Chapter 22

🦊Chapter 22

Arc 2 - လူမှားလက်ထပ်မိခြင်း

2.13

လူများက ရှုယုံယီအား သူ့အကောင့်တွင် တစ်ယောက်ပြီးတစ်ယောက် ရှုတ်ချနေကြသည်။ ရွှယ်လင်က ပွဲကိုဆက်ကြည့်ပြီး နောက်ထပ်ပြင်းထန်သောဗုံးတစ်လုံးကိုခပ်သာသာလေးပင် ပစ်ချလိုက်သည်။

ဝမ်ရှို့ယွမ်- ပိုင်လုဇီ က သူ့ကလေးတွေကို သူပြန်ကြည့်သင့်တယ်…ငါ့အစ်မက မင်းကို မကူညီဘူးဆိုပြီး ရူးကြောင်ကြောင်နဲ့ ကွန်ပလိန်းတက်မနေနဲ့အုံး …

(ရှုကျင်း နှင့် ပိုင်လုဇီ၏ DNA စစ်ဆေးမှု ဓာတ်ပုံ)

ယခုအချိန်တွင်လူတိုင်းက ယိုပေါက်များကိုဖြည့်စွက်ပြီးဒရာမာတစ်ခုလုံးကိုနားလည်နိုင်သည်။

(ကဖို့လာနေတဲ့ ပလာဇာအကသမားလေး - ဝိုး ဒီနှစ်ရဲ့ဒရာမာပဲ.. ဒါက သေရင်းရှင်ရေး မေတ္တာဇာတ်လမ်းလေးဖြစ်လာတာပဲ… ဘယ်လိုမာစတာဇာတ်ညွှန်းရေးသမားက ဒီလိုမျိုး "ကောင်းတဲ့ အရာတွေကို ယူပြီး အတုတွေနဲ့အစားထိုးမယ်"အမျိုးအစား ဇာတ်ကြောင်း ကိုရေးပြီးတီဗွီလိုင်းတွေမှာ လွှင့်ပြမှာလဲ….ဒါတော်တော်ဉာဏ်ကောင်းလွန်းတာပဲ…ဟားဟားဟားဟား…)

(ရေငန်ငါးလေး - သေချာစဉ်းစားကြည့်ရင် တကယ်လန့်စရာကြီး… ဒီလိုဆက်ဆံရေးမျိုးကိုရှင်းလင်းနိုင်တဲ့ အားကြီးတဲ့ ဆရာတစ်ဆူလောက်ရှိလား…

ရယ်လည်းရယ်မယ် တုတ်လည်းတုတ်မယ် - ဖရဲသီးစေ့တွေစားပြီး ရှေ့တန်းကနေထိုင်ကြည့်နေတယ်…)

(ရန်သူကိုဖျက်ဆီးမယ့်ဓားတစ်ချောင်း - ဇာတ်လမ်းအမှန်ကို သေချာမသိပဲ နေ့တိုင်းဝင်စစ်နေတဲ့ ပွဲကြည့်ပရိသတ်တွေ :3 …)

