Chapter 166

🚩Chapter -166

 Arc_8.မောင်းမဆောင်နတ်ဘုရားမ [ 2 ]

_____

စုဝမ်၏ ရက်စက်သည့်ခံစားချက်များကြား ချန်ရှန့်ပေ မျှော်လင့်ချက်များ ပျက်သုဥ်းခဲ့လေသည်။ တစ်ချိန်တည်းမှာပင် ယန်ယွီနော့၏ နူးညံ့သောနှလုံးသားနှင့် ကြင်နာမှုများကြောင့် သူမက ချန်ရှန့်ပေ၏နီးစပ်သည့် သူငယ်ချင်းတစ်ယောက်ဖြစ်လာခဲ့ကာ တဖြည်းဖြည်းနှင့် နောက်ဆုံးတွင် ချစ်ကျွမ်းဝင်သွားကြသည်။ 

ထိုအချိန်တွင် စုဝမ်က ဘုရင်မင်းမြတ်အား ချဥ်းကပ်ရန် ရည်ရွယ်ချက်ရှိရှိနှင့် ကြံစည်နေသည်။ သို့သော် ယန်ယွီချင်းက မည်ကဲ့သို့သော လူစားမျိုးနည်း။ သူမ အဆင့်မြင့်ကိုယ်လုပ်တော်လျို၏ အစေခံအဖြစ်ရှိနေစဥ်က သူ့သခင်မကို ကျော်၍ ဘုရင်မင်းမြတ်၏ အိပ်ရာပေါ်သို့တက်ခဲ့သည်။ ယခုတွင် သူမက အဆင့်မြင့်ကိုယ်လုပ်တော်လျိုကဲ့သို့ အမှားဖြစ်ခွင့် မပေးနိုင်ပေ။ ရလဒ်အနေနှင့် စုဝမ်၏ တော်ဝင်ကိုယ်လုပ်တော်ဖြစ်လာချင်သည့် အိပ်မက်က ကျဆုံးသွားခဲ့၏။ စုဝမ်က နန်းဆောင်ထဲတွင် အခြားနန်းတွင်းသူတစ်ဦး၏ အကွက်ချခြင်းကိုခံရကာ အညစ်ပတ်ဆုံးနှင့် အပင်ပန်းဆုံး အလုပ်များကိုလုပ်ရန် ရှင်းကျဲခူ သို့ ပို့ဆောင်ခံလိုက်ရသည်။ (T/N ရှင်းကျဲခူ - အပြစ်ပေးခန်းမ)

စုဝမ်က နိုးလာသည့်အခါ စတင်နောင်တရလာတော့၏။ ဤ ရှင်းကျဲခူတွင်သာ သူမတစ်ဘဝလုံး ကုန်ဆုံးရတော့မည်ဟုပင် တွေးမိသည်။ ထိုအချိန်တွင် ယန်ယွီနော့က သူမအတွက် ရပ်တည်လာခဲ့၏။ ယန်ယွီနော့က သူမ၏အရာအားလုံးကိုပေးကာ ချန်ရှန့်ပေကိုပင် ကူညီပေးရန် တောင်းဆိုခဲ့သည်။ သူတို့နှစ်ယာက်က ငွေစတော်တော်များများသုံး၍ စုဝမ်က ရှင်းကျဲခူမှထုတ်ပေးကာ ရှန့်ချင်းကျွီသို့ ဝင်ရောက်နိုင်စေခဲ့သည်။ (T/N ရှန့်ချင်းကျွီ - အိပ်ဆောင်)

ရှန့်ချင်းကျွီတွင် အလုပ်များက သက်သက်သာသာရှိ၏။ စုဝမ်က ဘုရင်မင်းမြတ်၏ ကိုယ်လုပ်တော်များ အဝတ်လဲနေစဥ် မီးထွန်းညှိပေးရန်နှင့် ကြည့်ရှုရန် တာဝန်ယူပေးရသည်။ ၎င်းက ဘုရင်မင်းမြတ်နှင့် နီးကပ်ရန် စုဝမ်အတွက် အခြားအခွင့်အရေးကောင်းတစ်ခုဖြစ်သည်။ သို့သော်လည်း ယခုတစ်ကြိမ်တွင် စုဝမ်က စွန့်စားမှုများသည့် “ကိုယ်လုပ်တော်”ရာထူးအတွက် အကြံများမရှိတော့ပေ။ သူမက ယန်ယွီနော့ထံမှ ချန်ရှန့်ပေသည် သူမကိုကယ်ရန် အကောင်းဆုံးကြိုးစားထားကြောင်း ကြားသိခဲ့ရသည်။ စုဝမ်က သူ၏ ကောင်းမွန်သည့်အမူအကျင့်များကို ပြန်တွေးလိုက်ပြီး အနာဂတ်တွင် နန်းတွင်းမှထွက်ကာ ချန်ရှန့်ပေနှင့် ပျော်ပျော်ရွှင်ရွှင်နေသွားရန်သာ ဆုံးဖြတ်လိုက်သည်။ 

