Chapter 184

🌱Arc 5 - [ဖျော်ဖြေရေးနယ်ပယ်တွင် လယ်စိုက်ခြင်း ]

Ch 184

ပြိုင်ဘက်ကင်း "ဆန်မုန့်လုံး"ဓလေ့ (၂)

ထို အရိုင်းဆန်လှသည့် မှန်းဆချက်များဖြင့် ပြည့်နှက်နေသော အစီရင်ခံစာများက ကြောက်မက်ဖွယ် ကောင်းစွာဖြင့် ပျံ့နှံ့လာတော့သည်။ ဧကရာဇ်သွေး နိုးထလာသူနှင့် ထိုသူ၏ နန်းဆောင်သုံးခု၊ ခြံဝင်းခြောက်ခု အကြောင်း ကြားလိုက်ရသူတိုင်းက ထိုအတင်းကို ထပ်မံပြီး ဖြန့်ချီရန် စိတ်အားတက်ကြွလာကြတော့သည်။ 

သို့သော် အခြေအနေအစစ်အမှန်ကို နားမလည်နိုင်သူများနှင့် စွေ့ချီချောင်း၏ စရိုက်အစစ်အမှန်ကို နားလည်ကြသူများကမူ ထိုသူအားလုံးကို အေးစက်စွာသာ လှောင်ရယ်လိုက်ကြတော့သည်။ 

သူတို့အားလုံးက စွေ့ချီချောင်းရဲ့ အစီအစဉ်တွေကို season လေးခု ဆက်တိုက်ကို  လိုက်ကြည့်ထားတာလေ... စွေ့ချီချောင်းက ဂေးဆက်ဆံရေးထဲ ပါဝင်ဖူးတာဆိုလို့ နှစ်ကြိမ်ပဲ ရှိတဲ့ဟာ... သူက ဘယ်လိုလုပ် မောင်းမဆောင် ဆောက်နိုင်မှာလဲ... မောင်းမဆောင်တစ်ခုကို ထိန်းသိမ်းဖို့ စွမ်းအင်တွေ ဘယ်လောက် လိုအပ်လဲဆိုတာရော မင်းတို့ကောင်တွေ သိကြလို့လား... သူ့ကို စိုက်ပျိုးရေးလုပ်ငန်းကနေ ဆွဲထုတ်လာဖို့ ဘယ်လိုလုပ်ရမလဲ ဆိုတာကိုရော သူတို့တွေ သိပါ့မလား ...

အမှန်တရားကို မသိကြသူများ၏ လက်ချက်ကြောင့် ထိုအတင်းစကားများမှာ အလွန်အမင်း ပျံ့နှံ့သွားလေတော့သည်။ ပျံ့နှံ့လွန်းအားကြီး၍ သရုပ်ဆောင်များ၏ အာရုံစိုက်မှုကိုပင် ဆွဲဆောင်နိုင်သွားကာ ထိုသူများက မျက်နှာတစ်ခုလုံး မည်းမှောင်နေလျက် ရှင်းလင်းချက် ထုတ်ပြန်လိုက်ကြတော့သည်။ 

“တော်တော်လေးကို ဆိုးရွားတာပဲ ဒီသတင်းတွေက နည်းနည်းလေးမှကို မှန်မနေဘူး မင်းတို့တွေက ငါ့ကိုရော စွေ့ချီချောင်းကိုရော မသိကြဘူးပဲ ...”

“မင်းတို့အားလုံးက အခြေအမြစ်မရှိတဲ့ မှန်းဆချက်တွေကို ထုတ်ဖော်တဲ့နေရာမှာတော့ ဆရာကြီးပဲနော် မင်းတို့ရဲ့ စိတ်ကူးယဉ်မှုတွေက အရမ်းကို ကောင်းပါပေတယ် ဟုတ်ပြီလား စွေ့ချီချောင်းအိမ်ကနေ ထွက်လာတဲ့အခါ ငါတို့ ခါးတွေကို လက်နဲ့ ထိန်းထားပြီး ထွက်လာရတာက သူ့အိမ်ထဲမှာ စိုက်ပျိုးရေးဂိမ်းတွေ ကစားခဲ့လို့ကွ...”

“နောက်ကျောနာတာက စပါးစိုက်တာကြောင့် ဖြစ်လာတာကွ စွေ့ချီချောင်းရဲ့ မိသားစုက စိုက်ပျိုးရေးဂိမ်းတစ်ခုကို တိတ်တိတ်လေး တီထွင်နေခဲ့တာ ...”

“မင်းတို့တွေ ဘာတွေ တွေးနေကြတာလဲ စိုက်ပျိုးရေးဧကရာဇ်ရဲ့ မျိုးဆက်က မောင်းမဆောင်နဲ့ ရှုပ်ရှုပ်ထွေးထွေး ပတ်သက်နေရမယ့်အစား စိုက်ပျိုးရေးလုပ်ဖို့ကိုမှ ပိုပြီး စိတ်ဝင်စားလိမ့်ဦးမယ် ...”

