Chapter 67

💙 Chapter 67 : ရှီရှီ ပျောက်ဆုံးနေသည်။

ရှောင်ကျန်းတန့်သည် ဆေးရုံတွင် ဆေးစစ်ရန်အတွက် ဝမ်လီချမ်နှင့်အတူ လိုက်ပါလာသော်လည်း ဝမ်လီချမ်က သူ့မိသားစုအား ပြောပြရန် ငြင်းဆိုခဲ့သည်။

စစ်ဆေးပြီးနောက် ဝမ်လီချမ်တွင် နံရိုးနှစ်ချောင်း ကျိုးသွားကာ ခန္ဓာကိုယ်မှာလည်း ဒဏ်ရာများစွာ ရရှိခဲ့သည်ကို တွေ့ရှိခဲ့ရသောကြောင့် ဦးစွာ စောင့်ကြည့်ရန် ဆေးရုံတင်ထားဖို့ လိုအပ်သည်။

ဆေးရုံတက်ခြင်း လုပ်ငန်းစဉ်များကို ပြီးမြောက်ပြီးဖြစ်သော်လည်း ဝမ်လီချမ်သည် ဆေးရုံမတက်ချင်ဘဲ အိမ်ပြန်ချင်မိသည်။

 "မင်းဟာ ငါ့ယောက်ဖဆိုလည်းဟုတ်တယ်၊ ညီလေးဆိုလည်း ဟုတ်တယ်၊ ဒါမှမဟုတ် ငါ့ရဲ့သူဌေးလည်း ဟုတ်တာပဲ၊ ဒါကြောင့် ငါ မင်းနဲ့အတူ ရှိကိုရှိနေရမယ်"  

ဝမ်လီချမ်၏ ဒဏ်ရာအကြောင်း ဆရာဝန်က ပြောသည်ကို ကြားပြီးကတည်းက ရှောင်ကျန်းတန့် စဉ်းစားပြီးဖြစ်သည်။ မနက်ဖြန် ချန်သဲရုံကို ပြင်းပြင်းထန်ထန် ရိုက်နှက်ဖို့ လူတစ်ယောက်ကို ခေါ်သွားရမှာပင်။

 "ကျွန်တော် တစ်ယောက်တည်း လှုပ်ရှားနိုင်ပါတယ်၊ ဒါကြောင့် ဘယ်သူ့ကိုမှ မလိုပါဘူး"  

တကယ်တမ်းက သူ မလှုပ်နိုင်တော့တာလည်း မဟုတ်ဘူး၊ နှစ်ရက်လောက် စောင့်ကြည့်ပြီးရင် ဆေးရုံက ဆင်းနိုင်တယ်မလား။

နောက်တစ်နေ့မနက် စောစောစီးစီးတွင် ရှောင်ကျန်းတန့်သည် ပစ္စည်းများကို ဝယ်ပြီး ဝမ်လီချမ်အာ ပေးပြီးနောက် အစ်ကိုဖြစ်သူ ရှောင်ကျန်းကျွင်းကို ဖုန်းဆက်ခဲ့သည်။

 "အစ်ကို၊ ဝမ်လီချမ် နံရိုးနှစ်ချောင်းကျိုးသွားတယ်၊အဲ့ဒီေကာင်ကို ကျွန်တော် လက်စားချေသင့်သလား"

သူတို့မိသားစု၏ အခြေအနေက ယခုဆို ပြောစရာမရှိအောင်ကောင်းနေပြီး သူတို့အားလုံးမှာလည်း ဝမ်လီချမ်ကြောင့် တယ်လီဖုန်းများ ရှိနေခြင်းပင်။ ချန်သဲရုံ၏ လုပ်ရပ်က အတော်များလွန်သည်။သူ ချန်သဲရုံကို ဘာမှမလုပ်ရလျှင် သူ့ကိုယ်သူပင် ယူကျုံးရမှာမဟုတ်တော့။