ယန်ယွီနော့အား အကောင်းဆုံး အစ်မတစ်ယောက်အဖြစ် သတ်မှတ်ထားသော စုဝမ်က သူမတွေ့ထားသည်များကို ယန်ယွီနော့အား ပြောပြခဲ့သည်။ ယန်ယွီနော့က စုဝမ်အတွက် ပျော်မိသလို၊ ဝမ်းလည်း ဝမ်းနည်းမိသည်။ 

တကယ်တမ်းတွင် သူမနှင့် ချန်ရှန့်ပေက လွန်ခဲ့သည့်ရက်အနည်းငယ်၌ပင် တစ်ယောက်နှင့်တစ်ယောက် ချစ်ကျွမ်းဝင်သွားကြပြီဖြစ်၏။ သို့သော် စုဝမ်ခံစားရသည့်အရာများနှင့် ချန်ရှန့်ပေနှင့်သူမကြားမှ ထိမ်းမြားလက်ထပ်ရန် စီစဥ်ထားသည်ကိုတွေးရင်း ယန်ယွီနော့က သူတို့ကိုကူညီပေးရန် သူမကိုယ်သူမ စွန့်လွှတ်အနစ်နာခံလိုက်မည်ဟု ဆုံးဖြတ်လိုက်တော့၏။

ထို့ကြောင့် ယန်ယွီနော့က ချန်ရှန့်ပေအပေါ် ခပ်ကွာကွာနေလာပြီး စိတ်မဝင်စားသလို စတင်ပြုမူလာလေသည်။ သူ့အရှေ့တွင် ရှိခဲ့သည့် သူမ၏ပုံရိပ်ကောင်းများအားလုံးကိုဖျက်ဆီးကာ သူမကိုယ်သူမ ရက်စက်ကြမ်းကြုတ်ပြီး တစ်ကိုယ်ကောင်းဆန်သည့် မိန်းမတစ်ယောက်အဖြစ် ဖော်ပြခဲ့သည်။

ကံမကောင်းစွာနှင့် ထိုအချိန်တွင် သူမအပေါ် ချန်ရှန့်ပေ၏အချစ်များက နက်နက်ရှိုင်းရှိုင်း အမြစ်တွယ်နေခဲ့ချေပြီ။ 

ယန်ယွီနော့ရဲ့ ညံ့ဖျင်းလှတဲ့ သရုပ်ဆောင်ချက်တွေနဲ့ ချန်ရှန့်ပေက ဘယ်လိုလုပ် အလှည့်စားခံမလဲ…။

ချန်ရှန့်ပေက စုဝမ်ကိုရှာပြီး ရှင်းပြရန်ဆုံးဖြတ်ခဲ့သော်လည်း ယန်ယွီနော့က သဘောတူရန် ငြင်းဆန်ခဲ့သည်။ သူတို့နှစ်ယောက် အချေအတင်ဖြစ်နေစဥ်မှာပင် ချန်ရှန့်ပေက သူ့အနောက်တွင် စုဝမ်တစ်ယောက် အေးစက်နေသည့် မျက်နှာနှင့် ရှိနေသည်ကို မြင်သွားလေသည်။

စုဝမ်က အချစ်ရဆုံးနှင့် အယုံကြည်ရဆုံး အစ်မနှင့် ချစ်သူထံမှ လှည့်စားခံလိုက်ရသည်ကို ခံစားလိုက်ရသည်။ အဆိုပါ ထိုးနှက်ချက်ကို မခံစားနိုင်သောကြောင့် ထိုညတွင် မတော်တဆနှင့် ကိုင်ထားသည့်မီးအိမ်က မှောက်သွားရာ မီးလောင်တော့မလိုဖြစ်ခဲ့သည်။

ထိုကဲ့သို့ ကြီးလေးလှသည့်အပြစ်ကြောင့် အပြစ်ပေးခံခဲ့ရသည့်နေရာသို့ စုဝမ်က ခေါ်ဆောင်သွားခံရမည်ဖြစ်သည်။ သို့သော် ထိုနေရာအစား သူမက တော်ဝင်ကိုယ်လုပ်တော် နေထိုင်ရာ ရှို့နင်နန်းဆောင်သို့ ခေါ်ဆောင်သွားခံရသည်။

