Chapter 62 Arc-3End

🚩Ch 62

Arc 3 END အစားထိုးခံချစ်သူ 

မင်္ဂလာဆောင်သည့်နေ့တွင် စု၀မ်သည် အဖြူရောင်စစ်စစ် မင်္ဂလာဝတ်စုံကို ဝတ်ဆင်ထားပြီး သတို့သမီးအနားယူခန်းတွင် ထိုင်နေကာ သူမအနားရှိ မိတ်ကပ်ပညာရှင်ကို မျက်နှာပေါ်ရှိ မိတ်ကပ်ဖျက်ရန် ခွင့်ပြုလိုက်သည်။ သူမက မှန်ကို စူးစူးစိုက်စိုက်ကြည့်နေပြီး မှန်ထဲက မျက်နှာသည် သူမ၏မူလမျက်နှာ မဟုတ်ချေ။

မှန်ထဲရှိ အမျိုးသမီးကို ကြည့်လိုက်သောအခါ စု၀မ်သည် သူစိမ်းတစ်ယောက်ကို ကြည့်နေရသကဲ့သို့ပင်.....

' ကျွီ '

ဧည့်ခန်းတံခါးကို အပြင်မှလူက သတိမမူသည့်အချိန်တွင် တွန်းဖွင့်လိုက်သည်။ ထိုလူသည် လက်ဖြင့်ချုပ်လုပ်ထား‌သည့် အနက်ရောင်၀တ်စုံပြည့်ကို ၀တ်ထားပြီး အနက်ရောင်သည် စု၀မ်၏ အဖြူရောင်ဝတ်စုံနှင့် လွန်စွာ ဆန့်ကျင်ဘက်ဖြစ်သည်။

" အခမ်းအနားကျင်းပမယ့်အချိန်က မကြာခင်ရောက်လာတော့မယ် "

ခပ်နိမ့်နိမ့် ယောက်ျားအသံက စိတ်လှုပ်ရှားပျော်ရွှင်မှုကို အနည်းငယ် ဖော်ပြနေသည်။

" ကျွန်မ အခု မင်္ဂ‌လာဆောင်က ထွက်ပြေးဖို့‌ အရမ်းနောက်ကျသွားပြီလား "

စု၀မ်သည် တည်ငြိမ်စွာ လှည့်ကြည့်လိုက်ပြီး စုရွေ့၏ နက်ရှိုင်းကာ အောက်ခြေမဲ့သော အနက်ရောင်မျက်လုံးများနှင့် အကြည့်ချင်းဆုံလိုက်သည် ။

" မင်း ဘယ်လိုထင်လဲ "

စုရွေ့က စု‌၀မ်ရှေ့သို့ ခြေလှမ်းအနည်းငယ်လှမ်းလာပြီး သူ၏ရှေ့က သူမကို ညင်သာစွာ ပွေ့ဖက်ရန် လက်နှစ်ဖက်ကို မြှောက်လိုက်သည်။

 " ရှန်းချန်မြို့ တစ်ခုလုံးက မင်း၊စု၀မ်က ငါ၊ဖန်းကျစ်မုရဲ့ ဇနီးအသစ်စက်စက် ဖြစ်ကြောင်း ချက်ချင်း သိသွားကြလိမ့်မယ် "

ဤကဲ့သို့ပြောရင်း စုရွေ့ ၏ နှုတ်ခမ်းများသည် ပို၍ပင် ကွေးညွတ်သွားသည် ။

ထိုအချိန်တွင် စုရွေ့ဖိတ်ခေါ်ထားသည့် မီဒီယာမျိုးစုံနှင့် ရုပ်သံဌာနများက ဟိုတယ်တစ်ခုလုံးကို ဝိုင်းရံထားသည်။

သူသည် ရှန်းချန်တစ်မြို့လုံးကို ဤအမျိုးသမီးသည် သူ့ဇနီးဖြစ်သည်ကို သိစေလိုရုံသာမက  ရှောင်းကျင်မော့ကိုလည်း ရှန်းချန်၏ ရယ်မောစရာအဖြစ်သို့ နှိမ့်ချလိုသည်။

မှန်ထဲ၌ စုရွေ့၏မြေခွေးလို အပြုံးကို ကြည့်ရင်း စု‌၀မ်က ချေပရန် စကားမဆိုတော့ချေ။

 သူမ ဤဆုံးဖြတ်ချက်ကို မင်္ဂလာဆောင်မည့် မနက်ခင်း၌ ဆုံးဖြတ်ခဲ့ခြင်းဖြစ်သည်။

မင်္ဂလာဆောင်သည့်နေ့မှာ သူမက ရှောင်းကျင်မော့ကို သေခြင်းတရားထက် ပိုဆိုးသည့်ဘ၀ခံစားချက်ကို အမှန်တကယ် မြည်းစမ်းကြည့်စေလိုသည်။

