MM Story Teller

Chapter 213

Viewers 49k

💘Chapter 213

ခြိမ်းခြောက်စာ

ချန်ယွင်ဇန်းနှင့်ချန်ဖုန်းအုပ်စုကလူတချို့သည် သူတို့က ချန်ယွင်ဇန်းကိုမားကတ်တင်းဌာန၏ဒါရိုက်တာရာထူးမှာရုတ်တရက်ထည့်ပြီး ဝေ့ချန်ကိုအငိုက်မိအောင်လုပ်ကာ ဘေးပို့ချင်ခဲ့သည်။ သို့သော် ဝေ့ချန်က ပြင့ဆင်မှုများအားလုံးကိုပြုလုပ်ပြီးသားဖြစ်ကာ ချန်ယွင်ဇန်းကိုလက်ဆောင်အကြီးကြီးပေးလာလိမ့်မည်ဟု သူတို့မမျှော်လင့်ထားကြပေ။သူက တစ်ဖက်လှည့်ဖြင့် မားကတ်တင်းဌာနကို သူ၏ထိန်းချုပ်မှုအောက်ကို ပြန်လည်ရယူသွားသည်။

ရလဒ်အနေဖြင့် အဆုံးတွင်အငိုက်မိသွားသူမှာ ချန်ယွင်ဇန်းပဲဖြစ်ခဲ့ရလေသည်။　

ရုံးခန်းကိုပြန်ရောက်ချိန်မှာ ချန်ယွင်ဇန်းက သူကုမ္ပဏီကိုရောက်လာသည့်နှစ်ရက်အတွင်းဖြစ်ခဲ့သည်များကို ပြန်လည်သုံးသပ်ခဲ့သည်။ဝေ့ချန်၏နည်းလမ်းများကိုနားလည်သိရှိသွားပြီးနောက် သူ၏ ယောက်ရက်ခတ်နေသောအတွေးများက တဖြည်းဖြည်းတည်ငြိမ်သွားခဲ့သည်။　

မည်းမှောင်နေသောမျက်နှာထက်မှာ အပြုံးရေးရေး ပေါ်လာပြီး သူ၏မျက်မှန်များကပြတင်းပေါက်နေရောင်အောင်ထူးဆန်သောအဖြူရောင်အလင်းတစ်ခု အလင်းပြန်နေခဲ့သည်။ဝေ့ချန်လိုပြိုင်ဘက်မျိုးကိုမတွေ့ရခဲ့သည်မှာကြာပြီဖြစ်သည်။လာမည့်ရက်များကတော့ အင်မတန်စိတ်လှုပ်ရှားစရာကောင်းလိမ့်မည်မှာ သေချာပေါက်ပင်။

ဝေ့ချန်က ပြတ်ပြတ်သားသား လျင်လျင်မြန်မြန်ဆောင်ရွက်ခဲ့သည်။မက်စ်ဘရန်းကားပရိုးမိုးရှင်းအထူးအဖွဲ့ထောင်ပြီး၍ အဖွဲ့ဝင်စာရင်း သတ်မှတ်ပြီးသည်နှင့် နေ့လည်ပိုင်းမှာ အထူးအဖွဲ့၏ရုံးခန်းကစီစဥ်ပြီးနေပြီဖြစ်သည်။

အထူးအဖွဲ့က မားကတ်တင်းဌာနက ဝန်ထမ်းများဖြင့် အများဆုံးဖွဲ့စည်းထားသည်။သူတို့ဝေ့ချန်၏လက်အောက်မှာအလုပ်ဆက်လုပ်နိုင်တော့မည်ဖြစ်ကြောင်းကြားရချိန်မှာ ချက်ချင်းပင် အပျော်လွန်ကုန်ုကြပြီး ပစ္စည်းများထုပ်ပိုးကာ အထူးအဖွဲ့၏ရုံးခန်းကိုသတင်းသွားပို့လေသည်။

တခြားဌာနများမှ ရွေးချယ်ခံရသည့်ဝန်ထမ်းများလည်းဝေ့ချန်၏နာမည်နှင့်ဆောင်ရွက်ချက်များကိုကြားထားပြီး ဤသည်ကရာထူးတိုးရန်အခွင့်ကောင်းတစ်ခုမှန်းသူတို့သိကြသည်။သူတို့လည်း မငြင်းဆန်ကြဘဲ ထုပ်ပိုးကာ အထူးအဖွဲ့၏ရုံးခန်းကိုသတင်းသွားပို့ကြသည်။

