Chapter 35

👥️Chapter 35

ယန်အန်းယုအား ချီးကျူးမှုများကို မြင်သည့်အခါ ယွီစစ်ယွမ်၏ ပရိသတ်များမှာ အထူးတလည် ဒေါသပုန်ထကုန်ကြတော့သည်။ ထိုပရိသတ်အုပ်စုနှစ်ခုသည် “လက်ဝှေ့ကျော်” ၏ “စတန့်သမားမောင်ငယ်လေး” ကိစ္စ ပြီးကတည်းက အမြဲလိုလို ရန်ဖြစ်နေခဲ့ကြသူများ ဖြစ်ပေသည်။ မရင့်ကျက်ကာ တစ်ဖက်စွန်းရောက်သည့် ပရိသတ်များက သူ့ကို မြင်လေတိုင်း “ငါတို့မိသားစုရဲ့ ယွီစစ်ယွမ်ကမှ အမိုက်ဆုံး အချောဆုံး” အစရှိသည့် စကားလုံးများကို အော်ဟစ်ကြွေးကြော်လေ့ ရှိကြသည်။ 

ယွီစစ်ယွမ်၏ မျက်ခုံးနှစ်ဖက်မှာလည်း ထိစပ်လုမတတ် တွန့်ကျုံ့နေတော့သည်။ 

ဘာလို့ အဲဒီ့ ယန်အန်းယုက အမြဲတမ်းနီးပါး မျက်စိရှေ့ကို ရောက်ရောက်လာရတာလဲ ...

ရှန်းဟွမ်ကုမ္ပဏီသို့ တစ်ချိန်တည်း ဝင်ရောက်လာကြသည့် လူသစ်များအနက် ရှန်သုန်းဟောင့်သည် ချင်နွော်ရှီ၏ သီချင်းအသစ်ကို နားထောင်ပြီးနောက် စိတ်ရှုပ်ထွေးမိလာသည်။ သို့သော် ဟွမ်ချွမ်းကမူ အလွန် ဒေါသထွက်သွားပြီး ရှန်သုန်းဟောင့်၏ အခန်းတံခါးကို ခေါက်လိုက်တော့သည်။ 

“ဟေး ရှန်သုန်းဟောင့် ကုမ္ပဏီက ငါတို့ကို ဒီအတိုင်း ဆက်ပြီး လျစ်လျူရှုထားရင် ငါတို့ရဲ့ ကျော်ကြားမှုတွေ တစ်ဖြည်းဖြည်း ပျောက်ကွယ်သွားတော့မယ် ...”

ဟွမ်ချွမ်း၏ မကျေမနပ် စောဒကတက်သံကို ကြားလိုက်ရသည့်အခါ ရှန်သုန်းဟောင့်၏ မျက်နှာထက်တွင် စက်ဆုပ်သည့် အမူအယာမျိုး မသိမသာ ထွက်ပေါ်လာတော့သည်။ 

“ပြောစရာရှိရင် တည့်တိုးပြော ကွေ့ဝိုက်မနေနဲ့ ...”

“ကောင်းပြီလေ ...”

ဟွမ်ချွမ်းက ခါးသီးစွာဖြင့် ပြုံးကာ ပြောလိုက်သည်။ 

“ထန်းရှောင်နဲ့ ချင်နွော်ရှီ နှစ်ယောက်စလုံး သီချင်းအသစ်တွေ ထုတ်ပြီးသွားကြပြီ ငါတို့အတွက်ကကျတော့ရော အခုထိ မန်နေဂျာတောင် ဖြစ်ဖြစ်မြောက်မြောက် မရှိသေးဘူး စောစောက အစည်းအဝေးမှာ ပြောသွားတဲ့ပုံအရဆို ငါတို့နှစ်ယောက်ကို အတူတူ ပွဲဦးထွက်ဖို့ စီစဉ်နေကြတဲ့ပုံပဲ ... ဟမ့် ပျင်းစရာကောင်းလိုက်တာ ...”

“...”

