MM Story Teller

Chapter 80

Viewers 8k

🌍Chapter 80

ထန်မော့သည် ပီနိုကီယိုမှ တစ်ခုခုအားသတိထားမိသွားမည်ကို စိုးရိမ်နေခဲ့သောကြောင့် သူ မည်သည့်အကွက်တွင် ရပ်မည်ဖြစ်ကြောင်း ဖူ၀မ်သော်နှင့် မဆက်သွယ်ရဲခဲ့ချေ။

သူတို့ ပီနိုကီယိုအား လှည့်စားရန်အတွက် ဤ အလောင်းအစားကို နိုင်ရန်လိုအပ်ခဲ့သည်။

သို့နှင့် ထန်မော့မှာ ဖူ၀မ်သော်နှင့် ဆက်သွယ်ရန်အတွက် ကြက်ဆင်ဥကိုသုံးရန်တွေးမိခဲ့လေသည်။

ကြက်ဆင်ဥကိုသုံးရန် နည်း၂မျိုးရှိလေသည်။ ပထမတစ်မျိုးမှာ သာမာန်ဆက်သွယ်ခြင်းနည်းလမ်းပင်။ သို့သော် ဘေးမှလူအများလည်း သူတို့၏ ဆက်သွယ်မှုကိုကြားနိုင်လေသည်။ ကျန်တစ်မျိုးမှာ ဂိမ်းသိမ်းမှတ်ကို ဖွင့်ခြင်းပင်။ ဖွင့်ပြီးသည်နှင့် စိတ်ထဲမှတဆင့် ဆက်သွယ်နိုင်လေသည်။

ထန်မော့နှင့် ဖူ၀မ်သော်တို့ အလောင်းအစားကို သဘောတူလိုက်စဥ်ကတည်းကပင် ပင်နိုကီယိုမှာ ဘေးတွင်ရပ်လျက် မျက်တောင်မခတ်စတမ်း စောင့်ကြည့်နေခဲ့လေသည်။

ထို့ကြောင့် ထန်မော့ ဂိမ်းသိမ်းမှတ်ကို ဖွင့်ရန်အခွင့်အရေးမရခဲ့ချေ။ အဖြူရောင်နံရံကျဆင်းလာပြီးနောက် ပီနိုကီယိုကြည့်မနေစဥ်တွင် ထန်မော့ ကြက်ဆင်ဥပေါ်၌ Sကိုရေးဆွဲခဲ့သည်။ ကံမကောင်းသည်မှာ သူဘာကိုမှမကြားနိုင်ခြင်းပင်။

အစကမူ ကြက်ဆင်ဥကို သုံးမရဟု ထန်မော့ထင်ခဲ့သော်လည်း ရုတ်ချည်း ကြက်ဆင်ဥထံမှ တောက်ပလာသည်ကိုတွေ့လိုက်ရပြန်သည်။

ဖူ၀မ်သော်သည်လည်း ဂိမ်းသိမ်းမှတ်ကိုဖွင့်လိုက်ခြင်းပင်။

သူသည် ဖူ၀မ်သော်၏ အသံကိုမကြားနိုင်သေးသည့်တိုင် ဂိမ်းသိမ်းမှတ်မှာ ပွင့်နေခဲ့ချေပြီ။

ထန်မော့နှင့် ဖူ၀မ်သော် တစ်ကွက်တည်းတွင် ရပ်မိနိုင်သည့်ရာခိုင်နှုန်းမှာ လေးပုံတစ်ပုံသာ။ သူကခတ္တမျှတွေးတောလျက် အကွက်နှစ်ကွက်ကြားမှ မျဥ်းတွင်ရပ်လိုက်သည်။ တဖက်လူကလည်း သူ၏အကြံကိုရိပ်မိလျက် ဤနည်းလမ်းကိုရွေးမိလောက်သည်ဟု ယုံကြည်လေသည်။

သေချာပေါက်ပင် အဖြူရောင်နံရံကြီးဖယ်သွားသည်နှင့် ၂ဦးလုံးမှာ အကွက်အလယ်မှ မျဥ်းတွင်ရပ်နေခဲ့ကြလေသည်။ သို့နှင့် အလောင်းအစားမှာ အသက်၀င်လာခဲ့သည်။