အမှန်တရားကို မသိထားသူများ၏ မျက်နှာထက်တွင် မေးခွန်းထုတ်လိုသည့် အရိပ်အယောင်များ စတင် ထွက်ပေါ်လာတော့သည်။ ထိုအခါမှ သူတို့လည်း ဤမျှအထိ အံ့ဩဖွယ်ကောင်းလှသော ဖြစ်ရပ်မျိုး ရှိနေကြောင်း သိရှိသွားကြတော့၏။ 

သူတို့အားလုံးမှာ စွေ့ချီချောင်း၏ ပရိသတ်များထံမှသာမက စွေ့ချီချောင်း၏ အစီအစဉ်ကို မကြည့်သော်လည်း အခြား LJJ ၏ အမာခံ ပရိသတ်များထံမှပါ လှောင်ပြောင်ခြင်းကို ခံလိုက်ရတော့သည်။ ထိုသို့ဖြင့် စွေ့ချီချောင်း၏ ပရိသတ်များက မိုက်ရူးရဲ ဆန်လှသည့်တိုင် သူ့အပေါ်ကို ကောင်းစွာ နားလည်ကြကြောင်းကိုပါ သိရှိသွားကြတော့သည်။ 

“အထွေထွေမန်နေဂျာတဲ့လား... ငါက ဘယ်လိုလုပ် မန်နေဂျာရုပ် ပေါက်သွားတာလဲ... ဘာလို့ သူတို့က အမှန်တရားကိုတောင် မမှန်းဆနိုင်ကြတာလဲ... တကယ်တမ်း ငါကမှ စွေ့ချီချောင်းနဲ့ ပတ်သက်မှု ရှိနေတဲ့လူပါနော် ...”

ကျန်းထန်ဝေ့၏ မျက်နှာမှာ စခရင်နှင့်ပင် ထိကပ်လုမတတ် ဖြစ်နေတော့သည်။ ထိုသရုပ်ဆောင်များကသာ အတင်းစကားများကို ရှေ့ထွက်ပြီး ရှင်းမလာပါလျှင် အမှန်တရားကို ဖော်ထုတ်ရန် သူကိုယ်တိုင် လှုပ်ရှားမိတော့မည် ဖြစ်သည်။ 

ထိုသတင်းကို မြင်လိုက်ရသည်နှင့်တစ်ပြိုင်နက် စွေ့ချီချောင်းမှာ လင်းလင်းက မီးထဲသို့ လောင်စာ ထည့်လိုက်ပြန်ကာ သတင်းအတုနှင့် ခေါင်းကြီးပိုင်း သတင်းများမှတစ်ဆင့် LJJ သရုပ်ဆောင်များ၏ ဖြေကြားချက်ကို အသုံးပြု၍ အခြေအနေကို ပြောင်းပြန်လှန်ကာ သတင်းမှားများကို ရှင်းလင်းလိုက်သည်ကို သိလိုက်သည်။ ထို့ကြောင့် သူက ဧကရာဇ်သွေ နိုးထလာသူဟူသည့် ဖြစ်ရပ်မှာ အားလုံးအတွက် ပိုပြီး ခိုင်မာသွားတော့သည်။ 

သို့သော် လူသိရှင်ကြား ထုတ်ပြန်ခြင်းနှင့် ပတ်သက်၍ စွေ့ချီချောင်းက ဟိုးယခင်ကတည်းက LJJ နှင့် သဘောတူထားပြီး ဖြစ်သည်။ သူ့အပေါ်သို့ များစွာ သက်ရောက်မှု မရှိသရွေ့ ငြင်းဆိုကန့်ကွက်လိမ့်မည် မဟုတ်ချေ။ 

ထို့ကြောင့် သူက ကျန်းထန်ဝေ့၏ “ဆက်စပ်ပတ်သတ်နေသူ” ဟု မကျေမနပ် ရေရွတ်သံကို ကြားလိုက်ရသည့်အခါ သူ့ကို သတိပေးသည့် အကြည့်တစ်ချက် ပို့လွှတ်လိုက်တော့သည်။ 

ကျန်းထန်ဝေ့က ချက်ချင်း ပါးစပ်ကို ပိတ်ထားလိုက်သော်ငြား အတွင်းစိတ်ထဲတွင်မူ များစွာ စိတ်ဖိစီးနေတော့သည်။

စွေ့ချီချောင်းရဲ့ တိုက်ခန်းကို လာတဲ့သူတွေမှ အများကြီးပဲလေ ဘာလို့ သတင်းတွေထဲမှာ ငါ့နာမည်ကျ ပါမလာရတာလဲ ဘာလို့ ငါ့ကိုကျ သာမန် ဝန်ထမ်းတစ်ယောက်လို့ပဲ ထင်နေကြတာလဲ ...

