MM Story Teller

Chapter 201

Viewers 32k

🌍Chapter 201

ဆယ်ကြိမ်မြောက် အမှန်တရားထုတ်ပယ်သည့်ဂိမ်း စတင်ခဲ့ချေပြီ။

ပစ္စည်း၂၄မျိုးမှာ အမှန်တရားနာရီ၏ အလယ်တွင်ရှိနေခဲ့သည်။ ၁မိနစ်ကြာပြီးနောက် သူ ၁၂မျိုး၏ အမှန်တရားကိုပြောပြီး ၂မျိုးကို လက်လျှော့ခဲ့သည်။ ထိုပစ္စည်း၁၂မျိုးထံတွင် အပြာရောင်အလင်းတစ်ခုတောက်ပလာခဲ့သည်။ ထန်မော့တန့်သွားလျက် ခေါင်းကိုမော့၍ တည်ငြိမ်စွာဆိုလိုက်သည်။

"၁၅ခုနဲ့ ၁၆ခုမြောက် ပစ္စည်းတွေက ကစားသမားထန်မော့နဲ့ ယုန်နက်...သူတို့၂ခုကြားက အမှန်တရားက သူတို့၂ယောက်လုံးက လူသားကစားသမားတွေဆိုတာပဲ"

အမှန်တရားနာရီပေါ်တွင် အပြာရောင် အလင်းက စူးရှစွာတောက်ပလာခဲ့လေသည်။

စက္ကန့်ပိုင်းအတွင်း အမှန်တရားနာရီ၏စက်ရုပ်ကဲ့သို့ ကြေညာသံထွက်ပေါ်လာခဲ့သည်။

"ကစားသမားထန်မော့သည် ကစားသမားများအကြားမှ အမှန်တရားကိုထုတ်ဖော်လိုက်ပါပြီ အကွက်တိုးသွားခြင်းရှိမှာမဟုတ်တော့ပါဘူး"

ထန်မော့၏ နှလုံးတချက်ဆောင့်ခုန်သွားပြီးနောက် သက်ပြင်းချကာ ပြုံးလိုက်မိလေသည်။

အပြာရောင်နံရံကတဖြည်းဖြည်းမြင့်တက်သွားပြီးနောက် တစ်ဖက်ခြမ်းက ယုန်နက်၏ ဆိုးရွားနေသော အမူအရာကိုဖော်ပြလာခဲ့သည်။

၄င်းမှာ ထန်မော့မှ အမှန်တရားနာရီကို ပြောလိုက်သည်အား မကြားနိုင်သော်လည်း ခန့်မှန်းနိုင်သေးသည်။ ယုန်နက်၏ အနီရောင်မျက်၀န်းများက ထန်မော့အား မုန်းတီးစွာစိုက်ကြည့်လာခဲ့ပြီး ထိုထဲတွင် မျှော်လင့်ချက်နှင့် အသနားခံမှုတို့လည်း ပါ၀င်နေလေသည်။

ထန်မော့ ထိုယုန်နက်ကို တစ်ချက်သာကြည့်လျက် တင်ပလ္လင်ခွေထိုင်ကာ ပြန်နားနေခဲ့လေသည်။

နာရီနှင့်မိနစ်လက်တံတို့ရွေ့လျားသွားစဥ် သူ ယုန်နက်ပြောခဲ့သည်ကို ပြန်စဥ်းစားလျက် ခေါင်းညိတ်လိုက်သည်။

၄င်းမှာ ယုန်နက်ပြောခဲ့သလိုပါပင်။ ဂိမ်းကိုမည်သူအနိုင်ရမည်လဲက မသေချာသေးချေ။

ထန်မော့အတွက် ဤဂိမ်းကိုအနိုင်ယူရန် နည်း၃နည်းရှိသည်။ ပစ္စည်းအားလုံး ထုတ်ပယ်ခြင်း သို့မဟုတ် ယုန်နက်ကို အမိဖမ်းခြင်း သို့တည်းမဟုတ် ထိုယုန်နက်မှာ အပြစ်ဒဏ်ပေးခံနေရစဥ်အတွင်း သေဆုံးသွားခြင်းတို့ပင်။ ယုန်နက်အတွက် အနိုင်ယူနည်းကို သေချာမသိသော်လည်း ထန်မော့ကိုမိလျှင်တော့ ၄င်းအနိုင်ရမည်မှာသေချာလေသည်။ သို့မဟုတ်ပါက ထန်မော့ကို အမိဖမ်းပြီးစားပစ်မည်ဟု တချိန်လုံး ကြုံး၀ါးနေလိမ့်မည်မဟုတ်ချေ။