(အချစ်ဇာတ်လမ်းလေးအကြောင်းပြောမယ် - ဒါကမထိုက်တန်ဘူး…ဒါပေမယ့်ဒီရှုပ်ထွေးမှုကို သပ်သပ်ရပ်ရပ်ဖြစ်အောင်ကြိုးစားလိမ့်မယ်… ညီလေးဝမ်ရဲ့ စကားလုံးတွေနဲ့ သက်သေအထောက်အထာတွေအရ အစ်မဝမ်က နိုင်ငံကထွက်သွားတော့ လုံးဝဝမ်းနည်းကြေကွဲခဲ့တာလေ.. သားငယ်လေးက သူ့ရဲ့သားအစစ်မဟုတ်ဘူး…သူမရဲ့ ကလေးအစစ် ဘယ်ကိုရောက်သွားခဲ့လဲဆိုတာကို သူမလည်း မသိခဲ့ဘူးလေ.. မိဘနှစ်ဦးစလုံးသေဆုံးခဲ့တာလေ.. သူ့ ခင်ပွန်းမှာလည်း မယားငယ်ရှိခဲ့တာလေ… သူက အသစ်ရောက်ရလာတဲ့လူလည်း မဟုတ်ဘူး… သူမ မထွက်သွားနိုင်ရင် ဒေါသကြောင့် သေသွားမှာပဲစိုးရိမ်နေခဲ့တာ… အဲ့အပြင် DNA စစ်ဆေးမှုသုံးခုကို ဓာတ်ပုံပြင်တဲ့နေရာမှာ သွားစစ်ဆေးတာ…အဲ့ဒါတွေက အစစ်တွေဖြစ်ပြီး ဘာမှပြင်ထားတာ မရှိဘူး…အဲ့တော့ အားလုံးရှင်းရှင်းလင်းလင်းဖြစ်လာပြီ… သားငယ်လေးကဒီဇိုင်းပညာရှင် ပိုင့် ရဲ့ကလေးဖြစ်ပါတယ်…ဒီဇိုင်နာပိုင့် က သူဌေးရှု နဲ့ အချိန်အကြာကြီး အတူတူရှိနေခဲ့ပြီး အဲ့ဒါက သူတို့လက်ထပ်ထိမ်းမြားမှုမတိုင်မီလား နောက်ပိုင်းမှလား ဆိုတာတော့ မသေချာဘူး…အတိုချုပ်ပြောရရင် သားတစ်ယောက်တောင်မှမွေးဖွားလာတယ်…မစ္စတာ ရှု ရဲ့ ရှုပ်ထွေးပွေလီတဲ့ ကိစ္စတွေကိုလည်း အတည်ပြုထားတယ်…ဒါကြောင့်ညီလေးဝမ် က သူတို့ရဲ့ ပိုင်ဆိုင်မှုအားလုံးကိုယူဖို့ တောင်းဆိုမှုက မမှားဘူးလေ…)

(ဖြစ်တည်မှုနှင့်ပျက်ဆီးခြင်း - အရင်ကတင်ထားတဲ့စကားတွေကို မရှင်းဘူး ငါနည်းနည်းရှုပ်နေသေးတယ်) …

(မိုင်ဆယ်သောင်းကျော်ပျံသန်းမယ် - ရိုးရိုးရှင်းရှင်းပြောရရင် သူဌေးရှုက ဒီဇိုင်နာပိုင့် နဲ့ ဖောက်ပြန်ခဲ့တယ်လေ မင်းသားလေးရှုက သူတို့ရဲ့ကလေးပဲ… တခြားကိစ္စတွေအရဆို မစ္စတာဝမ်က အရာအားလုံးကိုတောင်းဆိုတာ တရားမျှတတယ်…)

လေ့လာနိုင်တယ် ဒါပေမယ့် စကားမပြောနိုင်ဘူး- အစောပိုင်းကတည်းက အဲ့လိုပြောလေ…ငါလည်းအကြာကြီးရှုပ်ထွေးနေမှာမဟုတ်ဘူး…ငါသဘောပေါက်သွားပါပြီ..သူဌေးရှုကလည်း အရမ်း သတ္တိရှိတယ်..အလိမ်အညာတွေကို မျက်တောင်မခတ်ပဲပြောနိုင်သေးတာနော်…

ရှုယုံယီသည် ရွှယ်လင်က သွေးသားဖြစ်ကြောင်းစစ်ဆေးချက်လုပ်ခဲ့သည်ကို မသိလိုက်ပေ။ သူက စိတ်လှုပ်ရှားကာ ထိတ်လန့်နေပြီး ရွှယ်လင်က သူ့အနားတွင် လူလွှတ်ထားခဲ့ခြင်းဖြစ်မည်ဟု တွေးနေမိသည်။

 သို့သော် ပိုင်လုဇီ၏ လုပ်ဆောင်ချက်က သူ့အား အသိစိတ်ပြန်ကပ်စေသည်။ သူ စိတ်သက်သာရာရသွားသည်။ သူ အတွေးလွန်နေပုံရပြီး ဝမ်ရှို့ယွမ်က သူ့အား သေစေချင်နေသည်ဟု အမြဲ ခံစားနေရသည်။

ဒီအသုံးမကျတဲ့မောင်နှမက ငါ့ကိုနောက်နေတာလား…

ရွှယ်လင် က တစ်ခုခုပိုစ့်တင်လိုက်ပြီးနောက် ပိုင်လုဇီက လည်း ထိုညမှာပင် တန်ပြန်ပိုစ့်တင်လိုက်သည်။ ၎င်းက အချက်အလက်ဟု ခေါ်ရုံမျှဖြစ်သော ရှူကျင်းနှင့် ဝမ်ရှို့ယွမ်တို့၏ DNA Test ပင်ဖြစ်သည်။ 