နံရံမြင့်တက်သွားသည်နှင့် ထန်မော့ ဖူ၀မ်သော်၏အသံအား ကြားနိုင်သွားလေသည်။ နံရံကာဆီးနေချိန်တွင် အသံကိုမကြားရသော်လည်း နံရံတဖန်မြင့်တက်သွားသည်နှင့် သူတို့၂ဦးမှာ လွတ်လွတ်လပ်လပ် ဆက်သွယ်နိုင်ခဲ့သည်။ ဂိမ်းစည်းမျဥ်းအရအသင်း၂သင်း၏ အဆက်အသွယ်မှန်သမျှကို တားဆီးထားပုံပင်။ နံရံကာဆီးနေသ၍ ကြက်ဆင်ဥနှင့်လည်း ဆက်သွယ်၍မရချေ။

ပီနိုကီယို၏ မျက်ခုံးအောက်တွင်ပင် ဖူ၀မ်သော်နှင့် ဆက်သွယ်နိုင်နေခြင်းကဂိမ်းကို ပိုမိုလွယ်ကူစေသည်။ ကြက်ဆင်ဥ၏ဆက်သွယ်မှုမပါလျှင်တောင် သူတို့နှစ်ဦး၏ အပြန်အလှန်နားလည်မှုမှာ မြင့်မားလွန်းပြီးသားပင်။ တခါတရံတွင် သူသည် တဖက်လူ၏မျက်လုံးကိုကြည့်လိုက်ရုံဖြင့်ပင် ဖူ၀မ်သော်၏ဆိုလိုရင်းကို နားလည်နိုင်ခဲ့သည်။

သူကအရမ်းထက်နေလို့များလား...

ထန်မော့မှာ ထိုကဲ့သို့ကိုယ့်ဘက်ကိုယ်ယက်သောအတွေးမျိူးသာတွေးနိုင်ခဲ့လေသည်။ ဤအကြောင်းပြချက်တမျိုးကသာဖြစ်နိုင်ချေ ရှိနေ၍ပင်။

"တင်းတောင်~ ၃မိနစ်အတွင်းမှာ ကစားသမားတွေအားလုံး မိမိရွေးချယ်ထားတဲ့ ကတ်အကွက်မှာ ရပ်ပေးရပါမယ်...အကွက်ထဲမှရှိတဲ့ကတ်က နောက်အချီအတွက် ကတ်အဖြစ် ဖော်ပြခံရမှာပါ"

ထန်မော့အိတ်ကပ်ထဲလက်ထည့်ထားလျက်သား ဂိမ်း၏ကြေညာသံကို နားထောင်နေခဲ့သည်။ သူ၏အိတ်ထဲမှ ကြက်ဆင်ဥကို ထိလျက်သား ဘူရင်မကတ်ဆီလျှောက်သွားလိုက်သည်။

ဤတစ်ကြိမ်တွင် သူဖိအားပေးနေစရာမလိုပဲ ကျောက်၀မ်ပင်းမှာလည်း ဘုရင်မကတ်ကို လိုလိုလားလားရွေးချယ်လာခဲ့သည်။

ကျောက်၀မ်ပင်းကဆိုလိုက်သည်။

"ဆုတွေကအတူတူပဲ သရေကျတော့ကောင်းတာပေါ့...ငါတို့ ဘုရင်မကတ်ရွေးတာဆိုတော့ သူတို့ အစေခံကတ်ရွေးရင် ငါတို့ဘုရင်မကတ်လည်း ဖိနှိပ်ခံရမယ်...နောက်တစ်ကြိမ်ဆို အစေခံကတ်အတူတူရွေးပြီး ဂိမ်းကို အေးအေးဆေးဆေးအဆုံးသတ်လို့ ရပြီ"

ကျောက်၀မ်ပင်း၏ လေသံမှာ အလွန်ပေါ့ပါးနေခဲ့သည်။ ထန်မော့အား ခိုး၀င်သူဟုယူဆနေခဲ့စဥ်က သူကထန်မော့နှင့် စကားမပြောရဲခဲ့ချေ။

