MM Story Teller

Chapter 2

Viewers 4k

👻Chapter 2

ဝိဥာဥ်လက်ထပ်ပွဲ (1)

သူသာ ညသန်းခေါင်မတိုင်မီ သရဲမတစ်ယောက်ဆီမှ အလှည့်စားခံလိုက်ရလျှင် ပရလောကသို့ သွားရန် ဆုံးဖြတ်ထားချက်က အသုံးမဝင်သလို ဖြစ်သွားလိမ့်မည်။ သရဲမက သန်းခေါင်ကျော်သည်နှင့် သူ့ကို သတ်သွားနိုင်သလို သားကောင်ဖမ်းသည့် သူမကိုလည်း တားဆီးမည့်သူ မရှိချေ။

တကယ်တမ်းတွင်....စည်းမျဥ်းများက သတ်ရန် ဖြစ်သည်။

စဥ်းစားရင်းနှင့် ချူဟွိုက်၏ မျက်လုံးများက အေးစက်လာသည်။ သရဲမက လူများ၏ ရာဂစိတ်ကို နှိုးဆွနိုင်သည့်ပုံပင်။

ဟုတ်တယ်။ ဒါ အရမ်း ရင်ဖိုစရာကောင်းတယ်။ ထို့ကြောင့် ချူဟွိုက်က မျက်ခုံးပင့်လိုက်သည်။

သရဲမက သူမ၏ သားကောင်က ထောင်ချောက်ထဲ ချောချောမွေ့မွေ့ ဝင်လာပြီဟု တွေးမိ၍ မျက်လုံးထက် ဂုဏ်ယူသည့် အရိပ်အရောင်တို့ ဖြတ်ပြေးသွားကာ နူးညံ့ပြီးအရိုးမရှိသော လက်များက အောက်သို့ လျှောဆင်းလာချိန် ချူဟွိုက်က သူမလက်ကို အမြန် ဆုပ်ကိုင်လိုက်သည်။

သရဲမက မလှုပ်မယှက် ဖြစ်သွားလေသည်။

ချူဟွိုက် " ဆင်းတော့ ... မင်းက အရမ်း လေးတာပဲ"

သရဲမက ကြောင်သွားရသည် " ငါလား...။ ငါ့ကို ဆင်းစေချင်တယ်ပေါ့"

ချူဟွိုက်က မျက်နှာထား တင်းတင်းနှင့် စကားဆိုလိုက်သည် " ငါက မြုံနေတာ။ ငါ့မှာ မင်းရဲ့ စိတ်ကို မဆွဲဆောင်နိုင်တဲ့ အရာတွေ အကုန်ရှိတယ်"

သရဲမ"....."

ချူဟွိုက်က နူးနူးညံ့ညံ့ ပြုံးပြလိုက်သည် " ငါက အထီးကျန်နေတာ။ ခဏလောက် ဘဝအကြောင်း စကားပြောဖို့ အတူရှိနေပေးလို့ရမလား"

သရဲမ"...."

ချူဟွိုက်က သူ၏ ဘောင်းဘီများက စိုစွတ်လာမှန်း သိသွားသည်။

“အစ်မကြီး။ မင်းရဲ့ အောက်ပိုင်းက သွေးထွက်နေပြီ။ ငါက ဘာမှတောင် မလုပ်ရသေးဘူး" ချူဟွိုက်က သူ့ဘောင်းဘီပေါ်ရှိ သွေးကွက်ရဲရဲကြီးကို ကြည့်လိုက်ရင်း အသန့်ကြိုက်သည့်သူဖြစ်၍ စိတ်ညစ်သွားသည်။

သရဲမက သူ့စကားကို ကြားသောအခါ ခေါင်းငုံ့ပြီး ဝက်တစ်ကောင်လို မြည်တွန်လိုက်၍ ပူဖောင်းလို လုံးဝန်းဝန်းအရာတစ်ခုက မြေပြင်ပေါ် လိမ့်ကျသွားသည်။

သူမက မျက်လုံးဟောက်ပက်များနှင့် ပြန်မော့ကြည့်လာရာ မျက်လုံးထောင့်စွန်းမှ သွေးမျက်ရည်များ စီးကျလာ၍ ချူဟွိုက်က မျက်လုံးများက မြေပြင်ပေါ် လိမ့်ကျသွားပြီ ဖြစ်မှန်း ရှင်းရှင်းလင်းလင်း သိသွားလေသည်။

“အိုက်ယား။ ဖောက်သည်က နှလုံးသားမဲ့တဲ့သူပဲ။ သူမက မျက်လုံးတွေ ဖောက်ထုတ်လိုက်တာတောင် သနားမိနေရင်တော့ တကယ် ထူးဆန်းတာပေါ့"

သူကသာ ကြိုရှေ့ရောက်နေသော်လည်း သရဲမရောက်လာသည့် အကြောင်းရင်းက သူ့ကို သတ်ရန်ဖြစ်ပြီး သူ၏ သနားစဖွယ် အကြည့်ကြောင့် စိတ်ပျော့သွားမည်မဟုတ်မှန်း သိနေ၍ သက်ပြင်းချမိသည်။

