MM Story Teller

Chapter 172

Viewers 32k

🌍Chapter 172

စပါကတီခွက်ကိုယူပြီးနောက် ထန်မော့တို့၂ဦးမှာ ကျန်လူများထံမှခွဲလာခဲ့ပြီး ရှော့ပင်းစင်တာ၏အနောက်လမ်းကြားသို့သွားလိုက်ကြသည်။ ဤစင်တာမှာ အမှိုက်ရှင်းလင်းရေးဌာန၏ တောင်ဘက်တွင်ရှိလေသည်။ ထန်မော့နှင့်ဖူ၀မ်သော်က အရှေ့ဘက်သို့အရင်သွားကြမည်ဖြစ်ကာ ထို့နောက် ထန်မော့မှာ မြောက်ဘက်ရှိအမြင့်ဆုံးအဆောက်အဦးထံသို့သွားမည်ဖြစ်သည်။ ထိုစဥ်ဖူ၀မ်သော်မှာ ပုန်းကွယ်နေလျက်တိုက်ခိုက်ရန်အသင့်ပြင်ထားမည်ပင်။

ထန်မော့ အဆောက်အဦးမြင့်၃ခုကို အကဲခတ်ကာ ထွက်ခွာရန်အသင့်ဖြစ်နေခဲ့သည်။ သူခြေမလှမ်းနိုင်ခင်မှာပင် လက်တစ်ဖက်မှာ သူ၏ဘယ်လက်ကောက်၀တ်ကိုဖမ်းဆုပ်လာခဲ့သည်။ ထန်မော့တုန်လှုပ်စွာလှည့်ကြည့်လိုက်မိလေသည်။ ဖူ၀မ်သော်မှာ သူအားလက်ကောက်၀တ်မှ ပြန်ဆွဲခေါ်လိုက်သည်။ တစ်ချိန်တည်းမှာပင် သူ၏ကျန်လက်တစ်ဖက်မှာ ထန်မော့၏ ညာဘက်အိတ်ကပ်ထဲသို့နှိုက်လျက် စပါကတီခွက်ကိုထုတ်ယူလိုက်လေသည်။

ထန်မော့ကရေရွတ်လိုက်မိသည်။

"ဖူ၀မ်သော် ခင်များ..."

ဖူ၀မ်သော်မှာ ထန်မော့အား နက်ရှိုင်းသောအကြည့်များနှင့်ကြည့်လာခဲ့သည်။

"အဲဒီဖိနပ်တွေရှိတာ မင်းတစ်ယောက်တည်းမဟုတ်ဘူးလေ...ကိုယ်သွားပြီးဖောက်ခွဲလိုက်မယ် မင်းကဒီမှာနေပြီး တိုက်ခိုက်ပါ"

ထန်မော့မျက်မှောင်ကျုံ့လိုက်မိသည်။

သူသွားလိုသည်မှာ ဖိနပ်တစ်ခုတည်းကြောင့်မဟုတ်ပဲ ကြုံတွေ့လာရနိုင်သည် ပြဿနာမျိုးစုံကို သူ၏စွမ်းရည်များနှင့် ဖြေရှင်းနိုင်လိမ့်မည်ဟုထင်၍ပင်။ ကျန်ခဲ့သူက ၁မိနစ်ခန့်တောင့်ခံရန်လိုအပ်ကာ ဖောက်ခွဲရန်သွားသူပြန်လာသည်ကိုစောင့်ရပေမည်။ ဖူ၀မ်သော်မှာ အလွန်သန်မာကာ အစီအစဥ်၏ အန္တရယ်အများဆုံးအပိုင်းမှာ အဆောက်အဦးကိုဖောက်ခွဲခြင်းဖြစ်သည်။ သို့သော် တစ်ဦးချင်းတိုက်ခိုက်စွမ်းရည်မှာ သူကသိသိသာသာကိုပင် ထန်မော့ထက်သာလေသည်။

အတွေးများစွာကထန်မော့၏ ရင်ထဲတွင်ဖြစ်ပေါ်လာခဲ့သည်။ သူသည်စကားမဆိုပဲ ထိုအမျိုးသား၏ခပ်နိမ့်နိမ့်လေသံကိုသာနားထောင်နေခဲ့လေသည်။

"၁မိနစ်ထဲ...မင်းတောင့်ခံနိုင်တယ်မလား"

ထန်မော့ဖူ၀မ်သော်အား အံ့အားသင့်စွာကြည်ြနေခဲ့သည်။

"ကိုယ်အမြန်ပြန်ခဲ့မယ်"

ဖူ၀မ်သော်ခတ္တတန့်သွားလျက် သေနတ်ကိုထုတ်ယူကာ သူ့အားပေးလာခဲ့သည်။

"ကိုယ်မင်းကိုဒါပေးခဲ့မယ်..စိတ်မပူနဲ့..ဒီမှာအလစ်တိုက်ဖို့စောင့်နေကြတဲ့သူတွေအများကြီးရှိပါတယ်"

ထန်မော့သေနတ်ကို ခတ္တမျှကြည့်နေခဲ့မိသည်။

"..."

