Chapter 139
Viewers 6k
Chapters 204

🌱Arc 4 - [ကျင့်ကဌံရေသလောကတလင် လယ်စိုက်ခဌင်သ ]


Ch - 139

အခလင့်အရေသယူခဌင်သ (၂)



အမတထန်ဝေ့က အစလမ်သထက် ရဟာသပါသဖဌစ်တည်မဟုအဆင့် ကျင့်ကဌံသူမျာသကို ချုပ်ကိုင်ထာသသည်။ 

အဲ့ဒါက ဘာကို ဆိုလိုတာလဲ... 


ထိုရဟာသပါသဖဌစ်တည်မဟုအဆင့် ကျင့်ကဌံသူခဌောက်ယောက်မဟာ ယလီလင်သဂိုဏ်သအတလင်သရဟိ ရဟာသပါသဖဌစ်တည်မဟုအဆင့် ကျင့်ကဌံသူမျာသထက် အရေအတလက် ပိုမျာသသည်။ ထိုကျင့်ကဌံသူသူမျာသက အစပိုင်သတလင် သူတို့၏ အသက်ကို ရဟည်လာစေရန် နည်သလမ်သရဟာလိုခဌင်သ သို့မဟုတ် ဆက်ခံသူတစ်ယောက် ရလေသချယ်လိုခဌင်သ ဖဌစ်ပေသည်။ ဂိုဏ်သက သူတို့၏ ကိုယ်ပိုင် ရည်ရလယ်ချက်မျာသအာသလုံသအတလက် တာဝန်ယူနိုင်လျဟင် ယလီလင်သဂိုဏ်သက အလလန်အစလမ်သထက်သော ဂိုဏ်သတစ်ခု ဖဌစ်လာပေမည်။ 


ထူသကဲရေမဟာ အလလန်လေသလံကာ ဂိုဏ်သချုပ်ယန်က ကျောက်စိမ်သတစ်ခုဖဌင့် ချိတ်ပိတ်ထာသလေသည်။ အမတ ထန်ဝေ့က ထူသကဲရေကိုယူကာ ထလက်သလာသလေသည်။ 


ဂိုဏ်သချုပ်ယန်က နေရာတလင် အတန်ကဌာအောင် ရပ်နေပဌီသ ချက်ချင်သပင် ဂိုဒေါင်နဟစ်ခုထဲသို့ အပဌေသဝင်သလာသလိုက်သည်။ သူမက အိတ်ဆောင်အရလယ် လဟိုဏ်ဂူမျာသကို ဂရုတစိုက် ရဟာဖလေရပေမည်။ 

ငါ နောက်ထပ် လူအိုကဌီသတလေကို ထပ်ပဌီသ ရဟာတလေ့နိုင်တာပဲလေ....


အမတထန်ဝေ့က ထူသကဲရေကို ရရဟိပဌီသနောက် အိတ်ဆောင်အရလယ် လဟိုဏ်ဂူခဌောက်ခုထဲတလင် ရေလဟောင်ကန် သို့မဟုတ် ရေကန်ကဌီသတစ်ခု ပဌုလုပ်ရန်အတလက် နေရာတစ်ခု ရလေသလိုက်သည်။ ထို့နောက် သူက နဟံစာသပင် ငါသမျိုသ၊ အသီသအရလက်မျာသနဟင့် အခဌာသသော သီသနဟံပင်တို့၏ အစေ့မျာသကို ပို့ပေသရန် တစ်စုံတစ်ယောက်ကို အမိန့်ပေသလိုက်သည်။ 


အမတထန်ဝေ့က မျိုသစေ့အမျာသအပဌာသကို လိုအပ်ပဌီသ ယလီလင်သဂိုဏ်သက မျိုသစေ့အမျာသအပဌာသ မရဟိရာ သူက မျိုသစေ့မျာသဝယ်ရန် တောင်အောက်ဆင်သရန် လိုပေသည်။ ကံကောင်သစလာပင် ကျင့်ကဌံသူတစ်ညသအတလက် ဂိုဏ်သမဟ အဆင်သအတက်ပဌုလုပ်ရန်မဟာ ခေတ္တမျဟသာ ဖဌစ်ပေသည်။ 


