(28)
Viewers 13k
Chapters 524

ဂူဖောက်သူတို့ဒဏ္ဍာရီ 盗墓笔记 (volume 1)

Author -南派三叔 (nan pai san shu)

translater - Hninthawethadar

ဒေါသပင်လယ်၌ မြုပ်နေသောသဲ


Chapter (28)

ပိုင်မောင်ဟန့်ပါ (မိုးခေါင်ရေရှားနတ်ဆိုး)



ဖက်တီးက စကား ဆိုပြီးသောအခါတွင် ချောင်းဆိုးပြီး တံတွေးများစွာကို ထွေးထုတ်ပြန်လေသည်။ ဝူရှဲ စိတ်တွေပူကာ အလောတကြီး ဖြစ်နေတာကြောင့် ဆက်ပြော ခိုင်းလိုက်ရာ ဖက်တီးက ကျောကို ကုတ်ရင်း။


“မင်းကိုယ်တိုင် ကြိုးဆွဲထားရင်တောင် အသက်​တော့ရှူ​ ရမှာပဲ... ဒါကြီးက အရမ်းမြန်လွန်းတယ်ကွ.... ငါချက်ချင်း မပြောနိုင်သေးဘူး...မင်း ခဏလေး ငါ ဘာသာစကားတွေ စုစည်းပြီးတဲ့အထိ စောင့်..."


ဖက်တီးခမျာ မျက်နှာက ဖြူဖျော့နေပြီး သူ့အသံကလည်း ထူးဆန်းနေသည်။ သူ့လေပြွန်ထဲမှာ ရေတွေ ရှိနေ​သေးပုံ ပေါ်တာကြောင့် ဝူရှဲ သူ့ကျောကို အကြိမ်ပေါင်းများစွာ ပြင်းပြင်းထန်ထန် ထုပေးလိုက်ရာ ဖက်တီးက ခန္ဓာကိုယ်ကို ကျုံ့ပြီး ချောင်းဆိုးလိုက်တာ စေးကပ်ကပ် အရည်တွေ အများကြီး ထွက်လာတော့သည်။ 


"ရပြီ ရပြီ... မင်း ထပ်ရိုက်​နေရင် ငါသေလိမ့်မယ်!"


"ရပြီဆို ငါ့ကို မြန်မြန် ပြောပြစမ်းပါ... မင်းတို့ဘာနဲ့ တွေ့ခဲ့တာလဲ?"


ဖက်တီး သတိလည်လာပြီးနောက်မှာ သူကြုံတွေ့ခဲ့ရတာတွေကို အကျဉ်းချုံး ပြောပြပေးလာသည်။ အဖြစ်အပျက်တွေက အရမ်းမြန်ကာ သူ့ဇာတ်ကြောင်းက တော်တော်ရှုပ်နေပေမယ့် ဇာတ်လမ်း တစ်ခုလုံးကိုတော့ ဝူရှဲလည်း အကြမ်းဖျင်းတော့ နားလည်လိုက်ပါ၏။ 


အဲဒီတုန်းက ဖက်တီးမှာ ဝူရှဲတစ်ယောက် ကြွေပန်းချီ​တွေကို ကွက်ကွက်ကွင်းကွင်း စိုက်ကြည့်နေတာကို မြင်ပြီး အကြိမ်အနည်းငယ် တွန်းတိုက်​ကြည့်ပေမယ့် ဝူရှဲက လုံးဝ အာရုံစူးစိုက်ထားသလို လုံးဝ တုံ့ပြန်မှု မရှိတာကို မြင်တော့ သူလည်း ဆက်မခေါ်တော့ဘဲ ပြန်လှည့် ပြေးလာခဲ့သည်။ 


ဖက်တီးက သူ့စိတ်ထဲမှာ အဖိုးတန် ကျောက်စိမ်း အသုံးအဆောင် ပစ္စည်းတွေကို အရင် ပြန်သွားယူချင်နေတာကြောင့် သူထွက်သွားတာနဲ့ ဝူရှဲလည်း နောက်ကနေ လိုက်လာမယ်လို့ တွေးနေတာကြောင့်လည်း ဖြစ်ကောင်းဖြစ်နိုင်ပါ၏။ ခြေလှမ်း ငါးလှမ်း၊ ခြောက်လှမ်းလောက် ဝေးတဲ့နေရာလေးမို့ မတော်တဆ မဖြစ်နိုင်ပါဘူးဟု တွေးနေခဲ့သည်။ 


