MM Story Teller

Chapter 71

Viewers 4k

👻 Chapter 71

ကွမ်ရင်မယ်တော်လေး ...(4)

သူတို့က လူများ ပြည့်ညပ်နေသည့် တောင်ခြေနား ရောက်သွားသည့်အချိန် စုန့်ချင်း၏ မျက်နှာကအနည်းငယ် လန်းလာသည်။ နေ့အချိန်အတွင်း အပြင်သွားသည့်အခါ လူများနေမှ ပိုဘေးကင်းလေသည်။

နှစ်ရက်ရှိပြီဖြစ်၍ ချူဟွိုက်မှာ နည်းနည်းလေးမှ စိတ်အေးမနေနိုင်ပေ။ အချိန်ပိုကြာသည်နှင့်အမျှ အခြေအနေက ပိုပြီး ရှုပ်ထွေးလာပြီး အန္တရာယ် ပိုများလာသည်။ ပထမနှစ်ရက်က ရထားခဲ့သည့် အချက်အလက်များက နောက်ဆက်ဖြစ်မည့်အရာအတွက် အကူအညီပေးလောက်သည်။

ကွမ်ရင်မယ်တော်လေး၏ နတ်နန်းက သူတို့ရှေ့တည့်တည့်တွင် ပေါ်လာပြီဖြစ်သည်။ ရွာထဲရှိ အဆောက်အအုံများနှင့်ယှဥ်လျှင် ဤနတ်နန်းက နန်းတော်ကြီးအလားပင်။ ချူဟွိုက်က ဝင်ပေါက်တွင် ရပ်နေရင်း အမွှေးတိုင်နံ့ပြင်းပြင်းကို ရှူရှိုက်မိသည်။

နောက်ဆုံးတွင် သူတို့အလှည့်ရောက်လာ၍ ချူဟွိုက်က ဝင်သွားလိုက်သည်။ ကွမ်ရင်မယ်တော်လေး၏ ရွှေရောင်ရုပ်တုကြီးက နှစ်မီတာခန့် အမြင့်ရှိပြီး မျက်စိကျိန်းလောက်အောင်ပင်။

ဤရုပ်တုကို ကွမ်ရင်မယ်တော်ဟု ခေါ်ကြသော်လည်း ကွမ်ရင်မယ်တော်နှင့် သိပ်မတူပဲ ဆွဲဆောင်မှုရှိသည့် မိန်းမလှလေးတစ်ယောက်နှင့် တူသည်။

ချူဟွိုက်က ရုတ်တရက် ကွမ်ရင်မယ်တော်ဘေးရပ်နေသည့် ရွှေရောင် ကောင်လေးရုပ်တုနှင့် ကျောက်စိမ်းရောင် ကောင်မလေး ရုပ်တုတို့ပေါ် အကြည့်ရောက်သွားသည်။ ရွှေရောင်ကောင်လေးက ဘယ်ဘက်တွင် ရှိပြီး ကျောက်စိမ်းရောင် ကောင်မလေးက ညာဘက်တွင် ရှိသည်။

ချူဟွိုက်၏ မျက်လုံးများ ရုတ်ချည်း နက်မှောင်သွားပြီး တော်တော်လေး အံ့သြသွားသည်။

ကျောက်စိမ်းမိန်းကလေး၏ သွင်ပြင်က မနေ့ညက သရဲကို အကောင်လိုက် မြိုချခဲ့သည့် ကောင်မလေးနှင့် တစ်ထေရာတည်း တူနေသည်။

ဒီကောင်မလေးက သရဲဆိုမှတော့ ဒီကွမ်ရင်မယ်တော်လေးဆိုတာက.....

ချူဟွိုက်က လှောင်ရယ်လိုက်သည်။

သူ့အဖေက ဒူးထောက်ကန့်တော့ပြီးမှ သားလိုချင်လျှင် ရွှေရောင်ကောင်လေးကို ထိရမည်ဖြစ်ပြီး သမီးလိုချင်ပါက ကျောက်စိမ်းရောင် မိန်းကလေးကို ထိရမည်ဟု မနက်က မှာခဲ့သည်။ သူ့အဖေ မှာလိုက်တဲ့ပုံစံက တောင်းဆုတွေအကုန်လုံးကို အမှားမရှိ ဖြည့်ဆည်းပေးတဲ့အတိုင်းပဲ....

