Chapter 43

🌌Chapter 43

စားပွဲကိုလှန်ပြီး ချက်ချင်းပင် အခြေအနေကို ပြောင်းပြန်လှန်လိုက်ရန် ဆိုသည်မှာ ဤအမျိုးသားအတွက် အံ့သြစရာမဟုတ်ပေ။ 

တစ်ခုခုမှားနေသည်ဟု ခံစားရပါက သာမာန်အမျိုးသားဇာ့ဂ်တစ်ယောက်ပင်လျှင် လုမော့ကဲ့သို့ အရေးကြီးသောအချက်ကို မရိုက်ချနိုင်ချေ။ သို့သော်ငြား...

ဤတစ်ကြိမ်တွင်မူ စုလင်းက လုမော့အပေါ် လျှော့တွက်မှုကို ဘေးဖယ်ထားကာ သူ ပြင်ဆင်ပြီးမှ လာခဲ့ခြင်းဖြစ်သည်။

လုမော့၏အပြုအမူများက သူခန့်မှန်းထားသည့်အတွင်းပင် ရှိနေသည်။

စုလင်း အေးစက်စွာ ရယ်လိုက်သည်။

ဟမ့် ကံကောင်းစွာနဲ့ပဲ ငါကကြိုပြင်ဆင်ပြီးသား...

ကျင့်ချီက အနည်းငယ်စိုးရိမ်ကြောင့်ကြလျက် စုလင်းအားကြည့်လိုက်သည်။

"စုလင်း...ပွင့်ပွင့်လင်းလင်းပြောရရင် ငါ လုမော့ရဲ့ရည်ရွယ်ချက်ကို ခန့်မှန်းလို့မရဘူး..."

သူ မည်သို့ကြည့်ပါစေ လုမော့က အလွန်အရှက်မဲ့လွန်းသည်ကိုသာ မြင်နိုင်ပေသည်။

ဆရာတစ်ယောက်က တုံးအသည့် ကျောင်းသားတစ်ယောက်ကို ကြည့်သည့်အတိုင်း စုလင်းက ကျင့်ချီကို တစ်ချက်ကြည့်လိုက်သည်။ ထိုအကြည့်က ကျင့်ချီအားအနည်းငယ်နောင်တရသွားစေသည်။ ထိုမေးခွန်းကို သူ မမေးလိုက်သင့်ပေ။

"ကောင်းပြီ...ကျွန်တော်တို့က မဟာမိတ်တွေဆိုမှတော့ ခင်ဗျားကို ရှင်းပြရမယ့် တာဝန်ရှိတယ်လို့ ထင်ပါတယ်..."

စုလင်းက သူတို့၏ဆက်ဆံရေးကို ပိုနက်ရှိုင်းသွားစေသည့် 'မဟာမိတ်'ဟူသည့် အသုံးကို တမင်သတ်သတ် အလေးပေးသုံးလိုက်လေ၏။

ကျင့်ချီ အလွန်အမင်းပင် ကျေးဇူးတင်သွားသည်။

"အရမ်းကို ကျေးဇူးတင်ပါတယ်..."

"ခင်ဗျား ကျွန်တော်တို့ရဲ့ ရည်ရွယ်ချက်ကို မှတ်မိသေးလား..."

စုလင်းမေးလိုက်သည်။

"ဒီလေလံပွဲရဲ့ အဓိကရည်ရွယ်ချက်က တရားမဝင် စျေးကွက်ထဲရောက်ပြီး ခက်ခဲတဲ့ အခြေအနေဖြစ်နေတဲ့ အမျိုးသမီးဇာ့ဂ်တစ်ယောက်ကို လုမော့ကို ရယူခွင့်ပေးလိုက်ဖို့ပဲ..."

"အဲ့ဒီအမျိုးသမီးဇာ့ဂ်က သူ့ရှေ့ပေါ်လာရင် ဟန်မပျက် လစ်လျူရှုနိုင်မယ်လို့ ခင်ဗျားထင်လား...မမေ့နဲ့ သူက ပထမဆုံး အမျိုးသမီးဇာ့ဂ်ရဲ့သခင် ဖြစ်ဖူးပြီးသွားပြီ...တခြားနည်းတွေကို ဟန်ဆောင်နိုင်ရင်တောင် အဲ့ဒါကိုတော့  သူလစ်လျူမရှုနိုင်သေးဘူး..."

"ငါအခု နားလည်သွားပြီ..."

ကျင့်ချီ ရုတ်တရက် နားလည်လိုက်သည်။

"အဲ့ဒါက တကယ့်ကို ထူးခြားပြောင်မြောက်တဲ့ တန်ပြန်အစီအစဥ်ကောင်း တစ်ခုပဲ..."

