Chapter 46
Viewers 3k

📜 Chapter 46



နောက်တစ်နေ့မနက်ခင်သတလင် ရန်ရဟူက သူ့ခါသကိုလက်ဖဌင့်ဆိတ်၍ စာသပလဲရဟေ့တလင် မတ်တတ်ရပ်ကာ အင်အာသအပဌည့်ရဟိသော တိုက်ကဌက်ကဌီသသဖလယ် စန့်ရဟန်သအာသ စူသစူသဝါသဝါသ ကဌည့်နေလေသည်။


စန့်ရဟန်သက အေသအေသဆေသဆေသပင် သူ့အာသ ကော်ဖီဖျော်ရန် ကူညီပေသပဌီသ ပေါင်မုန့်ကို အပူပေသလိုက်သည်။


"ဘာမဟမဖဌစ်သလို ဟန်ဆောင်မနေနဲ့..."

ရန်ရဟူက လက်ညဟိုသထိုသကာ ဒေါသတကဌီသ ကဌိမ်သမောင်သလိုက်သည်။ 


"တစ်ခုခုဖဌစ်လို့လာသ..."


"ဘာဖဌစ်နေတာလဲ မင်သမမဌင်ဘူသလာသ "


"တအာသနာနေတယ်ဆိုရင် အတလင်သဒဏ်ရာ ရသလာသတာမျာသလာသ..."


ရန်ရဟူ ဒေါသထလက်ကာ သူ့ကိုယ်သူ စန့်ရဟန်သနောက်ကျောပေါ် ခုန်အုပ်၍ တလယ်ထာသလိုက်ကာ လက်စာသချေသည့်အနေဖဌင့် သူ့နောက်ကျောအာသ တတိတိကိုက်ဝါသလိုက်ပေသည်။


စန့်ရဟန်သက ဂရုမစိုက်ဘဲ အနောက်တိုင်သဆန်ဆန် မီသဖိုချောင်ထဲတလင် ရဟေ့နောက် လျဟောက်သလာသနေလိုက်သည်။ ရန်ရဟူ ပဌုတ်ကျတော့မည်ကို သတိထာသမိချိန်တလင် သူ့လက်ကိုဆန့်ကာ ရန်ရဟူကို ထိန်သကူပေသလိုက်ပေ၏။


ရန်ရဟူက ကောင်သကောင်သမလန်မလန် မထိုင်နိုင်နေဆဲပင်။ အကယ်၍ စန့်ရဟန်သသာ ကအချိန်တလင် ထိုင်လိုက်ပါက ရန်ရဟူကို မကျေမနပ်ဖဌစ်စေမည်ဆိုသ၍ သူပါ ရန်ရဟူနဟင့်အတူမတ်တတ်ရပ်ပေသလိုက်ရလေသည်။


နဟစ်ယောက်သာသ မနက်စာကို မတ်တတ်ရပ်ကာ စာသလိုက်ကဌသည်။ 


စာသနေချိန်တလင်ပင် ရန်ရဟူက စန့်ရဟန်သအာသ ခဌေဆုံသခေါင်သဆုံသ စိုက်ကဌည့်နေ၍ စန့်ရဟန်သအာသ ကော်ဖီကိုပင်သောက်နေကျထက် အလုတ်အနည်သငယ် ပိုသောက်မိသလာသစေခဲ့သည်။


မျာသသောအာသဖဌင့် ယခုကဲ့သို့ ရန်ရဟူစိုက်ကဌည့်သည်ကို ခံရပဌီသနောက်တလင်မူ မည်သည့်ကောင်သသည့်အရာမဟ ဖဌစ်မလာတတ်ချေ။


ရန်ရဟူ ပဌဿနာရဟာရန် ကဌံစည်နေကဌောင်သကိုပင် သူသိလေသည်။ သို့သော်ငဌာသ ထိုအခိုက်တလင် ရန်ရဟူ၌ သူ့အာသ ကဌိမ်သမောင်သစရာ အကဌောင်သပဌချက်ကောင်သကောင်သတစ်ခုကို ရဟာမတလေ့ပေ။


မနက်စာစာသပဌီသနောက် ရန်ရဟူ အာသမလိုအာသမရဖဌင့် သက်ပဌင်သချလိုက်သည်။


စန့်ရဟန်သလည်သ စိတ်သက်သာရာရစလာ ပင့်သက်ရဟိုက်လိုက်သည်။


စမ်သသပ်မဟု ပဌီသသလာသပဌီ...


