MM Story Teller

Chapter 70

Viewers 6k

🥘Chapter 70

ပိုင်ရှန်းကျစ်ထံမှ သဘောတူသည့် အကြည့်ဖလှယ်ပြီးချိန်တွင် ကလေးနှစ်ယောက်သား လက်ဆွဲကာ ကစားရန် ဖုန့်ပေအာနောက်သို့ လိုက်သွားတော့သည်။

ကလေးသုံးယောက် ထွက်ခွာသွားသည်ကိုကြည့်ကာ သက်ပြင်းချလိုက်သည်။

"စိတ်မပူပါနဲ့...သူတို့ပေအာနဲ့ပါ...ဖုန့်ကလန်ထဲက ဘယ်သူမှ ပေအာကို မထိခိုက်ရဲဘူး..."

ပိုင်ရှန်းကျစ် အသိအမှတ်ပြုဟန် ခေါင်းငြိမ့်သည်။

ဖုန့်ယဲ့ ဆက်ပြောသည်။

"မင်းကို စာကြည့်ခန်းထဲခေါ်သွားပြီး ဖုန့်ကလန်ဝင်းထဲ လိုက်ပြမယ်..."

ပိုင်ရှန်းကျစ် ပြန်ပြောလိုက်သည်။

"ကောင်းပါပြီ..."

...

ဖုန့်လင်သည် ဖုန့်ကလန်မိသားစုခွဲမှ မိသားစုဝင်ဖြစ်သည်။ သူတို့အခွဲအတွက် မျိုးနွယ်စုခေါင်းဆောင်ကိုမြင်ရသည်က ရှားပါးသော အခွင့်အရေးဖြစ်သည်။ အဓိကအားဖြင့်သူတို့နေထိုင်ရာ နေရာများမှာ ဝေးကွာလှ၍ ဖြစ်၏။ ခေါင်းဆောင်မှာလည်း လျောက်ပတ်နေလေ့မရှိသလို သူတို့မှာလည်း အဓိကအိမ်တော်တွင်း လွယ်ကူစွာ မဝင်နိုင်ပေ။ ထို့ကြောင့် သူတို့မိသားစုခွဲမှ လူများအနေဖြင့် ကလန်ခေါင်းဆောင်ကို သီးခြားတွေ့ခွင့်ရသည်မှာ ခက်ခဲသော စွမ်းဆောင်မှုပင်။ နှစ်စဥ် မျိုးနွယ်စု စုဝေးချိန်နှင့် ယခုကဲ့သို့ဂုဏ်ပြု အခမ်းအနားများ၌သာ တွေ့ရန် အခွင့်အရေးရှိသည်။

သို့သော် လက်ရှိ ခေါင်းဆောင်မှာ အရင်တစ်ယောက်ထက် ပို၍စွမ်းအားကြီးသည်။ နတ်ဘုရားမျိုးနွယ်ချင်း တူသည့်တိုင် သူ၏ပြင်းထန်သော တည်ရှိမှုအောက်တွင် ချစ်ကြောက်ရိုသေမှုကို ခံစားရ၏။ ထို့ကြောင့် ဖုန့်လင်အတွက် ခေါင်းဆောင်ကို တွေ့ခွင့် ရ မရသည် ရှုပ်ထွေးသော ကိစ္စဖြစ်သည်။ သူအနေနှင့် မျှော်လင့်ချက်တစ်ဝက် ကြောင့်ကြမှုတစ်ဝက် ရောနေသည်။သို့သော် မျှော်လင့်သကဲ့သို့ အကြီးအကျယ်အောင်မြင်သွားသည်။ သူ အရင်အကြိမ်များတွင် ကလန်ခေါင်းဆောင်ကို သီးသန့်မတွေ့ဖူးပေ။

