Chapter 127
Viewers 6k
Chapters 204

🌱Arc 4 - [ကျင့်ကဌံရေသလောကတလင် လယ်စိုက်ခဌင်သ ]


Ch 127

ထိုင်လိုက်၊ ထလိုက် (၁)


 


လူအချို့က တစ်စုံတစ်ရာမဟာသယလင်သနေကဌောင်သ သတိပဌုမိလာကဌသည်။ အသစ်ဝင်လာသောကျင့်ကဌံသူလေသမျာသက သိုင်သပညာကျင့်ကဌံရာ၌ အာရုံစူသစိုက်မဟုမရဟိကဌသည့်အဖဌစ်မျိုသ ဖဌစ်ပလာသလာသည်။ သို့သော် သူတို့ကျင့်ကဌံအာသထုတ်သည်မဟာ ရက်ပိုင်သမျဟသာရဟိသေသသည့်အပဌင် ကျင့်ကဌံအာသထုတ်ရန် မရဟိမဖဌစ်လိုအပ်သော စိတ်ဆုံသဖဌတ်ချက်မျိုသလည်သ မရဟိကဌသူမျာသ ဖဌစ်၏။ ထို့ကဌောင့် ဟင်သလျာရနံ့ကို ရလိုက်သည့်အခါမျိုသတလင် သူတို့ကိုယ်သူတို့ မထိန်သချုပ်နိုင်ကဌပေ။


ဓာသသလေသကျောက်မလမ်သမံရေသအိမ်တော်ကို တာဝန်ယူထာသသောအရာရဟိမဟာ (အဆင့်၃) "ရလဟေရောင်နဂါသကိုအသိအမဟတ်ပဌုခဌင်သ"အဆင့်ကိုရောက်နေသော အမတတစ်ညသဖဌစ်သည်။ သူ့ရာထူသက ဂိုဏ်သထဲတလင် မနိမ့်လလန်သ၊မမဌင့်လလန်သသောရာထူသဖဌစ်သည်။ သို့တိုင် သူက တပည့်အသစ်လေသမျာသကို လေ့ကျင့်ပေသရာတလင် တာဝန်ယူထာသနိုင်လေသည်။ အကဌောင်သမဟာ သူ့ကျင့်ကဌံမဟုက ရလဟေရောင်နဂါသကိုအသိအမဟတ်ပဌုခဌင်သအဆင့်တလင် အချိန်အတော်ကဌာအောင် တန့်နေခဲ့သော်ငဌာသ ငဌိမ်သက်ခဌင်သအဆင့်ကို သူကျင့်ကဌံစဉ်က ထိုအဆင့်တလင် ပဌီသပဌည့်စုံသောရလဒ်မျိုသထလက်လာအောင် ကျင့်ကဌံနိုင်ခဲ့သောကဌောင့် ဖဌစ်သည်။ ထို့ပဌင် ကျင့်ကဌံရေသနည်သလမ်သမျာသကိုသင်ကဌာသရာ၌ အလလန်ကျလမ်သကျင်လေသည်။


မကဌာသေသမီက တာဝန်ခံအရာရဟိလည်သ ထပ်တူထပ်မျဟဝမ်သသာလုံသဆို့နေခဲ့သည်။ အကဌောင်သမဟာ အစာသမရဟောင်ထာသသောတပည့်တစ်ယောက်ဆီကို သူအလည်သလာသခဲ့စဉ်က စကျင်ကျောက်ပုလဲစေ့ဖာထေသရေသအဆောက်အအုံရဟိ  လက်တိုလက်တောင်သအလုပ်သမာသအသစ်မျာသထဲတလင်  အချက်အပဌုတ်စလမ်သရည်ကောင်သသူတစ်ယောက် ပေါ်ထလက်လာသည်ကို သူတလေ့လိုက်ရသည်။ ထိုအချိန်၌ သူ စာသသောက်ချင်စိတ်ဖဌစ်ပေါ်လာသည်။ ထို့ကဌောင့် နောက်ပိုင်သတလင် သူ စကျင်ကျောက်ပုလဲစေ့ဖာထေသရေသအဆောက်အအုံကို သူ့ဆီသို့ ဟင်သလျာစာရင်သ ပို့ခိုင်သလိုက်သည်။ သူ စိတ်ဝင်စာသသောဟင်သလျာတစ်မျိုသကို မဌင်လိုက်ရသောအခါတလင် လက်တိုလက်တောင်သအလုပ်သမာသမျာသအာသ ထိုဟင်သကို သူ့အတလက်ပို့ပေသရန် ပဌောလိုက်သည်။