ဒါပေမဲ့ သူနောက်ပိုင်း တွေ့လိုက်တဲ့အရာက သူ့စွမ်းအင်ကို လုံးလုံးလျားလျား စုပ်ယူသွားတာကြောင့် ဝူရှဲရဲ့ ဖြစ်တည်မှုကို လုံးဝ မေ့သွားခဲ့ပြီး ကျောက်တံခါးကြီး ပျောက်ကွယ်သွားချိန်မှာတောင် သတိမထားမိခဲ့ပါဘူး။


အခေါင်းထဲကို ပြန်လာပြီး သူတို့နှစ်ယောက် ရေကို အတူတူ ခပ်ထုတ်လိုက်တဲ့အခါ မကြာခင်မှာ ခန္ဓာကိုယ် အစိတ်အပိုင်းတွေ ပေါ်လာခဲ့သည်။ ဖက်တီးလည်း အနီးကပ် ကြည့်လိုက်တော့ မထိန်းနိုင်ဘဲ တုန်လှုပ် ခြောက်ခြားသွားလေသည်။ ခေါင်းတွေလို့ ထင်ရတဲ့ အကျိတ်တွေက တကယ်ကို အသားတွေလို ထွက်​နေတာကို တွေ့ရလေ၏။ 


အဆီတွေ အားလုံးက တွဲလောင်းကျနေသလို ခန္ဓာကိုယ်ပေါ်မှ ဆွဲငင် တွဲကျနေသည်။ အဲဒီအချိန်မှာ ဖက်တီးလည်း အံကြိတ်လိုက်မိတော့သည်။ ဒီအလောင်းဟာ တကယ် အမျိုးသမီး အလောင်း ဖြစ်​နေမယ်လို့ သူ မမျှော်လင့်ထားခဲ့ဘူးလေ။


သို့သော် လက် ၁၂ဖက် ရှိသောကြောင့် သူမရဲ့ ရင်သားတွေကလည်း ၁၂ခု ရှိသင့်တယ်လို့ ထင်မိလေသည်။ သို့သော် ရှေ့တွင် ၅ ခုသာ ရှိသည်။ အနောက်ဘက်မှာ ထပ်ရှိနေတာများလား? သို့နှင့် သူတို့လည်း ခေါင်းတလားထဲက အလောင်းကို ဘယ်လို ထုတ်ရမလဲ ဆိုတာ စဉ်းစားကြတော့သည်။ 


လူသေအလောင်းကို ဆွဲထုတ်ဖို့ ချိတ်တစ်ခုအနေနဲ့ သေနတ်တစ်လက်ကို အရင်သုံးကာ ကြိုးစားခဲ့ပေမယ့် အလောင်းက ပျော့ပျောင်းလွန်းပြီး တစ်ကိုယ်လုံးနီးပါး ဖယောင်းလို စွတ်စိုနေပြီး ဆူပွက်နေတာကြောင့် အင်အား သုံးစရာနေရာ မရှိသလောက်ပဲ။ လက်ကို လက်အိတ် အနေနဲ့ သုံးရတာလည်း ပိုခက်နေသည်။ ဆပ်ပြာကို ညှစ်သလိုမျိုး ညှစ်လိုက်တာနဲ့ အဆီအလွှာတွေက ထွက်လာတော့သည်။ 


အဆီကလည်း ရွံမုန်းစရာ ကောင်းလှသည်။ နောက်ဆုံးတွင် မျက်နှာသေက နည်းလမ်းတစ်ခု ရလာခဲ့သည်။ သူတို့ အဝတ်အစားများကို ချွတ်ကာ တစ်ယောက်က အလောင်းရဲ့ ခေါင်းကို ပတ်ထားပြီး ကျန်တစ်ဦးမှာ သူမရဲ့ ခြေထောက်များကို ပတ်ရစ်ထားသည်။ သူတို့သည် သေနတ်ကိုသုံး၍ ထောက်တိုင်အဖြစ် ပြုလုပ်ကာ သူမကို ခက်ခက်ခဲခဲ ကြမ်းပြင်ပေါ် ချလိုက်ရသည်။