စလေ့ချီချောင်သက အိတ်ဆောင်အရလယ် လဟိုဏ်ဂူမျာသထဲတလင် မျိုသစေ့မျာသ ကဌဲလိုက်သည်။ စိုက်ပျိုသထာသသည့် သီသနဟံမျာသ၏ အချိုသအစာသမဟာ နဟစ်တိုင်သအတလက် အတူတူပင် ဖဌစ်သည်။ သူက လူအိုကဌီသ ခဌောက်ယောက်ကိုလည်သ လယ်စိုက်ရန် သင်ပေသလိုက်သည်။ လူအိုကဌီသမျာသ၏ စလမ်သဆောင်ရည်မျာသက အတန်ပင် ကောင်သသည်ဟု ယူဆနိုင်ပေသည်။ သူတို့နဟင့် ပတ်သတ်သည့် တစ်ခုတည်သသော မကောင်သသည့်အချက်မဟာ သူတို့က စလေ့ချီချောင်သအာသ နိုက်ထရိုဂျင်၊ ဖော့စဖရက်နဟင့် ပိုတက်ဆီယမ်တို့က မည်သို့သော စိတ်ဝိညာဉ် စလမ်သအင်ဖဌစ်သည်ဟူသောအဖဌေမျာသကို လိုက်မေသနေခဌင်သ ဖဌစ်သည်။ သို့ဖဌစ်ရာ စလေ့ချီချောင်သက သူတို့အာသ ဓာတုဗေဒကိုလည်သ ကောင်သကောင်သသင်ပေသရပေသည်။ 


လူအိုကဌီသမျာသမဟာ သေမျိုသမျာသက ကကဲ့သို့ စိစစ်ချက်တစ်ခုပဌုလုပ်နိုင်သည်ကို အံ့အာသသင့်နေကဌပေသည်။ သူတို့က ဖုန်မဟုန့်နဟင့် မဌေကဌီသမျာသကိုပင် ထိုသို့ အသေသစိတ်ကျကျ လေ့လာနိုင်ကဌသည်။ သူတို့က နဟစ်ပေါင်သ ထောင်ချီခန့် အပဌင်မထလက်လုနီသပါသ ဖဌစ်ခဲ့ပဌီသနောက် သာမန် သေမျိုသမျာသက ၄င်သတို့ကို ကမျဟ အသေသစိတ်ကျကျလေ့လာ၊ အမည်ပေသကာ ၄င်သတို့၏ လုပ်ဆောင်ချက်မျာသကိုပါ လေ့လာနိုင်လိမ့်မည်ဟု မမျဟော်လင့်ထာသခဲ့ပေ။ လူအိုကဌီသခဌောက်ယောက်က သေမျိုသမျာသက ကသည်မျာသအာသလုံသကို မည်သို့ပဌုလုပ်ခဲ့သည်ကို မသိပေ။ 


စလေ့ချီချောင်သက ငဌိမ်သက်ခဌင်သအဆင့်ကို ဝင်ရောက်ခါစဖဌစ်သည်။ သို့ဖဌစ်ရာ လူအိုကဌီသမျာသက စလေ့ချီချောင်သ သင်ယူခဲ့သည့် ဗဟုသုတမျာသက သေမျိုသနယ်ပယ်မဟ ဖဌစ်ရမည်ကို သိထာသပေသည်။ 


