MM Story Teller

Chapter 64

Viewers 4k

🐯Chapter 64

နံနက်ခင်းစောစောတွင် ပရိတ်သတ်အရေအတွက်က ကုယွီမြန်ခန့်မှန်းထားသည့်ပမာဏထက် ကျော်လွန်သွားသည်။ ကုယွီမြန်က အံ့အားသင့်သွားသော်လည်း သူ၏စည်းချက်အတိုင်းသာ ဆက်လက်လုပ်ဆောင်နေမြဲ ဖြစ်သည်။ သူက ယနေ့အတွက် အစီအစဥ်များကို ပရိတ်သတ်နှင့်ဝေမျှလိုက်သည်။

" ဒီနေ့ မနက်၉နာရီခွဲကနေ ညနေ၅နာရီထိ သိပ္ပံအကယ်ဒမီကိုသွားရမယ်… ပြီးရင်တော့ အထက်တန်းလွှာနယ်မြေထဲ ဟိုဟိုဒီဒီပေါ့… အရင်ဆုံးတော့ မနက်ခင်းမှာထွမ်ထွမ်ကကျောင်းသွားရမယ်..."

ကုယွီမြန်က နှင်းကျားသစ်လေး၏ မေးစေ့ကို ဖွဖွကုတ်ပေးနေသည့်အတွက် နှင်းကျားသစ်လေးက ဇိမ်ကျစွာ သမ်းဝေလိုက်သည်။

" အရင်ဆုံး ထွမ်ထွမ့်အတွက် အထုပ်ပြင်ပေးရမယ်..."

အထုပ်ငယ်လေးက ထွမ်ထွမ့်အတွက် သယ်ရပြုရလွယ်ကူစေမည့် အရွယ်အစားဖြစ်သည်။

ကုယွီမြန်က ၎င်းအိတ်တွင် သရေစာအများအပြားနှင့်အတူ ကလေးများလမ်းပျောက်လျှင် အိမ်ပြန်လမ်းရှာရန်ကူညီသေးနိုင်သော သံလိုက်ကတ်လေးကို ထုပ်ပိုးပေးထားသည်။

သူက နှင်းကျားသစ်လေး၏ အမွေးပွပွများအား သပ်သပ်ရပ်ရပ်ဖြီးသင်ပေးနေသည်။ ကုယွီမြန်က နှင်းကျားသစ်လေးအတွက် ထည့်သွင်းစဥ်းစားပေးခြင်းဖြစ်သည်။ သပ်ရပ်သည့်ကလေးများက ကျောင်းတွင်နာမည်ကြီးနိုင်ပေသည်။

ထိုသို့ပြင်ဆင်ပေးနေချိန်တွင် နှင်းကျားသစ်လေးက ပျင်းရိစွာလဲလျောင်းလျက် ကုယွီမြန်အား စိုက်ကြည့်နေသည်။ သူ၏မျက်ဝန်းများက ဂရုမစိုက်ခြင်းတစ်ဝက် မလိုလားခြင်းတစ်ဝက်ဖြင့် မှေးစင်းနေ၏။ ကုယွီမြန်ကမူ နှင်းကျားသစ်လေး၏ ဂျစ်ကန်ကန်အမူအရာကို ချစ်မွှေးပါသည်ဟု ယူဆမိ၏။

ထို့ကြောင့် သူ၏အကြည့်များက ပြုံးယောင်သမ်းနေခဲ့သည်။

[အားးး…]

[မနက်စောစောမှာ မြန်မြန့်အပြုံးလေးကိုတွေ့ရတာ အရမ်းကောင်းတာပဲ…]

[မြန်မြန် နည်းနည်းလောက်ပိုပြုံးပေးလို့ရမလား… ငါကော်ဖီထဲသကြားထည့်ဖို့မေ့နေလို့ပါ…]

ကြည့်ရှုသူအရေအတွက်က တဟုန်ထိုး မြင့်တက်လာသည့်အတွက် မှတ်ချက်တစ်ခုချင်းအား မမြင်နိုင်တော့ချေ။

" စကားမစပ်..."

ကုယွီမြန်က အချိန်ကို လှမ်းကြည့်လိုက်သည်။

" အချိန်က တစ်နာရီစွန်းစွန်းတော့ကျန်သေးလို့ ကျွန်တော် ငါးအသားလွှာနဲ့ ပင်လယ်စာစွပ်ပြုတ်ချက်လိုက်မယ်… ထွမ်ထွမ်ကျောင်းမသွားခင် စွပ်ပြုတ်စားသွားလေ..."