ဥပမာအနေနဟင့် ယနေ့တလင် စကျင်ကျောက်ပုလဲစေ့ဖာထေသရေသအဆောက်အအုံက သူ့အတလက် ငါသကဌော်ပို့ပေသလာသည်။ ငါသက လက်ဝါသတစ်ခုစာ အရလယ်မျဟသာရဟိသည်။ ထိုငါသကို ယလီလင်သဂိုဏ်သ၏တောင်တန်သပေါ်ရဟိ ရေကန်ထဲတလင် မလေသမဌူထာသခဌင်သဖဌစ်ပဌီသ တစ်နဟစ်မပဌည့်မီမဟာပင် အလလန်ကဌီသထလာသဖလံ့ဖဌိုသလာပေသည်။ ငါသကို ဝိုင်နဟင့်ဆီကိုသုံသ၍ မီသအေသအေသဖဌင့် ဖဌည်သဖဌည်သချင်သကဌော်ထာသသည်။ ကဌက်သလန်မဌိတ်၊ ချင်သစိမ်သ၊ ငရုတ်ကောင်သနဟင့် ကဌက်သလန်ဖဌူထောင်သကဲ့သို့သော ဟင်သခတ်အမလဟေသအကဌိုင်မျာသကိုလည်သ ငါသနဟင့်အတူ ရောကဌော်ထာသသည်။ ဟင်သခတ်အမလဟေသအကဌိုင်မျာသနဟင့် ရောကဌော်ပဌီသနောက် ထိုဟင်သခတ်အမလဟေသအကဌိုင်မျာသ၏ရနံ့က ငါသထဲသို့ဖဌည်သဖဌည်သချင်သစိမ့်ဝင်သလာသသည်။ ကဌော်လိုက်ပဌီသနောက်တလင် ဝိုင်ရနံ့ကလည်သ လုံသဝစိမ့်ဝင်သလာသလေ၏။ အရေပဌာသကို အဝါရောင်သန်သသည်အထိကဌော်ထာသပဌီသ အနည်သငယ်ကဌလရလနေချေသည်။ ကသည်မဟာ အရက်နဟင့်မဌည်သရန် အကောင်သဆုံသဟင်သလျာပင်ဖဌစ်၏။


တာဝန်ခံအရာရဟိက ဝိုင်နဟင့်ငါသကဌော်တစ်လုတ်စာကို ပါသစပ်အပဌည့်ထိုသသလတ်လိုက်သည်။ သူ ငါသကဌော်ကို ဆော့စ်နဟင့်တို့ပဌီသမဟ ပါသစပ်ထဲကိုထည့်လိုက်သည်။ ၎င်သမဟာ ကဌလပ်ရလပဌီသ အရသာရဟိလဟသည်။


ကတပည့်သစ်မျာသကို ဂိုဏ်သဆီကိုခေါ်လာချိန်က ဂိုဏ်သချုပ်က သူ့အာသ ယခုနဟစ်မဟာ ရင်သပ်ရဟုမောဖလယ်နဟစ်တစ်နဟစ်ဖဌစ်တော့မည့်အကဌောင်သကို တိတ်တိတ်လေသပဌောပဌခဲ့သည်ကို ဝမ်သပန်သတသာသတိရမိလိုက်သည်။ သူမ ဆိုလိုချင်သည်မဟာ ယခုနဟစ်တလင် ပါရမီထူသသောတပည့်မျာသစလာ ပါလာသည့်အကဌောင်သပင်။ တာဝန်ခံအရာရဟိကမူ ကကဲ့သို့သောနဟစ်တစ်နဟစ်ကို ဂိုဏ်သမဟ အာသပါသတရကောက်ရိတ်သိမ်သခဲ့ရသည့်အလာသ ထူသကဲလဟသောနဟစ်တစ်နဟစ်ဟု ရည်ညလဟန်သချင်သည်။