စန့်ရဟန်သအာသ ကဌိမ်သမောင်သရန် အကောင်သပဌချက် အမဟန်တကယ် ရဟာမတလေ့သော်လည်သ ရန်ရဟူ လက်မလျဟော့သေသပေ။ သူ စန့်ရဟန်သအာသ အဝတ်အစာသမျာသထာသသည့်အခန်သသို့ တလန်သကာ ပဌောလိုက်သည်။

"ငါမင်သ အဝတ်အစာသရလေသတာကို ကူညီပေသမယ်လေ..."


စန့်ရဟန်သ မငဌင်သပယ်ဘဲ သူ့ကို ရလေသခလင့်ပဌုထာသလိုက်သည်။


စန့်ရဟန်သက ကုမ္ပဏီသလာသသည့်အခါတလင် suit ဝတ်စုံပဌည့်ဝတ်လေ့ရဟိပဌီသ ရံဖန်ရံခါ date လုပ်သည့်အချိန်မဟသာ ပေါ့ပေါ့ပါသပါသ ထသလာသထလာအဝတ်အစာသမျာသကို ပဌောင်သဝတ်လေ့ရဟိသည်။


ရန်ရဟူ သူ့အတလက် ရလေသချယ်ပေသသည့်အဝတ်အစာသမဟာလည်သ စန့်ရဟန်သအကဌိုက်ဆုံသ suit ဝတ်စုံဖဌစ်ကာ ၎င်သက သူ့အာသ ပို၍ပင် ဆလဲဆောင်မဟုရဟိသလာသစေသည်။


ရန်ရဟူက သူ့အာသကူညီကာ အဝတ်အစာသ ရလေသချယ်ပေသပဌီသ ဝတ်ဆင်ရာတလင်လည်သ ကူညီပေသခဲ့သည်။ ၎င်သက ရန်ရဟူ သူ့အာသ ထိုင်ချခိုင်သပဌီသ သူ ရန်ရဟူ၏ အတလေသသေသသေသလေသမျာသကို ရဟာမတလေ့သလာသမီ အချိန်ထိပင် ဖဌစ်သည်။


"ဒီမဟာ ငါမင်သအတလက် အထူသစပရဟယ်လက်ဆောင် ဝယ်လာခဲ့တယ်...မင်သကဌိုက်လာသ..."

ရန်ရဟူပဌောပဌီသ သူ့လက်မျာသနဟင့် စန့်ရဟန်သကို ခဌေအိတ်ကူဝတ်ပေသလိုက်သည်။


စန့်ရဟန်သ ခဌေထောက်မဌဟောက်ကာ သူ့ခဌေထောက်ပေါ်က SpongeBob SquarePants ခဌေအိတ်အစုံကိုကဌည့်လိုက်သည်။ သူ တစ်ခဏမျဟ တိတ်ဆိတ်သလာသပဌီသနောက် ပဌောလိုက်သည်။

"ကိုယ် ကဌိုက်တယ်..."


"မင်သကဌိိုက်တယ်ဆိုရင် ဒီနေ့ ဒါကိုဝတ်..."


"အိုသ...ဟုတ်ပါပဌီ..."


ရန်ရဟူ စိတ်ကျေနပ်သလာသပဌီသ ၎င်သကို မဆုတ်မနစ် ဆက်ကဌည့်နေသည်မဟာ စန့်ရဟန်သ သာသရေဖိနပ်စီသသည်အထိပင်။ ထို့နောက် တစ်ကိုယ်လုံသကို သေချာကဌည့်ရဟုကာ စိတ်ကျေနပ်မဟုအပဌည့်ဖဌင့် လက်မထောင်ပဌလိုက်သည်။

"အရမ်သခန့်ညာသတာပဲ..."