ဤနေရာတွင် အလစ်တိုက်ရန်စောင့်နေသူအများအပြားရှိသည်...

ထို့ကြောင့် ထန်မော့၏ကျည်ဆံက တစ်ဦးဦးကိုတော့ ကျိန်းသေမှန်လိမ့်မည်...

ထန်မော့၏ မျက်တောင်တို့တုန်ရီသွားလျက် သေနတ်ကိုဆုပ်ကိုင်လိုက်သည်။

"အိုကေ..အမြန်သွားပြီး အမြန်ပြန်လာခဲ့"

ထန်မော့သေနတ်ကိုယူကာ လှည့်ထွက်သွားခဲ့လေသည်။ ဖူ၀မ်သော် ပြတ်သားသော သူ၏ကျောပြင်ကိုကြည့်ကာ မျက်ခုံးကိုပင့်လိုက်မိလေသည်။ သူတစ်ချက်ပြုံးလိုက်ပြီးနောက် သူ၏ကိုယ်ဟန်မှာ အမှောင်ထုနှင့်ရောနှောသွားလျက် မြောက်ဘက်ရှိ အမြင့်ဆုံးအဆောက်အဦးထံသို့ ပြေးထွက်သွားခဲ့လေတော့သည်။

၅မိနစ်အကြာ...မတ်လ ၆ရက် မနက်ခင်း ၄:၅၀ ...

ပြင်းထန်သော ပေါက်ကွဲသံကြီးနှင့်အတူ မြေပြင်မှာ တုန်လှုပ်သွားခဲ့သည်။ မီးတောက်မီးညွန့်များက ကောင်းကင်ကိုထိုးတက်နေခဲ့လေသည်။ နန်ကျင်း ရှင်းကျဲခုတွင် အမှောင်ထဲတွင်ပုန်းနေကြသော ကစားသမားများမှာ ထိတ်လန့်စွာ ထရပ်လျက် မြောက်ဘက်ရှိ မိုးမျှော်အဆောက်အဦးကို ကြည့်လိုက်ကြသည်။ ထိတ်လန့်နေကြသော ကစားသမားများမှာ ထိုအဆောက်အဦးမှ အဆုံးမဲ့စွာပြေးထွက်လာကြ၏။ သူတို့သည် ကြောက်လန့်တကြားအော်ဟစ်သံများနှင့် အပေါ်ထပ်မှ ခုန်ချလိုက်ကြသည်။

တစ်ချိန်တည်းမှာပင် အသံတစ်ခုကိုလည်းကြားလိုက်ရသည်။

"သေစမ်း...အဲဒီလူပဲ"

လူများ မော့ကြည့်လိုက်သောအခါ အနက်ရောင်အရိပ်တစ်ခုသည် ဘေးဘက်ရှိအဆောက်အဦးခေါင်မိုးပေါ် ခုန်ကူးသွားသည်ကိုတွေ့လိုက်ရလေသည်။ ထိုပြင်းထန်သော ပေါက်ကွဲမှုက ရှင်းကျဲခု၏ အချက်အချာနေရာတစ်ခုလုံးကို လှုပ်ရှားသွားစေသည်။

အနီးရှိကစားသမားများမှာလည်း ၄င်းကိုမြင်သည်နှင့် အဆောက်အဦးကိုဖောက်ခွဲပစ်ခဲ့သော အမျိုးသားနောက် ဒေါသဖြင့် အသည်းအသန်လိုက်ကြတော့သည်။ အမှောင်ထဲတွင် အလစ်တိုက်ရန်စောင့်နေကြသော သူများမှာလည်းမြောက်အရပ်သို့ပြေးသွားလျက် ရေပွက်စဥ် ငါးပက်ရန် အပြေးသွားကြတော့သည်။

တစ်ချိန်တည်းမှာပင် အဖွဲ့၃ခုက တောင်ဘက် အရှေ့ဘက်နှင့် အနောက်ဘက်တို့မှ အမှိုက်ရှင်းလင်းရေးဌာနထံသို့ပြေး၀င်လာခဲ့ကြလေသည်။ တစ်ယောက်ယောက်က ထိုရုတ်တရက်လှုပ်ရှားမှုကိုသတိထားမိချိန်တွင် ရှောင်ကျီထုံးမှာ တောင်ဘက်မှပြေး၀င်လာပြီး အမှိုက်ရှင်းလင်းရေးဌာန၏အလယ်ကိုရောက်နေခဲ့ပြီးဖြစ်သည်။

နင်နင်းက အလင်းထံသို့တိုက်ရိုက်ပြေးသွားလျက် တံဆိပ်ပြား၈ခုကို ထိုအမှိုက်ရှင်းလင်းရေးဌာန၏ အလင်းအောက်တွင်ထားလိုက်လေသည်။

တစ်စုံတစ်ယောက်မှ အော်လိုက်သည်။

"သေစမ်း... ဒီဘက်ကနေ လာနေကြတယ်"