『23:59』

သရဲမ၏ ဆံပင်များက ချူဟွိုက်၏ ရှည်သွယ်သွယ်နှင့် ဆွတ်ဆွတ်ဖြူနေသော လည်တိုင်ကို တစ်ဖြေးဖြေး ရစ်ပတ်လာသည်။ သူက ပုံမှန်မဟုတ်သည့် အပြုံးကို ပြုံးလိုက်ရင်း သူ၏ ရှပ်အင်္ကျီကို ချွတ်လိုက်သည်။

ချူဟွိုက်၏ အင်္ကျီကြယ်သီးက ပြုတ်ထွက်သွားပြီး အလွန်ပိန်ပါးသည့် အရေပြားနှင့် ရင်ဘတ်ညှပ်ရိုးတို့ကို ရှင်းရှင်းလင်းလင်း မြင်နေရသည်။ ချူဟွိုက်၏ နေနှင့် ထိတွေ့ခြင်း မရှိသည့် သူ့အသားအရေက သရဲမထက် သုံးပုံသုံးပုံလောက် ပိုဖြူနေ၍ စိတ်ညစ်သွားရသည်။

သရဲမက သွားစွယ်ကြီး ထွက်လာကာ မျက်လုံးများကလည်း ရက်စက်ပြီး မုန်းတီးစက်ဆုပ်နေဟန် အပြည့်ပြလာသည်။

“ငါ့ဘာသာ မလုပ်နိုင်တာမို့ မင်းရဲ့ သွားကို သုံးဖို့ ငှားဦးမယ်နော်" ချူဟွိုက်က ပြောလိုက်ရင်း သူ၏ လက်ချောင်းသွယ်သွယ်တို့နှင့် သရဲမပါးစပ်ထဲ နှိုက်လိုက်ပြီး ကြမ်းကြမ်းတမ်းတမ်း မွှေလိုက်ရာ သူ့လက်ချောင်းမှ သွေးစီးကျလာသည်။

သူ့စိတ်ထဲရှိ နာရီက စတင်ပြီး အချက်ပေးလာသည်။5, 4, 3, 2…1!

ထိုအချိန် လူ့အရိုးက နာရီအချက်ပေးရန် ခုန်ထွက်လာပြီး ချူဟွိုက်လည်ပင်းကို ရစ်ပတ်ထားသည့် ဆံပင်ကလည်း ချက်ချင်း တင်းကျပ်လာသည်။

ချူဟွိုက်က ကြိုတင်ပြင်ဆင်ထား၍ ပုံစံတစ်ခု ပြောင်းလိုက်ရင်း ခါးပေါ် လက်တင်လိုက်ပြီး ရုပ်ပုံပေါ် သွေးသုတ်လိုက်သည်။ ချက်ချင်းပင် ရုပ်ပုံက စတင်ပြီး လောင်ကျွမ်းလာ၍ သူက အံကြိတ်ထားလိုက်သည်။

“ဘိုင့်ဘိုင်" ချူဟွိုက်က ပြုံးပြလိုက်ရင်း သူ၏ ခန္ဓာကိုယ်က ပုံရိပ်ယောင်တစ်ခုအသွင် ပြောင်းသွားသည်။

“မင်းက ရုပ်ကလေး ကြည့်ကောင်းပေမယ့် ဖလစ်တဲ့ နည်းစနစ်ကတော့ ညံ့တေးရှင်းပဲ။

ငါ့ရဲ့ ညီငယ်လေးကတောင် တိုင်တောင်တန်းလို တစ်ချက်မှ မလှုပ်သွားဘူး။ မင်းကို ပြောလိုက်မယ်။ ယောက်ျားတွေက ရန်စဖို့က မလွယ်ဘူး"

အူးဝါး....

အသံစူးစူးဝါးဝါးနှင့် ထပ်ပြီး အော်ငိုလာချိန် ချူဟွိုက်က ပျောက်ကွယ်သွားလေသည်။

သူ နိုးလာသည့်အချိန် လူတစ်ယောက်ကို ဖက်ထားမှန်း တွေ့လိုက်ရသည်။

ချူဟွိုက်က ထိုလူ့ကို လုံးဝ တွယ်ကပ်ထားလေသည်။ သူ၏ ခန္ဓာကိုယ်ကလည်း ဘတ်စ်ကားစီးနေရသလို ဝှေ့ယမ်းနေသည်။

ထိုလူ့ထိုင်ခုံက ဘယ်ဘက်ခြမ်းတွင် ရှိနေ၍ ချူဟွိုက်က သူ၏ ညာလက်ကို ထိုလူ့ပုခုံးပေါ်တင်လိုက်ရင်း ဘယ်လက်နှင့် သူ့ခါးကို ဖက်ထားလိုက်သည်။