ရှောင်ကျန်းကျွင်းသည် ရှောင်ကျန်းတန့်ထံမှ ဖုန်းလက်ခံရရှိပြီးနောက် ချက်ချင်းဆိုသလိုပင် ဆေးရုံသို့ အမြန်လိုက်လာခဲ့သည်။ ထို့နောက် ညီအစ်ကိုအချို့ကို ခေါ်ပြီး ချန်သဲရုံ ၏အိမ်သို့ အတူတူသွားကြသည်။

ချန်သဲရုံသည် ယခုဆို ထွက်ပြေးသွားခဲ့ပြီး မိခင်၊ ဇနီးနှင့် သားကိုသာ အိမ်တွင် ထားခဲ့သည်။ သူတို့ခေါ်လာသူများသည် အမျိုးသမီးများနှင့် ကလေးကို အနိုင်မကျင့်တတ်ကြပေ။ထို့ကြောင့် မပြန်သေးခင် ရှောင်ကျန်းတန့်သည် မာဟုန်ယင်းထံသို့ သွားကာ

 "မင်းက ချန်သဲရုံရဲ့မိန်းမလား၊မင်းနာမည်ဘယ်လိုခေါ်လဲ"

 "မာဟုန်ယင်းပါ"  

ချန်သဲရုံသည် အပြင်ဘက်တွင် ပြဿနာရှာလာနိုင်သည်ဟု မာဟုန်ယင်း ခန့်မှန်းထားခဲ့သည်။ မနေ့ကလည်း အိမ်ကို လူတစ်ယောက် ရောက်လာပြီး ချန်သဲရုံကို ရိုက်သွားသည်။ထိုလူ အရိုက်ခံရပြီးနောက် ချန်သဲရုံက ခရီးဆောင်အိတ်များကို ထုပ်ပိုးပြီး တောင်ဘက်ပိုင်းကို ခရီးသွားတော့မည်ဟု ပြောသည်။ယနေ့တွင်လည်း အခြားလူတစ်စုရောက်လာပြီး ချန်သဲရုံကို ရှာဖွေနေပြန်သည်။  

 "မာဟုန်ယင်း.....မင်း အတော်အကြံပက်စက်တဲ့ကောင်ပါလား ချန်သဲရုံ" 

ငါ့ညီမနဲ့ နာမည်တူတဲ့ မယားကို ရှာထားတာက အရမ်းကို စိတ်ပျက်စရာကောင်းတာပဲ။

ရှောင်ဟုန်ယန်သည် မနေ့ညက အိပ်ရာေနာက်ကျမှ ဝင်ဖြစ်သည်။သမီးက သူ့အဖေကိုလွမ်းကာ တအီအီငိုနေသည်။ မနေ့ညက သူမ သမီးဖြစ်သူကို ရက်စက်စွာ ပထမဆုံး အကြိမ် ရိုက်နှက်ဖူးခြင်းပင်။ ဝမ်လီချမ်သည် သူမ အိမ်သို့ ပြန်သွားကြောင်းသိသော်လည်း ယခုထိ အိမ်ကိုလိုက်ရှာခြင်းမရှိပေ။ 

သူမ အဖေက သူ့ကို ဘယ်လိုလုပ် တားနိုင်ပါ့မလဲ။ သူ့အချစ်ဆုံးသမီးကိုတောင် လာမတွေ့သေးတာ ဘာကြောင့်လဲ၊ သူမတို့နှစ်ယောက်ရဲ့ နှစ်ရှည်လများ တည်ဆောက်လာတဲ့ အချစ်ရေး၊ အိမ်ထောင်ရေးက တကယ်တမ်းတော့ အတုအယောင်ဖြစ်နေတာလား။

သမီးေလးက နွေရာသီ အားလပ်ရက်ဖြစ်၍ မူကြိုတက်စရာမလိုပေ။ ယောက္ခမနှင့် ဝမ်လီချမ်က အိမ်မှာရှိစဉ် ကလေးထိန်းပေးကြသည်။ယခု သူမ၏သမီးကို ရှောင်တရှင်းဆီကိုသာ အပ်ထားနိုင်ပြီး သူမ အလုပ်သွားရမည်။

