MM Story Teller

Chapter 234

Viewers 32k

🌍Chapter 234

လီချောင်ချန်း၏ မျက်လုံးများမှာ လှုပ်ရှားလျက် သတင်းအများကြီးလည်း မဖော်မိစေဘဲ လွတ်မြောက်ရန်ကြိုးစားနေခြင်းပင်။

ထန်မော့၏ လက်ချောင်းများလှုပ်ရှားသွားလျက် မြေကြီးပေါ်ဓါးစိုက်သွားသည့်အသံထွက်ပေါ်လာခဲ့သည်။ အေးစက်သောဓါးမှာ လီချောင်ချန်း၏ လက်ချောင်းပြတ်အနီးမှ ဖြတ်ကျော်သွားလျက် သူ၏အသားများကို ဖောက်ထွက်သွားလုနီးပါးပင်။

လူလတ်ပိုင်းယောကျာ်းမှာ အံ့အားသင့်လျက် မျက်လုံးများပြူးကျယ်သွားခဲ့သည်။

ထန်မော့ချန်ရှန်းရှန်းကို ကြည့်၍ ပြောလိုက်သည်။

"သူ့လက်ကို ချုပ်ထားပေးဦး"

လီချောင်ချန်း အမြန်အော်ဟစ်လာခဲ့သည်။

"နေ..နေပါဦး ငါအကုန်ပြောပြပါ့မယ်..မင်းဘာသိချင်သေးလဲ အချိန်အဆင့်ယားဆိုတာ အဲဒါပဲလေ ရုတ်တရက်ပေါ်လာတာလေ..နားချိန်အပိုမရှိတဲ့သူတွေက ၀က်တွေလေ"

လီချောင်ချန်းသည် ဂျက်၏ မကျေနပ်သော အမူအရာကိုမြင်လျှင် ရှင်းပြလာခဲ့သည်။

"ငါ ပေးတဲ့နာမည်မဟုတ်ဘူး..ဘယ်သူကစလိုက်မှန်းတော့ ငါလည်းမသိဘူး ငါလည်း တခြားသူတွေအတိုင်းပဲလိုက်ခေါ်တာ..ငါသိတာတကယ်အဲဒါအကုန်ပဲလို့"

ထန်မော့နှင့် ချန်ရှန်းရှန်း တစ်ယောက်ကိုတစ်ယောက်ကြည့်လိုက်ကြသည်။

ချန်ရှန်းရှန်းမှာ တည်ငြိမ်နေခဲ့သည်။

"အာရှဇုန် ၁ကဘာလဲ အိန္ဒိယလား"

လီချောင်ချန်းကတုန့်ပြန်လာခဲ့သည်။

"ငါမသိဘူး"

"အချိန်အဆင့်ဇယား ထိပ်ဆုံး၅၀ထဲမှာ ဒီဂျန်ဂါလာဗာလို့ခေါ်တဲ့ကစားသမားမရှိဘူး"

လီချောင်ချန်း၏ အမူအရာက ပြောင်းလဲသွားခဲ့သည်။ သူ ထန်မော့လက်ထဲမှဓါးကိုကြည့်လျက် အံကိုကြိတ်လိုက်သည်။

"ဒီဂျန်ဂါလာဗာက လွန်ခဲ့တဲ့၂လကပဲသေသွားတာ..သူကအရင်က အဆင့်၂၀..သူကအချိန်အဆင့်ဇယားကိုဖွင့်ခဲ့တဲ့သူဆိုပေမယ့် သူ့အဆင့်ကတော့ အဲဒါနဲ့မဆိုင်ဘူး"

၄င်းကိုဆိုစဥ် လီချောင်ချန်း၏ အမူအယာမှာ ဆိုးရွားနေသော်လည်း သူ၏လေသံမှာမူ ခိုင်မာနေခဲ့သည်။