ထိုအချိန်တွင် ဟိုတယ်ဧည့်ခန်းတွင် ဧည့်သည်များစွာ တီးတိုးပြောနေကြသည်။ ဟိုတယ်တစ်ခုတည်း၊တစ်ချိန်တည်း၌ သတို့သမီးပင် အတူတူဖြစ်သည်။

တစ်ခုတည်းသော ကွာခြားချက်မှာ မင်္ဂလာခန်းမနှင့်သတို့သားဖြစ်သည်။

ဧည့်သည်များသည် ဖန်းမိသားစု၏ ဖိတ်စာကို ဟိုတယ်အ၀င်ဝတွင် လက်ခံရရှိသောအခါ မယုံကြည်နိုင်ဖြစ်ကြသော်လည်း အများစုသည် ဖန်းမိသားစု၏ မင်္ဂလာဆောင်ဖြစ်သည့် ဟိုတယ် ၅ လွှာသို့သွားရန် ရွေးချယ်ခဲ့ကြသည်။

မင်္ဂလာဆောင်အခမ်းအနား တရားဝင်စတင် ချိန် ကော်ဇောနီခင်းထားသည့်အပေါ်က ကြင်စဦးအတွဲ၏ ချိုမြိန်သည့်အပြုံးများကို မြင်ရသောအခါ အားလုံးက နှုတ်ဆိတ်နေကြသည်။ မရေမတွက်နိုင်သော ကင်မရာအလင်းတန်းများနှင့် ဓာတ်ပုံရိုက်ချက်များက  အဆက်မပြတ် ရောယှက်နေသည်။

ဤပွဲမှာ ယခုနှစ် ရှန်းချန်တွင် အခမ်းနားဆုံးနှင့် လူပြောအများဆုံး မင်္ဂလာပွဲဖြစ်လာပေမည်။

" ရှောင်၀မ် "

ရှောင်းကျင်မော့ မင်္ဂလာဆောင်ခန်းမထဲသို့ ဒယိမ်းဒယိုင်၀င်လာသောအခါ စု၀မ်နှင့်စုရွေ့ တို့က မင်္ဂလာလက်စွပ် လဲလှယ်နေကြသည်။

အခမ်းအနားတွင် လူနှစ်ယောက် အတူတကွမတ်တပ်ရပ်နေသည်ကိုမြင်သောအခါ ရှောင်းကျင်မော့၏မျက်လုံးများက နီရဲလာသည်။ သူ၏မျက်နှာ၌ မယုံကြည်နိုင်မှုများဖြစ်ပေါ်နေပြီး " ရှောင်၀မ် ဒီမှာ ဘာတွေဖြစ်နေတာလဲ၊ ဖန်းကျစ်မု မင်းကို ခြိမ်းခြောက်ထားတာလား "

ရှောင်းမိသားစု၏ မင်္ဂလာပွဲသည် အောက်ထပ်တွင်ရှိပြီး ဧည့်သည်အရေအတွက် လွန်စွာနည်းပါးလေသည်။ လွန်ခဲ့သည့်တစ်နာရီက ရှောင်းကျင်မော့သည် စု၀မ်ကို ဖုန်းဆက်သွယ်၍မရသော်လည်း စု၀မ်က စိတ်မပူရန်နှင့် စိတ်ရှည်စွာစောင့်ဆိုင်းရန် အကြောင်းကြားစာတစ်စောင်ပေးပို့လာသောကြောင့် ရှောင်းကျင်မော့က တစ်စုံတစ်ရာမှားယွင်းနေသည်ဟု မထင်ခဲ့ပေ။

မင်္ဂလာပွဲ တစထက်တစ နီးကပ်လာချိန်၌ မင်္ဂလာပွဲသို့လာ‌ရောက်သည့် ဧည့်သည်များထဲမှ တစ်ဦးသည် နောက်ဆုံးတွင် မနေနိုင်ကာ  ဖန်းမိသားစု၏ဖိတ်စာကို ရှောင်းကျင်မော့အား ပေးလိုက်သည်။