ရှောင်ဟုန်ယန် ထွက်သွားသောအခါ ရှောင်ဝမ်ရှီ မနိုးသေးပေ။ သူမသည် မနေ့ညက အတော်လေး အရိုက်ခံရကာ နောက်ဆုံးတွင် ငိုပြီးနောက် အိပ်ပျော်သွားခဲ့သည်။နိုးလာသောအခါတွင် သူမသည် ထူးဆန်းသော အခန်းတစ်ခုတွင် အိပ်ပျော်နေသည်ကို တွေ့လိုက်ရသည်။သူမ အိပ်ရာကထပြီး ဖိနပ်စီးလိိုက်သည်အထိ သူမ၏ မိဘများနှင့် အဖွားကို ရှာမတွေ့ေသးပေ။သို့ဖြင့် သူမ ဆိုဖာပေါ်ထိုင်ကာ တစ်ယောက်တည်း ငိုပါလေတာ့သည်။

ရှောင်တရှင်းသည် မနက်စာဝယ်ရန် ဆင်းလာသောအခါ ရှောင်ဝမ်ရှီ နိုးလာသည်နှင့် ကြုံလိုက်ရသည်။သူ တံခါးမဖွင့်မီ ရှောင်ဝမ်ရှီ၏ ငိုသံကို ကြားလိုက်ရသည်။ သူ ဧည့်ခန်းထဲသို့ဝင်သွားသောအခါတွင် ရှောင်ဝမ်ရှီသည် ဆိုဖာပေါ်တွင် ထိုင်ကာ မျက်ရည်များကို သုတ်နေသည်။

 "မငိုပါနဲ့ ရှီရှီ ၊ အဘိုး သမီးအတွက် မနက်စာ ဝယ်လာခဲ့တာ၊ တို့ဟူးနှောင်းလေ၊ ရှီရှီ ကြိုက်လား"  

သူ အောက်ထပ်ကနေ၍ မြေးမလေးအတွက် တို့ဟူးနှောင်းသွားဝယ်လာသည်။ရှောင်ဟုန်ယန်က ရှီရှီသည် တို့ဟူးနှောင်းအလွန်ကြိုက်သည်ဟုပြောပြသည်။ 

ရှောင်ဝမ်ရှီသည် အစားကို မြင်သောအခါ ချက်ချင်းအငိုတိတ်ပြီး မုန့်ကို လက်ဖြင့်လှမ်းဆွဲသည်။ ရှောင်တရှင်းက သူမကို ယူခွင့်မပေးသောအခါ၊သူမ ရှောင်တရှင်းကို သနားစဖွယ် မျက်လုံးဝိုင်းလေးဖြင့် ကြည့်လိုက်သည်။

ရှောင်ဝမ်ရှီနှင့် ရှောင်တရှင်း တို့သည် မရင်းနှီးကြသလို ဝမ်လီချမ်သည် များသောအားဖြင့် ဘယ်ကိုသွားသွား ရှောင်ဝမ်ရှီကို ခေါ်သွားလေ့ရှိသည်၊ ဆိုလိုသည်မှာ ရှောင်ဝမ်ရှီသည် တရုတ်နှစ်သစ်ကူးကာလတွင်သာ ရှောင်တရှင်း ထံသို့ လာလေ့ရှိပြီး များသောအားဖြင့် အလာနည်းပါးသည်။

ရှောင်တရှင်းသည် ထိုကဲ့သို့သော ကလေးလေးကို ဘယ်လိုချော့မြှူရမှန်းမသိသလို၊ ရှောင်ဝမ်ရှီသည်လည်း ရှောင်တရှင်းကို သိပ်ဂရုမစိုက်ပေ။ သူမဘာသာ အရုပ်လေးများနှင့် ကစားနေပြီး တစ်ခါတစ်လေ ရှောင်တရှင်းကို ခိုးပြီး တစ်ချက်သာ ကြည့်တတ်သည်။

သူမ မိဘများကို ရှာချင်သည်ဟု ပြောတိုင်း ရှောင်တရှင်းက သူတို့လာလိမ့်မည်ဟုသာ ပြောသည်။ အဘိုးပြောစကားကို နားထောင်ရမည်ဟု မနေ့က သူမ၏အမေကပြောသော်လည်း၊သူမ ချစ်သော အဖေဖြစ်သူကတော့ ပေါ်မလာသေးသလို တွေ့လည်းမတွေ့ရသေးပေ။ 