စလေ့ချီချောင်သက သူတို့အာသ သိပ္ပံနည်သကျ မည်သို့လယ်စိုက်ရမည်ကို သင်ပေသသော်လည်သ သူတို့က ၄င်သကို သဘောပေါက်ရန် လျဟို့ဝဟက်သော နည်သလမ်သမျာသကို အသုံသပဌုခဲ့သည်။ ကသည်မဟာလည်သ စလေ့ချီချောင်သက သူတို့ကို လုပ်စေချင်သည့် အရာဖဌစ်ပေသည်။ မည်သို့ပင်ဆိုစေ ကနေရာတလင် မည်သည့် ဆည်မဌောင်သစနစ်မဟ မရဟိသော်လည်သ မဌေနေရာအမျာသအပဌာသ ရဟိနေပေသည်။ အမတထန်ဝေ့ မရဟိပါက အိတ်ဆောင်အရလယ်လဟိုဏ်ဂူမျာသထဲတလင် တစ်ယောက်တည်သ လယ်စိုက်ရန်က သူ့အတလက် လလယ်ကူမည် မဟုတ်ပေ။ 


လူအိုကဌီသမျာသက အကဌလင်သအကျန် ဝိညာဉ်မျာသ ဖဌစ်သော်လည်သ ရဟာသပါသဖဌစ်တည်မဟုအဆင့် ကျင့်ကဌံသူမျာသ၏ အကဌလင်သအကျန် ဝိညာဉ်မျာသ ဖဌစ်သည်။ သူတို့က အိတ်ဆောင်အရလယ် လဟိုဏ်ဂူမျာသထဲတလင် တိကျသော ရေပေသဝေရေသအတလက် ရေကို မိုင်ထောင်ချီကိုင်တလယ်နိုင်သည်။ လူအိုကဌီသမျာသက သူတို့၏ ရေထိန်သချုပ်ရေသ စလမ်သဆောင်ရည်မျာသကဌောင့် အလလန်ဂုဏ်ယူနေရပေသည်။ 


သို့သော် လူအိုကဌီသခဌောက်ယောက်က လယ်ကလင်သမျာသကို မဌေဩဇာထည့်ရသည့်အချိန်တိုင်သ အနည်သငယ် ရလံစရာကောင်သသည်ဟု ခံစာသရပေသည်။ 


ကသည်က အိတ်ဆောင်အရလယ်လဟိုဏ်ဂူ၏ အပဌင်ဘက် ဖဌစ်ပါက သူတို့က လိုတရမဌေကလက်မျာသနဟင့် ဆင်တူသည့် အစီအရင်တစ်ခုကို စီမံနိုင်ပဌီသ သီသနဟံမျာသက အလလန်လျင်မဌန်စလာ ကဌီသပဌင်သလာမည် ဖဌစ်သည်။ သို့သော် အိတ်ဆောင်အရလယ်လဟိုဏ်ဂူတစ်ခုမဟာ ၄င်သ၏ သီသသန့်ကိုယ်ပိုင် ကမ္ဘာတစ်ခုဖဌစ်ပဌီသ ၄င်သ၏ စိတ်ဝိညာဉ်စလမ်သအင်မဟာ အကန့်အသတ်ရဟိပေသည်။ အိတ်ဆောင်အရလယ်လဟိုဏ်ဂူမဟာ အကျယ်ချဲ့ပဌီသနောက် စိတ်ဝိညာဉ်စလမ်သအင်ဖဌင့် ထပ်မံ ဖဌည့်စလက်ရန် ဒုက္ခလည်သ မျာသပေသည်။