သူ့အဖေက သားဆုတောင်းရန် ပြောခဲ့သည်။

" ကျွန်တော့်နောက်မှာနေ....လျှောက်မသွားနဲ့ဦး...." ချူဟွိုက်က စုန့်ချင်းကို ပြောလိုက်သည်။

စုန့်ချင်းက အမြန် သဘောတူလာသည်။

ချူဟွိုက်က သူ့အဖေ မှာထားသည့်အတိုင်း ကမ်းလှမ်းချက်တစ်ခု လုပ်ရန် ပြင်ဆင်သည်။ သူက ကျောက်စိမ်းရုပ်တု၏ ရှေ့က စာအုပ်ကို ယူကြည့်လိုက်ရာ တစ်ချက်ကြည့်ရုံနှင့် ထိတ်လန့်ပြီး အံ့သြသွားရသည်။

စာအုပ်ပေါ်တွင် ရေးထားသည့် နောက်ဆုံးစာလုံးက " ၉၉၈" ဖြစ်နေသည်။

ဒါဆို သူ့ညီမက ကိုးရာကိုးဆယ့်ကိုးယောက်မြောက် ကလေးပေါ့....

ချူဟွိုက်၏ သွေးများ ချက်ချင်း အေးခဲသွားရသည်။ ဒီစာအုပ်က အသက်ရှင်နေတဲ့ ကလေးရဲ့ စာရင်းလား....ဒါမှမဟုတ် ကျောက်စိမ်းရုပ် ကောင်မလေး စားသောက်ထားတဲ့ ကလေးဝိဥာဥ်အရေအတွက်လား.....

ကိုးရာကို့ဆယ့်ကိုးယောက်....ကျောက်စိမ်းရုပ် ကောင်မလေး မွေးဖွားလာဖို့က....

ချူဟွိုက်က တည်တည်ငြိမ်ငြိမ်နှင့် ရွှေရောင် ကောင်လေးနား ကပ်သွားလိုက်သည်။ သူက ထိုရုပ်တုရှေ့က စာအုပ်ကို ဖွင့်ကြည့်လိုက်ရာ ထိုစာအုပ်တွင်လည်း "၉၉၈" ဟု ရေးထားလေသည်။ သူက တံတွေးကို ခက်ခက်ခဲခဲ မြိုချလိုက်ရင်း နှလုံးခုန်မြန်လာသည်။

ဟုတ်ပြီ....ကျောက်စိမ်းရုပ်တု ကောင်မလေး မွေးဖွားလာပြီးရင် နောက်ကျ ရွှေရုပ်တု ကောင်လေးပေါ့....

သူ ဒီမစ်ရှင်ထဲ ဝင်လာတဲ့အချိန် သူ့အဖေက သူ့ညီမလေးကို သတ်ပြီးနေပြီ .....ဒါဆို ကျောက်စိမ်းမိန်းကလေး ပြန်မွေးဖွားလာတော့မယ်ဆိုတဲ့ သဘောပဲ.....

သူ့နာမည်ကို ရေးသည်ဖြစ်စေ မရေးသည်ဖြစ်စေ ကွမ်ရင်မယ်တော်လေး ရွှေရုပ်တုကောင်လေးနဲ့ ကျောက်စိမ်းရုပ်မိန်းကလေးတို့ အပေါ် သက်ရောက်မှုမရှိတော့ဘူး.....ဘာလို့လဲဆိုတော့ ကျောက်စိမ်းမိန်းကလေးက ဝိဥာဥ်ကိုးရာကိုးဆယ့်ကိုးခုကို စားပြီးသား ဖြစ်နေလို့ပဲ....

ဒါဆို....ရွှေရုပ်တု ကောင်လေးက ကျန်နေသေးတယ်....

သူ့ရဲ့ အသိဥာဏ်မရှိတဲ့ အဖေကို အပြစ်မဲ့တဲ့ ကလေးကို မသတ်ဖို့ တားရလိမ့်မယ်....

