Chapter 3

🐯Chapter 3

မိနစ်အနည်းငယ်ကြာပြီးနောက် ကြယ်ဆိပ်ကမ်း၌ ယာဉ်စုတစ်စု ဆိုက်ကပ်လာသည်။ ထောင်ပေါင်းများစွာသော ကြယ်စင်များ တောက်ပလျက်ရှိပြီး မြင်ကွင်းမှာ ကျက်သရေရှိတင့်တယ်သည့်အပြင် ခမ်းနားကြီးကျယ်လှပသည်။ ကြယ်သင်္ဘောတိုင်း၌ အင်ပါယာနှင့် တော်ဝင်တံဆိပ်များပါရှိပြီး အကြီးဆုံးကြယ်သင်္ဘောတံခါးက ပွင့်လာသည်။

ကိုယ်ရံတော်သက်တော်စောင့်များ ခြံရံလျက် အမျိုးသားတစ်ဦး ဆင်းလာသည်။

ဆိပ်ကမ်းတွင် လူပေါင်း သိန်းသောင်းချီကာ ရှိနေသော်လည်း အပ်ကျသံပင် မကြားရချေ။ မည်သူကမျှ စကားတစ်ခွန်း မပြောရဲပေ။

ဧကရာဇ်အရှင်က စကားများများ ပြောရခြင်းအား မနှစ်သက်ချေ။ အင်တာနက်၊ မဂ္ဂဇင်းနှင့် သတင်းများ၌ပင် ဧကရာဇ်၏ ဓာတ်ပုံဟူ၍ လက်ချိုးရေတွက်နိုင်ပြီး ထိုပုံများ အားလုံးမှာလည်း လူသားအသွင်နှင့်သာ ဖြစ်သည်။ ဧကရာဇ်၏ သားရဲသဏ္ဌာန်အား မည်သည့်နေရာတွင်မျှ ရှာတွေ့နိုင်မည် မဟုတ်ပေ။

ဤလူက နှစ်ပေါင်းများစွာအတွင်း အင်ပါယာ၏ အထူးကဲဆုံးသော ဧကရာဇ်ပင်။ သူ၏ လွန်ကဲသောစိတ်စွမ်းအင်နှင့်အတူ ရက်စက်ကြမ်းကြုတ်မှုမှာ နာမည်ကျော်လှသည်။ ထီးနန်းဆက်ခံချိန်၌ ဧကရာဇ်မှာ အသက် ၂၀ အရွယ်သာ ရှိသေးသည်။ ဤခေတ်၌ သာမန်လူတစ်ဦး၏ သက်တမ်းမှာ အနှစ် ၅၀၀ ဖြစ်သောကြောင့် ဧကရာဇ် ထီးနန်းဆက်ခံချိန်၌ အလွန်ငယ်ရွယ်လွန်းသောကြောင့် အဘက်ဘက်မှဖိအားများစွာ ကြုံတွေ့ခဲ့ရသည်။

ဖိအားများစွာနှင့် ဝေဖန်မှုများကြောင့် ငယ်ရွယ်သော ဧကရာဇ်လေးက ရှေ့တန်းစစ်မြေပြင်သို့ ကိုယ်တိုင်ကိုယ်ကျ သွားရောက်ခဲ့သည်။ အင်ပါယာသို့ နှစ်ပေါင်းရာနှင့်ချီ ကျူးကျော်ခဲ့သော ဇာဂ့်များအား ၇ နှစ်အတွင်း ရှင်းလင်းခဲ့သည်။ ရှေ့တန်းမှပြန်လာပြီး တစ်နှစ်အတွင်း ဇာ့ဂ်များအား သံမဏိသွေးဗျူဟာဖြင့် အမြစ်ဖြတ်သုတ်သင်ခဲ့သည်။

စိတ်စွမ်းအင်ကို E အဆင့်မှ S အဆင့်အထိ ဟူ၍ ခွဲခြားထားသည်။ တရားဝင်အချက်အလက်များအရ ဧကရာဇ်၏ စိတ်စွမ်းအင်မှာ SSS အဆင့် ဖြစ်သည်။ သို့သော်လည်း ဧကရာဇ်ထံ၌ ဆိုးဝါးသည့် အတင်းအဖျင်းများစွာရှိပြီး ထိတ်လန့်ဖွယ်အကောင်းဆုံးမှာ ဧကရာဇ်က ဖခင်ဖြစ်သူအား သတ်ဖြတ်သူ ဟူ၍ပင်။

ဤအခိုက်အတန့်၌ ကြယ်ဆိပ်ကမ်းတစ်ခုလုံး တိတ်ဆိတ်လျက်ရှိသည်။

တာ့ခ်ကြယ်၏ လက်ထောက်အုပ်ချုပ်မှုအရာရှိက သတိရှိစွာဖြင့် ရှေ့သို့တက်လာပြီး ကြိုဆိုပန်းစည်းကမ်းလိုက်သော်ငြား လျစ်လျူရှုခြင်း ခံလိုက်ရသည်။

“ဧကရာဇ်အရှင်...”

