Chapter 60

🐯Chapter 60

ထိုညနေတွင်...

"အထက်တန်းလွှာနယ်မြေတဲ့… မင်းသွားချင်လား…" 

ကုယွီမြန်က ခုတင်ပေါ်တွင် လဲလျောင်းနေပြီး နှင်းကျားသစ်လေးက သူ့ပခုံးပေါ်၌အိပ်နေကာ သူက ပန်ဒါလေး၏မျက်နှာကို ညှစ်လိုက်သည်။

ထိုအရာက အနည်းငယ် အလှမ်းဝေးလွန်းလှသည်။ သူနှင့် ကလေးလေးတို့က ထိုနေရာသို့ ရောက်ရန် ကြိုးကြိုးစားစား လုပ်ရလိမ့်မည်။

မသွားဘူးဆိုပါက သူ၏တိုက်ရိုက်ထုတ်လွှင့်မှုက သနားစရာ ဖြစ်သွားပေလိမ့်မည်။(အခွင့်ကောင်းကို လွဲသွားလို့ပါ) ဒုတိယအနေနှင့် တစ်ခုခုလွဲချော်သွားမည်ဟု သူထင်မိသည်။ သူ့ကိုယ်ပိုင်အမြင်အရဆိုလျှင် သိပ္ပံအကယ်ဒမီကို လည်ပတ်ခွင့်ရရန် သူ အလွန် စိတ်ဝင်စားသည်။

" ကောအာရှစ်စစ်ရဲ့ ဆွေမျိုးတွေက အထက်တန်းလွှာနယ်မြေမှာ နေကြတယ်…"

ကုယွီမြန်က ပြောလိုက်သည်။ ပန်ဒါဝက်ဝံလေး၏ နားရွက်များက လှုပ်နေပြီး မသိစိတ်မှ ထိုပြောကြားချက်ကို နားထောင် နေခဲ့သည်။

 "ငါသာ သူနဲ့တွေ့ခွင့်ရရင်…" 

ဤနည်းဖြင့် ကောအာရှစ်စစ်ကို အေးဂျင့်မှတစ်ဆင့် သွားတွေ့ရန်မလိုဘဲ ဆက်သွယ်နိုင်သည်။

ပန်ဒါလေးက ထိုအရာကို နားမလည်နိုင်သော်လည်း ရုတ်တရက် သူ အလွန်ပျော်သွားသည်။ သူက ကုယွီမြန်၏ လက်ဖဝါးကို ကိုင်လိုက်ပြီး သူ၏ အသိအမှတ်ပြုမှုကို ဖော်ပြရန် သူ့ ခေါင်းလေးကို ပွတ်သပ်လိုက်သည်။

ငါသာ သူနဲ့တွေ့နိုင်မယ်ဆိုရင်…

နှင်းကျားသစ်လေးက နိုးလာပြီး ပန်ဒါလေးကို အေးစက်စက် အကြည့်တစ်ချက်ပေးကာ သူ့ကို ဖြည်းညှင်းစွာ အဝေးသို့ တွန်းပို့လိုက်သည်။

"ငါတို့သွားမယ်ဆိုရင် တော်ဝင်မိသားစုနဲ့ရော တွေ့ရမှာလား… တော်ဝင်နန်းတော်ကို သွားကြည့်ချင်တယ်…" 

ကုယွီမြန်က ယခုအချိန်တွင် သွားရန် ဆုံးဖြတ်လုနီးပါး ဖြစ်ခဲ့ပြီး နေ့ခင်းဘက် အိပ်မက်များ မက်နေ (စိတ်ကူးယဉ်နေ)သည်။

နှင်းကျားသစ်ငယ်၏အမြီးက အနည်းငယ်တောင့်တင်းသွားပြီး နားရွက်လေးသည်လည်း အကြောင်းပြချက်မရှိဘဲ မတ်နေ၏။ အချိန်အတန်ကြာအောင် စောင့်ပြီးသော်လည်း ကုယွီမြန်က သူ့ကို မကြည့်ဘဲ ဆက်လက် စိတ်ကူးယဉ်နေသောကြောင့် နှင်းကျားသစ်လေးက အနည်းငယ်မကျေမနပ်ဖြစ်ကာ ကုယွီမြန်၏ပါးပြင်ကို သူ့လက်ဖဝါးလေးနှင့် ဖိလိုက်သည်။

