MM Story Teller

Chapter 210

Viewers 49k

💘Chapter 210

အလုပ်သမားသပိတ်

ရှန့်ကျားချီက ဝေ့ချန်ဆီကဖိုင်ကိုယူပြီး ဝေ့ချန်ကို သံသယနှင့်ကြည့်လိုက်သည်။ဝေ့ချန် ဘာတွေအကြံအဖန်လုပ်နေသည်ကို သူတကယ်သိချင်သည်။ဤသည်က ဆွဲခန့်ဖြင့်ဝင်လာသည့်မားကတ်တင်းဒါရိုက်တာအသစ်အတွက် ဝေ့ချန်၏ပြင်ဆင်မှုဖြစ်လောက်သည်။

ဝေ့ချန်က ရှန့်ကျားချီ၏သံသယများကိုနားလည်၏။ရှန့်ကျားချီနှင့်အကြည့်ချင်းဆုံသွားချိန်မှာ သူကဖတ်ကြည့်ပါဟူသည့်ဟန်အမူအရာလုပ်ပြလိုက်သည်။

ရှန့်ကျားချီက သူ့လက်ထဲက ဖိုင်ကိုသံသယများဖြင့်ကြည့်လိုက်သည်။သူကြည့်လေလေ အံ့ဩမိလေလေဖြစ်သည်။

ဤသည်က ဘယ်သူမှမငြင်းဆန်နိုင်သည့်အစီအစဥ်ဖြစ်သည်။ဝေ့ချန်နှင့်မတူညီနေသောအမြင်ရှိသည့် သူပင် ဤအစီအစဥ်ကိုဖတ်ပြီးနောက် မလှမ်းမကမ်းမှာ လက်လှမ်းပြနေသောအကျိုးအမြတ်များရှိနေသည်ကိုမြင်နိုင်လေသည်။မည်သူမဆို လက်မှတ်မထိုးဘဲနေနိုင်လိမ့်မည်မဟုတ်ပေ။

အစီအစဥ်အဆိုပြုချက်ပေါ်မှာရှိနေပြီသား လက်မှတ်များစွာကတခြားသောဒါရိုက်တာများချန်ထားခဲ့ခြင်းဖြစ်သည်။အစီအစဥ်တစ်ခုလုံးကိုဖတ်ပြီးနောက် ရှန့်ကျားချီလည်း သူ့နာမည်ကိုလက်မှတ်ထိုးပြီး တရားဝင်တံဆိပ်တုံးရိုက်နှိပ်လိုက်သည်။ဖိုင်ကိုဝေ့ချန်ဆီကမ်းပေးပြီးနောက် ရှန့်ကျားချီ အသိပြန်ဝင်လာသည်။အကျိုးအမြတ်ကိုသူမြင်သလို အနှီအစီအစဥ်ပေါ်မှာဝေ့ချန်ချန်ထားခဲ့သောဗျူဟာကိုလည်း သူမြင်ပေ၏။

"အားချန် မင်းကတကယ်ကို့ ငါ့ကိုအံ့ဩစေတာပဲ"

ရှန့်ကျားချီက ပြုံးပြုံးရွှင်ရွှင် ဆိုလိုက်သည်။

ရှန့်ကျားချီ၏လက်မှတ်နှင့်အတူ အစီအစဥ်ပေါ်ရှိတခြားလုပ်ဖော်ကိုင်ဖက်များ၏လတ်မှတ်များပါထပ်ပေါင်းလိုက်လျှင် ဤအစီအစဥ်က လူပေါင်းတစ်ဝက်ကျော်၏သဘောတူထောက်ခံမှုကိုရရှိထားသည်။ချန်ဖုန်းအုပ်စုဒါရိုက်တာဘုတ်အဖွဲ့၏စည်းမျဥ်းများအရ ဒါရိုက်တာ ထက်ဝက်ကျော်ကသဘောတူသည့် အစီအစဥ်သို့မဟုတ် ဆုံးဖြတ်ချက်များက အကောင်အထည်ဖော် ဆောင်ရွက်နိုင်လေသည်။ထို့ကြောင့်ဝေ့ချန်၏အစီအစဥ်က ပြီးစီအောင်မြင်နိုင်မည့်လမ်းကြောင်းပေါ်ရောက်နေပြီဟုဆိုနိုင်ပေသည်။

