MM Story Teller

Chapter 78

Viewers 4k

🐯Chapter 78

တစ်ချိန်တည်းတွင် သာမန်လူတန်းစားနယ်မြေရှိ အယ်လ်ဘတ်စားသောက်ဆိုင်၌ နံနက်ရှစ်နာရီတွင် လူတန်းကြီးဖြင့်ပြည့်နှက်နေ၏။ စားသောက်ဆိုင်က ပိုင်ဆိုင်မှုရုပ်သိမ်းခံရပြီး ပြန်လည်ပြုပြင်ရအဲ့ဆဲဆဲ အခြေအနေမှ ယခုအခါတွင် မူ အချိန်တိုအတွင်း စီးပွား‌ရေးကောင်းမွန်လျက်ရှိသည်။ အယ်လ်ဘတ်စားသောက်ဆိုင်အတွက် နဂိုထက်လှပသော အလှည့်အပြောင်းတစ်ခု ရောက်ရှိလာခဲ့သည်ဟု ဆိုရပေမည်။ အနည်းစုသော စားသောက်ဆိုင်များကသာ နံနက်စောစောအချိန်တွင် လူတို့အားတန်းစီစောင့်ဆိုင်းရန် စွမ်းဆောင်နိုင်ပေမည်။

ကုယွီမြန်၏ ပြန်လည်မွမ်းမံပေးမှုနှင့် လမ်းညွှန်မှုတို့အောက်တွင် အယ်လ်ဘတ်စားသောက်ဆိုင်၏ စီးပွားရေးလမ်းကြောင်းက လမ်းမှန်ပေါ်သို့ ပြန်လည်ရောက်ရှိလာသည်။ ထို့အပြင် စားသုံးသူများကလည်း အစားအသောက်များအတွက် မှတ်ချက်ကောင်းများပေးကာ မိတ်ဆွေအသိုင်းအဝိုင်းများအကြား ပြန်လည်ဝေမျှကြသည်။ ထိုအတွက် အချိန်အတော်ကြာတိတ်ဆိတ်နေခဲ့သည့် အယ်လ်ဘတ်စားသောက်ဆိုင်က လူထု၏ အာရုံစိုက်စရာဖြစ်လာခဲ့၏။

ဝူယွဲ့က ထိုစားသောက်ဆိုင်သို့သွားရန်ဟူ၍ သူ့ညီမ၏ အိပ်ယာပေါ်မှဆွဲချခြင်းကိုခံလိုက်ရသောအခါ မယုံကြည်နိုင်ဖြစ်သွားရသည်။

" ဘုရားရေ နင်ဦးနှောက်ဆေးခံလာရပြန်ပြီလား..."

ဝူယွဲ့က သမ်းဝေလိုက်သည်။

" နင့်သူငယ်ချင်းတွေဆိုတာ ပရိုမိုးရှင်းသာပေးရင် အသုံးမဝင်တာတွေကိုတောင် ဝယ်တဲ့အုပ်စုမဟုတ်ဘူးလား… အယ်လ်ဘတ်ကစီးပွားပျက်နေပြီလေ ချာတူးလံနေတဲ့ဆက်ဆံရေးကြောင့်..."

အယ်လ်ဘတ် ဖျက်သိမ်းခံရလုနီးပါးမဖြစ်ခင်က ထိုဆိုင်သို့ ဝူယွဲ့ အကြိမ်ရေအတော်များများရောက်ဖူးပြီး ထိုဆိုင်က အမည်နှင့်မထိုက်တန်ဟု ခံစားရ၏။ မကောင်းသည့်မှတ်ချက်များကလည်း များပြားလှပေသည်။

ဝူလဲ့က အလွန်ခေါင်းမာနေသည်။

" သူတို့သူဌေးညပြောင်းသွားပြီတဲ့ မမ… သူဌေးအသစ်က တော်တော်လုပ်ရည်ကိုင်ရည်ရှိတယ်လို့လည်းကြားတယ်… ဟုတ်သော်ရှိ မဟုတ်သော်ရှိ သွားမကြည့်ရင်ဘယ်သိမလဲ မြန်မြန်ထ နောက်ကျရင်တန်းစီနေရမှာပါဆို..."

