MM Story Teller

Chapter 59

Viewers 4k

👻Chapter 59

မင်းသားလေးရဲ့ အနမ်း (9)

ချူဟွိုက် " ရှင် တွေ့လား...."

" မတွေ့ဘူး..."

"အမြန်လုပ်....နောက်ကျနေပြီ.. "

ချူဟွိုက်က နောက်ထပ် အခန်းတံခါး တစ်ခုကို ပိတ်လိုက်ပြီး နာရီငုံ့ကြည့်လိုက်ရာ ၉နာရီ ၄၇မိနစ်ရှိပြီဖြစ်သည်။ သူတို့၏နောက်ထပ် ပရောဂျက်ဖြစ်သည့် နတ်သမီးနန်းတော်က ၁၀နာရီတွင် ဖွင့်မည်ဖြစ်သည်။

သူတို့က အခု ပရောဂျက်အနီးသို့ ရောက်နေပြီဖြစ်၍ သုံးမိနစ်အတွင်း လမ်းလျှောက်သွား၍ ရသော်လည်း ဘေးကင်းရန်အတွက် ကြိုရောက်ထားသည်က ပိုကောင်းလေသည်။

အမျိုးသမီးသန့်စင်ခန်းနား လျှောက်လာသည့် လော့ဇီယန်က စကားတစ်စွန်းတစ်စ ကြားလိုက်ရချိန် မျက်နှာနီသွားရသည် ' ရှင် gcမှတ်ကို တွေ့လား...မတွေ့ဘူး....အမြန်လုပ်....'

သူက ခေါင်းထဲ ပုံဖော်မိသွားသည်။ ဘော့စ်က ကျောင်းကျောင်းကို အခန်းထဲ ခေါ်သွားပြီးတော့ .....

လော့ဇီယန်က အထဲဝင်ရန်ပြင်နေသည့် ယဲ့ယွမ်ကို အမြန်ဆွဲလိုက်ရသည်။

“မ....မဝင်သွားနဲ့....ကိုယ်တို့ အပြင်ကပဲ စောင့်ရအောင်လေ...." သူက ထစ်ထစ်ငေါ့ငေါ့ ပြောလာသည်။

ယဲ့ယွမ်က ခေါင်းထဲ ညစ်ညစ်ပတ်ပတ် အတွေးများနှင့် ပြည့်နေသော လော့ဇီယန်ကို ကြည့်လိုက်မိသည် "......."

ကျင်းထျန်းယိ " ကိုယ် တွေ့ပြီ...."

ချူဟွိုက်က အခန်းတံခါးပိတ်လိုက်ပြီး သူ့နားသွားလိုက်ရာ အမှိုက်ပုံးထဲမှ ဆုတ်ဖြဲထားသော လက်မှတ်များကို တွေ့လိုက်ရသည်။

လွတ်သွားသည့် အမျိုးသမီးက သူ ဘယ်လောက်ကြိုးစားရှာပါစေ အမျိုးသမီးသန့်စင်ခန်းထဲသို့ ဝင်မရှာလောက်ဟု တွေးမိ၍ သူ ရှာနေသည့်အချိန်အတွင်း လက်မှတ်ကို ဆုတ်ဖြဲခဲ့ပြီး ဤနေရာတွင် လွှင့်ပစ်ထားခြင်း ဖြစ်နိုင်သည်။

ချူဟွိုက်က စကားဆိုလာသည် " လက်မှတ်က သူများလုပ်လို့ ပျက်စီးသွားတယ်ဆိုရင် ပရောဂျက်ကလည်း အကျုံးမဝင်တော့ဘူးပေါ့....ဟုတ်လား...."

ဒါဆို အဲ့ဒီလူက လက်မှတ်ရှာတွေ့သွားရင်တောင်မှ အသုံးမဝင်တော့ဘူးပေါ့....

ချူဟွိုက် " အဲ့ဒီအမျိုးသမီးက သူ့ကို သေစေချင်တာပဲ...."