ဤအစီအစဥ်ဖြင့်ဆိုလျှင် ဝေ့ချန် သူ၏ကိုယ်ပိုင်အောင်မြင်မှုများကိုကာကွယ်နိုင်ပြီဖြစ်သည်။

ဝေ့ချန်ရဲ့အောင်မြင်မှုတွေကိုခိုးယူချင်နေတဲ့မိသားစုကလူတွေကတော့လား...ထိုအခါကျသူတို့က ဇနီးရောတပ်ဖွဲ့ပါဆုံးရှုံးသွားရလိမ့်မှာသေချာသလောက်ရှိသည်။

ထို့ကြောင့် ဝေ့ချန်၏လေးနက်တည်ကြည်သောရုပ်သွင်ကြောင့်အရူးလုပ်မခံရသင့်ပေ။သူ့ပုံစံက အလွန်ဖြောင့်မတ်ဟန်ရှိပေမဲ့ သူနှင့်အတူအကြာကြီးပေါင်းသင်းခဲ့သူများသာလျှင် ဝေ့ချန်က အပြင်မှာဖြူပြီးအတွင်းမှာမည်းသည့် နှမ်းမဲလုံး(ထန်ယွမ်/တရုတ်မုန့်လုံးရေပေါ်)တစ်ခုသာဖြစ်ကြောင်းသိကြလိမ့်မည်ပင်။သူက အပေါ်ယံမှာ စည်းမျဥ်းများကိုအလွယ်တကူလိုက်နာသည့်သူပုံစံပေါက်ပေမဲ့ အတွင်းမှာ နှလုံးသား မည်းနက်နေသောဝမ်းတွင်းမည်းတစ်ယောက်ဖြစ်သည်။သူဆီကနေ တစ်စုံတစ်ခုရယူရန်မလွယ်ကူပါချေ။

ပထမဆုံးအကြိမ်အနေဖြင့် ရှန့်ကျားချီ သူ့အမြင်ကိုဂုဏ်ယူမိသွားသည်။သူက ဤရွှေတွင်းကြီးဝေ့ချန်ကို ကုမ္ပဏီထဲအောင်အောင်မြင်မြင်ခေါ်သွင်းနိုင်ခဲ့သည်လေ။

ဝေ့ချန်က ရှန့်ကျားချီ၏ရုံးခန်းမှထွက်လာပြီးနောက် မားကတ်တင်းဌာနဆီပြန်သွားလိုက်သည်။သူ့လက်ထဲက အလုပ်များကို ချန်ယွင်ဇန်းဆီလွှဲပေးချင်၍ဖြစ်သည်။

ချန်ယွင်ဇန်းကို ရှန့်ကျားချီ၏လက်ထောက်က မားကတ်တင်းဌာနထဲကိုခေါ်လာခြင်းဖြစ်သည်။မည်သို့ပင်ဖြစ်စေသူကချန်မိသားစုဝင်တစ်ယောက်ဖြစ်သည်မဟုတ်ပါလော။ရှန့်ကျားချီအနေဖြင့် သူ့ကိုမျက်နှာသာအနည်းနှင့်အများပေးရလိမ့်မည်ပင်။သူက သူ့လက်ထောက်ကိုချန်ယွင်ဇန်းကိုခေါ်ပြီး မားကတ်တင်းဌာနဆီသွားအစီရင်ခံခိုင်းခဲ့ပြီး ယင်းကချန်ယွင်ဇန်းကိုမျက်နှာသာပေးခြင်းနည်းလမ်းတစ်မျိုးဖြစ်သည်။ဤစံနှုန်းက ဝေ့ချန်ယခင်တစ်ခေါက် မားကတ်တင်းဌာကိုလာအစီရင်ခံစဥ်ကနှင့်ဆင်တူလေသည်။