သူတို့က ခုနှစ်နာရီခွဲတွင် ထွက်ခွာခဲ့ပြီး ရှစ်နာရီမတိုင်မီဆိုင်သို့ ရောက်ရှိခဲ့သည်။ သို့ရာတွင် အလွန်နောက်ကျသွားခဲ့ပြီဖြစ်သည်။ ရှည်လျားသော လူတန်းကြီးက ဆိုင်ရှေ့တွင်ရှိနှင့်နေပြီးဖြစ်ကာ စနောက်သံ၊ညရယ်မောသံများဖြင့် ဆူညံနေ၏။

အယ်လ်ဘတ်စားသောက်ဆိုင်က ပိုမိုကောင်းမွန်လာပြီဟူသောအကြောင်းကို ဝူယွဲ့ကမယုံကြည်နိုင်ချေ။ များပြားလှသောလူတန်းကြီးကို ကြည့်ရှုနေရသည့်တိုင် ၎င်းမှာဟာသတစ်ခုသာဖြစ်ရမည်ဟု သံသယရှိနေဆဲဖြစ်၏။ စားသောက်ဆိုင်နှင့်ပတ်သက်၍ တစ်ခုခုက ပြောင်းလဲနေသည်ကိုပြောနိုင်သော်လည်း ၎င်းက ဝူယွဲ့အတွက် ကြာမြင့်စွာ တန်းစီနေရန်မလုံလောက်ချေ။

" အားလဲ့ ထားလိုက်ပါတော့ လူတွေကအများကြီးပဲ… ဒီနားမှာ မနက်စာစားကောင်းတဲ့ဆိုင်ရှိသေးတယ် သွားရအောင်..."

သူ့စကားမဆုံးမီတွင် ရှစ်နာရီအတိထိုးသွားသောအခါ စားသောက်ဆိုင်တံခါးက အချိန်မီပွင့်လာခဲ့သည်။ သေးငယ်သော စက်ရုပ်လေးများက တစ်ရုပ်ပြီးတစ်ရုပ် ဧည့်သည်များကို ကြိုဆိုရန် ထွက်လာကြသည်။ ဝူယွဲ့က ထွက်သွားရန် ပြင်ဆင်နေသော်လည်း အလွန်ချစ်စရာကောင်းပြီး စကားများသည့် ကြောင်နှင့်တူသော စက်ရုပ်လေးထွက်လာသည်ကို မြင်လိုက်ရ၏။ သူမက အယ်လ်ဘတ်စားသောက်ဆိုင်ကောင်းမကောင်း ဝင်ကြည့်ရမည်လော ထွက်သွားရမည်လောဟု တုံ့ဆိုင်းသွားလေသည်။

ထိုတုံ့ဆိုင်းမှုကြောင့် သူမလှည့်ထွက်သွားခြင်း မပြုနိုင်ခဲ့ချေ။

လက်တွေ့တွင် သူမ အယ်လ်ဘတ်စားသောက်ဆိုင်အတွင်းသို့ ဝင်ရောက်သွားသောအခါ ဆိုင်၏အတွင်းခန်းကို အနည်းငယ်အထင်မသေးမိဘဲ မနေနိုင်ချေ။ ယခင်က အယ်လ်ဘတ်စားသောက်ဆိုင်မှာ အရသာညံ့သည့်တိုင် သီးသန့်ခန်းများရှိခဲ့သည်။ ယခုမူ ဆိုင်ခန်းအပြည့် တရုတ်စားပွဲများနှင့် ခုံတန်းရှည်များရှိနေပြီး သီးသန့်ခန်းဟူ၍ပင် ရှိမနေပေ။

နည်းနည်းများ ဖြစ်ကတတ်ဆန်းမနိုင်ဘူးလား...

တစ်ဖန် ဝူယွဲ့က ရိုးရှင်းသော ဟင်းလျာများကို ကြည့်လိုက်သည်။

ဒီကဟင်းပွဲတွေ ကြည့်ရတာလည်း ရိုးရှင်းပြီး ပမာဏလည်းနည်းနည်းပဲကို ဘာက ကောင်းနေတာလဲ စဥ်းစားမရပါလား...

ထိုစဥ် စက်ရုပ်လေးက သူတို့ကို လက်သန့်ဆေးရည်နှင့် လက်သုတ်ပဝါနွေးနွေးတို့ကို ပေးလာသည်။ လက်သန့်ဆေးကို ကိုယ်တိုင်ပြုလုပ်ထားဟန်တူပြီး တရုတ်ဆီးသီးရနံ့နှင့် ပန်းနံ့သင်းသင်းကိုရနိုင်နေ၏။ ၎င်းက မထင်မှတ်ထားလောက်အောင် မွှေးပြီး နွေးထွေးသော လက်ကိုင်ပုဝါဖြင့် သူတို့၏လက်ဖဝါးများကို သုတ်လိုက်ရသည်မှာ သက်သောင့်သက်သာဖြစ်နေသည်။

" ဒီလက်သန့်ဆေးကို အရမ်းကြိုက်တာပဲ... စိတ်မကောင်းစရာတစ်ခုကတော့ သူတို့ကဒါကိုမရောင်းဘူးတဲ့… ဧည့်သည်တွေအတွက်ပဲပေးတာ..."