ရေအောက် ရှာဖွေရေး အလင်းရောင်၏ ပြင်းထန်သော အလင်းအောက်တွင် အလောင်းသည် လျင်မြန်စွာ ခြောက်သွားပြီး မည်းနက်သွား၏။ ယခုအခါတွင် တခြားအင်္ဂါ အစိတ်အပိုင်းများစွာ ဖြတ်တောက်ခံထားရပြီး ခန္ဓာကိုယ် နှစ်ဘက်စလုံးတွင် ပန်းကန်လုံးလောက်အထိ အမာရွတ် အများအပြား ကျန်ရှိ​နေတာကို ရှင်းရှင်းလင်းလင်း မြင်နေရပြီ ဖြစ်သည်။


အစတုန်းက အမျိုးသမီး အလောင်းရဲ့ ဗိုက်က ဘာကြောင့် ဒီလောက် ကြီး​​နေမှန်းကို မစဉ်းစားမိဘဲ ဆူလွန်းတယ်လို့ပဲ ထင်နေခဲ့ကြသည်။ သူမက ကလေးမွေးဖွားစဉ်မှာ တကယ် သေဆုံးသွားပြီး ဗိုက်ထဲမှာ တခြားအရာတွေပါ ရှိနေခဲ့တယ်ဆိုတာကို သူတို့ မသိခဲ့ကြပါဘူး။


အလောင်းကို ဖယ်ရှားပြီးနောက် အောက်ဘက်က ကျောက်ပြားကို ဖော်ထုတ်နိုင်ခဲ့သည်။ ဤသည်မှာ ပင်လယ်ကြမ်းပြင် ရေ​အောက် ဂူသင်္ချိုင်း၏ လေလုံပိတ်သင်္ချိုင်း ပျက်စီးသွားသည်နှင့် တပြိုင်နက် ခေါင်းတလားကို လွင့်​မျောမသွားစေရန် အတွက် ကာကွယ်ပေးထားသော အခေါင်းတလား ကျောက်တုံး ဖြစ်ကြောင်း မျက်နှာသေက ဆို၏။ 


ခေါင်းတလား ကျောက်တုံးသည် အလွန်ကြမ်းတမ်းပြီး ၎င်းပေါ်တွင် စာလုံးကြီးများဖြင့် ရေးထိုးထားသည့် အတန်းတစ်ခုသာ ရှိသည်။


ဖက်တီးက အဲဒါကို အကြိမ်ပေါင်းများစွာ ကြည့်ပြီး နားမလည်နိုင် ဖြစ်​နေတော့မှ ဝူရှဲကို သတိရသွားခဲ့သည်။ ထိုအချိန်တွင်မှ သူတို့နှစ်ဦးသည် နံရံပေါ်က တံခါးများ ပျောက်ကွယ်သွားတယကို တွေ့လိုက်ရသည်။ မြင်တာနဲ့တင် အလွန်အမင်း ထိတ်လန့်တကြား ဖြစ်သွားပါ၏။ သူက​ ဝူရှဲကို စိတ်မပူဘဲ သူကိုယ်တိုင် အပြင် ပြန်မထွက်နိုင်တော့မှာကို စိုးရိမ်နေခဲ့သည်။


မျက်နှာသေက သူ့ကို မကြောက်ဖို့ပြောပြီး အချိန်ကျရင် တံခါးက သဘာဝအတိုင်း ပေါ်လာမယ်လို့လည်း ပြောခဲ့သည်။ အပြေးအလွှား ပျာယာခတ်နေလည်း အသုံးမဝင်ပေ။ ဒီအချိန်မှာ အရေးကြီးဆုံးက လက်ထဲမှာရှိတဲ့ အရာတွေကို ရှင်းပစ်ဖို့ပဲ။ မျက်နှာသေ အရမ်း တည်ငြိမ်နေတာကို မြင်တော့မှ ဖက်တီးလည်း စိတ်သက်သာရာ ရသွားတော့သည်။


