MM Story Teller

Chapter 104

Viewers 4k

🚩Chapter -104

Arc_5 . အရံအမျိုးသမီး ဇာတ်ကောင်၏ တန်ပြန်စနစ် [ 16 ]

____

နောက်ဆုံးတွင် လုံယန်အခြေစိုက်စခန်း၏ သံတမန်များနှင့် တွေ့ဆုံရန်အတွက် ယန်ယွီပြန်လာခဲ့သည် ။ သေချာပေါက် သူဘယ်လိုကိုင်တွယ်မလဲဆိုတာကို စုရွေ့ ရော စုဝမ်ပါ မမေးခဲ့ချေ ။ အဘယ်ကြောင့်ဆိုလျှင် အစောကတည်းကပင် လုံယန်အခြေစိုက်စခန်း၏ လူတို့၌ ကြမ္မာဆိုးမှ ပြန်လှည့်ဖို့ရန် လမ်းမရှိတော့သောကြောင့်ပင် ။

အခြားအခြေစိုက်စခန်းမှလူများကလည်း ယန်ယွီက သန္ဓေပြောင်း စွမ်းရည်အသုံးချသူဖြစ်ပြီး အပြင်ရှိ ဖုတ်ကောင်တို့အား ချန်းယအခြေစိုက်စခန်းကို မချဥ်းကပ်ရဲအောင် ဟန့်တားနိုင်တာကို သိကြသည် ။ ထို့နောက် ချန်းယအခြေစိုက်စခန်းရှိ လူထုမှာ အပြင်ဘက်ရှိဖုတ်ကောင်တို့က ရိုးသား ကြင်နာပြီး လူသားတို့ကို ဘယ်တော့ စတင်မတိုက်ခိုက်ဘူးဟုတောင် ခံစားလာမိကြ၏ ။

သို့သော် တကယ့်အကြောင်းအရင်းအစစ်အမှန်ကိုတော့ သူတို့မသိကြပေ ။အမှန်တရားမှာ ဤဖုတ်ကောင်များက တစ်စုံတစ်ယောက်ထံတွင် အချိန်ကြာရှည်စွာ ထိန်းချုပ်ထားခံရသောကြောင့်ပင် ။ သူတို့ကို ပုံမှန်အတိုင်း ထိန်းချုပ်ထားသောသူမှာ မြို့ထဲတွင် တစ်နေ့လုံးနေနေပြီး တစ်ချိန်လုံး ဘာမှလုပ်ပုံမရသော စုဝမ်ပင် ။

ဖုတ်ကောင်များမှာ ကမ္ဘာပျက်ကပ်နောက်ပိုင်းတွင် ထွက်ပေါ်လာသော မျိုးစိတ်အသစ်များဖြစ်လေ၏ ။ တကယ်တမ်းတွင် ၎င်းတို့က လူသားကဲ့သို့သာ ဖြစ်ပြီး အဆက်မပြတ်ဆင့်ကဲပြောင်းလဲမှု နှင့် လိုက်လျောညီထွေဖြစ်အောင် ရှင်သန်နိုင်စွမ်းလိုအပ်သည် ။

စုဝမ် လွန်ခဲ့သောနှစ်များက ဤအခြေစိုက်စခန်းထဲတွင်သာ နေခဲ့သော်လည်း ရံဖန်ရံခါတော့ စုရွေ့နှင့် အတူ သူမအပြင်ထွက်တတ်သည် ။ သူတို့ လီရှန်းလေးကို ဖုတ်ကောင်အုပ်စုထဲတွင် အဆင့်တက်ဖို့ ခေါ်သွားလေ့ရှိပြီး အခြေစိုက်စခန်းအနီးနားရှိ သန္ဓေပြောင်း ဖုတ်ကောင်များကိုလည်း နှိမ်နင်းလေ့ရှိ၏ ။ အခြားသူများ၏ မျက်လုံးထဲတွင်တော့ ဤနယ်မြေတစ်ဝိုက်ရှိ ဖုတ်ကောင်တို့မှာ အရင်နှစ်များက ဖုတ်ကောင်များနှင့် ကွာခြားမှုမရှိပေ ။သို့သော် ဖုတ်ကောင်စစ်တပ်မှာ ကနဦးအသိရှိနေသော အဆင့်မြင့် ဖုတ်ကောင်များဖြစ်နေ၏ ။ သူတို့၏ အသိဉာဏ်ကို ပြန်လည်ရယူစရာမလိုတော့သဖြင့် လူသားဖြစ်လာနိုင်သည့် သလင်းကျောက်အမြုတေတို့ကို နောက်ထပ်အဆင့်မြှင့်တင်ဖို့ရာလိုအပ်တဲ့ စွမ်းရည်အသုံးချနိုင်သူများကို ဝေပေးခဲ့သည် ။

