အပိုင်း ၁၉၅

Chapter 195

အဖေလင်းက ကျိယွီရှောင်ကို သွားဆယ့်နှစ်ချောင်းပေါ်အောင်ပြုံးပြကာ နှုတ်ဆက်စကားဆိုပြီး အပြင်လိုက်ပို့လေသည်။

လင်းလော့ချင်း ချစ်လှစွာသောအဖေနှင့် သိတတ်လိမ္မာသောသားဆက်ဆံရေးမှာ သားဖြစ်သူအခန်းကဏ္ဍကနေ သရုပ်ဆောင်ခြင်း ပြီးဆုံးပြီးနောက် ကားပေါ်သို့ ရောက်သည်နှင့် ဖိုင်အိတ်ကို ဖွင့်လိုက်သည်။ထို့နောက် သူက ကျိယွီရှောင်ကို အထဲရှိ စာရွက်စာတမ်းများကို စစ်ဆေးခိုင်းလိုက်သည်။ 

"ပြဿနာတစ်ခုခုရှိလား"

ကျိယွီရှောင်က ၎င်းကို စစ်ဆေးပြီး ဖိုင်ကို ပြန်ထည့်ကာဆိုသည်။

"ပြဿနာမရှိပါဘူး...အခု မင်းက ပေါယွမ်ရဲ့တရားဝင်ရှယ်ယာရှင်ဖြစ်သွားပြီ"

"ရက်စ်" 

လင်းလော့ချင်းက ဝမ်းသာအားရ ပြောလိုက်သည်။

ကျိယွီရှောင်က သူ၏ပျော်ရွှင်နေသောအမူအရာကိုကြည့်ပြီး ရယ်မောလိုက်၏။

"ဒါက အစပဲရှိသေးတယ်...အခုကနေစပြီး မင်း ကုမ္ပဏီကိုဝါးမြိုပြီး မင်းတစ်ယောက်တည်းအပိုင်ဖြစ်အောင်လုပ်ဖို့စီစဥ်ရမယ်"

လင်းလော့ချင်း: "...ဒါကကျ ငါနားမလည်တဲ့ နေရာထပ်ရောက်သွားပြန်ပြီ"

"ရပါတယ်" 

ကျိယွီရှောင်က သူ့ခေါင်းကို ပုတ်ပေးလိုက်သည်။

"ကျန်တာတွေ ငါ့တာဝန်ထားလိုက်... မင်းက လိုအပ်လာတဲ့အခါရှေ့ထွက်ပြီးဖျော်ဖြေပေးဖို့ပဲ လိုတယ်"

"အဲ့လောက်မလွယ်ဘူး" 

လင်းလော့ချင်းက သူ့ ရင်ဘတ်ကို ပုတ်ရင်းဆို၏။

"သရုပ်ဆောင်တဲ့နေရာမှာ ငါက ပရော်ဖက်ရှင်နယ်ပဲ"

"ဒါပေါ့"

ကျိယွီရှောင် အပြင်ထွက်သည်က ရှားရှားပါးပါးဖြစ်ပြီး လင်းလော့ချင်းကလည်း ရုပ်ရှင်အသစ်ရိုက်ကူးရန် ထွက်ခွာတော့မှာဖြစ်သဖြင့် လင်းလော့ချင်း ကျိယွီရှောင်၏ နောက်ဆက်တွဲဆေးစစ်မှုရက်ချိန်းကို ရက်အနည်းငယ် စောပြီးပြုလုပ်ရန်တမင်စီစဥ်ခဲ့သည်။စိတ်ချ၍ရအောင် သူထွက်မသွားခင် ကျိယွီရှောင်ဆေးစစ်ရာတွင် နောက်ဆုံးတစ်ခေါက်လိုက်အဖော်ပြုပေးချင်ခဲ့သည်။

ဝေ့ကျွင်းဟယ်က ကျိယွီရှောင်၏ ငယ်သူငယ်ချင်းပီသစွာပင် လုပ်မဆင်းဘဲ သူတို့နှင့် လိုက်ခဲ့လေသည်။