ကြောင်နက်လေးက ချူဟွိုက်ဘောင်းဘီစကို လှမ်းဆွဲလာပြန်သည်။ ချူဟွိုက်က လှည့်ကြည့်လိုက်ရာ သူ့နောက်တွင် တစ်ချိန်လုံးရှိနေသည့် စုန့်ချင်းက ပျောက်နေမှန်း သိလိုက်ရသည်။

တစ်ဖက်တွင်လည်း စုန့်ချင်းက ကျောက်စိမ်းရုပ် ကောင်မလေး၏ ခေါင်းပေါ် လက်တင်ထားမိလေသည်။

စုန့်ချင်းက ရီဝေဝေ ဖြစ်သွား၍ ဘာဖြစ်သွားမှန်း မသိလိုက်ရချေ။ သူမ အသိပြန်ဝင်လာသည့်အချိန် သူမလက်ထဲရှိ ကျောက်စိမ်းရုပ်တုဆီမှ အေးစက်စက် အထိအတွေ့ကြောင့် ကျင်ခနဲ ဖြစ်သွားရသည်။

စုန့်ချင်းက ချက်ချင်း လက်ပြန်ရုတ်လိုက်ပြီး လမ်းပျောက်သွားသလို ထိတ်လန့်မိသွားသည်။

ဘယ်လိုလုပ် ဒီလို ဖြစ်သွားတာလဲ....ဘာလို့ သူမက ဒီရုပ်တုကို ထိသွားရတာလဲ....

အဆင်ပြေသွားမှာပါနော်....

ရွှေရုပ်တု ကောင်လေးကို ထိရင် သားလေးမွေးမယ်....ကျောက်စိမ်းရုပ် ကောင်မလေးကို ထိရင် သမီးလေး မွေးမယ် ဆိုပေမယ့်.... သူမနဲ့ ချူဟွိုက်က စုံတွဲအစစ်မှ မဟုတ်တာ....လိင်ပိုင်းဆိုင်ရာ ပတ်သက်မှုလည်း မရှိဘူး....ဒါကြောင့် ဘယ်လိုလုပ် ကိုယ်ဝန်ရနိုင်မှာလဲ....

ဒါကြောင့် အဆင်ပြေသွားမှာပါ....စုန့်ချင်းက ကိုယ့်ကိုယ်ကို နှစ်သိမ့်ပေးလိုက်မှ စိတ်အေးသွားရသည်။

သူမက ရုပ်တုကို ကျောပေးလိုက်ချိန် ကွမ်ရင်မယ်တော်လေးနှင့် ကျောက်စိမ်းရုပ်တု ကောင်မလေးတို့က သူမကို ထူးဆန်းသည့် အပြုံးကြီးနှင့် ပြုံးပြနေမှန်း သူမ သိလိုက်မည် မဟုတ်ပေ။

ချူဟွိုက်က စုန့်ချင်းကို ရှာတွေ့သွားချိန် သူမက ထောင့်နားလေးတွင် ရပ်နေပြီး ညာဘက်လက်ကို အကြောင်းမရှိ စိုက်ကြည့်နေသည်။

ချူဟွိုက် " မင်း ဘယ်ရောက်နေတာလဲ...."

စုန့်ချင်းက တွန့်ဆုတ်တွန့်ဆုတ်နှင့် ကျောက်စိမ်းရုပ်တုကို ထိမိခဲ့သည့် အကြောင်းကို ချူဟွိုက်ကို ပြောပြရမလား မသိဖြစ်နေသော်လည်း အရေးမကြီးလောက်ဟု ထင်၍ ခေါင်းယမ်းပြပြီး ခေါင်းစဥ်ပြောင်းမေးလိုက်သည် " တစ်ခုခု ရှာတွေ့ခဲ့လား...."