ယခုတွင် စုယန်လည်း ဤနေရာကို ရောက်လာခဲ့သည် ။ သူမက အဆင့်လေးသို့မရောက်သေးသောကြောင့် သူမ၏ လူသားအသွင်သဏ္ဍာန်ကို ပြန်မရယူနိုင်သေးပေ ။ သို့သော် စုယန်က အလွန်အရည်အချင်းရှိသောကြောင့် ဖုတ်ကောင်စစ်တပ်ကို အုပ်ချုပ်နိုင်လေ၏ ။ ထို့ကြောင့် သူမကို လီရှန်းနှင့်အတူ အခြေစိုက်စခန်းတွင် ယာယီနေထိုင်ခိုင်းဖို့ စုဝမ်ဆုံးဖြတ်လိုက်သည် ။

ပြီးနောက် မကြာမီကာလတွင် လုံယန်အခြေစိုက်စခန်းနှင့် သူတို့တိုက်ခိုက်ရမည့် ပုံပင် ။ ၎င်းက ကြီးမားသောဖုတ်ကောင်အုပ်စု၏ အစွယ်ကို ထုတ်ပြရမည့်အချိန်ပင် ။

ဤကိစ္စ၏ လုပ်ငန်းစဥ်မှာ စုဝမ် ကြိုတင်ခန့်မှန်းထားသည့်အတိုင်း ရိုးရှင်းသည် ။ လုံယန်အခြေစိုက်စခန်းရှိ လူတို့မှာ ယန်ယွီထံမှ ငြင်းပယ်ခံရပြီး ဒေါသထောင်းထောင်းထကာ ပြန်သွားရလိမ့်မည်ပင်။ သူတို့ထွက်သွားပြီး မကြာမီတွင် သူတို့အုပ်စုငယ်လေးက ဖုတ်ကောင်တပ်ဖွဲ့ထံမှ တိုက်ခိုက်ခံရပြီး ကြီးကျယ်စွာ သုတ်သင်ခံရလိမ့်မည် ။

ထိုအခါ လုံယန်၏ ဘက်၌ လျင်မြန်သောတုံ့ပြန်မှုရှိလာလိမ့်မည် ။၎င်းက " သတ်ဖြတ်" ဖို့အတွက် ရည်ရွယ်ချက်ရှိရှိ ချထားသော အစီစဥ်ဖြစ်ပြီး ဤကိစ္စအတွက် တာဝန်ရှိသောသူမှာ သဘာဝကျကျပင် ချန်းယအခြေစိုက်စခန်းမှ လူဖြစ်လိမ့်မည်ဟု သူတို့သေချာပေါက် ယုံကြည်သွားလိမ့်မည် ။

ချန်းယအခြေစိုက်စခန်းကို ပြင်းထန်စွာ ရှုတ်ချနေရင်း သတ်ဖြတ်သည့်သူကို ဆယ်ရက်အတွင်း ဖမ်းဆီးဖို့လည်း လုံးဝရည်ရွယ်ထားသည် ။ မဟုတ်လျှင် လုံယန်အခြေစိုက်စခန်းက ချန်းယအခြေစိုက်စခန်းကို စစ်တပ်ခွင့်ပြုမိန့်ဖြင့် ပြစ်ဒဏ်စီရင်လိမ့်မည် ။

