MM Story Teller

Chapter 100

Viewers 4k

🚩Chapter -100

Arc_5 . အရံအမျိုးသမီး ဇာတ်ကောင်၏ တန်ပြန်စနစ် [ 12 ]

____

ချန်းယအခြေစိုက်စခန်းမှာ ဖျက်ဆီးခံလိုက်ရသည် ။ထိုကဲ့သို့ အဆုံးသတ်မှာ အခြားအခြေစိုက်စခန်းများ အကြာကြီးမျှော်လင့်ခဲ့ရသော အဆုံးသတ်ပင် ။ ထိုအခြေစိုက်စခန်းများမှာ ချန်းယအခြေစိုက်စခန်းနှင့် အလွန်နီးသော်လည်း ရိက္ခာပစ္စည်းများကို တိတ်တဆိတ်ရွှေပြောင်းဖို့ ပြင်ဆင်နေခဲ့ကြသည် ။ ဖုတ်ကောင်များ တစ်ခေါက်လာတိုက်သည်နှင့် သူတို့ချက်ချင်း စုပေါင်းကာ ရွှေ့ပြောင်းကြကုန်၏ ။

သို့သော်လည်း ဖြစ်ရပ်ကြီးဆုံးခန်းတိုင်သွားသည့်နောက် ချန်းယအခြေစိုက်စခန်း၏ နောက်ဆုံးထွက်သတင်းမှာ ပျံ့နှံ့သွားပြီး ရဲဘော်အချို့မှာ မှင်သက်ကြကုန်သည်။

ဖြိုချခံရပြီးတဲ့ ချန်းယအခြေစိုက်စခန်းက ကောင်ငယ်လေးတစ်ယောက်ဆီကနေ ကယ်တင်ခံလိုက်ရတာလား... ။

မြောက်များစွာသော ကောလဟာလသတင်းများအရ ထိုကလေးမှာ သဘာဝအလျောက် သန္ဓေပြောင်း စိတ်ဝိညာဥ်အသုံးချသူ ဖြစ်သည် ။ သူ့ထံတွင် စကားပြောနိုင်သော သန္ဓေပြောင်း အဆင့်မြင့် ဖုတ်ကောင်နှစ်ကောင် လည်းရှိသေးသည် ။

အဲ့ဒါက ဘယ်လိုတောင် အဓိပ္ပါယ်မရှိတာလဲ ။

သူတို့ ဤသတင်းကို ကြားသောအခါ အဓိကဌာနခွဲတိုင်း၏ ဦးစီးချုပ်တွေမှာ သူတို့လွန်ခဲ့သော ရက်များက အလွန်ပင်ပန်းခဲ့သောကြောင့် နားကြားမှားနေခြင်းဟုပင် ခံစားမိခဲ့သေးသည် ။

အင်း..အရမ်းကောင်းတယ် ၊ သူတို့ထင်ယောင်ထင်မှားဖြစ်နေတာဆိုရင်တောင် အဲ့လို လက်တွေ့မကျတဲ့ သတင်းတွေကို ယုံကြည်မှာမဟုတ်ဘူး ။

ရလဒ်အနေဖြင့် ထိုအရာကို နှိုက်နှိုက်ချွတ်ချွတ်စုံစမ်းဖို့ အဓိကဌာနတိုင်းက သူလျှိုများစေလွှတ်လိုက်သည် ။

ဤအချိန်တွင် လုံရှန်းအခြေစိုက်စခန်း၌လည်း ချန်းယအခြေစိုက်စခန်း၏ နောက်ဆုံးပေါ်သတင်းကို ရရှိထားပြီးဖြစ်သည် ။ ဤသတင်းကို သိပြီးသောအခါ ယန်ကျစ်ရှီ၏ အမူအရာမှာ အနည်းငယ်ပြောင်းလဲသွားခဲ့သည် ။

ယန်ယွီ အသက်ရှင်နေတုန်းဆိုတာ သူမ သိပြီးသားပင် ။

သဘာဝအလျောက် သန္ဓေပြောင်းနိုင်သော စိတ်ဝိညာဥ်စွမ်းရည် အသုံးပြုနိုင်သူမှာ သံသယဝင်စရာမလိုအောင် ယန်ယွီ ပင်ဖြစ်လိမ့်မည် ။

ယန်ယွီ၏ အနေအထားကို ခန့်မှန်းပြီးသောအခါ ယန်ကျစ်ရှီ ချက်ချင်းပင် သူမ၏ ဦးနှောက်မှ တစ်ဆင့် အရံအမျိုးသမီးဇာတ်ကောင် တန်ပြန် စနစ် ( system ) ဖြင့် ချိတ်ဆက်လိုက်သည် ။ ယန်ယွီက သူမအတွက် ခြိမ်းခြောက်နိုင်တုန်းလားဆိုတာ သူမ သိချင်မိသည် ။ ထို့နောက် အချို့သော တာဝန်ခွဲများကို အစပျိုးနိုင်ဖို့ ယန်ယွီကို သူမ၏ စမှတ်အဖြစ်အသုံးချနိုင်မလားဆိုတာလည်း သူမ သိချင်မိသည် ။