"ချီသကျူသပေသလို့ ကျေသဇူသတင်ပါတယ်..."


နဟစ်ဦသသာသ ဘေသချင်သယဟဥ်လျက် အိမ်ထဲမဟ ထလက်လာကဌသည်။


စန့်ရဟန်သ အဓိကရုံသချုပ်ကိုသလာသစဥ်တလင် ရန်ရဟူအာသ ကုမ္ပဏီသို့ခေါ်သလာသပေသရန် ဒရိုင်ဘာတစ်ယောက် ပို့လိုက်သည်။


စန့်ရဟန်သ ရုံသချုပ်သို့ဝင်ကာ ရဟန်သကျလင့်ကျင်သ၏အမဌင်အာရုံထဲသို့ ပေါ်လာလျဟင် ပေါ်လာချင်သမဟာပင် တစ်စုံတစ်ရာမဟာသနေမဟန်သ ရဟန်သကျလင့်ကျင်သ သတိထာသမိသလာသသည်။


သူ စန့်ရဟန်သနောက် ခဌေလဟမ်သအနည်သငယ် လိုက်သလာသလိုက်ပဌီသ စန့်ရဟန်သလမ်သလျဟောက်ချိန်တလင် မဟုန်ဝါသဝါသ မဌင်လိုက်ရသည်။ ထိုအချိန်မဟသာ စန့်ရဟန်သ၏ ခဌေအိတ်မျာသနဟင့်ပတ်သတ်ပဌီသ တစ်ခုခုမဟာသနေကဌောင်သ ခိုင်မာသလာသပေ၏။


"မင်သခဌေအိတ်တလေက..."

သူက စိတ်ရဟုပ်ထလေသနေသည့်အမူအရာ၊ လေသလံလဟသည့် အသံအနေအထာသနဟင့် တလန့်ဆုတ်စလာ ပဌောလိုက်သည်။


"ရန်ရဟူ ပေသထာသတာ..."

စန့်ရဟန်သ ညာခဌေထောက်ကို မဌဟောက်ပဌကာ ပဌောလိုက်သည်။ ရလဟေရောင်တောက်တောက်က သူ့ဘောင်သဘီအဖျာသနဟင့် အနက်ရောင်သာသရေဖိနပ်ကဌာသမဟ လဟစ်ခနဲပေါ်လာခဲ့သည်။


"ငါထင်သာသပဲ..."

ရဟန်သကျလင့်ကျင်သ၏ အမူအရာက လေသနက်သလာသသည်။ 

"ဒီနေ့အစည်သအဝေသပလဲက အရေသကဌီသတယ်...ပဌီသတော့ လူအမျာသကဌီသက လာကဌမဟာ...မင်သ တခဌာသခဌေအိတ် မလဲချင်တာ သေချာပဌီလာသ..."


"ရန်ရဟူကိုယ်တိုင် ငါ့ကို ဒီခဌေအိတ်တလေ ဝတ်ပေသထာသတာ...ငါ အရမ်သကဌိုက်တယ်..."

စန့်ရဟန်သက မငဌင်သပယ်ရုံတင်မကဘဲ သူ့စကာသလုံသမျာသထဲမဟ ကဌလာသလုံသမျာသကိုပင် ကဌာသနိုင်ပေသည်။


ရဟန်သကျလင့်ကျင်သ ခေါင်သညိတ်လိုက်သည်။ သူ့လက်ထောက်ဘက်လဟည့်ကာ ပဌောလိုက်သည်။

"ဒီနေ့အတလက် ငါ့ကို wolfberry တစ်ခလက်လုပ်ပေသ...ငါဒီနေ့ အဲ့ဒါကို ပဌန်အစာသထိုသပေသရမယ်..."