ဝူလဲ့က သက်ပြင်းချလိုက်သည်။

ဝူယွဲ့ကလည်း ထိုလက်သန့်ဆေးကိုကြိုက်သည်။ သို့သော်သူမက ထိုအကြောင်းကိုမပြောလိုက်ဘဲ ပတ်ဝန်းကျင်ကို လှည့်ပတ်ကြည့်ရှု၍ ရန်စရာကျမည့် စကားအချို့ကိုပြောချင်နေသည်။

ထိုစဥ် ဟင်းချက်စားပွဲများက လျှောက်လမ်းအလယ်သို့ရောက်ရှိလာပြီး စားဖိုမှူးများက စားသုံးသူများရှေ့တွင် ဖက်ထုပ် ၊ စတူးစွပ်ပြုတ် များနှင့် ခေါက်ဆွဲများပြုလုပ်ပြရန် စီတန်းလိုက်သည်။

ဝူယွဲ့က ပထမတွင် အံ့သြသွားပြီးနောက် ပဟေဠိဖြစ်သွားသည်။

မီးဖိုချောင်ထဲမှာမချက်ဘဲ ဘာလုပ်တာတုန်း...

သို့ရာတွင် ပုံမှန်ဧည့်သည်များက ၎င်းကိုအလွန်ကြိုဆိုနေသည်ဟု သူမ မျှော်လင့်မထားမိချေ။ အချို့က စားဖိုမှူးများထွက်လာသောအခါ လက်ခုပ်တီး၍ လေချွန်လိုက်ကြသေးသည်။

" မမ ကြည့်လိုက်ဦး..."

ဝူလဲ့ကလည်း ၎င်းကိုနှစ်သက်စောင့်စားနေသည်။ သူမက စားဖိုမှူးများကိုကြည့်ရန် စကားများနေသည်ကိုရပ်တန့်လိုက်၏။

စားဖိုမှူးများ၏ လှုပ်ရှားမှုက မပြေပြစ်လှသော်လည်း အလေးအနက်ရှိသည်။ လုံးဝန်းသော ပေါက်စီလုံးများကို ရေနွေးငွေ့ပေါင်းခံစက်ပေါ်တွင် သပ်ရပ်စွာစီထားသည်။ ပုစွန်ဖက်ထုပ်များ၏ ဖက်ထုပ်ရွက်က ကြည်လင်တောက်ပနေပြီး မွှေးကြိုင်လှ၏။ ရောင်စုံဟင်းပွဲများတွင်လည်း မျှစ်နုများဖြင့် အလွှာလိုက် တန်ဆာဆင်ထားသည်။

ဆက်တိုက်ဆိုသလို ဝူယွဲ့တစ်ယောက် မယုံကြည်နိုင်ဖွယ်အရာများကိုမြင်တွေ့နေရသည်ဟု ခံစားနေရ၏။

ဟင်းပွဲများက အမြင်အရသေးငယ်သော်လည်း သိမ်မွေ့ပြီး သူမမျက်စိရှေ့တွင်ပင် ချက်ပြုတ်ပြီးစီးသွားခြင်းဖြစ်သည်။ ဟင်းပွဲများကိုကြည့်ရသည်မှာ စိတ်ချရပြီး အရသာရှိမည့်ပုံပေါ်၏။ သူမက သတိမထားလိုက်မိဘဲ ဟင်းပွဲအများအပြားမှာ ယူလိုက်မိသည်။ သူမအားလုံးကို မြည်းစမ်းလို၏။

ဤနေရာရှိဟင်းပွဲများက စျေးလည်းသင့်တင့်ပေသည်။ သူမက မီနူးပေါ်ရှိ ဟင်းပွဲအများစုကိုမှာယူလိုက်သော်လည်း ကျသင့်ငွေက ကြယ်ဒင်္ဂါး တစ်ရာပင်မကျော်ချေ။

ဝူယွဲ့က သံသယများကျန်ရှိနေလျှင်ပင် ဟင်းပွဲများရောက်မလာမီအချိန်အထိ ဘာကိုမျှတွေးတောနိုင်ခြင်းမရှိတော့ချေ။

ပထမဆုံးဟင်းပွဲက ပါးပါးလှီးထားသော မျှစ်နုများဖြစ်သည်။ သန့်ရှင်းသော မျှစ်နုများကို အလွှာလိုက်လှီးကာ ခင်းကျင်းထားပြီး အပေါ်ယံတွင် အနံ့အရသာအတွက်ရှာလကာရည် ဆမ်းထား၏။ ဤရိုးရှင်းသော ပေါင်းစပ်မှုကပင် အလွန်အရသာရှိပြီး စားမြိန်စေသည်။ ၎င်းက တစ်ညလုံးတိတ်ဆိတ်ငြိမ်သက်နေခဲ့သော ဆာလောင်သည့် အင်းဆက်များကို လှုပ်နှိုးလိုက်သကဲ့သို့ပင်။