မြောက်အရပ်သို့ပြေးသွားနေသော ကစားသမားများမှာ အလျင်အမြန်ပြန်ပြေးလာခဲ့ကြသည်။

ထန်မော့တွင် နင်နင်း၏ ကံကောင်းမှုမျိုးမရှိချေ။

သူလမ်းတစ်၀က်မျှသာရှိသေးချိန်တွင် မြောက်ဘက်မှ ပြန်ပြေးလာကြသော ကစားသမားများမှာ သူ့ကိုတွေ့သွားခဲ့ကြသည်။ အနောက်အရပ်တွင် ပုန်းခိုနေသူသိပ်မရှိသည်ကို မည်သူမျှမမျှော်လင့်ထားကြချေ။ သို့သော် မြင်ကွင်းကျယ်ကြောင့် မြောက်ဘက်ရှိ အဖြစ်အပျက်ကိုတိုက်ရိုက်မြင်နိုင်လေသည်။ ဖူ၀မ်သော်ခုန်ချလိုက်ချိန်တွင် ၄င်းမှာ ကစားသမားတစ်ယောက်တည်းဖြစ်သည်ကို သူတို့တွေ့သွားခဲ့ကြသည်။

အရေအတွက်၏ တစ်၀က်မပြည့်တပြည့်လူများမှာ ပေါက်ကွဲမှုထံမှဆွဲဆောင်ခံလိုက်ရကာ ကျန်လူများမှာနောက်တွင်ကျန်ရစ်ခဲ့လေသည်။

၀ှစ်...

မြှားကလေးတစ်ခုလေထဲမှဖောက်ထွက်လာခဲ့သည်။ ထန်မော့ကိုယ်ကိုကိုင်းလျက် ထိုမြှားနှင့် ဆက်တိုက်လိုက်လာသော ကျည်ဆံများကိုရှောင်လိုက်သည်။

ထန်မော့၏ မျက်နှာမှာ မည်းမှောင်သွားလျက် ကျိန်ဆဲလိုက်သည်။

"ဘာဖြစ်တာလဲ"

သူသည်ထီးကလေးကိုဖွင့်ကာ အဆုံးမဲ့သော ကျည်ဆံများကိုတားဆီးလိုက်သည်။ သို့သော် များစွားသော အကူပစ္စည်းများမှာ သူ့ထံသို့ဦးတည်လာဆဲပင်။ ထန်မော့သည် ထီးကလေးကိုဝေ့ယမ်းလျက် တိုက်ခိုက်မှုမှန်သမျှကို ခုခံရင်း ပုန်းခိုရန်နေရာကိုရှာဖွေနေခဲ့လေသည်။

အချိန် ၁မိနစ်က လျင်မြန်စွာကုန်ဆုံးသွားခဲ့သည်။

ထန်မော့ခုခံနေရဆဲဖြစ်ကာ ထူးဆန်းပြီးကျိုးကြောင်းမဆီလျော်သော အတွေးတစ်ခု သူ၏ရင်ထဲတွင်ဖြစ်ပေါ်လာခဲ့သည်။

ဖူ၀မ်သော် ခင်များမျိုးမစစ် လူလိမ်...

လမ်းတစ်ဖက်တွင် သတ္တုချင်းထိခတ်မိသံများ ဆက်တိုက်ထွက်ပေါ်နေခဲ့သည်။

ထန်မော့တို့သည် မြောက်ဘက် အဆောက်အဦးကိုဖောက်ခွဲကာ အာရုံလွှဲခဲ့ပါသော်လည်း ထိုကစားသမားများ အမှန်တကယ်ပြန်ရောက်လာကြသောအခါ မကုန်ဆုံးနိုင်အောင် များပြားလှသည်။

ဤသည်မှာ ကမ္ဘာကြီးအွန်လိုင်းပေါ်တက်လာပြီး ၅လရှိပြီဖြစ်ရာ ကစားသမားအများစုမှာ လူမဆန်သော အနက်ရောင်မျှော်စင်ဂိမ်းများကို ကြုံတွေ့ခဲ့ဖူးပြီးဖြစ်ပြီး မရဲတင်းသူများဟူ၍မရှိတော့ချေ။

လူများအားလုံး ထိုအမှိုက်ရှင်းလင်းရေးဌာနအနီးတွင်တိုက်ခိုက်ရန်စောင့်နေကြသူများရှိလိမ့်မည်ဟုတွေးမိကြသည်။ သို့သော် ၄င်းမှာ သိရုံသာ။ လုံလောက်သော ခွန်အားမျိုးရှိသော ကစားသမားကသာ ထိုသို့အလစ်တိုက်ရဲမည်ဖြစ်သည်။ သို့နှင့်ကစားသမားများကို အုပ်စု၂ခုခွဲနိုင်သည်။ တစ်စုမှာ အလစ်တိုက်ရန် စောင့်နေကြသူများဖြစ်ကာ ကျန်တစ်စုမှာ ဦးတည်ရာမဲ့သွားကာ ကြုံရာတိုက်ခိုက်နေသူများဖြစ်သည်။