တရား၀င်အသိအမှတ်ပြုခြင်းမခံရသည့် ထိုကဲ့သို့သောအရာမျိုးကိုပင် ယုံကြည်နိုင်သည်ဟု ဆိုလျှင် ဝက်များလည်း သစ်ပင်ပေါ်တက်နိုင်သည် ဆိုသော စာသားနှင့်အတူ တွဲတင်ထားသည်။

အင်တာနက်အသုံးပြုသူများ နောက်တဖန်အံ့အားသင့်သွားကြသည်။ သူတို့က မည်သည့် ဘက်တွင် ရပ်တည်ရမည်ကို မသိကြတော့ပေ။ထို့ကြောင့်ရှေ့တန်းမှနေ၍ ဖရဲသီးစေ့များ စားဖို့သာ သူတို့ရွေးချယ်နိုင်တော့သည်။

🦊

 ရွှယ်လင်၏ တန်ပြန်တိုက်စစ်သည် လှလှပပ ပြီးမြောက်သွားခဲ့သည်။ သူသည် ပိုင်လုဇီ၏ မိုက်ခရိုဘလော့ဂ်ထံ မေးခွန်းတစ်ခုနှင့်အတူ အပြုံးမျက်နှာအီမိုတီကွန်ဖြင့် တွဲ၍ ရိုးရှင်းစွာပေးပို့ခဲ့သည်။

 "လွန်ခဲ့တဲ့နှစ်နှစ်အတွင်း ဝမ်မိသားစုအိမ်တော်ကြီးမှာ နေရတဲ့ဘဝက သက်တောင့်သက်သာရှိရဲ့လား" ၎င်းသည် သူ့တွင် ကစားရန် ကဒ်များရှိနေသေးသည်မှာ ထင်ရှားသည်။

 [မိုက်ခရိုဘလော့ဂ် ဆိုတာ Weibo ကိုပဲပြောတာပါ။ သူက မိုက်ခရိုဘလော့ဂ်လို့ရေးထားလို့ အဲလိုပဲရေးလိုက်ပါတယ်။ အီမိုတီကွန်ဆိုတာကလည်း emoji iconလေးတွေကိုပြောတာပါ။]

 အင်တာနက်သုံးစွဲသူများ... 'ဝမ်လေးရဲ့အပြုံးက အရမ်းကိုကောက်ကျစ်မဲ့ပုံပဲ။ ကြည့်ရတာ ဒီနေ့ညတော့ မအိပ်ရတော့ဘူးထင်တယ် - အားလုံး မိုးလင်းပေါက်အထိနေကြစို့'

ထို့နောက် ည ၁၁:၀၀ နာရီတွင် ရွှယ်လင်သည် ဗီဒီယိုဖိုင်ကို အမှန်တကယ် တင်ခဲ့သည်။ ဗီဒီယိုသည် စောင့်ကြည့်ကင်မရာဖြင့် ရိုက်ကူးထားပုံရသည်။ ရုပ်ပုံသည် အရမ်းကြီးမရှင်းလင်းသော်လည်း ၎င်းသည် ဆေးရုံ၏သီးသန့်လူနာခန်းဖြစ်ကြောင်း လူတိုင်း ရှင်းရှင်းလင်းလင်း မြင်နိုင်သည်။

 [ဝမ်ရှို့ယွမ် (v): ကောင်းကင်ဘုံက ဘုရားသခင်တွေက မင်းတို့ရဲ့လှုပ်ရှားမှုတိုင်းကို အမြဲစောင့်ကြည့်နေတယ်။ အသံသွင်းထားတာကို မင်း ဖျက်လိုက်ရုံနဲ့ ငါက ဘာမှရှာမတွေ့တော့ဘူးလို့ တကယ်ကြီး ထင်နေတာလား။ ဟားဟား။ <ရှုယုံယီ ခိုးကြောင်ခိုးဝှက် ကလေးချင်းလဲနေသည့် ဗီဒီယို>]