တစ်ခဏအတွင်းမှာပင် လုမော့နားလည်လိုက်သည်။ သူတို့က အဆင့်နိမ့်အမျိုးသမီးကို စီစဥ်ထားသော်လည်း လုမော့က လျှင်မြန်စွာပင် ဤအချက်ကို အကျိုးရှိရှိအသုံးချလိုက်ပေသည်။ သူ့စကားများ၏ အနောက်က အဓိပ္ပါယ်များကမူ...

ကောင်းပြီလေ..မင်းတို့က ငါ့ဘေးနားကို အမျိုးသမီးဇာ့ဂ်တစ်ယောက် ထားချင်တယ်ဆိုလည်း ရတယ်… အားလုံး လာလိုက်...ဒါပေမဲ့ ပြန်ပေးရမယ့် တန်ဖိုးကိုတော့ မင်းတို့ မခံနိုင်လောက်ဘူးနော်...

ကျင့်ချီ သက်ပြင်းချလိုက်သည်။

"ငါ တကယ် မထင်ထားခဲ့ဘူး..."

မူလက အဆင့်နိမ့်ဇာ့ဂ်အမျိုးသမီးတစ်ယောက်ကို စီစဥ်ထားခြင်းဖြင့် အကာအကွယ်တစ်ခု ရှိသွားမည်ဖြစ်သော်လည်း ဤကဲ့သို့ လွန်လွန်ကျူးကျူးခေါင်းပုံဖြတ် အမြတ်ထုတ်ခံလိုက်ရမည်ဟု မသိခဲ့ကြပေ။

"ခင်ဗျားကိုယ်ခင်ဗျား အထင်သေး လျှော့တွက်ဖို့ မလိုပါဘူး..."

စုလင်း ပေါ့ပေါ့ပါးပါးပြောလိုက်သည်။

"အဲ့ဒါက ဒီတိုင်း… အဲ့လူ အစောကြီးကတည်းက ပြင်ဆင်ထားတာလေးပဲ...ဘယ်လိုပဲဖြစ်ဖြစ် အဆုံးကျ လုမော့က ခြေတစ်လှမ်း နောက်ကျနေတုန်းပဲ..."

အဆင့်နိမ့်အမျိုးသမီးက မှန်မှန်ပင် မရပ်နိုင်တော့သည်ကို မြင်၍  စုလင်းရှေ့တိုးကာ သူ့အား ကူညီပေးလိုက်သည်။

"လူကြီးမင်းလုက အဲ့လိုတောင်းဆိုမှု လုပ်တယ်ဆိုမှတော့...မင်းက သူ့ဆန္ဒတွေကို ဆန့်ကျင်ချင်မှာ မဟုတ်လောက်ပါဘူး...ဟုတ်တယ်မလား..."

ပိုက်ဆံနှင့်ဖြေရှင်းနိုင်သည့် မည်သည့်အရာမဆို ပြဿနာတစ်ခုမဟုတ်ပေ။

ဒီနေ့တော့ မင်း ဒီအဆင့်နိမ့်အမျိုးသမီးကို လက်ကိုလက်ခံရလိမ့်မယ်...

စုလင်း၏ စကားလုံးများနှင့်အတူ အဆင့်န်ိမ့်အမျိုးသမီးက နောက်ဆုံးတွင် စိတ်ပိုင်းဖြတ်လိုက်သည်။ သူ လုမော့အားရှက်ကိုးရှက်ကန်းနှင့် ကြည့်လိုက်ပြီး ထစ်ငေါ့ထစ်ငေါ့နှင့် ပြောလိုက်သည်။

"ကျွန်...ကျွန်တော် ဆန္ဒရှိပါတယ်...ကျွန်တော့်ရဲ့ခန္ဓာကိုယ်ရော စိတ်နှလုံးသားကိုရော ဒီကလူကြီးမင်း ပိုင်ပြီးသားပါ..."

အရှင်လုမော့ : "..."

ဟမ် ဘယ်လို…

နူးညံ့လှသည့် အဆင့်နိမ့်အမျိုးသမီးက သူ၏ရှည်လျားလှသည့် မျက်တောင်မွှေးကြီးများကို လိပ်ပြာတောင်ပံများကဲ့သို့ တဖျပ်ဖျပ်ခတ်လျက် အောက်ငုံ့ချလိုက်သည်။

သူ့ဆံပင်များက ဖရိုဖရဲဖြစ်နေကာ  အဝတ်အစားများက ဝိုင်များဖြင့် စိုရွှဲနေသော်လည်း ရှိနေကြသည့် ဇာ့ဂ်များအားလုံးက ထိုအဆင့်နိမ့်အမျိုးသမီးမှာ မယုံနိုင်လောက်ဖွယ် လှပနေသည်ကို မတွေ့ဘဲမနေနိုင်သည်အထိ ဖရိုဖရဲပုံလေးပေါ်နေပေသည်။

လုမော့က လွဲ၍ပင်...