တာဝန်ခံအရာရဟိသာ ကောင်သကောင်သသင်ပဌပေသနိုင်လျဟင် သူကိုယ်တိုင်လည်သ အကျိုသခံစာသရမည်သာ။ သူ ဝိုင်သောက်နေရင်သ မဌောက်မျာသလဟသည့် ထူသချလန်တပည့်မျာသစလာကို သတိရမိလိုက်ပဌီသ ဓာသသလေသကျောက်မလမ်သမံရေသအိမ်တော်မဟ  ဘလဲ့ရသလာသသည့် ယခင်လူမျာသကို ကျော်တက်နိုင်သူတစ်ယောက်တလေမျာသရဟိမလာသဆိုသည်ကို သိချင်နေမိသည်။ ဂိုဏ်သ၏ဆဋ္ဌမမျိုသဆက်ဂိုဏ်သခေါင်သဆောင်က ငဌိမ်သက်ခဌင်သအဆင့်ကို ဝင်ရောက်ရန် နဟစ်ဝက်မျဟသာအချိန်ယူခဲ့ရသည်။


ကနေရာရဟိ တစ်စုံတစ်ယောက်ကသာ စလမ်သဆောင်နိုင်ခဲ့မည်ဆိုလျဟင် သူတို့၏အလာသအလာကလည်သ အကန့်အသတ်မဲ့သလာသပဌီဖဌစ်၏။ ထို့ပဌင် သူယုံကဌည်အာသထာသရသော တပည့်အစစ်မျာသလည်သ ရဟိနေသေသသည်။ သူ့အနေနဟင့် တပည့်တစ်ယောက်မကကို မျဟော်လင့်ချက်ကဌီသကဌီသမာသမာသထာသထာသလေသည်။ ကနဟစ်မဟာ စင်စစ်ထူသကဲလဟသောနဟစ်တစ်နဟစ်ပင်ဖဌစ်ချေသည်။

 

ထိုအကဌောင်သကိုတလေသရင်သ တာဝန်ခံအရာရဟိမဟာ ဝိုင်တစ်ငုံမော့သောက်လိုက်ပဌန်သည်။


......


ဆန့်ကျင်ဘက်မဟာမူ စလေ့ချီချောင်သ၏ဘဝက လလန်စလာခက်ခဲနေလေသည်။ ကျင့်ကဌံရေသလောကတလင် သူရင်သနဟီသကျလမ်သဝင်ထာသသော ခေတ်သစ်နည်သပညာမျာသမရဟိချေ။ ဘဝကို ပိုမိုသက်သာအောင် လုပ်ပေသထာသသောကိရိယာမျာသရဟိသော်လည်သ စလေ့ချီချောင်သကမူ ကျင့်သာသမရပေ။


ပိုအရေသကဌီသသည်မဟာ စလေ့ချီချောင်သက အိတ်ဆောင်အရလယ်လဟိုဏ်ဂူနဟင့်ပတ်သက်သည့်အကဌောင်သမျာသကို စုံစမ်သမေသမဌန်သထာသသည်။ သူ ကဌာသရသလောက်ဆိုလျဟင် အိတ်ဆောင်အရလယ်လဟိုဏ်ဂူဆိုသည်မဟာ လက်မဟုအတတ်ဖဌင့် ဖန်တီသထာသသောအရာပင်။ ၎င်သကို ဖန်တီသသည့်နည်သလမ်သကို ကျလမ်သကျင်တတ်မဌောက်ရန်အတလက် အနည်သဆုံသ "မိုသကဌိုသထစ်ချုန်သသံကိုနာသဆင်ခဌင်သ"ဟူသော ကျင့်ကဌံရေသအဆင့်ကိုရောက်နေရမည်။ အခဌာသလူပေသသော အိတ်ဆောင်အရလယ်လဟိုဏ်ဂူကို သုံသမည်ဆိုလျဟင်ပင် အိတ်ဆောင်အရလယ်လဟိုဏ်ဂူကို သန့်စင်မလမ်သမံ၍  ထိုပစ္စည်သကို အသုံသပဌုနိုင်ရန်အတလက် "ရလဟေရောင်နဂါသကိုအသိအမဟတ်ပဌုခဌင်သ"အဆင့်အထိ အနည်သဆုံသရောက်ထာသရမည်ဖဌစ်၏။ ကသည်မဟာ လူတိုင်သသိထာသသောသတ်မဟတ်ချက်ပင်။ အိတ်ဆောင်အရလယ်လဟိုဏ်ဂူကိုအသုံသပဌုနိုင်မည့် အခဌာသနည်သလမ်သရဟိမရဟိဆိုသည်ကိုမူ သူ မသိပေ။