ထို၂စုမှာ ဖူ၀မ်သော်မလှုပ်ရှားခင်အထိ အလွန်တည်ငြိမ်နေခဲ့သည်။ တစ်စုံတစ်ယောက်မှ ထိုတည်ငြိမ်မှုကိုဖြိုခွဲလိုက်သည်နှင့် ထိုကျပန်းတိုက်ခိုက်နေကြသူများမှာ အင်းဆက်အုပ်ကြီးသဖွယ် ရောက်လာကြမည်ပင်။

ရာကျော်သော ကစားသမားများမှာ အမှိုက်ရှင်းလင်းရေးဌာနအနီးသို့ လျင်မြန်စွာရောက်ရှိလာခဲ့သည်။

ထန်မော့ထီးကလေးကိုဝေ့လျက် အစိမ်းရောင်သတ္တုလိပ်ပြာကို တားဆီးလိုက်သည်။ သူမော့ကြည့်လိုက်သော ပိုးစုန်းကြူးနှယ် အဖြူရောင်အလင်းစက်များက သူ၏ရင်ဘတ်ထံဦးတည်လာသည်ကိုတွေ့လိုက်ရပြန်သည်။

ကစားသမားများမှာ ထူးဆန်းသော အကူပစ္စည်းမျိုးစုံနှင့် တိုက်ခိုက်လာခဲ့ပြီး ထန်မော့ ထီးကလေးဖြင့် ၄င်းကိုဆက်တိုက် ခုခံကာ ရှေ့သို့တိုးနေခဲ့သည်။

သူ စိတ်ထဲ၌အချိန်ကို ရေတွက်နေခဲ့သည်။

ဖူ၀မ်သော် မြောက်ဘက်ရှိအဆောက်အဦးကိုဖောက်ခွဲပြီး ၃မိနစ်ကျော်လွန်သွားချေပြီ။ ထန်မော့တိတ်တဆိတ်တွေးလိုက်မိသည်။

'ဖူ၀မ်သော် မတော်တဆတစ်ခုခုများကြုံနေရတာလား...'

ဖူ၀မ်သော်၏ ခွန်အားနှင့်ဆိုပါက လွတ်မြောက်ရန် ပြဿနာမရှိချေ။ မတော်တဆရှိနိုင်ချေနည်းပါးသော်

လည်း ထန်မော့အပြည့်အ၀ စိတ်မအေးနိုင်ခဲ့ချေ။ သို့သော်ကစားသမားများ၏ ပြင်းထန်သောတိုက်ခိုက်မှုကြောင့် ထိုကိစ္စကိုနောက်ပို့လျက် ထွက်ပြေးရန်သာအာရုံစိုက်နေခဲ့ရသည်။ ထန်မော့သည် ရှောင်ကျီထုံးနှင့် ကျန်လူများစောင့်နေသည့်အမှိုက်ရှင်းလင်းရေးဌာနအား တတ်နိုင်သမျှ နီးကပ်စေရန် ကြိုးစားနေခဲ့လေသည်။ သို့သော် အလစ်တိုက်ခိုက်နေသူများမှာ သူ၏အကြံအစည်ကို သိနှင့်ပြီးဖြစ်သည်။

ထိုအမှိုက်ရှင်းလင်းရေးဌာနဆီသို့သွားရာလမ်းတွင် အကူပစ္စည်းမျိုးစုံက ပိိတ်ဆို့နေခဲ့သည်။ ထန်မော့နောက်ပြန်ခုန်လျက် ဓါးကြီးတစ်ချောင်းကို ရှောင်တိမ်းလိုက်သည်။

အရပ်မြင့်မြင့်နှင့် သက်လတ်ပိုင်းလူတစ်ဦးသည် ထန်မော့ကိုကြည့်လျက် ထိုဓါးဖြင့် အညှာအတာမဲ့စွာ ခုတ်ပိုင်းလာခဲ့သည်။ သူ၏ဘေးမှ ကျန်၃ယောက်ကလည်း ထန်မော့ကို တိုက်ခိုက်ရန် ပြေးထွက်လာခဲ့ကြသည်။

ထန်မော့ဘေးသို့လျင်မြန်စွာဆုတ်ရှောင်လိုက်ပြီး ထီးကလေးကိုပိတ်လိုက်ကာ ၄င်း၏ထိပ်ဖျားဖြင့် ထိုလူကြီး၏ ရင်ဘတ်ကိုထိုးစိုက်လိုက်လေသည်။

ထိုလူကြီး၏ မျက်လုံးအစုံမှာ ပြူးကျယ်သွားခဲ့သည်။ အဖြစ်အပျက်မှာ အလွန်လျင်မြန်လွန်း၍ သူသည်မည်သို့သေသွားသည်ကိုပင် နားလည်ပုံမပေါ်ပဲ သူ့ကိုယ်မှာလည်း ပြိုကျသွားခဲ့လေသည်။ သူ၏ဘေးမှ လူများမှာ တုန်လှုပ်နေရာမှ တစ်စုံတစ်ယောက်မှ အော်ဟစ်လိုက်သည်။

"သူကအရမ်းသန်မာတယ်...သူ့မှာ တံဆိပ်ပြားတွေအများကြီးရှိမှာ"