ဤအဆင့်နိမ့်အမျိုးသမီးက အလွန် ရိုးဆင်းနုံအလှသည်ဟု ခံစားလိုက်ရလျက် လုမော့ ပြတ်ပြတ်သားသားပင် လက်အား ပြန်ရုတ်သိမ်းလိုက်သည်။

ဒီလိုလှည့်ကွက် သေးသေးလေးတွေနဲ့ သူတို့က လုမော့ မျက်လုံးတွေကို လာလှည့်စားလို့ရမယ်များ ထင်နေတာလား...လုံးဝ မဖြစ်နိုင်ဘူး...ငါက တချို့တွေလို ကြင်နာနူးညံ့တဲ့ လူကြီးလူကောင်းဇာ့ဂ်မှ မဟုတ်တာ... ငါက အေးစက်တဲ့နှလုံးသားနဲ့ အကြင်နာမဲ့တယ်...ရက်စက်ကြမ်းကြုတ်ပြီး လူသားလည်းမဆန်တဲ့ဇာ့ဂ်ကွ...

"မင်းရဲ့ ဒီလှည့်ကွက်သေးသေးလေးတွေက ငါ့ကို အရူး မလုပ်နိုင်ဘူး..."

သူက အဆင့်နိမ့်အမျိုးသမီးထံသို့  အနည်းငယ် ယိမ်းလိုက်ပြီး တိုးတိုးပြောလိုက်သည်။

"မင်းရဲ့အတွေးတွေက ထွင်းဖောက်မြင်နေရတဲ့ ပုလင်းတစ်လုံးလိုပဲ ခန့်မှန်းရလွယ်လွန်းနေတယ်..."

အဆင့်နိမ့်အမျိုးသမီး၏ မျက်လုံးများက ပြူးကျယ်သွားပြီး အနည်းငယ်ဆုံးရှုံးလိုက်သည့် အရိပ်ယောင် ပေါ်လာခဲဲ့သည်။

မည်သည့်နေရာကမှားသွားကြောင်း သူ မသိချေ။ ဇာ့ဂ်ဧကရာဇ်ရောက်လာလျှင်ပင် သူ၏ စစ်မှန်ရိုးသားလှသည့် ခံစားချက်များကို ယုံကြည်သွားလိမ့်မည် ဖြစ်ပြီး အေးစက်သည့် နှလုံးသားပိုင်ရှင်ဇာ့ဂ်များပင် လှုပ်ရှားသွားလိမ့်မည်ဖြစ်သည်။

လုမော့နဲ့ကျမှ ဘယ်လိုဖြစ်သွားရတာလဲ...

လုမော့က တိတ်တိတ်နေရန် လက်ဟန်ပြလိုက်၍ အဆင့်နိမ့်အမျိုးသမီးက အတင်းအကြပ်ပင် လိုက်နာလိုက်ရကာ ပါးစပ်ပိတ်လိုက်သည်။ 

"စိတ်ခံစားချက်အကြောင်းတွေ ပြောမနေနဲ့..မင်းနားလည်မှာ မဟုတ်ဘူး...ခံစားချက်တွေအကြောင်း ပြောတာတာက ပိုက်ဆံကို ထိခိုက်စေတယ်လေ..."

လုမော့ အသက်မပါစွာ ပြောလိုက်သည်။

"အံ့သြသွားတယ်မလား...ပျားရည်ထောင်ချောက်က ငါ့အပေါ်မှာ အသုံးမဝင်ဘူး...မင်းက အဲ့ဒါကို(လေလံပွဲအတွက် ငွေကုန်ခံရမှာကို) ရှောင်နိုင်လိမ့်မယ်လို့များ ထင်နေတာလား ဟက်..."

အဆင့်နိမ့်ဇာ့ဂ်အမျိုးသမီးက ထိတ်လန့်မှုဖြင့် မျက်လုံးများ ပြူးကျယ်သွားသည်။

"ကျွန်တော်..."

လုမော့အသံက သူ့ထက် ပိုကျယ်လောင်ပေသည်။

"ငါတို့အားလုံးက ဇာ့ဂ်မျိုးနွယ်ရဲ့ ဂုဏ်သိက္ခာကိုတန်ဖိုးထားတဲ့ မျိုးနွယ်ဝင်တွေပဲလေ...ပြောပြီးသားစကားကိုတော့ ပြန်မရုတ်သိမ်းသင့်ဘူးမလား ဟုတ်တယ်ဟုတ်...စက်ဆုပ်ဖို့အကောင်းဆုံး ဇာ့ဂ်တွေပဲ အဲ့လို အောက်တန်းကျတာတာကို လုပ်ကြမှာ...မင်းမှာ အဲ့လိုပြောရဲတဲ့မျက်နှာ တကယ်ရှိလား..."

