အပိုင်း ၈၁ ( Little White Face 9 )

ကျိုးဝမ်ရှိူ့ သူ့ရုံးခန်းထဲသို့ ဝင်လိုက်သည်နှင့် တစ်စုံတစ်ယောက် သူ့စီ ပြေးလာသည်ဟု ခံစားလိုက်ရသည်။

ဤသည်က သူ့ကို သတိရှိရန် နှိုးဆော်သင့်သော်လည်း အကြောင်းတချို့ကြောင့် သူ လုံးဝ သတိမထားနိုင်‌သောကြောင့် သူသည် ပွေ့ဖက်ခံရပြီး လည်ပင်းပေါ်တွင် အနမ်းအနည်းငယ်ကိုလည်း ခံစားလိုက်ရသည်။

ခပ်ဖွဖွ ခံစားချက်က သူ့တစ်ကိုယ်လုံး ပျံ့နှံ့သွားသည်... ကျိုးဝမ်ရှိူ့ ခဏတာ ငြိမ်သွားလျက် ယန်ကျင်းဇီ ပြောသည်ကိုပင် သူ မစဉ်းစားနိုင်‌လိုက်ပေ။

ခဏအကြာတွင် သူသည် တုံ့ပြန်ပြီး ယန်ကျင်းဇီ၏ ကျောကို စိတ်ပူပန်စွာ ပုတ်လိုက်သည် : " အိပ်မက်တစ်ခုပါပဲ။ မကြောက်နဲ့။ အဆင်ပြေတယ်... "

စကားပြောနေစဉ် ကျိုးဝမ်ရှိူ့၏ အမူအရာ ရုတ်တရက် အေးခဲသွားသည်။

ယန်ကျင်းဇီက အိပ်မက်ဆိုး မက်ခဲ့ပြီး ကလေးကဲ့သို့ ပြုမူနေခြင်းမှာ ထူးဆန်းလှပြီး သူက အမှန်တကယ်ပင် နှစ်သိမ့်ပေးခဲ့သည်...

ခဏလေး၊ သူ့နောက်မှာ တခြားသူတွေရှိနေတယ်!

ကျိုးဝမ်ရှိူ့က သူ့လှုပ်ရှားမှုကို ရပ်လိုက်ပြီး သူ့အမူအရာကို ပြန်ထိန်းလိုက်သည် : " ... လူတွေ ရှိ‌နေတယ်။ "

တကယ်တော့ ကျိုးဝမ်ရှိူ့၏နောက်တွင် လူများ ရှိနေကြောင်း ယန်ကျင်းဇီ သိထားသည်မှာ ကြာလှပြီဖြစ်ပြီး သူက လူများကို တမင်တကာ မြင်တွေ့စေခြင်းဖြစ်သည်။

ကျိုးဝမ်ရှိူ့ကို အသားယူပြီး ကျိုးဝမ်ရှိူ့၏ နှစ်သိမ့်မှုကို ရရှိလိုက်သော ယန်ကျင်းဇီသည် ခေါင်းမော့ပြီး ကျိုးဝမ်ရှိူ့နောက်မှ လူကို ကြည့်၍ နူးညံ့သိမ်မွေ့စွာ ပြုံးပြလိုက်သည် : " ဟယ်လို၊ တောင်းပန်ပါတယ် မင်းတို့ကို ဟာသကြည့်စေမိပြီ။ "

ကျိုးဝမ်ရှိူ့၏နောက်တွင် ကွင်းဆင်းဌာန၏ ခေါင်းဆောင် ကျားဝမ်ဟန်နှင့် ယန်ကျင်းဇီ ယခင်က တွေ့ဖူးသော တခြားစွမ်းအားရှင်နှစ်ဦး ရှိနေသည်။

ယန်ကျင်းဇီ၏စကားကို ကြားသော် ကျားဝမ်ဟန်က ဝတ်ကျေတမ်း‌ကျေ ပြုံးပြသည် : " ရပါတယ်။ "

ယန်ကျင်းဇီသည် ကျားဝမ်ဟန်က သူ့ကို မကြိုက်ဘူးဟု ခံစားနိုင်သော်လည်း ယခုချိန်တွင် သူက တကယ့်ကို နှစ်သက်ဖွယ် မကောင်းပေ... ယန်ကျင်းဇီတွင် ကောင်းမွန်စွာ ပြုမူတတ်သော အကြည့် ရှိသည် : " ဝမ်ရှိူ့၊ ငါ မင်းအတွက် လက်ဖက်ရည် လုပ်ပေးမယ်။ "

ယန်ကျင်းဇီသည် လက်ဖက်ရွက်များနှင့် ရေကို ယူပြီး လက်ဖက်ရည် ပြုလုပ်သည်။ ဤအချိန်တွင် ကျိုးဝမ်ရှိူ့သည် သူ့စားပွဲမှာ ထိုင်နေပြီး ကျားဝမ်ဟန်ကို မေးသည်။ " ဘာအတွက် မင်း ငါ့ကို တွေ့ချင်တာလဲ? "