ရှန်သုန်းဟောင့်က စကားတစ်ခွန်းမှမဆိုဘဲ လက်သီးကိုသာ ကျစ်နေအောင် ဆုပ်ထားလိုက်သည်။ 

“ထန်းရှောင်က တအားကို နောက်ခံတောင့်တယ်ဆိုတာကိုရော ပြီးတော့ အရည်အချင်းပိုင်းအရလည်း ငါက သူနဲ့ ဘယ်လိုမှ မယှဉ်နိုင်ဘူး ဆိုတာကိုရော သိပြီးသားပါ ဒါပေမယ့် ချင်နွော်ရှီကကျတော့ရော သူ့မှာ အရည်အချင်းတော့ ရှိပေမယ့် ရှန်သုန်းဟောင့် မင်းလည်း လူတော်တစ်ယောက်ပဲလေ ပြိုင်ပွဲတုန်းကဆို အဲ့တစ်ယောက်က တအားကို ပြဿနာ ရှာခဲ့တာ ကြည့်ရတာ သူ့ကို လူသိများလာအောင် တမင် လုပ်ခဲ့တာထင်တယ် ...”

ဟွမ်ချွမ်းက အဆက်မပြတ် ပြောနေလိုက်သည်။ 

“သူ့သီချင်း နာမည်ကြီးလာတာက အရည်အချင်းအစစ်အမှန်ကြောင့်တဲ့ ဟမ့် သူ့ကို ပျိုးထောင်ပေးနေတဲ့ ဥက္ကဌယန်ကြောင့် မဟုတ်ဘူးလား ငါကြားတာတော့ ဥက္ကဌယန်က သူ့ရဲ့ စပွန်ဆာ ဖြစ်နေပြီတဲ့ သူ့ဆီကနေ အထောက်အပံ့တွေ ရလာအောင် နေ့တိုင်းတောင် သွားအိပ်ပေးနေရပြီ ဆိုလားပဲ ...”

“မင်းပါးစပ်ကို ပိတ်ထားလိုက် ...”

ရှန်သုန်းဟောင့်၏ မျက်နှာထားမှာ ချက်ခြင်း မည်းမှောင်ကာ သူ့ကို ကောက်ကာငင်ကာ ရန်လုပ်လိုက်တော့သည်။ 

“ဒါက မင်း ကြားခဲ့တာတွေပေါ့ ဟုတ်လား ...”

သူ့အကြည့်တို့က ရေခဲသဖွယ် အေးစက်နေ၏။ 

“ငါတို့က အနုပညာရှင်တွေ ဖြစ်နေပြီ ဟွမ်ချွမ်း ကျေးဇူးပြုပြီး အနာဂတ်မှာ ပါးစပ်ကို စည်းစောင့်ပေးပါ ...”

ထိုသို့ ပြောပြီးနောက် တစ်ဖက်က မည်သို့ ပြန်လည်တုန့်ပြန်လာမည်ကိုပင် အာရုံမထားဘဲ ထွက်သွားလိုက်တော့သည်။ 

“...”

ဟွမ်ချွမ်း၏ နှုတ်ခမ်းတို့ မဲ့ရွဲ့သွားကာ ရှန်သုန်းဟောင့်ကို မျက်နှာနှစ်ခွနှင့်လူဟု တိတ်တဆိတ် သမုတ်လိုက်လေသည်။ 

ပြိုင်ပွဲမှာတုန်းကကျ ချင်နွော်ရှီကို မြင်နေရင်ကို စိတ်တိုပြနေရတာ အမော .. အခုကျမှ သဘောထားတွေ ပြောင်းပြနေလိုက်တာများ ...

****

တစ်ရက်ကြာပြီးနောက် .. ရှန်းဟွမ်မီဒီယာရုံးချုပ် အဆောက်အဦးတွင် .. ကုမ္ပဏီသည် ချင်နွော်ရှီအတွက် သီးသန့် အသံသွင်းစတူဒီယိုတစ်ခု ပြင်ဆင်ပေးထားခဲ့သည်။ 

သူနှင့် မန်နေဂျာ ကျိုးချန်က MV ကို ကြည့်ကာ တစ်ခုခုအား ဆွေးနွေးနေကြသည်။ ဘေးနားတွင်မူ ယန်အန်းယုက အနည်းငယ် စိတ်ညစ်ဟန်ဖြင့် ငုတ်တုတ်ထိုင်နေ၏။ 

MV ထဲတွင် သူသည် ဓားသမားအဖြစ် သရုပ်ဆောင်ရာ၌ သဘာဝကျကျ သရုပ်ဆောင်နိုင်ခဲ့သည့်တိုင် အော်ပရာအဆိုတော်တစ်ဦးကဲ့သို့ ကပြရသည့် နေရာ၌မူ ...

