Chapter 178

Volume 8 : ပတ်ဝန်းကျင်ထိန်းသိမ်းရေးဌာန

Chapter 178 (ကြည်လင်သောရေနှင့်စိမ်းလန်းသောတောင်တန်း ၀၃)

ကျန်းရှောင်နျန်မှတည်ဆောက်ထားသော မြေအောက်အခြေစိုက်စခန်းသည် ယခင်ပုံစံအတိုင်းဖြစ်ပြီး အိပ်ခန်း 4 ခန်း၊ ရေချိုးခန်း 2 ခန်း နှင့် အစည်းအဝေးနှင့် စားသောက်ခန်းများအတွက် ကျယ်ဝန်းသော ဧည့်ခန်းနှင့် ထမင်းစားခန်းပါရှိသည်။ ချင်လုသည် သူမဝယ်ထားသော အစားအသောက်တွေအားလုံးကို ဧည့်ခန်းထဲကို ရွှေ့ပြီး ချလိုက်သည်။ ထို့နောက်မှာတော့ အားလုံးက လင်းမန့်လော်အနီးတဝိုက်မှာ စုရုံးပြီး နောက်လာမည့် အစီအစဉ်ကို ဆွေးနွေးကြသည်။

လင်းမန့်လော်က အစီအစဥ်၏ ရိုးရှင်းသောပုံစံကို အမြန်စီစဉ်ခဲ့သည်။

လေကာကွယ်ခြင်း၊ သဲပြုပြင်ခြင်းနှင့် သစ်တောပျိုးထောင်ခြင်း ပရောဂျက်တစ်ခုလုံးကို သူမအနေဖြင့် အဆင့်သုံးဆင့်ခွဲထားသည်။ ပထမအဆင့်မှာ ရှိပြီးသား သဲနုန်းများကို ပိတ်လှောင်ပြီး စုစည်းရန် ဖြစ်သည်။ ယခုရက်ပိုင်းအတွင်း လေပြင်းတိုက်ခတ်မှုကြောင့် သဲကန္တာရအတွင်း ရွေ့လျားနေသော သဲနှင့်ဖုန်မှုန့်များသည် လေတိုက်၍ လယ်သမားများ၏ ထွန်ယက်စိုက်ပျိုးနိုင်သော လယ်မြေများအနီးတစ်ဝိုက်သို့ ပျံ့နှံ့သွားပြီး စိုက်ပျိုးနိုင်သောမြေတချို့မှာ သဲနှင့် ဖုန်မှုန့်များဖြင့်ပင် နစ်မြုပ်နေပါသည်။

စိုက်ပျိုးမြေသို့ ကျူးကျော်ဝင်ရောက်လာသော သဲနုန်းအားလုံးကို ဦးစွာဖယ်ရှားပြီး အကွာအဝေးအတွင်း သဲနုန်းများကို ပြုပြင်ရမည်။ ၎င်းက တစ်ရက်ခန့်ကြာမည်ဖြစ်ပြီး သူတို့၏ 24 နာရီ စာမေးပွဲအချိန်က 24 ရက် ကျော်လွန်သွားမည်ဖြစ်သည်။

နောက်ဒုတိယအဆင့်မှာ ကုန်တိုက်တွင်ဝယ်ထားသော ခြံစည်းရိုးဖြင့် အကာအရံကို ပြုလုပ်ကာ သဲနုန်းများကိုရပ်တန့်ရန် စက်ဝိုင်းပုံစံဖြင့် ကာရံကာ ရှေ့ကိုဆက်သွားရန်ဖြစ်သည်။ ဤအဆင့်ကို 2 ရက်/ 48 နာရီအဖြစ် သီးသန့်ထားပြီး စာမေးပွဲအချိန်က 48 ရက်အဖြစ် ပြောင်းလဲသွားမည်။

ဤအဆင့်နှစ်ဆင့်ကို 72 ရက်တာကာလအထိ ပေါင်းထည့်သည်။

တတိယအဆင့်သည် အရေးကြီးဆုံးဖြစ်ပြီး အရှည်ဆုံးဖြစ်သည်။ သူတို့သည် သဲခုံများကို အဆင့်သတ်မှတ်ရန်၊ ကုန်တိုက်တွင် ဝယ်ယူထားသော ပျိုးပင်များကို ဧရိယာကြီးများတွင် စိုက်ပျိုးရန်နှင့် ဧရိယာအတွင်းရှိ ဂေဟစနစ်ပတ်ဝန်းကျင်ကို မြင့်တင်ရန်အတွက် အပင်များကို အသုံးပြုရန် လိုအပ်ပြီး 4 ရက်မှ 5 ရက်ခန့်ကြာမြင့်မည်ဖြစ်သည်။

