Chapter 19

👥️Chapter 19

၁၈ လွှာ၊ တိုက် A ၊ ဝေ့ဟွား အဆောက်အဦး၌ .. မနက် ၁၀ နာရီ ဝန်းကျင်ခန့်တွင် ယန်အန်းယုသည် ဒါရိုက်တာကျိုး ပေးထားသည့် လိပ်စာအတိုင်း ရောက်လာခဲ့သည်။ 

“ဟားဟား ရှောင်ယု ငါ မင်းကို မျှော်နေတာ ...”

သူ့ကို မြင်လိုက်သည်နှင့်တစ်ပြိုင်နက် ဒါရိုက်တာကျိုးက အားရဝမ်းသာ ပြေးလာခဲ့သည်။ 

ယခင်က ဒါရိုက်တာကျိုးသည် ယန်အန်းယု၏ သရုပ်မှန်ကို မသိခဲ့ချေ။ တစ်ဖက်လူသည် ယန်ကျွယ့်၏ ညီငယ်လေး ဖြစ်သည်ဟု သိရပြီးသည့်အခါ သူ့စိတ်ထဲတွင် အံ့ဩဝမ်းသာ ဖြစ်မိသွားတော့သည်။ ထိုကဲ့သို့သော နောက်ခံမျိုးနှင့်သာဆိုလျှင် ယန်အန်းယုသည် နောင်တစ်ချိန်ချိန်၌ အနုပညာလောကထဲသို့ ဝင်သည့်တိုင် အလွယ်တကူ အနိုင်ကျင့်ခံရတော့မည် မဟုတ်ပေ။ 

စိမ်းသက်နေသည့် ပတ်ဝန်းကျင်ကြောင့် ယန်အန်းယုသည် လာရာလမ်းတစ်လျှောက် စိတ်ဖိစီးနေခဲ့မိသည်။ သူနှင့် ရင်းနှီးနေသည့် မျက်နှာကို မြင်လိုက်ရကာမှ စိတ်အေးသွားပြီး အားရဝမ်းသာ ပြုံးနိုင်လာ၏။ 

“ဒါရိုက်တာကျိုး မတွေ့ရတာ ခဏလေးပဲ ရှိသေးတာကို ပိုပြီးတောင် ခန့်ညားလာပြန်ပြီနော် ...”

“ဟားဟား ကောင်လေး မင်း ဘယ်တုန်းက ဒီလောက်အထိ နှုတ်ချိုသွားရတာလဲ “လက်ဝှေ့ကျော်” ရဲ့ တုန့်ပြန်မှုတွေက တအား ကောင်းနေတော့ ငါလည်း ပျော်နေမိတာပေါ့ကွာ ...”

ဒါရိုက်တာကျိုးက သူ့နောက်ကျောကို ပုတ်ကာ ပြောလိုက်သည်။ ထို့နောက် သူ့ကို အတွင်းဆုံး အခန်းထဲသို့ ခေါ်လာလိုက်၏။ စတူဒီယိုထဲတွင် သရုပ်ဆောင်တစ်ဦးက လူရွေးပွဲ ဝင်ဖြေနေကာ ဘေးနားတွင် ဒါရိုက်တာရှုနှင့် လက်ထောက်ဒါရိုက်တာက စခရင်ကို ကြည့်၍ အသံခပ်တိုးတိုးဖြင့် ဆွေးနွေးနေကြသည်။ 

ထိုနေရာသို့ မလာမီ ယန်အန်းယုသည် ဒါရိုက်တာရှုနှင့် ပတ်သက်သည့် သတင်းအချို့ကိုလည်း ရခဲ့သေးသည်။ 

ဒါရိုက်တာ ရှုဟောက်ကျန်းသည် ပြည်တွင်းရှိ ထိပ်တန်းဒါရိုက်တာ ဆယ်ဦးအနက် တစ်ဦးအပါအဝင် ဖြစ်ကာ ရုပ်ရှင်ထုတ်လုပ်ရေးနယ်ပယ်တွင်လည်း လွန်စွာ ဩဇာလွှမ်းမိုးနိုင်သူ ဖြစ်ပေသည်။ 