လက်ထောက်အုပ်ချုပ်မှုအရာရှိက နဖူးထက်ရှိ ချွေးများအား သုတ်ဖယ်လိုက်ပြီးနောက် ကြောက်ရွံ့စွာဖြင့် ဆိုလေသည်။

“ကျွန်တော်မျိုးတို့ တာ့ခ်ကြယ်မှာရှိတဲ့ လက်ထပ်ဖို့အရွယ်ရောက်ပြီး မျိုးရိုးမြင့်အမျိုးသားနဲ့ အမျိုးသမီးတွေကို ဆင့်ခေါ်ထားပြီးဖြစ်ပါတယ်... သူတို့က အရှင့်ရဲ့ ရွေးချယ်မှုကို စောင့်နေ...”

လက်ထောက်အုပ်ချုပ်မှုအရာရှိ၏  ပထမစကားတစ်ဝက်အား နားထောင်ပြီးနောက် ဧကရာဇ်အရှင်၏ နံဘေးရှိ အတွင်းဝန်အရာရှိမှာ ချက်ချင်းဆိုသလို စိတ်ထဲ ချွေးဒီးဒီးကျလာသည်။ 

သေချာပေါက်ပင် နောက်တစ်စက္ကန့်၌ ဧကရာဇ်အရှင်က ခြေလှမ်းများ ရပ်တန့်သွားပြီး အလေးမထားဟန်ရှိသော မျက်လုံးများဖြင့်  လက်ထောက်အုပ်ချုပ်မှုအရာရှိ၏ မျက်နှာအား ကြည့်လိုက်သည်။

လက်ထောက်အုပ်ချုပ်မှုအရာရှိက အတွင်းဝန်အရာရှိ၏ အမူအရာအား မြင်သည့်အခါ ချက်ချင်းဆိုသလို ထိုအခြင်းအရာမှာ မကောင်းတော့ကြောင်း နားလည်သဘောပေါက်မိသည်။ သူက ခြောက်ကပ်ကပ် အပြုံးတစ်ခုဖြင့် ခြေလှမ်းတစ်ဝက်ခန့် နောက်ဆုတ်သွားသည်။ ဧကရာဇ်အရှင်၏ အမှုမထားသော အကြည့်များအား မြင်သည့်အခါ ဤအခြေအနေအား ကျော်ဖြတ်နိုင်အောင် ကံကောင်းနေရန်သာ တွေးမိတော့သည်။

ထို့နောက် သူက ပြင်းထန်သည့်ခွန်အားဖြင့် ပစ်ထုတ်ခြင်း ခံလိုက်ရသည်။

ဧကရာဇ်အရှင်၏ အနောက်တွင်ရှိသော အတွင်းဝန်အရာရှိနှင့် ကိုယ်ရံတော်သက်တော်စောင့်များမှာ မျက်လုံးများ မှိတ်လိုက်ကြပြီး တစ်ချိန်တည်းမှာပင် လမ်းတစ်ဖက်တစ်ချက်ရှိ လူများသည်လည်း ခြေတစ်လှမ်းခန့် နောက်ဆုတ်လိုက်ကြသည်။ ဝဖိုင့်ဖိုင့် လက်ထောက်အုပ်ချုပ်မှုအရာရှိမှာ လေထုထဲ၌ ဘဲအသွင်သို့ ပြောင်းလဲသွားပြီး မြေပြင်ပေါ်သို့ ပြင်းထန်စွာပြုတ်ကျပြီးနောက် သတိလစ် မေ့မျောသွားတော့သည်။

