Chapter 222 🦊Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Chapter 222

🦊Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Chapter 222

14.9

ရွှယ်လင်မှာ သူ၏ Weibo အကောင့်သို့ အာရုံပြန်ရောက်လာချိန်တွင် ပြောစရာစကားပင်မရှိတော့။ သူသည် နာမည်ကြီးနေသော ခေါင်းစဥ်သို့ပြန်ကြည့်လိုက်မိပြီး အခြေအနေကမထူးမခြားနားဖြစ်နေလေပြီ။ ယင်းမှာ သူအလုပ်စလုပ်သည်နှင့် တခြားသူများ၏ မျက်နှာကိုရိုက်မိလိုက်၍ဖြစ်နိုင်ပြီး ၎င်းတို့ဘာပြောပြောအရေးမပါတော့ပေ။

ရိုက်ကူးရေးအဖွဲ့မှ ကြေညာချက်ကိုထုတ်ပြန်လိုက်ပြီဖြစ်ရာ သုံးရက်အတွင်းပရောဂျက်ကိုစတင်ရတော့မည်ဖြစ်သည်။ ဒါရိုက်တာကရိုက်ကူးမည့်အခန်းအတွက် ပြင်ဆင်ထားပြီးဖြစ်ကာ လူရွေးပွဲတွင် ရွှယ်လင်ဆယ်ကြိမ်မြောက်သရုပ်ဆောင်ထားသောအခန်းကိုပင်ချီးကျူးထားသေးသည်။

သရုပ်ဆောင်ရမည့်အခန်းကို ရွေးချယ်ခြင်းက သရုပ်ဆောင်များအတွက် စိန်ခေါ်မှုတစ်ခုဖြစ်နေသော်လည်း အပြိုင်အဆိုင်အငြင်းပွားမှုများက ဇာတ်ကောင်များကို ပိုထင်ပေါ်လာစေပြီး သရုပ်ဆောင်များကို ၎င်းတို့၏ဇာတ်ရုပ်နှင့် တဖြည်းဖြည်းကိုက်ညီလာအောင် ပံ့ပိုးပေးသည်။ 

ရိုက်ကူးရေးအဖွဲ့သည် မြို့တွင်းရှိ ရုပ်ရှင်နှင့်တီဗွီဇာတ်လမ်းတွဲများရိုက်ကူးရာ စတူရီယိုတွင်ရိုက်ကူးသည့်အတွက် ပြည်ပသို့ထွက်ခွာရန်မလိုအပ်ပေ၊ ထိုသို့ဖြစ်နေသည့်တိုင် ရွှယ်လင်က ပစ္စည်းများကိုထုတ်ပိုးကာ ရိုက်ကူးရေးအဖွဲ့နှင့်ပူးပေါင်းလိုက်သည်။ တနေကုန်ရိုက်ကူးနေရာတွင်အချိန်ဖြုန်းနေပြီး အိမ်ပြန်သွားလျှင် အဓိပ္ပာယ်မရှိပေ။ အိမ်အတွက် စိုးရိမ်စရာမရှိသောကြောင့် ရိုက်ကွင်းပေါ်တွင်ရှိနေလျှင် အတွေ့အကြုံအနည်းငယ်ရပြီး လုပ်စရာမရှိလျှင် အနည်းငယ်သင်ယူနိုင်ပေမည်။

ရှန်းယွဲ့က ရွှယ်လင်၏ကိစ္စများနှင့် ပတ်သတ်လာလျှင် တာဝန်ယူထားပြီးဖြစ်သည်။ ယင်းမှာ ပထမဆုံးအကြိမ်ဖြစ်နေ၍ ရွှယ်လင် ရိုက်ကူးရေးအဖွဲ့နှင့် ပူးပေါင်းနေချိန်တွင် အနောက်မှလိုက်လာပေးခဲ့သည်။ ရွှယ်လင်ထံတွင် လက်ထောက်လည်းမရှိသေးလေရာ အချိန်တစ်ခုအထိလူရှာရန် စိတ်ကူးမထားပေ၊ သို့ဖြစ်၍ ရွှယ်လင်အတွက် သင့်လျော်သောလက်ထောက်မရသေးခင် သရုပ်ဆောင်ရာ၌အဆင်ပြေစေရန် ရှန်းယွဲ့ကထိုအပိုင်း၌တာဝန်ယူသင့်သည်ဟု ခံစားလိုက်ရသည်။ သူခေါ်လာမည့်လူက ရွှယ်လင်ကိုပြန်မဆွဲချသွားစေရန် မျှော်လင့်မိပါ၏။

