Ch 7

🐈Chapter 7

အခြားအကြောင်းအရာများကိုလည်း လျင်မြန်စွာ ထပ်ဖြည့်ခဲ့သည် ‐- ယွဲ့အန်း၏ စွမ်းရည်များနှင့် တိုက်ပွဲအခြေအနေများတွင် ၎င်းတို့၏ အလားအလာရှိသော အသုံးချမှုများကို အကဲဖြတ်ခြင်း၊ မလိုလားသည့် အာရုံစိုက်မှုများကို ရှောင်ရှားပြီး ဤထူးခြားလှသော သတ္တဝါလေးကို အနား၌ ထားရှိခြင်းမှ ဖြစ်လာနိုင်သည့် အကျိုးဆက်များကို စဉ်းစားဆင်ခြင်ခြင်း၊ အင်ပါယာကြယ် သို့ ပြန်သွားသည့်အချိန်၌ မျိုးရိုးဗီဇစစ်ဆေးခြင်းနှင့် ကြယ်ကွန်ရက်ဒေတာဘေ့စ်တွင်မှတ်ပုံတင်ခြင်းကဲ့သို့သော လိုအပ်သည့် လုပ်ထုံးလုပ်နည်းများ စီစဉ်ခြင်းစသည်တို့ပင် ဖြစ်သည်။

စာရင်းက ပိုရှည်လာပေသည်။ ကျီရှို့ကျွင်းက ရှေ့ဆက်လုပ်ရမည့် အလုပ်များကို မျှော်တွေးရင်း မျှော်လင့်ချက်နှင့် စိုးရိမ်မှုတို့က ရောထွေးနေသကဲ့သို့ ခံစားလာမိသည်။

 သက်ပြင်းဖွဖွချလိုက်ပြီး စာရင်းပြုစုသည့်ဘက်သို့သာ အာရုံပြန်လှည့်လိုက်သည်။ ပစ္စည်းတစ်ခုချင်းစီကို ရေးသွင်းရင်း သူ့လက်ချောင်းများက ပစ္စည်းများပေါ်တွင် လျင်မြန်စွာ ရွေ့လျားနေသည်။

အချိန်ခဏကြာပြီးနောက် ကျီရှို့ကျွင်းက ဖောက်ထွင်းမြင်နိုင်သော ချစ်ပ်ပေါ်မှ မက်ဆေ့ချ်များကို စစ်ဆေးလိုက်သည်။ စစ်ဆေးနေစဉ် မာရှယ်ကယ်ဗင်ထံမှ တုံ့ပြန်မှုတစ်စုံတစ်ရာမရှိသည့် ဝင်စာပုံးကို စိတ်ပျက်စွာ တွေ့လိုက်ရသည်။ ထို့နောက် ခပ်ဖွဖွကုတ်ခြစ်သံက သူ့အာရုံကို ဖမ်းစားသွားခဲ့သည်။ သူက ချစ်ပ်ပြားကို ဖယ်လိုက်ပြီး အဖြူရောင် လက်ဖဝါးသေးသေးလေးကို မြင်နေရသည့် တံခါးဆီသို့ လှည့်ကြည့်လိုက်သည်။ ထိုလက်ဖဝါးလေးက အပေါက်ကို ကျယ်ကျယ်ချဲ့ဖို့ ကြိုးစားရန် လေထဲသို့ ကုတ်ခြစ်နေသည်။

၎င်းကို မြင်လိုက်ရချိန်တွင် ကျီရှို့ကျွင်း၏ နှုတ်ခမ်းထောင့်များက မရည်ရွယ်ဘဲ အပေါ်သို့ ကွေးတက်သွားကြောင်း ခံစားလိုက်ရသည်။ နီးကပ်လာသော ခြေသံများကြောင့် ယွဲ့အန်း၏ နားရွက်များက လှုပ်လှုပ်ရှားရှား ဖြစ်သွားသည်။ ထို့နောက် လက်ဖဝါးလေးကို ပြန်ရုပ်သိမ်းပြီး စိတ်အားထက်သန်စွာဖြင့် "မြောင်" ဟု အော်လိုက်၏။

တံခါးကို တွန်းဖွင့်လိုက်သည်နှင့် ယွဲ့အန်းက သွက်သွက်ကလေး ပြေးဝင်လာသည်။ ပါးစပ်တွင် ဟင်းခတ်အမွှေးအကြိုင် အိတ်သေးသေးလေးကို ကိုက်‌ဆွဲပြီး ကျီရှို့ကျွင်းဆီသို့ လျှောက်သွားသည်။ ထို့နောက် လူသား၏ ဘောင်းဘီ ခြေထောက်ကို ညင်သာစွာ ပွတ်သပ်ပြီး အာရုံစိုက်မှုကို အရယူလိုက်သည်။

"မြောင်"