အင်တာနက်ပေါ်မှ စကားသံများမှာ မည်သို့ပင် ဖြစ်နေပါစေ ယန်အန်းယုမှာမူ အလွန် ရှက်ရွံ့စိတ်ကြောင့် ၎င်းကို ဒုတိယအကြိမ်ပင် ပြန်ကာ မကြည့်လိုတော့ချေ။ 

“ရှောင်ယု ဘာဖြစ်လို့လဲ ဒီလောက် ကြာလှနေပြီကို ရှက်နေတုန်းလား ...”

ချင်နွော်ရှီက အနားသို့ ရောက်လာကာ ခပ်ပြုံးပြုံးဖြင့် မေးလိုက်သည်။ 

“ရှက်တာ မဟုတ်ပါဘူး နေသားမကျသေးတာ ...”

သူက သက်ပြင်းချကာ ချင်နွော်ရှီ၏ မျက်နှာနုငယ်ငယ်ကို စိုက်ကြည့်လျက် ပြန်ဖြေလိုက်သည်။ 

“နွော်ရှီ မိန်းကလေးလို ဝတ်ရမယ်ဆိုရင်လေ .. မင်းကမှ ငါ့ထက်ပိုပြီး လိုက်ဖက်သေးသလားလို့လေ နောက်တစ်ခေါက်ကျ မင်းကိုယ်တိုင် စမ်းကြည့်ပါ့လား ...”

ချင်နွော်ရှီ၏ မျက်ဝန်းထဲတွင် ရယ်မြူးရိပ်တို့ မသိမသာ ထွက်ပေါ်လာတော့သည်။

“ကောင်းပြီလေ .. အချိန်ရောက်လာရင် အခြေအနေ ကြည့်ကြတာပေါ့ ငါ့မျက်နှာကတော့ အဆင်ပြေပါတယ် ဒါပေမယ့် ခန္ဓာကိုယ်ကကျ အတောင့်လိုက်ကြီးနဲ့ လုံးဝ မကနိုင်ဘူးလေ အချိန်တိုအတွင်းမှာ ကတတ်အောင် အတင်းကြီး လေ့ကျင့်ယူဖို့ကျတော့လည်း အဆင်မပြေ .. ဒါပေမယ့် မင်းက ငါနဲ့မှ မတူတာ ...”

“ဟုတ်တယ် ...”

ကျိုးချန်ကပါ ဝင်ကာ ထောက်ခံလိုက်သည်။ 

“ပြီးတော့ “ရွှမ်းရှီ” ရဲ့ concept က မင်းသမီးတစ်ယောက်နဲ့ ရိုက်ဖို့လည်း အဆင်မပြေဘူးလေ ...”

ယန်အန်းယုက ဆက်ပြီး ငြင်းခုန်မည် ပြုလိုက်သည်။ ထိုစဉ် ကျန်းကျီချမ်က တံခါးခေါက်ကာ အထဲသို့ ဝင်လာ၏။ 

သူက ယန်အန်းယုကို လက်ဝှေ့ယမ်းကာ ပြုံးပြလိုက်သည်။ 

“ဟေး ယန်အန်းယု မတွေ့ရတာ ကြာပြီနော် နေပါဦး .. အခုတလော မင်းကို အွန်လိုင်းပေါ်မှာ ခဏခဏ တွေ့နေရသလားလို့ .. ဟားဟား ...”

“ကျန်းလောင်ရှီး ...”

ယန်အန်းယုကလည်း များစွာ အံ့ဩသွားရ၏။

“ကျန်းလောင်ရှီးကို ငါ လေ့ကျင့်တဲ့ နေရာမှာ ကူပေးဖို့ အကူအညီတောင်းလိုက်တာ ...”

ချင်နွော်ရှီက ရှင်းပြလိုက်သည်။ 

လူသစ်ဂျူနီယာလေးနှစ်ဦးနှင့် မျက်နှာချင်းဆိုင် တွေ့လိုက်ရသည့်အတွက် ကျန်းကျီချမ်သည် ရယ်ရခက်ငိုရခက် ဖြစ်သွားတော့သည်။ 

“မင်းတို့တွေ ငါ့ကို Shawn ကော လို့ပဲ ခေါ်ကြပါ လောင်ရှီးလို့ပဲ အကုန်လုံးက ခေါ်နေကြတော့ ငါ့ကိုယ်ငါတောင် အိုသွားပြီလို့ ခံစားနေရတယ် ...”

