MM Story Teller

Chapter 222

Viewers 32k

🌍Chapter 222

ထန်မော့ လင်းရှန်းရှီ၏လည်တိုင်ကို ထီးနှင့်ထောက်ထားသည့်တိုင် သူမကိုမူလှည့်ပင်မကြည့်ခဲ့ချေ။ သူကပိုင်ရို့ယောင်အား အေးစက်စွာ ပြုံးပြနေခဲ့သည်။

ဘုတ်ပြားပေါ်မှ မျက်နှာပြောင်လေးမှာ ထိုမြင်ကွင်းကိုမြင်သော် စိတ်လှုပ်ရှားစွာအော်ဟစ်လာခဲ့သည်။

"သတ်ကြ အမြန်သတ်ကြ"

မျက်နှာပြောင်လေး၏၀မ်းသာအားရအားပေးသံနှင့်အတူ ထန်မော့နှင့် ပိုင်ရို့ယောင်တို့ တစ်ဦးကိုတစ်ဦး တိတ်ဆိတ်စွာကြည့်နေခဲ့လေသည်။ ထူးဆန်းသည်က ပိုင်ရို့ယောင်၏ မျက်နှာပေါ်မှာ အပြုံးမှာ တဖြည်းဖြည်းမှိန်ဖျော့လာချိန်တွင် ထန်မော့မျက်နှာပေါ်မှ အပြုံးက ပိုမိုတောက်ပလာခြင်းပင်။

အတော်ကြာပြီးနောက် ပိုင်ရို့ယောင်ကဆိုသည်။

"ထန်ထန် မင်းသူ့ကို မသတ်ပါဘူး.. မင်းကအပြစ်မရှိတဲ့သူတွေကို သတ်တဲ့လူမျိုးမဟုတ်ဘူးဆိုတာ ငါသိပါတယ်"

"စမ်းကြည့်လေ"

ပိုင်ရို့ယောင်မှာမျက်ခုံးကိုပင့်လျက် သူ၏အဖြေမှာ လျို၀မ်ရှန်း၏ လည်တိုင်အပေါ်ယံအလွှာကို လှီးဖြတ်လိုက်ခြင်းပင်။

သွေးများတမဟုတ်ချင်းစီးကျလာခဲ့သည်။ ဤကဲ့သို့ဒဏ်ရာမျိုးမှာ ကမ္ဘာကြီးအွန်လိုင်းပေါ် မတက်မီက အသက်အန္တရာယ်ရှိနိုင်သော ဒဏ်ရာမျိုးဖြစ်ကာ ဆေးရုံသို့ တိုက်ရိုက်ပို့ဆောင်ခံရမှာဖြစ်သည်။

လက်ရှိတွင်တော့ လျို၀မ်ရှန်းမှာ အနည်းငယ်သာ ဖြူဖျော့သွားလျက် သူ၏ဒဏ်ရာမှာ မကြာခင်ပြန်ကောင်းသွားမည်ဖြစ်သည်။ လျို၀မ်ရှန်းပြန်ကောင်းသွားသည်နှင့် ပိုင်ရို့ယောင်က ထန်မော့အား စိန်ခေါ်သောအပြုံးမျိုးပြုံးပြလိုက်သည်။ သူတို့မမျှော်လင့်ထားမိသည်မှာ ထန်မော့ညာလက်မှာ လှုပ်ရှားသွားလျက် ထီးကလေးမှာနိမ့်ဆင်းသွားလျက် လင်းရှန်းရှီ၏ရင်ဘတ်သို့ ထိုးဖောက်လိုက်ခြင်းပင်။

သွေးများကသူမ၏အင်္ကျီကို တမဟုတ်ချင်း နီရဲသွားစေသည်။

ပိုင်ရို့ယောင်၏ အပြုံးမှာ တမဟုတ်ချင်းအေးခဲသွားခဲ့သည်။

ထန်မော့မှာထီးကလေးကိုပြန်နှုတ်လိုက်ပြီး လင်းရှန်းရှီ၏လည်တိုင်တွင်ပြန်ထောက်ထားလိုက်သည်။