အဖြူရောင်နံရံကတဖြည်းဖြည်းမြင့်တက်သွားခဲ့သည်။ အစေခံကတ်နှင့် ဘုရင်မကတ်မှာ ရှေ့သို့ အတူတိုးသွားခဲ့ကြပြီးနောက် ဘုရင်မကတ်မှာ ကွဲကြေသွားခဲ့သည်။ ဤတစ်ကြိမ်တွင် စီးချင်းထိုးသက်ရောက်မှုလည်း ပွင့်မလာတော့ချေ။ စန်တာကလော့ကသာ ရယ်မောလျက် ကောင်းချီးပေးနေခဲ့သည်။

"ဟား ဟား ဟား ဒါပဲပေါ့ ကလေးလေးတွေက ကောင်းကောင်း ဆော့နေတာပဲ"

ရယ်မောပြီးနောက် စန်တာမှာ သူ၏အိတ်ဆောင်နာရီကို ရုတ်ချည်းထုတ်လိုက်သည်။

"အိုး ကလေးတို့ရေ ဘိုးဘိုးကနောက်ဂိမ်းတစ်ခုကို အမြန်သွားရတော့မယ် မုန်းစရာကောင်းတဲ့ ပန်းချီဆရာတစ်ယောက်က ဘိုးဘိုးကို လိမ်ပြီးတော့ ဘိုးဘိုးရဲ့ ချစ်စရာကလေးလေးတွေကို အန္တရာယ်ပေးမလို့တဲ့လေ...နောက်ဆုံးအချီကို မြန်မြန်ဆော့လိုက်ကြရအောင် ပြီးရင်ဂိမ်းကို အဆုံးသတ်လိုက်ကြစို့"

အဖြူရောင်နံရံကြီးကျဆင်းလာပြီး ကျောက်၀မ်ပင်းမှာ နောက်ဆုံးကျန်ရှိသော အစေခံကတ်တွင်ရပ်နေခဲ့သည်။

၅မိနစ်ကြာပြီးနောက် အစေခံကတ်နှစ်ကတ်နှာ အလင်းရောင်များအဖြစ် လေထုထဲပျောက်က်ယ်သွားခဲ့လေသည်။ ၂သင်းလုံးမှာ သူတို့၏နောက်ဆုံးကတ်များကို ကိုယ်စီ ကြေလိုက်ကြပြီး ဂိမ်းကို အဆုံးသတ်လိုက်လေသည်။ စန်တာက ရယ်မောလိုက်ပြီး သမင်များကိုဆွဲကာ အဖြူရောင်ကမ္ဘာကြီးတ၀ိုက်စွပ်ဖားကို ပျံသန်းလိုက်သည်။

"ဟား ဟား ဟား မယ်ရီခရစ်စမတ်"

အနီရောင်စန်တာကလော့မှာ သမင်များနှင့်အတူ အဝေးတွင် ပျောက်ကွယ်သွားတော့သည်။ ယခုတွင် ထန်မော့ အကွက်များထံမှ လွတ်လွတ်လပ်လပ်လျှောက်ထွက်သွားနိုင်ချေပြီ။

လူအိုကြီးက ဖူ၀မ်သော်ထံသို့ မနီးကပ်ရဲသဖြင့် အဝေးတွင်ရပ်နေခဲ့သည်။ ကျောက်၀မ်ပင်းမှာလည်း ဂိမ်းထဲမှ ထွက်ရမည့်အချိန်ကိုသာ မလှုပ်မယှက်စောင့်ဆိုင်းနေခဲ့လေသည်။

စန်တာကလော့ထွက်သွားသည်နှင့် ထန်မော့ ထီးကလေးကို တင်းကြပ်စွာ ဆုပ်ကိုင်ထားခြင်းကိုဖြေလျော့လိုက်တော့သည်။ သူသည် ထီးကလေးအား လွယ်အိတ်ထဲထိုးထည့်လျက် ပြန်မော့ကြည့်လိုက်လျှင် ဖူ၀မ်သော်မှာ သူ၏ရှေ့မှ အကွက်တွင်ရပ်လျက် သူ့အား ပြုံးလျက်ကြည့်နေသည်ကို တွေ့လိုက်ရလေသည်။

ထန်မော့လည်း ခြေထောက်ကို အသာမြှောက်လိုက်ပြီးမှ ပြန်လည် ရပ်တန့်သွားမိသည်။

သူက ဖူ၀မ်သော်ရှေ့သို့လျှောက်မသွားခဲ့ချေ။ လူ၂ဦးမှာ အကွာအဝေးတစ်ခုမှသာ တစ်ဦးကိုတစ်ဦးကြည့်နေခဲ့ကြသည်။