ပါးစပ်တွင် အိတ်ကို ကိုက်ချီထား‌သောကြောင့် ယွဲ့အန်းအသံက မသဲမကွဲ ထွက်လာသည်။ သူ့မျက်လုံးများက မျှော်လင့်ချက်များဖြင့် တောက်ပနေသည်။

ကျီရှို့ကျွင်းက သတ္တဝါငယ်‌လေးကို ငုံ့ကြည့်လိုက်သည်။ သူတို့၏ မျက်လုံးများ ဆုံသွားသည့် အခိုက်အတန့်တွင် အသံတိတ် ဆက်သွယ်ခဲ့ကြသည်။ ဤတစ်ကြိမ်တွင် မာရှယ်က နောက်ထပ် "မြောင်" ဟု ထပ်အော်သည်ကို စောင့်စရာမလိုဘဲ အဓိပ္ပာယ်ကို နားလည်သွားခဲ့သည်။

"မင်းက အကင်စားချင်လို့လား"

ကျီရှို့ကျွင်းက မေးလိုက်သည်။ သူ့လေသံက ရွှင်မြူးမှုနှင့် မယုံကြည်မှုတို့အကြား ဗျာများနေသည်။

ယွဲ့အန်းက ကျီရှို့ကျွင်း၏ ခြေထောက်ကို ပွတ်သပ်ပြီး တုံ့ပြန်လိုက်သည်။ "မြောင်~" ဟု နူးနူးညံ့ညံ့ အသံပြုလိုက်ခြင်းက မာရှယ်၏ မှန်းဆချက်ကို အတည်ပြုလိုက်ပုံနှယ်။

များများစားစား မစဉ်းစားဘဲ ကျီရှို့ကျွင်းက ယွဲ့အန်း၏ တောင်းဆိုချက်ကို ကျေကျေနပ်နပ် ဖြည့်ဆည်းပေးရန် ဆုံးဖြတ်လိုက်သည်။ သူက အထောက်အပံ့ပစ္စည်းများကို စာရင်းပြုစု၍ ပြီးသွားခဲ့သည်။ ထို့နောက် သူ၏နေ့စဉ် လေ့ကျင့်ခန်းလုပ်သည့် အလေ့အကျင့်ကို ထိန်းသိမ်းရန် အနီးနား ပတ်ဝန်းကျင်ကို စူးစမ်းလေ့လာရန် စီစဉ်နေခဲ့သည်။ ထို့အပြင် ရက်ပေါင်းများစွာ အရသာမရှိသည့် အစားအသောက်များကိုသာ စားလာရပြီးနောက် အရသာပြည့်ဝသည့် အစားအာတစ်နှပ်ကို တွေးမိရုံနှင့်ပင် စွဲမက်ဖွယ်ကောင်းနေပြီဖြစ်၏။

ကျီရှို့ကျွင်းက အရေပြားတွင် အောက်ဆီဂျင်ကပ်ခွာကို ကပ်ပြီး လိုအပ်သော ကိရိယာများကို စုဆောင်းလိုက်သည်။ ထို့နောက် လုံခြုံရေးယာဉ်ထဲမှ ထွက်ခွာသွားသည့် ယွဲ့အန်း‌၏ အနောက်သို့ လိုက်သွားခဲ့သည်။ သူတို့နှစ်ဦးက ရေကန်ရှိရာဆီသို့ သွားနေစဉ် မာရှယ်က ရပ်လိုက်ပြီး ရှေ့ကို လှမ်းမျှော်ကြည့်လိုက်သည်။

ရေကန်၏ အနားတစ်ဝိုက်တွင် တိရစ္ဆာန်အသေကောင်များကို သပ်သပ်ရပ်ရပ် စက်ဝိုင်းသဏ္ဍာန် ခင်းကျင်းထားသည်မှာ အထင်ကြီးလောက်ဖွယ်ပင်။ အားလုံးကိုလည်း ကျွမ်းကျင်စွာ အရေခွံနွှာပြီး အရိုးပင် ထုတ်ထားသေးသည်။

ကျီရှို့ကျွင်းက မြင်ကွင်းကို စူးစမ်းကြည့်ရင်း မျက်ခုံးများက ပင့်တက်သွားသည်။ သူ့အကြည့်က သူ့အား မော့ကြည့်နေသည့် ယွဲ့အန်းဆီသို့ သက်ဆင်းသွားသည်။ ထိုအကောင်လေးက ဘဝင်ခိုက်နေသည့် အမူအရာကိုသာ ဖော်ပြထား၏။

ယွဲ့အန်းက ယာဉ်၏အပြင်ဘက်တွင် မည်ကဲ့သို့ အချိန်ကုန်ခဲ့ကြောင်းကို ခန့်မှန်းကြည့်ရန် မည်သည့် ဉာဏ်ကြီးရှင်ကိုမျှ မလိုအပ်‌ပေ။

 မာရှယ်၏ မျက်လုံးများက ပြီးပြည့်စုံစွာ အပေါင်အလက်ဖြတ်ထားသည့် တိရစ္ဆာန်များကို ဝေ့ဝဲကြည့်လိုက်သည်။ လေ၊ မြေပြင်နှင့် ရေထဲမှ အမျိုးမျိုးသော သတ္တဝါများပါ၀င်‌နေသည်။ ဖြစ်နိုင်ချေရှိသော အစားအစာ အရင်းအမြစ်တစ်ခု‌သော်မျှ အလွတ်မပေးခဲ့ပေ။

"ဒီဟာ..."