နှင်းကျားသစ်လေးက ကန့်ကွက်စရာမရှိချေ။ သူက သူ့ဦးခေါင်းလေးဖြင့် ကုယွီမြန်၏ လက်ဖဝါးကိုပွတ်သပ်လိုက်သည်။

ပန်ဒါလေးနှင့် မြေခွေးလေးတို့ နိုးလာပါက စွပ်ပြုတ်သောက်နိုင်သည်။ ထို့အပြင် စွပ်ပြုတ်များများလုပ်၍ သိပ္ပံအကယ်ဒမီရှိ နံနက်စာစားရန်အချိန်မရှိသူများအတွက် အပိုထည့်သွား၍ ရနိုင်သေးသည်။

ကုယွီမြန် စိတ်ထင်သည်သည်ပဲလား မသိသော်လည်း သိပ္ပံအကယ်ဒမီမှ ပြင်ဆင်ပေးထားသည့် မီးဖိုချောင်က ပြည့်ပြည့်စုံစုံရှိပေ၏။

ပေါင်းခံပစ္စည်များနှင့် မီးဖိုများအပြင် ကြယ်တာရာခေတ်တွင် မြင်တွေ့ရလေ့မရှိသော အိုးခွက်များပင်ရှိသည်။

" ငါးနဲ့ပုဇွန်ကို အရင်ရေဆေးဖို့လိုတယ်..."

ကုယွီမြန်က ငါးကိုလက်တစ်ဖက်ဖြင့်ကိုင်၍ သင့်လျော်သောအရွယ်အစားများဖြစ်သည်ထိ နုတ်နုတ်စင်းလိုက်သည်။ ငါးအသားလွှာများက ပန်းရောင်သန်းနေ၏။ သူက ဟင်းချက်ဝိုင်နှင့် ဆားကိုအသုံးပြု၍ ညှီနံ့ပျောက်စေလိုက်ပြီး နူးညံ့သောအရသာအတွက် ကြက်ဥအနှစ်ဖြင့် စိမ်လိုက်သည်။

တစ်ချိန်တည်းတွင် ပုဇွန်များကို အခွံနွှာ၍ အညစ်အကြေးများဖယ်ကာ ရေခဲရိုက်လိုက်၏။

" စွပ်ပြုတ်ကတော့ ကြာကြာချက်ရမယ်..."

ဤခေတ်တွင် ဆန်နှင့် ခေါက်ဆွဲစားသူ ရှားပါးလှသည်။ ကံကောင်းထောက်မစွာဖြင့် ကုယွီမြန်က အင်တာနက်ပေါ်မှတစ်ဆင့် ဆန်အချို့ဝယ်ယူနိုင်ခဲ့သည်။

သူက ပုလဲဆန်အချို့ကို ရေဆေးပြီးနောက် အိုးထဲတွင်ကျိုက်ကျိုက်ဆူအောင် မီးပြင်းပြင်းဖြင့် ပြုတ်လိုက်သည်။ အပူရှိန်ပြင်းလာသည်နှင့် မီးအားကို ချက်ချင်းလျှော့ချလိုက်၏။

နည်းပညာ၏ အကူအညီဖြင့် ချက်ပြုတ်ရန်ကြာချိန်က အတော်အတန်လျော့ကျသွားသည်။ ကုယွီမြန်က မီးအားကိုဂရုတစိုက် ထိန်းညှိကာ ထမင်းရည်များဝေမကျစေရန် ပြုလုပ်နေသည်။

ဆန်ကိုရေအေးဖြင့် ဦးစွာချက်ပြုတ်၍ အပူရှိန်ကိုလျှော့ချခြင်းက ဆန်အား ရေကိုလုံလောက်စွာစုပ်ယူနိုင်စေပြီး နူးညံကာ ထူထဲသောဆန်စေ့များ ဖြစ်လာစေသည်။

ကုယွီမြန် အိုးအဖုံးကိုလှပ်လိုက်သည့်အခါ အဖြူရောင် ဟင်းရည်အနှစ်၏ရနံ့က ပရိတ်သတ်အား သွားရေတမြားမြားဖြစ်စေသည်။ သူက မှိုနှင့် ခုံးကောင်အချို့ကို ဦးစွာထည့်၍ ဇွန်းရှည်ဖြင့်မွှေနောက်လိုက်သည်။ ထို့နောက် ရေဆေးထားသည့် ငါးအသားလွှာနှင့် ပုဇွန်များကို နုတ်နုတ်စင်းထားသည့် ဂျင်းအချို့နှင့် ရောထည့်ပြီးနောက် နှမ်းဆီအနည်းငယ်ထည့်လိုက်သည်။ ကျက်ခါနီးတွင်မူ ကြက်သွန်နီနှင့် အရွက်အချို့ထည့်လိုက်၏။

မကြာမီတွင် ငါးအသားလွှာနှင့် ပင်လယ်စာစွပ်ပြုတ်ပါသည့် ဟင်းရည်အိုးက မီးဖိုထက်တွင် တပွက်ပွက်ဆူပွက်လာသည်။

အဖုံးကို ဖွင့်လိုက်သည့်အခါ အထဲရှိအစားအသောက်က ထူထဲ နူးညံ့နေသည်။ စေးပျစ်သော ထမင်းအနှစ်ပြည့်ပြည့်မောက်မောက်ထဲ၌ ငါးအသားလွှာများ ပုဇွန်နီရဲရဲများနှင့် အစိမ်းရောင်ဟင်းသီးဟင်းရွက်များကို မြင်နေရသည်။ တောက်ပသောအရောင်အဆင်းက မြင်ရသူတိုင်းအား စားချင်စိတ်တိုးစေသည်။