ယခင်နှစ်များတွင် ဖုန့်မျိုးနွယ်မှ လူငယ်အများစုမှာ ဖုန့်လင်ကဲ့သို့ ရည်မှန်းချက် ရှိခဲ့ကြသည်။မျိုးနွယ်စုဝေးပွဲတွင် ငယ်ရွယ်သော မိသားစုဝင်များမှာ ခေါင်းဆောင်ကို တွေ့ကာ စကားအနည်းငယ်ပြောရန် ရည်ရွယ်၍ အဓိကအိမ်တော်တွင် လှည့်ပတ်နေကြသည်။ သို့သော်လည်း ဤသည်မှာ ဆန္ဒရှိသော အတွေးမျှသာဖြစ်ကြောင်း သူတို့သဘောပေါက်သွားကြသည်။ တစ်နှစ်ပြီးတစ်နှစ် မျိုးနွယ်စုဝေးပွဲတွင် သူတို့ကြိုးစားခဲ့သော်လည်း မည်သူမှ ခေါင်းဆောင်နှင့် တွေ့ခွင့်မရပေ။ နောက်ဆုံးတွင် ခေါင်းဆောင်မှာ သူတို့ရည်ရွယ်ချက်ကိုသိကာ ထိုနေ့ခြံဝင်းထဲတွင်ရှိခြင်းကို ရည်ရွယ်ချက်ရှိရှိ ရှောင်လေ့ရှိသည်ကို သူတို့နားလည်သွားခဲ့သည်။

လက်ရှိခေါင်းဆောင်၏ ထည်ဝါလှသော ရောင်ဝါနှင့်ပေါင်းစပ်ကာ ဖုန့်မိသားစုမှလူငယ်များမှာ မဖြစ်နိုင်ပုံရသည့် ဤစိတ်ကူးကို အလျော့ပေးသွားကြသည်။ ဖုန့်လင်ကဲ့သို့သော ဇွဲကောင်းသည့်အချို့လူမျိုးများသာ ဆက်၍ကျန်ရစ်ခဲ့လေသည်။

အမှန်မှာ ယနေ့လည်း ဖုန့်လင် မျှော်လင့်ချက်မထားပါချေ။ မျိုးနွယ်စုဝေးပွဲတွင် အချိန်ဖြုန်းရန် ခြံဝင်းထဲ လှည့်ပတ်သွားနေသည်က အကျင့်ဖြစ်နေလေသည်။

ဖုန့်မိသားစု၏ အနောက်ဘက်ခြံသည် တရုတ်ရိုးရာနန်းတော်ပုံစံနှင့် အနောက်တိုင်းဥယျာဥ်ပုံစံ ရောစပ်ထားခြင်းဖြစ်သည်။ တောင်၊ ရေ၊ပန်းနှင့်ငှက်များ စီမံထားပုံမှာ လိုက်ဖက်ညီလှသည်။ သပ်ရပ်စွာ စီစဥ်ထားသော သစ်ပင်များနှင့်အနောက်တိုင်းစတိုင်ပန်းခင်းမှာ လက်ရာတစ်ခုလုံးကို ပြည့်စုံစေသည်။ ထိုအတွင်းသို့ လမ်းလျောက်ရုံနှင့်ပင် အလွန်ပျော်ရွှင်ဖွယ် အတွေ့အကြုံကို ခံစားရစေသည်။

ဖုန့်လင်ခြံဝင်းထဲသို့ လျောက်သွားပြီးနောက် သူ့ကိုယ်၌ လွှမ်းခြုံနေသော ငြိမ်သက်မှုကို ခံစားရသည်။ ထိုအချိန် သူ့မျက်ဝန်းထောင့်စွန်းတွင် အရိပ်နှစ်ခုကို သတိပြုမိလိုက်သည်။ တုံ့ပြန်မှုအရ သူကြည့်ကာ ရုတ်တရက် ကြက်သေသေသွား၏။

ဒါက သူ့တစ်ဘဝတစ်လျှောက်လုံး ကြိုးစားခဲ့သည့်ဖြစ်ရပ်..သူနဲ့အခြားသူတွေ နားလည်ရခက်စေသော ဖြစ်ရပ်တစ်ခုက အခုအောင်မြင်သွားတာလား...

အဝေးတစ်နေရာမှ ပုံရိပ်နှစ်ခု ချဥ်းကပ်လာလေသည်။ တစ်ယောက်မှာ ငွေရောင်ဆံနွယ်ဖြာကျနေကာ စွမ်းအားကြီးကာ ဖမ်းယူနိုင်သည့် ရောင်ဝါရှိသည်။ ဖုန့်လင် အသက်အောင့်ထားမိသည်။

ဒါ တကယ်ကြီး မျိုးနွယ်စုခေါင်းဆောင်လား...နောက်ဆုံးမှာ ခေါင်းဆောင်ကို လူကိုယ်တိုင် တွေ့လိုက်ရတာလား...