ကျီရှို့ကျွင်းက စားသောက်ဆိုင်မီနူးများတွင် ဘုံဟင်းလျာအဖြစ် အသိအမှတ်ပြုထားသည့် ငှက်တစ်ကောင်ကို ကောက်ကိုင်လိုက်သည်။

ထိုအသားက နူးညံ့မှုနှင့် ကြွယ်ဝသောအရသာကြောင့် လူသိများသည်။ ဟင်းချိုပင်ချက်ချက် မွှေကြော်ပင်ကြော်ကြော် အလားတူ အရသာရှိသည်။ သို့သော် ဤငှက်များက သစ်တောများအတွင်း၌ ထုံးစံအတိုင်း အသိုက်ဖွဲ့လေ့ရှိသည်။ သို့သော် ဤနေရာက မျက်စိဖြင့် မြင်ရသလောက် ကြည့်လျှင် ကျက်တီးမြေမှလွဲ၍ ပတ်ဝန်းကျင်တွင် ညှိုးနွမ်းနေသော မြက်ခြောက်များသာ ရှိသည်။

"ဒါကို ဘယ်မှာရှာတွေ့လာတာလဲ..."

မာရှယ်က အသားများကို ရေကန်ထဲတွင် ဆေးချရင်း မေးလိုက်သည်။

ယွဲ့အန်းက လက်ဖဝါး‌လေးကို ဆန့်ထုတ်ရင်း တောင်ဘက်သို့ ညွှန်ပြလိုက်သည်။

"မြောင်"

သူက အားလုံးကို ရှင်းပြနေသကဲ့သို့ အသံပြုလိုက်သည်။

"ငါတို့ စားပြီးရင် အဲဒီကို သွားကြမယ်.."

ကျီရှို့ကျွင်းက ထိုသို့ဆုံးဖြတ်လိုက်ပြီး သိချင်စိတ်က ပြင်းပြလာခဲ့သည်။

မာရှယ်က ဟင်းချက်ရန် အသားများကို ကျွမ်းကျင်စွာ ပြင်ဆင်နေချိန်၌ ယွဲ့အန်းက ရွှန်းရွှန်းစားစားဖြင့် အာရုံစူးစိုက်စွာ ကြည့်နေခဲ့သည်။ သူ့အမြီးကလည်း မျှော်လင့်တကြီး စောင့်မျှော်နေသည့်အတိုင်း တလှုပ်လှုပ် လှုပ်ယမ်းနေသည်။

"မြောင်"

ယွဲ့အန်းက သဘောတူလိုက်သည်။ သူ့မျက်လုံးများက ကျီရှို့ကျွင်း၏ လက်များဆီမှ တစ်ဖဝါးမျှ မခွာခဲ့ပေ။

"ငါ သိချင်မိသား..."

ယွဲ့အန်း လက်လှမ်းမမီသော ငှက်အသားကင်တစ်ခုကို ကိုင်ရင်း ကျီရှို့ကျွင်းက စိတ်ထဲမှ အတွေးများကို ထုတ်ပြောလိုက်သည်။ ကြောင်လေးက အစာရရန် အလွန်အမင်း လှုပ်ရှားကြိုးစားနေသည်ကို ကြည့်ပြီး မာရှယ်က ပျော်ရွှင်သွားမိသည်။

"တစ်ယောက်ယောက်က မင်းကိုသာ အစားအသောက် ကောင်းကောင်း ကျွေးရင် သူ့နောက်ကို လိုက်သွားမှာလား"

ကျီရှို့ကျွင်းက ခေတ္တမျှ ရပ်လိုက်ပြီး ဂုဏ်ယူနေသည့် အသံဖြင့် ထပ်လောင်းပြောလိုက်သည်။

"ဒါပေမယ့် လူတော်တော်များများက ငါ့ရဲ့ အချက်အပြုတ် စွမ်းရည်နဲ့ ယှဉ်နိုင်ပါ့မလားလို့ သံသယဝင်မိတယ်..."