ကျန်အချိန်များတွင် သူတို့သည် အားနည်းသောအချက်များကို စုစည်းပြီး ပရောဂျက်ကို ကြည့်ရှုနိုင်သည်။

စုစုပေါင်းသင်တန်းစာမေးပွဲအချိန်သည် 365 ရက် (သူတို့တွင် 365 နာရီသာရှိသည်) ထို့ကြောင့်နာရီတိုင်းက တန်ဖိုးမဖြတ်နိုင်အောင် ဖြစ်လာသည်။ အစီအစဥ်ကို အပြီးသတ်ပြီးနောက် လင်းမန့်လော်က အလုပ်တာဝန်ကို ချက်ချင်းစတင်ခဲ့သည်။

ကျန်းရှောင်နျန်နှင့် ခယ်ရှောင်ပင်းတို့သည် လယ်မြေအနီးရှိ သဲနုန်းရှင်းလင်းရေးတာဝန်ခံများဖြစ်သည်။ ကျန်းရှောင်နျန်တွင် မြေတူးစက်တစ်ခုရှိသောကြောင့် ရှင်းလင်းရေးလုပ်ရန် ပိုအဆင်ပြေပြီး ခယ်ရှောင်ပင်းက လမ်းရှာဖွေခြင်းနှင့် အချက်အလက်တိုင်းတာခြင်းအတွက် တာဝန်ယူနိုင်ပါသည်။

လျှိုကျောက်ချင်း၊ ရွှီယိရှန်း၊ ကျိုဖုန်း၊ ရှင်းယန်၊ ယွဲ့ရှင်းဝမ်နှင့် ကျန်းဖျင်စစ်တို့ ယောင်္ကျားလေး 6 ယောက်သည် ကြီးမားသောဧရိယာတွင် ဓာတုသဲပြုပြင်ခြင်းအတွက် တာဝန်ရှိသည်။ သဲနှင့် ဖုန်မှုန့်များ စီးဝင်ခြင်းမှ တားဆီးရန် မာကျောသော အကာအကွယ်တစ်ခုကို သူတို့တွေ ဖန်တီးရန် လိုအပ်သည်။

မိန်းကလေး လေးယောက်သည် နောက်အဆင့်အတွက် ပြင်ဆင်ဖို့ ခြံစည်းရိုးတွေ ဆောက်နေကြသည်။

အလုပ်ခွဲပြီးတာနဲ့ လူတိုင်းက ကိုယ့်အလုပ်ကိုယ် စလုပ်ကြသည် 

ကျန်းရှောင်နျန်နှင့် ခယ်ရှောင်ပင်း၏ "စက်မှုအဖွဲ့"က စတင်ဦးဆောင်ခဲ့သည်။ ကျန်းရှောင်နျန်က မြေတူးစက်ကို မောင်းလာပြီး ခယ်ရှောင်ပင်းက ရှောင်ထူကို ခေါ်ခဲ့သည်။ နှစ်ယောက်သား လယ်မြေအနားသို့ ပြေးသွားကြပြီး ခယ်ရှောင်ပင်းက ရှောင်ထူအား စက်ဝိုင်းပုံစံ ရေဒါစကင်န်ဖတ်ခိုင်းပြီး 3D သုံးဖက်မြင် မော်ဒယ်ဂရပ်ဖစ်ကို ဖန်တီးပြီးနောက် လင်းမန့်လော်သည် ၎င်းကို ဂရုတစိုက် ကြည့်ရှုပြီး အချက်အလက်ကို အတူတကွ တွက်ချက်ရန် ကျန်းဖျင်စစ်ကို တောင်းဆိုခဲ့သည်။

နောက်ဆုံးတော့ လယ်မြေနဲ့ မီတာ 50 အကွာမှာ လေအကာအရံတံတိုင်း ဆောက်ဖို့ ဆုံးဖြတ်လိုက်သည်။

ကျန်းရှောင်နျန်သည် ဧရိယာအတွင်းရှိ သဲနုန်းများအားလုံးကို ဖယ်ရှားရန်အတွက် မြေတူးစက်ကို အသုံးပြုခဲ့သည်။ ယွဲ့ရှင်းဝမ်သည် ကုန်တိုက်မှ ကတ္တရာဒြပ်ပေါင်းများကို စတင်ဝယ်ယူခဲ့သည်။ သူက အဖွဲ့ခေါင်းဆောင်ဖြစ်ပြီး ဤသင်တန်းအတွက် "အထူးရန်ပုံငွေ" သည် သူ့လက်ထဲတွင်ရှိသည်။ ကုန်ပစ္စည်းတစ်ခုအတွက် ရန်ပုံငွေများကို အလိုအလျောက် ဖြတ်တောက်နိုင်ပြီး ဤနည်းဖြင့် ဝယ်ယူခြင်းက အလွန်အဆင်ပြေသည်။ အနည်းဆုံး ပစ္စည်းများဝယ်ရန် အလုပ်ကိစ္စများကို သက်သာစေပါသည်။