အရံအမျိုးသမီးဇာတ်ကောင် တန်ပြန်စနစ်က ယန်ကျစ်ရှီကို ပြန်လည်မွေးဖွားဖို့ အခွင့်အရေးပေးခဲ့ပြီး အခြားသူများ တစ်ဘဝလုံးမရနိုင်သော အခွင့်အလမ်းနှင့် စွမ်းရည်တို့ကိုလည်း ပေးခဲ့သည် ။

သို့သော်လည်း ဤစနစ်က အရာအားလုံးကိုတော့ တတ်စွမ်းမည် မဟုတ်ပေ ။

ဥပမာအနေဖြင့် စနစ်၏ အိုင်တမ်အချက်များကို အသုံးချလိုက်တိုင်း အမှတ်များကို အသုံးပြုရမည်ဖြစ်ပြီး ထိုအမှတ်များမှာ စနစ်မှ ပေးသော တာဝန်များကို အောင်မြင်မှ ရရှိနိုင်မည် ဖြစ်သည် ။

စနစ်၏ တာဝန်များကို ပြောရလျှင် ပို၍ ယုတ္တိမရှိပေ ။ စနစ်မှ အဓိကဇာတ်ကြောင်း၏ တာဝန်ကို ပေးလိုက်လျှင် host မှာ လုံးဝ ငြင်းဆိုပိုင်ခွင့်မရှိဘဲ ပေးထားသော အချိန်အကန့်အသတ်အတွင်း ပြီးစီးအောင် လုပ်ရလိမ့်မည် ။ မဟုတ်လျှင် hostကို စနစ်က ကွယ်ပျောက်အောင် ဖျက်ဆီးပစ်လိမ့်မည် ။

မည်သူကမှ သူတို့၏ ဘဝ နှင့် သေဆုံးခြင်းကို အခြားသူတစ်ယောက်က လာထိန်းချုပ်မှာ မလိုချင်ပေ ။ သို့သော် စနစ်နှင့် ချိတ်ဆက်ခံထားရသော ယန်ကျစ်ရှီမှာ တစ်ကြိမ်သေဆုံးပြီးသားဖြစ်သည် ။ သူမကို နောက်တစ်ကြိမ်ပြန်မွေးဖွားနိုင်ဖို့ အခွင့်အရေးပေးခဲ့သည့်အရာက ထိုပြင်ပစနစ်ပင်ဖြစ်ပြီး သူမတွင် ဘယ်တုန်းကမှ ရွေးချယ်စရာမရှိပေ ။

သူမ အရေးတကြီး အမှတ်များကို စုဆောင်းရပြီး စနစ်က ပေးသော တာဝန်များကို ပြီးစီးအောင် ဆောင်ရွက်ရသည် ။

ယန်ကျစ်ရှီ စနစ်နှင့် ချိတ်ဆက်ပြီးနောက် ယန်ယွီအကြောင်းကို မေးလိုက်ရာ သေချာပေါက်ပင် တာဝန်ခွဲများမှာ ယန်ယွီ၏ အစပျိုးမှုနှင့် ဆက်စပ်နေမှုရှိ၏။

စနစ် : " 'ယန်ယွီ၏ ပျော်ရွှင်သောဘဝ ' တာဝန်ခွဲကို စတင်နေပါပြီ ။ Host ဒီတာဝန်ကို လက်ခံမလား ၊ ငြင်းဆိုမလား ရွေးချယ်ခွင့်ရှိပါတယ် ။ တာဝန်ကို လက်ခံပြီးတာနဲ့ ပေးထားတဲ့အချိန်အတွင်း ယန်ယွီနဲ့ ရင်းနှီးတဲ့သူငယ်ချင်းဖြစ်အောင်လုပ်ရပါမယ် ။ ပြီးရင် ယန်ယွီ နဲ့ သူချစ်မြတ်နိုးရတဲ့သူကြားမှာ အချစ်ဖြစ်ပေါ်လာအောင် လမ်းကြောင်းရှာပေးရလိမ့်မယ် ။ "

ယန်ကျစ်ရှီ "...."