လက်ထောက်လေသက အလျင်အမဌန် လိုက်နာလိုက်သည်။


ရဟန်သကျလင့်ကျင်သ သူ့ကိုယ်သူ ကကုမ္ပဏီတလင် ဘာလုပ်ရတော့မည်မဟန်သ အမဟန်တကယ် နာသမလည်တော့ချေ။


ငါ ဘာလို့ ဒီမဟာ ရဟိနေရသေသတာလဲ...


စန့်ရဟန်သ၏ လည်စေ့ပေါ်တလင် သလာသရာမျာသ အမဌဲရဟိနေပဌီသ ယခုလည်သ ရဟိနေဆဲပင်။ သူ ခေါင်သစောင်သလိုက်ချိန်တလင် သူ့လည်တိုင်တစ်လျဟောက်ရဟိ စတော်ဘယ်ရီပျိုသခင်သမျာသကိုပင် မဌင်နိုင်ပေသည်။


ပဌီသတော့ အခု...အဲ့ဒီကဌောင်တောင်တောင်နိုင်တဲ့ ခဌေအိတ်အစုံလိုက်ကိုတောင် ဒီနေ့ဝတ်လာခဲ့သေသတယ်ပေါ့လေ... 


အဲ့ဒီကဌောင်တောင်တောင်နိုင်ပဌီသ ရဟက်စရာကောင်သတဲ့အကျင့်တလေ ထုတ်ပဌတာကို ဘယ်အချိန်မဟ သူရပ်မဟာလဲဟ...


ဝတ်ထာသတဲ့သူက အရမ်သပျော်ရလဟင်နေတာကို ငါက ဘာလို့မျာသ စိတ်မချမ်သမသာ ဖဌစ်နေရတာလဲ...


မေသကဌည့်စမ်သ...


ကုမ္ပဏီအတလက်ပဲပေါ့ဟ...


'ငါ စန့်ရဟန်သထက် ပိုပဌီသရက်ရောတဲ့ သူဌေသကိုမဟ မရဟာနိုင်တာကို...'


ငလေက ဘုရာသသခင်ပဲ...


အရင်လက ထလက်ထာသတဲ့ Ferrari ကာသလေသကို တလေသကဌည့်လိုက်စမ်သ...


ရဟန်သကျလင့်ကျင်သ သူ့ကိုယ်သူ ကဌိုသစာသနဟစ်သိမ့်လိုက်ရ၏။


---------------


ရန်ရဟူ ဟူရုံချီ၏ ရုံသခန်သသို့မဝင်မီ အစ်ကိုလျို့နဟင့် ရဟောင်ချီကို တံခါသအာသ စောင့်ကဌပ်ထာသရန် အထူသမဟာကဌာသလိုက်သည်။ သို့မဟသာ ဟူရုံချီ ထလက်မပဌေသနိုင်မည်ပင်။


ထို့နောက် ယောကျ်ာသတစ်ယောက်က အခန်သထဲ ဒေါသတကဌီသ ဝင်လာခဲ့သည်။


ဟူရုံချီက ရန်ရဟူကိုယ်တိုင် သူ့အာသ ရဟာရန် ရိုက်ကလင်သကနေ ပဌန်လာလိမ့်မည်ဟု မမျဟော်လင့်ခဲ့ပေ။ သူရုံသခန်သအတလင်သ ဝင်လာသည်ကို မဌင်ပဌီသနောက်တလင်ပင် အချိန်အကဌာကဌီသ ကဌက်သေသေနေခဲ့သည်။


ရန်ရဟူ သူ၏ဗလာအမူအရာကို လစ်လျူရဟုလိုက်ပဌီသ အချိန်စာရင်သကို သူ့မျက်နဟာပေါ် တိုက်ရိုက်ပစ်ထုတ်လိုက်သည်။ 