သူ၏ ရုပ်ရှင်ရိုက်ကူးမှု ပညာရပ်မှာ အခြားလူများနှင့် သိသိသာသာ ကွဲပြားခြားနားနေသည့်အပြင် ခံစားချက်တို့ကို ဖော်ပြသည့် ပုံစံမှာလည်း သန်မာအားကောင်းသည်ဟု ဆို၍ ရပေသည်။ သူ၏ လက်ရာအများစုမှာ အချိန်ကာလ ကြာမြင့်စွာ ဖိနှိပ်လှောင်ပိတ်ထားသော စိတ်ခံစားချက်များ မျက်စိတစ်မှိတ်အတွင်း တစ်ရှိန်ထိုး ပေါက်ကွဲထွက်လာသည့် မင်သက်ဖွယ် ခံစားချက်များကို အဓိကထား တင်ဆက်ထားခြင်း ဖြစ်သည်။ 

ဒါရိုက်တာရှုသည် သူ၏ ထူးခြားပြောင်မြောက်လှသော ရုပ်ရှင်အယူအဆကို ၈ နှစ်တိုင်တိုင် ရှာဖွေထားခဲ့ရကာ သူ၏ လက်ရာအများစုမှာလည်း မြောက်များစွာသော ရုပ်ရှင်ပွဲတော်အသီးသီး၌ ဆုများ အလီလီ ဆွတ်ခူးနိုင်ခဲ့သည်။ ထို့အပြင် ဤ ၂ နှစ်အတွင်း သူသည် အက်ရှင်ဇာတ်လမ်းများကို အများအပြား ရိုက်ကူးခဲ့သည်။ 

“ရှောင်ယု ဒါရိုက်တာရှုက “လက်ဝှေ့ကျော်” ကို ကြည့်ပြီးကတည်းက အဲဒီ့ထဲက တိုက်ခိုက်ရေးအခန်းတွေကို တဖွဖွ ချီးကျူးနေခဲ့တာ မင်းက ယွီစစ်ယွမ်ရဲ့ စတန့်သမားမှန်းလည်း သိရော မင်းကို တွေ့ချင်တယ်လို့ ပြောလာတော့တာပဲ ...”

ဒါရိုက်တာကျိုးက သူ့ကို မိတ်ဆက်ပေးလိုက်သည်။ 

ဒါရိုက်တာရှု ရိုက်ကူးရန် ပြင်ဆင်နေသည့် ရုပ်ရှင်မှာ “နှလုံးသား၌ ထုဆစ်လေသော” အမည်ရ ဂိုဏ်းစတား အက်ရှင်အမျိုးအစား ရုပ်ရှင်တစ်ခု ဖြစ်ပေသည်။ သူသည် အဓိကဒါရိုက်တာအဖြစ်သာမက ထုတ်လုပ်သူအဖြစ်ပါ တာဝန်ယူထားသည့်အတွက် သရုပ်ဆောင် ရွေးချယ်ရာတွင် ပုံမှန်ထက်ပင် ပိုမိုကာ အလေးထားခဲ့သည်။ ဤတစ်ကြိမ်တွင်မူ ဒါရိုက်တာကျိုးသည် ရိုက်ကူးရေးအဖွဲ့၌ ပါဝင်ထားခြင်း မရှိဘဲ လေ့လာရန်သာ ရောက်လာခဲ့ခြင်း ဖြစ်ကာ ဒါရိုက်တာရှုက သူမှတစ်ဆင့် ယန်အန်းယုကို တွေ့ဆုံလိုသူ ဖြစ်ပေသည်။ 

“ဒါရိုက်တာရှု မင်္ဂလာပါ ...”

ယန်အန်းယုက ဒါရိုက်တာရှုကို လေးလေးစားစား နှုတ်ဆက်လိုက်၏။ 

ယီချန်းယန်ဟု ပြောလိုက်လေတိုင်း အားလုံးက နောက်ထပ် ရုပ်ရှင်ဧကရာဇ်တစ်ဦးဖြစ်သူ ရှုရှစ်ယွမ်ကိုပါ အတူတူ ဖော်ညွှန်းလေ့ ရှိကြသည်။ နှစ်ဦးလုံးမှာ သက်တူရွယ်တူ ဖြစ်ကြသည့်အပြင် ပြောင်မြောက်လှသည့် သရုပ်ဆောင်စွမ်းရည်ကို ပိုင်ဆိုင်ထားကာ အမြဲလိုလို အခြေခိုင်မာသည့် ရုံဝင်နှုန်းနှင့် ရုပ်ရှင်ဝေဖန်ရေးသမားများ၏ ချီးကျူးမှုများကို ပိုင်ဆိုင်ကြသူများ ဖြစ်ပေသည်။ 