ဤတစ်ခေါက်ဆေးစစ်သည်က အရင်ကထက် ပိုကြာခဲ့၏။ကံကောင်းထောက်မစွာနှင့် အရင်တစ်ခေါက်အတွေ့အကြုံအပြီးမှာ လင်းလော့ချင်းနှင့် ဝေ့ကျွင်းဟယ်တို့က စိတ်ပိုင်းဆိုင်ရာ ပြင်ဆင်ထားခဲ့ကြသဖြင့် အလွန်ကြီး စိတ်မပူကြပေ။ကျိယွီရှောင် ထွက်လာမည်ကို စိတ်ရှည်ရှည်နှင့် စောင့်နေခဲ့ကြသည်။

"မဆိုးပါဘူး" 

ဆရာဝန်က ကျိယွီရှောင်ကိုဆိုသည်။ 

"ခင်ဗျားရဲ့ အခြေအနေက အရင်တစ်ခေါက်ကထက် ပိုကောင်းလာတယ်...ဒီအတိုင်း ဆက်သွားရင် မကြာခင် ပြန်လည်ထူထောင်ရေးလုပ်ဖို့ ကြိုးစားနိုင်မှာပါ"

ကျိယွီရှောင် အံ့သြသွားသည်။သူ့ဒဏ်ရာက သိပ်မပြင်းထန်ဘူးဆိုသည်နှင့်ပြန်ကောင်းလာရန် အခွင့်အလမ်းက မြင့်မားကြောင့် အစကတည်းက သိထာပေမဲ့ သူမတ်တပ်ပြန်ရပ်နိုင်မည့် မျှော်လင့်ချက်၏အရုဏ်ဦးက ဤမျှစောစော ရောက်လာလိမ့်မည်ဟု ဘယ်တုန်းကမှ မမျှော်လင့်ထားပါချေ။

နောက်ဆုံးတွင် သူ မတ်တပ်ရပ်ပြီး လင်းလော့ချင်းကို ပွေ့ဖက်နိုင်တော့မည်။

ဤအကြောင်းကို လင်းလော့ချင့်းမပြောပြဘဲ သူ့အခြေအနေကကောင်းနေပြီး ဆရာဝန်က အလွန်ဝမ်းသာနေသည်ဟုသာပြောခဲ့သည်။သူ လင်းလော့ချင်းကိုအံ့အားသင့်အောင် လုပ်ရန်စီစဥ်ထားသည်။

လင်းလော့ချင်းက သူ့အခြေအနေကောင်းမွန်ကြောင်းကြားသောအခါစိတ်သက်သာရာရပြီး နွေးထွေးစွာပြုံးလိုက်သည်။သူ့အတွက်က ကျိယွီရှောင် အခြေအနေကောင်းသည်ဟုကြားရသည်ကပင် အလွန်ကောင်းမွန်နေပြီဖြစ်သည်။အခြေအနေကောင်းနေသရွေ့တော့ အနှေးနှင့်အမြန်ဆိုသလို၊ တစ်နေ့ကျလျှင် သူပြန်ကောင်းလာလိမ့်မည်ပင်။

သူ ကျိယွီရှောင်ကို ကားထဲသို့ သယ်သွားပြီး အချိန်ကို စစ်ဆေးကာ အိမ်ပြန်ရန် ပြင်ဆင်သည်။

လင်းဖေး နှင့် ကျိလဲ့ယွီတို့သည် သူတို့ရှေ့မှ ပြန်လာခဲ့ကြပြီး တတိယထပ်ရှိ လေ့ကျင့်ရေးခန်းတွင် လော့ကျား နှင့် လေ့ကျင့်နေကြသည်။

အန်တီကျန်းက ဟင်းချက်နေဆဲဖြစ်၏။ကျိယွီရှောင်ကရှေ့ကနေ စာကြည့်ခန်းကိုသွားပြီး လင်းလော့ချင်းကနောက်ကနေ အမြီးလေးသဖွယ်လိုက်သွားသည်။သူ၏ဇာတ်ကားအသစ်၏ ဇာတ်ညွှန်းကိုဖတ်ရင်း စာကြည့်ခန်းတွင် ကျိယွီရှောင်နှင့်အတူနေရန်သူဆုံးဖြတ်ထားသည်။