ထန်မော့က ယုန်နက်နှင့် သူကိုယ်တိုင်ကြားမှ အမှန်တရားကို သိရှိသွားပြီးဖြစ်သော်လည်း ပစ္စည်းများကို ထုတ်ပယ်ရာတွင် မအောင်မြင်သေးသ၍ ယုန်နက်တွင် အခွင့်အရေးရှိနေဆဲပင်။ ၂~၅၈ ခုအထိရှိသော အပစ္စည်းများက အမှန်တရားနာရီပေါ်တွင် ပေါ်လာလိမ့်မည်။ သူ ၄င်းတို့အားလုံးကို ထုတ်ပယ်နိုင်ရန်မသေချာပေ။ သူသာအနိုင်ရရှိခဲ့ပါက ၄င်းမှာ ယုန်နက်ကိုဖမ်းမိ၍ဖြစ်ကြောင်း ၉၀ရာခိုင်နှုန်းသေချာလေသည်။

ထို့ကြောင့် ဤဂိမ်းမှာ လုံး၀တရားမျှတသွားပြီဖြစ်သည်။ ထန်မော့ ၂ကွက်နောက်ကျနေတော့မည်မဟုတ်ပဲသူတို့၏ စမှတ်မှာ အတူတူပဲဖြစ်လိမ့်မည်။ ပစ္စည်းများများထုတ်ပါယ်နိုင်ပြီး အကွက်တိုးနိုင်သူက နိုင် လိမ့်မည်။

"သုညကစားသမားက တစ်ကွက်ဆုတ်ရမှာဖြစ်ပြီး ကစားသမား၆ကတော့ တစ်ကွက်တိုးသွားပါပြီ...သုညကစားသမားနဲ့ ကစားသမား၆ဟာ အဆင့်သုံး မီးခိုးရောင် အမှားအပြစ်ကို အသက်သွင်းမိလိုက်ပါပြီ"

ယုန်နက်နှင့် ထန်မော့မှာ တည်ငြိမ်စွာ ရှေ့သို့တိုးလာခဲ့ကြသည်။ ထန်မော့မှာ ၂၃ကွက်တွင်ရပ်နေပြီး ယုန်နက်က ၁ကွက်တွင်ရပ်နေကာ ၂ဦးကြား ၂၂ကွက်ခြားနေခဲ့သည်။ သူတို့သက်ဆိုင်ရာအကွက်တွင်ရပ်လိုက်စဥ်မှာပင် ပြင်းထန်သောမုန်တိုင်းကြီးတစ်ခုက သူတို့ခေါင်းပေါ်တွင် ပေါ်လာခဲ့လေသည်။ ရှိုးဒင်းဂါးသေတ္တာ၏ အဆင့်၃အပြစ်ဒဏ်ကို လက်ခံရပြီးနောက် သူတို့၂ယောက်လုံးမောပန်းနေခဲ့ကြလေသည်။

အနားယူချိန်တွင် ယုန်နက်င ထန်မော့အား ရှုပ်ထွေးစွာ ကြည့်လာခဲ့သည်။ ထန်မော့မှာ ၄င်းက တစ်ခုခုပြောလာမည်ဟု ထင်ထားသော်လည်း သူကထန်မော့ကို သည်အတ်ိုင်းသာ စိုက်ကြည့်နေခဲ့ပြီး ဘာမျှမဆိုခဲ့ချေ။

ပစ္စည်း၁၆မျိုးနှင့် နောက်တစ်ချီက လျင်မြန်စွာစတင်လာခဲ့သည်။ ထန်မော့ ၂ကွက်တိုးသွားလျက် ယုန်နက်က ၁ကွက်တိုးလာခဲ့လေသည်။

နောက်တစ်လှည့်တွက်မူ ပစ္စည်း၂၄မျိုးပေါ်လာခဲ့သည်။ ထန်မော့ ၄ကွက်တိုးလျက် ယုန်နက်မှာ ၂ကွက်တိုးခဲ့သည်။

