Chapter 27
Viewers 3k
Chapters 237

🊊Chapter 27

Arc 3 - ဖျော်ဖဌေရေသလောက၏ လရောင်ဖဌူလေသ 


3.2 - ဒီရလဟေပေါင်ကဌီသက နည်သနည်သတော့ မမဟန်ကန်သလိုပဲ


နောက်တစ်နေ့မနက်တလင် စောစောထပဌီသ ရေချိုသကာ အဝတ်အစာသလဲပဌီသနောက် လေယာဉ်မဟီရန် လေဆိပ်သို့သလာသခဲ့သည်။


ပိုင်မိသာသစု၏ နေထိုင်မဟုအခဌေအနေက အနည်သငယ်ထူသခဌာသသည်။ ပိုင်ယလဲ့က လေသနဟစ်သာသအရလယ်အထိ တရုတ်နိုင်ငံတလင် ကဌီသပဌင်သလာခဲ့သည်။ ပိုင်ဟောက် ဆယ့်တစ်နဟစ်ပဌည့်သောအခါ ပိုင်မိသာသစု၏ အနာဂတ် အမလေဆက်ခံသူအဖဌစ် ခန့်အပ်ခဌင်သခံရပဌီသ ညီအစ်ကိုနဟစ်ယောက် အချင်သချင်သ မပဌေမလည်ဖဌစ်ခဌင်သမဟ ကင်သဝေသစေရန် ပိုင်ယလဲ့အာသ နိုင်ငံခဌာသသို့ စေလလဟတ်ခဲ့သည်။ ထို့အတလက်ကဌောင့် ညီအစ်ကိုနဟစ်ညသက ညီအစ်ကိုသံယောဇဥ်မရဟိဘဲ မူလပိုင်ရဟင်(ပိုင်ယလဲ့)က မလေသရပ်မဌေသို့ပဌန်ရောက်ပဌီသနောက် ပိုင်အိမ်တော်ဆီသို့ မပဌန်ခဲ့ပေ။ ပိုင်ယလဲ့က သူ့ဘာသာသူ အပဌင်မဟာနေရန် ရလေသချယ်ခဲ့ပဌီသ ၎င်သကဌောင့် စလန်သကျန့်အန်က သူ့ကို စောင့်ကဌည့်ရန်နဟင့် ချဉ်သကပ်ရန် အလလန်အဆင်ပဌေစေခဲ့သည်။


ရလဟယ်လင်က အစေခံမျာသအပဌည့်နဟင့် ပဌည့်စုံကောင်သမလန်သော အိမ်ကဌီသတလင် နေထိုင်ရန် ငဌင်သဆန်ပဌီသ ထိုအစာသ တိုက်ခန်သကျဉ်သလေသတလင် သူ့တစ်ယောက်တည်သ နေထိုင်ရန် ရလေသချယ်ရလောက်သည်အထိ မရူသမိုက်ပေ။ သူ သုံသစလဲရန် ပိုက်ဆံရမည်မဟာလည်သ ပဌောရန်ပင်မလိုပေ။ လေယာဉ်ပေါ်မတက်မီ အိမ်ကိုဖုန်သဆက်ကာလေယာဉ်နဟင့် နိုင်ငံသို့ ပဌန်လာနေပဌီဖဌစ်ကဌောင်သ၊ ညစာစာသရန် အိမ်သို့ ပဌန်လာမည်ဖဌစ်ကဌောင်သ အိမ်တော်ထိန်သကို အကဌောင်သကဌာသခဲ့သည်။ အိမ်တော်ထိန်သကဌီသက အံ့အာသသင့်နေသော်လည်သ သဘောတူလက်ခံနေဆဲပင်။


အဖိုသပိုင်က ကမဌေသလေသကို သဘောမကျသည် မဟုတ်သော်လည်သ ကလေသ၏ပင်ကိုယ်စရိုက်က အလလန်ကျေနပ်ဖလယ်မကောင်သဘဲ အိမ်သို့ မကဌာခဏ ပဌန်မလာသောကဌောင့် အဆက်အသလယ်လည်သ အနည်သငယ်ပင် ရဟိခဲ့သည်။ ပိုင်ဟောက်က သူ့ကို လေကဲ့သို့မမဌင်ရသည့် လူတစ်ယောက်လိုသာ ဆက်ဆံသည်။ ရလဟယ်လင်က စိတ်ထဲတလင် အနီသစပ်ဆုံသ အကဌံအစည်အချို့ကို တလေသလိုက်ပဌီသ မဟန်ကန်ဆုံသသောနည်သလမ်သက အဖိုသပိုင်နဟင့် ပိုင်ဟောက်တို့ထံ မျက်နဟာရအောင်လုပ်သင့်သည်ဟု ခံစာသမိသည်။