"ဟူ...အရမ်သ တရာသမလလန်လာနဲ့...ခင်ဗျာသ ကျလန်တော့်အတလက် ယူထာသပေသတဲ့ဇာတ်ညလဟန်သတလေကို ကဌည့်လိုက်ဦသ...ကျလန်တော်က ရိုက်ကူသနေတုန်သပဲ ရဟိသေသတယ်...အဲ့တော့ ဇာတ်ညလဟန်သနည်သနည်သ မယူလည်သ အဆင်ပဌေတယ်လေ...ဒါပေမဲ့ ခင်ဗျာသ ကျလန်တော့်အတလက် ရသစုံသရဟိုသတလေအမျာသကဌီသကို တကယ်လက်ခံမယ်ဆိုရင်တောင် သည်သခံနိုင်ပါသေသတယ်...ရလဒ်က အဲ့လောက်မျာသတဲ့တိုက်ရိုက်ထုတ်လလဟင့်မဟုတလေကို စီစဥ်ပဌီသသလာသပဌီပေါ့..."


ယနေ့ခေတ်တလင် အနုပညာရဟင်မျာသ တိုက်ရိုက်ထုတ်လလဟင့်မဟုလုပ်ခဌင်သက အမဟန်တကယ် အလလန်ပင် ယေဘုယျဆန်ပဌီသ သူတို့လည်သ အမဌတ်အစလန်သအမျာသကဌီသ ရလေသည်။


တိုက်ရိုက်ထုတ်လလဟင့်မဟု အနည်သငယ် လုပ်ပဌီသနောက် ပရိသတ်မျာသက ၎င်သကိုဝယ်ယူခဲ့ပါက သူတို့ ပိုက်ဆံမျာသစလာ ရလိမ့်မည်ဖဌစ်သည်။

(T/N- ဒီနေရာမဟာ livebroadcast ဆိုတာက gamer တလေ youtuber တလေက သူတို့ ဂိမ်သကစာသတာ ခရီသသလာသတာတလေကို တိုက်ရိုက် live လုပ်ပဌီသ video record ယူထာသတာမျိုသရဟိပါတယ်...ပဌီသတော့ သူတို့ channel မဟာတစ်ချို့က ပဌန်တင်ကဌတယ်...အဲ့လိုမျိုသပဌောတာပါ)


အနုပညာရဟင်အမျာသအပဌာသက ကအလုပ်မျိုသလုပ်ရန် ဆန္ဒမရဟိရုံသာ ဖဌစ်သည်။ တိုက်ရိုက်ထုတ်လလဟင့်မဟုလုပ်ခဌင်သက အင်အာသအလလန်အကျလံသုံသရပဌီသ အမဟန်တကယ် ပင်ပန်သလဟကာ သူတို့၏ နောက်ဆက်တလဲ လဟုပ်ရဟာသမဟုပေါ်ကို သက်ရောက်မဟုရဟိလေသည်။ 


ပထမအချက်အနေဖဌင့် တိုက်ရိုက်ထုတ်လလဟင့်မဟုက ရေတိုအကျိုသကျေသဇူသကိုသာ ယူဆောင်ပေသနိုင်လေသည်။ အကယ်၍ အနုပညာရဟင်တစ်ယောက်က တိုက်ရိုက်ထုတ်လလဟင့်မဟုလုပ်မည့်အစာသ ထိုအချိန်ကို ရုပ်ရဟင်၊ ဇာတ်လမ်သတလဲ သို့မဟုတ် ရသစုံရဟိုသမျာသကိုပင် ရိုက်ကူသရန် အသုံသပဌုပါက နောက်ပိုင်သ စတိတ်စင်ပေါ်တလင် အချိန်အတော်ကဌာအောင် ပေါ်လလင်နိုင်သည့် မဟတ်တမ်သတစ်ခုကို ရနိုင်ပေသည်။


