Volume 2 : နှစ်ယောက်တွဲဖြတ်ကျော်ခြင်း
Chapter 51 (3 of Spades – ငွေကြေးအကျပ်အတည်း ၁၁၊ လျှို့ဝှက်ဆန်းကြယ်သောကောင်လေး)
ယွီဟန်ကျန်းက ရှောက်လုံနှင့် ရှောက်ချင်းကော်တို့ကို ဂိုဒေါင်မှ ပစ္စည်းများအား စောင့်ကြပ်နေခိုင်းခဲ့ပြီး သူက ဆယ်ကျော်သက်ကောင်လေးနောက်ကို အမြန်လိုက်သွားခဲ့သည်။
ရှောက်လုံနှင့် ရှောက်ချင်းကော်တို့သည် အဖွဲ့ခေါင်းဆောင်ယွီ၏ဆုံးဖြတ်ချက်အပေါ် သဘောထားတစ်စုံတစ်ရာမရှိခဲ့ပေ။ ထို့အပြင် 'ခြေရာခံခြင်း' သည် အဖွဲ့ခေါင်းဆောင်ယွီ၏ကျွမ်းကျင်မှုဖြစ်သည်။ အကယ်၍ သူတို့လိုက်သွားပြီး အလွန်နှေးကွေးပါက ဆယ်ကျော်သက်ကောင်လေး၏ အာရုံစိုက်မှုကို ဆွဲဆောင်နိုင်မည်ဖြစ်သည်။
ညဉ့်နက်သန်းခေါင်မှာ လမ်းများက အလွန်တိတ်ဆိတ်နေသည်။
ယွီဟန်ကျန်းသည် အလှဆင်ပစ္စည်းဈေးမှ ထွက်သွားပြီး မကြာမီ ဆယ်ကျော်သက်ကောင်လေးကို တွေ့ရှိခဲ့သည်။
လမ်းမီးများ အလင်းရောင်အောက်တွင် ဆယ်ကျော်သက်ကောင်လေးနှင့် သူ၏ သုံးဘီးဆိုင်ကယ်တို့သည် မြေပြင်ပေါ်တွင် အရိပ်တစ်ခု ကျရောက်နေသည်။ သူ၏ ခန္ဓာကိုယ်ကြံ့ခိုင်မှုမှာ အလွန်သာမာန်ဖြစ်ပြီး ရိက္ခာအပြည့်ဖြင့် သုံးဘီးဆိုင်ကယ်စီးရန် အခက်အခဲတချို့ရှိပုံရသည်။ ယွီဟန်ကျန်းသည် သူ ပျံသန်းနေသကဲ့သို့ လမ်းလျှောက်လာပြီး မကြာမီ ဆယ်ကျော်သက်ကောင်လေးနှင့် မီတာ 50 အကွာအဝေးကို လိုက်သွားခဲ့သည်။
ဆယ်ကျော်သက်ကောင်လေးသည် တစ်ခုခုကို ခံစားမိသွားပုံရပြီး သူ့နောက်သို့ အချက်ပေးသည့်ပုံစံဖြင့် ခေါင်းကို လှည့်လိုက်သည်။
ယွီဟန်ကျန်းသည် လမ်းမီးများ အရိပ်ထဲသို့ ချက်ချင်း ရှောင်ထွက်သွားသည်။
ဆယ်ကျော်သက်ကောင်လေးသည် သူ့နောက်တွင်မည်သူမျှမတွေ့သဖြင့် သုံးဘီးဆိုင်ကယ်ကို ဆက်လက်စီးနင်းကာ ရှေ့သို့လှည့်သွားခဲ့သည်။ သူသည် ခပ်ဝေးဝေးသို့ ရွှေ့ကာ တောထဲ၌ အစာရှာရန် ခိုးထွက်နေသော တိရစ္ဆာန်လေးတစ်ကောင်ကဲ့သို့ သူ့ပတ်ပတ်လည်ကို လှည့်ကြည့်လိုက်သည်။
ယွီဟန်ကျန်းက သူ့နောက်ကို တိတ်တဆိတ် လိုက်လာခဲ့သည်။
အကွာအဝေးတစ်ခုအကြာတွင် ဤလူသည် ဆင်ခြေဖုံးအရပ်ဆီသို့ အမှန်တကယ် ဦးတည်နေကြောင်းကို ယွီဟန်ကျန်းက မကြာမီ တွေ့ရှိခဲ့သည်။ ယွီဟန်ကျန်းသည် ဤနေရာအား လွတ်မြောက်ရာလမ်းကြောင်းအဖြစ် အသုံးပြုရန်စီစဉ်ကတည်းက သူသည် ဆင်ခြေဖုံးရပ်ကွက်များရှိ ဆောက်လုပ်ရေးဆိုက်နှင့် ပတ်သက်၍ အလွန်စိုးရိမ်သောကြောင့် ဤဦးတည်ချက်ကို အလွန်ရင်းနှီးခဲ့သည်။ ဆယ်ကျော်သက်ကောင်လေးကလည်း ဆောက်လုပ်ရေးဆိုက်ကို သွားခဲ့တာလား။
အနောက်မြောက်ဘက်တွင် ဆောက်လုပ်ရေးဆိုက်သာရှိပြီး အနီးပတ်ဝန်းကျင်တွင် အိမ်မရှိပေ။
ယွီဟန်ကျန်းက အနည်းငယ် မျက်မှောင်ကြုတ်သွားသည်။ ရှောက်လုံ ပြောသည့်အတိုင်း ဤဆယ်ကျော်သက်သည် သူတို့အား စောင့်ကြည့်နေခဲ့ပြီး လွန်ခဲ့သည့်ရက်အနည်းငယ်က သူ ဆောက်လုပ်ရေးဆိုက်သို့ သွားနေကြောင်း တွေ့ရှိခဲ့တာ ဖြစ်ကောင်းဖြစ်နိုင်သည်။
သုံးဘီးဆိုင်ကယ်စီးသည့် ဆယ်ကျော်သက်ကောင်လေးသည် လမ်းထောင့်တစ်နေရာကို ရောက်ရှိလာပြီး လမ်းဆုံလမ်းခွမှာ အရက်မူးနေသူ နှစ်ဦးကို တွေ့လိုက်သောအခါ သူက လိုက်သင့် မလိုက်သင့်ကို စဉ်းစားနေသည်။
ယောင်္ကျားလေးနှစ်ယောက်က တစ်ယောက်ပခုံး တစ်ယောက်ဖက်ကာ အော်ဟစ်နေကြသည်။ သူတို့ခြေထောက်များက အချိန်မရွေး လဲကျတော့မလို တုန်နေသည်။
ဆယ်ကျော်သက်ကောင်လေးကို မြင်ပြီးနောက် အရက်မူးနေသော ယောင်္ကျားလေးတစ်ဦးသည် သူ၏ အမှိုက်ကားကို လှမ်းဆွဲကာ အပြုံးဖြင့် ပြောလိုက်သည်။