သီချင်းအသစ် ထွက်ရှိပြီးနောက် ချင်နွော်ရှီသည် နာမည်ကျော်ကြားလာကာ သူ၏ အချိန်စာရင်းမှာလည်း တစ်ဖြည်းဖြည်း ပြည့်ကြပ်လာသည်။ အစီအစဉ်များတွင် ပါဝင်ရန် တီဗီပရိုဂရမ်များစွာ၏ ဆက်တိုက် ဖိတ်ကြားခြင်းကို ခံရကာ သူ့မန်နေဂျာက အသေအချာ စဉ်းစားကာ သူ့အတွက် အသင့်လျော်ဆုံးတစ်ခုကို ရွေးချယ်ပေးခဲ့သည်။ ဤသည်မှာ စီနီယာ ကျန်းကျီချမ်နှင့်အတူ ပါဝင်သရုပ်ဆောင်ရမည့် အစီအစဉ်တစ်ခု ဖြစ်ပေသည်။ 

ပရိုဂရမ်၏ ဇာတ်ညွှန်းအရ သူနှင့် ကျန်းကျီချမ်သည် သီချင်းတစ်ပုဒ်ကို အတူတူ ဖျော်ဖြေသီဆိုကြရမည် ဖြစ်သည့်အတွက် တစ်ဖက်လူက ယနေ့ လာရောက်ခဲ့ခြင်း ဖြစ်သည်။ ထိုသို့ဖြင့် တစ်ကုမ္ပဏီတည်းသား ဖြစ်သူ ယန်အန်းယုနှင့်ပါ ဆုံတွေ့မိသွားတော့သည်။ 

“ယန်အန်းယု မင်းရဲ့ အော်ပရာအဆိုတော် မိတ်ကပ်က တအားကို လှတာပဲ ပြီးတော့ ဓားသမားဝတ်စုံက ပိုပြီးတောင် မိုက်သေးတယ် ...”

ကျန်းကျီချမ်သည် ချီးကျူးစကားများ ဆိုရာ၌ နှမြောတွန့်တိုခြင်း မရှိချေ။ 

ယန်အန်းယု၏ မတူညီသည့် စတိုင်နှစ်ခုက ဇာတ်ညွှန်းရေးဆရာနှင့် ဒါရိုက်တာအချို့၏ စိတ်ကူးစိတ်သန်းများကို ဆွဲဆောင်နိုင်ခဲ့သည်။ သူတို့က ယန်အန်းယုသည် အလွန် လိုက်လျောညီထွေဖြစ်ကာ သရုပ်ဆောင်ရာ၌ ဇာတ်ကွက်ရွေးချယ်နိုင်စွမ်း ကျယ်ပြန့်လှသည်ဟု ထင်မြင်မိလာကြပြီး သူသည် အနာဂတ်တွင် ပိုမိုများပြားစုံလင်သည့် ဇာတ်ကောင်အမျိုးမျိုးကို သရုပ်ဆောင်နိုင်လိမ့်မည်ဟုပါ ယူဆလာကြသည်။ 

“ကျေးဇူးတင်ပါတယ် ...”

သူက ပြုံးကာ ပြောလိုက်သည်။ 

ထို့နောက်တွင် အခြားသော ကိစ္စများကြောင့် ချင်နွော်ရှီနှင့် သူ့မန်နေဂျာ အပြင်သို့ ခဏ ထွက်သွားသည်ကို အခွင့်ကောင်းယူကာ ကျန်းကျီချမ်က ယန်အန်းယုနှင့် စကားစမြည် ပြောနေလိုက်သည်။ 

“ဟုတ်သားပဲ မင်းက ယီချန်းယန်ကို အများကြီး ကြိုက်တာ မဟုတ်လား ...””

“ဟမ် ...”

ယီချန်းယန်၏ နာမည်ကို ရုတ်တရက် ကြားလိုက်ရသည့်အတွက် ယန်အန်းယုသည် ကြောင်အသွားရှာတော့သည်။ 

“ဟုတ်ကဲ့ ဘာလို့လဲ Shawn ကော ...”