အနည်းဆုံး အပြင်ဘက်၌ ချက်ပြုတ်ခြင်းနှင့် ပတ်သက်လျှင် ထိုစကားမှာ အမှန်ပင်ဖြစ်၏။ နှစ်ပေါင်းများစွာ စစ်ရေးလှုပ်ရှားမှုများက အရင်းအမြစ်အနည်းငယ်ဖြင့် အရသာရှိသော အစားအစာများကို ဖန်တီးနိုင်စွမ်းရှိသည့် ကျီရှို့ကျွင်း၏ စွမ်းရည်ကို မြှင့်တင်ပေးခဲ့သည်။

ယွဲ့အန်းက ထိုစကားကို ကြားပြီး မခံမရပ်နိုင် ဖြစ်သွားခဲ့သည်။ မာရှယ်က သူ၏သစ္စာစောင့်သိမှုကို အာမခံရန်အတွက် အစားအစာကို အသုံးချရန် ကြိုးစားနေသည်မှာ ထင်ရှားလှသည်။ သို့သော် စိတ်ထဲ၌ ကန့်ကွက်နေသည့်တိုင် ယွဲ့အန်းက ပြီးပြည့်စုံစွာ ချက်ပြုတ်ထားသော အသားများ၏ အစအနတိုင်းကို အရသာမခံဘဲ မနေနိုင်တော့ပေ။ ထို့အပြင် ကျီရှို့ကျွင်း၏ ကျွမ်းကျင်မှုကိုလည်း ဝမ်းနည်းစွာဖြင့် အသိအမှတ်ပြုရ‌ပေမည်။

ကျေနပ်စွာ စားသောက်ပြီးနောက် သစ်ပင်ခြောက်များဖြင့် ပြည့်နှက်နေသည့် တောအုပ်ကို ဖြတ်ပြီး အစာ‌ကြေ‌လမ်းလျှောက် ထွက်လာခဲ့ကြသည်။ လမ်းတစ်ဝက်ခန့်တွင် ယွဲ့အန်းက ရပ်တန့်သွားပြီး ကောင်းကင်ပေါ်သို့ မော့ကြည့်လိုက်သည်။ ယခင် ကြည်လင်နေသော မျက်နှာပြင်က မှုန်မှိုင်းသော မီးခိုးရောင်အဖြစ် ပြောင်းသွားပြီး လေထုကလည်း စိုစွတ်မှုနှင့်အတူ လေးလံလာသကဲ့သို့ ခံစားရသည်။

ကျီရှို့ကျွင်းကလည်း အပြောင်းအလဲကို သတိပြုမိပြီး သတိထားမိသည်ကို ထုတ်ပြောလိုက်သည်။

"မိုးရွာတော့မှာလား"

"မြောင်"

ယွဲ့အန်းက အတည်ပြုပေးလိုက်သည်။

သို့သော်လည်း သူ့အသံက ရိုးရိုးမိုးသက် မုန်တိုင်းတစ်ခုထက် သာလွန်ကြောင်း ပေါ်လွင်နေပေသည်။

မိုးရာသီက နီးကပ်လာပေပြီ။ ထို့ကြောင့် ဤဂြိုဟ်ပေါ်တွင် ၎င်းက အသေးအမွှား ကိစ္စတစ်ခု မဟုတ်ပေ။ ဂြိုဟ်၏ရာသီစက်ဝန်းများက အလွန်ပြင်းထန်လှသည်။ ခြောက်သွေ့ချိန်တွင် မိုးခေါင်ရေရှားပြီး မိုးရွာချိန်၌ ရေကြီး‌ရေလျှံသည်အထိ သည်းထန်စွာ ရွာသွန်းတတ်သည်။ ကုန်းမြင့်၌ရှိသည့် ယွဲ့အန်း၏ ဂူအဟောင်းက ဖျက်ဆီခံလိုက်ရ‌ပြီဖြစ်၏။ ထို့ကြောင့် သူတို့တွင် ကျီရှို့ကျွင်း၏ ကာကွယ်ရေးယာဉ်တစ်စီးသာ ကျန်ရှိတော့သည်။

ခြောက်သွေ့ရာသီ ကုန်ဆုံးကြောင်း ဖော်ပြနေသည့် ပထမဦးဆုံး မိုးစက်များက စတင်ကျဆင်းလာသည်။ ထိုသို့ကျဆင်းလာသည်နှင့်အမျှ ယွဲ့အန်းနှင့် ကျီရှို့ကျွင်းတို့က ကာကွယ်ရေးယာဉ်ဆီသို့ အမြန်ပြန်လာခဲ့ကြသည်။ သူတို့က နှောင့်နှေးကြန့်ကြာမှုမရှိဘဲ တွန်းကန်အားစနစ်ကို ဖွင့်လိုက်ကြသည်။ ယခင်က ကျီရှို့ကျွင်းမှာ ဘေးကင်းနိုင်‌ခြေရှိသည့် နေရာတစ်ခုကို ကင်းထောက်ခဲ့ဖူးသည်။ ယခုအခါ ထိုခြောက်သွေ့သစ်တောဆီသို့ လမ်းကြောင်း သတ်မှတ်လိုက်သည်။

