Chapter 70

💙‌Chapter 70- ရာထူးတိုးခြင်း

ရှောင်ဟုန်ယန်သည် အိမ်ပြန်ရောက်ပြီးနောက် ဝမ်လီချမ်ကို ဘာမှလုပ်ခွင့်မပေးဘဲ အလုပ်ဆင်းပြီးနောက် သူ့ဘေးနားတွင်နေကာ သူလိုအပ်သမျှကို ပေးပြီး သူ့ကို အိပ်ရာမထစေခဲ့ပေ။

ယခင်က သူသည် ရေမချိုးဘဲ ရေပတ်သာတိုက်သည်။ယခု ရှောင်ဟုန်ယန် ပြန်ရောက်လာ‌ေသာ် နေ့တိုင်း သူ့ကို ရေချိုးပေးသည်။သူ့မှာ ငယ်စဉ်ကလေးဘဝသို့ ပြန်ရောက်သွားသလို ခံစားရသည်။

ရှောင်ဟုန်ယန်က သူ့ကို ရေချိုးပေးသည့်အခါတိုင်း သူမကိုပါ မတော်တဆ ရေစိုသွားပြီး နောက်ပိုင်းမှာ ဝမ်လီချမ်နှင့် အတူ ရေချိုးခဲ့သည်။ နေ့တိုင်း ရေအတူချိုးသော်လည်း မြင်သာမြင်ရ၊ မကြင်ရဖြစ်နေ၍ သူ အတော်စိတ်ဆိုးမိ၏။

သူ့အတွက် ကယ်လ်စီယမ်ဓာတ် ဖြည့်စွက်ရန် လျှိုဖုန်းကျန်းသည် အရိုးစွပ်ပြုတ်ကို နေ့တိုင်း ပြုတ်‌သည်။ ဝမ်လီချမ် နေ့တိုင်း အများကြီးစားပြီး လေ့ကျင့်ခန်းနည်းနည်းလုပ်ရသည်။သို့သော် ဝမ်းချုပ်လာတာကြောင့် ဆေးပါသောက်ရသည်။

ထိုနေ့မှစ၍ ရှောင်ဟုန်ယန်သည် ဝမ်လီချမ် ၏ဗိုက်ကို ညတိုင်း နှိပ်နယ်ပေးသည်။ ဝမ်လီချမ်၏ ဗိုက်ပေါ်တွင် လက်နှစ်ဖက်တင်ထားကာ အဝေးမှာပင် အိပ်ပျော်သွားခဲ့သည်။

ရှောင်ဟုန်ယန်သည် ဝမ်လီချမ် ဘေးမှာ အိပ်ရသည်ကို နှစ်သက်သော်လည်း၊ သူမ လှုပ်ရှားမှုကြောင့် သူ့ရင်ဘတ်အား ထိမိမှာကို ကြောက်မိသည်။ အိပ်ရာမဝင်ခင်မှာ တစ်ယောက်နှင့် တစ်ယောက် ဝေးကွာနေသော်လည်း မနက်အိပ်ရာနိုးသည့်အခါ သူမက သူ့ပခုံးပေါ်မှာ ခေါင်းအုံးလျက် နိုးလာတတ်သည်။ 

 "ကိုယ့်ကို ဘာလို့မနှိုးတာလဲ" 

အရိုးက အပြည့်အဝကြီးထွားရန် သုံးလခန့်အချိန်ယူရမည်ဟု ဆရာဝန်ကပြောပြီး သူ့ရင်ဘတ်ကို ပြန်လည်ကောင်းမွန်လာစေရန် ဒဏ်ရာထပ်မံမရရှိဖို့ ဂရုစိုက်ရ၏။ ဤအကြောင်းကြောင့် သီးခြားအခန်းမှာ အိပ်ဖို့တောင် စဉ်းစားခဲ့သော်လည်း ဝမ်လီချမ်က ငြင်းဆိုခဲ့ပြီး သူမ မပါဘဲ မအိပ်ချင်ဘူးဟုဆိုသည်။