ထို့ကြောင့် မနက်ခင်းတုန်းကမှထောင်ခါစအဖွဲ့သည် နေ့လည်မှာ ဝေ့ချန်အပါအဝင် အဖွဲ့ဝင်များအားလုံး ရုံးခန်းမှာရောက်နေကြပြီဖြစ်သည်။

လူတိုင်းက မိမိကိုယ်မိမိ မိတ်ဆက်ပေးပြီးနောက် ဝေ့ချန်၏ဦးဆောင်မှုအောက်မှာ အထူးအဖွဲ့၏ပထမဆုံးအစည်းအဝေးကျင်းပခဲ့လေသည်။သို့သော် လူတိုင်းကိုအံ့အားသင့်သွားစေသည်ကအစည်းအဝေးမှာဝေ့ချန်ထုတ်ဖော်ခဲ့သည့်အရာပါပင်။

သူက အမှန်တကယ်ကြီး လက်ရှောင်သောအထက်လူကြီးဖြစ်ချင်နေပြီး လုဝေ့ကို မက်စ်ပရောဂျက်အတွက် တာဝန်အပြည့်အဝယူခိုင်းချင်နေသည်။

ဤကိစ္စက အထူးအဖွဲ့၏ရုံးခန်းထဲမှာဗုံးတစ်လုံးအကျဲခံလိုက်ရသလိုပါပင်။လူတ်ိုင်းက ဝေ့ချန်ကိုပဟေဠိဖြစ်နေသောအကြည့်များဖြင့်ကြည့်လိုက်ကြပြီး ဝေ့ချန်ဘာကြောင့် ယခုလိုဆုံးဖြတ်ချက်မျိုးကိုချရသည်ကိုသူတို့သိချင်နေကြသည်။

ဝေ့ချန်က ရှင်းမပြပါဘဲ လုဝေ့ကိုကြည့်လိုက်ပြီး ဩဇာအာဏာအပြည့်ဖြင့်ဆိုသည်။

"လုဝေ့...အဖွဲ့ကိုဦးဆောင်ပြီး ဒီတာဝန်ကိုအောင်အောင်မြင်မြင်အဆုံးသတ်နိုင်ဖို့ ယုံကြည်ချက်ရှိလား"

လုဝေ့က ရှော့ခ်ရနေဆဲဖြစ်ပြီး အသိပြန်ဝင်မလာသေးပေ။ဝေ့ချန်၏မေးခွန်းကိုကြားရချိန်မှာ သူအနည်းငယ်ရှုပ်ထွေးနေသည်။အတန်ကြာကြောင်အနေပြီးနောက် လုဝေ့၏မျက်လုံးများထဲမှာ ခိုင်မာသောအကြည့်တစ်ခုပြသ၍လာသည်။

"လက်ထောက်အထွေထွေမန်နေဂျာဝေ့ကို သေချာပေါက်ဆွဲမချမိစေရပါဘူး"

"ဒါဆိုရင် အစည်းအဝေးကိုအဆုံးသတ်ကြတာပေါ့"

ဝေ့ချန်က ပရိုဂျက်တာကိုပိတ်ပြီး အပြီးအပြတ်ဆုံးဖြတ်ချက်ချလိုက်သည်။

"လက်ထောက်အထွေထွေမန်နေဂျာဝေ့...ကျွန်တော် နားမလည်ဘူး"

တခြားဌာနက ပြောင်းလာသည့် ဝန်ထမ်းတစ်ယောက်ကလက်မြှောက်ကာဆိုသည်။

"မက်စ်ပရောဂျက်က လုံးဝအရေးကြီးတယ်...လက်ထောက်အထွေထွေမန်နေဂျာဝေ့က ဒီပရောဂျက်ကိုပြီးစီအောင်မြင်အောင်ဦးဆောင်နိုင်မယ်လို့ ကျွန်တော့တို့ယုံကြည်ပေမဲ့ မန်နေဂျာလုက..."