ထိုလူ့ကြွက်သားများက တောင့်တင်းနေပြီး ကြံ့ခိုင်သည့် ခန္ဓာကိုယ်ရှိကာ သန့်စင်သည့် အနံ့တစ်ခုလည်း ရနေသည်။

ချူဟွိုက်၏ မျက်နှာက ထိုလူ့ရင်ဘတ်ထဲ နစ်မြုပ်နေသည်။ သူက အခုတွင် လုံးလုံးနိုးလာပြီဖြစ်၍ ထိုလူ့ကို ကျောပေးရန် ပြင်လိုက်စဥ် အသံတစ်ခုက သူ့စိတ်အာရုံကို ဖမ်းစားသွားသည်။

“ဘော့စ်ခင်ဗျာ....ဒီ အသစ်ဝင်လာတဲ့သူကို ဘယ်လို ပြောပြရမလဲ မသိပါဘူး" သူက တမင်သက်သက် အသံတိုးတိုး ပြောနေပြီး သူ့အသံကလည်း ဆေးလိပ်သောက်တတ်သည့်ဟန် အနည်းငယ် သြရှရှနေသည်။

ချူဟွိုက်က စိတ်ပြောင်းသွားပြီး နာနာခံခံနှင့် မျက်လုံးပိတ်ပြီး နားထောင်နေသည်။

လော့ဇီယန်က ချူဟွိုက်ကို လက်ညှိုးထားလာရင်း ပြောလာသည် " သူမက အရမ်း ရိုးသားတဲ့ပုံပါ"

သူ့ရှေ့က အမျိုးသမီးလေးက ပိုးသားလို နက်မှောင်တောက်ပသည့် ဆံပင်နှင့် နူးညံ့သည့် အသားရေတို့ ရှိကာ လည်တိုင်ကျော့ကျော့ပေါ်ရှိ ဖရဲသီးစေ့လို မျက်နှာကျပုံထက် ရှည်လျားကော့ညွတ်နေသည့် မျက်တောင်စိပ်စိပ်တို့လည်း ပါဝင်အားဖြည့်နေသည်။ ထိုအမျိုးသမီးက မျက်လုံးပိတ်ထားပြီး ငြိမ်းငြိမ်းချမ်းချမ်း အိပ်ပျော်နေ၍ အားနည်းသည့် အလှလေးတစ်ယောက်ပုံစံ ဖြစ်နေသည်။

“ဘော့စ်က သူမဖက်ထားကို ခွင့်ပြုထားတာပဲ။ ပုံမှန်ဆို ဒီလိုလုပ်တာကို သဘောမကျတတ်ပါဘူး ဆိုတော့... ဘော့စ်က ဒီလိုပုံစံမျိုးကို ကြိုက်တာလား။ ဒါဆိုလည်း သူမကို ကျွန်တော့်အပိုင်ဖြစ်အောင် မလုပ်တော့ပါဘူး"

လော့ဇီယန်က ဆိုလိုက်ရင်း သူ၏ ကြမ်းတမ်းသည့် မျက်နှာထက် ဝမ်းနည်းရိပ်တို့ ဖြတ်ပြေးသွားသည်။

ကျင်းထျန်းယိက ချူဟွိုက်၏ အမျိုးသားလိင်အကြောင်း တွေးမိသော်ငြား မပြောပြရန် ဆုံးဖြတ်လိုက်သည်။

ချူဟွိုက်၏ လက်ချောင်းလေးများက အနည်းငယ် လှုပ်သွားရသည်။

ဒီလူက ဂေးလား။ မဟုတ်ရင် သူက ဘာလို့ သူ့ကို စိတ်ဝင်စားမှာလဲ။

စဥ်းစားရင်းနှင့် ချူဟွိုက်က ခြေထောက်သွယ်သွယ်လေးများ ပေါ်နေသည့် အဖြူရောင် စကပ်ကို မျက်လုံးမှေးကြည့်လိုက်ရာ သူ့အကြည့်တို့ ချက်ချင်း နက်မှောင်သွားလေသည်။

ဒါ....ဒါ မဖြစ်နိုင်ဘူး မဟုတ်လား။

ဝိဥာဥ်ကပဲ ပရလောကထဲ ဝင်သွားတာ မဟုတ်ဘူးလား။

ဒါပေမယ့် သူက အမျိုးသမီးအဝတ်အစားတွေ ဝတ်ထားတဲ့ ယောက်ျားတစ်ယောက်အဖြစ် ပြောင်းသွားတာလေ။

ဒီလိုစွန့်လွှတ်အနစ်နာခံလိုက်ရတဲ့ ပုံစံကြီးက အရမ်း မယုံနိုင်စရာကောင်းလွန်းလိုက်တာ...။