 ရှုယုံယီ၏ မွေးကင်းစကလေးများအား လဲလှယ်နေသည့် ဖြစ်စဉ်တစ်ခုလုံးကိုဖော်ပြရန် ဤဗီဒီယိုကလစ်ကို တည်းဖြတ်ထားသည်။ ဆေးရုံ၏သီးသန့်လူနာခန်းထဲသို့ ဝမ်ရှို့ထင် ဝင်လာသောအချိန်နှင့် ပိုင်လုဇီ ဝင်လာသောအချိန်ကိုတောင် စာတန်းထိုးကာ ဖော်ပြထားသည်။ ဆေးရုံတက်ရောက်ကြောင်း စာရွက်စာတမ်းနှင့် ဆေးရုံ၏ဆေးမှတ်တမ်းများ အားလုံးပင် ရှိနေပြီး အရာအားလုံးကို ရှင်းရှင်းလင်းလင်း မြင်နိုင်စေရန် ဖော်ပြထားသည်။ ရှုယုံယီသည် နှစ်ယောက်သား တစ်ယောက်နှင့်တစ်ယောက် အလွန်နီးကပ်သော အခန်းများတွင် နေရစေရန် ရည်ရွယ်ချက်ရှိရှိ စီစဉ်ခဲ့သည်။ ပိုင်လုဇီ ကလေးမွေးပြီးနောက် ဝမ်ရှို့ထင်လည်း မွေးဖွားခဲ့သည်။ ဝမ်ရှို့ထင် မီးဖွားပြီးနောက် မောပန်းနွမ်းနယ်စွာ အိပ်ပျော်သွားချိန်တွင် ရှုယုံယီသည် သူနာပြုများကို ထွက်သွားခိုင်းခဲ့သည်။ ထို့နောက် အခန်းနှစ်ခန်းရှိ ကလေးငယ်များကို လဲလှယ်ကာ သူတို့၏ မှတ်ပုံတင်ကဒ်ပြားများကိုပင် ပြောင်းလဲခဲ့သည်။

 ဆရာဝန်များနှင့် သူနာပြုများကို လစာပေး၍ အလုပ်ထုတ်ပစ်ခြင်းနှင့် စောင့်ကြည့်ဗီဒီယိုများအား ဖျက်ဆီးခြင်းအပါအဝင် သူတို့၏လုပ်ဆောင်မှုများအားလုံးကို ဤဗီဒီယိုကလစ်ထဲတွင် ထည့်သွင်းဖော်ပြထားသည်။ ယခုအချိန်တွင် အရာအားလုံးကို ငြင်းဆန်လို့မရနိုင်တော့ပေ။

 အသေးစိတ်အချက်အလက်များကို ဖော်ပြထားသည့် ဤဗီဒီယို ထွက်လာသည်နှင့် တပြိုင်နက် ရှုယုံယီနှင့် ပိုင်လုဇီတို့သည် ငုတ်တုတ်မေ့သွားကြသည်။ 

(အင်တာနက်သုံးစွဲသူများ.. 'ဟားဟားဟား၊ ဝမ်သခင်ငယ်လေးမှာ ဒီလိုဝှက်ဖဲမျိုး ရှိလိမ့်မယ်လို့ မင်းတို့ မမျှော်လင့်ထားဘူးဆိုတာ ငါ လောင်းရဲတယ်။ အခုရော ဒီဗီဒီယိုကို အတုလုပ်ထားတယ်ဆိုပြီး မင်းတို့ စွပ်စွဲအုံးမှာလား။ ပုံက နည်းနည်းတော့ ဝါးနေတယ်ဆိုပေမယ့် မင်း ကိုယ့်ကိုကိုယ် ပြန်မမှတ်မိတာတော့ မဖြစ်နိုင်ဘူး၊ ဟုတ်တယ်မလား သူဌေးရှု'

 ဒါမှမဟုတ် မင်း ပြန်မမှတ်မိရဲတာလား...)

 မည်သည့် တရားစီရင်ချက်ကိုမှ မချမီယခုနှစ်၏ စိတ်ဝင်စားစရာကောင်းသော သတင်းကို ဖြေရှင်းရန် နှစ်ရက်လောက် စောင့်ဖို့လိုသေးသည်။ ဤအခြေအနေ၏ ပြောင်းပြန်ဖြစ်သွားမှုသည် အလွန်ရုတ်တရက်ဆန်လှသည်။ အဖြူအမည်း လုံးဝပြောင်းသွားခြင်းကြောင့် အင်တာနက်အသုံးပြုသူများသည် သူဌေးရှုအား အလွန်စက်ဆုပ်ဖွယ်ကောင်းကြောင်း ဖော်ပြခဲ့ကြသည်။