ယုန်နက်၏ လုပ်နိုင်စွမ်းက ထန်မော့ကို အံအားသင့်စေခဲ့သည်။ သူထင်ထားသည်မှာ တဖက်လူက သိပ်မသန်မာဘဲ ပစ္စည်းအရေအတွက်နည်းသောအခါတွင်မှ အဆင်ပြေသည်ဟုပင်။ သူကထိုယုန်နက် ပစ္စည်းများစွာ ထုတ်ပယ်နိုင်မည်ဟု ထင်မထားခဲ့ချေ။ သို့နှင့် ထန်မော့မှာ ယုန်နက်ကို မိရန်နှေးကွေးနေခဲ့သေည်။

ထန်မော့တွေးလိုက်မိသည်။

ကြည့်ရတာ သေရေးရှင်ရေးအခြေအနေကြောင့် စွမ်းရည်တွေ နိုးထလာပုံပဲ...

ယုန်နက်က ထန်မော့အား ဂရုစိုက်မနေတော့ချေ။ သူ့ကိုစကားလည်းမပြောတော့ပဲ လျစ်လျူရှူထားခဲ့သည်။ ပစ္စည်းအသစ်ပေါ်လာတိုင်း အာရုံစိုက်ကာ ထိုပစ္စည်းများကြားမှ အမှန်တရားကို ထုတ်ပယ်ရန်သာ ကြိုးစားနေခဲ့သည်။ သို့တိုင်အောင် ထန်မော့နှင့် သူ့ကြားမှ အကွာအဝေးမှာ တဖြည်းဖြည်းနည်းလာခဲ့သည်။ ထန်မော့ထက် ၂ကွက်အသာစီးရမှုမရှိတော့သောအခါတွင် ယုန်နက်သည် ထန်မော့ထက်အကွက်တိုးရသည်က အလွန်နည်းလာခဲ့သည်။

၂၃ကြိမ်မြောက်ထုတ်ပယ်မှုပြီးဆုံးသွားသည်နှင့် သူတို့၂ဦးကြားတွင် ၆ကွက်သာလျှင် ခြားတော့လေသည်။ ယုန်နက်က ရှေ့မှဖြစ်ပြီး ထန်မော့က ၄င်း၏ နောက်တွင်ဖြစ်သည်။ ထန်မော့က ယုန်နက်ကို ဖမ်းမိရန် ၆ကွက်သာလိုပြီး ယုန်နက်မှာလည်း အမှန်တရား၏ ထာ၀ရတွင်းနက်ကြီးထဲ ပြုတ်ကျသွားပေလိမ့်မည်။

သူတို့ကြားမှာ အကွာအဝေးမှာ တိုတောင်းလာသည်နှင့်အမျှ ယုန်နက်၏ မျက်လုံးထဲမှ မျှော်လင့်ချက်ရောင်ခြည်တို့မှေးမှိန်လာခဲ့လေသည်။ ကြမ်းပြင်ကိုသာစိုက်ကြည့်နေခဲ့ပြီး ၄င်း၏ အတွေးများကို မခန့်မှန်းနိုင်ချေ။ အမှန်တရားနာရီ၏ ကြေညာသံထွက်ပေါ်လာသော်လည်း ယုန်နက်မှာ ၄င်းကိုနားထောင်ချင်စိတ်မရှိတော့ချေ။ ၄င်းက သူ၏အမှားအပြစ်ဏ်ရောက်ရှိလာမည်ကို တိတ်ဆိတ်စွာ စောင့်ဆိုင်းနေခဲ့လေသည်။

"သုညကစားသမားဟာ အဆင့်၃မီးခိုးရောင်အပြစ်ဒဏ်ကို အသက်သွင်းမိလိုက်ပါပြီ... ကစားသမား၆ကတော့ အဆင့်၁ မူလအမှားအပြစ်ကို အသက်သွင်းမိလိုက်ပါပြီ"