လေကာကွယ်ခြင်းနှင့် သဲပြုပြင်ခြင်းအတွက် သူတို့ကို 1 ကီလိုမီတာ ရှည်လျားသော ဧရိယာပေးထားသည်။

ယွဲ့ရှင်းဝမ်သည် ဝယ်ယူထားသော ကတ္တရာများ၊ ခြံစည်းရိုးများ၊ သံဆူးကြိုးများနှင့် အခြားပစ္စည်းများကို အလယ်တွင် "ပစ္စည်းရုံ" အဖြစ် တည်ဆောက်ခဲ့သည်။ သူနှင့် ကျန်းဖျင်စစ်သည် အလယ်မှ ရှေ့သို့ ရွေ့သွားကာ လျှိုကျောက်ချင်းနှင့် ရွှီယိရှန်းတို့သည် အရှေ့ဘက်စွန်းသို့ သွားပြီး၊ ကျိုဖုန်းနှင့် ရှင်းယန်တို့သည် အနောက်ဘက်သို့ သွားကြကာ အဖွဲ့သုံးဖွဲ့က တစ်ချိန်တည်းမှာ စတင်လုပ်ဆောင်ကြသည်။

သာမန်အလုပ်သမားများဖြင့် အစားထိုးမည့် အကြီးစားပရောဂျက်အတွက် 24 နာရီအတွင်း လုံးဝပြီးမြောက်မည်မဟုတ်ပါ။

သို့ပေမဲ့ သူတို့လက်ထဲမှာ စွမ်းရည်များရှိသည်။ ယွဲ့ရှင်းဝမ်၏ "အလင်းကဲ့သို့လျင်မြန်ခြင်း" အဖွဲ့လိုက်အရှိန်မြင့်တင်ခြင်းသည် 15 မိနစ်တိုင်းတွင် လူတိုင်းအတွက် အလွန်အဆင်ပြေစေပြီး ၎င်းသည် လူတိုင်းအတွက် အထောက်အပံ့များ အခေါက်ခေါက်အခါခါရရှိရန် အချိန်များစွာကို သက်သာစေရုံသာမက လူတိုင်းအားစိုက်ထုတ်မှုကိုလည်း များစွာသက်သာစေပါသည်။

သုတေသနအဖွဲ့ chat channel တည်ရှိနေတာကြောင့် အချင်းချင်း ဝေးနေရင်တောင် ကျယ်ကျယ်လောင်လောင် အော်နေစရာ မလိုဘူး။

ဥပမာအားဖြင့် ရွှီယိရှန်းသည် ပျင်းရိပြီး သုတေသနအဖွဲ့ chat channel တွင် တိုက်ရိုက် စာရိုက်ခဲ့သည်။

"ဂျူနီယာညီလေးဖျင်စစ်… ကတ္တရာစည် 6 လုံးကို ဒီနေရာမှာ တန်းစီပြီး ချပေးပါဦး"

ကျန်းဖျင်စစ်က "အင်း" ဟူသော စကားလုံးကို ပေးပို့ပြီး သူ၏ညာလက်ကိုမြှောက်လိုက်သောအခါ ကတ္တရာစည် 6 လုံးက လေထဲတွင် သပ်သပ်ရပ်ရပ် ပျံဝဲနေတာကို အားလုံးတွေ့လိုက်ကြပြီး ရွှီယိရှန်း၏ခြေရင်းသို့ အခိုင်အမာ ဆင်းသက်လာကြသည်။

ရွှီယိရှန်းက လေးလေးနက်နက် ပြုံးပြီး ပြောလိုက်သည်။ 

"ကျေးဇူးတင်ပါတယ်"

လျှိုကျောက်ချင်းက အကူအညီမဲ့နေပြီး ပြောလိုက်သည်။

"မင်းမှာ နည်းလမ်းသေးတာပဲ"

ကုန်ပစ္စည်းပေးပို့ခြင်းအတွက် ဤဖြတ်လမ်းကို ရှာဖွေတွေ့ရှိပြီးနောက် ကျိုဖုန်းကလည်း ယဉ်ကျေးစွာပြောခဲ့သည်။

"ငါလည်း ဖျင်စစ်ကို ဒုက္ခပေးရဦးမယ်"

ကျန်းဖျင်စစ်: "အင်း"

နောက်ထပ် ကတ္တရာစည် 6 လုံးသည် အနောက်ဘက်သို့ ပျံသန်းလာပြီး ကျိုဖုန်း၏ခြေရင်းသို့ ဆင်းသက်လာသည်။