ကျင်းထျန်းယိက မျက်ခုံးအနည်းငယ် တွန့်မိသည် " သူတို့အပေါ် ထင်မြင်ချက် နည်းနည်းတော့ ရှိတယ်....ခုနက လော့ဇီယန်က စုံတွဲတွေရှိလားလို့ မေးတော့ သူတို့နှစ်ယောက်လုံး လက်မြောက်ပြလာကြတာ...."

ကျင်းထျန်းယိက တံခါးဆီ သွားလိုက်သည် " သူတို့မှာ စုံတွဲလက်မှတ်ရှိတဲ့အတွက် တစ်ယောက်က သေသွားရင် ကျန်တဲ့တစ်ယောက်က ဘယ်လိုဖြစ်သွားမှာလဲ....

ပထမဆုံးအနေနဲ့ တစ်ခြားအခြမ်းက သေသွားပြီ....ဘာလို့ဆို အမျိုးသားက သေသွားပြီလေ....ဒါပေမယ့် အမျိုးသမီးက အကောင်းတိုင်း ရှိနေသေးတယ်....ဒါကြောင့် ပြဿနာတစ်ခုတော့ ရှိနေတယ်....စုံတွဲလိုက်သေသွားတယ်ဆိုရင်တောင် စုံတွဲပရောဂျက်အတွက်က လူတစ်ယောက် လိုဦးမှာလေ...."

သူက အကြောင်းရာ ပြောင်းပြောလာသည် " စုံတွဲလက်မှတ်ကို တစ်ယောက်တည်းလက်မှတ်အဖြစ် ပြောင်းလို့မရဘူး ဆိုရင်ပေါ့...."

ချစ်သူနှစ်ယောက် သေသွားပါက သူတို့နှစ်ယောက်ကြားက ဆက်ဆံရေးက တည်ရှိတော့မည် မဟုတ်သော်ငြား လက်မှတ်က အကျုံးဝင်သေး၍ ကစားကွင်းက တစ်ယောက်ကို နှစ်ယောက်စာဝန်ဆောင်မှုများ ပေးလိမ့်မည်ပင်။ ဥပမာအားဖြင့် စုံတွဲလက်မှတ်တစ်စောင်ကို တစ်ယောက်တည်းကစားရသည့် ပရောဂျက်နှစ်ခုအဖြစ် ပြောင်းသွားလိမ့်မည်။

လော့ဇီယန်က ဘာမှမဖြစ်ထားသလို လျှောက်ထွက်သွားကြသည် ထိုနှစ်ယောက်ကို ကြည့်နေရင်း တစ်စက္ကန့်မျှ မေ့လဲမတတ်ဖြစ်သွားပြီးမှ သူ့မျက်နှာက 'နားလည်သွားပြီ' ဆိုသည့် ပုံစံ ပြလာသည်။

"မင်းက ဘာလို့ ဒီမှာ ရှိနေတာလဲ..." ကျင်းထျန်းယိက မေးလိုက်သည်။

လော့ဇီယန်က ချူဟွိုက်ကို ကြည့်လိုက်ပြီး ကောင်းကင်ကို မော့ကြည့်လိုက်သည် " စကပ်ဝတ်ထားတာ တော်တော် ကြည့်လို့လှတာပဲ...."

ချူဟွိုက်က သူ့၏ အကျိုးကြောင်း မဆီလျော်သည့် စကားကြောင့် အနည်းငယ် စိတ်ရှုပ်သွားသော်လည်း ကျင်းထျန်းယိက နားလည်၍ အပြုံးလေးနှင့် ကြည့်လာသည် " မင်းလို Lockeပေါက်စက အသက်ရှင်နေဦးမယ်လို့ မထင်ထားခဲ့ဘူး...."

လော့ဇီယန်၏ မျက်နှာက တောင့်ခဲသွားသည် "......"

