MM Story Teller

Chapter 229 🦊Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Viewers 32k

Chapter 229

🦊Arc 14 - ဖျော်ဖြေရေးလောကကို တန်ပြန်တိုက်ခိုက်ခြင်း

Chapter 229

14.16 - ကိုယ်တို့အမြဲအတူရှိနေကြမယ်။

"ကိုယ်မင်းအတွက် ရိုက်ကူးရေးအဖွဲ့ကိုရွက်ဖျင်တဲထိုးခိုင်းလိုက်မယ်.."

အဆင့်မြင့်ရွက်ဖျင်တဲများတွင် နေထိုင်ရေးအဆင်ပြေရန်ပစ္စည်းအစုံရှိသော်လည်း ၎င်းတို့က ဈေးကြီးပေးဝယ်ရပြီး ရိုက်ကူးရေးအဖွဲ့ကထိုပစ္စည်းမျိုးမတတ်နိုင်ပေ၊ ထို့ကြောင့် ဘတ်ဂျက်နှင့်ကိုက်အောင်စီစဥ်ရရှာသည်။

ရွှယ်လင်က ဝင်ဝင်ချင်းပင် ထိုစကားကြားလိုက်ရသည့်အခါ မနေနိုင်ဘဲရယ်မိပြီးပြောလိုက်၏။

"ခင်ဗျားစကားပြောတဲ့အသံက မသိရင် ကျွန်တော့်ရဲ့ရှူးဂါးဒယ်ဒီလိုပဲ..အခုချက်ချင်းပဲ ကျွန်တော့်ကို ပိုက်ဆံတွေတထပ်ကြီး ပစ်ပေးလိုက်တော့မလိုမျိုး..." သူ့အသံက လှောင်နေပုံရပြီး မသိမသာကျီစယ်နေသလိုထင်ရ၍ ပိုထူးဆန်းသွားစေခဲ့သည်။

သူကျီစယ်သည်ကို ခံလိုက်ရသောစူးရွှမ့်ယန်က ပြန်လည်တုံ့ပြန်လာသည်။

"ကိုယ်ကမင်းရဲ့ ရှူးဂါးဒယ်ဒီမဟုတ်ရင်တောင် မင်းအတွက်ငွေသုံးနိုင်ပါတယ်...ဒါက ကုမ္ပဏီကရင်းထားတဲ့ရုပ်ရှင်လေ..ပြီးတော့ ရိုက်ကူးရေးအဖွဲ့က ပိုအဆင့်မြင့်တဲ့ပစ္စည်းသုံးတာ ဘယ်နေရာမှမမှားဘူး..."

ရွှယ်လင်က အနှိပ်ခုံကိုနေရာချပြီး ခုံကစနှိပ်သည်နှင့် သူ့တစ်ကိုယ်လုံးက တုန်ခါလာတော့သည်။ သူသည်ကား ဇာတ်လမ်းထဲကအတိုင်း အနီရောင်ဝတ်ရုံကိုဝတ်ထားဆဲဖြစ်ပြီး မျက်နှာပေါ်တွင် အလွန်အကျူးခြယ်သထားသော မိတ်ကပ်များရှိနေဆဲ၊ နှုတ်ခမ်းမှာလည်းပြုံးရောင်သန်းနေသေးသည်။ ယင်းက စူးရွှမ့်ယန်ကို မျက်စိပသာဒဖြစ်စေကာ ထိုသို့သော 'ကျေနပ်ပျော်ရွှင်မှု'မျိုးက ထိုသူကို အနှိပ်ခုံပေါ်တွင် ဖိချုပ်ထားချင်စိတ်ဖြစ်လာစေသည်။

"ဥက္ကဌစူးက အခုလို ယဥ်ကျေးမှုမရှိဘဲပြောတတ်တာကို စူးလျို့နျန်ရောသိလား...သူလည်း ရိုက်ကွင်းတစ်ခုတည်းမှာပဲ ရှိနေတာကို ဥက္ကဌစူးက ညီလေးကို စိတ်မဝင်စားသလိုပဲ..."

စူးရွမ့်ယန်က ငြင်းလာ၏။ "သူ့ကိုစိတ်ပူစရာမရှိပါဘူး.."