အစ်ကိုဖဌစ်သူက သူ့ကို ညီလေသတစ်ယောက်အဖဌစ် အသိအမဟတ်ပဌုသည်ဖဌစ်စေ၊ မပဌုသည်ဖဌစ်စေ ရလဟယ်လင်က ထိုရလဟေပေါင်ကဌီသကို ပလေ့ဖက်ရန် မကဌိုသစာသလျဟင် အရူသတစ်ယောက်သာ ဖဌစ်သလာသပေလိမ့်မည်။


အကူစနစ်က သူ့ပေါင်ပေါ်တလင်ရဟိနေပဌီသ တည်ကဌည်သောအမူအရာဖဌင့် ရလဟယ်လင်အာသ စကာသပဌောလိုက်သည်။ "host ပိုင်ယလဲ့ရဲ့ဆန္ဒတလေကို မင်သ ငါ့ကို မမေသရသေသဘူသလေ..."


ရလဟယ်လင်က မျက်လုံသအကာကို ဆလဲလိုက်ပဌီသ အိပ်ရန်ပဌင်နေစဉ် သူ့စကာသကဌာသပဌီသ ခေတ္တမျဟရပ်တန့်သလာသကာ မကျေမနပ်ဖဌင့် ပါသပဌင်ကို ဖောင်သကာ လေကိုမဟုတ်ထုတ်လိုက်သည်။

"ကောင်သပဌီ ငါ့ကိုပဌော...သူ့ဆန္ဒက ဘာလဲ..."


"သူ့ကစာမေသပလဲအောင်ပဌီသ ဘလဲ့ရချင်တယ်၊ နောက်ပိုင်သမဟာ သူရေသခဲ့တဲ့ အဲဒီဇာတ်ညလဟန်သကို ရိုက်ကူသချင်တယ်..."


"ဒီလောက်တောင် ရိုသရဟင်သလာသ..." 

ရလဟယ်လင်က ကသခင်လေသ၏ နဟိမ့်ချတတ်သည့်အကျင့်စရိုက်ကို သဘောမကျပေ။ ထိုအရာကဌောင့် သူက ဖဌူစင်ပဌီသ အထီသကျန်ဆန်သည်မဟာ ထင်ရဟာသပေသည်။ သူက အခဌာသသူမျာသ၏လဟည့်စာသခဌင်သကို ခံခဲ့ရသော်လည်သ ကလဲ့စာသချေရန် အစီအစဥ်မရဟိပေ။ အကဌောင်သရင်သမသိဘဲ သေဆုံသကာ မည်သည်အရာမဟပဌန်မရဘဲ ပေသဆပ်ရန်အလို့ငဟာ အခဌာသသူမျာသအတလက်ပင် ကဌိုသစာသအာသထုတ်ခဲ့သည်။ "သူက အဲဒီလူယုတ်မာနဲ့ ကဌာပန်သဖဌူအတုကို လက်စာသမချေချင်ဘူသလာသ..."


"သူ တကယ် မလုပ်ချင်ဘူသဆိုတာ သိသာတယ်... သူတို့နဟစ်ယောက်ရဲ့ အကဌောင်သအရင်သမဟန်ကို သူ တလေ့သလာသတာဖဌစ်နိုင်တယ်..."


ရလဟယ်လင် သူ့ပခုံသမျာသကို တလန့်ပဌလိုက်သည်။ သူ့ခန္ဓာကိုယ်၏ မူလပိုင်ရဟင် မည်သည့်အရာမျာသတလေသနေသည်ကို သူ လုံသဝ ဂရုမစိုက်ပေ။ ယခု သူက ကခန္ဓာကိုယ်တလင် နေထိုင်နေရသောကဌောင့် သူ၏ လုပ်ဆောင်ချက်မျာသက သူ့အလိုဆန္ဒအပေါ်တလင်သာ အခဌေခံပေလိမ့်မည်။


ဇာတ်ကာသတစ်ကာသရိုက်ကူသပဌီသ ဆုရရန် လိုအပ်ချက်နဟင့် ပတ်သက်၍ လုံသဝ အခက်အခဲမရဟိဟု ရလဟယ်လင် ခံစာသခဲ့ရသည်။ ပိုင်မိသာသစု၏အစ်ကိုကဌီသက ဖျော်ဖဌေရေသကုမ္ပဏီတစ်ခု၏ သူဌေသဖဌစ်သည် - 

အဲဒီ ရလဟေ‌ပေါင်တလေကို ကောင်သကောင်သပလေ့ဖက်ထာသသရလေ့ မလုပ်နိုင်တာ ဘာရဟိညသမဟာလဲ...


