေးလိုက်၏။

"ငါမင်းကို အရင်ချဥ်းကပ်လာရင် မင်းငါ့ကိုချစ်ဦးမှာလား..."

နှစ်ယောက်လုံး အသံတိတ်သွားခဲ့သည်၊ နှစ်ယောက်လုံးအဖြေကို သိနေခဲ့ကြသောကြောင့် နောက်ဆုံး၌ ဘယ်သူမှ အဖြေမပေးလာခဲ့ပေ။

သူတို့သည် ကမ္ဘာပေါင်းများစွာ ကွဲကွာပြီးပြန်ဆုံခဲ့ကြသည်၊ ကြာညောင်းလှသော အတူတကွတည်ရှိမှုကြောင့် တိုတောင်းသောခွဲခွာခြင်းများကို ကြုံဆုံခဲ့ရသည်။ ယင်းသည် ကမ္ဘာ၏ ဝိညာဥ်ကူးပြောင်းခြင်းဖြစ်စဥ်နှင့် တူညီပြီး မည်သည့်အရာများ ဖြစ်လာခဲ့ပါစေ၊ တစ်ယောက်အနားသို့ တစ်ယောက်ပြန်လာရသည်ချည်းပင်၊ ထို့နောက် တစ်သက်တာလုံး အတူတကွ အဖော်ပြုသွားနိုင်ကြမည်။

****

သူမှတ်ဉာဏ်ပင်လယ်အတွင်းသို့ နောက်တစ်ကြိမ်သက်ဆင်းသည့်အခါ ထိုယောက်ျား၏ပုံရိပ်က ရွှယ်လင်၏စိတ်ထဲတွင် ပေါ်လာခဲ့ပြန်သည်။

နယ်ပယ်ဆရာသခင်များမှာ နယ်မြေကိုထိန်းချုပ်ရသောကြောင့် ၎င်းတို့အနားတွင် ဝိညာဥ်ကူးပြောင်းသူများ အမြဲရှိနေတတ်သည်။ ၎င်းတို့သည် တည်ငြိမ်ရန်အတွက် ၎င်းတို့ကမ္ဘာကို ချိန်ညှိပေးရပြီး အချုပ်အနှောင်မှလွတ်မြောက်သွားသော ရွှယ်လင်မှာ ဝိညာဥ်၏ ဆုံချက်နေရာမှ အပြင်သို့ ခွာထုတ်ခံလိုက်ရသော ကျီကျစ်ချန်းအမည်ရှိကိုယ်သို့ ချိတ်ဆက်ခံလိုက်ရသည်။ ဤကမ္ဘာမှ ဝိညာဥ်ကူးပြောင်းသူတိုင်း တူညီသောကြိုးတစ်ကြိုးတည်းဖြင့် ဆက်သွယ်ခံထားရမှန်း သူသိရှိလိုက်ရ၏။

ချိတ်ဆက်ထားသည့်ကြိုးကို စုလျိုနျန်ဟုခေါ်သည်။ ကျီကျစ်ချန်းသည် ယခင်ကသူ့အိမ်သို့ ရောက်ခဲ့ဖူးသော်လည်းရွှယ်လင်က ထိုအချိန်တွင် ထူးဆန်းသည့်အရာတစ်ခုမှ မရှိသလိုခံစားရသည်။

ရွှယ်လင်မှာ ခဲရာခဲဆစ်တွေးနေပြီးမှ ကျီဇစ်ချန်းကို မေးလိုက်ရသည်။ ထိုသူမှာ စူးလျိုနျန်အိမ်တွင် သူတွေ့ခဲ့ရသောလူများကို ထပ်ဆင့်စီနေပြီး စည်းဘောင်ဆရာသခင်၏ အော်ရာကို ခံစားလိုက်ရသည့်အခါ လူတစ်ယောက်ကိုရှာတွေ့သွားလေ၏။

