အပိုင်း ၁၇၉

Chapter 179

မင်းဘာကိုပဲ လိုချင်ပါစေ ကိုယ်ဖြစ်အောင် လုပ်ပေးမယ်

ထိုသတင်း ထုတ်လွှင့်လိုက်သည်နှင့် ဝေ့ပေါ်၌ ဖြစ်စေ များစွာသော ဖိုရမ်များ၌ ဖြစ်စေ အင်တာနက်တစ်ခွင် အုတ်အော်သောင်းနင်း ဖြစ်သွားခဲ့သည်။ 

[ယွီနျန်ကို အမျိုးမချစ်တတ် နိုင်ငံသားစိတ်ဓါတ်မရှိဘဲ ငွေကိုပဲ ဂရုစိုက်တယ်ဆိုပြီး ဝေဖန်ခဲ့ကြတဲ့သူတွေ ပါးစပ်ပိတ်လိုက်ကြတော့... နင်တို့ ဝေဖန်ရင်း အလုပ်များနေတဲ့အချိန် သူက ယဥ်ကျေးမှုအမွေအနှစ် ထိန်းသိမ်းစောင့်ရှောက်ရေး အမျိုးသားဗျူရိုကို ယဥ်ကျေးမှုအမွေအနှစ်တွေ လှူပြီးသွားပြီတဲ့နော်... အင်းပါလေ... လှူတယ်လို့တော့ ပြောလို့မရဘူးပေါ့... ဗျူရိုက လွှဲပြောင်းမှုအတွက် ယွမ်2ဘီလီယံ ပေးခဲ့တယ်ဆိုတော့လေ... ဒါပေမယ့် နင်တို့တွေ အဲ့ဒီရတနာဆယ့်ခြောက်ခုကို တစ်ခုချင်း ရွေးထုတ်လိုက်ရင်တောင် ဒီထက်မက တန်သေးတယ်... ငါ ယွီနျန်အတွက် ရုတ်တရက်ကြီး စိတ်မကောင်း ဖြစ်မိသွားပြန်ပြီ... ငါသာဆို နှစ်ဘီလီယံ သုံးဘီလီယံ မပြောနဲ့ တစ်ခါတည်းနဲ့ ယွမ်သန်း40လောက် ထွက်သွားရင်တောင် သွေးအန်ပြီး သေရလိမ့်မယ်]

[အား... နျန်နျန်က တကယ် အံ့သြစရာကောင်းလိုက်တာ QAQ... ဒီရက်ထဲ လူတွေ အများကြီးက သူ့ကို ဝေဖန်နေကြတာ... နင်တို့မှာ လုပ်ရည်ကိုင်ရည် ရှိရင် ဘာလို့ နင်တို့ပါ ဝင်မလှူလိုက်တာလဲ... နင်တို့မှာ လုပ်နိုင်စွမ်းရှိရင် နိုင်ငံရပ်ခြားမှာ ပြန့်ကျဲနေတဲ့ ယဥ်ကျေးမှုအမွေအနှစ်ပစ္စည်းတွေ ပြန်ယူလာခဲ့ကြ... နင်တို့သိတာ အကျင့်သိက္ခါကို ဓါးစာခံ လုပ်ဖို့ပဲ... မျက်နှာ ဖြတ်ရိုက်ခံရဖို့ ထိုက်တန်တယ်]

[ဒါကို လူထုအမြင်အား အောင်နိုင်ခြင်းလို့ သတ်မှတ်လို့ ပြောလို့ရမလား... အဆုံးမှာတော့ သူက လှူနေဆဲပဲလေ]

[သွားကြစမ်းနော် သူတော်ကောင်းကြီးတွေ... နင်တို့ သေချာရော ဖတ်ကြရဲ့လား... သူက ဆယ့်ခြောက်ခုတောင် လှူလိုက်တာနော်... သူလုပ်ချင်တာ သူလုပ်မှာပဲ... နင်တို့ကိုယ်နင်တို့ တွေ့ကရာ စကားလုံးလေးအချို့ ပြောလိုက်တာနဲ့ ကိုယ်ကျင့်သိက္ခါနဲ့ အမှန်တရား ဆောင်ကျဥ်းပေးသူတွေ ဖြစ်သွားမယ်လို့ တကယ်ထင်နေကြတာလား... ယွီနျန်နဲ့ ယှဥ်လိုက်ရင် နင်တို့က တကယ် ရွံစရာကောင်းတယ်နော်] 