ရှောင်တရှင်း ချက်ပြုတ်နေစဉ် မွန်းတည့်ချိန်တွင် ရှောင်ဝမ်ရှီသည် တံခါးကိုဖွင့်ပြီး အပြင်ကိုပြေးထွက်လာခဲ့သည်။ ရှောင်တရှင်းသည် ဟင်းတစ်မျိုးချက်ပြုတ်ပြီးနောက်၊ တံခါးက ပွင့်နေသည်ကိုတွေ့လိုက်ရ၏။ ရှောင်ဝမ်ရှီ ဧည့်ခန်းတွင် မရှိနေသည်ကို တွေ့ရသော် သူ အကြိမ်အနည်းငယ် ခေါ်ကြည့်ပြီးနောက်တွင် ပြန်မထူးလာသောကြောင့် သော့ကိုအမြန်ယူကာ ရှောင်ဝမ်ရှီကိုရှာရန် အောက်ထပ်သို့ဆင်းလာခဲ့သည်။

လမ်းသွားလမ်းလာ လူပေါင်းများစွာကို မေးမြန်းပြီးနောက် ခြံဝင်းထဲမှ ကလေးမလေးတစ်ဦး တစ်ယောက်တည်း လမ်းလျှောက်လာသည်ကို တွေ့လိုက်ရကြောင်း သတင်းရသွားသည်။ သူ ဘယ်ကိုကြည့်ရမှန်းမသိဘဲ လမ်းပေါ်မှာ ရပ်နေခဲ့မိသည်။ မွန်းတည့်ချိန်ဖြစ်၍ လမ်းပေါ်၌ လူသိပ်မရှိ။ တစ်ချက်ကြည့်လိုက်လျှင်ဖြင့် ရှောင်ဝမ်ရှီ၏ အရိပ်အယောင်ကို လုံးဝမမြင်ရပေ။

ရှောင်ဝမ်ရှီ ပျောက်ဆုံးသွားကြောင်း သူ့သမီးကို မပြောဝံ့သောကြောင့် အခြားကလေး သုံးယောက်ကို ခေါ်ကာ ရှောင်ဝမ်ရှီကို အတူတူရှာေပးဖို့ ချော့ပြောရလေသည်။ 

ရှောင်ကျန်းကျွင်းနှင့် ရှောင်ကျန်းတန့်သည် ချန်သဲရုံ၏ အိမ်မှပြန်လာပြီးနောက်ဆေးရုံသို့သွားခဲ့သည်။ ရှောင်ကျန်းကျွင်းသည် သတင်းစာကိစ္စအကြောင်း သိပြီးဖြစ်သည်။သူက ရှောင်ကျန်းတန့်လိုမဟုတ်၊ ဝမ်လီချမ်ကို မယုံကြည်ပေ။ထိုကိစ္စက ဟောင်ကောင်မှာ ဖြစ်ပွားခဲ့ခြင်းဖြစ်ပြီး ထိုအမျိုးသမီးကလည်း သာမန်လူ မဟုတ်ပေ။ အကယ်၍ ဝမ်လီချမ်သည် ထိုအမျိုးသမီးနှင့် ပတ်သတ်ပြီး ဟောင်ကောင်သို့ ထွက်သွားခဲ့ပါက၊ သူ့ညီမလေး ဘာလုပ်မည်နည်း။

ရှောင်ကျန်းကျွင်းက ရှောင်ကျန်းတန့်ကို အပြင်သို့လွှတ်လိုက်ပြီး သူကိုယ်တိုင် ဝမ်လီချမ် မေးမြန်းသည်။

 "လီချမ် သတင်းစာထဲက ဇာတ်လမ်းက အမှန်လား"  

ဝမ်လီချမ် ပြောသည့်စကားကို သူကိုယ်တိုင်ကြားချင်သည်။

 “မဟုတ်ဘူး၊သတင်းက မှားနေတာပါ၊မျက်မြင် သက်သေ နှစ်ယောက်ရှိပေမယ့် အခု လောလောဆယ် ကျွန်တော့်မှာ သက်သေမရှိဘူး"  