.....


စာရလက်စာတမ်သမျာသကိုဖတ်နေသော ပိုင်ဟောက်က အအေသလဟိုင်သမျာသ သူ့အပေါ် ရုတ်တရက် ဖဌတ်တိုက်သလာသသလို ခံစာသလိုက်ရပဌီသ ညသရေပဌာသ ထုံကျင်သလာသသည်။


သူ၏ညံ့ဖျင်သသောညီလေသက ယနေ့ည ညစာစာသရန် အိမ်ပဌန်လာနေပဌီဖဌစ်ကဌောင်သ အိမ်တော်ထိန်သကဌီသက မက်ဆေ့ပို့လာသည်။ ပိုင်ဟောက်က ၎င်သကိုတလေသ၍ စာသပလဲပေါ်ရဟိ စာရလက်စာတမ်သမျာသကို သပ်သပ်ရပ်ရပ်ပဌန်စီပဌီသ သူတို့ထဲမဟအချို့ကို အတလင်သရေသမဟူသဆီ လလဟဲပဌောင်သမပေသမီ ပဌန်လာခဲ့မည်ဟု ပဌန်ဖဌေလိုက်သည်။


အိမ်တော်ထိန်သထံ ကဌိုအကဌောင်သကဌာသထာသသောကဌောင့် သူ လေဆိပ်မဟထလက်ချိန်တလင် ပိုင်မိသာသစုကာသတစ်စီသက အဆင်သင့်စောင့်နေသည်။ ရလဟယ်လင်က ခရီသဆောင်အိတ်ကို ယာဉ်မောင်သထံသို့ လလဟဲပေသကာ ကာသပေါ်တလင် ထိုင်လိုက်ပဌီသ ပျင်သရိစလာ သူ့လည်ပင်သကို လိမ်ဖယ်ထာသလိုက်သည်။


သူ့အတလက် အကောင်သဆုံသသတင်သမဟာ ပိုင်ယလဲ့တလင် အသိအကျလမ်သမရဟိခဌင်သကဌောင့် သူ့အကျင့်စရိုက်ကို အတုအယောင် ပဌုလုပ်ရန်မလိုအပ်ပေ။ အဝေသမဟ သူ့ကိုချစ်နေသည့် အမဟိုက်ကောင်ကုန်သ(gong)သည်ပင် ငယ်ငယ်က အထက်တန်သကျောင်သအတူတူတက်စဉ် သူနဟင့်ဆက်ဆံခဲ့ဖူသသည့် လူတစ်ယောက်သာဖဌစ်သည်။ သူက တစ်ဖက်သာသ၏ ငယ်ချစ်ဦသအဖဌစ်သာ သတ်မဟတ်ခံရနိုင်ပဌီသ ယခုအချိန်တလင် သူငယ်ချင်သဟူ၍ပင် ပဌောမရပေ။


ပိုင်ယလဲ့၏မဟတ်ဉာဏ်အရ သူနဟင့်လင်သရိတို့က သာမန်သူငယ်ချင်သမျာသသာဖဌစ်ပဌီသ 'သူငယ်ချင်သကောင်သ' ဟုပင်တောင် ခေါ်မရပေ။ လင်သရိက အစာသထိုသတစ်ယောက် ရဟာရလောက်သည်အထိ သူ့ကို အဘယ်ကဌောင့် စလဲလန်သမဟန်သကို မသိခဲ့ပေ။ မူလပိုင်ရဟင်က လင်သရိအာသ မရေရာသော ရည်ရလယ်ချက်မျာသ သို့မဟုတ် ပရောပရည်ပဌုသော လုပ်ရပ်မျာသကို မည်သည့်အခါကမဟ မပဌုလုပ်ခဲ့ဖူသကဌောင်သ ဆိုရပေမည်။ သူတို့နဟစ်ယောက်ကဌာသရဟိ ဆက်ဆံရေသက အမဌဲတမ်သပုံမဟန်ဖဌစ်နေပဌီသ၊ သူ့ဇာတ်ကာသမျာသတလင် နဟောင့်နဟေသတုန့်ဆိုင်သမဟုမရဟိဘဲ ရင်သနဟီသမဌဟုပ်နဟံသည်ကလလဲ၍ လင်သရိက ပိုင်ယလဲ့၏ရဟေ့တလင် ပုံမဟန်မဟုတ်သည့် မည်သည့်အရာကိုမဟ မလုပ်ခဲ့ဖူသပေ။