သူမ၏ရင်ဘတ်မှဒဏ်ရာမှာပြန်လည်ကောင်းမွန်သွားချိန်တွင် ထန်မော့ကပြုံးလိုက်သည်။

"စမ်းကြည့်လို့ရတယ်လို့"

ပိုင်ရို့ယောင် ထန်မော့အားတိတ်တဆိတ်စိုက်ကြည့်နေခဲ့သည်။

ခတ္တအကြာတွင် သူကထပ်၍ဆိုလာသည်။

"မင်းမသတ်လောက်..."

သူ၏အသံမှာ တမဟုတ်ချင်းရပ်တန့်သွားခဲ့သည်။ အဘယ်ကြောင့်မူ ထန်မော့မှာထီးကလေးကိုရွေ့လျက် လင်းရှန်းရှီ၏လည်တိုင်တွင် သွေးများတမဟုတ်ချင်းစီးကျလာအောင်လုပ်ရန် တွန့်ဆုတ်မနေခဲ့၍ဖြစ်သည်။

သူတို့စကားမဆိုပဲ တစ်ဦးကိုတစ်ဦးကြည့်နေခဲ့ကြသည်။

၃မိနစ်ကြာပြီးနောက် အနက်ရောင်မျှော်စင်မှ ကစားသမားများအား မိမိတို့မူလနေရာဆီပြန်လျက် တတိယအချီအတွက်ပြင်ဆင်ရန်အသိပေးလာခဲ့သည်။ ၄ဦးစလုံးမည်သူမျှမလှုပ်ခဲ့ချေ။ ၁၀စက္ကန့်ကုန်လွန်သွားပြီးနောက် အနက်ရောင်မျှော်စင်မှာ ဒုတိယအကြိမ်ကြေညာရန် အသင့်ပြင်နေခဲ့သည်။

ထိုစဥ်ပိုင်ရို့ယောင်သည် သူ့လက်ကိုပြန်ရုတ်လိုက်ပြီး လှပသော လိပ်ပြာဓါးမှာ သူ၏အင်္ကျီလက််ထဲသို့ပြန်၀င်သွားခဲ့သည်။ သူ့လက်၂ဖက်ကို ဘောင်းဘီအိတ်ထဲထိုးထည့်လျက် ရိုးသားသောအမူအယာဖြင့် သူ၏အကွက်သို့ပြန်လျှောက်သွားခဲ့လေသည်။

"ထန်ထန်မင်းက ပျော်ဖို့လည်းမကောင်းဘူး..လူတွေကိုစခွင့်နောက်ခွင့်လေးတောင်မပေးဘူး"

ပိုင်ရို့ယောင် E1သို့ပြန်ရောက်လာပြီး ထန်မော့လည်း ထီးကလေးကိုဖယ်လျက် သူ၏အကွက်သို့ပြန်သွားခဲ့သည်။

ထန်မော့ ပိုင်ရို့ယောင်ကိုကြည့်လျက် ခိုင်မာစွာဆိုခဲ့သည်။

"မင်းသူ့ကိုသတ်ရင် ငါလည်းသူ့ကိုသတ်မှာ"

ပိုင်ရို့ယောင်၏ အပြုံးမှာ တောင့်တင်းသွားခဲ့သည်။ ထို့နောက်သူကပုခုံးကိုတွန့်လျက် ထပ်၍မဆိုတော့ချေ။

အလင်းနံရံတဖန်ပြန်ရောက်လာပြီး ၂ဖက်အသင်း၏ စကားသံများကို တားဆီးလိုက်တော့သည်။ လျို၀မ်ရှန်းမှာ ဤအခိုက်အတန့်တွင် အလွန်စိတ်အေးသွားခဲ့သည်။ သူသည်ယခုမှ သေတွင်းမှ လွတ်လာသည့်နှယ် အသက်ကိုအပြင်းအထန်ရှူနေခဲလေသည်။ ထို့နောက်သူပြန်လည်ကောင်းမွန်လာပြီး ထန်မော့အား စိတ်ရင်းဖြင့်ကြည့်ကာဆိုခဲ့သည်။