ထန်မော့ ချန်ရှန်းရှန်းအား ခေါင်းညိတ်ပြလိုက်ကာ ထိုလူလိမ်နေခြင်းမဟုတ်ကြောင်း အတည်ပြုလိုက်ကြသည်။ သို့ဆိုလျှင်

ထန်မော့မေးလိုက်သည်။

"မူဟွေ့ရွှယ်က ဘယ်လိုလူမျိုးလဲ"

လီချောင်ချန်းကတုန့်ပြန်လာခဲ့သည်။

"ငါမသိဘူး"

ထန်မော့မျက်ခုံးပင့်လိုက်သည်။

လီချောင်ချန်းက အလျင်အမြန်ဆိုလာသည်။

"ငါတကယ်မသိတာဟ..သူကခရိုင် ၃က ငါကခရိုင်၁က သူနဲ့က ဂိမ်းထဲမှာကလွဲရင် မဆုံနိုင်ဘူး..ဂိမ်းထဲမှာလည်း မတွေ့ဖူးဘူး ငါတွေ့ဖူးတာဆိုလို့ အဆင့်၃၆ကတစ်ယောက်ပဲ"

ချန်ရှန်းရှန်းကဆိုသည်။

"ပြန်လာသူတွေထဲမှာ မျှော်စင်တတိယထပ်ကို ရှင်းထားတာ ဘယ်နှစ်ယောက်ရှိလဲ"

လီချောင်ချန်းမှာ ခတ္တမျှတွန့်ဆုတ်နေပြီးမှ ရိုးသားစွာဖြေလာသည်။

"အတိအကျတော့မသိပေမယ့်..အများကြီးတော့ရှိလိမ့်မယ်..လွန်ခဲ့တဲ့လက ငါတတိယထပ်ကိုရှင်းခဲ့တာ..အချိန်အဆင့်ဇယားကသူတွေအကုန် တတိယထပ်ကိုတော့အနည်းဆုံးရှင်းပြီးထားကြမှာပဲ..မူဟွေ့ရွှယ်ကတော့ လေးထပ်မြောက်ကို ရှင်းလိုက်တယ်ထင်တယ်"

ဂျက်သည် လီချောင်ချန်း၏စကားကိုကြားသော် ထန်မော့နှင့် ချန်ရှန်းရှန်းအားစိုးရိမ်စွာကြည့်လိုက်မိသည်။ သို့သော် ထို၂ဦးက ထိုအဖြေကို ခန့်မှန်းမိပြီးသည့်နှယ့် မည်သည့်တုန့်ပြန်မှုကိုမျှမပြခဲ့ချေ။

ဂျက် ခေါင်းကို ကုတ်လိုက်မိသည်။ ထို့နောက် လက်ကိုဘေးပြန်ချလျက် နားလည်သွားခဲ့မိသည်။

ပျောက်ကွယ်သွားခဲ့သော လူပေါင်း၆ဘီလျံမှာ ပြန်လာသူများဖြစ်လာပြီး အနက်ရောင်မျှော်စင်မှ သူတို့အား ကမ္ဘာပေါ်သို့ပြန်လာနိုင်ရန်အတွက် မျှော်စင်ကိုတိုက်ခိုက်စေခဲ့သည်။ သူတို့သည်နေ့စဥ်နေ့တိုင်း ဂိမ်းပေါင်းများစွာကို စိန်ခေါ်ရသည်။ မျက်လုံး၂လုံးပွင့်သည်နှင့် ဂိမ်းများကိုစိန်ခေါ်နေရကာ နားချိန်လုံး၀မရှိချေ။ ဂိမ်းတစ်ခုအပြီး ၁၀မိနစ်သာရပ်ကာ နောက်ဂိမ်းတစ်ခုထဲထပ်၀င်ကြရသည်။