ယန်ယွီက အခုမှ ၁၀ နှစ်တောင်မရှိသေးဘူးလေ ၊ ဟုတ်ပြီလား ။

ပြီးတော့ ချစ်မြတ်နိုးရတဲ့သူဆိုတာကရော ဘာကြီးလဲ...သူမရဲ့ အရင် တာဝန်က စုယန်ကို ဖယ်ရှားပစ်ဖို့ မဟုတ်ဘူးလား ။

ယန်ကျစ်ရှီ အမှုမဲ့အမှတ်မဲ့ စုယန်ကို တွေးမိသွားသည် ။ အဘယ်ကြောင့်ဆိုလျှင် ထို့နေ့က လုံရှန်းအခြေစိုက်စခန်းတွင် ချူးဖေးယန်၏ နောက်သို့ စုယန်လိုက်လာပြီး ၎င်းက ' အမြစ်ပြတ်ဖယ်ရှားခြင်း ' တာဝန်ကို အစပျိုးစေခဲ့သည် ။ တာဝန်၏ အသေးစိတ်အချက်အလက်မှာ စုယန်ကို ပုံမှန်အတိုင်း ဖယ်ရှားပစ်ခြင်းပင် ။

ယန်ကျစ်ရှီ တာဝန်ကို လက်ခံရရှိခဲ့ချိန်တွင် စုယန်၏ မျက်ရည်များ အပြည့်ဖြစ်နေသော မျက်နှာကိုသာ တွေ့လိုက်ရသည်။ ထိုကလေးကို ကြည့်ပြီး သူမ အနည်းငယ် တွန့်ဆုတ်သွားမိ၏။

နောက်ဆုံးတွင် ယန်ကျစ်ရှီ ကိုယ်တိုင် တာဝန်ကို မလုပ်နိုင်တော့သဖြင့် စုယန်ကို အခြေစိုက်စခန်းအပြင်ဘက်သို့သာ ရိုက်နှက် မောင်းထုတ်ခိုင်းလိုက်သည် ။ သိပ်မကြာခင်မှာပင် မစ်ရှင်ပြီးမြောက်ကြောင်း ကြေညာမှုကို သူမရရှိလိုက်သည် ။

စနစ်အရ အရင်ကမ္ဘာတွင် စုယန် နှင့် ယန်ယွီတို့မှာ ချစ်သူများဖြစ်ခဲ့သည် ။ သို့သော် အကြောင်းအရင်းတချို့ကြောင့် နှစ်ယောက်သားမှာ တစ်ယောက်နှင့် တစ်ယောက် ယခုဘ၀တွင် လွဲချော်နေခဲ့၏ ။ ယခုတွင် စုယန်မှာ သေဆုံးသွားပြီး ယန်ယွီမှာ လုံးဝ မတူညီသော လမ်းကြောင်းပေါ်တွင် ရောက်ရှိနေပြီ ဖြစ်သည် ။

စနစ်ကပေးလာသော အချိန်အကန့်အသတ်ကို ယန်ကျစ်ရှီ တစ်ချက်ကြည့်လိုက်သည်။ ပေးထားတဲ့ အချိန်က ရှစ်နှစ် ဖြစ်၏ ။

၈ နှစ်ကြာပြီးနောက်တွင် ယန်ယွီ၏ အသက်က ၁၇နှစ် ဖြစ်ပြီပင်။

ယန်ကျစ်ရှီ အနည်းငယ်တွန့်ဆုတ်သွားသော်လည်း ရက်ရောသောအမှတ်များနှင့် တာဝန်ကို သူမ လက်ခံလိုက်သည် ။ ယန်ယွီ နှင့် သိရဖို့အတွက် သူမ လောမနေချေ ။ အရင်ဆုံး လုံရှန်းအခြေစိုက်စခန်းတွင် စုယန် နှင့်ဆင်သော မိန်းကလေးကို ယန်ကျစ်ရှီ အရင်ရှာပြီး သူမကို ဘေးတွင် ခေါ်ထားရပေမည် ။

*****

ချန်းယအခြေစိုက်စခန်း ။

ယခုတွင် အခြေစိုက်စခန်း၌ လုပ်စရာတစ်ပုံတစ်ပင်ရှိနေသည် ။ သူတို့၏ ခွန်အားကို တိုက်ခိုက်ရာ၌ အလွန်အကျွံသုံးစွဲခဲ့သော စွမ်းရည်အသုံးချသူတို့မှာ စိတ်အေးရသောအခါမှသာ ပြန်လည်နာလန်ထူလာကြသည် ။ အခြေစိုက်စခန်းထဲရှိ သာမန်လူတို့မှာ အဖွဲ့အစည်းနှင့် လီထောင်၏ အမိန့်အောက်တွင် သူတို့၏ အိမ်များကို ပြန်လည်တည်ဆောက်နေကြသည်။