တစ်ချိန်တည်းတွင် မွှေးပျံ့နေသောရနံ့က အကန့်အသတ်မဲ့သည်။

အိပ်ချင်မူးတူးဖြစ်နေသည့် နှင်းကျားသစ်လေးက အပြည့်အဝနိုးထလာပြီး အစာကျွေးမည့်အချိန်ကို စောင့်စားနေသည်။ ထိုစဥ် မြေခွေးလေးနှင့် ပန်ဒါလေးသည်လည်း အိပ်ရာမှ လူးလွန့်ကာထလာကြသည်။ သူတို့လည်း မွှေးပျံ့သည့်ရနံ့၏ ဆွဲဆောင်ခြင်းကို ခံလိုက်ခြင်းဖြစ်၏။

[နူးညံ့တဲ့ခြုံစောင်လေးပါ: ဘုရားရေ… ဒါကစားလို့ရတာလား ငါတို့ရော ဘယ်တော့များစားရမှာပါလိမ့်… ပေါင်မုန့်ခြောက်လေးကိုင်ပြီးစောင့်နေပါတယ် စားဖို့အသင့်ပဲ… ]

ပရိတ်သတ်က အလွန် စိတ်လှုပ်ရှားနေသည်။

'အားးး...'

'မျှော်လင့်နေပြီ...'

'မြန်မြန်စားပါတော့...'

အစရှိသည့်မှတ်ချက်များဖြင့် ပွက်လောရိုက်နေကြလေသည်။ မူလကပင် ကြောက်မက်ဖွယ်ကောင်းနှင့်ပြီးဖြစ်သော ပရိတ်သတ်ပမာဏက အရှိန်အဟုန်ဖြင့် တိုးပွားလာပြန်သည်။

ကုယွီမြန်က ဇွန်းတစ်ချောင်းကိုယူ၏ အရသာအနည်းငယ်မြည်းလိုက်ပြီးနောက် ဆားအနည်းငယ်ထပ်ထည့်ကာ မီးဖွင့်ထားလိုက်သည်။ ထို့နောက် အပူပေးထားသော ပန်းကန်လုံးတစ်လုံးထဲသို့ ငါးအသားလွှာများ ပုစွန်များနှင့် စွပ်ပြုတ်များကိုထည့်၍ နှင်းကျားသစ်လေးထံသို့ ပေးလိုက်၏။

နှင်းကျားသစ်လေးက စိတ်ကျေနပ်စွာကြည့်လိုက်ပြီး သူ၏နှစ်ခြိုက်မှုကို ပြသရန် ခေါင်းညိတ်လိုက်သည်။

ပူနွေးလတ်ဆတ်သော စွပ်ပြုတ်က နူးညံ့အိစင်းနေကာ မွှေးကြိုင်လှသည်။ ငါးအသားနှင့် ပုစွန်တို့၏ အရသာကိုစိမ့်ဝင်သည်ထိ တည်ထားခဲ့ခြင်းဖြစ်ရာ ထမင်းအနှစ်ထဲတွင် ချိုမြိန်လေးပင်သော အရသာပါရှိနေသည်။ ချိုမြနူးညံ့သောငါးအသား လတ်ဆတ်ကြွပ်ရွသော ပုဇွန်အသား ပါဝင်ပစ္စည်းအားလုံးအား မူလအရသာမပျက်စေဘဲ ညှီနံ့ပျောက်အောင် ချက်ပြုတ်ထား၏။

ဤကဲ့သို့ ဆောင်းမနက်ခင်းကို နွေးထွေးသည့်ထမင်းစွပ်ပြုတ်ဖြင့် စတင်ရခြင်းသည် ခန္ဓာကိုယ်တစ်ခုလုံးကို နွေးထွေးသွားစေသည်။ အစာအိမ်မှတစ်ဆင့် လေးပင်နေသော စိတ်ဝိညာဥ်ထိပျံ့နှံ့ကာ နိုးကြားစေသည်။ အရသာတင်သာမကဘဲ ခံစားချက်တစ်ခုလုံးကိုပါ ကောင်းမွန်သွားစေသည်။

မှတ်ချက်များက မီးရှူးမီးပန်းများကဲ့သို့ ပေါက်ကွဲသွားလုမတတ်ပင်။

[မြောင် မြောင် မြောင် : အားးးး…]

[ဂျူနီယာ ဘီ: အားး တိုက်ရိုက်ထုတ်လွှင့်တဲ့လူရဲ့ စကေးတွေကို သိပြီးသားဖြစ်နေတာတောင် သူချက်တာမြင်ရင်မစားချင်ဘဲကို မနေနိုင်သေးဘူး… ဒူးထောက်ပါတယ် အရသာရှိပြီး သက်သောင့်သက်သာဖြစ်လွန်းတယ်…]