လူနှစ်ဦးသည် အခေါင်းအတွင်းမှ ကျောက်ပြားကို ထုတ်ယူလိုသော်လည်း ကျောက်​ပြားကြီးသည် အလွန် လေးလံနေပြီး ၎င်းအနီး တစ်ဝိုက်တွင် ထင်းရှူးရည်များ လောင်းချထားကာ ခေါင်းတလား၏ အောက်ခြေတွင် ခိုင်မြဲစွာ ကပ်လျက်ရှိတာကို တွေ့ခဲ့ရသည်။ 


ဖက်တီးလည်း ယုတ္တိမရှိမှန်း သိလိုက်၏။ ကျောက်ပြားကို ပြင်းပြင်းထန်ထန် ခေါက်​ကြည့်လိုက်ရာ အောက်ခြေမှာ အခေါင်းပေါက် ဖြစ်နေကြောင်း ရုတ်တရက် တွေ့လိုက်ရသည်။


မီးကိုထွန်းညှိပြီး ထင်းရှူးဖျော်ရည်တွေ အားလုံးကို အရည်ကျိုပြီး ကျောက်တုံးကြီးကို ရွှေ့လိုက်ကာ အောက်က အပေါက်ကြီး တစ်ပေါက်ကို ဖယ်ထုတ်လိုက်ပါ၏။ ဖက်တီးက အတော်လေး အရေထူပေမယ့် သူ့မှာ အတွေ့အကြုံ များစွာရှိခဲ့ပါသည်။


အပေါက်ကြီးကို တွေ့လိုက်တာနဲ့ ပါးစပ်တောင် မပိတ်နိုင်ဘဲ အံ့ဩသွားတော့သည်။ ဒီအပေါက်က ရှေးဟောင်း ဂူသင်္ချိုင်းကို ဖန်တီးထားတဲ့ လက်မှုပညာရှင်ကြီး အထူးပြုလုပ်ထားတဲ့ အပေါက်မဟုတ်ဘူး။ ဂူသင်္ချိုင်း ဖောက်သူတွေ တူထားတဲ့ အပေါက်ပဲ။


ဒါက ဖောက်ခွဲထားတဲ့ အပေါက် တစ်ခုလိုပဲ။ တခြားရှုထောင့်တွေကို မပြောဘဲ ဒီဖောက်ထားတဲ့ အပေါက်ရဲ့ နေရာချထားမှုက ကမ္ဘာမှာ တုနှိုင်းမရတဲ့ အနေအထားလို့ ပြောလို့ရနေပြီ။ အခေါင်းရဲ့ အောက်တည့်တည့်ကိုမှ တိုက်ရိုက် တူးခဲ့တာပဲ။ ဒီအခေါင်းနဲ့ သေချာကပ်ထားတဲ့ ကျောက်ပြားကြောင့်သာ မဟုတ်ရင် အထဲက အလောင်းဟာ ဟိုးအရင်ကတည်းက ဂူထဲကို ဆွဲချခံခဲ့ရပြီးလောက်ပြီ။ ထူးဆန်းတာက ဒီသင်္ချိုင်းက ပင်လယ်အောက်ခြေမှာ တည်ရှိနေတာပဲ။


ဒါ့အပြင် ဒီသင်္ချိုင်းထဲမှာ ဓာတ်လှေကားလို တည်ဆောက်ပုံပါရှိလျှင် အခေါင်း၏ အောက်ခြေမှာ တခြားသင်္ချိုင်း တစ်ခုလည်း ရှိနိုင်​လောက်သည်။ အခု ဒီသင်္ချိုင်းတွင်းရဲ့ ယန္တရားနဲ့ ပတ်သက်တဲ့ သူတို့ရဲ့ အယူအဆဟာ မှား​နေနိုင်တယ်လို့ ဖက်တီးမှ အခိုင်အမာ ယုံကြည်ထား​လေသည်။


ထို​အခိုက်အတန့်တွင် အရာအားလုံးသည် မြူခိုးများ ပြန်ကျလာသလို နှစ်ယောက်စလုံး တစ်ချိန်တည်းတွင် တိတ်ဆိတ်သွားကြသည်။ ဖက်တီးသည် ဤအပေါက်ကြောင့် ချီ အာဟာရ ကျွေးပြီး အလောင်းကို ထိန်းသိမ်း ဝှက်ထားသော နည်းလမ်းမှာ ပျက်စီးသွားခဲ့ပြီ ဖြစ်ကြောင်း ခန့်မှန်းမိလိုက်သည်။