ဒါဖြင့် သူက သေသွားတာလား။

လည်ပင်းနောက်ပိုင်းနှင့် နားရွက်ဘေးက ဆံပင်များအကြောင်း တွေးကြည့်ရုံနှင့် ချူဟွိုက်က တစ်ခဏကြာ စိတ်ဓါတ်ကျသွားရသည်။ သူ့ညီငယ်လေးလည်း ရှိသေးသလား သေချာရန် စကပ်မ,ကြည့်ချင်မိသည်။

“ဘယ်လိုပဲဖြစ်ဖြစ် သူမရဲ့ ခြေတံရှည်တွေနဲ့ လက်တံရှည်တွေက်ို တွေ့လိုက်ရတော့ ကျွန်တော်တွက်ကြည့်တာမမှားရင် ကျွန်တော်တို့အတူတူ ရပ်ကြည့်လိုက်ရင်တောင် ကျွန်တော့်ထက် ပိုအရပ်ရှည်လောက်တယ်။ ၁.၈မီတာလောက် ရှိမယ်"

ထိုလူ့စကားကို နားထောင်ရင်း ချူဟွိုက်က အနည်းငယ် စိတ်သက်သာရာရသွားသည်။ အခုလေးတင် ကြားလိုက်ရသည့် စိတ်ပျက်ဖွယ်အသံကပင် ထူးထူးခြားခြား နားထောင်ကောင်းနေသလို ခံစားမိသည်။

ကြည့်ရတာ အမျိုးသမီး အဝတ်အစား ဝတ်ထားတာကို လက်မခံနိုင်တဲ့ပုံတော့ မရှိပါဘူး။

အမှန်တွင် သူ၏ လက်ရှိ ရုပ်ပိုင်းဆိုင်ရာ အခြေအနေက အရှုပ်တစ်ခု ဖြစ်နေသည်။ သူသာ ယောကျ်ားလေးတစ်ယောက် အသွင်နှင့် ပျော့ဖတ်ဖတ် ပုံစံဖြစ်နေပါက သူတို့က ထိုလူမျိုးကို သနားကြင်နာသည့်ပုံ ပြကြမည်မဟုတ်ပေ။ သို့သော်လည်း ယောက်ျားတိုင်းက အားနည်းသည့် ဆန့်ကျင်ဘက်လိင်များကို ကာကွယ်ပေးလိုသည့် ပင်ကိုယ်သဘာဝ ရှိတတ်ကြသည်။ ထို့ကြောင့် အမျိုးသမီးများက အမျိုးသားများ ဂရုဏာသက်လာစေရန် လုပ်နိုင်စွမ်းရှိကြလေသည်။

ဒါဆို....

ချူဟွိုက်က ဤကိစ္စအကြောင်း စဥ်းစားနေရင်း သူ့ခန္ဓာကိုယ်ထဲ စုပြုံလာသည့် ယင်စွမ်းအင်က ဖိနှိပ်ခံထားရပြီး ယခင်ကလို ရူးမသွားသည့်အတွက်ကြောင့် အံ့သြသွားရသည်။

ထို့ပြင် သူ၏ ကိုယ်အင်္ဂါအစိတ်အပိုင်းများနှင့် အရိုးများကလည်း အားအနည်းငယ် ပြန်ပြည့်လာသလို ခံစားရသည်။

ဒီလူကြောင့်များလား....။

လော့ဇီယန်:" ဘော့စ်။ ဘတ်စ်ကားရပ်မယ့် အချိန် ရောက်ခါနီးပါပြီ။ ကျွန်တော် တစ်ချက်ကြည့်လိုက်တော့ ဘော့စ်လက်ထဲက တစ်ယောက်အပါအဝင် အသစ်ဝင်လာတဲ့သူ စုစုပေါင်း လေးယောက်ရှိပါတယ်"

ကျင်းထျန်းယိက အသာအယာ ပြန်ဖြေလာသည်။ သူ့လက်ထဲ လှဲနေသည့် လူက နိုးနေဟန်ရှိသည်။သူက ချူဟွိုက်ထတော့မည်ဟု ထင်လိုက်၍ တစ်ဖက်လူ လက်ပြန်ရုတ်သွားရန် မတ်မတ်ထိုင်လိုက်သော်လည်း ချူဟွိုက်က ရုတ်တရက် သူ့ကို တည့်တည့်ကြည့်လာ၍ ကျင်းထျန်းယိက အံ့အားသင့်သွားရသည်။

သူ့ရှေ့က လူက ကြည်လင်သော အနက်ရောင် မျက်လုံးများရှိကာ အထဲရှိ မျက်ဆံတစ်စုံကလည်း မဟူရာရောင် တောက်ပနေသည်။

ချူဟွိုက်က ကျင်းထျန်းယိဆိုသည့်သူက အရမ်း ကြည့်ကောင်းနေမည်ဟု ထင်မထား၍ တစ်စက္ကန့်မျှ ကြောင်အသွားရသည်။ ထိုလူက စူးရှသည့် မျက်ခုံးများနှင့် ထင်းထွက်နေသည့် မျက်နှာအစိတ်အပိုင်းများရှိ၍ မယုံနိုင်လောက်အောင် ချောမောလေသည်