"ထန်...ထန်မော့ ငါ့ကိုကယ်ပေးလို့ ကျေးဇူးပါပဲ"

ထန်မော့သည် ထီးကလေးကို သူ၏ခါးတွင်ပြန်ချိတ်လိုက်သည်။

"ငါမင်းကိုကယ်ခဲ့တာမဟုတ်ဘူး"

လျို၀မ်ရှန်းတန့်သွားခဲ့သည်။

ထန်မော့သူ့အား ရှင်းပြလိုက်သည်။

"ငါသူ့ကိုမသတ်ရင် မင်းသေမှာ..ငါလည်း ၂ယောက် ၁ယောက်ယှဥ်ရတော့မှာပဲ...အဲလိုဆိုငါ့အတွက်နိုင်ဖို့ မဖြစ်နိုင်သလောက်ပဲ"

လျို၀မ်ရှန်းမှာ ထန်မော့အမှန်ကိုပြောနေမှန်းသိ၍ အမူအရာ အနည်းငယ်ပျက်ယွင်းသွားခဲ့သည်။ သူ၏အသင်းဖော်က သူ့ကိုမကယ်ချင်ခဲ့မှန်း ၉၀ရာခိုင်နှုန်းအထိသေချာလေသည်။ ထန်မော့မှာ လျို၀မ်ရှန်းအား ဂိမ်းကိုရှင်းလို၍သာ ကယ်ခဲ့ခြင်းဖြစ်လေသည်။

တစ်ဖက်ခြမ်းတွင်တော့ ပိုင်ရို့ယောင်က ထန်မော့အားပါးစပ်အမူအယာဖြင့် တစ်ခုခုပြောနေခဲ့သည်။

[မင်း လူဆိုး]

ထန်မော့သူ့ကိုလျစ်လျူရှူလိုက်သည်။

ထိုအခါပိုင်ရို့ယောင်က လျို၀မ်ရှန်းကိုကြည့်လျက် ပြောလိုက်ပြန်သည်။

[မင်းက ငတုံး]

လျို၀မ်ရှန်း လက်သီးကိုတင်းတင်းဆုပ်လျက် အကြည့်ကိုလွှဲလိုက်တော့သည်။

ပိုင်ရို့ယောင်က ရယ်လိုက်သည်။

ပိုင်ရို့ယောင်မှာ လျို၀မ်ရှန်းအား သေပြီဟုဆိုခဲ့ကတည်းက ပိုင်ရို့ယောင်မှာ လျို၀မ်ရှန်း၏ သေခြင်းအငွေ့အသက်များကို မြင်ခဲ့လောက်ကြောင်း ထန်မော့ခန့်မှန်းမိခဲ့သည်။ ဆိုလိုသည်မှာ သူအနိုင်ရရှိရန်အတွက် လျို၀မ်ရှန်းကို သတ်ပစ်ရန် လုံး၀ရည်ရွယ်ထားခြင်းပင်။

တကယ်တမ်းတွင် လျို၀မ်ရှန်းမှားယွင်းသွားသော အချက်တစ်ချက်ရှိသည်။ တစ်ဖက်အသင်းအတွက် ဂိမ်းကိုရှင်းရန်မှာ မဖြစ်နိုင်တာမျိုးမဟုတ်ချေ။ ထန်မော့အသင်းနှင့်ပူးပေါင်းရန်တောင်းပန်နေစရာလည်း မလိုအပ်ချေ။ သူတို့သည်တဖက်အသင်းမှ အသင်းဖော်ကို သတ်လိုက်ရုံပင်။