သတင်းထွက်ပေါ်လာသောအခါ ဝန်းကျင်ရှိ အဓိကအခြေစိုက်စခန်းများက သူတို့၏ တပ်ဖွဲ့ကို စတင်လှုပ်ရှားလာလိမ့်မည် ။ အပေါ်ယံတွင် အားလုံးက တာရိုးမှနေ၍ ပွဲကြည့်နေပုံရသော်လည်း တကယ်တမ်းတွင် အကျိုးအမြတ်အတွက် အားလုံးက ငါးဖမ်းဖို့စောင့်နေကြခြင်းပင် ။

ဤအချိန်တွင် ချန်းယအခြေစိုက်စခန်း၏ လူတို့မှာ အလွန်မခံမရပ်နိုင်ဖြစ်နေကြ၏ ။

သူတို့အမြင်တွင် လုံယန်အခြေစိုက်စခန်းမှ သူတို့က သူတို့၏ ဆေးဝါးအသစ်များကို ထောက်လှမ်းဖို့အတွက် လူများစေလွှတ်ခဲ့ပြီး မဟာမိတ်ထူထောင်သည့်ပုံစံဖြင့် သူတော်ကောင်းယောင်ဆောင်နေကြခြင်းပင် ။ ထို့နောက် ယန်ယွီ၏ ငြင်းပယ်ခြင်းကို ခံလိုက်ရသောအခါ ဒေါသထွက်သွားပြီး သူတို့စခန်းကို အမှုဆင်ခြင်းဖြစ်မည် ။ ဤအရာက အမှန်ကို အရှက်မရှိခြင်းပေ ။

ခက်ခဲသောလှိုင်း၏ အောက်တွင် အခြေစိုက်စခန်းတစ်ခုလုံးက စစ်ပွဲအတွက်ကြိုတင်ပြင်ဆင်ခြင်း ကဏ္ဍကို အားအင်အပြည့်အခြေအနေဖြင့် ဝင်ရောက်ခဲ့ကြသည် ။

သူတို့က စစ်ပွဲကို လိုချင်တယ်မလား...ဒါဆိုရင်တော့ စစ်ပွဲဖြစ်လာမှာပေါ့ ။

အခြေစိုက်စခန်းနှစ်ခုကြားတွင် ထူထဲသော ယမ်းမှုန့်နံ့များ ပေါ်လာသောအခါ ယန်ကျစ်ရှီ၏ ဦးဆောင်မှုအောက်၌ လုံရှန်းအခြေစိုက်စခန်းရှိ လူများက ချန်းယအခြေစိုက်စခန်းကို လာရောက်လည်ပတ်ကြသည် ။

အရင်ကတည်းက ယန်ကျစ်ရှီမှာ အစီစဥ်ရှိပြီးသားဖြစ်ကာ ဤအချိန်တွင် ချန်းယအခြေစိုက်စခန်း၏ ဝင်ပေါက်ကို ယန်ဝူ နှင့် အခြားသူများကိုခေါ်၍ ဖြတ်လာသောအခါ သူမ၏ အမူအရာကရုတ်တရက် ပြောင်းလဲသွားခဲ့၏။

စနစ်၏ ဖော်ပြချက် : hostနဲ့ ဆယ်ကီလိုမီတာအတွင်းမှာ ဒေါက်တာအယ်လ်ရဲ့ အငွေ့အသက်ကို ရှာတွေ့ထားပါတယ် ။

ဒေါက်တာအယ်လ်....