မျက်စိတစ်မှိတ်အတွင်းမှာပဲ သုံးရက်ကြာသွားပြီး လင်းလော့ချင်းတစ်ယောက် နောက်ဆုံးမှာ ရိုက်ကူးရေးအဖွဲ့ထဲကို ဝင်ရမည့်အချိန်ရောက်လာ၏။

ထိုအချိန်တွင် သူစိတ်လှုပ်ရှားနေသည့်တိုင် ကျိယွီရှောင်ကို ထားခဲ့ရန် အလွန်ဝန်လေးနေဆဲဖြစ်၏။မထွက်ခွာမီ နောက်ပြန်လှည့်ကာ ကျိယွီရှောင်ကိုနောက်တစ်ကြိမ် ဖက်လိုက်သည်။

"ငါပြန်အလာကိုစောင့်နေနော်" 

သူက ကျိယွီရှောင်ကိုပြောလိုက်သည်။

ကျိယွီရှောင်က ပြုံးပြီးဆို၏။

"ကောင်းပြီ"

လင်းလော့ချင်း သူ့ကို လှည့်ကြည့်လှည့်ကြည့်ဖြင့် အိပဲ့အိပဲ့နှင့် ခရီးဆောင်အိတ်ကိုဆွဲသွားသည်။ ခြံဝင်းအဆုံးနား ရောက်ခါနီးတွင် သူ့လက်ထဲက ခရီးဆောင်အိတ်ကို ရုတ်တရက် လွှတ်ချလိုက်ပြီး အမြန်ပြန်ပြေးကာ ကျိယွီရှောင်၏မျက်နှာကို ငုံ့နမ်းလိုက်သည်။ ပြီးလျှင် ပြန်ပြေးသွား၏။

၎င်းနောက် သူက ကျိယွီရှောင်ကို ပြန်လှည့်ကြည့်ကာ လခြမ်းကွေးမျက်လုံးများကို ကွေးနေအောင်ပြုံးပြရင်း လက်ကို မြှောက်ကာ တာ့တာ့ပြလိုက်သည်။ထို့နောက် လက်နှစ်ဖက်လုံးကိုမြှောက်ပြီး ခေါင်းလေး စောင်းကာ အသဲပုံလုပ်ပြလေ၏။

နေရောင်ခြည်က သူ့ခန္ဓာကိုယ်နှင့် မျက်လုံးများပေါ်သို့ ဖြာကျနေပြီး ဤအခိုက်အတန့်ဝယ် မိန်းမောလောက်ဖွယ်မြင်ကွင်းတစ်ခု ဖြစ်တည်၍နေသည်။

ကျိယွီရှောင် လင်းလော့ချင်း၏ကိုယ်ပေါ်၌ ကခုန်နေသော နေရောင်ခြည်ကို ကြည့်ကာ နှလုံးသားထဲတွင် လွမ်းဆွတ်မှုတို့ပြည့်လျှမ်း၍လာသည်။အကယ်၍ သူသာ တတ်နိုင်လျှင် တစ်ကိုယ်ကောင်းဆန်စွာဖြင့်လင်းလော့ချင်းကို သူ့ဘေးနာမှာပဲထားချင်မိမှာဖြစ်၏။သို့ပေမဲ့ တစ်ချိန်တည်းမှာပင် သူလင်းလော့ချင်းကို သူနှင့်ထိုက်တန်သည့် တောက်ပပြီးအလားအလာရှိသော အနာဂတ်ကိုလည်း ပိုင်ဆိုင်စေချင်သည်။

ဤအတိုင်းဆိုလျှင် သူ့ကိုပျံသန်းခွင့်သာပေးလိုက်ပါမည်။အတောင်ပံတွေနှင့် မွေးဖွားလာသူတစ်ယောက်ကို အဘယ်အကြောင်းကြောင့် မြေပြင်ပေါ်မှာ ခွေဝပ်နေခိုင်းရမည်နည်း။