အတော်လေးကြာပြီးနောက် ထန်မော့ကဆိုလိုက်သည်။

"လူကြီးမင်း ဖူ ကောင်းသောပူးပေါင်းမှုပါ"

"ကောင်းသောပူးပေါင်းမှုပါ"

"ကျွန်တော် ခရစ်စမတ်ပွဲကိုကြုံခဲတယ်"

ထန်မော့ လွယ်အိတ်ကိုလွယ်လျက် အေးဆေးစွာဆိုလိုက်သည်။

"ဒါပေမယ့်ဒါက ကြုံဖူးသမျှ ခရစ်စမတ်ထဲမှ အဆိုးဆုံးပဲ"

ဖူ၀မ်သော်က အင်မတန်နက်နဲသောအသံဖြင့် ဆိုလာခဲ့သည်။

"ကိုယ့်အတွက်တော့ အတော်လေး စိတ်၀င်စားစရာကောင်းတဲ့ ခရစ်စမတ်ဖြစ်ခဲ့ပါတယ်"

ထန်မော့ထိုစကားကို ကြားလျှင် ထိုအမျိုးသားကို တိတ်တဆိတ်ကြည့်နေခဲ့မိလေသည်။

ထို့နောက် နှစ်ဦးသားမှာ အတူတကွ ရယ်မောလိုက်ကြလေသည်။

ထန်မော့ကဆိုလိုက်သည်။

"ကျွန်တော်က ပူဒုန်မှာ"

ဖူ၀မ်သော်က မျက်ခုံးအသာပင့်လျက် လျင်မြန်စွာဆိုလာခဲ့သည်။

"ကောင်းသားပဲ ကိုယ်တို့ဆုံဖို့ ကံပါတာပေါ့"

တောက်ပသောအဖြူရောင်အလင်းတစ်ခုက အဖြူရောင်ကမ္ဘာကြီး၏အလယ်တွင် လင်းလက်လာခဲ့သည်။ ထန်မော့ ဖူ၀မ်သော်၏ အမူအယာကို မမြင်နိုင်တော့ ထိုအစား အနက်ရောက်ကိုယ်ဟန်ကိုသာ ရေးရေးလေး မြင်ရတော့သည်။ ဤသည်မှာ ထိုအမျိုးသားကို ပထမဆုံးစတွေ့စဥ်ကကဲ့သို့ပင်။ မည်သို့ပင်ဖြစ်စေ ဤအမျိုးသားမှာ တောင်ကြီးတစ်ခုနှယ် ဖြောင့်မတ်စွာ ရပ်လျက် မည်သည်ကမှ သူ့အား မတုန်လှုပ်စေနိုင်သည့်နှယ်။

"ဒီလိုရပ်တဲ့ကိုယ်ဟန်မျိုးက အထူးလေ့ကျင့်ရေးတစ်ခုခုကြောင့်ပဲ"

အဖြူရောင်အလင်းရောင်ကြားထဲ ထန်မော့မျက်လုံးများမှိတ်လျက် တီးတိုးရွတ်ဆိုလိုက်မိသည်။

"သူကဘယ်လိုလူမျိုးပါလိမ့်"

အဖြူရောင်အလင်းမှာ လူ၄ယောက်ကို ၀ါးမြိုသွားပြီး ထန်မော့မျက်လုံးကို ပြန်ဖွင့်လိုက်ချိန်တွင် ကမ္ဘာပေါ်သို့ ပြန်ရောက်နေခဲ့ချေပြီ။

ခရစ်စမတ်ည၏ ကောင်းကင်မှာ မှောင်မည်းနေခဲ့သည်။ ထန်မော့ဂိမ်းထဲမှ ထွက်ထွက်ခြင်းပင် စက်ရုံဟောင်းဆီပြေးလျက် ပုန်းကွယ်လိုက်သည်။ ထို့နောက် အိတ်ကပ်ထဲမှ ကြက်ဆင်ဥကို ထုတ်ယူလိုက်လေသည်။ ကြက်ဆင်ဥခွံပေါ်တွင် Sသဏ္ဍာန်က လင်းလက်နေဆဲ၊ ထန်မော့ကြက်ဆက်ဥအား လကွနှစ်ဖက်ဖြင့် ဖုံးလိုက်သည်။ ထို့နောက် အလင်းရောင်မှာမှိန်ဖျော့သွားလျက် ဂိမ်းသိမ်းမှတ်မှာလည်း ပြန်ပိတ်သွားခဲ့လေသည်။