သူ့အပျော်ကို မမှတ်လိုက်ရသေးခင်တွင် ငွေရောင်မျက်လုံးတစ်စုံမှ သူ့တည်နေရာကို သုံးသပ်လာလေသည်။ သူ့ နှလုံးသားက စည်းချက်နှင့် ခုန်နေ၏။ သူ့ နဖူးမှ ချွေးသီးချွေးပေါက်များ ကျနေပြီး သူ တစ်ချိန်လုံး တောင့်တင်းနေလေသည်။

လူရိပ်နှစ်ရိပ် အဝေးကိုရွေ့သွားသည့်အခါမှ ဖုန့်လင်အသက်ပြင်းပြင်း ရှုထုတ်ပြီး သူ့ကိုယ်သူ ပြန်ထိန်းလိုက်နိုင်သည်။ မျိုးနွယ်ခေါင်းဆောင်၏ ပြင်းထန်လွန်းသော တည်ရှိမှုကြောင့် တုန်ယင်နေသေးသော သူ၏ရင်ဘတ်ကို ကိုင်လိုက်သည်။ ထိုသူမှာ အကြည့်တစ်ချက်နှင့်ပင်လူကို မရွေ့လျားစေသော ရှိန်လောက်စရာ မျိုးနွယ်စုခေါင်းဆောင်ပင်။

သူ့ကိုသူတည်ငြိမ်နေရန် အချိန်ယူပြီးနောက် သူ့ကိုစိတ်သက်ရာရသွားစေကာ လေအေးတစ်ချက် ဖြတ်တိုက်သွားသည်။ သူအခုလေးတင်တွေ့ကြုံခဲ့ရသည့်အဖြစ်အပျက်ကိုပြန်တွေးလိုက်သည်။ ခေါင်းဆောင်က သူ့ကိုစောင့်ကြည့်ပြီးနောက်တွင် သူပြုံးလိုက်ပုံရသည်။ ပြုံးလိုက်တာလား...

ဖုန့်လင် သူ့မှတ်ညဏ်ကို ပြန်သံသယရှိလာသည်။ သူသတိရသလောက် သူတို့၏မျိုးနွယ်ခေါင်းဆောင်မှာ မပြုံးဖူးချေ။ သခင်လေးနှစ်ယောက်ဖြစ်သော ဖုန့်ပေါင်အာနှင့်ဖုန့်ပေအာမွေးချိန်မှာပင် ခေါင်းဆောင်က အမူအရာမပြပေ။ သူအနေနှင့် မျိုးနွယ်ခေါင်းဆောင်က မပြုံးတတ်ဟု ယုံကြည်ထားသည်။ သို့သော်လည်း ယခုလေးတင် ခေါင်းဆောင်က ပြုံးသွားခဲ့သည်။

သူထွက်သွားပြီး မကြာမီ သူရပ်နေခဲ့သောနေရာရှိ ခြုံပုတ်ထူများထဲမှ ၁၅၊ ၁၆ အရွယ်ခန့် ဖိုသီဖတ်သီလူငယ်တစ်ဦး တွားသွားထွက်လာလေသည်။ သူ့နဖူးထက်မှ ချွေးသုတ်ကာ သူ့လက်ထဲရှိ ဆက်သွယ်ရေးကိရိယာကို စိတ်လှုပ်ရှားစွာ ကြည့်လိုက်၏။ မူလက သူပိုးဟပ်ဖမ်းရန် လာခဲ့သော်လည်း ယခုမူ ယုန်ထောင်ကြောင်မိဆိုသလိုပင်။ ထို့ပြင် မျိုးနွယ်ခေါင်းဆောင်နှင့် အတော်လေး နီးစပ်သည့်လူငယ်တစ်ဦးကိုလည်း တွေ့လိုက်ရသေးသည်။

