MM Story Teller

Chapter 44

Viewers 3k

👾Chapter 44

[ မင်း စိတ်တွေကို ဘယ်လိုဖတ်ရမလဲ သိတာလား ]

လွန်ခဲ့သည့်ရက်အနည်းငယ်က လင်းဟန်သည် ဤနေရာတွင် ဒူးများကိုဖက်လျက်ထိုင်ရင်း သူ့လက်ကို ဆန့်ထုတ်ကာ ဟယ့်ယွင်ထင်အား အနည်းငယ် ဆွဲထူခိုင်းခဲ့သည်။သို့သော် လွန်ခဲ့သောရက်တစ်ဝက်ခန့်တွင် သူတို့နှစ်ဦးကြားရှိ လေထုမှာ တစ်ဖန် ကသိကအောက်ဖြစ်ခဲ့ပြီး မည်သူကမှ ယာယီ စကားမပြောခဲ့ကြချေ။

"...ခင်များ အနားမယူသေးဘူးလား "

နောက်ဆုံးတွင် နှုတ်ကို ဦးစွာ ဖွင့်ဟသူမှာ လင်းဟန်ဖြစ်လေသည်။

" ဗိုလ်ချုပ်၊ အိပ်ပျော်မယ့်ပုံ မပေါ်ဘူး "

ဟယ့်ယွင်ထင်၏နှုတ်ခမ်းများက အလွန်ညင်သာစွာလှုပ်ရှားသွားပြီး ခေါင်းခါသည်။

" ဘာလို့ မစ္စတာလင်းက ဒီမှာရှိနေတာလဲ "

ကြယ်များကို ယခုအခါ ရှင်းရှင်းလင်းလင်း မမြင်ရသေးပေ။

လင်းဟန်က ခဏလောက် တွေးလိုက်ပြီးနောက် " ဒီမှာ တိတ်ဆိတ်လို့ "

လျှို့ဝှက်စခန်းတစ်ခုကဲ့သို့။

ဟယ့်ယွင်ထင်က မတုံ့ပြန်ချေ။ လင်းဟန်သည် သူ၏အမူအရာကိုကြည့်နေပြီး နောက်ဆုံးတွင် အနုစိတ်သောမျက်နှာမှ စိတ်ပျက်မှုအချို့အား ဖမ်းဆုပ်မိလိုက်သည်။

" ...တိုးတက်မှုမရှိဘူးလား " သူက မဝံ့မရဲမေးလိုက်သည်။

ဟယ့်ယွင်ထင်က ပြောသည်။ " ဒီလိုပါပဲ "

လင်းဟန်သည် ယခင်ကဲ့သို့ ကြမ်းပြင်ပေါ်တွင် ဒူးထောက်လျက်ထိုင်နေဆဲဖြစ်ပြီး ဟယ့်ယွင်ထင်ကို မော့ကြည့်ကာ " ကျွန်တော့်ကို ကူညီခွင့်ပေးဖို့ ဗိုလ်ချုပ် ထည့်သွင်းစဉ်းစားကြည့်လို့ ရနိုင်ပါတယ်..."

၀မ်ထျန်းယောင်မှလွဲ၍ မည်သူက သံသယအရှိဆုံးဖြစ်သည်ကို သူ မသိသောကြောင့် သူ့အသံက တိုးသထက် တိုးညှင်းသွားတော့သည်။

ချီကျားမူလား သို့မဟုတ် တခြားတစ်ယောက်လား။

လင်းဟန်က စဉ်းစားနေသော်လည်း ဟယ့်ယွင်ထင်က သူ့ဆီသို့ ခြေလှမ်းနှစ်လှမ်း လှမ်းကာ အရှေ့၌ ရပ်လိုက်သည်ကို တွေ့လိုက်ရသည်။

ဟယ့်ယွင်ထင်က ညိုးငယ်သောမျက်၀န်းများဖြင့် သူ့အား ကြည့်သည်။

" မစ္စတာလင်း၊ ကျွန်‌တော် အရင်က ပြောခဲ့တယ်။ ကျွန်တော်တို့ စစ်သင်္ဘောရောက်တဲ့အခါ ကျွန်တော့်နောက်ကို နီးနီးကပ်ကပ်လိုက်သင့်တယ်လို့လေ "

ဟယ့်ယွင်ထင်က သူ့စကားကို အရှိန်လျှော့လိုက်သည်။ " အဲ့ဒါ အဆင်ပြေလား "

