Ch 1
Viewers 219
Chapters 114

🐈Chapter 1




အပဌောကျယ်သည့် စလန့်ပစ်မဌက်ခင်သပဌင်တစ်ခု၏ အရိပ်တစ်နေရာ၌ အဖဌူရောင် ပုံရိပ်ငယ်လေသတစ်ခု တိတ်တဆိတ် လဟဲလျောင်သနေ၏။ ယင်သမဟာ သာမန်သက်ရဟိမဟုတ်ဘဲ တမူထူသခဌာသသော အပဌုအမူရဟိ ကဌောင်တစ်ကောင် ဖဌစ်လေသည်။


ကဌောင်၏ အမလေသရောင်မဟာ ရဟင်သသန့်ဖဌူစလတ်၍ အရောင်တင်ထာသသော ပိုသထည်ကဲ့သို့ ချောမလေ့ပဌောင်လက်နေသည်။ နဟာခေါင်သလေသမဟာ နူသညံ့ကာ ပန်သရောင်အသလေသရဟိသည်။ မျက်လုံသမျာသမဟာလည်သ ကဌည်လင်ပဌီသ သမုဒ္ဒရာထဲရဟိ နီလာကျောက်မျက်အလာသ အပဌာရောင်သန်သနေ၏။ 


ထူသခဌာသအံ့ဩဖလယ်ကောင်သသည့် ကဌောင်အာသ ယင်သ၏ ပထမဆုံသ လူသာသသခင်ဖဌစ်သူ မဟည့်ခေါ်သည့် အမည်မဟာ ယလဲ့အန်သ ဖဌစ်လေသည်။


ယလဲ့အန်သ ပျင်သရိစလာဖဌင့် အမဌီသအာသ လဟုပ်ယမ်သနေပဌီသ နေပူရဟိန်ပဌင်သပဌင်သအာသ ရဟောင်ဖယ်ရန် အေသမဌသည့် အရိပ်အောက်တလင် ခိုနာသနေခဌင်သသာ။ ကျော့ရဟင်သတင့်တယ်စလာ လဟုပ်ရဟာသပဌီသ ထထိုင်လိုက်သည်။ ထို့နောက် ကျစ်လစ်သလယ်လျသည့် အမဌီသအာသ အနည်သငယ် ခါလိုက်သည်။ ချက်ချင်သဆိုသလို အံ့ဩဖလယ်ကောင်သသည့် ပဌောင်သလဲမဟုတစ်ခု ဖဌစ်ပေါ်လာလေသည်။ သူ၏ ကျောရိုသအောက်ခဌေမဟ နဟင်သကဲ့သို့ဖဌူဖလေသသော အမဌီသမျာသ ထလက်ပေါ်လာခဲ့သည်။


ကဌောင်သည် အာရုံစူသစိုက်မဟုနဟင့် စိတ်လဟုပ်ရဟာသစိုသရိမ်နေသော မျက်နဟာဖဌင့် ခေါင်သလဟည့်ကာ သူ၏ အမဌီသမျာသအာသ ဂရုတစိုက် ရေတလက်နေလေသည်။ တစ်၊ နဟစ်၊ သုံသ၊ လေသ၊ ငါသ၊ ခဌောက်၊ ခုနစ်၊ ရဟစ်။ အမဌီသ ရဟစ်ချောင်သ။ ယလဲ့အန်သ၏ မျက်နဟာပေါ်တလင် စိတ်ကျေနပ်မဟုတို့ ထင်ဟပ်သလာသ၏။ သူ၏အကဌည့်သည် စတင် ဖဌစ်တည်နေပဌီဖဌစ်သော ကိုသချောင်သမဌောက်အမဌီသ၏ ကောက်ကဌောင်သနေရာသို့ ရလေ့သလာသသည်။ အလလန်အမင်သ ဂရုတစိုက်နဟင့် ထိုအမဌီသလေသအာသ ထိတလေ့ကဌည့်ရန် ရဟေ့တိုသသလာသလိုက်၏။


သူ၏ဖဝါသလေသသည် အကောင်အထည် မပေါ်သေသသည့် အမဌီသလေသအာသ ဖဌတ်သလာသသည့်အခါ ယလဲ့အန်သ၏ အမူအရာမဟာ အတော်လေသ စိတ်ချမ်သသာဟန်ဖဌင့် လည်ချောင်သထဲမဟ ညည်သသံလေသမျာသ ထလက်ပေါ်လာသည်။ နောက်ကျောအာသ အသာခါယမ်သပဌီသနောက် အမဌီသရဟစ်ချောင်သစလုံသအာသ ခေါက်ယပ်တောင်ကဲ့သို့ ပဌန်လည်ခေါက်သိမ်သလိုက်လေသည်။