ဝမ်လီချမ် အနည်းငယ် ဝမ်းနည်းမိသည်၊ ဤသည်က ရင်းနှီးသော သူငယ်ချင်းထံမှ နောက်ကျောကို ဓားထိုးခံရသည့် ခံစားချက်မျိုးပင်။ ချန်သဲရုံက သူ့ကို ယခုလို ဆက်ဆံမည်ဟု ဘယ်တုန်းကမှ မတွေးခဲ့မိချေ။

 "မာကျစ်နဲ့ ချန်သဲရုံ လား၊ မင်းပြောတဲ့လူနှစ်ယောက်က...."

မာကျစ်သည် ဝမ်လီချမ်မှာ အပြစ်မရှိကြောင်း သက်သေပြခဲ့ပြီး ချန်သဲရုံသည် ဝမ်လီချမ်က အပြင်ဘက်တွင် မိန်းမရှုပ်နေကြောင်း ပြောခဲ့သည်။ ထို့ကြောင့် ရှောင်ကျန်းကျွင်းသည် သူ ဘာမှမပြောမီ သတင်းစာထဲတွင် ရေးထားသည့်စာကို ဖတ်သင့်သည်ဟု ထင်နေမိသည်။

ချန်သဲရုံက သူ့ညီမလေးကို ချစ်နေရိုးမှန်ပါက၊ ဝမ်လီချမ်ကို လိမ်ညာဂွင်ဆင်ပြီး ဆဲဆိုခြင်း ဖြစ်နိုင်သည်။ မာကျစ်သည် ဝမ်လီချမ် ငှားရမ်းထားသော အလုပ်သမားဖြစ်၍ ဝမ်လီချမ် အတွက် လိမ်လည်ပြောဆိုခြင်းလည်း ဖြစ်နိုင်သည်။

ရှောင်ကျန်းကျွင်းက ရှောင်ကျန်းတန့်ကို ဆေးရုံမှာ ဆက်နေခိုင်းခဲ့သည်။သူက ဝမ်လီချမ်၏ အိမ်သို့ကိုယ်တိုင်သွားခဲ့ပြီး အိမ်တွင်ကျန်ခဲ့သော လက်ကိုင်ဖုန်းအား ယူလာခဲ့သည်။ သတင်းစာကိစ္စကိုလည်း သူ သိချင်သည်။

ရှောင်တရှင်းသည် သားသမီး သုံးယောက်လုံး အိမ်မှာမရှိ၍ အပိုစားသောက်ကုန်ပစ္စည်းဆိုင်ကို ခေါ်ကြည့်သည်။သူ၏ တတိယသားသည် ယနေ့ ဆိုင်သို့ မရောက်လာကြောင်း ဝန်ထမ်းက ပြောသည်။ တစ်ဖန် စားသောက်ကုန်စက်ရုံကို သူ ခေါ်ကြည့်သည်။သူတို့အဆိုအရ သားအကြီးဆုံးက စက်ရုံမှာ မရှိ၊ ဒုတိယသမီးတစ်ယောက်ပဲ ရှိသည်ဟု ဆိုပြန်၏။  

ရှီရှီ ပျောက်သွားသည့် အကြောင်းအား သူ ဒုတိယသမီးကိုပြောပါက၊သမီးဖြစ်သူက ဝမ်လီချမ်၏ အစ်မကို တစ်ဆင့်ပြန်ပြောပြမည်ဟု ပြောသောကြောင့် ရှောင်တရှင်း ပြောပြလိုက်သည်။

ဒုတိယသမီးက ရှောင်တရှင်းအား အပြင်ထွက်မရှာဖို့နှင့် အိမ်မှာသာ ဖုန်းခေါ်လာချိန်ကို စောင့်ဖို့ ပြောနေသော်လည်း သူ ရင်ပူနေရသည်။မြေးမလေးက သူ ကောင်းကောင်းဂရုမစိုက်မိတာကြောင့် ပျောက်သွားခဲ့တာပင်။ 