ဝေ့ချန် မားကတ်တင်းဌာနရောက်ချိန်မှာ ချန်ယွင်ဇန်းကသူ့ကိုယ်သူမိတ်ဆက်ပြီးခါစဖြစ်သည်။သို့ရာတွင် သူ့မိတ်ဆက်ပြီးချိန်မှာ အခန်းက လုံးဝတိတ်ဆိတ်နေသည်။မားကတ်တင်းဌာနကလုပ်ဖော်ကိုင်ဖက်များက ချန်ယွင်ဇန်းကို ပြောင်ပြောင်တင်းတင်းမနှစ်မြို့သည့်ပုံစံမပြကြပေမဲ့ သူတို့ကသိပ်ပြီးပူးပေါင်းဆောင်ရွက်မပေးကြဘဲ သူ့အတွက်လက်ခုပ်ပင်တီးမပေးကြပေ။

ပထမဆုံးလက်ခုပ်သံထွက်လာချိန်မှာ မားကတ်တင်းဌာနကလုပ်ဖော်ကိုင်ဖက်များအားလုံးက လက်ခုပ်သံလာရာဆီကိုကြည့်လိုက်ကြသည်။ဝေ့ချန်က လက်ခုပ်တီးရင်း မားကတ်တင်းဌာနထဲကိုဝင်လာသည်ကိုမြင်သော် သူတို့က တွန့်ဆုတ်တွန့်ဆုတ်ဖြင့် လက်ခုပ်တီးလိုက်ကြသည်။လက်ခုပ်တီးသံက ကျိုးတိုးကျဲတဲဖြစ်ကာ သိပ်ပြီးစိတ်လက်လက်ပါရှိမနေပေမဲ့ ယင်းက အမှန်ပင် အနေရခက်စရာလေထုကိုအနည်းငယ်လျော့ပါးသွားခဲ့ပေသည်။

"လက်ထောက်အထွေထွေမန်နေဂျာဝေ့"

ချန်ယွင်ဇန်းကလည်း ဝေ့ချန်ကိုမြင်ပြီး

ခေါင်းညိတ်နှုတ်ဆက်လိုက်သည်။

"အလုပ်တွေလက်လွှဲပေးဖို့ဆင်းလာတာပါ"

ဝေ့ချန်က လိုရင်းကိုတန်းသွားလိုက်သည်။

"အခုလေးတင်ပဲ ဘယ်လိုစလုပ်ရမလဲတွေးနေတာ...လက်ထောက်အထွေထွေမန်နေဂျာဝေ့က အချိန်ကိုက်ရောက်လာပြီး ကျွန်တော့်ရဲ့အရေးပေါ်ပြဿနာကိုဖြေရှင်းပေးလိုက်တာပဲ"

ချန်ယွင်ဇန်းက ဝန်ထမ်းများအကြားရှိ အားကောင်းသောစည်းလုံးမှုကိုခံစားရ၍ဖြစ်မည်၊အနှီစည်းလုံးမှုကို ပံ့ပိုးပေးခဲ့သော ဝေ့ချန်ကိုမြင်ချိန်မှာသူက အလျော့ပေးလိုက်သည်။

ဝေ့ချန်က ခေါင်းညိတ်ရုံပြုပြီး ဘာမှတ်ချက်မှဆိုပေ။သူက မားကတ်တင်းဌာန၏မန်နေဂျာ လုဝေ့ကိုခေါ်ပြီး ချန်ယွင်ဇန်းကိုမားကတ်တင်းဌာနနှင့်ရင်းနှီးအောင်ကိုယ်တိုင်လိုက်ပြပေးခိုင်းပြီး အလုပ်များလက်လွှဲပေးလိုက်သည်။

ဝေ့ချန်နှင့် ချန်ယွင်ဇန်းက နှစ်ယောက်စလုံး ကျွမ်းကျင်ပိုင်နိုင်သောလူများဖြစ်သည်။နာရီဝက်အကြာမှာ ဝေ့ချန်က အလုပ်များလွှဲပြောင်းပေးပြီးသွားပြီး ချန်ဖုန်းအုပ်စုမှာ သူဆယ်လနီးပါးလောက်အလုပ်လုပ်ခဲ့သောမားကတ်တင်းဌာနကိုစွန့်ခွာလာခဲ့သည်။