ဆိပ်ကမ်းတစ်ခုလုံး တိတ်ဆိတ်သွားသည်။

ဧကရာဇ်အရှင်က အကြည့်လွှဲကာ ရှေ့ဆက်သွားလေသည်။

ဧကရာဇ်မှ ဆက်လက်တိုက်ခိုက်ရန် ရည်ရွယ်ချက် မရှိကြောင်း မြင်သည့်အခါ အတွင်းဝန်အရာရှိနှင့် အခြားသူများ စိတ်သက်သာရာ ရသွားကြပြီး ဧကရာဇ်အရှင်နောက်မှ ထပ်ကြပ်မကွာ လိုက်ပါသွားကြသည်။ ကြယ်သင်္ဘောများ၏ စက်သံများ ရပ်တန့်သွားချိန်တွင် ကြယ်ဆိပ်ကမ်း၏ လေထုတစ်ခုလုံးမှာ ငြိမ်သက်တိတ်ဆိတ်သွားလေသည်။

ယာဉ်ပျံပေါ်၌။

အခြားသူများသာ ဧကရာဇ်အရှင်၏ အသွင်သဏ္ဌာန်အား မြင်တွေ့မည်ဆိုလျှင် အလွန်အမင်း အံ့အားသင့်သွားကြပေမည်။ ပခုံးပြင်ကျယ်များ၊ ရှည်သွယ်သော ခြေထောက်များနှင့် ချောမောတင့်တယ်သော အသွင်သဏ္ဌာန်မှာ မှုန်မှိုင်းပြီး ဒေါသကြီးသည့် အခြေအနေနှင့် အနည်းငယ်မျှပင် အပ်စပ်ခြင်း မရှိချေ။ သူ့မျက်လုံးနှစ်လုံးအား ကြည့်လိုက်သည့် သူများမှာ နှလုံးခုန်နှုန်းပင် နှေးသွားနိုင်သည်။

သေသပ်ကျနသည့် ငွေရောင်ဆံနွယ်များ၊ နှုတ်ခမ်းပါးတစ်စုံနှင့် ခဲပြာရောင်မျက်ဝန်း။

ကြယ်တာရာမြို့တော်ရှိ မျိုးရိုးမြင့် အမျိုးသားနှင့် အမျိုးသမီးများစွာ ကုန်ဆုံးသွားသည့်တိုင်အောင် ဧကရာဇ်အရှင်မှာ ထိမ်းမြားရခြင်း မရှိသေးချေ။ အင်ပါယာ၏ မှူးမတ်များမှာ နှစ်ပေါင်းများစွာ တိုက်တွန်းခဲ့ကြသော်လည်း စိတ်ပျက်မှုအတိသာ ဖြစ်သည်။

ယာဉ်ပျံပေါ်သို့ ရောက်ရှိပြီး မကြာမီမှာပင် လေထုထဲ၌ အလင်းမျက်နှာပြင်တစ်ခု ထွက်ပေါ်လာပြီး ယာဉ်ပျံပေါ်ရှိ တင်းမာနေသောလေထုနှင့် ဆန့်ကျင်နေသော ခပ်တိုးတိုးဂီတသံ ထွက်ပေါ်လာသည်။

“အရှင်...ဒီ ဗီဒီယိုက အရှင့်ကို ကြိုဆိုဖို့ တာ့ခ်က ရိုက်ကူးထားကြတာပါ..”

အတွင်းဝန်အရာရှိက နဖူး‌ပေါ်ရှိ ချွေးများအား အသာသုတ်ဖယ်ရင်း ရှင်းပြလိုက်သည်။

အလင်းမျက်နှာပြင်မှ ကြောက်ရွံ့ထိတ်လန့်စွာဖြင့် ကိုယ်နေဟန်ထားမပျက်အောင် ကြိုးစားထိန်းသိမ်းနေရသော တင်ဆက်သူအမျိုးသမီး၏အသံ ထွက်ပေါ်လာသည်။

“တာ့ခ် ကို လာရောက်လည်ပတ်တဲ့ အရှင့်ကို တာ့ခ်ပြည်သူများက နွေးထွေးစွာ ကြိုဆို...”

နွေးထွေးစွာကြိုဆိုတယ် ဟုတ်လား...

ဧကရာဇ်အရှင်၏ မျက်နှာမှာ အနည်းငယ် လှောင်ပြောင်လိုဟန်ရှိသည်။

အတွင်းဝန်အရာရှိက ဧကရာဇ်၏ စိတ်အခြေအနေအား လေ့လာပြီးနောက် ချန်နယ်ပြောင်းလိုက်သည်။

“ဒါက တာ့ခ်ကြယ်မှာရှိတဲ့ မဟာဆီမဟာသွေး ပါဝင်တဲ့ လူငယ်တွေပါ အရှင်...”