သုံးရက်ကုန်လွန်သွားခဲ့ပြီ။ ရွှယ်လင်ထွက်သွားပြီး ရိုက်ကူးရေးအဖွဲ့နှင့်မပူးပေါင်းခင် သူ့ထံသို့ လက်ဆောင်ထုပ်တစ်ခုရောက်လာလေသည်။

ဘားမှတစ်စုံတစ်ယောက်က သူ့အိမ်သို့ ဝိုင်ပုလင်းများပို့လိုက်သည်ကို သူသည်ကား မျက်နှာသေဖြင့်ကြည့်နေလိုက်သည်။ စူးရွှမ့်ယန်အပေါ်ရှိ သူ့ခံစားချက်များကြောင့် ရွှယ်လင်မှာ ပိုပြီးရင်းပိုကာစိတ်ရှုပ်ထွေးလာရတော့သည်။

မူလကသူသည် ထိုနေ့ညနောက်ပိုင်း စူးရွှမ့်ယန်ကသူနှင့် သက်ဆိုင်မှုမရှိတော့သောကြောင့် သူ့အရှေ့တွင်ပေါ်မလာခြင်းဖြစ်မည်ဟုထင်ခဲ့သည်။ သို့သော်လည်း အချို့အကြောင်းအရင်းများကြောင့် ထိုလူက နှစ်ရက်အကြာတွင် ဘားမှလူများကို အရက်ပုလင်းများ တပြုံကြီးပို့ခိုင်းလိုက်သည်။

အရက်လာပို့သည့်လူငယ်လေးက မစ္စတာစူးမှပို့ခိုင်းလိုက်ခြင်းဖြစ်ပြီး လျော်ကြေးပြန်ပေးပါသည်ဟုပင် စကားပါးလိုက်သေးသည်။

ရွှယ်လင်က လူငယ်လေအားပြန်သယ်သွားခိုင်းခဲ့သော်လည်း တဖက်လူကငြင်းနေခဲ့လေ၏။ ထိုသူက ရွှယ်လင်၏ပေါင်ကိုဖက်ထားကာ သူအလုပ်မပြုတ်ချင်၍ လက်ခံပေးပါရန် ငိုယိုအော်ဟစ်ကာ အတင်းအကြပ်တောင်းပန်နေလေတော့သည်။

သူလည်းအကြောင်းမရှိဘဲ လူငယ်လေးကို ဒုက္ခမပေးလိုပါချေ၊ သို့ဖြစ်၍ ရွှယ်လင်မှာ အိမ်ထဲသို့ပစ္စည်းများအားလုံးရွှေ့ခိုင်းလိုက်ရတော့သည်။ 

ထိုလူကသူမသောက်နိုင်မှန်း သေချာပေါက်သိထားသည်။ ထိုအရက်ပုလင်းများကို သူ့အိမ်သို့ပို့လာခြင်းက မည်သို့များအဓိပ္ပာယ်ရှိသွားပါမည်နည်း။ ထိုသူကဘာဖြစ်နေသနည်း။ သူ့ပိုက်ဆံများကို သုံးစရာနေရာမရှိလေရော့သလား။

******

<ပဟေဠိလမ်းမများ> ဇာတ်လမ်းသည် လွန်ခဲ့သောနှစ်ပေါင်းတစ်ရာမှ အချိန်ကာလကို အခြေခံထားခဲ့သည်။ ထိုအချိန်က မြို့လမ်းများမှာမကျယ်သေးဘဲ ဆက်သွယ်သွားလာရေးတွင် ကားများကိုသာ အသုံးပြုနိုင်သေးသည်။ တစ်ခါတစ်ရံ ဆောင်းရာသီရောက်လျှင် နှင်းများက တစ်မြို့လုံးကိုဖုံးထားနိုင်ပြီး နတ်ဆိုးများနှင့် မသန့်စင်သောအရာများက အတွင်းပိုင်း၌ လွှမ်းခြုံထားတတ်သည်။