“ ကျွန်တော်တို့ အမြန် ပြန်မှ ဖြစ်မယ်...." ချူဟွိုက်က မျက်မှောင်ကြုတ်လိုက်သည်။

ကျောက်စိမ်းမိန်းကလေး၏ ပြန်လည်မွေးဖွားလာမှုကို တားဆီး၍မရနိုင်တော့သော်လည်း ရွှေရုပ်တု ကောင်လေးက ၉၉၉ခုမြောက် ဝိဥာဥ်ကို မစုပ်ယူရသေး၍ သူ့ကို တားရန် အခွင့်အရေး ရှိသေးသည်။

ထို့ပြင် သူက ပြိုင်ပွဲဝင် ကျို့ယွမ်တွင် ကိုယ်ဝန်သည် NPCဇနီးတစ်ယောက် ရှိနေမှန်း အမှတ်ရသွားသည်။ လတွက်ကြည့်လျှင် သူမက ကလေးမွေးရန် သိပ်မလိုတော့ပေ။

သူက ထိုအမျိုးသမီးက ၉၉၉ယောက်မြောက် ယောကျ်ားလေး အမွှာ မွေးမလား မသေချာသော်လည်း ဖြစ်နိုင်ချေက များနေသည်။

ချူဟွိုက်က သိပ်ပြီး မစိုးရိမ်မိချေ။ ကျို့ယွမ်က ခေတ်သစ်ပညာရေးကို သင်ကြားခဲ့ရပြီး ကွမ်ရင်မယ်တော်လေးကို ယုံကြည်မှု မရှိ၍ သူမဆန္ဒအတိုင်း လိုက်လျောပေးမည် မဟုတ်ပေ။ သူက ကိစ္စများက ထိုသို့ မရိုးရှင်းလောက်ဟု မသဲမကွဲ ခံစားမိ၍ အိမ်အမြန် ပြန်လာခဲ့သည်။

ကျို့ယွမ်ရဲ့ ဇနီးသာ မမွေးသေးဘူးဆိုရင် အဖေဆီက အသတ်ခံရတော့မယ့် နောက်ဆုံးကလေးကို အမြန် ရှာရမယ်....ပြီးတော့လည်း ဒီရွာထဲက ကိုယ်ဝန်သည် အမျိုးသမီးတွေကိုလည်း သတိထားပြီး စောင့်ကြည့်နေရမယ်....

ချူဟွိုက်က လမ်းလျှောက်ရင်း အတွေးနစ်နေစဥ် တစ်ယောက်ယောက်က သူ့ပုခုံးကို အနောက်ကနေ လာပုတ်သည်။

ချူဟွိုက်က လှည့်ကြည့်လိုက်ရာ စွန်းကျားမူကို တွေ့လိုက်ရသည်။

ချူဟွိုက်က စွန်းကျားမူလက်ထဲရှိ အဝတ်စပေါ် အကြည့်ရောက်သွားသည်။

စွန်းကျားမူ " ဒီဖြစ်ရပ်မှာ ငါက ကွမ်ရင်မယ်တော်လေး နတ်နန်းမှာနေပြီး ရုပ်တုကို အဝတ်နဲ့ သုတ်ပေး မြေပြင်ကို သန့်ရှင်းရေးလုပ်ပေးရတဲ့ ရွာသားတစ်ယောက် ဖြစ်နေတယ်..."

ချူဟွိုက်က အသာ ခေါင်းညိမ့်ပြလိုက်သည်။

စွန်းကျားမူက သူ့ပင်ကိုယ်ပုံစံမှ ခွဲထွက်ကာ လက်ဦးယူပြီး ပြောလာသည် " မင်း သတင်းအချက်အလက် ဖလှယ်ချင်လား...."

စွန်းကျားမူက သီးသန့်ဆန်သော်လည်း ဥာဏ်ကောင်းသည့်သူ ဖြစ်၍ သူတစ်ယောက်တည်း ရှာဖွေနေလျှင် အချိန်ကုန်လောက်မည်ဖြစ်မှန်း သိသောကြောင့် နတ်နန်းဆီ ချူဟွိုက်အလာကို စောင့်နေခြင်းပင်။

“ လွန်ခဲ့တဲ့ ရက်တွေမှာ ရွာသားတော်တော်များများနဲ့ စကားစပ်မိရင်း အသုံးဝင်မယ့် အချက်အလက်တွေ ရထားခဲ့တယ်...."

" ဘယ်လိုမျိုးလဲ...."

