MM Story Teller

Chapter 199

Viewers 32k

🌍Chapter 199

"အား ငါမင်းကို စားချင်တယ်...စားပစ်မယ်"

၄င်းက ဒေါသူပုန်ထနေသော ယုန်တစ်ကောင်၏ ပုံစံပင်။

ယုန်ကြီးကြောင့် နေရာတစ်ခုလုံးမှာ တုန်ခါသွားပြန်သည်။

ထန်မော့ ကြမ်းပြင်တွင်ထိုင်လျက် ယုန်နက်နှင့် နာရီပေါ်မှ ပစ္စည်း၄ခုကိုကြည့်နေခဲ့လေသည်။ သူသည် နာရီ၏ ဘယ်ဘက်အစွန်ဆုံးမှ ကြီးမားသော ပေါက်ဆီတစ်လုံးကိုတွေ့လိုက်ရသည်။ ထိုပေါက်ဆီမှာ လူတစ်ယောက်၏ခေါင်းတမျှရှိကာ နူးညံ့ပြီး အငွေ့ထောင်းထောင့်နှင့် စားချင်စဖွယ်ကောင်းလှသည်ပင်။

ထိုပေါက်ဆီ၏ဘေးတွင် အနီရောင်အရည်၊ တစ်၀က်စားထားသော ဘီစကစ်နှင့် ပန်းရောင်အမွှေးအိတ်လေးတစ်အိတ်ရှိလေသည်။

ယုန်နက်ကြီးက တချိန်လုံးခုန်ပေါက်နေပြီး ထန်မော့ကို စားပစ်မည်ဖြစ်ကြောင်းအော်ဟစ်နေခဲ့သည်။

ထန်မော့၄င်းကို လှည့်ကြည့်မနေခဲ့ပါချေ။ သို့သော် ထိုနေရာတစ်ခုလုံးမှာ လှုပ်ခါနေလွန်း၍ သူ ထရပ်ရန်ပင် အလွန်ခက်ခဲနေခဲ့သည်။

ထန်မော့သည်အေးစက်သောမျက်၀န်းများဖြင့် ယုန်ကြီးအားကြည့်လိုက်သည်။

"ပါးစပ်ပိတ်ထား"

ယုန်နက်ကြီးတန့်သွားပြီး ပါးစပ်အဟောင်းသားနှင့် ငြိမ်သက်သွားခဲ့သည်။

ခတ္တမျှကြာပြီးနောက် ယုန်နက်ကြီး သူ၏အောက်မှ လက်တံများကိုကြည့်လျက် မျက်လုံးများမှာလည်း ထိတ်လန့်မှုနှင့် ပြူးကျယ်လာခဲ့လေသည်။

၃၀စက္ကန့်သာကျန်တော့သည်။

စက္ကန့်လက်တံကရွေ့လျားနေဆဲ။ ထန်မော့မှာ ထိုပစ္စည်းလေးခုနှင့် ဘယ်ဘက်အစွန်ဆုံးမှ ပေါက်ဆီကိုလည်းတစ်ချက်ကြည့်လိုက်သည်။ ယခုလေးတင် ယုန်နက်ပြောခဲ့သည်က ဤသည်မှာ မြေအောက်ကမ္ဘာတွင် ရောင်းအကောင်းဆုံး အရသာအရှိဆုံး ခိုး၀င်သူအသားအစာသွပ်ပေါက်ဆီဟုပင်။ ပြောပြီးနောက်မှာလည်း ၄င်းမှာ ထိတ်လန့်ဟန်ဆောင်လျက် မတော်တဆပြောမိသွားဟန်မျိုး ပြုလုပ်နေခဲ့သည်။

သူ အမှန်တကယ်တော့ ဤပေါက်ဆီအကြောင်း မကြားဖူးသည်တော့မဟုတ်ချေ။

မြေအောက်ကမ္ဘာ၏ အကောင်းဆုံးဘုံဆိုင်မှာ ငှက်ပျောဘုံဆိုင်ဖြစ်ကာ အကောင်းဆုံးပေါင်မုန့်မှာလည်း ဤခိုး၀င်သူသားအစာသွပ်ပေါင်မုန့်ပင်ဖြစ်သည်။