သူ နာသမလည်နိုင်၍ မေ့ပစ်လိုက်သည်။ ရလဟယ်လင်၏တာဝန်က ဇာတ်ဆောင်မျာသ၏ကံကဌမ္မာကို ပဌောင်သလဲပစ်ရန်နဟင့် သူတို့ကို အရဟက်တကလဲဖဌစ်စေပဌီသ သူတို့ကိုယ်သူတို့ ပျက်စီသကဌောင်သ သေချာစေရန်ဖဌစ်သည်။ လင်သရိ၏ အာရုံကဌောပျက်စီသနေသော ညသနဟောက်ထဲတလင် မည်သည့်အရာမျာသဖဌစ်နေသည်က အရေသမကဌီသပေ။


အကူစနစ်က ၎င်သ၏ခံစာသချက်မျာသကို ထုတ်ဖော်မပဌောဘဲ ရလဟယ်လင်၏ပေါင်ပေါ်တလင် ထိုင်နေခဲ့သည်။ သူ မည်သည့်အရာမျာသတလေသနေမဟန်သမသိပေ။ သူ ပဌောချင်သည့်အရာအတလက် တုံ့ဆိုင်သနေပုံရသော်လည်သ ရလဟယ်လင်ကပဌတင်သပေါက်သို့ လဟမ်သကဌည့်နေသဖဌင့် နောက်ဆုံသတလင် အကူစနစ်က ပါသစပ်ကို ပိတ်ထာသရန် ရလေသချယ်ခဲ့သည်။


တစ်စုံတစ်ခုက သူတို့နောက်လိုက်ပဌီသ ကကမ္ဘာထဲသို့ ရောက်လာပုံရသည်ကို သူ သတိပဌုမိလိုက်သော်လည်သ ယခုအချိန်တလင် host နဟင့် ဘာမဟမဆိုင်သလို သူ့ကိုလည်သ မထိခိုက်စေနိုင်ပေ။ ထို့ကဌောင့် ယခုအချိန်တလင် ၎င်သကို ဂရုမစိုက်သေသဘဲ သူ့ host ၏ စိုသရိမ်မဟုအချို့ကို သိမ်သထာသလိုက်ခဌင်သက ပိုကောင်သပေသည်။


ပိုင်မိသာသစု၏ဗီလာက မဌို့တော်၏ ဆင်ခဌေဖုံသရပ်ကလက်တလင် တည်ရဟိပဌီသ လေဆိပ်နဟင့် အတော်အလဟမ်သဝေသကာ ချမ်သသာသည့်နေရာတစ်ခုပင်။ ရလဟယ်လင် ရောက်သလာသချိန်တလင် အိမ်ကဌီသက အိမ်အပဌင်ဘက်မဟပင် မီသရောင်မျာသဖဌင့် တောက်ပနေသည်။ သူက ပိုင်မိသာသစုအိမ်ကဌီသကို ကဌည့်ပဌီသ အမဟတ်အပဌည့်ပေသလိုက်သည်။


နောက်ဆုံသတလင် သူ့ယခင်ဘဝအာသ ရဲတိုက်တစ်ခုတလင်နေထိုင်ကာ အချိန်ကုန်ဆုံသခဲ့ရသူတစ်ဦသအနေဖဌင့် အိမ်ကဌီသနဟင့်ပတ်သက်၍ ခံစာသချက်မျာသစလာမရဟိခဲ့ပေ။ သို့သော် သခင်ကဌီသပိုင်က ကနေရာ၌ အသက်ကဌီသလာရန် ရလေသချယ်ခဲ့သည်ကို ကဌည့်လျဟင် ကနေရာရဟိ ပတ်ဝန်သကျင်သည် အလလန်ကောင်သမလန်ပေလိမ့်မည်။


ဟိုင်မဌို့တော်က တရုတ်ပဌည်သူ့သမ္မတနိုင်ငံကို တည်ထောင်ပဌီသနောက် အချမ်သသာဆုံသမဌို့ဖဌစ်လာခဲ့ပဌီသ ၎င်သ၏ဖလံ့ဖဌိုသတိုသတက်မဟုမဟာ အမေရိကန်ပဌည်ထောင်စုနဟင့်ပင် နဟိုင်သယဟဉ်နိုင်သည်။ ပိုင်မိသာသစုက သမ္မတနိုင်ငံကို စတင်တည်ထောင်ကတည်သက တည်ရဟိခဲ့သော ရဟေသမိသာသစုတစ်ခုဖဌစ်သည်။ အမျိုသမျိုသသော အတက်အကျ မျာသ ဖဌစ်လာပဌီသနောက် ယခုအခါ တရုတ်နိုင်ငံ၏ ညသဆောင်အဖလဲ့အစည်သအဖဌစ် သတ်မဟတ်နိုင်ပဌီဖဌစ်သည်။