စူးလျို့နျန်နှင့် စူးရွှမ်းချင်အတူရှိနေသရွေ့ စူးရွှမ်းချင်က စူးရွှမ့်ယန်ကို အလုပ်များတွင် ဝင်ပါခွင့်ပေးမည်မဟုတ်။ ညီဖြစ်သူကို ဂရုစိုက်နေသေးသော်လည်း ဝင်ရောက်ပတ်သက်ခွင့်မရှိဘဲ သဘောထားထုတ်ခွင့်ကိုသာပေးထားခဲ့သည်။ စူးရွှမ့်ယန်က ဖြည်းဖြည်းချင်းလက်လျှော့ထားလိုက်သည်။ မည်သို့ပင်ဖြစ်စေ စူးရွှမ်းချင်က စူးလျို့နျန်ကိုဂရုစိုက်ပေးနိုင်လေရာ သူ့အနေဖြင့် သူ့လူအပေါ်တွင်သာ အာရုံစိုက်ထားသင့်သည်။

. "ဘာလဲ...မင်းကလျို့နျန်ကိုမနာလိုဖြစ်နေတာလား..."

ရွှယ်လင်အသက်ရှူကြပ်သွားခဲ့သည်။ စူးရွှမ့်ယန်၏ဦးနှောက်က ကြီးမားလွန်းနေသည် သူကဘာကြောင့်များ ညီဖြစ်သူကို မနာလိုဖြစ်နေရမည်နည်း။ ထိုသူက အတွေးလွန်နေသည်ပင်!။

"ခင်ဗျားတကယ်ပဲ ဒီကိုဘာလာလုပ်တာလဲ..."

"ရိုက်ကွင်းကိုလာကြည့်တာလေ.." ထိုသူက တကယ်ကို လူ့ဂွစာဖြစ်ကြောင်းသိလိုက်ပြီးတည်းက စူးရွှမ့်ယန်က သူ့ကိုနှောင့်ယှက်ရန်စိတ်မပါတော့။ စားပွဲပေါ်တွင် အပူချိန်ထိန်းသည့်ကိရိယာကို ထားလိုက်ပြီး ရွှယ်လင်ကို အနားလာရန် လက်ယပ်ခေါ်လိုက်သည်။

"မင်းမကြာသေးခင်က ဝိတ်တွေကျသွားတယ်လေ...ဒါနဲ့ အလေးချိန်နည်းနည်းပြန်တက်လာအောင် ပစ္စည်းတစ်ခုလောက် ယူလာပေးချင်နေခဲ့တာ.."

ရွှယ်လင်မှာ အတော်လေးသတိထားပြီးပြောလိုက်ရ၏။ "ကျွန်တော်တို့အရင်က အဲဒီလောက်မရင်းနှီးကြဘူးမလား..."

ရိုက်ကူးရေးအဖွဲ့နှင့် အလုပ်စလုပ်တည်းက ရွှယ်လင်မှာပင်ပန်းလွန်း၍ အိမ်ပြန်ရောက်သည်နှင့်အလုပ်မလုပ်တော့ဘဲ ဆေးကြောပြီးအိပ်ရာထဲတန်းဝင်ခဲ့သည်။ တစ်ခါတစ်ရံ ခေါင်းရေစိုလျက်သားနှင့် အိပ်ပျော်သွားတတ်သေးသည်၊ သို့ဖြစ်၍ စူးရွှမ့်ယန်နှင့်ရင်းနှီးစရာအကြောင်းမရှိ။ နောက်ဆုံးတွင် သူတို့နှစ်ယောက်က လတ်တလော၌အတူနေထိုင်နေကြ၍ သူလည်းသတိလက်လွတ်နေထိုင်ခဲ့မိသည်၊ ထို့အပြင် ဖော်ပြရခက်သော အတူနေထိုင်ခြင်းမျိုးဖြစ်နေပြီး ပိုထူးဆန်းနေသေးသည်။

"ကျွန်တော်ပိန်သွားတာကို ခင်ဗျားဘယ်လိုသိလဲ..."