ယာဉ်၏ AI က အသင့်တော်ဆုံး ဆင်းသက်ရာနေရာအဖြစ် ခိုင်ခံ့သောအကိုင်းအခက်များရှိသည့် အထူးကြီးမားသော သစ်ပင်ကြီးတစ်ပင်ကို ရွေးချယ်ခဲ့သည်။ ကျီရှို့ကျွင်းက စက်၏ဆုံးဖြတ်ချက်ကို ယုံကြည်ပြီး ဆင်းသက်ခြင်းဆိုင်ရာ လုပ်ငန်းစဉ်များကို ကိုင်တွယ်ခွင့်ပြုထားခဲ့သည်။ ထို့နောက် မာရှယ်က သူ၏ခေါင်းအုံးပေါ်၌ နေရာယူထားသော ယွဲ့အန်းအပေါ် ပြန်လည်အာရုံစိုက်လိုက်သည်။ ခေါင်းအုံးပေါ်တွင်လည်း ညစ်ပေနေသော ခြေရာများက စုပုံပြီးကျန်ရစ်ခဲ့သည်။

"ရှောင်ပိုင်"

ကျီရှို့ကျွင်းက ရုတ်တရက် ခေါ်လိုက်ပြီး အမွေးလုံး‌လေးကို ကောက်ချီရန် လက်လှမ်းလိုက်သည်။

ထို့နောက် ကျီရှို့ကျွင်းက ယွဲ့အန်းကို ထိန်းချုပ်ရေးစနစ်ခုံဆီသို့ ခေါ်ဆောင်သွားလိုက်သည်။ ထို့နောက် ယာဉ်၏နံရံထဲတွင် ဝှက်ထားသော အခန်းတစ်ခုအတွင်းမှ ကုလားထိုင်ကို ဆွဲထုတ်လိုက်၏။ ထိန်းချုပ်‌ရေး စနစ်ခုံပေါ်တွင် ယွဲ့အန်းကို နေရာချကာ မေးလိုက်သည်။

"မင်း စာဖတ်တတ်လား"

ယွဲ့အန်းက အေးခဲသွားပြီး သူ့မျက်လုံးများက ဖန်သားပြင်ပေါ်ရှိ စာလုများဆီသို့ လှစ်ခနဲကြည့်လိုက်သည်။ ထို့နောက် သူ ထိုသင်္ကေတများကို အဓိပ္ပါယ်မဖော်နိုင်ကြောင်း ထိတ်လန့်စွာဖြင့် သဘောပေါက်သွားခဲ့သည်။

ဒီလောက်ဆယ်စုနှစ် နည်းနည်းလေးအတွင်းမှာ လူသားတွေရဲ့ လက်ရေးက ဘယ်လိုလုပ်ပြီး သိသိသာသာ ပြောင်းလဲသွားတာလဲ...

ယွဲ့အန်း၏ သိသိသာသာ ထိတ်လန့်နေသော အမူအရာက ကျီရှို့ကျွင်း သိလိုသမျှကိစ္စတိုင်းကို ပြောပြနေလေသည်။ မာရှယ်က ပုံမှန် တင်းမာသော အမူအရာနှင့် ကွဲလွဲပြီး စိတ်ရှည်စွာဖြင့် ထိန်းချုပ်စနစ်ခုံပေါ်ရှိ ခလုတ်တစ်ခုစီကို စတင်ညွှန်ပြလိုက်သည်။ ထို့နောက် ၎င်းတို့၏ လုပ်ဆောင်ချက်နှင့် ဆက်စပ်နေသော စာလုံးများကို ရှင်းပြခဲ့သည်။

ယွဲ့အန်း၏စိတ်မှာ တဖြည်းဖြည်း ပျံ့လွင့်သွားသည်။ သူ့မျိုးနွယ်၏ အကြီးအကဲများက သူ့ကို လူသားကလေးများနှင့် ပြည့်နှက်နေသော စာသင်ခန်းထဲသို့ မပြောမဆိုဖြင့် ပထမဆုံးအကြိမ် ပစ်ချခဲ့ချိန်က ထိတ်လန့်မှုကို ပြန်ပြောင်းသတိရမိသွားသည်။ သာမန်ကြောင်တစ်ကောင်ကဲ့သို့ ဟန်ဆောင်ရင်း လူသားများ၏ သင်ခန်းစာများကို နားလည်ရန် ရုန်းကန်ခဲ့ရသည့် မှတ်ဉာဏ်က သူ့ကျောရိုးတစ်လျှောက်ကို တုန်လှုပ်သွားစေခဲ့သည်။

ယွဲ့အန်းက လက်တန်းသင်ပေးသည့် ဘာသာစကား သင်ခန်းစာအပေါ် စိတ်အားထက်သန်မှု မရှိသည်ကို ကျီရှို့ကျွင်းက သတိပြုမိခဲ့သည်။ သို့သော် မာရှယ်ကျီက စိတ်အနှောင့်အယှက် မဖြစ်ခဲ့ပေ။ ထို့နောက် စိန်ခေါ်သည့် အရိပ်အမြွက်စွက်ထားသော အသံဖြင့် ပြောလိုက်သည်။

"မင်းနာမည်က ရှောင်ပိုင် မဟုတ်ဘူးမလား"