သူတို့က အပြင်ဘက် လျှောက်သွားကြရင်း ကျင်းထျန်းယိက သူတို့ကို အကြောင်းစုံ ရှင်းပြပေးလိုက်သည်။ လော့ဇီယန်က ရှက်သွေးဖြာသွား၍ ကျင်းတူးပြီးသာ ပုန်းလိုက်ချင်တော့သည်။

ယဲ့ယွမ်က နာရီတတိတိ ကြည့်နေ၍ သူတို့ နတ်သမီးနန်းတော်ထဲ ဝင်ရတော့မှန်း သိလိုက်ပြီး သူ့ဘက်ကလည်း သတင်းအချက်အလက်ကို ပြန်လည်ဝေမျှလိုက်သည်။

"အနက်ရောင် နတ်သမီးပုံပြင်လား..." ကျင်းထျန်းယိက ပေါ့ပေါ့ပါးပါး ဆိုလာသည် " သိပြီ...ကျေးဇူးပဲ...."

ယဲ့ယွမ် " ကျွန်တော်တို့က အခု ချားရဟတ်ကို သွားရတော့မှာ...."

ချူဟွိုက်နှင့် ကျင်းထျန်းယိတို့ဆီမှ သဲလွန်စများဖြင့် သူတို့က မစ်ရှင်ထဲ ဝင်ကြတော့မည်ဖြစ်ပြီး အရင်လူများက အပင်စိုက်ခဲ့၍ နှောင်းလူများ အရိပ်ခိုကြရသည်ဟုပင် သတ်မှတ်နိုင်သည်။

နှုတ်ဆက်စကားဆိုပြီးနောက် ကျင်းထျန်းယိနှင့် ချူဟွိုက်တို့က နတ်သမီးနန်းတော်၏ ဝင်ပေါက်သို့ ရောက်သွားကြပြီ ဖြစ်သည်။

တံခါးပေါက်ရှိ စင်ဒရဲလားက ထူးဆန်းသည့် အပြုံးနှင့် ပြုံးပြနေ၏။

ချူဟွိုက်က တိတ်တဆိတ် ညီးညူလိုက်သည်။ စင်ဒရဲလားသာရှိနေရင် သူလည်း ဒီအပြစ်ကြွေးကျသွားတာနဲ့ ဒေါက်မြင့်ဖိနပ်တွေ စီးရတော့မှာ မဟုတ်ဘူး.....

လော့ဇီယန် ယဲ့ယွမ်တို့နှင့် စကားပြောဆိုခဲ့၍ သူတို့က ဂရိဒဏ္ဍာရီလာပြတိုက်မှ သဲလွန်စနှစ်ခုက 'စက်ဝိုင်း' နှင့် ' ပြန်လှည့်မကြည့်နဲ့ ' ဖြစ်မှန်း သိခဲ့ရသည်။

"စက်ဝိုင်း" ဆိုသည့် သဲလွန်စနှင့်ယှဥ်လျှင် " ပြန်လှည့်မကြည့်နဲ့ " ဆိုသည့် သဲလွန်စက မှန်းရလွယ်သည်။

"ပြန်လှည့်မကြည့်နဲ့" ဆိုသည့် သဲလွန်စက အို့ဖီးရပ်စ်နှင့် ယူးရီဒဆီးတို့နှင့် ပတ်သက်နေသည်။

သူတို့နှစ်ယောက်က မူလက အရမ်းချစ်ကြသည့် စုံတွဲဖြစ်သည်။ နောက်ပိုင်းတွင် ယူးရီဒဆီးက မမျှော်လင့်ပဲ သေသွားခဲ့သည်။ အို့ဖီးရပ်စ်က သူ့ချစ်သူကို ရှာရန် မြေအောက်လောကသို့ သွားရောက်ခဲ့သည်။ သူတို့အချစ်က ပလူတိုကိုပင် စိတ်ပြောင်းစေ၍ ပလူတိုက အို့ဖီးရပ်စ်ကို သူ့ချစ်သူ၏ ဝိဥာဥ်ကို ခေါ်ထုတ်သွားရန် ပြောခဲ့သည်။