ယုန်နက်၏ခေါင်း ချက်ချင်းမော့လာပြီး ထန်မော့အား မယုံနိုင်စွာ ကြည့်လာခဲ့လေသည်။

ထန်မော့ သူ၏ခြေထောက်အောက်မှ အမှန်တရားနာရီအား ထိတ်လန့်စွာကြည့်လိုက်မိသည်။ ရှိုးဒင်းဂါးသေတ္တာမှာ ပွင့်လာတော့မည်ဖြစ်ကာ သူတို့၂ဦးတွင် ပြင်ဆင်ချိန် စက္ကန့်ပိုင်းမျှသာရှိတော့သည်။ ယုန်နက်၏ ရုပ်ဆိုးဆိုးမျက်နှာပေါ်တွင် ဆိုးရွားသော အပြုံးကြီးတစ်ခုပေါ်လာခဲ့သည်။ ၄င်းမှာ ရူးသွပ်စွာ မြည်တမ်းလာခဲ့လေသည်။

"ဟုတ်တယ်...ငါမရှုံးသေးဘူး... မင်းသေရင် ငါနိုင်မှာပဲ ငါနိုင်မှာ..."

သူ့စကားဆုံးဆုံးချင်း၌ပင် ရှိုးဒင်းဂါး၏သေတ္တာပွင့်လာခဲ့လေသည်။

ထန်မော့၏ ရှေ့တွင် မှောင်မည်းလျက်။ သူ၏မျက်လုံးများကိုပြန်ဖွင့်လိုက်ချိန်တွင် ထန်မော့မှာ မှော်၀င်မြက်ခင်းပြင်ကြီးထံ ပြန်လည်ရောက်ရှိနေခဲ့လေသည်။ လေအေးများမှာ ထက်ရှသော ဓါးများနှယ် သူ၏မျက်နှာပြင်ကို ဖြတ်ပြေးသွားပြီး ထန်မော့ခေါင်းကိုမော့ကြည့်လိုက်သည်နှင့် ရင်ထဲမှတင်းကြပ်သွားရတော့သည်။ သူသည် အေးစက်ပြီးမှောင်မည်းနေသော မြက်ခင်းပြင်ကျယ်ကြီးထဲတွင် ပိုးကောင်များ ရာနှင့်ချီ၍ ၀န်းရံခြင်းကို ခံထားရလေသည်။

စက္ကန့်ပိုင်းအတွင်း၌ပင် ၄င်းတို့က ထန်မော့ဆီသို့ ပြေး၀င်လာကြတော့သည်။

အမှန်တရားနာရီပေါ်တွင် ယုန်နက်သည် မီးတောက်များကြား ခုန်ပေါက်နေပြီး ထန်မော့ကို အသည်းအသန်စိုက်ကြည့်နေခဲ့လေသည်။ သူ၏မြင်ကွင်းထဲတွင် ထန်မော့သည် မမြင်ရသောလှောင်ချိုင့်ထဲတွင် အဆက်မပြတ် ရှောင်ရှားကာ တိုက်ခိုက်နေခဲ့လေသည်။ ထန်မော့မှာ ရန်သူတချို့ကို ရင်ဆိုင်နေရပုံဖြင့် သူ၏အမူအရာမှာ မကောင်းမွန်လှချေ။ သူသည်ထီးကလေးကိုသုံးလျက် တိုက်ခိုက်ရင်း ခုခံနေခဲ့သည်။

ရုတ်ချည်း ထန်မော့၏ ပုခုံးပေါ်တွင် နက်ရှိုင်းသော ခုတ်ရာကြီးတစ်ခုပေါ်လာပြီး သွေးများစီးကျလာခဲ့လေသည်

ယုန်နက်၏မျက်လုံးများမှာတောက်ပလျက် အရူးအမူးအော်ဟစ်နေခဲ့သည်။

"သေ သေသွားလိုက်စမ်း...သေလိုက်တော့"

ထန်မော့ကိုယ်ပေါ်ရှိ ဒဏ်ရာများမှာ ပိုများလာပြီး သူ၏အလျင်မှာလည်း တဖြည်းဖြည်းလျော့ကျလာခဲ့သည်။ ရာနှင့်ချီသော ပိုးကောင်များက သူ့အားထောင့်ကိုတွန်းပို့လျက် အဆိပ်ရည်များထွေးထုတ်နေခဲ့ကြသည်။ ထန်မော့ သတိလက်လွတ်နာကျင်စွာညည်းညူလိုက်မိသည်။ သူသည် ထီးကလေးကို သုံးလျက် အဆိပ်များကို ကာဆီးရန်ကြိုးစားနေခဲ့သော်လည်း အဆိပ်ရည်များမှာနေရာပေါင်းစုံမှ ပန်းထုတ်နေခဲ့သည်ဖြစ်၍ ကာဆီးရန်မဖြစ်နိုင်ခဲ့ချေ။