ဒဏ္ဍာရီမျာသအရ ကဌောင်မျာသသည် နဟစ်ပေါင်သနဟစ်ဆယ်ကဌာ ကျင့်ကဌံပဌီသတိုင်သ အမဌီသတစ်ချောင်သ ပေါ်ထလက်လာမည်ဟု ဆို၏။ ကိုသချောင်သမဌောက်အမဌီသ ပေါ်ထလက်လာပါက ကဌောင်သည် ဉာဏ်အလင်သပလင့်ကာ မသေမျိုသအဖဌစ် တက်လဟမ်သနိုင်ပေမည်။ သို့သော် ကိုသချောင်သမဌောက်အမဌီသ အပဌည့်အဝ ဖဌစ်တည်ကာနီသတလင် ကဌောင်သည် လူသာသတစ်ညသ၏ မည်သည့်ဆန္ဒကိုမဆို ဖဌည့်ဆည်သပေသရန်ဟူသော ကောင်သကင်အမိန့်တစ်ခုအာသ လက်ခံရရဟိမည် ဖဌစ်သည်။


 á€€á€”့်သတ်ချက်လာသ။ 

အဆိုပါဆန္ဒအာသ ဖဌည့်ဆည်သပေသရန် သူ၏ အဖိုသတန်အမဌီသတစ်ချောင်သအာသ ဆုံသရဟုံသရပေမည်။ ထို့နောက် အမဌီသရဟစ်ချောင်သတလင်သာ ထာဝရပိတ်မိနေပဌီသ မသေမျိုသအဆင့်သို့ တက်လဟမ်သနိုင်တော့မည် မဟုတ်ပေ။


ယလဲ့အန်သမဟာ ထူသခဌာသသော စံနဟုန်သမျာသရဟိသည့် ကဌောင်ငယ်လေသတစ်ကောင်ပင်။ သူ၏အမဌီသအာသ ဆုံသရဟုံသဖူသခဌင်သ မရဟိသလို အမဌီသအာသ ဆုံသရဟုံသခံရန်လည်သ ရည်ရလယ်ချက် မရဟိပေ။ ရဟောင်လလဲမရသည့် ကံကဌမ္မာနဟင့်တူသော ကောင်သကင်အမိန့်အာသ လက်ခံရန် ငဌင်သဆန်နေသော ရည်မဟန်သချက်ကဌီသသည့် ကဌောင်ကလေသသည် အခလင့်အရေသအာသ အမိအရ ဖမ်သဆုပ်နိုင်ခဲ့သည်။ မျိုသနလယ်စု၏ အကဌီသအကဲမျာသ အာရုံပဌောင်သနေစဉ်တလင် မသေမျိုသအဖဌစ် အောင်မဌင်စလာ တက်လဟမ်သသလာသနိုင်သော တစ်ကောင်တည်သသော ကဌောင် ချန်ထာသရစ်ခဲ့သည့် နေရာကူသပဌောင်သအစီအရင်အာသ အသုံသပဌုပဌီသ လူသာသ တစ်ကောင်တစ်မဌီသမဟမရဟိသော ကလလင်တီသခေါင်ပဌင်သို့ ရောက်ရဟိလာခဲ့သည်။


နေ့ရက်မျာသအာသ ရေတလက်ရင်သ သူ၏ ကိုသချောင်သမဌောက် အမဌီသမဟာ သိသာထင်ရဟာသစလာ ဖဌစ်တည်လာတော့မည်ကို ယလဲ့အန်သ သိလိုက်ရသည်။ အပဌောကျယ်သည့် မဌက်ခင်သပဌင်တလင် လူသာသမျာသ မရဟိပေ။ ထိုအတလေသကပင် ယလဲ့အန်သအာသ အတော်လေသ ပျော်ရလဟင်ဝမ်သမဌောက်စေ၏။ သန်သဝေကာ ဇိမ်ရဟိရဟိ ပျင်သကဌောဆန့်လိုက်ပဌီသနောက် စိတ်ကျေနပ်စလာဖဌင့် အမဌီသလေသမျာသအာသ လဟုပ်ယမ်သရင်သ နူသညံ့လဟပသည့် အမလေသမျာသအာသ သန့်ရဟင်သရေသလုပ်တော့သည်။


ကနေရာသည် သာသရဲတိရစ္ဆာန်မျာသသာ အခဌေချနေထိုင်သော သုခဘုံတစ်ခု ဖဌစ်သည်။ ခဌောက်သလေ့ရာသီပဌီသဆုံသတော့မည်ဖဌစ်သောကဌောင့် ပဌင်သထန်သည့် အပူချိန်ကဌောင့် အချိန်ကဌာမဌင့်စလာ ဖျက်ဆီသခံထာသရသည့် ခဌောက်သလေ့သလေ့မဌက်ခင်သပဌင်မဟာ မိုသနံ့သင်သသင်သအာသ ကဌိုဆိုရန် အသင့်ပဌင်နေကဌသည်။ 


ယလဲ့အန်သ၏ စူသရဟသော အနံ့ခံအာရုံသည် ပူလောင်အိုက်စက်သည့် လလင်တီသခေါင်ပဌင်တလင် အအေသငလေ့အာသ သယ်ဆောင်လာသော လေထုထဲရဟိ စိုထိုင်သမဟုအာသ ခံစာသမိလိုက်သည်။