“ ဥပမာ....ကွမ်ရင်မယ်တော်လေး ရုပ်တုက ဘယ်လို ဖြစ်လာလဲ ဆိုတာပေါ့....လွန်ခဲ့တဲ့ နှစ်ပေါင်းသုံးဆယ်တုန်းက ရွာသားတွေက ရုတ်တရက် မျိုးဆက်ပြတ်သွားခဲ့တယ်...သုံးနှစ်လောက်ကြာတော့ ကလေးဆုတောင်းခဲ့တဲ့ အမျိုးသမီးတစ်ယောက်က နတ်ဘုရားမတစ်ယောက်ကို အိပ်မက်မက်ခဲ့တယ်...."

" သူမကိုလား...." ချူဟွိုက်က သူ့နောက်ရှိ ကြေးရုပ်တုဆီ ညွှန်ပြလိုက်သည်။

“ ဟုတ်တယ်....အိပ်မက်ထဲမှာ နတ်ဘုရားမက သူ့နာမည် ကွမ်ရင်မယ်တော်လေး ဖြစ်ကြောင်း ပြောပြခဲ့ပြီးတော့ ဒီရွာရဲ့ အခက်အခဲကို သိလိုက်ရလို့ ဆိုပြီး အိပ်မက်ပေးခဲ့တယ်...သူမက သူတို့ကို ကယ်တင်ပေးဖို့ ရောက်လာတာတဲ့...တောင်းဆိုချင်တာက နှစ်ခုပဲ ရှိတယ်....တစ်ခုက သူမရုပ်ပုံနဲ့ ကြေးရုပ်တုတစ်ခု လုပ်ပေးပြီး နတ်နန်း ဆောက်ပေးရမယ်....ကျန်တာတော့ မင်းသိတဲ့အတိုင်း တစ်ယောက်သတ် တစ်ယောက်ကယ်တဲ့ဟာလေ...."

ချူဟွိုက်က မျက်မှောင်ကြုပ်ပြီး ခေါင်းညိမ့်ပြလိုက်သည် " ဘယ်သူမှ ဒါနဲ့ ပတ်သတ်ပြီး မမေးကြဘူးလား....မသေမျိုးတွေအကြောင်း မပြောလည်း သိကြပါတယ်....မသေမျိုးတွေဆိုတာ ကောင်းတဲ့သူတွေလေ...ဘာလို့ လူသတ်ခိုင်းရတာလဲ....ဒါတောင် မွေးကင်းစကလေးတွေကိုတဲ့...."

စွန်းကျားမူက ပြန်ဖြေလာသည် " ကွမ်ရင်မယ်တော်လေး ပြောခဲ့တာက အဲ့ဒါက သူတို့ရဲ့ ဝဋ်ကြွေးတဲ့....သူတို့က အပြစ်ကျူးလွန်ခဲ့လို့ ကောင်းကင်ဘုံက အပြစ်ပေးခံခဲ့ရတာတဲ့..

..သူမက အဲ့ဒီဒဏ်တွေကို မခံစားနိုင်တော့လို့ သေမျိုးကမ္ဘာဆီ တိတ်တိတ်လေး ဆင်းလာပြီး အကူအညီပေးလာတာ.... သူမက ကလေးရနိုင်ဖို့ ကူညီပေးနိုင်ပေမယ့် သူ့စွမ်းအားတွေက အကန့်သတ်ခံထားပြီး သူလုပ်ပေးနေတဲ့ အရာကလည်း ကောင်ကင်ဘုံရဲ့ အလိုဆန္ဒကို ဆန့်ကျင်နေတဲ့အတွက် ဒါက ပြစ်မှုပဲလို့ ပြောတယ်....ဒါကြောင့် အသစ်မွေးလာတဲ့ ကလေးဝိဥာဥ်တစ်ယောက်ကို ကောင်းကင်ဘုံဆီ ယဇ်ပူဇော်မှ အပြစ်ကနေ ကင်းလွတ်နိုင်မှာလို့ အိပ်မက်ထဲမှာ ပြောခဲ့တယ်တဲ့...."