"ဆုတစ်ခုမှမရခဲ့ပဲ ဂိမ်းသိမ်းမှတ်ကို သက်သက်ဖြုန်းလိုက်မိတာပဲ"

ထန်မော့စိတ်ပျက်လက်ပျက် ပြုံးလိုက်မိသည်။

ဂိမ်းထဲတွင် ဂိမ်းသိမ်းမှတ်ကို ဖွင့်ရခြင်းမှာ နောက်ဆုံးအခြေအနေမှဖြစ်သော်လည်း လိုအပ်ခဲ့လေသည်။ ထန်မော့နှင့် ဖူ၀မ်သော်မှာ ပီနိုကီယိုအား ဂိမ်းစည်းမျဥ်းကို ချိုးဖောက်မိစေရန် ပူးပေါင်းရန်လိုအပ်ခဲ့သည်။ သို့သော် ပီနိုကီယိုထွက်သွားရပြီးနောက် ဘာဆက်ဖြစ်မည်ကို မည်သူမျှမသိခဲ့ချေ။ ဂိမ်းသိမ်းမှတ်ကို သုံးရန်သာတတ်နိုင်လေသည်။ ဤသည်မှာ လွတ်လမ်းတစ်ခုပင်။

ထန်မော့ကဆိုလိုက်သည်။

"ဂိမ်းထဲမှာတုန်းက ဘယ်သူကမှ ဂိမ်းသိမ်းမှတ်ကို မသုံးခဲ့ရင် ငါတို့တွေ သုံးတယ်လို့ပဲသတ်မှတ်ပြီးတော့ ဖိုင်တွေက ညီသွားလိမ့်မယ်...နောက်တစ်မျိုးပြောရမယ်ဆို အနာဂါတ်မှာ ငါနဲ့သူနဲ့ ဆန့်ကျင်ဘက်တွေဖြစ်သွားခဲ့ရင် သူငါ့ကို ဂိမ်းသိမ်းမှတ်ဖွင့်ပေးဖို့ သဘောတူရင်တောင် သူ ဂိမ်းကို သိမ်းချင်သိမ်းပစ်လိုက်လို့ရတယ်"

ထန်မော့၏လက်ချောင်းများက ကြက်ဆင်ဥပေါ်တွင်ခေါက်လိုက်သည်။ သူနှစ်ကြိမ်ခေါက်လိုက်မိပြီးတိုင်း ၃ကြိမ်မြောက်တွင် ရပ်တန့်မိမည်သာ။

အတော်ကြာတွေးတောမိပြီးနောက် ထန်မော့ ကြက်ဆင်ဥကို ခေါက်နေခြင်းအား ရပ်တန့်လိုက်ကာ

"သူနဲ့နောက်တစ်ကြိမ် တစ်ဂိမ်းထဲ အတူကျလို့မရဘူး... အနည်းဆုံးတော့ သူနဲ့ရန်ဘက်တွေဖြစ်လို့မရဘူး"

တစ်ဖက်တွင် ကြက်ဆင်ဥကိုအသုံးပြုရခြင်းမှာ တင်းကြပ်လွန်းသည်။ တဖက်တွင်လည်း ဖူ၀မ်သော်နှင့် ကောင်းမွန်သော ဆက်ဆံရေးကို ပျက်စီးခံ၍မဖြစ်ချေ။

"ငါတို့ထပ်ပြီး ရင်ဆိုင်ရရင် ဘယ်သူနိုင်မလဲ မသေချာဘူး"

ဤတစ်ကြိမ်တွင် သူ ဖူ၀မ်သော်၏စွမ်းရည်မြင်လိုက်ရသော်လည်း ဖူ၀မ်သော်မှာမူ သူ၏စွမ်းရည်၏ အပိုင်းငယ်တချို့ကိုသာ တွေ့မြင်သွားခြင်းဖြစ်သည်။ သို့တိုင်အောင် ထန်မော့တွင် ဘုရင့်ရွှေဒင်္ဂါးရှိနေသည်ကို ဖူ၀မ်သော်ကရှာတွေ့သွားခဲ့သေးသည်။