ထူးဆန်းထွေလာဆပ်ကပ်ဂိမ်းကြောင့် ထန်မော့နှင့် ဖူ၀မ်သော်တို့ မြေအောက်ကမ္ဘာတွင် တစ်ပတ်ခန့်နေထိုင်ခဲ့ရသည်။ တီကောင်ကြီးကို ကာကွယ်ခြင်းနှင့် ကစားသမား၂၁ယောက်ကို ရင်ဆိုင်ရခြင်းမှအပ ထန်မော့သည် မြေအောက်ကမ္ဘာတွင် လျှောက်သွားနေခဲ့ခြင်းဖြစ်သည်။ ထိုအရသာရှိသော ခိုး၀င်သူသားပေါက်ဆီဆိုင်မှာလည်း အလွန်ထူးခြားသောဆိုင်တစ်ဆိုင်ဖြစ်ခဲ့သည်ပင်။

ဤပေါက်ဆီဆိုင်တွင် ခိုး၀င်သူသားကိုသာလျှင် အစာသွပ်ကာရောင်းသည်။

ဆိုင်တွင်လည်း ဆိုင်ဖွင့်ချိန်ဟူ၍အတိအကျမရှိချေ။ ခိုး၀င်သူကိုဖမ်းမိသောအခါမှသာ ဆိုင်ဖွင့်တတ်သည်။

ထန်မော့သည်လည်း မြေအောက်လူသားများမှာ အဘယ်ကြောင့် ခိုး၀င်သူသားကို ပီဇာနှင့် ပေါင်မုန့်တို့ မလုပ်ပဲ အဘယ်ကြောင့် ပေါက်ဆီပြုလုပ်ရသည်ကို နားမလည်ခဲ့ချေ။ အဖြေကိုလည်း မသိနိုင်ခဲ့ချေ။ ထို့နောက် သူ၏မျက်လုံးကိုမှိတ်လျက် အသက်ကို ပြင်းပြင်းရှူလိုက်လေသည်။

မွှေးပျံ့သောအသားရနံ့က သူ၏နှာခေါင်းထံတိုးဝှေ့ ကျီစယ်လာခဲ့သည်။ ၄င်းမှာ ၀က်သားလည်းမဟုတ် အမဲသားလည်းမဟုတ်သလို သိုးသားလည်းမဟုတ်ချေ။ ထို့အပြင်သွေးအနံ့တချို့လည်း ရောနှောပါ၀င်နေခဲ့သည်။ ထန်မော့သည် ထိုပေါက်ဆီ၏ဘေးမှ အနီရောင်အရည်ကို ကြည့်လိုက်ပြီး ပြုံးလိုက်မိလေသည်။ ၄င်းမှာ မည်သည်ဖြစ်သည်ကို သူခန့်မှန်းနိုင်သည်။

အမှန်တရားနာရီ၏တဖက်တွင် ယုန်နက်သည် ထန်မော့အား ဂရုတစိုက်အကဲခတ်ရင်း သူ၏စကားများကြောင့် အမှန်တရားကိုရှာတွေ့သွားမည်အား စိုးရိမ်နေဟန်ဖြင့် အဆက်မပြတ်ကျိန်ဆဲနေခဲ့သည်။ သို့သော် ၄င်း၏ မျက်လုံးများမှာတော့ လှုပ်ရှားနေခဲ့သည်ပင်။

အချိန်မှာ ပြည့်သွားခဲ့ချေပြီ။

အပြာရောင် နံရံ တဖြည်းဖြည်းကျလာပြီး ထန်မော့သည် တစ်ဖက်ခြမ်းမှ ယုန်နက်ကိုကြည့်လိုက်သည်။

ကြီးမားသော ရုရှားထပ်တစ်ရာရုပ်ကြီးမှာ ထန်မော့ကိုကြည့်လျက် သူ၏သွားများကို ဖြဲပြလာခဲ့သည်။