ဒါရိုက်တာရှုသည် လူသစ်များအား အသုံးပြုရခြင်းကို အလွန် နှစ်ခြိုက်လှသူ ဖြစ်သည်။ ပြီးခဲ့သည့်နှစ်က အသစ်စက်စက် ရုပ်ရှင်ဧကရာဇ် မုန့်ယာသည် ယခင်က ရှုရှစ်ယွမ်၏ လက်ထောက်တစ်ဦး ဖြစ်ခဲ့ဖူးကာ  ရှုရှစ်ယွမ် ရိုက်ကူးရေးလုပ်သည့် နေရာသို့ လိုက်ပါလာစဉ် ဒါရိုက်တာရှု၏ မျက်စိကျခြင်းကို ခံခဲ့ရသည်။ 

ဒါရိုက်တာရှုသည် ဒါရိုက်တာကျိုးထက် ခေါင်းတစ်လုံးခန့်ပင် ပိုပြီး နိမ့်သေးသည့်တိုင် အရှိန်အဝါမှာမူ လုံးဝဥဿုံ ကွဲပြားလှပေသည်။ ယန်အန်းယုကို တိတ်တဆိတ် အကဲခတ်နေသည့် သူ့အကြည့်တို့မှာ စွန်ရဲတစ်ကောင်အလား စူးရှလှကာ နေရခက်သည့် အငွေ့အသက်မျိုးကို အမှန်တကယ် ပေးစွမ်းနိုင်ခဲ့သည်။ 

“အရပ်က ၁၇၀ ၁၈၀ ဝန်းကျင်ပဲ ...”

ဒါရိုက်တာရှုက လက်ဟန်ခြေဟန်ပြကာ ခေါင်းငြိမ့်လိုက်သည်။ 

“မျက်နှာကလည်း အားခန်းရဲ့ ဇာတ်ကောင်နဲ့ လိုက်ပါတယ် တစ်ခုပဲ ဝလွန်းနေတယ် ...”

ဝတယ် ဟုတ်လား ...

ယန်အန်းယုက ကြောင်အသွား၏။

စင်စစ်အားဖြင့် ယန်အန်းယုမှာ ဝသည်ဟုပင် မဆိုနိုင်၊ သို့သော် သူ့မျက်နှာကမူ အလွယ်တကူ မို့တက်ဖောင်းကားလာတတ်ပေသည်။ 

ထို့အပြင် ထန်းကော်ကလည်း နေ့ရှိသရွေ့ သူ့နားရွက်နားသို့ ကပ်ကာ “သခင်လေး သခင်လေးက တအားကို ပိန်လွန်းနေတယ်” ဟု တဖွဖွပြောရင်း အသားနှင့် ငါးများကို ဖောဖောသီသီ ပြင်ဆင်ကျွေးမွေးလေ့ ရှိသည့်အပြင် စားသောက်ပြီးချိန်တွင်လည်း အချိုတည်းစရာများကိုပါ အရန်သင့် ထားထားပေးတတ်သည်။ 

သူ့အမူအယာကို မြင်သည့်အခါ ဒါရိုက်တာကျိုးက ပြုံးလျက် ရှင်းပြလာသည်။ 

“ရှောင်ယု ဒါရိုက်တာရှုက ဒီလောကထဲမှာတော့ တည့်တိုးဆန်တယ်ဆိုပြီး နာမည်ကြီးပဲ .. သူက စိတ်ထဲရှိတဲ့အတိုင်း ထုတ်ပြောတတ်တာ မင်းလည်း သိပ်မကြာခင် ကျင့်သားရသွားပါလိမ့်မယ် ...”

နာမည်ကြီး   A အဆင့် သရုပ်ဆောင်ဖြစ်စေ၊ D အဆင့် တက်သစ်စ အနုပညာရှင်ဖြစ်စေ မည်သူတစ်ဦးတစ်ယောက်မှ ဒါရိုက်တာရှု၏ အဆိပ်ပြင်းလှသော လျှာစောင်းထက်မှုဒဏ်မှ မကင်းလွတ်ခဲ့ဖူးချေ။ သူ စိတ်ဆုံးဖြတ်ထားသည့် ဇာတ်ကောင်အတွက် ဝင်ရောက် အရွေးချယ်ခံကာ သူ ရိုက်ကူးမည့် ရုပ်ရှင်ထဲတွင် ပါဝင်သူတိုင်းကို ဒါရိုက်တာရှုသည် တန်းတူညီမျှသာ ဆက်ဆံလေ့ရှိသည်။ ထို့အပြင် သူသည် အခြားလူများ၏ အမူအယာအား အကဲခတ်ရန်လည်း လွန်စွာ ပျင်းရိသူ ဖြစ်ပေသည်။ 