လုပ်ဖို့လိုသည့် တစ်ခုတည်းသော အရာက ဘာသံကြားကြား လှည့်မကြည့်ရန် ဖြစ်သည်။

သို့သော်လည်း အို့ဖီးရပ်စ်က သူ့ချစ်သူကို အလွန် စိတ်ပူနေ၍ မတတ်နိုင်ပဲ လှည့်ကြည့်လိုက်ရာ သူ့ချစ်သူက ချက်ချင်း ပျောက်ကွယ်သွားလေသည်။

ပထမဆုံး ဇာတ်ကြောင်းတွင် ယဲ့ယွမ်တို့က ခက်ခဲခဲ့ကြသော်လည်း ဒုတိယတစ်ပုဒ်တွင် အလွယ်တကူ အောင်မြင်ခဲ့ကြလေသည်။ အခြားတော့ မဟုတ်ပေ....ယဲ့ယွမ်က အို့ဖီးရပ်စ်အဖြစ် လုပ်ဆောင်ခဲ့၍ပင်။

ယဲ့ယွမ်က သူ့ကိုယ်သူ ထိန်းချုပ်ပြီး နောက်ပြန်လှည့်မကြည့်သလို လော့ဇီယန်ကလည်း ဘာမှမလုပ်ပဲ ယဲ့ယွမ်နောက်လိုက်ခဲ့၍ သူ့မှာ ကြောင်တောင်တောင်နှင့် ကျော်ဖြတ်ခဲ့ရသည်။

ယခုတွင် သဲလွန်စက အလုံး၂၀သာ ကျန်တော့သည်။ စက်ဝိုင်း၊ ပြန်လှည့်မကြည့်နဲ့၊ အနမ်း၊ လိမ္မော်ရောင်၊ ဒမ်မိုကလိစ်ရဲ့ ဓါးသွား....

ချူဟွိုက်တွင် အကြံတစ်ခု ပေါ်လာသည်။ တစ်ယောက်တည်းသမား ပရောဂျက်တွေအတွက် ပြိုင်ပွဲဝင်တွေက သဲလွန်စမပေါ်သေးတဲ့အချိန်ထိ နှောင့်နှေးနေလို့ရတယ်....

ဧည့်သည်သရဲရဲ့ အခန်းကဏ္ဍက ဖြစ်ရပ်ထဲမှာပုန်းနေတဲ့သရဲတွေက သူတို့ကို တိုက်လို့မရဘူး....ပြီးတော့ ချစ်သူတွေဖြစ်တဲ့ ပြိုင်ပွဲဝင်တွေကိုလည်း ကာကွယ်ပေးလို့ရသေးတယ်....

သေချာပေါက် ချူဟွိုက်က ထိုသို့ ကောင်းမွန်သည့်အရာတစ်ခု ဖြစ်လာလိမ့်မည်ဟု သူ့စိတ်က မယုံပေ။ အမှန်တွင်ဖြင့် ယဲ့ယွမ်၏ ဇာတ်မြစ်က ထူးခြားပြီး သူတို့မသိသေးသည့် အရာတစ်ခု ရှိနိုင်လောက်သည်။

ဥပမာအနေနှင့်....ပုံမှန်အခြေအနေတွင် ပရောဂျက်အချိန်အတွင်း ပြိုင်ပွဲဝင်က ဧည့်သည်သရဲကို စွန့်ပစ်လိုက်လျှင် သူ့ကို ဧည့်သည်သရဲမှ သတ်သွားလိမ့်မည်။

ပြိုင်ပွဲဝင်အချင်းချင်း စုံတွဲလုပ်ရာမှ ရရှိသည့် အကျိုးရလဒ်ကိုဖြင့် သူ မတွေ့ရသေးပေ။

အညီအမျှဖြစ်သွားရန် တစ်ခုချင်းစီ၌ ကောင်းကျိုးနှင့် ဆိုးကျိုးတော့ ရှိရမည်။

နတ်သမီးနန်းတော်အတွက် လက်မှတ်ဝယ်ရန် မလိုအပ်ပေ။ နန်းတော်ဂိတ်ဝက မင်္ဂလာဆောင်ခန်းမကြီးနှင့် တော်တော်လေး ဆင်သည်။ တစ်ဆောင်လုံးကို အစိမ်းရောင်သုတ်ထားပြီး နှင်းဆီနီများနှင့် အလှဆင်ထား၍ အနည်းငယ် ထူးဆန်းနေသည်။