[ရိုးရိုးသားသား ပြောရရင် ငါတော်တော်လေး အံ့သြသွားတာ... ယဥ်ကျေးမှုပစ္စည်း ဆယ့်ခြောက်ခု တစ်ခုစီဆို ယွမ်သန်းရာချီ တန်တာကို ယွီနျန်က အားလုံး တိတ်တိတ်လေး လှူပစ်လိုက်တယ်... သူ့ကို ပုံရိပ်ကောင်း ရဖို့ အကျိုးအမြတ် ရဖို့ လုပ်တယ်လို့ ပြောနေကြသူတွေရေ... ရပ်လိုက်တော့နော်... အခြားလူတွေရဲ့ စိတ်ဝိဥာဏ်နယ်ပယ်နဲ့ ပြင်းပြတဲ့ ဆန္ဒတွေက ငါတို့နဲ့ မတူတဲ့အဆင့်မှာ ရှိနေကြတာ... ယွီနျန်ကို ဝေဖန်နေကြသူတွေ တွေးကြည့်လိုက်ကြစမ်းပါ...

တကယ်လို့ ဒီပစ္စည်းတွေ နင်တို့ လက်ထဲမှာ ရှိနေရင် လှူဖို့ စိတ်ကူးရှိပါ့မလား... ငါကတော့ မရှိဘူးနော်... အမှန်တရားပဲဒါက] 

[နျန်နျန်က နိုင်ငံပိုင် ရုပ်သံလိုင်းမှာ ပါလာတယ်... ငါ့အမေက နျန်နျန့်ကို လက်ညှိုးထိုးပြပြီး ပြောတယ်... "ဒါက နင်လေ့လာသင်ယူဖို့ စံပြုရမဲ့သူပဲတဲ့" ဟားဟားဟား... ဂုဏ်ယူနေပါပြီ... ပြီးတော့ ငါ အကြံပြုပေးချင်ပါတယ်... နျန်နျန်ရဲ့ အယ်လ်ဘမ်က မကြာမီ ထွက်လာတော့မှာပါ... လူတိုင်း ကြည့်ပေးကြပါနော်]

စိတ်အားထက်သန်မှု လှိုင်းလုံးကြီးက ဇန်နဝါရီလ 7ရက်နေ့ ရှေးဟောင်းပစ္စည်းများ လက်ခံရရှိမှုဂုဏ်ပြုပွဲနေ့ မတိုင်မီအထိ ဆက်သွားခဲ့သည်။ ၎င်းက ယဥ်ကျေးမှုအမွေအနှစ် ထိန်းသိမ်းစောင့်ရှောက်ရေး အမျိုးသားဗျူရို၏ 8နှစ်နီးပါးအတွင်း လက်ခံရရှိခဲ့သည့် အကြီးဆုံး တန်ဖိုးအမြင့်ဆုံးနှင့် အရည်အသွေးအမြင့်ဆုံး လှူဒါန်းမှု ဖြစ်သည့်အတွက် မီဒီယာများကိုပင် ပွဲအခမ်းအနားကို ရိုက်ကူးတင်ဆက်ရန်အတွက် ခွင့်ပြုပေးထားခဲ့သည်။ 

ပွဲအခမ်းအနား ပြင်ဆင်ပြီးသွားပြီး ယွီနျန်ကလည်း အနက်ရောင် တရုတ်ရိုးရာဝတ်စုံ ဝတ်ဆင်လျက် စိတ်ရှည်လက်ရှည် ရပ်နေပြီး အဖွင့်မိန့်ခွန်းစကားများကို နားထောင်နေခဲ့သည်။ ဆံပင်များမှာ နက်မှောင်နေသည့် အနက်ရောင်သန့်သန့် ဖြစ်နေပြီး အထက်သို့ ဘီးဖြင့် လှန်ဖြီးထားသဖြင့် ချောမွေ့နေသော နှဖူးပြင်၊ နူးညံ့ထည်ဝါသော မျက်ခုံးနှင့် မျက်လုံးများကို လှစ်ဟပြနေသည်။ အပြုအမူများက တည်ငြိမ်အေးချမ်းနေပြီး တမင်သက်သက်မဟုတ်သော အမူအကျင့်တစ်ခုဖြစ်သည့် ကျောကိုမတ်မတ်ထားကာ ရပ်နေလေသည်။ ခြေတံရှည်များနှင့် ပြောင်မြောက်လှသော ခန္ဓါကိုယ်အချိုးအစားများက အထင်ကြီးလောက်ဖွယ်ရာ ကိုယ်ဟန်ကို ပေးစွမ်းနေသည်။ ဘေးဘက်မှ နောက်ကျောဘက်အထိ ကင်မရာများစွာ၏ ဦးတည်ရာကို ဆွဲဆောင်ထားနိုင်ခဲ့သည်။ 