မျိုးနွယ်စုခေါင်းဆောင်နှင့် ချစ်ကျွမ်းဝင်နေနိုင်သည့် အခြားကလန်မှ လူတစ်ဦးစီကိုတွေးကာဆယ်ကျော်သက်လေး၏ မျက်နှာထက်တွင် ဘဝင်ခိုက်သည့် အပြုံးပေါ်လာ၏။ သူအလိုရှိရာအရာကို ဤဗီဒီယိုဖြင့် ရရှိနိုင်ပေလိမ့်မည်။

---

သူမှတ်မိသည်သာမမှားလျှင် ခေါင်းဆောင်ကသူ့ဘေးမှ သူကိုပြုံးပြလိုက်သည်လားး

အဲ့လူဘယ်သူလဲ...ဖုန့်လင် သိချင်မှုကြောင့် လောင်မြိုက်နေသည်။ မျိုးနွယ်စုခေါင်းဆောင်၏ ခြိမ်းခြောက်တတ်သော သွင်ပြင်အောက်တွင် သူ့ဘေးကသူကို သူလုံးဝအပေါ်စီးမှကြည့်နေပြီး.... သူရေးတေးတေးမှတ်မိသမျှက ထိုသူမှာ ယောက်ျားလေးပင်။

ခေါင်းဆောင်က ကောင်လေးတစ်ယောက်ကို ပြုံးပြလိုက်တာလား...မယုံကြည်နိုင်သည့် ညို့ယူသောခံစားချက်က ဖုန့်လင်ထံတွင် ထွက်ပေါ်လာသည်။

အတွေးထဲတွင်ပိတ်မိကာ သူခြံဝင်းမှထွက်သွားလိုက်လေသည်။

*****

သုံးထောင်လောကတွင် ဂုဏ်သရေအရှိဆုံးသော နတ်ဘုရားမျိုးနွယ်သည် လူဦးရေအနည်းဆုံးဖြစ်သည်။ သူတို့၏အဆင့်အတန်းမြင့်မှုနှင့် ကြောက်စရာကောင်းမှုသည် အခြားသောမျိူးနွယ်များနှင့် သူငယ်ချင်းဖြစ်မှုကို အထင်အမြင်သေးစေသည်။ ဤအခြေအနေသည် နတ်ဘုရားမျိူးနွယ်ကြား ဆက်ဆံရေးကွန်ရက်ကို ဖြစ်ပေါ်စေသည်။ ကျိမိသားစုနှင့်သိသူက ဖုန့်မိသားစုနှင့်အသိဖြစ်ကာ ဖုန့်မိသားစုနှင့်သိသူက မင်မိသားစုနှင့်အဆက်အသွယ် ရှိနေသည်။ တိုတိုပြောရလျှင် ကျွန်ုပ်သာတစ်စုံတစ်ယောက်ကို သိလျှင် သင်ကလည်း သိမည်။ သင်တစ်စုံတစ်ယောက်ကို သိလျှင်လည်း ထိုသူကို ကျွန်ုပ်လည်းသိနေပေမည်။ အလွန်ကျယ်ဝန်းသော ခြံဝန်းကဲ့သို့ပင် ပါးစပ်မှသတင်းများပျံ့လျှင်ပင် တစ်ဦးနှင့်တစ်ဦး အပြန်အလှန် ဆက်နွယ်နေပေမည်။

တစ်နေ့တွင် ကြီမားလှသည့် နတ်ဘုရားမျိုးနွယ်အတွင်း တစ်စုံတစ်ဦးမှ ဗီဒီယိုတစ်ခုကို တင်လိုက်လေသည်။ ဖော်ပြထားသည့် ဘာသာစကားလည်း မပါဝင်ဘဲ တည်ငြိမ်သောမျက်နှာပြင်တွင် ဖမ်းယူထားသော တိကျသေချာသည့် မြင်ကွင်းပင်မပါချေ။...သစ်ပင်ကြီးများနှင့် အပင်ငယ်များသာ ပါရှိသည်။..