“ဒီဇာတ်ကောင် အားခန်းနေရာက ဇာတ်လမ်း နောက်ပိုင်းကို ရောက်လေလေ ပိုပြီး ပိန်လာလေပဲ ဇာတ်သိမ်းပိုင်းမှာ ဆို ငတ်မွတ်ပိန်လှီနေတဲ့လူလို့တောင် ပြောလို့ရတယ် မျက်နှာဆိုတာကလည်း ပါးရိုးတွေ ခွက်တဲ့အထိကို ချောင်ကျနေရမှာ လူငယ်လေး မင်း မျက်နှာက တအားကြီး ဖောင်းနေလွန်းတယ် ကြည့်ရတာ မင်း ဒီရက်ပိုင်းအတွင်းမှာ တော်တော်လေးကို အစားကောင်းတွေ အများကြီး စားထားတယ် ထင်တယ် ဒီတိုင်း ဆက်စားနေလို့ မဖြစ်ဘူး သိရဲ့လား မဟုတ်ရင် ဝက်တစ်ကောင်လို ဝတုတ်ပြဲကွဲလာလိမ့်မယ် ...”

ယန်အန်းယု “...”

ဒါရိုက်တာရှုရဲ့ လျှာက တကယ်ကို အဆိပ်ပြင်းတာပဲဟ ...

“မင်းက ဟို စတန့်သမားညီလေး ယန်အန်းယုဆိုတာ မဟုတ်လား ...”

ထိုစဉ် လူရွေးပွဲအတွက် ယှဉ်ပြိုင်ပြီးသွားသည့် ယဲ့လင်းက အနားသို့ ရောက်လာကာ ပြုံးလျက် မေးလိုက်သည်။ သူ့မျက်နှာအစိတ်အပိုင်းများမှာ ကြည်လင်ရှင်းသန့်နေကာ နှုတ်ခမ်းတို့ကို ကွေးညွတ်လျက် ပြုံးပြသည့်အခါ ပို၍ပင် ထူးခြားတင့်တယ်သည့် ပုံရိပ်ကို ပေးစွမ်းနေတော့သည်။ 

“ရှောင်ယု ဒါက ယဲ့လင်းတဲ့ မင်း သူ့ကို သိလောက်မယ်ထင်တယ် ...”

ဘေးနားရှိ ဒါရိုက်တာကျိုးက သတိပေးလိုက်သည်။ 

“သူက ဒီဇာတ်လမ်းမှာ ဒုတိယဇာတ်လိုက်အဖြစ် သရုပ်ဆောင်မှာလေ ...”

ယန်အန်းယုက ခေါင်းငြိမ့်ပြလိုက်သည်။ 

“လင်းကော မင်္ဂလာပါ ...”

ချန်းယွီအကယ်ဒမီ၌ ရုပ်ရှင်မေဂျာကို အထူးပြု ယူထားသူတစ်ဦး ဖြစ်သည့်အလျောက် ယန်အန်းယုသည် သရုပ်ဆောင်အများအပြား၏ နာမည်များကို ကြားဖူးသိဖူးပေသည်။ 

အသက် ၂၆ နှစ်အရွယ် ယဲ့လင်းသည် နွေးထွေးကာ ဟာသဉာဏ်ရွှင်သည့် စိတ်နေစိတ်ထားကို ပိုင်ဆိုင်ထားကာ ဤနယ်ပယ်တွင် မျက်နှာကို ဗန်းပြ၍ အလုပ်မလုပ်သူတစ်ဦးလည်း ဖြစ်ပြီး ထူးကဲပြောင်မြောက်လှသည့် စွမ်းရည်ကို ပိုင်ဆိုင်ထားသော အရည်အချင်းရှိသည့် သရုပ်ဆောင်တစ်ဦး ဖြစ်ပေသည်။ 