ထန်မော့၏မျက်လုံးတို့ကျဥ်းမြောင်းသွားခဲ့သည်။

တိုက်ပွဲမှာ စဲမသွားခဲ့ချေ။ ဤသည်မှာ သာမာန်အစစ်အမှန်ဂိမ်းနှင့်မတူတော့ပဲ အဆုံးမဲ့ရှင်သန်ရေးဂိမ်းတစ်ခုနှယ်။

ယုန်ခေါင်းနောက်ဆုံးတစ်သုတ်ထွက်လာခဲ့သော်လည်း မည်သူကမျှ ၄င်းတို့ကို သတ်ရန် စိတ်မ၀င်စားကြတော့ချေ။ ယုန်ခေါင်းကိုသတ်ခြင်းက တံဆိပ်ပြားတစ်ခုကိုသာရလိမ့်မည်။ ဤအချိန်အထိ ရှင်သန်လာသော ကစားသမားကိုသတ်ခြင်းက တံဆိပ်ပြားအများအပြားကိုရစေလိမ့်မည်။ လူတိုင်း မည်သည်ကို ရွေးချယ်ရမည်အား ကောင်းကောင်းသိလေသည်။

အချိန်များကုန်လွန်သွားပြီးနောက် ထန်မော့ တိုက်ခိုက်ခြင်းတွင် သူအသားစီးရနေသည်ကို အံ့အားသင့်သွားခဲ့သည်။

"ငါပိုသန်မာလာတာမဟုတ်ဘူး..သူတို့အားပိုနည်းလာတာ"

ထန်မော့၏ ဦးနှောက်က လျင်မြန်စွာအလုပ်လုပ်နေရင်း ပြင်းထန်သော လက်သီးချက်တစ်ခုကိုရှောင်ရှားလိုက်သည်။ သူရုတ်ချည်းတွေးလိုက်မိသည်။

"နေဦး..အဲဒီအဝေးကတိုက်ခိုက်တာတွေကရော.."

စက္ကန့်ပိုင်းအတွင်းမှာပင် ထန်မော့၏မေးခွန်းကိုဖြေကြားရန်အတွက် လေးလံသော တစ်စုံတစ်ခုပြုတ်ကျလာခဲ့သည်။ အရပ်မြင့်မြင့်နှင့် ချောမောသော ယောကျာ်းတစ်ဦး လမ်းတစ်ဖက်ခြမ်းသို့ကျလာခဲ့လေသည်။

ဖူ၀မ်သော် ထန်မော့အားကြည့်လိုက်သည်။ သူသည်ယခုလေးတင် ထန်မော့၏နောက်မှ အလစ်တိုက်ရန်ပြင်နေသော လူတစ်ဦးကို ဓါးနှင့်ပစ်သတ်ခဲ့ခြင်းဖြစ်သည်။

ထန်မော့၏ အကြည့်တို့က ဖူ၀မ်သော်၏ သွေးများစိုရွှဲနေသော အ၀တ်အစားများအပေါ် ကျရောက်သွားခဲ့သည်။ တဖက်လူ၏ အနေအထားကိုခန့်မှန်းပြီးနောက် သူ၏ရင်ထဲတွင်အဖြေတစ်ခုရှိနေပြီးဖြစ်သည်။

ထန်မော့၏ နှုတ်ခမ်းတို့တွန့်ကွေးသွားခဲ့သည်။ ထို့နောက် လူ၂ဦး စကားဆိုနေစရာမလိုပဲ အလစ်တိုက်ခိုက်လာသော ကစားသမားများကို အတူတကွ ရှင်းလင်းလိုက်ကြလေသည်။ ဤကစားသမားများ၏ ယေဘုယျအဆင့်မှာ အခြားနယ်မြေများထက်နိမ့်သော်လည်း သူတို့မှာ အရေအတွက်အလွန်များလေသည်။ ထန်မော့၏ကိုယ်ပေါ်တွင် သွေးသံရဲရဲ ဒဏ်ရာတချို့နှင့် လောင်ကျွမ်းရာများရှိပြီး ဖူ၀မ်သော်မှာမူ အခြေအနေမဆိုစလောက်ပိုကောင်းနေခဲ့သည်။

မည်မျှကြာသွားပြီမှန်း မသိနိုင်တော့ခင်မှာပင် ထန်မော့နှင့် ဖူ၀မ်သော်မှာ အဆုံးတွင် အမှိုက်ရှင်းလင်းရေးဌာနအနီးသို့ရောက်ရှိလာခဲ့ကြလေသည်။ ထန်မော့မှာ အတွင်းသို့ပြေး၀င်ရန်ပြင်လိုက်စဥ် ရှောင်ကျီထုံးမှ သူ့အား အလျင်အမြန်သတိပေးလာခဲ့သည်။

"သတိထား"