အလောင်းမှာ ဖယောင်း သုတ်ထားပြီးသား အလောင်းအဖြစ် ပြန်မပြောင်းနိုင်တော့ချေ။ ဒီနေရာရဲ့ စွမ်းအားက ရှိမနေတော့ပေမယ့် သင်္ချိုင်းတစ်ခုလုံးရဲ့ ဖုန်းရွှေအပေါ် သက်ရောက်မှုရှိမှာ သေချာပါ၏။ အခု အလောင်းရဲ့ ပြောင်းလဲမှုက ဘယ်လိုလဲ မသိသော်လည်း မအောင်မြင်တဲ့ ဝိညာဥ်ဘက်ကို ရုတ်တရက် ပြောင်းလဲသွားမယ် ဆိုတာ အာမခံချက် မရှိပါဘူး။


ဖုန်းရွှေပညာရပ်မှာ ဖုန်းရွှေရဲ့ အောင်မြင်မှုတွေက အမြင့်ကြီး မဟုတ်ပေမယ့် သူကတော့ မြောက်ပိုင်းသား ဖြစ်လို့ ဒီပြောင်းလဲမှုက အကောင်းကြီး မဟုတ်ဘူးဆိုတာ သူသိပါ၏။ 


ဒါပေမဲ့ အတိအကျပြောရရင် သူ ဒီဖုန်းရွှေ နယ်ပယ်အပေါ် နားလည်မှုဟာ မကျွမ်းကျင်ခဲ့ပါဘူး။ အသေးစိတ် အကြောင်းတွေကို တွေးကြည့်တဲ့အထိ သူ့ဦးနှောက်က မလုံလောက်​သေးဘူး။ ဒီကျောက်ပြားပေါ်က စကားလုံးတွေက သော့​ဖြစ်မယ်လို့ ထင်ရတာကြောင့် တချို့ အကြောင်းအရာတွေကို ခြေရာခံမိနိုင်သည်။ ထိုအခိုက် အမျိုးသမီး အလောင်းဘေးတွင် ထိုင်ချနေတဲ့ မျက်နှာသေဆီက အသံတစ်သံကို ကြားလိုက်ရ​တော့သည်။


"သွားပြီ!"


သူ့ခေါင်းကို လှည့်ကြည့်လိုက်တော့ မျက်နှာသေရဲ့ ဘယ်ဘက်လက်ကို အမျိုးသမီးခန္ဓာကိုယ်ကနေ ဆန့်ထုတ်လာနေတဲ့ ဆံပင်ဖြူဖြူလေးတွေက တင်းတင်းကြပ်ကြပ် ရစ်ပတ်ထားတာကို တွေ့လိုက်ရတယ်။ ဖက်တီးလည်း အမျိုးသမီးအလောင်းရဲ့ ဝမ်းဗိုက်ထဲမှာ သေဆုံးနေတဲ့ ကလေးငယ်တစ်ဦး ရှိနေမယ်လို့ မမျှော်လင့်ထားတာကြောင့် လန့်ဖျပ်သွား၏။


သို့သော် သူက လျင်မြန်စွာ တုံ့ပြန်လိုက်သည်။ သေနတ်ကို ချက်ချင်း ယူကာ အမျိုးသမီးအလောင်း၏ ဝမ်းကို ချိန်၍ လှံတံနဲ့ ပစ်ထည့်လိုက်ရာ နေရာမှန်ကို ထိမိသွားပုံပေါ်သည်။ မျက်နှာသေလည်း ချက်ချင်း လွတ်မြောက်သွား၏။ ဖက်တီးမှာ ထပ်ပြီး ပစ်ချင်ပေမယ့် မျက်နှာသေက အော်ပြောလာသည်။


"မင်း ပစ်လို့မရဘူး မြန်မြန် သွားကြရအောင်" 