အရာအားလုံးမှာ တွန်းအားပေးခံထားရပြီး ရွေးချယ်မှူဟူ၍မရှိချေ။

ထိုကဲ့သို့အခြေအနေမျိုးတွင် လူသားများက တဖြည်းဖြည်း ထုံထိုင်းလာကြလိမ့်မည်။ အနာဂတ်ကိုလည်း မသိသလို မည်သည့်အချိန်အထိ အသက်ဆက်ရှင်ရမည်ကိုလည်း မသိနိုင်ချေ။ ဂိမ်းတစ်ဂိမ်းထဲမှ ကံကောင်းစွာ အသက်ရှင်လာသည်က နောက်ဂိမ်းတွင် သေရန်လည်းဖြစ်လာနိုင်သည်။ သူတို့ကိုယ်သူတို့ အတတ်နိုင်ဆုံး ဒဏ်ရာမရရန် ကာကွယ်ကြရသည်။ ဒဏ်ရာရလာတိုင်းလည်း ကုသရာရန်အချိန်မရှိချေ။ ထိုဒဏ်ရာကိုသယ်လျက် နောက်ဂိမ်းကို၀င်ရခြင်းမှာ သေခြင်းတရားကိုသာ ရည်ညွှန်းလေသည်။

မည်မျှသန်မာသော လူပင်ဖြစ်စေ ထိုကဲ့သို့ ဆိုးရွားသော အခြေအနေတွင်မရှင်သန်နိုင်ချေ။ သူတို့မှာ သေဆုံးကြရန်သာရှိသည်။ ဘယ်တော့ သေမည်ကိုသာ မသိကြခြင်းပင်။

ထိုစဥ် အချိန်အဆင့်ဇယားပွင့်လာပြီး သူတို့တွင် ဦးတည်ရာတစ်ခုရှိလာခဲ့သည်။

သူတို့တွင်ရှင်သန်နည်းတစ်ခုရှိကြောင်း တွေ့လာခဲ့ကြသည်။

အချိန်အဆင့်ဇယားကျေးဇူးကြောင့် သန်မာသော ကစားသမားများမှာ အနားယူရန်အချိန်ရှိလာခဲ့သည်။ သူတို့သည်အနားယူနိုင်ပြီး အချိန်အဆင့်ဇယားပေါ်မှ ကစားသမားများကို အမဲလိုက်ကာ နားချိန်အပိုနှင့် အကူပစ္စည်းများကို ရရှိလာကြသည်။ ၄င်းမှာ စက်၀ိုင်းတစ်ခုနှယ်။ သန်မာသောသူများကပို၍သန်မာလာပြီး အားနည်းသူများက ပို၍အားနည်းလာခဲ့လေသည်။

ချန်ရှန်းရှန်းက လီချောင်ချန်းအား ပြန်လာသူများ၏ သန်မာမှုအကြောင်းမေးခဲ့ပြီး အဖြေကထန်မော့ကို အံ့အားသင့်စေသည်။ သို့တိုင်အောင် ထန်မော့၏ အမူအယာမှာ တည်ငြိမ်နေဆဲဖြစ်ကာ လီချောင်ချန်းအား တစ်ခုမျှမရိပ်မိစေခဲ့ပေ။

လီချောင်ချန်းမှာလည်း တွေးနေခဲ့လေသည်။

ကမ္ဘာပေါ်မှ ကစားသမားများမှာ အဘယ်ကြောင့်အလွန်သန်မာနေရသနည်း။ မျှော်စင်ပထမထပ်ကို ရှင်းထားသော ကစားသမားတစ်ယောက်မှာ အချိန်အဆင့်ဇယား ထိပ်ဆုံး၅၀မှ ကစားသမားများနှင့် ယှဥ်နိုင်ခဲ့သည်။

သို့ဆိုပါလျှင် သူတို့ပြန်လာသူများ အိမ်ပြန်လာခြင်းဆိုသည်မှာ ကျားပါးစပ်ထဲခုန်ဆင်းရခြင်းပင် မဟုတ်ပါလား..