"သူငယ်ချင်း ဝိုင်ရှိလား… ဒီည ငါအဝမသောက်ရသေးလို့… မင်းကော နည်းနည်းသောက်ချင်လား"
အခြားအရက်မူးသမားက ကောင်လေး၏လက်မောင်းကို လှမ်းဆွဲသည်။
"အဲဒီကနေဆင်းပြီး မိုးလင်းတဲ့အထိ သောက်ရအောင်"
ဆယ်ကျော်သက်ကောင်လေးသည် အရက်မူးနေသော ယောင်္ကျားလေးနှစ်ဦး ရုတ်တရက် ထွက်ပေါ်လာခြင်းကြောင့် အံ့ဩသွားသည်။ သူ့မျက်နှာက အနည်းငယ် ဖြူဖျော့နေသော်လည်း သူက အမြန်ချိန်ညှိလိုက်ပြီး ပြောခဲ့သည်။
"အစ်ကိုကြီးတို့ ကျွန်တော့်မှာ ဝိုင်မရှိဘူး… ကျွန်တော်က အမှိုက်ကောက်သမားပါ… ဟားဟား… ခင်-ခင်ဗျားတို့ ဆက်သောက်ကြပါ…"
သို့သော် အရက်မူးသူများသည် အသိစိတ်လုံးဝမရှိသဖြင့် သူ့ကို အတူတူသောက်ရန် ဆွဲခေါ်ကြသည်။ ယောင်္ကျားလေးတစ်ဦးသည် သူ၏ သုံးဘီးဆိုင်ကယ်ကို ဆွဲကိုင်ကာ အခြားတစ်ဦးမှာ လက်မောင်ကို ဆုပ်ကိုင်ထားပြီး လမ်းမလျှောက်နိုင်တော့ပေ။
တစ်မိနစ်အကြာတွင် ဆယ်ကျော်သက်ကောင်လေးက သိသိသာသာ စိတ်မရှည်တော့ပေ။
သူ့လက်ချောင်းထိပ်များက တောက်ပလာပြီး 3x3 မီတာ လေးထောင့်ကွက်က မြေပြင်ပေါ်တွင် ပေါ်လာပြီး အရက်မူးနေသော လူနှစ်ယောက်က ပိတ်မိသွားသည်။ ဆယ်ကျော်သက်ကောင်လေးက သူတို့လက်များကို ဖယ်ပြီး သုံးဘီးဆိုင်ကယ်ကို အမြန်စီးခဲ့သည်။
သူသုံးသောကတ်က 'နန်းတော်ကိုးခုလေးထောင့်ကွက်'ဖြစ်သည်။ ၎င်းသည် 2 of Diamonds လျှို့ဝှက်ခန်းအတွက် သတ်မှတ်ထားသောဆုဖြစ်ပြီး သတ်မှတ်ဧရိယာရှိမည်သူ့ကိုမဆို ကိုးစက္ကန့်ကြာ ထောင်ချောက်ဆင်နိုင်သည်။ ဒီကောင်လေးက ထွက်ပြေးဖို့ ၎င်းကိုအသုံးပြုတာ ဉာဏ်ထက်မြက်သည်။
သုံးဘီးဆိုင်ကယ်စီးနေသည့် ဆယ်ကျော်သက်ကောင်လေးသည် လမ်းထောင့်မှ ရုတ်တရက် ပျောက်ကွယ်သွားတာကို ယွီဟန်ကျန်း မြင်လိုက်ရသည်။ သူ ရှေ့ကို လျှောက်လှမ်းကြည့်တော့ ဆယ်ကျော်သက်ကောင်လေးက မီတာ 100 အကွာမှာ ရှိနေတာကို တွေ့လိုက်ရသည်။
သုံးဘီးဆိုင်ကယ်စီးနေသော သူ့အရှိန်က ဒီလောက်မမြန်ဘူး။
ယွီဟန်ကျန်းက မီတာ 50 အကွာအဝေးကို ထိန်းသိမ်းထားသည်။ ဒီဆယ်ကျော်သက်ကောင်လေးက စက္ကန့်အနည်းငယ်အတွင်း မီတာ 100 ကို ဘယ်လိုရွေ့နိုင်မှာလဲ။
နောက်အခိုက်အတန့်မှာတော့ ယွီဟန်ကျန်းက အဖြေကို သိသွားသည်။
ဆယ်ကျော်သက်ကောင်လေးက တစ္ဆေလို ရုတ်တရက် ပျောက်ကွယ်သွားပြီး လမ်း၏အဆုံးမှာ ပြန်ပေါ်လာသည်။
တယ်လီပို့ခြင်းပဲ…
ထူးဆန်းသော ကတ်အမျိုးအစားပေါင်းစုံရှိသော ဤကမ္ဘာကြီးကြောင့်သာ မဟုတ်ပါက ယွီဟန်ကျန်းသည် သရဲတစ္ဆေမြင်လိုက်သည်ဟု သေချာပေါက် ထင်မိပေလိမ့်မည်။
ညဉ့်နက်မှာ လမ်းများက အေးစက်ပြီး ဗလာဖြစ်နေသည်။ ဆယ်ကျော်သက်ကောင်လေးနှင့် သူ၏သုံးဘီးဆိုင်ကယ်သည် 'မီတာ 50 တယ်လီပို့ခြင်း'နှင့် ငါးကြိမ်ဆက်တိုက် တယ်လီပို့ပြီးနောက် ယွီဟန်ကျန်း၏ အမြင်အာရုံမှ လုံးဝပျောက်ကွယ်သွားခဲ့သည်။
ဒါက သိပ်ကို ဆန်းကြယ်လွန်းသည်။
ဆယ်ကျော်သက်ကောင်လေးက ယွီဟန်ကျန်း သူ့အားခြေရာခံနေတာကို ရှာတွေ့သွားတာ ဒါမှမဟုတ် အမူးသမားနှစ်ယောက်ကြောင့် သူသတိရှိလာပြီး ယွီဟန်ကျန်းက သူ့ကို မလိုက်မီခင် တယ်လီပို့ရန် ကတ်စွမ်းရည်ကို တိုက်ရိုက် အသုံးပြုခဲ့သည်။
ယွီဟန်ကျန်းက သူ့မျက်ခုံးကို ညင်သာစွာ နှိပ်လိုက်သည်။ ဒီနေ့က တကယ်ကို ဆိုးရွားပါသည်။ သူသည် သူခိုးတွေကို ဖမ်းဖို့ ကြိုးစားခဲ့ပြီး တစ်ဖက်က သူ့အဖွဲ့ဝင်ကိုသတ်ပြီး ထွက်ပြေးသွားသည်။