နောက်ထပ် မည်သည့်အံ့သြစရာများ လာဦးမည်ကို သူ မသိပေ။

လင်းဟန်သည် ဤစာကြောင်းကို သဘာဝအလျောက် မမေ့လျော့ပေ။

သို့သော် ယခုတွင်မူ ဟယ့်ယွင်ထင်၏ လေသံသည် ယခင်ကထက် သေချာမှုပို၍လျော့နည်းကာ ပိုမိုသတိရှိနေသည်။ သူသည်တောင်မှ ငြင်းပယ်ခံရမည်ကို ကြောက်ရွံ့နေသည်လား။ ကျိီမုန့်သေဆုံးမှုကို လွှတ်မချနိုင်ဆဲဖြစ်ပြီး သူ့ကိုယ်သူ အဆက်မပြတ် အပြစ်တင်ကာ ညှဉ်းပန်းနှိပ်စက်နေဆဲဖြစ်‌နေသည်လား။ သူ အမြဲတစေ ယခုလိုဖြစ်ခဲ့လေသလား။

လင်းဟန်သည် လွန်ခဲ့သော‌နေ့၀က်ခန့် တစ်ဖက်သူ၏နှလုံးသားထဲမှ ဝမ်းနည်းကြေကွဲမှုကို သတိရသွားပြီး‌ ဟယ့်ယွင်ထင်ကို ပြန်ကြည့်လိုက်သည့်အချိန်၌ သူ့မျက်လုံးများထဲ ခံစားချက်အချို့ ရှိ‌နေလေသည်။ သူက ရုတ်တရက် ထိုသူကို ပွေ့ဖက်ချင်သွားသည်။

" ဗိုလ်ချုပ် " လင်းဟန်ကခေါ်လိုက်သည်။

" ခင်များ ဒီကိုနည်းနည်းလောက် လှမ်းလာလို့ရမလား "

လွန်ခဲ့သည့်ရက်အနည်းငယ်ခန့်က သူ့အား လက်တစ်စုံကမ်းပေးရန် ဟယ့်ယွင်ထင်အား တောင်းဆိုခဲ့စဥ်ကအတိုင်း သူ့လေသံက အနည်းငယ် ပျော့ပျောင်းနေသည်။ လင်းဟန်သည် နှုတ်ခမ်းပေါ်တွင် အပြုံးတစ်ခုဖြင့် ခေါင်းကို စောင်းကာ ကြည့်နေသည်။

ဟယ့်ယွင်ထင်မှာ သူ ဘာကိုဆိုလိုသည်ကို နားမလည်သော်လည်း နာခံစွာ လျှောက်လှမ်းလာကာ နောက်တစ်ဖန် ကိုင်းညွှတ်သည်။

လင်းဟန်က လက်ဆန့်တန်းပြီး လွယ်ကူစွာဖြင့် သူ့ကို ပွေ့ဖက်လိုက်၏။

ဤပွေ့ဖက်မှုက အချစ်နှင့် မသက်ဆိုင် ချေ။ လင်းဟန်က တစ်ဖက်လူထံတွင် သူ့အတွက် မည်သို့သောခံစားချက်မျိုးရှိသလဲဆိုသည်ကို အတိအကျ မမေးမြန်းလိုချေ။ ထို့ကြောင့် လက်အိတ်ဝတ်ထားလျှင်တောင်မှ တစ်ဖက်သူ၏ စိတ်ထဲမှအရာများကို ကြားနေရဆဲပင်။

သို့သော် ထိုသည်ထက် လင်းဟန်က သူ့ကို ရိုးရိုးတန်းတန်း ပွေ့ဖက်ပေးခဲ့ရုံသာဖြစ်သည်။

ဟယ့်ယွင်ထင်သည် အေးခဲသွားပုံရပြီး ပွေ့ဖက်ခံရပြီးနောက် အချိန်အတော်ကြာမှသာ တဖြည်းဖြည်း တောင့်တင်းမှုလျော့ပါးသွားသည်။

" အဆင်ပြေပါတယ် " လင်းဟန်က

‌ ပြောလိုက်သည်။

" ပွေ့ဖက်ရုံပါပဲ "

သူက အမှန်တကယ်တွင် ' စိတ်မကောင်းမဖြစ်ပါနဲ့ ' ၊ သူရှိပါသည်ဟု ပြောလိုသော်လည်း တစ်ဖက်လူ၏နောက်ကျောပေါ်သို့ သူ့လက်တင်လိုက်သည့်အခါ သူက မလိုအပ်တော့သည့်နှစ်သိမ့်မှုများကို ထပ်မံမေ့လျော့သွားပြန်သည်။

" မစ္စတာလင်း "

ဟယ့်ယွင်ထင်၏အသံနိမ့်နိမ့်က လင်းဟန် နားအနောက်မှ ထွက်ပေါ်လာသည်။ ထင်းရှူးတောအုပ်ကြားထဲမှ အကြည်လင်ဆုံးသောနှင်းလက်တစ်ဆုပ်စာကဲ့သို့ပင် မြင့်မားသန့်ရှင်းပြီး လေထဲ၌ ချိတ်ဆွဲထားသောကြောင့် အေးစက်သော်လည်း ၎င်း၏မြင့်မားမှုကြောင့် အရည်ပျော်ရန်ခက်လေသည်။