ချူဟွိုက်နှင့် ကျင်းထျန်းယိတို့က ဥယျာဥ်ထဲ ခြေချလိုက်သည်။

ချူဟွိုက်က သူ့ရှေ့ရှိ ထည်ဝါလွန်းသော မြင်ကွင်းအား ရှုစားရန် အချိန်မရလိုက်ခင် သူ့ခေါင်းထဲ မူးနောက်လာ၍ သူ့ခန္ဓာကိုယ် ယိုင်လဲသွားပြီး ကျင်းထျန်းယိက အမြန်ဖမ်းပေးလိုက်သော်လည်း အိပ်မောကျသွားပြီဖြစ်သည်။

နိုးလာသည့်အချိန် သစ်သားကုတင်ကြီးထက် လှဲလျောင်းနေသည့် ချူဟွိုက်က သူ့ခေါင်းထက်က မီးခိုးရောင် ကျောက်တုံးကြီးကို ကြည့်နေရင်း မျက်လုံးက ဗလာသက်သက်ဖြစ်သွားရသည်။

ဘယ်ဘက်နားက ပြတင်းပေါက်သေးသေးလေးကနေ ထွက်လာတဲ့ အလင်းရောင်ကလွဲလို့ မှောင်မည်းနေတယ်....နေရာလေးက တကယ် ကျဥ်းကျဥ်းလေး....

ချူဟွိုက်က အသိစိတ်ပြန်ဝင်လာသည့်အချိန် ချက်ချင်း ထထိုင်လိုက်ပြီး ခေါင်းထက်ပိုင်းက ဆွဲအားပြင်းပြင်းကြောင့် ပြန်လဲကျသွားသည်။

"သောက်ကျိုးနည်း ဘာကြီးလဲ...." ချူဟွိုက်က ခေါင်းနောက်ပိုင်းကို စမ်းကြည့်လိုက်ရာ တစ်ခုခုရှိနေမှန်း တွေ့လိုက်ရသည်။ သူ့တွင် ပိုးသားလို နက်မှောင်တောက်ပနေသည့် ဆံပင်ရှည်ကြီး ရှိနေသည်။

ကုတင်၏ မျက်နှာချင်းဆိုင်ဘက်တွင် ကြေးဝါရောင် မှန်ကြီးတစ်ခု ရှိနေသည်။ ချူဟွိုက်က အလေးချိန်ကြောင့် မှန်ရှိရာဘက်ကို တွားသွားပြီး သွားနေရသည်။ သူ့မျက်နှာကို မမြင်ရခင် အမည်မသိအရာတစ်ခုကြောင့် ခလုတ်တိုက်မလို ဖြစ်သွားခဲ့ပြန်သည်။

ချူဟွိုက်က ခေါင်းငုံ့ကြည့်လိုက်ရာ မြေပြင်ကလည်း သူ့ဆံပင်နှင့် အပြည့်ဖုံးထားမှန်း တွေ့လိုက်ရသည်။

သူက သူ့ဆံပင်ပေါ် ပြန်နင်းမိတာလား....။ မြေပြင်က အလွှာထူတစ်ခု ခံနေ၍ ကောက်ရိုးနှင့်ကော်ဇောကြား တစ်နေရာရာကို စမ်းမိခြင်းဖြစ်သည်။

“သောက်ကျိုးနည်း...." ချူဟွိုက်က စိတ်မချမ်းသာဖွယ် တစ်ခုခု ပြောရန်ပြင်လိုက်စဥ် မှန်ထဲက သူ့မျက်နှာကို တွေ့လိုက်ရသည်။

ထိုမျက်နှာက စွဲမက်ဖွယ်ကောင်းပြီး လှပအသက်ဝင်ကာ ပြိုင်ဘက်ကင်းအလှမျိုး ဖြစ်သည်။ သူ့ကိုယ်တိုင်ဖြစ်နေသော်လည်း သေချာပေါက် သူမဟုတ်ပေ။ ကျင်းထျန်းယိကရော....