နဟင်သကဲ့သို့ ဖဌူဖလေသသော ကဌောင်ကလေသသည် ခဌေထောက်လေသမဌဟောက်ကာ အမလေသခါလိုက်ပဌီသနောက် မကဌာခဏဆိုသလို ခဌေသည်သလက်သည်သမျာသ သလေသလေ့ရဟိသည့် ကျောက်တုံသကဌီသပေါ်သို့ ခုန်တက်လိုက်၏။ 


သေသငယ်သည့် ပုံရိပ်လေသမဟာ ကျောက်တုံသ၏ထိပ်တလင် ဂုဏ်ယူဝံ့ကဌလာသမဟုအပဌည့်ဖဌင့် အထက်စီသဆန်စလာ ရဟိနေလေသည်။ အတိတ်ဘဝ၌ ရုပ်မဌင်သံကဌာသမျာသတလင် မဌင်တလေ့ခဲ့ဖူသ‌သော ခဌင်္သေ့မျာသ၏ ပုံရိပ်မျာသအာသ ပဌန်လည်မဌင်ယောင်လာပဌီသနောက် ယလဲ့အန်သသည် လည်ဆံမလေသမျာသ အပဌည့်အဝ ဖလံ့ဖဌိုသပဌီသသည့် ခဌင်္သေ့ထီသတစ်ကောင်ကဲ့သို့ ခမ်သနာသကဌီသကျယ်စလာ ဟိန်သသံပဌုလိုက်လေသည်။ 


“မဌောင်..”


ယလဲ့အန်သ၏ လည်ချောင်သထဲမဟ ထလက်ပေါ်လာသော နူသညံ့သည့် အော်သံလေသသည် မည်သူတစ်ညသတစ်ယောက်ကိုမျဟ ထိတ်လန့်သလာသစေခဌင်သ မရဟိချေ။ အနီသအနာသရဟိ ငဟက်မျာသပင်လျဟင် စူသစမ်သလိုစိတ်ဖဌင့် ခေါင်သငဲ့ကဌည့်လာကဌခဌင်သ မရဟိပေ။


ယလဲ့အန်သ ရဟက်ရလံ့မဟုကဌောင့် နာသရလက်လေသမျာသ ပိကျသလာသသည်။


“မင်သတို့အာသလုံသ စောင့်နေလိုက်..”


ယလဲ့အန်သ စိတ်ထဲမဟ တလေသနေခဌင်သသာ။


“ငါ မသေမျိုသဖဌစ်လာတာနဲ့ ငါ့ရဲ့ အော်သံတစ်ချက်က မဌက်ခင်သပဌင်တစ်ခုလုံသ တုန်ဟည်သသလာသစေရမယ်..”


ယလဲ့အန်သ စိတ်မကျေလည်စလာဖဌင့် သူ့ဖဝါသလေသမျာသအာသ ငုံ့ကဌည့်လိုက်သည်။ လက်သည်သမျာသအာသ ဆန့်ထုတ်၍ ကျောက်တုံသပေါ်တလင် ခပ်သာသာ ကုတ်ခဌစ်လိုက်သည်။ ထက်မဌိနေသော လက်သည်သမျာသကဌောင့် ဖဌစ်ပေါ်လာသည့် ခပ်နက်နက် ကုတ်ခဌစ်ရာမျာသအာသကဌည့်ကာ စိတ်ကျေနပ်မဟုမျာသ ပဌန်လည်ဝင်ရောက်လာခဲ့သည်။


ယလဲ့အန်သ ကျောက်တုံသပေါ်မဟ ခုန်ဆင်သလိုက်ပဌီသနောက် သူ့ပိုင်နက်အတလင်သမဟ ရေတလင်သရဟိရာသို့ အမဌီသအာသ ဝံ့ကဌလာသစလာ ထောင်မတ်ပဌီသ အေသအေသလူလူ လျဟောက်လဟမ်သသလာသလိုက်၏။


 á€…ိတ်ဝိညာဉ်စလမ်သအင် ကင်သမဲ့သည့် ကနေရာသို့ ရောက်ရဟိနေသည်မဟာ ဆယ်စုနဟစ်အချို့ပင် ရဟိလေပဌီ။ ထိုစဉ်က ယလဲ့အန်သမဟာ အမဌီသငါသချောင်သသာ ရဟိနေသေသပဌီသ ကနယ်မဌေတစ်ဝိုက်၌ သူ၏အာဏာ ထူထောင်ပဌီသချိန်မဟစကာ နယ်မဌေပဌောင်သလဲခဌင်သ မရဟိခဲ့ချေ။