ထန်မော့ ၄င်းအား တည်ငြိမ်စွာသာကြည့်နေခဲ့သည်။ ထန်မော့မည်သည်ကိုတွေးနေသည်အား လုံး၀မခန့်မှန်းနိုင်ချေ။ အမှန်တရားနာရီမှ အဖြေကိုပေးရန် ဆိုလာပြီးနောက် ထန်မော့လည်း နှုတ်ခမ်းကိုဟလျက် စကားလုံးတချို့ကိုဆိုလိုက်သည်။ ယုန်နက်မှာ ထန်မော့ပြောနေသည်ကို မြင်လျှင် သူ့အား စိတ်လှုပ်ရှားစွာ စိုက်ကြည့်နေခဲ့လေသည်။ ထန်မော့ စကားလုံးအနည်းငယ်သာဆိုလိုက်ကြောင်းမြင်သော် ၄င်းက စိတ်အေးစွာ သက်ပြင်းချလျက် သူ၏အဖြေကိုလည်း ဆိုလိုက်တော့သည်။

နာရီနှင့် မိနစ်လက်တံတို့မှာ တစ်ချိန်ထဲတွင် လှုပ်ရှားနေခဲ့ကြသည်။

ကလစ်...

ထန်မော့၏ ခြေထောက်အောက်တွင် နာရီလက်တံမှာ ၃ကြိမ်ရွေ့သွားခဲ့လေသည်။ ယုန်နက်၏ခြေထောက်အောက်တွင်တော့ မိနစ်လက်တံမှာ ငြိမ်သက်နေပြီး တစ်ချက်မှ ရွေ့မသွားချေ။ ထန်မော့ ၂၃ကွက်သို့ပြန်ရောက်လာချိန်တွင် ယုန်နက်မှာ ၁ကွက်တွင်သာ ရပ်နေခဲ့လေသည်။

"သုညကစားသမားက အဆင့်၃ မီးခိုးရောင် အမှားအပြစ်ကို အသက်သွင်းမိလိုက်ပါပြီ"

ဒေါသကြီးသော ယုန်နက်မှာ တမဟုတ်ချင်း တိတ်ဆိတ်သွားလျက် ထန်မော့ကို လှည့်ကြည့်လာခဲ့သည်။ ယုန်နက်၏ အနီရောင်မျက်လုံးများမှာ အမှန်တရားနာရီကိုတစ်လှည့် ထန်မော့ကိုတစ်လှည့်ကြည့်နေခဲ့လေသည်။ ၃စက္ကန့်ကျော်လွန်သွားသည်အထိ ၄င်းမှာ အမှန်တရားနာရီ၏ နောက်ထပ်ကြေညာချက်ကို မကြားရသေးချေ။

ယုန်နက်နှင့် အမှန်တရားနာရီကိုကြည့်လျက် ထန်မော့၏ မျက်လုံးများမှာ တောက်ပသွားခဲ့သည်။

ချက်ချင်းဆိုသလိုပင် ယုန်နက်မှာ နံရံကို၀င်တိုက်လျက် အော်ဟစ်လာခဲ့သည်။

"မင်း အဆင့်ငါး စကြာ၀ဠာလုံးဆိုင်ရာမဟုတ်တဲ့ အမှန်တရားကိုရှာတွေ့သွားတာလား ဘယ်လိုလုပ်ပြီး အပြစ်ဒဏ်ကိုရှောင်နိုင်သွားတာလဲ"

ထန်မော့ပြုံးလိုက်လေသည်။

ယုန်နက်မှာ အော်ဟစ်နေဆဲပင်။

"မင်းကို ငါစားပစ်မယ် တကယ်စားပစ်မှာ... အဆင့်ငါး စကြာ၀ဠာလုံးဆိုင်ရာမဟုတ်တဲ့ အမှန်တရားကိုတောင် ရှာနိုင်တာဆိုတော့ မင်းက သိပ်အရသာရှိတဲ့ ခိုး၀င်သူပဲဖြစ်မှာ မင်းကိုစားချင်တယ်လို့ အား..."