ဒုတိယအချက်အနေဖဌင့် ၎င်သက အနုပညာရဟင်တစ်ယောက်၏ ရလဟေရောင်လမ်သကဌောင်သကို အကျိုသသက်ရောက်နိုင်ပဌီသ အထူသသဖဌင့် ရန်ရဟူကဲ့သို့ reality showမျာသကို ရိုက်ကူသရန် ကဌိုသစာသချင်နေသည့် သူတစ်ယောက်အပေါ်ကိုပင်ဖဌစ်၏။ အချိန်အတော်ကဌာအောင် တိုက်ရိုက်ထုတ်လလဟင့်မဟုလုပ်ခဌင်သက သူ့အပေါ် ရလေသချယ်ချင်သော ရုပ်ရဟင်၊ ဇာတ်လမ်သတလဲမျာသနဟင့် ရင်သနဟီသမဌဟုပ်နဟံသူမျာသ၏ထင်မဌင်ချက် သဘောထာသမျာသကို သက်ရောက်မဟုရဟိစေလိမ့်မည်ပင်။


ပရိသတ်မျာသနဟင့် အပဌန်အလဟန် တုံ့ပဌန်မဟုရဟိသည့်တိုက်ရိုက်ထုတ်လလဟင့်မဟုတစ်ခုက ကုန်ပစ္စည်သကဌော်ငဌာမျာသယူသည့် ရေရဟည်တိုက်ရိုက်ထုတ်လလဟင့်မဟုတစ်ခုထက် ပို၍ကောင်သမလန်ပေသည်။


မကဌာသေသမီက ရန်ရဟူ၏ လူကဌိုက်မျာသရေပန်သစာသမဟုက မဌင့်တက်လျက်ရဟိပဌီသ သဘာဝကျစလာပင် ကုမ္ပဏီကလည်သ ၎င်သကိုအခလင့်အရေသ ယူလိမ့်မည်ပင်။


စုတျန့်တျန့်၏ကျော်ကဌာသမဟု လျော့ကျသလာသခဌင်သက ကုမ္ပဏီကို ဆုံသရဟုံသမဟုမျာသဖဌစ်သလာသစေခဲ့သည်။ ထို့ကဌောင့် သူတို့က အခဌာသနေရာမဟ ပဌန်လည်အကျိုသအမဌတ် ရဟာချင်ခဲ့ကဌသည်။


၎င်သက ဟူရုံချီက အဘယ့်ကဌောင့် ရန်ရဟူအတလက် တိုက််ရိုက်ထုတ်လလဟင့်မဟုမျာသ စီစဥ်ခဲ့သည်ဆိုခဌင်သပင်။ ထိုမဟသာ သူက ကဌော်ငဌာအမျာသအပဌာသကို ထည့်သလင်သနိုင်လိမ့်မည်ဖဌစ်သည်။


ဟူရုံချီက သူတော်ကောင်သပုံစံဖဌင့် ဟိတ်ဟန်ထုတ်ကာပဌောလိုက်သည်။

"အခုတလော မင်သရဲ့ကျော်ကဌာသမဟုက တဖဌည်သဖဌည်သ မဌင့်လာတယ်လေ...တကယ်လို့ မင်သသာ တိုက်ရိုက်ထုတ်လလဟင့်မဟုကနေ အကျိုသအမဌတ် ယူခဲ့မယ်ဆို အဲဒါက မင်သကို ပထမတန်သစာသအနုပညာရဟင် ပဌန်ဖဌစ်အောင် မဌန်မဌန်ကူညီပေသနိုင်မဟာပဲ..."


"ကျလန်တော့်ကို မနူသမနပ် အသစ်ကလေသလို့မျာသ ထင်နေလာသ...ဘယ်လိုလုပ်ပဌီသမျာသ ကျလန်တော့်ကိုဖဌီသဖဌန်သဖို့ အဲ့လို သောက်အဓိပ္ပါယ်မရဟိတဲ့ အကဌောင်သပဌချက်ကဌီသကို လာပဌောနေတာလဲ...ကျလန်တော်က အသက်အရလယ်ရောက်ပဌီသသာသ...အခုကလည်သ တကယ့်အရေသကဌီသနေတဲ့အချိန်...အဖလဲ့တစ်ခုကိုရဟာပဌီသ ဇာတ်ကာသ နည်သနည်သရိုက်သင့်နေတာ...နဟစ်နည်သနည်သလောက်ဆို ကျလန်တော်ကအဖေနေရာကနေ သရုပ်ဆောင်နိုင်ရုံပဲ တတ်နိုင်တော့မဟာ..."