"အလင်းရောင်" ဒရာမာဇာတ်ကားကို ရိုက်ကူးနေသည်က တစ်လကျော်လောက်ရှိပြီဖြစ်၏။အတွင်းအပြင်သက်ဆိုင်ရာဌာနတွေက လေးလေးနက်နက် ပံ့ပိုးကူညီမှုပေးနေသည့် ဒရာမာတစ်ခုအနေဖြင့် ဒါရိုက်တာကနေ သရုပ်ဆောင်တွေအထိ အားကိုးစိတ်ချရလောက်အောင်ထူးချွန်ကြသည်။တစ်ခုတည်းသော မယုံနိုင်စရာအချက်က ချန်ရွယ်၏ ရုတ်တရက် စာချုပ် ဖောက်ဖျက်မှုပါပင်။ကံအားလျော်စွာ၊ အဖွဲ့သားများက သင့်လျော်သော အစားထိုးကို ယခုတွေ့ရှိပြီဖြစ်သောကြောင့် ပြဿနာမရှိပါချေ။

သူတို့၏အရေးပေါ်ကယ်ဆယ်ရေးလုပ်သားတစ်ဦးဖြစ်သည့်လင်းလော့ချင်းကို ဇာတ်ညွှန်းရေးဆရာက သူ၏ကျေးဇူးတင်မှုကိုပြသရန် ကိုယ်တိုင်ကိုယ်ကျဟိုတယ်မှာ လာရောက်ကြိုဆိုခဲ့သည်။

"ဒါက ငါတို့ ဘွတ်ကင်ယူထားတဲ့ ဟိုတယ်ပါ... ဒီဇာတ်ကားအတွက် ရင်းနှီးမြှုပ်နှံမှု အများစုကို ရုပ်ရှင်အတွက် သုံးစွဲထားတာမလို့ ဟိုတယ်က မင်း အရင်က တည်းခိုခဲ့တဲ့ ဟိုတယ်တွေလောက်တော့ မကောင်းလောက်ဘူး...ကျေးဇူးပြုပြုပြီး စိတ်မရှိပါနဲ့" 

ဇာတ်ညွှန်းရေးဆရာက ယဉ်ကျေးစွာ ပြောကြားခဲ့သည်။

လင်းလော့ချင်းက ခေါင်းခါလိုက်ပြီးဆို၏။

"ရပါတယ်...ဒါက အတော်လေးကောင်းနေပါပြီ"

ဇာတ်ညွှန်းရေးဆရာကလည်း သူ၏စကားများက ယဉ်ကျေးသမူအရဆိုခြင်းဖြစ်မှန်း သိသောကြောင့် ပြုံးကာ လူငယ်လေးက တကယ်စကားပြောတတ်သည်ဟု တွေးခဲ့သည်။

အခန်းကတ်ကို စောစောကတည်းကယူခဲ့ပြီးဖြစ်၍ သူက လင်းလော့ချင်းကို အခန်းထဲသို့ တိုက်ရိုက်ခေါ်သွားခဲ့သည်။

"ခရီးဆောင်အိတ်ကို အရင်သွားထားလို့ရပါတယ်...ခဏနေရင် ညစာသွားစားလိုက်ပါ...လင်းလောင်ရှီး ကောင်းကောင်းအနားယူလို့ရပါတယ်... မနက်ဖြန်မှ ပုံမှန်အတိုင်းရိုက်ကူးရေးထဲစဝင်တာပေါ့"

"ကောင်းပါပြီ" 

လင်းလော့ချင်းမှည ကန့်ကွက်စရာမရှိပေ။

ကျိယွီရှောင်ကို သူရောက်ပြီဖြစ်ကြောင်း WeChat မက်ဆေ့ခ်ျကို ပို့ခဲ့လိုက်သည်။ပြီးလျှင် ညစာစားရန်အောက်ဆင်းလာခဲ့သည်။