ဂိမ်းစတင်ပြီးနောက် ကစားသမားတစ်ယောက်စီတိုင်းမှာ သာမာန်ကာလျှံကာ လျှောက်သွားနိုင်ခြင်းမရှိပဲ အကွက်ကိုယ်စီတွင် ပိတ်လှောင်ခံထားရသည်။ သူတို့အနေနှင့် မြွေလူသား ပိုင်ရို့ယောင်၏ အကွက်ကိုလျှောက်မသွားမိစေရန်သာ သတိထားရန်လိုအပ်သည်။ သို့သော် ဂိမ်းတချီနှင့် တချီကြား မူလကွက်သို့ပြန်သွားချိန်တွင် ကစားသမားများမှာ ထိန်းချုပ်မခံရပဲ အလိုရှိသလို သွားနိုင်သည်ပင်။

လူအများစုမှာ ၄င်းကိုလျစ်လျူရှူလျက် မိမိအကွက်သို့ပြန်သွားရန်သာ အာရုံစိုက်ထားကြလိမ့်မည်။ အမှန်တကယ်တွင် ဤသည်မှာ သတ်ဖြတ်ရန်အခွင့်အရေးပင်ဖြစ်သည်။

ပိုင်ရို့ယောင်သည် ထိုအခွင့်အရေးကို ဖမ်းဆုပ်လျက် လျို၀မ်ရှန်းကို သတ်ရန်ကြိုးစားခဲ့သည်။

'မင်းကငါ့အသင်းဖော်ကို သတ်ချင်တယ်ပေါ့..ဒါဆိုငါလည်းမင်းအသင်းဖော်ကို သတ်မှာ'

ထန်မော့မှာ ၄င်းကို ပိုင်ရို့ယောင်အား ရှင်းလင်းစွာပြသခဲ့ပြီး ပိုင်ရို့ယောင်လည်း လျို၀မ်ရှန်းကို လက်လွှတ်ရန် ရွေးချယ်ခဲ့သည်။

ထန်မော့မှာ အပြစ်မရှိသူကို သတ်မည်မဟုတ်သော်လည်း ပိုင်ရို့ယောင်မှာ ဤအလောင်းအစားကို မလုပ်ရဲချေ။ သူသည်ထန်မော့ မသတ်လောက်ဟု ထင်သော်လည်း ဖြစ်နိုင်ချေမှာ အပုံတစ်သောင်းတွင် တစ်ပုံသာရှိလျှင်တောင် သူမလုပ်ရဲဘဲ အလျှော့ပေးရန်သာဆုံးဖြတ်ခဲ့သည်။

လျို၀မ်ရှန်းက နောက်ထပ်ဂိမ်းဗျူဟာအတွက် အတွေးတွင်နစ်မြုပ်နေခဲ့သည်။ အရေးအကြီးဆုံးမှာ ထိုသွေးအေးသောငကြောင်နှင့် တစ်ကွက်ထဲ အတူမရပ်ရန်ပင်။ သို့မဟုတ်ပါက ထိုငကြောင်မှာ သူ့ကိုသတ်ရန် လွယ်ကူသွားလိမ့်မည်။ ထန်မော့လည်းသူ့ကို ကယ်နိုင်တော့မည်မဟုတ်သလို လင်းရှန်းရှီကိုလည်း သတ်နိုင်မည်မဟုတ်ချေ။

လျို၀မ်ရှန်း၏ နဖူးတွင် ချွေးစများသီးလာခဲ့သည်။

ထိုစဥ် အလင်းနံရံပျောက်ကွယ်သွားပြီး အနက်ရောင်မျှော်စင်၏ ကြေညာသံထွက်ပေါ်လာခဲ့သည်။

"တင်းတောင်~ တတိယအချီဖြစ်ပါတယ် ကစားသမား ၁က ၄ကွက်ရွေ့နိုင်ပါတယ်

ကစားသမား ၂က ၃ကွက်ရွေ့နိုင်ပါတယ်

ကစားသမား ၃က ၃ကွက်ရွေ့နိုင်ပြီး

ကစားသမား ၄ကတော့ ၂ကွက်တိုးနိုင်ပါတယ်"