ထိုလူသည်ကား ထိုကမ္ဘာက စူးအိမ်၏ခေါင်းဆောင် စူးရွှမ့်ယန်ပင်။

ထိုအမှတ်တရများကို ပြန်လည်အောက်မေ့လိုက်သည်တွင် ရွှယ်လင်ထံတွင် ထူးဆန်းသည့် ခံစားချက်တစ်ခု ဖြစ်တည်လာရသည်။ သူသည် တတိယလူနေရာမှ ကြည့်နေရသလိုခံစားရပြီး ရံဖန်ရံခါ သူပြဿနာကြားညပ်ရသည့်အခါ ငယ်ရွယ်လှသည့် သူ့ပုံစံကိုပြန်မြင်ယောင်လာသည့်တိုင် ဘာကိုမျှမလုပ်နိုင်ပေ။ ၎င်းက သူ့ကို စိတ်မသက်မသာဖြစ်ရစေသည်။

သူ ထိုလူ၏အမည်ကို မှတ်မိသည်။ ထိုစဥ်အချိန်က အနှီသူ၏စကားကို သူ့နားထဲတွင်ထပ်ခါတလဲလဲ ကြားနေရသည်၊ ထိုသူကိုမှတ်မိရန်၊ ထိုသူ၏မျက်နှာကို မှတ်မိရန်....။

ထို့ကြောင့် အနှီသူက ထိုကမ္ဘာ၏ နယ်ပယ်ဆရာသခင်ပင်....။

ရွှယ်လင် ရုတ်တရက်သဘောပေါက်သွားသည်။

စူးရွှမ့်ယန်က နယ်ပယ်ဆရာသခင်! အနှီသူက သူ့အနောက်ကို ကမ္ဘာများစွာ လိုက်လာခဲ့သည်မှာ မဆန်းတော့ နယ်ပယ်ဆရာသခင်အနေနှင့် ကမ္ဘာများကို အိမ်ဦးကြမ်းပြင်သွားလာနိုင်ရန် အင်မတန်လွယ်ကူသည်။ သူယခုသိထားသည့် အရာများအရ နယ်ပယ်ဆရာသခင်စူးရွှမ့်ယန်က အလွန်စွမ်းအားကြီးပြီး ကမ္ဘာများကို ထိန်းညှိသည့်နည်းလမ်းက အင်မတန်ကွဲပြားသည်။

ထိုအတိုင်းဆိုပါက စူးရွှမ့်ယန်နှင့် သူကဘယ်လိုပတ်သက်နေပါသနည်း။

နောက်ဆုံးမှတ်ဉာဏ်မှာ ဝေဝါးနေ၏။ သူအရှေ့တိုးလိုက်သည်နှင့် မရေရာမှုတို့ကိုဖယ်ရှားနိုင်သည့်တိုင် ရွှယ်လင်ရောက်ရှိရန်ကြိုးစားသည့်အခါတိုင်း တစ်ကိုယ်လုံးကအနောက်သို့ပြန်ဆွဲယူခံရသည်။ အနောက်ဘက်သို့လဲကျသွားပြီး ချက်ချင်းလန့်နိုးလာလေ၏။

သူ မကျေမချမ်းဖြင့် ကျစ်သပ်လိုက်မိသည်။ သူ့အနေဖြင့် နောက်ဆုံးအမြှီးတစ်ချောင်းကို ရှာရန်လိုအပ်နေပြီး ထိုအခါမှ အဆုံးသတ်ကိုသိနိုင်လိမ့်မည်။

စနစ်က သူရှေ့ဆက်လုပ်မည့်အရာကို စောင့်ဆိုင်းနေ၏။ ရွှယ်လင်က ထိုသူ သူ့အားအနီးအနားမှ စောင့်ကြည့်နေမှန်း သိနေသော်လည်း အချိန်အတန်ကြာအောင် ပုန်းအောင်းနေပြီး သူ့ကို ထွက်တွေ့ချင်စိတ်မရှိကြောင်း ခန့်မှန်းလိုက်နိုင်သည်။ ရွှယ်လင်သည် ၎င်းတို့၏ လက်ရှိဆက်ဆံရေးနောက်ကွယ်မှ ကိစ္စများကို ဖြေရှင်းရန်စီစဥ်ထားလေ၏။