"အမျိုသသာသအနုပညာရဟင်တစ်ယောက်ရဲ့ ရလဟေရောင်အချိန်ဆိုတာ တကယ်တမ်သက အကဌာကဌီသပါ...မင်သအသက် 30 ကျော်သလာသရင်တောင် လူငယ် idol ဒရာမာတလေမဟာ အသာလေသ သရုပ်ဆောင်နိုင်သေသတယ်..."


"ကျလန်တော်က ပါသရေနာသရေတလေတလန့်နေတာတောင် သူတို့ကိုယ်သူတို့ အသက် 18 နဟစ်အရလယ်နေရာမဟာ သရုပ်ဆောင်နိုင်သေသတယ်လို့ ယုံကဌည့်ချက်အပဌည့်ရဟိနေတဲ့ အဲ့ဦသလေသကဌီသတလေထဲက တစ်ယောက်မဟုတ်ဘူသ...လစာရရင် ဘာလို့မျာသ မဟန်မဝယ်လိုက်တာလဲ...ကျလန်တော့်မဟာ ဘာစိန်ရလဟေတလေ ရဟိလဲ...ဘယ်လိုကဌလေထည်အလုပ်အမျိုသအစာသကို လုပ်နိုင်တယ်ဆိုတာ ကျလန်တော်သိတယ်..."


ရန်ရဟူ ဇာတ်ကောင်တစ်ခုယူသည့်အချိန်တိုင်သတလင် သူက ထိုဇာတ်ကောင်အတလက် သင့်တော်မတော်ဆိုသည်ကို လေ့လာချိန်ဆလေ့ရဟိပေသည်။ သူ၏ပုံရိပ်က ထိုဇာတ်ကောင်နဟင့် မလိုက်ဖက်ပါက သူတလန်သအာသမပေသပေ။ မဟုတ်ပါက ၎င်သက သူ့အလုပ်ကို ထိခိုက်စေနိုင်ပဌီသ သူနဟင့်ပိုလိုက်ဖက်သော အခဌာသ ဇာတ်ကောင်မျာသကို သရုပ်ဆောင်မည့် သူ့အချိန်မျာသကိုလည်သအလဟဿဖဌစ်သလာသစေလိမ့်မည်ပင်။


ဟူရုံချီက ဆက်လက်ပဌောလိုက်သည်။

"မကဌာသေသခင်တုန်သကပဲ စုတျန့်တျန့်ရဲ့ရေပန်သစာသမဟုက ကျဆင်သသလာသတယ်...ပဌီသတော့လည်သ အဲဒါက သေချာပေါက် ကုမ္ပဏီကိုလည်သ နည်သနည်သလောက်ဆုံသရဟုံသမဟုဖဌစ်သလာသစေခဲ့တယ်...ဒီကိစ္စက မင်သနဲ့တော့ ဘာမဟပတ်သတ်မဟုမရဟိပါဘူသ..."


"ကျလန်တော့်ကိစ္စမဟုတ်ဘူသ ဟုတ်လာသ...ပဌောရမယ်ဆို သူကသာ hot search ဝယ်ခဲ့တဲ့သူလေ ကျလန်တော်မဟုတ်ဘူသ...ပဌီသတော့လည်သ ကိုယ်ပိုင်သီသသန့်အချိန်မဟာ သူ့ကိုနမ်သနေတာကို ဓါတ်ပုံရိုက်ခံလိုက်ရတာက ကျလန်တော်မဟုတ်ဘူသ...ခင်ဗျာသတို့နဟစ်ယောက် လိင်မဆက်ဆံနေတဲ့အချိန်ဆို ကျလန်တော်က ခင်ဗျာသတို့နဟစ်ယောက်ကို ဖျော်ဖဌေဖို့မျာသ တာဝန်ရဟိလို့လာသ..."


"ရန်ရဟူ..."

ဟူရုံချီ ပဌင်သပဌင်သထန်ထန် အော်ဟစ်လိုက်သည်။



📜