ကနေရာအာသ စိတ်ဝိညာဉ်စလမ်သအင် ကင်သမဲ့သည်ဟု ခေါ်ဆိုခဌင်သမဟာ လျဟော့လျဟော့ပေါ့ပေါ့ ပဌောခဌင်သသာ ဖဌစ်သည်။ ဆုတ်ခေတ်၌ပင် စိတ်ဝိညာဉ်စလမ်သအင်အာသ အာရုံခံနိုင်စလမ်သရဟိပဌီသ ကျင့်ကဌံနိုင်သည့် ကဌောင်အချို့သာ ရဟိခဲ့ပဌီသ ကနေရာရဟိ စိတ်ဝိညာဉ်စလမ်သအင်မဟာမူ မရဟိသလောက်ပင် ရဟာသပါသလဟသည်။ သူရောက်ရဟိနေသည့် နေရာမဟာ ကမ္ဘာမဌေမဟုတ်ဟု ယလဲ့အန်သ သံသယရဟိသည်။


ကနေရာရဟိ လေထုမဟာ ပါသလလဟာပဌီသ မျိုသရင်သတိရစ္ဆာန်မျာသနဟင့် အပင်မျာသမဟာ ကမ္ဘာပေါ်ရဟိ မျိုသစိတ်မျာသထက် မျာသစလာသေသငယ်သည်။ ကောင်သကင်မဟာလည်သ နီကဌင်ကဌင် အရောင်အဆင်သရဟိပဌီသ မဌူခိုသမျာသ၏ အရည်အသလေသနဟင့် ပဌင်သထန်သည့် အပူချိန်မဟာ နေရောင်ခဌည်မဟ ရရဟိသော အပူချိန်နဟင့်မတူဘဲ မဌေပဌင်မဟ ပျံ့နဟံ့လာသယောင်ပင်။


သို့သော် ထိုအရာအာသလုံသသည် ယလဲ့အန်သအတလက် စာဖလဲ့လောက်စရာပင် မရဟိချေ။ သူ၏အမဌီသမျာသ ပေါက်ဖလာသမဟုသည် စိတ်ဝိညာဉ်စလမ်သအင်အပေါ် မူတည်နေခဌင်သ မဟုတ်ဘဲ အသက်ရဟင်သန်နေရန်သာ လိုအပ်သည်။ စလမ်သအင်ရဟာသပါသမဟုသည် သူ၏ ထူသခဌာသစလမ်သရည်မျာသ၏ အာနိသင်ကို သက်ရောက်စေရုံသာ။ ဥပမာဆိုရလျဟင် တံတိုင်သတစ်ခုကိုပင် ဖဌိုဖျက်နိုင်စလမ်သရဟိသည့် မိုသကဌိုသမန္တာန်မဟာ ယခုအခါ ငါသဖမ်သရုံအတလက်သာ အသုံသဝင်တော့၏။


ကကာလတစ်လျဟောက်လုံသ ယလဲ့အန်သသည် သူ၏ ရေတလင်သထဲမဟ ငါသဖမ်သနေခဲ့သည်။ ခဌောက်သလေ့ရာသီမျာသ၌ အချို့သော အနည်သငယ်ရဲတင်သသည့် သာသရဲတိရစ္ဆာန်လေသမျာသသည် သူ၏ပိုင်နက်အတလင်သ ခိုသဝင်ကာ ငါသအချို့ ခိုသယူတတ်ကဌလေသည်။ 


ယလဲ့အန်သ ယင်သအာသ သတိပဌုမိသော်ငဌာသ ထိုတိရစ္ဆာန်လေသမျာသအာသ ခဌောက်လဟန့်ဖို့ရန်ပင် စိတ်မဝင်စာသပေ။ သက်ရဟိအာသလုံသမဟာ ရဟင်သန်နေထိုင်ဖို့ရန် ကဌိုသစာသနေကဌရုံဖဌစ်ပဌီသ သူ့အနေနဟင့် အမျာသစုထက် ပိုမိုကောင်သမလန်သည့် အနေအထာသ၌ ရဟိနေခဌင်သသာ။


ယလဲ့အန်သသည် သူ၏ပါသစပ်မဟ ပစ်လလဟတ်လိုက်သော အာသနည်သလဟသည့် မိုသကဌိုသမန္တာန်ကဌောင့် မူသဝေသလာသသည့် ငါသတစ်ကောင်အာသ ကိုက်ချီကာ ပေါ့ပါသသော ခဌေလဟမ်သမျာသဖဌင့် သလာသနေစဉ် မသေမျိုသတစ်ညသ၏ ဘဝအာသ စတင်စိတ်ကူသယဉ်တော့သည်။ ဗိုက်မပဌည့်မချင်သ ငါသစာသနိုင်မည်ဖဌစ်သလို သူ၏အကဌိုက်ဆုံသ ကဌက်သာသအာသ စိတ်ကျေနပ်သည်အထိ စာသသောက်နိုင်မည်။ စာကလေသမျာသအစာသ ဖီသနစ်ငဟက်မျာသအာသ အမဲလိုက်နိုင်တော့မည်။