အစောပိုင်းက အခြားသရုပ်ဆောင်များ ထုတ်ပြောခဲ့ကြသည့် စိုက်ပျိုးရေးဂိမ်းမှာ ကျန်းထန်ဝေ့က ဒီဇိုင်းဆွဲထားခြင်းဖြစ်သည်။ ထိုဂိမ်းကြောင့်သာလျှင် သူက စွေ့ချီချောင်း၏ တိုက်ခန်းထဲသို့ အင်တာနက်ပုံရိပ်ယောင်ဖြင့် မဟုတ်ဘဲ ကိုယ်တိုင်ကိုယ်ကျ ဝင်ထွက်သွားလာနိုင်ခြင်း ဖြစ်သည်။ 

ကျန်းထန်ဝေ့က LJJ မှတ်ဉာဏ်တု‌လေယာဉ်၏ နည်းပညာဗဟိုချက်ကို တုပနိုင်ခြင်း မရှိသေးသည့်တိုင် အသေးစိတ်ကျသည့် အချက်အလက်များကို မလိုအပ်သည့် စိုက်ပျိုးရေးဂိမ်းကိုမူ ရေးဆွဲနိုင်ပေသည်။ စွေ့ချီချောင်းက အသေးစိတ် အချက်အလက်များကို လွန်စွာ အာရုံထားသူ ဖြစ်သည့်အလျောက် ယုတ္တိမကျသည့် အချက်များကို ချက်ခြင်း ရှာတွေ့သွားတော့သည်။ 

သို့သော် သူ၏ စိုက်ပျိုးလိုသည့် ဆန္ဒများကို ဖွင့်ထုတ်ရန် အလို့ငှာ သာမန်အချိန်များတွင် ထိုဂိမ်းကို အသုံးပြုရခြင်းက ကောင်းမွန်သည်ဟု ထင်မြင်မိပေသည်။ 

စွေ့ချီချောင်းက ၎င်းကို အသုံးပြုပြီးနောက် စိတ်အခြေအနေများ များစွာ ကောင်းမွန်လာတော့သည်။ ထိုလုပ်ဖော်ကိုင်ဖက်များက သူ့အိမ်သို့ ဧည့်သည်အဖြစ် အလည်လာရောက်ကြကာ သိလိုစိတ်ကြောင့်ဖြစ်စေ၊ အိမ်ရှင်ကို အားနာသမှုကြောင့်ဖြစ်စေ အားလုံးအတူတူ သူနှင့် ကစားပေးလိုက်ကြရတော့သည်။ 

ဂိမ်းကမ္ဘာထဲတွင် ရောက်နေသည့်တိုင် စွေ့ချီချောင်းက သူတို့ကို စိုက်ပျိုးရေးနည်းစနစ်များအား အလေးအနက်ထားကာ သင်ကြားပေးခဲ့သည်။ ရလဒ်အနေဖြင့် ထိုဂိမ်းကို စမ်းသပ်ကစားခဲ့ကြသူအားလုံး နောက်ကျောနှင့် ခါးနာသည့် ဝေဒနာများ ခံစားခဲ့ကြရတော့သည်။ 

ထိုဖြစ်ရပ်၏ အကျိုးဆက်များက စွေ့ချီချောင်းနှင့် သူငယ်ချင်းဖြစ်သွားသည့် သရုပ်ဆောင်များအပေါ် အလိုလို သက်ရောက်ကာ နောက်ပိုင်းတွင် သူတို့ကိုယ်ပိုင် ရသစုံအစီအစဉ်များ ပြုလုပ်သည့်အခါ သူတို့၏ ပရိုဂရမ်တွင် စိုက်ပျိုးရေးအစီအစဉ်ကိုပါ အလိုလို ထည့်သွင်းမိသွားကြတော့သည်။ 

သူတို့အနေဖြင့်လည်း မည်သို့မှ မတတ်နိုင်ပေ။ စွေ့ချီချောင်း၏ စကားများက သူတို့၏ စိတ်နှလုံးထဲတွင် စွဲထင်နေကာ မြေနေရာအလွတ်တစ်ခုကို တွေ့လေတိုင်း ဤသို့သာ တွေးမိလာတော့သည်။ 

“Sh*t ဘာအသီးအနှံမှ မစိုက်ထားတာ တကယ်ကို နှမြောစရာပဲ…”

ထိုဖြစ်ရပ်တစ်ခုလုံးကြောင့် သရုပ်ဆောင်အားလုံးသည် သူတို့၏ မျိုးရိုးဗီဇများကို နောက်တစ်ကြိမ် ထပ်မံစစ်ဆေးလိုစိတ်များပင် ဖြစ်ပေါ်လာတော့သည်။ 

သူတို့လည်း ထူးထူးဆန်းဆန်းသွေးတွေ နိုးထလာတာများလား ...