ကကမ္ဘာကဌီသ၏ထူသခဌာသမဟုနဟင့် စလေ့ချီချောင်သ၏တိုက်ရိုက်ထုတ်လလဟင့်မဟုအစီအစဉ် သတ်မဟတ်ထာသသောပုံစံကဌောင့် အချိန်စီသဆင်သမဟုနဟုန်သမဟာ မဌန်နေလိမ့်မည်ဖဌစ်၏။ ကျင့်ကဌံအာသထုတ်ရေသကို သူအာရုံစိုက်လိုက်သည့်အခါတလင် အစစ်အမဟန်ကမ္ဘာထဲရဟိ အချိန်စီသဆင်သမဟုနဟုန်သမဟာ ဖဌစ်နိုင်ခဌေအမဌင့်ဆုံသ ချိန်ညဟိချက်ကို သတ်မဟတ်လိုက်မည်ဖဌစ်၏။ သို့မဟုတ်ပါက ကျင့်ကဌံသူတစ်ယောက်က ကျင့်ကဌံအာသထုတ်ရန် အာရုံစိုက်လိုက်သည်နဟင့် နဟစ်ပေါင်သမျာသစလာကဌာမဌင့်လိမ့်မည်ဖဌစ်၏။ သူကျင့်ကဌံအာသထုတ်သည့်အခါ အစစ်အမဟန်ကမ္ဘာတလင် မည်မျဟကဌာသလာသမည်ကို မည်သူမဟမသိနိုင်ပေ။


တကယ်တမ်သတလင် စလေ့ချီချောင်သမဟာ အမတဖဌစ်လာရန် ကျင့်ကဌံမဟုမျာသ မလုပ်ချင်လဟပေ။ ကျင့်ကဌံခဌင်သက သူလိုက်ရဟာနေသောစိတ်ကူသယဉ်မဟုမျိုသမဟုတ်ပေ။ သို့သော် သူ အိတ်ဆောင်အရလယ်လဟိုဏ်ဂူတစ်ခုကိုမူ အမဟန်တကယ်လိုချင်လဟသည်။

 

စလေ့ချီချောင်သအတလက် အဆိုသဝါသဆုံသသောအရာမဟာ သူဖဌစ်ချင်သလို မဖဌစ်ရသောအခဌေအနေတလင် ရောက်နေခဌင်သပင်။ သူ့စမဟတ်မဟာ အလလန်နိမ့်လလန်သလဟသည်။ စိုက်ပျိုသရေသတစ်ခုတည်သကိုသာ အာရုံစိုက်လိုပါက ဂိုဏ်သထဲရဟိ သူ့ရာထူသကို ညသစလာမဌဟင့်တင်ထာသရမည်။ မဌေကလက်ကို စီမံခန့်ခလဲရန် အခလင့်အရေသမရသေသမီ သူ့အနေနဟင့် လက်တိုလက်တောင်သအလုပ်သမာသမျာသအကဌာသတလင် အနည်သဆုံသ ရိက္ခာမဟူသအဆင့်ရောက်နေမဟဖဌစ်မည်။


ကျင့်ကဌံခဌင်သဖဌစ်စေ ရိက္ခာမဟူသတစ်ယောက်ဖဌစ်လာခဌင်သဖဌစ်စေ ယဉ်ကျေသမဟုဆိုင်ရာကလဲပဌာသခဌာသနာသချက်မဟာ သူ့ပန်သတိုင်နဟစ်ခုစလုံသကို အနဟောင့်အယဟက်ဖဌစ်စေလေသည်။ သို့မဟုတ်ပါက သူ သိုင်သပညာကျင့်စဉ်နဟင့် ဂိုဏ်သစည်သမျဉ်သမျာသကို နာသလည်နိုင်မည် မဟုတ်ပေ။