ကတ်ကမ္ဘာမှာ လူများက ပြစ်မှုတစ်ခုကို ကျူးလွန်ချင်တယ်ဆိုရင် ကမ္ဘာအစစ်ထက် ပိုလွယ်ပါလိမ့်မည်။
တယ်လီပို့ခြင်း၊ ကိုယ်ပျောက်ခြင်းနှင့် သော့၊ ပြစ်မှုကျူးလွန်ရန်အတွက် အဆင်ပြေသော ဤကတ်အမျိုးအစားများသည် လူဆိုးအုပ်စုလက်ထဲသို့ ကျရောက်ပါက ဘေးအန္တရာယ်ဖြစ်စေလိမ့်မည်။
***
ယွီဟန်ကျန်းက ဂိုဒေါင်သို့ မကြာမီ ပြန်လာခဲ့သည်။
ရှောက်လုံက သူ့မျက်နှာကို ကြည့်ကာ ရလဒ်ကို ခန့်မှန်းသည်။
"ဆယ်ကျော်သက်ကောင်လေးမှာလည်း အထူးကတ်ရှိနေတာလား" အဖွဲ့ခေါင်းဆောင်ယွီ၏ ပရော်ဖက်ရှင်နယ် ခြေရာခံနိုင်မှုဖြင့် ဆယ်ကျော်သက်ကောင်လေးသည် ထွက်ပြေးရန် အခြားနည်းလမ်းမရှိပါက ပစ္စည်းများပြည့်နေသော သုံးဘီးဆိုင်ကယ်တစ်စီးကို လိုက်မမီတာက မဖြစ်နိုင်ကြောင်း သူယုံကြည်ခဲ့သည်။
ယွီဟန်ကျန်းက ခေါင်းငြိမ့်လိုက်သည်။
"သူ့မှာ တယ်လီပို့ကတ်တစ်ခုရှိပြီး သူ့ရဲ့သုံးဘီးဆိုင်ကယ်ကိုတောင် ယူဆောင်သွားနိုင်တယ်… စက္ကန့်အနည်းငယ်အတွင်း မီတာ 50 ရွေ့လျားပြီး ပျောက်ကွယ်သွားတယ်"
ရှောက်ချင်ကော်က အော်ဟစ်လိုက်သည်။
"သူက သူ့ယာဉ်နဲ့အတူ တယ်လီပို့လို့ရတာလား… ဒီကတ်က အရမ်းသန်မာတာပဲ"
ရှောက်လုံက သူ၏ ပြုံးနေသော အမူအရာကို ကြည့်ပြီး မနေနိုင်ဘဲ ပြောလိုက်သည်။
"ခင်ဗျား လုယက်ချင်နေတာတော့ မဟုတ်ဘူးမလား"
ရှောက်ချင်းကော်က ပခုံးတွန့်လိုက်သည်။
"ငါက အဲဒီလောက်မရက်စက်ပါဘူး… စကားမစပ် မင်းရဲ့ပျော်စရာကတ်က ဘာလဲ"
ယွီဟန်ကျန်းက သူတို့ကို ပြောခဲ့သည်။
"ဒါကို နောက်မှပြောရအောင်… အရင်ရွှေ့ကြမယ်"
ယွီဟန်ကျန်းသည် ပစ္စည်းများ တင်ဆောင်လာသော ထရပ်ကားကို ရွှေ့လိုက်ပြီး ရှောက်လုံနှင့် ရှောက်ချင်းကော်တို့နှင့်အတူ ဆိုက်သို့သွားခဲ့သည်။
လမ်းမှာ ရှောက်လုံက ညည်းညူသည်။
"အခန်းခအတွက် ကျွန်တော် 80,000 ပေးခဲ့ပြီး ရလဒ်အနေနဲ့ အဲဒီမှာ သုံးညပဲ နေခဲ့ရတယ်… တွက်ချက်မှုတွေအရ တစ်ရက်ချင်းပေးတဲ့ စိန်ခေါ်သူတွေနဲ့ ယှဉ်ရင် 10,000 ရှုံးခဲ့တယ်…"
ရှောက်ချင်းကော်က သူ့ကို နှစ်သိမ့်ပေးသည်။
"အဆင်ပြေပါတယ်… အိမ်ခြံမြေစတော့တွေ ပြိုလဲပြီးတာနဲ့ အနည်းဆုံး အမြတ်ငွေ နှစ်သန်း ရနိုင်ပြီး တစ်ဝက်ကို မင်းကို ပေးမယ်… နောက်လျှို့ဝှက်ခန်းတွေကို မင်းတို့ရှင်းပြီးတာနဲ့ မင်းတို့တွေ စာချုပ်ကို တတ်နိုင်သမျှ အမြန်ဆုံး အဆင့်မြင့်နိုင်ပြီ"
"အဲဒါက အရမ်းကောင်းတယ်" ရှောက်လုံက ပြုံးပြီး သူ့ဘက် လှည့်လိုက်သည်။ "မစ္စတာရှောက်က ငွေရှာနည်းကို တကယ်သိတာပဲ… ကမ္ဘာအစစ်က ကျွန်တော်ရဲ့ဘဏ်ကတ်ထဲမှာ စုဆောင်းငွေတချို့ရှိတယ်… ကျွန်တော်တို့ပြန်သွားနိုင်ရင် စတော့ရှယ်ယာမှာ ရင်းနှီးမြုပ်နှံဖို့ ပိုက်ဆံပေးလို့ရမလား"
"ရတာပေါ့… ဘာပြဿနာမှ မရှိပါဘူး... ဒါပေမဲ့ ရည်ရွယ်ချက်ကတော့ ငါတို့ ပြန်သွားနိုင်ဖို့ပဲ" ရှောက်ချင်းကော်သည် ဗလာဖြစ်ပြီး အေးစက်နေသောလမ်းများကို စိုက်ကြည့်ရင်း တိုးတိုးပြောသည်။ "ဒါက 3 of Spades ပဲရှိသေးပေမဲ့ အခက်အခဲက အရမ်းများနေပြီ… 10 of Spades နဲ့အထက်ရဲ့ အခက်အခဲကို ငါစိတ်ကူးကြည့်လို့ရတယ်"
"ဘာအခက်အခဲရှိရှိ ငါတို့ပြန်သွားရမယ်… ငါတို့ဒီမှာနေလို့မရဘူး" ယွီဟန်ကျန်း၏အသံက တိုးလျပြီး ပြေပြစ်နေ၏။ ညသန်းခေါင်မှာ အားပေးစကားခွန်အားတွေ ရှိနေပုံရသည်။ "ကတ်တွေတည်ရှိခြင်းက စိန်ခေါ်သူတွေကို ကူညီပေးနိုင်ပေမဲ့ အဲဒီကတ်တွေက ပြစ်မှုတွေကို မွေးထုတ်ပေးရာနေရာတစ်ခုလည်းဖြစ်တယ်… ကမ္ဘာအစစ်မှာ တရားဥပဒေနဲ့ ကိုယ်ကျင့်တရား ကန့်သတ်ချက်တွေရှိပေမဲ့ ဒီနေရာမှာ လူများစွာက အသက်ရှင်ဖို့အတွက် ဘာမဆိုလုပ်ဆောင်ကြလိမ့်မယ်"