ထို့အပြင် သူ၏ အစောပိုင်း နှစ်များ၌ လူငယ်အချစ်ဇာတ်လမ်းတစ်ပုဒ်တွင် ကလေးသရုပ်ဆောင်အဖြစ် ပါဝင်ခဲ့ဖူးသည်။ ထို့နောက် မူလအေဂျင်စီနှင့် စာချုပ်ကို ရပ်စဲကာ ဟွားချန်ကုမ္ပဏီသို့ ပြောင်းလာခဲ့ပြီး ရုပ်ရှင်ရိုက်ကူးရေးဘက်သို့ တစ်ဖြည်းဖြည်း ချဉ်းနင်းဝင်ရောက်လာလိုက်သည်။ ဤ ၂ နှစ်အတွင်း သူ၏ သရုပ်ဆောင်စွမ်းရည်မှာ များစွာ တိုးတက်လာခဲ့သည့်အပြင် ကိုယ်ခံပညာတွင်လည်း အခြေခံရှိသည့်အတွက် ဤ ဂိုဏ်းစတားရုပ်ရှင်အတွက် အလွန် သင့်လျော်သည့် သရုပ်ဆောင်တစ်ဦးဟုပင် ဆိုနိုင်ပေသည်။

“ကုရှင်းစီကနေ မင်းအကြောင်းတွေကို ကြားဖူးထားတယ် သူမ ပြောတာတော့ မင်းက အရမ်းကို အလားအလာရှိတဲ့ ချစ်စရာ ဂျူနီယာလေးတဲ့ ဒီရက်ပိုင်းအတွင်း Weibo မှာလည်း လူတိုင်းက မင်းအကြောင်းပဲ ပြောနေကြတာနော် ဟားဟား နောက်ဆုံးတော့ ဒီညီလေးကို ကိုယ်တိုင် တွေ့ရပြီ ...”

ယဲ့လင်းက သူ့ကို မျက်စိတစ်ဖက် မှိတ်ပြကာ ပြောလိုက်ကာ စစချင်း တွေ့ဆုံမှုတွင်ပင် ဂျူနီယာလေး၏ နှစ်သက်မှုကို အရယူလိုက်သည်။ 

“ကျွန်တော်က သာမန်လူတစ်ယောက်ပါပဲ လင်းကောလိုလည်း နာမည်မကြီးပါဘူး ကောဘက်က ကျွန်တော့်ကို တကယ်ကို တွေ့ချင်တာ ဆိုရင်တော့ ကျွန်တော်ကလည်း အချိန်မရွေး ကြိုဆိုနေပါတယ် ...”

ယန်အန်းယုက ပြုံးကာ ပြောလိုက်သည်။ 

“ဒါပေမယ့် ကျွန်တော့်အတွက်တော့ လင်းကောကို ကိုယ်တိုင်ကိုယ်ကျ တွေ့ခွင့်ရတယ်ဆိုတာ တကယ်ကို ဂုဏ်ယူစရာပါ ...”

ယဲ့လင်း၏ အကြည့်တို့ ပြောင်းလဲသွားကာ ပြုံးပြလျက် သူနှင့် လက်ချင်းဆွဲကာ နှုတ်ဆက်လိုက်သည်။ သူက ယန်အန်းယုသည် သန့်စင်ရိုးသားသည့် ပုံစံမျိုး ရှိသည့်တိုင် အတွေးတို့မှာမူ ထင်သလောက် မရိုးရှင်းလှဟု ခံစားမိလိုက်သည်။ 

ထို့နောက်တွင် ရှည်ရှည်ဝေးဝေး ကွေ့ပတ်ပြောမနေတော့ဘဲ ဒါရိုက်တာရှုက ယန်အန်းယုကို တိုက်ခိုက်ရေးဇာတ်ကွက် နှစ်ခုအား အစမ်း သရုပ်ဆောင်ခိုင်းလိုက်သည်။ ပထမဇာတ်ကွက်တွင် ယဲ့လင်းနှင့် တိုက်ခိုက်ရမည် ဖြစ်သည်။

ရုပ်ရှင်ထဲရှိ ယန်အန်းယု၏ ဇာတ်ကောင် အားခန်းသည် ဂိုဏ်းခေါင်းဆောင် ဟုန်သာ့ကျင်း၏ အမိန့်များကို လိုက်နာရသည့် လူသတ်သမားတစ်ဦး ဖြစ်ပေသည်။ ယဲ့လင်းကမူ ဒေသတွင်း အကြီးစား ရာဇဝတ်ဌာနသို့ တာဝန်ထမ်းဆောင်ရန် ရောက်လာသည့် အသစ်စက်စက် အရာရှိတစ်ဦး ဖြစ်၏။

 သူ၏ ဇာတ်ကောင် ကပ္ပတိန် လျန်ဟုန်မှာ ငယ်ရွယ်ကာ ဉာဏ်ရည်ထက်မြတ်ပြီး အမျိုးမျိုးသော သဲလွန်စများကို ခြေရာကောက်ရင်း ရန်သူ၏ အခြေစိုက်စခန်းထဲသို့ တစ်ဖြည်းဖြည်း ချဉ်းနင်းဝင်ရောက်နိုင်ခဲ့ကာ အရေးပါသည့် ဒုတိယဇာတ်လိုက် ဖြစ်ပေသည်။ 