" မင်း စိတ်တွေကို ဘယ်လိုဖတ်ရမလဲ သိတာလား "

ဟယ့်ယွင်ထင်၏အသံထဲမှ ဝမ်းနည်းမှုသည် သူ၏အတွင်းစိတ် အတွေးများကဲ့သို့ ပြင်းထန်လွန်းသည် မဟုတ်ပေ။

[ သူ ငါ့စိတ်ထဲက စကားတွေကို ကြားသွားမလား ]

[ သူ ငါ့အားနည်းချက်ကိုမြင်ပြီး ငါ့ရဲ့ဆိုးညစ်မှုတွေကို နားလည်‌မှာလား ]

[ အကယ်၍ အဲ့လိုသာဆို သူ ငါ့ကို ဘယ်တော့မှ ပွေ့ဖက်ပေးမှာမဟုတ်ဘူး ]

လင်းဟန်က တိတ်ဆိတ်နေသည်။ သူသည် တွေးတောနေသည်များကို ကြားနိုင်ရုံတင်သာမက တစ်ယောက်နှင့်တစ်ယောက် အကြိမ်ပေါင်းများစွာ ထိမိကာ သေဆုံးခဲ့သည့်စစ်သားများအားလုံးကို မှတ်မိနေကာ နှလုံးသားထဲ၌ အထိမ်းအမှတ်တိုင် ဆောက်ထူးထားသည်အား တွေ့မြင်နိုင်သောကြောင့် သူ့အား စာနာနိုင်လေသည်။

"…ကျွန်တော်မလုပ်ပါဘူး "

လင်းဟန်က ပါးစပ်ဖွင့်ထားသော်လည်း ဟယ့်ယွင်ထင်ကို ယင်းအမှန်တရားအား ပြောမပြနိုင်ပေ။ သူ့နှလုံးသားထဲသို့ နောက်ထပ်ဓားတစ်ချောင်း ထိုးစိုက်ကာ သွေးထက်သံယိုဖြစ်စေရင်း ယင်းကဲ့သို့စိတ်သံသရာ ထပ်မံ လည်စေရန် မပြုလုပ်ချေ။

ဟယ့်ယွင်ထင်သည် နှစ်သိမ့်ခံလိုက်ပုံရပြီး လင်းဟန်၏လက်များကို ပိုမိုတင်းကျပ်စွာ ဆုပ်ကိုင်ကာ သူ၏ခေါင်းကို အနည်းငယ် ပို၍နက်အောင် နစ်မြှုပ်လိုက်သည်။

လင်းဟန်သည် သူ့ကိုဝန်းရံထားသည့် နွေးထွေးမှုကို ခံစားရသော်လည်း သူ့နားထဲတွင် ဟယ့်ယွင်ထင်၏ သူ့ကိုယ်သူ အဆက်မပြတ် အပြစ်တင်နေသောအတွင်းစိတ်အသံများဖြင့် ပြည့်နေသည်။ သူ ကြိုးစားသော်လည်း ဟယ့်ယွင်ထင်မှာ လုံးဝလက်မလွှတ်နိုင်ပေ။

ဤလူမှာ တိတ်ဆိတ်ကာ တသီးတခြားဖြစ်နေပြီး မည်သည့်အရာကမှ သူ့အား အနည်းငယ်မျှပင် မထိခိုက်စေသည့်အလား။

သူသည် ပြုံးတောင်မပြနိုင်သော်ငြား သူ့အားနည်းချက်ကို အပြည့်အ၀ သူ့ထံ မသိလိုက်ဘဲ ထုတ်ဖော်လိုက်မိသည်။

လင်းဟန်သည် သူ၏နှလုံးသားမှာ မမြင်နိုင်သောဖဲကြိုးတစ်ကြိုးဖြင့် ချည်နှောင်ထားခံရသကဲ့သို့ နာကျင် ပျော့ပျောင်းသောဝေဒနာဖြင့် ဆို့နစ်နေလေသည်။ သူက ပထမဆုံးအကြိမ် ပွေ့ဖက်လိုက်ကာ တစ်ဖက်သူ၏ ကျောကို လက်ဖြင့် ပုတ်လိုက်ပြီးနောက် ခိုင်မာတိုးညှင်းသောအသံဖြင့် ပြောလာသည်။

" .... ဒါပေမယ့် ခင်များကို အနိုင်ယူလို့ မရဘူး "

သူ ထိုကဲ့သို့ပြောလိုက်သည်နှင့် လင်းဟန်မှာ ရင်ခွင်ထဲသို့ ရုတ်တရက် တင်းတင်းကြပ်ကြပ် ပွေ့ဖက်ခံလိုက်ရကာ အသက်ရှုမဝလုနီးပါး ဖြစ်သွားတော့သည်။