ဤဝန်ထမ်းက ရှင်းရှင်းလင်းလင်းမပြောဘဲ နေရာမှန်မှာရပ်လိုက်သည်။သူက သူ့သံသယများကို ဖော်ပြခဲ့ခြင်းဖြစ်ပြီး လုဝေ့ကိုလုံးလုံးလျားလျားကြီးမဆန့်ကျင်ခဲ့ပေ။

"နောက်ကျရင်နားလည်လာပါလိမ့်မယ်"

ဝေ့ချန်က ဆက်၍ရှင်းမပြမြဲဖြစ်သော်လည်း လုဝေ့အပေါ်သူ၏လုံးဝဿုံယုံကြည်မှုကိုပြသလိုက်သည်။

ထိုအခိုက်အတန့်တွင် လု့ဝေတစ်ယောက် အားအင်များနှင့်စိတ်အားတက်ကြွမှုများဖြင့်ပြည့်နေသလိုခံစားရလေသည်။ဝေ့ချန်၏ယုံကြည်ခြင်းကို ခံရသဖြင့်သူဝေ့ချန်၏ယုံကြည်မှုနှင့် ကိုက်ညီအောင်နေမှရမည်။သူ သေချာပေါက် အဖွဲ့ကိုဦးဆောင်ပြီးမက်စ်ပရောဂျက်အတွက်အမှတ်ပြည့်အဖြေလွှာကိုအပ်နိုင်အောင်လုပ်မယ်...

မားကတ်တင်းဌာနက ဝန်ထမ်းများက ယခင်ကလုဝေ့နှင့်အလုပ်အတူတူလုပ်ခဲ့ကြသဖြင့် သူ၏လုပ်ရည်ကိုင်ရည်ကို သိသည်မှာသဘာဝဖြစ်သည်။ကနဦးရှော့ရမှုအပြီးမှာ သူတို့လည်းပြဿနာမရှိဟုခံစားရလေသည်။မှန်ပေသည်၊လက်ထောက်အထွေထွေမန်နေဂျာဝေ့ဦးဆောင်လျှင် ပိုကောင်းမည်ဟုသူတို့လည်း တိတ်တိတ်လေး တွေးကြပေသည်။

ကိစ္စကပြေလည်သွားပြီဖြစ်သည်။

တချို့လူများ၏စိတ်ထဲမှာ သံသယများရှိနေကြသော်လည်း သူတို့ ဝေ့ချန်၏ဆန္ဒကိုမဆန်ကျင်ခဲ့ကြပေ။ထိုအပြင် ဝေ့ချန်၏သဘောထားက သူတို့ကိုမျှော်လင်ချက်တချို့ပေးနေသည်။ထိုမျှော်လင့်ချက်က သူတို့ကို မင်းကလုံလောက်အောင်တော်သရွေ့ လက်ထောက်အထွေထွေမန်နေဂျာဝေ့၏လက်အောက်မှာ ကိုယ့်ကိုကိုယ်ပြသရန်အခွင့်အရေးရလိမ့်မည်ဟုပြောနေသည်။

ပြန်စဥ်းစားကြည့်လျှင် ဝေ့ချန် ချန်ဖုန်းအုပ်စုကိုဝင်မလာခင်က လုဝေ့သည် မားကတ်တင်းဌာန၏လက်ထောက်မန်နေဂျာတစ်ယောက်မျှသာဖြစ်လေသည်။သူက ယခင်မားကတ်တင်းမန်နေဂျာ၏ဖိနှိပ်ခြင်းကိုခံရပြီး ဘာတစ်ခုမှမလုပ်နိုင်ခဲ့ပေ။ထိုအခြေအနေက အရေပြားတစ်လက်မတိုင်းမှာ ယုံကြည်မှုတို့ဖော်ပြနေသည့် သူတို့ရှေ့မှ လက်ရှိလုဝေ့နှင့် လားလားမှမတူသည်က အတိအကျပင်ဖြစ်သည်။

...