ကိုယ်လုပ်တော်လျန်ဖေးက အသက်ငယ်ငယ်နှင့် နန်းတွင်းသို့ရောက်ရှိလာပြီး မြင့်မြတ်သည့်မိသားစုမှဖြစ်သည်။ သို့သော် သူမက တစ်ခါမှ မျက်နှာသာအပေးမခံရပေ။ ငယ်ရွယ်ပြီး အရည်အချင်းရှိသည့် ကိုယ်လုပ်တော်များနှင့် အလှတရားတို့ပြည့်ဝနေသည့် မိန်းမပျိုလေးများကို ကြည့်ရင်း ဒီနှစ်များတွင် လျန်ဖေးက သူမ၏မိသားစုအတွက် သည်းခံစွာဖြတ်သန်းခဲ့ရသည်ကို ဝမ်းနည်းမိသည်။ ထို့ကြောင့် သူမက နန်းတွင်း၌ ထူးချွန်သည့်လူများကိုရှာကာ စစ်တုရင်အစိတ်အပိုင်းလေးများအဖြစ် လေ့ကျင့်ပေးပြီး ဘုရင်မင်းမြတ်အား လက်ဆောင်ပေးချင်ခဲ့သည်။

စုဝမ်က လျန်ဖေး၏ ရွေးချယ်ခြင်းခံရသည့်သူများထဲမှ တစ်ယောက်ဖြစ်သည်။

ထိုအချိန်တွင် စုဝမ်က ယန်ယွီနော့၊ ချန်ရှန့်ပေတို့နှင့်အတူ ယန်ယွီချင်းကိုပါ အမုန်းကြီးမုန်းနေလေသည်။ သူမက တစ်ဖန်ပြန်လာပြီး ပြင်းပြင်းထန်ထန် လက်တုံ့ပြန်ချင်ခဲ့သည်။ လျန်ဖေး၏ လေ့ကျင့်သင်ကြားပေးမှုများအောက်၌ စုဝမ်က ဘုရင်မင်းမြတ်တုန်းဖန်းယောင်၏ အာရုံကို အောင်မြင်စွာ ဆွဲဆောင်နိုင်လိုက်သည်။ ထို့နောက် ဘွဲ့များ ချီးမြှင့်ခံရကာ သူမ၏ဆန္ဒများပြည့်ဝလာခဲ့သည်။

လျန်ဖေး၏ နောက်ခံအဖြစ်ရှိနေမှုနှင့်အတူ စုဝမ်က ယန်ယွီချင်းနှင့် ပွင့်ပွင့်လင်းလင်း ပြိုင်ဆိုင်လာခဲ့သည်။ တစ်ချိန်တည်းမှာပင် သူမက ရှန့်ဖူနန်းဆောင်သို့ လူများကို စေလွှတ်ပြီး ယန်ယွီနော့အား ပြဿနာတို့ ဖြစ်စေလိုက်သေးသည်။ ယွီနော့ကတော့ ဤမင်းဆက်၏ ကြာပန်းဖြူလေးဖြစ်သည်။ မည်မျှခက်ခဲနေပါစေ၊ တွေ့ကြုံရသည့် အခက်အခဲများတွင် ခေါင်းငုံ့အရှုံးပေးရန် ငြင်းဆန်ခဲ့၏။ သူမက အံကြိတ်၍ မတရားသည့် ဆက်ဆံမှုများအား သည်းခံကာ ဘယ်တော့မှ မဆန့်ကျင်ခဲ့ပေ။

နန်းတွင်းမှ ဘဝများက ရပ်တန့်မသွားဘဲ မျက်စိတစ်မှိတ်လေးမှာပင် နောက်တစ်နှစ်သို့ ကူးပြောင်းရောက်ရှိသွားတော့သည်။ စုဝမ်နှင့် ယန်ယွီချင်းတို့က ကိုယ်ဝန်ရသွားခဲ့ကြသည်။ သူတို့နှစ်ယောက်က သားတော်လေးဖွားမြင်ရန်လည်း ပြိုင်ဆိုင်နေကြ၏။ ထိုအချိန်တွင် လူနှစ်ယောက်က တဟုန်းဟုန်းတောက်နေသော မီးတောက်များကဲ့သို့ ပြိုင်ဆိုင်တိုက်ခိုက်နေကြရာ အခြားကိုယ်လုပ်တော် တစ်ယောက်၏ ယုတ်မာသည့်ကြံစည်မှုဖြင့် သူတို့ကလေးများကို ဆုံးရှုံးသွားခဲ့လေသည်။ ထိုအကြောင်းကြောင့်ပဲ စုဝမ်က ရှင်းကျဲခူမှာ ရှိနေတုန်းကလိုပင် ပြင်းပြင်းထန်ထန်ဖျားနာလာခဲ့သည်။

 ကိုယ်ဝန်ပျက်ကျပြီးနောက် သွေးဆုံးရှုံးမှုများကြောင့် သေလုနီးပါးပင်ဖြစ်ခဲ့၏။ ကံကောင်းစွာနှင့် နန်းတွင်းသမားတော် လုမုရွှင်၌ ပြောင်မြောက်လှသည့် ဆေးကုသရေးစွမ်းရည်များရှိကာ သူမအား သေခြင်းနှင့်ရှင်ခြင်းကြားထဲမှ ဆွဲထုတ်နိုင်ခဲ့သည်။