စူးရွှမ့်ယန်က ခေါင်းကိုပွတ်သပ်ပြီး တည်ငြိမ်စွာဖြင့်ပြောလာ၏။ "ကိုယ်ကအမြဲ မင်းကိုကြည့်နေခဲ့တာ..မင်းနားမလည်နိုင်ရင်တောင်ပေါ့..ကိုယ်မင်းဝိတ်ကျသွားတာကို သိနေတာပုံမှန်ပါပဲ..."

ရွှယ်လင်မှာ အလောတကြီးပြောလိုက်ရသည်။ "ခင်ဗျား ကျွန်တော့်နောက်ကိုလိုက်ဖို့လူလွှတ်ထားသေးလား..."

စူးရွှမ့်ယန် "....." ဘာကြောင့်မှန်းမသိ၊ ရွှယ်လင် အာရုံစိုက်နေသည့်ကိစ္စက ထူးဆန်းနေသယောင်ပင်။

"မဟုတ်ဘူး...ကိုယ်သာမင်းကိုတွေ့ချင်ရင်လွယ်လွယ်လေး...." ဆရာသခင်တစ်ယောက်အနေဖြင့် စူးရွှမ့်ယန်တွင် အထူးအခွင့်အရေးများရှိသည်။ တကယ်တမ်းတွင် စူးလျို့နျန်တွေ့ခဲ့ရသည့် အခန်းထဲမှဓာတ်ပုံများက ကင်မရာနှင့်နောက်မှလိုက်ရိုက်ထားခြင်း မဟုတ်သော်ငြား စူးရွှမ့်ယန် ချောင်းပြီးဖန်တီးထားခြင်းပင်။

"......" ရွှယ်လင်က ထိုကိစ္စကိုမယုံကြည်သေးသည့်တိုင် ဆက်လက်မေးမြန်းရန်လည်း သူ့ထံတွင်အခွင့်အရေးမရှိတော့။ မွှေးပျံ့သည့်အနံ့တစ်ခုကိုရလိုက်ပြီး သူ့နှာခေါင်းက ရှုံ့ပွပွဖြစ်သွားသည်။ သူနှုတ်ခမ်းများကိုဖိကာ သိချင်စိတ်ဖြင့်မေးလိုက်လေ၏။ "ခင်ဗျားဘာလုပ်ထားတာလဲ..."

"မင်းကြိုက်တဲ့စားစရာလေ.." အပူထိန်းကိရိယာကိုဖွင့်လိုက်ပြီး စူးရွှမ့်ယန်က အထဲမှဟင်းပွဲများကို ထုတ်လိုက်သည်။ "အမြန်လာစားလှည့်ချေ...စားပြီးရင်ခဏနားပြီး..ရိုက်ကွင်းကိုပြန်သွားတော့..."

ရွှယ်လင်က ဟင်းပွဲများကိုကြည့်ပြီးသူ့အားကြည့်လာပြီး တီးတိုးရေရွတ်လာ၏။

"ရိုက်ကွင်းကိုလာကြည့်တာကပုံမှန်ပါပဲ..."

သူတစ်ယောက်တည်း စားရမည်ဆိုသည့် သတ်မှတ်ချက်မရှိပေ။ ရွှယ်လင်က စူးရွှမ့်ယန်အတွက် လက်ထောက်ဖြစ်သူကို ခုံယူလာခိုင်းလိုက်ပြီး နှစ်ယောက်သားက နေရာကျဥ်းကျဥ်းလေးမှာတင် စားပွဲကိုအပြောင်ရှင်းလိုက်ကြသည်။ အတော်လေးခမ်းနားသည့်အတွေ့အကြုံပင်။

စူးရွှမ့်ယန်သည် ရိုက်ကူးရေးအဖွဲ့အတွက်လည်း ယူလာခဲ့ပြီး ရွှယ်လင်ကသူ့လက်ထောက်အား အားလုံးကိုခေါ်လာခိုင်းလိုက်သည်။ သူလူတိုင်းအပေါ် ပျော်ရွှင်အောင်ကြိုးစားနေခြင်းမဟုတ်သည့်တိုင် လူတိုင်းက ပူးပေါင်းလုပ်ဆောင်ခဲ့ပြီး ကောင်းသည့်အရာတိုင်းကို မျှဝေခဲ့သည်။