ထန်မော့ဘေးသို့အမြန်ရှောင်လိုက်သော်လည်းနောက်ကျသွားဆဲပင်။ ငွေရောင်ဓါးမှာ သူ၏မေးစေ့ကိုဖြတ်သွားခဲ့သည်။ အမှိုက်ရှင်းလင်းရေးဌာနအ၀င်၀တွင် ရပ်နေသော လူရွယ်က ထန်မော့ကို အေးစက်စွာကြည့်နေခဲ့သည်။ ထိုတိုက်ခိုက်မှုကြောင့် ထန်မော့၏ အိတ်ကပ်ထဲမှ Sတံဆိပ်ပြား၂ခုထွက်ကျသွားကာ လူရွယ်က ၄င်းကိုကြည့်လျက် လှောင်ရယ်လိုက်သည်။

ဖူ၀မ်သော်သူ့အားကူညီရန်ပြင်လိုက်စဥ် အဖြူရောင်ကြာပွတ်တစ်ခုမှာ သူ၏လက်ကိုရစ်ပတ်လာခဲ့သည်။ သူလှည့်ကြည့်လိုက်သော သူ့အားအေးစက်သောအမူအယာဖြင့်ကြည့်နေသော အထက်တန်းကျောင်းသူတစ်ဦးကိုတွေ့လိုက်ရလေသည်။ ဖူ၀မ်သော်တည်ငြိမ်စွာကြည့်နေရာမှ ရုတ်ချည်းပြေး၀င်သွားခဲ့သည်။

ထန်မော့ထီးကလေးကိုဝေ့ယမ်းလျက် ထိုလူရွယ်၏ဓါးကို ခုခံလိုက်သည်။ တဖက်ရန်သူမှာ အလွန်လျင်မြန်ကာ တိုက်ခိုက်မှုတိုင်းက ထန်မော့၏ အရေးကြီးသော အစိတ်အပိုင်းများကို ချိန်ရွယ်ထားခဲ့သည်။ စက္ကန့်ပိုင်းအတွင်းမှာပင် လူ၂ဦး အကြိမ်များစွာ ထိပ်တိုက်တွေ့ပြီးဖြစ်သည်။

ခုခံနေစဥ်မှာပင် ထန်မော့သည် တစ်ဖက်လူကပို၍လျင်မြန်လာပြီးသူ၏ တိုက်ခိုက်မှုတိုင်းကလည်း အလွန်သန်မာလှကြောင်း ခံစားမိလာခဲ့သည်။

ဓါးချက်က သူ၏ခေါင်းကိုတဖန်ချိန်ရွယ်လာလျှင် ထန်မော့ ထီးကိုမြှောက်လျက် ကာလိုက်သည်။ သို့သော် သူသည်ပြင်းထန်သော တွန်းကန်အားကြောင့်နောက်သို့၂လှမ်းခန့်ဆုတ်လိုက်ရလေသည်။

လူရွယ်က ချက်ချင်းတိုက်ခိုက်လာပြန်ကာ ထိုဓါးမှာ ထန်မော့ကိုခေါင်းကိုသာ ချိန်ရွယ်ထားခြင်းဖြစ်သည်။ ထန်မော့သူ၏ဘယ်လက်ကို အေးစက်စွာမြှောက်လိုက်သည်။ မီးခြစ်ဆီကြီးတစ်ခုရုတ်ချည်းပေါ်လာလျက် ထိုဓါးကိုခုခံလိုက်လေသည်။

သူသည် ထန်မော့အရေးနိမ့်ပြီဟုထင်နေချိန်တွင် ထိုမီးခြစ်ဆံကြီး ရုတ်တရက်ပေါ်လာလိမ့်မည်ဟုမထင်ထားခဲ့ချေ။ သူသည်မကောင်းသောခံစားချက်ကြောင့် ထိုမီးခြစ်ဆံကိုနောက်ဆုတ်လျက်ရှောင်လိုခဲ့သည်။ သို့သော်ထန်မော့မှာပို၍လျင်မြန်ခဲ့ပြီး မီးခြစ်ဆံ၏ခေါင်းမှာ မြေကြီးကိုပွတ်တိုက်သွားလျက် မီးပွားတို့ကထိုလူရွယ်ထံလွင့်စင်သွားခဲ့လေသည်။

ဘုန်း...

မီးတောက်များတမဟုတ်ချင်းထတောက်လာခဲ့သည်။

လူရွယ်က သူ၏လက်များနှင် ထိုမီးကို လျင်မြန်စွာငြိမ်းလိုက်သည်။ သို့သော် မီးမှာ ငြိမ်းမသွားပဲ သူ၏လက်များကိုပါ မီးစွဲလောင်သွားခဲ့သည်။ သူ တုန်လှုပ်စွာအော်ဟစ်လိုက်လျှင် ဖူ၀မ်သော်နှင့်တိုက်ခိုက်နေခဲ့သော အထက်တန်းကျောင်းသူလေးမှာ ထိုအသံကိုကြားလိုက်ရလေသည်။ သူမ ချက်ချင်းမော့ကြည့်လာပြီး အခြေအနေကိုနားလည်သွားခဲ့သည်။

"ကိုကြီး"