ယဥ်ကျေးမှုအမွေအနှစ် ဆယ့်ခြောက်ခု၏ ပုံရိပ်များ နောက်ခံပိတ်ကားထက် တစ်ခုပြီးတစ်ခု ပေါ်လာသောအခါ ယွီနျန်က စတိတ်စင်၏ အလယ်သို့ လျှောက်သွားလိုက်ပြီး ဂုဏ်ပြုဆုတံဆိပ်ကို လက်ခံယူလိုက်သည်။ တပြိုင်နက်တည်းဆိုသလို ကင်မရာမြောက်များစွာက ထိုအခိုက်အတန့်လေးကို ရိုက်ယူထားလိုက်ကြသည်။ 

ပွဲပြီး၍ တစ်နာရီအတွင်းမှာပင် ထိုပုံက အဓိကမီဒီယာသတင်းဌာနများ၏ ရှေ့ပိုင်းမျက်နှာစာများတွင် အုပ်စိုးလာခဲ့သည်။ 

ယွီနျန်က ပွဲကျင်းပရာနေရာမှ ထွက်လာပြီး နေရာကျယ်ဝန်းသည့် ကိုယ်ပိုင်ကားလေးထဲသို့ ဝင်ကာ ရွှယ်ယုံ၏ နောက်ကျောပြင်ပေါ် ခြေပစ်လက်ပစ် မှီတွယ်လိုက်ပြီးနောက် ပျင်းတိပျင်းရွဲ ဆိုလိုက်သည်။

 "မစ္စတာရွှယ် အချစ်ရေ... ခင်ဗျား..."

"နျန်နျန်"

စကားဖြတ်ပြောခံလိုက်ရသည့် ယွီနျန်က မျက်လုံးပင့်ကြည့်လာသည်။ "ဟမ်"

ရွှယ်ယုံက ယွီနျန်ကို လှည့်မကြည့်ရဲတော့ပေ။ "မင်း 'မစ္စတာရွှယ်' ဆိုတဲ့ အပိုင်းကို ဖြုတ်လို့ရတယ်"

ယွီနျန်က မျက်တောင် တဖျတ်ဖျတ် ခတ်ကာ ရွှတ်နောက်နောက် အပြုံးလေးများ ထွက်ပေါ်လာသည်။ 

"ရတယ်လေ... ဒါဆိုရင်" 

သူက တမင်သက်သက်ပင် ရွှယ်ယုံ၏ နားအနီးသို့ ကပ်ကာ သံရှည်၍ ဆွဲခေါ်လိုက်သည်။ 

"အချစ်.....ရေ" 

ချင်ချင်းဆိုသလို ရွှယ်ယုံ၏ နားရွက်များ နီရဲသွားလေသည်။ 

သူ့လက်ကို မြှောက်ကာဖြင့် ယွီနျန်ကို ကျောဘက်မှ ရင်ခွင်ထဲသို့ ဆွဲယူလိုက်သည်။ အသံကလည်း အက်ရှရှ ဖြစ်နေလေ၏။ 

"နျန်နျန်... ထပ်ခေါ်ပေးပါဦး"

ယွီနျန်က ရွှယ်ယုံ၏ လည်တိုင်ကို တွဲလွဲခိုကာ မျက်လုံးလေးများကို ကွေးတက်လာစေခဲ့ပြီးနောက် သူညွှန်ကြားထားသလို ခေါ်လိုက်သည်။ 