စူးရွှမ့်ယန်က သူ့အတွက်ဟုပြောသော်လည်း ရွှယ်လင်က ဟင်းများကိုလက်ထောက်အား အညီအမျှခွဲပေးလိုက်ပြီး ပြီးစေခဲ့သည်။

လက်ရှိရိုက်ကွင်းက ဝေးလံခေါင်သီသည့်နေရာတွင်တည်ထားသည်။ နေ့လည်စာစားပြီးနောက် နှစ်ယောက်လုံးသည် ညစာစားပြီးလမ်းလျှောက်နေကျအတိုင်း တောင်ပေါ်လမ်းတွင်လမ်းလျှောက်ခဲ့ကြသည်။ ရွှယ်လင်သည် ရိုက်ကူးပြီးချိန်မှလွဲပြီး အပြင်ထွက်လမ်းလျှောက်တတ်လေ့ မရှိသောကြောင့် မျက်နှာပေါ်တွင် အပြုံးဖျော့ဖျော့လေးရှိနေပြီး စူးရွှမ့်ယန်ကို အရှိုက်ထိသည့်တိုင်အောင်ပြောတတ်သည့် အကျင့်ပင် အတော်အတန်လျော့ပါးသွားလေသည်။

သူတို့နှစ်ယောက်သည် နာမည်ကြီးတောင်ပေါ်လမ်းပေါ်တွင် လမ်းလျှောက်နေခဲ့ကြ၏။ စူးရွှမ့်ယန်က သူ့အားမေးလာသည်။ "မင်းရုပ်ရှင်ရိုက်ရတာကိုကြိုက်လား..."

.ရွှယ်လင်ကစဥ်းစားနေကာ ခေါင်းယမ်းပြသည်။ "မကြိုက်ဘူး..."

"အိုကေ...."

စကားလမ်းကြောင်းက ဦးတည်ရာမရှိ။ ရွှယ်လင်က တစ်ဖက်လူထံမှပြောလာမည့်စကားကိုစောင့်နေပြီးမှ သိလိုဇောဖြင့်မေးလာသည်။ "ကျွန်တော်မကြိုက်ဘူးလို့ ပြောတာတောင် ဘာလို့လဲလို့မမေးရတာလဲ..."

"မလိုဘူးလေ..မင်းမကြိုက်ဘူးဆိုမှတော့ ဘာလို့ချဲ့ကားပြီး ထပ်တွေးရင်းအချိန်ကုန်ခံနေမှာလဲ...မင်းကြိုက်ရင် ပိုပြီးဗျူဟာတကျနဲ့ အစီအစဥ်ဆွဲရမှာပေါ့..မင်းလိုချင်ရင် ယွမ်မိသားစုက ပိုင်မုန့်တစ်စိတ်တောင်ဖဲ့ပေးလို့ရတယ်..."

ရွှယ်လင်: "အဲဒါကဘာအဓိပ္ပာယ်ရှိလဲ...ခင်ဗျားပိုင်တဲ့ တောင်တန်းနဲ့ မြစ်တွေကိုပြချင်တာလား..."

စူးရွှမ့်ယန်မှာ ရယ်ရခက်ငိုရခက်။ သူ၏ထူးဆန်းနေသော ဦးနှောက်ဆားကစ်အား အဖြေရှာနေခြင်းကို ရပ်လိုက်ပြီးပြောလိုက်သည်။ "မင်းအတွက် တောင်တန်းနဲ့မြစ်ပြင်တွေကိုယူပေးတာနဲ့ပဲ မင်းက အတူရှိဖို့သဘောတူလိုက်မှာလား..."

"မဟုတ်ဘူး..ကျွန်တော်တို့တစ်ယောက်နဲ့တစ်ယောက်သဘောမကျရင် အတူရှိဖို့မဖြစ်နိုင်ဘူး...တောင်နဲ့မြစ်တွေနဲ့ဘာမှမဆိုင်ဘူး..."