ထင်ရှားသည့် ရုပ်ရည်သွင်ပြင်များရှိသော အမျိုးသားနှင့် အမျိုးသမီးများက ဧည့်ကြိုခန်းတွင် ထိုင်ကာဖြင့် တိတ်တဆိတ် စောင့်ဆိုင်းနေကြသည့်ပုံသို့ ပြောင်းလဲသွားသည်။ တင်ဆက်သူမှ နောက်ခံစကား ပြောလာသည်။

“အရှင် ရွေးချယ်နိုင်...”

ဧကရာဇ်အရှင်၏ မျက်နှာတစ်ခုလုံး မဲမှောင်လာသည်။

အတွင်းဝန်အရာရှိ၏ နဖူးထက်မှ ချွေးတဒီးဒီး ကျဆင်းလာပြီး အလျင်စလိုဖြင့် ချန်နယ်ပြောင်းလိုက်ရပြန်သည်။ 

ဒီတာ့ခ်ကြယ်က ဘာအရူးထနေကြတာလဲ...လက်ထောက်အုပ်ချုပ်မှု အရာရှိကစပြီး ဒီလိုဟာတွေအထိ အတော်လေး သတ္တိကောင်းနေကြတာပဲ.. မဟုတ်ဘူးလား..

ဧကရာဇ်အရှင်ရဲ့ ထိမ်းမြားခြင်းမပြုဘူးဆိုတဲ့ သဘောထားကို မသိတဲ့သူ ဘယ်သူရှိလို့လဲ... မှူးမတ်တွေက မေးလာမယ် ဆိုရင်‌တောင် ‘ကြင်ဖက်တွေ့ခြင်း’ ဆိုတဲ့ ခေါင်းစဉ်ကို အရမ်းရွံရှာစက်ဆုပ်နေတာကို...

စက္ကန့်အနည်းငယ် ကြာပြီးနောက်တွင် ဖန်သားပြင်၌ သေးငယ်သောဝရန်တာတစ်ခု ပေါ်လာသည်။

အကြည့်တစ်ချက်တည်းနှင့်ပင် လုံးဝဆက်စပ်မှုမရှိသည့် ချန်နယ်သို့ ပြောင်းလိုက်မိကြောင်း အတွင်းဝန်အရာရှိက သိလိုက်ရသည်။

တာ့ခ်မှာ လူသားများ အခြေချနေထိုင်သည့် ဂြိုလ်တစ်လုံး မဟုတ်သော်လည်း ဆယ်ဂဏန်းပင်မပြည့်သော လူသားအနည်းငယ်မျှ ရှိနေသေးသည်။ လူသားမျိုးနွယ်၏ သီးခြားလက္ခဏာရပ်များနှင့် အတိတ်တွင် ဖြစ်ပျက်ခဲ့သော အလွန်ပြင်းထန်သည့် အဖြစ်အပျက်များကြောင့် တာ့ခ်ကြယ်ပေါ်တွင် ဧကရာဇ်အရှင် ရှိနေသမျှ ကာလပတ်လုံး တာ့ခ်တွင် နေထိုင်သည့် လူသားများအား အထူးအခြေအနေတစ်ရပ်ဖြင့် “လေ့လာမှု” ပြုနေမည် ဖြစ်သည်။ တစ်နည်းဆိုရသော် ထောက်လှမ်းခြင်းပင်။

ဤကဲ့သို့သော ထောက်လှမ်းခြင်းမှာ ကိုယ်ရေးကိုယ်တာ ချိုးဖောက်ခြင်းများ မပါဝင်သော်လည်း လူသားများ၏ အိမ်အပြင်ဘက်တွင် အလွန်တရာသေးငယ်သော မိုက်ခရိုကင်မရာလေးများ ထည့်သွင်းထားရန် လိုအပ်သည်။

အတွင်းဝန်အရာရှိက လူသားထောက်လှန်းရေးချန်နယ်အား မတော်တဆ ပြောင်းမိလိုက်ခြင်းဖြစ်သည်။

ပုံထဲတွင် အသားဖြူကာ ချောမောခံ့ညားသည့် လူငယ်တစ်ဦးက ထမင်းဘူးဖွင့်ကာ စားသောက်နေခြင်း ဖြစ်သည်။ ရှည်လျားသော ခြေထောက်များဖြင့် ပြတင်းဘောင်ပေါ်တွင် ခြေချထိုင်ကာ ကျယ်ပြောသည့် ကြယ်မြစ်ကြီးအား မျက်နှာမူလျက်ရှိသည်။ ထိုလူ တွေးတောနေသည့်အရာအား သူတို့ မသိနိုင်သော်လည်း အနည်းငယ်ဝမ်းနည်းနေဟန်ရှိသည်။