"ဟုတ်တယ်… လူတချို့တွေက သတ်ဖို့ တွန့်ဆုတ်မနေဘဲ ပိုဆိုးတာက လူသတ်မှုရဲ့ အပြစ်ကို ခံယူစရာမလိုတာပဲ" ရှောက်လုံက အမှောင်ထုကိုကြည့်ပြီး ညင်သာစွာ ပြောလိုက်သည်။ "အခုကစပြီး လျှို့ဝှက်ခန်းက ပိုခက်လာလေလေ အဲဒီလိုလူစားမျိုးတွေက ပေါ်လာနိုင်ခြေ ပိုများလေလေပဲ"
"အားနည်းသူတွေက အားကြီးသူတွေရဲ့ သားကောင်တွေဖြစ်တဲ့ ဒီကမ္ဘာမှာ စိတ်ဓာတ်မာကျောသူတွေက အသက်ရှင်နိုင်ခြေ ပိုမြင့်မားလာလိမ့်မယ်" ယွီဟန်ကျန်းက လူနှစ်ယောက်ကို ပြန်ကြည့်ကာ အေးစက်စွာပြောလိုက်သည်။ "ဒါပေမဲ့ မင်းတို့ လူသတ်မှုနဲ့ အသက်ရှင်နေတယ်ဆိုရင် ကမ္ဘာအစစ်ကို ပြန်ရောက်တဲ့အခါ ဘယ်လိုလုပ် သာမန်လူတစ်ယောက် ဖြစ်လာနိုင်တော့မှာလဲ"
ရှောက်လုံနှင့် ရှောက်ချင်းကော်တို့နှစ်ယောက်စလုံး အတွေးပင်လယ်ထဲရောက်သွားသည်။
အသက်ရှင်ဖို့အတွက် အခြားသူများကို သတ်ပစ်တာ၊ သူတို့လက်များကို သွေးစွန်းပြီး လူသတ်သမားများ ဖြစ်လာကာ သူတို့အသက်ရှင်ခဲ့ရင်တောင် ညတိုင်း အိပ်မက်ဆိုးတွေ ကြုံရနိုင်သည်… အဲဒီလို အသက်ရှင်နေရတာက ဘာအဓိပ္ပါယ်ရှိမှာလဲ။
ဒါတောင်မှ ဒီအရာများဟာ သူတို့ အနာဂတ်မှာ ရင်ဆိုင်ရမည့် အရာများဖြစ်သည်။ အကယ်၍ သူတို့ကိုယ်တိုင်နှင့် ပြိုင်ဘက်များအကြား လူတစ်ဦးတည်းသာ ရှင်သန်နိုင်လျှင် ရွေးချယ်မှုတစ်ခု ပြုလုပ်ရပေမည်။
ဒီအတွေးကြောင့် ရှောက်လုံ၏နောက်ကျောက အေးခဲသွားသည်။ သူမသတ်ချင်ပေမဲ့ နောက်ဆုံးနည်းလမ်းတစ်ခုကတော့ သူတစ်ပါးအတွက် သူ့ကိုယ်သူ စတေးလို့မရဘူး။ သူက သူတော်စင်မဟုတ်ဘူး။ သူ၏မူလစိတ်ထားကို လိုက်နာရန်သာ ကြိုးစားပြီး သွေးဆာနေသော လူသတ်သမားအဖြစ်သို့ မပြောင်းလဲနိုင်ပေ။
"ငါတို့ရောက်ခါနီးပြီ" ယွီဟန်ကျန်း၏ စကားများသည် ရှောက်လုံ၏အတွေးများကို အနှောင့်အယှက် ဖြစ်စေခဲ့သည်။
ရှောက်လုံ မော့ကြည့်လိုက်တော့ မနီးမဝေး ဆောက်လုပ်ရေးဆိုက်မှ မီးရောင်များကို တွေ့လိုက်ရသည်။ ယခုအချိန်တွင် ၎င်းက လုံးဝပိတ်သွားပြီဖြစ်ပြီး မည်သူမျှမတွေ့နိုင်ပေ။
ယွီဟန်ကျန်းက အဆိုပြုသည်။
"ဒီအဆောက်အဦးက သုံးထပ်ရှိပြီး အခန်းလွတ်ရာနဲ့ချီရှိတယ်… ဒီပတ်ဝန်းကျင်မှာ နေထိုင်သူမရှိသလို အလုပ်သမားတွေလည်း သပိတ်မှောက်သွားကြပြီ… သူတို့တွေ ဒီမှာ မရှိလောက်တော့ဘူး"
ရှောက်လုံက မေးလိုက်သည်။
"တတိယထပ်မှာ မြင်ကွင်းအကောင်းဆုံးအခန်းကို ကျွန်တော်တို့ရွေးကြမလား"
ယွီဟန်ကျန်းက ပြန်ပြောသည်။
"ကိုယ်စစ်ဆေးမှုလုပ်ခဲ့ပြီး တတိယထပ်ရဲ့ အရှေ့မြောက်ထောင့်မှာ အခန်းတစ်ခုရှိတယ်… နံရံလေးခုစလုံးမှာ ပြတင်းပေါက်တွေရှိပြီး ဘေးပတ်ပတ်လည်က ထောင့်အဆုံးမဟုတ်တာကြောင့် ကိုယ်တို့ကြည့်ရှုလို့ရတယ်… တစ်ယောက်ယောက် အနားရောက်လာရင် ကိုယ်တို့ အဲဒါကို အရင်သိနိုင်တယ်"
"အဖွဲ့ခေါင်းဆောင်ယွီက အလုပ်ကြိုးစားတာပဲ" ရှောက်လုံက ပြုံးကာ ပြောလိုက်သည်။ "ဒါဆို ကျွန်တော်တို့ အဲဒီအခန်းထဲမှာပဲ နေမယ်"
သုံးယောက်သား ပစ္စည်းများကို တတိယထပ် အရှေ့မြောက်ထောင့်ရှိ အခန်းသို့ ရွှေ့ပြောင်းရန် လုပ်ဆောင်ခဲ့သည်။
သူတို့က သေတ္တာများကို အဆောက်အဦးထဲသို့ သယ်ဆောင်လာသောအခါ ယွီဟန်ကျန်းက ရုတ်တရက် ရပ်လိုက်ပြီး သူ့အသံကို လျှော့လိုက်သည်။
"ဒီမှာ တစ်ယောက်ယောက်ရှိတယ်"
ရှောက်လုံက အံ့သြသွားသည်။