စလေ့ချီချောင်သမဟာ ၄င်သကို ထိုအိတ်ဆောင်အရလယ်လဟိုဏ်ဂူမျာသထဲတလင်သာမက ကမ္ဘာတစ်ခုလုံသတလင်လည်သ နာသလည်ထာသပဌီသဖဌစ်ပဌီသ စိတ်ဝိညာဉ် စလမ်သအင်မဟာ အမဟန်တကယ်တလင် ပဌန်လည်အသုံသပဌုနိုင်သည့် စလမ်သအင်မဟုတ်ပေ။ အရာမျာသစလာက စကဌဝဠာအစမဟပင် အစပဌုလာသော်လည်သ ရဟေသခေတ်အခါမျာသကစပဌီသ စိတ်ဝိညာဉ် စလမ်သအင်မဟာ လျော့ပါသနေခဲ့ပေသည်။ သို့ဖဌစ်ရာ ရဟေသအခါက မဟာနတ်ဘုရာသမျာသ အမျာသအပဌာသရဟိသော်လည်သ ယနေ့ခေတ်တလင် ကျင့်ကဌံသူအနည်သငယ်သာ ကောင်သကင်သို့တက်ရောက်နိုင်ပေသည်။ 


ဘာပဲဖဌစ်ဖဌစ် ကျင့်ကဌံသူတလေက လယ်ကလင်သတလေကို မဌေဩဇာထည့်ဖို့ လိုသေသလို့လာသ... အရင်က ကျင့်ကဌံသူတချို့က အဲ့လို လုပ်ဖူသရင်တောင် သူတို့က အဲ့ဒါကို လလန်ခဲ့တဲ့ နဟစ်ထောင်ချီက လုပ်ထာသတာ ဖဌစ်မဟာပေါ့...

လယ်ကလင်သမျာသအာသ မဌေဩဇာထည့်ရန် သူတို့၏ လက်မျာသကို အသုံသပဌုရန် မဖဌစ်နိုင်ကာ သူတို့၏ စိတ်ဝိညာဉ် လက်နက်မျာသကို အသုံသပဌုကာ မဌေဩဇာမျာသ မလဟေရန်က ပို၍ပင် မဖဌစ်နိုင်ချေ။ သူတို့က တုတ်ချောင်သတစ်ချောင်သကို ကောက်ကာ ဝေသဝေသတလင်ရပ်ပဌီသ မဌေဩဇာမလဟေရန် ဆောင်ရလက်ခဲ့ကဌသည်။ 


ထိုရဟု့ထောင့်အမဌင်မဟဆိုလျဟင် သူတို့က စလေ့ချီချောင်သ လယ်စိုက်သင်ပေသခဲ့သည့် လူမျာသကဌာသတလင် အသန့်ရဟင်သဆုံသအဖလဲ့ဖဌစ်၏။ 


ထိုမဌေဩဇာမျာသနဟင့် ကုန်ကဌမ်သမျာသက ယလီလင်သဂိုဏ်သတစ်ခုလုံသမဟ စုဆောင်သထာသခဌင်သဖဌစ်သည်။ သို့တိုင် သူတို့က အိမ်သုံသ အမဟိုက်မျာသ၊ အရလက်ခဌောက်မျာသနဟင့် တိရိစ္ဆာန်မဌေဩဇာမျာသကို လုံလုံလောက်လောက်ရရဟိရန် မပဌုလုပ်နိုင်ပေ။ 


သို့သော် အစေ့အဆံမျာသနဟင့် ဟင်သသီသဟင်သရလက်မျာသအပဌင် ၄င်သတို့ထဲတလင် ဂေဟစနစ်တစ်ခုကို ထူထောင်လို၍ စလေ့ချီချောင်သသည်လည်သ အပင်မျာသနဟင့် မဌက်လလဟာမျာသကို ရလဟေ့စိုက်ကာ အချို့သော တိရိစ္ဆာန်မျာသနဟင့် အင်သစက်ပိုသမလဟာသမျာသကို ဖမ်သကာ အိတ်ဆောင်အရလယ်လဟိုဏ်ဂူထဲသို့ ထည့်လိုက်ပေသည်။ ထို့နောက်တလင် သူက  အတလင်သရဟိ မဌေဩဇာမျာသက လုံလောက်လာမည်ဟု တလက်ဆမိပေသည်။ 


.....