" ငါ ဥက္ကာခဲအကြောင်း ရေဒီယိုမှာ ကြားလိုက်တယ်။ ဥက္ကဌ၊ ဥက္ကာခဲက စွမ်းအားရှင်တွေအတွက် ကောင်းမွန်တယ်။ အဲ့ဒါက သူတို့ရဲ့ အင်အားကို တိုးမြှင့်ပေးပြီး မလိုလားအပ်တဲ့ ပြဿနာတွေကို လျှော့ချပေးတယ်... ငါ ထင်တာ ဥက္ကာခဲကို ငါတို့ရဲ့ ကွင်းဆင်းဌာနစီ ပေးထားတာ အကောင်းဆုံးပဲ။ ဒါဆို ငါတို့ ကွင်းဆင်းတိုင်း အဲ့ဒါကို ငါတို့နဲ့အတူ ယူသွားလို့ရတယ်။ " ကျားဝမ်ဟန်က ဆိုသည်။

ကျိုးဝမ်ရှိူ့သည် ဥက္ကာခဲ၏ တည်ရှိမှုကို ထုတ်ဖော်ပြီးနောက်တွင် သူသည် ဤသို့သောမြင်ကွင်းမျိုးနှင့် ရင်ဆိုင်ရမည်ဟု သိခဲ့သော်လည်း သဘောမတူပေ : " ငါ့စီက ဥက္ကာခဲက မီးစွမ်းအားရှင်တွေအတွက်ပဲ အသုံးဝင်တယ်။ မင်းရဲ့ ကွင်းဆင်းဌာနမှာ မီးစွမ်းအားရှင်က လူနည်းစုပဲ ရှိတယ်။ "

ကျားဝမ်ဟန် : " တခြားစွမ်းအားရှင်တွေအတွက်လည်း အကျိုးအမြတ်တွေ ရှိနိုင်မယ်မလား? လူတိုင်းကို လေ့လာခိုင်းတာ မကောင်းဘူးလား? ပြီးတော့ မီးစွမ်းအားရှင်တွေက အဖွဲ့ထဲမှာ အဓိကတိုက်ခိုက်သူတွေ ဖြစ်နေတော့ သူတို့ရဲ့ တိုးလာတဲ့ အင်အားက အဖွဲ့တစ်ခုလုံးအတွက် ကောင်းလိမ့်မယ်။ "

ယန်ကျင်းဇီသည် ကျားဝမ်ဟန်ရှေ့တွင် ရေကို ချသည်။ ကျားဝမ်ဟန်က မသောက်ဘဲ ကျိုးဝမ်ရှိူ့ကိုသာ ဆက်တိုက်ဖျောင်းဖျနေသည်။

ယန်ကျင်းဇီ ပြောလိုက်သည် : " ဥက္ကာခဲက ဝမ်ရှိူ့ရဲ့ဟာလေ။ ဘာလို့ သူက မင်းကို ပေးရမှာလဲ? " ဒီလူက မျက်နှာထူတာပဲ!

ကျားဝမ်ဟန်က မျက်မှောင်ကြုတ်ပြီး ယန်ကျင်းဇီကို မကျေမနပ် စိုက်ကြည့်သည်။

ကျိုးဝမ်ရှိူ့က ပြောသည် : " စခန်းမှာ ရှိတဲ့ သုတေသီတွေ လေ့လာပြီးသွားပြီ။ ငါ့လက်ထဲက ဥက္ကာခဲက မီးစွမ်းအားရှင်တွေအတွက်ပဲ အမှန်တကယ် အသုံးဝင်တယ်။ မင်း ပြောတာကို ငါလည်း စဉ်းစားမိတယ်... အနာဂတ်မှာ ငါ စခန်းရဲ့ မီးစွမ်းအားရှင်တွေကို အပြင်ထွက်ပြီး အလုပ်ပိုလုပ်ဖို့ ခေါ်သွားမယ်။ "

ကျားဝမ်ဟန်၏မျက်နှာ အနည်းငယ် ပြောင်းလဲသွားသည် : " ကွင်းဆင်းမစ်ရှင်တွေ အကုန်လုံးကို ငါ လုပ်တာ မဟုတ်ဘူးလား? "

" အခု အခြေစိုက်စခန်းက တည်ငြိမ်နေပြီဆိုတော့ ငါ အခြေစိုက်စခန်းမှာ တစ်ချိန်လုံး နေဖို့ မလိုတော့ဘူး။ " ကျိုးဝမ်ရှိူ့က နောက်ဆုံးစကား ပြောလိုက်သည်။

တက္ကသိုလ်မြို့တော် အခြေစိုက်စခန်းကို ကျိုးဝမ်ရှိူ့သည် လူများကို ဦးဆောင်၍ တစ်ဆင့်ပြီးတစ်ဆင့် တည်ထောင်ခဲ့သည်။