ကျန်းကျီချမ်က ပဟေဠိဖြစ်ဖွယ် အပြုံးကြီးဖြင့် ပြုံးပြကာ သူ့အနားသို့ တိုးလာရန် လက်ဟန်ပြလိုက်သည်။ 

ယန်အန်းယုက နာနာခံခံဖြင့် အနားသို့ တိုးသွား၏။ ထို့နောက်တွင် ကျန်းကျီချမ်က သူ့နားရွက်အနားသို့ ကပ်ကာ တီးတိုးပြောလိုက်သည်။ 

“အရင်က မင်းကို ပြောဖို့ မေ့နေလို့ .. သူက မင်းလို ပုံစံလေးတွေကို ကြိုက်တယ်လေ ဟားဟား ...”

“ဒါပေမယ့် သူ့နှလုံးသားကတော့ ရေခဲတောင်ကြီးအတိုင်းပဲ ဒီလောက် နှစ်တွေအများကြီး ကြိုးစားလာတဲ့ ငါတောင် ထောင့်လေး သေးသေးလေးကိုပဲ အရည်ဖျော်နိုင်သေးတာ ...”

ယန်အန်းယု “...”

ကျန်းကျီချမ်ကလည်း ယီချန်းယန်ကို ကြိုက်နေတာကိုး ...

***

ထိုအချိန်၌ ယီချန်းယန်ကမူ S မြို့တော်သို့ ပြန်လည်ကာ ရောက်ရှိလာပြီ ဖြစ်သည်။ သူ ပြန်ရောက်လာချိန်မှာ ညဉ့်နက်နေပြီ ဖြစ်သည့်အတွက် အိပ်စက်လိုက်ကာ နောက်တစ်နေ့ မနက် နိုးလာသည်နှင့်တစ်ပြိုင်နက် အရန်အကောင့်ထဲသို့ ဝင်လျက် ယန်အန်းယု၏ လတ်တလော လှုပ်ရှားမှုများကို ကြည့်ရှုကာ သူ တင်ထားသည့် ပို့စ်များကို ဆက်တိုက် like ပေးလိုက်သည်။ 

ယခုလက်ရှိတွင် ချင်နွော်ရှီသည် သူ၏ သီချင်းအသစ်အတွက် အကြီးအကျယ် ပရိုမိုးရှင်းဆင်းနေရာ သူငယ်ချင်းကောင်းတစ်ဦး ဖြစ်သည့်အပြင် အဓိကသရုပ်ဆောင်အဖြစ်ပါ ပါဝင်ထားသည့် ယန်အန်းယုသည်လည်း သူ့ပို့စ်များကို ပြန် share ပေးခြင်းများ ပြုလုပ်ခဲ့ပေသည်။ 

ထိုသို့ဖြင့် အနုပညာလောကတွင် “ရှီယု” အမည်ရ သင်္ဘောတစ်စီး ထပ်မံပေါ်ထွက်လာပြန်တော့သည်။ 

အစအဆုံး လိုက်လံစုံစမ်းပြီးနောက် ပရိသတ်များသည် ချင်နွော်ရှီနှင့် ယန်အန်းယုသည် ပွဲဦးမထွက်ခင်ကတည်းက ခင်မင်ကြသူများ ဖြစ်ကြကာ “မနက်ဖြန်များ၏အသံ” ကိုပင် အတူတူ ပါဝင်ယှဉ်ပြိုင်ခဲ့ကြကြောင်းနှင့် ယန်အန်းယုသည် အကြိုရွေးချယ်ပွဲတွင် ပြုတ်သွားခဲ့ခြင်းဖြစ်ကြောင်းကိုပါ သိရှိသွားကြတော့သည်။

သို့သော် ယန်အန်းယုသည် ချင်နွော်ရှီကို နောက်ကွယ်တွင် အားပေးထောက်ပံ့မှုများနှင့် ချီးကျူးမှုများကို အဆက်မပြတ် ပြုလုပ်ခဲ့ကြောင်းနှင့် သူ၏ တတိယမြောက်ပို့စ်သည်ပင်လျှင် ချင်နွော်ရှီကို အားပေးထားသည့် အကြောင်းဖြစ်ကြောင်း သိရှိသွားကြ၏။ 

ထိုသို့ဖြင့် အင်တာနက်သုံးစွဲသူအချို့က “ရွှမ်းရှီ” MV ကို အနည်းငယ် တည်းဖြတ်ကာ ချင်နွော်ရှီနှင့် ယန်အန်းယုတို့၏ ဆွတ်ပျံ့တမ်းတဖွယ် နှစ်ဘဝအချစ်ဇာတ်လမ်းအဖြစ်သို့ ပြောင်းလဲဖန်တီးလိုက်ကြလေသည်။ 