။

သူက အသိပြန်ဝင်လာရင်း ရှက်ရိပ်သန်းနေသော မျက်နှာမျိုး လုပ်ပြလိုက်ပြီးနောက် ချူဟွိုက်က ထိုအမျိုးသား၏ ခါးဘက်ကို ခပ်တင်းတင်း ဖက်ထားလိုက်ရင်း သူ့ရင်ဘတ်ကို မျက်နှာနှင့် ပွတ်သတ်လိုက်ကာ ကြောင်ပေါက်လေးတစ်ကောင်လို ကလူသလိုမြူသလို လုပ်နေလိုက်သည်။

“မင်း..." ကျင်းထျန်းယိက တစ်ခုခုပြောချင်နေသော်လည်း တွန့်ဆုတ်ဆုတ်ဖြစ်နေပြီး သူ့ခန္ဓာကိုယ်တစ်ခုလုံးကလည်း တောင့်တောင့်ကြီးဖြစ်နေသည်။

ချူဟွိုက်ကို အမျိုးသမီး အဝတ်အစားဝတ်ရန် တွန်းအားပေးထားသည်က ကိစ္စတစ်ခုခု ရှိလောက်မည်ဟု အစက တွေးမိသည်။ သို့သော်လည်း ချူဟွိုက်က သူကိုယ်တိုင် အသားကျနေသည့်ပုံ ဖြစ်နေသည် မဟုတ်ပါလား။

ချူဟွိုက်က ထိုလူ့ရင်ခွင်ထဲ ခေါင်းတိုးဝင်လိုက်ရင်း ပြောလာသည် " ကျွန်မ ကြောက်တယ်"

သူ့အသံက ကျေနပ်ဖွယ်ကောင်းအောင် နူးညံ့နေပြီး အဖျားတွင် အနည်းငယ် တုန်ခါသွား၍ သနားစရာပုံစံလေး ဖြစ်နေသည်။ လော့ဇီယန်က တစ်ဖက်မှနေ၍ တံတွေးမြိုချလိုက်ရာ သူ၏အာဒံပန်းသီးက အပေါ်အောက် တုန်ခါနေသည်။

ထိုခဏ ချူဟွိုက်က သူ့ခန္ဓာကိုယ်ထဲရှိ ဝိဥာဥ်ကို ထိုလူက ချုပ်ထိန်းထားနိုင်သည် ဆိုသည့် ခန့်မှန်းချက်ကို အတည်ပြုလိုက်ရသည်။

သူက ထိုလူကို တင်းတင်းကျပ်ကျပ် ဖက်ထားလိုက်ချိန် သူ့ကိုယ်ထဲ ပြန့်ကျဲနေသည့် ယင်စွမ်းအင်က စုပ်ယူခံရသလို တဖြေးဖြေး ပျောက်ကွယ်စပြုလာသည်။

ချူဟွိုက်က ထိုလူ၏ ဇာတ်မြစ်ကို သိချင်လာရသည်။ အဖိုးကြီး(လောင်)ယွဲ့ ပြောသလိုမျိုး ယန်စွမ်းအင်ရှိတဲ့သူလား...။

ယန်စွမ်းအင်ရှိသော သူများက ဝိဥာဥ်အပူးမခံရနိုင်သလိုအခြားသူများနှင့်မတူပဲ မွေးဖွားလာသည့်အတွက် မကောင်းဆိုးဝါးဝိဥာဥ်များကို ထိန်းချုပ်နိုင်ကြသည်။

ကြည့်ရတာ သူ ကံကောင်းပြီထင်တယ်။ ဒီပရလောကထဲ ဝင်ဝင်ချင်း ဒီလိုလူမျိုးနဲ့ ထိပ်တိုက်တွေ့ရတယ်လို့။

နောက်ပိုင်းမှာ ဒီလူ ယုံကြည်နိုင်မယ့် နည်းလမ်းကို ရှာရတော့မယ်နဲ့ တူတယ်။

ချူဟွိုက်၏ လက်က ဂနာမငြိမ်ပဲ ကျင်းထျန်းယိ၏ ကျောရိုးကို ပွတ်သတ်လိုက်သည်။ တစ်ဖက်လူ၏ မျက်လုံးများက နက်ရှိုင်းသွားပြီး ချူဟွိုက်ကျောပြင်ကို ပြန်လည် ပွေ့ဖက်လာသည်။

သူ့တွင် ထင်ရှားသည့် လက်ဆစ်များနှင့် ရှည်မျောမျော လက်တစ်စုံ ရှိသည်။ ခဏအကြာတွင် မြင်ကွင်းက စိတ်ကြည်နူးဖွယ်ကောင်းသည့် ပုံစံလေး ဖြစ်နေသည်။