ကမ္ဘာအသစ်သို့ ဝင်လာပြီးနောက်ပိုင်း ယခုလို ရင်းနှီးနေသောခံစားချက်ကြောင့် ရွှယ်လင် မျက်လုံးဖွင့်ကြည့်လိုက်သည်။ ဤတစ်ကြိမ်တွင် သူသည် အိပ်ရာပေါ်တွင် အေးအေးလူလူလဲလျောင်းနေ၏။ ရွှယ်လင် အနည်းငယ်ခန့်လှုပ်ကြည့်လိုက်သည့်အခါ နာကျင်မှုမတွေ့ရပေ။ သူအနည်းငယ်ထူးဆန်းနေသလို ခံစားရသည်။ စနစ်ကသူ့ကို အမြဲခက်ခဲအောင်လုပ်ခဲ့သည်မလား?။

စနစ်: "...." သူက စနစ်ကောင်းလေးပါ။ ဘယ်လိုလုပ် host စိတ်ထဲမှာ ဒီလို သောက်ကျင့်မကောင်းတဲ့ စနစ်မျိုး ဖြစ်သွားရတာလဲ? ဝမ်းနည်းသွားပြီ...တာဝန်ပြီးသွားရင်...သူ့ဟာသူခွဲထွက်သွားဖို့ နည်းလမ်းရှာရမယ်...။

ရွှယ်လင် ကုန်းရုန်းထလိုက်သည်။ ဘေးပတ်လည်ကို ကြည့်လိုက်သည့်အခါ နည်းပညာမြင့် အနာဂတ်ကမ္ဘာကို ရောက်နေကြောင်းသိလိုက်ရ၏။ သူသိရန်မကြိုးစားတော့ပေ၊ မှန်ကိုလှည့်ပတ်ရှာနေပြီး သူ၏လက်ရှိအနေအထားကို စစ်ကြည့်လိုက်သည်။ ခဏအကြာတွင် မူလပိုင်ရှင်၏ ရုပ်သွင်က မြင်ကွင်းထဲသို့ဝင်ရောက်လာ၏၊ ရွှယ်လင်က မျက်ခုံးပင့်လိုက်ကာ ယင်းကစနစ်၏လက်ချက်ပင်ဖြစ်ကြောင်း လုံးဝနားလည်လိုက်သည်။ စနစ်က သူဝိညာဥ်ကူးပြောင်းတိုင်း အားနည်းသည့်နေရာကို အမြဲစီစဥ်ပေးတတ်သည်။ ဇာတ်ကွက်အကြီးစားထဲသို့ ချက်ချင်းပစ်မသွင်းပေးခြင်းကပင် စဥ်းစားစရာကောင်းနေပြီ။

ယခုလိုပင်။ ဆယ်ကျော်သက်လေးနှင့်တူနေသော လူငယ်လေးပုံစံဖြင့် ရွှယ်လင်မှာ သူ့ပါးသူ ဆွဲလိုက်မိသည်။ မယုံကြည်နိုင်စရာကောင်းလောက်အောင် နူးညံ့နေပြီး စိတ်ရှုပ်စရာ လူငယ်ဇာတ်လမ်းပုံစံအထိရောက်အောင်ပင် သူ၏ ဇာတ်ကောင်နေရာက သေးငယ်လွန်းနေ၏။ "ဟုတ်ပြီ..ဒီကမ္ဘာက ဘယ်လိုသောက်ကျိုးနည်း ဇာတ်ကြောင်းကြီးလဲ...ဒီခန္ဓာကိုယ်က သူ့ဟာသူ ခြေလက်တွေဖြတ်တောက်ထားမျိုးတော့ မဟုတ်ဘူး..ဘာမှလည်းမှားနေတာမရှိဘူး..သူဘာဖြစ်သွားတာလဲ.."

"ဒီတခေါက် ရွေးချယ်ထားတဲ့ကိုယ်က ကြာပန်းနက်လေးလေ.."

စနစ်၏စကားက ရွှယ်လင်ကို ပေါက်ကွဲသွားစေခဲ့သည်။ သူကပျော်ပျော်ကြီး ဆက်ပြောလာသေး၏။

"အရင်ကမ္ဘာနဲ့အတူတူပဲ..လက်ရှိ hostရဲ့ဇာတ်ရုပ်က ဗီလိန်..အမြှောက်စာပေါ့..."