"ရှင်းပြစရာတွေတော့ အများကြီး ရှိနေတယ်...လူတွေကလည်း သူများပြောတာနဲ့ လိုက်လုပ်ကြတာပဲ....ဒါပေမယ့် ယေဘုယျအတိုင်းဆို ဒါကိစ္စက လူသားအရေးမှာ နှစ်ဦးနှစ်ဖက် အသုံးဝင်တဲ့ နည်းလမ်းပဲ.... ဘယ်လောက်ပဲ ကျိုးကြောင်းမသင့်ဘူး ဆိုဦးတော့ လူတွေကတော့ အလိုလို ဆက်စပ်မိကြမှာပဲ....သူတို့ မဆက်စပ်မိရင်လည်း ဒီအတိုင်း လျစ်လျူရှူထားကြရုံပဲလေ...." စွန်းကျားမူက လှောင်ရယ်လိုက်သည်။

ချူဟွိုက်က ရုတ်တရက် တစ်ခုခု နားလည်သွားသည် " အပြစ်ကျူးလွန်တာ....သူတို့က အရင်ဘဝတုန်းက အပြစ်ကျူးလွန်ခဲ့တာလား...."

စွန်းကျားမူက အံ့သြသွားရင်း ဤအချက်ကို သူမစဥ်းစားကြည့်မိမှန်း နားလည်သွားသည်။

" ရွာသားတွအကုန်လုံးက ဒါကို သဘောတူကြတယ်ပေါ့...." ချူဟွိုက်က မေးလိုက်သည်။

စွန်းကျားမူက ခေါင်းညိမ့်ပြလာသည်။

ချူဟွိုက်က လွန်ခဲ့သော နှစ်ပေါင်းသုံးဆယ်က ဖြစ်ခဲ့သည့်ကိစ္စကို အစဖော်ရန် လိုအပ်ကြောင်း ခံစားမိသည်။ အရမ်းကြာနေပြီဖြစ်တဲ့အတွက် စုံစမ်းရခက်မှာတော့ သေချာပေါက်ပဲ...

" ကျွန်တော်တို့နဲ့ ပြန်လိုက်ခဲ့မလား...." ချူဟွိုက်က စကားဆိုလိုက်သည် " အခုဆို ကျွန်တော်တို့က လူသစ်တစ်ယောက်က လွဲရင် ကျန်တဲ့သူအားလုံးနဲ့ တွေ့ထားပြီးပြီ....."

စွန်းကျားမူက ခေါင်းညိမ့်ပြလိုက်သည်။

အိမ်ပြန်လမ်းတွင် ချူဟွိုက်က သူရထားသည့် အချက်အလက်များကို စွန်းကျားမူဆီ ပြန်လည်ဝေမျှပေးလိုက်သည်။

ကြောင်လေးကို ချီထားရင်း ချူဟွိုက်က အချင်းတိုင်ကိစ္စကို ရုတ်တရက် တွေးမိ၍ စွန်းကျားမူကို သိလောက်မလား မေးကြည့်မိသည်။ စွန်းကျားမူက သူမသိကြောင်း ခေါင်းယမ်းပြလာသည်။

ချူဟွိုက်က လမ်းပျောက်သွားသလို ခံစားမိပြီး ပြုံးလိုက်ရင်း ရေရွတ်လိုက်သည် " အဲ့ဒါ မင်းစားလိုက်တာလား...."

ကြောင်လေးက ခေါင်းယမ်းပြလာသည်။

ချူဟွိုက်က ပြုံးလိုက်ပြီး အတွေးနစ်သွားသည်။ အချင်းမှာလည်း သူ့ကဏ္ဍနဲ့သူ ရှိနေတာလား....အဲ့ဒီနတ်ဆိုးလိုအရာကြီးက သူ့နောက်လိုက်တွေကိုခိုင်းပြီး မွေးကင်းစကလေးကို အချင်းစတူးကျွေးခိုင်းတယ်ပေါ့....ဒါ တော်တော်လေးကို ရက်စက်တဲ့အကြံပဲ....ကြောင်နက်လေးက ဆွဲယူသွားတာ တစ်ခုခုကို အာရုံခံမိလို့များလား....

ဒါဆို အချင်းကို သုံးရတဲ့ အကြောင်းရင်းက ဘာဖြစ်မလဲ....

အိမ်ပြန်လာရင်း ချူဟွိုက်က လူအနည်းငယ် ခေါ်ပြီး ကျို့ယွမ်ဆိုသည့် လူသစ်၏ အိမ်သို့ သွားလိုက်သည်။

👻

Prev Next