ထိုအချိန်တွင် ယန်ယွီချင်းက နောက်ကွယ်ကကြိုးကိုင်သူမှာ စုဝမ်ဟု အထင်လွဲသွားပြန်သည်။ သူမက သက်သေအထောက်အထားတို့ကို လိုက်လံစုစည်းကာ ဘုရင်မင်းမြတ်နှင့် မိဖုရားခေါင်ကြီးတို့အရှေ့တွင် တိုင်တန်းခဲ့သည်။ စုဝမ်က တော်ဝင်သားတော်လေးများကို သတ်ခဲ့သည့်ပြစ်မှုအတွက် “ပြီးပြည့်စုံ” သည့်အထောက်အထားများကြောင့် သူမမှာ ရေခဲနန်းဆောင်သို့ ပို့ဆောင်ခြင်းခံလိုက်ရတော့သည်။ စုဝမ်က ရေခဲနန်းဆောင်ထဲတွင် ချုပ်နှောင်ခံထားရကာ ထုတ်ပေးမည့်သူတစ်ယောက်တစ်လေမှမရှိဘဲ အကူအညီမဲ့နေခဲ့၏။ ထိုအချိန်တွင် ယန်ယွီနော့က ထပ်မံပေါ်လာခဲ့သည်။ သူမက စုဝမ်ကို ကုသပေးရန် သမားတော်လုကိုလည်း ခေါ်လာခဲ့သည်။ 

ယခုတစ်ကြိမ်တွင် ‌‌လောကကြီး၌ သိပ်မနေရတော့မည့် စုဝမ်က ချမ်သာကြွယ်ဝခြင်းက မီးခိုးငွေ့များဖြစ်ကြောင်းကိုသာ သ‌ဘောပေါက်သွားပြီး ယန်ယွီနော့နှင့် ပြန်လည်သင့်မြတ်ခဲ့သည်။ 

ယန်ယွီ‌နော့ VS စုဝမ်....။ ကြာပန်းဖြူလေးက အောင်မြင်စွာနှင့် မိန်းမဆိုးတစ်ယောက်ကို အောင်မြင်စွာ သိမ်းပိုက်နိုင်ခဲ့လေသည်။

သေချာပေါက် ၎င်းက ကြာပန်းဖြူ‌လေး၏ မောင်းမဆောင်ခရီးလမ်းတစ်လျှောက်၌ ပထမဆုံး “ကယ်တင်” ခဲ့သည့် ပထမဆုံး ရက်စက်ကြမ်းကြုတ်သည့် အရံအမျိုးသမီးဇာတ်ကောင်ဖြစ်သည်။

စုဝမ် ရေခဲနန်းဆောင်သို့ ပို့ဆောင်ခံရပြီးနောက်တွင် မောင်းမဆောင်က ယန်ယွီချင်းနှင့် ကျန့်ဖေးတို့၏ စစ်မြေပြင်ဖြစ်လာခဲ့၏။ တုန်းဖန်းယောင်က အိပ်မက်တစ်ခုကြောင့် အဆင့်မြင့်ကိုယ်လုပ်တော်လျိုကို မျက်စိထဲတွင် သဘောကျနှစ်သက်မိနေကာ လျင်မြန်စွာနှင့် တန်ဖိုးထားရသည့် ကိုယ်လုပ်‌တော်အဖြစ် ရာထူးတို့မြှင့်ပေးလိုက်သည်။

ထိုအချိန်တွင် ယန်ယွီနော့က ရေခဲနန်းဆောင်မှ စုဝမ်သည် မှားယွင်းစွပ်စွဲခံရခြင်းဖြစ်ကြောင်း သိလိုက်ရသည်။ သူတို့၏ သားငယ်လေးများကို ဆုံးရှုံးစေခဲ့သည့်လူမှာ ထင်မှတ်မထားသည့် ယခင်အဆင့်မြင့်ကိုယ်လုပ်တော်လျိုဖြစ်သည့် ယခုလက်ရှိ အဖိုးတန်ကိုယ်လုပ်‌တော်ကျန့်ဖေးသာ ဖြစ်သည်။

သူတို့နှစ်ယောက်က ပြိုင်ဘက်များဖြစ်ကြကာ ရန်သူများက မျက်နှာချင်းဆိုင်တွေ့ကြလျှင် ဒေါသတကြီး ဖြတ်တတ်စမြဲပင်။

ကျန့်ဖေးက ယန်ယွီနော့နှင့် ယန်ယွီချင်းတို့က “ညီအစ်မများ” ဖြစ်ကြောင်း သိသွားသည့်အခါ ယန်ယွီနော့ကို အကွက်ချကြံစည်ရန် နန်းဆောင်သို့ လူလွှတ်လိုက်သည်။ ရလဒ်အနေနှင့် ယန်ယွီချင်းက အစွမ်းကုန်အားထုတ်ကာ ဘုရင်မင်းမြတ်အရှေ့တွင် ထိခိုက်ချင်ယောင်ဆောင်၍ ယန်ယွီနော့အပေါ် သူမ၏အချစ်များက နက်ရှိုင်းပြီး စစ်မှန်ကြောင်းပြသခဲ့သည်။ ၎င်းက ယန်ယွီချင်းအတွက် ဘုရင်မင်းမြတ်၏ အချစ်နှင့် ယုံကြည်မှုတို့ကို ပိုမိုရရှိစေကာ သူ့အား ယန်ယွီနော့ကိုလည်း သိအောင်လုပ်ပေးနိုင်ခဲ့သည်။