အစပိုင်းတွင် အားလုံးက ထိုရက်စက်ကြမ်းကြုတ်ပုံပေါ်သော ဖုတ်ကောင်များကို ကြောက်ရွံ့နေကြသည် ။သို့သော် ယန်ယွီက ထိုဖုတ်ကောင်များကို အမိန့်ပေးနေပြီး သူ့ဘေးတွင်ရှိသော စကားပြောနိုင်သည့် ဖုတ်ကောင် နှစ်ကောင်ကို မြင်တွေ့ရသောအခါ ဖုတ်ကောင်များက အလွန်ကြောက်စရာမကောင်းတာလည်း ဖြစ်နိုင်ကြောင်း အားလုံးတွေးမိလာကြ၏။

ထို့ကြောင့် အခြားအခြေစိုက်စခန်းမှ သူလျှိုများက အခြေစိုက်စခန်းသို့ ရောက်သာအခါ များပြားသော လူအုပ်များနှင့် ဖုတ်ကောင်အုပ်စုများက အတိုင်အဖောက်ညီစွာ အတူတကွ မြို့တံတိုင်းကို တည်ဆောက်နေတာ တွေ့လိုက်ရသည်။

သူတို့အကုန်လုံး၏အတွေးမှာ ယနေ့ သူတို့မျက်လုံးဖွင့်ဖွင့်ချင်း အမြင်မှားနေတာလားဟုပင် ..

****

အခြေစိုက်စခန်းတွင်

စုရွေ့ နှင့် စုဝမ်မှာ ဘယ်သူမှမရှိသလို သဘောထားပြီး မိန်းလမ်းမကြီးပေါ်တွင် လျှောက်သွားနေကြသည် ။ အဘယ်ကြောင့်ဆိုလျှင် စုဝမ်မှာ ယခုလက်ရှိ အဆင့် ၃ ဖုတ်ကောင်၏ အသွင်သဏ္ဍာန်ကို ထိန်းထားသောကြောင့် သူမ၏ ပုံစံက သာမန်လူများနှင့် အလွန်ဆင်ပြီး အခြားဖုတ်ကောင်များလောက် ကြောက်ဖို့ကောင်းမနေပေ ။ ထို့ကြောင့် သူတို့နှစ်ယောက်သွားသော နေရာတိုင်းတွင် အကြီးအကျယ် ရုတ်ရုတ်သဲသဲဖြစ်မသွားပေ။

တစ်ခါတစ်ရံ လမ်းပေါ်တွင် သတ္တိရှိသော ကလေးများရှိတတ်ပြီး သူတို့ရဲ့ ခေါင်းများကို ဖော်ကာ စုရွေ့ နှင့် စုဝမ်ကို စူးစမ်းသလို ကြည့်လာကြသည်။

နှစ်ယောက်သားမှာ အမှုမဲ့အမှတ်မဲ့ဖြင့် အနောက်ဘက်သို့ လျှောက်လာမိကြပြီး ဒဏ်ရာတွေကို ကုသနေသော နေရာသို့ ရောက်လာမိ၏။

ဤအချိန်တွင် ဒဏ်ရာရသူအလွန်များပြီး ချန်းယအခြေစိုက်စခန်းတွင် ပြန်လည်ကုစားနိုင်သောစွမ်းရည်ရှိသူ တစ်ယောက်ပဲ ရှိနေသည် ။ ဒဏ်ရာရသူအများအပြားကို ကုသပေးရသောအခါ လက်မလည်ဖြစ်နေသဖြင့် ပြင်းပြင်းထန်ထန်ဒဏ်ရာရထားသောသူများကိုသာ ဦးစားပေး ကုသပေးရသည်။ အနည်းအကျဥ်းသာ ဒဏ်ရာရထားသော သူတို့ကို အခြေစိုက်စခန်းတွင် သိုလှောင်ထားသော ဆေးဝါးများ၊ ပုံမှန် ဆရာဝန် နှင့် သူနာပြုများ လက်အောက်တွင်သာ အခြေခံကုသမှုများကို ပေးရသည် ။

" ဒေါက်တာ ဝမ် ၊ စခန်းမှာရှိတဲ့ အကိုက်ခဲပျောက်ဆေးအားလုံးက သုံးလို့ကုန်ပြီ "

စုဝမ် နှင့် စုရွေ့ အခန်းထဲသို့ ဝင်လာသောအခါ အကိုက်ခဲပျောက်ဆေးအကြောင်း သူနာပြုက ဆရာဝန်ကို အစီအရင်ခံနေတာ ကြားလိုက်ရသည် ။ ကမ္ဘာ၏ အဆုံးသတ်တွင် ဆေးဝါးတို့မှာ အရေးကြီးဆုံးအရင်းအမြစ်များ ဖြစ်ပြီး ချန်းယအခြေစိုက်စခန်းတွင် တောင့်တင်းသောအုတ်မြစ်မရှိပေ ။ ထို့နောက် မကြာသေးခင်ကလည်း သူတို့အမြောက်အများ သုံးစွဲလိုက်ရသေး၏ ။ ဆေးဝါးမလုံလောက်ခြင်းက ယခုလက်ရှိဖြစ်ပေါ်နေသော အရာပင် ။