ရွှယ်လင်သည် ခံစားချက်နှင့်အခြားအရာများကြားမှ ပတ်သတ်မှုများနှင့် ဆက်နွယ်လာလျှင် ပွင့်လင်းသည်။ မကြာသေးခင်ကတင် အပေါင်စာချုပ်ကိုချေဖျက်ရန် ပိုက်ဆံမလောက်သည့် ကြယ်ပွင့်လေးအကြောင်းကိုပြောရန်မှာ မဖြစ်နိုင်ချေ။ "ခင်ဗျားကရော..ခင်ဗျားလည်း ကျွန်တော့်ကို အဲဒီမှတ်ဉာဏ်တွေကြောင့် သဘောကျတာလား.."

ပေါ့ပေါ့ပါးပါးပြောလိုက်ခြင်းဖြစ်သော်လည်း စူးရွှမ့်ယန်ကမူ တစ်ဖက်လူက သူ့စကားကိုအလေးအနက်ထားနေမှန်း အသေအချာပြောနိုင်၏။ သူသည်ကား တည်ကြည်သောမျက်နှာဖြင့်ပြောလိုက်လေသည်။

"ကိုယ်မင်းကိုသဘောကျတယ်...ချစ်တယ်...ဘာလို့လဲဆိုတော့ မင်းကမင်းပဲ...မင်းပြောခဲ့သလိုပေါ့..မင်းက ကိုယ့်ဝိညာဥ်ကိုချစ်တာ...လူကိုမြင်မြင်ချင်းချစ်မိခဲ့ပြီး ကမ္ဘာတွေဘယ်လောက်ပြောင်းပါစေ အရေးမကြီးဘူးဆို...ကိုယ်ကကိုယ်ပဲလေ.." သူသာဖြစ်နေလျှင် သူ့မှတ်ဉာဏ်များထဲ၌ ရှိသည်ဖြစ်စေ၊ မရှိသည်ဖြစ်စေ ထိုသူချစ်သည့်လူက သူတစ်ယောက်တည်းသာဖြစ်ပြီး သူကထိုသူ၏ချစ်သူဆက်ဖြစ်နေဦးမည်ပင်။

ရွှယ်လင်မှာ သူ့စကားကြောင့် ယာယီမျှတောင့်ကနဲဖြစ်သွားလေသည်။ ခေါင်းငုံ့ထားရင်း နားရွက်ထိပ်ဖျားလေးများက နီရဲနေကာ စူးရွှမ့်ယန်းအား ငေးကြည့်နေလျက်ပြောလိုက်လေ၏။ "ကျွန်တော်က ရုပ်ရှင်ဧကရာဇ်ဖြစ်လာတော့မှ မှတ်ဉာဏ်တွေကို သိမ်းထားနိုင်တယ်လေ...ဒါကြောင့် ကျွန်တော် စိတ်မဝင်စားလည်း သရုပ်ဆောင်နိုင်တာ..."

စူးရွှမ့်ယန်က သူဆိုလိုချင်သည်ကိုသဘောပေါက်နားလည်ပြီး အနည်းငယ်ခန့်ရှေ့တိုးသွားသည်။ သူလက်ဆန့်ထုတ်ကာ ရွှယ်လင်၏ခေါင်းကို ပွတ်ပေးနေရင်း စကားဖြင့်နှစ်သိမ့်ပေးလိုက်၏။

"မင်းအရမ်းစိတ်လောနေဖို့မလိုပါဘူး...မင်းမမှတ်မိလည်းရပါတယ်...ကိုယ်မင်းကိုချစ်တယ်ဆိုတာ သိရင်ရပြီ..ပြီးတော့ မင်းလည်းကိုယ့်ကိုချစ်တယ်လေ..ကိုယ်တို့အမြဲအတူရှိနေကြမယ်...ဒါဆိုရပြီ..."

ရွှယ်လင် မျက်နှာနီလာပြီး သူ့လက်ကိုပုတ်ထုတ်ကာ မပျော်မရွှင်ဖြင့်ပြောလာ၏။ "မဖြစ်နိုင်တာ... ကျွန်တော်ကတော့ မှတ်ဉာဏ်တွေကိုပြန်ယူမှာပဲ.. ခင်ဗျား ကျွန်တော့်ကိုလိမ်နေရင်ရော...?"