တစ်ဖက်မှာ ကျိယွီရှောင်တို့တတွေက ထမင်းစားပြီးခါစဖြစ်၏။လင်းလော့ချင်း ထွက်သွားပြီး ပထမဆုံးနေ့ဖြစ်သဖြင့် ကလေးနှစ်ယောက်က စိတ်မပါလက်မပါဖြစ်နေကြပြီး ထမင်းစားချိန်မှာ စကားအများကြီး မပြောကြပေ။

ကျိယွီရှောင်က သူတို့ကိုချော့လိုက်သည်။

"ရက် 20လောက်နေရင် ပြန်လာမှာပါ"

ကျိလဲ့ယွီက လိုသည်ထက် ချဲ့ကားကာဖြင့်အော်လိုက်သည်။

"ရက် 20 ... ဆောင်းရာသီအားလပ်ရက်က ရက် 30ပဲရှိတာလေ"

ကျိယွီရှောင်: ......

ကျိယွီရှောင် တိတ်ဆိတ်စွာပဲ အသီးအရွက်တချို့ကို သူ့သားအငယ်ပန်းကန်ထဲ ခပ်ထည့်ပေးလိုက်သည်။ကောင်းပြီ၊အစားပဲ အာရုံစိုက်ကြစို့...

လင်းလော့ချင်း သူ့အိမ်က အခြေအနေအကြောင်းကိုကြားသောအခါ မနေနိုင်ဘဲ ပြုံးရယ်လိုက်မိသည်။ထို့နောက်မှာပဲ ဒါရိုက်တာက သူ့ကိုခေါ်နေသည်ကိုကြားလိုက်ရသည်။ကျိယွီရှောင်ကို ပြန်လာမှ စကားဆက်ပြောကြမည်ဟုပြောပြီး သူ့ဖုန်းကိုသိမ်းကာ ဒါရိုက်တာနှင့်ထွက်လာခဲ့သည်။

ညလေညင်းက ပြင်းထန်စွာ တိုက်ခတ်နေပြီး ဟော့ပေါ့စားရန်သင့်လျော်သည့်ညဖြစ်အောင်လုပ်နေသည်။

သူပြန်လာသောအခါ လင်းလော့ချင်း တံခါးဝကနေ အခန်းထဲသို့ မဝင်မီ ရှိုက်သံသဲ့သဲ့ကို ကြားလိုက်ရသည်။

သူအနည်းငယ် ရှုပ်ထွေးသွားပြီး သိချင်လာသည်။တစ်ယောက်ယောက် ငိုနေတာလား...

သရဲတော့မဟုတ်ပါဘူးနော်...

ဒီဟိုတယ်မှာနေတဲ့လူတွေအားလုံးက ရိုက်ကူးရေးအဖွဲ့တွေချည်းဖြစ်မယ်...ဒီလိုငိုနေတာဆိုတော့ ပြဿနာတစ်ခုခုကြုံရလို့များလား...

လင်းလော့ချင်း စင်္ကြံတစ်လျှောက် လျှောက်သွားလိုက်ရာ နောက်ဆုံးတွင် မိန်းကလေးတစ်ဦးကို လှေကားထစ်ပေါ်တွင် သူ့ကိုကျောပေးကာ ထိုင်နေသည်ကို တွေ့လိုက်ရသည်။ငိုသံက သူမဆီကလာပုံရသည်။

ခဏလောက် လင်းလော့ချင်း သူမကို နှောင့်ယှက်သင့် မနှောက်ယှက်သင့် မသိဖြစ်နေသည်။

သူတော့ တစ်ဖက်လူက အနှောက်အယှက်မခံချင်ဘူးထင်တာပဲ...အထူးသဖြင့် တစ်ဖက်လူကငိုနေတာလေ...

လူတွေက သူတို့ငိုတာကို သူများတွေကို မမြင်စေချင်ကြဘူး မဟုတ်လား...

ဒါပေမဲ့ လူတွေက ပြဿနာတွေနဲ့ ကြုံလာရတဲ့အခါမှ စိတ်မသက်မသာဖြစ်ပြီး ငိုတတ်ကြတာ...သူမမှာ အခက်အခဲတစ်ခုခုရှိနေတာများလား...