လီချောင်ချန်း၏မျက်လုံးများမှာ လှုပ်ရှားနေလျက် အဆုံးမရှိသော အတွေးများခေါင်းထဲတွင်ဖြတ်ပြေးနေခဲ့သည်။ သူ၏ပါးစပ်ကိုလှုပ်ရှား၍ ပြန်လာသူများ၏အကြောင်းကို စို့ရွံ့စွာ ပြန်ဖြေပေးနေဆဲပင်။

ထန်မော့တွင် အချိန်အဆင့်ဇယား ထိပ်ဆုံး၅၀ပေါ်မှစာရင်းရှိပြီး လီချောင်ချန်းမှာ ကျန်၅၀၏စာရင်းကိုပေးခဲ့သည်။ သူသည်အဆင့်၉၀အနီးမှ အမည်များကိုပြောနေစဥ် သူ၏ပတ်လည်တွင် အရောင်ဖျော့ဖျော့လင်းလာခဲ့သည်။

လီချောင်ချန်း၏ကိုယ်မှာတုန်လှုပ်သွားခဲ့သည်။

သူသည်အံ့အားသင့်လျက် ၄င်းမှာဘာဖြစ်ကြောင်းနားလည်သွားခဲ့သည်။ သို့သော်စက္ကန့်ပိုင်းအတွင်း ဓါးတစ်ချောင်းက သူ၏ရင်ဘတ်သို့ စိုက်၀င်သွားခဲ့လေသည်။

လီချောင်ချန်း သူ၏ရှေ့မှ ထန်မော့ကိုစိုက်ကြည့်နေခဲ့သည်။ ထန်မော့ ထိုရင်ဘတ်မှဓါးကို တိတ်တဆိတ်ဆွဲနှုတ်လျက် သူ၏အိတ်ကပ်ထဲသို့ ပြန်ထည့်လိုက်၏။

ထန်မော့ပြောခဲ့သလိုပင် သူ လီချောင်ချန်းကိုပြန်လည်ပျောက်ကွယ်မသွားခင် သတ်နိုင်စွမ်းရှိလေသည်။

လီချောင်ချန်းမှာ ပါးစပ်မှသွေးများအံထွက်လျက် မုန်းတီးစွာရေရွတ်လိုက်သည်။

"မင်း မင်း.."

ထန်မော့ကဆိုသည်။

"ဟုတ်သား..မင်းကိုမပြောရသေးဘူးပဲ..တကယ်တော့မင်းမှန်းတာမှန်တယ်..မင်းကိုချည်ထားတဲ့ ရာဘာကြိုးက ကျိုးကြောင်းပြသက်ရောက်မှုရှိတယ်..ဒါပေမယ့်သက်ရောက်မှုက ၁မိနစ်ပဲ..၁မိနစ်ကျော်သွားရင်ဖြည်လို့ရတယ်.."

ထန်မော့မှာ မျက်နှာသေဖြင့်ဆိုသည်။

"ဒါပေါ့..အမှန်အတိုင်းပြောနေတာလေ..ယုံချင်ယုံ မယုံချင်နေပေါ့"

လီချောင်ချန်း၏ကိုယ်က ပြင်းထန်စွာတုန်ယင်သွားခဲ့သည်။ သူသည်ထန်မော့အား ဆုတ်ဖြဲပစ်ချင်သကဲ့သို့ အဆိပ်များပြည့်နှက်နေသော မျက်လုံးများဖြင့် ကြည့်လာခဲ့သည်။ သူသူထန်မော့ကို စိုက်ကြည့်လျက်သားပင် သေဆုံးသွားခဲ့ပြီး သူ၏လည်ပင်းမှ ရွှေရောင် နံပါတ်များမှာပျောက်ကွယ်သွားလေသည်။

လီချောင်ချန်း၏ ကိုယ်မှာလည်း လေထုထဲသို့ တဖြည်းဖြည်းပျောက်ကွယ်သွားခဲ့လေသည်။

လီချောင်ချန်းပျောက်ကွယ်သွားပြီးနောက် ချန်ရှန်းရှန်းက စာရွက်ပေါ်မှ စာရင်းကိုကြည့်လိုက်သည်။ ထို့နောက် ထန်မော့ကိုပြောလိုက်သည်။