လုဝေ့ကို မက်စ်ပရောဂျက်၏ခေါင်းဆောင်အဖြစ်တိုးပေးပြီးနောက် သူကတကယ်ကို မက်စ်ပရောဂျက်ကို ဆက်မကွပ်ကဲတော့ပေ။သို့ရာတွင်တခြားသူများက အဆိုးမြင်နေကြသော်လည်း လုဝေ့က တစ်လအတွင်းမှာပဲအမှတ်ပြည့်အဖြေလွှာကိုအပ်နိုင်ခဲ့ပြီး ယင်းက ကုမ္ပဏီတစ်ခုလုံးကို လုဝေ့အား အမြင်သစ်တမျိုးဖြင့်ကြည့်စေခဲ့လေသည်။ထို့အပြင် သူတို့ ဝေ့ချန်၏အမြင်ကိုလည်းအံ့ဩသွားကြသည်။

ယခု ချန်ဖုန်းအုပ်စုမှလူများ ဝေ့ချန်ကိုထည့်ပြောသည့်အခါ သူတို့ မနာလိုဖြစ်သလို အားလည်းကျကြသည်။

ပြောစမ်းပါ...သူက အရမ်းတော်နေတဲ့ဟာ...သူ့လက်အောက်ငယ်သားတွေကပါဘာလို့ဒီလောက်တော်နေရတာလဲ...

ဘုရားသခင်က တကယ်မတရားဘူး...ဝေ့ချန်အတွက် တံခါးတစ်ချပ်ဖွင့်ပေးတဲ့အပြင်ကို မြင်ကွင်းကျယ်အမိုးမှန်ကွက်ပါဖွင့်ပေးလိုက်သေးတယ်...သူများတွေမှာ တအံ့တဩမော့ကြည့်ရုံတတ်နိုင်တယ်...

ချန်ယွင်ဇန်းက ရောက်လာလာချင်းမှာပဲ ဝေ့ချန်၏နည်းဗျူဟာများကြောင့်လှုံ့ဆော်ခံလိုက်ရ၍ဖြစ်မည်။ပြီးခဲ့သည်လမှာ ချန်ယွင်ဇန်းကအလွန်ပင်ရိုးသားနေခဲ့ပြီး သူ့အလုပ်သူပဲလုပ်နေခဲ့သည်။ဝေ့ချန်က မားကတ်တင်းဌာနကို တာဝန်မယူရတော့သော်လည်း လက်ထောက်အထွေထွေမန်နေဂျာတစ်ယောက်အနေဖြင့် တခြားဌာနများကိုကြီးကြပ်ရဆဲဖြစ်သည်။

ဥပမာအားဖြင့် အတော်လေးအသုံးမဝင်သော ထောက်ပို့ဌာနဖြစ်သည်။

ပတ္တမြားမှန်လျှင်နွံမနစ်ဟူသောစကားလိုပါပင်။တခြားသူများက ဝေ့ချန်၏လက်ရှိရာထူးကအသုံးမဝင်ဟုထင်ကြသော်လည်း ဝေ့ချန်၏တစ်လတာတက်ကြွသောနည်းဗျူဟာများအောက်မှာ သူ့နာမည်အောက်ကဌာနမှာ မိုးနှင့်မြေကြီးလိုပြောင်းလဲသွားခဲ့လေသည်။

ဤပြောင်းလဲမှုက တခြားသူများအမြင်အရသာပြောင်းလဲခြင်းမဟုတ်ဘဲ လက်တွေ့မျက်မြင်ပြောင်းလဲခြင်းဖြစ်၏။

ဝေ့ချန် လက်ထောက်အထွေထွေမန်နေဂျာရာထူးကိုယူလိုက်ချိန်မှစ၍ ကုမ္ပဏီတစ်ခုလုံးက ပုံစံအသစ်တစ်မျိုးအဖြစ် လုံးလုံးလျားလျားပြောင်းလဲသွားခဲ့သည်။

တံခါးမှာရပ်စောင့်နေကြသောလုံခြုံရေးများ အကုန်လုံး သတိအပြည့်နှင့်တက်ကြွနေကြပြီး အားမန်အပြည့်နှင့် မားမားမတ်မတ်ရပ်နေကြသည်။ဌာနတစ်ခုချင်းစီကြားက ရုံးခန်းထောက်ပို့ပစ္စည်းလည်ပတ်မှုမှာလည်း ပိုပြီး အချိန်မီလာသည်။ရံဖန်ရံခါ ဖုန်းတစ်ကောဆက်လိုက်သည်နှင့် ရုံးခန်းသုံးထောက်ပို့ပစ္စည်းအသစ်များက ဖုန်းဆက်သူဆီသို့ဆယ်မိနစ်အတွင်းရောက်လာတတ်သည်။