"အချစ်ရေ"

ထိုစကားများ ကျဆင်းလာသည်နှင့် ယွီနျန်တစ်ယောက် ရွှယ်ယုံ၏ ခေါင်းငုံ့ကျလာပြီး သူ့နှုတ်ခမ်းများအား အနမ်းကြမ်းများအဖြစ် သိမ်းပိုက်လာသည်ကို တွေ့လိုက်ရလေတော့သည်။ 

တစ်ခဏအကြာ ရွှယ်ယုံက အနမ်းများကို လွှတ်ပေးလိုက်ပြီး ယွီနျန်၏ နှုတ်ခမ်းထောင့်လေးကို နင့်နင့်သီးသီး ကြည့်ကာ အက်ရှရှ လေသံဖြင့် ပြောလိုက်သည်။ 

"ချိုတယ်"

ယွီနျန်က ရွှယ်ယုံ၏ လည်စီးကို ဆွဲယူလိုက်ပြီး နှုတ်ခမ်းသားများက ရေ၏ အရသာစွဲထင်နေဆဲ ဖြစ်ကာ ပျင်းတိပျင်းရွဲဖြင့် စနောက်လိုက်သည်။

 "ထပ်မြည်းကြည့်ချင်သေးလား"

သို့သော်လည်း အနမ်းများ ဆက်ပေးရမည့်အစား ရွှယ်ယုံက ယွီနျန်၏ မျက်လုံးများကို လက်ဖြင့် ဖုံးအုပ်လာခဲ့သည်။ 

တစ်စုံတစ်ခု ထုတ်ယူနေသည့် အသံကို ကြားလိုက်ရသည့် ယွီနျန်က ငြိမ်ငြိမ်လေး ထိုင်ကာ ပူးပေါင်းဆောင်ရွက်ပေးနေသော်လည်း သိလိုစိတ်ပြင်းပြနေခဲ့သည်။ "ဘာလုပ်နေတလဲ"

သိပ်မကြာခင် ရွှယ်ယုံက ယွီနျန်၏ မျက်လုံးများကို အုပ်ထားသည့်လက်အား ပြန်ဖယ်ပေးလာခဲ့ပြီး blueprint စာရွက်တစ်ထပ်ကို ကမ်းပေးလာခဲ့သည်။ 

[T/N Blueprintက ဗိသုကာဒီဇိုင်းတွေကို ပုံဆွဲတဲ့နေရာမှာ အဓိကအားဖြင့် အသုံးပြုတာပါ... ပုံတွေရဲ့ အသေးစိတ်အစီအစဥ်တွေကို ဖော်ပြချက်ပါ]

“ဒါကဘာလဲ" သူက ၎င်းတို့ကို ယူလိုက်ပြီး စာရွက်ပေါ်မှ စာများကို ကြည့်လိုက်သည်။ ယွီနျန်၏ အသက်ရှူသံများ ရပ်တန့်သွားသည်။ သူ ရွှယ်ယုံကို အံ့အားသင့်စွာဖြင့် ကြည့်လိုက်မိသည်။ 

"ဒါက..."

“ပြတိုက်အတွက် ဗိသုကာဒီဇိုင်းနဲ့ တည်နေရာပြကိုးကားချက်တွေလေ" ယွီနျန်၏ မျက်လုံးများထဲမှ အံ့အားသင့်မှုကို တွေ့လိုက်ရသည့် ရွှယ်ယုံက ယွီနျန်၏ နှုတ်ခမ်းထောင့်လေးကို ငုံ့နမ်းလိုက်ပြီး နူးညံ့စွာဖြင့် တီးတိုးပြောလိုက်သည်။ 

"မင်းလိုချင်သမျှ အကုန်ဖြစ်အောင် လုပ်ပေးချင်တယ်"