"အယောက်၉၀ပဲ..ကျန်တဲ့၁၀ယောက်နာမည်ကိုမသိဘူး..အစ်ကိုထန် ဒီစာရင်းကမှန်တဲ့ပုံပဲ..သူ ကျွန်မတို့ကို တမင်လိမ်စရာမလိုပါဘူး..သူသေသွားတာတော့နှမြောစရာပဲ"

ကလေးမလေးမှာ နှမြောတသဖြစ်နေပုံပင်။ သူမက လီချောင်ချန်းထံမှ ထိုထက်ပိုသိချင်ခဲ့သေးသည်။ ဥပမာ သူမသည် သန်မာသော ပြန်လာသူအဖွဲ့အစည်းမျိုး ဘယ်မှာရှိသည်ကို မေးလိုခဲ့သည်။ သို့သော် ပြန်လာသူတို့မှာ ပူးပေါင်းတတ်သူတို့မဟုတ်သဖြင့် ထိုကဲ့အဖွဲ့မျိုး မရှိဟုလည်းထင်ထားသည်။ သို့တိုင်အောင် သေချာအောင် မေးကြည့်လိုခဲ့လေသည်။

ထန်မော့ကဆိုသည်။

"ပြန်လာသူတွေက ငါတို့နဲ့မတူဘူး.. ကမ္ဘာပေါ်က ကစားသမားတွေထဲမှာ တချို့ရူးနေတဲ့ ခိုး၀င်သူတွေကလွဲရင် သာမာန်ကစားသမားတွေက လူတွေကို စိတ်ထင်တိုင်းလိုက်မသတ်ဘူး..ငါတို့ရဲ့ဘုံရန်သူက အနက်ရောင်မျှော်စင်နဲ့ ဂိမ်းတွေပဲ"

သို့သော် ပြန်လာသူတို့အတွက်မူ ကစားသမားမှန်သမျှသည် ရန်သူများဖြစ်သည်။ လူတစ်ယောက်စီကိုသတ်တိုင်း နားချိန်၁၀မိနစ်ရရှိမည်ဖြစ်ကာ အဆင့်ဇယားပေါ်မှ လူများကိုသတ်ခြင်းက ဆုများရရှိစေသည်။

ထန်မော့ခတ္တမျှတွေးလျက်ပြောလာခဲ့သည်။

"ပြန်လာသူတွေက သန်မာလေလေ ညှိနှိုင်းရခက်လေပဲ"

ဂျက်သည်လည်း ထိုအချက်ကို နားလည်လေသည်။

"ဟုတ်တယ်..သန်မာတဲ့ပြန်လာသူကိုသတ်ရင်ရမယ့်အကျိုးခံစားခွင့်တွေကတော်တော်များတယ်..ပထမအဆင့် ပြန်လာသူကိုသတ်ရင် အသက်ပြန်သွင်းခွင့်တောင်ရမယ်တဲ့..ကံမကောင်းတာက နျဲ့က ဂိမ်းထဲမှာသေတာမဟုတ်ပဲ ဟိုလူတွေလက်ထဲသတ်ခံလိုက်ရတာပဲ..မဟုတ်ရင် ငါမူဟွေ့ရွှယ်ကို သတ်ဖို့အခွင့်အရေးရှာပြီး နျဲ့ကို ပြန်ခေါ်မှာ"

ထန်မော့ဘေးပတ်လည်ကို ဂရုတစိုက်ကြည့်လိုက်သည်။ အနားတွင်မည်သူမျှမရှိသည်မှာ သေချာတော့မှ အိမ်ထဲသို့အတူတကွ၀င်သွားလိုက်ကြသည်။

၄င်းမှာ အမှန်တကယ်ပင် ဖူ၀မ်ရှန်း၏ အိမ်ဖြစ်သည်။ ကြီးမားသော သံတံခါးကြီးပေါ်မှ နာမည်ပြားတွင် ဖူဟုရေးထားခဲ့သည်။