အော်ပြောပြီးနောက် ခေါင်းတလားထဲက အပေါက်ထဲကို တူးဖို့ သူ့ကိုပါ ဆွဲထုတ်လိုက်လေ၏။


အထဲမှာ ကျန်နေတဲ့ အခေါင်းအတွင်းက အရည်တွေ စီးကျနေတာကို မြင်တော့ ဖက်တီးမှာ ရွံလွန်းလို့ ခြေဖျားတောင် မချချင်တော့ပေ။ ဒါပေမဲ့ ပြန်ကြည့်လိုက်တော့ အမျိုးသမီးအလောင်းရဲ့ ဝမ်းဗိုက်ထဲက ပြူးထွက်နေတဲ့ မျက်နှာသဏ္ဌာန်ကို မြင်လိုက်ရသည်။ ၎င်းက အပြင် ထွက်လာဖို့ အသဲအသန် ကြိုးစားနေရသလို အမျိုးသမီးအလောင်းရဲ့ ဝမ်းဗိုက်က အရေပြားက ပွင့်လာတဲ့အထိ ဆွဲထုတ်ခံနေရပြီ။ 


အတွင်းမှာရှိတဲ့ အရာရဲ့ မျက်နှာသွင်ပြင်ကိုတောင် ရှင်းရှင်းလင်းလင်း မြင်နေရသည်။ ဖက်တီး သူ့နောက်ကျောကို ပြေးဆင်းလာတဲ့ အေးစိမ့်စိမ့် အရသာကို ခံစားလိုက်ရ၏။ စိတ်ထဲမှာ အမျိုးကောင်း သားတစ်ယောက် အနေနဲ့ ချက်ချင်း အကျိုးဆက်ကို ခံရမှာ မဟုတ်ဘူးလို့ စိတ်ထဲမှာ အံကြိတ်ရင်း ခေါင်းတလားထဲ ခုန်ဝင်ခဲ့လေသည်။ 


တွင်းပေါက်ကို ကျောက်ပြားအား ဖယ်ထုတ်လိုက်ပြီးမှ တွေ့ခဲ့တာ ဖြစ်လေသည်။ တွင်းကို တူးဖော်ထားတဲ့ပုံက အလွန် လိမ္မာပါးနပ်စွာ လုပ်ဆောင်ထားသလို အုတ်အားလုံး၏ ထက်ဝက်ခန့်သာ ခေါက်ထုတ်နိုင်သောကြောင့် အပေါက်ထိပ်တွင် သဘာဝအတိုင်း ခုံးခုံးပုံစံ အတန်းများ ဖြစ်ပေါ်လာနိုင်မည် ဖြစ်သည်။  


ဒါဆိုရင် အပေါ်က အရာတွေကို ဖိထားမှာ မဟုတ်ဘူး။ ဒီလက်မှုပညာဟာ အမှန်တကယ် ကျွမ်းကျင်တဲ့ စမ်းသပ်မှု တစ်ခုဖြစ်ပြီး ပြီးမြောက်ရန် ရက်အနည်းငယ် ထက်မနည်း အချိန်ယူရပေမည်။


မျက်နှာသေက ခြေလှမ်း အနည်းငယ်တွင် တွားသွားခဲ့ပြီး ဖက်တီးလည်း သူ့နောက်ကို အသည်းအသန် လိုက်လာခဲ့သည်။ ဥမင်လိုဏ်ခေါင်း ရှိနေမယ်လို့ သူ မသိလိုက်ပေ။ ခြေလှမ်း အနည်းငယ် တက်ပြီးနောက်တွင် ဥမင်သည် အောက်ဘက်သို့ တိမ်းစောင်းသွားတာကို ရုတ်တရက် တွေ့လိုက်ရပြီး ရေတွေ ထွက်လာခဲ့သည်။ အောက်တွင် ရေရှိပုံမပေါ်ဘဲ ရှည်လျားသော အပိုင်းသည် အလင်းရောင် မှိန်ဖျော့သွားသည်ကို မြင်လိုက်ရသဖြင့် ဝူရှဲဖြစ်မယ်လို့ ထင်သောကြောင့် ရေထဲသို့ ခုန်ဆင်းသွားလေသည်။