ရှောင်းကျင်မော့ ထိုဖိတ်စာကိုမြင်လိုက်သောအချိန် ခံစားရသည့် ပထမခံစားချက်မှာ မယုံကြည်နိုင်မှုဖြစ်ပြီး ဒုတိယအတွေးမှာ စု၀မ်သည် ဖန်းကျစ်မု၏ခြိမ်းခြောက်ခြင်း သို့မဟုတ် လှည့်စားခြင်းကို ခံရခြင်းပင်ဖြစ်သည်။

ထို့ကြောင့် သူက အသည်းအသန် ပြေးလွှားလာခဲ့သည်။

စုရွေ့ထံမှ အထူးဖိတ်ကြားခံရသော မီဒီယာများ၏ မျက်လုံးများသည် နောက်ဆုံးပေါ် တိုးတက်မှုများကို မြင်လိုက်ရပြီး ရှောင်းကျင်မော့ကို သီးသန့်အင်တာဗျူးရန် အလျင်စလိုလုပ်ဆောင်ကြသည်။

" ရှောင်းကျင်မော့ ကိုယ့်ကိုယ်ကိုယ် သိပ်ဖြောင့်မတ်မနေနဲ့ "

ရှောင်းကျင်မော့ပြောသည်ကို ကြားသည့်အခါ စုရွေ့က ပြောလာသည်။ သူက ရှေ့ကိုလှမ်းလာပြီး သူ့နောက်က စုဝမ်ကို ကာကွယ်လိုသော်လည်း  သူမက စုရွေ့ကို ညင်သာစွာ ဖြတ်ကျော်သွားသည်။ သူမ၏ မင်္ဂလာဝတ်စုံရှည်ကို ကိုင်ဆောင်ကာ ခြေလှမ်းတစ်လှမ်းချင်း လှမ်းလိုက်ပြီး ရှောင်းကျင်မော့ရှေ့၌ ရပ်လိုက်သည်။

 " ရှောင်းကျင်မော့ ကျွန်မ ဖန်းကျစ်မုကို လက်ထပ်ဖို့ ဆန္ဒရှိတယ်၊ ဘာလို့လဲဆိုတော့.... သူ့ကို ချစ်လို့ "

" မဟုတ်ဘူး၊ မဖြစ်နိုင်ဘူး "

ရှောင်းကျင်မော့သည် စု၀မ်ကို မယုံနိုင်စွာ ကြည့်လိုက်သည်။ သူက သူ့လက်ကို မြှောက်လိုက်ပြီး စု၀မ်လက်ကို ဖမ်းဆုပ်ချင်သော်လည်း စု၀မ်က အမြန်ရှောင်လိုက်ပြီး " ဘာလို့မဖြစ်နိုင်တာလဲ၊ သူက ကျွန်မအတွက် ကားတိုက်ခံပြီး အသက်ပေးနိုင်တယ်။ ကျွန်မအတွက် ရှင်ဘာလုပ်ပေးနိုင်လဲ၊ ကျွန်မအဖေကို ဒေဝါလီခံရဖို့ အတင်းအကြပ် ဖိအားပေးပြီး ဆေးရုံမှာ သေဆုံးလုနီးပါးဖြစ်စေတာလား ဒါမှမဟုတ် ကျွန်မနှလုံးသားထဲမှာရှင့်အကြောင်းတွေး‌နေမိချိန်မှာ ရှင်က တခြားမိန်းမကို နမ်းတာကိုလား။ ရှောင်းကျင်မော့ ကျွန်မ ရှင့်ကို မုန်းတယ် ၊ အဲဒါကို ရှင်သိလား "

စု၀မ်က ရှေ့သို့ တစ်လှမ်းပြီးတစ်လှမ်းတိုးလာပြီး ရှောင်းကျင်မော့၏မျက်လုံးများနှင့် နီးကပ်စွာ  " အဲဒီနှစ်တွေက ငယ်သေးလို့၊ မသိနားမလည်လို့ သဘောကျခဲ့တာ။ အခု တကယ်ကို နိုးထသွားခဲ့ပြီ။ ရှင်ဆိုတဲ့ ရှောင်းကျင်‌မော့မှာဘာတွေရှိလို့လဲ ၊ ရှောင်းမိသားစုမရှိရင် ရှင်ကဘာမှမဟုတ်ဘူး။ ရှင်က ကျွန်မလိုမိန်းမသားနဲ့တောင် မနှိုင်းယှဥ်နိုင်ဘူး။ ရှင်က ဖန်းကျစ်မုနဲ့ ဘယ်အရာမှ မယှဉ်နိုင်ဘူး။ ဒါကြောင့် ကျွန်မသူ့ကိုချစ်တယ်။ ကျွန်မ အစကတည်းက ရှင့်ကို မချစ်ခဲ့ဘူး "