ကုယွီမြန်၏ “သူ့အကြောင်း” မှတ်ချက်ကို ကြားချင် သည်။

"ဟမ်…ဧကရာဇ်အကြောင်းလား…”

ကုယွီမြန်က နှင်းကျားသစ်လေး၏ ဆိုလိုသည့် အဓိပ္ပါယ်ကို ရိပ်မိခဲ့သည်။ သူ့တွင် ထက်မြက်သည့် စိတ်နှလုံးသားရှိသောကြောင့် ဖြစ်နိုင်သည်။ သူက နှင်းကျားသစ်လေး၏ လက်ဖဝါးလေးကိုကိုင်ကာ စဉ်းစားလျက် မှတ်ချက်ပေးလိုက်သည်။

"သူက အရမ်းချောမယ်ထင်တယ်…"

ဧကရာဇ်က မည်သည့်ပုံစံ အသွင်အပြင် မျိုးရှိသည် ဟူသော ဓာတ်ပုံတစ်ပုံကိုမျှ အင်တာနက်ပေါ်တွင်မတွေ့ ခဲ့ရသော်လည်း ကုယွီမြန်က ဧကရာဇ်၏နောက်ကျောပြင်နှင့်ဓာတ်ပုံကို တစ်နည်းနည်းဖြင့် ရှို့ဟန်၏ မျက်နှာဖြင့်တွဲကာ တွေးမိသွားသည်။ မည်သည့် သဘောထားကွဲလွဲမှုမျိုးမှ မရှိဘဲ ရှို့ဟန်က သူ မြင်ဖူးသမျှထဲတွင် ကြည့်အကောင်းဆုံးလူသားဖြစ်သည်။

နှင်းကျားသစ်လေး: "..."

"ကောင်းပြီ… ငါတို့ ရေချိုးပြီး စောစောအိပ်ကြရအောင် အထက်တန်းလွှာနယ်မြေကို သွားဖို့ ဆုံးဖြတ်လိုက်ပြီ… ဖြစ်နိုင်ရင် နှစ်ရက်လောက်နေမှထွက်မယ် အဲ့မှာ တစ်ပတ်လောက်နေမယ်…"

ကုယွီမြန်က လက်ခုပ်တီးကာ ကလေးနှစ်ယောက်ကို ခေါ်လိုက်ပြီး သူတို့အား အိပ်ယာမဝင်မီ မျက်နှာသုတ်ပုဝါနွေးနွေးလေးဖြင့် သုတ်ပေးလိုက်သည်။

ကုယွီမြန်၏ တစ်ခုတည်းသောစိုးရိမ်မှုက နှင်းကျားသစ်လေး ကျောင်းတက်ရန် ဖြစ်သည်။ အထက်တန်းလွှာနယ်မြေသို့ရောက်လျှင် ယခုနေမည့်နေရာတွင် ကလေးအတွက် အကျိုးသက်ရောက်မှုရှိမည့် အတန်းများ မရှိပေ။ ထို့ပြင် ကြယ်တာရာမြို့တော်၏ အထက်တန်းလွှာနယ်မြေက သူတို့၏ဌာနချုပ်တည်ရှိရာနေရာဖြစ်ကြောင်း ဌာနမှူးဟောင်းက သူ့ကိုပြောပြဖူးသည်။ သူ လုပ်ထုံးလုပ်နည်းများကို လုပ်ဆောင်ပြီးသွားလျှင် သူ့ကို ထိုနေရာရှိ ကျောင်းသို့ နေ့ခင်း ဘက်တွင် အတန်းတက်ရန် လွှတ်လိုက်ရုံပင်။