ထိုမျှသာမက အာဏာကြီးစိုးမှုအတွက် ရုန်းကန်မှုများနှင့် ရင်ဆိုင်နေရသည့် သရုပ်ဆောင်များမှာလည်း သီးနှံများကို ပိုပြီး ကျွမ်းကျင်စွာဖြင့် သိုလှောင်နိုင်လာကာ တစ္ဆေများနှင့် ရင်ဆိုင်ရသူများ၊ တော်ဝင်နန်းတော်နှင့် စီးပွားရေးစစ်ပွဲတွင် ရုန်းကန်နေရသူများနှင့် ပုံရိပ်ယောင်ကမ္ဘာ၌ ဝရမ်းပြေးသူများအပါအဝင် ဂိုဏ်းဖွဲ့လှုပ်ရှားသူများပါ မကျန် ကိုယ်တိုင် လယ်ယာစိုက်ပျိုးခြင်းကို အစပြုလာကြတော့သည်။ 

ထိုသို့ဖြင့် စိုက်ပျိုးရေးနှင့် သက်ဆိုင်သည့် ပရိုဂရမ်များက LJJ ထံ ဦးတည်လာပြီး မြောက်များစွာသော စိုက်ပျိုးရေး ကုမ္ပဏီများကလည်း ပူးပေါင်းလုပ်ဆောင်ရန် ဆွေးနွေးလာကြတော့သည်။ 

ကြည့်ရှုသူများကလည်း ထိုစိုက်ပျိုးရေးက အဆိပ်ပြင်းလွန်းလှသည်ဟုပင် ထုတ်ပြောမိလာကြတော့၏။ 

လတ်ရှိအချိန်တွင် စွေ့ချီချောင်းက ကျန်းထန်ဝေ့နှင့်အတူ ဆိုဖာပေါ်တွင် ထိုင်နေသည်။ 

ကျန်းထန်ဝေ့က စွေ့ချီချောင်း၏ တုံ့ပြန်ချက်များအတိုင်း စိုက်ပျိုးရေးဂိမ်းကို လိုအပ်သည့် ပြုပြင်ပြောင်းလဲမှုများ လုပ်ဆောင်နေလိုက်သည်။ 

ကျန်းထန်ဝေ့က ငွေရှာလိုသည်ဟု ပြောခဲ့သည့်တိုင် ထိုဂိမ်းကို ရောင်းချလိုခြင်း မရှိပေ။ သူက ပြောလိုက်သည်။ 

“ဒါက မင်းအပေါ် ထားတဲ့ ကျွန်တော့်ရဲ့ ခံစားချက်တွေကို ဖော်ပြထားတာ အရင်ဆုံး ဒီဂိမ်းကိုပဲ မင်းကို ပေးထားဦးမယ် နောက်ပိုင်းမှပဲ တကယ့် စိုက်ပျိုးမြေအစစ်ကို ပေးမယ်နော် ...”

စွေ့ချီချောင်းက မရယ်ဘဲပင် မနေနိုင်ပေ။ သူက ရှောင်ပိုင်မှာ အလွန် အလုပ်ကြိုးစားနေကြောင်း မြင်နေရကာ ထိုဂိမ်းကို ဒီဇိုင်းဆွဲကတည်းက ရှောင်ပိုင်၏ နှလုံးသားကို မြင်တွေ့ရပြီး ဖြစ်သည့်အတွက် အလွန် စိတ်ကျေနပ်မိနေပေသည်။ 

အရမ်းကောင်းတာပဲ… ဒီဂိမ်းကနေတစ်ဆင့် သူ့အနေနဲ့ ရှောင်ပိုင်က စိုက်ပျိုးရေးနဲ့ ပတ်သက်ပြီး ဘယ်လောက်အထိ အလေးအနက် လေ့လာထားလဲဆိုတာကို မြင်နေရတယ်လေ ...

အချက်အလက်တွေက လုံးဝဥဿုံ ပြီးပြည့်စုံနေတာတော့ မဟုတ်ပေမယ့် စနစ်တစ်ခုလုံးကတော့ တော်တော်လေးကို တိုးတက်နေတာပါပဲ...  ဒီဂိမ်းကို ဒီဇိုင်းဆွဲထားတဲ့လူက စိုက်ပျိုးရေးနဲ့ ပတ်သက်ပြီး သေသေချာချာကို လေ့လာထားမှန်း သိသာတယ် ...

သူက တွေးလိုက်သည်။ 

ဤသည်မှာ သူ့ဘက်က ကျန်းထန်ဝေ့ကို ချီးကျူးသည့် ပုံစံမျိုး ဖြစ်ပေသည်။ 

ကျန်းထန်ဝေ့က ထိုစကားကို တစ်ဝက်ခန့် ကြားလိုက်ရသည့်အခါ ဤသို့ ပြောလိုစိတ်များ ဖြစ်ပေါ်လာခဲ့သည်။ 

“နောက်ဆုံးတော့ ကျွန်တော့်ခံစားချက်တွေကို မြင်နိုင်ပြီပေါ့ ...”