သူနာပြု၏ အစီခံချက်ကို ကြားသောအခါ ဒေါက်တာဝမ်ဟုခေါ်သော သက်လတ်ပိုင်းဆရာဝန်အမျိုးသားမှာ မျက်ခုံးများ တွန့်သွားခဲ့သည် ။

" ငါတို့ဘာလုပ်ကြမလဲ အခုချက်ချင်း ခွဲစိတ်ဖို့လိုအပ်နေတဲ့ ဒဏ်ရာရသူတွေအများကြီးရှိသေးတယ် ။ မေ့ဆေးအစား အကိုက်အခဲပျောက်ဆေးသုံးဖို့ စီစဥ်ထားတာ ။ အခုချက်ချင်း ခွဲစိတ်ရတော့မယ်လို့တော့ မပြောနဲ့ "

စွမ်းရည်အသုံးချသူများထံတွင် သာမန်သူများထက် ထူးကဲသော ကျွမ်းကျင်မှုများရှိနေသော်လည်း သူတို့၏ ခန္ဓာကိုယ်မှာ သာမန်လူများကဲ့သို့ပင် ကျိုးပဲ့လွယ်သည် ။

ထို့နောက် ဤစစ်ပွဲတွင် ကျန်ခဲ့သော စွမ်းရည်အသုံးချသူတို့မှာ အခြေစိုက်စခန်းတွင်ကျန်ခဲ့သောသူများ၏ ဆွေမျိုးများပင် ။ သူတို့ ဤနေရာတွင် ရှိနေရခြင်းမှာ သူတို့ချစ်ရသူများကို ထောက်ပံ့ပေးဖို့ဖြစ်၏။ ထွက်ပြေးသွားသော အခြားစွမ်းရည်အသုံးချသူများနှင့် ယှဥ်လျှင် သူတို့အားလုံးမှာ သတ္တိရှိသော သူရဲကောင်းတွေပင်။

" ကျွန်မလုပ်လိုက်မယ် "

ဂရုမမူသလိုပင် မိန်းမတစ်ယောက်၏ အသံက ပေါ်ထွက်လာပြီး ဒေါက်တာဝမ် ခေါင်းလှည့်ကြည့်လိုက်သောအခါ ဖုတ်ကောင်နှစ်ကောင်က သူ့အနောက်တွင် ရပ်နေတာကို တွေ့လိုက်ရသည်။

" အား "

ဘေးတွင်ရှိနေသာ သူနာပြုဆရာမက အထိတ်တလန့်အော်လိုက်ပြီး အားလုံးက စိတ်လှုပ်ရှားစွာဖြင့် သူတို့၏ပါးစပ်များကို ကာထားလိုက်ရကာ စုဝမ် နှင့် စုရွေ့ကို ကြည့်ရင်း အလွန်ထိတ်လန့်နေကြ၏ ။

ဒေါက်တာဝမ်မှာ အသက်ကြီးနေသောကြောင့် အတော်လေးတည်ငြိမ်နေသည် ။ ယန်ယွီက " အစ်မ " နှင့် " အစ်ကို " ဟုခေါ်သော ဖုတ်ကောင်နှစ်ကောင်ကိုလည်း ဒေါက်တာဝမ် သိသည် ။

အားလုံးက ဤ ဖုတ်ကောင်စုံတွဲကို တိတ်တဆိတ်လေ့လာကြနေ၏ ။ အားလုံး၏ စိတ်ကူးထဲတွင် ဤစုံတွဲမှာ အလွန်လွန်နက်နက်ရှိုင်းရှိုင်း ချစ်နေကြပုံပေါ်သည် ။ ကမ္ဘာ၏ အဆုံးသတ်၌ သူတို့၏ ညီငယ်လေးကို ကယ်တင်ဖို့အတွက် သူတို့ကူးစက်ခံလိုက်ရသည် ။ ထို့နောက် သူ့ အစ်မ နှင့် အစ်ကိုက သူ့ကိုကယ်တင်ဖို့အတွက် ဖုတ်ကောင်များ ဖြစ်သွားတာကို တွေ့လိုက်ရသောအခါ သူ့ စိတ်ဝိညာဥ်စွမ်းအားကို မြှင့်တင်ဖို့မတော်တဆ ညီငယ်လေးက လှုံ့ဆော်သွားမိကာ သဘာဝအတိုင်း သန္ဓေပြောင်းသွားခဲ့၏။