ထန်မော့ လော့ကိုဖွင့်လျက် အိမ်တွင်းသို့၀င်သွားခဲ့၏။ သူပတ်ကြည့်ပြီးနောက် အစာနှင့်ရေများကိုတွေ့လိုက်ရသည်။ ထို့နောက် ဂျက်နှင့်ချန်ရှန်းရှန်းတို့ကို မျှဝေလိုက်လေသည်။ သူတို့၃ယောက်သားမှာ အချိန်အတော်ကြာ ဘာမှမစားထားခဲ့ရချေ။ အနည်းငယ်မျှစားပြီးနောက် ဂျက်က ကင်းလှည့်ရန် ထွက်သွားခဲ့လေသည်။

ထန်မော့နှင့် ချန်ရှန်းရှန်းကမူ ဒုတိယထပ်မှ စာကြည့်ခန်းထဲသို့၀င်သွားခဲ့သည်။

စာကြည့်ခန်းထဲသို့ရောက်သည်နှင့် သူတို့၏ အချိန်အဆင့်ဇယား စာရင်းကို စားပွဲပေါ်တွင်ဖြန့်လိုက်သည်။ ထန်မော့မှာ လီချောင်ချန်းအပါအ၀င် တရုတ်နာမည်မှန်သမျှကို အမှတ်အသားလုပ်လိုက်သည်။ စုစုပေါင်း ၂၄ယောက်ရှိလေသည်။

"အချိန်အဆင့်ဇယားပေါ်ကလူတိုင်းက မျှော်စင်တတိယထပ်ကိုရှင်းပြီးသွားပြီ..ဒါပေမယ့် ၄ထပ်မြောက်ကိုရောက်နေတဲ့ သူတွေလည်းရှိမှာ.."

ချန်ရှန်းရှန်း၏ ကြည်လင်သော အသံကိုကြားလိုက်ရသည်။ ၄င်းမှာ သူမ၏အရွယ်နှင့်မလိုက်သော ခိုင်မာမှုနှင့် ကြံ့ကြံ့ခံမှုတို့ပါ၀င်လေသည်။ သူမသည် အဆင့်ဇယား၏ ထိပ်ဆုံးမှ နာမည်၃ခုကိုကြည့်လိုက်သည်။

"မူဟွေ့ရွှယ်တစ်ယောက်ကပဲ မျှော်စင် လေးထပ်မြောက်ကို ရှင်းထားတာ..အစ်ကိုထန် ဆရာတွေးတာကတော့ ပြန်လာသူတစ်ယောက် ၄ထပ်မြောက်ကိုရှင်းပြီးတာနဲ့ မျှော်စင်ဗားရှင်း4.0ပွင့်လာမယ်လို့ပဲ..ဆရာ့အထင်ကတော့ မူဟွေ့ရွှယ်ကမတော်တဆတစ်ခုကြုံလို့ မျှော်စင်အဆင့်မြှင့်တာက ရပ်သွားတာ..ဒါပေမယ့် သူ၄ထပ်မြောက်ကို မရှင်းနိုင်လိုက်ဘူးလို့တော့မဟုတ်ဘူး"

ထန်မော့လည်း ၄င်းကိုတွေးမိသည်သာ။ သူ့တွင်အခြားအတွေးတစ်ခုရှိလေသည်။

"မူဟွေ့ရွှယ်က လေးထပ်မြောက်မှာ ရှိနေတုန်းလည်းဖြစ်နိုင်တယ်"

ချန်ရှန်းရှန်းမှာ အံ့အားသင့်သွားခဲ့သည်။

"လေးထပ်မြောက်မှာ ရှိနေသေးတာလား.."