အဓိပ္ပာယ်က ရှင်းလင်းလှပေ၏။ ယွဲ့အန်းက စာရေးတတ် ဖတ်တတ်လာလျှင် သူ့နာမည်အမှန်ကို ထုတ်ပြနိုင်လိမ့်မည်။ ယွဲ့အန်း၏ ချွန်မြမြ နားရွက်များက ဤပါးနပ်လှသော လှုံ့ဆော်မှုကြောင့် အသစ်တဖန် စိတ်ဝင်စားမှုနှင့်အတူ လှုပ်ရှားသွားခဲ့သည်။ သူ၏ ခန္ဓာကိုယ် သေးသေးလေးက ရုတ်တရက် နိုးနိုးကြားကြား ဖြစ်လာပြီး အာရုံစိုက်လာခဲ့သည်။

" 'ကျီ' ဆိုတဲ့ စကားလုံးကို ဒီအက္ခရာသုံးလုံးနဲ့ စာလုံးပေါင်းတယ်"

မာရှယ်က ဖန်သားပြင်ပေါ်ရှိ သင်္ကေတများကို စတင်ညွှန်ပြလိုက်သည်။

"မြောင်"

ယွဲ့အန်းက တုံ့ပြန်လိုက်ပြီး သူ့မျက်လုံးများက စာလုံးများကို စိုက်ကြည့်နေခဲ့သည်။

"အသံထွက်က..."

"မြောင်"

စိတ်အားထက်သန်သည့် ပြန်‌ဖြေသံလေးက ထွက်ပေါ်လာခဲ့သည်။

"ကောင်းတယ်... နောက်တစ်လုံးက..."

"မြောင်..."

ယွဲ့အန်း၏အသံက အာရုံစူးစိုက်သည့် အရိပ်အယောင်များဖြင့် ရောယှက်နေခဲ့သည်။

ရက်များကြာလာသည်နှင့်အမျှ သူတို့၏ နေ့စဉ်လုပ်ငန်းဆောင်တာများက စည်းချက်ကျလာခဲ့သည်။ သို့သော် ရံဖန်ရံခါ ယွီအန်း၏ အပြင်ထွက်မှုကြောင့် အစီအစဉ်က ပျက်ပြားသွားတတ်သည်။ စိတ်ဝိညာဉ်ကျောက်တုံးများကို စားပြီး စွမ်းအားမြင့်လာသော ကြောင်လေး‌က မိုးဒဏ်မှ မိမိကိုယ်ကို ကာကွယ်ရန် စိတ်ဝိညာဉ်စွမ်းအား အတားအဆီးတစ်ခုကို ဖန်တီးတတ်သည်။ ထို့နောက် စူးစမ်းလေ့လာရန် နာရီအနည်းငယ်ကြာတိုင်း အပြင်ထွက်ကာ စွန့်စားတတ်သည်။

ထိုအတောအတွင်း ရေစိုခံကိရိယာများကို ၀တ်ဆင်ထားသည့် ကျီရှို့ကျွင်း ရေပမာဏကို စစ်ဆေးပြီး သူတို့၏ ဘေးကင်းမှုကို သေချာစေရန် နေ့စဉ် ကင်းလှည့်မှုများ ပြုလုပ်ခဲ့သည်။

မရပ်မနား မိုးရွာသွန်းမှုကြောင့် ကာကွယ်ရေးယာဉ်တွင် ပိတ်မိသည့် လူသားတစ်ဦးနှင့် ကြောင်တစ်ကောင်တို့၏ သင်ခန်းစာများက ထူးထူးခြားခြား တိုးတက်မှုများ ရှိလာခဲ့သည်။ ကျီရှို့ကျွင်း၏ အမူအရာက အမြဲတမ်း တင်းမာနေတတ်သည်။ သို့သော်လည်း အံ့သြစရာကောင်းလောက်အောင်ပင် မာရှယ်၏ စိတ်နေစိတ်ထားက ပြည့်ဝကြောင်း ယွဲ့အန်း တွေ့ရှိခဲ့သည်။

ထိုလူသား၏စိတ်ရှည်မှုက မကုန်ခန်းနိုင်သည့်ပုံပင်။ ထို့အပြင် ယွီအန်းက စိတ်ရှုပ်ထွေးသော်လည်း ထူးထူးခြားခြား နှစ်သိမ့်မှုကို ပေးစွမ်းနိုင်သည့် သူ၏ထူးခြားသော အမူအကျင့်ကိုလည်း တွေ့ရှိခဲ့သည်။

သူ့ဘက်သို့ကြည့်လျှင် ယွဲ့အန်းအပေါ် ကျီရှို့ကျွင်း၏ လေ့လာတွေ့ရှိမှုက ပိုလို့ပင် ကျယ်ပြန့်သေး၏။ သူက ကြောင်လေး၏ အလေ့အထနှင့် ထူးခြားသော အကျင့်စရိုက်များကို မှတ်တမ်းတင်ရန်အတွက် ရည်ရွယ်ပြီး မှတ်စုစာအုပ်လေးကိုပင် စတင်ရေးသားခဲ့သည်။