ရှောင်ဟုန်ယန်သည် ချန်သဲရုံက သူမအပေါ် စိတ်ယိုင်နေသည်ကို သိပ်ပြီး မစဉ်းစားခဲ့သော်လည်း ဝမ်လီချမ်၏ ဒဏ်ရာကြောင့် ချန်သဲရုံကို မုန်းတီးခဲ့သည်။

 "အဆင်ပြေပါတယ်၊ အဲဒါနဲ့ မဆိုင်ပါဘူး၊ရှင် ဆက်အိပ်လိုက်ဦး"

သူနှင့် သမီးကို ပြုစုစောင့်ရှောက်နေရ၍ သူမ မျက်ကွင်းများလည်အတော်ညိုမည်းနေရသည်။ 

 "မအိပ်တော့ဘူး၊ အခုထတော့မှာလား" 

နောက်ကျနေပြီမို့ ဝမ်လီချမ် အတွက် ယနေ့ဝတ်မည့် အဝတ်အစားများကို ရှာပြီး ဝတ်ပေးလိုက်သည်။‌ေဘးအခန်းက သမီးလေး နိုးလာသံကိုလည်း တစ်ဆက်တည်းမှာပင် ကြားလိုက်ရသည်။

ဝမ်လီချမ် ဒဏ်ရာရပြီးနောက် သမီးလေးက လျှိုဖုန်းကျန်း နှင့် အတူ အိပ်ခဲ့သည်။ထို့ကြောင့် ဇနီးမောင်နှံနှစ်ဦးသည် နေ့ခင်းဘက်တွင်သာ သမီးဖြစ်သူနှင့် အချိန်ပို‌ေပးနိုင်သည်၊ ရှောင်ဟုန်ယန်သည် သမီးဖြစ်သူအား ညတိုင်း ချော့သိပ်ပြီးနောက် ဝမ်လီချမ်ကိုလည်း ရေချိုးပေးရသည်။သူမ အလုပ်ရှုပ်ပြီး ပင်ပန်းတိုင်း ချန်သဲရုံကို စိတ်ထဲမှာ ကျိန်ဆဲမိသည်။

သမီးလေး သူငယ်တန်းစစတက်ချင်းမှာပဲ ရှောင်ဟုန်ယန်သည် ကျောင်းအပ်ဖို့ နေ့တစ်ဝက်လောက် အနားယူခဲ့ရသည်။ ယခင်က သမီးအား ကျောင်းအပ်သူမှာ ဝမ်လီချမ် ဖြစ်ခဲ့သော်လည်း ယခု ရှောင်ဟုန်ယန်က ဝမ်လီချမ်ကို အပြင်ထွက်ခွင့်မပေးတော့ဘဲ သူ့သမီးကို သူမကိုယ်တိုင် စာရင်းသွင်းသည်။

ဝမ်လီချမ်သည် မကြာသေးမီက ကျန်းမာရေး များစွာကောင်းမွန်လာကြောင်း၊ ရင်ဘတ်အောင့်ခြင်း ပျောက်ကင်းသွားကာ ခန္ဓာကိုယ်လည်း ပြေလျော့သွားသည်ဟု ခံစားခဲ့ရသည်။ သူက ရှောင်ဟုန်ယန်ကို နေကောင်း‌ေနပြီဟု ပြောသော်လည်း ရှောင်ဟုန်ယန်က မယုံသည့်အတွက် နေ့တိုင်း သူနှင့်အတူ ရေချိုးနေဆဲပင်။