လျို၀မ်ရှန်းခေါင်းကိုမော့လျက် ဘုတ်ပြား၏ အလယ်မှ ကလေးမလေးကို ကြည့်လိုက်သည်။ ထန်မော့မှာမူ ထိုရလဒ်ကိုမတွေးထားပုံဖြင့် မျက်လုံးများပြူးကျယ်သွားခဲ့လေသည်။

လျို၀မ်ရှန်းမှာ သူ၏ဒေါသကိုမဖုံးဖိနိုင်ခဲ့ချေ။

"ကစားသမားတွေ ရွေ့ရတဲ့ အကွက်အရေအတွက် မတူနိုင်ဘူးလို့ မင်းမပြောခဲ့ဘူး"

မျက်နှာပြောင်လေးမှာ သူ့ထက်ပင်ဒေါသထွက်နေခဲ့သည်။

"ဒါဆိုသမီးကိုဘာလို့မမေးတာလဲ...မေးရောမေးခဲ့လို့လား...ပြီးတော့ တောင်းရောတောင်းပန်ခဲ့လို့လား..သမီးက ထန်မော့နဲ့ ဖြူချောလေးကိုသိပေမယ့် ရှင့်ကိုတော့ မသိပါဘူး"

"မင်း"

"တင်းတောင်~ ကစားသမားတွေ ရွေ့ရမယ့်အကွက်အရေအတွက်မတူညီကြတာမို့လို့ အကွက်အရေအတွက် အများဆုံးကစားသမားကလွဲရင် ကျန်ကစားသမားတွေက အလှည့်တိုင်းမှာ အကွက်တိုးချင်မတိုးချင်ရွေးချယ်လို့ရပါတယ် ဥပမာ ကစားသမား၂ဟာ ရှေ့ကို ၃ကွက်တိုးနိုင်ပါတယ် ကစားသမား၁ဟာရှေ့ကိုတကွက်တိုးပြီးတဲ့နောက် ကစားသမား၂ကဒီအခွင့်အရေးကို လက်လျှော့ပြီး နောက်အလှည့်မှ ၃ကွက်တိုးလို့ရပါတယ်"

အနက်ရောင်မျှော်စင်၏ ကြေညာမှုပြီးဆုံးသွားပြီးနောက် ကစားသမား၄ဦးမှာ တိတ်ဆိတ်နေခဲ့ပြီး ၄င်း၏ အဓိပ္ပါယ်ကိုတွေးတောနေပုံပင်။

မျက်နှာပြောင်လေးမှာ ကစားသမား ၄ဦး၏ ရယ်စဖွယ် အမူအယာများကိုကြည့်လျက် ပိုင်ရို့ယောင်၏ လေသံကို အတုခိုးလျက်ဆိုလိုက်သည်။

"အိုး မျှတတဲ့ဂိမ်းဆိုတာ ဒါပဲလေ"

အနက်ရောင်မျှော်စင်သည် ကစားသမားများအား ဂိမ်း၏ စည်းမျဥ်းအသစ်ကို နားလည်ရန်အချိန်မပေးပဲ တိုက်ရိုက်စတင်လိုက်တော့သည်။

ဘုတ်ပြားအလယ်တွင် မျက်နှာပြောင်လေးမှာ အလင်းရောင်တစ်ခုလွှမ်းခြုံလျက် ပျော်ရွှင်စွာ သီချင်းလေးညည်းနေခဲ့သည်။ လူသားများမှာ အချိန်မလောက်၍ ပူညံပူညံမလုပ်မနိုင်တော့။ သူတို့မှာ ဤအချီတွင် အကွက်မည်မျှရွေ့ကာ အကျိုးရှိအောင်လုပ်နိုင်မည်ကို အသည်းအသန်စဥ်းစားနေရတော့သည်။