သို့သော် သူ နာကျင်သွားမည်ကို ကြောက်ရွံ့သည့်အလား တစ်ဖက်လူမှ အမြန်ပြန်လွှတ်လိုက်သည်။

လင်းဟန်၏နှလုံးသားက ဖမ်းဆုပ်ခံလိုက်ရသကဲ့သို့ ခံစားလိုက်ရပြီး စိတ်နှလုံးပူဆွေးမှုက ရင်ထဲသို့ ပို၍တောင်မှ စိမ့်၀င်သွား‌တော့သည်။ သူက လက်မြှောက်လိုက်ပြီး လက်ချောင်းများမှာ ဟယ့်ယွင်ထင်၏လည်ပင်းပေါ်သို့ တက်သွားကာ နှလုံးခုန်သံများ တစ်ပေါင်းတစ်စည်း ခုန်ပေါက်လာသည်အထိ သူ့ထံသို့ ဆွဲယူလိုက်သည်။ ဒဏ်ရာဝေဒနာကို နှစ်ပိုင်းခွဲလိုက်ပြီး တစ်ဦးတစ်ယောက်တည်း မခံစားစေတော့ချေ။

" အဆင်ပြေပါတယ် "

လင်းဟန်က တစ်ဖက်သူ၏လည်ပင်းကို ချိတ်တွယ်ကာ ထပ်မံပြောလိုက်သည်။

" ခင်များဝမ်းနည်းနေမယ်ဆိုရင် ကိစ္စမရှိပါဘူး။ ခင်များကို အနိုင်မယူနိုင်ပါဘူး "

ဟယ့်ယွင်ထင်သည် အချိန်အတော်ကြာ စကားမပြောသလို ယခင်ကကဲ့သို့ သူ့ထံမှ ခွာထွက်ရန် အပြင်းအထန် ကြိုးစားခြင်းမရှိချေ။

အချိန်အတော်ကြာပြီးသည့်‌နောက် လင်းဟန်သည် အလွန်ညင်သာသော တုံ့ပြန်သံကို ကြားလိုက်ရသည်။

"....အင်း "

ဟယ့်ယွင်ထင်သည် နောက်ဆုံးတွင် မောပန်းနွမ်းနယ်နေပုံရပြီး သူ့ကိုယ်သူ တခဏတာမျှသာ လိုက်လျောလိုက်သည်။

သူသည် မြေပြင်ပေါ်တွင် ဒူးတစ်ဝက်ထောက်လိုက်သော်လည်း သူ့ခန္ဓာကိုယ် တစ်ခုလုံး၏အလေးချိန်ကို မသုံးချေ။ ထို့နောက် ရိုသေလေးစားမှုကိုပြကာ ချုပ်တည်းထားသည့်အနေအထားဖြင့် လင်းဟန်၏ရင်ခွင်ထဲသို့ နစ်မြုပ်လိုက်လေသည်။

လင်းဟန်သည် သူ့ရင်ခွင်ထဲမှလူ၏ အသက်ရှုသံ တဖြည်းဖြည်း ငြိမ်သက်သွားသည်ကို ခံစားရသည်။

ဟယ့်ယွင်ထင်သည် ပွေ့ဖက်ခံလိုက်သည့်အချိန်တွင် အနည်းငယ် မသက်မသာ ဖြစ်ခဲ့သော်လည်း လင်းဟန်၏ပိန်ပါးသောလက်မောင်းများကြားတွင် ငြိမ်းချမ်းခြင်းကို ပြန်လည်ရရှိသွားတော့သည်။ ထို့ကြောင့် သူသည်လည်း ဆူဆူညံညံပြုလုပ်သည်ကို ရပ်တန့်လိုက်ပြီး ပထမအကြိမ်အဖြစ် မှီခိုနေသော အနေအထားကို အသုံးပြုရန် ကြိုးစားလိုက်သည်။

ပခုံးပေါ်က အလေးချိန်ကို မဖယ်ရှား‌ ပေးနိုင်ပေမယ့် နွေးထွေးမှုနဲ့ ခင်များကို ငြိမ်းချမ်းစေချင်တယ်။ အခုချိန်ကစပြီး ခင်များနဲ့ကျွန်တော်က တခြားသူတွေနဲ့ မတူတော့ဘူး။ ဒီနေ့ည ကျွန်တော်တို့ကြားမှာမျှဝေခဲ့တဲ့ လျှို့ဝှက်ချက်တစ်ခုရှိတယ်ဆိုတာ ဘယ်သူမှမသိကြဘူး။