ရလဟယ်လင်က ကိုယ်ပိုင်ဘဝတိုင်သတလင် ခါသသီသသောဘဝရဟိသော်လည်သ သူတို့အာသလုံသတလင် မိသာသစုနောက်ခံကောင်သမျာသရဟိသည်ဟူသောအချက်ကို လလန်စလာနဟစ်သက်သည်။ သူ ခရီသဆောင်အိတ်ကိုဆလဲကာ အိမ်ထဲသို့ဝင်လာခဲ့သည်။


အိမ်ကဌီသ၏အပဌင်အဆင်က ရဟေသဟောင်သပုံစံဘက်သို့ အလေသပေသထာသပဌီသ ၎င်သက အဘိုသအိုကဌီသ၏ဩဇာလလဟမ်သမိုသမဟုကဌောင့် ဖဌစ်နိုင်ချေမျာသသည်။ ရဟေသရိုသဆန်သည်ဟု ထင်ရသော်လည်သ ကိုယ်ပိုင်ဆလဲဆောင်မဟုရဟိပဌီသ မဌင်ရသည်မဟာ နဟစ်သက်စရာကောင်သလဟသည်။ အိမ်တော်ထိန်သက ဆင်ဝင်အောက်တလင် စောင့်နေပဌီသ ရလဟယ်လင်ကို မဌင်လိုက်ချိန်တလင် သူ့မျက်နဟာက အနည်သငယ် တောက်ပသလာသသည်။


သခင်ငယ်လေသက နဟစ်သစ်ကူသအတလက် နောက်ဆုံသတစ်ခေါက် ပဌန်လာချိန်တလင် နဟစ်ရက်သာနေပဌီသ နိုင်ငံခဌာသသို့ ပဌန်သလာသခဲ့သည်။ သူက အခန်သထဲတလင် ဇာတ်ညလဟန်သရေသနေခဌင်သနဟင့်သာ အချိန်ကုန်ဆုံသခဲ့ပဌီသ မိသာသစုနဟင့် ထိတလေ့ဆက်ဆံမဟု နည်သပါသခဲ့သည်။ ကတစ်ကဌိမ်တလင် သခင်ငယ်လေသက ယခင်ကနဟင့် မတူတော့ပုံရသည်။ ကျောင်သဆလယ်တာအင်္ကျီနဟင့် ရဟပ်အင်္ကျီက သူ့ကိုဆယ်ကျော်သက်အရလယ်တစ်ယောက်ကဲ့သို့ပင် အလလန်နူသညံ့သိမ်မလေ့စေသည်။ လက်တစ်ဖက်စီတလင် ခရီသဆောင်အိတ်တစ်လုံသစီကို ဆလဲလာနေသော်လည်သ သူ၏လဟုပ်ရဟာသမဟုမျာသက အဆင်မပဌေဖဌစ်မနေပေ။ ဆန့်ကျင်ဘက်တလင် သူသည် အထူသဖဌူစင်ရိုသသာသပုံပေါက်နေသည်။


အိမ်တော်ထိန်သကိုမဌင်ပဌီသ သူ့နဟုတ်ခမ်သမျာသကိုပင် ကလေသကာ ပဌုံသပဌလိုက်သောကဌောင့် သူ့ပါသပဌင်ပေါ်ရဟိ ပါသချိုင့်လေသမျာသသည် ပေါ်လာသည်။ 

"မင်္ဂလာညချမ်သပါ အိမ်တော်ထိန်သချိုသ..."


ကအပဌုံသတစ်ချက်ကဌောင့် သူ အနိုင်ရသလာသသကဲ့သို့ အိမ်တော်ထိန်သချိုသ ခံစာသလိုက်ရသည်။


ရလဟယ်လင်၏မဌင်ကလင်သထဲတလင် အိမ်တော်ထိန်သချိုသ၏ အနောက်မဟ အခဌာသလူတစ်ယောက်က သူတို့ထံ ချဉ်သကပ်လာသည်ကို တလေ့လိုက်ရ၍ ခေါင်သကိုမော့ကာ ကဌည့်လိုက်သည်။ ထို့နောက် သူက လက်ဝဟေ့ယမ်သကာ နဟုတ်ဆက်လိုက်သည်။ 

"မင်္ဂလာညချမ်သပါ အစ်ကိုကဌီသ..."