အတိတ်ဘဝတုန်းက ထိုလူမှာ အတော်လေးဆန်းကြယ်သော သူပင် ။ လင်ကျင့်ဟူသော နာမည်နှင့် အသက် နှစ်ဆယ့်ခြောက်သာရှိသေးကြောင်း သိရသည်မှလွဲ၍ စနစ်ထဲတွင် ဒေါက်တာအယ်လ်၏ အခြားသောအကြောင်းအရာများက ဗလာနတ္ထိပင် ။

ဤဆန်းကြယ်သော ဒေါက်တာအယ်လ်၏ မျက်နှာအစစ်အမှန်ကို စနစ်က မသိသော်လည်း သူ၏ တည်နေရာကို အနီးဆုံးခန့်မှန်းနိုင်ဖို့အတွက် ထိုလူ၏ အငွေ့အသက်ပေါ်တွင် မှီတည်နိုင်ပုံပင် ။

သူမ အစိမ်းရောင်သစ်ရွက်ဌာနကို ဝင်ရောက်နိုင်ရန် အခွင့်အရေးရဖို့အတွက် အချိန်တော်တော်ကြာကြာစောင့်ရဦးမည်ဟု ယန်ကျစ်ရှီတွေးခဲ့သည် ။ထို့ကြောင့် ဤနေရာတွင် ဒေါက်တာအယ်လ်နှင့် တိုးလိမ့်မည်ဟု သူမ မတွေးခဲ့ပေ ။

အစိမ်းရောင်သစ်ရွက်ဌာန။

မေပယ်ရွက်ဓါတ်ခွဲခန်း။

ယန်ကျစ်ရှီ၏ အကြည့်တို့က ရုတ်တရက် ရွှန်းစိုသွားခဲ့သည် ။

အခုလက်ရှိ ဒေါက်တာအယ်လ်က မေပယ်ရွက်ဓါတ်ခွဲခန်းမှာလို့တော့ မပြောနဲ့ ။

ဤခန့်မှန်းချက်က သူမနှလုံးသားထဲတွင် ပေါ်လာသည်နှင့် တစ်ပြိုင်နက် သူမ၏ အကြံဉာဏ်က မှန်ကန်နေကြောင်း ယန်ကျစ်ရှီ ပို၍ ခံစားလာရသည်။

သူက ဒေါက်တာအယ်လ်ပဲဖြစ်လိမ့်မည် ။ မဟုတ်လျှင် ဖုတ်ကောင်ကူးစက်ရောဂါကို မြှင့်တင်နိုင်သော ဒုတိယ ဉာဏ်ကြီးရှင်တစ်ယောက် ဘယ်လိုလုပ်ရှိနေပါမည်နည်း ။

ထိုကဲ့သော မမျှော်လင့်ထားသည့် အံ့အားသင့်စရာကြောင့် ယန်ကျစ်ရှီ နှင့် ယန်ယွီတွင် အလွန်ဖော်ရွေကာ ရင်းနှီးသမှုပြုရမည့် တွေ့ဆုံမှုရှိလာခဲ့၏ ။

ယန်ကျစ်ရှီ နှင့် ယန်ယွီ တွေ့ဆုံသောအခါတွင် စုရွေ့ နှင့်စုဝမ်က တစ်ဖက်ခန်းရှိ ညီလာခံခန်းမတွင် ပုံမှန်အတိုင်းထိုင်နေကြသည် ။ နှစ်ယောက်စလုံး ဘာစကားမှမပြောဘဲ တစ်စုံတစ်ခုကို အာရုံခံနေကြ၏ ။

သူတို့ ဤကမ္ဘာထဲကို ဝင်ရောက်လာတာ လေးနှစ်တိုင်ရှိခဲ့ပြီး ယန်ကျစ်ရှီ နှင့်ပက်သက်သည့် သတင်းတို့ကို သူတို့ အာရုံစိုက်ကာ စုစည်းခဲ့သော်လည်း ပစ်မှတ်နှင့် အနီးဆုံးရှိနေခြင်းမှာ သူတို့အတွက် ဤအကြိမ်က ပထမဆုံးပင် ။

တစ်ဖက် အစည်းအဝေးခန်းထဲရှိ လူတို့မှာ လေးဖက်လေးလံပျံ့နှံ့နေသည် ။

စုဝမ်က သူမရဲ့အာရုံကို ပြန်ခေါ်ပြီး စုရွေ့ကိုလေးနက်စွာကြည့်လိုက်သည်။

" ရှင်ခံစားမိလား "