ချန်ဖုန်းအုပ်စုမှာ ဝန်ထမ်းကန်တင်းရှိပေမဲ့ ယခင်ကဝန်ထမ်းများက ဝန်ထမ်းကန်တင်းမှာမစားချင်ကြပေ။သူတို့က ဝန်ထမ်းကန်တင်းမှာ မကောင်းမကန်း နေ့လည်စာအလကားစားသည်ထက် နေပူပူမိုးရွာရွာအပြင်ထွက်စားချင်ကြသည်။

သို့ပေမဲ့ ဝေ့ချန် ထောက်ပို့ဌာနကို တာဝန်ယူပြီးနောက်မှာ ဝန်ထမ်းကန်တင်းမှ ဟင်းများက လုံးလုံးလျားလျားပြောင်းလဲသွားခဲ့သည်။အသားရော အသီးအရွက်ပါပါလာပြီး အာဟာရမျှတမှုရှိလေသည်။အဓိကအချက်က အရသာက အပြင်ဘက်ကစားသောက်ဆိုင်များထက်မနိမ့်ပေ။ထမင်းစားပြီး အချိုတည်းရန် သစ်သီများနှင့်အချိုပွဲများပါရှိသေးသည်။

တကယ်ကို နိဗ္ဗာန်ပင်။

ဝန်ထမ်းကန်တင်းနှင့်ပတ်သက်သည့်ပြဿနာကြောင့် ထောက်ပို့ဌာန၏ဒါရိုက်တာသည် ဝေ့ချန်၏တိုက်ရိုက်ရာထူးမှဖယ်ရှားခြင်းခံလိုက်ရပြီး ကုမ္ပဏီ၏စည်းကမ်းထိန်းသိမ်းရေးကော်မတီ၏ခေါ်သွားခြင်းခံရလေသည်။

စစ်ဆေးရေးရလဒ်များအရ ထောက်ပို့ဌာန၏ဒါရိုက်တာကယွမ်သန်းရာနှင့်ချီအလွဲသုံးစားလုပ်ခဲ့ပြီး သူ၏စားသောက်ရေးအလေ့အကျင့်များမှာလည်း တကယ်ကို အမြင်မတင့်စရာပင်။

ဝေ့ချန်က ပြတ်သားလွန်း၍ ဘာမျက်နှာမှမထောက်တတ်ပေ။တစ်ဖက်လူမှာ နောက်ခံရှိသည်ဖြစ်စေ၊မရှိသည်ဖြစ်စေ ပြဿနာရှိကြောင်းတွေ့ရှိသည့်နှင့်နောက်တစ်နေ့မှာတန်း အရေးယူခြင်းခံရလေသည်။

ထောက်ပို့ဌာနက မည်မျှအမြတ်ရသည်ကို လူတိုင်းသိသွားကြသည်။ရုံးဖွင့်ရက်များမှာပင် ထောက်ပို့ဌာန၏တချို့ခေါင်းဆောင်များက ဝဖီးနေကြသည်မှာမဆန်းတော့ပေ။နောက်ဆုံးတွင် သူတို့က ဤမျှပိုက်ဆံအများကြီးကိုအလွဲသုံးစားလုပ်ထားကြသည်။

သို့ပေမဲ့ မီးကတခြားဌာနများကိုမကူးခဲ့ပါချေ။တခြားဌာနကဝန်ထမ်းများက ထိုသို့ဖြစ်သွားသည်ကိုမြင်ရသည်အားပျော်နေကြသည်မှာသဘာဝဖြစ်သည်။မည်သို့ပင်ဖြစ်စေ သူတို့တစ်ခုမှဤမျှလောက်သက်တောင့်သက်သာမရှိဖူးပေ။သူတို့၏အလုပ်စွမ်းရည်ကလည်း အဆများစွာတိုးလာသည်။

သို့သော် အပေါ်ယံစိတ်လှုပ်ရှားမှုကိုသာမြင်သည့်သူများနှင့်မတူဘဲ ဝေ့ချန်၏မီးက ထောက်ပို့ဌာနတစ်ခုထဲကိုလောင်နိုင်သည်ဟု သူတို့ကထင်နေကြသည်။ဝေ့ချန်၏လက်ရှိရာထူးဖြင့်ဆိုပါက သူကထောက်ပို့ဌာနကိုပဲ မီးရှို့နိုင်သည်။သို့ပေမဲ့ ဝေ့ချန်၏နောက်ကလူက ချန်ဖုန်းအုပ်စု၏ ဥက္ကဋ္ဌ ရှန့်ကျားချီ ဖြစ်သည်ကိုသူတို့မမြင်ကြပေ။