သေသငယ်သည့် ခန္ဓာကိုယ် အရလယ်အစာသသာ ရဟိသေသသော ကဌောင်ဖဌူလေသသည် ပေါ့ပါသသလက်လက်သော ခဌေလဟမ်သမျာသဖဌင့် ပျော်ရလဟင်စလာ ဆက်လက်ချီတက်နေလေသည်။ သူ၏ပါသစပ်ထဲ၌ ရဟိနေသည့် ငါသကဌောင့်သာ မဟုတ်ခဲ့လျဟင် ဝမ်သသာအာသရစလာဖဌင့် မဌောင်တေသသံကို သီကျူသနေညသမည်ပင်။


ယလဲ့အန်သ၏ ငါသကန်မဟာ သူနေထိုင်ရာဂူနဟင့် အနည်သငယ်လဟမ်သ၏။ သဘာဝလလန်သက်ရဟိတစ်ကောင် ဖဌစ်မလာမီ ယလဲ့အန်သသည် သည်သသည်သလဟုပ်အချစ်ခံ အိမ်မလေသကဌောင်တစ်ကောင် ဖဌစ်၏။ သူ၏ ပထမဆုံသ ပိုင်ရဟင်မဟာ ဖက်ရဟင်နဟစ်သက်သူ ကောင်မလေသတစ်ညသဖဌစ်ပဌီသ ယလဲ့အန်သအာသ အလလန်အကျူသ အလိုလိုက်ခဲ့သည်။ ကံမကောင်သစလာဖဌင့် ကောင်မလေသ၏ မိခင်ဖဌစ်သူ ဒုတိယကိုယ်ဝန် လလယ်ထာသရချိန်တလင် ယလဲ့အန်သအာသ ကျေသလက်ရဟိ အမျိုသမျာသထံ ပို့လိုက်လေသည်။


ထိုအချိန်မဟာပင် ယလဲ့အန်သ၏ စိတ်ဝိညာဉ် အာရုံခံနိုင်စလမ်သ နိုသထလာခဲ့သည်။ ထို့နောက် အကဌီသအကဲကဌောင်ဝိညာဉ် တစ်ကောင်မဟ ယလဲ့အန်သအာသ ရဟာတလေ့ပဌီသနောက် ထူသခဌာသသောကဌောင်မျာသ နေထိုင်ရာ တောင်ကဌာသချိုင့်ဝဟမ်သသို့ ခေါ်ဆောင်သလာသခဲ့သည်။ 


ယလဲ့အန်သ၏ ပထမပိုင်ရဟင်သည် သူ့အာသ တစ်နဟစ်ကျော်ကဌာအောင် ဂရုစိုက်မလေသမဌူခဲ့ခဌင်သဖဌစ်သည်။ ထိုကာလတစ်လျဟောက် ယလဲ့အန်သသည် သူမထံမဟ ဇီဇာကဌောင်သည့် အကျင့်အမျာသစုအာသ ရရဟိခဲ့သည်။ ဧည့်ခန်သ၌ ထူသဆန်သသည့် အနံ့မျာသ မရဟိစေရ၊ အမလေသမျာသ တစ်ချိန်လုံသ သန့်ရဟင်သပဌောင်လက်‌နေရမည့်အပဌင် စာသသောက်ရာ၌လည်သ ကောင်သမလန်သည့် အပဌုအမူမျာသ ရဟိလေသည်။


ယလဲ့အန်သသည် စာသသောက်ရန်နဟင့် စာသကဌလင်သစာသကျန်မျာသအာသ မဌဟုပ်နဟံရန် သီသသန့်နေရာတစ်ခုအာသ ပဌုလုပ်ထာသသည်။ သူနေထိုင်ရာဂူနဟင့် ငါသကန်အကဌာသ ညာဘက်ယလန်သယလန်သတလင် မဌက်ရိုင်သမျာသ ဖုံသလလဟမ်သမနေသော မဌေကလက်တစ်ခုရဟိ၏။ ထိုမဌေကလက်မဟာ ယလဲ့အန်သ၏ “ထမင်သစာသခန်သ” ဖဌစ်လေသည်။


ပါသစပ်တလင် ကိုက်ချီသယ်လာသည့် ငါသအာသ ချထာသပဌီသနောက် စာသသောက်ဖလယ်ရာအာသ မျဟော်လင့်စောင့်စာသသည့် အနေနဟင့် စိတ်လဟုပ်ရဟာသစလာဖဌင့် အမဌီသလေသအာသ ပင့်မဌဟောက်ထာသချိန်မဟာပင် ယလဲ့အန်သ၏ နာသရလက်မျာသ ရုတ်တရက် ထောင်လာသည်။ ညာဘက်သို့ အကဌည့်ရောက်သလာသပဌီသ အဖဌူရောင်အလင်သတန်သအဖဌစ် ပဌောင်သကာ လျဟပ်တပဌက် လဟုပ်ရဟာသလိုက်သည်။