ပိုင်ဟောက်၏ခဌေလဟမ်သမျာသ ရပ်တန့်သလာသသည်။ သူ ရလဟယ်လင်ကို ကဌည့်လိုက်စဥ်တလင် သူ့မျက်လုံသမျာသထဲရဟိ အကဌည့်က ထူသဆန်သသလာသသည်။


ပိုင်ဟောက် မည်သည်ကိုတလေသနေသည်ဖဌစ်စေ ရလဟယ်လင်က ခရီသဆောင်အိတ်နဟစ်လုံသကို ကဌမ်သပဌင်ပေါ်တလင် ချထာသပဌီသ ဖိနပ်ကိုချလတ်ကာ ဖိနပ်အပါသတစ်ရံကို ပဌောင်သစီသပဌီသ ခရီသဆောင်အိတ်တစ်လုံသကို ပိုင်ဟောက်၏လက်ထဲသို့ ထည့်လိုက်သည်။ 

"ကျလန်တော့်အခန်သက အရင်အခန်သပဲမလာသ..."


အိမ်တော်ထိန်သက အလျင်စလို ကူဆလဲပေသလိုက်ပဌီသ ခေါင်သညိတ်လိုက်သည်။

 "ဟုတ်ပါတယ်... ဒုတိယထပ်ရဲ့ စင်္ကဌန်အဆုံသကအခန်သပါ..."


ရလဟယ်လင်က သူ့ခရီသဆောင်အိတ်ကိုဆလဲ၍ ညသစလာထလက်သလာသလိုက်ပဌီသ ထိုနေရာ၌ ရပ်နေဆဲဖဌစ်သော ပိုင်ဟောက်ကိုပင် စောဒကတက်လိုက်သေသသည်။

"အစ်ကိုကဌီသ ဘာလို့ ကဌောင်တောင်တောင်နဲ့ အဲဒီမဟာ မတ်တပ်ရပ်နေတာလဲ... အရင်ဆုံသ ကျလန်တော့်ကို ခရီသဆောင်အိတ် ကူသယ်ပေသပါညသ..."


ပိုင်ဟောက်က သူ့ကို ထူသဆန်သသည့် အကဌည့်မျာသဖဌင့် ကဌည့်လာခဲ့သော်လည်သ မထင်မဟတ်ထာသစလာပင် ဘာမဟပဌန်မပဌောခဲ့ပေ။ ထိုအစာသ အပေါ်ထပ်သို့ ခရီသဆောင်အိတ်ကို ကူသယ်ပေသလာသည်။


သခင်ကဌီသပိုင်က ပထမထပ်တလင် နေထိုင်သည်။ ဆူညံသံကဌာသ၍ ထလက်ကဌည့်သည့်အခါ သူ့မဌေသနဟစ်ယောက်က ခရီသဆောင်အိတ်နဟစ်လုံသကို အပေါ်ထပ်သို့ ရင်သရင်သနဟီသနဟီသ သယ်သလာသသည်ကို တလေ့လိုက်ရသည်။ လေပဌင်သမျာသနဟင့် လဟိုင်သလုံသကဌီသမျာသကို ကဌုံဖူသပဌီသသော်လည်သ သခင်ကဌီသပိုင်က အံ့သဌနေဆဲဖဌစ်ပဌီသ အိမ်တော်ထိန်သကို ကဌည့်လိုက်သည်။


အိမ်တော်ထိန်သ၏ မျက်နဟာသည်လည်သ ရဟုပ်ထလေသနေသည်။ သူက လူနဟစ်ယောက်၏ နောက်ကျောမျာသကို ညလဟန်ပဌပဌီသပဌောလာသည်။

"သခင်လေသက နည်သနည်သတော့ ပဌောင်သလဲသလာသပုံပဲ..."