အဆိုပါခေတ်အရ ဒရမ်မာအများအပြားကို ရိုက်ကူးထားပြီးသောကြောင့် အဆိုပါခေတ်နောက်ခံပုံစံများဖြင့် ပြင်ဆင်ထားသော ရုပ်ရှင်နှင့်တီဗွီစီးရီးများအတွက် ရိုက်ကူးသည့်နေရာများရှိသည်။

ရွှယ်လင်နှင့် ရှန်းယွဲ့တို့က ရိုက်ကူးမည့်နေ့ထက် တစ်ညစောရောက်လာခဲ့သည်။ ရိုက်ကူးရေးကို နောက်တနေ့အစောပိုင်းတွင် စတင်မည်ဖြစ်ပြီး ၎င်းတို့နှစ်ယောက်က နောက်တစ်နေ့နံနက်တွင် နောက်ကျနေမည်စိုးသောကြောင့် ကြိုရောက်လာကြခြင်းဖြစ်သည်။ ရိုက်ကွင်းသို့ရောက်လာပြီးနောက် ရှန်းယွဲ့က ရွှယ်လင်ကို ဒါရိုက်တာများနှင့်တွေ့ရန် ခေါ်သွားပေးခဲ့သည်၊ ဇာတ်ညွှန်းရေးဆရာထံမှ ဇာတ်ညွှန်းကိုအပြည့်အဝမရသေးခင် တစ်ယောက်ပြီးတစ်ယောက်ကိုတွေ့ပြီး နှုတ်ဆက်ခဲ့ရသည်။

ဇာတ်ညွှန်းရေးဆရာမှာ ရွှယ်လင်၏ သရုပ်ဆောင်ချက်ကိုကြည့်ပြီး လှုံ့ဆော်ခံလိုက်ရကာ ဇာတ်ညွှန်းကိုတစ်ပတ်အတွင်း အပြီးသတ်နိုင်ခဲ့သည်။ ဇာတ်ညွှန်းအရည်အသွေးက ဒါရိုက်တာမှ သူမကိုချီးကျူးထားခဲ့သည်ထက်ပင် ပိုကောင်းမွန်ခဲ့၏။ ထို့ကြောင့် သူမက ကိုယ်တိုင်လုပ်ထားခဲ့သောဘီစကစ်များကို ရွှယ်လင်ထံလက်ဆောင်ပေးခဲ့သေးသည်။

ရွှယ်လင်က လှိုက်လှိုက်လှဲလှဲကျေးဇူးတင်ပြီး ရိုက်ကူးရေးအဖွဲ့က အင်မတန်ချစ်စရာကောင်းကြောင်းပြရန် ဓာတ်ပုံရိုက်ကာ Weibo ပေါ်တင်ခဲ့သည်။

သူ၏ပို့စ်ကြောင့် သူအမှန်တကယ်ကို ရိုက်ကူးရေးလုပ်တော့မည်ဖြစ်ကြောင်း အသိပေးလိုက်သလိုဖြစ်သွားခဲ့သည်။ ဒရမ်မာနှင့်ပတ်သတ်၍ သူ့ဘက်မှ သတင်းအတိအကျမပေးသေးသော်လည်း သူ့အားမုန်းကြသူများဘက်သို့ အသိပေးရန်စဥ်းစားထားခဲ့သည်။ ၎င်းတို့ဘက်မှ သူ့အားမည်မျှပင်မုန်းတီးကြပါစေ၊ ရိုက်ကူးရေးအဖွဲ့က လူပြောင်းမည်မဟုတ်ဘဲ သူသည်လည်း ရိုက်ကွင်းပေါ်တွင်ရှိနေပြီဖြစ်သည်။

မထင်မှတ်ဘဲ ရိုက်ကူးရာတွင် တစ်ခန်းချင်းစီတိုင်းက အဆင်ပြေခဲ့၍ နှောင့်နှေးသွားခဲ့ခြင်းမရှိချေ။ ရွှယ်လင်ရိုက်ကူးချိန်တွင် အရာအားလုံးအဆင်ပြေနေပြီး တစ်ကြိမ်တည်းနှင့်ပြီးပြည့်စုံအောင် ရိုက်ကူးနိုင်ခဲ့သည်။ အလွန်ဆုံးအရ ၎င်းတို့ ကင်မရာအနီးအဝေးချိန်သည့်နေရာတွင်သာ အထူးပြန်လည်ရိုက်ကူးခဲ့ရသည်။