စက်တင်ဘာလလယ်တွင် ဝမ်လီချမ်သည် လမ်းလျှောက်နိုင်လာသော်လည်း ရှောင်ဟုန်ယန်က ကျန်းချမ်ကို သွားခွင့်မပြုခဲ့ပေ။ ဟောင်ကောင်က သူ ဝယ်လာသော အဝတ်အစားများသည် စက်ရုံမှာရှိနေဆဲဖြစ်ပြီး ယခုမှ ပြန်မယူလာလျှင် သူနှင့်တော်မှာမဟုတ်တော့။ 

ဟန်ဆန် Index သည် သမိုင်းတွင်အောင် အမှတ် 7,000 အောက်အထိ ကျဆင်းသွားကြောင်း မာကျစ်က ဖုန်းဆက်သောအခါ ဝမ်လီချမ် အလွန်ဝမ်းသာသွားသည်။ ဝမ်လီချမ် ထွက်သွားပြီးနောက် သူ့အမေက သူ့ကို ယွမ် ၁ သန်းပေးခဲ့ပြီး မာကျစ်က အားလုံးကို စတော့ဈေးကွက်မှာ ရင်းနှီးမြှုပ်နှံခဲ့၍ ယွမ် ၁ သန်းကျော် ရရှိခဲ့သည်။ သူလည်း အမြတ်အစွန်းရလျှင် သူ့အမေနှင့်အတူ အိမ်ဝယ်နိုင်မည်ဟု ဝမ်လီချမ် ပြောသွားသည်ကို သူ သတိရမိသည် ။

သူ အိမ်ဝယ်ရန် စိတ်လှုပ်ရှားနေချိန်မှာပင် အိမ်ဈေးများကြောင့် သူ မျှော်လင့်ချက်မဲ့သွားသည်။ အိမ်ရာဈေးက အလွန်မြင့်ပြီး ယွမ် ၂ သန်းသုံလျှင်တောင်မှ စတုရန်းမီတာ ငါးဆယ်၊ ခြောက်ဆယ်လောက်ရှိသည့် အိမ်ငယ်လေးကိုသာ ရနိုင်မည်။သူ စိတ်ပျက်လက်ပျက် အိမ်ပြန်သွားပြီး ငွေ ၁ သန်းကို သူ့အမေဆီ ပြန်ပေးကာ အိမ်ပြောင်းဖို့ ကိစ္စကို ခေတ္တဆိုင်းငံ့ထားခဲ့သည်။ ဤကိစ္စနှင့် ပတ်သက်ပြီး ဝမ်လီချမ်ကို ဖုန်းဆက်ကာ သူ့ကို ကူညီပေးဖို့ တောင်းဆိုခဲ့သည်။

ဝမ်လီချမ်က ချန်သဲရုံ ကြောင့် သူ အရိုက်ခံရကြောင်း မပြောခဲ့ပေ။ စတော့ရှယ်ယာဈေးကွက်အကြောင်းမေးရန် မာကျစ်ကို ဖုန်းဆက်တိုင်း ချန်သဲရုံက သူ့ကိုဆက်သွယ်ခဲ့သလား ဆိုသည်ကို မေးသည်။

ဝမ်လီချမ်သည် စတော့ရှယ်ယာများစွာတွင် သူ ရရှိသောငွေအားလုံးကို ရင်းနှီးမြှုပ်နှံရန် မာကျစ်အား ပြောခဲ့သည်။ ရင်းနှီးမြှုပ်နှံမှုနည်းလမ်းအချို့ကိုလည်း ခွဲခြမ်းစိတ်ဖြာရန် ကူညီပေးခဲ့သည်။ ဤနည်းဖြင့် သူသည် မာကျစ်ကို အခါအားလျော်စွာ ဆက်သွယ်နိုင်ပြီး ချန်သဲရုံ၏ သတင်းကိုပါ မေးမြန်းနိုင်သည်။