ယန်အန်းယု ရိုက်ကူးရမည့် အခန်းများမှာ အလွန် နည်းပါးလှကာ စတုတ္ထဇာတ်လိုက်ဟုသာ သတ်မှတ်၍ ရနိုင်သည့် အနေအထားမျိုး ဖြစ်သော်လည်း ရပ်တည်မှု ကွဲပြားခြင်းများကြောင့် သူတို့နှစ်ဦးအကြားတွင် ထိပ်တိုက် ရင်ဆိုင်မှုများ မလွဲမသွေ ပေါ်ပေါက်လာမည် ဖြစ်သည်။ 

စတန့်ပြကွက် နည်းပြက သူတို့နှစ်ဦးကို လိုအပ်သည့် လှုပ်ရှားမှုများအား ပြသပေးလိုက်သည်။ တိုက်ကွက်များ အားလုံးမှာ ခက်ခဲခြင်း မရှိ၊ သာမန် ရိုးရှင်းသည့် အကွက်များသာ ဖြစ်သည့်အတွက် သူတို့နှစ်ဦးစလုံး အလျင်အမြန် နားလည်သဘောပေါက်သွားကြတော့သည်။ 

ဇာတ်ညွှန်းအရ ကပ္ပတိန် လျန်ဟုန်သည် အမြှောက်စာ လုပ်ဖော်ကိုင်ဖက် နှစ်ဦးသုံးဦးကို ကိုင်တွယ်ဖြေရှင်းကာ ပြန်လည်သက်သာလာရန် အနားယူနေစဉ်တွင် ရေခဲရိုက်နှလုံးသားပိုင်ရှင် အားခန်း ထွက်ပေါ်လာမည် ဖြစ်သည်။ 

အချက်ရေ အနည်းငယ်ခန့် တိုက်ခိုက်ပြီးနောက် ကပ္ပတိန် လျန်သည် အားခန်း၏ အနိုင်ယူမှုကို ခံလိုက်ရကာ သေနတ်မှာလည်း အဝေးသို့ လွင့်စင်သည်အထိ ကန်ထုတ်ခံလိုက်ရသည်။ ထို့နောက်တွင် အားခန်းက သူ့ကို မြေပေါ်သို့ ကိုင်ပေါက်လိုက်တော့သည်။ 

“Cut …”

လက်ထောက်ဒါရိုက်တာက OK ဟု လက်ဟန်ပြကာ အော်ပြောလိုက်သည်။ ဘေးနားတွင် ရပ်ကာ အကဲခတ်နေသည့် ဒါရိုက်တာကျိုးကလည်း ယန်အန်းယုကို ခေါင်းငြိမ့်ပြလိုက်၏။ သူတို့နှစ်ဦးအကြားတွင် ရပ်နေသည့် ဒါရိုက်တာရှုကမူ တစ်ခုခုကို အတွေးလွန်နေသည့်ဟန်ဖြင့် မေးစေ့ကို ပွတ်သပ်နေခဲ့သည်။ 

ဤဇာတ်ကွက်အား ရိုက်ကူးရန် စီစဉ်ရခြင်း၏ အကြောင်းအရင်းမှာ ယန်အန်းယု၏ စွမ်းရည်ကို သိလိုသောကြောင့်သာမက ယန်အန်းယုနှင့် ယဲ့လင်း၏ ပူးပေါင်းဆောင်ရွက်နိုင်စွမ်းကို အကဲခတ်လို၍လည်း ဖြစ်သည်။ 

အချို့သော သရုပ်ဆောင်များသည် ပူးပေါင်းဆောင်ရွက်ရာ၌ အားကောင်းကာ ထုတ်ပြောရန် မလိုဘဲ အလိုလို သိရှိနားလည်သည့် စွမ်းရည်ကို ပိုင်ဆိုင်ထားသော်ငြား ပုံမှန်အားဖြင့် စစချင်း တွေ့ဆုံကာစ သရုပ်ဆောင်နှစ်ဦးအကြား အေးစက်လှသည့် လေထုကို ချိုးဖျက်နိုင်ရန်မှာ မလွယ်ကူလှချေ။ အစောပိုင်းက သရုပ်ဆောင်သွားသည့် ယန်အန်းယုနှင့် ယဲ့လင်းတို့၏ ပူးပေါင်းလုပ်ဆောင်ချက်မှာ မဆိုးလှချေ။ 

“လင်းကော အဆင်ပြေရဲ့လား ...”