ချူဟွိုက်က လှည့်ပတ်ကြည့်လိုက်ရင်း ဤနေရာကျဥ်းကျဥ်းလေး၌ ကျင်းထျန်းယိ မရှိမှန်း သိလိုက်ရသည်။

သူ့ဆံပင်များကို မရှုပ်အောင် ဖြန့်လိုက်ပြီး ပြတင်းပေါက်သေးသေးလေးဆီ သွားလိုက်သည်။ ပြတင်းပေါက်က မှန်မကာထား၍ အပြင်ဘက်မှ လေတဖြူဖြူးတိုက်လာပြီး ရက်ပန်ဇယ်၏ အနံ့သင်းသင်းလေးလည်း ရလာသည်။

ချူဟွိုက်က အောက်ငုံ့ကြည့်လိုက်ရာ နှလုံးခုန်မြန်သွားရသည်။ သူက မျှော်စင်အမြင့်ကြီးပေါ် ရောက်နေတာပဲ....။

မျှော်စင်က အနည်းဆုံး ဆယ့်ငါးပေခန့် မြင့်ပြီး အောက်ခြေက ချုံနွယ်ပိတ်ပေါင်း ထူထပ်နေသည်။ မျှော်စင်၏ ကိုယ်ထည်က အနက်ရောင်မှိုင်းမှိုင်းရှိ၍ မြင်သူအပေါင်းကို စိတ်အားငယ်သလို ခံစားရစေသည်။

မော့ကြည့်လိုက်ချိန် ကောင်းကင်ကလည်း အနက်နှင့် ခမ်းရောင်ဖျော့ရောင်ရောနေ၍ ညအလယ်တွင် မျှော်စင်က အန္တရာယ်များသည့်ပုံပေါ်သည်။

ချူဟွိုက်က အသိစိတ်လွတ်သွားချိန် အမည်းရောင် အရိပ်ကြီးတစ်ခုက မြင်ကွင်းထဲ ရုတ်တရက် ပေါ်လာသည်။

ထိုပုံရိပ်က ခေါင်းမော့လာ၍ ချူဟွိုက်က ကျင်းထျန်းယိ၏ မျက်နှာချောချောကို တွေ့လိုက်ရသည်။

သူက အနည်းငယ် စိတ်အေးသွားပြီး လှမ်းခေါ်ရန် ပြင်လိုက်စဥ် ကျင်းထျန်းယိ၏ သီချင်းဆိုသံကို ကြားလိုက်ရသည် " ရက်ပန်ဇယ် ရက်ပန်ဇယ်....မင်းရဲ့ ဆံပင်ကို ချပေးကွယ်...."

ရက်ပန်ဇယ်....ချူဟွိုက်ခေါင်းထဲ မင်းသမီးပုံပြင်လေးတစ်ပုဒ် ပေါ်လာ၏။

စုန်းမ....မျှော်စင်....ဆံပင်ရှည်ကြီး.... သူက ပုံပြင်ထဲရောက်သွားမှန်း သေချာပေမယ့် ဒီထဲရောက်ပြီး ဘယ်လိုဆက်ဖြစ်လာမလဲ သူမသိဘူး....

စာအုပ်ထဲမှာ ရက်ပန်ဇယ်ရဲ့ မိဘတွေက ရက်ပန်ဇယ်ကို ကိုယ်ဝန်ဆောင်ဖို့အတွက် စုန်းမရဲ့ သစ်ရွက်ကို ခိုးပြီး သူမကို မွေးဖွားခဲ့တယ်....