လှေကားထစ်ကတံခါးကို ခေါက်ပြီးကောင်မလေးကို အကူအညီလိုသလားဟု မေးသင့်မမေးသင့် ချီတုံချတုံဖြစ်နေချိန်တွင် ဖုန်းမြည်သံကြားလိုက်ရသည်။

ကောင်မလေးက ဖုန်းကိုင်လိုက်ပြီး "ဟဲလို" ဟု အသံတိုးတိုးနှင့်ပြောလိုက်သည်။

"ကောင်းပြီ နားလည်ပြီ ...အခုချက်ချင်းပြန်လာပါ့မယ်"

ထို့နောက် သူမက ဖုန်းကို ကျစ်ကျစ်ပါအောင်ကိုင်ရင်း မတ်တပ်ထရပ်ကာ အောက်ထပ်သို့ ပြေးဆင်းသွားခဲ့သည်။

လင်းလော့ချင်း သူမပျောက်ကွယ်သွားသည်ကို မြင်သောအခါတွင် နောက်ကလိုက်မသွားခဲ့ပေ။ရိုးရိုးရှင်းရှင်းပဲ လှည့်ပြန်လာခဲ့သည်။

သူမ မကြာခင် အရာရာကိုအဆင်ပြေအောင် ဖြေရှင်းနိုင်ရန် သူမျှော်လင့်မိသည်။

*****

နောက်တစ်နေ့ မနက်စောစောတွင် ဝူရှင်းယွမ်က လင်းလော့ချင်းကို မိတ်ကပ်ဘာညာ စတင်ပြင်ဆင်ရန် အဖွဲ့သားများ၏ အဝတ်လဲခန်းသို့ ခေါ်သွားခဲ့သည်။

ဤဒရာမာမှာ သူ့ဇာတ်ကောင်က အမျိုးသားဇာတ်ဆောင် ဖူပင်း၏သား ဖူဟန်ဖြစ်၏။ ဖူပင်းက ရဲစခန်းမှာ အပြတ်သားဆုံးနှင့်လူအမုန်းခံရဆုံး ရဲမှူးဖြစ်ဖြစ်၏။သူက သူ၏စည်းကမ်းတင်းကြပ်မှုနှင့် ဖြောင့်မတ်မှန်ကန်မှုကြောင့် နာမည်ကြီးလေသည်။သူ၏ပြောင်မြောက်သော အမှုတွဲကိုင်တွယ်မှုစွမ်းရည်ကြောင့် လူသတ်မှု ကြီးကြီးမားမားအားလုံးကို တာဝန်ယူရသူဖြစ်၏။တစ်နှစ်ပတ်လုံး ဇနီးနှင့် သားသမီးတွေဖြင့် အချိန်ဖြုန်းရန် အချိန်မရှိသလောက်ပင်။

ဖူဟန်က ငယ်စဉ်ကပင် မိခင်ဖြစ်သူ၏တစ်ကိုယ်တည်းပြုစုပျိုးထောင်မှုနှင့်အတူ ကြီးပြင်းလာခဲ့သည်။ သူ့မိခင်က သူမ၏ခင်ပွန်းကို ကောင်းစွာနားလည်ပြီး သူမ၏ခင်ပွန်းသည်ကို သူရဲကောင်းတစ်ဦးဟုမှတ်ယူကာ သူမ၏လက်ရှိဘဝနှင့် ပတ်သက်၍ မကျေနပ်မှုမျိုးမရှိပေ။သို့ပေမဲ့ ဖူဟန်က သူ့အမေအတွက် အမြဲစိတ်မကောင်းဖြစ်ပြီး သူ့အဖေ၏ သူတို့မိသားစုအပေါ်လျစ်လျူရှုနှင့်ပတ်သတ်၍မကျေမနပ်ဖြစ်လေသည်။သူ့အမေက မုဆိုးမတစ်ယောက်နှင့်မခြားနားဘဲ သူ့အဖေနှင့်လည်းဘယ်သောအခါမှကောင်းကောင်းမနေရဟု သူခံစားရ၏။