သိုသော် စွေ့ချီချောင်း၏ စကားများအား အဆုံးအထိ ကြားလိုက်ရသည့်အခါ ဤသို့သာ ဝမ်းနည်းပက်လက်ဖြင့် ပြန်ပြောလိုက်ရတော့သည်။

“မင်းဘက်က ဒီလိုပဲ တွေးတယ်ဆိုလည်း အဆင်ပြေပါတယ် ဒါပေမယ့် တစ်ခုတော့ မှတ်ထားပေးနော် ကျွန်တော်က တစ်ခြားလူတွေလိုမျိုး ဦးနှောက်ဆေးဖို့ လွယ်ကူတဲ့သူ မဟုတ်ဘူးနော်… ကျွန်တော်က လူတစ်ယောက်ကိုချစ်ရင် အဲဒီ့လူရဲ့ တခြားအရာတွေ အားလုံးကိုပါ ချစ်ပေးတဲ့ လူစားမျိုး ...” 

.....

LJJ ၏ ဇာတ်လမ်းတိုထဲတွင် အစောပိုင်းက ပါဝင်ခဲ့သည့် ဒေသခံမျိုးနွယ်စုများက စွေ့ချီချောင်း သူတို့ထံ ပြန်လာကာ အုပ်ချုပ်နိုင်စေရန်အတွက် အချိန်ပြည့် ပြဿနာမျိုးစုံ ရှာလာကြသည့်အပြင် စွေ့ချီချောင်း၏ ဆုံးဖြတ်ချက်ကို ပြောင်းလဲနိုင်စေရန်အတွက် စွေ့ချီချောင်း၏ မိတ်ဆွေများကိုပင် စစ်သူကြီးချုပ်နှင့် ဝန်ကြီးချုပ်ကဲ့သို့သော ရာထူးများကို ပေးအပ်လာခဲ့ကြတော့သည်။ 

ထို့နောက်ပိုင်းတွင်မူ ထိုမျိုးနွယ်စုများက အခြားသော မျိုးနွယ်စုများနှင့် တိုက်ခိုက်ကြလေတိုင်း စွေ့ချီချောင်းက သူ့ဟင်းချက်ဓားကို ဘေးသို့ ပစ်ချကာ စိုက်ခင်းသို့ သွားသည့်ကားကို မောင်းနှင်လျက် ထိုသူများကို ကယ်တင်ရန် ရောက်လာပေးခဲ့တော့သည်။ 

စွေ့ချီချောင်းနှင့် သူ့အဖော်များ ဤဂြိုဟ်ပေါ်သို့ စတင်ကာ ရောက်လာစဉ်က သူတို့နှင့်အတူ ခေတ်မီနည်းပညာများစွာ မပါရှိခဲ့ပေ။ သို့သော် ယခုမူ သူတို့တွင် ကားတစ်စီး ရှိလာပြီ ဖြစ်သည့်အတွက် သူ့အပေါင်းအဖော်များ အားလုံး တစ်ဦးမကျန် ထင်ရှားကျော်ကြားလာတော့သည်။ သူတို့က စက်သံကို အမြင့်ဆုံးအထိတင်ကာ တိုက်ခိုက်ချိုးဖျက်သည့် အသံပြုလုပ်ချက်များကိုပါ ထည့်သွင်းလျက် လူအင်အား များပြားသည်ကို အခွင့်ကောင်းယူကာ ရန်သူကို တိုက်ခိုက်ခြောက်လှန့်ရန် ဆုံးဖြတ်လိုက်ကြတော့သည်။ 

ထိုသို့ဖြင့် သူတို့အုပ်စုနှင့် ဒေသခံမျိုးနွယ်စုများအကြား ဆက်ဆံရေးက တင်းမာမှုမှသည် မိတ်ဆွေများအဖြစ် သို့မဟုတ် ရန်သူများအဖြစ်သို့ ပြောင်းလဲသွားတော့သည်။ အုပ်စုနှစ်ခုအကြားတွင် ပြိုင်ဆိုင်မှုများ ရှိနေသေးသည့်တိုင် ၎င်းက ဆဲရေးတိုင်းထွာ သတ်ဖြတ်ခြင်းတို့ မပါဝင်သည့် သာမန်ရန်ပွဲအဖြစ်သို့သာ ပြောင်းလဲသွားတော့သည်။ 

သို့သော် ထိုမျိုးနွယ်စုက တစ်နေ့နေ့တစ်ချိန်ချိန်တွင် စွေ့ချီချောင်းအား အရိုက်အရာ ဆက်ခံခိုင်းမည့် အကြံကိုမူ မစွန့်လွှတ်နိုင်ကြသေးချေ။ 