တဖြည်းဖြည်းနှင့် လင်းဟန်၏နားများသည် တိတ်ဆိတ်လာကာ တစ်ဖက်လူ၏ ပြင်းထန်သောနှလုံးခုန်သံများသာ ကျန်ရှိတော့သည်။ သူသိသည်၊ နောက်ဆုံးတွင် ဟယ့်ယွင်ထင်တစ်‌ယောက် အားလပ်ချိန်တဒင်္ဂအချိန်လေးတစ်ခု ရရှိသွားလေပြီ။

သူ့ကိုယ်သူ တစ်ချိန်လုံး မေးခွန်းမထုတ်‌ တော့ပေ။ အမျိုးမျိုးသော မှန်ကန်မှုများနှင့် မှားယွင်းမှုများ၌ တဝဲလည်လည် မဖြစ်တော့ချေ။

ဤအခိုက်အတန့်တွင် သူသည် သူနှင့် သူကိုယ်တိုင်၌သာ ပိုင်ဆိုင်သည်။

သူ့အပေါ်၌ရှိနေသည့် ဟယ့်ယွင်ထင်၏လက်‌အ‌နေအထားမှာ မထူးဆန်းသော်လည်း ညစ်ညမ်းစွန်းထင်း‌စေ၍ မဖြစ်သောတန်းဖိုးထားမြင့်မြတ်မှုရှိနေလေသည်။

လင်းဟန်လည်း စကား‌ပြောခြင်းအား ရပ်တန့်လိုက်သည်။ ဤအခိုက်အတန့်တွင် မည်သူမျှ ၎င်းတို့အား နှောင့်ယှက်ရန် လာမည်မဟုတ်ပေ။ ဤကဲ့သို့ တစ်ယောက်ကိုတစ်ယောက် ဖက်တွယ်ထားမှုသည် တိတ်ဆိတ်ငြိမ်သက်စွာဖြင့် နှစ်သိမ့်မှုရကာ ညအမှောင်တွင် မျှော်လင့်ချက်အား ခံစားရနေသကဲ့သို့ပင်။

တံခါးကို တွန်းဖွင့်လိုက်သည်နှင့် ဟယ့်ယွင်ထင်သည် စိုးရိမ်သောကအခြေအနေကို ရင်ဆိုင်ရဦးမည်ကို သူ သိရှိထားသည်၊ ကြားနေ၀ါဒကျင့်ရန် ကြိုးစားသော်လည်း၊ ရုန်းရင်းဆန်ခတ် နိုင်ငံရေးတိုက်ပွဲကို မရှောင်တိမ်းနိုင်ချေ။

မျက်ရည်များမရပ်တန့်လျှင်တောင်မှ....၊ ဘယ်ရီသီးနီက ထပ်မံမပွင့်လန်းနိုင်လျှင်တောင်မှ.....။

ညအခါသည် အဆုံးမရှိလျှင်တောင်မှ တိုတောင်းနေဆဲ‌ဖြစ်လေသည်။

ဟယ့်ယွင်ထင်သည် ထွက်ခွာသွားမည့်အချိန်၌ သူ၏ယခင်က အေးစက်သည့်သွင်ပြင်သို့ ရောက်ရှိသွားသော်လည်း လင်းဟန်မှ သူ့အား ကြည့်လိုက်သည့်အခါ ယခင်ကနှင့် တစ်စုံတစ်ရာ ကွဲပြားနေပုံခံစားရမိကာ သူ၏ပွေ့ဖက်မှုက ထိရောက်သည်ဟု ဆိုလိုနေသည်။

လင်းဟန်က လုံလောက်ပြီဟု တွေးလိုက်သည်။ သူက ဟယ့်ယွင်ထင်ကို ဦးစွာ ပြုံးပြလိုက်ပြီး " တကယ်လို့ ဗိုလ်ချုပ် ပင်ပန်းနေရင် ကျွန်တော့်ဆီ ကို လာနိုင်ပါတယ် "

နွေးထွေးနေဆဲဖြစ်သောလက်များအပေါ် မျက်၀န်းများက ဝေ့ဝိုက်သွားသည်။

" ပြီးတော့ ကျွန်တော်နဲ့ ယဉ်ကျေးတဲ့လက်ဆွဲနှုတ်ဆက်ခြင်းမျိုးတွေ မရှိရတော့ဘူး။ ဗိုလ်ချုပ် ဆန္ဒရှိတိုင်း ကိုင်ထားလို့ရတယ် "

အကယ်၍ ဤသည်က ဟယ့်ယွင်ထင်၏၀မ်းနည်းမှုကို အနည်းငယ် မျှဝေနိုင်မည်ဆိုလျှင်.....

