MM Story Teller

Chapter 225

Viewers 32k

🌍Chapter 225

ကမ္ဘာကြီးအွန်လိုင်းပေါ် တက်လာစဥ်ကပင် ထန်မော့၏ ကိုယ်ခွန်အားနှင့် စိတ်ပိုင်းဆိုင်ရာမှာလည်း အလွန်သန်မာလာခဲ့ပြီးနောက် စိုးရိမ်ပူပန်ခြင်းဟူသော ခံစားချက်ကို မေ့လျော့နေခဲ့သည်မှာပင် ကြာလေပြီ။ ယခုအချိန်တွင် သူပထမဆုံး စိုးရိမ်ပူပန်ခြင်းကို ခံစားလိုက်ရသည်။ ၄င်းမှာ သူကြုံနေရသောအရာအတွက် မဟုတ်ဘဲ ဖူ၀မ်သော်၏ မျှော်စင်တိုက်ခိုက်ခြင်းဂိမ်းကြောင့်သာဖြစ်သည်။

သူက ဤနေရာတွင် ရပ်နေပြီး သူလူပ်ပေးနိုင်သော တစ်ခုတည်းသော အရာမှာ ဂိမ်းသိမ်းမှတ်ကို ဖွင့်ပေးခြင်းပင်။ သူသည် ဤဂိမ်းကိုလျင်မြန်စွာအဆုံးသတ်ချင်ပြီး တစ်ဖက်မှ အခြေအနေကို အမြန်ဆုံးသဘောပေါက်ရန် ကြိုးစားချင်မိသည်။

ထန်မော့၏ အကြည့်တို့ ခိုင်မာလာခဲ့သည်။

အနက်ရောင်မျှော်စင်၏ အကျင့်အရ ၀ံပုလွေကြီးနောက်တစ်ကြိမ်ပြန်ရောက်လာမည်မှာ သေချာသလောက်ပင်။ ဒုတိယအကြိမ်မှာ ပထမအကြိမ်ထက်ပို၍ ခက်ခဲမည်။ ကစားသမားများအပေါ် သူမပေးသောဖိအားမှာလည်း ၂ဆပိုများလာလိမ့်မည်။

အပြာရောင်အလင်းနံရံပျောက်ကွယ်သွားပြီး ပစ္စည်းအခု၂၀ပေါ်လာပြန်သည်။

ထန်မော့ရုတ်ချည်းပါးစပ်ကိုဖွင့်လိုက်သည်။

"ပိုင်ရို့ယောင် ငါတို့ပူးပေါင်းကြမလား"

လျို၀မ်ရှန်းမှာ ထန်မော့အားထူးဆန်းစွာကြည့်လာခဲ့သည်။ ယခုလေးတင် သူကိုယ်တိုင်ပင် ထိုငကြောင်မှာ ပူးပေါင်းရန်လက်မခံလောက်ဟုဆိုခဲ့သည်မဟုတ်ပါလား။ ယခုမှအဘယ်ကြောင့် ထိုမေးခွန်းကို မေးနေရပါသနည်း။

ပိုင်ရို့ယောင်ကရယ်သည်။

"ပူးပေါင်းမယ်ပေါ့ ထန်ထန် မင်းငါ့ကိုတောင်းပန်နေတာလား"

သေချာပေါက် သူက ပူးပေါင်းမည်မဟုတ်ချေ။

လျို၀မ်ရှန်းမှာ ဦးစားပေးမှုအစဥ်လိုက်၏ အဓိကရည်ရွယ်ချက်ကို သိရပြီးနောက် ထိုရွံမုန်းစရာကောင်းသောကလေးမျက်နှာနှင့်လူရွယ်အား ကြည့်လျက် သူ၏ရင်ထဲမှ အေးစက်လာခဲ့သည်။ လက်ရှိကစားသမား၄ယောက်တွင် ပိုင်ရို့ယောင်မှာ သေနိုင်ချေအနည်းဆုံးသူဖြစ်သည်။ ထို့ကြောင့် သူ မည်သူနှင့်မျှ ပူးပေါင်းမည်မဟုတ်ချေ။ ပူးပေါင်းလိုလျှင် ပိုင်ရို့ယောင်ကို တောင်းပန်ရမှာဖြစ်သည်။