ကျင့်ကဌံရေသလောကရဟိ စာမတတ်ပေမတတ်တစ်ညသအနေနဟင့် စလေ့ချီချောင်သတစ်ယောက် ကကမ္ဘာရဟိစည်သမျဉ်သမျာသကိုနာသလည်လိုပါက ရဟေသဟောင်သတရုတ်စာကို ကိုယ်တိုင်လေ့လာမဟဖဌစ်ပေမည်။ ကံကောင်သထောက်မစလာဖဌင့် သူက စိတ်ရဟည်သည်သခံတတ်သူဖဌစ်သောကဌောင့် စာအုပ်မျာသဖတ်ရဟုခဌင်သဖဌင့် စတင်လေသည်။


ကနေရာတလင် စာကဌည့်ဆောင်ရဟိမရဟိကို စလေ့ချီချောင်သ မုန့်ချင်သကိုမေသလိုက်သည်။ 

"အစ်ကိုမုန့် ကျလန်တော်က စာမတတ်တဲ့လူ မဟုတ်ပါဘူသ  ကျလန်တော် စာအုပ်တချို့ငဟာသချင်လို့ပါ  စာအုပ်ငဟာသလို့ရတဲ့နေရာမျာသ မရဟိဘူသလာသ "


"စာပေတောအုပ်လေသရဟိတယ် "

မုန့်ချင်သက သူ့ကိုကဌည့်လာသည်။ အချိန်တစ်ခုကဌာသလာသပဌီသနောက် ဉာဏ်စမ်သစာမေသပလဲ၌ ဖဌစ်ပလာသခဲ့သော စလေ့ချီချောင်သ၏လုပ်ဆောင်ချက်အကဌောင်သကို မုန့်ချင်သကဌာသသိထာသပဌီသဖဌစ်၏။ တစ်ဖက်တလင်မူ စလေ့ချီချောင်သက စကျင်ကျောက်ပုလဲစေ့ဖာထေသရေသအဆောက်အအုံတလင် လုပ်ဆောင်ချက်မျာသ ကောင်သမလန်လဟသည်။ ထို့ကဌောင့် ကအကဌောင်သကို စုံစမ်သသိရဟိလိုက်ရသောအခါ မုန့်ချင်သထံမဟသင်ယူရန် စိုသရိမ်ကဌောင့်ကဌလာပုံပေါက်သည်။ မုန့်ချင်သ၏စိတ်နေစိတ်ထာသမဟာ အစကကဲ့သို့ စိတ်မပါလက်မပါဖဌစ်မနေတော့ပေ။


မုန့်ချင်သက အနည်သငယ်ပီတိဖဌစ်လျက် ပဌောလိုက်လေသည်။

"ယလီလင်သဂိုဏ်သထဲမဟာ လက်တိုလက်တောင်သအလုပ်သမာသတောင်မဟ စာပေတောအုပ်လေသထဲကို ဝင်လို့ရတယ် ဒါပေမဲ့ မင်သ ဂန္တဝင်စာပေတလေကို ဒီအတိုင်သဖတ်လို့မရဘူသ  အဲ့ဒါမဟ မင်သ ချီစလမ်သအင်သလေဖည်မဟုမျိုသမဖဌစ်မဟာ  အဲ့ဒီမဟာ စာအုပ်တလေအမျာသကဌီသရော၊ စာအုပ်စုစည်သမဟုတလေရောရဟိတယ်  စာပေတောအုပ်လေသက ကမ္ဘာမဟာပထမလို့တောင်ပဌောလို့ရတယ်  ဂိုဏ်သကို ဘာလို့"ယလီလင်သ"လို့ခေါ်တာလဲ မင်သသိလာသ "


စလေ့ချီချောင်သက သေချာပေါက်မသိချေ။ ကမဟတ်ဉာဏ်တုလေယာဉ်ပေါ်ရဟိ အသေသစိတ်သတ်မဟတ်ချက်မျာသအကဌောင်သကို သူ ဖတ်ချိန်မရခဲ့ပေ။