ယုန်နက်သည် ထန်မော့၏ ကိုယ်ပေါ်မှ အသားများ မျက်စိဖြင့်မြင်နိုင်သောအလျင်ဖြင့် ရှုံ့တွလာသည်ကို မြင်နေရလေသည်။ အသားများမှာ ပုပ်ပွပျော်ကျလျက် အဖြူရောင်အရိုးများကို ဖော်ပြလာခဲ့သည်။ ထန်မော့၏ ညာလက်မှာ အရိုးသာကျန်တော့သည်ကိုကြည့်လျက် သူ၏ ရင်မှာတဒိုင်းဒိုင်းခုန်လာခဲ့တော့သည်။

"မင်းသေတော့မှာ"

မမြင်ရသောအဆိပ်ရည်မှာ ထန်မော့၏ ရင်ဘတ်ကို ထိမှန်ခါနီးဆဲဆဲတွင် ရုတ်ချည်းရပ်တန့်သွားခဲ့လေသည်။

ထန်မော့ လဲကျသွားပြီး သူ၏ ညာဘက်ပုခုံးမှ လောင်ကျွမ်းသော နာကျင်မှုကိုခံစားနေရလေသည်။ သူကြည့်နေစရာပင်မလိုပဲ သူ၏ညာလက်တစ်ခုလုံးလောင်ကျွမ်းသွားသည်ကို သိနေခဲ့လေသည်။

ထန်မော့သည် တီကောင်မျက်ရည်ကို ထုတ်ယူလျက် ၄င်းအား သူ၏အရိုးဖြူဖြူတို့အပေါ် ဖိကပ်လိုက်သည်။ အဖြူရောင်အလင်းရောင်တစ်ခုလင်းလက်လာလျက် ထိုညာလက်မှ အသားတို့ ချက်ချင်းပြန်လည် ဖွံ့ဖြိုးလာခဲ့သည်။

ယုန်နက် သူ့အား မှုန်မှိုင်းသော အမူအရာဖြင့် ကြည့်နေခဲ့သည်။ ၄င်း၏ပါးစပ်မှာဟနေသော်လည်း အတော်ကြာသည်အထိ မည်သည်ကိုမှမဆိုနိုင်ခဲ့ချေ။

ထန်မော့၏ ကိုယ်ပေါ်မှဒဏ်ရာများပြန်လည်ကောင်းမွန်သွားလျက် တီကောင်မျက်ရည်မှာလည်း မာကျောသွားခဲ့လေသည်။ ၄င်းမှာတဖြည်းဖြည်းသေးငယ်လာပြီး လက်မအရွယ်ခန့်ကိုရောက်ရှိသွားသည်။ ထို့နောက် ၂ပိုင်းကွဲသွားပြီး အ၀ါရောင်သဲမှုန်များအဖြစ် ထန်မော့၏ လက်ကြားမှ ကျဆင်းသွားခဲ့လေသည်။

ထန်မော့ ထိုင်လျက်သားဖြင့် စိတ်ပျက်လက်ပျက်ဖြစ်နေသော ယုန်နက်နှင့် အမှန်တရားနာရီ၏အလယ်ကိုကြည့်လိုက်သည်။

၁၀မိနစ်ကုန်ဆုံးသွားပြီးနောက် အမှန်တရားနာရီပေါ်တွင် ပစ္စည်း၄မျိုးပေါ်လာခဲ့ပြန်သည်။

ဤသည်မှာ ၂၄ကြိမ်မြောက်ဖြစ်ကာ ပစ္စည်း၄မျိုးသာဖြစ်၍ ခက်ခဲသည့်အလှည့်ဖြစ်ကြောင်း ပြောစရာပင် မလိုချေ။

ယုန်နက်က ထန်မော့အားစိုက်ကြည့်လျက် တစ်ခုခုကိုတွေးမိပုံဖြင့်ဆိုလာသည်။

"အနည်းဆုံးတော့ မင်းပစ္စည်းတွေကို အလျင်စလိုထုတ်ရဲတော့မှာမဟုတ်ဘူး...ခုဏကလို အဆင့်၁ မူလအမှားအပြစ်ကို အသက်သွင်းမိမှာစိုးလို့ တချို့ခက်ခဲတဲ့ပစ္စည်းတွေကို ချန်ခဲ့မှာပဲ"