ဆက်သွယ်ရေးကိရိယာကို သုံးနေသည့် မုန့်ယန်တစ်ယောက် သူ ဗီဒီယိုကိုမြင်သည်နှင့် အတွင်းစိတ်မှ မျက်လုံးလှိမ့်လိုက်သည်။ ဤအုပ်စုတွင်ပါဝင်သော လူငယ်များသည် နတ်ဘုရားမျိုးနွယ်စု၏ ကလန်ကြီးများမှဖြစ်ကာ ကျိမိသားစုမှထူးခြားသော အကြိုက်ရှိသူတစ်ဦးလည်း ပါဝင်သည်...ဗီဒီယိုနှင့်စာများကို မျှဝေရာ၌ အသက်ကြီးမျိုးဆက်ပုံစံဖြင့် မျှဝေသူတစ်ဦးပင်။ ပထမဆုံးအကြိမ် မုန့်ယန်မြင်စဥ်က အသက်ကြီးသူတစ်ဦး ပါဝင်လာသည်ဟုသာ တွေးမိခဲ့သည်။ နောက်ပိုင်းတွင် ထိုသူသည် ကျိမိသားစုမှ အဖွဲ့ဝင်ငယ်တစ်ဦးဖြစ်ကာ သူ့ထက်ပင်ငယ်သည်ကို သိခဲ့သည်။

ဘယ်လိုကြောင့် သူ့အကြိုက်မှာ အဆင်မပြေဖြစ်နေရသနည်း...

ယခု အစိမ်းရောင်မျက်နှာပြင်နှင့် ဗီဒီယိုကိုကြည့်ကာ မုန့်ယန်၏ ပထမဆုံးတုံ့ပြန်ချက်ကား ရှခင်းမြင်ကွင်းနှင့် အပေါစားသီချင်းကိုပေါင်းစပ်ကာ ငြီးငွေ့ဖွယ် စိတ်ဓာတ်လှုံ့ဆော်ရေးတို့ကို တင်ဆက်သည့် ကျိမိသားစုဝင်၏ လက်ချက်ဟုသာ ထင်လိုက်သည်။ ဤပုံမှန်ဖြစ်စဥ်ကြီးမှာ သူ၏လုပ်ရိုးလုပ်စဥ်ဖြစ်ကာ ထိုအရာမျိုးပေါ်တွင် ဤသူ၏ယုံကြည်မှုကို နားမလည်နိုင်တော့ပေ။

ဖန်သားပြင်ကို တစ်ချက်ကြည့်ကာ သူထွက်သွားတော့မည်ဖြစ်သော်လည်း သူ့လက်တို့ အေးခဲသွားရသည်။ ဤအရာမှာ ကျိမိသားစုမှ ဗီဒီယိုမဟုတ်ပေ။ ဖုန့်မိသားစုမှဖြစ်ကာ အထူးသဖြင့် ခေတ်ဆန်သည့် ဖုန့်လီဆီကပင်..

ဖုန့်လီ ဘာလို့ဒီလိုအကြောင်းအရာကိုတင်တာလဲ...သူ့အကောင့်ဟက်ခံလိုက်ရတာလား....အံ့သြမှုများက ယန်မင်ကို အဖွဲ့တွင်း ဆက်နေစေကာ သူ ဗီဒီယိုကိုထိလိုက်သည်နှင့် သိလိုစိတ် ပိုများလာတော့သည်။

ဗီဒီယိုသည် အလွန်မကြာဘဲ တစ်မိနစ်ခွဲခန့်သာရှိသည်။ ပထမစက္ကန့်အများစုတွင် အစီအစဉ်မကျသော အပင်များပါဝင်နေသည်။ မင်ယန် ဖြစ်စဉ်ကို လူနှစ်ယောက် ဖန်သားပြင်တွင်ပေါ်လာသော စက္ကန့်သုံးဆယ်သို့ ဆွဲလိုက်သည်။ မျက်နှာများကို ရှင်းလင်းစွာ မြင်ပြီးနောက် မင်ယန်ထိတ်လန့်မှု့ဖြင့် မျက်လုံးပြူးသွားလေသည်။

.ဘာလား...ဖုန့်လီတကယ်ကြီး ဒီလောက်ထိ ရဲတင်းနေတာလား...ဖုန့်မိသားစုခေါင်းဆောင်ရဲ့ ဗီဒီယိုကိုတောင် မျှလိုက်သေးတယ်...သူ့အသက်ကို မစိုးရိမ်ဘူးလား...