ချန်ယွင်ဇန်းက ဝေ့ချက်ထွက်ခွာသွားသည်ကိုကြည့်နေသည်။ခုနက လွှဲပေးခဲ့သောအလုပ်များအားလုံးကို သူအသေးစိတ်မှတ်မိသည်။သူကိစ္စများစွာကိုကောင်းကောင်းနားလည်သွားပြီဖြစ်ပေမဲ့ ဝေ့ချန်ကသူ့ကို အထူးသီးသန့်မက်စ်အေဂျင်စီသဘောတူညီချက်ကို လွှဲမပေးခဲ့ပေ။

မက်စ်ကို သူ့ကိုလွှဲမပေးချင်တာလား...ဒါမှမဟုတ်ဝေ့ချန်မှာ မက်စ်အတွက်တခြားအစီအစဥ်တွေရှိနေတာများလား...

ဝေ့ချန်၏အရည်အချင်းဖြင့်ဆိုလျှင် ဒုတိယကိစ္စကပိုဖြစ်နိုင်သည်ဟုချန်ယွင်ဇန်းခံစားရသည်။သို့ပေမဲ့ ယခုအချိန်မှာ ဝေ့ချန်အတွက်တခြားစီစဥ်မှုများပြုလုပ်ရန်နောက်ကျလွန်းနေပြီဟုသူယုံကြည်သည်။သူချန်ဖုန်းအုပ်စုကိုရောက်နေပြီဖြစ်၍ ဝေ့ချန်ကိုအောင်မြင်ခွင့်ပေးလိမ့်မည်မဟုတ်သည်မှာ သဘာဝဖြစ်ပေသည်။

ချန်ယွင်ဇန်းက သူ့အကြည့်ကိုပြန်ရုတ်သိမ်းလိုက်ပြီးနှာရိုးပေါ်ကမျက်မှန်ကိုတွန်းတင်၍ မားကတ်တင်းဌာန၏မန်နေဂျာလုဝေ့ကိုကြည့်လိုက်သည်။

"လက်ထောက်အထွေထွေမန်နေဂျာဝေ့က မင်းအမြင်မှာဘယ်လိုလူမျိုးလဲ"

ချန်ယွင်ဇန်းက အပြုံးဖျော့ဖျော့နှင့်မေးလိုက်ခြင်းဖြစ်ကာ သူဘာကိုဆိုလိုသည်ကို ပြောရန်မဖြစ်နိုင်ဖြစ်စေလေသည်။

"အရည်အချင်းပြည့်ဝတဲ့အထက်လူကြီး"

လုဝေ့က ဝေ့ချန်ကိုချီးမွမ်းရန် ဘာကောင်းသည့်အရာမှမပြောခဲ့သလို သူ့အထက်လူကြီးအသစ်ကိုမျက်နှာလုပ်ရန် ဝေ့ချန်ကိုတမင်တကာသေးသိမ်စေခဲ့ခြင်းမျိုးလည်းမရှိခဲ့ပေ။ဤသည်က သူဝေ့ချန်ကိုပေးနိုင်သည့် အသင့်တင့်ဆုံးတန်ဖိုးဖြတ်မှုဖြစ်သလို သူတွေးနိုင်သည်အမြင့်ဆုံးတန်ဖိုးဖြတ်မှုလည်းဖြစ်ပေသည်။

"အရည်အချင်းပြည့်ဝတယ်..."

ချန်ယွင်ဇန်းက ဒွိဟဖြစ်စေသော အပြုံးတစ်ပွင့်နှင့် ဆိုသည်။

"အလုပ်သွားပြန်လုပ်လို့ရပြီ...ကိုယ့်ဘာသာကိုယ် ကြည့်လိုက်ပါ့မယ်"

"ဟုတ်ကဲ့"