ဟယ့်ယွင်ထင်သည် ခဏတာ ထိတ်လန့်သွားပုံရပြီး သူ့ကိုကြည့်ရန် မျက်လုံးများကို ပင့်တင်လာသည်။

" ခင်များ ဘာကိုမှစဉ်းစားနေစရာ မလိုဘူး။ ခင်များ ဘေးနားက ဘာကိုမှလည်း ဂရုစိုက်ဖို့မလိုဘူး " လင်းဟန်က ခေါင်းလေးစောင်းကာ ပြောလိုက်သည်။

" တကယ်လို့ ဗိုလ်ချုပ်က ပိုကောင်းမယ်လို့ထင်ရင်.... ကျွန်တော့်ကို ခွင့်မတောင်းဘဲ ကြိုက်တဲ့အချိန် ကျွန်တော့်လက်ကို ဖမ်းဆုပ်နိုင်တယ် "

ရှည်ကြာခဲ့သည့်ပွေ့ဖက်ခြင်းက ၎င်းတို့နှစ်ယောက်ကို ပိုမိုရင်းနှီးလာစေခြင်းဖြစ်နိုင်‌ပြီး လင်းဟန်က ' ပြုံးလိုက်ပါ၊ ဟယ့်ယွင်ထင် ' ဟု ပြောလိုစိတ် ရှိနေလေသည်။

သို့သော် မကြာမီ၌ သူက အကန့်အသတ်ကို ကျော်လွန်သွားမိပြီဟု ခံစားလိုက်ရပြီး အတွေးကိုရုပ်သိမ်းလိုက်တော့သည်။

" ကျေးဇူးတင်ပါတယ် " ဟယ့်ယွင်ထင်က ဤစကားနှစ်ခွန်းဖြင့်သာ ပြန်လည် ဖြေကြားခဲ့ပြီး ယခင် လင်းဟန်ပြောခဲ့သည့်စကားကို တိတ်တဆိတ်သဘောတူပုံပေါက်နေလေသည်။

လင်းဟန်သည် ဤကဲ့သို့ အမြဲတမ်း အေးစက်နေသောမျက်နှာကို ကြည့်ရှုရန် ခေါင်းကို တိမ်းစောင်းလိုက်ပြီး ယခုမှပင် ပို၍ ကွက်ကွက်ကွင်းကွင်း ဖြစ်လာကာ ဖုံးကွယ်၍မရတော့ဟု တွေးမိနေလေသည်။

သူသည် သူ၏အပြုံးကို မြင်တွေ့ချင်သည်။

သူ ပြုံးရယ်သည့်အခါ ကြည့်ကောင်းမည်ဖြစ်ကာ တခြားသူများနှင့် ကွဲပြားပေလိမ့်မည်။

ထိုအရာကို မြင်တွေ့ခွင့်ရှိလာနိုင်ပေလိမ့်မည်။

ထိုနေ့ရက်သည် တစ်နေ့ ရောက်ရှိလာပေလိမ့်မည်ပင်။

လင်းဟန် ဤအရာအားလုံးကို တွေးတောနေခဲ့သည်။

****

ဟယ့်ယွင်ထင် စောင့်ကြည့်ရေးအခန်းမှ ထွက်သွားခဲ့ပြီး မပင်ပန်းသကဲ့သို့ သို့မဟုတ် ယခုလေးတင် သူ့အား ပေးအပ်ခဲ့သည့်ပွေ့ဖက်မှုက အားသစ်သွန်းလောင်းပေးခဲ့သကဲ့သို့ သူ့အလုပ်ဆီသို့ ပြန်သွားခဲ့သည်။

လင်းဟန် ခေတ္တခဏတာ အိပ်မောကျသွားပြီးနောက် ကပ္ပတိန်အခန်းသို့ ပြန်လာသည့်အခါ ငြင်းခုံနေသောလူအချို့ကို တွေ့လိုက်ရသည်။

လုအန်းဟယ်၏ အသံသည် ဆက်သွယ်ရေးစက်ထံမှ ပျံ့လွင့်လာပြီး " ကျွန်တော်တို့ ဇီ၀မျိုးကွဲများဇီ၀စနစ်ကို အခုပဲ ဆက်သွယ်ထားပါတယ်။ သူတို့က ဒီရက်ပိုင်းရာသီဥတုဆိုးနေတယ်၊ မြင်နိုင်စွမ်းကလည်း အရမ်းဆိုး၀ါးနေတယ်လို့ ပြောကြတယ်။ နောက်ပြီး... လတ်တလောမှာ နယ်စပ်ဒေသမှာ စိတ်သဘောထားပြောင်းသွားခဲ့လို့ သူတို့ရဲ့အကြံပြုချက်ကတော့ လေ့ကျင့်‌ရေးဆက်လုပ်လို့ မရတော့ဘူးတဲ့ "