လှေကားထစ် အနည်းငယ်ခန့်ကို ဖြတ်ကာ ရေကူးလာပြီးနောက် ရှေ့မျက်နှာစာက ကျယ်လာကာ သူတို့လည်း ရေထဲသို့ ထိုးဆင်းသွားခဲ့သည်။ ရေကန်ကြီးထဲမှာ နှစ်ယောက်လုံး စွမ်းအင်တွေ ဆုံးရှုံးပြီး အစွမ်းကုန် ကြိုးစား၍ ရေထဲက ထွက်လာနေစဥ် ဝူရှဲက သူတို့ဘက်ကို လေသေနတ်နဲ့ ချိန်ထားတာကို တွေ့လိုက်ရတော့သည်။ 


ဒါကို ကြားတော့ ဝူရှဲ မထိန်းနိုင်ဘဲ ပြောလိုက်သည်။ 


"လက်တစ်ဖက်တည်း မြင်လိုက်တာတောင် ပြောလို့ မဆုံးနိုင်တော့ဘူး"


"ဖက်တီး ငါက အဲဲဒါကို လုံးဝမကြောက်ဘူး.... ဒါပေမဲ့ အစ်ကိုလေးက ဒီလောက် အစွမ်းထက်တာ သူတောင် မြင်တာနဲ့ တန်းပြေးတာ... ငါကဘာလုပ်နိုင်မှာလဲ? ပြန်စဥ်းစားကြည့်တော့လည်း ဘာလို့ ထွက်ပြေးရလဲ ငါ တကယ်နားမလည်ဘူး... အစ်ကိုလေး အဲဒါက ဘာ​​ကြီးလဲ? အဲ့လောက်တောင် အစွမ်းထက်လား? အလေးချိန်က ဒီလောက်ပဲ ရှိတာ လေသေနတ်စာလေး နည်းနည်း ပေးလိုက်ရင် ထိန်းနိုင်မယ် ထင်တယ်နော်"


မျက်နှာသေက သူ့လက်ကောက်ဝတ်ကို ထိ၍


"အဲဒါက ဆံဖြူ မိုးခေါင်​​ရေရှားစေတဲ့ နတ်ဆိုးတစ်ကောင်ပဲ.... သူ့ဦးခေါင်းကို ဖြတ်ပြီး သတ်နိုင်ပါတယ် ဒါပေမဲ့ သူသေသွားတဲ့ အခါကျရင်တော့ အလောင်းအဆိပ်တွေက အငွေ့ပျံသွားလိမ့်မယ်.... ငါတို့က အခု လေအများကြီး လိုနေသေးတယ်... တွတ်ချေမကိုက်ဘူး"


ဝူရှဲ တိတ်ဆိတ်သွားသည်။ ဒဏ္ဍာရီထဲက ဆံဖြူမိုးခေါင်ရေရှား နတ်ဆိုးဟာ မိုးခေါင်ရေရှားမှုကို ဖြစ်စေနိုင်တဲ့ တစ္ဆေလို့ ပြောခဲ့ဖူးတာ ကြားမိသည်။ အခုလို ကြားလိုက်ရတဲ့အခါ ဝူရှဲ အံသြသွားမိ၏။ ဖုတ်ကောင်တွေဟာ အလောင်းမွေးတဲ့ မြေမှာ အချိန်အကြာကြီး ဆက်နေမယ်ဆိုရင် နတ်ဆိုးတွေ ဖြစ်သွားနိုင်တယ်လို့ ဆိုထားကြသည်။  


ဆံဖြူမိုးခေါင်ရေရှား နတ်ဆိုးဟာ မိုးခေါင်ခြင်းကို ဖြစ်စေနိုင်သော တစ္ဆေဖြစ်ကြောင်း သီချင်းများ၊ ကျမ်းဂန်များတွင် ဖော်ပြထားသလို အတိုချုပ်အားဖြင့် ထိုအရာနှင့် ပတ်သက်၍ ထင်မြင်ချက်များစွာလည်း ရှိသည်။ သို့သော် တကယ် ရှိနေမယ်လို့ မမျှော်လင့်ခဲ့ချေ။ ဒါပေမဲ့ ဒါတွေက အရေးမကြီးပါဘူး။ ရှေး​ဟောင်း ဂူသင်္ချိုင်းထဲကို ဝင်လိုက်တာနဲ့ ထူးဆန်းပြီးရင်း ထူးဆန်းတဲ့ အရာတွေကို တွေ့ဖို့ ပြင်ဆင်ထားပြီးသားပဲ​လေ။ 