လူငယ်လေး၏ ခံစားချက်မှာ အလွန်ထူးခြားလှသည်။ ဖန်သားပြင်အား ကြည့်နေသော အတွင်းဝန်အရာရှိပင်လျင် ခေတ္တမျှ အာရုံပျက်ပြားသွားပြီး နှလုံးသားထဲ၌ နူးနူးညံ့ညံ့ ခံစားလိုက်ရသည်။ အလွန်ထူးဆန်းပေသည်။ ဤသည်မှာ လူသားတစ်ဦးသာ။ သို့သော်လည်း ရွံရှာစက်ဆုပ်မှုအား မခံစားရသည့်အပြင် နီးကပ်လိုစိတ်ပင် ဖြစ်ပေါ်လာသည်။ 

အတွင်းဝန်အရာရှိက အလျင်စလို အသိစိတ်ပြန်ကပ်လာသည်။ သူက ဤကဲ့သို့သော အမှားမျိုးအတွက် အလွန်အမင်း ရှက်ရွံ့မိသည်။

“တောင်းပန်ပါတယ် အရှင်...”

သူက ဖန်သားပြင်အား တိုက်ရိုက်ပင် ပိတ်ပစ်လိုက်ချင်သည်။

မမျှော်လင့်စွာပင် တိတ်ဆိတ်နေခဲ့သော ဧကရာဇ်အရှင်မှာ ရုတ်တရက်ဆန်စွာ လက်တစ်ဖက် မြှောက်လာပြီး အတွင်းဝန်အရာရှိ၏ အပြုအမူအား ဟန့်တားလိုက်သည်။

“မပိတ်နဲ့...”

ခဲပြာရောင်မျက်ဝန်းများမှာ ဖန်သားပြင်ပေါ်ရှိ လူငယ်ကိုသာ ကြည့်နေလေသည်။ ဧကရာဇ်အရှင်၏ မျက်နှာမှာ အေးစက်စက်နှင့် ပျင်းရိဟန်ရှိနေသည်။

သို့သော်လည်း သူက ထိုလူသားအား နှစ်နာရီကြာအောင် ကြည့်နေခဲ့လေသည်။

-----

ကုယွီမြန်က စားသောက်ပြီးနောက် အပင်များအား ရေလောင်းသည်။ ထို့နောက် ဝရန်တာတွင်ထိုင်ကာ တွေဝေငေးမောနေလေသည်။

တိရစ္ဆာန်ရုံ၌ အလုပ်ဝင်ချိန်တွင် ကုယွီမြန် ပထမဆုံး စောင့်ရှောက်ပေးခဲ့ရသော ပန်ဒါမှာ ဒယ်အိုးကြီး (တာ့ကော) ဟု ခေါ်သည်။ ထို့နောက်တွင် ဒယ်အိုးကြီးမှာ အမြွှာလေး မွေးဖွားခဲ့ပြီး သူတို့ကို ဒယ်အိုး ၂ (အာကော)နှင့် ဒယ်အိုး ၃ (စန်းကော) ဟု ခေါ်သည်။ မတော်တဆမှု မဖြစ်ခင် ပန်ဒါပေါက်လေးများမှာ နို့ဖြတ်ကာစသာ ရှိသေးပြီး လုံးလုံးဝိုင်းဝိုင်းနှင့် လူကပ်ကြသည်။

ထိုကလေးများ ဘာဆက်ဖြစ်မည်ကို သူ မသိနိုင်တော့ချေ။

ကုယွီမြန်က ပန်ဒါများအား အချိန်ကြာမြင့်စွာ ထိန်းသိမ်းစောင့်ရှောက်ခဲ့ရသဖြင့် သူတို့နှင့်ပတ်သက်၍ သံယောဇဉ်နှင့် စိတ်ခံစားချက်များ ရှိလေသည်။ ပန်ဒါများမှာ အမြဲလိုလို နှေးကွေးလေးလံပြီး ငပျင်းလေးများ ဖြစ်ကြသည်။ ထို့ကြောင့် တစ်နေ့တာလုံး ငေးတိငေးငိုင်နှင့် နေနိုင်ပြီး လွတ်လွတ်လပ်လပ်ပင်။