ယွဲ့ရှင်းဝမ်သည် လေထဲတွင် သပ်ရပ်စွာ ပျံဝဲနေသော သံစည်များကို တစ်ချက်ကြည့်လိုက်ပြီး အပြုံးဖြင့် ပြောခဲ့သည်။

"ဖျင်စစ်က တကယ်ကို အသန်မာဆုံးပစ္စည်းပို့သူပဲ"

ချင်လု၏ ကိုင်တွယ်မှုသည် အကြိမ်အရေအတွက် ကန့်သတ်ထားပြီး ကျောက်ထုလွှာကိုသာ ပြောင်းလဲနိုင်သည်။ ကျန်းဖျင်စစ်၏စွမ်းရည်များက ပို၍ပြောင်းလွယ်ပြင်လွယ်ပြီး ဤနည်းဖြင့် လူတိုင်းသည် အရာဝတ္ထုများကို ရွေ့လျားရန် ခေါက်တုံ့ခေါက်ပြန် ပြေးစရာမလိုဘဲ ထိရောက်မှုကို နှစ်ဆတိုးစေသည်။

တစ်ချိန်တည်းမှာပင် မိန်းကလေးအများအပြားသည် အခြေစိုက်စခန်းအနီး မြေပြင်ပေါ်တွင် ထိုင်ကာ ခြံစည်းရိုးများကို အတူတကွ ယက်လုပ်ကြသည်။ လင်းမန့်လော်က ကိုယ်တိုင် မယက်ဖူးသော်လည်း တချို့သော ပစ္စည်းများကို သူမဖတ်ပြီး ခြံစည်းရိုး၏ အသွင်အပြင်ကို ယောင်ဝါးဝါး မှတ်မိနေသည်။ သူမသည် ကြိုးတစ်ချောင်းကို ကြိုးထိုးရန် ကြိုးစားခဲ့ရာမှ ၎င်းသည် အလွန်ဆင်တူကြောင်း တွေ့ရှိသောကြောင့် ကိုနည်းလမ်းကို ကျန်သုံးယောက်အား သင်ကြားပေးခဲ့သည်။

မိန်းကလေးများသည် ဉာဏ်ကောင်းပြီး လျင်မြန်စွာ သင်ယူတတ်မြောက်ကြသည်။ ကုန်တိုက်မှဝယ်သော ခြံစည်းရိုးများကို ပိုက်ကွန်များအဖြစ် ဖြည်းညှင်းစွာ ယက်လုပ်ကာ သံကြိုးများဖြင့် ချိတ်ဆက်ခဲ့သည်...

ကျန်းရှောင်နျန်သည် သဲနုန်းများကို ရှင်းလင်းပြီးနောက်တွင် မြေတူးစက်ကို ထပ်မံမောင်းနှင်ကာ လေအကာအရံနံရံတစ်ခုတည်ဆောက်ရန် ကီလိုမီတာ 1 ရှည်သော မြောင်းတစ်ခုကို တူးဖော်ခဲ့သည်။ ခယ်ရှောင်ပင်းသည် ထောင့်ကို လမ်းကြောင်းမှ မထွက်အောင် တိုင်းတာရန် ကူညီပေးခဲ့သည်။

လူတစ်စုက အလွန်အလုပ်များနေခဲ့သည်။

ဤကမ္ဘာသည် "ပတ်ဝန်းကျင်ညစ်ညမ်းခြင်း" ကဲ့သို့မဟုတ်သော်လည်း သဲမုန်တိုင်းရာသီဥတုအောက်တွင် လေဝင်လေထွက်မရှိဘဲ အဆက်မပြတ်လေနှင့် သဲများ၏လွှမ်းမိုးမှုကြောင့် သူတို့အတွက် အလုပ်ရရန် အလွန်ခက်ခဲနေဆဲဖြစ်သည်။ အဝတ်အစားများနှင့် ဆံပင်များကို သဲများဖြင့် ဖုံးအုပ်ထားပြီး နှစ်နာရီကြာမျှသာ အလုပ်လုပ်ပြီးနောက် လူတိုင်းက မောပန်းကာ အသက်ရှူမဝ ဖြစ်နေကြသည်။

မိန်းကလေးအများအပြားသည် လက်တွင် ဒဏ်ရာများ ရရှိခဲ့ကာ တချို့မှာ ခြံစည်းရိုးတွင် ထိုးခံရကာ တချို့မှာ ကြိုးဖြင့် ပြတ်ရှကာ သွေးယိုစီးမှုများ ရှိနေသည်။ လင်းမန့်လော်က သုတေသနအဖွဲ့ chat channel တွင် စာရိုက်ခဲ့သည်။