[သစ်တော်ပွင့်ဖြူလေး : အရမ်း သက်သောင့်သက်သာဖြစ်လွန်းတယ်… ဒါကိုဘာကြီးလို့ခေါ်တာပါလိမ့် ထမင်းစွပ်ပြုတ်လား… ငါသာစာကောင်းကောင်းလုပ်ခဲ့ရင် ခုချိန် သိပ္ပံအကယ်ဒမီမှာ မြန်မြန်ချက်တဲ့ထမင်းစွပ်ပြုတ်စားနေရလောက်ပြီ…]

[တိမ်လေးတစ်ခုရှိတယ် : အရမ်းနွေးထွေး မွှေးကြိုင်နေတာပဲ… ပင်လယ်စာတွေကလည်းမွှေး ထမင်းကလည်းနူးညံ့နေရော… ဒါကိုပင်လယ်စာ ထမင်းစွပ်ပြုတ်လို့ခေါ်တာလား မီးရှူးမီးပန်းငါးခုပို့လိုက်ပါတယ်…]

[အေယူအက်ဖ်စီအန်: သူငယ်ချင်းတစ်ယောက်အကြံပေးလို့ရောက်လာတာပါ …မနက်၉နာရီအလုပ်သွားဖို့ရှိသေးပေမယ့် ငါအခုအရမ်းကျေနပ်သွားပြီ ငါအရမ်းအဆင်ပြေနေတယ်…]

အချိန်က ရှစ်နာရီခွဲဖြစ်သည်။ ကုယွီမြန် တိုက်ရိုက်ထုတ်လွှင့်မှုစတင်ပြီး နာရီဝက်အတွင်း ကြည့်ရှုသူအရေအတွက်က သန်းသုံးဆယ်အထိ ရောက်ရှိသွား၏။ သူ၏ တိုက်ရိုက်ထုတ်လွှင့်မှုအစီအစဥ်က မည်သည့်အကူအညီမှမပါဘဲ စစ်မှန်သောကျော်ကြားမှု အဆင့်များထဲမှ ထိပ်တန်းနေရာသို့ ကြောက်ခမန်းလိလိ ရောက်ရှိသွားသည်။

ကုယွီမြန် မတတ်နိုင်ဘဲ ပြုံးလိုက်မိသည်။ သူက စွပ်ပြုတ်အချို့အား လတ်ဆတ်မှုထိန်းသိမ်းသည့် ဘူးများထဲသို့ ခွဲထည့်လိုက်သည်။

" အနာဂတ်မှာ အခွင့်ကြုံရင် မင်းတို့ကိုယ်တိုင် လာမြည်းစမ်းလှည့်ပါ..."

အယ်လ်ဘတ်စားသောက်ဆိုင်၏ အခြေအနေက ယခုလက်တလောတွင် မတည်ငြိမ်နိုင်သေးဟု ကုယွီမြန်တွေးမိသည်။ အခွင့်အရေးရခဲ့လျှင် ချက်ရပြုတ်ရမခက်ခဲသော ထမင်းစွပ်ပြုတ်အား မီနူးထဲသို့ ထပ်တိုးထည့်ရန် တွေးထားလိုက်သည်။

ပရိသတ်ကမူ ကုယွီမြန်က အနာဂါတ်တွင် ထီလက်မှတ်ကံစမ်းရန်ပြောနေသည့်အလား မှတ်ယူကာ တစ်ခဲနက် အားပေးထောက်ခံလိုက်ကြသည်။

'ကောင်းတယ်...'

' မျှော်လင့်နေပြီ...'

အစရှိသော မှတ်ချက်များက တိုက်ရိုက်ထုတ်လွှင့်မှုကို ဖုံးလွှမ်းသွားပြန်ကာ လက်ဆောင်အများအပြား ပေးပို့လာကြသည်။

ကုယွီမြန်က သိပ္ပံအကယ်ဒမီသို့ ယူဆောင်သွားမည့် ထမင်းစွပ်ပြုတ်များကို ခွဲခြမ်း၍ သိမ်းဆည်းထားလိုက်သည်။ ထို့နောက် နှင်းကျားသစ်လေးကို သူ့ပခုံးပေါ်တွင်သယ်ဆောင်၍ လက်နှစ်ဖက်တွင် စွပ်ပြုတ်အိုးကို အပူခံလက်အိတ်ဖြင့်မကာ ဧည့်ခန်းထဲသို့ ဝင်ရောက်လာသည်။ ထို့နောက် သူ၏ အခြားကလေးနှစ်ဦးအား နံနက်စာစားရန် ခေါ်လိုက်သည်။

မလှမ်းမကမ်းတွင် အမြှီးအားဘောလုံးကဲ့သို့လုံးကာ ခွေနေသော မြေခွေးလေးက ဦးစွာထလာသည်။ သူက အိပ်ယာထက်တွင် ခေတ္တမျှသမ်းဝေနေပြီးနောက် ပန်ဒါလေး၏ နူးညံ့သောဝမ်းဗိုက်အား သူ့လက်ဖဝါးဖြင့်အသာပုတ်ကာ တစ်ဖက်သူကို နံနက်စာအတွက်ထရန် သတိပေးလိုက်သည်။ မကြာမီတွင် ပန်ဒါလေးလည်း နိုးထလာပြီး မြေခွေးလေးအား ငူငူငိုင်ငိုင်ဖြင့် ငေးကြည့်နေ၏။

" ချိုးချိုးနဲ့ ယွမ်ယွမ် မနက်စာစားမယ်..."