တစ်ဖြည်းဖြည်း နာမည်ကျော်ကြားလာသောကြောင့် နောက်ပိုင်းတွင် ဇာတ်လမ်းတိုထဲ၌ နောက်ထပ် ဇာတ်ကောင်များစွာကိုပါ ထပ်မံ ထည့်သွင်းလိုက်တော့သည်။ ထုတ်လုပ်ရေးအသင်းက ထို အသစ်ထည့်ထားသည့် ဇာတ်ကောင်များနှင့် ပတ်သက်၍လည်း ပြီးပြည့်စုံနေစေရန် အားသွန်ခွန်စိုက် ကြိုးစားခဲ့ကြသည်။ ဥပမာအားဖြင့် အသစ်ထည့်ထားသည့် ဇာတ်ကောင်နှစ်ဦးမှာ ထိုဂြိုဟ်ပေါ်သို့ မတော်တဆ စွန့်ပစ်ခြင်း ခံခဲ့ရသည့် လူသားမျိုးနွယ်စုများ ဖြစ်ကြကာ သူတို့က ဤဂြိုဟ်ပေါ်တွင် လူသားဟူ၍ သူတို့နှစ်ဦးသာ ရှိသည်ဟု ထင်ခဲ့ကြသည်။ သို့သော် ဘက်စုံသုံးယာဉ်ကို မောင်းနှင်၍ နေထိုင်ရန် ဘေးကင်းသော နေရာကို လိုက်ရှာသည့်အခါ ဒေသခံမျိုးနွယ်စုတို့၏ဝတ်စုံနှင့် အနည်းငယ် တူညီသော ဝတ်စုံကို ဝတ်ဆင်ထားသည့် စွေ့ချီချောင်းနှင့် တွေ့လိုက်ရသည်။ 

စွေ့ချီချောင်း ထိုဂြိုဟ်ပေါ်သို့ ရောက်ရှိနေခဲ့သည်မှာ အလွန် ကြာမြင့်နေပြီ ဖြစ်သည့်အလျောက် သူ့ကိုယ်ပိုင် အဝတ်အစားများကို ဖန်တီးဝတ်ဆင်နှင့်ပြီး ဖြစ်ပေသည်။ 

ထိုအချိန်မှာပင် ထိုလူနှစ်ဦး၏ ယာဉ်မှာ ရုတ်တရပ် ပျက်သွားခဲ့တော့သည်။ တစ်ဖက်သူ၏ အဝတ်အစားများက သူတို့သည် စွေ့ချီချောင်းကို ဤဂြိုဟ်ပေါ်ရှိ မျိုးနွယ်စုဝင်တစ်ဦးဟု အထင်မှားကာ မျောက်များကဲ့သို့ လက်ဟန်ခြေဟန်ဖြင့် စကားပြောလိုက်ကြသည်။ 

စွေ့ချီချောင်းက သူတို့၏ လှုပ်ရှားမှုများကို တစ်ခဏမျှ စိုက်ကြည့်နေပြီးနောက်တွင်မှ ဘုံဘာသာစကားဖြင့် ပြောလိုက်သည်။ 

“တစ်မိနစ်လောက်စောင့်... ငါ မင်းတို့ကားကို ပြင်ပေးမယ် ...”

လက်ဟန်ခြေဟန်ဖြင့် အကူအညီတောင်းနေသူနှစ်ဦး : “...”

စွေ့ချီချောင်းက ယာဉ်ကို အလျင်အမြန် ပြင်ဆင်ပေးလိုက်ကာ ထိုသူနှစ်ဦးကို သူတို့၏ အခြေစိုက်စခန်းသို့ ခေါ်လာခဲ့လိုက်သည်။ အခြေစိုက်စခန်းမှာ သူတို့နှစ်ဦးအတွက် အမှန်တကယ် အမြင်ပွင့်ဖွယ်ရာပင်။ အခြေစိုက်စခန်းမှာ အမှန်တကယ်လည်း ကောင်းမွန်လွန်းလှရာ ထိုကဲ့သို့ တုံ့ပြန်ခဲ့သူမှာ သူတို့နှစ်ဦးသာမက အခြားသော အုပ်စုများလည်း ရှိနေခဲ့ပေသည်။ ပစ္စည်းကိရိယာများနှင့် အစားအစာများသာမက အင်ဂျင်နီယာပိုင်းဆိုင်ရာ တည်ဆောက်ချက်များပင်လျှင် ရှိနေသေးသည်။ ရေအရင်းအမြစ် ထိန်းသိမ်းရေး စီမံချက်ကြောင့် ရေပြဿနာကို အပြည့်အဝ ဖြေရှင်းနိုင်ခဲ့ကာ ၂၄ နာရီပတ်လုံး ရေမပြတ်လပ်စေရန် ဆောင်ရွက်နိုင်ခဲ့သည်။ သန့်စင်ခန်း၊ ရေချိုးခန်းသာမက အကြမ်း တည်ဆောက်ထားသော အိမ်သာများပင်လျှင် ရှိနေသေးသည်။ ထို့အပြင် အသားစားနိုင်ရန်အတွက် တိရိစ္ဆာန်များလည်း မွေးမြူထားသည့်အပြင် တစ်ကိုယ်ရေသုံး စိုက်ပျိုးရေးလုပ်ငန်းသုံး ကားနှင့် သစ်သားကို အသုံးပြုကာ တိရိစ္ဆာန်ခွန်အားဖြင့် မောင်းနှင်ရသည့် အခြားသော ယာဉ်များလည်း ရှိနေသေးသည်။ ထို့အပြင် ရှိနေသည့် မီးဖိုမှာလည်း အလွန် ကြီးမားလှသည့်အတွက် ပေါင်မုန့်ဖုတ်ရန် မဆိုထားနှင့်၊ ပန်းပဲလုပ်လိုလျှင်ပင် အခက်တွေ့နိုင်မည် မဟုတ်ချေ။ 