ချူဟွိုက်၏ ခန္ဓာကိုယ်က အနည်းငယ် တောင့်တင်းသွားရင်း အလိုက်သင့်နေပေးလာသည်။ သူ၏ နားရွက်များက နီမြန်းလာပြီး ရှက်ပြုံးလေးတစ်ခုပင် ပြလာသည်။ လော့ဇီယန်က ခေါင်းလှည့်သွားပြီး သူ့ရင်ထဲ တိတ်တဆိတ် ငိုကြွေးနေမိသည်။

အဲ့ဒီမိန်းမပျိုလေးက ဝင်ပေါက်ကို ဖြတ်ပြီးတာနဲ့ ဘာလို့ သူ့ဘေးနား လာမထိုင်ရတာလဲ။

“မင်းနာမည် ဘယ်လိုခေါ်လဲ" ကျင်းထျန်းယိက မေးလေ့မေးထရှိသလို မေးလိုက်သည်။

ချူဟွိုက်က ခဏရပ်သွားရင်း အသံတိုးတိုးလေးနှင့် ပြန်ဖြေလာသည် " ချူကျောင်း...ချူက နူးညံ့ပြီးတော့ ကျောင်းက အားနည်းတယ်"

ကျင်းထျန်းယိ:"....."

"လူတိုင်းကတော့ ကျောင်းကျောင်းလို့ပဲ ခေါ်ကြတာကြောင့် ရှင်လည်း အဲ့ဒီလို ခေါ်လို့ရတယ်"

“……ကောင်းပြီ”

ချူဟွိုက်:"ရှင့်နာမည်ကရော"

"ကျင်းထျန်းယိ"

ရုတ်တရက် ဘတ်စ်ကားရပ်သွား၍ ချူဟွိုက်က ခေါင်းစောင်းပြီး အပြင်ကို ကြည့်လိုက်သည်။ ပြတင်းပေါက်အပြင်ဘက်က မှောင်မိုက်ပြီး ဘာမှမမြင်ရ၍ စိတ်အားငယ်ပြီး ခေါင်းကိုက်သွားစေနိုင်သည်။

သူက ရုတ်တရက် ပေါ်လာသည့် မြင်ကွင်းတစ်ခုကြောင့် လန့်သွားရသည်။ ထင်မထားစွာ ခေါင်းထိုးကိုက်လာပြီး သက်သာသွားသည်နှင့် သွေးစာတန်းတစ်ခု ပေါ်လာသည်။

[ကိစ္စရပ်တစ်ခု ထုတ်ပြန်ခြင်း]

[အမည်=ချူဟွိုက်]

[ဖြစ်စဥ်တွင် ပါဝင်ဖူးသည့် အကြိမ်ရေ=မရှိ]

[တာဝန်=ချောင်မိသားစုမှာ သေသွားတဲ့ သားတစ်ယောက် ရှိတယ်။ သုံးရက်အကြာမှာ မင်းက ချောင်မိသားစုရဲ့ မွန်မြတ်သန့်စင်တဲ့ အိမ်တော်မှာ ကျင်းပတဲ့ ဝိဥာဥ်လက်ထပ်ပွဲမှာ ရပ်ဝေးဆွေမျိုးအဖြစ် ပါဝင်ရမယ်]

[ထုတ်ပြန်ချက် ပြီးဆုံး]

“မစ်ရှင် စပြီ" လော့ဇီယန်က ပြောလိုက်သည်။

ထိုခဏ ဘတ်စ်ကားပေါ်မှ အသစ်လေးများအားလုံး မျက်နှာပုံစံအမျိုးမျိုးနှင့် နိုးလာကြသည်။

ကျင်းထျန်းယိက လော့ဇီယန်ကို တစ်ချက်ကြည့်လိုက်၍ တစ်ဖက်လူက ချက်ချင်းသဘောပေါက်သွားကာ အသစ်လေးများကို အခြေအနေအကျဥ်းချုပ် ရှင်းပြလာသည်။

လော့ဇီယန်က အာခေါင်ခြောက်မှ စကားရပ်သွားပြီး နောက်ဆုံးတွင် ဘတ်စ်ကားတံခါး ပွင့်သွား၍ သူက အရင်ဆုံး ခုန်ဆင်းလိုက်သည်။

“ကားပေါ်က ဆင်းလိုက်" ကျင်းထျန်းယိက ချူဟွိုက်ကို ကားအပြင်ဘက် ခေါ်သွားလိုက်သည်။

ချူဟွိုက်က ယခုလေးတင် ပေါ်လာသည့် ချောင်မိသားစု၏ မွန်မြတ်သန့်စင်သော အိမ်တော်ရှေ့ မတ်တပ်ရပ်လိုက်ရင်း အနည်းငယ် ရယ်ချင်သွားသည်။

သူ....တကယ်ကြီး မတ်တပ်ရပ်လို့ရနေတယ်။

ယခင်က ဘီးတပ်ကုလားထိုင်တွင် ထိုင်ခဲ့ရသည့်အတွက် ပြဿနာတစ်ခု မဟုတ်ခဲ့သော်လည်း ရုတ်တရက်ကြီး မတ်တပ်ရပ်လို့ရသွား၍ သူ့ခြေထောက်များက နေသားမကျသလို ခံစားရသည်။