ကမ္ဘာကြီး၏ အဆုံးသတ် ရောက်လာချိန်မှာတော့ လူတော်တော်များများက စွမ်းရည်များ ရှိကြသော်လည်း ဇွန်ဘီများနှင့် မတိုက်ဝံ့ကြချေ။ ထိုအချိန်တွင် သူသည် ထိုလူများကို ဇွန်ဘီများနှင့် တိုက်ခိုက်ရန် ခေါ်ဆောင်လာခဲ့သည်။

သို့သော် အခြေစိုက်စခန်းတွင် လူများ ပိုပိုများလာပြီး စခန်းတွင် ကိစ္စများ ပိုပိုများလာသောကြောင့် သူသည် ဇွန်ဘီသတ်ရန် အပြင်သိပ်မထွက်ဖြစ်တော့ပေ။ သို့သော် ယခု အ‌ခြေစိုက်စခန်းက လမ်းကြောင်းမှန်ပေါ် ရောက်နေပြီဟု သူ ခံစားရသဖြင့် သူ အပြင်ထွက်သင့်သည်ဟု တွေးမိသည်။

ကျားဝမ်ဟန်သည် ဥက္ကာခဲကို လိုချင်နေသေးသော်လည်း ကျိုးဝမ်ရှိူ့က သဘောမတူသောကြောင့် ဒေါသတကြီး ထွက်သွားသည်။

" ဝမ်ရှိူ့၊ သူ မင်းကို မကျေနပ်ဘူး။ " ယန်ကျင်းဇီ ပြောလိုက်သည်။ သူ၏ စိတ်ဝိညာဉ်စွမ်းအားက အလွန်သန်မာသောကြောင့် ဖြစ်နိုင်သည်၊ သူ့တွင် မကြာခဏ လျှို့ဝှက်ဆန်းကြယ်သော ခံစားချက်တချို့ ရှိတတ်သည်။ ဤအခံစားချက်မှာ ဆဋ္ဌမအာရုံနှင့် အလွန်ဆင်တူပြီး ယခုလေးတင် သူသည် ကျားဝမ်ဟန်ကို သဘောမကျဟု ရှင်းရှင်းလင်းလင်း ခံစားလိုက်ရသည်။

" ငါ သိတယ်။ " ကျိုးဝမ်ရှိူ့က ပြောသည်။ အခြေစိုက်စခန်းရှိ စွမ်းအားရှင်အချို့သည် အခြေစိုက်စခန်း၏ လက်ရှိစည်းမျဉ်းများနှင့် သတ်မှတ်ချက်များကို မကျေနပ်ကြဘဲ ၎င်းကိစ္စကို သူလည်း သိသည်။

ဥပမာအားဖြင့် ကျားဝမ်ဟန်သည် စွမ်းအားရှင်များအတွက် နေထိုင်ရာနေရာက သာမန်လူများနှင့် ‌ဝေးကွာခြင်း အစရှိသော အထူးအခွင့်အရေးများ ရှိသင့်သည်ဟု အမြဲတွေးနေသည်။ သာမန်လူများက သူတို့ကို စော်ကားလျှင် သူတို့က ရိုက်နှက်၍ ပညာပေးနိုင်သင့်သည်။ သူတို့က သူတို့၏ အခြေစိုက်စခန်းဟာ အလုပ်မလုပ်နိုင်သော လူများကို လူမှုထောက်ပံ့ရေးများ ပေးခြင်းဖြင့် ရိက္ခာများနှင့် ထောက်ပံ့ပစ္စည်းများကို ဖြုန်းတီးနေသည်ဟုလည်း ခံစားရသည်။

သို့သော် သူကတော့ ထိုသို့မထင်ပေ။

ဤသည်မှာ ကမ္ဘာပျက်ကပ် ဖြစ်ပြီး လူသားများက သေခြင်းရှင်ခြင်းကို ရင်ဆိုင်နေရသည်။ ဤအချိန်တွင် လူတိုင်းက တစ်ယောက်နှင့်တစ်ယောက် ကူညီပြီး အခက်အခဲများကို အတူတူ ကျော်လွှားသင့်သည်။

" ဝမ်ရှိူ့၊ မင်း လုပ်ချင်တာကိုပဲ လုပ်ပါ။ ငါ မင်းကို အမြဲတမ်း ထောက်ခံနေမယ်။ " ယန်ကျင်းဇီက ဆိုသည်။

ကျိုးဝမ်ရှိူ့၏ အကြံဥာဏ်များစွာသည် အနည်းငယ် ရိုးစင်းသော်လည်း သူသည် ၎င်းတို့ကို လေးစားသည်။

အားနည်းသူကို အနိုင်ကျင့်ဖို့ သန်မာသူ‌တွေကို အမှန်တကယ် လမ်းဖွင့်ပေးလိုက်ရင် အနာဂတ်မှာ ဒီကမ္ဘာက ဘယ်လိုဖြစ်သွားမလဲ?