ကုယွီမြန်က အိုးကိုချ၍ သူ၏အပူခံလက်အိတ်များကိုချွတ်ပြီးနောက် ကလေးများအားချီမရန် သွားလိုက်သည်။

" သိမ်မကြာခင် သိပ္ပံအကယ်ဒမီကျောင်းကိုသွားကြမှာ ဘယ်အချိန်မှပြန်ရောက်မယ်မပြောနိုင်လို့ ဗိုက်ဝအောင်စားသွားကြရမယ်..."

ကုယွီမြန် မရောက်ရှိမီ နှင်းကျားသစ်လေးက ကုယွီမြန်၏ ပခုံးပေါ်မှခုန်ဆင်းကာ အခြားသားပေါက်နှစ်ကောင်အား အထက်စီးဆန်သောအကြည့်ဖြင့် ငုံ့မိုးကြည့်ကာ အနည်းငယ်မာန်ဖီလိုက်သည်။ ကျန်နှစ်ဦးက သူ့အား ထိုင်းမှိုင်းစွာငေးကြည့်နေကြ၏။

နှင်းကျားသစ်လေး၏ အမူအရာက လက်အောက်ငယ်သားများကို မာန်မဲနေသော လူဆိုးဂိုဏ်းခေါင်ဆောင် တစ်ဦးအလားပင်။

ပရိတ်သတ် : ဟားဟားဟား…

ကုယွီမြန်: "..."

ကုယွီမြန်က ပန်ဒါလေးအတွက် တိုက်ရိုက်ထုတ်လွှင့်မှုကိုယ်ရေးကိုယ်တာ ကာကွယ်ရေးစနစ်ကိုဖွင့်ရန် သတိရခဲ့သော်လည်း မြေခွေးလေးကိုမူ သတိလက်လွတ်ဖြစ်သွားခဲ့သည်။ ထိုအခါ တစ်စုံတစ်ယောက်က ချက်ချင်းဆိုသလို မေးမြန်းလာ၏။

" ချိုးချိုးက သိပ္ပံအကယ်ဒမီကလေ ငါတို့အိမ်မှာလာကစားတာ..."

ကုယွီမြန်ကရှင်းပြလိုက်သည်။ သိပ္ပံအကယ်ဒမီတွင် အာတိတ်မြေခွေးများ ရှိသည့်အကြောင်း လူအများစုသိကြသော်လည်း အကြီးအကဲနှင့် မြေခွေးလေးအကြားရှိ ဆက်နွယ်မှုကိုသိသူက ရှားပါးသည်။

" ထွမ်ထွမ်..."

ကုယွီမြန်က နှင်းကျားသစ်လေးအား သူ့ပခုံးထက်သို့တက်စေကာ လုံးဝန်းကာ သယ်ယူရလွယ်သည့် ထန်ယွမ်လေးကိုကြည့်လိုက်သည်။ ထို့နောက် ရှည်လျားသော အမြှီးလေးကိုပိုက်ကာ အနည်းငယ် ရှက်ရွံ့နေသော အာတိတ်မြေခွေးလေးအား ကြည့်ရှုလိုက်၏။

ကုယွီမြန်က အာတိတ်မြေခွေးလေးကို ဦးစွာပွေ့ချီလိုက်ပြီးနောက် ကျန်တစ်ဖက်ဖြင့် ထန်းယွမ်ကို ချီမလိုက်ကာ ဧည့်ခန်းအတွင်းသို့ ခေါ်ဆောင်သွားပေးလိုက်သည်။

အိမ်တွင် ဤထက်ပို၍ ကလေးမများနိုင်ဟု ကုဟွီမြန်တွေးလိုက်မိသည်။

ယနေ့က စတူဒီယိုအတွင်း၌ တိုက်ရိုက်ထုတ်လွှင့်မှုပြုလုပ်သည့် ပထမဆုံး နံနက်ခင်းဖြစ်သည်။

ကုယွီမြန်က ပန်ဒါလေးနှင့် အာတိတ်မြေခွေးလေးတို့အတွက် နို့အိုးကျိုထားပေးသည်။ နို့ရနံ့များနှင့် တကျိုက်ကျိုက်ဆူပွက်သံများက စားပွဲကို ဖုံးလွှမ်းထား၏။ ကုယွီမြန်က ကလေးများအတွက် နို့နှင့် ထမင်းစွပ်ပြုတ်များ ပြင်ဆင်ပေးပြီးနောက် စကားအနည်းငယ်ပြောနေလိုက်သည်။