ထန်မော့မျက်နှာမှာ အမူအယာမဲ့လျက်

"ငါရှုံးတာပဲ"

သူတကယ်ရှုံးနိမ့်သွားခြင်းပင်။

ထန်မော့ စက်ရုံ၏ ရုံးခန်းတစ်ခုအတွင်းလဲလျောင်းရင်း ဂိမ်းထဲမှ အဖြစ်အပျက်များကို အသေးစိတ်ပြန်တွေးနေရင်းပင် ခရစ်စမတ်သစ်ကိုင်းကို ထုတ်ယူလိုက်မိသည်။

အေးစက်သောလရောင်မှာ ပြတင်းပေါက်မှ တဆင့်ဖြာကျလျက် ထန်မော့မှာ ထိုလရောင်အောက်တွင် သစ်ကိုင်းအား စူးစမ်းနေခဲ့သည်။

အကိုင်းမှာသေးငယ်ကာ အရွက်များမရှိချေ။ ၄င်းမှာ သာမာန်ရိုးရိုးသစ်ကိုင်းတစ်ကိုင်းနှင့်သာ တူလေသည်။ ဤသစ်ကိုင်းတစ်ကိုင်းအတွက် ကစားသမား၈ဦးမှာ ခရစ်စမတ်ဂိမ်းတစ်ခုကို ဆော့ခဲ့ရသည်။ တစ်ယောက်မှာ သေဆုံးသွားပြီး သုံးယောက်မှာ မျှော်စင်တိုက်ခိုက်ခြင်းဂိမ်းထဲသို့ ရောက်ရှိသွားလျက် သေခြင်းရှင်ခြင်းကို မဆုံးဖြတ်နိုင်ချေ၊

မိမိတို့နှင့်အလားတူ ဤသစ်ကိုင်းတစ်ကိုင်းအတွက် မတူညီသောဂိမ်းများအတွင်းဆွဲသွင်းခံလိုက်ရသော တခြားလူများလည်း ရှိမည်သာ။

ထန်မော့လည်းသစ်ကိုင်းကို အကြာကြီး စိုက်ကြည့်နေပြီးမှ အိတ်ထဲပြန်ထည့်လိုက်သည်။ သူ၏လက်ရှိအနေအထားနှင့်ဆိုလျှင် တစ်ပါတ်တွင် တစ်ကြိမ်မျှအိပ်ရုံဖြင့် ခွန်အားပြည့်၀ရန်လုံလောက်နေပြီဖြစ်သည်။ ထို့ကြောင့် မျက်လုံးများကို မှိတ်လျက်ကျန်အကြောင်းများကို တွေးတောနေခဲ့သည်။ အချိန်များ ကုန်လွန်သွားပြီးနောက် ဂိမ်းထဲမှမထွက်ခင်ဆိုခဲ့သော ကျွန်တော်က ပူဒုန်မှာ ဟူသောစကားစုကို ပြန်တွေးမိရင်း မျက်လုံးများကို ဖွင့်လိုက်မိလေသည်။

"မနက်ဖြန် တိုက်ကိုသွားပြီး ချန်ရှန်းရှန်း ဘယ်လိုနေလဲ သွားကြည့်ရမယ်"

သူစုကျိုးကို အချိန်တစ်ခုအထိ ပြန်ဖြစ်ဦးမည်မဟုတ်ချေ။

တရုတ်ပြည်မှာ တိတ်ဆိတ်လျက်။ ဂိမ်းထဲမှ ထွက်လာကြသော ကစားသမားများမှာ လက်ထဲတွင် သစ်ကိုင်း ကိုယ်စီကိုကိုင်လျက် ပုန်းကွယ်ရန်နေရာများကို ရှာဖွေလိုက်ကြသည်။

ညသန်းခေါင်အချိန်တွင် ထန်မော့၏ အိတ်ထဲမှ တစ်ခုခုကလွန်စွာ တောက်ပလာခဲ့လေသည်။

ထန်မော့မျက်လုံးကို ချက်ချင်းဖွင့်လျက် သူ၏ကျောပိုးအိတ်ကို ကြည့်လိုက်မိသည်။ သူ၏အိတ်ထဲမှ ရှည်မျောမျော တစ်စုံတစ်ခုကတောက်ပနေသလိုပင်။ ထိုအလင်းမှာ သူ၏မိုးကာသားကျောပိုးအိတ်ကိုဖောက်လျက် တစ်ခန်းလုံးကို လင်းလက်သွားစေသည်။ ထန်မော့ရင်ထဲမှ တစ်ချက်ဆောင့်ခုန်သွားပြီး တုန့်ပြန်န်အသင့်အနေအထားနှင့် ဇစ်ကိုဆွဲဖွင့်လိုက်သည်။