သွေးသားတော်စပ်မှု နှင့် စိတ်ဝိညာဥ်စွမ်းအားနှစ်ခုအောက်တွင် ဖုတ်ကောင်နှစ်ကောင်က ယန်ယွီ၏ အနောက်ကိုလိုက်ကာ ကာကွယ်ပေးနေကြ၏ ။ထို့နောက် သူတို့ရဲ့ ဆက်တိုက် တိုးတက်လာမှုများကြောင့် မူလအသိဉာဏ်များကို စတင်ပြန်ရရှိလာကြသည် ။ ယခုတွင် သူတို့ စကားပင် ပြောနိုင်နေပြီ ဖြစ်သည် ။ အပြင်ပိုင်းအသွင်အပြင်မှလွဲ၍ ထိုသူနှစ်ယောက်မှာ သာမန်လူများနှင့် ကွာခြားမှုမရှိကြောင်း သူတို့ပြောနိုင်သည် ။

ဤအရှုပ်တော်ပုံကြီးကို သူတို့စိတ်ကူးပုံဖော်ထားပုံမှာ အလွန်အထင်ကြီးစရာပင် ။

" ဒါက..."

စုဝမ်ကို ဒေါက်တာဝမ်ကြည့်လိုက်သည် ။ တကယ်တမ်းတွင် သူမကို ဘယ်လိုဖော်ပြရမှန်း သူမသိပေ ။ ယန်ယွီခေါ်သလို " အစ်မ " ဟုလိုက်ခေါ်ဖို့တော့ သူ့အတွက် မဖြစ်နိုင်ပေ ။

" မင်း.. မင်းမှာ တကယ်ပဲနည်းလမ်းရှိတာလား ။"

" ငါထင်ယောင်ထင်မှားဖြစ်နေတုန်းပဲ "

စုဝမ် ရှေ့သို့ တိုးလိုက်သည် ။

" ဘယ်သူက ခွဲစိတ်ဖို့လိုအပ်တာလဲ ကျွန်မကို ပြောပြ ကျွန်မ သူ့အတွက် စိတ်ကူးယဥ်ကမ္ဘာကိုရောက်အောင် ဖန်တီးပေးလို့ရတယ် အဲ့လိုဆို သူနာကျင်မှုကို မခံစားရတော့ဘူး ။ "

" တကယ်လား ။ အဲ့ဒါ အရမ်းကောင်းတာပဲ "

ဒေါက်တာဝမ်၏ အဖြေကို စောင့်မနေတော့ဘဲ ဘေးတွင်ရှိသော သူနာပြုဆရာမက စိတ်လှုပ်ရှားစွာ အော်ဟစ်လာခဲ့သည် ။

ဒေါက်တာဝမ် "....."

" အရမ်းကောင်းတယ် ငါ့နောက်လိုက်ခဲ့ "

ထို့နောက်တွင် စုဝမ် ၏ ပုံရိပ်ယောင်အသုံးချမှုက အလွန်အထောက်အကူဖြစ်ပြီး စွမ်းရည်အသုံးချသူသုံးယောက်၏ ခွဲစိတ်မှုကို အောင်အောင်မြင်မြင် ကူညီပေးနိုင်ခဲ့သည် ။ ဒေါက်တာဝမ်၏ တောင်းဆိုမှုအရ ငယ်ရွယ်သောကလေးများနှင့် နာကျင်မှုကို ခံစားနေရသောသူများအတွက်လည်း စုဝမ်က ပုံရိပ်ယောင်ကို အသုံးပြုပေးခဲ့ပြီး လှပသော ပုံရိပ်ယောင်ကမ္ဘာထဲတွင် သူတို့ကို အေးချမ်းစွာ အနားယူစေခဲ့၏။

ထောက်ပံ့ရေးဌာနမှ ထွက်လာပြီးနောက် စုဝမ်ပြုံးနေတာကို စုရွေ့ ဆက်တိုက်ကြည့်နေမိသည်။

" မင်းဘာတွေ ပြုံးနေတာလဲ "

စုဝမ်ကို ကြည့်ရင်း စုရွေ့ ခေါင်းခြောက်စွာရယ်လိုက်မိ၏ ။

" ဘာမှမဟုတ်ပါဘူး "

စုရွေ့ခေါင်းမော့ကာ သူ့ အပေါ်တွင်ရှိနေသာ မီးခိုးရောင် ကောင်ကင်ကြီးကိုကြည့်လိုက်သည်။

"ရှောင်ဝမ်၊ကောင်းကင်ပြာကြီးကို ကြည့်ပါဦး"

"ယုတ္တိရှိတာ ပြောစမ်းပါ"

စုဝမ်သူ့ကို မထောက်ပြဘဲ မနေနိုင်တော့ချေ။ မီးခိုးရောင်အခိုးအငွေ့များ ပြည့်နေသော ကောင်းကင်တွင် ဘယ်နေရာမှာ အပြာရောင်ကောင်းကင်က ရှိမည်နည်း။