 စက်တင်ဘာလကုန်တွင် ရှောင်ဟုန်ယန်သည် မြူနီစီပယ်ပါတီကော်မတီ၏ ပါတီကျောင်းရှိ လူငယ်နှင့် လူလတ်ပိုင်း ကေဒါများအတွက် လေ့ကျင့်ရေးသင်တန်းတွင် လေ့ကျင့်ခွင့်ရရှိခဲ့သည်။သင်တန်းတက်နေစဉ် ဝမ်လီချမ် သည် ကျန်းချမ်သို့ တိတ်တဆိတ်သွားခဲ့သည်။ အကြောင်းမှာ လောကျုံးယုံက သူ မလာပါက အလုပ်မှနုတ်ထွက်မည်ဟု ပြောခဲ့တာ‌ေကြာင့်ဖြစ်သည်။

ဝမ်လီချမ်သည် စက်ရုံသို့ မရောက်သည်မှာ တစ်လကျော်ရှိပြီဖြစ်သည်။ လျန့်လီရွှယ် ကိုယ်ဝန်ရင့်လာသဖြင့် လျန့်လီရွှယ်က မွေးဖွားရန်အတွက် အိမ်ပြန်ကာ သူက အလုပ်များအား တာဝန်ယူရသည်။ 

လောကျုံးယုံ ကို ဝမ်လီချမ် သည် ဒဏ်ရာအကြောင်း မပြောခဲ့သလို ရွှယ်ကျစ်ယုံ နှင့် ဖန်ယဲ့ချမ်ကိုလည်း မပြောခဲ့‌ေချ။ ဤသည် ဂုဏ်ယူစရာ မဟုတ်ပေ။လူများမျာသိလေလေ ရှက်စရာကောင်းလေလေပင်။ 

 သူ ကျန်းချမ်ကိုသွားသည့်ညတွင် ရှောင်ဟုန်ယန်က ဖုန်းခေါ်လာသည်။

 "ဝမ်လီချမ်၊ ရှင် ဘာဖြစ်ချင်နေတာလဲ၊ ကျွန်မ ရှင့်ကို ဘယ်လောက်စိတ်ပူ‌ေနသလဲဆိုတာ သိရဲ့လား"

သူ ကျန်းချမ် အထိ တစ်ယောက်တည်း ကားမောင်းသွားသည်။သူ့ဒဏ်ရာတွေက မသက်သာ‌ေသးဘူး။ သူ ဒီလောက်ထိအောင် တောင့်ခံပြီး သူမကို ဘာလို့ ခြောက်လှန့်ချင်တာလဲ။

 "စိတ်အေးအေးထားပါ၊ ကိုယ် နေကောင်းပါတယ်၊ ဆရာဝန်က ပုံမှန်အတိုင်း လှုပ်ရှားနိုင်တယ်လို့ ပြောတယ်မလား၊ ကားမောင်းတာဆိုတော့ ဘာမှလည်း မထိခိုက်ဘူးလေ၊လေ့ကျင့်ခန်းတွေလည်း ပြင်းပြင်းထန်ထန် မလုပ်ပါဘူး"

လောကျုံးယုံကို ဝမ်လီချမ် နားလည်နိုင်သည်။ ရှောင်ဟုန်ယန် က သမီးလေးမွေးတုန်းကလည်း သူအင်မတန်စိတ်လှုပ်ရှားရသည်ထို့အပြင် အထည်စက်ရုံကို လောကျုံးယုံ တစ်ယောက်တည်း မပိုင်သဖြင့် သူ့ကိုသာ လုံး၀ လျစ်လျူရှုထား၍ မရပေ။

 "ဒါဆို ရှင် ကိုယ့်ကိုကိုယ် ပိုဂရုစိုက်ရမယ်၊ အပြင်လည်းမထွက်နဲ့၊ နေ့ခင်းဘက်ဆို ရုံးမှာထိုင်၊ကျွန်မ ရှင့်ကို အချိန်မရွေး ဖုန်းဆက်မယ်"  