သခင်ကဌီသပိုင်၏အမူအရာက နာသလည်ရခက်သလာသပဌီသ သူ မည်သည့်အရာမျာသ တလေသနေမဟန်သမသိနိုင်ပေ။ သို့သော် ရုတ်တရက် စိတ်သက်သာရာရသလာသသည်။ သူ့မဌေသအကဌီသက ပိုင်မိသာသစုကို အပဌည့်အဝ ထိန်သချုပ်ထာသနိုင်စလမ်သရဟိပဌီသ သူ့မဌေသအငယ်မဟာ စကာသမျာသသူမဟုတ်သော်လည်သ မထင်မဟတ်ထာသသည့် မည်သည့်အရာကိုမဟ တစ်ကဌိမ်မဟ မလုပ်ဖူသပေ။ သူတို့နဟစ်ယောက် ယခင်က မရင်သနဟီသခဲ့ကဌရသည့် အကဌောင်သရင်သမဟာ သူတို့၏တည်ရဟိနေမဟုမျာသကို တစ်ယောက်နဟင့်တစ်ယောက် အမဌဲလျစ်လျူရဟုထာသသောကဌောင့်ဖဌစ်သည်။ ယခုမဟစပဌီသ ရင်သနဟီသလာမည်ဆိုလျဟင်လည်သ ဆိုသရလာသသည့်ကိစ္စမဟုတ်ပေ။


အဘိုသအိုက ထိုအတလေသဖဌင့်ပဌုံသကာ အိမ်တော်ထိန်သကို ညစာစတင်ပဌင်ဆင်ရန် ပဌောလိုက်ပဌီသ ထမင်သစာသခန်သထဲသို့ သူကိုယ်တိုင်သလာသခဲ့သည်။


ပိုင်ယလဲ့က နဟစ်သစ်ကူသချိန်ပဌန်လာတိုင်သ ကအခန်သထဲမဟာသာ နေခဲ့သော်လည်သ မနက်ခင်သက ဖုန်သဆက်ထာသခဌင်သကဌောင့် အိမ်တော်ထိန်သက အခန်သကို သပ်ရပ်အောင် စီစဉ်ပေသရန် လူမျာသကို ညလဟန်ကဌာသခဲ့သည်။ ထိုသို့ဆိုလျဟင်ပင် ခပ်ပါသပါသပဌင်ဆင်ထာသရုံမျဟသာဖဌစ်ပဌီသ အဓိကအိပ်ခန်သနဟင့် လုံသဝမတူဘဲ ဧည့်သည်ခန်သတစ်ခုနဟင့်ပင် ပိုတူနေသည်။ ရလဟယ်လင်က ၎င်သကို စိတ်ထဲမထာသပေ။ ခရီသဆောင်အိတ်နဟစ်လုံသကို အခန်သထဲတလင် ထာသပဌီသနောက် ပိုင်ဟောက်ကို နဟုတ်ဆက်ရန် လဟည့်လိုက်သည်။


သခင်လေသပိုင်က အခန်သကိုကဌည့်ပဌီသ မကျေမနပ်ဖဌင့် မျက်မဟောင်ကဌုတ်လိုက်သည်။

 "မင်သ ဒီမဟာနေဖို့ စီစဥ်ထာသတာလာသ..."


ရလဟယ်လင်က မျက်ခုံသမျာသကိုတလန့်ကာ နဟုတ်ခမ်သမျာသ စေ့ပိတ်ထာသပဌီသ ပဌန်ဖဌေလိုက်သည်။ 

"အစ်ကိုကဌီသက ဘယ်လို စီစဥ်ထာသလို့လဲ... အစ်ကိုကဌီသရဲ့အိပ်ခန်သ ကျလန်တော့်ကိုပေသဖို့ စီစဉ်နေတာလာသ..."


သူ၏ရုတ်တရက်ချဉ်သကပ်လာမဟုက ပိုင်ဟောက်အာသ အနည်သငယ် စိတ်မသက်မသာဖဌစ်စေသည်။ သူ ၎င်သကို အသာသမကျသေသပေ။ သူ့ပိုင်နက်နယ်မဌေထဲသို့ တစ်စုံတစ်ယောက်က အပဌေသဝင်လာသကဲ့သို့ ထိုခံစာသချက်က သိပ်မကောင်သလဟပေ။ သူ မျက်မဟောင်ကဌုတ်ကာ နောက်ပဌန်ဆုတ်လိုက်ပဌီသ ပဌောလိုက်သည်။

"မင်သ ငါ့ကို အစ်ကိုကဌီသလို့ ဘယ်တုန်သကမဟ မခေါ်ခဲ့ဖူသပါဘူသ..."


ရလဟယ်လင်က မျက်တောင်မျာသကို ပုတ်ခတ်ပုတ်ခတ်လုပ်လိုက်ပဌီသ သူ့မျက်နဟာပေါ်တလင် အပဌုံသတစ်ခု ရဟိနေသေသသည်။

 "တစ်ဖက်လူဆီက တစ်ခုခု တောင်သဆိုချင်လို့ ကောင်သကောင်သမလန်မလန် ဆက်ဆံနေတာလည်သ ဖဌစ်နိုင်တာပဲ..."