"အားလုံး ခဏအနားယူရအောင်… စီနီယာအစ်ကိုလျှို… ကျွန်မ အသုံးပြုဖို့ ပတ်တီးနည်းနည်းငှားချင်တယ်"

လျှိုကျောက်ချင်းသည် မိန်းကလေးများ၏လက်တွင် ဒဏ်ရာများကိုမြင်လိုက်ပြီးနောက် ပတ်တီးစအလိပ်ကြီးကို ထုတ်ကာ လင်းမန့်လော်အား ပေးလိုက်သည်။ 

"မင်းတို့တွေသတိထားကြ… နောက်ကျရင် မင်းတို့လက်တွေကို ပတ်တီးအလွှာနဲ့ရစ်ပတ်ထားလိုက်… အဲဒါကို မင်းတို့လက်ချောင်းတွေ မနာတော့ဘူး"

ဒါက အကြံကောင်းတစ်ခုဖြစ်သည်။ လင်းမန့်လော်သည် လူတိုင်းကို လက်နှစ်ဖက်က လက်ချောင်းများပေါ်တွင် ပတ်တီးစအလွှာဖြင့် အကာအကွယ်လက်အိတ်များကဲ့သို့ စည်းထားရန် ချက်ချင်းပြောလိုက်သည်။

ယွဲ့ရှင်းဝမ်သည် လူတိုင်းကို ရေသောက်ပြီး အနားယူဖို့ ခေါ်လိုက်ကာ ချောကလက်တစ်ခုစီပေးပြီး တိုးတက်မှုအကြောင်း မေးသည်။

"အခြေအနေ ဘယ်လိုရှိလဲ"

ကျိုဖုန်း: "ငါ့ဘက်မှာ သုံးပုံတစ်ပုံတော့ ပြီးသွားပြီ"

လျှိုကျောက်ချင်းက ရွှီယိရှန်းကို ကြည့်ပြီး အပြုံးဖြင့် ပြောလိုက်သည်။

"ငါတို့ဘက်ကတော့ ပိုမြန်တယ်… ဂျူနီယာညီလေးရွှီက mitosis ကိုအသုံးပြုပြီး ခန္ဓာကိုယ်ငါးခုခွဲပြီးတော့ ကတ္တရာငါးပုံးကို သယ်ပြီး နေရာအနှံ့ ဖြန်းနေတယ်… အခု တစ်ဝက်လောက်ပြီးသွားပြီ"

ယွဲ့ရှင်းဝမ်: "ဖျင်စစ်က ကတ္တရာပုံးကို လေထဲ တိုက်ရိုက်ပစ်တင်ပြီး လှန်လိုက်ပြီးတော့ တည့်တည့်ရွေ့ပြီး တောက်လျှောက်ဖြန်းလိုက်တယ်"

ကျိုဖုန်းက အကူအညီမဲ့စွာ ပခုံးတွန့်လိုက်သည်။

"မင်းတို့အားလုံးမှာ ကူညီနိုင်တဲ့အထူးစွမ်းရည်တွေရှိပြီး ငါနဲ့ ရှင်းယန်ကတော့ အဲဒါကို ဖြည်းဖြည်းချင်း ရိုးရိုးသားသားပဲ လုပ်နိုင်တယ်"

ခယ်ရှောင်ပင်းက ပြေးလာပြီးပြောသည်။

"ကျွန်တော် ကူညီပေးမယ်… ရှောင်နျန်ရဲ့တွင်းက တူးလို့ပြီးပြီ… ကျွန်တော် ဘာမှလုပ်စရာမရှိဘူး… ကျွန်တော်က ရှောင်ထူကို ကတ္တရာပုံးကို အရှေ့ဆီ ဆွဲသွားခိုင်းလိုက်မယ်… အဲဒါက ပုံးကို လက်နဲ့ကိုင်ပြီး အရှေ့ကို တစ်လှမ်းချင်းတိုးနေတာထက် ပိုကောင်းတယ်" 

ကျိုဖုန်း၏ မျက်လုံးများ တောက်ပလာသည်။

"ဟုတ်သားပဲ… ငါ ရှောင်ထူကို မေ့သွားတယ်… အဲဒါက ငါတို့ထက် ပိုမြန်တယ်"

ခဏတာ အနားယူပြီးနောက် လူတိုင်း အလုပ်ပြန်လုပ်ကြသည်။

ကျန်းရှောင်နျန်သည် ရွှီယိရှန်းနှင့် လျှိုကျောက်ချင်းတို့ကိုကူညီရန်အရှေ့ဘက်သို့သွားခဲ့ပြီး ခယ်ရှောင်ပင်းသည် ကျိုဖုန်းနှင့် ရှင်းယန်တို့ကိုကူညီရန် အနောက်ဘက်သို့သွားခဲ့ကာ အလယ်တွင်ကြီးမားသောဧရိယာသည် ယွဲ့ရှင်းဝမ်နှင့် ကျန်းဖျင်စစ်အတွက်သီးသန့်ထားဆဲဖြစ်သည်။