ည ၁၀ နာရီတွင် ဝရန်တာတံခါးအား ပိတ်ကာ အခန်းတွင်းသို့ ဝင်လိုက်သည်။

စတားလိုက်ဖ်၏ လုပ်ဆောင်မှုနှုန်းမှာ အတော်လေးမြင့်ပြီး သူ၏စာချုပ်မှာ မနက်ဖြန်တွင် အသက်ဝင်မည် ဖြစ်သည်။ စာချုပ်စတင် အသက်ဝင်သည်နှင့် ကုယွီမြန်မှာ တရားဝင် တင်ဆက်သူတစ်ဦး ဖြစ်လာပေမည်။ ကုယွီမြန် အခန်းအတွင်းသို့ ခြေချလိုက်သည်နှင့် စတားလိုက်ဖ်က သူ၏လက်ပတ်ကွန်ပျူတာသို့ မက်ဆေ့ချ်တစ်ခု ပေးပို့လာသည်။

【ဒီနွေဦးမှာ ဆုံကြမယ်… စတားလိုက်ဖ်ပလက်ဖောင်းရဲ့  တင်ဆက်သူအသစ်တွေကို ထောက်ပံ့ခြင်းပရောဂျက် တရားဝင် ဖွင့်လှစ်လိုက်ပါပြီ…】

ကုယွီမြန်က အသေးစိတ်အားကြည့်ရှုရန် မက်ဆေ့ချ်ကို နှိပ်လိုက်သည်။

ဤနှစ်က စတားလိုက်ဖ် တည်ထောင်ခြင်း ၁၀ နှစ်ပြည့် နှစ်ပတ်လည်ဖြစ်သည်။ လှုပ်ရှားမှုကဏ္ဍမျိုးစုံနှင့် ယှဉ်ပြိုင်ပွဲများအား လူထုနှင့် တရားဝင်မိတ်ဆက်ရာတွင် တင်ဆက်သူအသစ် ထောက်ပံ့ခြင်းပရောဂျက်မှာ တစ်ခုအပါအဝင်ဖြစ်သည်။ ဤပရောဂျက်က အရည်အချင်းရှိသော တင်ဆက်သူအသစ်များအတွက် အခွင့်အရေးများဖြစ်သည့် အကြံပြုချက်များ၊ အပိုဆုကြေးများ၊ စာချုပ်အဆင့်မြှင့်တင်ခြင်းများနှင့် ကြေညာထောက်ခံချက်အများအပြား ပါဝင်ပြီး အလွန်ကြီးမားသော အခွင့်အရေးများ ဖြစ်သည်။

တာ့ခ်တွင် ခေတ်မမီတော့သော ဂြိုဟ်တုတစ်လုံးသာ ရှိသည်။ ကြည့်ရှုသူအများဆုံး ရရှိသော တင်ဆက်သူအသစ်က ကြယ်တာရာမြို့တော်တွင် ကျင်းပမည့် တင်ဆက်သူအသစ်ပြိုင်ပွဲတွင် ပါဝင်ခွင့်ရရှိမည်ဖြစ်ပြီး စတားလိုဖ်ဘုရင်ဘွဲ့အတွက် ပြိုင်ရမည် ဖြစ်သည်။

ပွဲစဉ်စပြီး မကြာမီမှာပင် စာရင်းပေးသွင်းကြသော တင်ဆက်သူများစွာ ရှိသည်။ ကုယွီမြန်က တာ့ခ်ဆာဗာ၏ တင်ဆက်သူအသစ် ထောက်ပံ့ခြင်းပရောဂျက် ယှဥ်ပြိုင်ပွဲနေရာအား ဖွင့်လိုက်ပြီးနောက် ဆာဗာ၏ နာမည်အကြီးဆုံး တင်ဆက်သူအသစ်အား တွေ့လိုက်ရသည်။ ထိုတင်ဆက်သူမှာ အစားအသောက်နှင့် ပတ်သက်၍ တိုက်ရိုက်ထုတ်လွှင့်နေခြင်းဖြစ်ကာ ကြည့်ရှုသူ ၄ သောင်း ရှိပေသည်။

“ကြည့်ရှုသူ ၄ သောင်းလား...”