ယန်ယွီနော့၏ ကြင်နာတတ်မှုနှင့် ရိုးသားသည့် အကျင့်စရိုက်လေးက လှည့်စားမှုများနှင့်သာ ပြည့်နေသည့် နန်းတွင်း၌ ကြီးပြင်းလာခဲ့သော ဘုရင်တုန်းဖန်းယောင်အား သူမသည်အဖိုးတန်သည့် ဖြစ်တည်မှုတစ်ခုဟု ခံစားမိစေခဲ့သည်။ ထို့ကြောင့် သူက ချက်ချင်း ယန်ယွီနော့ကို အနားသို့ခေါ်ထားကာ တန်ဖိုးထား ဆက်ဆံလေသည်။

ယန်ယွီ‌နော့ အဆင့်တိုးသွားသည်နှင့် မောင်းမဆောင်ထဲမှ သူမ၏အဆင့်အတန်းသည်လည်း မြင့်တက်သွားကာ အမျိုးမျိုးသော ကိုယ်လုပ်တော်များထံမှ မနာလိုမုန်းတီးမှုတို့ကို ဆွဲဆောင်မိလိုက်လေသည်။

ကံကောင်းစွာနှင့် ယန်ယွီနော့က နှလုံးသားဖြူစင်မှု၊ ရောင့်ရဲခြင်းနှင့် ကောင်းမွန်သည့်အမူအကျင့်တို့ကို အခြေတည်ကျင့်သုံးတတ်သောသူဖြစ်သည်။ အန္တရာယ်ကျရောက်နေသည့်အချိန်တွင်တောင် သူမကိုယ်သူမ အန္တရာယ်မှ လွတ်မြောက်နိုင်ခဲ့ပြီး မျက်နှာသာအပေးမခံရသော အခြားကိုယ်လုပ်တော်နှစ်ယောက်ကိုပါ ကယ်တင်ပေးခဲ့သည်။ 

ထိုအချိန်တွင် ယန်ယွီနော့ကို ဘုရင်မင်းမြတ်က အတော်လေး နှစ်သက်သဘောကျနေမိကာ နောက်ပိုင်းတွင် တုန်းဖန်းယောင်က သူ့အနားတွင်ရှိနေသည့် နန်းတွင်းအစေခံမလေးကို တဖြည်းဖြည်းနှင့် ချစ်မြတ်နိုးလာမိလေ၏။ ကံမကောင်းစွာနှင့် ယန်ယွီနော့သည် ချန်ရှန့်ပေကို ဟိုးအရင်တည်းကပင် သဘောကျနေကြောင်း သူသိသည်။ ဘုရင်တစ်ယောက်အနေနှင့် သူချစ်ရသည့်မိန်းကလေးကို သူမတစ်ဘဝလုံး သွေးအေးရက်စက်သည့် မောင်းမဆောင်ထဲတွင် ပိတ်မိမနေစေချင်။ တုန်းဖန်းယောင်က နောက်ဆုံးတွင် ယွီနော့အတွက် စွန့်လွှတ်အနစ်နာခံရန် ဆုံးဖြတ်လိုက်လေသည်။ ထိုအချိန်တွင် ယွီချင်းက အလွန်မနာလိုဖြစ်ကာ သူမကို ကြံစည်လာတော့သည်။

ယန်ယွီ‌နော့က သူမထံမှ ဘုရင်မင်းမြတ်အား လုယူသွားမည်ကိုတားဆီးရန် ယန်ယွီချင်းက ယန်ယွီနော့နှင့် လုမုရွှင်တို့ကို ဆက်ဆံရေးတစ်ခုရှိကြောင်း ချောက်ချရန် ကြံစည်ခဲ့၏။

လုမုရွှင်က ယန်ယွီနော့ကို အချိန်တော်တော်ကြာကတည်းကပင် စွဲမက်မိလေသည်။ သူတို့နှစ်ယောက်က အတွင်းနန်းဆောင်တွင် မကြာခဏ တွေ့ဆုံမိကြပြီး အလွန်လည်းနီးကပ်ကြသည်။