ထပ်မံရောက်ရှိလာသည်က ပုစွန်ဖက်ထုပ်နှင့် ပဲနို့ပူပူတို့ဖြစ်သည်။

လခြမ်းကွေးသဏ္ဌာန်ပုစွန်ဖက်ထုပ်တွင် ပါးလွှာသောဖက်ထုပ်ရွက်အသားရှိပြီး အတွင်း၌ နီရဲသောပုစွန် ကြိတ်ချေထားသောအသားနှင့် မျှစ်နုများပါရှိသည်။ ဖက်ထုပ်သားကို ကိုက်လိုက်သောအခါ ပူနွေး၍ အရသာရှိသော စွပ်ပြုတ်ရည်က ပါးစပ်တွင်းသို့ စီးဝင်လာသည်။ ပုစွန်သားက ဝါးလိုက်သည့်အခါ ခပ်ထုပ်ထုပ်ဖြစ်နေပြီး အသားနှင့်မျှစ်နု ပေါင်းစပ်လိုက်သောအခါ မထင်မှတ်လောက်သော အရသာအနှောကို ရရှိစေ၏။

ခရမ်းချဥ်သီးပန်ကိတ်များ၏ ရွှေရောင်ဝင်းနေသော ကြပ်ရွရွအလွှာနှင့် လေးပင်သောအရသာက တစ်ကိုက်ကိုက်ရုံမျှဖြင့် အလွန်ကောင်းမွန်သည်။ ချိုဆိမ့်ဆိမ့် ပဲနို့မွှေးမွှေးကို သောက်လိုက်သောအခါ အခြားဟင်းလျာများ၏ အဆီအဆိမ့်အရသာကို လျော့ကျသွားစေသည်။ ပဲ၏ လတ်ဆတ်သောမူလအရသာနှင့် ချိုသောနို့ရနံ့တို့၏ပေါင်းစပ်မှုက အစာအိမ်နှင့် သရက်ရွက်ကို အားဖြည့်လိုက်သည့်အလား လန်းဆန်းသွားစေသည်။

ဝူယွဲ့နှင့် ဝူလဲ့တို့က အစတွင်စကားပြောဖြစ်ကြသေးသော်လည်း နောက်ပိုင်းတွင်း စားရင်းအလုပ်ရှုပ်နေကြ၏။ ပန်ကိတ်နှင့် ဖက်ထုပ်များက လတ်လတ်ဆတ်ဆတ်ပြုလုပ်ပေးထားခြင်းဖြစ်ပြီး အေးသည်ထိမစောင့်နိုင်လျှင် တဖူးဖူးမှုတ်၍ စားနိုင်သည်။ အစားစားနေချိန်အတွင်းတွင် တူနှင့်ကြွေပန်းကန်များ ထိခတ်သံမျှအပ အခြားအသံများပင်မကြားနိုင်ချေ။

ဝူယွဲ့က အရသာရှိသော အစားသောက်များစားနေခြင်းမှ မရပ်တန့်နိုင်တော့ချေ။ မူလက သူမ၏ အဆိုးမြင်စကားလုံးများကိုလည်း လေထဲသို့ဝဲလိုက်ပြီး ယခုအချိန်တွင် သူမပါးစပ်ထဲသို့ဝင်ရောက်လာသည့် တူဖျားထက်တွင်သာ သူမနှလုံးသားကိုမြှုပ်နှံထားလိုက်သည်။

"အရသာရှိလိုက်တာ..."

ယနေ့တွင် အယ်လ်ဘတ်စားသောက်ဆိုင်၌ သုံးဘက်မြင်နောက်ခံကို ဖွင့်မထားခဲ့ပေ။ ထိုအစား မျက်နှာကြက်နေရာတွင် ဖောက်ထွင်းမြင်ရသော မှန်များဖြင့် လဲလှယ်တပ်ဆင်ထားသည်။ နွေရာသီနှောင်းပိုင်းတွင် နေရောင်က နွေးထွေးပြီး မျက််စိကျိန်းလောက်အောင် တောက်ပနေခြင်းမရှိချေ။ လူတိုင်းက ခုံတန်းများပေါ်တွင် မိမိအစားအသောက်ကိုသာ ကိုယ်စီစားသောက်နေကြပြီး ရယ်မောသံများ ပန်းကန်ခွက်ယောက်သံများနှင့် ပဲနို့အိုးဆူပွက်သံများကိုသာကြားနိုင်သည်။ ၎င်းက ရိုးရှင်းကာအသက်ဝင်သည့် ပျော်ရွှင်ဖွယ်ဘဝတစ်ခုဖြစ်သည်။