ရှောင်ဝမ်ရှီ ပျောက်ဆုံးနေကြောင်း ဝူလျန့် သိပြီးနောက်၊ ရှောင်ဝမ်ရှီကို မြင်ဖူးသော ဝမ်မိသားစုနှင့် ရှောင်မိသားစုမှ ဆွေမျိုးများအားလုံးကို ခေါ်ကာ အကုန်အပြင်ထွက်ရှာခိုင်းပြီး အိမ်မှာ လူတစ်ယောက်ကျန်နေခဲ့၍ ဖုန်းဒိုင်ခံဖြေကြားဖို့ ပြောသည်။ စက်ရုံမှာ တွေ့ပါက စက်ရုံကို ချက်ချင်းဖုန်းဆက်ရမည်။ တွေ့လျှင် ဖုန်းခေါ်ပြီး တွေ့သည့်နေရာကို လမ်းပြပေးရမည်။ ဤနည်းအားဖြင့် ကလေးကို တွေ့ပြီးပါက အချိန်နှင့်တစ်ပြေးညီ တွေ့ကြောင်း သိနိုင်ကာ၊ တခြားသူများလည်းး အချိန်မကုန် လူမပင်ပန်းမည်ဖြစ်၏။လူတိုင်းကို ပြောပြီးနောက် ဝူလျန့်သည် ဝမ်လီချမ်ကို ချက်ချင်းဖုန်းဆက်ရန် ကြိုးစားခဲ့သည်။ဝမ်လီချမ်ကို နှစ်သိမ့်ပေးချင်သော်လည်း ဖုန်းပိတ်ထားသည်ကိုတွေ့ရ၏။

ရှောင်ကျန်းကျွင်းသည် ဝမ်လီချမ်၏ လက်ကိုင်ဖုန်းနှင့် အားသွင်းကြိုးကို ယူနေစဉ် တတိယထပ်တွင် သတင်းစာများနှင့် စာများကို တွေ့၍ ဆေးရုံသို့ ပြန်ယူသွားခဲ့သည်။

 သတင်းစာဓာတ်ပုံထဲကလူက တကယ်ပဲ ဝမ်လီချမ်ပင်။

ဒါပေမယ့် သတင်းစာထဲက ပြောတဲ့အတိုင်း ဝမ်လီချမ်က တကယ်ပဲလား။ နိုင်ငံခြားသားက နိုင်ငံခြားသားကို ဆိုလိုတာမဟုတ်လား။ ဝမ်လီချမ်က ပြည်မကြီးသားမလို့ နိုင်ငံခြားသားလို့ ပြောချင်တာလား။

ရှောင်ကျန်းကျွင်းသည် ဖျော်ဖြေရေး အနုပညာရှင်များအကြောင်း သတင်းများ ပြည့်နေသော သတင်းစာ တစ်ခုလုံးကို ဂရုတစိုက် လေ့လာခဲ့သည်။ အိမ်ထောင်ပြုခြင်း၊ အိမ်ထောင်တစ်ဖန် ပြုခြင်း၊ ဖောက်ပြန်ခြင်း၊ ချစ်သူနှင့်ရည်းစားများပြောင်းခြင်း၊ဘယ်မင်းသမီးက ဘယ်သူနှင့် လျှို့ဝှက်ချိန်းတွေ့နေသည်ကို ရှာဖွေတွေ့ရှိခြင်း။စသည်ဖြင့်...

ဤသတင်းစာက သမားရိုးကျသတင်းစာများအပေါ် သူ့အမြင်ကို ချိုးဖျက်လိုက်သည်။ ဒီသတင်းအားလုံးကို သတင်းစာတစ်ခုတည်းမှာ ဘယ်လိုထုတ်ဝေနိုင်တာလဲ။ ယင်းက သတင်းစာထဲတွင် ဝမ်လီချမ်၏ ဖြစ်ရပ်ကို ပို၍ပင် သံသယဖြစ်မိစေသည်။