အထက်တန်းကျောင်းသူမှာ ပြေးသွားချင်ခဲ့သော်လည်း ဖူ၀မ်သော်က သူမကိုထိုသို့လုပ်ခွင့်မပေးခဲ့ချေ။ သူသူမ၏ကြာပွတ်ကိုဆွဲယူရန်တွန့်ဆုတ်မနေပဲ လွှတ်ပစ်လိုက်သည်။ ဖူ၀မ်သော်သည် သူ၏ ညာလက်ကိုလှုပ်ရှားလိုက်ကာ ကြိုးလေးတစ်ချောင်းက ထိုကျောင်းသူ၏ လက်ကောက်၀တ်ကိုချည်နှောင်သွားခဲ့သည်။ သူမမှာရုန်းကန်သော်လည်း ထိုကြိုးမှာ ပြေမသွားသည်ကိုတွေ့လိုက်ရလေသည်။ ထိုအချိန်တွင် လူရွယ်၏ ကိုယ်တစ်၀က်ခန့်မှာ လောင်ကျွမ်းသွားပြီးဖြစ်သည်။

ကျောင်းသူကလေးမှာ ဒေါသတကြီးဖြင့် သူမ၏အိတ်ကပ်ထဲမှ စက်လုံးတစ်ခုကိုထုတ်ယူလျက် ပစ်လွှတ်လိုက်သည်။

"ရှင့်ကိုသတ်မယ်.."

အနက်ရောင်စက်လုံးပြုတ်ကျလာလျှင် ထိုအနီးအနားမှ ကစားသမားများမှာ တစ်ခုခုမှားယွင်းနေသည်ကို ခံစားမိပုံဖြင့်ထွက်ပြေးလိုက်ကြသည်။ ထန်မော့၏ မျက်လုံးများမှာ အံ့အားသင့်မှုကြောင့်ပြူးကျယ်သွားခဲ့သည်။

ထန်မော့ ဖူ၀မ်သော်ကိုကြည့်လိုက်လျင် ဖူ၀မ်သော်ကလည်း သူ့အား ပြန်ကြည့်နေခဲ့သည်။ စက္ကန့်ပိုင်းအတွင်း ဖူ၀မ်သော်လှည့်ပြေးလိုက်သည်။ လူတိုင်းပြေးထွက်သွားချိန်တွင် သူသည် အမှိုက်ရှင်းလင်းရေးဌာနထဲသို့ပြေး၀င်ရန် တုန့်ဆိုင်းမနေခဲ့ချေ။

ဘုန်း...

အနက်ရောင်စက်လုံးပေါက်ကွဲသွားချိန်တွင် ဖူ၀မ်သော်မှာအမှိုက်ရှင်းလင်းရေးဌာနထဲရောက်ရှိပြီးဖြစ်လေသည်။

ထိုအခြေအနေအတွင်း လူဒါဇင်ကျော်ခန့် ဌာနထဲသို့ပြေး၀င်လာခဲ့ကြပြီး တံဆိပ်ပြားအပြည့်အစုံမရှိသေးသော ကစားသမားများမှာလည်း အညှာအတာမဲ့စွာ အတွင်းသို့တွန်းထည့်ခံလိုက်ရလေသည်။ ဖူ၀မ်သော်၀င်သွားသည်ကိုတွေ့လျှင် လူတိုင်းအံ့အားသင့်သွားခဲ့သော်လည်း သိပ်မတွေးလိုက်ကြချေ။ သူက တံဆိပ်ပြား၈ခုကိုထုတ်လာပြီး ဂိမ်းကိုရှင်းလိုက်မည်ဟုသာထင်ထားကြလေသည်။

သို့သော် ဖူ၀မ်သော် အလင်းရှေ့သို့ထွက်လာပြီး ဘာမျှမလုပ်သည်ကိုတွေ့လိုက်ရသည်။ သူသည်ထိုအလင်းကို တည်ငြိမ်စွာသာကြည့်လျက် တစ်ခုခုကိုတီးတိုးရေရွတ်လိုက်သည်။

ဖူ၀မ်သော်မှာ ထိုအလင်းကိုကြည့်နေစဥ်တွင် အချိန်မှာ ရပ်တန့်နေသည့်အလား...

၃စက္ကန့်ကြာပြီးနောက် သူ ထန်မော့ကိုလှည့်ကာကြည့်လိုက်သည်။

"ပလန် A"

ထန်မော့ ဖူ၀မ်သော်ကိုကြည့်လျက် နှုတ်ခမ်းများပွင့်ဟနေရာမှ ပြန်ပိတ်သွားလိုက်သည်။ သူ၏ရင်ထဲတွင်ခံစားချက်မျိုးစုံဖြတ်ပြေးသွားခဲ့သော်လည်း အဆုံးတွင် မည်သည်ကိုမျှမဆိုနိုင်ခဲ့ချေ။