စုန်းမက ရက်ပန်ဇယ်ကို ခေါ်ထုတ်သွားပြီး မျှော်စင်အမြင့်ကြီးထဲမှာ သော့ပိတ်ထားခဲ့တယ်....။ သူမကို တွေ့ချင်တဲ့အခါ စုန်းမက မျှော်စင်အောက်ကနေ သီချင်းဆိုလိုက်ပြီး တွယ်တက်လို့ရအောင် ဆံပင်ကို ချခိုင်းတယ်......။

ဒီနေရာကို ရောက်လာတဲ့ မင်းသားလေးက လျှို့ဝှက်ချက်ကို ရှာတွေ့သွားလို့ အဲ့ဒီအကွက်အတိုင်း လုပ်ကြည့်ရင်း နံရံပေါ် တွယ်တက်ပြီး ကြင်နာတတ်တဲ့ မိန်းမလှလေး ရက်ပန်ဇယ်နှင့် ချစ်ကြိုးသွယ်မိသွားတယ်....။ နောက်ပိုင်းမှာ စုန်းမက သိသွားလို့ ရက်ပန်ဇယ်အယောင်ဆောင်ရင်း မင်းသားလေးကို မြူဆွယ်ပြီး သတ်ပစ်လိုက်တယ်....။

ကျင်းထျန်းယိကလည်း အခုမှ ချူဟွိုက်ကို တွေ့ရသည်။ သူက မင်းသားလေးလို ဝတ်ဆင်ထားပြီး ချောမောပြီး ထင်းထွက်နေသော ရုပ်ရည်ပိုင်ရှင် ထိုသူက ချူဟွိုက်ကို ပြုံးပြနေသည်။

ချူဟွိုက်က အနည်းငယ် တွန့်ဆုတ်နေသည်။ အခုလာတဲ့သူက စုန်းမဖြစ်နေရင်ရော.... စုန်းမက မင်းသားလေးဟန်ဆောင်ပြီး သူ့ကို မြူဆွယ်နေတာဆိုရင်ရော.....သူ့ဆံပင်ကို ချပေးလိုက်ရင် ထောင်ချောက်ထဲ ကျသွားသလို ဖြစ်သွားမလား....။

ကျင်းထျန်းယိက အံ့သြသွားသော်လည်း ချက်ချင်း သဘောပေါက်သွား၍ အပြုံလေးနှင့် အော်ပြောလိုက်သည် " မူလအရောင်ရဲ့ စည်းမျဥ်းတွေအရ လျှော့ချထားတဲ့ မူလအရောင်သုံးရောင်က..... ထပ်တိုးထားတဲ့ မူလအရောင်သုံးရောင်နဲ့ လိုက်ဖက်အရောင်တွေ ဖြစ်တယ်....."

ချူဟွိုက် "......" သူက ထွက်ပြေးမသွားတော့ပေ။

သူက ဆံပင်ကို ပစ်ချလိုက်သော်လည်း ကျင်းထျန်းယိက သူ့ဆံပင်ကို ကိုင်ပြီး တွယ်တက်လာမည့်ပုံကို စဥ်းစားမိ၍ ဦးရေပြားပင် လှုပ်သွားရသည်။

ကျင်းထျန်းယိက လမ်းတစ်ဝက်နှင့် ပြုတ်ကျသေသွားမည်ဟုလည်း မစိုးရိမ်မိချေ။ မျှော်လင့်ထားသော နာကျင်မှုက ရောက်မလာပဲ မျက်စိတစ်မှိတ်အတွင်း ကျင်းထျန်းယိက မျှော်စင်ပေါ် သွက်သွက်လက်လက် တွယ်တက်လာလေ၏။

ချူဟွိုက်က စုန်းမပေါ်လာမည်စိုး၍ သူ့ပတ်ပတ်လည်ကို အမြဲတစေ စောင့်ကြည့်နေမိသည်။ ကံကောင်း၍ သူက မင်းသားလေး ဟုတ်မနေချေ။ ဤအရာက ရုပ်ပိုင်းဆိုင်ရာ အားထုတ်လုပ်ဆောင်ရ၍ သာမန်လူ လုပ်နိုင်သည့်အရာ မဟုတ်ပေ။

ကျင်းထျန်းယိက ပြတင်းပေါက် ကျဥ်းကျဥ်းလေးထဲ ကုတ်တက်လာ၍ ချူဟွိုက်က လက်ကမ်းပေးလိုက်သည်။