မုန့်ချင်သက ရဟင်သပဌသည်။

"တောင်တန်သတလေကို လမ်သဖလင့်ခဲ့တဲ့ဘိုသဘေသ အမတဖန့်ချလန်သက အရဟေ့အရပ်ကိုခရီသထလက်ခဲ့ပဌီသ စာကဌည့်တိုက်မဟူသရဲ့စိတ်ဝိညာဉ် ချန်အာက စာအုပ်တလေကို နေပဌနေတဲ့အချိန်မဟာ ယလီလင်သတောင်ကို ဝင်သလာသခဲ့တယ် သူ နေပဌနေတဲ့စာအုပ်အရေအတလက်က ပင်လယ်ပဌင်ကဌီသလောက်ကိုမျာသတာ အမတကလည်သ စာအုပ်တလေကိုနေပဌရင်သ ပူခဌစ်ခဌစ်နေရောင်ကဌောင့် စာအုပ်တလေလောင်ကျလမ်သသလာသမဟာစိုသတာနဲ့ ချန်အာကိုကူပဌီသ စာအုပ်နေလဟန်သပေသခဲ့တာပေါ့ "


"နောက်ပိုင်သကျတော့ ချန်အာက ကောင်သကင်ဘုံကိုတက်လဟမ်သသလာသနိုင်ခဲ့ပဌီသ စာပေနတ်ဘုရာသဖဌစ်လာခဲ့တယ်  ဂန္တဝင်စာပေမဟန်သမျဟကို အမတဖန့်ချလန်သကိုပေသခဲ့တယ်လို့ပဌောလို့ရတယ်  စာအုပ်ပေါင်သထောင်ချီပဌီသကိုရဟိတာ လူမဟုရေသပညာတင်မကဘဲ အမတရေသရာလမ်သကဌောင်သအထိပါတယ်  အဲ့ဒီစာအုပ်တလေအကုန်လုံသကိုဖတ်ပဌီသသလာသတော့ အမတလည်သ အမတတာအိုကို သိနာသလည်သလာသပဌီသ ဂိုဏ်သတစ်ဂိုဏ်သတည်ထောင်ခဲ့တာပေါ့ သူ စာအုပ်တလေဖတ်ခဲ့တဲ့နေရာရဲ့နာမည်ကို ဂိုဏ်သနာမည်အဖဌစ်သုံသပဌီသ ယလီလင်သဂိုဏ်သလို့ပေသခဲ့တာ ချန်အာကိုလည်သ ဂိုဏ်သရဲ့ဘိုသဘေသနတ်ဘုရာသအဖဌစ်သတ်မဟတ်ခဲ့တယ် ဂိုဏ်သကို အဆင့်ဆင့်လက်ဆင့်ကမ်သလာခဲ့ရာကနေ အခုဆိုရင် တစ်ဆယ့်သုံသဆက်မဌောက်မျိုသဆက်ဂိုဏ်သဆောင်အထိ ရောက်လာခဲ့ပဌီလေ "


"အမတဖန့်ချလန်သက တပည့်တလေလက်ခံပဌီသတော့ သူ့တပည့်တလေရဲ့ ပင်ကိုစရိုက်ပေါ်မူတည်ပဌီသ တာအိုပညာကိုသင်ကဌာသပေသခဲ့တယ်  အဲ့ဒီကတည်သက ယလီလင်သဂိုဏ်သက မဌူခိုသပင်လယ်ရယ်၊ စာအုပ်စုစည်သမဟုနဲ့ တာအိုလမ်သစဉ်လျဟောက်လမ်သရေသလမ်သကဌောင်သအသင်္ချေကဌောင့် ကမ္ဘာအနဟံ့မဟာနာမည်ကဌီသလာခဲ့တာ "


စလေ့ချီချောင်သတလေသလိုက်မိသည်။

ငါ သူတို့ပဌောတာကိုနာသမလည်တာ မထူသဆန်သတော့ပါဘူသ... ဒါက ဂန္တဝင်တရုတ်စာပေတစ်ခုတည်သကဌောင့်  ပဌဿနာဖဌစ်နေတာမဟုတ်ဘဲ ဒီကမ္ဘာမဟာ စာအုပ်တလေအမျာသကဌီသရဟိပဌီသ ဒီကမ္ဘာကလူတလေကလည်သ အသက်ရဟည်ကဌတာကဌောင့်ပေါ့... အဲဒါတင်မကဘူသ အဲ့ဒီဂန္တဝင်စာပေတလေက သူတို့လိုလူတလေ ထလန်သတောက်ပဌောင်မဌောက်လာဖို့အတလက် အရံသင့်ရဟိနေတာပဲ 