ယန်ယွီချင်း၏ထောင်ချောက်တွင်မိသွားကြပြီးနောက် သူတို့နှစ်ယောက်က ပြင်းထန်သည့် စိတ်ကြွဆေးများ အခတ်ခံလိုက်ရကာ လစ်လပ်နေသည့်နန်းဆောင်ထံတွင် အတူတကွအပိတ်ခံထားခဲ့ရသည်။ သူချစ်ရသည့် မိန်းကလေး၏ ဖြူစင်မှုအတွက် လုမုရွှင်က သူ့ကိုယ်သူသာထိခိုက်အောင်လုပ်၍ စိတ်ထိန်းရန် တွ့န်ဆုတ်မနေခဲ့ပေ။ အဆုံး၌ သူတို့နှစ်ယောက်အား ဘုရင်မင်းမြတ်ရှာတွေ့ချိန်တွင် လုမုရွှင်က သွေးတော်တော်များများဆုံးရှုံးလိုက်ရသောကြောင့် သတိမေ့နေပြီဖြစ်သည်။ ဆေးအရှိန်မပြယ်သေးသည့် ယန်ယွီနော့ကတော့ ချက်ချင်း တုန်းဖန်းယောင်၏ ရင်ခွင်ထဲ၌ ပွေ့ချီခေါ်သွားခံရကာ ကုသရန်အတွက် ထိုက်ယွမ်ကုသရေးနန်းဆောင်သို့ ခေါ်သွားခံရလေသည်။

ထို့နောက်တွင် တုန်းဖန်းယောင်က ချက်ချင်း ကိစ္စကိုစုံစမ်းရန် လူများကိုစေလွှတ်ခဲ့သည်။ ယန်ယွီချင်းက သူမလုပ်ထားသည့်ကိစ္စက အလင်းရောင်ထဲသို့‌ပေါ်လာတော့မည်ကို သိသွားသောအခါ အဝတ်အစားတို့ ဖရိုဖရဲဖြင့် ယန်ယွီနော့အနားယူနေရာသို့ အပြေးအလွှားသွား၍ သနားညှာတာပေးရန် တိုးလျှိုတောင်းပန်ခဲ့သည်။ အမြဲတစေ ကြင်နာနူးညံ့သည့် ယန်ယွီနော့က ယန်ယွီချင်း၏စကားများကို ယုံခဲ့သည်။ သူမ၏ ဖျားနာနေသည့် ခန္ဓာကိုယ်လေးနှင့် ဘုရင်မင်းမြတ်ရှေ့မှောက်သို့ ဝင်ရောက်၍ သူမ၏ညီမအတွက် တောင်းဆိုပေးရာ ယန်ယွီချင်းက အပြစ်ဒဏ်မှ ကင်းလွတ်ခွင့်ရသွားလေသည်။ 

ထိုဖြစ်ရပ်ပြီးနောက် ယန်ယွီချင်းက သွမ့်ဖေးမှသည့် သွမ့်ယွီသို့ နိမ့်ဆင်းသွားတော့သည်။ ရေခဲနန်းတော်သို့ မပို့မခံရသော်လည်း ထိုအချိန်မှစ၍ သူမက တုန်းဖန်းယောင်၏ ချစ်ခင်နှစ်သက်ခြင်းကို ဆုံးရှုံးလိုက်ရသည်။

ငယ်ရွယ်စဥ်ကပင် ယန်ယွီချင်းက သူမ၏ကံကြမ္မာကို ဦးညွှတ်ရန် ဆန္ဒမရှိခဲ့ပေ။ ထိုအချိန်တွင်လည်း သူမက ရှုံးနိမ့်သွားခြင်းကို လက်ခံရန်ငြင်းဆန်နေလေသည်။ ဘုရင်မင်းမြတ်၏ ချစ်ခင်နှစ်သက်ခြင်းကို ဆုံးရှုံးလိုက်ရပြီးနောက် သူမက ထင်မှတ်မထားဘဲ ရွေ့ဝမ်တုန်းဖန်းလီ၏ စိတ်ကိုဆွဲဆောင်နိုင်လိုက်သည်။

တုန်းဖန်းလီက ယခင်ဘုရင့်အစ်ကိုတော်၏ သားဖြစ်ပြီး သူ့ဝမ်းကွဲက ယခုလက်ရှိဘုရင်မင်းမြတ်ဖြစ်သည်။ သူ့အသွင်အပြင်က သန့်စင်သော်လည်း သူကရည်မှန်းချက်မြင့်မားသူဖြစ်၏။ ပလ္လင်ကိုလုယူရန် ကြိုးစားနေသော တုန်းဖန်းလီက သူမ မျက်နှာသာအပေးမခံရချိန်တွင် သူမအနားကိုချဥ်းကပ်ခဲ့သည်။ ခံစားချက်မျိုးစုံတို့ဖြင့် သူက ဖြည်းဖြည်းချင်း ယန်ယွီချင်း၏ နှလုံးသားကိုတိုက်ခိုက်ကာ နောက်ဆုံး သူ့အပေါ် သူမအလုံးစုံနစ်မျောသွားချိန်၌ သုံ့ဖန်းလီက သူမအား ဘုရင်မင်းမြတ်အတွက် အဆိပ်ခတ်ထားသည့် အစားအသောက်များကို ပြင်ဆင်ပေးရန် ညွှန်ကြားခဲ့သည်။ 