စု၀မ်နှင့်စု‌ရွေ့၏မင်္ဂလာပွဲသည် အချိန်မီပြီးဆုံးသွားပြီး ရှောင်းကျင်မော့သည် ပွဲနေရာသို့  ရုန်းရင်းဆန်ခတ်ဖြစ်ရန်လာခဲ့သော်လည်း ရှောင်းသခင်ကြီး ရောဂါထ‌ဖောက်လာသောကြောင့် အလျင်အမြန် ထွက်ခွာသွားရသည်။

ထွက်သွားချိန်မှာတော့ သူ၏မျက်နှာတစ်ခုလုံး 

တွန့်လိမ်ရှုံ့တွနေလေသည်။

ရှောင်းကျင်မော့သည် အမြဲတမ်း မာနကြီးပြီး တစ်ကိုယ်ကောင်းဆန်ကြောင်း စု၀မ် သိသည်။ သူ၏ အထီးကျန်နေသောခန္ဓာကိုယ်နှင့်စိတ်ကို သက်သာစေရန်အတွက် အစားထိုးတစ်‌ယောက်ရှာဖွေရန် သူ့ကိုယ်သူ ခွင့်ပြုနိုင်သော်လည်း အခြားသူများက သူ့အား သနားဖွယ်ဖြစ်စေမည့်အရာများကို ပြုလုပ်ခွင့်မပြုပေ။

မင်္ဂလာသတင်းကို အဓိကမီဒီယာတိုင်းတွင် လျင်မြန်စွာ ဖော်ပြခဲ့ပြီး စု၀မ်နှင့်စုရွေ့၏ မင်္ဂလာပွဲသုံးရက်မြောက်နေ့တွင် ရှောင်းသခင်ကြီး ရောဂါထပ်ဖောက်ခဲ့ပြီးနောက် မကယ်တင်နိုင်ဘဲ ဆေးရုံ၌ သေဆုံးသွားသည်။

လက်ထဲရှိ ကျန်ရှိသည့်စု‌ဆောင်းငွေများနှင့်အတူ ရှောင်းကျင်မော့သည် ရှန်းချန်၏မြင်ကွင်းမှ ပျောက်ကွယ်သွားလေသည်။

သူသည် ငွေကိုယူပြီး မြို့သစ်တွင် တစ်ကျော့ပြန်နလန်ထပြီး စည်းစိမ်နှင့်ဂုဏ်အသရေကို ရယူပြီးနောက် ဖန်းကျစ်မု၊စု၀မ်တို့နှင့် စာရင်းရှင်းမည်ဖြစ်သည်။

ရှောင်းကျင်မော့ပျောက်ကွယ်သွားပြီးနောက် ဖန်းမိသားစုသည် ရှန်းချန်၏ ပြိုင်ဘက်ကင်းသောအရှင်သခင်ဖြစ်လာခဲ့သည်။ 

စုရွေ့က ဖန်းကျစ်၀မ့်အတွက် စေ့စပ်ပွဲတစ်ခုကို အမြန်စီစဉ်ပေးလိုက်သည်။ 

ဖန်းကျစ်၀မ့်၏နှလုံးသားသည် ရှောင်းကျင်မော့ကို မစွန့်လွှတ်နိုင်သော်လည်း စုရွေ့၏ ကြီးကြပ်မှုအောက်တွင် ဖန်းကျစ်၀မ့်မှာ ၎င်းကို တဖြည်းဖြည်း လိုက်နာရန် တွန်းအားပေးခံရသည်။

စု၀မ်က ဖန်းမိသားစု၏ လွတ်လပ်နေသောသခင်မရာထူးကို အေးချမ်းစွာ ခံယူနေပြီး နေ့စဥ်နေ့တိုင်း တစ်စုံတစ်ယောက်သည် ရှောင်းကျင်မော့နှင့်ပတ်သက်သည့် သတင်းကို သူမထံ အချိန်မီ သတင်းပို့လေသည်။

အိမ်နှင့်ဝေးကွာသည့်အရပ်၌ ရှောင်းကျင်မော့မှာ လုပ်ငန်းစတင်တည်ထောင်လိုက်သော်လည်း ကောင်းကောင်းမလည်ပတ်နိုင်‌ချေ။ ထို့အပြင် သူသည် ပြင်ပလူတစ်ယောက်ဖြစ်တာကြောင့် ပြည်တွင်းစီးပွားရေးလုပ်ငန်းများ၏ အမြင်မှာ ပို၍‌ပင် ဆိုးရွား နေသည်။