အခန်းအပြင်ဘက်တွင် ကျဆင်းနေသည့်နှင်းများ ရပ်တန့်သွားသည်။ ကြည်လင်သော အပြာရောင်ကောင်းကင်က အထက်တန်းလွှာနယ်မြေ၏ အထက်တွင်တည်ရှိနေသည်။

ကြည့်ရှုသူသန်းသုံးဆယ်၏ ခံစားချက်သည်လည်း အေးဆေးငြိမ့်‌ညောင်းသော ငြိမ်းချမ်းမှုအတွင်း မြောပါသွားလေသည်။ သူတို့က ယနေ့ထုတ်လွှင့်မှုကို များစွာ မျှော်လင့်စောင့်စားနေမိကြပြီဖြစ်သည်။

ကုယွီမြန်၏ တိုက်ရိုက်ထုတ်လွှင့်မှုကလည်း ကျော်ကြားမှုစာရင်းတွင် ဖြေးဖြေးနှင့် မှန်မှန်မြင့်တက်လာနေဆဲဖြစ်သည်။

" ဒါဆို သိပ္ပံအကယ်ဒမီကို သွားကြရအောင်..."

နံနက်၉ နာရီအတိတွင် ကုယွီမြန်က ကလေးသုံးဦးအား ဖြီးလိမ်းပြင်ဆင်ပေးပြီးဖြစ်သည်။

နှင်းကျားသစ်လေးက သူ့ပခုံးထက်တွင်ထိုင်နေပြီး ပန်ဒါလေးနှင့် မြေခွေးလေးတို့က ချီပိုးခြင်းခံထားရသည်။ ကုယွီမြန်က နောက်ဆုံးအကြိမ်အဖြစ် စစ်ဆေးပြီးနောက်တွင် တံခါးကိုတွန်းဖွင့်လိုက်သည်။

နေရောင်က တောက်ပစွာဖြာကျနေပြီး သာယာသောနေ့တစ်နေ့ဖြစ်၏။

အပြင်ဘက်သို့ မော့ကြည့်လိုက်သည့်အခါ ခမ်းနားသောနန်းတော်ကြီးနှင့် မိုးထိအောင်မြင့်မားသောမျှော်စင်ကို တွေ့မြင်လိုက်ရသည်။ မျှော်စင်၏ ပတ်ပတ်လည်တွင် ဥပဒဟို လှည့်ပတ်ပျံသန်းနေသော ယာဥ်ပျံများကိုလည်း တွေ့ရှိနိုင်၏။ ထူထပ်စွာကျဆင်းခဲ့သောနှင်းများသည်လည်း အလိုအလျောက် နှင်းဖယ်ရှားရေးကိရိယာများဖြင့် ဖယ်ရှားခံလိုက်ရပြီးဖြစ်ကာ လမ်းမထက်တွင် အတားအဆီးမရှိ သွားလာလှုပ်ရှားနေနိုင်ကြ၏။

နှားကျားသစ်လေးကို အထက်တန်းလွှာနယ်မြေရှိကျောင်းမှ ဘတ်စ်ကားဖြင့် လာရောက်ခေါ်ဆောင်သွားကြပြီဖြစ်သည်။ ကျန်သားပေါက်လေးနှစ်ကောင်အား လုံခြုံစွာစောင့်ရှောက်နိုင်လျှင် ကုယွီမြန်အလွန် စိတ်အေးရမည်ပင်။

" မစ္စတာကု တစ်ယောက်ယောက်ကို လာကြိုဖို့လွှတ်ပေးရမလား...ဟို လမ်းသိရဲ့လားလို့ပါ..."

လက်ထောက်က ဖုန်းဆက်လာသည်။

ကုယွီမြန်က အမှန်တကယ်ကို အထက်တန်းလွှာနယ်မြေ၏ လမ်းများကိုမသိချေ။ သို့ရာတွင် သူက ကလေးများကို အပြင်ခေါ်ထုတ်ရန် အလွန်စိုးရိမ်ပူပန်နေခဲ့သည့်အတွက် ယမန်နေ့ညက တစ်ကီလိုမီတာပတ်လည်အတွင်းရှိလမ်းများအား နှံ့နှံ့စပ်စပ် ရှာဖွေကြည့်ရှုပြီးဖြစ်သည်။

" ပြဿနာမရှိပါဘူး ကျွန်တော်သိပ်မကြာခင် အဲဒီကိုရောက်မယ်နော်..."