အမှန်တရားနာရီ၏ အပြစ်ဒဏ်က အချိန်ကိုက်ရောက်ရှိလာခဲ့သည်။

အပြာရောင်မီးတောက်များက ယုန်နက်၏ ကိုယ်ထည်ကို ရုတ်ချည်း လောင်ကျွမ်းသွားတော့သည်။ ဤတစ်ကြိမ်မီးတောက်၏ အပူရှိန်မှာ ယခင်တစ်ခေါက်ကထက် ပိုပြင်းပုံပင်။ ယုန်နက်မှာ အော်ဟစ်နေပြီး မီးကြောင့် သူ၏တစ်ကိုယ်လုံး မည်းတူးသွားခဲ့သည်။ ထိုသို့လောင်ကျွမ်းခံနေရသည့်တိုင် ထန်မော့အား အာခေါင်ခြစ်လျက် ဟိန်းဟောက်နေဆဲဖြစ်သည်။

" စားပစ်မယ်"

"အမှန်တရားနာရီက မှားသွားတာနေမှာ မင်းကဘယ်လိုလုပ် အဆင့်ငါး စကြာ၀ဠာလုံးဆိုင်ရာမဟုတ့် အမှန်တရားကို ဘယ်လိုရှာတွေ့နိုင်မှာလဲ"

၃မိနစ်ကြာပြီးနောက် မီးတောက်များလည်း ငြိမ်းသွားပြီး ယုန်နက်ကြီး ကြမ်းပြင်ပေါ်သို့ လဲကျသွားခဲ့သည်။ သစ်သားကိုယ်ထည်က မီးကြောင့် မည်းချိတ်နေပြီး ၄င်းပေါ်မှ ဆွဲထားသော ယုန်ရုပ်ကိုပင်မမြင်ရတော့ချေ။

ယုန်နက် အသက်ကိုအတော်ကြာအမောတကောရှူနေပြီးမှ ရပ်တန့်လိုက်သည်။ ၄င်းက ကုန်းရုန်းထလျက် ထန်မော့ကို ကျိန်ဆဲလာပြန်သည်။ တချိန်လုံး အော်ဟစ်ဟိန်းဟောက်နေသည့် စိတ်ရှုပ်ဖွယ် ဆူညံသံက ထိုနေရာတစ်ခုလုံးပဲ့တင်ထပ်နေခဲ့လေသည်။

သို့သော် မည်မျှပင် ကျိန်ဆဲနေပါစေ ထန်မော့က တုန့်ပြန်မှုမရှိပဲ ခေါင်းငုံ့ကာတွေးတောနေခဲ့လေသည်။

ထန်မော့၏ လက်များက အိတ်ထဲတွင်ထိုးထည့်ထားပြီး ဘယ်လက်မှာ ရွှေဒင်္ဂါးကို ပွတ်သပ်လျက် ညာလက်မှာမူ ကြက်ဆင်ဥအား စည်းချက်ညီညီခေါက်နေခဲ့သည်။ ၃မိနစ်ကြာပြီးနောက် ထန်မော့မှာ စိတ်သက်သာရာရစွာ သက်ပြင်းချလိုက်ပြီး ယုန်နက်ကို လှည့်ကြည့်လိုက်လေသည်။

ယုန်နက်၏အော်ဟစ်နေသော အသံများ တမဟုတ်ချင်း တိတ်ကျသွားခဲ့သည်။

ထန်မော့ကဆိုလိုက်သည်။

" ပါးစပ်ပိတ်ထားလို့ ပြောနေတယ်လေ၊ ပိတ်မထားနိုင်ဘူးလား"

ယုန်နက် တုန်လှုပ်လျက် ထန်မော့ဆိုလိုသည်ကို နားမလည်ချေ။ ထို့နောက် ရှေ့အလှည့်တုန်းက ထန်မော့ သူ့အား ပါးစပ်ပိတ်ထားရန် ဟောက်ခဲ့သည်ကို သတိရကာ ထပ်၍ကျိန်ဆဲမလာတော့ချေ။ သို့သော် ခေတ္တအတွင်းမှာပင် ယုန်နက်၏ အမူအယာမှာ ပြောင်းလဲသွားခဲ့ပြီး ထပ်မံဟိန်းဟောက်လာပြန်သည်။ နေရာလွတ်ထဲတွင် ထိုဆူညံသံမှာ အတော်ကြာသည်အထိ ပဲ့တင်ထပ်နေခဲ့သည်။ ထန်မော့မျက်လုံးကိုမှိတ်လျက် မည်သည်ကိုမျှ မကြားသယောင် ပြုနေခဲ့တော့သည်။