ထန်မော့ ပိုင်ရို့ယောင်၏ မေးခွန်းကို မတုန့်ပြန်ခဲ့ချေ။

လျို၀မ်ရှန်းမှာ ထန်မော့သည် လင်းရှန်းရှီအား ၀ံပုလွေကြီးပြန်ရောက်လာသော် သူမအရင်ဆုံးသေရမည်ဖြစ်ကြောင်း ပြောလိမ့်မည်ဟု ထင်ခဲ့သည်။ သို့တိုင်အောင် ထန်မော့က ဘာကိုမျှမဆိုခဲ့ချေ။ လျို၀မ်ရှန်းမှာ ထူးဆန်းသည်ဟု ခံစားနေရစဥ် ထန်မော့သူ့အား ကြည့်လာခဲ့သည်။ သူကပါးစပ်ကို အလျင်အမြန်ပိတ်လိုက်ကာ ဘာကိုမျှ မဆိုရဲတော့ချေ။

ကစားသမားများကြားမှ လေထုမှာ ထူးဆန်းလာခဲ့လေသည်။

မျက်နှာပြောင်လေးမှာ စားပွဲပေါ်တွင်လဲလျောင်းလျက် ကစားသမားများကို ကြည့်လိုက်သည်။ သူမကနှာခေါင်းရှုံ့လျက် တီးတိုးရေရွတ်လိုက်သည်။

"ဘာလို့ အရင်ကလူတွေနဲ့ မတူကြတာလဲ"

မည်သူကမှ သူမ၏မေးခွန်းကို မဖြေလာခဲ့ချေ။

ပစ္စည်းအခု၂၀ထဲတွင် စာအုပ် တစ်အုပ်သာ ပါရှိလေသည်။

အနက်ရောင်မျှော်စင်၏ ကြေညာချက်ပြီးနောက် ကစားသမားများမှာ ကိုယ်စီအကွက်များသို့လျှောက်သွားလိုက်ကြကာ ဂိမ်းမှာရှုံးနိမ့်နေဆဲပင်။ အနက်ရောင်မျှော်စင်မှ သူတို့အား မူလနေရာသို့ပြန်သွားရန်ပြောခဲ့ကာ မျက်နှာပြောင်လေးမှာ စိတ်လှုပ်ရှားစွာ ထထိုင်လာခဲ့သည်။

သူမသည် မိမိတို့တစ်ယောက်ကိုတစ်ယောက်သတ်ကြမည်ကို စောင့်မျှော်နေသည်မှာ သိသာလှသည်။ သို့သော် သူတို့သည် တိုက်ခိုက်ခြင်းမရှိပဲ သက်ဆိုင်ရာအကွက်တွင်သာ တိတ်ဆိတ်စွာရပ်နေကြလေသည်။

မျက်နှာပြောင်လေးမှာ အေးခဲသွားခဲ့သည်။ သူမ စက္ကန့်အနည်းငယ်ထပ်စောင့်ပြီး ဤကစားသမားများမှာ တစ်ဦးကိုတစ်ဦးမသတ်လိုကြဟု အတည်ပြုပြီးနောက် စိတ်ပျက်လက်ပျက်ဖြင့် စားပွဲပေါ်သို့ပြန်မှောက်သွားခဲ့သည်။

ထန်မော့ သူမကိုကြည့်လျက် ခေါင်းထဲမှ အသံကိုလည်းနားထောင်နေရင်း လျင်မြန်စွာတွေးတောနေခဲ့သည်။