" အင်း "

စုရွေ့ခေါင်းညိတ်လိုက်သည် ။

" ယန်ကျစ်ရှီရဲ့ အတွေးပင်လယ်ထဲမှာ သူမနဲ့မသက်ဆိုင်တဲ့ စိတ်ဝိညာဥ်က လှုပ်ရှားနေတယ် ။ အဲ့ဒါက သူမရဲ့ စိတ်ထဲမှာ နေထိုင်နေတဲ့ စနစ်ပဲဖြစ်ရမယ်။အဲ့ဒါက မှတ်ဉာဏ်တု (AI) နဲ့ ဆင်တူပေမယ့်လည်း တကယ်တမ်းက ကပ်ပါးစိတ်ဝိညာဥ်ခန္ဓာပဲ ။အခု အဲ့ဒါက အရမ်းမတည်မငြိမ်ဖြစ်နေပြီး သူ့ရဲ့စိတ်ဝိညာဥ်စွမ်းအားကလည်း ကိုယ့်ထက်အားနည်းတာကို ခံစားမိတယ် ။ ဒါပေမဲ့ ကိုယ်တို့အလျင်စလိုလှုပ်ရှားလိုက်ရင် ကိုယ်သူ့ကို တစ်ချက်ထဲနဲ့ သုတ်သင်နိုင်ပါ့မလားဆိုတာတော့ မသေချာဘူး ။"

" ကျွန်မသိပါတယ် "

စုဝမ် ခေါင်းညိတ်လိုက်၏။

" ဒီအချက်အလက်အရ ယန်ကျစ်ရှီက လတ်တလောမှာ ပြန်လည်ကုစားနိုင်တာနဲ့ အာကာသစနစ် စွမ်းရည်နှစ်ခုအသုံးချနိုင်တဲ့သူဆိုတာ ကျွန်မတို့သိထားတယ် ဒါပေမဲ့ တကယ်တမ်းက မူလ ဇာတ်လိုက်မဆီက အတင်းလုယူထားတဲ့ ပြန်လည်ကုစားနိုင်တဲ့ စွမ်းရည်တစ်ခုပဲ သူမဆီမှာ ရှိတာ အာကာသစနစ်စွမ်းရည်လို့ခေါ်တဲ့အရာက တကယ်တမ်းကျ ရှိမနေဘူး"

"သူမ အသုံးပြုနေတဲ့အာကသစွမ်းရည်က သူမရဲ့ လေဟာနယ်စနစ်ပဲ အဲ့ဒါက ပစ္စည်းကိရိယာတွေကို စုဆောင်းပြီး ဖြည့်စွက်စာတွေနဲ့ သက်ရှိတွေ ထုတ်လုပ်နိုင်ရုံပဲ ။ တကယ်လို့ ယန်ကျစ်ရှီက ဘဝ နဲ့သေခြင်းတရားကပ်ဆိုက်တာကို တစ်ခေါက်လောက်ကြုံတွေ့လိုက်ရမယ်ဆိုရင်တောင် စနစ်ရဲ့ အကူအညီနဲ့ သူမက လေဟာနယ်ထဲကို အလိုအလျောက် ဆွဲသွင်းခံရပြီးသားဖြစ်သွားမှာ "

" ဒါကြောင့် သူမကိစ္စကို ဆောင်ရွက်ဖို့ ကျွန်မတို့အလျင်မလိုဖို့လိုတယ် ။ မဟုတ်ရင် မြက်ရှင်းရင်း မြွေနဲ့တိုးနေလိမ့်မယ် ။ အဲ့လိုဆို အဆုံးမရှိတဲ့ ဘေးအန္တရာယ်တွေ ဖြစ်လာနိုင်တယ် ။ "

လေဟာနယ်စနစ်....

စိတ်ဝိညာဥ် နေထိုင်မှု...