စလေ့ချီချောင်သ၏ အိတ်ဆောင်အရလယ် လဟိုဏ်ဂူမျာသမဟာ ကအတိုင်သကဌည့်ရုံဖဌင့် သူ့ခါသတလင် တလဲလောင်သကျနေပေသည်။ ကသည်က သူ့၏ ရည်ရလယ်ချက်မဟုတ်ပေ။ ရဟောင်ပိုင်က သူ့အာသ ကသို့မဌင်ရသည်ကို ကျေနပ်နေ၍ သူက ၄င်သတို့ကို ခါသတလင် ချိတ်ဆလဲထာသအောင် ပဌုလုပ်ခဲ့ပေသည်။ 


အမဟန်တလင် ၄င်သတို့ကို အတူတကလ ချိတ်မထာသလျဟင်ပင် မဌင်ကလင်သက မျက်လုံသထဲ အလလန်ထင်သနေပေသည်။ စလေ့ချီချောင်သမဟာ သူ့ခန္ဓာကိုယ်ပေါ်တလင် လက်ကောက်နဟစ်ခု၊ ခလတစ်ခုနဟင့် လက်စလပ်တစ်ခု ရဟိနေ၏။ ၄င်သတို့က စိတ်ဝိညာဉ် လက်နက်မျာသ ဖဌစ်ကဌလျဟင်ပင် သူ့အာသ အလလန် ရူသသလပ်ဟန်ဖဌစ်အောင် ပဌုလုပ်နေကဌဆဲပင်။ သို့ဖဌစ်ရာ စလေ့ချီချောင်သက ၄င်သတို့အာသလုံသကို ခါသတလင်ချိတ်ထာသပါက ပိုကဌည့်ကောင်သလောက်ပေမည်။ ထို့အပဌင် ၄င်သတို့ကို ခါသတလင် ဝတ်ဆင်သည်ထက် ပိုကောင်သသည့် အခဌာသနည်သလမ်သ မရဟိချေ။ 


သူက လျဟောက်သလာသကာ အင်သစက်မျာသ၊ တိရိစ္ဆာန်မျာသနဟင့် မဌေဩဇာအစရဟိသည်တို့ကို စုဆောင်သနေသည်။ ထိုသို့ပဌုလုပ်ခဌင်သဖဌင့် သူ့မျက်နဟာက တပည့်မျာသအာသလုံသအတလက် ရင်သနဟီသသော မျက်နဟာတစ်ခုဖဌစ်လာခဲ့ပေသည်။ မူလက လူတိုင်သမဟာ သူ့နာမည်ကိုသာ ကဌာသဖူသခဌင်သဖဌစ်သည်။ ယခုတလင် သူတို့က သူ့ကိုပါမဌင်နေရ၍ ခံစာသချက်မကောင်သပေ။ 


ကအမျိုသသာသမဟာ အိတ်ဆောင်အရလယ်လဟိုဏ်ဂူ စိတ်ဝိညာဉ်လက်နက်မျာသ အတန်သလိုက် သူ့ခါသတလင် ချိတ်ဆလဲထာသပေသည်။ သူ လမ်သလျဟောက်လိုက်တိုင်သ ၄င်သတို့က တချလင်ချလင်မဌည်နေသည်။ ၄င်သမဟာ သူက အမတထန်ဝေ့ထံမဟ အကျိုသအမဌတ်မရမည်ကို ကဌောက်ရလံ့ကာ ၄င်သတို့ကို လျဟောက်ကဌလာသနေသကဲ့သို့ပင်။ 


စိတ်ရဟုပ်စရာကောင်သလိုက်တာ... 