ယေဘုယျအားဖြင့် ကစားသမားများမှာ တစ်ဦးကိုတစ်ဦးသတ်ရန် အလျင်မလိုကြချေ။ သာမာန်ကစားသမားများမှာ ၀ံပုလွေကြီးပေါ်လာပြီးမှသာ တစ်ယောက်ကိုတစ်ယောက်ရှင်းထုတ်ရန်အလျင်လိုလာကြမည်ဖြစ်သည်။

ပိုင်ရို့ယောင်မှလွဲ၍။

ထိုသူသည်လျို၀မ်ရှန်းအား လမ်းကြိုရှင်းသည့်သဘောဖြင့် သတ်ချင်ခဲ့သည်။ ပိုင်ရို့ယောင်ကအရင်လှုပ်ရှားခဲ့ပြီးပြီဖြစ်၍ လက်ရှိတွင် သူတို့တစ်ယောက်ကိုတစ်ယောက် သတ်ရန် မကြိုးစားကြခြင်းပင်။ ထပ်ပေါင်းဆိုရသော် ပိုင်ရို့ယောင်မှာ ဦးစားပေးမှုအစဥ်လိုက်၏ ထိပ်ဆုံးတွင်ဖြစ်သည်။ ထန်မော့သေသွားလျှင်တောင် သူကကျိန်းသေရှင်ကျန်ရစ်ပေမည်။ ထို့ကြောင့် သူသည် ထိုပျင်းစရာကောင်းသောလှုပ်ရှားမှုမျိုး လုပ်ရန်စိတ်မပါတော့ချေ။ သူဘာမှလုပ်မလာသ၍ မည်သူကမှလည်းစတင်လာကြမည်မဟုတ်ချေ။

အသံကာနံရံပေါ်လာသည်နှင့် လျို၀မ်ရှန်း၏ စိတ်အခြေအနေမှာ သိပ်မကောင်းလှချေ။

"သေစမ်း...ငါတို့ဒီလိုပဲဆက်သွားပြီး ၀ံပုလွေနောက်တစ်ကြိမ်ပြန်လာမှာကို စောင့်နေရမှာလား"

လင်းရှန်းရှီမှာ အားအနည်းဆုံးဖြစ်သော်လည်း လျို၀မ်ရှန်းမှာလည်း အရမ်းသန်မာနေခြင်းမဟုတ်ချေ၊ သူခံစားနေရသည်မှာ နောက်တစ်ကြိမ် ၀ံပုလွေပြန်လာသည်နှင့် သူသည် လင်းရှန်းရှီကြောင့် ရှင်ကျန်နေဦးမည်ဖြစ်သည်။ သို့သော် ၀ံပုလွေတတိယအကြိမ်ရောက်လာာသော အခါတွင်မူ သူလည်း ကျိန်းသေပေါက် သေရတော့မည်ဖြစ်သည်။

သူဘာလုပ်ရမလဲ...

ဒီသေခြင်းအစဥ်လိုက်ကြီးကဘယ်လို ရုန်းထွက်ရမလဲ...

လျို၀မ်ရှန်းမှာ တဖက်အသင်းအား ပူးပေါင်းရန်တောင်းပန်ခိုင်းခဲ့မိခြင်းကို ပထမဆုံးအကြိမ် နောင်တရလာမိသည်။ သူသာ ဂိမ်းအစကပင် ပူးပေါင်းရန် သဘောတူညီခဲ့လျှင် ယခုအချိန် သူတို့အတူပူးပေါင်းလျက် ဂိမ်းကိုရှင်းနေလောက်ချေပြီ။

"ငါအနက်ရောင်မျှော်စင်ဂိမ်းတွေအများကြီးဆော့ဖူးတယ်...အနက်ရောင်မျှော်စင်ရဲ့သဘောကတော့ ကစားသမားတွေကို အချင်းချင်းသတ်ဖို့ထက် ပူးပေါင်းစေချင်သလိုပဲ။