ကလေးမလေးမှာ ထန်မော့ရှင်းပြသည်ကိုစောင့်မနေဘဲမျက်မှောင်ကျုံ့လျက် ထန်မော့၏ ဆိုလိုရင်းကိုနားလည်ရန်ကြိုးစားတော့သည်။

"မဖြစ်နိုင်တာတော့မဟုတ်ဘူး အနက်ရောင်မျှော်စင်က အဓိကမစ်ရှင်နဲ့တွဲပြီးအရံမစ်ရှင်တွေ ဖွင့်ဖွင့်ပေးတတ်တယ်..မျှော်စင်တိုက်ခိုက်ဂိမ်းတစ်ခုစီမှာ အနည်းဆုံးမစ်ရှင်၂ခုလောက်ပေါ်လာမှာပဲ..မူဟွေ့ရွှယ်လည်း မစ်ရှင်တစ်ခုကိုရှင်းနေတာဖြစ်လောက်တယ်. သူ၄ထပ်မြောက်ကိုရှင်းခါနီးမှာပဲ နောက်ထပ်မစ်ရှင်တစ်ခုကိုဖွင့်မိသွားတာဖြစ်မယ်"

ချန်ရှန်းရှန်း၏လေသံမှာ တန့်သွားပြီး ထန်မော့ကိုကြည့်နေသောမျက်၀န်းများမှာ ပြူးကျယ်သွားခဲ့သည်။

ထန်မော့သည်လည်း ထိုကလေးမလေးကို ကြည့်နေခဲ့သည်။

၂ဦးသား၏အကြည့်တို့ လေထဲတွင်ဆုံတွေ့သွားလျက် ထန်မော့သက်ပြင်းချလိုက်သည်။

"ဒီဟာကအချိန်နဲ့ပြိုင်ရတဲ့ပွဲပဲ..ရှန်းရှန်း မင်းနဲ့ဂျက်တတိယထပ်ကို ဘယ်တော့တိုက်မှာလဲ..ဂျက်ရဲ့ခွန်အားနဲ့ မင်းရဲ့ဥာဏ်စွမ်းဥာဏ်စနဲ့ဆို မင်းတို့အတူပူးပေါင်းပြီး တတိယထပ်ကို ချောချောမွေ့မွေ့ရှင်းနိုင်မှာပါ"

ချန်ရှန်းရှန်း ခေါင်းညိတ်လိုက်သည်။

"၂ရက်အတွင်း.."

ဆန္ဒအလျောက် မျှော်စင်တိုက်ခိုက်ခြင်းဂိမ်းအား ဆုံးဖြတ်ပြီးချေပြီ။

လီချောင်ချန်းသည် ထန်မော့က လူပေါင်းသန်း၄၀၀၏ဘိတ်ချေးတွင်ဖြစ်ကာ မျှော်စင်ပထမထပ်ကိုသာ ရှင်းထားကြောင့်အမှန်တကယ် ယုံကြည်နေခဲ့သည်။ သို့သော် ထန်မော့၏တိုက်ရည်ခိုက်ရည်မှာ အသန်မာဆုံးမဟုတ်သော်လည်း သူ၏သန်မာမှုမှာ ရှင်ကျန်ရစ်သော ကစားသမားများထဲတွင် ထိပ်ဆုံးတွင်ရှိကြောင်း ထန်မော့ရော ချန်ရှန်းရှန်းရော သိထားပြီးသားဖြစ်လေသည်။ သူ့အားသတ်ရန် အင်မတန်ခက်ခဲသော်လည်း သူ့ထံမှ အသတ်ခံရရန်တော့ အလွန်လွယ်ကူလေသည်။

ပြန်လာသူများမှာ အနက်ရောင်မျှော်စင်ဂိမ်းများစွာကို အတွေ့အကြုံရှိသော ကစားသမားများဖြစ်သည်။ ထန်မော့အနေနှင့် သူကပို၍အတွေ့အကြုံပိုများသည်ဟုမဆိုရဲချေ။ သူ ချန်ရှန်းရှန်းနှင့် ဂျက်တို့၃ယောက်ပေါင်းလျှင်တောင် လီချောင်ချန်းဆော့ခဲ့ဖူးသော ဂိမ်းများ၏ တစိတ်တပိုင်းမျှသာရှိနိုင်လောက်သည်။