သူသည် တခါမှမပွင့်လင်းခဲ့ဖူး၍ စူးရွှမ့်ယန်မှာ သူယခုလိုစိတ်ပြောင်းသွားမည်ဟု မမျှော်လင့်ထားချေ။ သူတို့အတူရှိခဲ့ကြသည့်အချိန်ကို မှတ်မိလျှင်ပင် ရွှယ်လင်၏မှတ်ဉာဏ်များနှင့်ပတ်သတ်၍ တစ်ခုခုလုပ်ရန်နည်းလမ်းမရှိသည်မှာမဖြစ်နိုင်။ ရွှယ်လင်အနေဖြင့် သူ့နည်းနှင့်သူမှတ်မိသွားလျှင်ပင် သူတို့၏ပတ်သတ်မှုအပေါ်တွင်သာ သက်ရောက်မှုရှိနိုင်သည်။ ထိုနောက်ပိုင်း ရွှယ်လင်မှာ အပြောင်းအလဲများကို ကြီးကြီးမားမားကြုံတွေ့ခဲ့ရသည်။

<ပဟေဠိလမ်းမများ> မှာ တစ်လအကြာတွင် ပြသနေမှုကို အပြီးသတ်နိုင်ခဲ့သည်။ ရွှယ်လင်သည် ရိုက်ကူးရေးလုပ်နေစဥ်အတွင်း ပရိသတ်အများအပြားရခဲ့ပြီး <ကောင်းကင်ဘုံသို့အမေး> ရုပ်ရှင်အတွက် ဈေးကွက်ရှာဖွေရေးအဖွဲ့က သူ၏ကနဦးကျော်ကြားမှုကိုအသုံးပြုခဲ့သည်။

စူးလျို့နျန်က ဇယားတွင်အောင်မြင်မှုကိုတည်ဆောက်နိုင်ခဲ့သောကြောင့် <ကောင်းကင်ဘုံသို့အမေး> အတွက် ရွှယ်လင်၏ လတ်တလောကျော်ကြားမှုကို အသုံးချရန်မလိုအပ်ပေ။ စူးလျို့နျန်က ပြေးလွှားနေရပြီး စိတ်လှုပ်ရှားနေရခြင်းကိုနှစ်သက်သည် ထိုသူသည် အဓိကသရုပ်ဆောင်၊ ဇာတ်ညွှန်းရေးဆရာနှင့် ရင်းနှီးမြုပ်နှံသူလည်းဖြစ်သည်၊ အလုပ်များပုံမှာ စကားနှင့်ပင် မလုံလောက်ပေ။ သူသည် စားပွဲကို ဗြန်းကနဲရိုက်ကာ ဓာတ်ပုံရိုက်ရန်အတွက်ဆုံးဖြတ်လိုက်သောကြောင့် လူတိုင်းမြင်တွေ့ချင်နေကြသော <ကောင်းကင်ဘုံသို့အမေး> အတွက် အဝတ်အစားနှင့်ဇာတ်ကောင်ပြင်ဆင်မှုကို အချိန်အတန်ကြာယူကာ စီစဥ်ခဲ့ကြပြီးနောက်ဆုံး၌ လူထုရှေ့မှောက်သို့ ချပြနိုင်ခဲ့သည်။

စူးလျို့နျန် နတ်ဘုရားအသွင်ဖြင့် နေရာကိုအခိုင်အမာယူနိုင်ခဲ့သော မူရင်းဝတ္ထုမှာ ကမ္ဘာ့စာပေကွန်ရက်တွင် ကြီးကျယ်သည့်နေရာကိုသိမ်းယူထားသည့် အောင်မြင်သော လက်ရာတစ်ခုဖြစ်သည်။ ပထမဆုံး ဇာတ်လမ်းတွဲရိုက်ကူးနိုင်ခဲ့သည့်အခါ အာရုံစိုက်မှုကို တန်နှင့်ချီရခဲ့ပြီး ဇာတ်လမ်းရိုက်ကူးမည့်သတင်းထွက်လာသည်နှင့် စူးလျို့နျန်က အဓိကဇာတ်ကောင်နေရာကိုယူခဲ့သည်၊ <ကောင်းကင်ဘုံသို့အမေး> အား follow လုပ်ထားသော ပရိသတ်ဦးရေသည်ကား ကြောက်ခမန်းလိလိ အရေအတွက်အထိ မြင့်တက်သွားခဲ့၏။ ဇာတ်ကောင်ထွက်လာပြီး ရုပ်ရှင်အတွက် ဓာတ်ပုံရိုက်သည့်အခါ ပရိသတ်အရေအတွက်က ကောင်းကင်ဘုံအထိပင်တက်သွားလေတော့၏။