သူက ပရလောကတွင် အမျိုးသမီးအဝတ်အစား ဝတ်ထားရ၍ သူ၏ သရုပ်ဆောင်နိုင်စွမ်းကလည်း ပရလောက၏ မျှခြေရလဒ်ဖြစ်နိုင်သည်။ယင်းက သေချာပေါက် ကျင်းထျန်းယိ၏ လွှမ်းမိုးနိုင်မှုလည်း မဟုတ်ရချေ။

အရင်လူဖြစ်ဖြစ် နောက်လူဖြစ်ဖြစ် လုပ်ရန်ဆန္ဒရှိသည့်သူက သူသာ ဖြစ်သည်။

ဆိုရလျှင် ကျင်းထျန်းယိကလည်း သူ့အပေါ် ထင်မြင်ချက် ကောင်းကောင်းရှိသည့်ပုံပေါ်သည်။ သူ့ကို ငြင်းပယ်ရမည့်အစား သူ့နှင့် လိုက်ကစားပေးပြီး သူ့လက်ကိုပင် ကိုင်ထားသေးသည်။

ကျင်းထျန်းယိက ပွင့်ပွင်လင်းလင်းရှိ၍ ကိုင်တွယ်ရ လွယ်ကူလေသည်။

တစ်ဖက်လူအပေါ် မှီခိုနေရသည့် ချူမမလေးက ချက်ချင်းပင် ကျင်းထျန်းယိ၏ လက်ကို ရင်းနှီးသလို ဆုပ်ကိုင်လိုက်သည်။

မွန်မြတ်သန့်စင်သော အိမ်တော်က အလွန် ကြီးမားလေသည်။ ဆေးဖြူရောင် သုတ်ထားပြီး ခေါင်မိုးကမြင့်မားကာ မီးခိုးရောင် အုတ်နံရံကြီး ကာထားလေသည်။ နံရံနှစ်ဖက်လုံးတွင် မီးဘေးကာကွယ်ရန်အတွက် မြင်းခေါင်းတစ်ခုလည်း ရှိသည်။ အိမ်တော်တစ်ခုလုံးက ဗိသုကာပညာရှင်အဖွဲ့မှ ဒီဇိုင်းဆွဲထားခြင်း ဖြစ်နိုင်သည်။

ဤနေရာ၏ လီတာပေါင်းများစွာအတွင်း ချောင်မိသားစုက အချမ်းသာဆုံး ဖြစ်သည်။

ဤကိစ္စတွင် ပါဝင်သည့်သူက စုစုပေါင်း ခြောက်ယောက်ရှိကာ ချူဟွိုက်ကို အမျိုးသမီးတစ်ယောက်အဖြစ် ရေတွက်လိုက်လျှင် အမျိုးသားသုံးယောက်နှင့် အမျိုးသမီးသုံးယောက် ရှိပေမည်။

ကျင်းထျန်းယိက သွားပြီး တံခါးခေါက်လိုက်သည်။ အတန်ငယ်ကြာပြီးနောက် အထဲမှ တံခါးဖွင့်လာသည်။ အစေခံက ကျင်းထျန်းယိနှင့် အခြားသူများကို မြင်သည်နှင့် နွေးနွေးထွေးထွေး ပြောလာသည်

" ကျေးဇူးပြုပြီး အထဲကြွပါ။ ဧည့်သည်ခန်းကို ပြင်ဆင်ပေးထားပြီးပါပြီ။ ဒီရက်ပိုင်း သခင်မကြီးက အရင်တုန်းက အကြောင်းတွေ ပြောနေသေးတာ"

အသစ်ကလေးများက ပျာယာခတ်သွားဟန် လော့ဇီယန်ကို တစ်ယောက်ပြီးတစ်ယောက် ကြည့်လာကြသည်။ လော့ဇီယန်က အရင်က ပါဝင်သူ ဖြစ်ဖူးသည် ဆိုသည့်အကြောင်း ပြောခဲ့၍ သူက သူတို့၏ ကျောရိုးတိုင်ကြီး ဖြစ်လာရသည်။

“မင်းတို့ ငါ့ကို ဘာာလုပ်ဖို့ ကြည့်နေကြတာလဲ" လော့ဇီယန်က မျက်မှောင်ကြုပ်လိုက်သည် " အထဲဝင်ကြ"

အသစ်လေးများ၏ သဘောထားက သူ့ကို စိတ်ကျဥ်းကျပ်စေသည်။ ပွင့်ပွင့်လင်းလင်း ပြောရပါက ဤမျက်နှာပြောင်သည့် အသစ်လေးများက ကြာကြာအသက်မရှင်နိုင်သလို တစ်ဖွဲ့လုံးလည်း ချေမှုန်းခံရနိုင်သည်။