သူက ယွဲ့အန်း၏ သန့်ရှင်းရေးလုပ်ခြင်းကို အလွန်ဂရုစိုက်တတ်သည့် အလေ့အကျင့်၊ အခါအားလျော်စွာ အမွှေးများကို မြိုချမိပြီး အန်ထုတ်တတ်ခြင်းကို သတိထားမိခဲ့သည်။ ထို့အပြင် ယွဲ့အန်းက သူ့တွင်ရှိသော အမြီးရှစ်ချောင်းကို တစ်ချောင်းချင်းစီ ရေတွက်တတ်သည်။ ပြီးလျှင် အမြီးခုနစ်ချောင်းကို သိမ်းလိုက်ပြီး စိတ်ဓာတ်ကျစွာဖြင့် ဘောလုံးလေးတစ်လုံးကဲ့သို့ ကိုယ်ကို သေးသေးလေး ကွေးပြီး အိပ်တတ်သည့် ထူးဆန်းသော အလေ့အကျင့်တစ်ခုလည်း ရှိနေသည်။

ယွဲ့အန်းက နွေးထွေးသော နေရာများကို နှစ်သက်သည်။ ထို့အပြင် သူက အပျော်သဘောဖြင့် သူ့အမြီးကို လိုက်ဖမ်းတတ်ပြီး လှုပ်ရှားနေသော မည်သည့်အရာပေါ်ကိုမဆို မခုန်အုပ်ဘဲ မနေနိုင်ကြောင်းကိုလည်း မာရှယ်က သတိပြုမိခဲ့သည်။ သို့သော် ကျီရှို့ကျွင်းကို အမှန်တကယ် အံ့အားသင့်စေသည့် အရာက ယွဲ့အန်း၏ စွမ်းရည်များပင်ဖြစ်၏။

တွင်းတူးခြင်းနှင့် မီးမွှေးခြင်းမှအစ ရေနှင့်လေကို ကြိုးကိုင်ခြင်းအထိပင်။ လျှပ်စီးများနှင့် ရေခဲများကို ဖြစ်ပေါ်စေသည့်တိုင် မည်သည့်ကိစ္စကမျှ သတ္တဝါလေး၏ စွမ်းပကားထက် ကျော်လွန်နေပုံမရပေ။ ယာဉ်၏အတွင်းပိုင်း နံရံပေါ်ရှိ လက်သည်းရာနက်နက်များနှင့် ယွဲ့အန်း၏ စွမ်းအား မတော်တဆ ပေါက်ကွဲထွက်မှုကြောင့် ဖြစ်လာသော အမှတ်အသားများက ကြောင်လေး၏ စစ်မှန်သော ခွန်အားကို အမြဲတ‌စေ သတိပေးချက်ဖြစ် လာခဲ့သည်။

ကျီရှို့ကျွင်း၏ အကြည့်များက ထိုအမှတ်အသားများပေါ် ရောက်သွားသည့်အချိန်တိုင်း ယွဲ့အန်းက သူ့စွမ်းအားကို ထိန်းချုပ်ထားခြင်းအပေါ် ကျေးဇူးတင်မိသည်။ ဒေါသကြီးသူဖြစ်လင့်ကစား ကြောင်လေးက သူ့အပေါ် တစ်ခါမျှ လက်သည်းဖြင့်ပင် မရွယ်ခဲ့ဖူးပေ။ ယင်းအစား မကျေနပ်ကြောင်းဖော်ပြရန်အတွက် နူးညံ့သော လက်ဖဝါးလေးဖြင့် ပုတ်ခြင်း သို့မဟုတ် သူ့အား ကျောခိုင်းထားခြင်းကိုသာ ရွေးချယ်ခဲ့သည်။ အရေးအကြီးဆုံးမှာ ယွဲ့အန်းက သူ၏ထူးကဲသော စွမ်းရည်များအား မာရှယ့်ကို ဆန့်ကျင်ရန်အတွက် တစ်ခါမျှ အသုံးမပြုခဲ့ပေ။

ကျီရှို့ကျွင်း၏ မျက်လုံးများက လက်သည်းရာများမှတစ်ဆင့် ယွဲ့အန်းထံသို့ ပြန်ပြောင်းကြည့်လိုက်ချိန်တွင် ကြောင်လေးက နူးညံ့သော လက်ဖဝါးလေးဖြင့် သူ့လက်ကို ညင်သာစွာ ပုတ်နေကြောင်း တွေ့လိုက်ရသည်။ မာရှယ်၏ အာရုံစိုက်မှုကို ပြန်ရသွားသည့် ယွဲ့အန်းက ထိန်းချုပ်ရေးစနစ်ခုံဘက်သို့ ပြန်လှည့်သွားသည်။ ထို့နောက် ဂရုတစိုက်ဖြင့် ခလုတ်များကို တန်းစီပြီး နှိပ်လိုက်သည်။