"ဘာ"
"ဒီအဆောက်အဦးမှာ လူလေးယောက်ရဲ့ ခြေရာတွေရှိတယ်"
ရှောက်လုံ၏ခန္ဓာကိုယ်ပေါ်ရှိ အမွေးများသည် ညဉ့်သန်းခေါင်တွင် ထောင်မတ်နေ၏။ သူ့အမူအရာက ရုတ်တရက် ပြောင်းလဲသွားပြီး 'ညဥ့်နက်မှာ သရဲခြောက်သောအိမ်' ၏ ထိတ်လန့်သော ခံစားချက်ကို ခံစားလာရသည်။ သူလှည့်ကြည့်လိုက်တော့ ယွီဟန်ကျန်း၏ အေးဆေးတည်ငြိမ်သော အမူအရာကို မြင်လိုက်ရပြီး တစ်ဖက်လူ၏တိုးလျသောအသံက သူ့နားထဲကို ဝင်လာသည်။
"အဲဒီလူက အခုလေးတင် လှေကားပေါ်တက်သွားတယ်… ကိုယ်တို့သုံးယောက်နဲ့မတူတဲ့ ခြေသံကို ကြားလို့ရတယ်"
ရှောက်လုံက စိတ်ပူသွားသည်။
"ကျွန်တော်တို့နောက်ကို လိုက်လာတဲ့ သူခိုးလား"
ယွီဟန်ကျန်းက ခေါင်းခါလိုက်သည်။
"ဖြစ်နိုင်ခြေများတာက သုံးဘီးဆိုင်ကယ်နဲ့ ပြေးလာတဲ့ ကောင်လေးပဲ… ဒီလမ်းကြောင်းကို သူသွားနေတာလို့ ငါတွေးခဲ့တာ… သူက ဆောက်လုပ်ရေးဆိုက်မှာ ယာယီနေထိုင်လိုသူလည်း ဖြစ်နိုင်တယ်"
ရှောက်လုံက အလွန်ပင် အံသြသွားသည်။
"သူက ဖြစ်စဉ်ကိုရှင်းလင်းဖို့ ကျွန်တော်တို့ရဲ့နည်းလမ်းကို ကူးယူနေတာလား ဒါမှမဟုတ် သူက ကျွန်တော်တို့နဲ့တူတာကို တွေးခဲ့မိတာလား"
သူတို့နှစ်ယောက်က အသံကိုလျှော့ပြီး 'တိုးတိုး' ချဉ်းကပ်မှု ကို အသုံးပြုခဲ့သည်။ ရှောက်ချင်းကော်က ဤနေရာအထိ ကြားလိုက်ရပြီး ပေါ့ပါးသော အသံဖြင့် မေးသည်။
"မင်းတို့ သူ့ကို သိလား"
ရှောက်လုံနှင့် ယွီဟန်ကျန်းတို့သည် တစ်ယောက်ကိုတစ်ယောက် ကြည့်ကာ ငြင်းဆိုလိုက်သည်။
"ငါတို့ သူ့ကို မသိဘူး"
ရှောက်ချင်းကော်က စဉ်းစားခဲ့သည်။
"ထူးဆန်းလိုက်တာ… သူဘာလို့ ငါတို့ရဲ့ရှင်းလင်းရေးနည်းဗျူဟာကို ကူးယူရတာလဲ… စိန်ခေါ်သူတွေအများကြီးရှိပေမဲ့ သူက ငါတို့အနောက်ကိုပဲ အစကတည်းက လိုက်ခဲ့တာ… ငါတို့မျက်နှာမှာ 'ဖြစ်စဉ်ရှင်းလင်းနိုင်တယ်'ဆိုတဲ့စာလုံးကြီးကို ရေးထားလို့လား"
ရှောက်လုံက ရယ်ရမလား ငိုရမလား မသိတော့ချေ။
"အိမ်စာတွေကူးယူတဲ့ ကျောင်းသားတွေအတွက်တော့ ကူးယူဖို့ ရလဒ်ကောင်းရှိတဲ့သူကို ရှာလိမ့်မယ်… ကျွန်တော်တို့ရဲ့ ရှင်းလင်းရေးနည်းဗျူဟာကို သူက အမှန်တကယ် ကူးယူချင်ရင် မသေချာဘဲ သူကူးယူလို့မရဘူး… သူက ကျွန်တော်တို့ရဲ့အထောက်အထားတွေကို မသိဘဲ ကျွန်တော်တို့က အဲဒါကို ရှင်းလင်းဖို့ အလားအလာကောင်းတွေရှိတယ်ဆိုတာ သူမယုံကြည်ရင်ပေါ့"
ရှောက်ချင်းကော်: "မင်းတို့နှစ်ယောက်က 3 of Hearts နဲ့ 3 of Diamonds မှာ ကမ္ဘာ့စံချိန်ချိုးခဲ့သလို အဖွဲ့ခေါင်းဆောင်ယွီက 2 of Spades ကို ကမ္ဘာ့စံချိန်ချိုးခဲ့ပြီး ပရော်ဖက်ဆာရှောက်က 2 of Diamonds ကို ကမ္ဘာ့စံချိန်ချိုးခဲ့တယ်… မင်းတို့ရဲ့နာမည်တွေကို ကြေညာချက်တွေမှာ အကြိမ်ပေါင်းများစွာ ဖော်ပြထားပြီး မင်းတို့က ရှောက်လုံနဲ့ ယွီဟန်ကျန်းဆိုတာ သူသိသွားတာနဲ့ ကြီးမြတ်တဲ့နတ်ဘုရားတွေနဲ့ သူတွေ့လိုက်ရသလို ခံစားရမှာသေချာတယ်… ကြီးမြတ်တဲ့နတ်ဘုရားတွေနောက်ကနေ လိုက်ခြင်းနဲ့ ဖြစ်စဉ်ကို ရှင်းလင်းနိုင်တယ်လေ"
ယွီဟန်ကျန်းက 'ရှူး'အမူအရာဖြင့် သူတို့နှစ်ယောက် ခရီးဆောင်အိတ်များကို မြေပြင်ပေါ်ချဖို့ အချက်ပြလိုက်သည်။
သူက အိတ်ထဲရှိ ပစ္စည်းအားလုံးကို ထုတ်ယူပြီး အိတ်တစ်ခုလုံးကို လှန်ပစ်လိုက်သည်။
ခရီးဆောင်အိတ်သုံးလုံး၏ ထောင့်တွင် လက်သည်းအရွယ် အနက်ရောင်ခလုတ်တစ်ခု ပါရှိသည်။ ယွီဟန်ကျန်းသည် 'ခလုတ်' ကို ညင်သာစွာ ကောက်ကိုင်လိုက်ပြီး ခဏလောက် ဂရုတစိုက် ကြည့်ပြီးနောက် မြေပြင်ပေါ်တွင် သူ့လက်ချောင်းများဖြင့် 'အသံဖမ်းစက်' ဟူသောစကားလုံးကို ရေးလိုက်သည်။