အထူးသဖြင့် ဝူယွဲ့က ဟင်းပွဲအချို့မှာလိုက်ချိန်တွင် တစ်ဖက်စားပွဲရှိလူနှင့် တိုက်ဆိုင်သွားကာ နှစ်ဦးသားက ဖော်ရွေစွာပြုံးပြလိုက်ကြသည့်အခါ ပျော်ရွှင်မှုက ဆင့်ပွားသွားပြန်သည်။

စားသောက်ပြီးသောအခါ ဝူယွဲ့နှင့်ဝူလဲ့က ယာဂုတစ်ပွဲကို ကံစမ်းမဲပေါက်သွားပြန်သည်။ ၎င်းက ဆိုင်ရှင်သူဌေးကိုယ်တိုင် ချက်ပြုတ်ပြီး ပို့ဆောင်ပေးထားခြင်းဖြစ်သည်ဟူ၏။ စျေးကြီးသောအလှကုန်များကြောင့်ပင် စိတ်လှုပ်ရှားခဲ့ဖူးခြင်းမရှိသော ဝူယွဲ့က ဤတစ်ကြိမ်တွင် ထခုန်မိမတတ် ပျော်ရွှင်သွားရသည်။

ယာဂုက အလွန်အရသာရှိပြီး သူမကလည်းအလွန်ပျော်ရွှင်နေသည်။ မနက်ခင်းက စောင့်ဆိုင်းရခြင်းမှာ အလွန်တန်သည်ဟု တွေးလိုက်မိ၏။

ဝူယွဲ့ ဤသို့ထင်မြင်သည်မှာ မဆန်းကြယ်လှချေ။

ဤသို့ဖြင့် အယ်လ်ဘတ်စားသောက်ဆိုင်၏ ဂုဏ်သတင်းက မွှေးသထက်မွှေးပျံ့သွားပြန်ကာ စားသုံးသူများကို ဆွဲဆောင်လိုက်နိုင်၏။

-----

တစ်ချိန်တည်းတွင် နံနက်ကိုးနာရီခန့်တွင် ချိုက်ခဲ့ တောင်တွင်...

ယာဂုအိုးက ဆူပွက်နေသည်။ အိုးထဲတွင် ဆန်လုံးများက ပွယောင်းကာ နူးညံ့လာသည်။ ဆန်စေ့များကို ဂျုံမှုန့်များနှင့်အတူရော၍ နူးညံ့ကာ ကြေညက်လာသည်အထိ ချက်ပြုတ်ထားခြင်းဖြစ်သည်။ ယာဂု၏ မွှေးကြိုင်သောရနံ့က လေထုထဲတွင် ရစ်ဝဲနေသည်။

ကုယွီမြန်က ဇွန်းဖြင့် ယာဂုအနည်းငယ်ခပ်ယူ၍ နှင်းကျားသစ်လေးကို မြည်းစမ်းစေလိုက်သည်။ သူက မနက်တိုင်းတွင်ပင် ယာဂုကိုစားနိုင်လိမ့်မည်ဟု ကုယွီမြန်တွေးနေမိ၏။

မည်သည့်ရာသီဥတုတွင်မဆို၊ အထူးသဖြင့် ဆောင်းရာသီနံနက်ခင်းများတွင် ယာဂုတစ်ခွက်သောက်သုံးလိုက်ရခြင်းသည် အစာအိမ်ကိုသာမက စိတ်နှလုံးကိုပါနွေးထွေးစေသည်။ ထိုနွေးထွေး၍ သက်သောင့်သက်သာဖြစ်သော ခံစားချက်ကို အခြားမနက်စာများဖြင့် အစားထိုး၍ မရနိုင်ချေ။

" ထွမ်ထွမ် ငါ့ကိုကူပြီး ချိုးချိုးနဲ့ ယွမ်ယွမ့်ကိုနှိုးပေးပါဦး..."

ကုယွီမြန်က နှင်းကျားသစ်လေးကို ချိုင်းနှစ်ဖက်မှမကာ ကော်ဇောပေါ်သို့ချပေးလိုက်သည်။

" ယာဂုအိုး ချလိုက်ဦးမယ်နော်..."

နှင်းကျားသစ်လေးက သူ၏ကြိုးစားမှုအတွက် ကုယွီမြန်ကသူ့နဖူးကို မနမ်းမီအချိန်အထိ ထွက်မသွားခဲ့ချေ။

ကုယွီမြန်က ယာဂုများပြင်ဆင်ပြီးသောအခါ ကလေးနှစ်ယောက်လည်း နိုးထလာသည်။ နှင်းကျားသစ်လေးက ကုယွီမြန်၏ ပခုံးပေါ်သိူ့ခုန်တက်လိုက်ပြီး ပျင်းရိစွာမှီတွယ်နေ၏။ ပန်ဒါလေးက အိပ်ချင်မူးတူးဖြစ်နေကာ ဒယိမ်းဒယိုင်လျှောက်လှမ်းနေပြီး မြေခွေးလေးက သူလဲကျမသွားစေရန် သူ့လက်သည်းလေးများဖြင့် ကူညီထောက်ကန်ပေးနေ၏။

" ယွမ်ယွမ်က ဘာလို့အိပ်ငိုက်နေသေးတာလဲ မနေ့ကလည်း ဆယ်နာရီမက အိပ်ထားတာကို..."