မိစ္ဆာဂိုဏ်းမှအခန်းများကို ရိုက်ကူးပြီးသည့်နောက် ရွှယ်လင်မှာ စစ်မြေပြင်မှအခန်းများကိုရိုက်ကူးရန် ပြင်ဆင်နေလေသည်။ အနားယူရန်ပင်အချိန်မရှိရှာဘဲ Weibo ပေါ်သို့တက်ကြည့်ရန် အပြောခံရပြန်သည်။

သူသည်ကား နာနိုကွန်ပျူတာကိုဖွင့်လိုက်သည့်အခါ သူ၏ Weibo အကောင့်ကပေါက်ကွဲမတတ်ဖြစ်နေသည်ကို တွေ့လိုက်ရ၏။ သူ၏အကောင့်တွင် ပရိသတ်များအပြိုင်အဆိုင်တိုးလာသည်မှာ ပြောစရာပင်မလိုတော့သော်လည်း သူ၏ပေ့ချ်တွင် လက်ဆောင်များနှင့် ပြည့်နေတော့သည်။ သူပိုက်ဆံပိုရစေရန် ထိုလက်ဆောင်များကို တကယ့်ပိုက်ဆံအစစ်နှင့် လဲလိုက်ရုံပင်။

ရွှယ်လင်သည် ရုပ်ရှင်၏ တရားဝင် Weibo စာမျက်နှာကို ဖွင့်လိုက်သည့်အခါ ဇာတ်လမ်းတွဲအတွက် သတင်းကိုတွေ့လိုက်ရလေသည်။

ရိုက်ကူးရေးလုပ်နေသည့် ခုနစ်ရက်တစ်ပတ်လုံး ရိုက်ကူးရေးအဖွဲ့သည် နေ့လည်ခင်းတိုင်း ဇာတ်ကောင်ဒီဇိုင်းပုံများကို တင်ပေးလေ့ရှိ၏။ နေ့တိုင်း ဇာတ်ကောင်နှစ်ခုထွက်လာတတ်ပြီး ၎င်းတို့ကဇာတ်လမ်းထဲမှ အဓိကဇာတ်ကောင်များပင်။ စူးရွှမ့်ယန်းက ချင်းရှီနေရာကိုယူခဲ့သည်။ နှစ်နှစ်လုံး ရိုက်ကူးရေးပြင်ပတွင်ရှိနေသည့်တိုင် ဧည့်သည်အသွင်အပြင်နှင့်ပင် ပရိသတ်များကို ပို့စ်အောက်မှ မှတ်ချက်ရေးသည့်နေရာတွင် ငိုကြွေးစေခဲ့၏။ ဇာတ်လိုက်အနေဖြင့် ရွှယ်လင်နှင့်စူးလျို့နျန်တို့၏ ဇာတ်ကောင်ပုံများက နောက်ဆုံးရက်တွင်ထွက်လာပြီး ယင်းကြောင့် ရွှယ်လင်၏ Weibo ကိုပေါက်ကွဲရန်ဖိအားပေးလိုက်သလိုပင်။

အမျိုးသားနှစ်ယောက်လုံး၏ မိတ်ကပ်နှင့်အဝတ်အစားဓာတ်ပုံနှစ်ခုလုံးက ပူးတွဲထွက်လာခြင်းဖြစ်၏။ ယင်းမှာ ဇာတ်ကောင်နှစ်ခုကြားမှ ပတ်သတ်မှုကို ပိုရှင်းလင်းစေနိုင်ရန် အတူတွဲထုတ်ရခြင်းပင်။ ကျူးရိဖန်က အနက်ရောင်ဝတ်ပြီး ဖုန်းချင်းယွင်က အနီရောင်ဝတ်ထားခဲ့သည်။ စုစုပေါင်းဓာတ်ပုံမှာ ကိုးပုံဖြစ်ပြီး ကျူးရိဖန်နှင့်ဖုန်းချင်းယွင်တို့၏ ရုပ်ရှင်ထဲမှ အချိန်ကာလကွာဟချက်ကို ပရိသတ်များထံချပြထားသည်။