အကြီးအကဲကိုယ်တိုင်ပါနေသည့်အတွက် လမ်းမပျောက်နိုင်ဟု လက်ထောက်ကယူဆလိုက်သည်။

[မိုင်းတွင်းထဲမှာ မိသားစုတစ်စုရှိတယ် : အထက်တန်းလွှာနယ်မြေကျ လူကျဲလိုက်တာ မနက်စောစောတောင်လမ်းပေါ်လူမရှိဘူး…]

အပြင်ဘက်တွင် ရာသီဥတုက အတော်အတန်အေးသည့်အလျောက် ကုယွီမြန်က သားမွေးအဝတ်အစားများကိုဝတ်ဆင်ကာ မာဖလာပတ်ထားသည်။ ထူထဲသော အဝတ်အစားများကြောင့် သူ၏လှုပ်ရှားမှုများက အနည်းငယ်နှေးကွေးနေပြီး နွေးထွေးသော အငွေ့အသက်များထုတ်လွှတ်နေသည်။

ကုယွီမြန်က ရှက်တတ်သောမြေခွေးလေးကိုပွေ့ချီကာ ပန်ဒါလေးကို အနည်းငယ်ဖုံးကွယ်လိုက်ပြီး ရှင်းပြလာသည်။

" အထက်တန်းလွှာနယ်မြေရဲ့ ဆယ်ရာခိုင်နှုန်းက တော်ဝင်မျိုးနွယ်တွေလေ ကျန်တာတွေက အစေခံတွေနဲ့ ရွှေ့ပြောင်းလုပ်သားတွေ..."

ဤနေရာက သက်ဦးဆံပိုင်စနစ်၏ လွှမ်းမိုးမှုကြောင့် နည်းပညာအတိုးတက်ဆုံးဖြစ်သည်။ နံနက်စောစောတွင် တော်ဝင်မျိုးနွယ်များက အိပ်မောကျလျှင်ကျ မဟုတ်ပါက လူမှုဆက်ဆံရေးတာဝန်များ ရှိနေနိုင်ပေသည်။ ထို့ကြောင့် လမ်းမထက်တွင် ရွှေ့ပြောင်းလုပ်သားများဖြင့် ပြည့်နှက်နေ၏။

" သိပ္ပံအကယ်ဒမီက ဧရိယာဘီထဲမှာရှိတာ... ဧရိယာ ဘီက နန်းတော်နဲ့နီးလို့ စစ်ဆေးရေးဂိတ်တွေဖြတ်ရလိမ့်မယ် အဲအခါကျ ကိုယ်ရေးကိုယ်တာ အချက်အလက်တွေပါနိုင်လို့ တိုက်ရိုက်ထုတ်လွှင့်တာကို ခဏပိတ်ထားရလိမ့်မယ်နော် စိတ်မရှိပါနဲ့..."

ကုယွီမြန်က အသံတိုးတိုးဖြင့် ရှင်းပြလာသည်။

ကုယွီမြန်၏ အတွေးကား ကျိုးကြောင်းသင့်ပေသည်။ ကိုယ်ရေးကိုယ်တာ အချက်အလက်များကို ဂရုစိုက်ရန်လိုအပ်၏။ ပရိသတ်များက စိတ်ဝင်တစားရှိသော်လည်း သူတို့က ကုယွီမြန်ကိုယ်တိုင်ထုတ်ဖော်ပြောပြလာသည်ကိုသာ စောင့်ကြမည်ပင်။

စစ်ဆေးရေးဂိတ်က လေဆိပ်စစ်ဆေးရေးဂိတ်နှင့် အလားတူသည်။

ကုယွီမြန်က လူသားတစ်ယောက်သာဖြစ်သော်လည်း မတူညီသောမျက်လုံးများစွာဖြင့် ကြည့်ရှုခြင်းခံရသည်။ ထိုမျက်လုံးများက ရင်းနှီးဖော်ရွေလှသည်တော့ မဟုတ်ချေ။

အထက်တန်းလွှာနယ်မြေရှိ လူအချင်းချင်းအကြားမှ ဆက်ဆံရေးက အတော်အတန်အားနည်းပေသည်။ အကြောင်းမှာ လူတိုင်းက မိမိ၏ ကိုယ်ပိုင်ကိစ္စများနှင့် လည်ပတ်နေကြ၍ဖြစ်သည်။

ကုယွီမြန် စစ်ဆေးရေးဂိတ်သို့ ဖြတ်သောအခါ ဝန်ထမ်းကကုယွီမြန်၏ လျှပ်စစ်ကတ်ကို စကန်ဖတ်ကာစစ်ဆေးပြီးနောက် ကုယွီမြန်အား ဖြတ်သန်းခွင့်စာရွက်ပြရန် တောင်းလာသည်။

ကုယွီမြန် "...."