အင်အားကြီး နတ်ဘုရားမျိုးနွယ်စုကြားတွင် အမြင့်ဆုံးသောအဆင့်ကို မျိုးနွယ်စုခေါင်းဆောင်များ ပိုင်ဆိုင်သည်။ မျိုးနွယ်ခေါင်းဆောင်များသည် အဓိကမိသားစုမှ မွေးလာသောကလေးများဖြစ်၍ အသက်ဆယ်သုံးတွင် ကိုယ်စားလှယ်များအားလုံး ပညာရေးအမျိုးမျိုးကို သင်ယူရသည်။ ဤဖြစ်စဉ်အတွင်း အထူးချွန်ဆုံးသောသူသည်သာ မျိုးနွယ်စုခေါင်းဆောင် ဖြစ်နိုင်မည်ဖြစ်သည်။

ဤအချိန်အတောအတွင်း မိသားစုကြီးများမှ ကလေးများသည် အချိန်တစ်ခုကြာသည်ထိ ပူးပေါင်းလေ့ကျင့်မှု၊ရှင်သန်မှု၊တို့ကို အတူတကွ လေ့လာခဲ့ကြသည်။ ဤအချိန်အတောအတွင်းသူတို့၏လူမှုဆက်ဆံရေးနှင့် အဆက်အသွယ်များကို ခိုင်မာစေသည်။

ဤငယ်ရွယ်သောမျိုးဆက်မှ ကလေးငယ်အားလုံး အတူတကွ လေ့ကျင့်ရေးဆင်းခဲ့ရသည်။

ဤအုပ်စုကို ထိုအချိန်က တည်ထောင်ခဲ့သည်ဖြစ်ရာ ဖုန့်မိသားစု ခေါင်းဆောင်ဖုန့်ယဲ့သည်လည်း အုပ်စုတူကျောင်းသားများထဲမှ ဖြစ်သည်။

ဤဆက်ဆံရေးကြောင့် ဤအုပ်စုရှိတစ်ဦးချင်းစီသည် ဖုန့်ယဲ့၏ခြိမ်းခြောက်နေသော ဂုဏ်သတင်းကို စိုးရိမ်နေကြသည်။ သူသည် အညှာအတာကင်းမဲ့သော နတ်ဆိုးဘုရင်ပင်။

သူတို့ ဆယ်ကျော်သက်အရွယ်တွင် ပျော်ပါးတတ်သော သဘာဝရှိခဲ့သည်။ အထူးသဖြင့် ယောက်ျားလေးများကြားတွင် အမျိုးမျိုးသော လှုပ်ရှားမှုတို့ ပါဝင်ကြသည်။ သို့သော်လည်း ဖုန့်ယဲ့မှာ ခြွင်းချက်ဖြစ်သည်။ သူတို့တစ်တွေ လက်လွှတ်စပယ် နေကြချိန်တွင် သူက သိုင်းကျင့်၊ စာလေ့လာကာ အမှားအယွင်းမရှိ စာဖတ်သည်။ သူသည် စာမေးပွဲတိုင်းတွင် အမှတ်များစွာဖြင့် ထိပ်ဆုံးဖြစ်ခဲ့သည်။

တစ်ခါတွင် ဖုန့်ယဲ့၏အတန်းဖော် မင်မိသားစုဝင်တစ်ဦးသည် သူကိုပြင်းပြင်းထန်ထန် မနှစ်သက်ပေ။ ဤလူများသည် ဖုန့်ယဲ့ကိုရင်ဆိုင်ကာ သင်ခန်းစာပေးရန် စုဝေးလိုက်ကြသည်။ ရလဒ်အနေနှင့် မည်သူ့အကူအညီမျှမပါသော ဖုန့်ယဲ့မှာ တစ်အုပ်လုံးကို ထိခိုက်စေခဲ့သည်။ ထိုအချိန်မှစကာ ဖုန့်ယဲ့ကို မည်သူမျှ ရန်မစရဲတော့ပေ။