******

ယွီနျန်က အချိန်ဆွဲတတ်သူ မဟုတ်ပေ။ သူက အယ်လ်ဘမ် ထုတ်လုပ်ရေး အပြီးသတ်သွားပြီး ပရိုမိုးရှင်းကာလသို့ ရောက်ရှိလာတော့မည်ကို အခွင့်ကောင်းယူလိုက်သည်။ အေးဆေးနေသော အချိန်စာရင်းကြောင့် ကိုယ်ပိုင်ပြတိုက်ပြင်ဆင်မှုအပေါ် စတင်အာရုံစိုက်ထားလေတော့သည်။ ရွှယ်ယုံက သူ့ကို ကူညီပေးရန်အတွက် အဖွဲ့တစ်ဖွဲ့ကိုပင် စုစည်းပေးခဲ့ပြီး ဆက်နွယ်ကိစ္စများကို ကိုင်တွယ်ရာ၌ အကြံဥာဏ်များ ပေးခဲ့သည်။ 

ရွှယ်ယုံက ယွီနျန်အား ပြတိုက်အတွက် ဗိသုကာဒီဇိုင်း ဒါဇင်ကျော် ပြသခဲ့ပြီး အကြံပြုချက် နှစ်ခုကို ရွေးချယ်ရန် ဆွေးနွေးခဲ့ကြသည်။ တည်နေရာကို အပြီးသတ်ပြီးသည်နှင့် အသေးစိတ် ပြုပြင်မွမ်းမံမှုများ ဆောင်ရွက်ရန် စီစဥ်ခဲ့ကြသည်။ 

ထိုအခိုက် ယွီနျန်နှင့် သူ့အဖွဲ့က ပြတိုက်အတွက် နျင်းမြို့ထဲမှ တည်နေရာများစွာကို စူးစမ်းရှာဖွေနေခဲ့ကြသည်။ သူတို့က ဆောက်လုပ်ရေးနေရာများကို စစ်ဆေးနေကြစဥ် ဖြတ်သွားဖြတ်လာများ ဖန်များထံမှလည်း ဖမ်းမိခံခဲ့ရသည်။ သတင်းများ ထွက်ပေါ်လာပြီးနောက် #ယွီနျန်မြေဝယ်နေတယ်#ဟူသော hashtagက တစ်ရက်မျှ ရေပန်းစားသွားခဲ့သေးသည်။ မုန့်ယွမ်က ဝမ်းသာအားရ ဖုန်းခေါ်လာပြီး ယွီနျန်သာ ပရိုမိုးရှင်းကာလအတွင်း hot searchများ ရောက်အောင် လုပ်နိုင်ပါက ပရိုမိုးရှင်းအတွက် ကုန်ကျငွေ ပမာဏ အတော်များများ ချွေတာနိုင်လိမ့်မည်ဟု ပြောခဲ့သည်။ 

ထင်မှတ်ထားသည့်အတိုင်း ကိုယ်ပိုင်ပြတိုက်အတွက် လျှောက်ထားခြင်း လုပ်ငန်းစဥ်က သက်ဆိုင်ရာ ဌာနများထံမှ ခွင့်ပြုချက် မြန်မြန်ကျလာပြီး ချောချောမွေ့မွေ့ ပြီးဆုံးသွားသည်။ ပြတိုက်အတွက် အဆုံးသတ်တည်နေရာကို ချင်းရှီလမ်းမတွင် သတ်မှတ်ခဲ့ပြီး ယွီနျန်ကိုယ်တိုင် မြေနေရာကို သွားကြည့်ခဲ့ခြင်း ဖြစ်သည်။ 

မီးပုံးပွဲတော် ကျရောက်လာသည့် အချိန်ပတ်လည်တွင် နျင်းမြို့၌ ရက်ပေါင်းများစွာ မိုးရွာခဲ့ပြီး အဆုံးတွင် နေသာလာခဲ့သည်။ အနက်ရောင် Maybachကားက ရေအိုင်ငယ်လေးများနှင့် သစ်ရွက်ကြွေများအပေါ် ဖြတ်ကျော်လာခဲ့ပြီး မြေအလွတ် နေရာလေးတစ်ခု၌ တဖြည်းဖြည်း ရပ်တန့်လာခဲ့သည်။ 

မည်သူကမှ ကားထဲက မထွက်ခဲ့ကြပေ။ ယွီနျန်က ကားတံခါးကို ဖြတ်၍ ခြံနွယ်များ ပြည့်နေသည့် မြေကွက်လပ်ကို ကြည့်လိုက်ပြီးနောက် ရွှယ်ယုံဘက်သို့ လှည့်ကာ ပြောလိုက်သည်။ 