ရွှယ်လင်ထံမှ 'အို့' ဟူသော အသံထွက်သွားသည်။ ထူးဆန်းသည့်အရာ မရှိပါချေ။ မည်သို့ပင်ဖြစ်စေ သည်ကိုယ်က သူ့လက်ထဲရောက်လာပြီ၊ မဟူရာကြာပန်းဖြစ်နေလျှင်ပင် ဆေးကြောပစ်၍ ရသေးသည်။ ကြောက်စရာကောင်းသည့်အရာဟူ၍မရှိ။

"Host ကိုအပေါ်ယံ ဇာတ်ကြောင်းပေးမယ်...ပြီးတော့ ဒီကိုယ်ကမှတ်ဉာဏ်တွေကို အရင်ပေးမယ်..အတိတ်ကအကြောင်းတွေတော့ နည်းနည်းပါမှာ..ပြီးတော့ host မကြာခင် ပူပူနွေးနွေးစကားများစရာရှိတယ်..."

ရွှယ်လင်သည် စနစ်က သောက်ကြီးသောက်ကျယ် ပြောတတ်မှန်း သိသည်၊ လျှော့ပြောခိုင်းရန်က ခက်လှ၍ မကြာခင်မှာပင် ရန်သတ်ကြတော့၏။ ရွှယ်လင်က အိပ်ရာပေါ်ပြန်သွားကာ မျက်လုံးကိုမှိတ်လိုက်ရင်းမှတ်ဉာဏ်များကို စတင်ပြန်ရစ်ကြည့်လိုက်သည်။

ဤကိုယ်သည် ဟယ်လန်ကျို့ယွင်အမည်ရှိပြီး ဝိညာဥ်စွမ်းအင်နည်းကာ ဖွံ့ဖြိုးမှုအားနည်းသော လက်မှုဆရာတစ်ယောက်ဖြစ်၏။ သူက ဇာတ်လိုက် shou၏ အစ်ကိုကြီးတစ်ယောက်လည်း ဖြစ်ပြီး ဇာတ်လိုက်၏ မကြာခဏ အနိုင်ကျင့်နှိပ်စက်မှုကိုလည်း ခံရသည်၊ သူနှင့်ပတ်သက်သော မကောင်းသတင်းများကိုဖြန့်ပြီး တစ်နေ့လုံးစိတ်ဒုက္ခပေးတတ်၏။

မှန်သည်။ ထိုသူက သွေးတစ်ဝက်သာနှောသည့် အဖေတူ အမေကွဲ ဖြစ်ပေ၏။ သည်ခန္ဓာကိုယ်၏ မိခင်ဖြစ်သူက သေဆုံးသွားပြီး ဇာတ်လိုက် shou ကနောက်အိမ်ထောင်နှင့် ပါလာသည့်ကလေးပင်။

မူလကိုယ်က ထိုအမျိုးသမီးကို မိထွေးဟုမခေါ်ပေ၊ အကြောင်းမှာ ထိုမိန်းမက သူ့အား အပေါ်ယံတွင် ကောင်းကောင်းဆက်ဆံလင့်ကစား ကွယ်ရာတွင်မူ ညစ်တီးညစ်ပတ်နှင့် မဟုတ်တရုတ်များသာ လုပ်တတ်လေသည်။ မူလဇာတ်ကောင်၏ ဉာဏ်ရည်ကြောင့်သာမဟုတ်လျှင် သူသည် မိထွေးဖြစ်သူ၏ အကောက်ကြံမှုကြောင့် အိမ်အပြင်ထွက်သွားရလောက်ပြီ၊ သူ၏ပုံစံလည်း ပျက်ယွင်းသွားကာ ဂုဏ်သိက္ခာလည်း မြောင်းထဲရောက်လိမ့်မည်။ ထိုသို့ဖြစ်ရပ်မျိုးနှင့်ယှဥ်လျှင် သူ၏လက်ရှိအနေအထားက ကောင်းနေပါသေး၏။

ဤကမ္ဘာမှ သိပ္ပံနှင့်နည်းပညာအမြန်တိုးတက်မှုဖြင့် လူများ၏နေ့စဥ်ဘဝတွင် စက်အများစုက ပါဝင်နေလေသည်။ ဤကမ္ဘာတွင်ကျားမ ခွဲခြားထားခြင်း မရှိသော်လည်း သားရဲလူသားများနှင့် လက်မှုဆရာသခင်များအကြား၊ သားရဲတစ်ဝက် လူသားတစ်ဝက်ကြားတွင်မူ ရှိပေသည်။