ဖူဟန်၏အမေက ၎င်းနှင့်ပတ်သတ်၍ အနည်းငယ် အကူအညီမဲ့နေသော်လည်း ဖူပင်းက သူ့သား၏ပုန်ကန်ထကြွမှုက အလွန်ချစ်ဖို့ကောင်းသည်ဟု ထင်မြင်ခဲ့သည်။သူသည် ဘယ်သောအခါမှ သားဖြစ်သူနှင့်အတူထိုင်ပြီး သားဖြစ်၏အထင်အမြင်လွဲမှားမှုများကိုရှင်းလင်းပေးကာ အတင်းအကြပ် သူ့အခက်အခဲများကို နားလည်ခိုင်းခြင်းမျိုးမလုပ်ခဲ့ပေ။သူ့သား ကြီးပြင်းလာသည်နှင့်အမျှ သဘာဝအတိုင်း နားလည်လာလိမ့်မည်ဟု သူယုံကြည်ခဲ့သည်။

ဖူဟန် ကြီးပြင်းလာသည်နှင့်အမျှ သူနှင့် သူ့သူငယ်ချင်းတွေ စာသင်ခန်းထဲမှာ အေးအေးဆေးဆေးထိုင်ပြီး အတန်းတက်နိုင်သည့် အကြောင်းရင်းက သူတို့မမြင်နိုင်သည့်နေရာကနေ သူတို့၏ငြိမ်ချမ်းရေးနှင့်လုံခြုံရေးကို စောင့်ကြပ်ပေးနေသော လူတွေရှိသည့်အတွက်ကြောင့်မှန်း နားလည်လာခဲ့သည်။သူ့အဖေက သူ့ဇနီးနှင့်သားသမီးများကို အဖော်ပြုမပေးချင်၍မဟုတ်ဘဲ သူ့မှာ အချိန်တကယ်မရှိ၍ဖြစ်၏။သူက တခြားအဖေတွေနှင့် မတူပေ။သူ့မှာ ကာကွယ်စရာတွေ အလွန်များနေပြီး သူ့တာဝန်ကကြီးလေးလွန်းသည်။

ထို့ကြောင့် ဖူဟန် သူ့အဖေကို ခွင့်လွှတ်ပြီး ဖူပင်းကို စတင်၍ပင်လေးစားလာခဲ့သည်။ဘွဲ့ရပြီးနောက် ဖခင်၏ခြေရာအတိုင်းကို လိုက်ကာ ရဲစခန်းသို့ ဝင်ရောက်ခဲ့သည်။

ရက်စက်ကြမ်းကြုတ်သော လူသတ်မှုတစ်ခု ဖြစ်ပွားပြီးနောက် ရဲစခန်းက သဲလွန်စများကို လိုက်လံရှာဖွေကာ ဤမြို့ရှိ ရာဇ၀တ်ဂိုဏ်း၏ အသိုက်ကို တူးဖော်ခဲ့သည်။သို့သော် ၎င်း၏ခေါင်းဆောင်က အလွန်ဉာဏ်များသည်။ သူသည် သုံးကြိမ်တိုင်တိုင် ဖမ်းဆီးခံခဲ့ရသော်လည်း သူတို့ရှေ့နေများ၏ခုခံကာကွယ်မှုအောက်တွင် သက်သေမလုံလောက်မှုကြောင့် မည်သည့်အခါမျှ ပြစ်ဒဏ်ချမှတ်ခြင်း မပြုနိုင်ဘဲ လွှတ်ပေးလိုက်ရသည်။

ပိုမိုအားကောင်းသည့် သက်သေအထောက်အထားများကို ရှာဖွေစုံစမ်းရန်အတွက် ရဲစခန်းသည် လျှို့ဝှက်အေးဂျင့်အဖြစ်နှင့် ကိုယ့်ကိုကိုယ် ဖုံးကွယ်ကာ ရန်သူထံ ခိုးဝင်မည့် တစ်စုံတစ်ဦးကို လိုအပ်လေသည်။ထို့အပြင် ယင်းက သူတို့အားလုံးကိုဖမ်းဆီးနိုင်ရေးအတွက် ရဲဘက်ကို ထိုကဲ့သို့သောအဖွဲ့အစည်း၏ရှုပ်ထွေးသောကွန်ယက်နှင့် ဖွဲ့စည်းပုံကို ပိုမိုနားလည်နိုင်စေမည်ဖြစ်၏။