 ထိုကဲ့သို့တမင်လှည့်စားပြီး အနက်ရောင်ကို အဖြူရောင်ဖြစ်အောင် စွမ်းဆောင်နိုင်မှုတို့ကြောင့် ရှုယုံယီသည် ဝမ်မိသားစု၏ပိုင်ဆိုင်မှုများအတွက် ဝမ်မိသားစုကို လှည့်စားပြီး ဝမ်အုပ်စုမှ ရှုအုပ်စုဟု နာမည်ပြောင်းနိုင်ခြင်းသည် အံ့သြစရာတော့ မဟုတ်ပေ။ ပွဲကြည့်ပရိသတ်ထိုင်ခုံတွင် ဖရဲသီးအစေ့များကိုစားသုံးနေသော အင်တာနက်သုံးစွဲသူများသည် ဆက်ကြည့်နေရုံသာ တတ်နိုင်ကြသည်။

 [ဖရဲသီးသတင်းဆိုပြီး ကြားဖူးကြမှာပါ။ အတင်းအဖျင်းသတင်းကို ဆိုလိုတာပါ။ ဒီမှာတော့ အတင်းအဖျင်းကို စိတ်ဝင်စားသူတွေပေါ့]

  ဤအချိန်တွင် အခကြေးငွေပေးထားသော လူအုပ်စုပင်လျှင် အခြေအနေကို မကယ်တင်နိုင်တော့ပေ။ ရှုယုံယီသည် လုံးဝကို အံအားသင့်လွန်း၍ စကားမပြောနိုင်ဖြစ်သွားပြီး ပိုင်လုဇီသည်လည် ဒေါသတကြီးဖြင့် အံကြိနေရသည်။

 ရွှယ်လင်သည် ဗီဒီယိုကို တင်ပြီးနောက် အိပ်ရာဝင်ရန် ပြင်ဆင်ကာ ချက်ချင်း အိပ်ယာဝင်လိုက်သည်။ သူ တင်လိုက်သော ဗီဒီယိုကြောင့် တစ်ညလုံး အိပ်မပျော်သည့် အခြားလူနှစ်ယောက်ကိုတော့ သတိထားမိပုံမရပေ။ သူတို့သည် ကူကယ်ရာမဲ့ခြင်းမှ ရုန်းထွက်ရန် နောက်ဆုံး မိုက်ရူးရဲဆန်သောလုပ်ရပ်ကို မပြုလုပ်မီ ခါးခါးသီးသီး အချိန်အကြာကြီး တွေးတောနေခဲ့ကြသည်။

 "အရာအားလုံးက ဒီအခြေအနေထိတောင် ရောက်လာပြီ။ ကျွန်မတို့မှာ ဒါပဲ အားကိုးစရာရှိတော့တယ်" ပိုင်လုဇီ၏မျက်နှာသည် အေးစက်နေပြီး ပုံမှန်အတိုင်းရှိနေသည့် လှပမှုနှင့်နူးညံ့သိမ်မွေ့မှုတို့သည် လုံးဝပျောက်ကွယ်သွားခဲ့သည်။ သူမ၏မျက်လုံးများသည် ယုတ်မာမှုများနှင့် ပြည့်နှက်နေသည်။

 "ဘာလဲ"

"ကွာရှင်းချင်တဲ့သူ့ရဲ့ဆန္ဒကို ဖြည့်ဆည်းပေးလိုက်၊ အဲဒါကပဲ ရှင့်ရဲ့ ပိုင်ဆိုင်မှုအားလုံးကို သူ လုံးဝ ယူမသွားနိုင်အောင် လုပ်နိုင်မယ်။ ကျွန်မတို့ သူ့ကို ပိုက်ဆံပိုပေးပြီး လျော်ကြေးပေးလို့ရတယ်၊ ဒါပေမယ့် ရှုအုပ်စုကိုတော့ သူ့ဆီ သေချာပေါက် အပါမခံနိုင်ဘူး" 