လုဝေ့က ချက်ချင်းလှည့်ပြန်သွားခဲ့ပြီး ချန်ယွင်ဇန်းရှေ့မှမျက်နှာဆက်မပြချင်ခဲ့ပေ။

ချန်ယွင်ဇန်းက ကြီးမား ကျယ်ဝန်းသောမားကတ်တင်းဌာနကြီးကိုကြည့်လိုက်ပြီး မားကတ်တင်းဌာနထဲက လုပ်ဖော်ကိုင်ဖက်များ၏မကျေမနပ်ဖြစ်နေသောမျက်နှာများကိုမြင်ရချိန်မှာ နှုတ်ခမ်းများကော့တက်သွားသည်။

စိတ်ဝင်စားစရာပဲ...စိတ်ဝင်စားစရာပဲ...ဝေ့ချန်ကတင်စိတ်ဝင်စရာကောင်းတာမဟုတ်ဘူး...ဒီမားကတ်တင်းဌာနကလည်း သိပ်စိတ်ဝင်စားစရာကောင်းတယ်...

***

နောက်တစ်နေ့မှာ နေမင်းက ထုံးစံအတိုင်းထွက်လာသည်။နွေရာသီရောက်ခါနီးသည်နှင့်အမျှ အပူချိန်ကတဖြည်းဖြည်းမြင့်တက်လာခဲ့သည်။သို့ပေမဲ့ ချန်ဖုန်းအုပ်စုမှာတော့ ကိစ္စကြီးတစ်ခုဖြစ်ပွားခဲ့လေသည်။

မားကတ်တင်းဌာနက ဝန်ထမ်းတွေ သပိတ်မှောက်နေကြတယ်...

မနက်ခင်းမှာ ချန်ယွင်ဇန်းတစ်ယောက် ကုမ္ပဏီကိုလာပြီး မားကတ်တင်းဌာနထဲကိုဝင်လာခဲ့သည်။ပုံမှန်ဆို ပျားပန်းခပ်စည်ကားနေသည့်မားကတ်တင်းဌာနကြီးက ယနေ့မနက်မှာ ဗလာကျင်းနေသည်။ထိုင်ခုံအလွတ်များက ချန်ယွင်ဇန်း၏ဘာမှလုပ်နိုင်စွမ်းမရှိမှုအပေါ် လှောင်ပြောင်သရော်နေကြဟန်ရှိသည်။

မားကတ်တင်းဌာနက သူ၏လုပ်ဖော်ကိုင်ဖက်များက ဝေ့ချန်၏အပြောင်းအရွှေ့နှင့်ပတ်သတ်ပြီး

မကျေနပ်ကြဘဲ ဝေ့ချန်၏အမည်ခံရာထူးတိုးပြီးမသိမသာရာထူးကျသွားမှုအတွက် သူ့ရှေ့မှာ ပြဿနာရှာကြလိမ့်မည်မှန်းကိုသူသိပေသည်။သို့ပေမဲ့ ဤမားကတ်တင်းဌာနကလုပ်ဖော်ကိုင်ဖက်များက ဤမျှရဲတင်းပြီး သူတို့၏အသက်မွေးဝမ်းကြောင်းများကိုပင် ဤအပေါ်မှာ လောင်းကြေးထပ်ကာ တကယ်ကြီးအလုပ်သမားသပိတ်ပြုလုပ်လိမ့်မည်ဟုသူ လုံးဝမမျှော်လင့်ထားခဲ့ပေ။

ဤသည်က သူ၏ပထမဆုံးအလုပ်တက်သည်နေ့မှာ ချန်ယွင်ဇန်းအတွက် စော်ကားခံလိုက်ရခြင်းပင်။အနှီဝန်ထမ်းများ၏ရည်ရွယ်ချက်ကသူ့ကိုပစ်မှတ်ထားရန်မဟုတ်ဘဲ ဝေ့ချန်ကိုအပြောင်းအရွှေ့လုပ်လိုက်သည့်ဆုံးဖြတ်ချက်ကို သဘောမတူကြောင်းဆန္ဒပြရန်ဖြစ်မှန်း ချန်ယွင်ဇန်းသိသော်ငြားလည်း သူတို့စုပေါင်းသပိတ်၏ ပထမဆုံးရိုက်ချက်က ချန်ယွင်ဇန်း၏မျက်နှာတည့်တည့်မှာဖြစ်လေ၏။