ယန်အန်းယုက သူ့ကို ဆွဲထူကာ မေးလိုက်သည်။ 

မတ်တပ် ထရပ်လိုက်ပြီးနောက် ယဲ့လင်းက ပါးစပ်တစ်ခုလုံး နားရွက်သို့ တက်ချိတ်လုမတတ် ပြုံးပြကာ ပြောလိုက်သည်။ 

“ရှောင်အန်းယု မင်းက တကယ်ကို ဝါရင့်ကျွမ်းကျင်သူပဲ ဖြစ်ရမယ် ...”

  ယန်အန်းယုက နှုတ်ခမ်းကို တင်းတင်းစေ့ထားလျက် အသံတိတ် ထောက်ခံလိုက်သည်။ သို့သော် ယဲ့လင်း၏ “ရှောင်အန်းယု” ဟု ခေါ်ဆိုသံကို ကြားလိုက်ရသည့်အခါ အနည်းငယ် အနေခက်သွားမိသည်။ 

ဒီနေ့မှ သူတို့တွေ ပထမဆုံးအကြိမ် စတွေ့တာကို .. ရှောင်အန်းယုလို့ ခေါ်ရလောက်တဲ့အထိ ရင်းနှီးသေးတာမှ မဟုတ်တာ ...

အကြိုက်မခံရတော့ကြောင်း သတိမပြုမိသေးသည့် နာမည်ကျော်ကြယ်ပွင့်လေးကမူ စကားများ အဆက်မပြတ် ပြောနေဆဲ ဖြစ်သည်။ 

မူလက ယဲ့လင်းသည် ယန်အန်းယုမှာ နူးညံ့ချောမောသည့် ရုပ်ရည်ကို ပိုင်ဆိုင်ထားရာ အနည်းငယ် ပရိုမိုးရှင်း ဆင်းရုံဖြင့်ပင် မိန်းကလေးများစွာတို့၏ အသည်းကို သိမ်းပိုက်နိုင်သည့် အိုင်ဒေါတစ်ဦး ဖြစ်လာနိုင်သည်ဟု ထင်ခဲ့ဖူးသည်။ သို့သော် သူသည် ကိုယ်ခံပညာအရာ၌လည်း ရှားရှားပါးပါး  ထူးချွန်နေခဲ့ကာ ကျွမ်းဘားနှင့် တိုက်ခိုက်ရေးပညာ ကျွမ်းကျင်သူ အနုပညာရှင်တစ်ဦးပင် ဖြစ်လာနိုင်သည့် အလားအလာမျိုး ရှိနေတော့သည်။ 

အစမ်းသရုပ်ဆောင် ပြီးသည့်အခါ ယဲ့လင်း၏ ထိုအတွေးတို့မှာ ပို၍ပင် သေချာသွားတော့သည်။ 

ယန်အန်းယုက တစ်ခဏမျှ အနားယူပြီးနောက် နောက်ထပ်တစ်ခုကို ဆက်လက်ရိုက်ကူးရန် ပြင်ဆင်လိုက်သည်။ နောက်ထပ် ရိုက်ချက်မှာ စိတ်ခံစားချက် အပြောင်းအလဲများကို အလွန် အဓိကထားထားသည့်အတွက် သူ့ကို စမ်းသပ်ရန် အလွန် သင့်လျော်ပေသည်။ 

ယန်အန်းယုသည် ကျောင်း၌ သရုပ်ဆောင်အတန်းအချို့ တက်ရောက်ဖူးသည့်တိုင် တရားဝင် သရုပ်ဆောင်ဖူးခြင်း မရှိသည့်အတွက် ထိုနယ်ပယ်၌ သူ၏ အတွေ့အကြုံမှာ သုညမျှသာ ဖြစ်ပေသည်။ “လက်ဝှေ့ကျော်” ၌ ပါဝင်ခဲ့ရစဉ်က သူသည် လူစားထိုးစတန့်သမားမျှသာ ဖြစ်သည့်အတွက် တိုက်ခိုက်ရေးအခန်းများအတွက်သာ တာဝန်ယူရသည်။ မျက်နှာအမူအယာနှင့် ကိုယ်နေဟန်ထားတို့ကို သရုပ်ဆောင်ရာ၌ ထည့်သွင်းအသုံးပြုရန် မလိုအပ်ခဲ့ချေ။ ပရိသတ်၏ အရှေ့၌ ပြသသည့်အခါ  ထိုနေရာ၌ ယွီစစ်ယွမ်၏ မျက်နှာကိုသာ မြင်ရမည် ဖြစ်သည်။ 