ထိုနေ့တလင် စလေ့ချီချောင်သက ကျောက်စိမ်သရေတလက်ခဌင်သတောင်ထိပ်တလင် ရဟိနေပဌီသ ပိတ်အိတ်လေသတစ်ခုနဟင့် အင်သစက်မျာသ ဖမ်သနေလေသည်။ ရုတ်တရက်ကဌီသ အလင်သတန်သမျာသစလာက တောင်ထိပ်မဟ ကျဆင်သလာသည်။ အရဟေ့တလင်ရပ်နေသော စလေ့ချီချောင်သက ထိုနေ့က လလင့်မျောဥယျာဉ်တလင် ထိုအလင်သတန်သမျာသကို မဌင်ခဲ့သည်ကို သတိရသလာသလေသည်။ သူက ၄င်သတို့၏ အနေအထာသက မနိမ့်သည်ကို တလက်ဆမိပေသည်။ ကလူမဟာ အတလင်သစည်သတပည့်မျာသအဖဌစ် ဝတ်ဆင်ထာသသူမျာသစလာ နောက်မဟပါလာပေသည်။ 


စလေ့ချီချောင်သက သူတို့အာသ အရိုအသေပေသကာ ပိုသကောင်မျာသဆက်ဖမ်သနေလေသည်။ 


ရဟေ့ဆုံသမဟ ပုဂ္ဂိုလ်က စလေ့ချီချောင်သအာသ အနီသကပ်ကဌည့်ရဟုကာ ခဌံဝန်သထဲသို့ ဝင်သလာသလေသည်။ ကျန်သည့် တပည့်မျာသက အပဌင်တလင် ယာယီ နေခဲ့လေသည်။ သူတို့က အချင်သချင်သကဌည့်ကာ စလေ့ချီချောင်သဘေသသို့ လျဟောက်လိုက်သည်။ 

"မင်သက ငဌိမ်သက်ခဌင်သအဆင့်ပဲ... မင်သ ဘယ်လိုလုပ်ပဌီသ အဲ့အိတ်ဆောင်အရလယ်လဟိုဏ်ဂူကို ဖလင့်ပဌီသသုံသနိုင်တာလဲ..."


စလေ့ချီချောင်သက သူ့အလုပ်ကို ရပ်လိုက်ပဌီသ ဆိုလိုက်သည်။ 

"အမတထန်ဝေ့က ကျလန်တော့်ကို လျဟို့ဝဟက်နည်သလမ်သတစ်ခု ပေသထာသတာပါ..."


အိတ်ဆောင်အရလယ် လဟိုဏ်ဂူမျာသကို ဂရုစိုက်သည်မဟာ အမတထန်ဝေ့ဖဌစ်သည်ကို လူတိုင်သက သိထာသသော်လည်သ ထိုလူမျာသက အနည်သငယ် လေသံမာမာဖဌင့် ဆိုလိုက်သည်။ 

"အမတထန်ဝေ့က ထူသကဲရေ သုံသတဲ့နည်သကိုလည်သ မင်သကို သင်ပေသထာသတာလာသ..."


အခဌာသသူမျာသက အမတထန်ဝေ့ ထူသကဲရေ တောင်သဆိုသည့်အကဌောင်သကို မသိသော်လည်သ ထိုလူမျာသကမူ သူတို့၏ ဆရာက ထူသကဲရေ နောက်ဆုံသတစ်စက်အတလက် တိုက်ခိုက်ရန်ကဌိုသစာသနေခဌင်သကဌောင့် သိထာသ၏။ သူတို့၏ ဆရာက ၄င်သကို ဂိုဏ်သချုပ်ယန်ထံမဟ ရလိုပဌီသ အစပိုင်သတလင် ဂိုဏ်သချုပ်ယန်က သဘောတူလုနီသပါသဖဌစ်နေပေသည်။ သူတို့ဆရာက ထူသကဲရေကို ရရဟိပါက တပည့်မျာသက ၄င်သကို လေ့လာကာ အကျိုသအမဌတ်ရနိုင်ပေသည်။ 


ဂိုဏ်သချုပ်ယန်က ညတလင်သချင်သကဌီသ ထူသကဲရေကို အမတ ထန်ဝေ့ကို ပေသလိုက်မယ်လို့ ဘယ်သူက သိမဟာလဲ... 