ဤကမ္ဘာတွင် ရုပ်ရှင်ရိုက်ကူးရာ၌ (360°) ပတ်လည်ရိုက်ကူးပြီး တစ်နေရာတည်းတွင် ရိုက်ကူးခြင်းမရှိ။ ရုပ်ရှင်ရုံများက တစ်ခန်းလုံးကိုပြန်လည်ထုတ်လွှင့်ပေးပြီး သတင်းမထုတ်ပြန်ဘဲ အံ့အားသင့်သွားအောင်လည်း လုပ်တတ်သေးသည်၊ အလင်းကို အများဆုံးအထိချိန်ဆပေးတတ်သေး၏။ လူတိုင်း ဇာတ်လမ်းကို တတိယလူနေရာမှ ဝင်ခံစားနိုင်ကာ ဇာတ်လမ်းကို အပြီးအထိ ကြည့်ရှုနိုင်သည်။ ဤကဲ့သို့သော နည်းပညာတိုးတက်မှုက သရုပ်ဆောင်များ၏ စွမ်းရည်လိုအပ်ချက်ကိုနောက်တစ်ဆင့်တိုးသွားစေသည်။

မည်သူမဆို လူအများကြားမှထင်ပေါ်ချင်လျှင် မျက်နှာတစ်ခုတည်းအပေါ်၌ မှီခိုထား၍မရပေ။ အရေးအကြီးဆုံးမှာစွမ်းရည်ဖြစ်ပြီး ရွှယ်လင်ကိုလည်း ရိုက်ကူးရေးအဖွဲ့တစ်ဖွဲ့လုံးက စွမ်းရည်အရှိဆုံးဟု သတ်မှတ်ထားကြသည်။

သူ၏ပြောင်မြောက်ထူးချွန်သော သရုပ်ဆောင်စွမ်းရည်ကြောင့် သူနှင့်အတူအလုပ်တွဲလုပ်သူများအရှေ့တွင် သင့်တင့်လျော်ကန်သော သဘောထားမျိုးကို အမြန်ဝင်လာစေသည်၊ သူပါဝင်သည့်အခန်းတိုင်းက အလျှင်အမြန်ပင် ပြည့်စုံစေခဲ့၏။ ရိုက်ကူးနေစဥ်အတွင်းမှာပင် ဒါရိုက်တာများအားလုံး ပြုံးနေတတ်ကြပြီး အချိန်ဇယားကို အချိန်နှင့်အလိုက်ညှိနှိုင်းရန် ငြင်းခုံကြရတော့သည်။ ရိုက်ကူးသည့် လုပ်ငန်းစဥ်အပေါ်မူတည်ပြီး မူလကစီစဥ်ထားခဲ့သည့်အတိုင်းအတိအကျလုပ်ရန် မလိုအပ်တော့ပေ။ ရိုက်ကူးနေခြင်းက မကြာခင်မှာပင် ပြီးစီးတော့မည်ဖြစ်ကာ တိုက်ရိုက်ထုတ်လုပ်နိုင်လိမ့်မည်။ ထုတ်လုပ်ရေးအတွက်အချိန်ပိုယူလျှင် ပိုမိုဆန်းသစ်ပြီးစိတ်ကျေနပ်ရလိမ့်မည်။

ရွှယ်လင်သည်ကား မိုးထိမြောက်နေသောသူ၏သရုပ်ဆောင်စွမ်းရည်နှင့် ပတ်သက်၍ သိပ်အာရုံမထားတော့ချေ။ မည်သို့ပင်ဖြစ်စေ သူ ကင်မရာအရှေ့ရောက်သည်နှင့် သရုပ်ဆောင်ရန်အတွက် မွေးဖွားလာသလို ဇာတ်ကောင်နှင့်တသားတည်း ကျသွားလိမ့်မည်။ သူကင်မရာအရှေ့တွင် ရိုက်ကူးနေလျှင် ရွှယ်လင်မဟုတ်တော့ဘဲ ဇာတ်လိုက်ဖြစ်သွားမည်သာ။

စနစ်က ၎င်းအတွက် အခွင့်အရေးယူရန်ငြင်းနေပြီး ရွှယ်လင်၏ပင်ကိုယ်အရည်အချင်းသာဖြစ်ကြောင်း လက်ခံထားပေသည်။ 