" အင်း " ကျိုးဝမ်ရှိူ့ ခေါင်းညိတ်သည်။

ယန်ကျင်းဇီက ဆက်ပြောသည် : " ဝမ်ရှိူ့၊ မင်း အလုပ်လုပ်ဖို့ အပြင်ထွက်ရင် ငါလည်း အတူလိုက်ချင်တယ်! "

ယန်ကျင်းဇီသည် ဤအကြောင်းကို ယခင်က ပြောခဲ့ဖူးသည်။ သို့သော် ကျိုးဝမ်ရှိူ့သည် ၎င်းကို စဉ်းစားလိုက်ပြီးနောက် ယန်ကျင်းဇီက သူ့ကို ချွဲရန် ပြောခြင်းဖြစ်လောက်သည်ဟုသာ ခံစားရသဖြင့် ၎င်းကို အလေးအနက် မထားပေ။

ယခု မမျှော်လင့်ဘဲ ယန်ကျင်းဇီက ထပ်ပြောလာသည်။

ကျိုးဝမ်ရှိူ့ : " အပြင်မှာ အန္တရာယ်များတယ်။ နေရာတိုင်းမှာ ဇွန်ဘီတွေ ရှိပြီး ညစ်ပတ်နေတယ်... "

" ငါ သွားချင်တယ်။ " ယန်ကျင်းဇီက မလျှော့တမ်း ပြောသည် : " မင်း ငါ့ကို လိုက်ခွင့်မပေးရင် ငါ တစ်ယောက်တည်း သွားမယ်။ "

ကျိုးဝမ်ရှိူ့ : " ... " လူတွေ ပြောကြတဲ့ လက်တွဲဖော်ရဲ့ ဂျီကျမှု ဆိုတာကို သူ ကြုံတွေ့နေရတာလား?

" ဘာပဲဖြစ်ဖြစ် ငါ မင်းနောက်လိုက်မယ်။ " ယန်ကျင်းဇီက ထလာပြီး ချွဲချွဲနွဲ့နွဲ့ ပြောသည်။ : " ငါ့ကို သွားခွင့်ပေးပါ! "

ကျိုးဝမ်ရှိူ့ ကြက်သီးထသွားသည်။ ယန်ကျင်းဇီရဲ့ ဒီအကြည့်က ရှင်းရှင်းလင်းလင်း ဖော်ပြဖို့ ခက်တယ်! ဆန့်ကျင်ဘက်အားဖြင့် သူ တွေးနေသည်မှာ ၎င်းက... ‌အတော်ချစ်ဖို့ကောင်းသည် : " မင်း... ဘာလို့ မင်း... အရမ်းတွယ်ကပ်တာလဲ? "

ယန်ကျင်းဇီက မတွေးဘဲ ပြောသည်။ " ငါ မင်းကို ချစ်လို့ပေါ့။ "

ကျိုးဝမ်ရှိူ့ : " ... " မေ့လိုက်တော့၊ နောက်ထပ်လူတစ်ယောက် ခေါ်လာရန် အဆင်ပြေသည်။ သူသည် အသင်းကို ဦးဆောင်ခဲ့သည်မှာ မူလက အနီးအနားရှိ ဇွန်ဘီများကို ရှင်းထုတ်ရန်သာ ဖြစ်ပြီး အန္တရာယ်များသော တာဝန်များကို လုပ်ရန် မဟုတ်ချေ။

အခြေစိုက်စခန်းအများအပြားသည် ဇွန်ဘီများကို သတ်ရန် အပြင်ထွက်မည် မဟုတ်။ အများစုမှာ ထောက်ပံ့ရေးပစ္စည်းများကို ရှာဖွေသောအခါတွင် ဇွန်ဘီအချို့ကို သတ်ပစ်မည်ဖြစ်သည်။

သို့သော် တက္ကသိုလ်မြို့တော် အခြေစိုက်စခန်းကတော့ ကွဲပြားသည်။ တက္ကသိုလ်မြို့တော် အခြေစိုက်စခန်းသည် ဇွန်ဘီများကို သတ်ရန် လူအင်အားကို စုစည်းမည်ဖြစ်သည်။ အစပိုင်းတွင် အသက်ရှင်ကျန်ရစ်သူ အများအပြား ရှိနေစဉ် သူတို့သည် ရှင်သန်သူများကို ကယ်တင်ခြင်းအတွက်လည်း အထူးပြုမည်ဖြစ်၏။

ကျိုးဝမ်ရှိူ့ထံမှ အပြုသဘောဆောင်သော အဖြေကို ရရှိပြီးနောက် ယန်ကျင်းဇီသည် အလွန်ပျော်သွားသော်လည်း သူ၏ ရွံရှာဖွယ် အားနည်းသော ကြက်ပေါက်စွမ်းရည်ကို စဉ်းစားမိသောအခါ စိတ်ဓာတ်ကျသွားသည် : " ဝမ်ရှိူ့၊ ငါ အရမ်းအားနည်းတယ်လို့... မင်း ထင်လား? "