" အာ "

စုရွေ့က.စုဝမ်၏ လက်မောင်းကို ဖက်ဖို့ လက်မြှောက်လိုက်သည် ။

" တကယ်က ရှောင်ဝမ်က အကောင်းဆုံးပဲလို့ ကိုယ်တွေးနေတာ အမြဲကြင်နာပြီး ချစ်ဖို့ကောင်းနေတာ "

ဘာကြင်နာတာလဲ ။ ဘာကို ချစ်ဖို့ကောင်းတာလဲ ။

စုဝမ် မျက်လွှာချရင်းဖြေလိုက်သည် ။

" သူတို့လည်း သူတို့မိသားစု ၊ သူတို့တန်ဖိုးထားရတာတွေအတွက် တိုက်ခိုက်နေရတာပဲ ကျွန်မ သူတို့အတွက် လုပ်ပေးနိုင်တာက ဒါပဲရှိတာ ၊ တစ်ခြားဘာမှမရှိဘူး ။ "

ပြီးတော့ ဒါက အထင်ကြီးစရာကောင်းအောင်လုပ်ဆောင်တာပဲလေ...ရှင်နားမလည်ဘူးလို့တော့ ကျွန်မကို မပြောစမ်းပါနဲ့ ။

တကယ်တမ်းတွင် သူတို့နှစ်ဦးစလုံး သတိပြုမိကြသည် ။ ဤဒရမ်မာဇာတ်ဝင်ခန်းကို သူတို့ကိုယ်တိုင် ဦးတည်ရိုက်ကူးပုံဖော်နေခြင်းပင်။

ယခုတွင် ၎င်းက လေလုံးထွားနေခြင်းဟု ပြောလို့ရမည်လား ။ သို့မဟုတ် လွဲမှားနေသော သနားညှာတာမှုဟု ခေါ်ရမည်လား ။

ဤအရာကြောင့် စုဝမ် ရှုပ်ထွေးနေလိမ့်မည် မဟုတ်ပေ ။ အဘယ်ကြောင့်ဆိုလျှင် သူမကိုယ်ကိုယ် သူမအဓိပ္ပါယ်ဖွင့်ဆိုချက်အရ သူမက လူကောင်းတစ်ယောက် မဟုတ်ပေ။

ဗီလိန်တစ်ယောက်အနေနှင့် အခြားသူများရဲ့ နားလည်မှုကိုရော သဘောတူညီချက်ကိုရော မလိုအပ်ပေ။

" နေပါဦး ၊ နေပါဦး ရှင်တို့ စောင့်ကြပါဦး "

သူတို့ တိတ်ဆိတ်သွားသောအခါတွင် သူတို့၏ အနောက်၌ ထိတ်ထိတ်ပြာပြာဖြင့် အမျိုးသမီးတစ်ယောက်ရဲ့ အသံက ပေါ်ထွက်လာသည် ။

စုဝမ် တွန့်ဆုတ်စွာ ရပ်လိုက်ပြီး ဖြည်းဖြည်းချင်း နောက်လှည့်ကြည့်လိုက်၏။ အစောတုန်းက ဒေါက်တာဝမ်၏နောက်မှ လိုက်ပါကူညီနေသော သူနာပြုဆရာမလေးက သူတို့အနောက်သို့ ပြေးလိုက်လာသည်။

" ကျွန်မ နာမည်က နင်းစီးစီး ပါ ကျွန်မရှင်တို့ကို မျက်နှာသာပေးဖို့ တောင်းဆိုချင်လို့ ကျွန်မကို ကူညီပေးပါ"

စုဝမ်ကို နင်းစီးစီးက တည့်တည့်စိုက်ကြည့်လာပြီး သူမရဲ့ မျက်ဝန်းများထဲတွင်မူ မျှော်လင့်ချက်နှင့် တောင်းဆိုမှုများ အပြည့်ဖြစ်နေခဲ့၏ ။

စုဝမ် မျက်ခုံးတွန့်လိုက်မိသည် ။ သူမက တွေ့ကရာလူကို ကူညီပေးနေသည့် မြင့်မြတ်သောမိခင် မဟုတ်ပေ ။

" ကျွန်မမှာ အချိန်မရှိဘူး "

" ကျွန်မရှင့်ကို တောင်းဆိုပါတယ် "