ထိုအချိန်တွင် ယန်ယွီချင်းက နှစ်သက်ခြင်းမခံရသောကြောင့် ပတ်ဝန်းကျင်တွင် သူမကိုကြည့်နေသည့် မျက်လုံးများလည်းရှိမနေရာ အကောင်းဆုံးအခွင့်အရေးဖြစ်ခဲ့သည်။

ရက်အနည်းငယ်ကြာပြီးနောက် တုန်းဖန်းယောင်က အဆိပ်မိကာ သတိမေ့သွားခဲ့သည်။ သက်သေအားလုံးက ယန်ယွီနော့ကို ညွှန်ပြနေကာ သခင်ကိုအဆိပ်ပြန်ခတ်သည့်သူအဖြစ် စွပ်စွဲခံရလေသည်။ 

အကွက်ချကြံစည်ခံရပြီး အကျဥ်းချခံရသည့် ယန်ယွီနော့က ခေါင်းဖြတ်အသတ်ခံရရန်သာ စောင့်ဆိုင်းနေခဲ့သည်။ ထိုအချိန်တွင် ယန်ယွီချင်းက အကျဥ်းထောင်ထဲသို့လာကာ သူမ၏ခွန်အားကို မပြသဘဲမနေနိုင်ခဲ့ပေ။ တစ်ချိန်တည်းမှာပင် တုန်းဖန်းယောင် အဆိပ်မိနေသည်ကိုအခွင့်ကောင်းယူ၍ တုန်းဖန်းလီက ပလ္လင်ကိုသိမ်းရန် စီစဥ်လေသည်။ ထိုကဲ့သို့ အရေးကြီးနေသည့်အချိန်၌ လုမုရွှင်က အဆိပ်ကို သူ့ကိုယ်နှင့်စမ်းသပ်ကာ အောင်မြင်စွာနှင့် တုန်းဖန်းယောင်ကို ကုသနိုင်ခဲ့သည်။ ချန်ရှန့်ပေကလည်း လက်ရွေးစင်ကိုယ်ရံတော်တပ်နှင့်အတူ ကယ်ဆယ်ရန် ‌ရောက်လာခဲ့သည်။ တုန်းဖန်းလီက ကျဆုံးကာ အကျဥ်းထောင်ထဲသို့ အပို့ခံလိုက်ရတော့၏။

ယန်ယွီနော့က မှားယွင်းစွပ်စွဲခံရမှုကြောင့် ပြန်လွတ်လာခဲ့သည်။ သူမလွတ်လာပြီးနောက် တုန်းဖန်းယောင်က ဆုလာဘ်တော်တော်များများချီးမြှင့်ကာ ယန်ယွီနော့နှင့် ချန်ရှန့်ပေကို ကိုယ်တိုင် ထိမ်းမြားလက်ထပ်ပေးခဲ့သည်။ ထိုအချိန်တွင် ယန်ယွီနော့က အကျဥ်းထောင်ထဲ၌ပြောခဲ့သည့် ယန်ယွီချင်း၏အမုန်းတရားများ ပြည့်နှက်နေသော စကားတို့ကို ပြန်တွေးမိသည်။ အလွန်ခက်ခဲသည့်အခြေအနေသို့ ရောက်ရှိသွားပြန်သည့် ယန်ယွီချင်းကိုကြည့်ရင်း ယန်ယွီနော့၏ နှလုံးသားကလှုပ်ရှားသွားကာ တုန်းဖန်းယောင်အရှေ့တွင် ယန်ယွီချင်းအတွက် တောင်းပန်ခဲ့ပြန်သည်။ ယန်ယွီနော့၏မျက်နှာကို ထောက်ထား၍ တုန်းဖန်းယောင်က ယန်ယွီချင်း၏ သေဒဏ်ကိုလျှော့ချပေးလိုက်သည်။ သို့သော် သေဒဏ်မှသည် ဘဝကိုလေ့ကျင့်ရန် ဘုရားကျောင်းတွင်သာ တစ်သက်တာကုန်ဆုံးစေလိုက်သည်။ 

ယန်ယွီချင်းအကျဥ်းထောင်မှ လွတ်မြောက်လာသည့်နေ့တွင် ယန်ယွီနော့က သူမအား ကိုယ်တိုင် မြို့တော်အပြင်ဘက်သို့ လိုက်ပို့ခဲ့သည်။ ယန်ယွီနော့မှာ သူမ၏ညီမက နှုတ်ဆက်စကားပြောရန် တွန့်ဆုတ်နေသည်ဟု ထင်မိသည်။ သူမက စိတ်လွတ်သွားပြီး ရူးနှမ်းသွားသည်ကိုတော့မည်သူမှမသိကြချေ။ ယန်ယွီချင်းက ရုတ်တရက် ဝတ်ရုံထဲမှ ဓားမြှောင်ကိုထုတ်လိုက်ကာ ယန်ယွီနော့၏ ရင်ဘတ်တည့်တည့်ကို ချိန်ရွယ်လာခဲ့သည်။ ထိုးစိုက်မိတော့မည့်အချိန်မှာပင် ချန်ရှန့်ပေက ယန်ယွီနော့အား ရင်ခွင်ထဲသို့ ဆွဲသွင်းကာ တိုက်ခိုက်မှုကို ဝင်ခံလိုက်သည်။ 