သို့သော် ကျန်းဖျင်စစ်သည် နှစ်ယောက်တည်းကို ထိပ်ဆုံးတွင်နေရာယူထားဆဲဖြစ်သည်။ သူ တစ်ချိန်တည်းတွင် လေထဲ၌ ရွေ့လျားရန် သံစည်ပေါင်းများစွာကို ထိန်းချုပ်နိုင်သည်။ ပထမဦးစွာ သံစည်များကို ထောင့်တစ်နေရာတွင် စောင်းပြီး လေထဲသို့ လွှင့်တင်ကာ လူတစ်ယောက်က စည်ကိုထမ်းပြီး ရှေ့သို့လောင်းချသကဲ့သို့ ရှေ့သို့ ဖြည်းညှင်းစွာ ရွေ့လျားသွားသည်။ ယွဲ့ရှင်းဝမ်က ရွှေ့စရာပင်မလိုဘဲ သံစည်ကို သူ့ဆီ တိုက်ရိုက် ပေးရုံပါပဲ။

ခယ်ရှောင်ပင်းသည် "တိုက်ပွဲ" တွင်ပါဝင်ပြီးနောက် ကျိုဖုန်းနှင့် ရှင်းယန်တို့အဖွဲ့၏စွမ်းဆောင်ရည်က နှစ်ဆတိုးပြီး ရှောင်ထူသည် သီချင်းဆိုနေစဉ် ရှေ့သို့ပြေးကာ သံစည်တစ်ပုံးကိုဆွဲယူပြီး ၎င်း၏ခြေထောက်အောက်ရှိ ဘီးလုံးဖြင့် ကွင်းပြင်တွင် ခေါက်တုံ့ခေါက်ပြန် မျက်စိတစ်မှိတ်အတွင်း ပြေးနိုင်သည်။ 

မှောင်လာသောအခါတွင် ဓာတုသဲပြုပြင်ခြင်း လုပ်ငန်းအားလုံး ပြီးမြောက်ခဲ့သည်။

အလုပ်စတင်ချိန် နေ့လယ်မှ နောက်ဆုံးပြီးသည်အထိ သူတို့တွေ 6 နာရီသာကြာခဲ့သည်။

သူတို့ရှေ့မှာ တဖြည်းဖြည်း ခိုင်မာလာသော မြေသားမျက်နှာပြင်ကြီးကို ကြည့်လိုက်ရင်း လင်းမန့်လော်က မယုံနိုင်အောင်ဖြစ်သွားသည်။

"ငါက ဒါကို 24 နာရီလို့ စီစဉ်ထားတာ… အားလုံး 6 နာရီအတွင်း ပြီးအောင်လုပ်လိုက်တာလား"

ယွဲ့ရှင်းဝမ်က ပြုံးကာ ပြောသည်။

"စီနီယာအစ်မမန့်လော်က ကျွန်တော်တို့ရဲ့စွမ်းရည်တွေကို လျစ်လျူရှုထားခဲ့လို့ပါ… ကျွန်တော်တို့က လူ 12 ယောက်ပါတဲ့ အင်ဂျင်နီယာအဖွဲ့ဖြစ်ပေမဲ့ ကျွန်တော်တို့ရဲ့ တကယ့်လုပ်နိုင်စွမ်းက လူ 120 ထက်ပိုများတယ်"

ရွှီယိရှန်းက mitosis နဲ့ ပြေးလာပြီး အပြုံးဖြင့် ပြောသည်။

"ဒီလိုမျိုးလုပ်ရတဲ့ ဖျင်စစ်နဲ့ ရှောင်ထူအတွက်တော့ အားထုတ်မှုအနည်းဆုံးဖြစ်မှာပေါ့… ငါက သံစည်တွေကိုသယ်ရပြီး ငါ့လက်တွေ ပြုတ်ထွက်လုမတတ်ပဲ"

လျှိုကျောက်ချင်းက ပြောလိုက်သည်။

"မင်းက နစ်နာချင်ယောင်ဆောင်နေသေးတယ်… သံစည်လှိမ့်သွားပြီး အဆုံးထိပျံသန်းဖို့ မင်းလည်း DNA helix ကို တိုက်ရိုက်သုံးခဲ့တာ မဟုတ်ဘူးလား"