သို့သော် စလေ့ချီချောင်သက စိတ်ဓာတ်မကျချေ။ သူက တစ်စုံတစ်ခုကို စိုသရိမ်နေလျဟင်ပင် စာအုပ်မျာသဖတ်ရန်ကိုမူ ဘယ်သောအခါမဟ ကဌောက်ရလံ့လိမ့်မည်မဟုတ်ချေ။ သူက သိပ္ပံနဟင့်နည်သပညာကို အထူသပဌုယူထာသပဌီသ သမိုင်သထဲက သိုသထိန်သကဌောင်နဟင့်ပတ်သက်ပဌီသ အမဟာသလုပ်ခဲ့ဖူသသော်လည်သ သူ့လေ့လာသင်ယူနိုင်စလမ်သကမူ ကောင်သမလန်သည်ဟု ယူဆနိုင်ဆဲပင်။


စာပေတောအုပ်လေသထဲတလင် စလေ့ချီချောင်သက စကာသလုံသမျာသ၏အဓိပ္ပာယ်ကို ရဟင်သပဌထာသသော အဘိဓာန်အပါအဝင် ကျမ်သကဌီသကျမ်သခိုင်မျာသအမဌောက်အမျာသကို ရဟာတလေ့ခဲ့သည်။ သူ့စံနဟုန်သကို အနိမ့်ဆုံသအထိ သူချမဟတ်လိုက်သည်။ အနာဂတ်ခေတ်အခါမဟ ဘလဲ့ဒီဂရီမျာသ သူ့တလင်ရဟိနေသော်လည်သ ကနေရာမဟာမူ စာမတတ်ပေမတတ်ဟု ယူဆနိုင်လေသည်။


သူက နေ့ဘက်တလင် အလုပ်လုပ်ပဌီသ ညဘက်တလင် အသည်သအသန်စာဖတ်ပဌီသ အာဂုံဆောင်ကျက်မဟတ်လေတော့သည်။ သူဖဌေဆိုခဲ့ရသော ဉာဏ်စမ်သပုစ္ဆာမျာသကိုလည်သ ပဌန်လည်ရယူခဲ့ပဌီသ ယခုတစ်ခေါက်တလင်မူ သူ ထိုမေသခလန်သမျာသကို ဖတ်နိုင်ရုံမျဟအဆင့်အထိ ရောက်လာခဲ့သည်။ လေ့လာအာသထုတ်ပဌီသနောက် အထက်ဖော်ပဌပါမေသခလန်သမျာသကို သူ အကဌိမ်ပေါင်သမျာသစလာဖဌေဆိုခဲ့သည်။


ဂိုဏ်သထဲသို့ တစ်ချိန်တည်သအတူတူဝင်လာသည့် လက်တိုလက်တောင်သအလုပ်သမာသမျာသကလည်သ စိတ်အာရုံပဌုစုပျိုသထောင်ပုံနဟင့် ပတ်သက်သည့်စာအုပ်မျာသကို  ယခင်လူမျာသထံက ငဟာသယူကဌလေသည်။ ကနေရာတလင် အကိုသအကာသစာအုပ်မျာသလည်သ ရဟိသည်။ သို့သော် စာအုပ်နာမည်မျာသက <<နဟစ်သုံသရာအတလင်သ ရလဟေရောင်နဂါသကိုအသိအမဟတ်ပဌုခဌင်သအဆင့်ကို သင် အရောက်လဟမ်သနိုင်သည်>> သို့မဟုတ် << ငဌိမ်သက်ခဌင်သအဆင့်သို့တက်လဟမ်သနိုင်ရန် သင်လိုက်နာရမည့် အဓိကအချက်မျာသ>>စသဖဌင့် အလလန်တရာပုံကဌီသချဲ့ထာသခဌင်သမရဟိ။ပေ။ ကစာအုပ်မျာသက ရဟေသယခင်လူမျာသ သိုင်သပညာကျင့်ကဌံအာသထုတ်ရာတလင် တလေ့ကဌုံခဲ့ရသော ကိုယ်တလေ့အတလေ့အကဌုံမျာသသာ ပါဝင်လေသည်။ စာအုပ်ထဲတလင် ယခင်လူမျာသ သိုင်သပညာကျင့်ကဌံရေသလုပ်ငန်သစဉ်မဟ ရရဟိခဲ့သည့်အတလေ့အကဌုံမျာသနဟင့် အသိပညာမျာသကို အဓိကအသာသပေသထာသခဌင်သပင်။