ကျိုးဝမ်ရှိူ့သည် ယန်ကျင်းဇီက အားနည်းလွန်းသည်ဟု တကယ် ခံစားမိပြီး ပိုမ်ုလေ့ကျင့်နိုင်ရန် ယန်ကျင်းဇီကို သူ အထူးတလည် ခေါ်သွားချင်သည်။

သို့သော် သူသည် ကမ္ဘာမပျက်ခင် အဆောင်မှ ယောက်ျားလေးများ စကားပြောနေကြသည်ကို ရုတ်တရက် သတိရသွားသည်။ သူတို့သည် ရည်းစားကောင်လေးတစ်ဦးအဖြစ် / အသက်ရှင်နေထိုင်ရန် လိုအင်ဆန္ဒ / အကြောင်း ပြောနေခဲ့ကြသည်။

ကျိုးဝမ်ရှိူ့ ပြောလိုက်သည် : " မဟုတ်ဘူး။ ငါ အားနည်းတဲ့ လူတွေကို ကြိုက်တယ်။ "

ယန်ကျင်းဇီ : " ... " ကောင်းပြီ...

ယန်ကျင်းဇီ၏ ယခင် နေ့လယ်ခင်း 'တစ်ရေးတစ်မော' ကုန်ဆုံးသွားသည်။ ဤအခိုက်အတန့်တွင် ကျိုးဝမ်ရှိူ့၏ အလုပ် ပြီးသွားကာ နှစ်ယောက်အတူ အိမ်ပြန်လာကြသည်။

ယန်ကျင်းဇီသည် သူ့အပိုင်းကို လုပ်ဆောင်ပြီး မီးဖိုချောင်ထဲသို့ ဝင်၍ ချက်ပြုတ်ကာ ကြက်ဥထမင်းကြော်ကို ပြုလုပ်နေသည်။

နေ့လယ်က ထမင်းအများကြီး ကျန်သေးတော့ ကြက်ဥထမင်းကြော် ကြော်တာက အလွယ်ဆုံးနဲ့ အဆင်ပြေဆုံးပဲ!

အစောက မီး‌ခိုးရောင်မြူခိုးများကို ဖယ်ရှားထားပြီးသား ထမင်းမှာ ယခုအခါ ခပ်ဖျော့ဖျော့ အမည်းရောင်မြူခိုးဖြင့် လွှမ်းနေသည်... ယန်ကျင်းဇီသည် ပြန်လည်သန့်စင်လိုက်ပြီး ကြက်ဥတချို့ကို မွှေကြော်လိုက်သည်။ သူသည် ယနေ့ ထောက်ပံ့အမှတ်များကို အသုံးပြု၍ အစိမ်းရောင် အသီးအရွက်များနှင့် လဲလှယ်ပြီး အစိမ်းရောင် အသီးအရွက်ဟင်းရည်တစ်ခွက်ကို ပြုလုပ်လိုက်၏။

ဟင်းရွက်အစိမ်းရောင် ဟင်းရည်ကို အနည်းငယ်ကြာကြာ ချက်လိုက်၍ အရောင်က ကြည့်မကောင်းချေ။ ကြက်ဥထမင်းကြော်ထဲမှ ကြက်ဥများမှာ အကုန်တူးနေသော်လည်း အရသာက... အံ့မခန်းပင်။

ကျိုးဝမ်ရှိူ့ အလွန်အကျွံ စားမိလိုက်ပြီး စားပြီးနောက် ဆန္ဒပြုလိုက်သည်။ " ငါ ပန်းကန်တွေ ဆေးလိုက်မယ်။ "

" ဘယ်ဖြစ်မလဲ? အခုချိန်မှာ ငါ့ကို ပျိုးထောင်ဖို့ မင်းကို အားကိုးနေရတယ်။ ဘယ်လိုလုပ် ငါ မင်းကို ပန်းကန်ဆေးခိုင်းနိုင်ပါ့မလဲ? ငါ လုပ်လိုက်မယ်! " ယန်ကျင်းဇီ အလျင်အမြန် ပြောသည်။ " မင်း အရင်ဆုံး ရေချိုးသင့်တယ်။ ဒါမှမဟုတ်... ငါတို့ ရေအတူချိုးဖို့ စောင့်ချင်လား? "

ကျိုးဝမ်ရှိူ့ : " ... ငါ အရင်ရေချိူးလိုက်မယ်။ "

ယန်ကျင်းဇီသည် ကျိုးဝမ်ရှိူ့ကို စိတ်ဓာတ်ကျသော အကြည့်ဖြင့် ကြည့်ကာ ပန်းကန်ဆေးရန် ထွက်သွားသည်။

ကျိုးဝမ်ရှိူ့ : " ... " ယန်ကျင်းဇီ အနည်းငယ် ဝမ်းနည်းသွားပုံပေါ်သည်။ ယန်ကျင်းဇီနဲ့ ရေအတူချိုးဖို့ သူ သဘောတူလိုက်သင့်တာလား?