ယုန်နက်သည် သူ၏အောင်မြင်မှုက သေချာနေဟန်ဖြင့်ဆိုလာခဲ့သည်။ သို့သော် ထိုပစ္စည်း၄မျိုးကိုမြင်စဥ် ထန်မော့မျက်နှာပေါ်မှ ထူးဆန်းနေသော အမူအရာကို မမြင်ခဲ့ချေ။

စက္ကန့်လက်တံ စတင်ရွေ့လျားလာပြီး ကစားသမားများက ပစ္စည်းများကို ထုတ်ပယ်ရန်ပြင်လိုက်ကြတော့သည်။ အပြာရောင်နံရံမှာလည်း ပြန်လည် မြင့်တက်သွားခဲ့ပြီး ယုန်နက်မှာ အမှန်တရားနာရီမှာ သူတို့ရွေ့ရမည့်အကွက်ကို ကြေညာလာမည်အား စောင့်ဆိုင်းနေခဲ့လေသည်။ သို့သော် ဤတစ်ကြိမ်တွင် တစ်ခုခုထူးခြားနေသည့်ဟန်ပင်။ ၁၀စက္ကန့်ကြာပြီးသည့်တိုင် မည်သည့်ကြေညာသံကိုမျှ မကြားရသေးချေ။

ယုန်နက်က အမှန်တရားနာရီအား ထူးဆန်းစွာ စိုက်ကြည့်နေခဲ့လေသည်။ ရုတ်ချည်း ယုန်နက်၏ မျက်လုံးများမှာ ပြူးကျယ်သွားလျက် ထန်မော့အား ထိတ်လန့်စွာ ကြည့်လာလေသည်။

"မဟုတ်ဘူး... မဖြစ်နိုင်ဘူး..."

ထိုစဥ်မှာပင် နေရာလွတ်ထဲ၌ ကလေးသံ၏ ကြေညာမှုကို ကြားလိုက်ကြရလေသည်။

"တင်းတောင်~ ကစားသမားထန်မော့ဟာ အဓိကမစ်ရှင်' ဦးဦးယုန်ရဲ့အမှန်တရားနာရီဂိမ်း'ကို ပစ္စည်းအားလုံးကို ထုတ်ပယ်ပြီး ရှင်းလင်းလိုက်ပါပြီ"

ဂျွတ်...

အနက်ရောင်မျှော်စင်၏ ကြေညာသံပြီးနောက်တွင် ယုန်နက်၏ ခေါင်းပေါ်မှ ကွဲအက်သံတစ်ခုကိုကြားလိုက်ရလေသည်။ ထန်မော့မှာ တဖက်သို့ အံ့အား သင့်စွာကြည့်လိုက်မိလေသည်။ ရုရှားထပ်တစ်ရာရုပ်ကြီး၏ အပြင်ခွံတွင် အက်ကွဲရာများပေါ်လာခဲ့သည်။ ထိုအက်ကွဲကြောင်းများက တဖြည်းဖြည်းကြီးမားလာပြီးနောက် ထို ယုန်ရုပ်ကြီးမှာ ပြိုကွဲကျသွားပြီး အတွင်းမှ လူကိုဖော်ပြလာခဲ့လေသည်။

ထန်မော့ ထိုလူအား ရှင်းလင်းစွာမြင်လိုက်ရလေသည်။

ယုန်ရုပ်၏ နောက်ကွယ်တွင် တချိန်လုံးပုန်းကွယ်နေခဲ့သူမှာ သူ၏ဦးနှောက်မှ တစီစီမြည်နေသည်ကိုသာခံစားစပြီး ကမ္ဘာကြီးမှာ မှုန်၀ါးနေခဲ့သလိုပင်။

သူ၏ အမည်က လီစစ်ရွှီဖြစ်သည်။

လွန်ခဲ့သော ၆နာရီခန့် ထန်မော့တစ်ယောက် မှော်၀င်မြက်ခင်းပြင်ကြီးတွင် ပြေးလွှားနေခဲ့စဥ် လီစစ်ရွှီသည် ဤမှောင်မည်းနေသောနေရာလွတ်ထဲသို့ ကျဆင်းလာခဲ့လေသည်။