ထိုဗီဒီယို၏ မှတ်ချက်ကဏ္ဌတွင် အမျိုးမျိုးသော မှတ်ချက်များ တရစပ် ထွက်ပေါ်လာကာ သူတို့နှစ်ဦး၏ ဆွဲဆောင်မှု ရှိမှုများကို ဆက်တိုက် ချီးကျူးရင်း အင်တာနက်သုံးစွဲသူများသည် တိတ်တခိုး သက်ပြင်းချလိုက်မိကြသည်။ 

ဒီလို ဆက်တင်မျိုးကို တစ်ခေါက် ရလိုက်ပြီးတာနဲ့ ရှင်းမပြတတ်စရာ နှစ်လိုမှုတစ်ခုခု ရှိလာတော့တာပဲ အိုက်ယား ...

ဤသို့သော တည်းဖြတ်မှုများနှင့် အကျွမ်းတဝင် ဖြစ်နေသည့် နာမည်ကြီး တည်းဖြတ်သူများက ချစ်ကြည်နူးစဖွယ် fanart များကို ဖန်တီးလာကြကာ fanfiction ရေးသူများလည်း အများအပြား ပေါ်ထွက်လာတော့သည်။ 

ထိုပို့စ်များကို ဖတ်နေရင်း ယီချန်းယန်၏ နှလုံးသားထဲတွင် သုန်မှုန်မှုတို့ တရစပ် တိုးများလာတော့သည်။ 

****

ဝမ်ရှင်းကျင်းယွမ်၌ ...

ရေချိုးခန်းထဲမှ ထွက်လာကာစ ဆံပင်ကို ပဝါဖြင့် ခြောက်အောင်သုတ်နေစဉ် ယန်အန်းယုသည် အပေါက်ဝ၌ ခွေးဟောင်သံတစ်ခုကို ကြားလိုက်ရသည်။ 

“ဝုတ် .. ဝုတ် ...”

ကြောင်အနေစဉ်မှာပင် ဝင်ပေါက်တံခါး ပွင့်သွားခဲ့ပြီး နှစ်လနီးပါး မတွေ့ရသည့် ယီချန်းယန် ပြန်ရောက်လာသည်ကိုတွေ့လိုက်ရသည်။ 

ထို့အပြင် သူက လက်ထဲတွင် corgi ခွေးတစ်ကောင်ကိုလည်း ပိုက်ထားသေး၏။ 

ယန်အန်းယုမှာ ကျောက်ရုပ်သဖွယ် ကြောင်အသွားကာ ဆံပင်ကို ဆက်ပြီး သုတ်ရန်ပင် မေ့လျော့သွားတော့၏။ 

“ကိုယ့်ကို လွမ်းနေလား ...”

ဤသည်မှာ ယီချန်းယန်ထံမှ ထွက်လာသည့် ပထမဆုံး စကားသံပင်။ 

ယန်အန်းယုကလည်း အနည်းငယ် မင်သက်မိသွား၏။ သူ ယီချန်းယန်၏ အပြုံးဖျော့ဖျော့လေးများအား အနည်းငယ်မျှပင် မခုခံနိုင်ချေ။ ထို့အပြင် သူသည်လည်း ထိုသူကို အလွန့်အလွန် လွမ်းဆွတ်နေခဲ့ပေရာ ...။ 

ပြီးခဲ့သည့်နှစ်လအတွင်း သူသည် ယီချန်းယန်နှင့် လူချင်း မတွေ့နိုင်၊ တစ်ဖက်လူ၏ ပရိသတ်များ တင်ထားသည့် ပို့စ်များမှတစ်ဆင့် ဓာတ်ပုံများကို လိုက်ကြည့်ခြင်းဖြင့်သာ ထိုသူ၏ ပြင်ပလှုပ်ရှားမှုများကို သိခဲ့ရသည်။ 

အလုပ်လုပ်ရာ၌ အနှောင့်အယှက် ဖြစ်သွားမည်ကို စိုးရိမ်စိတ်ကြောင့် ဖုန်းလည်း မခေါ်ရဲ၊ WeChat မှတစ်ဆင့်  "goodnight " အစရှိသော စာတိုများကိုသာ ရံဖန်ရံခါ ပို့ခဲ့ရသည်။ 

ဤအခိုက်အတန့်၌ ယန်အန်းယုသည် အလွန် စိတ်လှုပ်ရှားနေမိသည့်တိုင် ယဉ်ကျေးမှုကို အနည်းငယ် ထိန်းထားရန် လိုအပ်သေးသည်ဟု ခံစားမိသည့်အတွက် နှလုံးသားထဲမှ အပြောင်းအလဲများကို ထိန်းချုပ်ကာ ခေါင်းကိုသာ မသိမသာ ‌ငြိမ့်ပြလိုက်သည်။ 

ယီချန်းယန် "..." 