တကယ်တော့ သူလည်း ရေအတူချိုးချင်သည်...

နေဦး၊ သူ ဘာတွေတွေးနေတာလဲ! ကျိုးဝမ်ရှိူ့သည် ရေချိုးခန်းထဲသို့ အမြန်ဝင်ကာ ရေအေးကို ဖွင့်လိုက်သည်။

မူလပိုင်ရှင်သည် ချက်ပြုတ်ခြင်းနှင့် ပန်းကန်များကို ဆေးကြောရန် ဆန္ဒမရှိသော်လည်း အိမ်မှုကိစ္စ ဆောင်ရွက်ခြင်းနှင့် ပတ်သက်၍ ပြဿနာတစ်စုံတစ်ရာရှိသည်ဟု ယန်ကျင်းဇီ မထင်ပါ။

သူသည် ကျိုးဝမ်ရှိူ့ကို မလုပ်စေချင်သောကြောင့် သူကိုယ်တိုင် လုပ်ရပေမည်။

သူ ပန်းက‌န်ဆေးပြီးချိန်တွင် ကျိုးဝမ်ရှိူ့သည် ရေချိုးပြီးပြီဖြစ်သည်။ ကံမကောင်းစွာဖြင့် သူက ထွက်လာသောအခါ လုံလုံခြုံခြုံ ဝတ်ဆင်ထားသည်...

ယန်ကျင်းဇီသည် စိတ်ပျက်လက်ပျက် သက်ပြင်းချလိုက်ပြီး အဝတ်အစား မယူဘဲ ရေချိုးခန်းထဲသို့ တန်းတန်းမတ်မတ် ဝင်သွားသည်။

ဒါကို သတိထားမိသော ကျိုးဝမ်ရှိူ့ : " !!! " သူသည် မူလက အခန်းထဲသို့ ပြန်သွားချင်ခဲ့သော်ငြား စဉ်းစားလိုက်ပြီးနောက် သူသည် ထွက်မသွားဘဲ ဧည့်ခန်းတွင် ထိုင်ရန် နေရာရှာလိုက်သည်။

ဒီအိပ်ခန်းနှစ်ခန်းနဲ့ ဧည့်ခန်းတစ်ခန်း ရှိတဲ့ အိမ်မှာ ရေချိုးခန်းတစ်ခန်းပဲ ရှိပြီး ဒီကနေဆို မြင်ရတယ်... အဟမ်း!

ကျိုးဝမ်ရှိူ့သည် ယန်ကျင်းဇီထံမှ စိတ်ကြွဆေး ကျွေးခံထားရခြင်း ဖြစ်လောက်သည်ဟု ခံစားမိသည်...

ယန်ကျင်းဇီသည် ရေချိုးခန်းထဲသို့ ဝင်ပြီး သူ့ကိုယ်သူ ကောင်းစွာ ဆေးကြောလိုက်သည်။

ဤနေရာတွင် ယခုလေးတင် ကျိုးဝမ်ရှိူ့ ရေချိုးခဲ့သည်ကို တွေးမိသောအခါ သူသည် အနည်းငယ် နှိုးဆွခံလိုက်ရသော်လည်း အဝတ်အစား ချွတ်ကာ ရေချိုး‌ပြီးနောက် ခံစားချက် ပျောက်ကွယ်သွားသည်။

မူလပိုင်ရှင်တွင် အလွန်ကောင်းမွန်သော အသားအရေနှင့် ကောင်းမွန်သော အရိုးတည်ဆောက်ပုံတို့ ရှိသဖြင့် အဝတ်အစားဝတ်သည့်အခါ အလွန်ကြည့်ကောင်းသည်။

သို့သော် အဝတ်အစားများ ချွတ်လိုက်သည်နှင့်...

အသားက နူးညံ့တယ်! ပြီးတော့ ဗိုက်လုံးလေး တစ်လုံးလည်း ရှိတယ်!

ကျိုးဝမ်ရှိူ့ ကြည့်ဖို့ ဒီပုံစံနဲ့ အပြင်ထွက်သွားရင် သူ နည်းနည်း သိက္ခာကျလောက်မလား?

မေ့လိုက်တော့၊ ကျိုးဝမ်ရှိူ့က သေချာပေါက် အပြင်ဘက်မှာ စောင့်ကြည့်နေမှာ မဟုတ်ဘူး... သူက အရမ်းတည်ကြည်လေးနက်သော ဥက္ကဌတစ်ဦး ဖြစ်သည်။

ယန်ကျင်းဇီသည် အနည်းငယ် စိတ်ပျက်လျက် ရေချိုး‌လိုက်သည်။ မှန်ရှေ့တွင် ရပ်လိုက်သောအခါ သူသည် ကောင်တာတွင် အသားအရေ ထိန်းသိမ်းသော ထုတ်ကုန်များ ပြည့်နေသည်ကို တွေ့လိုက်ရသည်။

ဤအသားအရေ ထိန်းသိမ်းသော ပစ္စည်းများ အားလုံးကို မူလပိုင်ရှင်က လဲလှယ်ထားခဲ့ပြီး နေ့စဉ်နေ့တိုင်း အသုံးပြုလိမ့်မည်ဖြစ်သည်...