အားကိုးရသူများအားလုံး ကျန်းချမ် တွင် ရှိကြပြီး၊ လျန့်လီရွှယ် မွေးဖွားတော့မည်ကို သူမ သိသော်လည်း ဝမ်လီချမ် ၏ခန္ဓာကိုယ်က မကျန်းမာ‌ေသးပေ။ သူမ စိတ်ပူသည်။

ဝမ်လီချမ် ကျန်းချမ်သို့သွားကတည်းက ရှောင်ဟုန်ယန်သည် ဝမ်လီချမ် အိမ်ထဲတွင်နေပြီး အပြင်မထွက်ကြောင်း သေချာစေရန်အတွက် နာရီတိုင်းလိုလို ဖုန်းဆက်သည်။

လောကျုံးယုံ သည် သူ့အခြေအနေကို မသိထားတာကြောင့် ဝမ်လီချမ် မှာ စည်းကမ်း တင်းကြပ်သောဇနီးရှိပြီး၊ ရှောင်ဟုန်ယန်က သူ့ကိုလွမ်းသောကြောင့် ခဏတိုင်းဖုန်းဆက်နေသည်ဟုတွေးကာ အမြဲလှောင်နေတော့သည်။

ဝမ်လီချမ် ကလည်း သိပ်ရှင်းပြမနေပေ။လောကျုံးယုံ စိတ်ကြိုက်ပြောခွင့်ပေးထား၏။ရှောင်ဟုန်ယန်က သူ့ကို ဂရုစိုက်သောကြောင့် မကြာခဏ ဖုန်းဆက်ခြင်းဖြစစ်သည်။ ထိုကဲ့သော ချိုမြိန်သည့် ဝန်ထုပ်ဝန်ပိုးမျိုးကို သူ ကျေကျေနပ်နပ်ကြီး ထမ်းထားနိုင်ပါ၏။

 "ဟုန်ယန်၊ ဖုန်းသွားဝယ်လိုက်ပါလား၊ ပိုက်ဆံကိစ္စကို စိတ်မပူနဲ့"

ရှောင်ဟုန်ယန်သည် ပါတီကျောင်းမှာ လေ့ကျင့်နေဆဲဖြစ်ပြီး သူ့ကို ဖုန်းခေါ်ရတိုင်း သူမသည် အတန်းတစ်ခုနှင့်တစ်ခုကြား နားချိန်ရသော မိနစ်အနည်းငယ်အတွင်း အများသုံဖုန်းဆိုင်ကို သွားကာ ဆက်နေရခြင်းဖြစ်သည်။ 

 "ကောင်းပြီ ရှင် ပြန်လာရင် အတူတူဝယ်မယ်" မိုဘိုင်းလ်ဖုန်းရှိခြင်းက ပိုအဆင်ပြေသည်။သူမ သူ့ကို အချိန်မရွေး ဖုန်းဆက်နိုင်ပြီး သူဘယ်ရောက်နေမှန်း သိနိုင်ပေသည်။

ဝမ်လီချမ်သည် ကျန်းချမ် သို့ သွားပြီးနောက်၊သူသည် ဖူချမ် သို့ သောကြာနေ့လည်တိုင်း ပြန်လာပြီး တနင်္လာနေ့နံနက်တွင် ကျန်းချမ်သို့ ထပ်မံသွားခဲ့သည်။ ယခုနှစ်ကုန်အထိ ထိုအတိုင်းလည်ပတ်နေသည်။လျန့်လီရွှယ်သည် ကလေးမွေးဖွားပြီး နောက်လည်း ကလေးကို လက်မလွှတ်ရသေး၍ ယခုလို လုပ်နေရခြင်းပင်။

ဇန်နဝါရီလတွင် ရှောင်ဟုန်ယန် ထံမှ သတင်းကောင်း ထွက်ပေါ်လာသည်။ သူမ ရာထူးတိုးခံရပြန်သည်။ မြူနီစီပယ်ပါတီ ကော်မတီ၏ ဝါဒဖြန့်ချိရေးဌာန အတွင်းရေးမှူးဌာန အကြီးအကဲ၏ အချိန်ပြည့်ကေဒါ ဖြစ်လာခဲ့သည်။