အိတ်ပွင့်သွားသည်နှင့် တောက်ပနေသော ခရစ်စမတ်သစ်ကိုင်းမှာ ပျံထွက်လာခဲ့သည်။ ထန်မော့လျင်မြန်စွာပင် ထိုအကိုင်းကို လှမ်းဆွဲထားလိုက်သည်။ သို့တိုင် လေထုကိုသာဖမ်းမိလေသည်။ သစ်ကိုင်းမှာ အလင်းတစ်ခုအဖြစ်ပြောင်းလဲသွားလျက် ပြတင်းပေါက်မှတဆင့်ကောင်းကင်ပေါ်သို့ ပျံသန်းသွားခဲ့သည်။

ထန်မော့လည်း ပြတင်းပေါက်ထံလျှောက်သွားလျက် ကောင်းကင်ကိုမော့ကြည့်လိုက်လေသည်။

မှောင်းမည်သော ညကောင်းကင်ပေါ်တွင် တရုတ်ပြည်တစ်ပြည်လုံးထံမှ အလင်းစက်များများ ကောင်းကင်ပေါ်သို့ ပျံတက်သွားခဲ့သည်။ ထိုအလင်းသစ်ကိုင်းများစုပေါင်းလျက် ကောင်းကင်ပေါ်တွင် ခရစ်စမတ်သစ်ပင်ကြီးတစ်ခုကို ပုံဖော်လာခဲ့သည်။

ကြီးမားသော ခရစ်စမတ်သစ်ပင်ကြီးမှာ တရုတ်ပြည်တစ်ခုလုံးအပေါ် အုပ်မိုးလျက် တောက်ပနေသည်မှာ ညသည် နေ့အဖြစ်ပြောင်းလဲတော့မတတ်။ အလင်းများမှာ အလွန်အမင်းတောက်ပလာလွန်း၍ သာမာန်မျက်စိဖြင့်မကြည့်နိုင်တော့ချေ။ ထိုစဥ် ကျယ်လောင်ရောရယ်သံတစ်ခုကိုကြားလိုက်ကြရလေသည်။

"ဟား ဟား ချစ်စရာကလေးတို့လေ မယ်ရီခရစ်စမတ်ပါကွယ်"

ဘုန်း...

ခရစ်စမတ်သီချင်းမှာ ကောင်းကင်နေရာအနှံမှ ထွက်ပေါ်လာခဲ့ပြီး စန်တာကလော့မှာ ၀င်ရိုးစွန်း သမင် ၄ကောင်ဆွဲသော စွပ်ဖားကြီးဖြင့် ခရစ်စမတ်သစ်ပင်ကို ဖောက်ထွက်လာခဲ့လေသည်။

ခရစ်စမတ်သစ်ပင်ကြီးမှာ ထောင်သောင်းချီသော အလင်းစက်များအဖြစ်ပြောင်းလဲသွားခဲ့ပြီး မြေပြင်ပေါ်သို့ပြန်ကျလာခဲ့သည်။ ကြယ်ပုံသဏ္ဍာန်အလင်းစက်တစ်ခုမှာ ထန်မော့ထံ တန်းတန်းမတ်မတ်ကျလာခဲ့ကာ ထန်မော့၄င်းကို လက်ကိုဆန့်လျက် ဖမ်းယူလိုက်လေသည်။

လက်မော့၏ လက်ဖ၀ါးထဲတွင် ထိုကြယ်ကလေးမှာ လှပစွာ တဖြတ်ဖြတ်တောက်ပနေခဲ့သည်။ ထိုအလင်းရောင်မှာ သူ၏ကိုယ်အတွင်းသို့ တိုး၀င်သွားသည်နှင့် ထန်မော့လည်း မျက်လုံးများကို မှိတ်လိုက်မိလေသည်။ ၅မိနစ်ကြာပြီးနောက် သူမျက်လုံးပြန်ဖွင့်လိုက်လျှင် ထိုအလင်းစက်လည်း မရှိတော့ချေ။