သူတို့က ဘဝကို ကောင်းမွန်သာယာစွာ ဖြတ်သန်းနေကြကာ လူနေမှုအဆင့်အတန်းမှာလည်း အလွန် မြင့်မားလှသည်။ အနီးအနားရှိ မျိုးနွယ်စုများကလည်း ဘုံဘာသာစကားကို တစ်ခွန်းစနှစ်ခွန်းစ ပြောနိုင်လာကြကာ ပစ္စည်းများ ဖလှယ်ပြီး စားဖိုမှူးကို သူတို့၏ ဘုရင်အဖြစ် ဆောင်ရွက်ပေးရန် မကြာခဏ ဖိတ်ကြားလာကြသည်။ 

စားဖိုမှူးက ဘယ်သူလဲ ...

စားဖိုမှူးက သူတို့ယာဉ်ကို ပြင်ပေးခဲ့သည့် လူချောလေးတစ်ဦး ဖြစ်ကာ အခြေစိုက်စခန်းသို့ လာခဲ့ရာ လမ်းတစ်လျှောက်တွင် သူတို့နှစ်ဦးကို အမျိုးမျိုးသော စွမ်းရည်များ ထုတ်ပြခဲ့သူလည်း ဖြစ်ပေသည်။ 

“စွေ့ချီချောင်းလို အရည်အချင်း ရှိပါတယ်ဆိုတဲ့လူတောင် ဒီအခြေစိုက်စခန်းမှာဆို စားဖိုမှူးအဆင့်ပဲ ရှိသေးတယ် ...”

ထိုစကားကို ကြားလိုက်ရသည့်အခါ လူသစ်နှစ်ဦးသည် အလွန်အမင်း အံ့ဩမင်သက်သွားပြီး အခြေစိုက်စခန်းသို့ ပူးပေါင်းဝင်ရောက်လိုစိတ်များ ထက်သန်လာတော့သည်။ သူတို့က ဂြိုဟ်ပေါ်တွင် အခြေစိုက်စခန်း ဆောက်လုပ်သည့် လုပ်ငန်းစဉ်၌လည်း အားသွန်ခွန်စိုက် ပါဝင်ခဲ့ကြသည်။ 

တဖြည်းဖြည်း နာမည်ကြီးလာသည့် ဇာတ်လမ်းတိုကြောင့် LJJ ဘက်မှ ပရိသတ်များအား ရိုက်ကွင်းနေရာသို့ လာရောက်လည်ပတ်ရန် ခွင့်ပြုလိုက်တော့သည်။ 

သို့သော် ရိုက်ကွင်းနေရာသို့ လာရောက်လည်ပတ်ရာ၌ ကန့်သတ်ချက်များစွာ ထုတ်ထားသည့်အပြင် နေရာအနှံ့ လှည့်ပတ်စစ်ဆေးနေသည့် လုံခြုံရေးများလည်း အများအပြား ရှိနေပေသည်။ အကြောင်းမှာ ပါဝင်သည့် သရုပ်ဆောင်အရေအတွက်မှာ အလွန်များပြားလှရာ ထိုသရုပ်ဆောင်အားလုံး၏ ပရိသတ်များကို တစ်ပြိုင်တည်း လာရောက်ခွင့် ပြုလိုက်ပါလျှင် အမျိုးမျိုးသော အခက်အခဲများ ဖြစ်ပွားလာနိုင်သောကြောင့် ဖြစ်သည်။ ထို့ကြောင့် အားလုံးကို အလှည့်ကျသာ လာရောက်လည်ပတ်ခွင့် ပြုလိုက်သည်။ 

စွေ့ချီချောင်း၏ ပရိသတ်များမှာ သူတို့၏ လုပ်ရပ်များကြောင့် နာမည်ကြီးနှင့်နေကြပြီး ဖြစ်သည်။ သူတို့ လည်ပတ်ရမည့် အလှည့်သို့ ရောက်လာသည့်အခါ အခြားသရုပ်ဆောင်များ၏ ပရိသတ်များသာမက သရုပ်ဆောင်များ ကိုယ်တိုင်ကပင်လျှင် ဖြစ်လာနိုင်မည့် ကိစ္စများကို ကြိုတွေးကာ စိတ်လှုပ်ရှားနေကြတော့သည်။ 