ကေဒါလေ့ကျင့်ရေးကာလတွင် သူမသည် အလွန်ကောင်းမွန်စွာ စွမ်းဆောင်နိုင်ခဲ့သည်။ ကိုယ်စားလှယ်တစ်ဦးအနေဖြင့် မြို့သူမြို့သားများအား စစ်ဆေးရေးကာလအတွင်း အကြိမ်ကြိမ် မိန့်ခွန်းများ ပြောကြားခဲ့သည်။ မြို့တော်ဝန်ဖန်သည် ရှောင်ဟုန်ယန်ကို များစွာ ချီးကျူးခဲ့သည်။ သင်တန်းပြီးဆုံးပြီးနောက် ဝါဒဖြန့်ချိရေးဌာနသို့ ပြန်လာသောအခါ သူမအတွက် ရာထူးတိုး‌ကြေငြာချက်တစ်ခု ရရှိခဲ့သည်။

ရှောင်ဟုန်ယန် လည်း ယခုလို မြန်မြန်ရာထူးတိုးဖို့ ဘယ်တုန်းကမှ မတွေးခဲ့မိပေ။ ကျန်းတက္ကသိုလ်၏ ဘွဲ့လက်မှတ်သည် ဘွဲ့ရပြီးနောက် အချိန်ပြည့် အရာရှိအဖြစ် ရာထူးတိုးခဲ့သည်။ ဝမ်လီချမ်ကို ပြောပြသောအခါ ဝမ်လီချမ်သည်လည်း အလွန်ပျော်ရွှင်နေသည်။ ဖုန်းထဲမှတစ်ဆင့် အားရကျေနပ်သော သူ့ရယ်သံကို သူမ ကြားလိုက်ရသည်။

 "ရှင်က ဘယ်တော့ပြန်လာမှာလဲ"  

တရုတ်နှစ်သစ်ကူးသည် ဇန်န၀ါရီလဖြစ်၍ ယခုဆိုလျှင် တရုတ်နှစ်သစ်ကူးရန် ရှစ်ရက်သာ လိုတော့သည်။

"နောက်ထပ်ရက်နည်းနည်းကြာရင် ပြန်လာတော့မယ်၊ လျန့်လီရွှယ် လည်း မီးတွင်းထဲမှာမလို့ပါ၊ နောက်နှစ်ကျရင် ဒီကို ခဏခဏလာနေစရာ မလိုတော့ပါဘူး"  

လွန်ခဲ့သည့်ခြောက်လတွင်၊ သူသည် ကျန်းချမ်တွင် မကြာခဏရှိ‌ေနခဲ့ပြီး ရှောင်ဟုန်ယန်သည်လည်း စာကျက်ရန်နှင့် လေ့ကျင့်ရန် လိုအပ်သောကြောင့် နှစ်ယောက်လုံး သမီးဖြစ်သူနှင့်အတူ အချိန်အနည်းငယ်သာ ကုန်ဆုံးဖြစ်ခဲ့သည်။

 "ကောင်းပြီ ရှင် ပြန်လာတာကို စောင့်နေမယ်" 

 လွန်ခဲ့သည့်ရက် အနည်းငယ်က နှင်းများထူထပ်စွာကျခဲ့ပြီး လမ်းပိတ်နေ၍ လျန့်လီရွှယ်သည် ပြီးခဲ့သည့် သီတင်းပတ်ကတည်းက ပြန်မလာသဖြင့် မတွေ့တာ ဆယ်ရက်ရှိပြီဖြစ်သည်။