"ဒီနေရာက စတုရန်းမီတာ တစ်သောင်းလောက်ကျယ်တယ်... ဒီနေရာမှာ ကိုယ်ပိုင်ဥယျာဥ်ခြံလေး တစ်ခုဖြစ်ခဲ့တာလေ... ဘိုးဘိုးငယ်ငယ်တုန်းက ဥယျာဥ်ခြံလေးမှာ ကျောက်ဆောင်ငယ်လေးတွေ၊ လျှောက်လမ်းငယ်လေးတွေနဲ့ ကြာအိုင်လေးတွေ ရှိသေးတယ်တဲ့... စွန့်ပစ်ခံထားရပြီးတော့ တဖြည်းဖြည်းနဲ့ လက်ရှိမှာ ပြိုလဲပျက်စီးနေတဲ့ပုံစံလို ဖြစ်သွားတာပဲ...

ဒီနေရာက ကျွန်တော်ရဲ့ ဘိုးဘွားပိုင်အိမ်နဲ့ နီးတယ်... နှစ်လမ်းပဲခြားတာ... သီးသန့်စားသောက်ဆိုင်နဲ့လည်း နီးတယ်... ဦလေးရှန်းကပြောတယ်... ပြတိုက်ဆောက်ရင် ဒီနေရာနားက စီးပွားရေးအခြေအနေကိုလည်း တိုးတက်လာအောင် လုပ်နိုင်လိမ့်မယ်တဲ့"

ယွီနျန်၏ မျက်လုံးများထဲမှ ရောင်ခြည်များကြောင့် လွှမ်းမိုးခံလိုက်ရသည့် ရွှယ်ယုံက ယွီနျန်၏ ကုတ်ပိုးအိအိလေးကို ဖျစ်ညှစ်ကာ သြရှနူးညံ့နေသည့် လေသံဖြစ်လာသည်။ 

"ဗိသုကာဒီဇိုင်းကို အဆုံးသတ်ပြီးသွားပြီလား"

“အင်း... ဒီဇိုင်နာနဲ့ စိတ်ကူးက တစ်ထပ်တည်းကျနေတယ်... ကျွန်တော်တို့ နှစ်ယောက်လုံးက ကျန်းနန်ဥယျာဥ်ရဲ့ ကျော့ရှင်းလှပမှုကို ပြသချင်ကြတယ်... ကျွန်တော်က ရွှံ့အိုင်လေးကို ရှင်းပြီး ကန်သင်းလေးဘေးမှာ ပြန်ပြီး နေရာချမယ်... ပြီးရင် အဓိကအဆောက်အအုံကြီး ဆောက်ဖို့ စီစဥ်ထားတယ်... ရေအိုင်လေးရဲ့ တောင်ဘက်မှာ ရေထဲကို အရိပ်ထင်ဖို့ 'တောင်တန်းရှုမျှော်ခင်း'ပုံကို ဆွဲဖို့ နံရံတစ်ခု ထောင်ရမယ်... ဒါဆိုရင် လှလှပပ ပေါင်းစပ်သွားမှာ"

ပြတိုက်ဒီဇိုင်းအကြောင်း ရောက်လာသည်နှင့် ယွီနျန်က ပို၍ စကားများလာပြီး ပြောလိုက်တိုင်းလည်း ခြေဟန်လက်ဟန်များ ပါလာသည်။ 

"အိမ်မှာ စုဆောင်းပစ္စည်းတွေ အများကြီးရှိတာ အခုထိ မသိမ်းရသေးဘူး... ပြပွဲခန်းမရဲ့ အပြင်အဆင်ကို အချိန်ယူပြီး သေသေချာချာ စဥ်းစားလို့ ရပါသေးတယ်... နျင်းချန်ပြတိုက်ရဲ့ ဒါရိုက်တာကန်ကျိုးက ကျွန်တော့်ကို ကူညီပေးဖို့ အကြံပေး နှစ်ယောက် ပို့ပေးမယ်လို့ ပြောထားတော့ စိုးရိမ်စရာမရှိပါဘူး" 

သူ ဆက်ပြောနေရင်း ခဏရပ်ကာ ယခုထက်ထိ မထိတွေ့ရသေးသည့် မြေနေရာလွတ်ကို ခေါင်းလှည့်ကြည့်လိုက်ပြီးနောက် အသက်နှစ်ချက်မျှ ရှုပြီးမှ ဆက်ပြောလာသည်။ 