နင်းစီးစီး၏ အသံမှာ ရှိုက်ကြီးတငင်ဖြစ်နေ၏ ။

"ကျွန်မ..ကျွန်မသူ့ကို ပုံရိပ်ယောင်ထဲမှာ ထပ်မြင်ချင်ရုံလေးပါ ။တစ်ချက်ပဲ ကြည့်ရရင်တောင် အဆင်ပြေပါတယ် ။ အရင်တုန်းက မကောင်းခဲ့တဲ့သူက ကျွန်မပါ ။ ကျွန်မရဲ့ မင်းသမီးလေးလိုနေချင်တဲ့ရောဂါ ၊ အလိုဆန္ဒတွေ နဲ့ ဒေါသတွေကို ကျွန်မသူ့အပေါ်ပုံချ ခဲ့မိတာ ။ သူက ချမ်းသာတဲ့မိသားစုက မဟုတ်လို့ ၊သူ့မှာ အလုပ်ကောင်းကောင်းမရှိလို့ ကျွန်မသူ့ကို မုန်းတီးခဲ့တယ် ကျွန်မရဲ့ အမှားတွေပါ ၊ ကျွန်မရဲ့ အမှားတွေပါ ကျွန်မ သူ့ကို လေးလေးနက်နက်သဘောမထားခဲ့ဘဲ သူ့ရဲ့ ကျေးလက်ကလာတဲ့မိဘတွေကိုတောင် ကျွန်မက မောက်မောက်မာမာဆက်ဆံခဲ့သေးတယ် ကျွန်မရဲ့ အမှားတွေကို သိပါတယ် ...ဒီအတိုင်း..."

" သူ့ကို တွေ့ချင်ရုံပဲလား သူက ရှင့်အတွက် သေသွားခဲ့တာ မဟုတ်လား ရှင်က သူ့ကို ထပ်ပြီးတော့ ရှင့်ရဲ့အမှားတွေအတွက် ကျေနပ်ခိုင်းစေချင်သေးတာလား"

စုဝမ် စက္ကန့်အနည်းငယ်လောက် တွန့်ဆုတ်သွားခဲ့ပြီး သူမ၏ နှုတ်ခမ်းစွန်းက အေးစက်စွာ ကွေးတတ်သွား၏။

" စစ်မှန်တဲ့ အထိအတွေ့ပဲ.. ဒီလိုပုံစံရှိတဲ့ရှင်က သူ့ရဲ့ တစ်ဘဝလုံးကို လဲလှယ်ပေးရအောင် လုံးဝမထိုက်တန်ဘူး ဒါကြောင့်..ရှင့်ရဲ့ တစ်ဘဝလုံးကို နောင်တရပြီး ရှင်သန်သွားတာက အကောင်းဆုံးပဲ ပြီးတော့ ရှင်သူ့ကို ပြန်တွေ့နိုင်ဖို့အတွက်က စိတ်မကောင်းပါဘူး မဖြစ်နိုင်ဘူး ရှင့်ကို အဲ့လိုအခွင့်အရေး ကျွန်မပေးမှာ မဟုတ်ဘူး"

သူမ ပြောပြီးသွားသည်နှင့် လျစ်လျူရှူကာ ထွက်သွားလိုက်၏ ။ တစ်ဖက်တွင် စုရွေ့လည်း အနည်းငယ် မျက်နှာအမူအရာပြောင်းလဲသွားပြီး စုဝမ်၏ အနောက်သို့ ခပ်သွက်သွက်လိုက်သွားတော့သည် ။

အချို့သောသူများက ဆုံးရှုံးမှုကြောင့် နာကျင်ခံစားပြီးမှသာ နောင်တရကြသည် ။

သေဆုံးသောသူတို့မှာ မကြားနိုင်တော့ပေ ။ သူတို့ဖြတ်တောက်ခဲ့သော ဒဏ်ရာတို့မှာ ပြန်ကုစားနိုင်ဖို့ အခွင့်အရေးမရှိတော့ပေ ။ အတိတ်တွင် ထာဝရရှင်သန်နေပြီး နောင်တရစွာ နေထိုင်သွားခြင်းထက် အရာအားလုံးကို ဖြတ်တောက်လိုက်ခြင်းက ပို၍ ကောင်းလိမ့်မည်ပင်။

ထို့အပြင် ပြာကျပြီးသွားသော ဇာမဏီငှက်လို အခြားသူများကို ဘယ်လိုတန်ဖိုးထားရမလဲ သိတဲ့သူအဖြစ်ပြန်လည်မွေးဖွားလာခြင်းက ပို၍ ကောင်းလိမ့်မည် ။

သို့မဟုတ် ၎င်းကို သေဆုံးခြင်းဖြင့်သာ အဆုံးသတ်လိုက်သင့်သည် ။

သူ နာကျင်လွန်းလို့ သေမလိုဖြစ်နေသည့်ပုံကို မည်သူ့ကို ပြချင်နေတာလဲ ။ သူ့ကို ချစ်ခဲ့တဲ့သူက မမြင်နိုင်တော့တာ ကြာပြီလေ ။

__🚩

Prev Next