ရှောက်ချင်းကော်: "…"
ရှောက်လုံ: "…"
ခရီးဆောင်အိတ်များပေါ်တွင် ကြိုးမဲ့ခလုတ်ကို အမှန်တကယ်ထည့်ထားသောကြောင့် လွန်ခဲ့သည့်ရက်အနည်းငယ်အတွင်း လူသုံးဦး၏လှုပ်ရှားမှုများကို ရှင်းလင်းစွာကြားခဲ့ရပါသည်။
ယွီဟန်ကျန်းက သူ့ဖုန်းကို ထုတ်လိုက်ပြီး စာရိုက်လိုက်သည်။
"ငါ့အိတ်ကို ဘယ်သူမှမကိုင်ဘူးဆိုတာ သေချာတယ်… ပရော်ဖက်ဆာရှောက်ကော"
ရှောက်လုံက စာရိုက်ခဲ့သည်။
"ကျွန်တော်လည်း အတူတူပဲ… အိတ်ထဲမှာ သုံးရက်စာ အစားအသောက်အလုံအလောက်ပါပြီး အိတ်ကိုထားတဲ့ တည်းခိုခန်းကလွဲလို့ ကျွန်တော် အပြင်ထွက်တဲ့အခါ ဒီအိတ်ကို ကျွန်တော့်ခန္ဓာကိုယ်ကနေ မချခဲ့ဘူး"
ရှောက်ချင်းကော်က တွေးဆခဲ့သည်။
"ဒီအသံဖမ်းစက်က ဘယ်လိုဖြစ်တာလဲ"
ယွီဟန်ကျန်းက ရုတ်တရက် အတွေးတစ်ခုဝင်လာသည်။
"ဒီကမ္ဘာရဲ့ပထမဆုံးနေ့က ဗဟိုရင်ပြင်အနီးမှာ သူသီချင်းနှစ်ပုဒ်ဆိုနေတာကို ငါတို့ကြားခဲ့ရတယ်"
ရှောက်လုံ၏ အာရုံများ လျင်မြန်စွာ ပြန်ရောက်လာသည်။
"ဟုတ်တယ်… သူက 'ကြီးကျယ်ခမ်းနားသောနှစ်များ'နဲ့ 'ပြတင်းပေါက်အပြင်ဘက်မှာ'ကို သီဆိုခဲ့တယ်… မြို့ခံတွေက ဒီသီချင်းနှစ်ပုဒ်ကို မကြားဖူးပေမဲ့ စိန်ခေါ်သူတွေက ရင်းနှီးပြီးသားဖြစ်မှာ… ပရိသတ်ရဲ့ တုံ့ပြန်မှုအရ လူအုပ်ထဲက စိန်ခေါ်သူတွေကို သူဆုံးဖြတ်ခဲ့တာလား"
ယွီဟန်ကျန်း၏ မျက်လုံးများက နက်နဲသွားသည်။
"ဒီကောင်လေးက ရင်ပြင်မှာ သီချင်းတာ ငွေရှာဖို့ မဟုတ်ဘူး"
ဆယ်ကျော်သက်ကောင်လေးသည် ရှောက်လုံနှင့် ယွီဟန်ကျန်းတို့ကို ရှန်းရွှိန်တည်းခိုခန်းတွင် တွေ့ပြီး ဗဟိုရင်ပြင်တွင် သူ၏သီချင်းဆိုသံကို နားထောင်ရန် ရပ်သွားတာကို တွေ့လိုက်ရသည်။ ရင်းနှီးသောသီချင်းသည် ရှောက်လုံ၏အမှတ်တရများကို ဖြစ်ပေါ်စေပြီး ရှောက်လုံ၏မျက်နှာသည် ထိုအချိန်တွင် ၎င်းကိုသေချာပေါက်ပြသမည်ဖြစ်သည်။ ယင်းက ဆယ်ကျော်သက်ကောင်လေးအား သူ၏ 'စိန်ခေါ်သူ' အထောက်အထားကို ဖော်ထုတ်နိုင်စေခဲ့သည်။
ဘယ်အချိန်က ခိုးနားထောင်နိုင်သော အသံဖမ်းစက်ကို ချထားမှန်း သူတို့သုံးယောက်မသိခဲ့ကြဘူး။
ရှောက်လုံက မှန်းဆခဲ့သည်။
"သူ့မှာ အသံဖမ်းစက်ကို သတ်မှတ်ထားတဲ့အကွာအဝေးအတွင်း သက်ရောက်မှုရှိစေမဲ့ ကတ်တစ်ခုရှိနိုင်တယ်… အဲဒါက တစ်ချိန်တည်းမှာ အများအပြားကို ထုတ်လွှတ်နိုင်ဖွယ်ရှိတယ်… ဒီကောင်လေးရဲ့ ကတ်တွေက အရမ်းအားကောင်းတယ်"
တယ်လီပို့ခြင်းနှင့် အသံဖမ်းစက်၊ ကတ်နှစ်ခုတွင် တိုက်ခိုက်နိုင်စွမ်းမရှိသော်လည်း ဤကတ်များကို အားကိုးခြင်းဖြင့် လူငယ်၏ထွက်ပြေးပေါက်နှင့် ကူးယူခြင်းစွမ်းရည်သည် ပထမတန်းစားဖြစ်သည်။
ပရော်ဖက်ရှင်နယ် ပြစ်မှုစုံစမ်းစစ်ဆေးရေးမှူး ယွီဟန်ကျန်းသည် အမှန်တကယ်ပင် သူ့ခြေရာခံရာ ပျောက်သွားခဲ့ပြီး ရက်ပေါင်းများစွာ အသံဖမ်းစက်တပ်ခံထားရသည်။
သုံးယောက်သားက တစ်ယောက်ကို တစ်ယောက် ကြည့်နေကြသည်။
ခဏကြာတော့ ရှောက်ချင်းကော်က မနေနိုင်စွာ ရယ်လိုက်သည်။
"နားစွင့်နေတဲ့ဒီကောင်လေးက သတိရှိပြီး လိုက်လျောညီထွေရှိတဲ့ ကြောင်ကလေးပဲ"
ရှောက်လုံက ထိုမြင်ကွင်းကို တွေးပြီး ရယ်လိုက်သည်။