စုရွေ့ ခဏတာမျှ တိတ်ဆိတ်သွားခဲ့သည် ။

" ရှောင်ဝမ် ၊ ကိုယ်တို့ မစ်ရှင်ဖော်ပြချက်အရ ဒီစနစ်က ဒီကမ္ဘာရဲ့ဥပဒေတွေကနေ ငြင်းပယ်ခံထားရတယ် ။ ပြီးတော့ အဲ့ဒါက ယန်ကျစ်ရှီရဲ့ အတွေးပင်လယ်မှာ နေထိုင်နေပြီး ယန်ကျစ်ရှီကို မစ်ရှင်အရင်းအမြစ်အားလုံးကိုပြီးမြောက်အောင်လုပ်ဖို့ တွန်းအားပေးနေတာပဲ ။ သူလုပ်ခိုင်းတဲ့ မစ်ရှင်တွေက ဒီကမ္ဘာရဲ့ဥပဒေသတွေကို ဆန့်ကျင်မယ့် စိတ်ဝိညာဥ်စွမ်းအားကို ပြန်ဖြည့်ဖို့ အရင်းအမြစ်ပဲ ။ ခုနက ယန်ကျစ်ရှီနဲ့ စနစ်ရဲ့ စိတ်ဝိညာဥ်က စိတ်လှုပ်ရှားပြီး မတည်မငြိမ်ဖြစ်နေတာကို အာရုံခံမိသည် ။ ချန်းယအခြေစိုက်စခန်းမှာ သူတို့တစ်ခြားမစ်ရှင်တစ်ခု ရှိနေမယ်လို့ ကိုယ်ခံမှန်းမိတယ် "

စုရွေ့၏ စကားတို့ကို ကြားသောအခါ စုဝမ်၏ အကြည့်တို့က ရုတ်တရက်တောက်ပလာသည် ။

" ရှင်က ..သူမရဲ့ မစ်ရှင်ကို ဖျက်ဆီးဖို့ စဥ်းစားနေတာလား ။ "

" အမှန်ပဲ "

စုရွေ့ ခေါင်းညိတ်လိုက်သည် ။

" သူမရဲ့ အတွေးပင်လယ်ထဲက စနစ်က အစထဲကနေ အခုချိန်အထိ ကိုယ့်ရဲ့ စိတ်ဝိညာဥ်စွမ်းအားကို မရှာတွေ့သေးဘူး ။ ကိုယ် သူတို့ရဲ့ လှုပ်ရှားမှုတွေကို ဆက်စောင့်ကြည့်ပြီး သူတို့လာရတဲ့ အဓိကရည်ရွယ်ချက်ကို ကိုယ်လျှို့ဝှက်စုံစမ်းကြည့်လို့ရတယ် "

အစည်းဝေးခန်းမှ ထွက်လာသော ယန်ကျစ်ရှီမှာ စုရွေ့ထံတွင် သူမစောင့်ကြည့်ခံနေရပြီဖြစ်ကြောင်း မသိခဲ့ပေ ။သူမက စိတ်လှုပ်ရှားစွာဖြင့် ယန်ဝူနှင့် သူမဂရုတစိုက်ပျိုးထောင်ခဲ့သော အခြားစွမ်းရည် အသုံးချသူအမျိုးသမီးကို ခေါ်လာကာ ယန်ယွီနှင့်အတူ ချန်းယအခြေစိုက်စခန်းတစ်ခုလုံးကို လှည့်ပတ်ကြည့်ရှူဖို့ ထွက်လာခဲ့၏။

သူမ မေပယ်ဓါတ်ခွဲခန်းကို ဖြတ်သွားရသောအခါတွင် ယန်ကျစ်ရှီ စက္ကန့်အနည်းငယ်လောက် ပိုနေခဲ့ပြီး ဒဏ္ဍာရီလာ သိပ္ပံပညာရှင်များကို တွေ့နိုင်ဖို့အတွက် ယန်ယွီကို အစ်အောက်မေးခဲ့သည် ။ ကံမကောင်းစွာဖြင့် တစ်ဖက်လူတို့မှာ ဓါတ်ခွဲမှု အလယ်ပိုင်းကို ရောက်နေသောကြောင့် ဤအကြံက ငြင်းပယ်ခံခဲ့ရ၏ ။