အဆင့်နိမ့်အမျိုးသမီး၏ ရင်ဘတ်က ပြင်းထန်စွာ မြင့်ချည်နိမ့်ချည် ဖြစ်လာခဲ့သည်။ သူက စုလင်း၏ အမိန့်ကိုလိုက်နာရသော်လည်း အလွန်အမင်းကြင်နာကာ လူကြီးလူကောင်းဆန်သည့် အမျိုးသားဇာ့ဂ်များကိုသာ တွေ့ကြုံဖူးလေသည်။ အနည်းဆုံး သူတို့က လူရှေ့တွင် လူကြီးလူကောင်းဆန်ကာ ကြင်နာသည့်သွင်ပြင်ကို ထိန်းသိမ်းထားပေသည်။

ထိုကဲ့သို့ ပေါ်တင်ရန်စပြီး အထင်သေးသည့် စကားများကို ကြားရသည်မှာ ပထမဆုံးအကြိမ်ပင်ဖြစ်၍ မတတ်နိုင်စွာပင် ပြောလိုက်မိသည်။

"ကျွန်တော့်ရဲ့စကားတွေကို ပြန်ရုတ်သိမ်းမှာ မဟုတ်ပါဘူး..."

"အာ...အဲဒါဆိုရင်တော့ ကောင်းတာပေါ့.. "

လုမော့ပြောလိုက်ပြီး သူ့လက်ကို လင်းထံဆန့်လိုက်သည်။

"လင်း...မင်းမှာ စာရွက်ရှိလား ကိုယ် ဒီအဆင့်နိမ့်အမျိုးသမီးနဲ့ စာချုပ်တစ်ခုကို အကြမ်းရေးထားချင်လို့..."

အဆင့်နိမ့်အမျိုးသမီးက ဒေါသတကြီးဖြင့် သူ့အား စိမ်းစိမ်းဝါးဝါး စိုက်ကြည့်လိုက်သည်။

လင်း၏ နှုတ်ခမ်းထောင့်မှ လျှပ်တစ်ပြက် အပြုံးလေးအား သူ သတိပြုမိသွားသည်။

မင်း တစ်လျှောက်လုံးပြုံးနေတာပဲ...ခုထိကို မရပ်သေးဘူး...

"လု..."

လင်း အပြုံးအားဖုံးကွယ်လျက် ခေါင်းကို လှည့်လိုက်သည်။

"သခင်လု...ဒီအပြုအမူက တကယ်ပဲ မျိုးရိုးမြင့်တွေရဲ့ ဂုဏ်သိက္ခာကို ထိခိုက်စေပါတယ်...ဒီအဆင့်နိမ့်အမျိုးသမီးက သဘောတူညီမှုကို  လေးစားဂုဏ်ယူနေမယ်လို့ ကျွန်တော် ယုံကြည်ပါတယ်..."

လုမော့ မျက်ခုံးများကြုတ်လိုက်ပြီး တစ်ခဏကြာပြီးနောက် ဝန်လေးစွာဖြင့် ပြောလိုက်သည်။

"ကောင်းပြီလေ...ငါ့မိန်းမက မင်းကို ယုံကြည်နေမှတော့ ငါလည်းမင်းကို အင်တင်တင်နဲ့ပဲ ယုံပေးလိုက်ပါ့မယ်..."

အဆင့်နိမ့်အမျိုးသမီးက နောက်ဆုံးတွင် သူ့အင်္ကျီလက်များကို ဆုတ်ဖြဲပစ်လိုက်လေ၏။ 

တွန့်ရှုံ့နေသည့် အပြုံးတစ်ခုကို ထိန်းထားလျက် အဆင့်နိမ့်အမျိုးသမီးက အံကြိတ်ကာ ပြောလိုက်သည်။

"အိုး...ကျွန်တော့်နှလုံးသားတစ်ခုလုံးနဲ့ ချစ်ရတဲ့အရှင်လုမော့ဆီက ယုံကြည်ခံရတဲ့အတွက် ဂုဏ်ယူမိပါတယ်..."

လုမော့က ခံ့ညားသိက္ခာရှိသည့် အပြုံးတစ်ခုကို ထုတ်ဖော်လိုက်သည်။

"မှန်တယ်...မင်း အလေးအနက်ထားပြီးကို ဂုဏ်ယူသင့်တယ်..."