ထန်မော့ အနက်ရောင်မျှော်စင်ဂိမ်းများစွာကို ဆော့ဖူးသော်လည်း စည်းမျဥ်အသစ်ချပေးခြင်းကို ဤတစ်ခါသာကြုံဖူးလေသည်။ ပြီးခဲ့သည့်အခေါက်တိုင်းမှာ အနက်ရောင်မျှော်စင်မှာ ဂိမ်းစတင်စဥ်ကတည်းက စည်းမျဥ်းများကို နားလည်စေရန်ရှင်းပြပေးမည်ဖြစ်သည်။ လှည့်ကွက်တချို့သာထည့်ကောင်းထည့်ထားနိုင်သော်လည်း စည်းမျဥ်းအသစ်ဟူ၍ မရှိခဲ့ချေ။ တဖက်မှကြည့်လျှင်လည်း ကစားသမားများရွေ့ရမည့် အကွက်အရေအတွက်မှာ တူညီလိမ့်မည်ဟု အနက်ရောင်မျှော်စင်က မပြောခဲ့ချေ။

တစ်လှည့်စီမစတင်မီတွင် ကစားသမားများ ရွေ့နိုင်သည့် အကွက်အရေအတွက်ကို ကြေညာပေးမည်ဟုသာဆိုခဲ့သည်။

ဤသည်မှာ ထန်မော့နှင့် ပိုင်ရို့ယောင်တွေးနေခဲ့သော ဂိမ်း၏ မျှချေပင်ဖြစ်လေသည်။

တကယ်တမ်းတွင် ဤသည်မှာ စည်းမျဥ်းအသစ်မဟုတ်ချေ။ ကစားသမားများက အနက်ရောင်မျှော်စင်၏ စကား၀ှက်ထောင်ချောက်တွင်မိသွားခြင်းသာဖြစ်သည်။

ပထမဆုံးအနေနှင့် ကစားသမားတစ်ဦးချင်း ရွေ့နိုင်သော အကွက်အရေအတွက် အတိအကျရှိသည်ဟု မဆိုထားချေ၊ ဤတစ်ချီတွင် ပိုင်ရို့ယောင်က ၄ကွက်ရွေ့နိုင်သည်။ လျို၀မ်ရှန်းနှင့် လင်းရှန်းရှီက ၃ကွက်စီရွေ့နိုင်ကာ ထန်မော့ကတော့ ၂ကွက်သာရွေ့နိုင်လေသည်။ စာအုပ်၏တည်နေရာမှာ A2တွင်ဖြစ်သည်။ ထန်မော့မှာ ၂ကွက်သာရွေ့နိုင်သည်ဖြစ်ရာ A2ကိုမရောက်နိုင်ပေ။ ပိုင်ရို့ယောင်ပင်လျှင် A2ကိုရောက်ရန်ဝေးလွန်းနေခဲ့သည်။ ဤတစ်ကြိမ်တွင် လျို၀မ်ရှန်းနှင့် လင်းရှန်းရှီကသာ စာအုပ်ပါသော အကွက်ကို ရောက်နိုင်သည်။ ပိုင်ရို့ယောင်နှင့် ထန်မော့၏ တာ၀န်မှာ ထိုအကွက်၏ မီးအလင်းအမှောင်ကို ထိန်းချုပ်ရန်ပင်ဖြစ်လေသည်။

ဒုတိယအနေနှင့် ရွေ့နိုင်သောအကွက်အများဆုံး ပိုင်ရို့ယောင်မှလွဲ၍ ကျန်ကစားသမားများက မိမိတို့မည်သည့်အချိန်ရွေ့မည်ကို ဆုံးဖြတ်နိုင်လေသည်။ ဥပမာ ပိုင်ရို့ယောင် ပထမတစ်လှမ်း လှမ်းပြီးသည်နှင့် ကျန်၃ယောက်မှာ ဤအလှည့်ကို ဆန္ဒရှိလျှင် အရှုံးပေးလိုက်နိုင်သည်။ သူတို့သည် ပိုင်ရို့ယောင် ဒုတိယတစ်လှမ်းကိုလှမ်းသောအခါတွင်မှ စရွေ့လိုလျှင်လည်း ရလေသည်။ ဤစည်းမျဥ်းမှာ အဓိပ္ပါယ်မရှိသော်လည်း ၄င်းမှာ အမှန်တကယ်တွင် နောက်ဆုံးရွေ့နိုင်သည့် ကစားသမားကို အဆုံးအဖြတ်ပေးခြင်းဖြစ်သည်။