လျို၀မ်ရှန်းမှာ မျှော်စင်ပထမထပ်ကိုရှင်းထားပြီးဖြစ်၍ အနက်ရောင်မျှော်စင်၏ ဂိမ်းများအကြောင်း အနည်းငယ် နားလည်လေသည်။

"ထန်...ထန်မော့ ငါတို့ဒီဂိမ်းကိုရှင်းဖို့ဆို အတူပူးပေါင်းဖို့လိုမှာသေချာတယ်..မင်းနဲ့ အဲဒီငကြောင်နဲ့ သိကြပုံပဲ...မင်းပြောရင်...သူပူးပေါင်းဖို့လက်ခံလောက်လား"

တိတ်ဆိတ်မှုတစ်ခုကိုသာ ပြန်လည်ရရှိခဲ့လေသည်။

လျို၀မ်ရှန်း သူ့ဘက်သို့လှည့်လာခဲ့သည်။

"ထန်မော့"

ထန်မော့မှာ မျက်လုံးကိုမှိတ်ထားလျက် သူ၏ခေါင်းထဲမှ တိုက်ခိုက်သံများမှာ ရုတ်ချည်းရပ်တန့်သွားခဲ့သည်။ ထန်မော့သည် အသက်ရှူအောင့်လျက် တစ်ဖက်မှ လှုပ်ရှားမှု အသံလေးတစ်စကိုပင်မကြားရခင်အထိ စိတ်ရှည်လက်ရှည် စောင့်နေခဲ့လေသည်။ မိနစ်၀က်ခန့်ကြာပြီးနောက် ခပ်နိမ့်နိမ့်အမျိုးသားအသံတစ်ခုက သူ၏နားထဲ ညင်သာစွာရောက်ရှိလာခဲ့သည်။

"ဘာမှမဖြစ်ပါဘူး ထန်မော့"

ထန်မော့ စိတ်သက်သာရာရစွာ သက်ပြင်းချလိုက်သည်။

"ဘာဖြစ်ခဲ့တာလဲ"

ကြီးမားသော ဖန်တောင်ကြီးရှေ့တွင် ဖူ၀မ်သော်နှင့် လူလတ်ပိုင်းတစ်ဦးမှာ တောင်ကိုမီလျက် ထိုင်နေခဲ့ကြသည်။ ဖူ၀မ်ရှန်းက ဖူ၀မ်သော်၏ လက်မောင်းအပေါ် သူ၏လက်များကို တိုက်ရိုက်တင်လိုက်ပြီး ကြည်လင်သော ရေများက သွေးလွှမ်းနေသောဒဏ်ရာများအပေါ်ဖုံးလွှမ်းသွားခဲ့သည်။ ထန်မော့သည် ဖူ၀မ်သော်၏ လက်မောင်းပေါ်တွင် ကြောက်မက်ဖွယ် ကိုက်၍ဆုတ်ဖြဲခံထားရသော ဒဏ်ရာကြီးရှိကြောင်း ထိုညင်သာသော အသံမှတဆင့်မည်သို့မျှခန့်မှန်းနိုင်မည်မဟုတ်ချေ။

သူ၏လည်တိုင်မှာလည်း ကြီးမားသော ကိုက်ဖဲ့ရာကြီးရှိနေကာ သူ၏လည်တိုင်မှာ လုံး၀ပြုတ်ထွက်လုနီးနီးပင်။

ဖူ၀မ်ရှန်း၏ကုသစွမ်းရည်နှင့် ဖူ၀မ်သော်၏ မျိုးရိုးဗီဇပြန်လည်ဖွံ့ဖြိုးခြင်းနှင့် ပေါင်းစပ်လိုက်သောအခါ ဖူ၀မ်သော်၏ မျက်နှာမှာ သွေးရောင်ပြန်လွှမ်းလာခဲ့သည်။