လျှို့ဝှက်အေးဂျင့်များသည် အသက်ကြီးလွန်း၍မရပေ။ရဲအရာရှိတစ်ယောက်ပုံစံလည်းမပေါ်စေရပေ။တစ်ချိန်တည်းမှာပဲ လျှို့ဝှက်အေးဂျင့်တစ်ယောက်အတွက်လိုအပ်သော ကျွမ်းကျင်မှုများနှင့်သွင်ပြင်လဏ္ခာများကိုလိုလေသည်။ဤမစ်ရှင်က အန္တရာယ်အတိုင်းအတာတစ်ခုထိရှိသောကြောင့် အေးဂျင့်က ပါးနပ်ပြီး အခြေအနေအပေါ်မှုတည်၍ သွက်လက်လျင်မြန်စွာတုံံပြန်နိုင်သူဖြစ်ရမည်။မည်သည့်အခြေအနေနှင့်မဆို လိုက်လျောညီထွေဖြစ်အောင်ညှိယူတတ်ပြီး နိုင်ငံတော်အပေါ် ခိုင်မြဲသောသစ္စာရှိသူလည်းဖြစ်ရပေမည်။

ဤကဲ့သို့အခြေအနေများအလွှာလိုက်အထပ်လိုက် စုစည်းထားသောကြောင့် ရွေးချယ်စရာကိုယ်စလှယ်လောင်း နည်းပါးလေသည်။

ဖူဟန်က သူ၏ ကပ္ပတိန်နှင့် သူ့ဖခင်တို့ ဤအကြောင်းအရာကို ဆွေးနွေးနေသည်ကို ကြားပြီး မည်သည့်တာဝန်ကိုမဆို လုပ်ဆောင်ရန် စေတနာအလျောက် လျှောက်ထားခဲ့သည်။

ဖူပင်းက သူဘက်ကနေစပြီး သွားရန်ပြောလာမည်ဟု မမျှော်လင့်ထားပေ။ သူ့စိတ်တွေ ရှုပ်ထွေး၍နေကာ ထိုအကြံကိုသဘောမတူခဲ့။သို့ပေမဲ့ ဖူဟန်ကသူ့ကို ဖြောင်းဖြခဲ့သည်။သူတို့အားလုံးက ရဲယူနီဖောင်းကို စ၀တ်လိုက်သည့်နေ့ကစပြီး အန္တရာယ်ကြုံလာသည့်အခါ ကိုယ့်ကိုယ်ကိုယ် စတေးရန် အဆင်သင့်ပြင်ထားပြီးသားဖြစ်ကြသည်။သူတို့တတွေက ၎င်းကိုရှင်းရှင်းလင်းလင်းသိထားပြီးဖြစ်ပြီး ဖူဟန်၏မိဘတွေက တခြားမိဘတွေထက်ပင် ပို၍ရှင်းရှင်းလင်းလင်းသိကြသည်ပင်။

ထို့အပြင်၊ သူက အမှန်ပင် လျှို့ဝှက်အေးဂျင့်ဖြစ်ရန် အသင့်တော်ဆုံးကိုယ်စားလှယ်လောင်းဖြစ်ပြီး သူ့အား မသွားခိုင်းရန် အကြောင်းပြချက် မရှိပါချေ။

ဖူပင်း ဖူဟန်ကိုမတားနိုင်ခဲ့ပေ။နောက်ဆုံးမှာ သူ့သားပုခုံးကိုပုတ်ပြီး ဘေးကင်းစွာ ပြန်လာနိုင်ရန် ဆုတောင်ပေးရုံသာတတ်နိုင်ခဲ့သည်။

သို့ပေမဲ့ ဖူဟန်ကဘေးကင်းစွာ မပြန်နိုင်ခဲ့ပါချေ။