ပိုင်လုဇီသည် ဒေါသများအပြည့်နှင့် ဆိုဖာပေါ်သို့ ထိုင်ချလိုက်သည်။

 "ဆုံးရှုံးမှုကို လုံးဝ လျော့နည်းသွားအောင် ကျွန်မတို့ ပိုက်ဆံသုံးရင်တောင်မှ ဒီကိစ္စက ကျွန်မတို့ရဲ့ ဂုဏ်သိက္ခာကို ထိခိုက်သွားပြီးပြီ။ အခုကျွန်မတို့မှာ အားကိုးနိုင်တဲ့ တစ်ခုတည်းသောအရာက ရှုအုပ်စုပဲ။ ဒီကိစ္စကြောင့် အကျိုးသက်ရောက်မှု ရှိလာမှာဖြစ်ပေမဲ့ ဘယ်လိုပဲဖြစ်ဖြစ် ကြီးမားတဲ့ပူးပေါင်းဆောင်ရွက်မှု ရှိနေသေးတယ်။ ရှင့်ရဲ့ကိုယ်ရေးကိုယ်တာကိစ္စကြောင့်နဲ့တော့ လူတွေက ကျွန်မတို့နဲ့ လက်တွဲဖြုတ်မှာမဟုတ်ဘူး။ ကျွန်မတို့သာ အစုရှယ်ယာတွေကို ထိန်းချုပ်ထားနိုင်ပြီး ကုမ္ပဏီတည်ရှိနေသရွေ့ ကျွန်မတို့ အစကနေ ပြန်စလို့ရတယ်"

ရှုယုံယီ ခဏလောက်စဉ်းစားပြီး ခေါင်းညိတ်ကာ ပြောလိုက်သည်။ 

"ဒါက ပြဿနာမဟုတ်ဘူး။ အဲ့ဒီအချိန်တုန်းက အဲဒီခွေးမသားဝမ်ရှို့ယွမ်ရဲ့ လက်ထဲမှာရှိတဲ့ ရှယ်ယာတွေအတွက် ပိုက်ဆံပေးခဲ့ရတယ်။ သူ့မှာ အဲဒီရှယ်ယာတွေကို ပြန်ရနိုင်မယ့် နည်းလမ်းမရှိဘူး"

"ဟုတ်တယ်..."

 လေထုသည် ရုတ်တရက် သိပ်သည်းလေးလံလာပြီး နှစ်ယောက်စလုံး သက်ပြင်းချလိုက်ကြသည်။ သူတို့သည် အမြဲတမ်း ခြေတစ်လှမ်း နောက်ကျကျန်နေခဲ့သည်ကိုတော့ ဘယ်တုန်းကမှ မသိခဲ့ကြပေ။ သူတို့ ထိုကိစ္စကို ကောင်းကောင်း ဖုံးကွယ်ထားပြီးဖြစ်သည်မှာ ထင်ရှားသော်လည်း.....

 ဒီကမ္ဘာမြေပေါ်က ဘယ်သူကများ ဝမ်ရှို့ယွမ်ကို သတင်းပေးလိုက်တာလဲ...

 မိုဘိုင်းလ်ဖုန်းနှင့် ကွန်ပြူတာဖန်သားပြင်များသည် အလင်းရောင်အနည်းငယ်နှင့်အတူ ညအချိန်ထိ တောက်ပနေခဲ့သည်။ ယနေ့ညတွင် ထွက်ရှိခဲ့သော အရှုပ်တော်ပုံသတင်းကြောင့် မူလက စိတ်ဝင်စားစရာမကောင်းသော အကြောင်းအရာသည် အလွန်စိတ်လှုပ်ရှားလာစေသည်။ အင်တာနက်သုံးစွဲသူ ပရိသတ်အများအပြားသည် အဆိုပါပွဲကို ကြည့်ရှုရန် ထိုလူသုံးဦး၏ Weibo အကောင့်သို့ တစ်ဖန်ပြန်လည်ဝင်ရောက်လာခဲ့ကြပြီး ထင်ကြေးပေးမှုနှင့်နောက်ပြောင်မှုများ တဖြည်းဖြည်း စုပုံများပြားလာခဲ့သည်။

  မူလက ရွှယ်လင်အား ရည်ရွယ်ခဲ့သည့် ရက်စက်ကြမ်းကြုတ်သော စော်ကားပြောဆိုမှုသည် ယခုအခါ ရှုယုံယီနှင့် ပိုင်လုဇီ၏ မိုက်ခရိုဘလော့ဂ်များဆီသို့ ဦးတည်နေပြီဖြစ်သည်။ နောက်ဆုံး ထိုချွန်ထက်သောဓားသည် သူတို့အား ချိန်ရွယ်လာလိမ့်မည်ဟု သူတို့နှစ်ဦးစလုံး ထင်မထားခဲ့ရုံသာမက အရာအားလုံးသည် သူတို့ ယုံကြည်ထားသလို ရိုးရှင်းလိမ့်မည်မဟုတ်ကြောင်းကိုလည်း သူတို့ မသိခဲ့ကြပေ။