သူတို့အခု သူခိုးရဲ့ဂူ ပုန်းအောင်းရာ ရေကန်ထဲကို တကယ် ရောက်သွားခဲ့တာတော့ မဖြစ်နိုင်ပါဘူးနော်။ ရေကန်အောက်က ဖောက်ထားတဲ့ အပေါက်က ထွက်ပေါက်တစ်ခုပဲ ဖြစ်ရမယ်။ လူက ဂူသင်္ချိုင်းဖောက်တဲ့ အပေါက်ကို တူးတဲ့အခါ ပင်မခေါင်းတလားရဲ့ တည်နေရာကို သေချာ မသိတဲ့အတွက် အပေါက်ကို တတ်နိုင်သမျှ လမ်းကြောင်း အမျိုးမျိုးနဲ့ တူးခဲ့တတ်သည်။ 


အခုဟာကလည်း သူတို့ထဲကတစ်ခုပဲ ဖြစ်လိမ့်မည်။ ဝူရှဲ ဒါကိုတွေးပြီး သူတို့လာတဲ့ လမ်းမှာ လမ်းဆုံလမ်းခွတွေကို တွေ့သလားလို့ မေးကြည့်လိုက်သည်။ 


ဖက်တီးက ခေါင်းခါရင်း မရှိဘူးဟု ဆိုလေ၏။ အုတ်ခဲတွေကို ဖုံးထားရတာ အရမ်း အဆင်ပြေတဲ့အတွက် အပေါက်က သိပ်မရှည်သွားဘဲ အဆုံးအထိ သိသာထင်ရှား လမ်းကြောင်းပဲ ရှိသည်။ ဒါကြောင့် ကြားလိုက်ရတဲ့ အ​ဖြေအတွက် ဝူရှဲ သိပ်ပြီး စိတ်ရှုပ်မသွားချေ။ 


ဒီဖောက်ထားတဲ့ အပေါက်မှာ လေလုံတဲ့ ဖွဲ့စည်းပုံ မရှိလို့ သူ့ရဲ့ဝင်ပေါက်ဟာ ဒီရှေးဟောင်းသင်္ချိုင်းမှာ ဖြစ်ရမယ်။ ရှာတွေ့ရင်တောင် အသုံးမဝင်ဘူးလို့ ဝူရှဲ ထင်မိသည်။ တံခါးမရှိသော အခြေအနေမျိုးမှာ အဲဒီလူဟာ သူ့မှာ ရွေးချယ်စရာ မရှိသောကြောင့် ဥမင်လိုဏ်ခေါင်းကို တူးခဲ့သည်။


သို့သော် ထိုလူမှာ ကံမကောင်းခဲ့ပေ။ နားခန်းထဲကို တူးပြီး ခေါင်းတလား ကျောက်​ပြားတစ်​ပြားကို တွေ့ရှိခဲ့သည်။ ဒါဆို သူ ပင်မသင်္ချိုင်းဘက်ကိုပါ တူးထားမလား မသိ။


အဲဒါကို တွေးကြည့်လိုက်တော့ ဖက်တီးက ရုတ်တရက် ထပြောလိုက်သည်။


"မိုးခေါင်ရေရှား နတ်ဆိုး(ပိုင်မောင်ဟန့်ပါ) က ရေကူးတတ်မယ်လို့ မင်းတို့ထင်လား?"


သူဘာကို ဆိုလိုချင်မှန်းကို မသိတာကြောင့် ဝူရှဲ အံ့ဩမိသွားသည်။ ထိုစဥ် ဖက်တီးက ရေထဲကို လက်ညှိုးထိုးပြပြီး ဝူရှဲလည်း ချာကနဲ ပြန်ကြည့်လိုက်တော့ ရေကန်ရဲ့ အလယ်မှာ ရုတ်ချည်းဆိုသလို ရေပူပေါင်းတွေ ပေါ်လာတာကို တွေ့လိုက်ရလေ၏။ 




Prev Next