သူတို့ပူပေါင်းလေ့ကျင့်ရေးတွင် ဤလူများမှာ ဖုန့်ယဲ့အရိပ်အောက်တွင် နေကြရသည်။ သူတို့သူကို စာတွင်သာမက တိုက်ခိုက်ရေးတွင်လည်း မယှဥ်နိုင်ကြပေ။ နောက်ဆုံးတွင် ဖုန့်ယဲ့တစ်ယောက် သူတို့ပူးပေါင်းလုပ်ဆောင်ရေးဌာန၏ ကိုယ်စားလှယ်ပင် ဖြစ်လာတော့သည်။ ထို့ပြင် သူ့ စည်းကမ်းများမှာ ကျောင်းသားတစ်စု လိုက်နာရသည့် စည်းကမ်းအစုအဝေး ဖြစ်လာတော့သည်။ ယနေ့ချိန်ထိတိုင် ဤစည်းကမ်းများကို ပူးပေါင်းလေ့ကျင့်ရေးဌာနတွင် ပြဌာန်းထားဆဲပင်။ စိတ်မကောင်းစရာကား လက်ရှိမျိုးဆက်များအနေနှင့် တစ်ချိန်က ပျော်စရာဖြစ်ခဲ့သောဌာနကို သိခွင့်မရတော့ပေ။

ဖုန့်ယဲ့၏အရိပ်က သူတို့၏အသက်ကြီးပိုင်းတွင်ပါ သက်ရောက်နေသည်။ သူတို့ဘဝကို ပျော်ပျော်ဖြတ်သန်းနေချိန်တွင် ဖုန့်ယဲ့မှာ ဖုန့်မျိုးနွယ်၏ ခေါင်းဆောင် ဖြစ်လာရုံသာမက နတ်ဘုရားမျိုးနွယ်သမိုင်းတွင် အငယ်ဆုံးခေါင်းဆောင် ဖြစ်လာခဲ့သည်။

ထိုသို့သော သူမျိုးနှင့်ရင်ဆိုင်လာရသည့်အခါ သူတို့မျိုးဆက်များမှာ ရွေးချယ်စရာမရှိဘဲ သူသည်လူသားမဟုတ်သော နတ်ဆိုးဘုရင်ဟုသာ လက်ခံလာရသည်။

သူတို့အနေနှင့် သူ့ကိုမနာလိုရန် အိပ်မက်ပင် မမက်ဘူးပေ။ ပူးပေါင်းလေ့ကျင့်ရေးအတွင်း သူ အနိုင်မယူခဲ့ပေဘူးလား...

ဤသို့သော ခံယူချက်ဖြင့် သူတို့ဖုန့်ယဲ့ကို မြင်သည့်အခါတိုင်း ရှောင်ကွင်းသွားကြသည်။ ရလဒ်အနေနှင့် ဖုန့်လီ၏ဗီဒီယိုမှတ်တမ်းမှာ သူတို့ကိုစိတ်လှုပ်ရှားစေသည်။

သူမျှဝေထားသည်က နတ်ဆိုးဘုရင်ကို မကြောက်ရွံ့ ၍လား...

သူ၏စိတ်တွင် မုန့်ယန်တစ်ယောက် ခေတ်ဆန်သောလူတစ်ဦးအဖြစ် ဂုဏ်သတင်းနှင့်နေထိုင်သော ဖုန့်လီ၏သတ္တိကို လေးစားနေမိသည်။ သူ၏သတ္တိမှာ အတော်လေး ပုံမှန်မဟုတ်ပေ။

လေးစားမှုအပြည့်နှင့် မုန့်ယန်ဗီဒီယိုကို ဆက်ကြည့်နေသည်။ သူကြည့်လေလေ...တစ်ခုခု လွဲနေသည်ကို ခံစားရလေလေပင်။

ဗီဒီယိုထဲမှလူမှာ နူးညံစွာပြုံးနေလေသည်...

ဖုန့်ယဲ့မှဟုတ်ပါရဲ့လား...

မိန်းမလှလေးများထံမှ လှပသော အချစ်ဝန်ခံစာတို့ကို မတုန်လှုပ်ခဲ့သော သွေးအေးစက်ကြီး ဟုတ်ပါရဲ့လား...

ဗီဒီယိုပြီးသွားသည်နှင့် မုန့်ယန်အတော်လေး ရှော့ခ်ရသွားကာ သူ့ကိုယ်ဟန်ကိုပင် မထိန်းနိုင်တော့ချေ။ သူအထင်မှားနေသည်ဟုတွေးကာ ဗီဒီယိုကို နောက်တစ်ကြိမ် အလျင်ထပ်နှိပ်လိုက်သော်လည်း ထပ်၍သာ အံ့သြရလေသည်။

[WTF....တကယ်ကြီး ဖုန့်ယဲ့လား...လတ်တလောမှာ သူ့ရဲ့နှစ်တွေအကြာကြီး ပျောက်နေတဲ့အမွှာကို ပြန်တွေ့ထားတာ မဟုတ်လား...]