တစ်ဖက်လူ၏ စိတ်လှုပ်ရှားဖွယ် မရှိသော တုန့်ပြန်ပုံကြောင့် ရုပ်ရှင်ဧကရာဇ်တစ်ဦးမှာ မပျော်မရွှင် ဖြစ်သွားရရှာလေသည်။ 

"ဝုတ် ဝုတ် ..." 

ထိုစဉ် ယီချန်းယန်၏ ရင်ခွင်ထဲမှ ခွေးဟောင်သံ ထွက်ပေါ်လာ၏။ ထိုအကောင်ပေါက်လေးမှာ သူ့ကို လျစ်လျူရှုကာ အကြည်စိုက်နေကြသူနှစ်ဦးအား သူလည်း ရှိနေသေးကြောင်း ဒေါသတကြီး သတိပေးလိုက်သည်။ 

ယန်အန်းယုက အနားသို့ လှစ်ခနဲ ရောက်လာကာ ရင်ခွင်ထဲရှိ corgi ခွေးလေးကို ငုံ့ကြည့်ကာ အကဲခတ်လိုက်သည်။ 

ထိုအကောင်လေးမှာ အလွန် သေးငယ်လှကာ ယခုမှ အရွယ်ရောက်ကာစ အရွယ်လေးဟု ထင်မှတ်ရသည်။ ဖျတ်ခနဲ ကြည့်လိုက်စဉ်က ၎င်းသည် ရိုက်ကူးရေးအဖွဲ့၏ နာမည်ကျော်သရုပ်ဆောင် သာ့ခဲနှင့် ဆင်တူလှသည်ဟု ခံစားမိခဲ့သော်ငြား အနီးကပ် ကြည့်လိုက်သည့်အခါတွင်မူ ကွဲပြားမှုများ ရှိနေကြောင်း သတိပြုမိသွားသည်။ 

သာ့ခဲနှင့် နှိုင်းယှဉ်ပါလျှင် ၎င်း၏ မျက်လုံးအရောင်မှာ အနည်းငယ် ပိုဖျော့ကာ လည်ပင်းအနီးရှိ အမွှေးများမှာလည်း ကွဲပြားသည်။ 

"ဒါလေးက ဘယ်သူလေးလဲ ..." 

ယန်အန်းယုက သဘောတကျ ရယ်မောရင်း မေးမြန်းလိုက်သည်။  

"သာ့ခဲရဲ့ ညီလေး ..." 

ယီချန်းယန်က ရိုးရိုးရှင်းရှင်းသာ ပြန်ဖြေလိုက်သည်။ လေ့ကျင့်ရေးမှူး ဝမ်ကောကို အထူးတလည် ဆက်သွယ်ကာ ထို corgi ခွေးပေါက်လေးအား ဝယ်နိုင်ရန် ကြိုးစားခဲ့ရပုံ အသေးစိတ်များကိုမူ .. ယန်အန်းယု သိသွားအောင် ထုတ်ပြောလိုစိတ် ရှိမနေခဲ့ချေ။ 

ထိုစကားကို ကြားလိုက်သည့်အခါ ယန်အန်းယု၏ မျက်ဝန်းတို့ ဝင်းလက်တောက်ပသွားပြီး ခွေးပေါက်လေး၏ ခေါင်းကို အသာအယာ ပွတ်သပ်ပေးလိုက်တော့သည်။  ၎င်းကလည်း ထိုကဲ့သို့သော ပွတ်သပ်မှုမျိုးကို အင်မတန် သဘောကျနေသည့်ဟန်၊ မျက်တောင်များ စင်းကျလျက် ဇိမ်ခံနေလိုက်သည်။ 

"နာမည်တစ်ခုလောက် ပေးလိုက်လေ ..." 