"အဖွဲ့ခေါင်းဆောင်ယွီနဲ့ ကျွန်တော်တို့ 'ဖန်ထည်ပါပြီး ဂရုတစိုက်ကိုင်တွယ်ပါ'ဆိုတဲ့ သေတ္တာတွေကို ရွှေ့တဲ့အခါ သူက ကျွန်တော်တို့ရဲ့ကျောပိုးအိတ်ထဲက အသံဖမ်းစက်တွေထဲကနေ နားထောင်ပြီး ပစ္စည်းတွေကို သီးခြားစီ သိမ်းနေတာကို ကြားခဲ့ရတယ်… သူက အနောက်ကလိုက်ခဲ့ပေမဲ့ အဆင့်မြင့်တဲ့ပုံစံနဲ့ ပစ္စည်းတွေကို ဂိုဒေါင်ထဲမှာ အမှိုက်အဖြစ် ဖုံးကွယ်ထားတယ်"
ယွီဟန်ကျန်းက ထပ်ပေါင်းပြောသည်။
"ငါက ဆောက်လုပ်ရေးဆိုက်ကို စောင့်ကြည့်နေတယ်ဆိုတာကို သူကြားပြီး ပုန်းအောင်းဖို့ သင့်တော်သလားဆိုတာ ကြည့်ဖို့ ပြေးသွားခဲ့တယ်"
ရှောက်လုံက ဆက်ပြောသည်။
"ကျွန်တော်တို့တွေ သူခိုးကို ညသန်းခေါင်မှာ ဖမ်းမိပြီး မမျှော်လင့်ဘဲ သူခိုးက သူ့အဖွဲ့ဝင်ကို ထွက်ပြေးဖို့ သတ်ပစ်လိုက်တယ်… အဖွဲ့ခေါင်းဆောင်ယွီက ချက်ချင်းနေရာပြောင်းဖို့ ဆုံးဖြတ်လိုက်တယ်… သူက ဒါကိုကြားတော့ သူခိုးက စိန်ခေါ်သူတွေကို ဝင်တိုက်ဖို့ ပြန်လာမှာကို ကြောက်ပြီး သူကလည်း ချက်ချင်း နေရာပြောင်းသွားတယ်"
ရှောက်ချင်းကော်က အဆိုပြုသည်။
"သူက ငါတို့ရဲ့ ရှင်းလင်းရေးနည်းဗျူဟာကို ကူးယူနေတာပဲ"
ရှောက်လုံက ပြုံးလိုက်သည်။
"ဆရာတစ်ယောက်အနေနဲ့ ကျွန်တော် သူ့ကို မချီးကျူးဘဲမနေနိုင်ဘူး… သူက ကူးယူတဲ့နေရာမှာ ကျွန်တော်တွေ့ဖူးတဲ့ အတော်ဆုံးကျောင်းသားပဲ… သူက အဲဒါကို အသုံးပြုရုံတင်မက အဆင့်မြင့်တင်ပြီး ကျွန်တော်တို့ရဲ့ နည်းဗျူဟာကို ပြောင်းလဲခဲ့တယ်"
အဖွဲ့ခေါင်းဆောင်ယွီသည် သည်တို့၏ ပစ္စည်းများကို ဖန်ထည်အဖြစ် ရုပ်ဖျက်ခဲ့ပြီး သူက အမှိုက်အိတ်အဖြစ် တိုက်ရိုက် ရုပ်ဖျက်ခဲ့သည်။ အမှိုက်အိတ်ပေါ်တွင် ကြက်ဥအဖြူနှင့် ဖျော်ရည်တို့ကိုလည်း ဖြန်းထားကာ အနံ့အသက်ဆိုးများ ထွက်ပေါ်နေသဖြင့် လူများအား ၎င်းတို့အနီးကို မရောက်စေတော့ပေ။
အဖွဲ့ခေါင်းဆောင်ယွီသည် သူတို့၏ပစ္စည်းများကို ရွှေ့ပြောင်းရန်အတွက် ရွေ့လျားကုမ္ပဏီတစ်ခုအား ရှာဖွေတွေ့ရှိခဲ့ပြီး သူက သုံးဘီးဆိုင်ကယ်နှင့်အတူ အဆင်သင့်စီးသွားခဲ့သည်။
ဤအချက်ကို ကူးယူခြင်းမှာ ဒီကောင်လေးက ဉာဏ်ကောင်းလွန်းသည်ဟုသာ ဆိုနိုင်သည်။
ရှောက်ချင်းကော်က မေးလိုက်သည်။
"အဖွဲ့ခေါင်းဆောင်ယွီ… မင်းရဲ့ အစီအစဉ်က ဘာလဲ… မင်းက သူ့ကို ရှင်းချင်တာလား"
ယွီဟန်ကျန်းက ခဏလောက်စဉ်းစားလိုက်သည်။
"သူက ငါတို့ရဲ့ ရှင်းလင်းရေးဗျူဟာကို ကြားပြီး ကူးယူခဲ့တယ်… ငါတို့ပစ္စည်းတွေ ဘယ်မှာထားတယ်ဆိုတာ သူသိပေမဲ့ ငါတို့ပစ္စည်းတွေကို ခိုးယူဖို့ ဒါမှမဟုတ် အန္တရာယ်ပြုဖို့ မစဉ်းစားခဲ့ဘူး… လောလောဆယ် သူ့ကို ဆန့်ကျင်ဖို့ မလိုဘူး… ပရော်ဖက်ဆာရှောက်… မင်းဘယ်လိုထင်လဲ"
ယွီဟန်ကျန်းက သူ့ထင်မြင်ချက်အတွက် ရှောက်လုံကို မေးလိုက်သည်။
ရှောက်လုံက ပြန်ပြောသည်။
"ကျောင်းသားတစ်ယောက်က စာမေးပွဲမှာ စာခိုးချတယ်ဆိုရင် သူတို့ကို ကျွန်တော်သေချာပေါက် သတိပေးမှာ… ဒါပေမဲ့ ဒီကမ္ဘာကြီးမှာ နေထိုင်ဖို့က ခက်ခဲလွန်းပြီး ကျွန်တော်တို့ရဲ့ရှင်းလင်းရေးနည်းဗျူဟာကို ကူးယူနိုင်တဲ့ စွမ်းရည်တစ်ခုလို့လည်း ယူဆနိုင်တယ်…" ရှောက်လုံက ခေတ္တရပ်ကာ စာရိုက်ခဲ့သည်။ "ဒါ့အပြင် သူ့ရဲ့ကတ်နှစ်ကတ်ဖြစ်တဲ့ တယ်လီပို့နဲ့ ခိုးနားထောင်တဲ့လုပ်ဆောင်ချက်ကိုလည်း ကျွန်တော် အရမ်းစိတ်ဝင်စားတယ်"
ယွီဟန်ကျန်းက အဆိုပြုသည်။
"မင်းစိတ်ဝင်စားတယ်ဆိုတော့ သူ့ကိုဖမ်းပြီးကြည့်ရအောင်"
နောက်အခိုက်အတန့်တွင် ယွီဟန်ကျန်းသည် ခလုတ်အရွယ်အစား အသံဖမ်းစက်ကို တိုက်ရိုက်ကောက်ယူပြီး တိုးတိုးပြောလိုက်သည်။