ဤကိစ္စမှာ ဝေ့ချန် ပါ၏မပါ၏သူမသိပေမဲ့ လက်အောက်ငယ်သားများကို ထိန်းချုပ်နိုင်သည့်ဝေ့ချန်၏စွမ်းရည်ကိုသူလေးစားရမှာဖြစ်သည်။ယခုလို မားကတ်တင်းဌာနကလူအများကြီးကို ထိထိရောက်ရောက် ထိန်းချုပ်နိုင်ပြီး အလွယ်တကူသပိတ်မှောက်အောင်လုပ်နိုင်သည်က နည်းသည့်အရည်အချင်းမဟုတ်။

ချန်ယွင်ဇန်းက မည်မျှပင်ကောင်းကောင်းဆုံးမသွန်သင်ခံခဲ့ရပါစေ ယခုလိုအခြေအနေမျိုးနှင့် ကြုံတွေ့ရသည့်အခါ ဒေါသမထွက်ဘဲမနေနိုင်ခဲ့ပါချေ။သူ့နဖူးမှာသွေးကြောများဖောင်းတက်လာပြီး လက်သီးများတင်းနေအောင်ဆုပ်လိုက်သည်။နောက်ဆုံးမှာသူ တံခါးကိုလက်သီးဖြင့် ပြင်းပြင်းထန်ထန် ထိုးလိုက်မိသည်။သို့ပေမဲ့ တံခါးမှန်က ခိုင်သဖြင့် မည်သည့်ထိခိုက်ပျက်စီးမှုမှမရှိခဲ့ပေ။

သို့ပေမဲ့ မကြာမီပင် ချန်ယွင်ဇန်းက သူ့ရင်ထဲက ဒေါသကိုဖိနှိပ်လိုက်သည်။သူက သူ၏နဂိုရည်မွန်တင့်တယ်သောပုံစံသို့ပြန်လည်ရောက်ရှိသွားပြီး နှာရိုးပေါ်ကမျက်မှန်ကိုတွန်းတင်ကာ ဘာမှမဖြစ်ခဲ့သည့်အတိုင်း သူ့ရုံးခန်းဆီကိုဆက်လျှောက်သွားလေသည်။

မိနစ်နှစ်ဆယ်အတွင်းမှာပဲ မားကတ်တင်းဌာနက လုပ်ဖော်ကိုင်ဖက်များအားလုံး စုပေါင်းသပိတ်မှောက်သည့်သတင်းက ချန်ဖုန်းအုပ်စုတစ်ခုလုံးမှာ ပျံ့နှံ့သွားသည်။ဌာနတစ်ခုလုံးက ဝေ့ချန်အတွက်ဤအတိုင်းအတာထိသွားကြလိမ့်မည်ဟု မည်သူမှ မမျှော်လင့်ထားကြသောကြောင့် လူတိုင်း အလွန်ထိတ်လန့်တုန်လှုပ်သွားကြသည်။

ထိပ်ပိုင်းအုပ်ချုပ်ရေးအဖွဲ့ကလည်းသတင်းကြားပြီးအလျင်အမြန် ဤအတွက်အရေးပေါ်အစည်းအဝေးကျင်းပလိုက်ရသည်။မားကတ်တင်းဌာနကသာမန်ဌာနမဟုတ်ပေ။အထူးသဖြင့် အရောင်းဌာနနှင့်ပေါင်းစည်းပြီးနောက်မှာ မားကတ်တင်းဌာန၏အရေးပါမှုက ကျန်ဌာနများမယှဥ်နိုင်တော့ပေ။မားကတ်တင်းဌာနတစ်ခုလုံး တစ်ရက်သပိတ်မှောက်လိုက်ခြင်းကြောင့် ကုမ္ပဏီအတွက်ဖြစ်စေသည့် စီပွားရေးဆုံးရှုံးမှုက တိုင်းတာ၍ပင်မရပေ။