ဝမ်လီချမ်နဲ့ တဖက်မိန်းမက စကားပြောနေကြတာပါ။ သူတို့ နှစ်ယောက်က တစ်ယောက်နဲ့ တစ်ယောက် တွဲနေတာလည်း မဟုတ်ဘူး၊ သူတို့ နှစ်ယောက် အတူတူ ပြန်သွားတဲ့ ဓါတ်ပုံလည်း မတွေ့ဘူး။ မာကျစ်ပြောသလိုဆို သတင်းစာက လုပ်ကြံဖန်တီးတာ ဖြစ်နိုင်တယ်။

ချန်သဲရုံက သူ့ညီမလေးဆီရေးသည့်စာမှာ အသုံးအနှုန်းက ထူးဆန်းနေသည်။ ချန်သဲရုံသည် စတိုးဆိုင်တွင် သူ့ညီမကို မရီးဟု အမြဲခေါ်သော်လည်း စာထဲတွင် ဟုန်ယန် ဖြစ်‌ေနသည်။

စာပါအကြောင်းအရာကလည်း တစ်မျိုးဖြစ်နေသေးသည်။ စာကြောင်းတိုင်းက ဝမ်လီချမ်ကို ဦးတည်ကာ မကောင်းကြောင်းပြောထားပြီး စာကြောင်းတိုင်းက သူ့အတွက် ကောင်းကြောင်း ရည်ရွယ်နေသည်။ 

ချန်သဲရုံသည် အတန်းပညာမရှိ၊ မူလတန်းကျောင်းပင် မပြီးသေး။ ဟောင်ကောင်မှာ သူ သတင်းစာကို ဘယ်လိုလုပ် ဝယ်တတ်မလဲ။သူ ကိုယ်တိုင် သက်သေမြင်ထား၍သာ ဝမ်လီချမ်၏ သတင်းအမှားကို ထုတ်ဝေသည့် Entertainment Weekly ကို ဝယ်ယူနိုင်ခဲ့ခြင်းဖြစ်သည်။

ဝမ်လီချမ်ပါသော သတင်းသည် အလွန်သေးငယ်သည်။ ဓာတ်ပုံကလည်း သေးငယ်သလို၊ နာမည်လည်းမပါ‌၍ အကြောင်းသိသူများသာ ရှာတွေ့ပေလိမ့်မည်။ချန်သဲရုံ သည် ဤဓာတ်ပုံသည် ဝမ်လီချမ် ဖြစ်ကြောင်း မည်သို့ စိတ်ချနိုင်မည်နည်း။ သူသာ ကွမ်ဝမ်မေ မသိလျှင် ဒါမှမဟုတ် ကွမ်ဝမ်မေနဲ့ ဝမ်လီချမ် တို့ကို အတူတူမမြင်ဖူးလျှင် ယခုလိုမသိနိုင်ပေ။

မည်သို့ပင်ဆိုစေ၊ ရှောင်ကျန်းကျွင်းသည် ဤကိစ္စကို သံသယအပြည့်ဝင်မိပြီး ဘယ်သူ့ကို ယုံကြည်ရမှန်း မသိသော်လည်း ဝမ်လီချမ်ဘက်ကို အနည်းငယ် အလေးသာနေသည်။ အဘယ်ကြောင့်ဆိုသော် ချန်သဲရုံသည် တကယ်ပင် လူကောင်းမဟုတ်သောကြောင့်ဖြစ်သည်။

ဝမ်လီချမ်သည် ဖုန်းကို အားအပြည့်သွင်းပြီးနောက် ဖွင့်လိုက်သော်၊ ဝူလျန့်ထံမှ ဖုန်းခေါ်လာသည်။

 "လီချမ်၊ စိတ်မပူပါနဲ့၊ ငါ ရှီရှီကိုရှာဖို့ လူတွေကို စည်းရုံးထားပြီးပြီ၊ သူ့ကို သေချာရှာတွေ့မှာပါ"

ရှောင်ဝမ်ရှီကို ရှာဖို့ ဝူလျန့် မထွက်လာခင်မှာ ဝမ်လီချမ်ကို ဖုန်းအကြိမ်ကြိမ်ဆက်သည်။ယခုမှသာ ဖုန်းကိုင်လာတာပင်။ 