သို့သော် ယန်ကျစ်ရှီ စိတ်မပျက်သွားပေ ။ယန်ယွီနှင့် ရွယ်တူလောက်ရှိသော သူမခေါ်လာသည့် စွမ်းရည်အသုံးချနိုင်သူအမျိုးသမီးကို ယန်ယွီအနားတွင် နေဖို့ တစ်ယောက်ထဲထားခဲ့ပြီး သူမ နှင့် ယန်ဝူက အခွင့်အရေးရှာကာ ထွက်လာခဲ့သည် ။

ယန်ယွီက ငယ်သေးသော်လည်း တစ်ဖက်လူ၏ ခန္ဓာကိုယ် အမူအရာမှတစ်ဆင့် အတွေးတို့ကို အရိပ်အကဲဖမ်းရာတွင် ကျွမ်းကျင်လှ၏ ။ ထိုမိန်းကလေးက ရှက်သွေးဖြန်းနေပြီး ယန်ကျစ်ရှီ အလျင်အမြန်ခွဲထွက်သွားတာကို မြင်လိုက်ရသောအခါတွင် ယန်ယွီ၏ အမူအရာက တဖြည်းဖြည်း ယိုယွင်းလာ၏ ။

ဘယ်လို ပျားရည်ထောက်ချောက် မျိုးလဲဟ ၊ သူမက ဒါမျိုးကိုတောင် ကြံနိုင်သေးတယ် ။

ယန်ယွီ၏ မြင်ကွင်းမှ ထွက်လာပြီးသောအခါတွင် ယန်ကျစ်ရှီ သူမရဲ့ ခန္ဓာကိုယ်တစ်ခုလုံးကို ဖြေလျော့ထားပြီး မသိမသာဖြင့် ယန်ဝူကို မေပယ်ရွက်ဓါတ်ခွဲခန်းသို့ ခေါ်ဆောင်လာခဲ့သည် ။ ဤနေရာက လက်ရှိတွင် ချန်းယအခြေစိုက်စခန်း၌ စောင့်ကြပ်ခံရဆုံးသော နေရာဖြစ်ပြီး သူတို့အဝေးမှသာ ကြည့်နိုင်၏ ။

" မမလေး လျို့ယွီကို ယန်ယွီနဲ့ တစ်ယောက်တည်းထားခဲ့လို့ အဆင်ပြေပါ့မလား ။ "

သူ၏ စိတ်ထဲတွင် လျို့ယွီအတွက် ယန်ဝူ စိတ်ပူနေဆဲဖြစ်ပြီး ယန်ကျစ်ရှီ ဓါတ်ခွဲခန်းကိုကြည့်နေသော တဖိတ်ဖိတ်တောက်နေသည့် မျှော်လင့်ချက်တို့ကို မမြင်နိုင်ခဲ့ပေ ။

လျို့ယွီက အပင်စနစ်စွမ်းရည်အသုံးချသူပင် ။သူမကို ရှာဖွေကာ လွန်ခဲ့သော ၂နှစ်က ယန်ကျစ်ရှီပျိုးထောင်ထားခြင်း ဖြစ်၏ ။ ယခုတွင် သူမက ၁၃ နှစ်ရှိပြီဖြစ်ပြီး အဆင့်လေး စွမ်းရည်အသုံးချသူပင် ဖြစ်နေ၏ ။

အစပိုင်းတွင် လျို့ယွီကို ပျိုးထောင်ပေးနေသော ယန်ကျစ်ရှီ၏ အဓိကရည်ရွယ်ချက်ကို ယနေ့ ချန်းယအခြေစိုက်စခန်းကို မလာခင်အထိ ယန်ဝူ မသိခဲ့ပေ ။ယန်ကျစ်ရှီကလျို့ယွီကို အမိန့်ပေးနေတာ သူမတော်တဆကြားသွားသည် ။ ထို့နောက်မှသာ ယန်ကျစ်ရှီက ယန်ယွီကို ပေးဖို့အတွက် လျို့ယွီကို အပင်ပန်းခံပျိုးထောင်ပေးနေကြောင်း သူနားလည်သွားတော့၏။