ထိုစကားများ ပြောလိုက်သည့်အချိန်တွင် ပွဲကြည့်ပရိသတ်အားလုံး၏ မျက်နှာများ အက်ကွဲလုနီးပါးပင်။

သူတို့က အဆင့်အတန်းမြင့်သည့် လူမှုအသိုင်းအဝိုင်းတွင် ကြီးပြင်းလာကြသူများဖြစ်၍ လုမော့၏ အရှက်မဲ့လှသည့် အပြုအမူများကို အမှန်တကယ်မကြုံဖူးပေ။

အခြေခံယဥ်ကျေးမှုအပြင်ဘက်သို့ ထွက်နေလျှင်ပင် အဆင့်နိမ့်အမျိုးသမီးတစ်ယောက်က သူ့ထံ တဟုန်ထိုးပြေးလာပါက အများအမြင်တွင် သူ့မျက်နှာမပျက်သွားစေရန် ဖမ်းပေးထားသင့်ပေသည်။

သို့သော် လုမော့က လက်လေးတစ်ချောင်းပင် မမြှောက်ခဲ့ဘဲ အဆင့်နိမ့်အမျိုးသမီးအား မြေပြင်ပေါ်သို့ လဲကျသွားခွင့်ပြုပြီးနောက် ခြေတစ်လှမ်းပင် ပြန်ဆုတ်လိုက်သေးသည်။

အဲ့အပြုအမူက တကယ်ကြီး စိတ်ထဲကအတိုင်းလုပ်လိုက်တာလား...

အဲ့ဒါတင်မကဘဲ သူက အရှက်မရှိ အဆင့်နိမ့်အမျိုးသမီးရဲ့တောင်းပန်မှုကို လက်ခံလိုက်သေးတယ်...

ဤအပြုအမူများက ဇာ့ဂ်အားလုံး၏နှလုံးသားထဲကို လုမော့၏ ကြောက်စရာကောင်းသော ပုံရိပ်အား ချန်ထားခဲ့ရန် လုံလောက်နေပြီဖြစ်သည်။ သူက အောက်တန်းကျသူများထဲမှ အောက်တန်းအကျဆုံး တန်ဖိုးမရှိသည့် အမျိုးသားတစ်ယောက်ကဲ့သို့ဖြစ်သော်လည်း ယုံကြည်ချက်အပြည့်ရှိသည်။

သို့သော် မည်သူမှ လုမော့က ဇာ့ဂ်အားလုံး၏ အောက်ခြေမျဥ်းကို ကျော်လွန်သွားလိမ့်မည်ဟု မမျှော်လင့်ခဲ့ကြပေ။ 

အားလုံးသိကြသည့်အတိုင်း အမျိုးသားဇာ့ဂ်များက မြင့်မြတ်သည့် အဆင့်အတန်းတစ်ခုရှိပြီး လက်ထပ်ပြီးနောက် သူတို့၏အိမ်သူဘုရင်မနှင့် အစေခံ၏ ပိုင်ဆိုင်မှုများအားလုံးကို ဆက်ခံပိုင်ဆိုင်ခွင့်ရှိသော်လည်း မရှိမဖြစ် ရှိထားရမည့် လိုအပ်ချက်တစ်ခုမှာ လက်ထပ်ထားရမည်ဖြစ်သည်။

ယခုအခါ လုမော့က လက်မထပ်ရသေးသည့် အဆင့်န်ိမ့်အမျိုးသမီးတစ်ယောက်၏ ပိုင်ဆိုင်မှုကို မထီလေးစားစွာ တောင်းဆိုနေသည်။

စက်ဆုပ်စရာအကောင်းဆုံး အမျိုးသားဇာ့ဂ်များသာ ထိုကဲ့သို့ အပြုအမူမျိုးကို  စိတ်ဝင်တစားလုပ်ဆောင်လိမ့်မည်ဖြစ်သည်။

ထိုအခိုက်တွင် လုမော့အား ကြည့်နေသည့် ဇာ့ဂ်မျိုးနွယ်အားလုံး၏ အကြည့်များက အညစ်အကြေးပုံကြီးတစ်ပုံကို ကြည့်နေသကဲ့သို့ပင် ထင်ရပေသည်။

[ဒင်… မျက်မြင်သက်သေအားလုံးရဲ့ နှလုံးသားထဲကနေ အထင်သေး စက်ဆုပ်ရွံရှာခံရပါတယ်...အမှိုက်ဆန်မှုပွိုင့် +500]

[ ဒင်… အဆင့်နိမ့်အမျိုးသမီးတစ်ယောက်ရဲ့ နှလုံးသားထဲကနေ 10 မိနစ်ကြာအောင် ကျိန်ဆဲခြင်းခံရပါတယ်... အမှိုက်ဆန်မှုပွိုင့် +500]