သူ၏လည်တိုင်မှ ဒဏ်ရာမှာ လုံး၀ပြန်ကောင်းသွားခဲ့ကာ ဖူ၀မ်သော်ကဆိုလာသည်။

"အခုလေးတင် အတော်သန်မာတဲ့ မွန်းစတားတွေနဲ့ ကြုံခဲ့တာ..အခုတော့အဆင်ပြေသွားပါပြီ..အဲ့ဘက်မှာရော အခြေအနေဘယ်လိုလဲ"

"ပိုင်ရို့ယောင်က ဂိမ်းထဲထိ ကျွန်တော့်နောက်ကိုလိုက်လာတယ်"

ဖူ၀မ်သော် မျက်မှောင်ကျုံ့လိုက်မိသည်။

"သူလည်း ၀င်လာတာလား"

"အရေးမကြီးပါဘူး...သူနဲ့ကျွန်တော်က တစ်သင်းထဲမဟုတ်တော့ သူလိုက်ရှုပ်နေလဲ ပြဿနာသိပ်မရှိဘူး.

ခင်များရော ဘာတွေဖြစ်နေတာလဲ...တတိယထပ်က အဲလောက်မခက်သင့်ဘူးလေ"

ဖူ၀မ်သော်၏ ခွန်အားဖြင့် တတိယထပ်ကို အလွယ်တကူရှင်းနိုင်သည်။ ထို့ကြောင့် ဖူ၀မ်သော်နှင့် ဖူ၀မ်ရှန်း မျှော်စင်တိုက်ခိုက်ရန် အတူ၀င်သွားခြင်းကို စိတ်ပူမနေဘဲ ဘုရင့်ရွှေဒင်္ဂါးကို မပေးလိုက်ခြင်းပင်။ ဂိမ်းသိမ်းမှတ်ကိုပင်ဖွင့်ရအောင်အထိ အဘယ်ကြောင့် ခက်ခဲသွားရပါသနည်း။

ဖူ၀မ်သော်၏ လက်မောင်းမှ အသားများမှာ မြင်နိုင်သော အလျင်ဖြင့် ပြန်လည်ဖွံ့ဖြိုးလာပြီး အရိုးများပြန်ထွက်လာသော ခံစားချက်မှာ သိပ်တော့ မကောင်းလှချေ။ ဖူ၀မ်သော် မျက်ခုံးများတွန့်ချိုးလျက် တောင်ကိုမှီလိုက်သည်။ သူ၏ စိတ်ထဲတွင် အချိန်ကို တွက်ချက်နေခဲ့ပြီး ထန်မော့ ထပ်စကားပြောလာတော့မည့်အချိန်မှာပင် သူကဆိုလိုက်သည်။

"ရှောင်ရှန်းက ခက်ခဲမှုအဆင့်ကို မတော်တဆဖွင့်မိသွားတာထင်တယ်"

ထန်မော့ အံ့အားသင့်သွားခဲ့သည်။

"တတိယထပ် ခက်ခဲမှုအဆင့်လား"

"အခုက မျှော်စင်တိုက်ခိုက်ဂိမ်းကို ရှင်းဖို့နည်းလမ်းက မရေရာဘူးဖြစ်နေတယ်...ကိုယ်နဲ့အတူ အသင်း၂သင်း စုစုပေါင်း ကစားသမား၄ယောက် မျှော်စင်ကိုတိုက်ခိုက်နေကြတာ..ကိုယ်က တတိယထပ်မှာ သူတို့က ရှောင်ရှန်းလိုပဲ ဒုတိယထပ်မှာ..ဂိမ်းစတော့ ပြဿနာနည်းနည်းကြုံရတယ်လေ..တစ်ယောက်သွားပြီးတော့ ရှောင်ရှန်းက ကိုယ်တို့ကိုကယ်ဖို့ မြေအောက်လူသားတစ်ယောက်ကို သတ်လိုက်တာ"

ဖူ၀မ်သော်၏ လက်မှာ လုံး၀အသစ်ပြန်ထွက်လာခဲ့သည်။ သူကထိုလက်ကို ဖြေလျော့ရင် ဆက်ပြောလိုက်သည်။