ထိုအဖြစ်အပျက်ပြီးနောက် ယန်ယွီချင်းက သူမကိုယ်သူ သတ်သေသွားခဲ့သည်။ ပြင်းပြင်းထန်ထန် ထိခိုက်သွားသည့် ချန်ရှန့်ပေကို လုမုရွှင်က ကုသပေးခဲ့သော်လည်း သူကကိုယ်ခံပညာတို့ကို လေ့ကျင့်၍မရတော့သလို၊ တပ်များကိုလည်း ဦးဆောင်၍မရတော့ပေ။ 

ဇာတ်ကြောင်းက ထိုမျှနှင့် ပြီးဆုံးသွားသည်။ ချန်ရှန့်ပေက နန်းတွင်းမှ နှုတ်ထွက်ကာ ဇာတိမြေဖြစ်သည့် ကျင့်ကျိုးမြို့သို့ ယန်ယွီနော့နှင့်အတူ ပြန်လာခဲ့သည်။ ထို့နောက် သူတို့နှစ်ယောက်က အိုမင်းသည်အထိ ပျော်ရွှင်စွာနေထိုင်သွားကြတော့၏။။ 

ဒါက ပျော်ရွှင်စရာအဆုံးသတ်ပဲမလား....။ ပျော်ရွှင်စွာ ပေါင်းစည်းနေနိုင်ပါစေ...ခဲအိုရေ...။

ကြာပန်းဖြူလေး မောင်းမဆောင်ထဲတွင် ကျင်လည်နေသည့်အချိန်အတွင်း အပြစ်ကင်းစင်သည့် အစေခံ ဘယ်လောက်များများက အမြှောက်စာများဖြစ်ခဲ့ကြောင်း ပြောစရာလိုပင်မလိုချေ။ ထို့အပြင် ချန်ရှန့်ပေနှင့် လုမုရွှင်တို့သည်လည်း သူမအတွက် တစ်ယောက်က အထိခိုက်ခံကာ တစ်ယောက်က အဆိပ်နှင့်ကိုယ့်ကိုကိုယ် စမ်းသပ်ခဲ့သည်။ အလားအလာရှိလှသည့် သမားတော်က နာတာရှည်ရောဂါဖြစ်တည်သွားခဲ့သည်။ တစ်ဖက်၌ မြို့တော်နှင့် ပြည်သူပြည်သားများကို ကာကွယ်ရန် တပ်တို့ကို ဦးဆောင်နေရမည့် စစ်သူကြီးသည်လည်း မစွမ်ဆောင်နိုင်ဖြစ်သွားခဲ့ရသည်။

အမျိုးသမီးဇာတ်လိုက်ရေ…နင့်မှာ ကမ္ဘာကြီးတစ်ခုလုံးရော၊ သနားကရုဏာတွေရောစုပုံနေတာ အခြားသူတွေအတွက်တော့ တွင်းမတူးဘဲ ကိုယ့်လူ‌တွေအတွက်တွင်းတူးပေးလိုက်ရသလား…။

စုဝမ်က အမျိုးသားဇာတ်လိုက်နှင့် အရံအမျိုးသားဇာတ်ကောင်တို့၏ နှလုံးသားထဲတွင် မီးလေးထွန်းပေးမည့်အကြောင်းတွေးပြီးနောက် တီးတိုးရေရွတ်လိုက်သည်။ ဤကမ္ဘာတွင် အရံအမျိုးသားဇာတ်ကောင်များမှာ လုမုရွှင်နှင့် တုန်းဖန်းယောင်တို့ဖြစ်လိမ့်မည်။ 

စု‌ရွေ့သာ ဒီကမ္ဘာကိုဝင်လာရင် ဘာဇာတ်ကောင်နေရာကို ရောက်လာလိမ့်မလဲ…။

တကယ်လို့ လုမုရွှင်ဆိုရင် အဆင်ပြေတယ် ဒါပေမယ့် အလှလေးသုံးထောင်ရှိတဲ့ မောင်းမဆောင်နဲ့ ဘုရင်ဆိုရင်တော့….ဟမ့်…။

စစ်သူကြီးစုရေ ဇနီးလေးရဲ့နှလုံးသားအောက်ခြေက မကောင်းတဲ့ခံစားချက်တွေကို ခံစားမိရဲ့လား…။

__

🚩