ထန်မော့မှာ နောက်ဆုံးရွေ့ရမည့်ကစားသမားဖြစ်စေရန် နောက်ဆုတ်၍နေခဲ့ရန်လိုအပ်ကြောင်း သံသယ၀င်စရာပင် မလိုချေ။

ဂိမ်း၏ တတိယအချီမှာ လျှင်မြန်စွာစတင်ခဲ့သည်။ လင်းရှန်းရှီနှင့် လျို၀မ်ရှန်းမှာ A2အနီးတွင် ရပ်နေခဲ့ကြသည်။ ပိုင်ရို့ယောင်က A2ကို ဂရုမစိုက်ပဲ E4သို့တစ်လှမ်းချင်းလှမ်းသွားခဲ့ကာ ထန်မော့ရှေ့တွင်ရပ်လိုက်သည်။ သူသည်ထန်မော့ကို ပြုံးပြနေခဲ့သည်။ ၂ကြိမ်မျှငြိမ်နေပြီးနောက် ထန်မော့ D5သို့ ပထမဆုံးလှမ်းလိုက်လေသည်။

ပိုင်ရို့ယောင်မှာ သူ့ကိုကြည့်လျက် သူ၏နောက်ဆုံးအရွေ့ကို E5ကိုရွေးရန် တွန့်ဆုတ်မနေခဲ့ချေ။

လျို၀မ်ရှန်းမှာ သူ၏ရှေ့မှ အမျိုးသမီးကို သတိထားလျက်ကြည့်လိုက်သည်။ ထို့နောက် သူA2ကိုလှမ်းလိုက်လေသည်။

ထို့နောက် ကလစ်ဟူသော အသံဖြင့် A2၏အလင်းမှာ ပိတ်သွားခဲ့လေသည်။

ထိုအချိန်တွင် လင်းရှန်းရှီမှာ ထူးဆန်းမှုတစ်ခုခုကို သတိမထားမိသ၍သူမ A2ကိုရွေ့ကာ အကွက်မှာလည်း မီးလင်းလာလိမ့်မည်။ ပိုင်ရို့ယောင်မှာ အကွက်၏ အလင်းအမှောင်ကို ထိန်းချုပ်နိုင်စွမ်းမရှိတော့ချေ၊ ထန်မော့သာ ထိုအကွက်၏ အလင်းအမှောင်ကို ထိန်းချုပ်နိုင်သ၍ ထန်မော့နှင့် လျို၀မ်ရှန်းတို့အနိုင်ရရှိနိုင်လေသည်။

သို့သော် လင်းရှန်းရှီမှာ လျို၀မ်ရှန်းကိုတစ်ချက်ကြည့်လျက် B1သို့လျှောက်သွားလိုက်ကာ A2၏ အလင်းကို မဖွင့်ပေးခဲ့ချေ။

လျို၀မ်ရှန်းမှာ ထိုရလဒ်ကို ကြိုတင်မျှော်လင့်ထားပြီးဖြစ်သော်လည်း စိတ်ပျက်လက်ပျက်ဖြင့် လက်ချောင်းများကို တင်းတင်းဆုပ်လိုက်မိဆဲဖြစ်သည်။

"ငါကအဲလောက်တောင် တုံးတဲ့ပုံပေါက်လို့လား"

ကြည်လင်သော အမျိုးသမီးအသံကို ကြားလိုက်ရလေသည်။

🌍

Prev Next