[ဒင်…သင့်ရဲ့ အပြုအမူတွေက လမ်းဘေးကြွက်တစ်ကောင်ရဲ့ အဆင့်ကို အစပိုင်းရောက်ရှိပါပြီ...ထပ်ပေါင်း ဆုလာဘ်+ 300 အမှိုက်ဆန်မှုတန်ဖိုး…]

-------

လုမော့ မျက်လုံးများမှိတ်ကာ စနစ်၏ အကြောင်းကြားသည့် အသံများထဲတွင် သူ့ကိုယ်သူ နစ်မျောသွားပေသည်။ 

ရှေးလူကြီးများ ပြောကြသည်မှာ အမှန်ပင်ဖြစ်သည်။

လူသုံးယောက် လမ်းလျှောက်သည့်အခါ လူတစ်ယောက်ထံမှ သင်ယူနိုင်သည်ပင်။ 

ဤနေရာတွင် သူ စုန့်ကျန်းရှူးအား တွေးမိသွားသည်ပင်။

အမျိုးသမီးများအားလုံး၏ လေးစားခြင်းခံရသည့်တရားမျှတမှု၏ သံတမာန်ဖြစ်သည့် စုန့်ကျန်းရှူးပင်လျှင် လင်းကို လက်ထပ်ခြင်းမရှိဘဲဘဲ လင်း၏ပိုက်ဆံများကို သုံးနေသည့် ဗီဒီယိုထုတ်ဖော်ခံလိုက်ရသည့်အခါ ဇာတ်လိုက်ရောင်ဝါ၏ အရေးပါသည့် တစ်စိတ်တစ်ပိုင်းက အစိတ်စိတ်အမြွှာမြွှာ ကွဲကြေသွားခဲ့သည်။

ထိုကဲ့သို့ လုပ်ခဲ့သည့်သူက သူတစ်ယောက်တည်းဖြစ်ခဲ့မည်ဆိုလျှင်...

အလွန်ထူးခြားသည့် သက်ရောက်မှုတစ်ခု ချက်ချင်းဖြစ်သွားလိမ့်မည်ပင်။

ဘယ်လက်တွင် ပိုက်ဆံ၊ ညာလက်တွင် အမှိုက်ဆန်မှုတန်ဖိုးနှင့် ဥာဏ်ကောင်းလှသည့်လုမော့၊ ကြီးမြတ်လှသည့် လုမော့...

---------------

ငါ အဲ့ဒါတွေ အကုန်လိုချင်တယ်...

လုမော့နှင့်ယှဥ်ပါက အခြားဇာ့ဂ်များက သူတို့မှာ အမှန်တကယ် စံနမူနာယူထိုက်သည့် ဇာ့ဂ်များဟု ခံစားလိုက်ရပေသည်။

ထိုအခိုက်တွင် မြင့်မြတ်သည့် စိတ်ဓါတ်အားမာန်များက ဇာ့ဂ်မျိုးနွယ်အားလုံးကို ဝန်းရံသွားပေသည်။ သဘာဝအားဖြင့် အေးစက်သည့် နှလုံးသားပိုင်ရှင်ဇာ့ဂ်များပင် ဤကဲ့သို့ အခိုက်အတန့်များ ရှိလာကြလိမ့်မည်။ သူတို့၏ မျက်စိရှေ့တွင် မတရားမှုကို တွေ့ရသည့်အခါ သူတို့ကိုယ်သူတို့ သာမာန်ဟုသာ သတ်မှတ်ထားကြသည့် ဇာ့ဂ်တိုင်းက အလဟဿ ထိုင်မနေနိုင်တော့ချေ။

ထို့အပြင် ၎င်းကပင် စနစ်၏ရည်ရွယ်ချက်အတိအကျပင်ဖြစ်သည်။ 

စနစ်က စိတ်လှုပ်ရှားစွာဖြင့် အံ့သြတကြီးပြောလိုက်သည်။

[အဲ့ဒါကိုတွေ့လား လုမော့...မင်းရဲ့အပြုအမူတိုင်းက အဓိပ္ပါယ်ရှိတယ်...မင်းက ဒီဇာ့ဂ်မျိုးနွယ်တွေရဲ့ စိတ်ဓါတ်ခွန်အားတွေကို မြှင့်တင်ပေးလိုက်တာပဲ...]

လုမော့၏ မျက်လုံးများက စိတ်ရှုပ်ထွေးသွားသည်။

[ငါတကယ် အဲ့လိုလုပ်ခဲ့တာလား...]

ရင်ထဲထိစရာပဲ...

"လုမော့ လူကြီးမင်း..."

ရွှေရောင်ဆံပင်နှင့် အမျိုးသားတစ်ယောက်က မတ်တတ်ရပ်လိုက်သည်။

" ဒီလိုလုပ်တာ  A  အဆင့် အမျိုးသားဇာ့ဂ်တစ်ယောက်ရဲ့ဂုဏ်သိက္ခာကို အရှက်ရစေတယ်လို့ ခင်ဗျားမထင်ဘူးလား..."