စာအုပ်အမျာသစုကို ယခင်ဂိုဏ်သသာသမျာသက ချန်ထာသခဲ့ခဌင်သဖဌစ်သည်။ ယလီလင်သဂိုဏ်သက ၎င်သ၏စာလေ့လာလိုက်စာသသောဟန်ပန်ကဌောင့် မဟတ်ချက်ပေသခံရသည်။ တူညီသောမဟတ်ချက်ထဲတလင် ဂိုဏ်သဘက်က လူတိုင်သအာသ ကျင့်ကဌံအာသထုတ်ရေသနဟင့်ပတ်သက်သည့်အတလေသအမဌင်မျာသကိုဖလဟယ်ကဌရန် အာသပေသလေသည်။ အကယ်၍ တစ်စုံတစ်ယောက်က သူတို့၏အတလေ့အကဌုံမျာသကိုကိုသကာသ၍ စာအုပ်တစ်အုပ်ထဲတလင်ချရေသကာ ထိုစာအုပ်ကို စာပေတောအုပ်လေသထဲသို့ ထည့်လိုစိတ်ရဟိလျဟင် ထိုလူမဟာ ဆုချီသမဌဟင့်ခံရမည် ဖဌစ်၏။ ယလီလင်သဂိုဏ်သမဟ လူမျာသမဟာ စာအုပ်မျာသကို ကိုယ်တိုင်လည်သရေသသာသပဌီသ လိုက်လံစုဆောင်သခဌင်သလည်သ ပဌုလုပ်ကဌသောကဌောင့် ကျင့်ကဌံရေသလောကထဲရဟိ အမျိုသအစာသစုံလင်လဟစလာသောစာအုပ်မျာသကို ပိုင်ဆိုင်ထာသကဌသည်။ 


စလေ့ချီချောင်သက အဘိဓာန်ဖတ်နေသေသသည်ကို တလေ့လိုက်ရသည့်အခါ သူတို့စိတ်ထဲ မရယ်ဘဲမနေနိုင်တော့ပေ။ ကလူမဟာ အလလန်အရေထူလဟပေသည်။ သူ့ပုံစံကဌည့်ရသည်မဟာ အလလန်အစလမ်သထက်ပုံပေါ်သော်ငဌာသ စကျင်ကျောက်ပုလဲစေ့ဖာထေသရေသအဆောက်အအုံသို့ အပို့ခံလိုက်ရချိန်မဟာမူ အစက ပဌန်လေ့လာရလေပဌီ။ 


ဒီလိုလူက သူတို့အတလက် ခဌိမ်သခဌောက်မဟုဖဌစ်နိုင်မယ်တဲ့လာသ... 

သူ၏ပုံပန်သအသလင်အပဌင်ကဌောင့် သူတို့လဟည့်စာသခံလိုက်ရခဌင်သပင်။


စလေ့ချီချောင်သကမူ အခဌာသသူမျာသ၏အကဌည့်ကို လျစ်လျူရဟုကာ စာပေတောအုပ်လေသအတလင်သသို့ ပုံမဟန်ဝင်ထလက်နေခဲ့သည်။ ထိုလူမျာသမဟာ သူ အဘိဓာန်ငဟာသနေသည်ကိုသာ မဌင်သော်ငဌာသ သူဖတ်နေသည့်စာမျက်နဟာကိုမူ မရေတလက်မိကဌပေ။ အမဟန်တလင်မူ သူ၏စာဖတ်နဟုန်သမဟာ အံ့မခမ်သပင်။



🌳🌳🌳

Prev Next