ရွှီယိရှန်းက ပေါ့ပေါ့ပါးပါး ချောင်းဟန့်လိုက်ပြီး အကြောင်းအရာကို ပြောင်းလိုက်သည်။

"မိန်းကလေးတွေဘက်က ခြံစည်ရိုးက အခြေအနေဘယ်လိုရှိလဲ"

လင်းမန့်လော်: "ဒါက ကိုယ်တိုင်လုပ်ရတာ စွမ်းရည်သုံးလို့မရဘူး"

ယွဲ့ရှင်းဝမ်က အကြံပြုကာ ပြောလိုက်သည်။

"အဲဒါလုပ်ဖို့ ကူညီရအောင်… စကားမစပ် လူတိုင်းအတွက် ညစာပြင်ဆင်ဖို့ စားဖိုမှူးရှင်းယန်ကို ဒုက္ခပေးရဦးမယ်" သူက ရှင်းယန်ကို ကြည့်ပြီး အပြုံးဖြင့် ပြောလိုက်သည်။ "‌ရေသန့်စင်ဖို့ ငါ မင်းနဲ့အတူ လိုက်ခဲ့မယ်"

ရှင်းယန်က ပေါ့ပါးစွာ ဆိုလိုက်သည်။

"အင်း… အားလုံး ခေါက်ဆွဲခြောက်ကို ဘယ်လိုအရသာမျိုးနဲ့ စားချင်လဲ"

ခယ်ရှောင်ပင်းက သူ့ကို အံ့အားသင့်စွာ ကြည့်လိုက်သည်။ ရှင်းယန်က အခြားသူများ၏ ထင်မြင်ယူဆချက်များကို တောင်းဆိုတာ ခယ်ရှောင်ပင်း ပထမဆုံးအကြိမ် ကြားဖူးခြင်းဖြစ်သည်။

လျှိုကျောက်ချင်း: "အမဲသားခေါက်ဆွဲပြုတ်ကလွဲရင် ဘာမဆို ငါစားနိုင်တယ်"

ရွှီယိရှန်းက သူ့လက်ကို မြှောက်လိုက်ပြီး ပြောသည်။

"ငါ ပင်လယ်စာခေါက်ဆွဲပြုတ် လိုချင်တယ် ကျေးဇူးပါ"

အခြားသူများကလည်း သူတို့၏အရသာကို တင်ပြကြပြီး ရှင်းယန်က ပြောလိုက်သည်။

"ကောင်းပြီ… ငါ အိုးသုံးလုံးချက်ပြီး ကျက်တဲ့အခါ အားလုံးကို ဝေမျှလိုက်မယ်"

ယွဲ့ရှင်းဝမ်နှင့် ရှင်းယန်တို့သည် ညစာပြင်ရန် အခြေစိုက်စခန်းသို့ ပြန်လာခဲ့ကြပြီး ခယ်ရှောင်ပင်းက ခိုးဝင်ကာ ပေါင်းခံကိရိယာအား အမြန်တပ်ဆင်နေသော ရှင်းယန်ကို တွေ့လိုက်ရသည်။ ယွဲ့ရှင်းဝမ်က ပုလင်းထဲကို မိုးရေများထည့်ပြီး သူက ရေယူပြီး ပုလင်းသေးသုံးလုံးထဲကို ထည့်ကာ ခေါက်ဆွဲခြောက်ထုပ်များကိုဖွင့်ပြီး ထည့်လိုက်သည်။

ခယ်ရှောင်ပင်းက မနေနိုင်ဘဲ သူ့ကို သတိပေးလိုက်သည်။

"ဟင်းခတ်အမွှေးအကြိုင်ထုပ်ကို ထည့်ဖို့ မမေ့နဲ့"

အဖုံးပိတ်တော့မည့် ရှင်းယန်: "…"

မေ့လုနီးပါးပဲ…

ယွဲ့ရှင်းဝမ်က ပြုံးကာ ပြောလိုက်သည်။

"ရှောင်ခယ်က ရှင်းယန်ရဲ့ဟင်းချက်စွမ်းရည်ကို အယုံအကြည့်မရှိပုံရတယ်… ဒါကြောင့် သူကိုယ်တိုင် ကြီးကြပ်ဖို့ ရောက်ခဲ့တာပဲ"

ခယ်ရှောင်ပင်း: "ရှင်းယန်ရဲ့လက်တွေက ဓာတ်ခွဲခန်းမှာ စမ်းသပ်ဖို့ ပိုသင့်တော်တယ်… ချက်ပြုတ်တာက သူ့အတွက် အရမ်းခက်ခဲတယ်"

ရှင်းယန်က ခဏလောက် နှုတ်ဆိတ်နေခဲ့သည်။

"ငါက ချက်ပြုတ်ရာမှာ တကယ်မကောင်းဘူး"