"မိနစ်ပိုင်းလေးတုန်းက သူမင်းနဲ့အတူ ရတနာကော်ရစ်တာမှာရလာတဲ့ အကူပစ္စည်းကို သုံးလိုက်တယ်"

ထန်မော့ကမေးလိုက်သည်။

"လရောင်ပန်းလား"

"အင်း...သူအဲဒါကိုသုံးပြီး ကိုယ်တို့ ဂိမ်းဘယ်လိုရှင်းရမလဲဆိုတာကို ရှာကြည့်တာ..အဖြေက ကိုယ်တို့ဒီဂိမ်းကိုရှင်းဖို့ အဲဒီသေသွားတဲ့ မြေအောက်လူသားရဲ့ အကူအညီနဲ့ ဂူတစ်ခုကိုဖွင့်ရမှာဖြစ်နေတယ်"

၄င်းမှာ သူကြိုတင်မမျှော်လင့်ထားသော ရလဒ်တစ်ခုဖြစ်သည့်တိုင် ဖူ၀မ်သော်၏ လေသံမှာ ပူပန်နေပုံမပေါ်ပေ။

"ကြည့်ရတာ ကိုယ်တို့ ရိုးရိုးနည်းနဲ့ဒီဂိမ်းကို ရှင်းလို့မရတော့ပုံပဲ ဒုတိယနည်းကိုပဲရွေးရတော့မယ်.. လောလောဆယ်တော့ အဲဒီနည်းကိုရှာမတွေ့သေးဘူးဆိုပေမယ့် အနက်ရောင်မျှော်စင်ဂိမ်းတွေမှာ ရှင်းလင်းနည်း တစ်နည်းထက်ပိုရှိမယ်လို့ ကိုယ်တော့ထင်တယ်"

ရိုးရှင်းသော နည်းမှာ ရိုးရိုးအဆင့်ဖြစ်ကာ..

ခက်ခဲသော နည်းမှာ ခက်ခဲမှုအဆင့်ဖြစ်သည်။

ထို့ကြောင့်ဖူ၀မ်သော်မှာ သူတို့ ခက်ခဲမှုအဆင့်ကိုဖွင့်လိုက်မိပြီ ထင်ကြောင်းပြောခဲ့ခြင်းပင်။

သို့သော် ထိုစကားလုံးများက ထန်မော့ကို တမဟုတ်ချင်းတိတ်ဆိတ်သွားစေခဲ့သည်။

ဖူ၀မ်သော်မှာ ထန်မော့၏ ထူးဆန်းနေမှုကို ချက်ချင်းခံစားမိလျက် တီးတိုးခေါ်လာခဲ့သည်။

"ထန်မော့.."

"ဘယ်အနက်ရောင်မျှော်စင်ဂိမ်းမဆို ရှင်းလင်းနည်း တစ်နည်းထက်ပိုရှိနိုင်တာလား"

ဖူ၀မ်သော် မျက်ခုံးပင့်လိုက်မိသည်။

ထန်မော့သက်ပြင်းချလိုက်ကာ မပြုံးဘဲမနေနိုင်ခဲ့ပေ။

"ဒီတစ်ခါ ကျွန်တော်၀င်လာတဲ့ အစစ်အမှန်ဂိမ်းက မခက်ပေမယ့် အရမ်းတင်းကြပ်လွန်းနေတာ..ကျွန်တော်ပြန်လာရင်ပြောပြမယ််..တကယ်တော့ ရှင်းရှင်းလေးရယ်ပါ"

"အိုကေ"