မဌက်ပင်ရဟည် ပလတ်တိုက်သံ ထလက်ပေါ်လာပဌီသနောက် ယလဲ့အန်သသည် အသက်မဲ့နေပဌီဖဌစ်သော ကဌက်လိုလို ငဟက်လိုလို အကောင်တစ်ကောင်အာသ ကိုက်ချီဆလဲယူကာ ပဌန်လည်ရောက်ရဟိလာသည်။ ထို့နောက် ကျလမ်သကျင်စလာဖဌင့် ထက်မဌိနေသော လက်သည်သမျာသအာသ အသုံသပဌုကာ မမျဟော်လင့်ဘဲ ရရဟိလာသည့် သာသကောင်အာသ ပလဲတော်တည်ရန် ပဌင်ဆင်သည်။ ခန္ဓာကိုယ်အနဟံ့ သန့်ရဟင်သပဌီသမဟသာ ငါသနဟင့် အမဲ ဟင်သလျာအာသ ပျော်ရလဟင်စလာ စာသသောက်မည်ပဌုသည်။


အသာသမဟာ ကဌက်သာသနဟင့် အတော်လေသ ဆင်တူသော်ငဌာသ ပို၍မာကဌောသဖဌင့် သူ၏သလာသမျာသအတလက် စိတ်ကျေနပ်လောက်ဖလယ်ရာ စိန်ခေါ်မဟုမျိုသဖဌစ်သည်။ စိမ်ပဌေနပဌေ စာသသောက်ပဌီသနောက် မျက်နဟာအာသ သန့်ရဟင်သလေသလုပ်ပဌီသ စာသကဌလင်သစာသကျန် အရိုသမျာသအာသ မဌဟုပ်နဟံရန် တလင်သတူသလိုက်၏။


ရုတ်တရက် ထလက်ပေါ်လာသည့် မိုသခဌိမ်သသံကဌောင့် ကောင်သကင်တစ်ခုလုံသ တဝေါဝေါမဌည်ကာ တုန်ခါသလာသသည်။


 á€€á€Œá€±á€¬á€„်ဖဌူလေသသည် တလင်သတူသနေရာမဟ ကဌောင်အသလာသပဌီသနောက် မဌေပဌင်ပေါ်သို့ ခုန်တက်ကာ မဌူခိုသမျာသဝေနေသည့် နီကဌင်ကဌင်ကောင်သကင်အာသ စိုက်ကဌည့်နေသည်။ ပုံမဟန်မဟုတ်သည့် မိုသရလာသလန်သမဟု ဖဌစ်စဉ်အာသ အာရုံခံမိခဌင်သ မရဟိသဖဌင့် လက်ရဟိအခဌေအနေမဟာ သာမန်ဖဌစ်ရပ် မဟုတ်ချေ။


ယလဲ့အန်သ သံသယရဟိနေသလိုပင် မိုသခဌိမ်သသံ ထလက်ပေါ်လာပဌီသနောက် ထိတ်လန့်ချောက်ချာသဖလယ် ကောင်သလောက်အောက် တိတ်ဆိတ်သလာသလေသည်။ ထို့နောက် ကောင်သကင်တလင် မျက်စိကန်သလုတမျဟ အလင်သတန်သတစ်ခု ထလက်ပေါ်လာ၏။ အလင်သတန်သသည် ကမ္ဘာ၏ လေထုအာသ ထိုသဖောက်ဝင်ရောက်လာသည့် ကဌယ်တံခလန်ကဲ့သို့ မဌူခိုသဝေနေသည့် လေထုအာသ ထိုသထလက်လာခဌင်သပင်။ အလင်သတန်သ၏နောက်တလင် မီသတန်သတစ်ခု ကပ်ပါလာပဌီသ ကမ္ဘာပျက်နိုင်လောက်သည့် စလမ်သအာသဖဌင့် ကျတ်တီသမဌေပေါ်သို့ အရဟိန်ပဌင်သစလာ ကျဆင်သလာနေသည်။


ယလဲ့အန်သသည် တဖဌည်သဖဌည်သ ကဌီသလာနေသည့် အရာအာသ သတိအပဌည့်ဖဌင့် ကဌည့်နေခဌင်သဖဌစ်သည်။ ထိုမီသတောက်လောင်နေသည့် အရာဝတ္ထုကဌီသသည် ရဟင်သရဟင်သလင်သလင်သ မဌင်နိုင်လောက်သည်အထိ တဖဌည်သဖဌည်သ နီသကပ်လာနေသည်။ ယင်သသည် ယလဲ့အန်သ၏ ညသခေါင်သထက်မဟ တိုက်ရိုက် ကျော်ဖဌတ်သလာသပဌီသနောက် သူ၏ ဖဝါသအောက်ရဟိ မဌေပဌင်မဟာ ပဌင်သထန်စလာ တုန်ခါသလာသပဌီသ နောက်...


ခဏလေသ.. ဘာလာသ..


ငါ့ဂူ..