ဖူချမ်၏ လက်ထောက်အတွင်းဝန်နှင့် မြို့တော်ဝန် ဖန်ချန်ကျန်းသည် လျှိုဟုန်မေ၏ခင်ပွန်း ဖန်ယဲ့ချမ်၏ဖခင် ဖြစ်သလို၊ ဝမ်လီချမ် ကယ်တင်ခဲ့သော ကလေးများ၏ အဖိုးဖြစ်သည်။

ရှောင်ဟုန်ယန်သည် မြို့တော်ဝန်ဖန်မှ စာရင်းသွင်းပေးကာ ဝါဒဖြန့်ချိရေးဌာနသို့ ဝင်ရောက်ခဲ့သည်။ ရှောင်ဟုန်ယန်၏ နာမည်ကို မှတ်မိပြီး သူမသည် သူ့မြေးကို ကယ်တင်ခဲ့သည့် လူငယ်လေး၏ ဇနီးမှန်း သူ အစကတည်းက သိခဲ့၏။သူမကို အလုပ်ပေးထားရခြင်မှာ ကျေးဇူးပြန်ဆပ်ခြင်းသက်သက်ဟုသာ သူက သဘောထားခဲ့သော်ငြား သူမ၏ စွမ်းဆောင်ရည်က ဤမျှ ကောင်းမည်ဟု မမျှော်လင့်ထားတာကြောင့် သူမကို ချီးကျူးခဲ့မိသည်။

သို့သော် တခြားလူများက ထိုကဲ့သို့မထင်ကြချေ။ ရှောင်ဟုန်ယန်သည် မြို့တော်ဝန်ဖန်ကြောင့် ဝါဒဖြန့်ချိရေးဌာနတွင် အလုပ်ဝင်ခဲ့ကြောင်း သူတို့လည်း သိရှိခဲ့ကြသည်။ ဘွဲ့၊ အရည်အချင်းနှင့် နောက်ခံကောင်း‌ေကာင်းရှိသောကြောင့် သူမ ရာထူးတိုးခြင်းသည် ထုံးစံအတိုင်း မြန်ဆန်သည်ဟုသာ တွေးကြ၏။

တရုတ်နှစ်သစ်ကူးပြီးနောက်၊ ဝမ်လီချမ်သည် ဇနီး၊ သားနှင့်အတူ အိမ်တွင်နေခဲ့သည်။ တစ်ခါတစ်ရံ သူသည် အထည်ချုပ်စက်ရုံသို့သွားသည်။ မာကျစ်နှင့်လည်း အဆက်အသွယ်မပြတ်ပေ။ သူတို့ဝယ်ထားသည့် စတော့ရှယ်ယာများမှာ အင်မတန် တက်နေပြီး ဟောင်ကောင်မှာ အိမ်ဈေးများလည်း ကျဆင်းနေသည်။ မာကျစ်က အိမ်ဈေးနည်းနည်းကျလျှင် အိမ်ဝယ်ပြီး အရင်အိမ်မှ ပြောင်းဖို့ စတော့ဈေးကွက်ထဲက ပိုက်ဆံတချို့ကို ရအောင်စောင့်ချင်သည်ဟု ပြောသည်။

ဟောင်ကောင်၏ စီးပွားရေးကို လွန်ခဲ့သည့် ခြောက်လခန့်ကတည်းက မာကျစ် လေ့လာခဲ့သည်။ သူ့အမေက သူ့အတွက် စီးပွားရေးများအား ဆရာခေါ်ကာ သင်ကြားစေပြီ၊သူကိုယ်တိုင်ကလည်း ဝမ်လီချမ် နှင့် မကြာခဏ ဆက်သွယ်သည်။

တစ်နှစ်ခွဲရှိပြီဖြစ်သည်၊ယခုထိ ဝမ်လီချမ် သည် ချန်သဲရုံ အကြောင်းမကြားရသေးပေ။ ချန်သဲရုံ သည် မာကျစ်ကို မဆက်သွယ်ခဲ့သလို၊ သူ့ဇနီးနှင့် မိခင်ထံမှလည်း သတင်းမကြားရပေ။