အသိပေးချက်ကို ရရှိချိန်မှာဝေ့ချန်လည်း အတော်လေးအံ့အားသင့်သွား၏။ဤကိစ္စကိုသူလုံးဝမသိခဲ့ပေ။မားကတ်တင်းဌာနကသူ၏လုပ်ဖော်ကိုင်ဖက်များက သူ့အတွက် ဤအတိုင်းအတာထိသွားလိမ့်မည်ဟု သူလုံးဝမမျှော်လင့်ထားခဲ့ပေ။

သို့သော် ဝေ့ချန်လည်းဤကိစ္စ၏လေးနက်မှုကိုသိလေသည်။ဖိုင်များကို အလျင်စလိုသိမ်းဆည်းပြီးနောက် သူအစည်းအဝေးခန်းသို့သွားခဲ့သည်။

ဝေ့ချန် အစည်းအဝေးခန်းထဲဝင်လာသည်နှင့် ငေါ့တော့တော့အသံတစ်ခုထွက်လာသည်။

"ငါတို့ရဲ့လက်ထောက်အထွေထွေမန်နေဂျာဝေ့ကြီးရောက်လာပြီပဲ...မားကတ်တင်းဌာနက လက်ထောက်အထွေထွေမန်နေဂျာဝေ့ရဲ့ရာထူးတိုးမှုကြောင့်သပိတ်မှောက်တယ်တဲ့...လက်ထောက်အထွေထွေမန်နေဂျာဝေ့က တကယ်ကို ဆွဲဆောင်မှုရှိပါ့လား"

ပြောသူက ချန်ဖုန်းအုပ်စု၏လက်ထောက်အထွေထွေမန်နေဂျာနောက်တစ်ယောက်ဖြစ်သည့် ဟွမ်ဟွားပဲဖြစ်လေသည်။သူကအသက်ငါးဆယ်ခန့်အရွယ် တကယ့် *ဆာမူရိုင်းကေစစ်စစ်နှင့်ဖြစ်သည်။ဘေးနှစ်ဖက်ကဆံပင်များကိုအရှည်ထားပြီး ကတုံးပြောင်ဖြစ်နေသည့်နေရာများကိုအုပ်ကာ ကိုယ့်ကိုကိုယ် နှစ်သိမ့်ပေးသောဆံပင်ကေတစ်ခုကိုဖန်တီးထားလေသည်။ဘီယာဗိုက်ဖောင်းဖောင်းက အလွန်ကိုမှ ထင်ရှားပြီး ဗိုက်ကြီးသည်လေးငါးလဗိုက်အတိုင်းပါပင်။အင်္ကျီက ဒီဇိုင်နာချုပ်အင်္ကျီဖြစ်သော်လည်း သူ့ထိုင်သည့်ပုံစံကြောင့်ကြယ်သီးများကအနည်းငယ်တင်းနေပြီး ဗိုက်ဖြူဖြူကပေါ်နေသည်။

ဝေ့ချန်က သူ့ကိုတစ်ချက်သာကြည့်ပြီး သူ့နေရာမှာသူဝင်ထိုင်ကာ သူ့အပေါ်ကျရောက်နေသော သရော်တော်တော်မျက်လုံးများကိုလျစ်လျူရှုကာ အစည်းအဝေးစတင်မည်အားစောင့်နေလေသည်။

တခြားလက်ထောက်အထွေထွေမန်နေဂျာတစ်ယောက်က ဝေ့ချန်၏ ဘေးမှာထိုင်ခြင်းဖြစ်သည်။ဝေ့ချန် ထိုင်လိုက်သည်ကိုမြင်လျှင် သူကဝေ့ချန်၏လက်ကိုတို့ကာမေးလိုက်သည်။

"မင်းဒီအကြောင်းကိုသိလား"

ဤကိစ္စထဲမှာဝေ့ချန်ပါသည်ဟု သူ့စိတ်ထဲမှာ သတ်မှတ်လိုက်ပြီးသားဖြစ်သော်လည်း မနေနိုင်ဘဲမေးချင်မိဆဲဖြစ်သည်။

လက်ထောက်အထွေထွေမန်နေဂျာ၏အသံက မကျယ်ပေမဲ့အလွန်ကြီးလည်းမတိုးပေ။သူ့အနားကလူများစွာက ၎င်းကိုကြားပြီးဝေ့ချန်ဘာပြောမည်ကိုနားထောင်ရန်နားစွင့်လိုက်ကြသည်။