ထိုသို့လုပ်သည်က ကောင်းပေမည်။

ရေချိုးနေစဉ် ကုယွီမြန်က သူ့တက်တူးကို အမှတ်မထင် ကြည့်လိုက်ရာ၊ အနက်ရောင်နှင်းဆီနှင့်ဓားပုံသဏ္ဍာန်က ညှပ်ရိုးတလျှောက် နေရာယူထားကာ အလယ်သို့ အနည်းငယ် ရောက်နေသည်။ သို့သော်လည်း …

သူ မနေနိုင်ဘဲ ထိုတက်တူးကို သူ့လက်ညှိုးဖြင့် ထိကြည့်လိုက်သည်။ အနည်းငယ်ပူလာသည်ဟု သူထင်သည်။

ဘာလို့များ ပူလာရတာလဲ…

ထိုညတွင် ကုယွီမြန် အိပ်မက်တစ်ခုမက်ခဲ့သည်။ ကြယ်ကွန်ရက်တွင် သူတွေ့ခဲ့သည် ဓာတ်ပုံမြင်ကွင်းများကို သူ အိပ်မက်မက်ခဲ့သည်။ အထီးကျန်ပြီး မာနကြီးသော ဧကရာဇ်က ရာဇပလ္လင်ပေါ်သို့ တစ်ဆင့်ပြီး တစ်ဆင့် လျှောက်သွားခဲ့သော်လည်း သူ့အမြင်ရှူ ထောင့်က ထိုလူ၏ ရှေ့မှဖြစ်ပြီး ထိုလူကို ငုံ့ကြည့်နေသည်။

ထို့နောက် ဧကရာဇ်က ရှေ့တိုးလာ၍ သူ့ရှေ့တွင်ရပ်ပြီး သူ့မျက်လွှာချပြီး အနည်းငယ်အောက်စိုက်လိုက်ကာ သူ့ ညှပ်ရိုးပေါ်ရှိ နှင်းဆီပန်းကို နမ်းလိုက်သည်။

သူက လှပသော ခဲပြာရောင်မျက်ဝန်းများနှင့် အကြည့်ချင်းဆုံမိသွားသည်။

နောက်တစ်နေ့ ကုယွီမြန် နိုးလာသောအခါ ".. ….”

ငါ့ရဲ့ လိင်စိတ်တိမ်းညွှတ်မှုက အန္တရာယ်ရှိနေတာများလား… အိပ်မက်တွေက များသောအားဖြင့် ဆန့်ကျင်ဘက် အဓိပ္ပါယ်ကောက်ရတာပဲလေ…

-----

တစ်ဖက်တွင်….

ကုယွီမြန်က သကြားခဲသကြားခဲကို လွန်ခဲ့သည့် တစ်စက္ကန့် က သိပ္ပံအကယ်ဒမီကို သွားမည်ဟု ကတိပေးခဲ့သည်။ ထို့နောက် ကြယ်တာရာကောင်းကင်ပလက်ဖောင်းမှတရားဝင် ကြေငြာချက်ကို ထုတ်ပြန်ခဲ့သည်။

"@ ကြယ်တာရာကောင်းကင်တိုက်ရိုက်ထုတ်လွှင့်မှူ ပလက်ဖောင်း V: တင်းတောင် ~ မင်းတို့ရဲ့ အဖိုးတန် နတ်သားလေး ဆင်းလာတော့မယ် ကျေးဇူးပြုပြီး @ သိပ္ပံအကယ်ဒမီ V. [link] လူသစ်ပြိုင်ပွဲ ရဲ့ လျှို့ဝှက် စမ်းသပ်ချက်ကို စစ်ဆေးကြည့်ကြမလား… နံပါတ် ၁ တင်ဆက်သူဖြစ်တဲ့ ကုယွီမြန်က သိပ္ပံအကယ်ဒမီကို သွားမယ်… ပြီးတော့ တိုက်ရိုက်ထုတ်လွှင့်မယ်တဲ့..."