မျက်နှာဖြူလေး ဖြစ်ရတာ မလွယ်ဘူး... ယန်ကျင်းဇီသည် မူလပိုင်ရှင်ကဲ့သို့ ပြင်ဆင်ရန် အချိန်မရှိသဖြင့် ခရင်မ်တစ်ဖတ်ကို တူးယူပြီး မျက်နှာပေါ်တွင် တင်လိုက်သည်။ သူသည် ခါးတွင် ရေချိုးပုဝါကို ပတ်ပြီး အပြင်ထွက်သွားသည်။

အပြင်ဘက်တွင် စောင့်နေသော ကျိုးဝမ်ရှိူ့နှင့် သူ မျက်နှာချင်းဆိုင် တွေ့လိုက်ရသည်။

ယန်ကျင်းဇီ : " ... "

ထိုညတွင် ယန်ကျင်းဇီသည် စိတ်ဝိညာဉ်စွမ်းအားကို မလေ့လာမီ ဝမ်းဗိုက်ပိုင်းဆိုင်ရာ လေ့ကျင့်ခန်း အများအပြားကို ပြုလုပ်ခဲ့သည်။ သေချာပေါက် ဒိုက်ထိုးခြင်း နှင့် ထိုင်ထခြင်းတို့လည်း ပါဝင်သည်။

သူသည် မောပန်းနွမ်းနယ်၍ ပြိုလဲသွားသည့်အခါမှသာ သူ၏ စိတ်ဝိညာဉ်စွမ်းအားကို စတင်လေ့လာသည်။

သူ အရမ်းပင်ပန်းနေပြီ... ယန်ကျင်းဇီ လေ့လာပြီး အမှတ်တမဲ့ အိပ်ပျော်သွားသည်။ သူ အိပ်ပျော်သွားသောအခါ သူက အလွန် နှစ်နှစ်ခြိုက်ခြိုက် အိပ်ပျော်သွားသည်။

တခြားအခန်းက ကျိုးဝမ်ရှိူ့ကတော့ သူ့လောက် အဆင်မပြေဘူး!

ကျိုးဝမ်ရှိူ့သည် ညလယ်တွင် အိပ်ရာထကာ အတွင်းခံဘောင်းဘီကို လျှော်ဖွပ်သည်။

ဘာဖြစ်နေမှန်း သူ မသိချေ။ သူ နွေဦးအိပ်မက် မက်ခဲ့သည်။

အဲ့ဒါတင်မကဘဲ သူ မက်ခဲ့တဲ့ နွေဦးအိပ်မက်က တကယ် ထူးဆန်းတယ်! ယန်ကျင်းဇီက သူ့ကို ဖိထားသည်ဟုပင် သူ အိပ်မက်မက်ခဲ့သည်...

အတွင်းခံကို လျှော်ပြီးနောက် ကျိုးဝမ်ရှိူ့သည် စိတ်တည်ငြိမ်စေရန် အပြင်ထွက်ပြီး ပြေးလိုက်သည်။ သူသည် အိမ်သယ်သွားရန် မနက်စာတချို့ကိုလည်း ဝယ်ယူလာသည်။ ထို့နောက် သူသည် ပြင်းထန်သော အချက်ပေးသံတစ်သံ ယန်ကျင်းဇီ၏ အခန်းထဲတွင် မြည်နေသည်ကို ကြားလိုက်ရသည်။ ခဏကြာပြီးနောက် ယန်ကျင်းဇီသည် နှိုးစက်ကို ပိတ်ကာ သမ်းဝေလျက် ထွက်လာသည်။ သူ ထွက်လာလာချင်း သူက ပြောသည် : " ဝမ်ရှိူ့၊ မနက်စာအတွက် ကျေးဇူးတင်ပါတယ်။ ငါ မင်းကို အရမ်းချစ်တယ်! "

ယန်ကျင်းဇီသည် ကျိုးဝမ်ရှိူ့အတွက် မနက်စာထဲမှ အညစ်အကြေးများကို ဖယ်ရှားပေးရင်း ပြောလိုက်သည်။

ကျိုးဝမ်ရှိူ့ ထပ်မံဖွင့်ပြောခံလိုက်ရပြီး သူ့နှလုံးသားက ပျားရည်ကဲ့သို့ ချိုမြိန်နေသည်။ သူ မနက်စာတစ်လုတ် စားလိုက်သောအခါ... ဘာလို့ ဒါက အရမ်း အရသာရှိနေသေးတာလဲ?