ယနေ့သည် မတ်လ ၂၅ရက်ဖြစ်ကာ ကစားသမားများ ၃လအတွင်းမျှော်စင်ကိုတိုက်ခိုက်ရန် ရက်အနည်းငယ်ကျန်ရစ်နေသေးလေသည်။ သူက အလွန်သတိထားတတ်သူဖြစ်သည်။ သူ၏စွမ်းရည်က အားနည်းကာ အသုံးမကျပုံပေါ်သော်လည်း ကမ္ဘာကြီးအွန်လိုင်းပေါ်တက်လာသည်မှစ၍ ယခုချိန်အထိ အသက်ရှင်နေရန် တစ်ချက်မှ မပေါ့လျော့ခဲ့ချေ။ သူသည် အချိန်ကုန်ပြီးသွားတော့မှ ကမ္ဘာတစ်၀ှမ်းမှ အခြားကစားသမားများနှင့်အတူ မျှော်စင်ကိုတိုက်ခိုက်ရန် ဆွဲခေါ်ခံရသည်ထက် ကြို၍တိုက်ခိုက်ထားသည်က ပိုကောင်းမှန်း တွေးတတ်လေသည်။ ဂိမ်း၏ခက်ခဲမှုလည်း ပိုနိမ့်လိမ့်မည်ပင်။

သူသည် အနက်ရောင်မျှော်စင်မှာလည်း လူတစ်ဦးသာဖြစ်ကြောင်း ယုံကြည်လေသည်။ အနည်းဆုံးတော့ မျှော်စင်မှ လူသားများအား ၄င်းကို တိုက်ခိုက်စေချင်သည်မဟုတ်ပါလား။

မျှော်စင်အား မိမိဆန္ဒနှင့်တိုက်ခိုက်ခြင်းနှင့် အတင်းဆွဲသွင်းခံရခြင်းတွင် ကွာခြားမှုရှိလိမ့်မည်။ ဖြစ်နိုင်ချေအလွန်နည်းလျှင်တောင် သူက ဂိမ်း၏ခက်ခဲမှုကို လျှော့ချနိုင်မည့်အခွင့်အရေးအား လက်လွတ်မခံလိုပါချေ။

ထို့ကြောင့် သူကမျှော်စင်ကို စောစောတိုက်ခိုက်ခဲ့ပြီး ပထမအထပ်ကို စတိုက်ခြင်းလည်းဖြစ်လေသည်။

သူသည် ထူးဆန်းသော အရံမစ်ရှင်၂ခုကိုရှင်းခဲ့ပြီး ဒုတိယတစ်ခုပြီးသွားသည်နှင့် သူသည် ဤနေရာလွတ်ထဲသို့ကျလာပြီး အနက်ရောင်မျှော်စင်၏ သီချင်းဆိုသံကို ကြားလိုက်ရလေသည်။

"တင်းတောင်~ ဒေတာမှားယွင်းနေပါသည်...ဒေတာမှားယွင်းနေပါသည်..."

သူ ထိုမရှင်းလင်းသော ကြေညာသံကို နားထောင်နေခဲ့သည်။ အနက်ရောင်မျှော်စင်မှာ ၄င်းကို ၁၀မိနစ်ခန့် ထပ်ခါထပ်ခါကြေညာနေပြီးမှ နောက်တစ်ကြိမ်တွင် သူ၏ကြေညာသံက ပြောင်းလဲသွားခဲ့လေသည်။