ပေါက်ကွဲမှုစတင်ရန် အချိန်မရသေးမီတွင် သိပ္ပံအကယ်ဒမီမှ ၎င်းပို့စ်ကို အမြန်ပြန်တင်ခဲ့သည်။

"@ သိပ္ပံအကယ်ဒမီ V- မြန်မြန် ရောက်ရှိလာခြင်းကို စောင့်မျှော်နေပါတယ်[အသဲပုံ] … ငါတို့ မင်းအတွက် အကြီးအကဲ တင်တင်ရဲ့ ဓါတ်ပုံတစ်ပုံကို ယူလာပေးပါတယ်…"

ပုံထဲတွင် အဖြူရောင်ကုတ်အင်္ကျီလေးကို ၀တ်ဆင်ထား သည့် အာတိတ်မြေခွေးတစ်ကောင်က စမ်းသပ်မှုအစီရင်ခံစာပေါ်တွင် လှဲနေကာ 'နမ်းနေသည့်’ အသံကို ပြုလုပ်ရန် ဖိအားပေးခံနေရပုံပေါ်သည်။ အာတိတ်မြေခွေးလေး၏အမြီးက ပျော့ပျောင်းကာ နှင်းဖြူရောင်ဖြစ်ပြီး အမြီးဖျားတွင် ငွေပြာရောင် အနည်းငယ်ပါရှိသည်။ သူ၏ မျက်နှာလေးက လေးနက်နေပြီး၊ အရေးကြီး စမ်းသပ်မှုတစ်ခု၏ အဓိကသော့ချက်က သူ့ခြေသည်းများအောက်တွင် ရှိနေပုံပေါ်သည်။ 

လူတိုင်း- ဝှက်သယ်ဖတ်...

[ကျား : ဒါက ပြစ်ဒဏ်ပေးခံနေရတာလား မင်းပြန်ပေးဆွဲခံရတာဆိုရင် မျက်တောင်ခတ်ပြပါဦး …ဒီလိုလုပ်ပြဖို့အတွက် မင်းပုံစံက အရမ်းအေးစက်လွန်း နေတာမဟုတ်ဘူးလား… မင်းရဲ့ ဒီဇိုင်း က ပျက်နေတယ်… မင်းကို ယောက်ျားတစ်ယောက်ကို ဖိတ်ခေါ်ဖို့ ခုလိုလုပ်ပြတာ ဘာအကျိုးကျေးဇူးတွေ ရမှာမို့လို့လဲ...]

[Tgixရဲ့ နောက်ဆုံးစမ်းသပ်ချက် ရလဒ်တွေကိုထုတ်ဝေလိုက်သည်- အားးး အကြီးအကဲက ရုပ်ရည်ခန့်ငြားပေမဲ့ ချစ်စရာကောင်းတယ်… ပုံ​ဟောင်း​လေးဖြစ်​​နေ​ပေမယ့် ချစ်​​စရာကောင်းနေတုန်းပဲ… [ဓာတ်ပုံ] ပြီးတော့ လူသား တင်ဆက်သူ အကြောင်းလည်း ငါ ကြားဖူးပါတယ်… သူက အရမ်းကောင်းပြီး အမှန်ကို သိတယ်… စိတ်မပူပါနဲ့…]

[ဗီဗီယန် : အားးး ဒါက ငါ မကြာ​သေးခင်​က ရှာ​တွေ့ခဲ့တဲ့ ​တင်ဆက်သူပဲ… ပြီးတော့ သိပ္ပံအကယ်ဒမီရဲ့ အကြီးအကဲက အရမ်းချစ်စရာကောင်းလိမ့်မယ်လို့ ငါမမျှော်လင့်ခဲ့မိဘူး… ဒါ အကြီးအကဲလား ဒါမှမဟုတ် အကြီးအကဲရဲ့သားလေးလား အာတိတ်မြေခွေးလေးက ငါ့ကိုသတ်နေတာ။]

[ဂျူနီယာ ဘီ :အစ်ကို @ ကုယွီမြန် V ၊ မင်းက အရမ်း တော်လို့ သိပ္ပံအကယ်ဒမီကိုတောင် တက်နိုင်တာလား… အိုက်ယား သိပ္ပံအကယ်ဒမီက တိုက်ရိုက် ထုတ်လွှင့်မှုကို စောင့်မျှော်နေပါတယ်…]