သေခြင်းရှင်ခြင်းကို အလောင်းအစားလုပ်နေရသော ကမ္ဘာတွင်နေထိုင်ရသော ပြန်လာသူများက မိမိတို့ထက်သန်မာသည်ဆိုသည်မှာ သဘာ၀ကျလေသည်။ ယခု မူဟွေ့ရွှယ်မှာ မျှော်စင်၄ထပ်မြောက်တွင် ရှိနေဆဲဖြစ်နိုင်လေသည်။ သူမအောင်မြင်သွားသ၍ မျှော်စင် 4.0ဗားရှင်း ပွင့်လာပြီး ကမ္ဘာ၂ခုမှာလည်းပေါင်းစပ်သွားပေမည်။

အချိန် မရှိတော့ချေ။ သူတို့သည် ခွန်အား ပို၍သန်မာလာစေရန် အခွင့်အရေးမှန်သမျှကို ဖမ်းဆုပ်ထားရချေမည်။

အချိန်အဆင့်ဇယားပေါ်မှ ကစားသမားများမှာ ကျိန်းသေ သန်မာလေသည်။ လီချောင်ချန်းမှာလည်း သန်မာပါသော်လည်း သူကားကိုယ့်ကိုယ်ကိုအထင်ကြီးလွန်းခဲ့သည်။ သူသည်ထန်မော့တို့အား ၀က်များအဖြစ် အထင်သေးလျက် သူ့စွမ်းရည်၏ အားနည်းချက်များကို မဖုံးကွယ်ထားခဲ့ချေ။

ထန်မော့ဆိုလိုက်သည်။

"သူ့စွမ်းရည်က ထူးဆန်းတဲ့ အပ်တွေကို လုပ်တာပဲ..အမြန်နှုန်းရယ် မာကြောမှုရယ်က အတော်မြင့်တယ်..အားနည်းချက်ကတစ်ခုပဲရှိတယ်.. တစ်ခါသုံးပြီးတိုင်း ပြန်သုံးဖို့ကြာတာရယ်..လက်တစ်ဖက်က နောက်တစ်ဖက်ထက် အပ်၂ချောင်းပိုနည်းတာရယ်ပဲ.."

အပ်များအားလုံးကို အတူပစ်နေသည့်အချိန်တွင် ထိုအားနည်းချက်ကို မြင်ရန်ခက်ခဲလေသည်၊

ထန်မော့သည် မိနစ်အနည်းငယ်ကြာပြီးမှ ၄င်းကို သတိထားမိခြင်းပင်။ ထို့ကြောင့်ပင် ဂျက်နှင့် လူချင်းခွဲလျက် ဘေးမှ ၀င်တိုက်ရန် ပြင်ခဲ့ခြင်းဖြစ်လေသည်။

လီချောင်ချန်း၏ ခွန်အားမှာ မေးခွန်းထုတ်စရာမလိုချေ။ ထန်မော့စိုးရိမ်သည့်အရာမှာတစ်ခုသာ။

"အချိန်အဆင့်ဇယားပေါ်မှာ မရှိဘဲ လီချောင်ချန်းထက် သန်မာတဲ့ ကစားသမားတွေလည်းရှိမှာပဲ"

ထန်မော့တန့်သွားလျက် စကားလုံးကိုပြင်လိုက်သည်။

"အမှောင်ထဲမှာ ပုန်းနေတဲ့ သန်မာတဲ့ ကစားသမားတွေလည်းရှိမှာ"

ချန်ရှန်းရှန်းမှာ စာရွက်များကိုပြန်လည်သိမ်းဆည်းနေစဥ် ထိုတန့်သွားမှုကို ကြားလိုက်ရသည်။

ကလေးမလေးမှာ ခေါင်းကိုငုံ့ထားလျက် စကားမဆိုပဲ ထန်မော့၏စကားကို တိတ်တဆိတ်ထောက်ခံနေခဲ့သည်။

🌍

Prev Next