ခယ်ရှောင်ပင်းက သူ့မျက်မှန်ကို ချိန်ညှိပြီး အပြုံးဖြင့် ဆိုသည်။

"ငါက အရမ်းကောင်းတယ်… ကံမကောင်းစွာပဲ မင်းရဲ့ပေါင်းခံပုလင်းက ငါအတွက် ချက်ပြုတ်ဖို့ နေရာမရှိဘူး… ငါလုပ်တဲ့ ဝက်နံရိုးပြုတ်နဲ့ ကိုလာကြက်တောင်ပံတွေ အရမ်းအရသာရှိတယ်"

ယွဲ့ရှင်းဝမ် သူ့လက်ကို မြှောက်လိုက်ပြီး ပြောသည်။

"ဒါကိုတော့ ငါထောက်ခံတယ်… အစားအသောက်မက်သူတစ်ယောက်အနေနဲ့ ရှောင်ခယ်က ချက်ပြုတ်နည်းကို အရမ်းကျွမ်းကျင်တယ်… အရင်တုန်းက ငါတို့ကျောင်းသားတွေ ညစာအတူစားတဲ့အခါ ငါတို့ကိုယ်တိုင် ချက်ပြုတ်ဖူးတယ်… ခယ်ရှောင်ပင်းက စားဖိုမှူးဖြစ်ပြီး ချီးကျူးခံရတယ်"

ထိုအချိန်တွင် ကျန်းဖျင်စစ်လည်း ပုလင်းသုံးလုံးထဲတွင် ချက်ပြုတ်ထားသည့် ခေါက်ဆွဲကိုကြည့်ကာ အသံတိုးတိုးဖြင့် ပြောလိုက်သည်။ 

"ခြံစည်းရိုးကပြီးလုနီးနေပြီ… အပြင်ကအမှောင်ထဲမှာ ဆက်လုပ်လို့မရဘူး… လူတိုင်းကို အရင်အနားယူခိုင်းပြီး မနက်ဖြန်မှဆက်လုပ်ဖို့ အကြံပြုချင်တယ်"

ယွဲ့ရှင်းဝမ်က သုတေသနအဖွဲ့ chat channel တွင် ချက်ချင်း စာရိုက်ခဲ့သည်။

"အားလုံး အနားယူဖို့ အခြေစိုက်စခန်းထဲဝင်လာခဲ့ကြ… ဒီနေ့အတွက် အလုပ်နားပြီး ညစာစားရအောင်"

အလုပ်များသည့်နေ့လယ်ခင်းအပြီးမှာ အားလုံးက အလွန်ပင်ပန်းနေကြသည်။ အများအားဖြင့် သူတို့သည် အသင့်စားခေါက်‌ဆွဲခြောက်များကို မကြိုက်ကြဘဲ ယခုအခါ အနံက ထူးထူးခြားခြား ကောင်းမွန်နေသည်။ ဒီနေ့ ဈေးဝယ်ခဲ့သောလေးယောက်အုပ်စုက တစ်ခါသုံးစက္ကူပန်းကန်နှင့် တစ်ခါသုံးတူချောင်းများဝယ်ခဲ့ပြီး သူတို့က ရှင်းယန်၏ဖန်ပုလင်းဖြင့် စားစရာမလိုတော့ဘူး။ 

ဧည့်ခန်းထဲတွင် လူတိုင်းထိုင်နေကြပြီး စက္ကူပန်းကန်လုံးတစ်လုံးစီကိုင်ကာ အရသာအမျိုးမျိုးရှိသော ခေါက်ဆွဲခြောက်များကို မြိန်ရေရှက်ရေစားကြသည်။ ဒီလို "အာဟာရမဖြစ်သောအစားအစာ"ကို အမြဲမုန်းတီးသော ကျန်းဖျင်စစ်ပင်လျှင် ယနေ့တွင် မည်သည့်ထင်မြင်ချက်မှ ထုတ်ဖော်ပြောဆိုခြင်း မရှိခဲ့ပါ။ သူက ခေါက်ဆွဲကို လျင်မြန်စွာစားပြီး ဗိုက်ဆာနေမှန်း သိသာပါသည်။

သင်တန်းတွေ အများကြီး ပြီးသွားပြီးနောက် အားလုံးက အသင့်စားခေါက်ဆွဲခြောက် တစ်ပန်းကန် စားရတာ အလွန်ပျော်ရွှင်သလို ခံစားရသည်။

စာကြည့်တိုက်၏ နှိပ်စက်ညှဉ်းပန်းမှုအောက်မှာ သူတို့၏လိုအပ်ချက်များက တကယ်ကို နိမ့်ပါးပြီးရင်းနိမ့်ပါးလာခဲ့သည်…

#TK