ယုန်နက်၏ အော်သံမှာ ပိုကျယ်လောင်လာပြီး ပို၍လည်း ဆိုးရွားလာခဲ့သည်။

စက္ကန့်ပိုင်းအတွင်း ထန်မော့၏ မျက်လုံးတို့ပွင့်လာလျက် ထီးကလေးကို ဆွဲထုတ်လိုက်သည်။ ပန်းရောင်ထီးကလေးက လေထုကို ဖြတ်ချလျက် ၄င်း၏ ထိပ်ဖြားမှာမူ ယုန်နက်၏ခေါင်းကို ချိန်ထားခဲ့လေသည်။

ထန်မော့၏ အေးစက်သော မျက်၀န်းတို့တွင် သတ်ဖြတ်လိုသောဆန္ဒတို့တို့ ဖုံးကွယ်မထားခဲ့ချေ။ အကယ်၍ ဖူ၀မ်သော်သာ ဤနေရာတွင်ရှိနေခဲ့ပါက ထိုလှုပ်ရှားမှုကို ရင်းနှီးနေသလို ခံစားရလိမ့်မည်။ အဘယ်ကြောင့်မူ ထန်မော့မှာ ဤအကွက်ကို ဖူ၀မ်သော်ထံမှ သင်ယူလာခြင်းဖြစ်သောကြောင့်ပင်။

ဖူ၀မ်သော် လူသတ်သည့်အခါတိုင်း ကွဲပြားသောအရှိန်အ၀ါတစ်မျိုးကို ထုတ်လွှတ်နေတတ်သည်။

ကမ္ဘာကြီးအွန်လိုင်းပေါ်တက်လာပြီးနောက် ထန်မော့သည် ခိုး၀င်သူများအပါအ၀င် လူများစွာကိုသတ်ခဲ့ဖူးသည်။ သို့သော် သူ လူသတ်ရာတွင် ဖူ၀မ်သော်ကဲ့သို့ ပြတ်သားပြီး တိကျသော ဆန္ဒတို့မရှိချေ။

ကမ္ဘာပေါ်တွင် သတ်ဖြတ်လိုရိပ်၂မျိုးသာရှိသည်။ ၁ခုကဖူ၀မ်သော်၏ သတ်ဖြတ်လိုရိပ်နှင့် ကျန်တစ်ခုမှာ ဖူ၀မ်သော်လို သတ်ဖြတ်လိုရိပ်မရှိခြင်းသာ။ (ရှင်းသွားတာပဲ)

ထိုဆိုးရွားသော ခံစားချက်က ယုန်နက်၏ပါးစပ်အား ချက်ချင်းပိတ်သွားစေခဲ့သည်။

ထန်မော့၏ မျက်လုံးများမှာ အလွန်အေးစက်နေခဲ့သည်။ ယုန်နက်သည် နေရာတွင် ရပ်တန့်လျက် ပါးစပ်ဟကာ ဘာကိုမျှဆိုမလာတော့။ ထန်မော့၏ နှုတ်ခမ်းတို့တဖြည်းဖြည်း ကွေးညွတ်လာလျက် ရေရွတ်လိုက်သည်။

"ဒီလိုကိုး..."