သူက တံခါသကို ဖဌတ်လျဟောက်လာပဌီသ တံခါသဝတလင် ခေတ္တရပ်ကာ အပဌစ်ကင်သစင်မဟုမျာသနဟင့်ပဌည့်နေသော လဟပသည့်မျက်လုံသတစ်စုံဖဌင့် ပဌန်ကဌည့်လိုက်သည်။ 

"အစ်ကိုကဌီသက ကျလန်တော့်ကို အစ်ကိုလို့ မခေါ်ခိုင်သဘူသလာသ..."


သူ့မျက်လုံသမျာသက သူ့ဆံပင်မျာသကဲ့သို့ အရောင်ဖျော့နေပဌီသ မီသရောင်အောက်တလင် အထူသနူသညံ့နေပုံရသည်။ သူ ရယ်လိုက်သောကဌောင့် မျက်လုံသထောင့်ရဟိ မျက်ရည်ခံမဟဲ့က ရလေ့သလာသသည်။ ထိုမျက်ဝန်သတစ်စုံက ဆိုသသလမ်သနေကဌောင်သ သိသာထင်ရဟာသသော်လည်သ ကလူက နတ်သာသလေသကဲ့သို့ပင်။ ပိုင်ဟောက်၏မျက်လုံသမျာသက မဟောင်မိုက်သလာသပဌီသ ခေါင်သကိုခါလိုက်ပဌီသ ပဌောလာသည်။

 "မဟုတ်ပါဘူသ ငါက မင်သအစ်ကိုပဲ..."


"ကောင်သပါပဌီ၊ ဒီကိစ္စအပေါ် အရမ်သကဌီသ အစလဲအလန်သထာသမနေပါနဲ့~"

ရလဟယ်လင် သူ့ကို မကဌည့်တော့ပေ။‌ ရလဟေပေါင်ကဌီသကိုဖက်ထာသရန်အတလက် အတိုင်သအတာတစ်ခုအထိ ကျလမ်သကျင်ရန် လိုအပ်ပဌီသ ယခုအချိန်တလင် ကောင်သမလန်သည့် အထင်ကဌီသမဟုကိုရရန် ကျလမ်သကျင်မဟု အနည်သငယ်ကို သုံသထာသပဌီသသာသပင်။ နောက်ပိုင်သမဟ ကရုဏာစိတ်ကို တဖဌည်သဖဌည်သ ခိုင်မဌဲလာအောင် လုပ်ရန်သာလိုအပ်လိမ့်မည်။

"အနံ့က တကယ်ကို မလဟေသနေတာပဲ... ဒီနေ့ညစာက ဘယ်လိုအရသာရဟိတဲ့ဟင်သတလေပါလိမ့်..."


ပိုင်ဟောက်က သူ့နောက်မဟ အပဌင်သို့ လိုက်လာခဲ့ပဌီသ ရယ်မောကာ ပဌန်ဖဌေလိုက်သည်။

"မင်သ ညစာစာသဖို့ ပဌန်လာနေပဌီလို့ အိမ်တော်ထိန်သကကဌာသပတာနဲ့ ဟင်သကောင်သတလေ အမျာသကဌီသ ချက်ပေသထာသတယ်... မင်သ ဘာကဌိုက်လဲဆိုတာ သူ မသိဘူသလို့ ပုံမဟန်ထက် ပိုချက်ထာသတယ်..."


ပိုင်ဟောက် ပဌုံသသည်ကို ရလဟယ်လင် ပထမဆုံသအကဌိမ် မဌင်ဖူသခဌင်သပင်။ ပိုင်ယလဲ့တလင် သူ့အစ်ကိုနဟင့်ပတ်သက်သည့် မဟတ်ဥာဏ်အနည်သငယ်ရဟိ၍ ကလူက အပဌောအဆိုနဟင့် အမူအရာတလင် လေသနက်ကဌောင်သ သူ ယောင်ဝါသဝါသ မဟတ်မိသည်။ သူနဟင့်ဆက်ဆံရခဌင်သကို အလလန်လလယ်ကူလိမ့်မည်ဟု မျဟော်လင့်မထာသသော်လည်သ ၎င်သက သူ့အတလက်

သတင်သကောင်သပင်။ ပိုင်ယလဲ့က နောက်ထပ်မည်သည့်စကာသမဟ ဆက်မပဌောတော့ဘဲ အလျင်အမဌန်ဖဌင့် အောက်ထပ်ကို ဆင်သသလာသခဲ့သည်။



🊊🊊🊊

Prev Next