အတိတ်ကာလ၌ စီးပွားရေးလောကတွင်  အင်အားကြီးပြီး ‌ဩ‌ဇာညောင်းကာ ကောင်းကင်ဘုံ၏ အနှစ်သက်ဆုံးဖြစ်ခဲ့သော်လည်း  ယခုချိန်မှာတော့ အရည်အချင်းကောင်းရှိသော်လည်း ထိုက်တန်သောအခွင့်အရေးများကို အမိအရဆုပ်ကိုင်နိုင်ခြင်းမရှိချေ။

ရှောင်းကျင်မော့သည် ခက်ခက်ခဲခဲဖြင့်  ယွင်ချန်၌ လိုင်းတစ်ခုကို တည်ထောင်နိုင်သွားပြီး ခိုင်မာသောခြေကုပ်ကိုရယူနိုင်ကာ အရည်အချင်းများကိုပြသနိုင်မည်ဟု တွေးထားသော်လည်း အရာအားလုံးသည် ကောင်းစွာ ပြင်ဆင်ထားသည့် ထောင်ချောက်တစ်ခုဟု မည်သူထင်မည်နည်း။

ရှောင်းကျင်မော့ တစ်ပြားတစ်ချပ်မျှ မရှိသည်အထိ အလိမ်ခံလိုက်ရပြီး လမ်းမများပေါ်တွင် နေထိုင်သောအခါ လော့ချူးချူး၏ ကြင်နာမှုကို အမှတ်ရသွားမိသည်။

တကယ်တော့ လော့ချူးချူးသည် မိန်းကလေးကောင်းတစ်ယောက်ဖြစ်သည်။

ယခု သူမဘယ်ရောက်နေမှန်း သူ မသိချေ......

အချို့သောသူများသည် ယခုကဲ့သို့ဖြစ်ကြပြီး မည်သို့ တန်ဖိုးထားမြတ်နိုးရမည်နည်းကို မသိရှိကြ‌ပေ။ အချိန်တိုင်းဆုံးရှုံးသည်အထိ စောင့်ဆိုင်းကြပြီး ထိုအခါမှသာ အမှတ်တရများမှနောင်တရခြင်းများကို ခံနိုင်ရည်မရှိ ဖြစ်ကြလေသည်။

ကမ္ဘာပေါ်တွင် အရှားပါးဆုံးအရာမှာ မြဲမြံသည့် ရိုးသားမှုဖြစ်သည်။

စု၀မ်သည် ရှောင်းကျင်မော့၏ နောက်ဆုံးအခြေအနေကို လက်ခံရရှိပြီးနောက် ဌာနချုပ်နှင့် ဆက်သွယ်ရန် ကြိုးစားလိုက်ပြီး မစ်ရှင်ပြီးမြောက်ကြောင်း အပြုသဘော ပြန်လည်ဖြေကြားချက်ကို ရရှိသည်။

ထို့ကြောင့် ထွက်သွားရန် အချိန်တန်လေပြီ။

စု၀မ်က စုရွေ့ကို နှုတ်ဆက်ခြင်းမပြုပေ။ မစ်ရှင်ကမ္ဘာမှ နုတ်ထွက်ကြောင်း အတည်ပြုရန် ရုံးချုပ်ကို ဆက်သွယ်ပြီးနောက် စု၀မ်သည် ဖန်းမိသားစုမှ တစ်ယောက်တည်း တိတ်ဆိတ်စွာထွက်ခွာသွားလေသည်။

ညဘက်တွင် စုရွေ့ သူ့အိပ်ခန်းသို့ ပြန်ရောက်သောအခါ အခန်းလွတ်တစ်ခုနှင့် ရင်ဆိုင်လိုက်ရသည်။

သူတို့၏မင်္ဂလာဓာတ်ပုံကို ကုတင်ဘေး၌ ချိတ်ဆွဲထားဆဲဖြစ်ပြီး စုရွေ့က ဓာတ်ပုံကို တွေဝေနစ်မောစွာ စိုက်ကြည့်သည်။