စန်တာကလော့မှာ ရယ်မော့ရင်း စွပ်ဖားကြီးကိုမောင်းနှင်လျက်ပင် ဝေးကွာသွားတော့သည်။

ထန်မော့လက်သီးဆုပ်လျက် လေထဲသို့ ဝေ့ယမ်းလိုက်သည်။ သူ၏ကိုယ်မှာပေါ့ပါးလာပြီး ကြွက်သားများမှာလည်း တောင့်တင်းသန်မာလာမှုကို ခံစားမိလေသည်။ ထိုအလင်းစက်ကလေးမှာ ထန်မော့၏ ပြင်ပခွန်အားကိုတိုးမြှင့်ပေးခဲ့လေသည်။ သူ၏ခွန်အားမှာ ကစားသမားအများစုထက် သန်မာလေသည်။ တရား၀င်ကစားသမားများနှင့် ခိုး၀င်သူများကြား၌ပင် ထိပ်တွင်ရှိသည်။ ထို့ကြောင့် အလင်းစက်မှပေးသော တိုးတက်မှုမှာ သူ့အတွက် မပြောပလောက်ချေ၊ သို့သော် ကျန်ကစားသမားအတွက်မူ ဤမျှသောခွန်အားမှာပင် အံအားသင့်ဖွယ်ကောင်းပေလိမ့်မည်။

ခရစ်စမတ်မှာပြီးဆုံးသွားချေပြီ။

ဤသည်မှာ အမှန်တကယ်ကို ခရစ်စမတ်လက်ဆောင်ဖြစ်နေခဲ့သည်။

ထန်မော့ ပြုံးကာခေါင်းခါလိုက်ရင်း ပြတင်းပေါက်ထံမှ ခွာလျက် ပြန်လည်အနားယူရန်ပြင်လိုက်လေသည်။

ကောင်းကင်ပေါ်တွင် အလင်းစက်အများစုမှာ သူတို့၏ သက်ဆိုင်ရာနေရာများကို ပျံသန်းသွားလျက် ခရစ်စမတ်လက်ဆောင်များအဖြစ်ပြောင်းလဲသွားကြသည်။

သို့သော် ထန်မော့ကျောခိုင်းလိုက်စဥ်မှာပင် မြူးကြွသော ခရစ်စမတ်သီချင်းသံကို နောက်ခံထားလျက် ကလေးသံ၏ ကြေညာမှုက ထွက်ပေါ်လာခဲ့ပြန်သည်။

"တင်းတောင်~ ဗားရှင်း အဆင့်မြှင့်မှု အသိပေးချက်...၂၀၁၈ ဂျန်န၀ါရီလ ၁ရက်နေ့ အနက်ရောင်မျှော်စင်ရဲ့ ဗားရှင်း ၂.၀က အွန်လိုင်းပေါ်ရောက်ရှိလာတော့မှာပါ...ဗားရှင်းအသစ်ရဲ့စည်းမျဥ်းတွေနဲ့ ရင်းနှီးအောင် မှတ်သားပေးကြပါဦးနော်..ဗားရှင်းအသစ်ရဲ့ စည်းမျဥ်းတွေကတော့..."

ထန်မော့ပြန်လှည့်လာလျက် သူ၏မျက်လုံးများမှာ ၀ိုင်းစက်နေခဲ့သည်။ သူသည် ရှန်ဟိုင်းမြို့ကောင်းကင်ပေါ်မှ ကြီးမားသော အနက်ရောင်မျှော်စင်ကြီးကို ကြည့်နေမိလေသည်။

အနက်ရောင်မျှော်စင်မှာ ကမ္ဘာကြီးအွန်လိုင်းပေါ်တက်လာကြောင်း ကြေညာစဥ်ကလို ရောင်စုံအလင်းများတဖြတ်ဖြတ်လင်းလက်လျက်ပင်။ မယ်ရီခရစ်စမတ်သီချင်းသံကိုလည်းကြားနေရဆဲ။ ထို့နောက် ရင်းနှီးနေသော ကလေးသံ၏ စည်းမျဥ်းများကြေညာမှုကို လူတိုင်း ကြားလိုက်ကြရလေသည်။

🪩

Prev Next