ခတ္တမျှအကြာတွင် ထန်မော့သည် လူအုပ်ကြားမှတိုးသွားလျက် ရှောင်ကျီထုံးကိုကြည့်လိုက်သည်။ ရှောင်ကျီထုံးသည်လည်း ဖူ၀မ်သော်မှာ အမှိုက်ရှင်းလင်းရေးဌာနတွင် မည်သည့်တံဆိပ်ပြားကိုမှထုတ်မလာခဲ့သည်ကိုတွေ့ခဲ့လေသည်။ သူ၏ရင်ထဲတွင် အတွေးပါးပါးတစ်ခုဖြတ်ပြေးသွားခဲ့သော်လည်း သူက တမင်ထိုဖြစ်နိုင်ချေကို မခန့်မှန်းလိုက်ချေ။

ခတ္တမျှအကြာ ရှင်းကျဲခုတခွင် ကျယ်လောင်သော အသံတစ်ခုကိုကြားလိုက်ရလေသည်။

"တံဆိပ်ပြားတွေမရှိလည်း လူတိုင်း၀င်ပြီး ဂိမ်းကိုရှင်းလို့ရတယ်"

မှောင်မည်းသော ညတွင် တိုက်ခိုက်သံများအားလုံးရပ်တန့်သွားခဲ့သည်။ မရေတွက်နိုင်သော လူများမှာ အမှိုက်ရှင်းလင်းရေးဌာနအနီးတွင်ရပ်နေသော လူရွယ်ကို လှည့်ကြည့်လိုက်ကြသည်။ ထိုဌာန၏ဘေးရှိ ကြီးမားသော နာရီကြီးမှာ ကလစ်ဟူသော အသံနှင့်အတူ နံပါတ်၁၁သို့ပြောင်းလဲသွားခဲဲ့သည်။

ဤသည်မှာ ၅.၅၀ဖြစ်ကာ အရှေ့ဘက်မှ ရောင်နီကလေးသန်းလာနေခဲ့သည်။

တချိန်တည်းမှာပင် တရုတ်ပြည်ခရိုင်၉ခု၌ ကစားသမားများ၏ အော်သံများကိုကြားနေခဲ့ရသည်။

"မသတ်ကြနဲ့...သတ်စရာမလိုဘူး...တံဆိပ်ပြားတွေလည်း မလိုဘူး...ဒီတိုင်း surpriseနဲ့ပတ်သက်တာတစ်ခုခုပြောရုံပဲ ဂိမ်းရှင်းပြီးသားဖြစ်သွားလိမ့်မယ်"

နာရီမှာ တချက်ချက်မြည်နေဆဲ...

နေရောင်မှာ တဖြည်းဖြည်းတောက်ပလာနေခဲ့ပြီး နောက်ဆုံးကျန်ရစ်သူ အမှိုက်ရှင်းလင်းရေးဂိမ်းမှာလည်း ပြီးဆုံးရန် ၁၀မိနစ်သာကျန်တော့လေသည်။

မတ်လ ၆ရက်နေ့ ၆နာရီတွင် ကလေးသံ၏ကြေညာမှုကို ခရိုင်၁၀ခုတွင် ကြားလိုက်ကြရသည်။ သူ၏လေသံကားအထင်သေးမှုများရောယှက်လျက် ကစားသမားကို ပေါ်တင်လှောင်ပြောင်နေသည့်အလား...

"တင်းတောင်~ အစစ်အမှန်ဂိမ်းအကြီးစား 'နောက်ဆုံးကျန်ရစ်သူ အမှိုက်ရှင်းလင်းရေးဂိမ်း' ပြီးဆုံးသွားပါပြီ...ဂိမ်းအချိန်အတွင်းမှာ တရုတ်ပြည်ခရိုင် ၆ရဲ့ အမှိုက် ၄၉၂၁ယောက်က ဂိမ်းကိုအောင်မြင်စွာရှင်းလင်းနိုင်ခဲ့ပြီး လူသားသရုပ်ကိုပြန်လည်ရရှိသွားပါပြီ...တရုတ်ပြည်ခရိုင် ၄၉မှာတော့ ၄၂၃၅ယောက်ဟာ ဂိမ်းကိုအောင်မြင်စွာရှင်းလင်းပြီး လူသားသရုပ်ကိုပြန်လည်ရရှိသွားပါပြီ ... တရုတ်ပြည်ခရိုက် ၁၀၀၂မှာ ၃၉၁၄ယောက်

ဟာ ဂိမ်းကိုအောင်မြင်စွာရှင်းလင်းပြီး လူသားသရုပ်ကိုပြန်လည်ရရှိသွားပါပြီ..."

"ကျန်တဲ့အမှိုက်တွေအတွက် အနက်ရောင်မျှော်စင်တိုက်ခိုက်ရေးဂိမ်း (ခက်ခဲမှုအဆင့်)ကိုပြင်ဆင်နေပါပြီ"

"တင်းတောင်~ တရုတ်ပြည်ခရိုင်၁၀ခုက လူသားကစားသမားတွေကို အနက်ရောင်မျှော်စင်ဟာ 'အနက်ရောင်မျှော်စင်ရဲ့ surprise'ကိုချီးမြှင့်ပေးလိုက်ပါပြီ"

"ကဲ..မျှော်စင်ကို ကြိုးစားပြီးတိုက်ခိုက်ပေးကြပါနော်"

🪩

Prev Next