အမည်အရ သားရဲလူသားများက လူသားနှင့်တိရစ္ဆာန်ပုံစံအကြားတွင် ကူးပြောင်းနိုင်သည်။ သူတို့လက်ထဲတွင် ရှိနေသည့်စွမ်းအားနှင့် တိုင်းပြည်ကိုကာကွယ်ရန် တာဝန်ရှိနေပြီး စက်များအသုံးပြုကာ တိုက်ပွဲဝင်ရလေသည်။

တစ်ဖက်မှ ဆရာများက ထောက်ပံ့ရေးတွင်တာဝန်ယူရသည်။ သားရဲလူသားများကို ကုသပေးနိုင်ပြီး သားရဲလူသားများအတွက် အလုပ်များကို စီမံပေးရသည်။

လက်မှုဆရာများ၏ ဝိညာဥ်စွမ်းအင်များက စွမ်းအင်ကျောက်များကို ထိုးဖောက်ကာ ၎င်းတို့၏ စွမ်းဆောင်ရည်ကို ဆုံးဖြတ်ပေးနိုင်သည့်အပြင် ထိုစွမ်းအင်ကျောက်များကို ပုံဖော်နိုင်သည့် စွမ်းရည်လည်းရှိပေသည်။

စွမ်းအင်ကျောက်များက ဤကမ္ဘာ၏စွမ်းအင်အရင်းအမြစ်များပင်။ 'စွမ်းအင်ခရစ်စတယ်' ဟုခေါ်သော စွမ်းအင်ကျောက်များကို ကျောက်ရိုင်းများမှ သန့်စင်ထားခြင်းဖြစ်သည်။ ၎င်းတို့၏ နေ့စဥ်ဘဝကို ထောက်ပံ့ပေးနိုင်သည်။ ၎င်းတို့က သားရဲလူသားများ တိုက်ခိုက်ရာနှင့် လေ့ကျင့်ရာတွင်လည်း အသုံးလိုသည်။

အားကောင်းသည့်ပညာရှင်များက စွမ်းအင်ခရစ်စတယ်များအတွင်း ပါသည့် စွမ်းအင်များကို အသုံးပြုသူတို့နှင့် သင့်တော်သော ပုံစံအလိုက် ပုံစံအမျိုးမျိုးထွင်းတတ်ကြသည်။

ထို့အပြင် အချို့သောစွမ်းအားမြင့် ဆရာများက စွမ်းအင်ခရစ်စတယ်များကို စွမ်းရည်မြှင့်နိုင်ပြီး တံဆိပ်ဖော်ခြင်းအားဖြင့် စွမ်းအားများကို ပိုကြီးအောင်မြှင့်နိုင်သည်။

ထိုလက်မှုဆရာများအပြင် သားရဲတပိုင်းလူသားများ၌လည်း ထိုစွမ်းရည်ရှိကြသည်။ သို့သော်လည်း စွမ်းအားအနည်းငယ်ကသာ ၎င်းတို့၏ စိတ်ဝိညာဥ်စွမ်းရည်ကို လှုပ်နှိုးနိုင်ပြီး သားရဲတပိုင်းလူသားအများစုက ၎င်းတို့စွမ်းရည်ကို စိတ်ဝိညာဥ်စွမ်းအားဖြင့် မမြှင့်တင်နိုင်ပေ။ ထို့ကြောင့် ၎င်းတို့ခမျာ အဆင့်နိမ့်အလုပ်များကို လုပ်ကြရပြီး စွမ်းရည်သလင်းကျောက်များကို ပြုလုပ်နိုင်လင့်ကစား အများစုက အစုအဝေးဖြင့် အလုပ်လုပ်ကြရကာ စွမ်းရည်မြင့်သလင်းကျောက်များနှင့် ထိတွေ့ခွင့်ရရန် အခွင့်အရေးနည်းပါးကြသည်။