လုမော့က တည်ငြိမ်လျှက်ပင် ပြန်ပြောလိုက်သည်။

"မင်းနဲ့ မဆိုင်ဘူးလားလို့..."

"ဘယ်လိုလုပ် ကျွန်တော်နဲ့မဆိုင်ရမှာလဲ..."

"ရွှေရောင်ဆံပင်နှင့်အမျိုးသားက ရယ်မောလိုက်သည်။

"ဒီကိစ္စသာ အပြင်ပေါက်ကြားသွားရင် ဇာ့ဂ်မျိုးနွယ်တွေက ကျွန်တော်တို့ A အဆင့်အမျိုးသားဇာ့ဂ့်တွေကို ဘယ်လိုထင်ကြမလဲ...အရှက်မရှိတဲ့ သတ္တဝါအုပ်စုလို့လား..."

လုမော့ သူ့အား အထင်တသေး ကြည့်လိုက်သည်။

"မင်း စကားပြောတာ ရင့်သီးတာပဲ..."

ရွှေရောင်ဆံပင်နှင့် အမျိုးသားမျက်နှာက ရှုံ့မဲ့သွားသည်။

"အဲ့ဒါက အဓိကအချက်လား..."

"အဲ့ဒါကတကယ်ကို စိတ်အနှောင့်အယှက်ဖြစ်စရာပဲလေ..."

လုမော့ သက်ပြင်းချလိုက်သည်။ သူ၏ လွှမ်းမိုးနိုင်သည့် အရပ်အမောင်းနှင့် မေးကိုမော့ကာ လူများအား ငုံ့ကြည့်လိုလိုက်သည့်အခါတွင် စိတ်သဘောထားအကြီးဆုံး ဇာ့ဂ်မျိုးစိတ်များပင် သူ၏အထက်စီးဆန်မောက်မာမှုကြောင့် ဒေါသထွက်သွားကြလိမ့်မည် ဖြစ်သည်။

သူ ပတ်ဝန်းကျင်အား လေ့လာဆန်းစစ်လိုက်ပြီး တီးတိုးပြောလိုက်သည်။

"မင်းတို့အားလုံး အဲ့လောက် ဒေါသထွက်နေကြမှတော့ ဘာလို့ အကုန်လုံးကို လေလံမဆွဲလိုက်ကြတာလဲ... အဲ့နည်းလမ်းနဲ့ဆို လက်မထပ်ရသေးတဲ့အမျိုးသမီးလေးလည်း မွဲပြာကျမသွားတော့ဘူးဘူးပေါ့ မှန်တယ်မလား..."

"ဒါပေမဲ့...ငါမင်းကိုလည်း လွယ်လွယ်လေး လွှတ်မပေးလိုက်ချင်သေးဘူး...လေလံပွဲမှာ စျေးအများဆုံးပေးနိုင်တဲ့သူက အမြဲတမ်း အနိုင်ရတဲ့သူပဲ..."

လုမော့က နတ်ဆိုးဆန်ဆန်အပြုံးတစ်ခုကို လှစ်ဟလိုက်သည်။

"မင်းအဲဒါကို တတ်နိုင်ပါ့မလားလို့တော့ ငါအံ့သြမိသားပဲ..."

"မင်း အဲ့လိုပြောဖို့လိုအပ်လို့လား..."

ရွှေရောင်ဆံပင်နှင့် အမျိုးသားဇာ့ဂ်က ယုံကြည်ချက်အပြည့်ဖြင့် ပြောလိုက်သည်။

"မင်းလိုမျိုး တောကတက်လာတဲ့ကောင်က အင်ပါယာကြယ်က ငါတို့ မျိုးရိုးမြင့်စစ်စစ်တွေ ဘယ်လောက်တောင် ချမ်းသာလဲဆိုတာ မသိနိုင်ပါဘူး..."

"ဒီနေ့ ငါမင်းကို မျိုးရိုးမြင့်တွေရဲ့ ရည်မွန်ကြော့ရှင်းမှုကို သင်ပြပေးမယ်..."

စုလင်း ထိတ်လန့်ကာ ကြောက်လန့်တကြား ဖြစ်သွားသည်။ 

မိနစ်အနည်းငယ်အတွင်းမှာပင် အခြေအနေက ထူးဆန်းသည့် အလှည့်အပြောင်းတစ်ခုဖြစ်သွားပြီး မမျှော်လင့်သည့် ဦးတည်ဘက်သို့ ရောက်သွားခဲ့သည်။

ဒီအမျိုးသားဇာ့ဂ်က...