 "ရှီရှီ ဘာဖြစ်နေတာလဲ "  

ဝမ်လီချမ် စိုးရိမ်တကြီးဖြစ်ကာ အလောတကြီးမေးလိုက်တာကြောင့် ရင်ဘတ်နာကျင်သွားကာ ချွေးများလည်းထွက်လာရသည်။

 "ရှီရှီ ပျောက်သွားတာ၊ မင်း မသိဘူးလား"  

ဝမ်လီချမ်အား ရှီရှီ ပျောက်သွား၍ ယခုရှာနေပြီဖြစ်ကြောင်း ဝူလျန့်မှ ပြောလိုခြင်းဖြစ်သည်။ဖအေဖြစ်ပြီး ဝမ်လီချမ်က ဘာလို့မသိရတာလဲ။ 

ဝမ်လီချမ်နှင့် ဇနီးဖြစ်သူ ရန်ဖြစ်နေသည်ကို စက်ရုံရှိ ဆွေမျိုးများက မသိခဲ့ကြပေ။ ရှောင်ဟုန်ယန်သည် သမီးဖြစ်သူအား ဖအေ့အိမ်သို့ ပြန်ခေါ်သွားခဲ့သည်။ ယခုလည်း ဝမ်လီချမ် ဆေးရုံတင်ထားရသည်။

 "ရှီရှီ ပျောက်သွားတာလား"

ဝမ်လီချမ် ပြော‌ေနသည်ကို နားပါးသော ရှောင်ကျန်းကျွင်း ကြားလိုက်ရသည်။သူ ချက်ချင်းပင် ဝမ်လီချမ်၏ လက်ကိုင်ဖုန်းကို ယူကာ ဝူလျန့် နှင့် စကားပြောလိုက်သည်။

 "ရှီရှီ ပျောက်နေတယ်ဆိုတာ ဘာကိုဆိုလိုတာလဲ"

လင်မယားချင်း စကားများ ရန်ဖြစ်မှုကြောင့် ဝမ်လီချမ်ကို ဆေးရုံတင်ခဲ့ရပြီး ညီမငယ်ကလည်း ဖခင်ဖြစ်သူ၏အိမ်သို့ ပြန်သွားခဲ့သည်။ အခု ရှီရှီတောင် ပျောက်နေပြန်ပြီ။ ဒီမိသားစုလေး တကယ်ပဲ ပြိုကွဲတော့မှာလား။

 "ရှောင်ကျန်းကျွင်းလား၊ မင်း အဖေက စက်ရုံကို ဖုန်းဆက်လာတာ၊သူ ဟင်းချက်နေတုန်း ရှီရှီက တံခါးဖွင့်ပြီး သူ့ဘာသာသူ ထွက်သွားတယ်လို့ပြောတယ်" 

ရှောင်ကျန်းကျွင်းသည် စက်ရုံတွင်မရှိသောကြောင့် ဈေးရောင်းရန်ထွက်သွားသည်ဟု ဝူလျန့် အစက ထင်ခဲ့သည်၊ သူက ဘာလို့ ဝမ်လီချမ်နဲ့ အတူရှိနေရတာလဲ။ရှီရှီ ပျောက်သွားတာကို သူတို့နှစ်ယောက်လုံး မသိခဲ့ကြဘူးလား။

 "ဝမ်လီချမ် နံရိုးနှစ်ချောင်းကျိုးလို့ အခု ဆေးရုံတက်နေရတာ၊ဒါဆို ရှောင်ကျန်းတန့်နဲ့ ကျွန်တော် ချက်ချင်း လိုက်ရှာဖို့ သွားလိုက်ပါ့မယ်။"

အဖြစ်အပျက်များက ရှုပ်ထွေးနေ၍ ဝမ်လီချမ်၏ ဒဏ်ရာနှင့် ဆေးရုံတက်ရသည့်အကြောင်း ရှောင်ကျန်းကျွင်း လျှို့ဝှက်မထားတော့ပေ။ယခုလောလောဆယ် ရှောင်ဝမ်ရှီ ကိုရှာ‌ေတွ့ဖို့ အရေးကြီးသည်။

xxxxxx💙