ရွှယ်လင်ကမူ ယင်းက သူ၏မွေးရာပါအရည်အချင်းဖြစ်ကြောင်း သိလိုက်ရ၍ အံ့ဩနေလေသည်၊ သည်အတိုင်းဆိုလျှင် သူလွန်ခဲ့သော ဆယ်နှစ်က ဘာများလုပ်နေခဲ့ပါသနည်း။ ရှိုးပြနေခဲ့ခြင်းလား? ယခုမူ အတိတ်မှနက်ရှိုင်းသောပုံစံများကို ပြန်လည်အောက်မေ့မိသည့်အခါ သူ၏ယခင်ဘဝက အင်မတန်သိမ်မွေ့ခဲ့သလိုခံစားနေရ၏။ ယခင်က အခြားသူများအရှေ့တွင်ထုတ်ပြခဲ့သော အတိတ်မှသူက သူမဟုတ်ပေ။ ဤနေရာတွင်ရှိနေသူက အသွေးအသားနှင့် တည်ဆောက်ထားသည်၊ သရုပ်ဆောင်စွမ်းရည်ပြည့်ဝပြီး ယုံကြည်ချက်အပြည့်နှင့် သူ၏အနာဂတ်ဘဝအတွက်လည်း ပူပင်မှုမရှိ  ယင်းကသာသူအစစ်ဖြစ်သည်။

စေ့စေ့တွေးလေ ရွှယ်လင်ဆိုသောဇာတ်ရုပ်ကပိုပီပြင်လာလေပင်။ ယခင်ကတော့ ဒါရိုက်တာက သူ၏အပြင်ပန်းသရုပ်ဆောင်မှုများ မကောင်းတော့မည်ကိုစိုးရိမ်ခဲ့သည်၊ သို့သော်လည်း ယခုမူ ထိုပြဿနာကိုစိုးရိမ်စရာမလိုတော့။ 

လူတွေ့စစ်ဆေးပွဲတွင် သူ၏အတိတ်မှပုံစံကို ရွေးချယ်ပေးခဲ့သည့် ထျန်းရွှမ်မှလူများကိုကျေးဇူးတင်မိသည်။ ရွှယ်လင်သည် သူ့အားကယ်တင်ရန် ကောင်းကင်ဘုံမှဆင်းလာခဲ့သည့် နတ်ဘုရားတစ်ပါးလိုပင်၊ ထိုသူကိုတွေ့လိုက်သည်နှင့် အရာအားလုံးအဆင်ပြေသွားတတ်ပြီး အကြိုထုတ်လုပ်မှုကာလကိုလည်းတိုးမြှင့်နိုင်ခဲ့သည်၊ ၎င်းကြောင့် သူ့အားစိတ်ကူးကောင်းများပိုရလာစေရန် အချိန်ပိုရစေခဲ့၏။

ဒါရိုက်တာမှာ ထိပ်တန်းအဆင့်မဟုတ်ဘဲ တစ်နှစ်ပတ်လုံး တီဗွီစီးရီးများကို ရိုက်ကူးခဲ့သည်။ ဤတစ်ကြိမ်တွင် ၎င်းသည် သူ၏ကန့်သတ်ချက်ကိုကျော်လွန်ပြီး အကောင်းဆုံးဖြစ်လာသင့်သည်ဟုခံစားနေရ၏။

သူသည် လူအများထံမှချီးမွမ်းမှုနှင့် အဆုံးမရှိသော ဂုဏ်သရေကြီးမြင့်မှုတို့ ကင်းမဲ့ခဲ့ရသော်လည်း ယခုမူ ဤဖန်တီးမှုကိုပုံဖော်ရတော့မည်။