ယမန်နေ့က ဒါရိုက်တာကျိုး၏ ဖုန်းခေါ်ဆိုမှုကို လက်ခံရရှိခဲ့ပြီးနောက် သူသည် အနည်းငယ် တုန့်ဆိုင်းနေမိခဲ့သေးသည်။ နောက်ဆုံးတွင်မူ အရောက်လာရန်သာ ဆုံးဖြတ်နိုင်ခဲ့၏။

သူသည် အနုပညာလောကနှင့် သင့်လျော်ခြင်း ရှိမရှိ သူ့ကိုယ်သူလည်း မသိသေးသည့်တိုင် ယီချန်းယန်သည် ဤလောကထဲသို့ ရောက်ရှိနေပြီ ဖြစ်ပေသည်။ အချစ်မပါသည့် လက်ထပ်ထိမ်းမြားခြင်းမျိုးကို ဆောင်ရွက်ထားကာ တစ်ဦးနှင့်တစ်ဦး သူစိမ်းများသဖွယ်သာ ပြောဆိုဆက်ဆံလေ့ ရှိကြသည့်အတွက် သူတို့နှစ်ဦးသည် တစ်နေ့နေ့တစ်ချိန်ချိန်တွင် သေချာပေါက် လမ်းခွဲရမည်ဖြစ်ကြောင်းကိုလည်း သိထားခဲ့သည်။ 

အတိတ်ဘဝတွင် ယန်အန်းယုသည် စစ်သူကြီးအား ဘဝသက်တမ်းတစ်လျောက် အဖော်ပြုပေးနိုင်ခြင်း၊ ကာကွယ်ပေးနိုင်ခြင်း မရှိတော့သည့်အပေါ် ကြီးစွာ နောင်တရရှိခဲ့ရသည်။ ထို့ကြောင့် ယခုလက်ရှိကမ္ဘာတွင် သူသည် ယီချန်းယန်၏ မိတ်ဆွေတစ်ဦး ဖြစ်လာကာ သူ့အပြုံးကို မကြာခဏ မြင်လိုသည့် ဆန္ဒများ ဖြစ်ပေါ်လာတော့သည်။ 

ယန်ကျွယ့်က သူ့အပေါ် မျှော်လင့်ချက်များ များစွာ မထားရှိသည့်တိုင် “စတန့်သမားမောင်ငယ်လေး” ကိစ္စ ဖြစ်ပွားပြီးသည့်နောက်ပိုင်း ယန်အန်းယုသည်  သူ့ကို သဘောကျသူများလည်း ရှိနေသေးကြောင်း သိလိုက်ရသည့်အတွက် အနည်းငယ် ယုံကြည်ချက် ပြည့်ဝလာသည်။ 

ဟုတ်သားပဲ မူလယန်အန်းယု မလုပ်နိုင်တာတွေ ရှိတယ်ဆိုပေမယ့် သူက မူလယန်အန်းယုမှ မဟုတ်တော့တာကို ...

နောက်ဆုံးကျ သူလည်း ယီချန်းယန်လို သရုပ်ဆောင်ကောင်းတစ်ယောက် ဖြစ်လာနိုင်လောက်လား ... 

ထိုအဖြေကိုမူ သူကိုယ်တိုင်လည်း ကောင်းစွာ မသိချေ။ သို့သော် ကြိုးစားမကြည့်သေးသရွေ့ အောင်မြင်နိုင်မည် မဟုတ်ကြောင်းကိုမူ တပ်အပ် သိနေပေသည်။ 

အသက်ကို အကြိမ်အနည်းငယ်ခန့် ပြင်းပြင်းရှူထုတ်လိုက်ပြီးနောက် သူက ခပ်ဖျော့ဖျော့ပြုံးကာ ပြောလိုက်သည်။ 

“ဒါရိုက်တာရှု ကျေးဇူးပြုပြီး ကျွန်တော့်ကို အခွင့်အရေးတစ်ခု ပေးပါ ဒါရိုက်တာကြီးရဲ့ စိတ်ထဲက “အားခန်း” ကို ရုပ်လုံးပေါ်လာအောင် ကျွန်တော် အစွမ်းကုန် ကြိုးစားပါ့မယ် ...”

ဒါရိုက်တာရှု “ကောင်းပြီလေ ...”

👥️