ကုယွီမြန်ကပြုံးလိုက်ပြီး ကော်ဇောပေါ်တွင် တင်ပျဥ်ခွေထိုင်ချလိုက်သည်။ သူက အမွေးဘောလုံးလေးနှစ်လုံးကို ဖိချကာ ပွတ်သပ်လိုက်၏။

" ကောင်းပြီ မနက်စာစားပြီးမှ တစ်ရေးတစ်မောပြန်အိပ်ကြ..."

ပန်ဒါလေးက အိပ်ငိုက်နေဆဲဖြစ်ပြီး ယာဂုပန်းကန်ကိုကိုင်လျက် ခပ်ယောင်ယောင်ခေါင်းညိတ်ပြနေသည်။ သို့သော် ကုယွီမြန်က သူ့အား ယာဂုတစ်ဇွန်း ခွံ့လိုက်သောအခါ ချက်ချင်းနိုးကြားသွားသည်။ သူက ယာဂုပန်းကန်လုံးကိုကိုင်၍ တစ်ကျိုက်တည်းဖြင့် ယာဂုအတော်များများကိုသောက်လိုက်ပြီး ပျော်ရွှင်သောအသံများ ပြုလုပ်နေသည်။

မြေခွေးလေး၏ အပြုအမူများက ယခင်ကထက် သက်သောင့်သက်သာရှိလာသည်။ သူက အနည်းငယ်ရှက်ရွံ့နေသည့်တိုင် ကုယွီမြန်ထံမှပွေ့ဖက်မှုကိုတောင်းခံလိုက်သည်။ ထို့နောက် သူ့အမြှီးလေးကို လိပ်ခွေ၍ မျက်နှာကို လက်နှစ်ဖက်ဖြင့်အုပ်ကာထားလေသည်။

ကုယွီမြန်၏ နှလုံးသားလေးအရည်ပျော်သွားရသည်။ သူ့မိသားစုရှိ သားပေါက်လေးသုံးကောင်၏ ချစ်စရာကောင်းမှုအား တွန်းလှန်နိုင်စွမ်းမရှိချေ။ သူက ယာဂုခွံ့ကျွေးရန်အတွက် မြေခွေးလေးအား သူ့ရင်ခွင်ထဲသို့ ဆွဲခေါ်လိုက်သည်။

နှင်းကျားသစ်လေး : "..."

နံနက်ခင်းစောစောစီးစီးတွင် သူကအချဥ်ဓာတ်ဖြင့် တစ်နေ့တာကို စတင်နေရပြီဖြစ်သည်။ ဤစျေးပေါသောအရူးများက သူ့ရပိုင်ခွင့်များကို လုယူနေသည်။

ဘယ်လောက်တောင်လုယူခံရပြီးပြီလဲ...

ဖြစ်သင့်ရဲ့လား...

" နေ့လယ်ကျရင် ခြံထဲမှာနှင်းဘောလုံးကစားကြမယ်နော်...နှင်းတွေနဲ့ကစားလို့ဝရင် အနားယူပြီး ရေပူစမ်းကိုသွားကြမယ် ညနေကျ နေဝင်တာကြည့်ပြီးရင် ညစာစားကြမယ် ချိုးချိုး ယွမ်ယွမ် ထွမ်ထွမ် ဘာကိုအရင်လုပ်ချင်လဲ..."

ကုယွီမြန်က ကလေးများအား နံနက်စာကျွေးရင်း ပြောသည်။

ပန်ဒါလေးက နေထွက်ချိန်တွင် အိပ်ရာထရန်မဖြစ်နိုင်ချေ။ သူက အလွန်အိပ်ငိုက်လွယ်သည်။ သို့သော် နေဝင်ချိန်ကြည့်ရန် မဖြစ်နိုင်သည် မဟုတ်ချေ။

ချိုက်ခဲ့တောင်ပေါ်ရှိ နေဝင်ချိန်နှင့် နေထွက်ချိန်က လူတစ်ယောက်အား အလွန်တရာဆွဲဆောင်နိုင်သည်ဟူသည့်အတွက် ကုယွီမြန်က သူ့မိသားစုနှင့်အတူကြည့်ရန် စိတ်အားထက်သန်နေသည်။

ပန်ဒါလေးက ရေရေရာရာနားမလည်သော်လည်း ပျော်ရွှင်သည့်အသံများဖြင့် ဆူညံသွားစေသည်။ ထိုအခါ ကုယွီမြန်က ရွှင်မြူးသွား၏။ မြေခွေးလေးကလည်း လေးလေးနက်နက်တွေးပြီး ခေါင်းညိတ်ပြလာ၏။