စွေ့ချီချောင်း၏ ပရိသတ်များက လက်ထဲတွင် အသီးအရွက်များ ကိုယ်စီ သယ်ဆောင်ထားကြရာ တစ်ချက်တည်း ကြည့်ရုံမျှဖြင့်ပင် သူတို့ကို မည်သူမည်ဝါဖြစ်ကြောင်း ခွဲခြား၍ ရပေသည်။ 

စွေ့ချီချောင်းနှင့် စကားပြောကြသည့်အခါ သူတို့၏ ပုံစံမှာ ပို၍ပင် ရယ်စရာ ကောင်းလာတော့သည်။ တစ်ဦးချင်း အစဉ်လိုက် တန်းစီနေကြသည်မှာ သူတို့၏ အသီးအရွက်များနှင့် စပ်လျဉ်း၍ စွေ့ချီချောင်း၏ အကဲဖြတ်မှုကို ခံယူရန် စောင့်ဆိုင်းနေကြသည့်အတိုင်းပင်။ ထို့အပြင် အချို့သော ပရိသတ်များက သူတို့၏ အသီးအရွက်များ ပိုပြီး ကြည့်ကောင်းနေစေရေးအတွက် ရေဖြန်းရန် စပရေးဘူးများကိုပင် ယူလာခဲ့ကြသေးသည်။ အခြားသရုပ်ဆောင်များ၏ ပရိသတ်များသာဆိုလျှင် မုန်ညင်းရွက်အစား နှင်းဆီ ၉၉၉ ပွင့်ကို ယူလာကြမည် ဖြစ်သော်ငြား စွေ့ချီချောင်း၏ ပရိသတ်များမှာမူ အများနှင့် ကွဲပြားကြပေသည်။ 

ထို့အပြင် သူ့ပရိသတ်များထဲတွင် အိမ်အခြေအနေ ပိုမိုကောင်းမွန်ကာ အိမ်တွင် ရေကန်တစ်ကန် ပိုင်ဆိုင်ထားသူများလည်း ပါဝင်နေပေသည်။ ထိုသူများက အလွန် ရှည်လျားသည့် အမြစ်များရှိသော ကြာပင်များကိုပါ ယူဆောင်လာခဲ့ကြသည်။ 

ပရိသတ်များက အသီးအရွက်များကို ရဲရဲဝံ့ဝံ့ ယူလာခဲ့ကြသည့်အလျောက် စွေ့ချီချောင်းကလည်း သူတို့ကို အလွန်စိတ်အားထက်သန်စွာဖြင့် အကြံပေးလိုက်တော့သည်။ သူက ထိုသူများနှင့် လက်ဆွဲနှုတ်ဆက်ကာ မှတ်ချက်ပြုနေပြီး အကြည့်တစ်ချက်တည်းဖြင့်ပင် ထိုအပင်များက အလိုအလျောက် စိုက်ပျိုးရေးစနစ်ဖြင့် စိုက်ပျိုးထားသည့် အပင်များဖြစ်ကြောင်း ပြောနိုင်ခဲ့သည်။ 

ထိုအပင်များနှင့် စပ်လျဉ်း၍ သူတို့ကို ပြစ်တင်ရှုံ့ချဖွယ်ရာ မရှိပေ။ သို့သော် စွေ့ချီချောင်းအတွက်လည်း ပြောစရာစကား ကင်းမဲ့နေပေတော့သည်။ သူ့အနေဖြင့် ဈေးကွက်ထဲတွင် စိုက်ပျိုးရေးစနစ်များ မည်မျှအထိ များပြားနေကြောင်း မှတ်ချက်ချရုံသာ ရှိတော့သည်။ 

ထို့နောက် ပရိသတ်များက သူ့ကို စိတ်လှုပ်ရှားမှုအပြည့်ဖြင့် မေးလိုက်ကြသည်။ 

“မစ္စတာစွေ့ ကျွန်တော်တို့တွေက ဒီမှာ နေ့လည်စာ စားကြမလို့ အဲဒါ စိတ်မရှိရင် ကျွန်တော်တို့အတွက် ဟင်းတစ်ပွဲလောက်ချက်ပေးလို့ ရမလားဟင် ...”

စွေ့ချီချောင်း : “ဟမ် ...”

ပရိသတ်များက လက်ထဲတွင် သယ်လာသည့် အသီးအရွက်များကို လှုပ်ယမ်းပြလိုက်ကြသည်။

“အသီးအရွက်တွေ အကုန်လုံးက မှည့်နေပြီလေ အဲဒါဆိုတော့ ကျွန်တော်တို့အထင် ...”

🌲🌲🌲