သူတို့သည် အိမ်ထောင်ကျချိန်မှ ယခုအချိန်အထိ သီးခြားစီ နေထိုင်လာခဲ့ကြသည်။

သူသည် သူမကို သဘောကျပြီး သူမနှင့်အတူနေလိုသော်လည်း  အတင်းအကြပ်ပြုမည်မဟုတ်ပေ။

စုရွေ့သည် တစ်နေ့ စု၀မ်ကိုလက်ထပ်မည်ဖြစ်သည်။ ထိုလက်ထပ်မှုသည် အစစ်အမှန်လက်ထပ်မှုဖြစ်ကာ ပျောက်ဆုံးနေသောအချိန်နှင့်အာကာသ၌ အစစ်အမှန် သူမနှင့် ထာဝရလက်တွဲသွားမည့် စစ်မှန်သောအိမ်‌ ထောင်ရေးတစ်ခုဖြစ်လာလိမ့်မည် ။

ပျောက်ဆုံးနေသောအချိန်နှင့်အာကာသ၊ ကမ္ဘာ(ဇာတ်ကြာင်း)ဖျက်စီးသူများဌာနချုပ်၌..

စု၀မ် ကွပ်မျက်ခန်းမှ ထွက်လာပြီး သူမ၏ နေအိမ်သို့ ပြန်လာခဲ့သည်။ စုဆောင်းထားသောရမှတ်များကို စစ်ဆေးရန်အတွက် သူမ၏ ဆက်သွယ်ရေးစက်ကို အကျင့်အတိုင်း ဖွင့်လိုက်ကာ သနားစရာကောင်းသော မစ်ရှင်အမှတ်များကို တွေ့လိုက်ရသည်။ စု၀မ်သည် မျက်ခုံးကို တွန့်လိုက်ပြီး သူမ ပြီးဆုံးသွားသည့် မစ်ရှင်ဖိုင်ကို ဖွင့်ကြည့်လိုက်ရာ သူမအကြည့်များမှာ  ထိုအကြောင်းအရာများကို ရပ်တန့်နေသည်။

ရှောင်းကျင်မော့သည် ဆင်းဆင်းရဲရဲဖြင့် လမ်းမများပေါ်တွင် လှည့်လည်နေထိုင်ရင်း ထရပ်ကားဖြင့် ဝင်တိုက်ခံရပြီးနောက် ကိုမာဖြစ်သွားခဲ့သည်။ သူ မည်သူမည်ဝါဖြစ်သည်ကို မသိရှိကြ‌သောကြောင့် ဒေသခံများက  လူမှုဖူလုံရေး‌ဂေဟာသို့သာ ပို့ဆောင်ခဲ့ကြသည်။ ထိုအချိန်တွင် ဂေဟာ၌  အလုပ်လုပ်နေသောလော့ချူးချူးမှာ ရှောင်းကျင်မော့နှင့် ဤနည်းအားဖြင့် ပြန်လည်ဆုံတွေ့သွားခဲ့သည်။

လော့ချူးချူးသည် ရှန်းချန်မြို့မှ ထွက်ခွာပြီး ယွင်ချန်တွင် အဘယ်ကြောင့် ပေါ်လာသနည်း ။

စု၀မ် ဆက်လက်ဖတ်ရှုပြီး အရာအားလုံးသည် စုရွေ့၏လက်ချက်ဖြစ်ကြောင်း သိရှိလိုက်ရသည်။ လော့ချူးချူးကို မထိခိုက်စေရန် ကတိပေးခဲ့သော်လည်း လော့ချူးချူး၏မိသားစုကို အလွန်ဒုက္ခ‌ရောက်စေခဲ့သည်။ သူမ၏မိသားစုကို ပြုစုစောင့်ရှောက်ရန်နှင့် ကြီးမားသောကြွေးမြီများကို ဆပ်ရန်အတွက် လော့ချူးချူးသည်  သူမကိုယ်သူမ ရောင်းချရန် စုရွေ့နှင့် သဘောတူခဲ့သည်။ သူမ၏ အဓိကတာဝန်မှာ ဂေဟာရှိ တစ်သက်လုံး မနိုးထနိုင်တော့သော ရှောင်းကျင်မော့ကို ပြုစုစောင့်ရှောက်ရန်ဖြစ်ပေသည်။

ထို့ကြောင့် ဤမစ်ရှင်လောကတွင် ရှောင်းကျင်မော့သည် အမြောက်စာဇာ‌တ်ကောင်ဖြစ်လာသော်လည်း စုရွေ့သည် လော့ချူးချူးနှင့် ရှောင်းကျင်မော့တို့၏ဘဝကို အတူတကွ ချည်နှောင်ထားဆဲဖြစ်သည်။