ထို့နောက် ယုန်နက်အားလျစ်လျူရှုလိုက်ကာ ထီးကလေးကို သိမ်းလိုက်ပြီး ကြမ်းပြင်ကိုသာ စိုက်ကြည့်နေလိုက်လေသည်။

၄င်းမှာ အချိန်အကြာကြီးဟုထင်ရသော်လည်း ၃စက္ကန့်မျှသာ ကုန်လွန်သွားခြင်းဖြစ်သည်။

ယုန်နက်၏မျက်လုံးများမှာ တုန်လှုပ်သွားလျက် ပြန်လည်သတိ၀င်လာခဲ့လေသည်။

"ငါတော့ ဒီကောင့်ကိုစားမှရမယ်"

ထန်မော့ ကြမ်းပြင်ပေါ်တွင် ထိုင်ချကာ မျက်လုံးကို မှိတ်ထားလိုက်လေသည်။

၇ကြိမ်မြောက်တွင် အမှန်တရားနာရီပေါ်၌ ပစ္စည်း၁၂ခုပေါ်လာခဲ့လေသည်။ ထန်မော့က နဂိုအကွက်တွင်သာ ရပ်နေခဲ့ကာ ယုန်နက်ကမူ ၂ကွက်တိုးသွားခဲ့သည်။

၈ကြိမ်မြောက်တွင် ပစ္စည်း၂၈ခုပေါ်လာခဲ့သည်။ ထန်မော့က ၃ကွက်တိုးကာ ယုန်နက်မှာတော့ ၁ကွက်သာတိုးခဲ့လေသည်။

ပစ္စည်း၂၈ခုကိုထုတ်ပယ်ရသည်က ထန်မော့နှင့် ယုန်နက်တို့အတွက် အားအင်ကုန်ဆုံးစေကာ ၂ဦးစလုံး အပြစ်ဒဏ်ကိုယ်စီကို လက်ခံခဲ့ရသည်။ ဤသည်မှာ ပစ္စည်း၄၈ခုကို ထုတ်ပယ်ရသော အလှည့်ကလောက် မဆိုးသေးသော်လည်း ထန်မော့ အသက်ပြင်းစွာရှူလျက် နားထင်တို့ကို ပွတ်သပ်နေရဆဲဖြစ်သည်။

ယုန်နက်၏ အခြေအနေမှာလည်း ပိုကောင်းမနေခဲ့ချေ။ ၄င်းသည်ကားဆူညံရန် အားအင်လည်း မကျန်တော့ချေ။

အမှန်တရားနာရီပေါ်တွင် ရှားပါးသော တိတ်ဆိတ်မှုတစ်ခုသာ လွှမ်းခြုံထားခဲ့လေသည်။

ထန်မော့က အကွက်၂၀တွင်ရပ်နေပြီး ယုန်နက်မှာ ၅၈ကွက်တွင် ရပ်နေခဲ့သည်။ ၄င်းမှာ ၂၂ကွက်ဝေးကွာသည်ပင်။ အပြာရောင်နာရီကြီးက တောက်ပနေဆဲဖြစ်ပြီး ကစားသမား၂ဦးအတွက် တိတ်တဆိတ်အနားယူရန် အခွင့်အရေးရှိနေဆဲပင်။

သို့သော် အနားယူချိန်မှာ လျင်မြန်စွာ ကုန်ဆုံးသွားပြီး အမှန်တရားနာရီ၏ စက်ရုပ်ဆန်သော ကြေညာသံက တဖန်ထွက်ပေါ်လာခဲ့ပြန်သည်။

"အချိန် ၁နာရီ ၃၀မိနစ် တည်နေရာ အမှန်တရားနာရီ

အမှန်တရားကြွယ်၀သော ပစ္စည်း၂ခုပေါ်ထွက်လာပါပြီ"

ထန်မော့၏ မျက်လုံးတို့ရုတ်ချည်းပြူးကျယ်သွားခဲ့သည်။ ယုန်နက်သည်လည်း အံ့အားသင့်လျက် အမှန်တရားနာရီအား မယုံနိုင်စွာကြည့်လာခဲ့သည်။ ထို့နောက် ပစ္စည်း၂ခုပေါ်လာသည်နှင့် ယုန်နက်မှာ အရင်ဆုံး တန့်သွားပြီးမှ စိတ်အေးစွာ သက်ပြင်းချလိုက်ပြီး ထန်မော့ကို အကဲခတ်လာခဲ့သည်။