[ဒီဗီဒီယိုက အတုကြီးဖြစ်မယ်...နတ်ဆိုးဘုရင်က ဘယ်လို ပြုံးမှာလဲ...ဘယ်လို ဖြစ်နိုင်မှာလဲ... ]

[ဖုန့်လီ...အမြန် ထွက်လာခဲ့...ဗီဒီယိုကို လာရှင်း...အဲ့သူက တကယ်ပဲ ဖုန့်ယဲ့လား...]

[ဖြစ်တောင့်ဖြစ်ခဲပဲ...နတ်ဆိုးဘုရင်က တကယ်ကြီး ပြုံးလိုက်တာလား...ပြီးတော့ နောက် နောက်တစ်ယောက်ကို ဦးတည်ပြုံးပြနေတာတဲ့လား...]

[ဒီဗီဒိယိုထဲက တခြားလူကတော့ တကယ့်စစ်သည်ပဲ...နတ်ဆိုးဘုရင်ကြီးနဲ့ အတူတူရှိရဲရုံတင်မကဘူး သူ့ကိုပါပြုံးအောင် လုပ်လိုက်သေးတယ်...တကယ် လေးစားစရာပဲ...]

[ငါတော့ အရဲစွန့်ပြီး ထင်ကြေးပေးရရင် နတ်ဆိုးဘုရင်ကြီး ချစ်မိသွားတာလား....အဲ့လူက သူ သဘောကျတဲ့လူလား...

[တစ်ခုပဲ ရှင်းပြလို့ရတယ်...သူမိသားစု အကြီးအကဲဖြစ်တဲ့နေ့မှာတောင် သူမပြုံးဖူးဘူး...]

[ဘုရားရေ...တစ်ယောက်ယောက်ကတော့ နတ်ဆိုးဘုရင်ကြီးကို ယဥ်ပါးစေခဲ့ပြီ...]

[ငါဒီဗီယိုထဲကသူကို ထူးထူးခြားခြား သနားမိတယ်...သူကနတ်ဆိုးဘုရင်ရဲ့ တခြားတစ်ဝက်များလား...သူ့မှာလည်း စည်းမျည်းတွေများလား သိချင်မိတယ်...]

[...စာနာမှု+1...]

[ဘာလို့ ရုတ်တရက် ကျောချမ်းလာရတာလဲ...ငါတို့အုပ်စုထဲကဟာကို နတ်ဆိုးဘုရင် သိသွားလို့လား...]

[မင်းပြောမှ...ငါလည်း အဲ့လိုခံစားမိသလိုပဲ...]

[နည်းနည်း ကြောက်ဖို့ကောင်းပေမယ့် ဆက်(share)ပို့နေတုန်းပဲ...]

[ငါလည်း ဆက်ပို့တုန်းပဲ...အဲ့လိုသတင်းကောင်းမျိုးကို ဘာလို့မမျှဝေရမှာလဲ... ]

[ဒါကိစ္စကြီးပဲ...မင်းတို့ကောင်တွေ ဘာလုပ်လုပ်ဒီဗီဒီယိုကို တခြားအုပ်စုတွေဆီ ဆက်ပို့နေတုန်းပဲ...လူတွေအများကြီး ပြန်ပို့ကြရင် ငါ့ကိုလည်း မမိလောက်ဘူး...]

[ဟီးဟီးဟီး...မင်းက ညဏ်များလိုက်တာ...ငါလည်း ထောက်ခံတယ်...]

ဤနည်းဖြင့် အုပ်စုထဲမှလူများသည် ဤဗီဒီယိုကိုတစ်ယောက်ပြီးတစ်ယောက်ဆက်ပို့သွားကြသည်။ မိနစ်အနည်းငယ်အတွင်း ဗီဒီယိုမှာ အဓိကနတ်ဘုရားဘုံအုပ်စုများထံသို့ ပြန့်နှံ့သွားလေတော့သည်။

🥘

Prev Next