ငယ်ရွယ်စဥ်တွင် တစ်ယောက်က သောကတရားကိုမသိသေးဘဲ ကျန်တစ်ယောက်က နှမြောဖွယ်ကောင်းစွာဖြင့် အနိုင်ကျင့်ခံနေရသည်။ အလှည့်အပြောင်းသည်ကား တစ်ယောက်က ခံစားချက်ကင်းမဲ့သွားသည်အထိ ခြောက်လှန့်ခံရပြီး စိတ်ပျက်အားငယ်မှုများအောက်တွင် နစ်မြုပ်သွားခဲ့၏၊ ကျန်တစ်ယောက်က ဘဝတွင် ပထမဆုံးနေခြည်တန်းကို မြင်တွေ့လိုက်ရပြီး စတင်တောက်ပလာခဲ့သည်။

ဇာတ်ကောင်နှစ်ခုကြားမှ နှိုင်းယှဥ်ချက်သည် အစတွင်သိသာသည်။ အလယ်တွင် သူတို့ပုံရိပ်နှင့် ဆန့်ကျင်ဘက်ဖြစ်လာပြီး အဆုံးတွင်တော့ အပြန်အလှန်နီးစပ်စေမည့် ဆက်သွယ်မှုတစ်ခုဖြစ်လာခဲ့၏။ ရှားပါးဓာတ်ပုံများသည် လူနှစ်ယောက်၏ ကြီးမြတ်သောဘဝ၏အတက်အကျကို ပြသနေလေသည်။

ရွှယ်လင်သည် တီဗွီဒရမ်မာတစ်ခုတည်းတွင်ပင် မင်းသားအနေဖြင့် ပါဝင်သရုပ်ဆောင်ဖူးသည်၊ ရုပ်ရှင်ဧကရာဇ်ဆုကို အကြိမ်ကြိမ်ဆွတ်ခူးထားသော ငယ်ရွယ်သည့်ရုပ်ရှင်ဧကရာဇ် စူးလျို့နျန်ကြောင့် နောက်ကျကျန်ခဲ့ရခြင်းမဟုတ်။ ထိုအစား သူသည်ဓာတ်ပုံတိုင်းတွင် စူးလျို့နျန်နှင့် တန်းတူချိန်ညှိနိုင်ပြီး သူ၏ကိုယ်ပိုင်စံသတ်မှတ်ထားသော စတိုင်လည်းရှိသည်။ ပြင်းထန်သောအခက်အခဲဖြစ်နေပါက ပိုပြီးပင်ဆွဲဆောင်မှုရှိသွားနိုင်၏။

အင်အားတောင့်တင်းခြင်းက အနုပညာအသိုင်းအဝိုင်းတွင် အကောင်းဆုံးသောအကာအကွယ်ပင်။ ရွှယ်လင်သည် လူများချီးကျူးနေပြီး သူ့အားလက်ထပ်ရန်တောင်းဆိုနေသော မှတ်ချက်များကိုကြည့်လိုက်ကာ စူးလျို့နျန်၏ Weibo ပို့စ်ကို တိတ်တိတ်လေးမျှဝေလိုက်သည်။

[နှင်းမြေခွေး: သမိုင်းကိုအတူရေးရအောင်// @စူးလျို့နျန်: မှော်ဆန်တဲ့ကံတရားကို အတူရှာဖွေကြရအောင် - // ကောင်းကင်ဘုံသို့အမေး: ဒါက ငါတို့ဇာတ်ကောင်တွေရဲ့ ဓာတ်ပုံထွက်တဲ့ နောက်ဆုံးနေ့ပဲ! ငါတို့ရဲ့သခင်လေးနဲ့ရိဖန်--- ငါသူတို့ဘယ်နှခါတောင် လျက်နေမှန်း မင်းတို့မသိပါဘူး]

Prev Next