‌ပျောက်ဆုံးနေသောအချိန်နှင့်အာကာသ၏ စည်းမျဉ်းများအရ သူမနှင့်စု‌ရွေ့တို့၏ တာဝန်များ အောင်မြင်ခဲ့ကြသည်။ တူညီသောကမ္ဘာမှ အမှတ်များကို နှစ်ပိုင်းခွဲခဲ့ကာ သဘာ၀ကျစွာဖြင့် သနားစရာကောင်းဖွယ် နည်းပါးလွန်းလှသည်။

စု၀မ်က သက်ပြင်းချလိုက်ပြီး တွေးလိုက်သည်။ ' ဘယ်လောက်တောင် ကံမကောင်းလိုက်သလဲ '။ သူမ မကျေမနပ်ဖြစ်ပြီး ခလုတ်အနည်းငယ်ကို နှိပ်လိုက်သည်။ စု၀မ်က အသစ်ပြန်လည်ပြင်ဆင်ထားသော မစ်ရှင်စာရင်းကိုမြင်လိုက်ရပြီး တုံ့ဆိုင်းမှုမရှိစွာ နောက်ထပ်မစ်ရှင်တစ်ခုကို စတင်လုပ်ဆောင်လိုက်လေသည်။

တစ်ချိန်တည်းမှာပင် ကမ္ဘာ(ဇာတ်ကြောင်း)ပြန်လည်ထိန်းသိမ်း သူများရုံးချုပ်၌...

စုရွေ့သည် ကွပ်မျက်ခန်းမှ ထွက်လာပြီး သူ့ခန္ဓာကိုယ်သည် အေးစက်စက်ကာ ချဉ်းကပ် ၍မရသော လေထုကို သယ်ဆောင်ထားသည်။ တူညီသောဌာနမှ လူများအားလုံးသည် သူ့လမ်းမှ  ရှောင်ဖယ်သွားကြသည်။

ဤသည်မှာ အသစ်၀င်လာသည့် S အဆင့်အန္တရာယ်ရှိသူဖြစ်သည်ကို မည်သူမသိသနည်း။

သူ့မစ်ရှင်၏ပစ်မှတ်အားလုံးမှာ ခြွင်းချက်မရှိ သနားစရာကောင်းသည့်ကံကြမ္မာကို ကြုံတွေ့ရသည်ဟု ပြောဆိုကြသည်။  ဦးခေါင်းမှ ခြေဖျားအထိ အဆုံးစွန်သော ဗီလိန်‌ဘော့စ်လေထုရှိသည့် ဤအန္တရာယ်ရှိသော လူသားသည် သူတို့ကဲ့သို့ သာမန်လူများနှင့် အလွန်ဝေးကွာနေသည်။

စုရွေ့သည် မစ်ရှင်ခန်းမသို့ လမ်းလျှောက်လာစဥ် လူတိုင်း၏ ငြင်းပယ်ခြင်း သို့မဟုတ် ကြောက်ရွံ့ခြင်းတို့ကို မခံစားခဲ့မိချေ။ သူသည် ခန်းမအနီးနားတွင် ချီယွဲ့ နှင့်ယွင်ရှန့်တို့ကို တွေ့လိုက်ရပြီး တစ်ခုခုကို ငြင်းခုံနေပုံရလေသည်..

" ချယ်ကော မင်းကို ထပ်ခါထပ်ခါသတိမပေးဘူးလား။ ဘာလို့ ခေါင်းမာနေရတာလဲ "

ယွင်ရှန့်၏ အသံတွင် ဒေါသများ ပါ၀င်နေသည်။ သူနှင့်ချီယွဲ့တို့သည် ရန်သူများဖြစ်သည်ဟု လူတိုင်းက ပြောကြသော်လည်း စုရွေ့၏မျက်လုံးထဲတွင် သူတို့နှစ်ယောက်လုံးသည် သူငယ်ချင်းကောင်းများဖြစ်ကြသည်။ အချင်းချင်း ပြိုင်ဆိုင်ကြသော သူငယ်ချင်များဖြစ်သော်လည်း တစ်ယောက်ကိုတစ်ယောက် ကျောပေးနိုင်ကာ ယုံကြည်နိုင်သည့် မိတ်ဆွေမျိုးဖြစ်သည်။

ထိုအချိန်တွင် ချီယွဲ့သည် ယွင်ရှန့်ပြောသည်ကို ကန့်ကွက်ဆဲဖြစ်သည်။ " ကျွန်တော် အမှတ်တွေအကုန်သုံးပြီး တည်နေရာခြေရာခံကိရိယာကို ဝယ်ပြီးသွားပြီ။ အခု လက်လျှော့လိုက်ရင် နှမြောစရာမဟုတ်ဘူးလား "