ဇီ၀မျိုးကွဲများသည် အင်ပါယာကို မလေးစားသော်လည်း နှစ်ပေါင်းများစွာအတွင်း ပူးပေါင်းဆောင်ရွက်မှုဆက်ဆံရေးက ၎င်းတို့အား ဤကဲ့သို့ အကြံဉာဏ်ကို ရုတ်တရက် ပေးခွင့်ပြုခဲ့ခြင်းမဟုတ်‌။ တစ်ဖက်မှ ယခုကဲ့သို့ ပြောလာသည့်အတွက် အမှန်တကယ် ဆက်လက်လုပ်ဆောင်ရန် မသင့်တော်နိုင်ချေ။

ထို့အပြင် ရုတ်တရက်ဖြစ်ပွားခဲ့သည့် မတော်တဆမှုမှာ လူတိုင်းကို သတိမမူမိဖြစ်စေခဲ့ပြီး ဗိုလ်ချုပ်ကြီးများသည် ကျိီမုန့်၏ရုပ်ကြွင်းများကို ပြန်လည်ယူဆောင်လာရန် စိတ်အားထက်သန်လွန်းလှသည်။

ဟယ့်ယွင်ထင်လည်း ယခုကဲ့သို့ တွေးထားသည့်အတွက် ဤကိစ္စအား မအံ့သြ ချေ။ သူ၏လက်ကို အမိန့်ပေးသည့်ပလက်ဖောင်းပေါ်တွင် တင်ထားကာမျက်ခုံးများက ပင်ပန်းနွမ်းနယ်မှုကို ပြသခြင်းမရှိပေ။ အချိန်အတော်ကြာ မျက်လုံးမမှိတ်ရ‌ဆဲဖြစ်သည်ကို မည်သူမျှ စိတ်ကူးယဉ်ကြည့်နိုင်ကြမည်မဟုတ်‌ ပေ။

" ငါ သိတယ် "

ဘေးကင်းလုံခြုံမှု‌ သေချာစေရန်အတွက် အုပ်စု A ၏ မက်ခါများ အားလုံးကို ပြန်လည်ခေါ်ယူထားပြီး အုပ်စု B သည် ၎င်းတို့၏ဘေးကင်းမှုကို အာမခံ ပြောကြားထားပြီးဖြစ်သော်လည်း အလားအလာရှိသော ပိုင်းလော့အချို့မှာ ဤအခွင့်အရေးကို လက်မလွှတ်ချင်ကြဆဲဖြစ်သည်။ ဟယ့်ယွင့်ထင်ထံမှ ရှင်းလင်းသည့် ညွှန်ကြားချက်မရှိသရွေ့ ပုံမှန်အတိုင်း လေ့ကျင့်မှုများကို ပြုလုပ်နေကြသည်။

သို့သော် ဟယ့်ယွင်ထင် ဘာမှပြန်မပြောမီ ၀မ်ထျန်းယောင်က ပါးစပ်အရင်ဖွင့်လာသည်။

" ဗိုလ်ချုပ်၊ အားလုံးက ဒီနယ်စပ်ကို လာဖို့ ကြိုးအားစားထုတ်ခဲ့ကြရတယ်။ စတုတ္ထအကြိမ် လေ့ကျင့်ရေးက တစ်နှစ်မှ တစ်ကြိမ်ပဲ ကျင်းပတာကို ပြောစရာတောင်မလိုဘူး။ အကယ်၍ တပ်မတော်ထဲကို ၀င်ရောက်ဖို့ အကောင်းဆုံးသော ‌ပိုင်းလော့တွေကို မရွေးချယ်ဘူးဆိုရင် အဲဒါက..."

သူ ဆိုလိုသည်မှာ ရှင်းလင်းပေသည်။ လေ့ကျင့်‌ရေးက ဒီနေရာ၌ ရပ်တန့်မနေသင့်ဟုပင်။

ဟယ့်ယွင်ထင်သည် စိတ်ခံစားမှုမရှိစွာဖြင့် သူ့ကိုကြည့်ရန် ခေါင်းလှည့်လိုက်သည်။

" ဒါဆို အရှင့်သားဆိုလိုတာက ဒီတစ်ကြိမ် မေဂျာကျိီမုန့် မတော်တဆဖြစ်မှုအတွက် တာဝန်ယူမယ်ဆိုတဲ့ သဘောလား "

၀မ်ထျန်းယောင်အား ဂရုစိုက်ခြင်းမရှိခဲ့ဖူးသည့်ဟယ့်ယွင်ထင်က သူ့ကို ထိုကဲ့သို့ လေသံဖြင့် မေးလိုက်လေသည်။

ကျိီမုန့်ကွယ်လွန်သွားသော်လည်း တစ်စုံတစ်ဦးက တာဝန်မယူလိုပေ။

၀မ်ထျန်းယောင်၏မျက်နှာက ဖြူဖျော့လာပြီး မသိစိတ်ဖြင့် ခေါင်းကို ယမ်းခါကာ ၀တ်ကြေတန်းကြေစကားသံဖြင့် ပြောလာသည်။

" မေဂျာကျိီမုန့်မှာ ဒီလိုအဖြစ်မျိုးဖြစ်ပျက်သွားခဲ့တာ ငါတို့အားလုံး စိတ်မကောင်းပါဘူး...."