ကျင်းထျန်းယိက ခုန်ဝင်လာပြီး မတ်တပ်ရပ်ရန်ပြင်လိုက်စဥ် တစ်ခုခုပေါ် တက်နင်းမိသွား၍ ရှေ့ရောက်သွားပြီး ချူဟွိုက်ကို သစ်သားကုတင်ပေါ် တွန်းချမိသလို ဖြစ်သွားရသည်။

ချူဟွိုက်မှာ သေချင်သွားရသည် "....ရှင် ကျွန်မဆံပင်ပေါ် တက်နင်းထားတယ်...."

ကျင်းထျန်းယိက ဖိထား၍ မသက်မသာ ဖြစ်လာရသည် " ထတော့...." သူက အားမပါပဲ တွန်းဖယ်လိုက်သည်။

ကျင်းထျန်းယိက ရုတ်တရက် ပြုံးလိုက်ပြီး ချူဟွိုက်မျက်နှာကို သူ့နှုတ်ခမ်းဆီ ဆွဲယူရင်း ပြင်းပြင်းရှရှ နမ်းရှိုက်လာသည်။

"သောက်ကျိုးနည်း....အင်း...."

ချူဟွိုက်က တစ်ဖက်လှည့်လိုက်ချင်သော်လည်း သူ့ဆံပင်က ထူပြီး လေးနေသည်။

ကျင်းထျန်းယိက သူ့ကို လွှတ်ပေးလာပြီး ချူဟွိုက်၏ အပြစ်တင်နေသော မျက်လုံးများဆီ ဖြူဖြူစင်စင်လေး ပြုံးပြလာသည် " ကိုယ်က အနမ်းပေးတဲ့ သဲလွန်စက ဒီမှာ အလုပ်ဖြစ်သေးလား သိချင်ရုံပါ....တကယ်လည်း ' နတ်သမီးပုံပြင်' မို့လား....ကိုယ့်အမြင်မှာ မင်းသားလေးက အနမ်းနဲ့ မဖြေရှင်းနိုင်တဲ့ ပြဿနာမရှိဘူးလို့ ထင်တယ်....ရှိရင်လည်း နောက်ထပ် နမ်းကြည့်ကြတာပေါ့ ....."

သူက လှည့်လိုက်ပြီး နောင်တရနေသည့် မျက်နှာလေးနှင့် ထရပ်လာသည် " ကြည့်ရတာ ဒီပုံပြင်က သိပ်မကောင်းတဲ့ပုံပဲ...."

ချူဟွိုက်၏ ပါးမို့လေးများက အနည်းငယ် ပူလောင်သွားရင်း အံတင်းတင်းကြိတ်မိသည် "......."

ကျင်းထျန်းယိက နံရံကို ပျင်းပျင်းရိရိ မှီလိုက်ရင်း ပြုံးပြလာသည် " ကိုယ် ဆူးခက်တွေကို ပထမဆုံး တွေ့လိုက်တဲ့အချိန် မင်းကို အိပ်ပျော်နေသော အလှလေး ဖြစ်နေမယ်လို့ ထင်ထားခဲ့တာ...."

ချူဟွိုက်က ရယ်လိုက်ပြီး အမှန်တရားကို ပြောပြလာသည် " ရှင့်လို ဆူးခက်ကို ကြည့်ပြီးပြောမယ်ဆို အနည်းဆုံး ပုံပြင် ငါးပုဒ်ခြောက်ပုဒ်လောက် ရှိနေပြီးပြီ...."

ကျင်းထျန်းယိက ပြုံးလိုက်ပြီး စကားဆိုရန်ပြင်လိုက်စဥ် မျှော်စင်၏ အောက်ဘက်မှ ရင်းနှီးနေသော သီချင်းသံကို ကြားလိုက်ရသည်။

"ရက်ပန်ဇယ် ရက်ပန်ဇယ်....မင်းရဲ့ ဆံပင်ကို ချပေးကွယ်...."

👻

Prev Next