ထိုမချိန်၌ပင် ချီယွဲ့၏လက်ထဲမှ ခြေရာခံစက်သည် အနီရောင်အလင်းတန်းတစ်ခု ထွန်းတောက်လာသည်။

" ဒီမှာ၊ ဒီမှာ၊ သူမ နောက်ထပ်အလုပ်တစ်ခုကို ဒီလောက်မြန်မြန်ဝင်လိုက်ပြီလား "

ချီယွဲ့၏ အမူအရာမှာ အနည်းငယ် စိတ်လှုပ်ရှားနေသည်။ "စုဝမ်၊ စုဝမ်၊ ဒီတစ်ခါတော့ မင်းကို ငါမရှုံးစေရဘူး။ လုပ်... ဟေး......"

ချီယွဲ့မှာ စကားမဆုံးသေးဘဲ နေရာတွင် ရပ်တန့်သွားသည်။ သူသည်  သူ၏ အသစ်ဝယ်ထားသော တည်နေရာပြကိရိယာလေး ရုတ်တရက် လုယက်ခံရကိုကြည့်ရင်း မျက်လုံးများ ပြူးကျယ်သွားလေသည်။

ဤအခြေအနေက မည်သို့ဖြစ်သနည်း။

ချီယွဲ့က ဒေါသတကြီး မော့လိုက်ပြီး စုရွေ့၏ စူးရှသောအကြည့်နှင့် ထိပ်တိုက်တွေ့လိုက်သည်။

" ဒီဟာကို ငါလိုချင်တယ်။ နောက်မှ မင်းဆီကို အမှတ်တွေလွှဲပေးမယ် "

ထိုစကားလုံးများကို အေးစက်စွာ ချန်ထားခဲ့ကာ ယွင်ရှန့်နှင့်ချီယွဲ့တို့ ကြောင်အနေချိန်တွင်  စုရွေ့က လှည့်ထွက်သွားလေသည်။

ချီယွဲ့ : သူ ဘာကိုဆိုလိုတာလဲ။ ငါ တစ်ခုခုလွတ်သွားတာလား။

ယွင်ရှန့် : မင်း မလွတ်ပါဘူး၊ တုံးအနေရုံလေးပဲ။

ချီယွဲ့ : .....

ယွင်ရှန့် မင်း ရပ်လိုက်စမ်း။ ငါ မင်းကို မသတ်ဘူးလို့ ကတိပေးတယ်။

..........

အခန်းထဲသို့ အမြန်ပြန်လာရင်း စုရွေ့သည် သူဆက်သွယ်ရေးစက်မှတစ်ဆင့် စု၀မ်၏မစ်ရှင်ကမ္ဘာကို စတင်ရှာဖွေနေပြီဖြစ်သည်။

ချီယွဲ့ကြောင့်သာ မဟုတ်ပါက ရုံးချုပ်ကုန်တိုက်တွင် ထိုသို့သော တည်နေရာ ခြေရာခံစက်ကိရိယာကို ရယူရန် ရမှတ်များသုံးနိုင်သည်ကို သူ သိမည်မဟုတ်ချေ။

ဤတည်နေရာပြကိရိယာကို အခြားဌာနများမှ ဝန်ထမ်းများ၏ လက်ရှိနေရပ်ကို ခြေရာခံရန်သာ အသုံးပြုနိုင်သည်။ တစ်ကြိမ်သာလျှင် အသုံးပြုနိုင်သော်လည်း အလွန်အသုံးဝင်လေသည်။

" သုံးဖက်မြင်အွန်လိုင်းဂိမ်းလား "

စုရွေ့ မစ်ရှင်ကမ္ဘာကိုတွေ့သောအခါ ပထမဆုံးအကြိမ်အဖြစ် ပြင်းပြင်းထန်ထန် မျက်မှောင်ကြုတ်လိုက်မိသည်....။

အွန်လိုင်းဂိမ်းများကို မည်သို့ ကစားရမည်မှန်းသူ မသိချေ။

🚩

Arc -3 အစားထိုးခံချစ်သူ 

END 

MC နဲ့ ML နဲ့က ဆန့်ကျင်ဘက် အလုပ်တွေ တစ်ယောက်ကဖျက်ဆီး၊ တစ်ယောက်ကထိန်းသိမ်း ဟုတ်နေပြီ 🤣