ကျင့်ချီ ကြက်သေသေသွားသည်။

"စုလင်း...ငါ...ငါ ထပ်ပြီးနားမလည်တော့ပြန်ဘူး..."

"အဲ့ဒါ ခင်ဗျားအမှားမဟုတ်ဘူး...သူ့ရဲ့နည်းဗျူဟာတွေက အရမ်းကို နက်နဲသိမ်မွေ့လွန်းတယ်..."

စုလင်း လက်သီးကို ကျစ်ကျစ်ပါအောင် ဆုပ်လိုက်သည်။

"ခင်ဗျားမမြင်ဘူးလား... သူစကားစပြောတဲ့အချိန်ကတည်းက အခြေအနေတစ်ခုလုံးကို ထိန်းချုပ်ထားခဲ့တာ..."

"ပထမဆုံး အမျိုးသမီးရဲ့ဝန်ခံမှုကို သူကျွမ်းကျွမ်းကျင်ကျင် ထိန်းသိမ်းလိုက်ပြီး လေလံပွဲရဲ့ကုန်ကျစရိတ်တွေဘက်ကို လမ်းကြောင်းပေးလိုက်ပြီး တစ်ပြိုင်နက်တည်း လူတိုင်းရဲ့ဒေါသကို ဆွပေးလိုက်တယ်...ဘာဖြစ်သွားလဲ မှန်းကြည့်လိုက်...ဒေါသထွထွက်နေတဲ့ အမျိုးသားဇာ့ဂ်တွေအကုန်လုံးက သူ့ကို ဒီညဘယ်ဟာကိုမဆို လေလံပြိုင်ခွင့် ပေးလိုက်တယ်လေ..."

ကျင့်ချီ ရုတ်တရက် နားလည်သွားပြီးပြီ ထပ်မံတွေးတောလိုက်သည်။

သူ စိတ်အားထက်သန်စွာ ပြောလိုက်သည်။

"ပြီးတော့ သူက အဲ့အမျိုးသမီးအတွက် သဘောထားကြီးပြီး အကျင့်ကောင်းတဲ့ အမျိုးသားဇာ့ဂ်တစ်ယောက်ကိုတောင် တွေ့လိုက်သေးတယ်...လေလံပွဲကို နိုင်တဲ့ဘယ်သူမဆို စိတ်ပျက်သွားကြမှာမဟုတ်ဘူး..."

စုလင်း လေးလံစွာခေါင်းညိတ်လိုက်ပြီး လုမော့အားကြည့်လိုက်သည်။

လုမော့ ဘေးပတ်ပတ်လည်ကို လှည့်လျက် လင်းကို ကြည့်ကာ နှုတ်ခမ်းလှုပ်၍ တစ်စုံတစ်ရာကို တီးတိုးပြောလိုက်သည်ကို စုလင်း သတိထားမိလိုက်သည်။

လုပ်ကြံသတ်ဖြတ်သူ အိမ်တော်ထိန်းတစ်ယောက် အနေနှင့် စုလင်းက သဘာဝကျစွာပင် နှုတ်ခမ်းဖတ်ပုံကို နားလည်ပေသည်။ လုမော့ ပြောသည်မှာ...

"ချစ်ဇနီးလေး...မင်းရဲ့သခင်ယောကျ်ားက အဲ့လိုစက်ဆုပ်စရာကောင်းတဲ့ အမျိုးသားဇာ့ဂ်တစ်ယောက်ပဲ..."

လင်းက ပြောလိုက်သည်။

"စုန့်ကျန်းရှူးနဲ့ လုံးဝကွာတယ် ဟုတ်တယ်မလား..."

လုမော့ ချောင်းဆိုးလိုက်သည်။

"အာ ဒါပေါ့...အမှန်ပဲ..."

စိတ်ခံစားချက်တွေကို အဲ့လို တိတိကျကျ ကွက်တိ ထိန်းချုပ်နိုင်တဲ့ ဇာ့ဂ်တစ်ယောက် ကမ္ဘာပေါ်မှာ တကယ်ကြီး ရှိတာလား...

လုမော့က အမှန်တကယ်ကို ကြောက်လန့်စရာကောင်းလှပေသည်။

"အရင်တုန်းက ငါအရမ်း ပြင်ဆင်ထားလွန်းတယ်လို့ ငါထင်ခဲ့တာ..."

စုလင်း ဖြည်းညင်းစွာ ပြောလိုက်သည်။

"ဒါပေမဲ့ ငါ အခု အပိုအစီအစဥ်တစ်ခု ပြင်ဆင်ထားမိလို့ ဝမ်းသာသွားပြီ..."

"လုမော့ အဲ့အမျိုးသမီးကို သေချာပေါက် လက်ခံအောင် ငါ လုပ်မှာ..."

🌌🌌🌌