ယီချန်းယန်က ပြောလိုက်သည်။ 

ယန်အန်းယုက ကြောင်အသွား၏။ 

"ကျွန်တော်လား ... ခင်ဗျား ဝယ်လာတာဆိုတော့ ခင်ဗျားပဲ နာမည်ပေးလိုက်တာက ပိုပြီး မသင့်တော်ဘူးလား ..." 

ယီချန်းယန်က ခေါင်းငြိမ့်ကာသာ ဆက်တိုက် တိုက်တွန်းလိုက်သည်။ 

"အဆင်ပြေတယ် မင်းပဲ ပေးလိုက်ပါ ..." 

"ကောင်းပါပြီ ..." 

ယန်အန်းယုက ပြုံးကာ ပြောလိုက်သည်။ 

"သူက သာ့ခဲရဲ့ ညီလေးဆိုတော့ CoCo လို့ ခေါ်ကြရအောင်လေ အဆင်ပြေလား အရမ်းများ ကလေးဆန်လွန်းသွားသလားလို့..." 

"CoCo လား ကိုယ့်အထင်တော့ အဆင်ပြေပါတယ် ..." 

ယီချန်းယန်က အပြုံးသေးသေးလေးတစ်ပွင့်နှင့်အတူ ခေါင်းတဆတ်ဆတ်ငြိမ့်ကာ ပြောလိုက်သည်။ 

ထိုစကားကို ကြားသည့်အခါ ယန်အန်းယုကလည်း အူကြောင်ကြောင်နိုင်စွာဖြင့် ပြုံးပြလိုက်၏။ 

ယန်အန်းယုက ဟိုးယခင်ကတည်းက ခွေးချစ်တတ်သူ ဖြစ်သည်။ ထို့အပြင် "နှလုံးသား၌ ထုဆစ်လေသော" ကို ရိုက်ကူးစဉ်ကလည်း လက်တွဲဖော်လေး သာ့ခဲနှင့်အတူ အပိုင်းအနည်းငယ်ခန့် အတူတူ ရိုက်ကူးခဲ့ဖူးသည့်အတွက် သူတို့အကြားတွင် နက်ရှိုင်းသည့် ခံစားချက်များ ဖြစ်ပေါ်လာခဲ့သည်။ သာ့ခဲ ရိုက်ကွင်းမှ ပြန်ရမည့် အချိန်သို့ ရောက်သည့်အခါ သူ့စိတ်ထဲတွင် မခွဲခါလိုသည့် စိတ်များတွင် ဖြစ်ပေါ်ခဲ့ရာ ယီချန်းယန်က corgi အမျိုးအစား ခွေးတစ်ကောင် ခေါ်လာပေးခဲ့ခြင်းက သူ့အတွက် အင်မတန် ကောင်းမွန်သွား၏။ 

ထိုခဏ၌ ယီချန်းယန်က ယန်အန်းယု၏ ဆံပင်များမှာ စိုစွတ်နေဆဲဖြစ်ကြောင်း သတိပြုမိသွားသည်။ ခပ်ပွပွ တီရှပ်တစ်ထည်ကို ကြုံရာ ဆဲဝတ်ထားသည့် တစ်ဖက်လူ၏ ပုံစံမှာ ရေချိုးခန်းထဲမှ ထွက်လာကာစဖြစ်ကြောင်း မေးနေရန်ပင် မလိုအပ်တော့သည့်အတွက် ယီချန်းယန်သည် သူ့ဆံပင်ကို လေမှုတ်ပေးရန် ဆုံးဖြတ်လိုက်သည်။ 

နွေဦးသို့ ရောက်နေပြီ ဖြစ်သည့်တိုင် ကျန်းမာရေးကို ကောင်းစွာ ဂရုမစိုက်ပါလျှင် အလွယ်တကူ အအေးမိသွားနိုင်ပေသည်။  

ထိုအခွင့်အရေးကြောင့် ယန်အန်းယုသည် အလွန် ရင်ထဲထိရှသွားရသော်ငြား ချက်ခြင်း ငြင်းဆန်လိုက်သည်။ သို့သော် ယီချန်းယန်ကမူ ထို ငြင်းဆန်ချက်ကို မကြားဟန်ပြုကာ အိမ်ထဲရှိ ဆံပင်အခြောက်ခံစက်ကို ထုတ်၍ ယန်အန်းယုကို ဆိုဖာပေါ်တွင် ငြိမ်ငြိမ်လေး ထိုင်နေရန် ပြောလိုက်လေသည်။

👥️