အောင်မြင်နေသော ဒါရိုက်တာများနှင့်ယှဥ်ကြည့်ပါက ရှန်းယွဲ့က လက်ခံရန်အသင့်ဖြစ်နေချေပြီ။ သရုပ်ဆောင်များက သူ့အား လုံးဝမစိုးရိမ်စေခဲ့ပေ။ စူးလျို့နျန်နှင့်ရွှယ်လင်တို့၏ သရုပ်ဆောင်အရည်အချင်းမှာလည်း အံ့မခန်း၊ စူးလျို့နျန်၏ လက်တွေ့ဘဝက ရှုပ်ထွေးသော်လည်း သူ၏မိသားစုစီးပွားရေးအသိုင်းအဝိုင်းက ကျယ်ပြန့်ပြီး သူ့အားပိတ်ဆို့ထားသည့်အရာများကို ရှင်းလင်းရန် လက်တစ်ချက်ပင် မြှောက်စရာမလိုပေ။ သူ့ဘက်မှ စီးပွားရေးကိစ္စများကို ကူညီစီစဥ်ပေးရန်သာလိုပြီး ကျန်သည့်အရာများမလိုပေ။ ဤတစ်ကြိမ်မှာ ရွှယ်လင်ကိုတာဝန်ယူရကာ သူကောင်းကောင်းလုပ်နိုင်ပြီဟု ထင်ခဲ့သည်၊ သို့သော်ငြား နောက်ပိုင်းတွင်မူ ရွှယ်လင်နှင့်ပတ်သတ်၍ မည်သည့်စိုးရိမ်စရာမှမရှိကြောင်း သူသဘောပေါက်သွားခဲ့၏။

အနှီသူ၏ လူမှုဆက်ဆံရေးနှင့် ပတ်သက်လာလျှင် ပြောနေစရာပင်မလို ရိုက်ကူးရေးတစ်ဖွဲ့လုံးက သူ၏လိင်ကိုပင်ထည့်မတွက်ဘဲ 'နတ်ဘုရား' ဟုသတ်မှတ်လိုက်ကြပြီ။ သူ၏ကိုယ်ပိုင်ဘဝတွင်လည်း အရှုပ်အရှင်းကင်းသည်။ သူ၏မိသားစုတွင်လည်း အခြားသူများရှိပုံမရဘဲ ရိုက်ကူးရေးစသည်နှင့် ဝန်ထမ်းများတည်းသည့် ဟိုတယ်တွင်နေကာ ရိုက်ရမည့်အခန်းပါလျှင် ထွက်လာသည်။ မပါလျှင် ဟိုတယ်တွင်သာနေပြီး စူးလျို့နျန်ထက်ပင်ပျော်နေသယောင်။

ရှန်းယွဲ့က သူ့အား အသုံးမဝင်လောက်ဟု တွေးခဲ့ချိန်တွင် စူးလျို့နျန်က သူ့အားဆက်သွယ်ပြီး ရွှယ်လင်၏ယခင်က အလုပ်များနှင့်ပတ်သတ်၍ စုံစမ်းခဲ့သည်။

"လက်ရှိပရောဂျက်နဲ့စာရင် သူဘာမှလုပ်စရာမရှိသေးဘူး.. လွှင့်မှာကိုထိုင်စောင့်နေရုံပဲ... အခြားဒရမ်မာတွေရော.. အရင်ကဟာထက်ကောင်းတာမရှိဘူးဆိုတာ မင်းသိသင့်တယ်..<ပဟေဠိလမ်းမများ> ထက် ကုမ္ပဏီက <ကောင်းကင်ဘုံသို့တောင်းဆိုချက်> ကိုပိုစိတ်ဝင်စားနေကြတယ်..ဒါပေမဲ့ ပြင်ဆင်နေတုန်းပဲရှိပါသေးတယ်..."

<ကောင်းကင်ဘုံသို့တောင်းဆိုချက်> ကိုရေးသားသောစာရေးဆရာကြောင့် စူးလျို့နျန်သည် ရိုက်ကူးနေသည့်အဆင့်က မည်သည့်အနေအထားအထိ ရောက်နေပြီဖြစ်ကြောင်းသိထားသည်။ အကြောင်းမှာ <ကောင်းကင်ဘုံသို့တောင်းဆိုချက်> သည် ရွှယ်လင် <ပဟေဠိလမ်းမများ> ဖြင့် လူအကြားထွက်လာချိန်တွင် စတင်ရိုက်ကူးမည့်အချိန်နှင့်နီးကပ်နေခဲ့၏။ ဇာတ်ညွှန်းရလာသည့်အခါ သူသည်ရွှယ်လင်ကို လေ့ကျင့်ရန်ကမ်းလှမ်းခဲ့သည်။