သားရဲတပိုင်းများသည် ဆရာများနှင့် သားရဲလူသားများအကြားတွင် နေထိုင်ကြရ၏။ ၎င်းတို့က တိစ္ဆာန်အဖြစ်သို့ မပြောင်းလဲနိုင်သည့်တိုင် သားရဲလူသားများနှင့် စရိုက်မတူသည့်အပြင် ပညာရှင်များနှင့်လည်း မတူပြန်ပေ။ ၎င်းတို့အများစုတွင် တိရစ္ဆာန်များကဲ့သို့ အမြှီးနှင့်နားရွက်များပါရှိတတ်သည်။ ၎င်းတို့၏ ဖွံ့ဖြိုးမှုအားနည်းပုံက မဆိုသလောက်လေးသာဖြစ်ပြီး ပညာရှင်များနည်းတူ အသိုင်းအဝိုင်းအကြားတွင် နေထိုင်နိုင်သည်။

သို့သော်လည်း ကွာခြားချက်ရှိသေးသည်။ ဆရာများအား ကာကွယ်စောင့်ရှောက်ရေး ထုံးတမ်းက ဆရာများနှင့် သားရဲတပိုင်းများအကြားတွင် ပြီးပြည့်စုံစွာ ရေးဆွဲထားသောဥပဒေပင်ဖြစ်သည်။ ၎င်းသည်ကား လွတ်လပ်ရေးနှင့် အချုပ်အနှောင် နှစ်ခုကြားမှ စည်းမျဥ်းလည်းဖြစ်၏။

သားရဲတပိုင်းများတွင် မိမိနှစ်သက်သဘောကျသူကို လွတ်လပ်စွာလက်ထပ်ခွင့်ရှိသည်။ စည်းမျဥ်းဟူ၍မရှိဘဲ အရွယ်ရောက်သည်နှင့်တန်းပြီး လက်ထပ်နိုင်သည်၊ သို့သော် ဆရာများနှင့် လုံးဝကွာခြား၏။ တွဲဖက်မရှိသေးသည့် ဆရာများက လက်ထပ်ရမည့်အရွယ်သို့ရောက်သည့်အခါ အစိုးရစနစ်က လက်မထပ်ရသေးသည့် သားရဲလူသားများနှင့် အလိုအလျောက်ချိတ်ဆက်ပေးပြီး သူတို့ချစ်သူများဖြစ်သွားပြီးနောက်ပိုင်း အတင်းအကျပ်ချည်နှောင်ခံရမည်။

ကမ္ဘာ၏စနစ်က ဤပုံစံအတိုင်းဖြစ်ပြီး သားရဲတစ်ပိုင်းကိုယ်ထဲသို့ ဝိညာဥ်ကူးလိုက်ခြင်းကပင် ပိုအသုံးဝင်နိုင်သည်၊ ထို့နောက် ဤဇာတ်လမ်း၏ဇာတ်လိုက်က သားရဲတစ်ပိုင်းကိုယ်ထဲသို့ဝင်ရောက်သွားသည်။ ရွှေလက်ချောင်းအားကိုးဖြင့် သူ့အသက်ကိုရန်ရှာပြီး စွမ်းအင်တည်ထောင်သူ စီနီယာ ဖြစ်လာသည်၊ ရုပ်ရှိရေလျှံ အလန်းဇယားလေးကိုလက်ထပ်ပြီး ကလေးတပြုံကြီးမွေးပြီး အင်မတန်အေးချမ်းပြီး ပျော်စရာကောင်းသည့်ဘဝလေးပင်။

ရွှယ်လင်: "...." နောက်ဆုံးတော့ နောက်ခံကို ဒီလိုဆင်ထားတာကိုး။ ဘာလို့ ဒီဇာတ်လမ်းက ကျင့်ကြံရေးဝတ္ထုတွေနဲ့ လာတူနေတာလဲ? ...ဒီလို ရှုပ်ထွေးပြီး ဘာရန်ငြိုးမှမပါဘဲ ချိုလွန်းတဲ့ဇာတ်ကြောင်းက ပြောင်းဖို့အခက်ဆုံးပဲ။

သူတို့ဇာတ်လမ်းကို မပြောင်းနိုင်တော့တာများလား!

Prev Next