 ခေတ်သစ်လူ့အဖွဲ့အစည်းသည် ချမ်းသာကြွယ်ဝသူများသာ ပကတိလုံးဝ အသာစီးရနိုင်သော ကမ္ဘာမဟုတ်တော့ပေ။ အွန်လိုင်းတွင် သူတို့အား ဒေါသတကြီး စော်ကားပြောဆိုမှုများသည် သူတို့အပေါ် မည်သည့်အကျိုးသက်ရောက်မှုမှ ရှိမည်မဟုတ်ဟု ထင်မြင်ခဲ့ကြသည်။ သူတို့သည် ဝမ်ရှို့ယွမ်နှင့် သဘောတူညီမှု ရရှိအောင်လုပ်နိုင်သရွေ့ အွန်လိုင်းပေါ်တွင် သူတို့၏ပြင်းပြင်းထန်ထန်ဝေဖန်မှုများကို ဖယ်ရှားပစ်နိုင်ပြီး ဤမုန်တိုင်းကို ငြိမ်သက်သွားအောင် လုပ်နိုင်စွမ်းရှိသည်ဟု ယုံကြည်ထားကြသည်။

သို့သော် ကံမကောင်းစွာပင် ရွှယ်လင်တွင် အကူစနစ်တစ်ခုရှိပြီး အင်တာနက်သည် သူ့အတွက် လုံးလုံးလျားလျား အသုံးချစရာတစ်ခုသာဖြစ်သည်။ ထို့အပြင် ရွှယ်လင်သည် လူထု၏အမြင်များကို အနားပေးရန် ရည်ရွယ်ချက်မရှိပေ။

ရှုယုံယီသည် ရွှယ်လင်နှင့် စကားပြောချင်သော်လည်း တစ်ဖက်လူသည် သူ့ကိုတွေ့ရန် ရည်ရွယ်ချက်မရှိပုံရသည်။ တရားရုံးမှ ဆင့်ခေါ်စာကို လက်ခံရရှိချိန်တွင် ဝမ်ရှို့ယွမ်သည် သူ့အား အနှောင့်အယှက်ပေးရန်အတွက်သာ ပြန်လာခဲ့ခြင်းဖြစ်ကြောင်း နောက်ဆုံး၌ ရှုယုံယီ လုံးဝသေချာ နားလည်သွားခဲ့သည်။

ဝမ်ရှို့ယွမ်တွင် ငြိမ်းချမ်းရေးဆွေးနွေးရန် ရည်ရွယ်ချက် လုံးဝမရှိပေ။ ရွှယ်လင်၏ ယခင်က လုပ်ဆောင်မှုများအားလုံးသည် သူ့အပေါ်လှည့်စားရန်အလို့ငှာ လုပ်ဆောင်ခဲ့ခြင်းသာဖြစ်သည်။

တစ်ဖက်လူ၏ရည်ရွယ်ချက်ကို ရှင်းရှင်းလင်းလင်း သိခဲ့လျှင်တောင် သူနှင့်ပိုင်လုဇီတို့သည် တခြားရွေးချယ်စရာများ မရှိတော့ပေ။ သူတို့သည် ရှေ့နေတစ်ဦးသာ ရှာပြီး သူ၏ပိုင်ဆိုင်မှုအားလုံးကို လွှဲပြောင်းပေးခြင်းသည် ကျိုးကြောင်းဆီလျော်မှုမရှိသော တောင်းဆိုမှုဖြစ်ကြောင်း အယူခံဝင်ပြီး တောင်းဆိုနိုင်လိမ့်မည်ဟု မျှော်လင့်ခဲ့ကြသည်။

အရာအားလုံး ဝမ်ရှို့ထင်အား လွှဲပြောင်းပေးရန်အတွက် အခြေခံတရားဥပဒေမရှိခြင်းကြောင့် ပြဿနာမဖြစ်နိုင်ကြောင်းနှင့် ကျိုးကြောင်းဆီလျော်မှုမရှိသော တောင်းဆိုချက်အဖြစ် အယူခံဝင်၍ရနိုင်ကြောင်း ရှေ့နေက ပြောခဲ့သည်။ 