ရှန့်ကျားချီ၏ဖွင့်ဟပြောစရာမလိုသော ခွင့်ပြုချက်မပါလျှင် ထောက်ပို့ဌာနက မီးလည်းလောင်နိုင်မည်မဟုတ်ပေ။

ဒါဆို ရှန့်ကျားချီက ဘာလို့ဝေ့ချန်ထောက်ပို့ဌာနမှာမီးရှို့တာကို မျက်စိမှိတ်လိုက်လျောထားတာလဲ...

ဤမေးခွန်းက နှိုက်နှိုက်ချွတ်ချွတ်စုံစူးစမ်းရှာဖွေရန်ထိုက်တန်ပေ၏။

ဤသည်ကို သတိပြုမိသူများက အကြောင်းပြချက်ကို အနည်းနှင့်အများ ခန့်မှန်းမိကြသည်။

ဤအခိုက်အတန့်မှာ လူတိုင်းက အန္တရာယ်ရှိနေကြလေပြီ။အကြီးတန်းအလုပ်အမှုဆောင်များစွာက ထောက်ပို့ဌာနက စတင်သည့်မီးက ပျံ့လာပြီး သူတို့ကိုပါလောင်မည်စိုး၍ အကြောက်ကြောက်အလန့်လန့်ဖြစ်ကုန်ကြသည်။

သို့ပေမဲ့ ရှန့်ကျားချီက မီးကိုဆက်ကြီးခိုင်းရန်အစီအစဥ်ရှိပုံမရပေ။သူက ကုမ္ပဏီတစ်ခုလုံ၏လေထုပြောင်းလဲမှုကိုသတိမပြုမိသည့်အတိုင်း နေ့ရက်တိုင်းပြုံးပြုံးရွှင်ရွှင်ရှိနေလေသည်။

ယနေ့တွင် ဝေ့ချန်ပုံမှန်အတိုင်းအလုပ်သွားခဲ့သည်။သို့ပေမဲ့ သူရုံးခန်းတံခါးနားကိုရောက်ချိန်မှာ တံခါးလက်ကိုင်တွင်ညှပ်ထားသောစာတစ်စောင်ကိုတွေ့လိုက်ရသည်။ဝေ့ချန်က စာကိုမပြောင်းမလဲအမူအရာဖြင့်ပဲ ဆွဲယူလိုက်ပြီး တံခါးဖွင့်ကာရုံးခန်းထဲဝင်လာလိုက်သည်။

စာက မှင်နီဖြင့်ရေထားခြင်းဖြစ်ကာ စာအိတ်ပေါ်မှာဝေ့ချန်၏နာမည်ကို ရိုးရိုးရှင်းရှင်းရေးထားသည်။စာရေးသူက ဝေ့ချန်ကိူတကယ်မုန်းတီးနေ၍ဖြစ်မည်၊သူက အလွန်ကိုအားစိုက်၍ရေးထားပြီး စာအိတ်ပေါ်မှာအပေါက်များပင်ရှိနေသည်။

စာအိတ်ကိုမဖွင့်ပါဘဲ ဤစာကခြိမ်းခြောက်စာမှန်း ဝေ့ချန်သိလိုက်သည်။အမှန်တွင် ဤအပတ်အတွင်းမှာ ဤသည်က ဝေ့ချန်ရရှိသည့် ပထမဆုံးခြိမ်းခြောက်စာ မဟုတ်ပေ။ခြိမ်းခြောက်စာကို မည်သူပို့သည်နှင့် ပတ်သက်ပြီး ဝေ့ချန်မှာ ကိုယ်ပိုင်ထင်မြင်ချက်များရှိလေသည်။

ပထမနှစ်ကြိမ်တုန်းကတော့ ဝေ့ချန်စာကိုဖွင့်ပြီးတစ်ချက်လောက်ကြည့်ခဲ့သေးသည်။သို့ပေမဲ့ ယခု သူ့မှာ စာကိုဖွင့်ကြည့်ချင်စိတ်ပင်မရှိပေ။အကြောင်းအရာနည်းနည်းလေးကိုပဲ အပြန်ပြန်အလှန်လှန် ရေးထား၍ဝေ့ချန်ပင် အလွတ်ရနေပြီဖြစ်သည်။