ထန်မော့က ၄င်း၏အကြည့်ကို သတိမထားမိပဲ နာရီပေါ်မှ ပစ္စည်း၂ခုကိုသာ ကြည့်နေခဲ့ခြင်းဖြစ်သည်။

၄င်းမှာ အနက်ရောင်ချောကလက်လိုအရာနှင့် အနက်ရောင်ဇီးကွက်တစ်ကောင်ဖြစ်လေသည်။

ပထမအကြည့်တစ်ချက်နှင့်ပင် ဤ၂ခုကြားတူညီသည့်အရာဟူ၍မရှိပေ။ သို့သော် ဤ၂ခုကသာ အမှန်တရားနာရီပေါ်တွင်ပေါ်ထွက်လာခဲ့ရာ ထို၂ခုကြားမှ တူညီသော အမှန်တရားကို ရှာရပေတော့မည်။

ရှည်လျားသော စက္ကန့်လက်တံ တဖန်လှုပ်ရှားလာခဲ့လေသည်။

ထန်မော့ ကြမ်းပြင်တွင် တင်ပလ္လင်ခွေကာထိုင်နေရင်း ထိုချောကလက်နှင့် ဇီးကွက်ကို ကြည့်နေခဲ့သည်။ စက္ကန့်လက်တံ သတ်မှတ်ချိန်သို့ရောက်ခါနီးတွင် သူသည်တဖက်မှ ယုန်နက်ကို ရုတ်ချည်းကြည့်ကာဆိုလိုက်သည်။

"ငါကချောကလက်မကြိုက်ဘူး ရွေးရမယ်ဆိုရင်တော့... ဒပ်ဗ်က ဖာရီရိုထက်တော့ ပိုကောင်းသလိုပါပဲ...မင်းရောဘယ်လိုထင်လဲ"

သူပြောပြီးသည်နှင့် အပြာရောင်နံရံက သူတို့၂ဦးကြား ခြားသွားတော့သည်။

ဖောက်ထွင်းမြင်ရသော အပြာရောင်နံရံကို ဖြတ်လျက် ယုန်နက်က ထန်မော့အားစိုက်ကြည့်နေခဲ့သည်။

နံရံမြင့်တက်သွားသည်နှင့် ယုန်နက်မှာ သာမာန်မျက်စိနှင့် မမြင်နိုင်လောက်အောင် သေသပ်စွာ လှုပ်ခါသွားခဲ့သည်။ ၄င်းက ထန်မော့နှင့် အမှန်တရားနာရီကြားကို ကြည့်နေခြင်းပင်။

ထန်မော့ ခေါင်းကိုငုံ့လျက် အမှန်တရားနာရီ၏ အဖြေကို စောင့်နေခဲ့လေသည်။

သူတို့၂ဦးစလုံး မည်သူကမျှစကားမဆိုကြချေ။

တိတ်ဆိတ်နေသော အမှောင်ထုထဲတွင် အမှန်တရားနာရီ၏ ခံစားချက်မဲ့သော အသံထွက်ပေါ်လာခဲ့လေသည်။

"သုညကစားသမား ၂ကွက်နောက်ဆုတ်ပြီး ကစားသမား ၆ ၄ကွက်တိုးသွားပါပြီ"

***

စာရေးသူမှာ ပြောစရာရှိတယ်:

ထန်ထန်: ကမ္ဘာပေါ်မှာ လူသတ်ချင်စိတ်၂မျိုးရှိတယ်၊ တစ်မျိုးက ဖူ၀မ်သော်ရဲ့ဟာ နောက်တစ်မျိုးက ဖူ၀မ်သော်လိုမဟုတ်တဲ့ ဟာ။

လူအိုကြီးဖူ: ကိုယ်စိတ်လှုပ်ရှားသွားမိပြီ ငါ့ရဲ့ထန်ထန်လေးက ငါလူသတ်ချင်စိတ်ဖြစ်တိုင်း အရမ်းချောတယ်လို့မြင်နေတာပဲ

ထန်ထန်: ...ခင်များကမချောပါဘူး၊ ကြောက်ဖို့ကောင်းတာပါနော်

🌍

Prev Next