"လက်ထောက်အထွေထွေမန်နေဂျာကျန့်က ကိုယ်ကြားချင်တဲ့အဖြေကိုကြားချင်တာလား ဒါမှမဟုတ် လက်ထောက်အထွေထွေမန်နေဂျာဝေ့ ပြောမဲ့အဖြေကိုကြားချင်တာလား"

လက်ထောက်အထွေထွေမန်နေဂျာကျန့်၏ဘေးမှာထိုင်နေသည့်ကျူးကောဖုန်းက ငေါ့တော့တော့လေသံဖြင့်မေးလိုက်သည်။

လက်ထောက်အထွေထွေမန်နေဂျာကျန့်က ခြောက်ကပ်ကပ်ရယ်ကာဆိုသည်။

"ကျွန်တော်ကြားချင်တဲ့အဖြေရယ်လို့မရှိပါဘူး...လက်ထောက်အထွေထွေမန်နေဂျာဝေ့ရဲ့ရှိရင်းစွဲအဖြေကိုပဲ ကြားချင်တာပါ"

"မတူဘူးလေ"

ကျူးကောဖုန်းနှင့်တစ်ဖွဲ့တည်းသမားနောက်တစ်ယောက်က ဆိုလိုက်၏။

"လက်ထောက်အထွေထွေမန်နေဂျာကျန့်ရဲ့စိတ်ထဲမှာ အဖြေတစ်ခုရှိပြီးသားဆိုရင် လက်ထောက်အထွေထွေမန်နေဂျာဝေ့ကဘာပဲပြောပြော လက်ထောက်အထွေထွေမန်နေဂျာကျန့်ရဲ့အဖြေကအတူတူပဲဖြစ်မှာလေ...ဒါဆိုလက်ထောက်အထွေထွေမန်နေဂျာဝေ့က ဘာလို့ဖြေစရာလိုနေဦးမှာတုန်း"

လက်ထောက်အထွေထွေမန်နေဂျာကျန့်

ပြောစရာစကားမဲ့သွား၏။သူ့စိတ်ထဲမှာ အမှန်ပင်မားကတ်တင်းဌာန၏အလုပ်သမားသပိတ်က ချန်ယွင်ဇန်းကိုအာဏာပြချင်သည့် ဝေ့ချန်၏သွေးထိုးလှုံ့ဆော်မှုကြောင့်ဟု သတ်မှတ်ထားခဲ့သည်။ယခု သူ့အတွေးများကတဆုံးအဖော်ခံလိုက်ရပြီဖြစ်ရာ အရေထူပေငြား သူ့မှာ သူ့ကိုယ်သူမခုခံနိုင်ဖြစ်ရလေသည်။

ဝေ့ချန်က ဤဖြစ်စဥ်တလျှောက်လုံးမှာဘာစကားမှမပြောဘဲ လက်ထဲကဖုန်းဖြင့် လုဝေ့ဆီသို့သာမက်ဆေ့ချ်တစ်စောင်ပို့လိုက်သည်–

[အကုန်လုံးကို အလုပ်ပြန်လာခိုင်းလိုက်...နာရီဝက်အတွင်း မားကတ်တင်းဌာနကလူတိုင်းကိုမြင်ချင်တယ်!]

(T/N–ဆာမူရိုင်းတွေက စစ်တိုက်ရာမှာခေါင်းဆောင်း ဆောင်းရအဆင်ပြေဖို့နဲ့အပူမလွန်စေဖို့ ထိပ်ကဆံပင်ကိုရိတ်ပြီး ကျန်တဲ့ဆံပင်ကိုစု၊အထုံးသေးသေးလေးထုံးကြပါတယ်။အဲဒါကြောင့် ဟွမ်ဟွားရဲ့ထိပ်ပြောင်ဘေးရှည်ကေကိုတင်စားပြီးဆာမူရိုင်းကေလို့ပြောထားတာပါ)

<<>>

💘

Prev Next