ကုယွီမြန် အံ့အားသင့်မိသွားသည်။ တာ့ခ်တွင် နေထိုင်သူ အနည်းငယ်သာရှိပြီး အများစုမှာ ယခုအချိန်တွင် အိပ်စက်သင့်နေပြီ ဖြစ်သော်လည်း ကြည့်ရှုသူ ၄ သောင်း ရှိနေဆဲ ဖြစ်သည်။ ဤတင်ဆက်သူအသစ်မှာ အမှန်တကယ် အံ့ဩဖွယ်ရာပင်။

ထို့ကြောင့် တစ်သန်းတွင် တစ်ယောက် ကြည့်ရှုနေခြင်းဖြစ်ကာ ဤတင်ဆက်သူအသစ် ထောက်ပံ့ခြင်း ပရောဂျက်မှာ မဆိုးလှချေ။

ကုယွီမြန်ထံ၌ မျှော်လင့်ချက်များစွာ မရှိသော်လည်း လက်လျော့လိမ့်မည် မဟုတ်ပေ။ တင်ဆက်သူ၏ တိုက်ရိုက်ထုတ်လွှင့်မှုအား ခေတ္တမျှကြာအောင် ကြည့်ပြီးနောက်တွင် မီးပိတ်ကာ အိပ်စက်တော့သည်။

-----

တစ်ချိန်တည်းမှာပင် အခြားတစ်ဘက်၌။

ယာဉ်ပျံပေါ်ရှိ အတွင်းဝန်အရာရှိမှာ စိုးရိမ်ပူပန်လျက်ရှိသည်။ ဤပိုစ့်၏ ကြည့်ရှုသူအရေအတွက်မှာ အတော်လေး မြင့်လှသည်။ သူတို့၏ ဘဝလုံခြုံမှုမှာ ဧကရာဇ်အရှင်၏ စိတ်အခြေအနေပေါ်တွင် မူတည်နေပြီး လက်ရှိတွင် ဧကရာဇ်အရှင်၏ စိတ်ခံစားချက်မှာ မည်သို့ရှိနေမည်ကို သူ မခန့်မှန်းနိုင်ချေ။

ထိုလူသား အခန်းအတွင်းသို့ ဝင်သွားသည်နှင့် သူ၏ပုံရိပ်အား ကင်မရာမှ ဖမ်းယူနိုင်ခြင်း မရှိတော့သဖြင့် အလင်းမျက်နှာပြင်မှာလည်း အလိုအလျောက် ပိတ်ကျသွားလေသည်။

ယာဉ်ပျံမှာ ဦးတည်ရာနေရာသို့ ရောက်ရှိနှင့်သည်မှာ ကြာမြင့်လှပေပြီ။ သို့သော်လည်း ဧကရာဇ်အရှင်မှာ အပြင်သို့ထွက်ရန် စိတ်ကူးရှိပုံ မရသေးချေ။ မျက်လုံးအောက်စိုက်ကာ စိတ်ပျက်လက်ပျက်ဖြင့် သူ့လက်သူ ပြန်ကြည့်လျက်ရှိသည်။

အတွင်းဝန်အရာရှိမှာ နဖူးတွင် ချွေးစို့လျက်ရှိသည်။ 

“အရှင်...”

ဧကရာဇ်အရှင်၏ အသားအရေမှာ လွန်စွာဖြူဖျော့ပြီး အရေပြားအောက်မှ အပြာရောင်သွေးကြောမျှင်များကိုပါ ထွင်းဖောက်မြင်နိုင်သည်။ သို့သော်လည်း ဤအချိန်တွင် သူ၏ သွေးကြောများမှာ အပြာရောင်မှ အနီရောင်သို့ စတင်ပြောင်းလဲလာပြီး လောင်ကျွမ်းလုမတတ် ဖြစ်လာသည်ကို သာမန်မျက်စိဖြင့်ပင် တွေ့မြင်နိုင်သည်။

အတွင်းဝန်အရာရှိ၏ စိတ်ဓာတ်ကြံ့ခိုင်မှုမှာ အားမနည်းလှချေ။ ဤအချိန်တွင် သတ္တဝါများအားလုံး၏ အထွတ်အထိပ်တွင် ရှိနေသော ဖိနှိပ်ချုပ်ချယ်မှုအား ရှင်းရှင်းလင်းလင်း ခံစားမိပြီး လွန်စွာကြောက်မက်ဖွယ် ကောင်းလှသည်။

၎င်းက လုံးလုံးလျားလျား ပုံမှန်မဟုတ်ချေ။

ဧကရာဇ်အရှင်က အနီရင့်ရင့် သွေးကြောများအားကြည့်ကာ ခေတ္တမျှတိတ်ဆိတ်သွားပြီးနောက် ခပ်တိုးတိုး ရေရွတ်လိုက်သည်။

“ဘိုးဘေးသွေးမျိုးဆက် နိုးထခြင်းလား..”