ကြည့်ရတာ သူ ယန်ကျင်းဇီနဲ့ အတူရှိနေသရွေ့ သူက အရသာရှိတာ ဘာမဆိုစားပြီး အရာရာကို တက်တက်ကြွကြွ လုပ်နေမှာလား?

ကျိုးဝမ်ရှိူ့တွင် အားအင်များ ပြည့်နေပြီး ယန်ကျင်းဇီကမူ... သူ မနေ့က အနည်းငယ် ဒိုက်ထိုးခဲ့သည်။ ယနေ့ သူ လက်ပင်မမြှောက်နိုင်ပေ...

ကျိုးဝမ်ရှိူ့သည် သူ လုပ်မည်ဟု ပြောသမျှကို အမြဲလုပ်တတ်သူ ဖြစ်သည်။ မြို့ပြင်တွင် ဇွန်ဘီများကို သတ်ရန်အတွက် အဖွဲ့တစ်ဖွဲ့ကို ဦးဆောင်ရန် ဆုံးဖြတ်ပြီးနောက် သူသည် ချက်ချင်း အဖွဲ့တစ်ဖွဲ့ကို ဖွဲ့စည်းခဲ့သည်။

ကူးပြောင်းပြီးနောက် စတုတ္ထနေ့တွင် ယန်ကျင်းဇီသည် ကျိုးဝမ်ရှိူ့ အထူးရှာဖွေထားသော အကာအကွယ်ဝတ်စုံကို ဝတ်ဆင်ပြီး mask တပ်၍ ကျိုးဝမ်ရှိူ့နှင့်အတူ ဇွန်ဘီသတ်ရန် မြို့ပြင်သို့ ထွက်လာသည်။

အပြင်ထွက်‌သောအခါ ယန်ကျင်းဇီသည် စားစရာအချို့ကို အထူးထုပ်ပိုးပြီး ယူလာခဲ့သည်။ သူသည် သူကိုယ်တိုင် သယ်သွားချင်သော်လည်း ကျိုးဝမ်ရှိူ့က အမြန်သယ်သွားသည်။

ကျိုးဝမ်ရှိူ့လည်း မတတ်နိုင်ပေ... ဤရက်ပိုင်းတွင် ယန်ကျင်းဇီသည် ‌ခြေလက်များ သိသိသာသာ အားနည်းနေပြီး ဘာဖြစ်နေလဲ သူ မသိချေ... သူသည် ယန်ကျင်းဇီကို ပစ္စည်းများ သယ်ခွင့်မပေးရဲပေ။

ညတိုင်း အဆက်မပြတ် လေ့ကျင့်ခန်းလုပ်ခြင်းသည် ခါးနာခြင်းနှင့် ခြေထောက်ကြွက်တက်ခြင်းတို့ကို ဖြစ်စေသည် : သူက တကယ် အရမ်း အသုံးမကျဘူး!

သို့သော် သူသည် အသုံးမကျသော်ငြား သူ၏ ရုပ်ပိုင်းဆိုင်ရာ ကြံ့ခိုင်မှု အနည်းငယ် ပိုကောင်းလာသည်ကို သူ၏ စိတ်ဝိညာဉ်စွမ်းအားမှတစ်ဆင့် တွေ့ရှိနိုင်ခဲ့သည်... သေချာသည်မှာ ဤသည်က သူ ယခုမှ စလုပ်သော လေ့ကျင့်ခန်းနှင့် ဘာမှမဆိုင်ချေ။ သူ ဤသို့ဖြစ်လာသည်မှာ စွမ်းအားရှင်တစ်ယောက် ဖြစ်လာသောကြောင့် ဖြစ်သည်။

သူက စီးကရက်တစ်လိပ်ကိုသာ မီးညှိနိုင်ရင်တောင်မှ သူက စွမ်းအားရှင် ဖြစ်နေဆဲပဲ!

ယန်ကျင်းဇီသည် မြို့ပြင်ထွက်မည့် အဖွဲ့၏ တွေ့ဆုံရာနေရာသို့ ကျိုးဝမ်ရှိူ့၏နောက်မှ ဝံ့ကြွားစွာ လိုက်ပါသွားသည်။

ထိုနေရာတွင် လူတချို့က စောင့်နေကြပြီဖြစ်သည်။ အစက ယန်ကျင်းဇီသည် အပြည့်အဝ ဖုံးအုပ်ထားသဖြင့် သူတို့သည် သူ့ကို မမှတ်မိကြပေ။ သို့သော် နောက်ပိုင်းတွင် ယန်ကျင်းဇီက သူ့ mask ကို ချွတ်ပြီး သူတို့ကို နှုတ်ဆက်လိုက်သည်။

ကျိုးဝမ်ရှိူ့နှင့် မြို့ပြင်ထွက်ရန် အဆင်သင့်ဖြ

စ်နေသူများ : " ....... " ဒီလူလည်း သွားမှာလား?!