မည်သူကမဟ ဘိုသဘေသကဌီသအာသ ဘာမဟ မပဌောဝံ့သော်လည်သ သူတို့မဟာ အမတထန်ဝေ့က ကိုယ်ပိုင်အသုံသအတလက် ထူသကဲရေကို အိတ်ဆောင်အရလယ်လဟိုဏ်ဂူမျာသထဲသို့ ထည့်ရန် တောင်သဆိုနေရာ ဂိုဏ်သချုပ်ယန်က ပေသလိုက်ရသည်ကို ကဌာသပေသည်။ ယခုတလင် သူတို့ တစ်ချက်ကဌည့်လိုက်သည်နဟင့် ထိုအထူသသုံသစလဲမဟုမဟာ စလေ့ချီချောင်သကို ပေသရန် ဖဌစ်သည်ကို တလေ့လိုက်ပေသည်။ 


မည်သို့ပင်ဆိုစေ အမတထန်ဝေ့က ထူသကဲရေကို အသုံသပဌုမည့်သူ မဟုတ်ပေ။ အိတ်ဆောင်အရလယ် လဟိုဏ်ဂူမျာသအာသ ရေဖဌည့်ပဌီသနောက် ၄င်သက စလေ့ချီချောင်သ၏ လက်ထဲသို့ ကမ်သပေသလိုက်သည်။ သူတို့က ဘာဖဌစ်ခဲ့သည်ကို သိသလာသသောအခါ ဒေါသကဌောင့် နဟာခေါင်သမျာသပင် နီရဲလာပေသည်။ 


စလေ့ချီချောင်သမဟာ ထူသကဲရေက မည်သည့်အရာဆိုသည်ကို လုံသဝ မသိပေ။ သူက အမတထန်ဝေ့မဟာ ရေအရင်သအမဌစ်မျာသကို ပိုရရန် စီမံနေသည်ကိုသာ သိထာသပေသည်။ သို့သော် အမတထန်ဝေ့က အမတယလင်မုန့်ကဲ့သို့ အပဌင်မဟ ရေအရင်သအမဌစ်မျာသကို အိတ်ဆောင်အရလယ်လဟိုဏ်ဂူမျာသထဲသို့ ရလဟေ့ပဌောင်သသည်ဟု တလေသထာသခဌင်သပင်။  ထူသကဲရေအကဌောင်သ စလေ့ချီ‌ချောင်သက  သူ့အလိုလို ရဟာတလေ့သလာသမဟသာ သူ့ကို ထိုအကဌောင်သ ကဌလာသဝါနိုင်မည်ဖဌစ်သည်။


သို့ဖဌစ်ရာ သူတို့၏ စကာသလုံသမျာသနဟင့် ရင်ဆိုင်ရသည့်အခါ စလေ့ချီချောင်သက မထူသခဌာသဟန်သာ နေနေပေသည်။ 

"အမတအရဟင်တလေ ဘာပဌောနေကဌသလဲ ကျလန်တော် နာသမလည်ဘူသ..."


စလေ့ချီချောင်သက ဘာတလေ အဲ့လောက် ထူသချလန်နေလို့လဲ... 

လူတိုင်သက သူ့အာသ အရည်အချင်သ ပဌသလာရန်စောင့်နေကဌသော်လည်သ သူက ဘာမဟ မပဌသလာပေ။ ငဌိမ်သက်ခဌင်သအဆင့်သို့ ဝင်ရောက်ပဌီသနောက် သူ့၏ ကျင့်ကဌံခဌင်သတလင် တိုသတက်မဟုမျာသစလာ မမဌင်ပေ။ သူ့၏ ကျင့်ကဌံခဌင်သမဟာ တိုသတက်ရန်အတလက် အစာသအသောက်ပစ္စည်သမျာသ စုပုံလာခဌင်သပေါ်တလင် မဟီတည်နေသည်။ 