"ပြတိုက်နာမည်အတွက် ချင်းရှန်း(စိမ်းမြသောတောင်တန်း)လို့ ခေါ်ချင်တယ်... ဝင်ပေါက်မှာ 'နှစ်တစ်ထောင်က ပြန်မလာတော့ဘူး... ချင်းရှန်းပဲ ကျန်ရစ်နေမယ်' လို့ စာထွင်းထားတဲ့ ကျောက်တုံးတစ်ခု နေရာချထားမယ်... နှစ်တစ်ထောင်က ပြန်မလာပေမယ့် စိမ်းလန်းနေတဲ့ တောက်တန်းတွေက ကြယ်တွေ နေမင်းကြီးလိုပဲ ခေတ်အဆက်ဆက်ထိ ထာဝရတည်ရှိနေမှာ"

ယွီနျန်က ရွှယ်ယုံ၏ လက်ချောင်းလေးများနှင့် အမှတ်တမဲ့ ကစားနေပြီး မလုံမလဲ ဆက်ပြောလာသည်။ 

"ဒီစာကြောင်းမှာ ကိုယ်ရေးကိုယ်တာ အတွေးတွေလည်း ရှိတယ်... ကျွန်တော်က ဒီထဲမှာ 'ချင်းရှန်းယွီမျိုးရိုး'ကိုပါ ပေါင်းစပ်ချင်တာ... ဒီနေရာက မကြာခင် ကျွန်တော်တို့ မိသားစု မျိုးဆက်များစွာရဲ့ စုဆောင်းမှူတွေအတွက် အိမ်ဖြစ်လာပြီးရင် သူတို့တွေကို မေ့မေ့ပျောက်ပျောက် ဖြစ်နေမှာကို မလိုချင်ဘူး"

“နာမည်ရော စာကြောင်းရော နှစ်ခုလုံးက အံ့လောက်ဖွယ်ရာပါပဲ... နျန်နျန်... ဘာပဲလုပ်ချင်ချင် ကိုယ်မင်းကို ထောက်ပံ့ပေးနေမယ်" 

ရွှယ်ယုံက ယွီနျန်၏ နှုတ်ခမ်းထောင့်လေးကို နမ်းလိုက်ပြီးနောက် အမှတ်ရသွားသည်။ 

"လွန်ခဲ့တဲ့ နှစ်ရက်လောက်တုန်းက မင်း ပြပွဲခန်းမရဲ့ ရှေးဟောင်းစာအုပ်တွေနဲ့ လက်ရေးစာမူတွေအတွက် နာမည် စဥ်းစားနေတယ်လို့ ပြောခဲ့သေးတယ်" 

“ယွင်ယန် ပွဲကြည့်စင် (တိမ်နဲ့ မြူနှင်း ပွဲကြည့်စင်) ကျွန်တော်တို့ အိမ်မှာ ရှေးဟောင်းစာအုပ်တွေ လက်ရေးစာမူတွေ အများကြီး ရှိနေတော့ မင်းဆက်အလိုက် အမျိုးအစားခွဲပြီး ပြပွဲခန်းမတွေ ခွဲပြရမယ် ထင်တယ်... ဟောခန်းမထဲက တစ်ခုအတွက်ကို တိမ်တိုက်နဲ့ မြူနှင်းတွေကို ဖြစ်ပေါ်စေတဲ့ စုတ်ချက်လို့ အဓိပ္ပါယ်ရတဲ့ 'ယွင်ယန်ပွဲကြည့်စင်'လို့ ပေးဖို့ စဥ်းစားထားတယ်... ဒါပေမယ့် တကယ်တော့ ဒီနာမည်က ကျွန်တော်တို့ရဲ့ ဘိုးဘေး ဖြစ်တဲ့

ဟုန်ထူပွဲကြည့်စင်က ပညာသင်သား ယွီယောင်ကျို့ ပိုင်ဆိုင်တဲ့ စာကြည့်ခန်းရဲ့ အမည်ပဲ... ကျွန်တော် ငှားသုံးလိုက်တာ အဆင်ပြေမှာပါ"