နှင်းကျားသစ်လေးကမူ မပျော်ရွှင်ဆဲဖြစ်သည့်အတွက် သူ့အမြှီးကို ခါယမ်းလိုက်သည်။

ညနေလေးနာရီတွင် ကုယွီမြန်က သူ၏တိုက်ရိုက်ထုတ်လွှင့်မှုကိုစတင်လိုက်သည်။ မတိုင်မီက သူ၏ကိုယ်ပိုင်ဘလော့တွင် ကြိုတင်အသိပေးထားသည့်အတွက် စောင့်ဆိုင်းနေကြသော ကြည့်ရှုသူများရှိနေသည်။ တိုက်ရိုက်ထုတ်လွှင့်မှုစတင်သည်နှင့်တစ်ပြိုင်နက် ကြည့်ရှုသူအရေအတွက်က ထိုးတက်သွားပြီး မှတ်ချက်များ တစ်သီတစ်တန်းဝင်ရောက်လာသည်။

" အားလုံးပဲမင်္ဂလာပါ ကျွန်တော် တင်ဆက်သူကုယွီမြန်ပါ..."

ကုယွီမြန်က ကြည့်ရှုသူများကို အပြုံးလေးဖြင့် အတိုချုပ်နှုတ်ဆက်လိုက်သည်။

" ကျွန်တော်အခု ခြံထဲမှာကလေးတွေနဲ့နှင်းကစားနေတာပါ… ဒါပြီးရင် ရေပူစမ်းမှာအနားယူကြမယ် ပြီးရင်ကလေးတွေနဲ့အတူနေဝင်ချိန်ကိုကြည့်ပြီး ညစာပြန်စားကြပါမယ်..."

[သခွားသီးများ : ငါ့ရဲ့တန်ဖိုးရှိတဲ့တင်ဆက်သူလေးလိုင်းတက်လာပြီ ပျော်တယ်ဟေး…]

[ကြောင်လေးရဲ့မြောင် : အားး မြန်မြန်ရေ ငါတို့ဘယ်မှာလဲ အပြင်မှာလား… အေးလိုက်တာ ဒါပေမယ့် မြန်မြန့်ရဲ့နှင်းကာဝတ်စုံကအရမ်းကြည့်ကောင်းတယ်နော် အာ… ]

[မိုင်းတွင်းထဲမှာ မိသားစုတစ်စုရှိတယ် : ဝူးဝူး ငါလည်းမြန်မြန်နဖြ့ သားပေါက်လေးတွေရယ်နဲ့ တူတူဆော့ချင်တယ်လို့… ငါနှင်းလူသားလည်းလုပ်တတ်တယ် စကိတ်လည်းစီးနိုင်တယ် နှင်းဘောလုံးတွေလည်းပစ်ချင်တယ်လို့…]

အလွန်အေးသည့်နေ့ဖြစ်သည့်တိုင် ကုယွီမြန်က ချွေးထွက်နေပြီး သူ့ပါးပြင်များက နီစွေးစွေးဖြစ်နေသည်။ သူ၏ အညိုရောင်မျက်ဝန်းများထဲတွင် အကူအညီမဲ့သော အရိပ်အယောင်များထင်ဟပ်နေ၏။ ကုယွီမြန်က အလွန်ချောမောနေသည့်အတွက် အကြည့်လွှဲရန်ပင် ခက်ခဲစေသည်။

ကုယွီမြန်က အနည်းငယ်မောဟိုက်နေပြီး ပန်ဒါငယ်လေးကိုပွေ့ချီထားရင်း ကင်မရာရှိရာသို့ သူ့လက်ကိုဝှေ့ယမ်းပြလာသည်။

"နှင်းထဲမှာဆို ထွမ်ထွမ်နဲ့ ချိုးချိုးက အတော်ဆုံးပဲ..."

မည်သို့ပင်ဆိုစေ နှင်းဟူသည် အာတိတ်မြေခွေးနှင့် နှင်းကျားသစ်တို့၏ အိမ်ဖြစ်သည်ပင်။ ကုယွီမြန်က ကလေးနှစ်ယောက်နှစ်သက်မည်ကို မျှော်လင့်ထားပြီးဖြစ်သော်လည်း သူတို့က အလွန်နှစ်သက်နေကြသည်။