အမှန်တကယ်တွင် ဤနှစ်၌ ထျန်းရွှမ် လူသစ်ရွေးချယ်ခဲ့ရသည့်အကြာင်းအရင်းက <ကောင်းကင်ဘုံသို့တောင်းဆိုချက်> အတွက်ပင်။  ရုပ်ရှင်တွင် ကျင့်ကြံရေးလောကမှ ဓားသမားနှစ်ယောက်ပါဝင်ပြီး ပင်မဇာတ်ကောင်အတွက်ဆုံးဖြတ်ပြီးပြီဖြစ်သည်။ ထိုစဥ်က စူးလျို့နျန်၏ ရည်ရွယ်ချက်မှာ <ပဟေဠိလမ်းမများ> မှလူသစ်နှင့် <ကောင်းကင်ဘုံသို့တောင်းဆိုချက်> တွင်ပါဝင်မည့် ဒုတိယဇာတ်ကောင်နေရာမှ သရုပ်ဆောင်ကိုတွဲပေးရန်ဖြစ်သည်။

သို့သော်လည်း ယခု စူးလျို့နျန်က အဆိုပါကိစ္စကို အာရုံမစိုက်တော့ပေ။ "သူ့မှာအခြားလုပ်စရာမရှိတော့တာသေချာလား...ရုပ်ရှင်မရိုက်ရတဲ့နေ့မှာ ဟိုတယ်မှာပဲတစ်နေ့လုံးနေတာလား..."

"ဟုတ်တယ်လေ...ဘာလို့လဲ..."

"သူဘယ်သူနဲ့မှအဆက်အသွယ်မရှိဘူးလား..."

"ဘာဖြစ်လို့လဲ..." 

ရှန်းယွဲ့က စူးလျို့နျန်ကို တည့်တည့်ကြည့်သည်။ စူးလျို့နျန်က အခြားသူ၏ကိုယ်ပိုင်ဘဝကို တစ်ခါမှဝင်မစွက်ဖက်ဖူးပေ။ ယခုမူ ရွှယ်လင်၏ကိုယ်ရေးကိုယ်တာကို မေးမြန်းနေသည်မှာ ထူးဆန်းနေ၏။ "မင်းကိုကြည့်ရတာ အရမ်းအာရုံစိုက်နေသလိုပဲ..."

"ဘယ်လိုလုပ်.." စူးလျို့နျန်က တွေးနေပုံရပြီး စိတ်ဓာတ်ကျသွားခဲ့သည်။

 "ကျွန်တော်ကအစ်ကိုကြီးရဲ့အခန်းထဲကနေ မယုံနိုင်စရာကောင်းတာတစ်ခုကိုတွေ့သွားလို့ပါ..."

"အစ်ကိုစူးလား..." 

ရှန်းယွဲ့သည် စူးရွှမ့်ယန်နှင့်ပတ်သတ်၍ မမြင်သိပ်မကောင်းပေ။ သူက ညီငယ်ဖြစ်သူနှင့် ပတ်သက်လာလျှင် အသည်းအသန်ဖြစ်တတ်ပြီး စူးလျို့နျန်ကို အင်မတန်ဂရုစိုက်တတ်မှန်း သူသိသည်။ ၎င်းက မကြာသေးခင်ကပင် နိုင်ငံရပ်ခြားသို့ထွက်သွားခဲ့သော်လည်း ဟွားပြည်၏ စီးပွားရေးလုပ်ငန်းများကို နှစ်နှစ်ကြာအောင်စီမံခဲ့ကာ ရုတ်တရက်အပန်းဖြေခရီးဟုပြောပြီး တစ်နှစ်ကြာအောင်ပျောက်သွားခဲ့သေးသည်။

 စူးလျို့နျန်သည် သူ့(ရှန်းယွဲ့)သူငယ်ချင်းဖြစ်ပြီး စူးရွှမ့်ယန်ကသူ့ချစ်သူ၏ သူငယ်ချင်းပင်၊ ထို့ကြောင့် ရှန်းယွဲ့သည် စူးရွှမ့်ယန်၏ ဘက်နှစ်ခုလုံးကို ကောင်းစွာနားလည်ထားသည်။ 