အတွင်းဝန်အရာရှိက ဧကရာဇ်၏ စကားလုံးများအား ကြားလိုက်ရသည်။ ဘိုးဘေးသွေးမျိုးဆက် ဆိုသည်မှာ တော်ဝင်မိသားစု၏ ထူးခြားမှုဖြစ်သည်။ ဘိုးဘေးသွေးမျိုးဆက်မှာ အရွယ်ရောက်ချိန်၌ အထူးအခြေအနေအချို့ဖြင့် နိုးထလာတတ်သည်။

အနည်းငယ်မျှ စဉ်းစားခွင့်ပင် မပေးတော့ဘဲနှင့် မိနစ်ဝက်အတွင်းမှာပင် ဧကရာဇ်အရှင်၏ အလွန်စွမ်းအားကြီးကာ ကြီးကျယ်ခမ်းနားလှသော စိတ်ဝိညာဉ်စွမ်းအားမှာ  ဖုံးလွှမ်းထားခြင်းမရှိဘဲ ထွက်ပေါ်လာသည်။ အတွင်းဝန်အရာရှိက ယာဉ်ပျံ၏ထောင့်တစ်နေရာသို့ လွင့်ထွက်သွားပြီး အသက်ရှူရန်ပင် ခက်ခဲလာသည်။

ယာဉ်ပျံအတွင်း၌ ရေခဲလွှာတစ်ခု အလျင်အမြန် ဖြစ်တည်လာသည်။ ဇီဝလက်နက်လှိုင်းဖြင့် တိုက်ခိုက်ခံရသောကြောင့် ဉာဏ်ရည်မြင့်စနစ်တစ်ခုလုံး ဖျက်ဆီးခံလိုက်ရပြီး အပူချိန်မှာလည်း သုညမှတ်အောက် နိမ့်ကျသွားသည်။

တာ့ခ်ဂြိုဟ်တစ်ခုလုံး၌ တိမ်တိုက်များဖုံးလွှမ်းကာ မိုးသက်မုန်တိုင်း တိုက်ခတ်လာသည်။

မိနစ် ၃၀ အတွင်း၌။

တပ်ရေးဗိုလ်တစ်ဦးက သတိကြီးစွာဖြင့် ယာဉ်ပျံတံခါးအား ခေါက်လိုက်သည်။ ယာဉ်ပျံတစ်ခုလုံး၏ ဉာဏ်ရည်မြင့်စနစ်မှာ ဖျက်ဆီးခံထားရပြီး သံတိုသံစများအဖြစ် ပြောင်းလဲသွားသည်။ အဆုံး၌ အတွင်းရှိ အခြေအနေအား မြင်တွေ့ရရန် တံခါးအား အတင်းအကြပ်ဖွင့်လိုက်ကြသည်။

ယာဉ်ပျံ၏ အတွင်းပိုင်းတစ်ခုလုံးအား ရေခဲများ ဖုံးလွှမ်းလျက်ရှိသည်။ အတွင်းဝန်အရာရှိမှာ မေ့မြောလျက်ရှိပြီး ဧကရာဇ်အရှင်ကိုမူ မတွေ့ရချေ။ ကြမ်းပြင်ပေါ်၌ ပျက်စီးနေသော လက်ပတ်ကွန်ပျူတာသာ ရှိနေသည်။

နေရာတွင်ရှိနေသည့်လူတိုင်း ကြောက်ရွံ့ထိတ်လန့်သွားကြသည်။ အချို့မှာ အထိတ်ထိတ်အပျာပျာဖြစ်နေကြပြီး အချို့မှာမူ စိတ်ထဲ၌ တိတ်တဆိတ် တွက်ချက်လျက်ရှိသည်။ အဆုံးတွင် တာ့ခ်ကြယ်ကို နှစ်ပေါင်းများစွာ အုပ်ချုပ်ခဲ့သော နယ်စားကြီးဖန်းနစ်ခ်အား ဆုံးဖြတ်ချက်ချစေလိုက်သည်။ 

“အပြင်ကို သတင်းမပေါက်ကြားစေနဲ့... လူလွှတ်ပြီး အရှင့်ကို ရှာကြ...”

🐯🐯🐯