တကယ်တမ်းဆိုရလျှင် သူ၏အိမ်ထောင်သည်ဘဝအတွင်း ရှုယုံယီ ဖောက်ပြန်ခဲ့ကြောင်း ဝမ်ရှို့ထင် သက်သေပြနိုင်ခဲ့လျှင်တောင်မှ နောက်ဆုံးရလဒ်အနေဖြင့် ရှုယုံယီသည် သူ့နာမည်အောက်တွင် ဘာမှမချန်ထားခဲ့လျှင် အဓိကပိုင်ဆိုင်မှုအများစုကိုသာ ဝမ်ရှို့ထင် ရရှိသင့်သည်။(ရှိသမျှအကုန်ပေးစရာမလိုဘူး)

 ထိုကဲ့သို့ အတည်ပြုချက်ကို ရရှိပြီးနောက် ရှုယုံယီနှင့် ပိုင်လုဇီတို့သည် အနည်းငယ် ပို၍စိတ်ချသွားရသည်။

 ကိုးလ်၏ ကြားဝင်စွက်ဖက်မှုကြောင့် မူလက သုံးလကြာမြင့်ရမည့် အဆိုတင်သွင်းမှုကာလသည် တိုတောင်းသွားပြီး ကွာရှင်းမှုလုပ်ငန်းစဉ်သည် တစ်လခွဲအကြာတွင် စတင်ခဲ့သည်။ ရှေ့နေပြောခဲ့သည့်အတိုင်း ရှုယုံယီသည် အရာအားလုံးကို မဆုံးရှုံးခဲ့ပေ။ သူ၏အိမ်ခြံမြေနှင့် ဝမ်မော့၏အုပ်ထိန်းမှု အားလုံးကို ဝမ်ရှို့ထင်အား ပေးခဲ့ရသည်။

 ဝမ်ရှို့ယွမ်သည် ရှုအုပ်စုကို စိတ်ဝင်စားပုံမရပေ၊ သူ ရနိုင်သမျှ အကုန်ယူကာ ရှုယုံယီအား လွှတ်ထားပေးခဲ့သည်။ ၎င်းသည် ရှုယုံယီ၏ဦးရေပြားကို ထုံကျင်သွားစေပြီး မမျှော်လင့်ထားသည့်အရာတစ်ခု ဖြစ်လာလိမ့်မည်ဟု အမြဲခံစားရစေသည်...

ဖြစ်ပေါ်လာသောကိစ္စများက သူ၏ထင်ကြေးသည် မှန်ကန်နေကြောင်း သက်သေပြပေးခဲ့သည်။ အမှုစစ်ဆေးပြီးနောက် ဝမ်ရှို့ယွမ်သည် သေတမ်းစာကို အတုပြုလုပ်ထားကြောင်း ဖော်ပြထားသည့် အထောက်အထားနှင့်အတူ စာတစ်စောင်ကို Weibo တွင် ထုတ်ပြန်ခဲ့သည်။

ရှုယုံယီသည် တုန်လှုပ်သွားပြီး ချွေးစေးများပင် ထွက်လာလေသည်။

 ဝမ်ရှို့ယွမ်၏မိဘများ မတော်တဆမှုတစ်ခုဖြစ်ခဲ့ချိန်တွင် သူတို့သည် သေတမ်းစာ ချန်မထားခဲ့ပေ၊ ရှုယုံယီသည် အစားထိုးတစ်ခုကို အတုလုပ်ခဲ့သည်။ သူသည် ခြေရာလက်ရာများကို ရှင်းပြီးပြီဟု ထင်ထားခဲ့သော်လည်း ဝမ်ရှို့ယွမ်သည် တနည်းနည်းနှင့် ရှာတွေ့ခဲ့သည်။ မမျှော်လင့်ထားစွာပင် သေးငယ်သောအမှားတချို့ကို ရှာဖွေပြီး ကွန်ရက်ပေါ်သို့ တိုက်ရိုက်တင်ခဲ့သည်။

 [ဝမ်ရှို့ယွမ် (v): ငါ့မိဘတွေက သေတမ်းစာကို မထားခဲ့ဘူး။ ရှုယုံယီက သေတမ်းစာတစ်ခုကို အတုလုပ်ပြီး ငါ့အစ်မနဲ့ ငါတို့ရဲ့ ပိုင်ဆိုင်မှုတွေကို လုယူသွားခဲ့တယ်။ သူက ဒီမိသားစုထဲကို လက်ထပ်ပြီး ဝင်လာတဲ့ လူ့အမှိုက်တစ်ယောက်သာမဟုတ်ဘူး၊ လက်ရှိဥပဒေအရ သားမက်က ယောက္ခမရဲ့အမွေကို ဆက်ခံပိုင်ခွင့်မရှိဘူး]