ထိုစကားကိုကြားပြီးနောက် ဟယ့်ယွင်ထင်၏မျက်နှာ တစ်မိနစ်ခန့် မည်းမှောင်သွားသည်ကို လင်းဟန်မြင်လိုက်ရသည်။

" ဒီတော့ "

၀မ်ထျန်းယောင်သည် ယခုကဲ့သို့စကားမျိုးပြောရခြင်း၌ အလွန်တော်ပုံရပြီး အေးဆေးတည်ငြိမ်နေလေသည်။

" ဒုဗိုလ်မှူးလုက သူ့တာဝန်ကို လွှဲပြောင်းယူလိုက်ပြီဆိုတော့ အဲဒါက ရပ်မနေသင့်ဘူးလေ။ နောက်ဆုံးတော့ ဒီဟာက အခြေစိုက်စခန်းအတွက် လက်ရွေးစင်ပိုင်းလော့တွေကို ရွေးချယ်ဖို့ အခွင့်အရေး‌လေ။ ဒီကိစ္စကို ဒီလိုမျိုး လွယ်လွယ်နဲ့ထားလိုက်လို့မရဘူး "

ဤအခိုက်တွင် လင်းဟန်သည် ရုတ်တရက် ထူးဆန်းမှုခံစားလိုက်ရပြီး တစ်ခါတစ်ရံတွင် ၀မ်ထျန်းယောင်ထံ၌ သူ သဘောမပေါက်နိုင်သည့် မိုက်မဲမှုမျိုးရှိနေသည်ဟု ခံစားမိလိုက်သည်။ သူ၏ပြရုပ်နှင့် အဆင့်အတန်းကို ဦးစားပေးကာ ထိန်းသိမ်းထားပုံရသော်လည်း မူအရ ပြဿနာများစွာကိုမူ လျစ်လျူရှုခဲ့သည်။

" ရာသီဥတုပြောင်းသွားပြီလို့ ဇီ၀မျိုးကွဲစနစ်ကပြောတယ်။ ကြယ်တာရာဓားပြ တချို့က အခြေအနေတွေကို အခွင့်ကောင်းယူလာရင် ဘယ်လိုလုပ်မလဲ "

ဟယ့်ယွင်ထင်က စကားလုံး တစ်လုံးပြီးတစ်လုံးပြောလိုက်သည်။

" အလားအလာရှိတဲ့ ပိုင်းလော့အားလုံးကို အခြေစိုက်စခန်းမှာ တတိယအကြိမ်အပြီးမှာ ရွေးကိုရွေးချယ်ရမယ်ဆိုရင် သူတို့ရဲ့ အသက်အတွက် ဘယ်သူက တာဝန်ယူမှာလဲ "

၀မ်ထျန်းယောင်သည် အခြားတစ်ခုခုကို ပြောလို‌နေဆဲပင်။

" ဒါပေမယ့် ယန်းမင်ကလည်း ပိုင်းလော့တွေထဲက တစ်ယောက်လေ၊ သူ့ရဲ့လုပ်ဆောင်မှုက အနည်းအကျဉ်းထိခိုက်သွားတာကြောင့်နဲ့....."

ဟယ့်ယွင်ထင်သည် ၀မ်ထျန်းယောင်ထက် ဦးခေါင်း ထက်ဝက်ခန့် အရပ်မြင့်ကာ အပေါ်မှ ငုံ့ကြည့်နေသည်။ သူ့လေသံက အလုံးစုံ အေးစက်နေချိန်တွင် စစ်ဦးထုပ်အစွန်းတစ်ဖက်က မျက်လုံးများပေါ်တွင် အရိပ်တစ်ခု ထင်ဟပ်သွားကာ ဖိနှိပ်မှုကို ပို၍ပင်ခံစားရစေသည်။ သူက ၀မ်ထျန်းယောင် စကားဆုံးသည်အထိ မစောင့်စားဘဲ တိုက်ရိုက် စကား ဖြတ်၍ ပြောလိုက်သည်။

" ဒါပေမယ့် သူတို့က အရင်ဦးဆုံး ကျုပ်ရဲ့ တပ်ကြပ်တွေဖြစ်ခဲ့ကြပြီး ဒုတိယမှ အင်ပါယာရဲ့တပ်ကြပ်တွေ။ ယန်းမင်ရဲ့အမှုကို အပြည့်အဝ မစုံစမ်းရသေးတဲ့အပြင် ရုံးတင်စစ်ဆေးရမယ်ဆိုရင်တောင် ခိုင်မာတဲ့သက်သေနဲ့အတူ စစ်ခုံရုံးကို ပြန်သွားမှာပါ "

👾

Prev Next