[တိမ်လေး တစ်ခုရှိတယ်: ဟဲဟဲ တင်ဆက်သူ က သိပ္ပံ အကယ်ဒမီကို သွားနေတာလား ဂုဏ်ယူပါတယ်… ငါ မင်းကို ပိုကောင်းတဲ့ အသက်မွေးဝမ်းကြောင်း တစ်ခု ရစေချင်တယ် မင်းရဲ့ မိုက်ခရိုဘလော့ဂ်ကို ထပ်ဆင့် ရှဲလ်ပေးနေမယ်…]

သိပ္ပံအကယ်ဒမီက အမြဲလိုလို အေးစက်သော ပညာရပ်ဆိုင်ရာ နေရာတစ်ခုဖြစ်သောကြောင့် ၎င်းတို့က လူအများနှင့် မဆက်သွယ်ဖြစ်ခဲ့ကြပေ။ နောက်ဆုံးရ သိပ္ပံနှင့် နည်းပညာဆိုင်ရာ အောင်မြင်မှုများကိုသာ သတင်းများတွင် မြင်တွေ့ခဲ့ရသည်။ အတိုင်းအတာတစ်ခုအထိ၊ ၎င်းက နည်းပညာသုတေသနနှင့် ဖွံ့ဖြိုးတိုးတက်မှုတို့ကြားတွင် အချိန်ကွာဟမှုကို ဖြစ်ပေါ်စေခဲ့ပြီး သိပ္ပံအကယ်ဒမီက လူသိရှင်ကြား ထုတ်ဖော်ကြော်ငြာခြင်း နှင့် သိပ္ပံပညာ ရေပန်းစားလာမှု စသည့် တာဝန်များတစ်စိတ်တစ်ပိုင်းကိုလည်း တာဝန်ယူခဲ့ရသည်။

သို့သော်လည်း သူတို့ ပထမဆုံး ပြုလုပ်သည့်အရာက လူသားတင်ဆက်သူတစ်ယောက်အတွက် ဖြစ်သည်။

မိုက်ခရိုဘလော့ဂ် ပို့စ်နှစ်ခု တင်ထားသည်မှာ အချိန် မကြာသေးသော်လည်း ချီးကျူးမှုများနှင့် မှတ်ချက်များသည် 100,000 ကျော်သွားပြီဖြစ်သည်။ သိပ္ပံအကယ်ဒမီ၏ရေပန်းစားမှုကြောင့် နာရီဝက် ခန့်အကြာတွင် "ကုယွီမြန်" ဟူသောအမည်ဖြင့် တိုက်ရိုက်ရှာဖွေခဲ့ကြပြီး သူ၏မိုက်ခရိုဘလော့ဂ်ကို လိုက်ကြည့်ခဲ့ကြသည်။

ကုယွီမြန်က သူ၏မိုက်ခရိုဘလော့ဂ်အကောင့်တွင် ပို့စ်များမတင်ဘဲ အကောင့်ကို တိုက်ရိုက် ထုတ်လွှင့်သည့်ပလပ်ဖောင်းတွင် စာရင်းသွင်းရန် အတွက်သာ ထည့်သွင်းခဲ့သည်။ တစ်ညတည်းနှင့် သူ၏ထုတ်လွှင့်မှုအပေါ် အာရုံစူးစိုက်မှုနှုန်းက တိုးလာပြန်သည်။

နောက်နှစ်ရက်တွင်...