ဝေ့ချန် ကွန်ပြူတာကိုဖွင့်ပြီး အလုပ်စလုပ်ရန်ပြင်လိုက်သည်။ကွန်ပြူတာကိုဖွင့်လိုက်သည့်အခိုက်မှာပဲ အလုပ်ရှုပ်သည့်နေတစ်နေ့ကစတင်ခဲ့ပြီဖြစ်သည်။

ခြိမ်းခြောက်စာက စားပွဲပေါ်မှာငြိမ်သက်စွာလှဲလျောင်းနေပြီး ဝေ့ချန်၏လုံးလုံးလျားလျား လျစ်လျူရှုခြင်းကိုခံထားရလေသည်။

ချန်လီအနားမှာမရှိသည်နှင့် ဝေ့ချန်ကအလုပ်ရှုပ်နေချိန်မှာဆိုလျှင် စားဖို့အိပ်ဖို့ကိုအလွယ်တကူမေ့သွားတတ်သည်။နေ့လည်စာစားနားချိန်အတွင်းမှာ ဝေ့ချန် တစ်လုပ်နှစ်လုပ်လောက်ခပ်သွက်သွက်စားပြီး ရုံးခန်းပြန်ကာ လက်ထဲမှအလုပ်ကိုဆက်လုပ်လေသည်။

မကြာမီ နာရီ၏လက်တံများကအလုပ်ဆင်းမည့်အချိန်ကိုပြသလာသည်။ပုံမှန်ဤအချိန်ဆိုလျှင် ချန်လီကကျောင်းဆင်း၍အိမ်ကိုရောက်နေပြီဖြစ်သည်။ဝေ့ချန်ကချန်လီ၏အချိန်ကိုသိသဖြင့် ဘယ်တုန်းကမှအချိန်ပိုမဆင်းခဲ့ပေ။အချိန်ကျလာသည်နှင့်သူက

မပြီးစီးသေးသောအလုပ်များကိုသိမ်းပြီးအိမ်ပြန်ရန်ပြင်လိမ့်မည်ဖြစ်သည်။

ဝေ့ချန်မတ်တပ်ထရပ်လိုက်ချိန်မှာ ရုတ်တရတ်သူ့နှလုံးသားထဲမှာ ရင်တလှပ်လှပ်ဖြစ်လာသလိုခံစားလိုက်ရသည်။သူတစ်ကိုယ်လုံး တုန်ယင်လာပြီး ထိုင်ခုံပေါ် ပစ်ကျသွားသည်။သူ့အကြည့်များက ယနေ့ပို့လာသည့်မင်နီဖြင့်ရေးထားသောခြိမ်းခြောက်စာပေါ်ကိုရောက်သွားသည်။

ထိုအခိုက်အတန့်တွင် ဝေ့ချန် သူ့ကိုယ်သူဘာတွေးနေမှန်းမသိခဲ့ပေ။သူလက်ဆန့်လိုက်ပြီး ခြိမ်းခြောက်စာကိုလှမ်းယူခဲ့သည်။သူ့လက်ချောင်းများက မထိန်းနိုင်ဘဲ တုန်ယင်နေခဲ့သည်။သူ့လက်ကခြိမ်းခြောက်စာနားကို တိုးကပ်သွားရင်း သူ့နှလုံးသားထဲရှိမသက်မသာဖြစ်မှုက ပိုပိုပြင်းထန်လာသည်။

သူ့လက်ကခြိမ်းခြောက်စာကိုထိမိလိုက်သည့်အခိုက်မှာ ဝေ့ချန် ဓာတ်လိုက်ခံရသည့်အတိုင်း စာကိုအလျင်အမြန်ယူပြီး တုန်တုန်ယင်ယင်နှင့်ဖွင့်လိုက်သည်။

ဤတစ်ခေါက်တွင် စာအိတ်ထဲမှာမင်နီဖြင့်ရေးထားသောစာရှိမနေဘဲ ဓာတ်ပုံတစ်ပုံပဲရှိနေပြီး ချန်လီQတက္ကသိုလ်ဝင်ပေါက်မှ စက်ဘီးတွန်းထွက်လာသည့်ပုံပဲဖြစ်လေတော့သည်။

<< >>

💘

Prev Next