"ငါကြားတာမှားသွားတာ… ဒီမှာ ခြေရာတွေမရှိဘူး… ဒီနေရာက အရမ်းဝေးပြီး ဘယ်သူမှရှိမှာမဟုတ်ဘူး… ငါတို့ ပစ္စည်းတွေကိုရွှေ့ပြီး ဖယ်ထားလိုက်မယ်"
ရှောက်လုံက သူနှင့်ပူးပေါင်းခဲ့သည်။
"ကောင်းပြီ… မစ္စတာရှောက်က ဒီမှာနေခဲ့လိုက်… ပစ္စည်းတွေရွှေ့ဖို့ အဖွဲ့ခေါင်းဆောင်ယွီနဲ့ ကျွန်တော်က အောက်ထပ်ကို ဆင်းလိုက်မယ်"
ရှောက်ချင်းကော်က ပြုံးလိုက်သည်။
"ကိစ္စမရှိပါဘူး"
ပြော၍ပြီးသွားသောအခါ ယွီဟန်ကျန်းသည် လူနှစ်ယောက်ကို အချက်ပြပြီး အသံဖမ်းစက်ကို ထောင့်တွင် ထားလိုက်သည်။
သူတို့သည် သေတ္တာကိုရွှေ့ဖို့ အောက်ထပ်ကို မဆင်းဘဲ ဒုတိယထပ်က အနောက်ဘက်ကို ဦးတည်သွားသည်။ ထို့နောက် ပေါ့ပါးသော ခြေလှမ်းများဖြင့် သူတို့က ယွီဟန်ကျန်းအနောက်ကနေ တတိယထပ်သို့ လိုက်သွားကြသည်။
ယွီဟန်ကျန်းက အဆောက်အဦးအတွင်းပိုင်းကို အလွန်ရင်းနှီးသည်။
တတိယထပ်တွင် အရှေ့မြောက်နှင့် အနောက်မြောက်စင်္ကြံများမှာ မြင်ကွင်းအကျယ်ဆုံး အခန်းများရှိသည်။ သို့သော် ပြတင်းပေါက်များသည် အောက်ထပ် လှုပ်ရှားမှုများကိုသာ မြင်နိုင်စေကာ အဆောက်အဦးအတွင်းကို မမြင်ရပေ။
သူတို့သည် ဒုတိယထပ်မှ ဆင်းလာပြီး တတိယထပ်သို့ လှေကားဖြင့် တက်ကြသည်။ ဤလုပ်ငန်းစဉ်တစ်ခုလုံးက တိတ်ဆိတ်လုနီးပါးဖြစ်ခဲ့သည်။
ယွီဟန်ကျန်းက တတိယထပ်၏ အနောက်မြောက်ထောင့်ရှိ အခန်းထဲသို့ ဦးတည်သွားသည်။
အခန်းထဲမှာ ပစ္စည်းတွေ အများကြီးရှိပြီး ပိန်ပါးသော ဆယ်ကျော်သက်ကောင်လေးတစ်ယောက်က ပြတင်းပေါက် မှာ ပုန်းနေကာ ပြတင်းပေါက်အဟမှ အောက်ထပ်ကို လှမ်းကြည့်နေသည်။
ဆယ်ကျော်သက်ကောင်လေးသည် အသံဖမ်းစက်များမှတစ်ဆင့် သူတို့၏ စကားပြောဆိုမှုကို ကြားခဲ့ရပြီး ပစ္စည်းသယ်ရန် အောက်ထပ်သို့ ဆက်သွားလိမ့်မည်ဟု ထင်ခဲ့သည်။ သူ ခဏတာ စောင့်ကြည့်နေပေမဲ့ အောက်ထပ်မှာ ဘယ်သူ့ကိုမှ မတွေ့ဘူး။
ဆယ်ကျော်သက်ကောင်လေးသည် သူ့နောက်မှ တိုးလျပြီး အေးစက်သောအသံကို ကြားလိုက်ရသောအခါ အံ့ဩသွားသည်။
ယွီဟန်ကျန်းက ပေါ့ပါးစွာ ဆိုလိုက်သည်။
"ကြည့်စရာမလိုဘူး… ငါတို့ဒီမှာ"
ဆယ်ကျော်သက်ကောင်လေး၏ ခန္ဓာကိုယ်သည် ပြင်းထန်စွာ တုန်ခါသွားပြီး ရုပ်တုတစ်ခုကဲ့သို့ ချက်ချင်း အေးခဲသွားသည်။
ရှောက်လုံက အဆိုပြုသည်။
"မင်းထည့်ထားတဲ့ အသံဖမ်းစက်တွေကို ငါတို့ရှာတွေ့ပြီး အဖွဲ့ခေါင်းဆောင်ယွီက မင်းရဲ့သတိကိုလျှော့ဖို့အတွက် ဒီစကားတွေကို တမင်တကာပြောခဲ့တာ"
ရှောက်ချင်းကော်က တစ်ဖက်လူကို ပြုံးပြသည်။
"အရမ်းစိတ်လှုပ်ရှားမနေပါနဲ့… ငါတို့က လောလောဆယ် တတိယထပ်မှာရှိနေပြီး မင်းခုန်ချလိုက်ရင် မင်းခြေထောက်ကျိုးသွားနိုင်တယ်"
ဆယ်ကျော်သက်ကောင်လေး: "…"
ရှောက်ချင်းကော်က ဆက်ပြောသည်။
"မင်းရဲ့ တယ်လီပို့ကတ်က ဒေါင်လိုက်ရွှေ့နိုင်ရင် မင်း ပြတင်းပေါက်ကနေ ခုန်ချဖို့ ရွေးချယ်နိုင်တယ်" ထို့နောက် သူက အနက်ရောင်အမှိုက်အိတ်ကို ဖွင့်ကာ နို့ဘူးကို ထုတ်ယူလိုက်သည်။ "ဟေ့… ဒါက ဂျုံနို့ပဲ… ငါ ဒါကို အကြိုက်ဆုံးပဲ"
ဆယ်ကျော်သက်ကောင်လေး: "…"
ဒီလူလိမ်အုပ်စုကတော့…
အောက်ထပ်မှာ ပစ္စည်းသွားရွှေ့မယ်ဆိုတာ ဘာလဲ… သူတို့က သူ့ကို ဖမ်းဖို့ တတိယထပ်ရဲ့ အနောက်ဘက်ခြမ်းကို ခိုးဝင်ခဲ့တာလား…
ဆယ်ကျော်သက်ကောင်လေးသည် သူ့ထက် အရပ်ရှည်သော ယောင်္ကျားကြီးသုံးယောက်ကို မြင်လိုက်ရပြီး သူ့နှုတ်ခမ်းက အနည်းငယ် တုန်ယင်သွားသည်။
"ခင်-ခင်ဗျားတို့က ဘာလိုချင်လို့လဲ"
လူသုံးယောက်: "…"
ဒီစကားက ငါတို့မင်းကို မေးသင့်တာမဟုတ်ဘူးလား…
#TK