ဂြိုဟ်တစ်ခုတည်းတွင်ရှိသော်လည်း အထက်တန်းလွှာ နယ်မြေက ဆောင်းရာသီကုန်ခါနီးတွင်ဖြစ်ပြီး နောက်မြို့တွင်မူ နွေရာသီ ပြီးဆုံးသွားပြီ ဖြစ်သည်။ သို့သော် ကြယ်စုတွင် နေထိုင်သူများ၏ အအေးဒဏ်ခံနိုင်ရည်မှာ အလွန် ပြင်းထန်သည်။ လူတိုင်းက အဝတ်ပါးပါးဖြင့် လမ်းပေါ်တွင် လမ်းလျှောက်နေကြဆဲဖြစ်သည်။ ကုယွီမြန်၏နှာခေါင်းက အေးစက်နီရဲနေပြီး အဝတ်အစား တစ်ခုပြီးတစ်ခု ထပ်ဝတ်လိုက်သည်။ ကံကောင်း ထောက်မစွာဖြင့် နှင်းကျားသစ်လေးက သူ့လည်ပင်းကို နွေးထွေးစေသည်။

ပန်ဒါလေးနှင့် နှင်းကျားသစ်လေးတို့နှင့်အတူ ကုယွီမြန်သည် အထက်တန်းလွှာနယ်မြေတွင် ဆင်းသက်ပြီး အကောက်ခွန်ဌာနတွင် ပိတ်မိသွားသည်။

သာမာန်လူတန်းစားနယ်မြေမှ အထက်တန်းလွှာနယ်မြေ အထိ ပြင်းထန်သော စစ်ဆေးမှုတစ်ခုဖြေဆိုရန် လိုအပ် ပသည်။ ထို့အပြင် သူက တိရိစ္ဆာန်မျိုးနွယ်ဖြစ်စေ လူသားဖြစ်စေ ယင်းက အရေးကြီးသော စစ်ဆေးမှုတစ်ခုဖြစ်သည်။

ဝန်ထမ်းများက သူတို့ အနားယူနေချိန်များ ရှိသောကြောင့် နှစ်နာရီ သို့မဟုတ် သုံးနာရီခန့်ပင် ကြာနိုင်သည်။ 

ကုယွီမြန် ခဏမျှတုံ့ဆိုင်းသွားပြီး ဤနှုန်းဖြင့်ဆိုလျှင် လာမည့်တိုက်ရိုက်ထုတ်လွှင့်မှုကို ယနေ့တွင် စ၍ မရနိုင်တော့ဟု တွေးမိသည်။ 

ဒါဆိုရင် အခုဘာလို့ စမလုပ်တာလဲ...

တင်ဆက်သူ တစ်ယောက်အနေနှင့် အရေးကြီးဆုံး အရာက တည်ငြိမ်သည့် တိုက်ရိုက်ထုတ်လွှင့်မှုတစ်ခုရှိရန်သာ ဖြစ်ပြီး ဦးထုပ်ပြုတ်ကျစေမည့်အရာများကို မပြုလုပ်ရန် သာ ဖြစ်သည်။(ဥပဒေနဲ့ ငြိတာတွေ မလုပ်ဖို့ပါ)

သူက ထုတ်လွှင့်ရန် အကြောင်းအရာကို ခဏစဉ်းစားလိုက်သည်။ ကံကောင်းထောက်မစွာဖြင့် သူက ထိုအကြောင်းကို ယခင်ကလည်း တွေးခဲ့ဖူးသောကြောင့် သူက ခဏတာ ကျော်ကြားပြီးနောက် ပျောက်ကွယ်သွားသည့်သူ မဖြစ်ချင်ခဲ့ပေ။ အချိန်အတော်ကြာ ပြင်ဆင်ပြီးနောက် ကုယွီမြန် က တိုက်ရိုက်ထုတ်လွှင့်မှုကို ဖွင့်၍ လက်ဝှေ့ယမ်းပြလိုက်သည်။ 

"ဟဲလို… ဒါက မင်တို့ရဲ့ တင်ဆက်သူ ကုယွီမြန်ပါ… ငါ အထက်တန်းလွှာနယ်မြေကို ရောက်နေပြီ…"

သူ စတင်ထုတ်လွှင့်လိုက်သည်နှင့် မရေမတွက်နိုင်သော မှတ်ချက်များ ချက်ချင်းပေါ်ထွက်လာသည်။

🐯🐯🐯