စူးရွှမ့်ယန်က သူ၏ညီငယ်နှစ်ယောက်နှင့်ပတ်သတ်လာလျှင် ရေးကြီးခွင်ကျယ်လုပ်တတ်ကာ မိသားစုနှင့်အပြင်လူအရေးတို့ကို ဖြေရှင်းရန်ဖြစ်လာပါက ဘက်နှစ်ခုလုံးကို ထုတ်ပြလာတတ်၏။ သူသည် စူးလျို့နျန်အပေါ် အင်မတန်သိမ်မွေ့ပြီး ထိုသူနှင့်ပတ်သက်လာတိုင်း ရှုထောင့်ပေါင်းစုံမှ အာရုံစိုက်တတ်သည်။ စူးလျို့နျန်နှင့် စူးရွှမ်းချင်တို့အပေါ်ရှိ သူ၏ဂရုစိုက်မှုကိုပြောင်းလဲလိုက်လျှင်ပင် သူအိမ်တွင်ရှိနေစဥ်အတွင်း နူးညံ့စွာဖြင့် ဂရုတစိုက်ရှိနေဦးမည်ဖြစ်သည်။

သူ၏အပြင်ပိုင်းပုံစံနှင့် ယှဥ်လိုက်လျှင် သူတို့နှစ်ယောက် နှစ်အနည်းငယ်ကြာ သူငယ်ချင်းဖြစ်လာခဲ့သည့်တိုင် အပြင်လူများနှင့်တွေ့ကြသည့်အချိန်တိုင်း စူးရွှမ့်ယန်က ရေခဲမျက်နှာဖြင့်သာနေတတ်လေသည်။ တိုက်တန်းနစ်သင်္ဘောပင် မြုပ်သွားနိုင်လောက်သည်အထိ ကြီးမားသောရေခဲစိုင်ကြီးဖြစ်ပြီး ထိုသို့သောအော်ရာမျိုးကို သာမန်လူအချို့သာ ထိန်းသိမ်းထားနိုင်ကြသည်။ လက်ရှိတွင် သူသည် စူးမိသားစု၏ မျိုးဆက်ခေါင်းဆောင်ဖြစ်သော်လည်း တကယ်တမ်းတွင် စူးမိသားစု၏ စီးပွားရေးရာကိစ္စတိုင်းကို စူးရွှမ်းချင်ကသာ တာဝန်ယူထားခဲ့သည်။ ထိုသို့ဖြစ်ခဲ့လျှင်ပင် စူးရွှမ်းချင်၏နာမည်က ယိမ်းယိုင်သွားမည်မဟုတ်ချေ။

အားလုံးပေါင်းလိုက်လျှင် စူးရွှမ့်ယန်က ရှန်းယွဲ့မျက်လုံးထဲ၌ အံ့ဩဆန်းကြယ်သက်ရှိဖြစ်နေလေသည်။ ရံဖန်ရံခါတွင် အင်မတန်ရင်းနှီးသလိုထင်ရသော်လည်း ရှန်းယွဲ့ကမူ အနှီကြီးမြတ်သောနတ်ဘုရားက သူတို့နှင့်ရှင်သန်ရာလောက မတူသလိုခံစားရသည်။

"အစ်ကိုကြီးစူးအခန်းထဲမှာ ဘာရှိနေလို့လဲ..."

စူးလျို့နျန်၏မျက်နှာထားက ကြည့်ချင်စရာမကောင်းလောက်အောင် ကြောက်စရာကောင်းနေလေ၏။

 "....ရွှယ်လင်ရဲ့ပုံတွေနဲ့ ပြည့်နေတာ..."

ရှန်းယွဲ့: "....."

ရှန်းယွဲ့: "???" သူ၏မျက်နှာထားက အလွန်အမင်း စိတ်ရှုပ်ထွေးနေသည်မှာသေချာ၏။ ဖော်ပြရခက်လောက်သည်အထိကိုပင် ရှုပ်ထွေးနေခြင်းပင်။ သူ့စိတ်ထဲရှိနေသည့်အရာများကို ခေါင်းပေါ်မှ မေးခွန်းသင်္ကေတများကသာ ဖော်ပြနိုင်တော့မည်။ ထိုသူသာ အီမိုဂျီများပို့ခွင့်ရပါက စူးလျို့နျန်၏မျက်နှာတွင် '?' သာပေါ်နေနိုင်သည်။

"ဘယ်...ဘယ်ကနေရောက်လာတာလဲ..."