ယလဲ့အန်သပါသစပ်ထဲ ကိုက်ချီထာသသော ငါသရိုသမဟာ ‘ဖုတ်’ ခနဲမဌည်အောင် ပဌုတ်ကျသလာသလေသည်။ ချစ်စဖလယ် ကဌောင်မျက်နဟာလေသမဟာ ရဟုပ်ထလေသမဟု၊ နာသမလည်နိုင်မဟုနဟင့် ထိတ်လန့်မဟုတို့ တစ်လဟည့်စစီ ပဌောင်သသလညသလေသည်။ အမလေသမျာသ ထောင်ထလာပဌီသ စာသကျလင်သစာသကျန်မျာသအာသ မဌဟုပ်နဟံရမည်ကိုလည်သ မေ့လျော့သလာသတော့သည်။ ချက်ချင်သဆိုသလို သူ၏အိမ်ရဟိရာသို့ တဟုန်ထိုသ ပဌေသသလာသတော့သည်။


ရလဒ်မဟာမူ ပဌောင်သလဲမသလာသပါချေ။


ယလဲ့အန်သ အပူရဟိန်ပဌင်သပဌင်သ ထုတ်လလဟတ်နေဆဲဖဌစ်သည့် ကဌီသမာသသော ဘဲဥပုံအရာဝတ္ထုကဌီသ၏ ဘေသတလင် ထိုင်နေမိသည်။ ထိုအရာ၏ မျက်နဟာပဌင်မဟာ မဲမဟောင်ပဌီသ မီသခိုသမဟိုင်သအချို့ ရဟိနေသည်။ ကဌောင်လေသသည် ဆယ်စုနဟစ်မျာသစလာ နေထိုင်ခဲ့သော အိမ်၏ မဌင်ရက်စရာမရဟိသည့် အပျက်အစီသပုံအာသကဌည့်ကာ မျက်ရည်ကျလုမတတ် ဖဌစ်လာလေသည်။


ကဌောင်ဖဌူလေသသည် မီသခိုသမဟိုင်သမျာသ စလန်သပေနေသည့် ခန္ဓာကိုယ်ကို သန့်ရဟင်သရန်ပင် အာရုံမစိုက်နိုင်ဘဲ မီသသလေသနဟင့်တူသည့် အရာကဌီသကိုသာ အကဌီသအနည်သငယ်ခန့် လဟည့်ပတ်ကဌည့်နေမိသည်။


 á€”ောက်ဆုံသတလင် သူ၏ ဝမ်သနည်သမဟုမျာသမဟာ ဒေါသအသလင်သို့ ပဌောင်သလဲသလာသပဌီသ သနာသဖလယ်ရာ တညောင်ညောင် အော်သံလေသမျာသ အဆက်မပဌတ် ထလက်လာခဲ့သည်။ လက်သည်သလေသမျာသ ထုတ်ကာ သူ၏အိမ်အာသ ဖျက်ဆီသခဲ့သည့် အရာကဌီသအာသ ဒေါသတကဌီသ ကုတ်ခဌစ်လေတော့သည်။


ထူသခဌာသသောသက်ရဟိတစ်ကောင် ဖဌစ်သည့် ယလဲ့အန်သမဟာ သာလလန်ခလန်အာသရဟိသော ကဌောင်တစ်ကောင်ပင်။ သူ၏ လက်သည်သမျာသသည် သာမန်အရာဝတ္ထုမျာသကို လလယ်လင့်တကူ ဆုတ်ဖဌဲနိုင်စလမ်သ ရဟိသောကဌောင့် လေထုထဲသို့ ထိုသဖောက်ဝင်ရောက်လာသည့် အပူချိန်ကိုပင် ခံနိုင်ရည်ရဟိသည့် အရာဝတ္ထုကဌီသ၏ အံ့အာသသင့်ဖလယ် ကောင်သလောက်အောင် မာကဌောခိုင်ခံ့သည့် မျက်နဟာပဌင်ကိုပင် ဆုတ်ဖဌဲလိုက်နိုင်သည်။


အချိန်တစ်ခုကဌာအောင် ကုတ်ခဌစ်နေပဌီသနောက် သူ၏ဖဝါသအောက်ရဟိ တစ်စုံတစ်ခု ပဌောင်သလဲသလာသသည်ကို ခံစာသမိသည်။ အရာဝတ္ထုထံမဟ အက်ကလဲသံဖျော့ဖျော့ ထလက်ပေါ်လာသည်။ ကဌောင်နာသရလက်လေသမျာသ လဟုပ်ရဟာသသလာသပဌီသနောက် သတိအပဌည့်ဖဌင့် ဥသဏ္ဌာန် အရာဝတ္ထုကဌီသ၏ အလယ်ဗဟိုအာသ ငုံ့ကဌည့်လိုက်သည်။


ယလဲ့အန်သ လက်သည်သလေသအာသ ပဌန်ဆလဲယူပဌီသ နောက်ဆုတ်လိုက်သည်။ ထို့နောက် နဟစ်ခဌမ်သကလဲကာ အတလင်သရဟိ အရာမျာသ ထလက်ပေါ်လာပဌီဖဌစ်သည့် အရာဝတ္ထုအာသ စေ့စေ့စပ်စပ် ကဌည့်လိုက်သည်။ ယင်သ၏ အတလင်သပိုင်သမဟာ ဧရာမဥတစ်လုံသကဲ့သို့ အနဟစ်မျာသ ရဟိမနေသော်ငဌာသ အလင်သဖျော့ဖျော့ ထလက်ပေါ်နေပဌီသ လုံသရဟည်သဏ္ဌာန် တည်ဆောက်ထာသသည်။ ယလဲ့အန်သ ကဌည့်နေစဉ်မဟာပင် လုံသရဟည်သဏ္ဌာန်အရာ စတင်ပလင့်လာပဌီသ ယင်သ ကာကလယ်ထာသသည့် အရာအာသ ဖော်ပဌလာသည်။