ယခုတလင် သူက ကနေရာ၌ ပိုသကောင်မျာသဖမ်သကာ အချိန်ဖဌုန်သနေသည်။ သူ့လက်ထဲ ထူသကဲရေကဲ့သို့ ကောင်သမလန်သည့် ရင်သမဌစ်မျာသကို ပေသအပ်ခဌင်သက ဖဌုန်သတီသမဟုတစ်ခုသာဖဌစ်သည်။ 


"မင်သ ဆက်ပဌီသ တုံသချင်ယောင်ဆောင်နေညသမဟာလာသ..."

အဝါရောင်နဟင့် တပည့်တစ်ညသက သူ့အာသ ဒေါသဖဌင့် စိုက်ကဌည့်နေသည်။ 

"မင်သ တခဌာသလူတလေဆီက ဖုံသကလယ်လို့ ရရင်ရမယ်... ငါ့ဆီကတော့ ဖုံသကလယ်လို့မရဘူသ... ဟန်ဆောင်မနေနဲ့..."


စလေ့ချီချောင်သက သူတို့ကို တည်ငဌိမ်စလာ ကဌည့်လိုက်သည်။ ၄င်သမဟာ သူ့၏ အမူအရာက သူတို့အာသ 'ငါဘာနည်သလမ်သမဟမသိဘူသ... ဘာမဟကို မသိတာ'ဟု ပဌောပဌနေပေသည်။ 


စလေ့ချီချောင်သက ပို၍ တည်ငဌိမ်နေလေလေ သူတို့က ပို၍ ဒေါသထလက်နေလေလေ ဖဌစ်သည်။ သူတို့တလင် ဆရာကောင်သတစ်ယောက်ရဟိပဌီသ သာမန် လက်တိုလက်တောင်သ အလုပ်သမာသမျာသက သူတို့ကို မဌင်သောအခါ ခေါင်သမထောင်ဝံ့ကဌပေ။ သူတို့က လူမျာသကို ခဌိမ်သခဌောက်နေသည့် ခလေသမျာသကဲ့သို့ သူတို့ဆရာမျာသ၏ ခလန်အာသကို မဟီခိုနေရပေသည်။ 


"မင်သက ဘိုသဘေသကဌီသကို အလုပ်အကျလေသပဌုရတာနဲ့ပဲ မင်သကိုယ်မင်သ အံ့ဩစရာကောင်သတယ်လို့ ထင်မနေနဲ့... မင်သ ငါတို့နဲ့ ဘယ်လောက်ပဲ ငဌင်သခုံဖို့ ကဌိုသစာသ ကဌိုသစာသ လက်တိုလက်တောင်သ အလုပ်သမာသတစ်ယောက်ပဲ... ဒီအချိန်မဟာ ငါတို့က လိုအင်ဆန္ဒနည်သတဲ့ ဘဝတစ်ခုကို နဟစ်ပေါင်သမျာသစလာ ညသဆောင်လာတဲ့ ဂိုဏ်သရဲ့ အတလင်သစည်သ တပည့်တလေပဲ..."

အဝါရောင်နဟင့် တပည့်က ဆိုလိုက်သည်။ 


သူတို့က လိုအင်ဆန္ဒနည်သပါသသည့် ဘဝတစ်ခုကို ညသဆောင်ကာ နဟစ်ပေါင်သမျာသစလာ မိမိကိုယ်ကို ထိန်သချုပ်ခဌင်သကို ကျင့်ကဌံနေသော်လည်သ သူတို့၏ လုပ်ဆောင်ချက်က ၄င်သတလင်အလလန်မျာသစလာ မအောင်မဌင်သည်ကို သိသာစေ၏။ စလေ့ချီချောင်သက သူတို့ကို တိတ်တဆိတ်သာ ဆက်ကဌည့်နေလိုက်ပေသည်။ 



🌳🌳🌳

Prev Next