သူက အလှလေးဘေးနား ရပ်နေသည့် ကျင်းထျန်းယိကို ဝမ်းနည်းတကြီး စိုက်ကြည့်လိုက်သည်။ ဤကဲ့သို့ ကျေးဇူးတင်စရာမကောင်းသည့် တာဝန်ကြီးက အမြဲတမ်း သူ့အပေါ်သာ ကျတတ်၍ပင်။

အစေခံက လူတိုင်းကို အထဲခေါ်သွားပြီး အသစ်လေးများကလည်း ပတ်ပတ်လည်ကို စိုက်ကြည့်နေကြသည်။

ချူဟွိုက်က ကျင်းထျန်းယိ၏ အင်္ကျီစကို ဆွဲယူလိုက်ရင်း တိုးတိုး မေးလိုက်သည် " ကျွန်မတို့က ခေတ်သစ်အဝတ်အစားတွေ ဝတ်ထားတာကို မြင်သွားတော့ ဘာလို့ အစေခံက ထူးဆန်းသလို မကြည့်သွားရတာလဲ"

“ပြီးတော့ ကျွန်မတို့က ချောင်မိသားစုရဲ့ ရပ်ဝေးဆွေမျိုးလည်း မဟုတ်ဘူးလေ"

ကျင်းထျန်းယိက ဆိုလာသည် " ဖြစ်ရပ်ရဲ့ ရလဒ်ကို ထိန်းသိမ်းဖို့ ကမ္ဘာကြီးက ပိုးကောင်တွေအားလုံးကို သူ့အလိုလို ရှင်းပြပေးသွားလိမ့်မယ်"

အစေခံက လူတိုင်းကို ကြေကွဲခြင်းခန်းမကို အရင်ခေါ်သွားလိုက်သည်။ ခန်းမထဲတွင် အနက်ရောင် အခေါင်းကြီး နှစ်ခု ချထားသည်။ ဘယ်ဘက်က အခေါင်းက အနည်းငယ် ပိုကြီးပြီး ကောင်းကောင်းမွန်မွန် လုပ်ထားခြင်းဖြစ်သည်။ ယင်းက ချောင်သခင်မကြီး၏ သားဖြစ်သူ ချောင်ရုန်၏ အခေါင်းဖြစ်ပြီး ညာဘက်က အခေါင်းက အမျိုးသမီးတစ်ယောက်အခေါင်း ဖြစ်ရမည်။

ရိုးရာအတိုင်းဆိုပါက အနက်ရောင်အခေါင်းများမှာ နာမကျန်းဖြစ်ခြင်း သို့မဟုတ် မတရားခံရပြီး သေသွားရသူများအတွက် ဖြစ်သည်။

အသစ်ကလေးများက အခေါင်းကို တွေ့သောအခါ တစ်ခဏမျှ မျက်နှာများ ဖြူဖျော့သွားရင်း မျက်လုံးများ ဟိုကြည့်သည်ကြည့် ကြည့်နေကြသည်။ လေတစ်ရှိုက်ကြောင့် တံခါးပေါ် ချိတ်ထားသည့် အဝတ်ဖြူစများက ဖြေးဖြေးချင်း ဝှေ့ဝဲသွား၍ ခန်းမတစ်ခုလုံး ရုတ်တရက် မှောင်မည်းသွားသည်။

အမွှေးတိုင်ကို မီးညှိလိုက်ပြီးချိန် ချူဟွိုက်က ဖြေးဖြေးချင်း လှုပ်ရှားလိုက်သည်။ သူက အစေခံက လူစုနှင့် စကားပြောနေသည်ကို အခွင့်ရေးယူပြီး အခေါင်းနှစ်ခုကို တိတ်တိတ်လေး ပတ်ကြည့်လိုက်သည်။

သူ့ခြေလှမ်းများ တိခနဲ ရပ်သွားရပြီး မျက်ဝန်းများပင်ကျဥ်းမြောင်းသွားသည်။

အခေါင်းအသေးလေးတွင် အဆောင်များစွာ ကပ်ထားပြီး အဝါရောင်အင်းစာရွက်တစ်ခု၏ ထောင့်နားက ဖော်ပြထား၍ သူက မြင်သွားလေသည်။

အခေါင်းနှစ်ခုစလုံးသာ ကပ်ထားလျှင် သတိထားမိစရာ မရှိသော်လည်း ....

ချူဟွိုက်က စိတ်အေးအေးထားပြီး စစ်ဆေးရန် လှည့်ပတ်ကြည့်လိုက်ချိန် ထိုအခေါင်းတစ်ခုတည်းကသာ ကပ်ထားမှန်း အတည်ပြုမိသွားသည်။

အရေးကြီးတဲ့ အပိုင်းက သူတို့က ဘာလို့ အဝါရောင် အင်းစာရွက် ကပ်ထားရတာလဲ။

သူတို့က ဘာကို ကြောက်နေကြတာလဲ။

👻

Prev Next