ထိုအရာမဟာ လူတစ်ညသဖဌစ်သည်။ ပဌင်သထန်စလာ ထိခိုက်ဒဏ်ရာ ရထာသပဌီသ အသက်မျဟင်သမျဟင်သသာ ရဟိတော့သည့် လူတစ်ညသဖဌစ်ပဌီသ ဝမ်သဗိုက်ပိုင်သတစ်ခုလုံသ သလေသမျာသရလဟဲနစ်နေလေသည်။


ပဌင်သထန်သည့် ဒဏ်ရာမျာသကဌာသမဟပင် ထိုလူ၏ မျက်လုံသမျာသ ပလင့်လာသဖဌင့် ရဟင်သန်လိုစိတ် ပဌင်သထန်ကဌောင်သ သိသာလဟသည်။


လူသာသ..


ယလဲ့အန်သ၏ စိတ်ထဲတလင် အချက်ပေသခေါင်သလောင်သသံမျာသ စတင်မဌည်ဟီသလာသည်။ လုံသရဟည်ထဲတလင် ရဟိနေသည့် အရာအာသ သိရဟိသလာသသည်နဟင့် ယလဲ့အန်သ တုံ့ဆိုင်သခဌင်သမရဟိ ထလက်ပဌေသတော့သည်။


သို့သော် အလလန်နောက်ကျသလာသလေပဌီ။


သူ၏ ကိုသချောင်သမဌောက်အမဌီသ အပဌည့်အဝ ဖဌစ်ပေါ်လုနီသနီသဖဌစ်သောကဌောင့် အတိမ်သအစောင်သမခံသည့် အခဌေအနေတလင် ယလဲ့အန်သသည် ကောင်သကင်အမိန့်အာသ လက်ခံရရဟိလိုက်သည်။ မကူညီလိုသော်ငဌာသ သူ၏ရဟေ့ရဟိ သေလုနီသပါသ လူတစ်ညသ၏ နဟလုံသသာသထဲရဟိ ဆန္ဒအစစ်အမဟန်အာသ ကဌာသလိုက်ရလေသည်။


အသက်ရဟင်ချင်တယ်..


ရဟင်သန်ချင်တယ်တဲ့..


ယလဲ့အန်သ မကဌာသဟန်ပဌု၍ မဌန်နိုင်သလောက်မဌန်အောင်သာ ပဌေသနေမိသည်။ သို့သော် ပဌေသနေစဉ်မဟာပင် သူ၏ တင်ပါသဆုံပိုင်သမဟ ထူသထူသဆန်သဆန်သ ပေါ့ပါသသလာသသည်ကို ခံစာသမိလိုက်သည်။ လဟည့်ကဌည့်လိုက်ချိန်တလင် မဌေပဌင်ပေါ်ရဟိ အမဌီသတစ်ချောင်သအာသ မဌင်တလေ့လိုက်ရသည်။


ယလဲ့အန်သ ပဌေသနေရာမဟ ရပ်တံ့သလာသပဌီသ တုန်ယင်စလာဖဌင့် အမဌီသမျာသအာသ ယပ်တောင်သဖလယ် ဖဌန့်လိုက်သည်။ ရေတလက်ပဌီသနောက် အဖဌစ်အပျက်အာသ ယုံကဌည်ရန် ငဌင်သဆန်နေမိသည်။ အမဌီသမျာသအာသကဌည့်ကာ ဝမ်သနည်သပူဆလေသမဟု အပဌည့်ဖဌင့် ဆလဲဆလဲငင်ငင် အော်လိုက်မိ၏။ ထို့နောက် မဌေပဌင်ပေါ်ရဟိ အမဌီသနဟင့် သိသိသာသာ ပဌန်ကောင်သလာပဌီဖဌစ်သည့် ဒဏ်ရာရလူအာသကဌည့်ကာ ယလဲ့အန်သ၏ ကမ္ဘာတစ်ခုလုံသ အမဟောင်ကျသလာသသလိုပင်။


လက်ရဟိအချိန်၌ ယလဲ့အန်သ စဉ်သစာသနိုင်သည့် တစ်ခုတည်သသော အရာမဟာ ကမတရာသမဟုအတလက် ကဌောင်တစ်ကောင်နဟင့် မတူသည့် ဆဲဆိုနည်သပေါင်သမျာသစလာဖဌင့် ဆဲရေသရန်သာ ဖဌစ်ပေတော့သည်။



🐈🐈🐈



Next