သူ့တွင် စက္ကူပေါ်၌ တံဆိပ်ရိုက်ထားသော ဖြတ်သန်းခွင့်စာရွက်ရှိသည်ကားအမှန်ဖြစ်သည်။ သို့ရာတွင် သူထိုစာရွက်အား သာမန်ကာလျှံကာမျှသာ ကြည့်ရှုခဲ့ခြင်းဖြစ်၍ ယူလာမိရန် မသေချာချေ။ ထူထဲသောအဝတ်အစားများကို ဝတ်ဆင်ထားရသည့်အလျောက် အိတ်ကိုဖွင့်၍ စစ်ဆေးရန်လည်း အခက်အခဲရှိနေသည်။

သူ့နောက်ဘက်မှလူကလည်း စိတ်ဝင်စားဟန်မပြဘဲ အချိန်ကိုသာ စိတ်မရှည်စွာကြည့်နေ၏။

အာတိတ်မြေခွေးလေးက လူကြားထဲသို့ရောက်နေသည့်အတွက် အနေရကြပ်ကာ စိုးရိမ်ပူပန်နေဟန်ရှိသည်။ ကုယွီမြန်က မြေခွေးလေးအားပြောလိုက်၏။

" ချိုးချိုး တွန်းလှည်းထဲမှာ ယွမ်ယွမ်နဲ့ခဏနေနော် ..."

မြေခွေးလေးက နားလည်သည့်အသံပြုလာသည်။

ကုယွီမြန်က သူ့လွယ်အိတ်အား နောက်မှရှေ့သို့ရွေ့ကာ မွှေနှောက်ရှာဖွေနေသည်။ အိတ်ထဲ၌ မျက်နှာသုတ်ပုဝါများ ရေဘူးများ အခြားပစ္စည်းများဖြင့်ပြည့်နှက်နေကာ အချိန်အတန်ကြာသည်ထိ စာရွက်အားရှာမတွေ့ချေ။ ထိုအခါ အနောက်ရှိလူတန်းက အနည်းငယ် စိတ်မရှည်ဖြစ်လာဟန်တူသည်။

သို့သော် ရုတ်တရက် ပတ်ဝန်းကျင်ကတိတ်ဆိတ်သွား၏။ လျှောက်လှမ်းပေါ်သို့ စစ်ဖိနပ်များ နင်းလျှောက်လာသည့် အသံက ပဲ့တင်ထပ်ကာ နီးကပ်လာသည်။

ကုယွီမြန်က အာရုံမစိုက်အားချေ။ ယောကျာ်းတစ်ဦးက ကုယွီမြန်အနီးသို့ရောက်ရှိလာပြီး သူ၏ မီးခိုးပြာရောင်မျက်ဝန်းများဖြင့် ကုယွီမြန်၏ သေးသွယ်သောမျက်နှာနှင့် ဖြူဖျော့သောနှုတ်ခမ်းများကို ငေးကြည့်နေသည်။

မကြာမီတွင် တစ်စုံတစ်ရာလွဲမှားနေသော လေထုကို ကုယွီမြန် သတိပြုမိသွားသည်။

ကုယွီမြန် နောက်သို့လှည့်ကြည့်တော့မည့်တစ်ခဏတွင် သူ့ညာဘက်လက်က ဆုပ်ကိုင်ခံလိုက်ရသည်။

" ဒါကိုသုံးလိုက်..."

အမျိုးသားက အနည်းငယ်ငုံ့ကိုင်းလာကာ ဆိုသည်။ သူ့အသံက သံလိုက်ကဲ့သို့ ဆွဲငင်အားပါဝင်နေပြီး ကုယွီမြန်၏နားထဲသို့ ပျင်းရိလေးတွဲ့စွာ ဝင်ရောက်လာသည်။

ထိုလူအား အခြားအမျိုးသားရေမွှေးရနံ့များနှင့်မတူသော ရနံ့တစ်မျိုးက လွှမ်းခြုံထားသည်။

ကုယွီမြန်၏လက်ကို အေးစက်သောလက်ချောင်းများကဆုပ်ကိုင်ထားသည်။ ထိုလူက သူ့လက်ထဲသို့ နာမည်ရေးထိုးထားသော ကတ်တစ်ခုအားထည့်ပေးလာသည်။ ၄င်းက သိပ္ပံအကယ်ဒမီမှပေးသော ယာယီကတ်မဟုတ်ချေ။

တစ်ဖက်လူက သူ့အားနောက်ကျောမှတစ်ဆင့် ပွေ့ဖက်ထားသကဲ့သို့ဖြစ်နေပြီး အပြုအမူကလည်း ရင်းနှီးလှသည်။ ချစ်သူများသာလျှင် ဤသို့သောနီးကပ်မှုနှင့် သင့်လျော်မည်ဖြစ်သည်။

လေထုက အနည်းငယ်ပူနွေးလာသည်ဟု ကုယွီမြန်ခံစားလိုက်ရသည်။

ရှို့ဟန်က နောက်ကျောဘက်မှတစ်ဆင့် ကုယွီမြန်၏ တုံ့ပြန်မှုများကိုကြည့်ရှုနေကာ သူ့မျက်ခုံးများကအနည်းငယ်မြင့်တက်သွား၏။

ပတ်ဝန်းကျင်ရှိလူများကမှု အသံစိုးစဥ်းမျှမပြုဘဲ တိတ်တဆိတ်သာရပ်ကြည့်နေကြလေ၏။

"..."

🐯🐯🐯

Prev Next