"... ယွဲ့လား"

ကျီရှို့ကျွင်းက ပါးစပ်မှ ထုတ်ဖတ်လိုက်သည်။ သူ့မျက်ခုံးများကလည်း အာရုံစူးစိုက်မှုကြောင့် တွန့်ကြုတ်သွားသည်။

"မြောင်~"

ယွဲ့အန်းက နောက်ထပ် ခလုတ်အတန်းလိုက်ကို မနှိပ်မီ အတည်ပြုပေးလိုက်သည်။

"အန်းလား"

အဖြူရောင် အမွေးလုံးလေးက သူ့အမြီးကို ပျော်ရွှင်စွာ ဝှေ့ယမ်းနေရင်း စိတ်အားထက်သန်စွာဖြင့် အော်လိုက်သည်။

"မြောင်"

"ယွဲ့အန်းလား"

ကျီရှို့ကျွင်းက တစ်ခဏမျှ စိတ်ရှုပ်ထွေးသွားသော်လည်း မကြာမီ နားလည်သွားခဲ့သည်။

"ဒါက မင်းနာမည်လား"

"မြောင်"

ဟုတ်မှန်ကြောင်း ပြန်ဖြေသံက ထွက်ပေါ်လာသည်။

ယွဲ့အန်းပေါ့...

ပုံမှန်အတိုင်း တင်းမာနေသော မာရှယ်၏မျက်နှာထားက မသိမသာ နူးညံ့သွားသည်။ ထို့နောက် သူက မျက်ဆန်များကို လှန်လိုက်သည်။ ထိုအပြုအမူက မကြာခဏဆိုသလို ဒေါသထွက်နေသည့် အမူအရာအဖြစ် အထင်မှားတတ်ကြသည်။ ထို့အပြင် နှုတ်ခမ်းထောင့်များကလည်း တွန့်ကွေးသွားပြီး အပြုံးမမည်‌သော အပြုံးတစ်ပွင့် ဖြစ်တည်လာခဲ့သည်။ သူကိုယ်တိုင် အံ့အားသင့်‌စေသည့် နူးညံ့သိမ်မွေ့မှုနှင့်အတူ ကျီရှို့ကျွင်းက လက်ဆန့်ထုတ်ပြီး ယွဲ့အန်း၏ ခေါင်းသေးသေးလေးကို ပွတ်သပ်ပေးလိုက်သည်။

ယွဲ့အန်းက ထိန်းချုပ်ရေးစနစ်ခုံမှ ခုန်မချမီ မာရှယ်၏ ချစ်ခင်ကြင်နာသော အမူအရာအား ခဏတာ ခွင့်ပြုပေးခဲ့သည်။ ထို့နောက် သူက ဟင်းခတ်အမွှေးအကြိုင်များကို သိမ်းဆည်းထားသည့် ဗီရိုငယ်ဆီသို့ ခပ်ဖွဖွလျှောက်သွားပြီး မျှော်လင့်တကြီး တံခါးကို ကုတ်ခြစ်လိုက်၏။

သို့သော်လည်း ကျီရှို့ကျွင်းမှ အသိပေးလိုက်ချိန်တွင် သူ၏ မျှော်လင့်ချက်များက ပျက်ပြားသွားခဲ့သည်။

"ငါတို့မှာ ဟင်းခတ်အမွှေးအကြိုင်တွေ ကုန်သွားပြီလေ"

"...?!?"

ယွဲ့အန်း၏တုံ့ပြန်မှုက လုံးဝ စိတ်ပျက်သွားသည့်ပုံနှယ်။ ထို့နောက် သူက မာရှယ်ထံသို့ လှည့်ကြည့်လိုက်သည်။ ထိုလူသားက ယခုအခါ ထိန်းချုပ်စနစ်တွင် ဖောက်ထွင်းမြင်နိုင်သော ချစ်ပ်ပြားကို ထည့်သွင်းနေလေသည်။

ယွဲ့အန်းက စိတ်ထိခိုက်နာကျင်နေသည့် အသံလေးဖြင့် အော်လိုက်သည်။

"မြောင်"

ပထမဆုံးအနေဖြင့် စိတ်ဝိညာဉ်ကျောက်တုံးများ မရှိတော့ပေ။ ယခုအခါ အသားကင်များလည်း မရှိတော့ပေ။

ဒီလို ရိုးရှင်းတဲ့ ပျော်ရွှင်မှုတွေ မရှိတော့တဲ့ ကြောင်တစ်ကောင်ရဲ့ ဘဝက ဘာများအဓိပ္ပာယ်ရှိတော့မှာလဲ...

စိတ်ပျက်အားငယ်မှုနှင့်အတူ ယွဲ့အန်းက ဗီရို၏အရှေ့တွင် ဘောလုံးလေးတစ်လုံးကဲ့သို့ တင်းတင်းကျပ်ကျပ် ကွေးထား‌လေတော့သည်။

🐈🐈🐈