"ဒေတာမှန်ကန်ပါသည်...ကစားသမားလီစစ်ရွှီက အရံမစ်ရှင် 'အရသာရှိသော မုန်လာဥ'နှင့် 'ဦးဦးယုန်အတွက် မနက်စာ'ကို ရှင်းလင်းလိုက်ပြီး အနက်ရောင်မျှော်စင် ပထမထပ်( ခက်ခဲမှုအဆင့်)ကို ဖွင့်လှစ်လိုက်ပါပြီ...ကစားသမားထန်မော့က အနက်ရောင်မျှော်စင်တတိယထပ်( ရိုးရိုးအဆင့်)ကို ဖွင့်လှစ်လိုက်ပါပြီ... ၃နာရီအတွင်း အဓိကမစ်ရှင်' ဦးဦးယုန်ရဲ့ အမှန်တရားနာရီဂိမ်း' ပွင့်လာမှာပါ...ကစားသမား လီစစ်ရွှီက အဆင့်နိမ့်အကာအကွယ်ကို ဖွင့်လှစ်ပြီး 'အနက်ရောင် ရုရှားထပ်တစ်ရာရုပ်' အကူပစ္စည်းကို လက်ခံရရှိသွားပါပြီ...ဂိမ်းထဲမှာလည်း အသာစီးရခွင့်ပေးထားမှာဖြစ်ပါတယ်...အနက်ရောင်မျှော်စင်ဟာ ကစားသမား လီစစ်ရွှီရဲ့ သရုပ်မှန်ကိုဖုံးကွယ်ထားပြီး ၂ကွက် အသာစီးရခွင့်ကိုလည်း ပေးထားမှာဖြစ်ပါတယ်"

လီစစ်ရွှီမှာ တောင့်ခဲလျက် ဘာကိုမှနားမလည်နိုင်ဖြစ်နေစဥ်မှာပင် အနက်ရောင်မျှော်စင်မှ ထပ်မံကြေညာလာခဲ့သည်။

"တင်းတောင်~ ကစားသမားလီစစ်ရွှီက အနက်ရောင်မျှော်စင်(ခက်ခဲမှုအဆင့်)ရဲ့ ဘော့စ်ဖြစ်တဲ့ ကစားသမား ထန်မော့ကို ၃နာရီအတွင်းတွေ့ရမှာဖြစ်ပါတယ်"

"ခင်မင်မှု သဲလွန်စ: ကစားသမားထန်မော့က ကမ္ဘာပထမဆုံး အနက်ရောင်မျှော်စင် ပထမအထပ်ရဲ့( ခက်ခဲမှုအဆင့်)ကို လွန်ခဲ့တဲ့ ၄လကရှင်းခဲ့သူဖြစ်ပါတယ်...ကစားသမားလီစစ်ရွှီရဲ့ အနက်ရောင်မျှော်စင်ပထမထပ်( ခက်ခဲမှုအဆင့်)ကို ချော့မွေ့စွာ ဖြတ်ကျော်နိုင်ချေက ၁ရာခိုင်နှုန်းဖြစ်ပါတယ်...ကျေးဇူးပြုပြီး မျှော်စင်ကို ကြိုးစားတိုက်ခိုက်ပေးပါနော် ..."

အနက်ရောင်ယုန်၏ ကိုယ်ထည်မှာ အစိတ်စိတ်အမွှာအမွှာကွဲကြေသွားခဲ့ပြီး အတွင်းမှ တုန်ယင်နေသော လီစစ်ရွှီကို ထုတ်ဖော်ပြလာခဲ့သည်။ ထန်မော့ ၄င်း၏မျက်နှာ နှင့် ခေါင်းပေါ်သို့ တစ်ချက်ကြည့်လိုက်သည်။

[ခိုး၀င်သူ]

အမှောင်ထဲမှ ခြေသံများတဖြည်းဖြည်းနီးကပ်လာစဥ်တွင် အမှန်တရားနာရီပေါ်မှ အပြာရောင် အလင်းမှာ တဖြည်းဖြည်း မှိန်ဖျော့သွားခဲ့လေသည်။ လီစစ်ရွှီက ငိုလိုက်ရယ်လိုက်ဖြစ်နေခဲ့ပြီး ထန်မော့ကမူ တည်ငြိမ်စွာရပ်နေခဲ့လေသည်။ အမုန်းတရားများနှင့်အက်ကွဲနေသော အသံကို သူရုတ်ချည်းကြားလိုက်ရသည်။

"ဂိမ်းကိုရှင်းလင်းတဲ့ ဗျူဟာက ပိုသန်မာဖို့ပဲ...ငါအခုထိမရှုံးသေးပါဘူး... ငါမရှုံးသေးဘူး"

ဘုန်း...

လီစစ်ရွှီ၏ ကိုယ်က ဒုံးပျံတစ်စီးနှယ် ထန်မော့ထံပြေး၀င်လာခဲ့လေသည်။

🌍

Prev Next