ဤကိစ္စက ယန်ဝူကို နှလုံးသားထဲ၌ အလွန်မသက်မသာ ခံစားမိစေသည် ။ ဘယ်အချိန်က စတင်ခဲ့လဲ သူမသိသော်လည်း မမလေးက အလွန်ကောက်ကျစ်လာခဲ့၏။

သူမက လုံရှန်းအခြေစိုက်စခန်းကို လေနဲ့ မိုးတို့ကို ဆင့်ခေါ်ခဲ့ပြီး ယန်ကျစ်ရှီ၏ အသုံးတော်ခံထဲတွင် ယန်ဝူလည်း ပါဝင်နေခဲ့သည်။ သူမ၏ မှော်ဆန်သော လေဟာနယ်ထဲတွင် နိဗ္ဗာန်ဘုံကဲ့သို့ အသုံးချနိုင်သောအရာမျိုးစုံရှိနေ၏ ။

[ etran's note: လေနဲ့ မိုးတို့ကို ဆင့်ခေါ်တယ် ဆိုတာက မှော်ဆန်တဲ့စွမ်းအင်ကို အသုံးချတာ ၊ ပြဿနာရှာတာ လို့ အဓိပ္ပာယ်ရပါတယ် ]

ထိုကာလတွင် လုံရှန်းအခြေစိုက်စခန်းကို ထားရစ်ခဲ့ကာ ဤကမ္ဘာပျက်ကပ်တွင် ညီအစ်ကိုများနှင့် ဝေးရာကို သူနှင့် ယန်ကျစ်ရှီ နှစ်ယောက်ထဲထွက်သွားမည်။ သူ့ခန္ဓာကိုယ်ကို မှီခိုပြီး သူမ၏ စွမ်းရည်နှင့် နေထိုင်နိုင်ဖို့ နေရာကို ရှာဖွေကာ ဘာအနှောင့်အယှက်မှမရှိ လွတ်လပ်သောဘဝနှင့် နှစ်ယောက်အတူ နေထိုင်ဖို့ကိုပင် ယန်ဝူ စိတ်ကူးယဥ်ခဲ့မိသည်။ထိုအချိန်သို့ရောက်လာလျှင် ယောကျာ်းက ထယ်ထိုး ၊ မိန်းမက ရက်ကန်းရက်နေရင်း သူတို့အနားတွင် ကလေးများကလည်း ပြေးလွှားနေလိမ့်မည် ။ ထိုအရာက သေချာပေါက် ပျော်ရွှင်ပြီး ချမ်းမြေ့သော မြင်ကွင်းပင် ။

သို့သော် ...

ဤအရာက ယန်ဝူ၏ လွတ်လပ်သော အတွေးများသာ ။

မူလလူမှ ယခု စွမ်းရည်အသုံးချနိုင်သော လုံရှန်းအခြေစိုက်စခန်း၏ ခေါင်းဆောင်အဖြစ် ပြောင်းလဲလာသည့် ယန်ကျစ်ရှီကို သူမျက်မြင်တွေ့ခဲ့သည် ။

တစ်လျှောက်လုံး သူမအနောက်မှ သူလိုက်ပါခဲ့ပြီး လေ နှင့် မိုးတို့မှာ မပြောင်းလဲခဲ့ပေ။

ယခုတွင် သူကသာ သူမ၏ မပြောင်းလဲသော နောက်ကွယ်မှလူသာဖြစ်ပြီး သူမကတော့ သူ့မှတ်ဉာဏ်ထဲကပုံရိပ်နှင့် တဖြည်းဖြည်းဝေးကွာလာခဲ့၏။

__🚩

Prev Next