ရှောင်ကျန်းတန့် နှင့် ရှောင်ကျန်းကျွင်း တို့သည် နောက်ပိုင်းတွင် ချန်သဲရုံ၏ အိမ်သို့သွားခဲ့ကြပြီး ချန်သဲရုံ၏မိခင်နှင့်ဇနီးအား ချန်သဲရုံ လုပ်ခဲ့သောအရာကို ပြောပြခဲ့သည်။ ချန်သဲရုံ၏မိခင်က တောင်းပန်ခဲ့ပြီး မာဟုန်ယင်းကတော့ ဘေးတွင်ထိုင်ကာ ငိုနေခဲ့သည်။

ချန်သဲရုံသည် သူမအား ဟုန်ယင်း ဟု ခေါ်ရသည်ကို အလွန်နှစ်သက်သည်၊ အထူးသဖြင့် ညအချိန်တွင်၊ သူမကို ဟုန်ယင်း ဟု ခေါ်တတ်ပြီး၊သူ့ကိုလည်း သဲရုံဟု ခေါ်ခိုင်းသည်။ထို့ကြောင့်လည်း ချန်သဲရုံက သူမကို လက်မထပ်ရသေးလျှင်တောင် သဘောကျနေသည်ဟု ထင်ခဲ့မိသည်။ သူမကို သူ့ဘက်က ချစ်နေသရွေ့ လက်ထပ်စာချုပ်ကိုလည်း အနှေးနှင့်အမြန်ဆိုသလို ချုပ်မည်ဟုသာ သူမ ယုံကြည်နေသည်။

ယခုမူ ချန်သဲရုံက တခြားမိန်းမတစ်ယောက် အပေါ် စိတ်ယိုင်‌ေနကာ၊ သူ့သူဌေး၏ဇနီးကိုပါ ပြစ်မှားနေမှန်း သိလိုက်ရသည်။သူမကိုပြောတတ်သော နူးညံ့ညင်သာသည့် အပြောအဆိုများက တခြားတစ်ယောက်ကို ရည်ညွှန်းနေမှန်းသိရသောအခါ၊သူမ သူ့ကို အတော်ရွံရှာသွားမိ၏။ 

 လွန်ခဲ့သည့် နှစ်အနည်းငယ်အတွင်းတွင် သူမသည် ချန်သဲရုံ နှင့် ကလေးနှစ်ယောက် ထွန်းကားခဲ့ပြီး သူမ၏ ကျန်းမာရေးသည်လည်း ယိုယွင်းသွားခဲ့သည်။သူမသည် မကြာခဏ ခါးနာဝေဒနာကို ခံစားခဲ့ရပြီး ပင်ပန်းသော အလုပ်များကို မလုပ်ဆောင်နိုင်ပေ။ ချန်သဲရုံက သူမကို ဘယ်တုန်းကမှ မချစ်‌ကြောင်း အခြားသူများထံမှ တစ်ဆင့် သိလိုက်ရသောအခါ ၊သူမ အနာဂတ်တွင် ဘာလုပ်ရမည်ကို မသိခဲ့ပေ။

ကလေးများနှင့်အတူ ထွက်သွားဖို့ တွေးထားသော်လည်း ယောက္ခမက မပြန်ခိုင်းပေ။ ယောက္ခမက သူမတို့ သုံးယောက်သည် အနာဂတ်မှာ မိသားစုလိုသာ နေထိုင်ရမည်ဟုဆိုသည်။ယခုထိ ချန်သဲရုံ ပေါ်မလာသေးချေ။

ချန်သဲရုံသည် မိသားစု၏ စုဆောင်းငွေအများစုကို ယူကာ ထွက်ခွာသွားခဲ့သည်။သူ့မိသားစုကို မဆက်သွယ်ဘဲ တစ်နှစ်ခွဲလောက်နေခဲ့သည်။

xxxxxxx💙