ရေပူစမ်းဗီလာက ဧည့်သည်များ နှင်းကစားရန်နှင့် စကိတ်စီးရန် အထူးနေရာများထားရှိထားသည်။ နေ့လယ်ခင်းတွင်လူရှင်းနေပြီး သူတို့၏ဗီလာကလည်း သီးသန့်ဖြစ်သည်။ ပန်ဒါလေးက နွေးထွေးသောအဝတ်အစားများဝတ်ဆင်ထားပြီး အအေးဒဏ်ကို မခံစားရချေ။ ကနဦီးတွင် သူကအတူတကွ ဆော့ကစားနေခဲ့သော်လည်း နောက်ပိုင်းတွင် အမီမလိုက်နိုင်တော့သည့်အတွက် ခေါင်းငိုက်စိုက်ချ၍ ကုယွီမြန်၏ လက်မောင်းများကြား ခွေနေလေ၏။

ပထမတွင် ကုယွီမြန်တို့က အလွန်အဆင်ပြေနေပြီး နှင်းလူသားများပြုလုပ်ကာ မိသားစုဓာတ်ပုံအများအပြားရိုက်ခဲ့ကြသည်။

ကုယွီမြန်နှင့် ပန်ဒါလေးတို့က အတူတကွပျော်ရွှင်စွာဆော့ကစားနိုင်ခဲ့ကြသော်လည်း နှင်းဘောလုံးတိုက်ပွဲတွင် ခံနိုင်ရည်မရှိတော့ချေ။

နှင်းကျားသစ်လေးက လက်တုံ့ပြန်ချင်စိတ်ပြင်းပြနေသည်။ သူ၏နှင်းဘောလုံးတိုင်းက မြေခွေးလေးထံသာ ချိန်ရွယ်ထားခြင်းဖြစ်၏။ သူက မောက်မာစွာဖြင့် သူ့အမြှီးကို လှုပ်ယမ်းနေကာ မြေခွေးလေးကို ငုံ့ကြည့်နေသည်။ သူ၏ မနာလိုဝန်တိုမှုများနှင့် ဒေါသများက စုပုံနေပြီး နောက်ဆုံးတွင် ကျိုးကြောင်းဆီလျော်သော ထွက်ပေါက်ကိုတွေ့ရှိသွားခဲ့ပြီဖြစ်သည်။

အစပိုင်းတွင် မြေခွေးလေးက ကြောင်အနေသည်။ ကုယွီမြန်က နှင်းကျားသစ်လေးကို တားဆီးတော့မည့်အချိန်တွင် မြေခွေးလေးက ကျင်းတစ်ကျင်းတူးကာ ခုန်ဝင်သွားသည်။ ပြန်ထွက်လာသည့်အခါ သူ့အမြှီးနားတွင် နှင်းဘောလုံးများရှိနေပြီး ပြန်လည်တိုက်ခိုက်ခြင်းကို စတင်လိုက်သည်။

သူက ကုယွီမြန်၏ရှေ့တွင် ရှက်ကြောက်တတ်ပြီး တည်ငြိမ်အေးဆေးသောစရိုက်ရှိသော်လည်း နှင်းတောက သူ့အားရန်စ၍ကောင်းသောနေရာ မဟုတ်ချေ။

ဤအချိန်က မည်သူက နှင်းဘုရင်ဟူသည်ကို အဆုံးအဖြတ်ပေးမည့် တိုက်ပွဲပင်ဖြစ်နိုင်သည်။

ကုယွီမြန်က အခြေအနေများ အလွန်အကျွံဖြစ်မလာစေရန် ဘေးမှကြည့်ရှုနေရုံသာ တတ်နိုင်သည်။ သူတို့ငြီးငွေ့သွားမှသာ ရေပူစမ်းသို့ပြန်၍ အနားယူလိုက်မည်ပင်။

နှင်းကျားသစ်လေးက အချိန်နှင့်အမျှပို၍ တက်ကြွလာပြီး သူ၏ ခွန်အားနှင့် လျင်မြန်မှုတို့ကိုပြသလေသည်။ သူက သူ၏ကျော့ရှင်းသော ကိုယ်ဟန်နှင့် အမွေးတို့ကို ဂုဏ်ယူစွာကြွားဝါနေပြီး ကုယွီမြန်သူ့အားကြည့်ရှုနေမနေကိုလည်း စစ်ဆေးသည်။ ကုယွီမြန်က သူ့အားကြည့်ရှုနေမှသာလျှင် သူက ကျေနပ်မည်ဖြစ်၏။

၎င်းက အလွန်အပြစ်ကင်းစင်ကာ ချစ်စဖွယ်ကောင်းလှသည်။

" ကောင်းပြီ..."

ကုယွီမြန်က အချိန်ကိုကြည့်လိုက်သည်။ ကလေးနှစ်ဦးကလည်း ပင်ပန်းနေပြီဖြစ်သည့်အတွက် ရပ်တန့်စေလိုက်ပြီး နှစ်ဦးစလုံးကို ကောက်ချီလိုက်၏။

" အနားယူပြီးရင် နေဝင်တာ သွားကြည့်ကြရအောင်..."

🐯🐯🐯

Prev Next