ဂိမ်းသိမ်းမှတ်ကိုဖွင့်ထားသည်မှာ မိနစ်၂၀ရှိပြီဖြစ်ကာ မိနစ်၄၀ကျန်နေဆဲဖြစ်သည်။ သူတို့၂ဦးစလုံး ၄င်းကို ပိတ်လိုက်ရန် ရည်ရွယ်ချက်မရှိကြချေ။ ပထမအချက်အနေဖြင့် ၄င်းမှာ ဖူ၀မ်သော်နှင့် မတော်တဆမှုများကို ရှောင်ရှားနိုင်လိမ့်မည်။ ဒုတိယအချက်အနေနှင့် ဖူ၀မ်သော် ဘာကိုတွေးနေသလဲ မသိသည့်တိုင် ထန်မော့မပိတ်ချင်ခဲ့၍ပင်ဖြစ်လေသည်။ ဖူ၀မ်သော်လည်း ပိတ်ရန်မပြော၍ သူလည်း ပြောမည်မဟုတ်ချေ။

"တကယ်လို့များပေါ့..ကိုယ်တစ်ခုခုကိုကြိုပြောထားလို့ရမယ်ထင်တယ်"

အမျိုးသား၏ တီးတိုးစကားသံမှာ သံလိုက်၏ဆွဲငင်အားနှယ်။

ထန်မော့ခတ္တမျှမတုန့်ပြန်နိုင်ခဲ့ချေ။

"ဘာများလဲ"

အမျိုးသား၏ နက်ရှိုင်း၍ ညင်သာသော စကားသံက သူ၏နားထဲသို့၀င်ရောက်လာခဲ့သည်။

"မော့ထန် ကောင်းကောင်းလုပ်ခဲ့တယ်"

ထန်မော့၏ရင်ခုန်သံတချို့ မြန်သွားခဲ့သည်။ သူသည် ထိုစကားစုကို ကွန်ပျူတာပေါ်တွင် မရေတွက်နိုင်အောင် မြင်ခဲ့ဖူးသော်လည်း လူကိုယ်တိုင်ကြားရသည်က ပထမဆုံးဖြစ်သည်။ ထန်မော့၏ မျက်လုံးတို့ ၀ိုင်းစက်သွားလျက် နားလည်ရခက်သော ခံစားချက်တို့ ဖြတ်ပြေးသွားခဲ့သည်။ အတော်လေးကြာပြီးမှ သူကရယ်မောလျက် ရေရွတ်လိုက်သည်။

"ဒါဆို ခင်များလည်း ကောင်းကောင်းလုပ်မှရမယ်နော် ဗစ်တာ..."

ကြီးမားသော ဖန်တောင်ကြီးအောက်တွင် အရပ်မြင့်မြင့်ချောမောသော အမျိုးသားမှာ အသာပြုံးလိုက်မိလေသည်။

ဖူ၀မ်ရှန်း ထိတ်လန့်သွားခဲ့သည်။

"Geဘာလို့ပြုံးနေတာလဲ"

ဖူ၀မ်သော်၏ အပြုံးတို့ ချက်ချင်းပျောက်ကွယ်သွားလျက် သူ့ညီအရူးလေးကိုကြည့်လိုက်သည်။

"မင်းမျက်စိမှားသွားတာ"

ဖူ၀မ်ရှန်း"...???"

'မဟုတ်ပါဘူးနော်...အရမ်းပျော်လွန်းလို့မျက်လုံးတွေတောင် ကွေးနေပြီးတော့...အကြီးတစ်ယောက်ဖြစ်ပြီး စကားတွေကတစက်မှ မယုံရပါလား...ပိုင်းသွားတဲ့ ခြေထောက်တောင်ပြန်မထွက်သေးတာကို...ဘာလို့ဒီလိုကြောက်ဖို့ကောင်းအောင် ပြုံးနေရတာလဲ'

"ပြဿနာရှိလား"

ဖူ၀မ်သော် အသာမေးလိုက်သည်။

ဖူ၀မ်ရှန်းချက်ချင်းခေါင်းခါလိုက်သည်။

"ဟင့်အင်း"

ဘေးတွင်ထိုင်နေကြသော ကျပန်းအသင်းဖော်များ"..."

ဒီလူက တကယ်ဖူ၀မ်သော်တော့ဟုတ်ပါတယ်နော်..

🌍

Prev Next